Kunal Bela ko ghar le aakar use apne bed pe leta deta hai aur apne sofa pe baith kar doctor ka intazaar kar raha hota hai.
Mujhe pata hai aaj ki shaadi ki adla badli mein Bela ka koi haath nahi tha, lekin aisa nahi kaha ja sakta ki uski wajah se nahi hua tha. Maan ne yeh sab kiya, but no doubt, zaroor ismein Bela ka haath hai. Wahi thi jo Adhij ke strongly againt thi, aur uski aur Aarohi ki shaadi todwana chaahti thi. Warna Maan suddeenly apne hi bhai ke against kyun jayegi? Bachpan se dono hamesha saath rahe hain aur Maan Adhij se bohot pyaar karti hai.
Agar Adhij keh raha hai ki usne Aarohi ko kidnap nahi kiya, aur Maan bhi keh rahi hai ki usne Aarohi ko kidnap nahi kiya, to iska matlab kisi aur ne kiya. Par kisne? Us manipulator ne? Hamesha Bela scapegoat ban jaati hai us manipulator ke liye. Wo uske kandhe par rakh ke goli chala raha hai aur wo phas ja rahi hai. Maine usse kaha tha ki door rahe, lekin wo har ulta kaam karegi apni zid mein aakar.
Jab main Bela ke paas gaya tha usse maafi maangne aur use manane ke liye taaki wo shaadi mein aaye, to usne arrogance aur pride ke saath bola tha ki wo nahi aayegi. Lekin aaj wo aayi, bina kisi ko bataye, sabse chhup ke, choron ki tarah. Log choron ki tarah tab hi aate hain jab wo nahi chaahte koi unhe dekhe kyunki wo kuchh galat karne wale hain. Lekin Bela yahan kya karne aayi thi? Adhij aur Aarohi ki shaadi todne? Shayad usi samay use sedation diya gaya hoga.
"Kunal sir, doctor aa gaya hai."
"Theek hai, Aalok, use andar bhejo."
"Sir, koi aur bhi aaya hai, Aarohi Ma'am ko lekar."
"Aarohi? Meri behen, kahan hai, le chalo mujhe uske paas."
"Sir, use ek aadmi le kar aaya tha."
"Haan, to theek hai na, Aalok. Mujhe dono ke paas le chalo."
"Sir, wo to gaya, par mujhe us aadmi ke baare mein kuchh sahi nahi hai."
"Sahi nahi hai matlab? Aalok, ek baar mein batao, yeh suspense banakar time waste mat karo."
"Sir, us aadmi ko maine aaj dopahar ko dekha tha, Bela ji ka photo kheechte hue. Maine jab usse puchha usne photo kyun liya to usne kaha ki wo chandelier ka photo le raha tha, usne mujhe apne phone par photo bhi dikhaya. Par mujhe lagta hai uske baare mein kuchh to gadbad hai, sir."
"Is baare mein ham baad mein baat karenge. Pehle mujhe Aarohi ke paas le chalo."
Kunal Aalok ko living room tak follow karta hai. "Aarohi! Aankh kholo apna, Aarohi. Doctor kahan gaya?" Kunal ko doctor seedhiyon se upar jaate dikhta hai. "Doctor, aap pehle meri behen ko dekhiye. Mujhe bataiye ise kya hua hai."
Doctor neeche aata hai aur Aarohi ki check karta hai. "Patient ke refelxes theek hain, she's just sleeping. Lagta hai inhe sleeping pill diya gaya hai. Ek (1) sleeping pill aath (8) ghante tak asar dikhata hai. Agar inhone aaj dopahar ko sleeping pill liya tha to wo kuchh der mein uth jayengi. Agar inhe zabardasti uthaya jaye to inhe short term memory loss ho sakta hai to inhe apne aap uthne dijiyega. Aur jab yeh uthengi tokuchh ghanton ke liye she'll be in a daze, jo sleeping pills ki wajah se hoga. Lekin ghabrane ki zaroorat nahi hai."
"Thank you, doctor," Kunal kehta hai lekin uska pura dhyaan Aarohi par hai.
"No problem. Ab main chalta hoon, koi bhi problem ho to-"
"Sir, Bela ji bhi to hain upar," Aalok Kunal ko yaad dilata hai.
"Haan," Kunal Aarohi se bina aankh hataye kehta hai. "Ek patient aur hai upar. Aalok aapko unke paas le jayega, aap use bhi dekh lijiye."
Kunal Aarohi ko room mein sula deta hai aur Veer ko message kar deta hai ki Aarohi wapas aa gayi hai aur doctor ne use check kar liya hai and she's fine. Uske baad wo apne kamre mein jata hai. Kunal ko dekhkar Aalok wahan se chala jata hai.
"Doctor, ise kya hua? Kya ise bhi sleeping pills diya gaya tha?"
"Inhe sedation diya gaya tha. Jaisa mujhe aapke staff ne bataya, yeh apne pure hosh mein nahi thi, lekin behosh nahi hui thi."
"Haan, lekin yeh beech mein behosh ho gayi thi."
"Ek to sedation ki halat mein thi, jo drugs hai, upar se lagta hai yeh kafi samay se thaki hui thi, shayad theek se khana nahi kha rahi thi. Exhaution on top of drugs, dono ki wajah se behosh ho gayi thi. To overcome this fatigue, main inhe liquid nutrition de raha hoon. Ek nurse station kar dunga jo inke saath overnight, ya jitne din zaroorat pade rukegi. Inhe over exert nahi karna hai, she needs rest. Main kal subah dobara aaunga inhe check karne. Inhe memory loss ho sakta hai, she might not remember sedation ke kuchh ghante pehle kya hua tha, to inhe yaad karwane ke liye stress na diya jaye."
"Thank you once again, doctor."
"Ji." Doctor apna saman pack kar leta hai. Aalok doctor ko darwaze tak chhod ke aata hai.
---☆---
Ronit Shreeja ko apne saath le jata hai. "Yeh kya kar rahi ho tum? Pagal ho gayi ho kya?"
"Ronit, main jaanti hoon tum yeh shaadi kyun hote dekhna chaahte the. Main yeh bhi jaanti hoon tumne Adhij ko thappad kyun mara."
"Kuchh nahi jaanti ho tum. Pandraa (15) saal mein sab badal gaya hai."
"Par tum nahi badle, na kabhi badloge, chahe pandraa saal ho ya pachas. Aur main to tumhe jaanti hoon na. Tum hamesha se lalchi aur farebi ho. Tumhari company ka loss chal raha hai aur is shaadi ke jariye tum uski bharpayi karna chaahte ho."
"Tum kuchh nahi jaanti, Shreeja. Wapas kyun aayi ho? Us baar sabko dhokha di ki tum mar gayi ho aur sabne vishwaas kar liya tha. Bacchon par kya beeti tum soch bhi nahi sakti. Is baar kaun sa dhokha dene wali ho?"
"Please, Ronit, don't act like you care about the kids. Tumhe kabhi unki koi fikar nahi rahi hai. Yeh baat Niharika aur Adhij jaante hain, bas Maan hi hai bewakoof jise tumpar bharosa hai. Tumne uske saath paanch (5) saal pehle jo kiya, uske baad bhi use tumpar andha bharosa hai. Aaj tumne Maan ki side lekar Adhij ko mara taaki sabko lage ki Maan is innocent aur tumhare paison ka source band na ho jaye. Kaise baap ho tum, apne swaarth ke liye apni beti ko bechne tak ke liye tayyar ho gaye the."
"Aur tum sabko usi ke baare mein bata di. Tumhe bhi Maan ki koi khaas fikar nahi hai. Pata nahi itni kamini kaise ho sakti ho tum."
"Main jo bhi ki wo tumhara plan fail karne ke liye ki."
Ronit Sreeja ka gala dabata, bas itna ki uski saans kam ho jaye, par wo mare na, kyunki ab jo wo haath lagi hai, Ronit use jaane nahi dene wala hai. "Sreeja, sab to laga tum mar gayi thi, lekin tum zinda ho. Bhagwaan ne tumhe mere liye zinda rakha tha, taki tumne jo mere saath kiya, uska saza bhi main tumhe khud doon. Tumhe yahan nahi aana chahiye tha, kyunki is baar marogi to pandraa saal baad dobara nahi uth paogi," Ronit dangerously low voice mein bolta hai.
"Koshish karke dekh lo, Ronit, lekin is baar patang ki dor mere haath mein hai. Yeh khel ab us disha mein jayega jis disha mein main ise lekar jaungi."
"Kya chahiye tumhe jo ab lauti ho?"
"Main tumhe nahi bataungi, kuchh bhi nahi bataungi. Satta ab tumhare paas nahi hai. Tum akele ho, lekin mere pichhe log hain, takatvar log, jo tumhari maut dekhna chaahte hain. Aur tumhe ghuton par dekhne ki tayyari shuru ho chuki hai."
"Tumhare khokhle dhamkiyon se darne nahi wala hoon."
"To daro, kyunki yeh khokhli dhamki nahi hai. Mere paas bohot saboot hain tumhare khilaf. Yakeen nahi hota? Pandraa saal pehle, tumne Kabir ke company se 100 crore churaya tha, jiski wajah se tum dono ke beech-"
Ronit Sreeja ka gala zor se dabata hai aur saans ki kami ke wajah se wo chup ho jaati hai. "To tumne mujhe kya samjha hai, Sreeja? Tumne jo kiya hai, sab ka saboot mere paas hai. Main tumhe yoon jail bhejwa sakta hoon."
"Nahi, tum aisa kuchh nahi kar paoge, kyunki phir tum bhi nahi bachoge." Ronit Sreeja ko chhodta hai aur pichhe hat jata hai.
"Kya chaahti ho?"
"Bohot kuchh, dheere dheere bataungi. Filhaal mujhe apna hissa chahiye. Tumhari patni hoon, afterall."
"Kitna?"
"50%, jitna mera hak banta hai."
"Jis din tumne mujhe dhokha diya, us din se tumhara koi hak nahi hai mujhpar. 20%."
"Lekin maine wahi kiya jo tumne kiya. 45%."
"25%."
"40%."
"Deal." Kaun hai iske pichhe jo iska saath de raha hai? Itne saal baad yeh lauti hai, wo bhi aise. Kya toofaan lane wali hai yeh?
---☆---
Mehrotra pariwaar ghar pahonchti hai jahan grih pravesh ki tayyari ho chuki hoti hai.
"Maya, apni bahu ki aarti utaaro aur uska grih pravesh karwao."
"Kaun si, bahu, Mummy ji? Aaj to mere bete ki shaadi nahi thi, agar thi bhi to mujhe kisi ne nahi bataya."
"Maya, aisa mat karo."
"Nahi, Bhabhi, aaj itna kuchh hua, iski itni pol khuli, hamein iski sacchai pata chali, phir main ise apni bahu kaise maan loon? Pandraa saal pehle iski maa ne mera ghar barbaad kiya, mujhse mera pati chheen liya aur phir use maar diya, ab yeh mere bete ke pichhe padi hai. Mera pati usi layak tha, lekin main apne bete ki zindagi barbaad nahi hone dungi."
"Tumhari chinta jayaz hai, Maya, lekin tum Shreeja ki baat par bharosa karke bohot badi galti kar rahi ho. Wo aurat bharose ke layak nahi hai. Hamne Maan ko apne aakhon ke aage bada hote dekha hai, yeh wahi bacchi hai, Maya. Tumhe bhi to yeh pyaari lagti thi na."
"Bhabhi, isse lagaav aapko tha, mujhe nahi, bhale hi maine iske baare mein kabhi galat nahi socha. Lekin aapne dekha na yeh London jaake kya kya ki wahan? Iske khoon mein behta hai, Bhabhi, aur khoon ko koi badal nahi sakta hai. Agar aaj Shreeja nahi aati, to jo bhi hua main uske bawajood ise apna leti, pariwaar ke sammaan ke liye. Lekin ab lagta hai pariwaar ke sammaan ke liye ise apni ghar ki bahu nahi banana chahiye."
"Maya," Dadi kehti hai, "Maan ki shaadi Ansh se hui hai aur wo is ghar ki bahu hai, tum maano ya na maano."
"Phir main nahi maanti, Mummy ji. Iski Maa ne mere pati ko maar diya. Kya bharosa ki kisi din gusse mein aakar yeh mere bete ko nahi maar degi? Mummy ji, aapne apna beta khoya hai, aap wo dard jaanti hain, phir aap mera dar kyun nahi samajh rahi hain? "Maya wahan se chali jaati hai.
Anshuman apne gale se varmala nikaalta hai aur wo bhi jaane lagte hai jab Dadi use rok deti hai. "Kya kar raha hai tu, Ansh? Grih pravesh abhi hua nahi hai?"
"Main thak gaya hoon, main apne kamre mein ja raha hoon." Ansh chaahe jitna gussa ya pareshaan kyun na ho, wo apne ghar ke badon ka apmaan ya unse badtameezi kabhi nahi karega. Mehrotras ne apne beton ko aise sanskar diye hain. Teeno bhaiyon ke liye unka pariwaar sarvopari hai. Unke liye teeno jaan de sakte hain to jaan le bhi sakte hain, chaahe pariwaar mein si kisi ki galti kyun na ho. Yahi hua tha pandraa saal pehle, jab Kabir ki maut hui thi. Mushkil se Dadi ne ghar mein sabke andar ki badle ki aag bujhayi thi, kyunki wo jaanti thi ki badla sab barbaad kar dega.
"Ansh, teri biwi hai wo, tere saath iska grih pravesh hoga."
"Main is dhokhe aur lobh ki shaadi ko nahi maanta hoon. Ise jiske saath grih pravesh karna hai yeh kar le." Anshuman wahan se chala jaata hai.
"Koi na, main hoon na, main apni bahu ka grih pravesh karungi," Sonia kehti hai. "Anshuman ghar ka baccha hai, to Maan meri bhi to bahu hui. Parvati, puja ki thal mujhe de." Sonia Maan ka grih pravesh karti hai.
"Aise to reet hai shaadi ke baad ke khel ki, lekin aaj yeh sahi nahi hoga," Dadi kehti hai. "Kal dekhte hain in sab ke baare mein." Dadi wahan se chali jaati hai. Unke pichhe Raj bhi chala jaata hai.
"Welcome to the family, Bhabhs. Good night," Veer bhi chala jaata hai.
Sirf Maan aur Sonia bachte hain. "Mom, Dadi mujhse naraaz hain kya?"
"Maan, aaj jo bhi hua, use sabke liye pachana thoda mushkil hai. Kisi ko nahi pata kya sach hai, kispar vishwaas karein. Upar se wo paapi Shreeja aa tapki. Sabko thoda wakt do, sab theek ho jayega."
"Kisi ko mujhpar vishwaas nahi hai, aapko mujhpar itna vishwaas kyun hai?"
"Maan, tumhari ma ke jaane ke baad maine tumhe apni bacchi ki tarah pala hai, Aarohi jitna pyaar diya hai. Mere liye tum aur Aarohi ek jaise ho. Phir main to tumhari Maa hui na, tum mujhe 'Mom' bhi kehti ho, phir ek Maa ko apne bacche par kaise vishwaas nahi hoga?"
"Sab theek ho jayega na? Mujhe yeh sab bilkul achha nahi lag raha hai."
"Chinta mat karo, main tumhare saath hoon. Main sab theek kar dungi."
---☆---
"Nalayak auladein, besharam kahin ke. Kya karne chale the tum dono?"
"Dad, agar main Kunal se shaadi kar leti to unhe kangaal banakar chhodti. Beech mein Maan aa gayi."
"Beech mein tum aayi ho, Niharika!" Ronit chillata hai jor se. "Kya pagalpan hai yeh? Kunal se pyaar? Tumhara dimaag to theek hai?"
"Papa, mera badla ka mere Kunal ke liye feelings se koi matlab nahi hai. Apna pariwaar pehle, baaki koi baad mein. Khoon sabse mazboot hota hai, kisi pyaar se bhi. Maan Kunal ko kabhi nahi chhodegi, jab sab barbaad ho jayega tab bhi nahi. Is liye main usse shaadi karne wali thi, kyunki uski behen hoon, use barbaad ghar mein nahi chhod sakte."
"Chup! Ekdam chup. Kis cheez ka badla? Sreeja zinda hai, tum dono ne khud use dekh, ab kisi badle ki zaroorat nahi hai."
"Wo zinda hai lekin hamare saath nahi hai. Unhone hamare pariwaar ko hamesha ke liye tod diya aur hamari khushi hamse chheen li."
"Sreeja ke saath koi khushi aa hi nahi sakti hai. Ulta bach gaye tum sab. Main jaisa kehta hoon, waise karo. Tum dono ka ek bhi plan aaya to main tumhe ghar se nikaal dunga. Kal, main sab ko bolunga ki Maan ki shaadi Kunal se ho jani chahiye. Lekin wo budhiya talaakh nahi hone degi, to main baat kheechunga nahi. Maan ko Anshuman ke saath rehna hoga uski biwi bankar. Rahi baat Adhij ki, to main bolunga ki Adhij aur Aaarohi ki shaadi karwa deni chahiye."
"Papa, achha khasa peechha chhoota hai, wapas mat bhejiye mujhe uske paas. Main usse shaadi nahi karna chaahta hoon. Use dekh ke chidhh hota hai, man karta hai apne baal kheech loon. Main uske saath nahi reh paunga."
"Don't get on my nerves. Main jaisa kehta hoon waisa karte jao, warna ek phooti kaudi nahi milegi apne jayedad ki. Jitni jaldi paise aayenge utni jaldi tum use chhod sakoge." Adhij aur Niharika jaane wale hote hain jab Ronit dono ko rok deta hai. "Wahan kaun si video ki baat ho rahi thi?"
Koi kuchh nahi bolta hai to Ronit ka dar aur gussa dono badhne lagta hai. "Muh mein dahi jamake mat baitho, kuchh bolo! Kis video ki baat ho rahi thi?"
"Wo, Bela ne mujhe aur Niharika ko sun liya tha aur video bana liya tha to maine use dusre video se replace kar diya taaki Bela buri dikhe aur use ghar se nikaal diya jaye."
"Kis video se replace kiya?"
"Wahi video jismein Raj uncle kisi aurat ke saath-"
"Kahan mili wo video tumhe?" Adhij dar ke maare kuchh nahi kehta hai. "Khoteya, kuchh bol!"
"Aa-aapke cupboard mein jab main aapne pen drive maanga tha."
Ronit apna sir pakad leta hai. "Gadhe ki aulad, apna dimaag kyun chalate ho jab dimaag mein bhusa bhara hai? Itni badi cheez haath lagi to mujhse baat karna ya puchhne ka nahi soojha tumhe? Saara kaam bigaad diya, bail buddhi kahin ka. Dafa ho ja yahan se isse pehle ki main tera khoon kar apne haathon se."