ကျွမ်းကျင်စားဖိုမှူးစနစ် အပိုင်း(၄၇)
“ဟင်းပွဲအသစ်တွေ အများကြီး ရှိတာပဲ။ ခေါက်ဆွဲစွပ်ပြုတ်ကိုလည်း စားကြည့်ချင်တယ်။ ပြီးတော့ အထူးပွဲဆိုတာက ဘာတွေလဲ” ယင်ယာ မေးမြန်းသည်။
“မင်း အော်ဒါမှာကြည့်ရင် သိလိမ့်မယ်။ စမ်းစားကြည့်ချင်လား” ယွမ်ကျိုးက အလှလေးများကို အမြဲတမ်း စိတ်ရှည်သည်းခံစွာဖြင့် ရှင်းပြတတ်သည်။ ထို့ကြောင့်လည်း အပိုစကားလေးများဖြင့် ထည့်ပြောလိုက်သေးသည်။
“ဟေ့ အလှလေး။ သူ့လှည့်ဖြားတာကို မခံနဲ့။ အထူးပွဲ(၁၃)က ဘလူးဘယ်ရီယိုကြီးနော်။ တခြားတစ်ပွဲကတော့ ဘာလဲဆိုတာ သေချာမသိသေးဘူး”
ဝူဟိုင်းက သူမကို ချက်ချင်း အမှန်အတိုင်း ပြောသည်။
“ဒါဆိုရင် ဘလူးဘယ်ရီယို ပေးပါ။ ကျွန်မက သစ်သီးယိုတွေကို ကြိုက်တယ်” ယင်ယယာက ဘလူးဘယ်ရီယိုကို မှာလိုက်သည်။
“ဟုတ်ကဲ့ပါ။ ခဏစောင့်ပေးပါ” ဝူဟိုင်းက အမှန်တရားကို ထုတ်ပြောသည့်တိုင် ယွမ်ကျိုးက ဂရုမစိုက်ပေ။ သူတို့နှင့် ငြင်းခုန်တိုင်း ယွမ်ကျိုးက အမြဲတမ်း အနိုင်ရသူ ဖြစ်နေ၍ ဝူဟိုင်းကို တစ်ခါတစ်ရံ အနိုင်ပေးလိုက်ရခြင်းက ပြဿနာ မဟုတ်ပေ။
ဝူဟိုင်းနှင့် ယင်ယာတို့ နှစ်ယောက်စလုံးက ခေါက်ဆွဲပြုတ်ကို မှာသည်။ ဤဟင်းပွဲက ချက်ပြုတ်ရ အလွယ်ကူဆုံးဖြစ်သည်။
ယွမ်ကျိုးက စံသတ်မှတ်ထားသော ပန်ကန်လုံး နှင့် တူ ကို ယူလိုက်သည်။ ဟင်းပွဲတစ်ပွဲချင်းစီက စနစ်၏သတ်မှတ်ချက်တိုင်း ပမာဏတူညီရမည်။ ထိုစဉ် ကြွေရည်သုတ်ထားသော အကန့်ပိုင်းများအနက် ၂ခုသည် ရေ ၇၀%ကို အလိုအလျောက်ဖြည့်ပေးသည်။ ရေပွက်ပွက်ဆူလာသောအခါ ခေါက်ဆွဲသားများကို အကန့်ထဲမှာ နှစ်လိုက်သည်။
ခေါက်ဆွဲသားများက လိပ်ခွေ ကာ ရေထဲ မြောပါနေသည်။ ထိုစဉ်အခိုက်အတန့် ယွမ်ကျိုးက ခွက်နှစ်ခွက်ထဲ ဟင်းခတ်အမွှေးအကြိုင်များ ချက်ချင်း ထည့်သည်။
ထို့နောက် သေးငယ်သောပန်ကန်ပြား နှစ်ချပ်ကို ယူကာ ကောင်တာ(ပြန့်ပြူးသောအပြား)ပေါ်မှာ တင်လိုက်သည်။ သူ အသေးအမွှားကိစ္စများ လုပ်ဆောင်နေစဉ် ခေါက်ဆွဲက ပြီးပြည့်စုံစွာဖြင့် အသင့်အနေအထား ရောက်ရှိနေပါပြီ။ တူအရှည်ကို သုံးပြီး ယွမ်ကျိုးက ခေါက်ဆွဲများကို ခပ်ယူပြီး ခေါက်ဆွဲပန်းကန်လုံးထဲ ဖြည့်လိုက်သည်။ ထို့နောက် ခေါက်ဆွဲသားနှင့် ဟင်းခတ်အမွှေးအကြိုင်များကို သမအောင် ရောမွှေသည်။ နောက်ဆုံးမှ ပူပူနွေးနွေး စွပ်ပြုတ်ရည် တစ်ဇွန်းကို ခေါက်ဆွဲခွက်ထဲ လောင်းထည့်လိုက်သည်။ ထိုစဉ် မွှေးကြိုင်သော ရနံ့ထွက်ပေါ်လာသည်။
ယွမ်ကျိုးက ခေါက်ဆွဲစွပ်ပြုတ်အချိုကို ဗန်းပေါ်တင်လိုက်သည်။ ထို့နောက် ဆော့စ် ပြင်ဆင်မှုကို စတင်သည်။ ထိုစဥ် ယွမ်ကျိုးက စမ်းသပ်မှုလုပ်ဆောင်ရန် ကြိုးစားသည်။ ဆော့စ်ကို ဗန်းပေါ်တင်လိုက်သောအခါ တည်ခင်းရန် အဆင်သင့် ဖြစ်နေပါပြီ။ ယွမ်ကျိုး၏အပြုအမူကို စနစ်က ထင်မြင်ချက်ပေးခြင်း မရှိပေ။
ထို့ကြောင့် သူက ဖောက်သည်များဆီ ဗန်းကို သယ်ဆောင်သွားပြီး ပုံမှန်အတိုင်း ဟင်းပွဲများကို တည်ငြိမ်စွာ ချပေးသည်။
“ဝိုး၊ ပူပူစပ်စပ် ဟင်းအနှစ်ပဲ။ အမဲသားနုပ်နုပ်စဉ်းဟင်းအနှစ်ပဲ။ အခုလို ပူပူစပ်စပ်ဟင်းပွဲကို ရောင်းပေးလို့ တကယ်ဝမ်းသာတယ်။ ပူပူစပ်စပ် ဟင်းအနှစ်လေးကို စားရတော့မယ်” ဝူဟိုင်းက သူ့အရှေ့က ပန်ကန်ပြားလေးကို ဝမ်းမြောက်ဝမ်းသာ ငေးကြည့်သည်။ သူ့ခန္ဓာကိုယ်တစ်ခုလုံးက ပျော်ရွှင်မှုများ လွှမ်းခြုံနေသည်။
ဝူဟိုင်းက ခေါက်ဆွဲစွပ်ပြုတ်အချိုကို ကြည့်ပြီး ပူစပ်စပ် ဟင်းအနှစ်ကို ကြည့်သည်။ သူက အကြံပေါ်လာ၍
ဆော့စ်အနှစ်ပန်ကန်ပြားကို မြှောက်ကာ ခေါက်ဆွဲပြုတ်ထဲ လောင်းထည့်ရန် ဟန်ပြင်သည်။
“အားနာပါတယ်။ ခေါက်ဆွဲပြုတ်ထဲကို တခြားဟာတွေ ရောထည့်လို့ မရပါဘူး။ ဒီဟင်းပွဲက သူ့ဘာသာသူ အရသာရှိပြီးသားပါ” ယွမ်ကျိုးက ခေါက်ဆွဲပန်းကန်ကို လှမ်းဆွဲပြီး ဖြည်းဖြည်းချင်း ပြောသည်။
“အမ်” ယွမ်ကျိုး၏စကားလုံးများကြောင့် ဝူဟိုင်း နှုတ်ဆိတ်သွားသည်။ သို့တိုင် ဆော့စ်ပန်ကန်ပြားကို ကိုင်ထားဆဲ ဖြစ်သည်။
'ဒါက ဘာသဘောလဲ။ အကျိုးအကြောင်း မဆီလျော်ဘူး။ ခေါက်ဆွဲပြုတ်ထဲ ဟင်းအနှစ်ထည့်လိုက်တော့ ဘာဖြစ်မှာမို့လို့လဲ' ဝူဟိုင်းက ယွမ်ကျိုးကို မကျေမနပ် ကြည့်နေသည်။
“သူဌေးယွမ်။ ပူပူစပ်စပ် အစားအသောက်တွေ မစားရဘဲ မနေနိုင်ဘူး။ ဒါတွေ မစားရရင် ငါသေလိမ့်မယ်” ဝူဟိုင်းက ယွမ်ကျိုးကို လေးနက်သောအမူအရာဖြင့် ကြည့်နေသည်။ သူ့အမူအရာက သေရေးရှင်ရေးတမျှ အရေးပါသော ပုံစံဖြစ်သည်။ သူ့မျက်ဝန်းများက နာခံမှုကို မလိုလားသော မီးတောက်များဖြင့် ဟုန်းဟုန်းတောက်နေသည်။
“အို့စ် ရတယ်လေ။ ဒီနေ့ ငါ့စကားကို နားမထောင်ဘဲ ခေါက်ဆွဲပြုတ်ထဲ ဟင်းအနှစ်ထည့်လိုက်ရင် နောက်နောင် ငါ့ဆိုင်ကို မလာနဲ့တော့” ယွမ်ကျိုးက ခေါက်ဆွဲစွပ်ပြုတ်ပန်းကန်လုံးကို သူ့နေရာသူ ပြန်ထားလိုက်သည်။
“သူဌေးယွမ်၊ မရက်စက်ပါနဲ့။ ငါတို့ချင်း ညှိနှိုင်းကြမယ်လေ” ဝူဟိုင်းက ဆော့စ်ကို ခေါက်ဆွဲပြုတ်ထဲ လောင်းထည့်ခါနီး ကြားလိုက်ရသောစကားကြောင့် လက်တွန့်သွားသည်။
“ဒါက ခေါက်ဆွဲစွပ်ပြုတ်အချို” ယွမ်ကျိုးက ဝူဟိုင်း၏မျှော်လင့်ချက်ကို ရိုက်ချိုးသွားသည်။
“ဒါကို ပြုပြင်လို့ မရဘူးလား” ဝူဟိုင်းက မျှော်လင့်တကြီး စောင့်ဆိုင်းနေသည်။
“မရပါဘူး” ယွမ်ကျိုးက သူ့ကို ဆက်လက်ငြင်းပယ်သည်။
“သူဌေးယွမ်၊ ခင်ဗျား ဒီလောက်အထိ စည်းမျဉ်းတွေကို လိုက်နာနေရင် တစ်သက်လုံး လူပျိုကြီးဘဝနဲ့ အရိုးထုတ်ရတော့မယ်။ ဘယ်ကောင်မလေးကမှ ခင်ဗျားရဲ့ချစ်သူ ဖြစ်ချင်မှာ မဟုတ်ဘူး”
ဝူဟိုင်းက ပူပူစပ်စပ်ဟင်းအနှစ်ကို အောက်ချလိုက်ပြီးနောက် သူ့စိတ်ထဲ တွေးမိသည့်အတိုင်း အဆိပ်အတောက်ဆန်သော စကားလုံးများဖြင့် ကျိန်စာတိုက်သည်။
“မဖြစ်နိုင်ပါဘူး။ ငါက လူပျိုကြီးဖြစ်စရာ အကြောင်းမရှိဘူး။ ငါက ရုပ်ချောတဲ့အပြင် ဟင်းချက်ကျွမ်းတယ်။ ဒီကမ္ဘာမြေပေါ်မှာ မိန်းကလေးမျိုးနွယ်အားလုံး မျိုးတုန်း ပျောက်ကွယ် သွားရင်တောင် ငါက သေချာပေါက် ကောင်မလေးရတယ်” ယွမ်ကျိုးက လေးနက်စွာ တွေးတောပြီးနောက် ပြန်ဖြေသည်။
ထိုမှသာ ဝူဟိုင်း၏ထေ့ငေါ့မှုကို တောက်ချပစ်နိုင်လိမ့်မည်။ ထို့နောက် ဝူဟိုင်းက ပူပူစပ်စပ် ဟင်းအနှစ်ကို ငေးကြည့်ကာ ခေါက်ဆွဲပြုတ်ကိုစားသည်။ ထိုမှသာ အစပ်အရသာကို စိတ်ကူးယဉ်ကြည့်နိုင်လိမ့်မည်။ ယွမ်ကျိုး၏စားသောက်ဆိုင်မှာ ပူပူစပ်စပ်ဟင်းအနှစ်ကို ရောင်းချပေး၍ အစပ်ကြိုက်သော ဝူဟိုင်းအတွက် ကျေနပ်ဖွယ်အတိဖြစ်သည်။
“အရသာရှိမယ့်ပုံပဲ” စားပွဲပေါ်မှာ ခင်းကျင်းထားသော အစားအသောက်များကို ကြည့်ပြီး ယင်ယာက ခံစားချက်အပြည့်ဖြင့် လေးနက်စွာ သက်ပြင်းချလိုက်သည်။
သံသယဝင်စရာပင် မလိုအပ်အောင် ဘလူးဘယ်ရီယို၏အရောင်အဆင်းက တကယ်ကို လှပသည်။ ကောင်မလေးများက လှလှပပ အရောင်းအဆင်းများကို နှစ်သက်သည်။ သူတို့က အသီးအနှံ နှင့် အသီးအရွက်များ ဝယ်ယူလျှင်ပင် ကြည့်ကောင်းသောအရာများကို ဝယ်ယူလေ့ရှိသည်။
ဘလူးဘယ်ရီယိုက တစ်ချက်ကြည့်လိုက်ရုံဖြင့် အထင်ကြီးလေးစားသော ခံစားချက်ကို ဖြစ်ပေါ်စေသည်။ ယိုခပ်ရန် အသုံးပြုထားသော ဇွန်းကလည်း ပန်ကန်ပြားနှင့်လိုက်ဖက်သည်။ လက်သန်းအရွယ်အစားဖြစ်သော်လည်း လက်နှင့် အံကိုက်ဖြစ်နေသည်။
ဘလူးဘယ်ရီ၏အသားက အရောင်မဲ့သော်လည်း အခွံက အပြာရောင်ဖြစ်သည်။ ယိုထိုးလိုက်သောအခါ မှော်ဆန်ဆန် အပြာရောင်သန်းသွားသည်။
စနစ်မှ ထောက်ပံ့ထားသော ဘလူးဘယ်ရီက သာမန် မဟုတ်ပေ။
စနစ် “ဘလူးဘယ်ရီက ပင်ပုမျိုးနွယ်ဖြစ်လို့ အရွယ်အစားသေးတဲ့ ဘယ်ရီသီးလေးတွေကို ထွက်တယ်။ အဲဒီအပင်တွေကို တောရိုင်းမြေတွေမှာ တွေ့ရတတ်တယ်။ ဘယ်ရီသီးက သေးငယ်ပေမဲ့ အန်သိုဆိုင်းရန်နင်း ဓာတ်ပေါကြွယ်ဝတယ်။ အရောင်အဆင်းက အပြာရောင်ရှိလို့ ဘလူးဘယ်ရီကို အမည်ပေးခဲ့တာပဲ”
“စနစ်က တောရိုင်းမြေမှာ ပေါက်တဲ့ ဘလူးဘယ်ရီအပင်ကိုယူပြီး မျိုးကောင်းမျိုးသန့်ဖြစ်အောင် စိုက်ပျိုးတယ်။ အသစ်ဖြစ်လာတဲ့အပင်မျိုးက တောရိုင်းမြေမှာပေါက်တဲ့ အသီးထက် ပိုကြီးပြီး ပိုလုံးဝိုင်းတယ်။ အရသာကလည်း အရင်မျိုးဆက်အသီးထက် ပိုကောင်းတဲ့အပြင် လူသားတွေရဲ့ခန္ဓာကိုယ်ကို အထောက်အကူ ပြုစေတယ်”
“စနစ်က ထောက်ပံ့ထားတဲ့ ဘယ်ရီသီးက အဟာရဓာတ်တွေ ပေါကြွယ်ဝလို့ အသက်ကြီးလာရင် ကြုံတွေ့နိုင်တဲ့ အာရုံကြောပြဿနာတွေကိုလည်း ကာကွယ်ပေးနိုင်တယ်။ အမြင်အာရုံကောင်းမွန်စေခြင်း၊ နှလုံးခွန်အားဖြစ်ခြင်း၊ သွေးစီးဆင်းမှုကောင်းမွန်ခြင်း နဲ့ ခန္ဓာကိုယ်ရဲ့ခုခံအားစနစ်ကိုလည်း တိုးတက်စေတယ်”
“ယိုအဖြစ်အသုံးပြုမယ့် ဘယ်ရီသီးကို စနစ်တကျ တင်းတင်းကျပ်ကျပ် ရွေးချယ်ထားတယ်။ လိုအပ်ချက်နဲ့ ကိုက်ညီမှု မရှိရင် ချက်ချင်း ဖယ်ထုတ်ပစ်တယ်။ တောင်ကျစမ်းရေနဲ့ ဘယ်ရီသီးကို ဆေးကြောထားတယ်။ ဒါမှလည်း အသီးရဲ့အဟာရဓာတ်နဲ့ လတ်ဆတ်မှုူကို ထိန်းသိမ်းထားနိုင်မှာလေ”
“ယိုထိုးတဲ့အခါမှာ အသုံးပြုထားတဲ့ သကြားက ကြံပင်ကရတဲ့ သကြားပါ”
“ကြံသကြားရဲ့ချိုမြမှုက သဘာဝသကြားဓာတ်ပါ။ ဘလူးဘယ်ရီအရသာနဲ့ အလွယ်တကူ ပေါင်းစပ်နိုင်တယ်။ ဒါကြောင့်လည်း အထူးကောင်းမွန်တဲ့အရသာ ဖြစ်လာတာပါ”
“ကြံသကြားနဲ့ ဘလူးဘယ်ရီမှာ ပါဝင်တဲ့အဟာရဓာတ်တွေက ယိုရဲ့ချိုမြတဲ့အရသာကို ခံစားစေတဲ့အပြင် အဝလွန်ခြင်း၊ သွေးတိုးခြင်း နဲ့ သွေးတွင်း သကြားဓာတ်လွန်ကဲခြင်းကိုလည်း ကာကွယ်ပေးနိုင်တယ်”
ယင်ယာက ဟင်းပွဲများကို ဂရုတစိုက်ဖြင့် ဖြည်းဖြည်းချင်း အရသာခံသည်။
အစားအသောက်များကို အရသာခံစားနေသော လူနှစ်ယောက်ကို ကြည့်ပြီး ယွမ်ကျိုးက စနစ်ကို မေးခွန်းမေးမြန်းလိုက်သည်။
“စနစ်၊ မင်းချမှတ်ထားတဲ့ စည်းမျဉ်းရဲ့ဟာကွက်ကို ရှာတွေ့သွားပြီ။ ငါ့ကို ဆုလာဘ်ချီးမြှင့်သင့်ပြီလို့ မထင်ဘူးလား” ယွမ်ကျိုးက စနစ်ကို တိုက်ရိုက်မေးမြန်းလိုက်သည်။
စနစ် “ဆိုင်ရှင်၊ ခင်ဗျားရဲ့အဆင့်ကို မြှင့်တင်ဖို့ပဲ ကြိုးစားပါ။ စိတ်ကူးယဉ်မနေနဲ့”
စနစ်က ယွမ်ကျိုး၏တောင်းဆိုမှုကို ပြတ်ပြတ်သားသား ငြင်းပယ်ပစ်သည်။
“ခင်ဗျားထောက်ပံ့ပေးတဲ့ ပစ္စည်းတိုင်းက ပမာဏတူတူပဲဖြစ်သင့်တယ်မလား” ယွမ်ကျိုးက တည်ငြိမ်သော အမူအရာဖြင့် ဆက်လက်မေးမြန်းသည်။
စနစ်က အချိန်အတော်ကြာအောင် တိတ်ဆိတ်နေသည်။
မိနစ်ပိုင်းခန့်ကြာပြီးနောက် စနစ်က ပြန်ဖြေသည်။
“ဆိုင်ရှင်၊ ခင်ဗျားပြောတာ မှန်ပါတယ်”
“စားသောက်ဆိုင်ထဲက အခြေအနေကို မင်း မြင်လား” ယွမ်ကျိုးက စကားလမ်းကြောင်းလွှဲသည်။
“ဆိုင်ရှင် ကြည့်စေချင်ရင် အခုပဲ ကြည့်လိုက်မယ်”
“အမျိုးသမီး နဲ့ အမျိုးသားကို သေချာကြည့်လိုက်ပါ။ သူတို့က တူညီတဲ့ဟင်းပွဲကို မှာထားပေမဲ့ ထည့်ပေးထားတဲ့ ပမာဏ မတူဘူး” ယွမ်ကျိုးက ပွင့်လင်းစွာ ပြောလိုက်သည်။
ဝူဟိုင်းက အထူးပွဲကို အော်ဒါမှာယူစဥ်က ဘလူးဘယ်ရီယိုကို သူ့ကိုယ်တိုင် ခပ်ယူပေးရ၍ ဟာကွက်ကို သတိပြုမိခြင်းဖြစ်သည်။ ပန်းကန်ပြားထဲ ထည့်သော ပမာဏကို ထိန်းချုပ်နိုင်မှန်း ရိပ်မိသည်။ ထို့ကြောင့် ယင်ယာက ဘလူးဘယ်ရီယိုကို အော်ဒါမှာယူသောအခါ ဝူဟိုင်းကို ထည့်ပေးသော ပမာဏထက် ပိုထည့်ပေးကြည့်သည်။ စနစ်က တုံ့ပြန်မှုကို မမြင်တွေ့ရ၍ ဟာကွက်ကို အတည်ပြုနိုင်ခဲ့သည်။
ယွမ်ကျိုးက နတ်ဘုရားအဆင့် ကြက်ဥထမင်းကြော်ကို တစ်ဖက်ကမ်းခတ် ကျွမ်းကျင်နေ၍ ထည့်ပေးသော ပမာဏချင်း ကွာခြားမှာ စိုးရိမ်စရာ မရှိပေ။
စနစ် “ ဆိုင်ရှင်က ဟာကွက်ကို ရှာတွေ့သွားလို့ စနစ်က ဆုလာဘ်ပေးပါမယ်။ ဆုလာဘ်ကို အခုပဲ ရယူနိုင်ပါပြီ”
အပိုင်း(၄၇)
ပြီးပါပြီ။