سبحان الله وبحمده سبحان الله العظيم ♡
( الـمـسـتـشـفـى )
بهاج رمى مفتاح السياره على نوره : بنت
نوره مسكت المفتاح : هلا
بهاج : روحي شغلي السياره وانا بجيب خالتي ام سحاب
ام عبدالله اتسعت عيونها بصدمه من معامله بهاج لـ نوره وكأنها خويه ونطقت بصدمه : تراها زوجتك مو خويك
غدير : عاملها برقه ترى مو حدا عيال عمامي!
بهاج ناظرهم : عادي هي ودها بالسواقه وانا قلت اكسب فيها الخير واخليها تشغل السياره
نوره انسحبت من بينهم عشان بهاج مايغير رايه وياخذ المفتاح وراحت
وضحك بهاج من راحت ونطق : ترى الحياه تشارك يعنى عادي لو عاملتها كذا اهم شي مايضايقها
غدير : بس نوره دلوعه وغنوجه المفروض تعاملها برقه ولطف
ام سحاب ضحكت : وينها ووين الدلع ياحظي
ضحكو كلهم ودف بهاج العربيه الي فيها ام سحاب ونزلو وابو عبدالله قده راح
واتجههو لـ سياره بهاج الجالسه فيها نوره بمكان السواق
ونطق بهاج : غدير افتحي الباب
تقدمت غدير وفتحت الباب الي جنب مكان السواق وركبت ام سحاب وسحب بهاج العربيه وسكر الباب ونطق بهاج : اركبو وانا برجع العربيه واجي وانتي يانوره انزلي بسوق
نوره : افكر بالموضوع
ضحك بهاج وراح ونوره طقت براسها تسوق
جاء بهاج وابتسم من شاف نوره مكانه وفتح الباب ونطق : ماشاء الله الطاره نوره ؟
نوره : ابغى اسوق
بهاج تكى على الباب : بعد سنه افكر
نوره رفعت حواجبها : وليه بعد سنه ليه مو الحين ؟
بهاج بتفلسف وشبك اصابعه ببعض : بعد ٨ شهور تقريباً تولدين على خير ان شاء الله وبعدها تجليسن نفاس كم يوم او شهر وبعدها بيداهمك تكاك لان طلعت لك كروشه صغيره وبعدها تسطريني وتهاوشيني وتقولين انت السبب وعشان كذا اعطيك سنه تتعدل امورك
نوره : مايهم ابغى اسوق
بهاج : انقزي ورا يلا مع غدير يلا يلا
نوره تكتفت : مابغى
غدير بضحكه : نوره لاتمشينها له سوقي فينا
ام عبدالله بمزح : سالفه نور نور
نوره تذكرت ورفعت حاجبها : ماراح اقوم الا لمن تعرف مين نور ؟
بهاج تنهد ونطق : تبين تعرفين مين نور حياتي؟
نوره اتسعت عيونها يصدمه ونطقت بهمس: بهاج!
بهاج : تبين تعرفين نور عيني ونور قلبي ونور حياتي !! مو انتي تبين تعرفينهاا ؟
نوره بهمس : تحب غيري؟
بهاج : ايي احب نور حياتيي ونور قلبي
ام عبدالله : بهاج لاتحارشها !
بهاج : انتم تبون تعرفون من هيي ؟ تم وبجيب لكم صور وصوت عنها نور حياتي دندنو وغنو
نوره نزلت من السياره ومشت جنبه بزعل
بهاج مسك عضدها : وين ؟ مو تبين تعرفينها ؟
نوره هزت راسها : مابغى
بهاج : والله تشوفينها غصب
نوره فكت يدها : مابغى
وركبت السياره وضحك بهاج
صارت نوره بين ام عبدالله وغدير
ركب بهاج السياره وفتح شاشه السياره ونطق : الحين تشوفون نور حياتي مين
نوره صدت
بهاج : غدير افتحي الشاشه الي عندك
فتحت غدير الشاشه الي على المرتبه وشبكها بهاج على جواله وشبك الصوت وارتفع صوت نوره بالمسجل وهي تنطق بأعترافاتها : بهاجوه ماينوصف حبه
الكل تنهد براحه من سمع صوت نوره وصوره نوره الي على الشاشه وهي تتأمل اعتراف بهاج التفت نوره لـ بهاج بصدمه : حسبي الله خرشتني عبالي وحده ثانيه صدق !
بهاج التفت لها وابتسم : تحرم عافيتي اذا شفت وحده غيرك وحبيتها
نوره ضيقت عيونها : عيني بعينك يادودو سحاب البنات
بهاج ضحك والتفت يسوق وابتسمت نوره ودخلت راسها بين بهاج وام سحاب وهي تسولف مع ام سحاب ومشتاقه لها
وبهاج يضحك ويتشمت على شكلها الي بينهم
ام عبدالله : ياوخيتي الحريم اليوم بيجن يسلمن عليتس
ام سحاب : ايه حياهن الله
بهاج تنهد بطفش: ياليلل عاد لايكون يجون رجالهم واقعد اقهويهم ليل نهار
نوره : اكيد طبيعي يجون
بهاج كشر : ياليل السرى
ضحكت غدير : مالمفترض تعودت تقهوي الرجال ليل نهار
بهاج : هاذا المفروض بس الواحد يطفش من سوالفهم الي تدبل قاعه الكبد
نوره بهياط : ابد اي احد يغثك ويضايقك قول له يتواصل معي واصفقه
بهاج ناظرها بطرف عين ونطقت غدير : الرجل الشرقي الغيور يانوره يغار عليك حتى وانتي بتصفقينهم
نوره بضحكه: اهاا الحين فهمت النظره
بهاج ضحك ونطقت ام سحاب وهي ترجع راس نوره الي حاجبها عن بهاج
:ياولد توقع للطريق ولا تسرع
نوره حطت راسها بينهم وبهاج رجع راس نوره ونطق لام سحاب : ابشري ياخالتي القادحه
نوره رجعت راسها ونطقت ام سحاب بنفاذ صبر: يابنت علامتس مدربيه راستس عندنا
نوره حست بالاحراج ورجعت راسها وسكتت وناظرها بهاج وضحك
نوره ضربت كتف بهاج بخفه : حيوان لاتضحك
ضحك بهاج زياده يحارش نوره وتكتفت نوره
ووصلو بيت ابو عبدالله بعد اصرار ام عبدالله على اختها
ونزل بهاج يفتح باب ام سحاب ويساندها ويمشي معها للبيت ونزلت نوره وغدير ونطقت نوره : ليش جينا هنا مو بيتنا؟
غدير : عشان ياطويله العمر والسلامه انتي حامل ويالله يالله شايله نفسك وماتقدرين تركضين يمين ويسار عشان تعتنين بخالتي قلنا افضل قرار اننا نجيبها عندنا منها انا اشوفها وامي تشوفها وبهاج مايقصر وانتي الحين روحي غرفه بهاج ونامي
نوره ضحكت بخفه: يوهه ياغرفه بهاج هذيك ياكثر ماتهاوشت معه فيها
غدير : ايي اتذكر هواشكم الي ماتهجد
نوره ضحكت ودخلت مع غدير وشافتهم يسدحون ام سحاب على الكنبه والتفت ام عبدالله : يابنات قمن سون القهوه بيجون ضيوف يزرن وخيتي
نوره هزت راسها : ابشري ياخاله
بهاج رفع حواجبه بصدمه : اقعدد ! ماتعاندين؟
غدير : هي تعاندك عشانها تحبك
بهاج بضحكه : اي خلاص رضيت
ضحكت نوره ونطق بهاج : خلاص عطيتكم وجهه روحو سوو قهوه يلا
نوره تخصرت : مابغى
بهاج : يمه عاني نوره ماتبي تسوي قهوه وشاهي
ام عبدالله مشغوله تعدل مخده ام ساحب ونطق بهاج يحارش نوره : يمه
ام عبدالله بنفاذ صبر : وش تبي؟ يمه يمه ماني امً لاحد تقلع انت وياها وسوو قهوه يلا قدامي لاللعن خيركم الخير
بهاج : ليتني ساكت
غدير : لاتحارشها مره ثاني تلقم
نوره : قدامي يلا سو قهوه
بهاج رفع طرف الثوب
غدير ونوره مع بعض : بيهرب
قبل لايهرب مسكته نوره وهو مايقدر ينفض نوره ويهج لانها حامل ! صعبه
ووقف مكانه
نوره : يلا ساعدني انت واختك
وراحو المطبخ كلهم الثلاثه ونوره تسوي القهوه وغدير الشاهي وبهاج يسولف لهم
بهاج : ماقصرت ماشاء الله علي اونسكم بسوالفي ياحليلي
نوره : بهاج جيب الهيل وانت ساكت
بهاج مد الهيل لها : سمي
دخلت وئام : سلام
ردو السلام
التفت بهاج ورفع حاجبه : ياقاطعه الوصل والرحم ! ابك انا اخوك اخوك علامك قاطعتنا ؟
غدير : حتى انا اختك اختك واعيش معك ماشوفك الا مره !
نوره : وانا زوجه اخوك المصيون ! قاطعتني يالظالمه
بهاج تخصر : ليش ياوئام تزعلين البطريق ؟
يقصد نوره
نوره : انت زعلتني مو هي
غدير مسكت بطنها بضحكه : بطنييي بطريقق
وئام : لحضه لحضه دقيقه خل ابرر اولاً انا طالبه العلم
بهاج بمحارش : بقره تائهه عز الله
وئام : بهاجوه ! نوره تكفين امسكي رجلك عننا
نوره : حبيبتي انا دابل كبدي
بهاج جلس بالارض واخذ وضيعه المسكين المظلوم : ليش كلكم ضدي
نوره جلست جنبه : بهاجوه اذا صارو كلهم ضدك ان....
بهاج قام واعطاهم ظهره : اذا اصبح الجميع ضدك فأستدر واصبح القائد
نوره وغدير : الله عليك
وئام : طلع حكيم هالولد
بهاج التفت لهم: سوي القهوه وانت الشاهي وانتي ياوئام تعالي معي
وئام : يمه يخرش هاذا
بهاج مسك يدها وطلع
غدير : وش يبي فيها؟ قال لك شي ؟
نوره رفعت كتوفها: لا ماقال شي بس اكيد بيتكلم معها عن الدراسه او ينكبها ويخليها تساعده بتنظيف مجلس الرجال
غدير : عزتي لها
وكلملو شغلهم
بهاج مسك وئام : بنت
وئام : بسم الله وش فيك خوفتني
بهاج جلس على الكراسي الي بالحوش ونطق: اجلسي علامك خايفه تراني اخوك مابسوي فيك شيي!
وئام جلست بتوتر وقعدت تراجع اغلاطها
بهاج بهدوء : ابوي قال لي ماعاد صار يشوفك الا مره وحده باليوم
وئام : بهاج ضغط !
بهاج عدل جلسته : اي ضغط تتكلمين عنه وانتي بدايه الترم الثالث!
وئام : مدري بس مضغوطه
بهاج : بنت انا واثق فيك وماودي افتش جوالك
وئام : وليش تفتش جوالي ؟
بهاج : ترى جلوسك عليه طول اليوم وماتقابلين اهلك هاذا دليل كافي ان جوالك فيه شي!
وئام عقدت حواجبها : يعني تشك اني اكلم وجال؟
بهاج بحده : ماقصدي كذا ! اقصد انتي في احد يهددك؟ يبتزك؟
وئام : لا شدعوا!
بهاج : طيب عطيني سبب جلوسك عليه لدرجه ماتنامين ؟
وئام : بهاج خير ؟
بهاج بنفاذ صبر ونطق بعصبيه: يابنتي اشوف هلاتك واسكت ؟ اشوف انك جالسه بغرفتك ٢٤ ساعه واسكت؟ اشوف استدعاء ولي الامر الي يجيني من مدرستك واسكت؟ اشوف حزن ابوي عليك واسكت؟ تراك دمرتي ابوي بقطيعتك له !
وئام قامت بأنفعال : عندك شي طلعه على حرمتك مو على اختك!
بهاج قام ونطق بعصبيه : نوره لاتطري على لسانك بالشينه
جت نوره وغدير على صراخهم وصرخت نوره : بهاج!!
بهاج التفت لها وناظرها وتقدمت نوره وتسحب وئام منه وتحطها ورا ظهرها ونطقت : بهاج هاذي اختك الصغيره ماتسوي فيها كذاا ! لاتصارخ عليها
بهاج ادرك ان هاوش وئام بدون سبب معقول وتعوذ من ابليس
غدير : بهاج تعوذ من ابليس الشيطان يوسوس لك
بهاج تنهد وتعوذ من ابليس ونطق : معليش وئام حقك علي
وئام : لا بس برر لي موقفك
نوره بهمس لـ وئام: خلاص اعتذر مالها داعي يبرر
تقدمت غدير تاخذ وئام ودخلت ونوره مسكت بهاج وجلسته : بهاج
بهاج بهدوء : لبيه
نوره : وش فيك على البنت
بهاج ناظرها ونطق : مدري يانوره مدري وش جاني هاوشتها وانا ماودي اهاوشها !
نوره : حصل خير خلك جالس هنا بجيك
وراحت نوره تجيب ماء وبهاج تكى ويفكر وش الي قلب حاله من مروق لعصبيه بمجرد من ان وئام طرت نوره يعني لدرجه هاذي مايرضى على نوره؟
جت نوره بأبتسامه ومعها ماء : اشرب
بهاج ابتسم واخذ الكوب منها وشرب ونطق : يلوموني بحبك يابنت محمد
نوره بأبتسامه : يروحي يابهيج لاتعصب مو حلو تصير
بهاج ضحك : ابشري ياعيون بهيج انتي
نوره : يلا عاد بكمل شغلي
بهاج قام : انتبهي على نفسك ياويلك تجهدين نفسك
نوره هزت راسها برضى وطلع بهاج من البيت ونوره رجعت للبنات
ومسكتها وئام : نوره اسفهه
نوره بعدم فهم : على ايش؟
وئام: نوره بهاج ماانفعل على قل سنع
نوره : دقيقه وش تقولين
وئام : نوره انا تقريباً سبيتك وانفعل وبغى يدفني مكاني !
نوره قعدت ترتب افكارها وكلام وئام والي فهمته ان بهاج بغى مد يده عشانها ذكرت نوره بالشينه
نوره بأبتسامه : حصل خير ياروحي انتي الحين يجي بهاج يعتذر منك ترى اعرفه طيب وحنون مرهه
غدير : اي وئام انتي تعرفين بهاج عصبيي وادنى حاجه تعصبه وانتبهي بالكلام جاريه وسلكي له مو لازم تجادلينه
وئام حضنت نوره وغدير : الله لايحرمني منكم
نوره وغدير : ولا منك
واتجهو للمجلس والسوالف ونوره منسدحه بحضن جدتها وتدمع ماتبغى تفقدها
ام عبدالله : يانوره علامتس
نوره : اخاف انحرم من هالحضن
غدير : يروحيي
نتحنح بهاج
ام عبدالله : ادخل مامن احد
دخل بهاج وشاف وئام صاده عنه وغدير تناظرهم ونوره بحضن جدتها
ونطق بهاج : وئام تعالي ساعديني
نوره فزت بخوف على وئام
التفت غدير : وش تبي فيها؟
بهاج : ابيها تساعدني !
نوره ناظرته بخوف تخاف يمد يده على اخته ! بس ماتدري انه مستحيل يمد يده على انثى، تاب !
بهاج : وش فيكم ؟ باكلها؟ تعالي يلا انتظرك
قامت وئام وملامح الخوف بوجهها
بهاج ماله امان بهاج مايقدر يمسك عصبيته يمكن يدفن الشخص من غير قصده وسحبها معه وطلع ونطق : لاتخافين من اخوك ياوئيم
وئام برجفه: طيب وش تبي؟
بهاج : افا ياوئيم تخافين من اخوك؟ انا بهاج بهاج !
وئام : ماخاف منك
بهاج مسك كتوف وئام بحنان : خلاص انا اسف اخر مره اعصب عليك بعد انتي لاتعصبيني
وئام ابتسمت : ابشر
بهاج طلع من جيبه لوح شوكلت ونطق : مدري نوره ترضى بهالاشياء البسيطه عساك نفسها ترضين
وئام رفعت حاجبها بمزح : لا ماني نوره انا انا ابي جوال
بهاج ضحك : ابشري
وئام ابتسمت وابتسم لها بهاج وراح ودخلت وئام المجلس والابتسامه شاقه وجهها
غدير : وش صار
وئام : اعطاني شوكلت عساس اسامحه يعني رضاوه
نوره ابتسمت لانه يراضيها كذا بشوكلت وكملت وئام : يقول انه يراضي نورته كذا
غدير بضحكه : اقعد يابهيج اقعدد صاير يعرف يراضي هو ووجهه وانا يهايط علي ولايراضيني خيرر
نوره : شوفي اذا هايط مايراضي مستحيلل دايم يهايط علي وبعض الاحيان يكون هياطه ومزحه ثقيل وانا اكون بفتره مابغى احد يقرب مني ونتهاوش ومستحيل يراضيني لانه كان يمزح اما اذا كان معصب فهنا الا يراضي
غدير: ويي ياحليل اخونا تونا نشوف الجانب الايجابي منه
وئام ضحكت ونطقت ام عبدالله : علامكم ؟ بهيج وش فيه؟
غدير : مادريتي ؟
نوره بهمس : اشتغلت ام زكي
ام عبدالله : لابالله مادريت انثري ماعندتس
غدير تربعت وشربت فنجانها وبدت تقول السالفه من الي وبأدق التفاصيل
شهقت ام عبدالله : ابك هاذا ولدنا بهيج؟ يراضي؟ ماصدق!
وئام رفعت الشوكلت : شوفي ويختار النوع المفضل بعد
ام عبدالله ضحكت : ماصدقق
وضحكو البنات ونطقت ام عبدالله: يلا بيجون الحريم
نوره : اجل بروح البس شي اشوا من هالخلاقين
غدير : لاتتأخرين تخليني لحالي لسوالف الحريم
ابتسمت نوره وراحت وجو الحريم وسلمو
_______________________
(غـرفـه بـهـاج )
بهاج ضمن ان الرجال مايبون يجون وتنهد براحه وشغل السوني وجلس يلعب بغرفته
دخلت نوره وانصدمت بوجوده يلعب سوني ونطقت : بهيج؟
بهاج لابس سماعه راس ومندمج باللعبه وخسر : ولعنهه
نوره اتسعت عيونها بصدمه تتوقعه يقصدها وسكتت وكمل بهاج : لعنه تلعنك
نوره بصدمه : بهاج!
بهاج رمى اليده حقت السوني : الله ياخذك
ضحكت نوره بخفه من كان يقصد السوني مايقصدها وتقدمت وصارت جنبه عشان ينتبه لها
وشافها بهاج واقفه جنبه وابتسم ونزل السماعه : لبيه ياعيون بهيج
نوره ابتسمت : مو المفروض ماتلعب؟
بهاج : مايجون وجال اليوم بس حريم وابوي قده راح قلت العب السوني اضيع وقتي على مايطسون الحريم واتفرغ لك
نوره : تمام حلوو خلك هاجد ولاتفضحنا عند الحريم انت وصراخك
بهاج ضحك : اسمعي اذا اذوك وضروك ودقوك بالكلام تعالي نلعب لنا قيم
نوره : ابشر
بهاج بأبتسامه: يالبيه ياتنوره
نوره ضيقت عيونها : بعاجوه لاتقول تنوره
بهاج كشر بمزح : تنوره لاتقولين بعاجوه
وضحكو مع بعض وكمل بهاج لعب وراحت نوره تنفتح الدولاب وابتسمت لما شافت ملابسها عادها موجوده محد جاء غرفه بهاج من بعدهم
وسحبت لها فستان صيفي بسيط خفيف لونه بينك فاتح ولبسته وحطت ميكب خفيف تخفى تعب عيونها من تعب جدتها والتفت بهاج بيسولف معها ونطق
: اي نوره ما......
سكت وبلع ريقه من شاف شكلها وهي تزين شعرها وصفر بذوبان : صاروخ
نوره التفتت له تضحك وكمل بهاج وهو ماسك قلبه : اهخ ياقلبي حلوه بزياده يلعن شكلك
نوره ابتسمت بحياء والتفت للتسريحه تكمل تسريحه شعرها
بهاج رمى السماعه واليده والاسلاك والشواحن الي بحضنه وقام ومتجه لها وحاوط خصرها من ورا
ارتبكت نوره وابتسمت من الربكه
بهاج : ارفقي بقلبي يابنت محمد حرام عليك تلعبين بقلبي
نوره نزلت انظارها ليدين بهاج المحاوطه خصرها وبعدت يدينه وابعدت عنه بسرعه ونطقت : الحريم جو يلا سلام
ماسمحت له يكمل وطلعت وضحك بهاج وهز راسه بضحكه وكمل لعب سوني
نوره عند الباب تاخذ نفس وتهيئ نفسها لكلام الحريم وتجمع نفسها بعد مامدحها بهاج وهي تدري ان بهاج اذا مدح فأنها صدق صاروخ
واخذت نفس وراحت للحريم
_______________________
( بـيـت ابـو عـبـد الله - مـجـلس الـحـريـم )
الحريم يسولفون وكانو حريم كثار وغدير توهقت من اسألتهم الي مالها داعي
ام عواد : اي ياغدير كم عمرك ؟
غدير انصدمت من هالسؤال ونطقت بصدمه : ٢٦
ام عواد : ايي هو انتي متزوجه ولا؟
غدير : اي مخطوبه وبملك وبتزوج بالعيد ان شاء الله
ام عواد : ايي ماشاء الله الله يتمم لكم على خير
التفت ام عواد لـ وئام الجالسه ومصدومه من عدد الحريم واسأله ام عواد لغدير وقطع تفكير وئام من نطقت ام عواد : ايي وانتي زوجه اخوهم سهام ؟
وئام هزت راسها بنفي : لا انا اخته وئام
ام عواد : ايي ما شاء الله
التفتت ام عواد لـ غدير : وبهاج اخوكم وشلونه خبري به ورع صغير
غدير بوهقه : كويس
ام عواد : هو توظف السربوت؟
وئام : مو سربوت! ايي ولواء بعد !
ام عواد : ايي ماشاء الله هالسربوت يتوظف وولدي مجتهد ماتوظف
غدير بهمس : والله مالسربوت الا ولدك
وئام بهمس : افف وينها نوره ام لسانين ماتجي تسد نحرها؟
غدير بهمس : شكلها جحدتنا وراحت تلعب سوني مع بهاج
وئام تأفأت والتفت وشافت نوره جايه والتفتت لـ غدير وهمست
: جت جت ام لسانين حي حي عينها الحين تسكتها هي واسألتها
غدير : يالبيه لابسه الوردي بعد
جت نوره ونطقت السلام بصوت طويل وكل الي بالمجلس التفتو لها وردو السلام وهم مصدومين مين هالبنت الي جت بكامل جمالها رغم بساطه لبسها وميكبها الا انها جميله ؟ وتفكيرهم كان
: هاذي حرمه اخوهم سهام؟
: لا سهام اعرفها عندها ورعان
: حرمه بهاج؟
: لالا بهاج عاده صغير ماتزوج
: هاذي شكلها اليتيمه الي عند ام سحاب
: ايي عرفتها هاذي حرمه عمهم
: كيف حرمه عمهم وهي صغيره وعمهم شايب؟
: وويلي وش هالصاروخ الي اقبل علينا
ابتسمت نوره لهم ووقفت جنب غدير وهمست غدير : فكينا من ام عواد
نوره : وينها ؟
غدير : هاذي الي تناظر لك
نوره التفت شافتها وصدت لـ غدير : تخوف يمه
غدير : انتي تستطيعين هيا يلا كفو سكتيها
ام عواد : وانتي من ؟ بنت عمهم؟
نوره : لا بنت سحاب ومحمد الله يرحمهم
ام عواد : اوهه انتي حفيده ام سحاب
نوره : اي
ام عواد : وانتي متزوجه؟
نوره : ايوه انا حرم بهاج بن مطلق
ام عواد عقدت حواجبها : هاه؟ بهاج من متى تزوج؟ خبري مخطوب لبنت عمه هيام وش جابك لهم ؟
نوره : جابه الحب حبيبتي
ام عواد : عوذه ، الا بسألك
نوره بهمس :ياكثر اسألتك
ابتسمت : تفضلي
ام عواد : كم طولك ؟
نوره عقدت حواجبها بصدمه وصدت
ام عواد تعمدت تحرج نوره ورفعت صوتها ونطقت : متى تحملين؟
والكل ناظر بـ نوره ينتظر منها جواب
نوره ابتسمت : حامل حبيبتي
تعالت اصوات الحريم: ماشاء الله - الف مبروكك - شهر كم؟
ام عواد : اهب ياوجه ابك حامل كيف ؟
ام سحاب وهي منسدحه : اذكري الله يالنحوت وانتي يانوره اشربي من فنجانها واحفظي اذكارتس
ام عواد : ماشاء الله بس كيف يعني حامل
نوره : وش يعني تبيني اذكر التفاصيل ياقلبي ؟
غدير انصدمت وعضت شفايفها من نوره الي طلع لسانها الي مخبى لايام
ام عواد : شكلك طويله لسان
نوره : ياحليلك ماشفتي شي لساني يطول اذاني انتبهي منه واكل الانسان بلساني
ام عواد : عوذه منك الله يكفينا شرك عويذ الله من شرك يالبليه
نوره ابتسمت : وشرك
ام عواد : ماش مارتحت لك
نوره : ولا انا شعور متبادل حبي
ام عواد ناظرت نوره من فوق لتحت وراحت نوره تقهوي
___________________
( بـيـت ابـو عـبـد الله - ١١:٤٣م )
بهاج طقت كبده من الحريم الي من صباح الله خير ماراحو لحد الان وطلع من البيت
نوره جالسه بين الحريم بتعب جسدي من ركضها يمين يسار تقهوي الحريم وتعبها النفسي من تقييم الحريم لها ولشكلها وللبسها وغير تعليقاتهم عليها من عرفو ان هيام كانت خطيبه بهاج ولو مادخلت نوره حياه بهاج كان بهاج زوجته رسمياً هيام
غدير جالسه تهوجس بوجيه الحريم
وئام تقيم اوتفيت الحريم الي عباره عن قمصان روز
ام عبدالله توهقت بالحريم الي مو راضين يروحون من صباح ربي
ام سحاب غفت بينهم من التعب
وشوي شوي راحو الحريم وتنهدو براحه من راحو الحريم
ام سحاب قامت واشرت على فنجان : جيبي لي هالفنجان ياوئام
وئام اشرت على الفنجان : هاذا؟
ام سحاب : اي هو هاتيه
وئام خذت الفنجان واعطته ام سحاب ونطقت ام سحاب : بهيج وينه مختفي ؟
نوره : اخر مره شفته يلعب سوني
غدير : لا طلع يقول كان بخاطري اشوف شكل نوره بس ماش الحريم وزوارتهن الطويله طفش وطلع
وئام : مالومه لو طقت كبده
ام عبدالله : ليش وش تبين به حنا موجودين
ام سحاب : لا بس بهاج تعرفين يعني له معزه خاصه
نوره بغيره ومزح : وانا ؟
ام سحاب : اوهه انتي غيرر
ابتسمت نوره ونطقت ام سحاب : بالله اتصلو علاه بشوفه قبل ارقد
نوره : تمام
خذت جوالها واتصلت عليه ورد بسرعه بشوق لها وقالت ان لازم يجي وفعلاً جاء
بهاج دخل : ادري ادري اشتقتو لي
غدير : لا بس نوره وام سحاب اشتاقو لك مسوي لهم شي شكلك ساحرهم
ضحك بهاج ونطق : بعدين وش هالضيوف الي طولو بغيت اخذ عليهم ايجار السكن !
ضحكو كلهم ونطقت ام سحاب : الحق ياولدي بقول لك شي
بهاج : اجيك يالنسيب
وتقدم بهاج وجلس جنب ام سحاب والتفت من شاف الكل يطالع فيهم وناظرهم
: خير مكتوب على جبهتي سينما ؟
نوره : لابس استغربنا وش هالحب الي نزل على جدتي فجاء شكلها ضيعت تحسبك حفيدها
ام عبدالله : وويلي لايكون وخيتي جاها زهايمر
ام سحاب همست لـ بهاج وقالت له السالفه من الي
تحمس بهاج ونطق : بالخدمه يالخالتي القادحه
وطلعت ام سحاب الفنجان
ام عبدالله : وش تبين بالفنجان ياوخيتي
ام سحاب : دقيقه بس بهاج شف شغلك
بهاج قام واتجهه لـ نوره وقام يدور حولها ووترها
نوره: وش فيك؟
بهاج وقف وراها : لا ولاشي
وتقدم مره لها وحاوط كتوفها بهدوه واستغربت : وش فيك؟ خرشتني تكلم؟
بهاج : لا مافي شي بس بتكي على كتوفك اعجبتني التكوه هنا
نوره : طيب فكني
بهاج : طيب عادي انا بتكي عليك كذا وين المشكله؟
ام سحاب : خل اقولكن السالفه
غدير : اسلمي
ام سحاب : ياطويلين العمر والسلامه انا ماترتحت لام عواد واسألتها هي صح تسأل غدير ووئام وتنطق بـ ماشاء الله بس لما تسأل نوره ماتنطق ولاتذكر ربها
ام عبدالله : يوهه عاد يقولون ام عواد عينها حاره
بهاج شد على نوره ويده على صدرها وكتوفها ويد على شعرها يمسحه ويسمي : بسم الله على حرمتي من عيونهم
نوره ارتبكت من مسكه بهاج وكلام جدتها وواضح بيسون شي نوره ماتبغاه
ام سحاب رفعت الفنجان : وعشان كذا نشرب نوره من فنجانها ونمنع العين والحسد
نوره : ووش دخل الفنجان؟
غدير : عادات قديمه للاولين لما يخافون من وحده تحسدهم يشربون من شي منها
نوره بشهقه : اشرب من نفس الفنجان حق ام عواد؟
ام سحاب : وصلتي خير
نوره : مستحيل!
بهاج : ماتبغى ياخي لحد يجبرها
ام عبدالله : بهاج جودها وانت ساكت ولا بتخسر ورعك ونوره
بهاج شد على نوره وكتفها : لاخلاص بجودها
ام سحاب : قهوو الشيخه نوره بفنجان ام عواد
نوره : مابغىى! بهاج فكني
بهاج : لا
نوره : تكفى فكني ابغاك عون صرت فرعون
بهاج : تقهوي تقهوي
ام سحاب : اطرحها بس يلا
نوره تتفلت : وربي مايطب فمي شي منها !
ام عبدالله : يابنت استهدي بالله
بهاج مسكها وجودها كويس ونطق : قولي لااله الا الله
نوره : لااله الا الله طيب فكني !
بهاج : ماقدر
واستمرو يحاولون بـ نوره الي رافضه تشرب من الفنجان واخيراً قدرو يشربونها بس مااكتفو
ام عبدالله : عندي ماء مقري عليه ياربه ينفع
ام سحاب : ايي جيبيه ينفع ينفع
التفت ام عبدالله : غدير روحي جيبي الماء الي بغرفتي
غدير هزت راسها برضى وراحت تجيب الماء
بهاج: اتركها؟
ام سحاب : لا
بهاج: ابشري
وجت غدير ومعها الماء المقري عليه
وخذته ام سحاب وصبت على يدها شوي وبدت تغسل وجهه نوره وشعرها ورقبتها وتسمي وتقرا عليها ونوره تصارخ وتهاوش
بهاج : مسحوره مسحوره
ام عبدالله: فال الله ولافالك
وغسلو نوره بالماء المقري عليه خايفين عليها من العين والحسد وتركها بهاج
والتفت نوره له وضربته وهو يضحك وهي تضرب الين رفع ثوبه وهرب برى البيت
ام سحاب : يلا روحي ارقدي عشان المفعول
نوره : جديده وش فيك علي؟
ام سحاب : خايفتن عليتس
ام عبدالله : معليه معليه
وام سحاب انسدحت وارقدت وراحت غدير ووئام ينامون وام عبدالله جالسه عند ام سحاب ونوره واقفه عند جدتها
ام عبدالله : بهاج وينه ؟
نوره رفعت كتوفها : مدري طلع
ام عبدالله : اي زين روحي ارقدي
نوره هزت راسها : ابشري
وراحت نوره
___________________
( غـرفـه بـهـاج - ١:٢٣ اليل )
نوره نتنظر بهاج بس مايرد عليها وتنهدت وقامت فرشت سجادتها تصلي قيام اليل
دخل بهاج بهدوء ويتوقع ان نوره نامت بس شافها تصلي قيام اليل ابتسم ووقف عندها
سلمت نوره والتفت عليه وهي تقرا ايه الكرسي
بهاج ابتسم : في حركه حنونه احبها
نوره : وش هي؟
بهاج تقدم ونزل مستوى نوره وحط راسه بحضن نوره وهي جالسه على سجادتها ابتسمت نوره تلعب بشعره : وين كنت وليش ماترد
بهاج طلع جواله من جيبه : عانيه طافي شحن
سكتت نوره واستمرت تلعب بشعره وطلع بهاج شوكلت من جيبه : حسيت انك زعلانه علي قلت اراضيك
نوره خذت الشوكلت : يروحيي افف وشدراك اني اشتهيته اليوم؟
بهاج بضحكه : خابزك على يدي اعرفك
نوره فتحت الشوكلت واخذت قطعه وحطتها بفم بهاج واكلت قطعه
وبدت نوره بحركتها الحنونه الي يحبها بهاج الي هي تحصن نفسها وتحصن بهاج معها وتقرا عليه وتمسح شعره واذا خلصت تبوس جبهته بحب
نطق بهاج بعد ماباسته نوره : بكل ثقه اقولها انتي ماتتعوضين
نوره ابتسمت : ولا انت
بهاج : اعميت عيني عن جميع الخلايق افز لك واهيم لك وانتمي لك
نوره بأبتسامه: بهيج خيرو ماعرف اردد
بهاج بضحكه : بهيج تكفيي
نوره : طيب خلك معي انت الوحيد الي ماودي يتركني
بهاج مسك يد نوره الي على شعره ومسحها بحنان ونطق : انا معك وين ماتروحين انا معك واذا تركتك اترك روحي ماقدر اعيش بدونك
نوره ابتسمت تشد يد بهاج بحب
بهاج باس يد نوره ونطق : وجودك بحياتي من الاشياء الحلوه الي خلتني اؤمن بأن صدف الحياه ممكن تكون جميله
نوره تنهد : بهاج اصبر عرقت من الكلام الحلو ماعرف ارد
بهاج قام والتفت لها : يلا قومي نامي
نوره ابتسمت وقامت معه ونامو
~ الصبح ~
بهاج قام وطفى المنبه والتفت لـ نوره النايمه بعمق وابتسم لان واضح انها متهنيه بالنومه
بهاج بهمس : يالبى قلبك
قام وغطى نوره وراح يغسل ويلبس بيروح للدوام ولبس وخلص واخذ جواله وطلع وسكر الباب بهدوء واره
___________________
( بـيـت ابـو عـبـدالله - الظهريه )
ام سحاب جالسه تسولف وتاخذ وتعطى واسترجعت صحتها
وام عبدالله في اسعد لحظات حياتها ان اختها تاخذ وتعطي معها
وغدير جالسه تدرس وئام الي مو راضيه تفهم
غدير بنفاذ صبر : يابنتي ١ ضرب ١٠ كمم
وئام : ٩!
غدير : ياليللل عاد ماقول طرح اقول ضرب اضربي اضربي
وئام ضربت فخذ غدير : ها ضربت
غدير : لا لا اضربي الرقمم
وئام سكرت الكتاب : خلاص بعدين اذاكره
ام عبدالله بضحكه : سبحان الله وئام وبهاج دلوخ مايفهمون
غدير فتحت الكتاب : الله يصبرنا عليهم بس ، ذاكري بهاج يقول دابلين قاعه كبده بالاتصالات انك ماتذاكرين ولاتحلين واجباتك !
وئام تنهدت : افف الرياضيات صعب ماعرف
غدير : اوجدي قيمه x
وئام : الاكس ماله قيمه
غدير ضربت راس وئام بخفه : عقلك وينن ؟
ام سحاب : نوري وينها؟
ام عبدالله : قبل يروح بهاج لدوامه قال انها نايمه
ام سحاب عقدت حواجبه بأستغراب : غريبه راقده لظهر؟ مو من عوايدها
غدير : عوضي عن قيمه x
وئام : مابيي
ام عبدالله : المسكينه من تعبتي ماطب عينها النوم وفوقها تعب الحمل
ام سحاب : يابعد تسبدي والله
غدير : نرجع ١ ضرب ١٠ كمم ؟!
دخل بهاج : ١١
غدير رفعت راسها وناظرت بهاج : جاك الدلخ الثاني
بهاج ضحك وسلم وردو السلام وجلس بينهم ويسولف مع ام عبدالله وام سحاب
غدير تقرا السؤال: يابنتيي طيب طلعي الازواج المرتبه للعلاقه العكسيه ؟!
بهاج التفت عليهم : سهله هم ازواج طلقيهم
غدير : جهود لايذكر ولايشكر
بهاج بثقه : لاداعي لاداعي
وئام : بهاجوه تعال انت فتحت باب التدريس تعال درسني اشوا من غدير
بهاج لف جسمه كله لهم وجلس عندهم وسحب الكتاب ونطق بثقه: معك المدرس الخصوصي بهاج بن مطلق
غدير : كدينا خير
بهاج ناظر المسأله ويميل راسه ويحاول يفهمها ونطق بهمس : والله والبلشه
وئام تناظر فيه بأمل وغدير تناظر فيه بتحدي
بهاج : يقولك اوجدي النظير الظربي للعدد واحد على خمسه
غدير : ايوهه
بهاج : ركزي ياوئيم يعني شقلبي العدد تصير خمسه على واحد وانتهينا مايبي لها صراخ وهواش وملعنه خير
وئام صفقت بيدينها بتعزيز : اوههه كفوو اختصرت ام الدرس علي
بهاج : لاداعي لاداعي
غدير : الحين سؤال لكم جميعاً الحين ياوئيم كيف وصلتي ثاني ثانوي وانتي ماتعرفين تضربين وبهيج انت كيف صرت لواء!؟
بهاج : دعاء الوالدين
وئام : معتمده على الله ثم خويتي الدافوره
غدير : ويافقع كبديي
بهاج ابتسمت ونطق : يلا عاد اعطيتكم وجهه زياده عن اللزوم وبروح للوليفه جعلني ماخلا منها
غدير : رح رح
ام سحاب : علمً يوصلكم ويتعداكم اول يوم برمضان عندي والكل معزوم
بهاج قام وجمد مكانه ونطق : خالتي انتي تعبانه كيف ؟
ام سحاب : والله مالتعبان الا انت ابك احد يقول لخالته تعبانه؟
بهاج : خلاص انا اسف
ام سحاب : الخلا
بهاج كتم ضحكته وطلع
ام عبدالله : ياوخيتي تعب عليك
ام سحاب : لاتعب ولا شي مالكم شغل الي عليكم تجون كلكم
ام عبدالله : بجيتس بدري اساعدتس
غدير : اي واسوي الذ فطاير
ابتسمت ام سحاب برضى
___________________
( غـرفـه بـهـاج )
دخل بهاج الغرفه والظلام والبرد مالي المكان سكر الباب ونطق
: احوهه يالبرد ابك مانتي صاحيه نايمه بهالبرد
لكن لا رد من نوره والغرفه هاديه
وشغل اللمبات وفتح الستاير ونطق : خلاص عاد قومي اشتقت
نوره بنوم : هاه
بهاج : قوميي يابنت اشتقت
نوره عدلت النومه ونامت
بهاج كشر : يملا العافيه علامك ماتبين تقومين ؟
نوره بصوت مليان نوم: بهاج تكفى اتركني بنام شوي
بهاج تقدم وسحب البطانيه : قوميي
نوره تسحب البطانيه : يانكدي مابغى اقومم
بهاج : وش الي جاك صايره تحبين النوم
نوره : مو شغلك سكر اللمبات وانقلع
بهاج ميل شفايفه بصدمه : الهرمونات ضاربه اليوم ؟
نوره : دامك تعرف اتركني عشان مانتهاوش
بهاج ضيق عيونه : قومي يلاا لااجيب ملوكه وسلوم يقومونك
نوره : بسطرك
بهاج : اجل ارقدي واذبحيني بالشوق
نوره تنهدت وحطت المخده على راسها من بهاج الي ازعجها
بهاج كشر بمزح : تحسبيني ميت عليك؟
نوره : اي نشوف
بهاج لف وشغل السوني والتفت لـ نوره : قوميي اشتقت يلا
نوره : وين الي يقول ماني ميت عليك؟ مامدى
بهاج : انا كذاب اذا قلت ماني ميت عليك ابك انا اشتاق لك بالحيل قومي
نوره ضحكت وغطت وجهها بالبطانيه : مابغى اقوم خلك تموت من الشوق
بهاج مسك اليده حقت السوني : قومي العبي معي قيم
نوره : ماعرف
بهاج التفت لها : قومي غسلي وصلي الظهر وعيني من الله خير وتعالي اعلمك
نوره فزت ونطق بهاج: بسم الله عليك علامك فزيتي؟
نوره : الظهر؟؟
بهاج : قده بيصك العصر ياختي
نوره : كذاب ! الظهر؟
بهاج : شوفي جوالي عندك عاني الساعه كم
نوره شافت جوال بهاج وسحبت تشوف الساعه وانصدمت انها نامت للظهر!
: بهاج خيرر ماقومتني ؟
بهاج: مدري شفتك نايمه بعمق قلت خلها
نوره : لاا اكيد جدتي خافت
بهاج: لا معليك
تنهدت نوره وقامت تغسل وتوضى ولبست شرشف الصلاه وفرشت السجاده وكبرت وصلت وبهاج يلعب سوني
وسلمت نوره وجلست بسجداتها تتأمل بهاج وصراخه بسبب اللعبه
بهاج التفت لها وشال سماعه الراس عنه : ناديتيني ؟
نوره ابتسمت وهزت راسها : لا كمل لعب
بهاج ابتسم وطفى السوني ونطقت نوره : ليه؟
بهاج : امشي تحت سوالفهم ثقه وغدير ووئيم يتهاوشون على كتاب الرياضيات
نوره : يروحي ياغدير دايم تاكلها
بهاج : اقولك بغت تسطرني
نوره : تستاهل اكيد خربت عليها
بهاج ضحك : والله الصدق اني حست عليها شرحها كله
نوره : يروحيي
بهاج : يلا قومي سنعيهم اخبرك دافور
نوره : يلا دقايق
بهاج ضحك وقام ومد يده لـ نوره تقوم ومسكت يده وقامت ومشت جنبه وحط يده على كتوفها يمشي معها ونزلو من الدرج وشافو غدير طالعه من المطبخ معها كوب ماء وقافله معها
بهاج بهياط : تعالي تعالي
غدير التفتت له: خير ؟ من ظهر ربي تهايط؟
بهاج يحارش غدير ونطق : ليش تزعلين نوره؟
نوره التفت له بصدمه : وش ؟ متى ؟
غدير عرفت انه من كذبات بهاج وواضح مشتهي يهايط اليوم
بهاج ضحك من نظراتهم لـ بعض ومسك تيشيرت غدير بهايط : اسمعيني يابنت الاجاويد لاتتعرضين نوره
غدير دفت بهاج عنها : تقلع
بهاج التفت لـ نوره ومسك فستانها من عند الصدر بهياط : اسمعيني يابنت محمد لاتتعرضين غدير
نوره حطت يدها على يد بهاج الي على صدرها تحاول تفك يده عنها : بعد عني
غدير : وخر عنها يابزر
بهاج ضحك : والله لو تحاولين تفكين يدي من هنا لبكره ماتقدرين
نووه رفعت حاجبها بتحدي: تحداني؟
بهاج شد على مسكته : اتحداك
نوره بصراخ : خالتيييي جديدهه شوفو بهاجج
طلعو ام عبدالله وام سحاب وعصبو من شافو بهاج ماسكها
بهاج ملامحه جمدت بصدمه
بهاج تركها : كيد النساء والعياذ بالله
ام عبدالله وماسكه زنوبتها : علامك تولجتها ؟
بهاج : دقيقه خل ابرر
ام سحاب : مافي تبربر شفنا كل شي
غدير : تستاهل خل الهياط ينفعك
ام عبدالله رمت عليه الزنوبه : انطق تكلم
بهاج يحك مكان الضربه بألم : حسبي الله على ابليس
التفت لـ نوره الي نطقت : خلاص والله صدق كان يمزح مابيننا شي
بهاج رفع يده بأنتصار : ظهر الحق وزهق الباطن ان الباطن كان زهوقا
ام سحاب : والله المفروض نجلد نوره على هالعمل ابك دامكم تمزحون وراتس تصارخين ؟
نوره : بوريه كيف كيد النساء
بهاج : الله يكفينا شره بس بغى يعدمني
غدير : افف متى يشتغل كيدي بس
بهاج غمز : شغليه على نيوفي
غدير تحاول تخبي ابتسامتها ونطق بهاج : ترى راعي الهوى مفضوح
نوره : احرجت البنت حرام عليك
ضحكو ورجعو للمجلس ونوره وغدير ماسكين وئام يشرحون لها وبهاج يخرب عليهم بشرحه الفاشل المبسط
نوره : بهاج يرحم والديك تكفى لاتحوس علينا
غدير : شيلي حبيب قلبك تكفين
وئام : معليش بس شرح بهاج افضل
بهاج تكى بثقه
نوره : اي عشانه يهبد لك اي كلام
وئام : الاستاذ بهاج الافضل
بهاج شاش راسه وقام : حييي عينكك ياشيخه قومي قومي الدرس والشروحات لاحقين عليهم
نوره : بهاج ! انثبر
وئام : اقول بعدين نذاكر
بهاج : بعدين بعدين الحين انا والشيخه وئام بنتمشى
غدير تخصرت : خير ؟ وانا ؟
بهاج ابتسم : وهو انا اتركك خواتي ؟ مستحيللل
نوره ابتسمت وهي تناظرهم حاضنين بهاج
غدير يمين بهاج ووئام يسار بهاج وحاضنهم وناظر نوره ورفع حاجبه : قومي شاركينا وكملي الحضن
ابتسمت نوره وقامت ووقفت قدامهم استحت تحضن بهاج قدام خالتها وسحبتها غدير اتجهاه بهاج وحضنهم بهاج ثلاثتهم ونطق : ياحبي لكم بس
ابتسمت ام عبدالله وهي تشوف ام سحاب رجعت لـ التصوير وبقوه
بهاج : ماودكم نتمشى؟
غدير ووئام : ايي
بهاج : ونوره وش رايك؟
نوره : والله مابغى اطلع اي مكان روح انت وخواتك تمشو واستانسو
بهاج تنهد : لاا قولي غيرهاا
غدير : نوريي لا ماتحلى الطلعه الا معاك
بهاج رفع حاجبه وناظر غدير بطرف عين ونطق : ياء التملك هاذا حقي كم مره اقول؟
غدير: يوهه مو وقتك
بهاج : الوكاد يلا انتظركم كلكم بالسياره
والتفت : يمه خالتي تمشون معنا نتمشى؟
ام عبدالله : كيف خالتك
ام سحاب : والله اني عاجزه ياوليدي خذ نوره لاتتركها هنا
بهاج ابتسم والتفت لـ نوره : بنت يلا قومي البسي
نوره : تعبانه مابغى اطلع
بهاج : وش المتعبك طيب ؟
نوره : مدري
بهاج تنهد وتخصر : وشلون يعني تبين تحرمين البنات من الطلعه؟
نوره : مو قصدي احرمهم رح انت وياهم
غدير: قومي عن الدلع بس
بهاج : حلو حلو تبيني اجبرك يعني؟
نوره : لا
بهاج تقدم وشال نوره بحضنه ونوره تضحك ونطق بهاج : اني داري انك تبيني اشيلك
نوره ضحكت بسعاده وبهاج يحب هالضحكه منها وضحك معها وللبنات يضحكون
نطق بهاج وهو يناظر ضحكه نوره : اصير لك ضحكه بس لاتختفي ضحكتك
ابتسمت نوره وخدودها صارو حمرا
بهاج : غدغد قومي جيبي عبايه هالعوبا
غدير ضحكت : ابشر نجيب عبايه العوبا
ضحكت وئام : بزرانن
بهاج : وش نسوي بالبزر هاذي
نوره : اجل نزلني
بهاج : لا
ابتسمت نوره وطلع بهاج وبحضنه نوره شايلها ووقف بالحوش ونزل نوره ينتظر وئام وغدير يلبسون عبايتهم ويجون
جت غدير واعطت نوره عبايتها وراحت تلبس نقابها
ولبست نوره عبايتها ونقابها والتفت لـ بهاج: حلو؟
بهاج تقدم ورفع النقاب شوي ويعدل النقاب : كذا حلو
نوره : تمام
بهاج : يلا امشي اركبي السياره
نوره : جوالي بجيبه واجي
بهاج : تمام جيبي جوالي معك وتلقيني بالسياره
نوره هزت راسها برضى ودخلت تجيب الجولات وبهاج ركب السياره وجت غدير ووئام وركبو ورا وجت نوره ونطق : غدير تعالي قدام انتي الكبيره واخته
غدير : بس انتي زوجته اركبي
بهاج تكى : اذا خلصتو قولو لي
وئام : ياحليلي وانا الصغيره ودايم ورا
واستمرو غدير ونوره يلزمون على المكان وغدير رفضت
وركبت نوره بقله حيله
بهاج: الحمدلله خلصتو
ضحكو البنات وراحو يتمشون ويروحون كوفي واغاني وضحكات وابتسامات سعاده ولابد من مسكات يدين بهاج ونوره
ورجعو البيت على حدود المغرب بهاج نزل البنات وراح يصلي المغرب
دخلو البنات عقب مااشترو المول كله بحساب بهاج
نوره معها ٣ اكياس وغدير كيسين ووئام٤ اكياس والواضح انها براندات اكيد ان بهاج خسر ثروته
دخلو البنات ورمو الاكياس وتسدحو بالمجلس
ام عبدالله : وويلي علامكن مشتريات كل ذا
غدير : وش اسوي ببهيج قعد يكرم يكرم الين لقم
ام سحاب : عزتي له اكيد اخر مره يكرم
نوره بضحكه : واره بيت وعيال طرق يصرف
ام عبدالله : اي انتي مو مشكله يصرف عليك وعلى عيالك حتى لو مامعه الريال
ام سحاب : ذابحه الحب الولد
غدير : مالومه دامه طاح بنواره
وئام : احسدهه
نوره ابتسمت بأحراج وخدودها صارو حمرا من الحياء ماتعرف ترد
دخل بهاج وشاف نوره محمره ونطق : علامك غديتي طماطه ؟
ام عبدالله : ابد والله اطرينا حبيب الطفوله حقها
بهاج عقد حواجبه وجلس ونطق : حبيب طفوله ؟ مين ؟
غدير تعمدت تثير غيره بهاج : ايي حلو وطويل شفنا صورته تو
نوره ضحكت من الوهقه نظرات بهاج وتروها
بهاج فك ياقته وتنهد ونطق بحده : انطقوو وش اسمهه ؟!
غدير : وي يابهاج عادي مجرد حبيب سابق
بهاج ناظر نوره وهز راسه ينتظر اجابه
ام سحاب : اسمه بهاج بن مطلق
ضحك بهاج : مقلبكم نايمم
نوره : نايم؟ وانت متت من الغيره
بهاج كشر بمزح : ماغار
ام عبدالله : عيني عينك
ام سحاب : ماغار وبغى يفلم بنا عوذه
ضحك بهاج وقام: يلا بروح اشوف وش اسوي
نوره : وين؟
بهاج التفت واشر بيده : انتي تعالي
نوره قامت : ياحظيي في جدول يعني ماراح اطفش
ضحك بهاج ونطقت غدير: جدوله كله سوني
ضحكت نوره ومشى بهاج ومعه نوره للغرفه
وغدير ووئام يشوفون الملابس والاغراض الي اشتروها وام عبدالله وام سحاب يسولفون
دخل بهاج ودخل نوره معه وسكر الباب ونطق : اوعدك بجدول بطلل
نوره تكتفت : وشهو عاد؟
بهاج ابتسمت واتجهه للسوني وشغله والتفت لها : نلعب ضد بعض واشوف مهاراتك القتاليه
نوره تنهد : بس انا ماعرف!
بهاج: لا تعرفين اقربي بس
جلس بهاج بالارض وقدامه شاشه السوني وعلى راسه سماعه الراس وبيده اليده حقت السوني
تقدمت نوره وجلست جنبه والتفت لها بهاج وسحبها له واعطاها يده السوني الثانيه ولبسها سماعه الراس ونطق : انطلقي
نوره : طيب كيف اشغلها
بهاج بدا يعلمها كل خطوه باللعبه وعلمها كيف تشيل السلاح وترمي فيه وتنزله وهكذا
بهاج : فهمتي؟
نوره : ازهلنيي
بهاج : تمم نعلب ضد بعض
نوره : اجلدك
بهاج : الميدان ياحميدان
وبدا القيم وهم ضد بعض وبهاج اطلق على نوره وصرخت نووه : مين هاذا ؟
بهاج : انا انا
نوره : لاتذبحني حرام عليك
بهاج : هاذي اللعبه طيب
نوره : لا ماتذبحني
بهاج ضحك : تم يلا اذبحيني
نوره : يلا اوقف لاتهرب وتنط !
بهاج : لازم اهرب وانط عشان اتجنب اطلاقك
نوره : اوقفف بذبحك لاتحرك
بهاج وقف باللعبه ومع الاسف نوره ماقدرت تقتله رغم انه واقف
بهاج: صوبي على راسي اموت
نوره كان الايم عندها فاشل ماتعرف تصوب
ضحك بهاج وكملو لعب ودخلت نوره الجو رغم انها ماتعرف تلعب ولاتصوب زين الين قرر بهاج يدخلون فريق يساعدون بعض ودخلو فريق ولعبو
نوره : بنام
بهاج نزل اليده والتفت لها ومسح على خدها : ليش كثران نومك الفتره الاخيره؟ تتهربين من احد؟ احد يضايقك؟ علميني والله لاثور فيه
نوره ابتسمت ونطق : وشدعوا اتهرب ! لابس تعب الحمل وكذا
بهاج : لو اقدر شلته عنك شلته بس وش نسوي
نوره ضحكت : بهاج !
بهاج : عيون بهاج ، يلا يلا روحي نامي وبنام شوي
نوره ابتسمت وماترددت ابداً تبوس خده وبهاج تكى بذوبان : اهخ ارفقي بحالي تكفينن
نوره ابتسمت وقامت تنام وبهاج ماطول ونام
________________________
( بـيـت ام سـحـاب - اول يـوم رمـضـان )
ام سحاب رسمياً استعادت صحتها ولله الحمد نوره والبنات كلهم بالمطبخ يسوون فطور
الحريم جالسين بالحوش والرجال بحوش الرجال
وبهاج والعيال قافله معهم وجوعانين
والسعاده والاصوات ماليه المكان واصوات اطفال الديره في اول يوم رمضان
نوره : سهام وحشتيني مرهه!
سهام : اهخخ يانوره والله لو بيدي ماكان تركتك دقيقه بس وش اسوي انشغلت
نجلاء : يالطيبه انتي وياه الناس صايمه مو وقت مشاعر
نوره بضحكه : نجولل !
صيته جالسه فوق الطاوله وتلف سمبوسه : لو تزوجت بخلي زوجي هو يزين السمبوسه انهد ظهري حسبي الله
نوره ونجلاء مع بعض : عزتي لزيزو
صيته بلعت ريقها ورفعت راسها : عزتي والله الحقيقيه لـ ريودي وبوبو
الهنوف : لحظه في اسقاطه الحين بوبو وعرفناه بهاج ريودي مين وزيرو مينن ؟
صيته انقذت نفسها ونطقت: شخصيه خياليه
وداد بضحكه : مادري ياوخيتي دلع رائد ريودي شكله هو
نجلاء : لا دقيقه مو هو يع استغفرالله اللهم اني صايمه بس هاذا مشهور مشهور اسمع ريودي
صيته: واضحح
نوره : صح صح مشهور
غدير : لعنبو حيكم عادكم ماخلصتو؟ ابك المغرب بيأذن الحين
نجلاء ملابسها ووجهها كله طحين ونطقت:اجل تعالي يالسنعه سنعينا
غدير تقدمت تاخذ العجينه من نجلاء الي جايبه العيد فيها وهمست نجلاء
: ابن المحضوضه نيوف
غدير : بنت اعقلي
نجلاء : اقعددد تغارين؟
غدير: لا مايهميني
نجلاء : اي واضح
سهام : عزتي لـ غدير دام نجول تولجتها !
ضحكو البنات ونطقت نوره وهي تقرا جوالها : بنات! بنت عمي بتجي
نجلاء : مين بنت عمك؟ من متى عندك بنت عم ؟
صيته : لاتشوفها عيني بنت الي، استغفر الله اللهم اني صايمه
غدير : نوره بس بهاج بيرضى؟
نوره : مستحيلل لو درا اني اتواصل معها يهاوشني
الهنوف : طيب اذا ماتبين المشاكل اعتذري منها
نوره : هي جايه جايه الله لايعوق بشر بس تقول يعني بعطيكم خبر
وداد : طرار ويشرط !
سهام : طيب وش الدبره؟
نجلاء: طيب خالتي ام سحاب تدري؟
نوره : لا تكرها وان شافتها كفختها
صيته: عززز ياخالتي عزز
غدير : اذا خالتي وبهاج واحنا مو راضين كيف تجي؟
نوره نزلت جوالها : مدري بنات
نجلاء : والله والبلشه
نوره : بنات بقول لكم شي ، ترى انا وموضي تصالحنا بس بهاج مو واثق
البنات شهقو بصدمه
رن الجرس والتفتو البنات على بعض ونطقو : جت !
نوره : يمهه احس اني اليوم بيصير مشكله كبيره
غدير : تعوذي من ابليس
نوره : اعوذ بالله من الشيطان الرجيم
صيته لمحت موضي من دريشه المطبخ انها جايه ونطقت: الشيطان مقبل علينا
نجلاء: غريبه الشياطين ينحبسون برمضان الا هالشيطان
الهنوف : بنات خلاص جتت
وداد : ياحليلك ياالهنوف انتي وطيبه قلبك
دخلت موضي : هايي بنات
البنات : وعليكم السلام
تقدمت موضي ووقفت عند نوره : وشلونك يابنت العم
نوره بأبتسامه: الحمدلله تمام كيفك انتي؟
موضي : الحمدلله تمام
نجلاء كشرت وهمست: ماودي اقطع صيامي على هالاشكال
صيته بهمس : اللهم اني صايمه بس يذن اوريتس بها
نجلاء شبكت مع لهجه صيته : حيي عينتس والله
موضي : بنات عرفوني على انفسكم
صيته غمرت : المعروف لايعرف
سهام : انا سهام زوجه عبدالله اخو بهاج رجل نوره
موضي بأبسامه : اسمك حلو انتبهي لنوري دامك قريبه لها
الهنوف : الهنوف
وداد : وداد
موضي : عاشت الا سامي وعاد خوات بهاج النسيب اعرفهم غدير ووئام وانتي ؟ مين ؟
نجلاء تكت : انا مصفقه الورعان ومسطره الحريم اي بنت تأذي نوره سلقتها بالزيت مثل هالسمبوسه
حطت السمبوسه على الزيت وكملت نجلاء بحده :وحارس ومحامي نوره ويسموني ابو سالم
موضي : اوهه كلام قويي
نجلاء: وبخاطري اليوم اسلق وحده بس افطر واكمل صيامي وابشري
موضي عقدت حواجبها مافهمت وش مقصد نجلاء
نوره ضحكت بوهقه : خلاص بناتت يلا كملو
نجلاء سحبت نوره وطلعت برا مع صيته: بنتت ! وشلون نصرفها الحين؟
نوره : نجول صيوت خلاص البنت اعتذرت
صيته : يابنتي انتي صاحيه؟ كيف تنسين ؟ ليش كذا طيبه ؟مرهه ؟
نجلاء : نوره اذا صارت لك مشاكل تحمليها !
صيته : هاذي ماجت الا ووراها شي
نوره : بنات تكفون لاتضغطون عليي
نجلاء مسكت كتوف نوره : انتي متى تستوعبين؟ تبين تعيدين سالفه مشاعل؟
صيته: صحح كل الي صار فيتس بسالفه مشاعل عشانتس طيبه
نجلاء : العبره بالنهايات ست نوره ونشوف وش بيصر
صيته : ونشوف وش بتسوي خالتي لما تعرف انتس تتواصلين معها
نوره تنهد وقعد تناظرهم بهدوء عكس العواصف الي داخلها والافكار المشوشه ثابته تماماً مارف لها جفن مابكت ولادمعت زي عادتها
تنهدت نجلاء من شافت نظرات نوره : نوره حبيبتي حنا مانسوي كذا الا اننا تحبك
صيته : ايي اكيد
تقدمو البنات حضنو نوره ونطقت صيته: ابك علامتس ماعاد تصيحين زي كلعاده
نجلاء بضحكه : شكل بهاج علمها القساوه
ضحكت نوره وراحو يكملون شغلعهم
،
حوش الرجال ببيت ام سحاب
ابو عبدالله : يلا ياعيال باقي ربع ساعه ويذن قومو توضو
بهاج: متوضي
ابو رائد : اجل قم جب الفطور
بهاج : سم
وقام بهاج واتجهه للبنات يجيب الفطور
تنحنح بهاج عند باب المطبخ : يانوره
نوره طالعه ووجهها الوان وواضح مرتبكه وعقد حواجبه بهاج : علامك؟
نوره بربكه : هاه؟ لا لا ولاشي
بهاج : طيب تمام وين الفطور عمامي يبونه
نوره : ايي حق الرجال خلصناه بس كثير لازم واحد معك
بهاج رفع حاجبه : افا ياتنوره افاا ماتوثقين بقدرات رجلك حبيبك ؟
نوره : عشانك قلت تنوره مااثق
بهاج ضحك وتقدم: خلاص تم ادخل اجيبهم
نوره حطت يدينها على صدر بهاج تمنعه يدخل : لالا امزح انا اجيبهم
بهاج : لا انتي حامل ثقيل
نوره : وشدعوا ترا كلها كم حافظه
بهاج : طي....
طلعت موضي وصد بهاج على باله وحده من بنات عمه تنحنح عشان تنتبه له التفت نوره وشافت موضي واقف جنبها وبلعت ريقها نوره :روحي روحي
بهاج وهو صاد ومنزل راسه : اجيكم بعدين
موضي : شدعوا بهاج! جايه اتكلم معك بأخر موضوع تكلمنا عنه
نوره : خلاصص يابنتي روحي !
بهاج عقد حواجبه يحاول يميز الصوت الي كأنه سامعه ونطق : ماعندي لاحد موضوع اتكلم معاه الي يبغى شي يقول لنوره توصله لي
موضي : بهاج ! حنا على اتفاقنا اننا ضد عمامي
بهاج بلع ريقه بصدمه من عرف انها موضي : نوره ابيك
نوره اخذت نفس وناظرت موضي بعصبيه : ارجعي اجيك
وراحت نوره ورا بهاج الي دخل المجلس معصب : وش جابها هالمصيونه؟!
نوره : جت كذا محد عزمها بهاج لاتعصب علي مالي دُخل
بهاج جلس على الكنبه واخذ نفس يهدي نفسه ورفع راسه لـ نوره ومسك يدينها بحنان ويسحب نوره تجلس جنبه وابتسم : خلاص ياعيون بهاج انتي مابي اعصب عليك ولا بسوي حاجه لك علشان مالك دخول على قولتك
المهم محد يدري اني عصبت وسوي الي تبينه ولاتخافين مني علميني اول بأول ولا احد يقول لك بهاج لايدري او بهاج يعرف ؟ قولي لهم ايه يعرف وراضيي ولاياخذون اسم بهاج تهديد لك بالعكس خل يقولون علمي بهاج مو خبي على بهاج
نوره ابتسمت : خلاص مابخبي عليك وانت اول من يعرف مشاكلي بس هاذي مدري وش تبغى !!
بهاج : انتبهي منها ولا بقلب الدنيا كلها فوق راسها
نوره : لا استهدي بالله ولاتقلب الدنيا انا بقلبها الحين عليها
بهاج : لا انثبري ارتاحي تراك حامل
نوره ضحكت وابتسم بهاج : يلا بروح استودعتك الله
راح بهاج وابتسمت نوره واختفت ابتسامتها من دخلت هيام بعد ماطلع بهاج
نوره : خير؟
هيام : هو في خير بوجهك؟
نوره : يابنتي اجلي الهوشه بعد الصيام مو فاضيه اجرح صيامي
هيام : الله اكبر عاد يالصيام
نوره عقدت حواجبها : وش تقصدين ؟ يعني صيامي متقطع او شايفتني اكل ؟
هيام : والله عاد قصدي واضح
نوره قامت : اف بس ماودي اجرح صيامي على اشكالك ابعدي عن وجهي تراك ببيتي
هيام : بيت جدتك مو بيتك
نوره ناظرت لها وضحكت بسخريه وطلعت متجهه للمطبخ بعصبيه : وين حنا عايشين ست موضي ؟
نجلاء : نواره معصبه ليه؟
موضي : نوره لاتقلبين علي عشان رجال!
نوره : تطلعين عند رجال لاعبايه ولاطرحه ولا شي يسترك وتقولين لاتقلبين عليي انتي صاحيه؟!!!
غدير : ايشش؟ بهاج شافها ؟
صيته بضحكه : واذا شافها معليكم ماتفتنه بالعكس تخوف الولد وماينام عشر سنين قدام من يتذكر وجهها
نوره : علماً يوصلك ويتعداك ان شفتك توطوطين عند بهاج ولا حول اي واحد يحب او متزوج والله لااهدم هالبيت على راسك فهمتي ولا افهمك انسي نوره
موضي : نوره خلاص اسفه ماكان قصدي ماتوقعت انك تغارين كذا
نجلاء : ليش هو انتي كاسره صحن يوم تتأسفين؟
صيته : انتي طلعتي عند رجلها بدون عبايه ولا والي
غدير: تخيلي اني اطلع لرجلك؟
الهنوف : بنات خلاص استهدو بالله صيام صيام خلو مشاكلكم بعد الصيام
نوره تنهد وطلعت على جيه بهاج ونطقت : نعم وشبغيت جاي ؟!
بهاج : علامك معصبه؟
نوره : وماتبيني اعصب وانت واقف عند الباب ابعد عن الباب ومااعصب
بهاج ضحك من غيرتها ورجع ورا : خلي غدير ووئام يجيبون الفطور
نوره : طيب
ودخلت واخذت الحافظت حقات الرجال والكل خايف يتكلم معها عشان ماتنفجر عليه وطلعت لـ بهاج : امسك
بهاج اخذ الحافظات : كم مره قلت لاتشيلين الثقيل ؟
نوره : خلاص بهاج لاتزودها علي
بهاج ابتسم ونطق : باقي حافظات ؟
نوره : ايي باقي خمسه بعد
بهاج بصدمه : خمسه ليه؟
نوره : سوينا سبع حافظات سميوسه وفطاير وشروبه وكذا
بهاج: السناعه ذابحتكم يلا برسل رايد يجيب الباقي انتبهي تطلعين
نوره : تمام
وراح بهاج : رايد واحمد قومو جيبو باقي الحافظات
الجد عبدالرحمن: افا باقي ؟ ثنتين يكفون شوربه وسمبوسه
بهاج: البنات صايرين سنعات وضبطو هاذا كله
ابو عبدالله : والله موب هينات ماشاء الله عليهن
ابو صيته : هن سنعات بس مايحبن الي يضغط عليهن
ابو نايف : ايي الي عندي ماتحب احد يقول لها قومي جيبي ودي ماودها
ابو نجلاء : كلش الا ابو سالم نجول لاهاذي ولاهاذي عزتي له الي بياخذها
بهاج ناظر رائد الي تعدل ونطق بهاج : ياعم ممكن الي يبي يتزوجها يحب الكشخه مايبيها سنعه
ابو عبدالله رمى علبه المناديل على بهاج : ابك عيب تقول ذا الحتسي
بهاج حك راسه مكان الضربه: اللهم اني صايم ، ثم يارائد انت والدلخ الي معك
احمد : انا ولا الاستاذ عبدالله ؟
عبدالله: وهو صاحي يقول لاخوه الكبير دلخ اكيد انت
محمد : عزتي لـ احمد مضطهد من عيال مطلق
احمد : تشوف؟ اخيراا احد لاحظ الاضطهاد الي انا فيه
رائد : ياصبر الارض قم بس
احمد التفت : عمي مطلق عان عيالك يضطهدوني حرام عليهم انا اخوهم الصغير
ابو عبدالله ضحك ونطق : يابهيج وعبود لاعاد تقولون لاخوكم الصغير شي
بهاج : قصير ودب كأنه اسطوانه غاز
احمد ضحك لانه يتقبل المزح بجيمع انواعه وهاذا الي يحبونه بأحمد
نايف يبي يرد الحركه لـ بهاج : طويل ونحيف كأنك عامود كهرباء ؟
بهاج : ورع انا النسيب !
نايف تذكر انه اخو غدير ونطق : اوه معليش يالنسيب انا العامود موب انت
عبدالله : قوموو جيبو الفطور بيذن والفطور ماقد جاء
وقام احمد مع رائد واتجهو للمطبخ بعد مافرفرو بيت ام سحاب يدرون المطبخ ويتنحنحون
البنات من سمعو صوت رجال ينطقون بـ ياولدد الفطور ارتبكو البنات
غدير : نجول انتي ماتتغطين وهو اساساً اخوك روحي اعطيه
نوره : ايي صدق انقذينا
نجلاء: بس معه واحد
صيته: وهو انتي بالاساس تتغطين عنهم؟
نجلاء: لا انا برمضان اتغطى
نوره : الله اكبر يابراعم التقوى قومي بس
نجلاء ضحكت وسحبت شرشف صيته الاحمر وتغطت واخذ نص الحافظات وطلعت
احمد ورائد صدو ونطقت نجلاء : ورع ماني جارحه صيامي خذ الحافظه وتقلع
احمد رفع راسه يناظرها متغطيه : ابو سالم اسلم
نجلاء كشت بوجيههم ودخلت واخذت الحافظات وطلعت ونزلتهم عندهم ودخلت
رائد يحاول مايرفع راسه يشوفها
احمد : خذ خذ يابو راس
رائد: طالع منها يابو صنادح؟
واخذو الحافظات ورجعو للرجال يزينون السفره والتمر والماء
والبنات يزينون السفره والحوش بالاضاءت
واخيراً اذن المغرب
وهمسو بـ : اللهم لك صمت وعلى رزقك افطرت ذهب الظمأ وابتلت العروق وثبت الاجر ان شاء الله
واكلو التمر والابتسامات والضحكات والقلوب النقيه بس محد لاحظ اختفاء موضي
الرجال اكلو تمر وشربو ماء وقامو يصلون المغرب جماعه بالمسجد الي قبال البيت
والبنات يصلون بغرفه نوره والحريم بالمجلس
وانتهت الصلاه وجو الرجال وافطرو شوربه وفطاير والحريم يفطرون
وانتهو من الافطار والعيال تسدحو مكاناتهم
والبنات شوي ويبكون من قالو لهم يلا غسلو المواعين وسو حلا لصلاه العشاء
نوره القائد المدبر للمشاكل جمعت البنات بغرفتها
نوره : بنات عندي خطه نسوي حلا والعيال يغسلون المواعين
نجلاء: منجد بنات من اليوم جالسين لاشغل ولامشغله!
غدير : طيب ومن يقنع العيال يغسلون؟؟
صيته: حبيبتي انتي مادريتي؟ زيد وبهاج ورائد غسلو بيت نوره وهي متكيه
وداد : حيوان رائدوه اجل غرفته ماينظفها كيف نظف بيت نوره ؟!
نجلاء : شغلنا كيد النساء وخليناهم ينظفون حرام نوره مسكينه حامل ماتقدر تنظف البيت قلنا نجيبهم ينظفون
نوره : بنات اسمعو الخطه
وئام : اسلمي
وبدت نوره نقول الخطه واتفقو البنات وحطو يدينهم ببعض وقامو متجهين لقسم الرجال ونطقت نوره : عمي مطلق
فز ابو عبدالله وطلع : سمي يابنتي
نوره تغير وجهها وحولته لملامح برائه : عميي انصرنا تكفى انا داخله على الله ثم عليك
ابو عبدالله : سمي ابشري بي
نوره : ابغاك تجمع عمامي كلهم بقول لهم شي
تقول لهم عمامي عشانهم بحسبه عمامها
ابو عبدالله : ابشري ياعيون ابوك
ودخل ابو عبدالله ونطق : ياخواني نوره تبيكم
بهاج فز : علامها لايكون ولدت بدري
زيد مات ضحك ونطق عبدالله : لاياغبي ماتولد المره بالشهر الثاني
رائد: ماهي ارنب تولد بـ ٤٠ يوم
بهاج التفت: ورع !
قامو الرجال وطلعو لنوره الي وراها كل البنات
ونطقت نوره : عمامي حبايب قلبي انصرونا وانقذونا
ابو رائد: ابك علامك ليكون تعبتي من الحمل ؟
نوره : لاياعم
ابو نايف : اجل خل ننادي بهاج يوديك المستشفى ياربك تطيبين
غدير : عمامي حنا تعبنا وحنا كرف من الصبح وحنا بالمطبخ
ابو عبدالله : ايي بالله ماقصرتو تسلم هالايادي
ابو صيته: اجل وش بغيتو
طلع بهاج وزيد بشفايه وسمعو نجلاء تقول : العيال ينظفون مواعين
ارتبشو بهاج وزيد ونطق بهاج : يلا سلام توصون على شي بطلع عندي شغل
زيد : ايي وانا مخاوي بهاج
نوره : لا ابغى بهاج وزيد هم الاساس
ابو عبدالله : تم نخلي العيال كلهم يغسلون المواعين دامكم تعبتو
نطو البنات بفرحه وضحكات وبهاج وزيد يحاولون يهربون بس لعل ابو صيته صادهم قبل يبدون مشروعهم
كل وحده من البنات حضنت ابوها ماعادا نوره الي وقفت وشافها بهاج وفتح يدينه : تعالي
نوره ابتسمت وتقدمت حضنته : افف احبك
زيد تنحنح : ياولد
بهاج : كل سلح خربت على اللحظه
نوره ضحكت : يلا ناد العيال ينظفون
بهاج تنهد : تنوره !
نوره : بعاجوه!
بهاج: طيب تهربيني ؟
نوره: وين اهربك ؟
بهاج : اي صح انا اهرب نفسي
نوره عقدت حواجبها بعدم فهم وبعدها عنه والكل التفت لـ بهاج الي طلع الجدار
ابو عبدالله : ابك انزل يامهبول!
بهاج تكى فوق الجدار : هايي كيكرز
طلعو العيال على اصواتهم الي يهاوشون بهاج ودخلو البنات من شافو العيال
ملاحضه وتوضيح بهاج طلع على الجدار الي يفصل بين قسم الحريم وقسم الرجال يعني الحريم يشوفون بهاج والرجال يشوفون بهاج
ام سحاب : ابك هالولد اشك انه قرد ابك كل ماشوفه القاه فوق الجدار
ام عبدالله : ي بهاج انزل
بهاج التفت: اوه يمه؟
ام عبدالله : لا يبه
ام نجلاء: ياسكني انزل لاتتعور
بهاج: عمتي صدقني ماسوي كذا الا اني اتعرض لخطر في الارض
ام رائد: ومن الخطر الي يهددك؟
بهاج : نوره وشلتها وعمامي
ام سحاب : ابك انزل فضحتنا ياحمار القايله
بهاج ضحك: ياخالتي انا ماتخطريت يوم اسوي فيكم مقلب وتقولين حمار القايله انا ماتخطريتها شلون بتخطرى هاذي؟
رائد : ابك علامكم ؟؟
بهاج: هج ياولد عمي هج بيخلونك تكرف ونتفخ
رائد: اعوذ بالله
وطلع رائد مع بهاج
بهاج ضحك : مع الخيل ياشقرا
نجلاء : انزل انت وياهه !
نجلاء لابسه قميص روز ازرق مغصوبه عليه وكان جنبها مخده قماشها روز وزرقاء
والتفت رائد: وش هالمخده الي تتكلم
ضحكو العيال بتعزيز لذبه رائد
نجلاء : بالله بنات دغدغوني خلوني اضحك
نوره : يابنتي لو ندغدغك من هنا لبكرا مستحيل تضحين ذبته نايمه
غدير : شهاده حق مايلحقها زور
بهاج: شهاده الزور كله انتي ونوره
نوره: اسكت
بهاج: ابشري
والرجال والعيال من جهه يحاولون يطولون بهاج ورائد والبنات والحريم من جهه
وبهاج ورائد يهزون كتوفهم ويرقصون على هواشهم
ابو عبدالله : بهاج ان مانزلت ياويلك
بهاج: يايبه اذا نزلت تدبجني
ابو رائد: لا تعالو ومايصير لكم شي
زيد : من وجهه نظري لاتنزل
احمد : ايي نظراتهم تخرش وواضح ناوين كفوف لكم
بهاج: كلها من رائد
رائد: وجع وش دخلنيي !
واستمرو يحاولون وبهاج ورائد معطينها وضيعه "لااسمع لاارى "
طلع الجد عبدالرحمن : استدار راسي ابك وش جاكم
ابو عبدالله : شوفه عينك يايبه
بهاج ورائد فزو بخوف وينطقون بهمس : وجعلنا بينهم سدا ومن خلفهم سدا فأغشيناهم فهم لايبصرون
تقدم الجد عبدالرحمن : انزلو
بهاج ورائد سكتو من الخرشه وبلحظه سهو ونزلو رجولهم
تقدم الجد عبدالرحمن بلحظه سهو بهاج ورائد ومسك رجولهم ونزلهم
وطاحو بالارض
تقدمو ابو عبدالله وابو رائد ودبجو بهاج ورائد
بهاج جلس بتعب بعد ماكفخه ابوه : اللهم اني صايم
رائد يحك راسه ومنسدح على كتف بهاج: كل عام وانت بخير
عبدالله ضحك ونطق : من قوه الجلد الي جاهم واحد يحسب نفسه صايم والثاني يحسبنا بالعيد
نايف : عزتي لهم صدق
وقامو العيال زي الشطورين متجهين للمطبخ
بهاج يشمي بطريقه تضحك وماسك ظهره ويكرر : اهخخ ياظهري
رائد : حسبي الله على من تسبب بتكفيخنا
زيد: ابك جدكم ماعنده تفاهم
نايف : سريع سريع شغله
بهاج ماسك ظهره : والله ياكفخني ابوي تكفيخ
عبدالله : مالومه
زيد شاف مشيه بهاج : الظاهر الحامل بهاج مو نوره
العيال ضحكو ونطق بهاج: تشمتت على مشيتها ولعلي ابتليت
ضحكو العيال ودخلو المطبخ يغسلون المواعين
________________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
*اعتذر عن الاخطاء الاملائيه*
النجمه تدعم الروايه✨