سبحان الله وبحمده سبحان الله العظيم ♡
( بـيـت ام سـحاب )
بهاج يعدل شماغه : نوره بسرعه تجهزيي
نوره تلبس عبايتها : يلا ثواني بسس
ام سحاب : يلا عاد بالتوفيق
بهاج ابتسم واتجهه لـ نوره ومسك يدها بحنان : خلصتي يانور عيني ؟
نوره : ايي ياروحي
بهاج التفت لـ ام سحاب : تجين معنا ؟
ام سحاب هزت راسها : لا يانظر عيني انت وهي بس ها يانوره ان سمعت انتس تنازلتي انسي اني جدتتس
نوره تنهدت بضيق : لاتقولون كذا ماحب!
بهاج : لازم نضغط عليك يام دميعه عشان تستوعبين اهميه القضيه هذي!
نوره كشرت بضيق
بهاج ابتسم وطلعو وركبو السياره
بهاج بأسلوب جديه وتهديد : والله يانوره ان تنازلتي عاد مابحدد وش بسوي فيك اقلها اقلها بدفنك وانتي حيه هاذا اقلها عاد لك حريه التخيل بأكثر شي اسويه فيك ، بخليك تنصدمين وتنكرين ان انا نفسه بهاج الي مع نوره ، يانوره لاتحديني اقسى عليك وانا ماودي اضرك بمقدار ذره ماودي اضرك ويجيك اذا مني ماودي اصرخ واسوي المستحيل لاتحديني يرحم والديك تكفين طالبك طلبه لاتحديني اجي صوب الردي .
تنهد وسكت والتفت شافها تدمع ونطق بهدوء: لاتحديني تكفينن ماودي اشوفك متضرره مني تكفين يانوره تكفيننن لاتغلبك عاطفيتك طلعي عاطفيتك على جنب وخليك جديه وتذكري الصوره الي تسببت بضربك واذيتك ورفع السلاح بوجهك تذكري يانوره تشويهها لسمعتك تذكري كلامها عنك تذكري نظراتها تذكريي كل شي تذكري بهاج الي انجن من عرف بسالفه الفديو تذكري شخصيته هذيك الي القاسيه تكفين يانورتي لاتحديني اطلعها عليك وانا ماودي يجيك ضرو مني انا بوجهك .
نوره بدموع : لاتقولي كلام قاسي زي كذا ماتحمل يابهاج ماتحمل اتذكر الماضي مابغى بهاج اتذكرك زمان مابغى مابغى لاتقول كذاا وتهددنيي ، لاتهاوشني اذا انا عاطفيه وحنونه شي خارج عن مقدورييي انت اكثر شخص يدري ان الشي خارج عن مقدوريي بسألك سؤال طيب؟ وقلبه براسك
بهاج : ماقسيت الا عشان مصلحتك ،سمي اسألي
نوره : تقدر تتحكم بعصبيتك؟غيرتك؟
بهاج : اتفق اني ماقدر اتحكم على عصبيتي بس مااترك حقي يروح وهو بين يديني اذا ماوقفتيها عند حدها تتمادى وتأذيك وتأذي الورع وانا خلاص ماعاد فيني طاقه افقد جزء مني ومنك ماعندي طاقه اقسى عليك
نوره ناظرت فيه والتفت بهاج ناظرعيونها العاجزه عن القساوه بهاج ميل راسه : نوري ادري ضغطنا عليك بس هاذا الي لازم يصير، عشانك وعشان حياتك واذا ماتفكرين بحياتك فكري بحياه الطفل الي داخل بطنك
نوره شهقت ببكى: ماقدر قلبي ماتعود على القساوه
بهاج مسك على يدها وشدها : تقدرين انا معك اذا طحتي اساعدك ماتركك يانوره مااتركك وانتي بذمتي بساعدك
نوره سكتت تمسح دموعها وتهوي على نفسها وبهاج عقد حواجبه بضيق من اجبرها تقسي قلبها وهو مايحب يجبرها على شي وناظر الطريق بعصبيه وييحلف يمين بالله ان اذا شاف هيام باللحظه هاذي بيفرغ الرصاص براسها بس يحمد ربه ان هيام مو موجوده باللحظه هاذي وفضل الصمت عشان نوره ماتبكي ولاتتضايق من ملامحه وهو عارف وميقن ان كلامه قاسي وقوي على قلب نوره الحنون
وبعد مرور وقت بسيط وصلو الرياض وتنهد بهاج يقطع الصمت : نويري مستعده لـ رمضان؟
نوره التفت له : ايوا متحمسه اجهز البيت بالفوانيس والحركات
بهاج ابتسم من غير من نفسيتها : حلوو ابد ياعيوني ابشري نجهزه مع بعض والسنه الجايه بأذن الله نجهز البيت مع الورع
نوره ابتسمت : وناسه ونطقم مع بعض
بهاج ضحك : تخيلت شكلنا كلنا لبس واحد
نوره : ليه لايكون ماتحب هالاشياء البسيطه !؟
بهاج رفع حاجبه : افا وشلون ماحبه وبالشتاء مطقمين بلوفرات!
نوره : ايي تذكرت
بهاج : شي تحبينه انا احبه شي ماتحبينه ماحبه
نوره ابتسمت : بهاج! خير غش تجيب راسي ليه
بهاج : ابك انتي تغديتي على وجبتي راسي
نوره ابتسمت والتفت بهاج : ودك بقهوه؟
نوره : تدري يعني ماارد القهوه
بهاج ضحك: والله اني داري ماتخلين القهوه
نوره ابتسمت وبهاج اتجهه للكوفي وطلب قهوه له ولـ نوره ورجع ومد القهوه لـ نوره بأبتسامه ونطق : الخوف والتوتر بعيونك لاتتوترين دامك معي
نوره خذت القهوه ونطقت بنبره توتر : بهاج اعذرني اذا توترت وخفت اول مره اقسي قلبي !
بهاج ابتسم ومسك يدها : معذوره اكيد يحق لك تتوترين بس مايحق لك تتنازلين عن حقك
نوره هزت راسها برضى : تمام
واتجهو للمحكمه ونزل بهاج والتفت لـ نوره الجامده مكانها بخوف وتوتر عض على شفايفه واتجهه لـ باب السياره حق نوره وفتحه ونطق بهدوء : انزلي ماهو صاير الا كل خير
نوره : بهاج ماقدر !
بهاج سحب يدها ونزلها غصب ونطق : لاتقدرين !
نوره : بهاج خلاص روح خلص كل شي وانا بجلس بالسياره
بهاج : ودي ودي انجز كل شي بدونك وبدون عاطفيتك بس وش نسوي انتي الاساس
نوره تنهدت بضيق : اف منك ليش تكبر السالفه وترفع قضيه ؟!
بهاج ناظرها بحده : نعم؟ اشوفك تبكين وتاذيك واسكت؟ لايانوره ماهقيتك طقوع وخوافه تسكتين عن حقك
بهاج شدد على كلمه "طقوع وخوافه " عشان تشتعل وتثبت قوتها
نوره ناظرته بتحدي : ماني طقوع !
بهاج ضيق عيونه : اذا منتي طقوع اثبتي لي بالجلسه قوتك
نوره صافحت بهاج وشدت على يده ونطقت : ماكون بنت محمد اذا ما مسحت كرامه هيام
بهاج بأعجاب : حييييي عينك يابنت محمد جعلني فداك عز عزز
نوره ابتسمت والصدق كان مجرد هياط من نوره ومن داخلها عروقها توقفت من الخوف وبهاج واثق انها ماراح تخذله وتخيب ضنه
وجلسو ينتظرون جلستهم تبدا ومسك بهاج يد نوره الي كانت ترجف وشد عليها
: لاتخافين مدام راسي يشم الهوا وانا موجود معك وحواليك لاتخافين دام بهاج ومزون واقفين بصفك لاتخافين دامك بوجهي انا وخالتي !
نوره ابتسمت : اهخ يابهيج ياخي ودي اخبيك عن العالم ليش انت طيب قد كذا ليش تطيب خاطري وانت ماعكرته ليش تدافع عني حتى لو كنت على خطاء
بهاج ابتسم وضم كتوف نوره ونطق بحب : انتي عيوني الثنيتين لازم احافظ على عيونيي وصدقيني مالا داعي تخبيني عن العالم لاني طيب وحنون معك بس انتي وانا مع العالم شديد معهم لاتخافين محد ياخذ قلبي غيرك
نوره تنهدت بأبتسامه وحطت راسها على كتف بهاج وبهاج يهدي من توترها
________________________
(بـيـت الـعـم مـصـعـب )
خالد ملاحظ على موضي تصرفات غريبه وجوالها اذا احد مسكه تهاوشت معه وماتحترم احد وكأن احد يحرضها عليهم وشافها جالسها على جوالها : بنت
موضي ناظرت فيها وشمقت له ورجعت نظرها لجوالها
مصعب : بنت احترمي ابوك !
خالد انقهر من بنته الي تغيرت فجأه : اكلمك انا !
موضي : نعم ؟
خالد : علامك متغيره ؟
موضي تجاهلتهم وناظرت جوالها
مصعب بعصبيه : لاتكلم ابوك ناظرينه !
موضي ببرود : المره الجايه اناظر فيه
خالد : هيه انتي هاتي جوالك
موضى توترت وقامت : خيررر وين حنا عايشين عشان تاخذون جوالي !
مصعب : ماانفعلتي الا وراك بلا
موضى: ابي نوره !
الكل شهق نطق حمدان : كلنا نبيها مو بس انتي
مصعب بعصبيه : وش تبين فيها تبينها تخربك
خالد : البنت نوره خراب و شيطان و جنيه
موضي بصراخ : لافعلاً انا محتاجه نوره ! نوره تفهمنيي
حمدان : اي صح حتى انا تفهمني
خالد : احلمي بـ نوره شكلها ساحرتك زي ماسحرت بهاج
موضي بعصبيه : ابيي نوره ابيهاا !
مصعب : مافي نوره !
موضي رمت جوالها على الكنبه ونطقت : انا بنت انا بنت وبتفهمني نوره نوره اقرب لي منكم نوره ماتضرني مهما ضريتها انتم ضريتوها ٢٣ سنه ولاضرتكم بمقدار ذره حتى الكلمه مارمتها عليكم مااذتكم كثر مااذيتوها
خالد : لاتأذي ، اذت بنت عم بهاج ! هيام الحين من محكمه لـ محكمه وربي فكك مالحقتك
موضي : ماهو هي الي جرجرت هيام ! بهاج ، ابي نورهه !
مصعب : حلم إبليس بالجنه
ناظرت فيه من تحه لفوق وسحبت جوالها واتجهه لغرفتها وسكرت الباب بقوه
________________________
(الـمـحـكـمـه )
بهاج ونوره جالسين قبال هيام وابوها وامها وكانت نظرات اهل هيام ماهي طبيعيه وكأنهم واثقين ان هيام ماسوت حاجه ! وهاذا الي موتر نوره اما بهاج كان يعطي اهل هيام نظرات سخريه واشتمئزاز وقرف منهم وكأنه يقول لهم "اخر ايام هيام بأحضانكم "وهيام تناظر بهاج بحب رغم نظرات بهاج الناقده عليها الا انها تتدلع وتتمايع وتحاول تلفت انتباه بهاج ونوره ساكته ماتنطق بحرف ومتوتره وكيف تقسى قلبها
بهاج التفت لـ نوره وهمس بأذنها : تبين تقسين قلبك ؟ ناظري حركات هيام ويقسى قلبك
نوره رفعت نظراتها لـ هيام واتسعت عيونها بصدمه من حركات الدلع والميكب ورصت على اسنانها بكرهه وقهر وودها تقوم تنتف شعرها الاصفر المتقصف بس لزمت ارضها ماتبغى تسوي شي وتنقلب الطاوله عليهم
هيام بتصنع الدلع : بابي مامي
ابو هيام : هلا يابنتي
ام هيام : عيوني ياهيامي
نوره ناظرت فيهم وجهها مصدوم وناقده على الدلع الي مو لايق وبهاج شاف وجهه نوره وتذكر رياكشن براسه وكتم ضحكته
هيام بتصنع الدلع : باباتي تحبني صح ؟
ابو هيام: اكيددد
هيام : حرام مسكينه نوره ماعندها اب وسند ومعتمده على بهاجي اف منك بس اعتمدي على نفسك
نوره احتدت ملامحها من طرت "ابوها " وشدت على يدها بقوه وتحاول تمسك نفسها لاتفرشها هنا وعاد تلقم قضيه ثانيه
بهاج التفت لـ هيام من قالت "نوره ماعندها اب " وناظر هيام بعصبيه وكرهه ونطق : عندها اب ويفتخر فيها وحتى وهو بقبره متهني وفرحان لان نوره بنته لكن انتي ؟ لاافتخر فيك ولاهو فرحان فيك ولاهو متهني وانتي تجرجرينه من محكمه لمحكمه ومن قضيه لقضيه بسبب افعالك الي حتى ابوك يستحي يقابل الرجاجيل بسببها نزلتي راس ابوك وهو حي ونوره رفعت راس ابوها وهو ميت الله يرحمه ويغفر له
ابو هيام : احترم نفسك واحترم اني عمك واحترم المكان
بهاج ارخى ظهره على الكرسي ببرود : مايشرفني تكون عمي ولاني محترمك وش بتسوي يعني ؟
ام هيام : بجهض ورعك الي ببطن حرمتك المصيونه الي ماينعلم هو منك ولا من ولد عمها والي خبري خبرك عاد
بهاج ناظرها بعصبيه واستوعب وضحك بـ سخريه ونطق : ثواني بس
وقام والتفت لـ نوره ومد يده : قومي بوريك شغلي فيهم
نوره مسكت يد بهاج وقامت وراحو
ام هيام التفت بخوف : يويلي بهاج ينخاف منه داهيه وش بيسوي ؟!
ابو هيام بخوف : ايي بالله داهيه ومصيبه وهو لواء اكيد يعرف كل شي
هيام : لا بهاجي مايهون عليه يضرني
ام هيام : اسكتي انتي وبهاجك ذا الي بيودينا بست وستين داهيه
وجلسو بتوتر وخوف وقلق
جاء بهاج وجنبه نوره ويضحك ونوره ساكته تراقب رده فعلهم وجلس بهاج واشر لـ نوره تجلس جنبه : تعالي
وجلست نوره وبهاج ارخى ظهره على الكرسي ورفع ذاكره الفلاش ونطق
: كيف بس؟ كلامك قبل شوي وتشكيكك بشرف نوره موجود هنا
ام هيام تغير وجهها ونطقت برجفه : تكفى استرنا خلاص بنسكت ولا بنسوي شي لـ نوره ابداً ابداً تكفى ياولد مطلق احب رجولك اعتقنا خلاص انتصرت علينا خلاص نستسلم
بهاج : وقت المصالح تجيك الكلاب تنبح
ابو هيام : خلاص يام هيام حنا بنكسب القضيه
التفت ام هيام وتقدمت وجلست عند رجول نوره : تكفين يانوره انتي بتصيرين ام بعد كم شهر وفكري بشعور ان ياخذون ضناك من بين يدينك تكفين يانوره ريحي امك بقبرها وتنازلي تكفينن افدا امك وابوك
نوره تناظر فيها وعيونها دموع وصدرها يطلع وينزل بقوهه وهي تشوف ام هيام تترجها وتطري امها وابوها
وبهاج يشوف حاله نوره وخايف تتنازل ويضطر ينفذ حلفه ويسوي فيها المستحيل وشد على يد نوره وناظرها بمعنى " ياويلك "
نوره التفت ناظرت بهاج ونظراته ويده الي شاده على يدها وتذكرت كلامه وكلام جدتها "بتركك اذا تركتها " "ماعرفك ليوم الدين اذا تنازلتي ""لاتحديني اجي صوب الردي واضرك ""تكفينن يانوره لاتجبريني اضرك "
وقطع كل شي من اعلنو موعد الجلسه تنهد بهاج براحه وسحب نوره بسرعه عشان ماتتنازل ودخل وناظر نوره ونطق : تذكري كلامي وكلام خالتي زين
نوره مسحت دموعها وهزت راسها برضى
وبدت القضيه ومحامي نوره الي بهاج متفق ومظبطه وهيام واهلها معهم محامي كذلك وبدت الحوارات والنقاشات وبهاج مبهور بـ نوره وكلامها ودفاعها عن نفسها وفخور فيها وهيام واهلها توقعو نوره تسكت ماتتكلم بس صدمت الجميع كان الوضع يمشي كويس الين طلعت هيام ونطقت : طيب بهاج خاين نوره وانتم عاد تعرفون عقوبه الخاين ومتزوج !
بهاج ناظرها بأنفعال : صاحيه ولاتتعاطين انتي ؟ كيف كذا تتهميني !؟
نوره : هي هي عاد تراك زودتيها بالمره ! كيف كذا تقولين كلام ردي عنه !
القاضي : وعندك اثبات على صحه كلامك يالاخت هيام؟
هيام : اي انا حامل منه
الكل شهق بصدمه وحتى ابو هيام شهق وماسك نفسه لايسطر هيام
بهاج بأنفعال : كذابه !
ورجعو يتهاوشون وكذا ونوره تدافع عن بهاج والمحامي يدافع عن نوره وبهاج
القاضي : ماحتاج كلام ففقط ! احتاج اثبات ! والان تروحين تجيبين دليل على انك حامل واذا طلع صدق فـ عقوبتك انتي وبهاج الرجم بالحجر حتى الموت واذا كذب فـ لك عقوبه اخرى
جمدت ملامح هيام بصدمه وبهاج ناظرها ويعرف انها كذابه ونطق : اثبتي
هيام سكتت وجلست
القاضي : روحي جيبي دليل !
هيام التزمت الصمت وادركت حجم الكذبه الي كذبتها وهي بالحالتين بتروح وطي
القاضي فهم انها كذابه : لك عقوبه اشد بسبب اتهامك للولد
بهاج تنهد براحه من طلعت الحقيقه
القاضي : تمام كذا نقدر نقول الجلسه القادمه نقرر من يكسب القضيه والجلسه بعد اسبوعين اتمنى حظوركم جميعاً
بهاج : مافي مجال تقرر الحين؟
القاضي : لا مانبي نظلم احد وقضيتكم يحتاج لها وقت وفهم
بهاج هز راسه برضى وطلعو
والتفتت نوره لـ بهاج وحضنته : اهخخ ماتوقعت قد كذا اقدر ادافع عن نفسي
بهاج بادلها : ياخيي انتي دايم تبهرينيي ابهرتيني دفاعك عن نفسك ابهرني روعه روعه ياختيي احبك انتي وكلامك
وطلعو عائله هيام
والتفت ابو هيام وسطر هيام كف : يابنت الكلب عجزت اربي فيك وتقولين بكل برود انا حامل !!!
شهقت نوره من قوه الكف الي طيح هيام على الارض
ام هيام : خلاص عاد يابو هيام امش امش
وراحو عائله هيام وهم يسبون ويلعنون خير هيام
ونوره وبهاج يناظرونهم بنقد وطلعو
________________________
(بـيـت ابـو عبـد الله )
ابو عبدالله : بهاج بيجي مع نوره
ام عبدالله : زارتنا البركه
غدير : اما ؟ يسس في علوم بنقلها لنوريي
وئام : كلن على همه سرى
ابو عبدالله : قومي ي وئيم افتحي لهم الباب
هزت راسها برضى وقامت واتجهت للباب وفتحته ونطق بهاج بفرحه: ارحبيي يالعنقود
وئام ابتسمت وتقدم بهاج وحضن وئام : ياحماره ماتوقعت اني بشتاق لك كذا
وئام : طبعاً بتشتاق لي انا الاساس
بهاج بهمس : اسكتي لاتسمعك النوري تغار
وئام ضحكت بخفه وابعدت عن بهاج
نوره : اهلا اهلا يالمختفيه
وئام : بقره تائهه في بحر العلم
بهاج : صدقتي والله زين عرفتي انك بقره
نوره : بهاج ! اترك البنت
وئام : تشوفين يانوره؟ متولجني
نوره : بهاجوه لاتجيها اهبدك عندها الا وئيم
ضحك بهاج ودخلو
ابو عبدالله بفرحه : ياهلا ويامرحبا ترحيبه البدو ارحبو زارتنا البركه
ام عبدالله : ياهلا بنوره وبهيج
بهاج سلم على ابوه : البقى يايبه
وسلم على امه
ابو عبدالله ابتسم وحضن نوره : يازين بنتي الي بتصير ام
نوره ابتسمت : كذا استحي وماعرف ارد
ابو عبدالله ضحك : معليه يعلمتس بهاج الردود
بهاج التفت لهم : ابد بالخدمه
نوره ضحكت بخفه وسلمت على ام عبدالله وبهاج متسلط غدير
بهاج: ام زكي بتصير ربه منزل؟
غدير : ايي ليش ماني ماليه عينك؟
بهاج تكى : بالله هاذا وجهه وحده سنعه تمسك بيت؟
ابو عبدالله : اسكت يابهاج لاتخليني انثر العفش عند النوري وتفشل لاتسلط غدير انكبك
بهاج : لاخلاص خلنا كذا حلوينن
نوره : غشش لازم تعلموني
بهاج : الفات مات مايحتاج
غدير : نوره مادريتي ؟
نوره عدلت جلستها: لا عن وش ؟
غدير : شفتي هذيك البنت الي شفناها بالعزيمه الي لابسه فستان بيج الي قلت تجنن
نوره : ايي الصاروخ
بهاج : اسلمم
نوره رفعت حاجبها : امسكو ولدكم
ام عبدالله : يابهاج اهجد
بهاج : سمي
غدير : تخيلي انخطبت! خساره كنت بخطبها
نوره : افف حسافه كنت ابيها تجنن البنت
وئام : لحضه لحضه مين هاذي وانا مين وانتم ايش مخططين تزوجونها واخواني كلهم متزوجين
غدير بمزح : عادي لو نزوجها بهاج ماهي بمشكله
نوره : وش ؟
غدير : اقصد نايف نايف
نوره : عبالي بعد
ابو عبدالله : وشلون القضيه عسى نوره ماجابت العيد هناك
بهاج : ابد القضيه نمبر ويحد ، روعه نوره روعههه
ام عبدالله : الحمدلله
وسولو واستانسو وضحكو
________________________
(بـيـت ام سـحـاب - الـعـشـاء )
نوره اصرت على بهاج يرجعها للديره بتجلس عند جدتها وهو مايرفض لها طلب وفعلاً وصلها البيت والتفت لها ونطق بهدوء وحب : انتبهي على نفسك ياعيوني استودعتك الله
نوره ابتسمت ونطقت : تعال اجل عندنا
بهاج هز راسه بنفي ونطق : فشله اكل واشرب عند خالتي وانا عندي بيت
نوره عقدت حواجبها : بهاج! عيب عليك هاذا الكلام مابيننا فشله ورسميات وعادي اذا جلست عندنا مافيها شي
بهاج تنهد ونطق : ولاتتضايقين بروح اخلص كم شغله وان شاء الله اجيك
نوره ضيقت عيونها بشك : بهاجوه عيونك تقول بسحب عليها اوعدني بتجي
بهاج زم شفايفه : يانواره شي خارج عن مقدوري الشغل موب سهل ولا اقدر اخلصه بساعه ولا ساعتين واضرب مشوار وطريق وظلام واليل لديره
نوره نزلت راسها بزعل تخفيه : تمام توصل بالسلامه
بهاج كشر بقهر من دار ببال نوره ان بهاج مستحيل يمسك خط لديره عشانها ونطقت : وعد رجال والشناب لاجيك وعد يانوره اجيك لو اني هلكان تعب ولااخليك تتضايقين قد كذا !
نوره ابتسمت : صدق تجي عشاني ؟
بهاج بأبتسامه : اجيك ليه ماجي اجي عشان عيونك ابشري بس لاتسهرين يمكن اجي متأخر
نوره هزت راسها برضى وارسلت قبله بالهواء وابتسم بهاج ويأشر لها بيده بمعنى "مع السلامه " نوره ابتسمت له ودخلت وتاكد انها دخلت وحرك سيارته راجع للرياض
نوره فكت نقابها بتعب من اليوم المتعب هاذا من الصبح وهم يكرفون من المحكمه ومن المعاملات الي ماتخلص : هفف الحمدلله عدت على خير
ام سحاب جت على حس نوره ونطقت : بشري وش صار ؟!
نوره ابتسمت ونطقت : نقول ان شاء الله اننا نكسب القضيه
ام سحاب عقدت حواجبها بعدم فهم : وش تهبدين وتخربطين ؟
نوره : الادله كلها ضد هيام وام هيام ولازالت تنكر وهاذا الي طول المسأله وخلاها بعد اسبوعين يعني بنص رمضان
ام سحاب تنهدت براحه : لا ان شاء الله كاسبينها بأذن الله
نوره ابتسمت وام سحاب تدور بهاج بعيونها : والبناخي وينه؟
نوره : بهاج؟
ام سحاب : ومن غيره
نوره بمزح : حيوان راح يخلص شغله ويتركني
ام سحاب : والله عيونتس عوينات التسذوب الجربا اهرجي وش قوم الولد؟
نوره ضحكت ونطقت : اصريت عليه يجيبني عندك وهو مضغوط وبنص شغله جابني عندك قلت له اجلس قال الشغل وكذا وقال انه بيجي ان شاء الله
ام سحاب : دقي علاه قولي له يتوقع لطريق
نوره هزت راسها برضى وفتحت جوالها وارسلت له :انتبه للطريق ترى بذمتك روحين
سرعان مافتح بهاج الرساله وارسل : ابشري على خشمي اوامر ثانيه ست نوره
نوره ضحكت وكتبت له : اي فيه ، اترك الجوال وركز بسواقتك
بهاج ابتسم وارسل : ابد انتي الوحيده الي افتح الوساله قبل تكتبين
نوره : ياروحي يابهيج استودعتك الله
بهاج : انتبهي على نفسك وامنعيني من البربسه والدنفسه
نوره ابتسمت وطلعت من المحادثه وبهاج قفل جواله وركز بطريقه
ونوره اتجهه لغرفتها وانسدحت على السرير تفكر فيه
ام سحاب من دخل فصل الربيع صارت ترقد بالحوش والظهر تحرقها الشمس وتقوم تسرح مع الغنم
________________________
(بـيـت ابـو هـيـام )
دخل ابو هيام البيت وماسك هيام من شعرها ورماها بعصبيه : ادخلي فشلتينا يالفشيله انتي
هيام ببكى والم: يبه تكفى فكني
ابو هيام : الله ياخذك ابك انتي عقوبه ربي عاقبني فيك من كثرمااذيت الناس
ام هيام : يابو هيام اترك البنت
ابو هيام : انقلعي انتي وبنتك
وابو هيام سطر هيام وكل كلمه مو كويسه قالها لهيام
________________________
(قـبـل اذان الـفـجـر بـدقـائق )
نوره تدور بغرفتها وتتوعد بـ بهاج اشد الوعيد ولو شافته نتفت شعره لانه مايرد عليها وتتصل مليون مره ولايرد وترسل ومايرد !
جاهله ان بهاج متكي فوق جدار بيت ام سحاب والي يشوفه يقول حرامي
نوره ضربت رجلها بالارض بقوه : وعد رجال والشناب اجل؟ اجيك؟ وينك ؟ افف منك يالمهايطي لكن هين يابو كشه هين والله انتف كشتك يابو اذاني
جاها اتصال وفز قلبها وسحبت الجوال وقرت الاسم وردت بعصبيه : ورع وينك وليش تسوي فيني كذا ؟
بهاج بتمثيل صوت مليان نوم : وش كميه الاتصالات ذي ، توقعتك ولدتي على الاتصالات هاذي بسم الله الرحمن الرحيم
نوره من سمحت صوته المليان نوم عرفت انه سحب عليها : وعد رجال واشناب ياالحبيب اجل؟
بهاج تنهد : وش بعد وعدتك فيه ، مو انتي تبين تجلسين عند جدتك ؟
نوره بعصبيه : طيب طيب قابلني بس والله ماتسلم مني ومابغى اشوفك ٨ شهور
بهاج شهق بصدمه : حسبي الله على عدوك ٨ شهور وش يصبرني
نوره : تحمل هاذي غلط......
قطعت كلامها من حست بحركه برا الغرفه وهمست بخوف : بهاج !
بهاج تعمد يرمي حجره صغيره عند باب الغرفه عشان تطلع تشوفه
بهاج : لبيه
نوره بخوف : بهاج !
بهاج : علامك؟
نوره بخوف ودموع : بهاج حرامي حرامي
بهاج : ابك وش جاك انتي اطلعي واجهيه وسطريه وفرغي طاقتك عليه
نوره بخوف وهمس : بهاج خايفه تعال
بهاج : اجي من الرياض؟ قومي دافعي عن نفسك واطلعي له ونتفي شعره
نوره بدموع : بهاج مو وقتك تعال وربي خايفه !
بهاج : اهدي اهدي واطلعي له وسطريه على مااجيك
نوره بخوف وهمس : بهاج مابغى اطلع خايفه
بهاج تعمد يخوفها ويرمي حجره على الباب ونطق : اذا ماواجهتيه بيجيك
نوره شهقت بخوف من سمعت الصوت : تعال !!!
بهاج : بجيك بجيك بس انتي الحين اطلعي وشوفي يمكن البسه !
نوره : بهاج بلا استهبال توتي عندي !تعال تكفىىى
بهاج : جيت جيت بس اطلع من الغرفه
نوره : بهاج بكامل عقلك اطلع؟ مستحيل
تنهد بهاج ونطق : ايي اطلعي على مااجي
نوره تأففت وترددت تطلع بس بهاج ضغط عليها وفتحت الباب برجفه وعيونها دموع وخطت خطوه برى الغرفه تتلفت يمين ويسار مافي احد !
بهاج من فوق الجدار يتنحنح والتفت نوره بخوف من الرجال الي جالس فوق
ماميزت الملامح بسبب ظلمه المكان وصرخت بخوف وفزت ام سحاب الي كانت نايمه بالحوش : علامتس؟!
بهاج فتح فمه من الصدمه ومانطق بحرف وثابت مكانه وكان الضوء خفيف ماكان واضح الا شكل بهاج وشعره بس ملامحه ماكانت واضحه وكان شكله مرعب على الاضاءه الخفيفه
ام سحاب شافت نوره جامده مكانها ونتاظر الجدار والتفت ام سحاب للشخص الي متكي فوق الجدار وله كشه وشهقت : ابك ابك ابك حماره القايله ظهرت الفجر يويلي وقله واليي اهربي يانوره هاذا موب انس
بهاج ضحك من تشبيه ام سحاب لـ بهاج بحماره القايله وكلهم التفتو على ضحكته وعرفوها ومانزل نوره شافت مخده طايحه تقدمت خذتها ورمتها على بهاج وتبكي وتصارخ بعصبيه وام سحاب تتعوذ من ابليس وماسكه عصاتها تتوعد بـ بهاج
نزل بهاج من شاف انهيار نوره ولكن تقدمت ام سحاب وضربت بهاج بالعصى على ظهره وبهاج يتحرك يمين ويسار يحاول يتصدى الضرب ورمت ام سحاب العصا وتعوذت من ابليس وجلست بتعب من بهاج الي رفع ضغطها بمقالبه الي مالها داعي
اما نوره الي تبكي ومافي خليه بجسمه ماوقفت من الخوف تقدم بهاج لها وحضنها وهي رافضه حضنه وتضرب صدره بعتاب : ليش ماكان له داعي المقلب الخايس هاذا افرض جدتي صار فيها شي ؟افرض توقف قلبها بعيد الشر عنها افرض صار لنونو شي لاسمح الله حط الف احتمال واحتمال انت كيف بتصير اب وانت للحين ماعقلت ماوعيت على نفسك بتصرفات الاطفال هاذي بهاج استوعب ان شنبك خاط ولازم تعقل وتترك هالتصرفات الي مالها داعي بحياتنا كلها وابداً ماتعبر عن حب ابدا ماتعبر عن حبك لي بالعكس بتنفرني منك وبتخوفني منك وبتعيشني بخوف انا وجدتي والنونو بخوف من مقالبك الي تسبب سكته قلبيه ! تخيل اخر الليل تشوف شخص متكي فوق الجدار وشعره يلعب فيه الهوا وماهو واضحه ملامحه ! مجرد التخيل اصلاً يشيب الراس استوعب مابغى اصير ام لطفين، الاب وولده ! اف منك وقفت قلبي حسبي الله على إبليسك
بهاج شد الحضن عليها : والله يانوره ماكان قصدي الا اني اغير نفسيتك عن الي صار بالمحكمه اليوم ماكان قصدي اضركم واسف .
نوره سكتت وارخت نفسها بحضنه وهو فعلاً المقلب قوي على نوره الحساسه
وجلسو شوي يستوعبون المقلب وبهاج يقول سوالف عشان يضحكهم وفعلاً ضحكت نوره وام سحاب وتنهد براحه من رضو عليه
بهاج : تدرون وش امنيتي حالياً ؟
ام سحاب : وش ؟
بهاج : نوره تولد بسرعه
نوره : ليش؟
بهاج بضحكه: بكل مقلب ولا سالفه الحمل يكون عذرك
نوره تذكرت حلفها وانها بتنتف شعر بهاج !
نوره شدت شعر بهاج : وتدري وش اتمنى حالياً
بهاج بضحكه ومزح: افا شعري حرام عليك حطيت عليه زيت عشان يهجد
ام سحاب : وش
نوره تركت بهاج : بهاج يعقل ويستوعب انه بيصير اب
بهاج ضحك : ياخي من حبك دبجك يعني تحملي حبي فريد من نوعه
ام سحاب قامت: يالله صباح خير يلا تقلع انتي وياها برقد ولا اسمع حس
نوره : جدتي علمي بهاج هو المزعج
ام سحاب : ابك ماصار مزعج ومحب للحياه الا لمن شافتس
بهاج : صح صح اتفق مع خالتي
ام سحاب ضحكت وراحت ترقد ونوره ضيقت عيونها وزمت شفايفها : زعلانه
بهاج غمز : تبين رضاوه فريده من نوعها ولا رضاوه بوبو؟
نوره كشرت بزعل : راضني بأي شي !
بهاج ابتسم : بالخدمه
نوره عقدت حواجبها : ابتسامتك مارتحت ل..
قطع كلامها ببوسه
نووه اتسعت عيونها بصدمه من رضاوته الغريبه
بهاج ضحك : هاكيف الرضاوه ؟
نوره شتت انظارها بحياء وتحلف انها اخر مره تطلبه يراضيها
بهاج حاوط خصر نوره : لاتستحين ولاتخافين مني
نوره بتوتر : لا يعني بس
بهاج ينتظر منها اجابه منطقيه : بس وش؟
نوره : يعني صدمتني ماتوقعت الرضاوه تكون كذا عبالي شوكلت او حضن او زي كذا
بهاج : مايهم وش هو لكن عساك رضيتي ؟
نوره ابتسمت بحياء وهزت راسها برضى
بهاج مسك خدود نوره : فديت المستحين انا
نوره استحت زياده وقطع كل شي جوالها الي يتصل
بهاج تنهد : منهو هاذا بسطره خرب علينا !
نوره خذت جوالها وقرت الاسم وعقدت حواجبها : موضي؟
بهاج سحب الجوال من يدها : ولارح تردين مادقت الا في مصيبه
نوره : بهاج جيبه اكيد تبي شيي
بهاج هز راسه بالنفي : لا يعني لا ورجاً خففي حنيه شوي
نوره : طيب بس بشوق وش تبغى
بهاج قطع الاتصال ودخل الجوال بجيب ثوبه : تبغى مشكله ومصيبه او انها تهدد عشانها عرفت عن سالفه العقرب هيام
نوره : بهيج عشاني تكفى اكيد عمامي سوو لها شي لاتسيئ الظن انا اعرف عمامي !
تنهد بهاج يشد على شعره : وان صار شي وخربت نفسيتك ؟
نوره : وعد ماابكي
بهاج : اكيد؟ بس بشرط تحطينه سبكر ويكون الجوال بيدي !
نوره : هاه؟ لا مستحيل ليه يكون بيدك ؟
بهاج قال كذا عشان نوره عشان اي كلمه ماتعجبه وتبكي نوره بيقطع الاتصال وتنهد ونطق بهدوء : اجل مافي مكالمه
نوره : افف منك خلاص موافقه
ودخلو الغرفه وجلس بهاج وجنبه نوره واتصل على موضى وردت بسرعه : نوره
نوره : هلا
موضى : نوره وينكك
بهاج ضيق عيونه بشك من كلامها وردت نوره : موجوده انتي وينك
موضي : نوره انا تعبانه ومحتاجتك
بهاج بصدمه : محتاجتك؟
اتسعت عيون نوره تهدد بهاج بعيونها ونطقت موضى بصدمه : بهاج؟
نوره سحبت الجوال من بهاج : معليش موضى بس سمعك بالغلط وهالحين تقدرين تاخذين راحتك
موضي : اكيد نوره واثقه فيك
نوره : قد الثقه بأذن الله
بهاج مسح على وجهه بقهر من نوره الي ترضى بسرعه
موضي : انتي ببيتك لاببيت رجلك؟
نوره بربكه : ها؟ ليه ؟
موضى : تكفينن ابيك وربي مانيتي شي ابي افضفض لك
نوره التفت لـبهاج الي عيونه تطلع شرار عصبيه
نوره : خلاص تمام تعالي ببيت جدتي انا موجوده وترى معي بهاج !
موضي : لاتخافين مامعي احد
نوره : تمام انتظرك
وقفلت الخط وقام والتفت عليها بهاج بعصبيه : تعالي ؟؟ وين تصريفها هاذي يابنت انتي علامك ترضين بسرعهه ولابهاج تصيرين ثقيله ! انتي ماتتوبين تبي توقعك بمصيبه ثانيهه !
تنهد نوره : بعاج خلاص خلك معنا ولاتخاف علي
بهاج ناظرها بعصبيه وفاقد الامل ان نوره تفكر صح
نوره بأبتسامه تقدمت لـ بهاج : خلاص فك النونه لاتعصب عليي
بهاج ابتسم تلقائياً من قربها له
نوره رفعت رجولها تطول نفسها عشان توصل بهاج وباست خد بهاج : رضاوه نوره
بهاج تنهد بذوبان : اشهد بالله اني خاروف ارضى بسرعه
نوره ضحكت ولبست شرشفها ونطقت : بهيج ترى بطلع للمزرعه اقابلها
بهاج تنهد بعصبيه ومسك يدها وطلع هو وياها : مااتركك بين يدين العدو
نوره ابتسمت من خوفه عليه وصارو بالمزرعه ورا البيت واتصلت على موضى انها ورا البيت بالمزرعه وبعد دقائق جت موضي واختل توازنها من نظرات بهاج الي تخرش وكأنه يهددها وتقدمت تسلم على نوره
بهاج بحده : اسمعيني زين يابنت خالد ، ان جيتي تضرين نوره فمضر نوره من مضرتي وبهاج بيضرك ويعلمك بهاج الصح على اصوله ان كان فيك ذره شر فهمتي؟ عاد ان مافهمتي قلبيها براسك يارب الله يعطيك عقل تفهمين منه وتفهين كلامي ! ان جيتي وبراسك شر فالباب يسوع جمل مانتشرف وان جيتي ونيتك حسنه فأهلاً وسهلاً مانرد احد
موضى خافت من كلامه وتهديده ونظراته ونطقت بربكه : لاتخاف مابسوي شي لها هي بنت عمي محمد الله يرحمه
بهاج ناظرها بعصبيه ونطق : قد قلتي انها بنت عمك وضريتيها والمسلم لايلدغ مرتين وحنا حريصين وعلم يوصلك ويتعداك سالفه بضر واذي نوره احلمي فيها انا قدامها وحوالها وصعبه تجينها وهي جنبي وام عيالي
نوره سحبت بهاج : بهاج خلاص خوفت البنت
بهاج ناظر نوره والتفت يناظر موضي : قلبيها براسك وتفهمين كلامي والسلام ختام يلا سلام
موضي ناظرته وهزت راسها برضى ومن بعد تهديد بهاج لها حرمت اذيه نوره كلامه ودفاعه عن نوره قوي
نوره ابتسمت تلطف الجو : تعالي اجلسي بسوي شاهي واجي
موضي : لاياعيوني مايحتاج
نوره ماكانت نيتها الا تشوف بهاج : لا بسوي عشان تزين الجلسه
موضي هزت راسها برضى وراحت نوره واول مادخلت مسكها بهاج المعصب : بنت انتي علامك دافعتي عنها !
نوره : بهاج البنت اكيد عمامي مسوين فيها شي وانت زدت عليها وخوفتها وهي تشوفني ملجئ وبعدين فك يدك توجعني
بهاج فك يد نوره : تمام نشوف نهايه هالكلام العبره بالنهايات
نوره : تعال ساعدني بسوي شاهي
بهاج اتسعت عيونه بصدمه : نعم ؟ اسوي شاهي للمصيونه الي برى؟ تخسي
نوره تطلع ابريق شاهي : عيب بهاج اعتبرها ضيقه
بهاج كشر : ضيفه وتجي الساعه ٤ الفجر؟ وش الضيف السروق حشى الحرامي مايجي هالوقت وتبين ضيف يجي هالحين ؟
نوره : بهاجوه ؟ متلاحظ انك مواصل ؟
بهاج تكى على الباب : تبيني انام والسحليه عندك ؟ معصي انام وهي عندك
نوره : خلاص تمام لاتنام اقلط معنا اجل
بهاج : ودي اقلط بس كـ رجل بينكم؟
نوره ناظرته بغيره : وانت مصدق اني بقلطك عندها
بهاج شاف غيره نوره ونطق : عادي بواسيها
نوره ضربته بخفه : انت عليك تواسي نوره انا نوره تواسيها بس غيري لا
بهاج ضحك : شهاده حق مااواسي الا نوري
نوره : ورع رح نم عشان العصر نروح لـ ريف ورهف
بهاج ضحك : ابشريي
نوره خذت الشاهي وراحت واتجهه لـ موضي وجلست : اهلاً هلاً
موضي ابتسمت : هلابك
نوره : ها يعيوني وشبغيتي
موضي : الصدق بهاج خرشني مدري كيف عمامي صاملين يأذونكم وهاذا تهديده
نوره بضحكه : ايواا خايف على النونو
موضي بأستغباء: حامل ؟!
نوره : ايي
موضي بفرحه : ماشاء الله الف مبروك يتربى بعزكم
نوره : الله يبارك فيك
موضي نزلت راسها : يانوره الصدق اني متفشله واعتذر عن تصرفاتي عنك واذيتي لك اسفه صدق وربي ندمت
نوره : معذوره ياعيوني بس وش جاك؟
جاهلين بهاج المتكي فوق السطح يراقب تصرفاتهم بس كلامهم مايسمعه
تنهد وكش عليهم : مالت عليكم وعلي ابك وش ذي توها تعرف ان عندها بنت عم وتجيك الخبله نوره تسامحها
كش على نفسه : ومالت علي بعد قاسي مره مااسامح ولاانسى تقول بعير
وضلت موضي تعتذر ونوره تطبطب عليها وبهاج يحش فيهم من فوق السطح
موضي : نوري جايه اتكلم معاك ومع بهاج بشي ضروري مره
نوره عقدت حواجبها : بهاج؟
موضي : ايي انتي وبهاج ضروري
نوره بغيره : بهاج يستحي من الحريم مايجلس عندهم
موضي : ماني اكلته وبتغطى عنه لا تخافين
نوره هزت راسها برضى وقامت تنادي بهاج ودخلت البيت ونادته
بهاج جاء: لبيه
نوره : بهيج موضي تقول تبغى تقول شي ضروري ولازم تجي
بهاج : انا ؟ وشدخلني ؟ رجاً لاتدخلني بمشاكل انا بغنى عنها
نوره بغيره : تصدق؟ احسن لاتجي
بهاج : الي ودك
نوره : اف لا امزح شي ضروريي
بهاج : تمام الله يستر بس ، نوره البسي شي يدفي برد المزرعه
نوره هزت راسها برضى واتجهت لـ غرفتها تجيب وشاح خفيف وبهاج متكي ويفكر
جت نوره : ها نمشي ؟
بهاج التفت وناظرها وهز راسه واتجهو للمزرعه وجلس بهاج بعد ماتغطت موضي عنه
موضي : بدخل الموضوع بدون مقدمات ، بهاج لازم تكون حول نوره وحواليها وماتتركها لان لو تركتها ثانيه بس عمي مصعب وابوي يتسلطون عليها وفي الفتره الاخيره كانو يتكلمون عن اجهاض جنين وماتوقعت ولا واحد بالميه انها تكون نوره الحامل محد عرف الا لمن قالت لي نوره
بهاج عدل جلسته بأنصات ونوره مسكت بطنها بخوف من عمامها بهاج التفت لـ نوره وناظرها يطمنها انها بأمان
تنهدت موضي ونطقت : نوره وانتي كذلك حاولي ماتطلعين عن شور بهاج واتمنى ماتعاندينه واتمنى تكونين حريصه على نفسك وعلى النونو
بهاج حط يده على فكه بتفكير : وانتي وش مصلحتك وش غايتك تقولين هالكلام ولا تقولين كذا عشان تجينا غدر؟!
موضي : ماقصدي شي ولا ودي شي والله بس يانوره انتي وبهاج امي طلعت لي بالحلم وتحذرني من عمامي وان الدنيا بتدور وبيقلبون علي ويغدرون فيني
نوره نزلت راسها : منجد عمامي من صفاتهم الغدر مايواجهونك وجهاً لوجه
بهاج التفت لـ نوره ورجع ناظر موضي وهو مو واثق ابداً فيها وفي شي ينغزه ويحذره منها بس بيعطيها على جوها وبيشوف هل فعلاً موضي تابت ولا هاذا مجرد اتفاقيه مع عمامها وجلس بدوامه لانهايه
نوره التفت لـ بهاج الساكت وهادي ونطقت بهمس : مابتقول شي ؟
بهاج تنهد والتفت لـ نوره وابتسم والتفت لـ موضي وبدا يستفسر منها مواضيع تهمه ويبي اثبات على صحه كلام موضي بس مو قادر يحدد تصرفاتها المرتبكه وخايفه والتأتأت وهل هي فعلاً خايفه من عمامها وتطلب العون من نوره وبهاج او مجرد خطه من قبل ابوها وعمها
بهاج ماكان واثق فيها ابداً عكس نوره الي صدقتها بسرعه وجلس يجمع الاحداث ويربطها ببعض وخذا من موضي المعلومات الي تكفيه وتهمه
نطق بهاج بحده وتهديد : بشوف وضعك وان طلع كذب ماتلومين الا نفسك !
وقام تارك الجلسه بكبرها وترك نوره وموضي بحيرتهم من قومه بهاج وهدوء بهاج ، بهاج ماكان هادي كان يفور دمه من داخل وركب سيارته وجلس فيها وبدا يسجل ويتذكر ويربط احداث مادخلت باله ان موضي تجي عند نوره وتعتذر وتستنجد فيها وطلع جواله من جيبه وارسل لـ نوره : قولي لها لاتعلم احد انها تواصلت معي ترى مو من صالحها ماتعلم احد واذا علمت تأذي هي ولا انا ماعلي شي ان شاء الله وانتي الان قومي ادخلي ماقدر اتركك عندها ماوثقت فيها
اما عند نوره الي شافت اشعار منه وسحبت الجوال وفتحته وقرت الرساله وردت : تمام
ونطقت : موضي حبيبتي لاتعلمين احد انك تواصلتي مع بهاج ولا انا عشان نفسك
موضي : مستحيلل اعلم على نفسي تبين يجون الحين وينحروني بلياه هم يتحدوني عشاني اتجنبهم وجالسه على جوالي
نوره ابتسمت تطمن موضي : موضي ياعمري محد يأذيك اذا اخترتي الطريق الصح طريق الامن والسلام والاستقرار انتي اخترتي الطريق الصح ومايجيك شي بأذن الله وترى انتي بنت العم وصح اذيتني بس مااشيل على قلبي وبابي لك مفتوح دايم
موضي نزلت راسها : اسفه نوره ماادركت الا تو كأني مسحوره زمان وتو ينفك السحر توي استوعب اني اذيت ناس كثير بحياتي مو متقبله نفسي احس ودي اموت وانهي حياتي وافتك من الحياه وافك الناس من شري
نوره : لاا تقولين كذاا مو زين وترى عادي الانسان يتعلم من غلطته ويستوعبها ويندم ويصلحها ويقوم على رجليه
موضي ابتسمت بحب لـ نوره وهي توها تدرك اهميه نوره بحياتها وادركت كم اذت نوره وكم وكم الي لانهايه
موضي قامت : استئذنك
نوره قامت معها : وين تو الناس
موضي ابتسمت : الساعه ٤ وتقولين تو الناس
نوره ضحكت وراحت موضي وتهدت نوره بضيق وترسل لـ بهاج : وينك ؟
بهاج من تأكد ان موضي راحت عن نوره حرك سيارته: ادخلي البيت انا بروح
نوره ارسلت : تعال وينن
بهاج : نوره ادخلي ولاتعانديني انا بطريق الرياض مايمدي ارجع
نوره : مابغى ادخل
بهاج ضحك بخفه وارسل : كيفك بس ترى في كلب شفته
نوره سرعت خطواتها ودخلت البيت : وينهه يمه كيف انامم
بهاج : دخلتي ؟ بقول لـ محمد يمسكه ولا يأذيك
نوره : الحمدلله ، يلا انتبه على الطريق ياويلك تسرع ترى انتف شعرك
بهاج ابتسم: ابشري ياعيون بهاج انتي ، استودعتك الله
نوره ابتسمت وتلون خدودها بالوردي وبما انها ماتعرف ترد على المدح والكلام الحلو ارسلت قلوب وطلعت من المحادثه وابتسمت واتجهت لغرفتها وضاقت فيها الوسيعه كذا بدون سبب زعلت وتبغى احد يراضيها : اوفف كلها من بعاج
وطلعت من الغرفه وشافت جدتها نايمه بالحوش وابتسمت بحب : اوه ياجديده بنام عندك من زمان مانمت بحضنك كلها من بهاجوهه
واتجهه لفراش جدتها وانسدحت جنبها وماتت حر وقامت : افف يالحر كلها من بهاجوه
قامت لبست توب وشورت من الحر واتجهه لفراش جدتها وانسدحت جنبها
وظلت تناظر جدتها الي بكرا اخر موعد لها هل تتشافى من المرض ولا تضل كذا تعبانه وشاحبه ودمعت بضيق وغطت نفسها وجدتها ونامت وهي تشم ريحه جدتها خايفه تفقدها .
________________________
( بـيـت ام سـحـاب - الـضـحـى )
من احتر الجو والشمس صارت على وجهه ام سحاب قامت بأنزعاج من الشمس وهاذا منبه ام سحاب "ضوء الشمس " والتفت حصلت نوره نايمه عقدت حواجبها بأستغراب : ابك علامها راقده يمي لايكون متخانقه مع هالسربوت بهاج هه كلعاده مالت عليكم
هزتها : نوير ثوري الشمس احرقتس يلا يالجنينتي انتي
نوره كشرت بأنزعاج ورفضت تقوم لانها مانامت الا متأخر
ام سحاب تنهدت : ياليل السرى سرو الناس وحنا ماسرينا، ابك قومي لاثور فيتس علامتس راقده متاخر ؟ ولا مسهرتس السربوت بهاج ؟؟
نوره انزعجت من ضوء الشمس وسحبت بطانيتها وغطت وجها تحجب ضوء الشمس عن وجهها وعيونها
دخل بهاج وسكر الباب ورا وبيده الغدا : ارحبي ياخالتي
ام سحاب : ياهلا ابك جابك الله
بهاج : افا علامكم؟
ام سحاب اشرت على نوره الي تحت البطانيه : عانها
بهاج عقد حواجبه : وش قومها راقده هنا ؟
ام سحاب : مدري عنها حسبت انكم متخانقين
بهاج ضحك بخفه ونزل الغذا ونطق : نوره
نوره ماردت عليه
بهاج : قومي ولا بقومك غصب
نوره فتحت عيونها بصعوبه وعيونها مورمه من بكاها امس على ام سحاب واستوعبت ملابسها وتجمدت مكانها ، هو عادي انها تلبس كذا بس نوره دراما تستحي !
بهاج حرك البطانيه : قومي يلا لاسحب البطانيه ، لابسه قميص ؟ حذريني قولي لي اذا لابسه قميص استر عليك واغطيك
نوره مسكت البطانيه بقوه : لاا اردى من القميص رح رح تكفى
بهاج ضحك وحب يحارشها وسحب البطانيه وهي تسحب البطانيه
ونطقت : بهاج تكفى اتركنيي
بهاج : بشوف وش هالشي الي اردى من القميص
نوره : شورت وتوب (ياجماعه تكفون والله قصدي شورت وتوب ماقصد شي ثانيي يارب فهمتو )
بهاج : ايي بقيم يلا خليني اقيم شورتك يلا
نوره : لاا
بهاج فقد الامل وسكت شوي يوهم نوره انه راح
نوره طلعت عيونها من تحت البطانيه تتاكد انه راح ولكن شافته يبتسم ويلعب بحواجبه
نوره : اوفف بهاج خلاص بلا حركات اطفال روح تغدا
بهاج تكى : اولاً حلال شوفتي لك عادي انتي حلالي ثانياً احد يتغدا الضحى؟
نوره : بهاج استحي
بهاج : لا ماتستحين يالعوبا اعرفك لو تستحين كان استحيني تلبسن فستان مفتح
تنهدت نوره وهي تنتظر بهاج يروح عشان تقوم تبدل ملابسها
بهاج كان عنده فضول يعرف وش الي يخليها تستحي قد كذا وسحب البطانيه بلحضه غفله نوره وفزت نوره وقامت من الخوف بهاج ناظرها من فوق لتحته بتأمل : صاروخ
نوره عرقت من الاحراج
بهاج كش بوجهها : مالت عليك عبالي لابسه شي ثاني طلعني لابسه كذا ؟ متستره لاتسوقينها علي
نوره ضربت بهاج : عيب
بهاج : قومي قومي نتغذا والله عندك تكبير المواضيع من تكبيرك المواضيع عبالي شي ثاني حسبي الله على ابليسك انخرشت معك
نوره ابتسمت وراحت تلبس اي شي وبهاج دخل عند ام سحاب الي جالسه عند الراديو : قومت العوبا ؟
بهاج : اي قومتها
ام سحاب : الحمدلله
وجت نوره والابتسامه بوجهها وبهاج شافها وابتسم : بنت ترى بنروح سعود اليوم خلك جاهزه
نوره كشرت : سعودوه؟ وش ابغى فيه وجهه الفقر
بهاج ضحك من كرهه نوره لـ سعود : عشان ريف
تنهدت نوره بضيق : افف ياعمري عليهاا اصبر بجهز دموعي عشان ابكي معها
ضحك بهاج وام سحاب بالها مشغول بمرضها
،
بهاج بالسياره ينتظر نوره ومتكي وطفشان : نوره يانوره وينك
وجلس ينتظر نوره واخيراً جت : صنعه صاروخ هي؟
نوره سكرت الباب : النقاب اصعب من صناعه الصاروخ انت وش عرفك
بهاج ضحك : ايي اضحكي واستانسي وطقطقي وذبي بعد شوي بتبكين من ريف
نوره كشرت بضيق : افف لاتذكرني ابكي
بهاج ضحك والتفت يناظر الطريق ونوره تحط اغاني ومستانسه وبهاج يضحك عليها وبعد مرور وقت بسيط وصلو بيت ابو رهف
بهاج التفت لـ نوره : اسمعي حاولي تخلينها ترجع لـ سعود
نوره : خيرر؟ تبيه يكمل عليها ضرب ؟
بهاج هز راسه : لا سعود ندم وتغير
نوره : مارتحت ولا صدقت
بهاج : حاولي فيها احسن من تجلس عند ابوها ويبيعها
نوره زمت شفايفها وهزت راسها برضى ونزل بهاج ونزلت نوره وراه
________________________
(بـيـت ابـو رهـف )
ابو رهف بصراخ : يابهيمه انتي وياهه بيجون ضيوف سوو القهوه والشاهيي
رهف : اعصابك شوي شوي
ريف هزت راسها واتجهه للمطبخ ورهف اتجهه وراها ونطقت بعصبيه : بنت انتي خلاص عاد بلا دلع ماصخ ! قوي شخصيتك مو كل احد ياسلط عليك كلامي مو كلام عدوه كلامي لك كأخت انا اختكك بكرا تتزوجين وتشوفين حياتك ويشوفك رجلك ضعيفه يتسلط عليك
ريف : خلاصص تكفين لاتزيدين عليي الي فيني مكفيني
رهف: كيفك بس اذا استمريتي على وضعك هاذا تروحين وطي
ريف سكتت وتنهد رهف وسوو القهوه والشاهي
وطق الباب واتجهه ابو رهف يفتح الباب ونطق : يالله حيه
بهاج : الله يحيك ويبقيك كيف الحال والاحوال
ابو رهف : والله الحمدلله كل شي تمام ماعدا هالعله رهف على تسبدي وريف مثلتها
نوره كشرت وكانت ورا بهاج فـ ابو رهف ماشافها ونطق ابو رهف : ها عساك يالبهجي جاي ترجع زوجتك رهف
بهاج احتدت ملامحه والتفت ومسك يد نوره وطلعها من ورا ظهره: متزوج
ابو رهف ارتبك من شاف نوره : ماشاء الله مبروك يعني بس الشرع حلل اربع
بهاج بحده وشد على يد نوره ونطق : الشرع حلل اربع بشروط واسباب وانا غني عن كل شي هي مغنيتني عن الاربع الحريم الباقيه
ابو رهف : ايي بس بهالوقت الي ماتزوج ثنتين على الاقل يعتبر رخمه
بهاج بعصبيه يخفيها : الرخمه الي يبيع بناته على اردى رجال
ابو رهف انلجم ونطق بهاج : جايين نبي البنات
ابو رهف بفرحه : تتزوجها ؟
تنهد بهاج : ياليل اقولك متزوج متزوج ويجيني ورع بعد كم شهر
ابو وهف كشر وجهه : ايي زين زين مبروك ، اقلط اقلط
بهاج ناظره بحده والتفت لـ نوره : ادخلي داخل تلقين البنات
نوره هزت راسها برضى ودخلت وهمس ابو رهف : والله خاروف يابهاج
بهاج رفع حاجبه : وش قلت؟
ابتسم ابو رهف : اقلط اقلط
ودخل بهاج مجلس الرجال وصدره مكتوم من المكان مايحبه
وعند نوره الي دخلت وجتها رهف : ياهلا ويامرحبا بالنوريي
نوره ابتسمت وسلمت على رهف : هلابك ياعيوني
رهف : اجلسي البيت بيتك وبروح اودي القهوه واجيب ويف لك
نوره ابتسمت وهزت راسها : خذي راحتك
وراحت رهف وتدخلت المطبخ ونطقت : بنت نوره جت روحي يمها
ريف بفرحه : نوره حرم بهاج ؟
رهف : ايواا هي جت تهبل تهبل
ريف : بروح لمها
وراحت ريف لـ نوره ورهف راحت ودت القهوه لـ ابوها
~مجلس الرجال ~
ابو رهف : اي على ماقال بنزوج البنات ونرتاح من همهم
بهاج : يارجال ربي رزقت بالغاليات المؤنسات غيرك ربي مارزقهم احمد ربك على هالنعمه
ابو رهف : ماجابن لي الا العار والفشيله
بهاج هز راسه بيأس من تفكير ابو رهف
رهف من ورا الباب: القهوه
قام ابو رهف وفتح الباب على كبره عشان بهاج يشوف رهف وينعجب فيها بهاج صد وناظر الارض
وابو رهف يطول الحوار مع رهف عشان بهاج يلمح رهف ورهف جاها هبوط وترجف من الخوف ان ابوها عادي عنده ! وابعدت شوي عن الباب عشان بهاج مايشوفها وبهاج ماكله الحياء ومنزل راسه يناظر الارض ويتنحنح
رهف اعطت القهوه ابوها وراحت ترجف وابو رهف يناديها يبيها تجي بس طنشته بخوف ورجت للبنات وبهاج كل تفكيره نوره
ابو رهف صب القهوه ومدها لبهاج : سم
بهاج بنقد ونظرات نقد : سم الله عدوك ، بتصل على سعود يجي ياخذ حرمته
ابو رهف هز راسه : ماش البنت صايره عنيده ماتسمع الكلام
بهاج ابتسم بخفه ويدري ان نوره معلمتها العناد
،
نوره وريف يسولفون ويضحكون وجتهم رهف ترجف
نوره عقدت حواجبها: وش فيك؟
رهف : هاه ؟ لا ولاشي
ريف : ابوي سوا حاجه؟
رهف : لا لا
نوره : قولي عادي
رهف : مافي شيي
ريف : تكلميي !
وضغطو عليها البنات وقامت وصرخت : ابويي مايغار علينا لدرجه فتح الباب بكبره عشان يشوفني رجل نوره ! خلاص كذاا ارتحتوو ؟!
وراحت لغرفتها ونوره تجمدت مكانها بصدمه
ريف : حركات ابوي مايبطلها
نوره قامت تبغى تروح تتهاوش مع ابو رهف بس مسكتها ويف ونطقت : نوري لا انتي حامل وابوي يدور فرصه انه يجهض الجنين ويقدر يرجع بهاج !
نوره هزت راسها بنفي : لالا مستحيل يقدر يرجها لـ بهاج مستحيلل وربي مااسامحه هالمره خلاص تعبتتت افف زواجي منه مهدد وكل شوي يطلع لي واحد ! من جهه هيام ومن جهه رهف ومن جهه سعود وخططه الفاشله ومن جهه جدتي ومرضها ومن جهه الديره وكلامهم عني واني سراقه رجاجيل وربي مو قادره اتحملل واواسي الناس واطبطب عليهم بس من يشوف حزني وهمي غير بهاج !! بهاج الوحيد الي اقدر اقوله الشي الي يضايقني بدون اي تردد وادري انه بيقوف معي بالمره قبل الحلوه كيفف يقدر يرجع لها
ريف حضنت نوره : محد يقدر ياخذ بهاج منك اذا انتي تحبينه وواقفه معهه !
نوره جلست بتعب وشدت شعرها بتفكير هي كانت تحتاج احد يواسها وتجي هنا تشيل همهم وتمشي ويقولون لها كلام تشتعل غيره ؟ ريف فقدت الامل وتدور اي شي عشان تجيب بهاج لـ نوره وطلعت على جيه سعود
سعود ناظر لها بشوق : ريف
ريف تقدمت له ومسكت طرف ثوبه من يده : سعود تكفى ناد بهاج حرمته تعبانه
سعود : ابشريي ابشري ولا يهمك
ريف هزت راسها ودخلت وسعود اتجه للمجلس الرجال وسلم ونطق لـ بهاج : بهاج اهلك يبونك داخل تعبانين
بهاج فز وانكب فنجان القهوه من الخوف : وينها؟
ابو رهف : تعال تعال من هنا
ودخل بهاج ويدور نوره بعيونه وابو رهف ورا بهاج طاحت عين بهاج على نوره الي جاسله وتفكر وماكانت تبكي ونوره اذا مابكت يعني شي قويي على قلبها وهاذا الي خوف بهاج ونطق بلهفه : نوره
نوره رفعت راسهاوناظرته وودها تنهار بحضنه بس مافي شي يخليها تنهار
بهاج تقدم بهاج وحضنها قدام عيون ريف وابو رهف الي يناظرهم بنقد :رخمه همه رضى حرمته
بهاج عض على شفايفه بعصبيه ونطق بحده : الرخمه الي شاربه يوقف عليه الطير لكن افعاله ماتعبي فنجان !
ابو رهف : وشو؟! انا رخمه
بهاج ترك نوره من حضنه وجلسها والتفت لـ ابو رهف وتقدم له ونطق بحده :اي رخمه ولا من يبيع بناته على اقرب رجال واردى الرجاجيل ؟ قلي انطق من يبيع ضناه من
سكتت ابو رهف والتفت بهاج على ريف واشر عليها وصرخ : هاذيي بنتك بعتها وعنفتها وضربتها عشانها ماتبي زوجها؟ اوقف معها واسها خلك سند وعون لها صر رجال وصف مع الرجاجيل لاتصير رخمه اردى رجال ياخذ بنتك
والتفت لـ نوره : روحي السياره الان !
نوره خذت جوالها وطلعت
والتفت بهاج على ابو رهف : والي يزعل هالبنت الي طلعت بزعله واخليه يندم يحط عينه بعينها والي مايحشمها مايحشمني
ابو رهف ناظر بهاج من فوق لـ تحت
بهاج من شاف ابو رهف يناظر من فوق "لتحت" ونطق بسخريه: زين عرفت مقامك
ابو رهف : احشم نفسك وصر رجال لاتوديك وتجيبك حرمهه !
بهاج مسك ياقه ابو رهف : الحرمه الي مستصغرها ربتك وجابتك على الحياء وتعبت عليك واخر شي تستصغرها؟ هاذا الي صدق حرام فيه ٩ شهور
ودف ابو رهف والتفت لـ ريف ونطق بحده: وانتي لاتشوفك عيني جالسه هنا انتي تدرين ان ابوك يبيعك على ٥٠٠ ﷼ ؟؟ قومي قومي بسرعه البسي عبايتك مالك جلسه بهالبيت
ريف سكتت وقعدت تناظر ابوها وتناظر بهاج الي معصب
تقدم بهاج ومسك عضد ريف بقوه ومشى وابو رهف ورا بهاج ويسحب ريف طلع بهاج واعطى ريف سعود ونطق بهاج : خذها ياسعود بدق الخشوم خذها رجوله ولاتسكت خذها كانك تحبها صر رجال وخذها
سعود مسك ريف ومنلخم وراح بهاج والتفت سعود لـ ريف : مالك جلسه الا ببيت رجلك
ريف فكت يده بقوه : بعد عني
سعود سحبها له ونطق: باخذك طرق وعناد
ريف : اعلى مابخيلك اركبه ماني رايحه معاك
سعود تجاهلها وسحبها للسياره رغم رفض ريف وبكائها الا انه سحبها معه وراح
________________________
( وسـط الـريـاض )
بهاج تنهد وفك ياقته والتفت لـ نوره : وش قالو لك عشان يصير لك كذا ؟
نوره صدت : ماقالو شي
بهاج : الا صار وبعدين تعالي ليه مابكيتي غريبه
نوره : خلاص تعودت ماابكي
بهاج : افا
نوره : ايي خلاص كبرت وبصير ام !
بهاج ضحك بخفه ونطق: نشوف نشوف
نوره بتحدي : نشوف ، ابغى قهوه
بهاج حط صبعه على خشمه : ابشري
نوره ابتسمت واتجهه بهاج للكوفي وطلب قهوه ومد لنوره : سمي
نوره خذتها وابتسمت وكلعاده تصور
بهاج : اعوذ بالله تقول ساهر تصورين كل شي
نوره ضحكت على ذبه "ساهر" وابتسم بهاج واستمرو يتمشون بالرياض
بهاج التفت لنوره وعقد حواجبه من شافها تبكي ونطق : افا علامك تبكين ؟
شهقت نوره واشرت على شايب جالس حاله حال نفسه ونطقت ببكى
: شوفه يعمري احسه يوكل القطاوه بالشارع احسه لطيف وحنون
الشايب يناظرهم ومستغرب ومصدوم
كتم ضحكته بهاج ونطق : طيب عادي مافيه شي
نوره بدموع : افف منك ماعندك احساس شوفه كيف لطيف وجالس لحاله خلينا ناخذه
بهاج : هو ورع ناخذه؟ اكيد عنده اهل
نوره بدموع: ياربي منك حرامم شوفه جالس لحاله ياكل لحاله
بهاج بحيره : وش تبيني اسوي له ؟
نوره : ناخذه معنا حرام
بهاج عقد حواجبه : وين ناخذه ؟
الشايب : ابك علامكم تولجتوني تقلعو وراكم
نوره التفت لشايب وكمل الشايب : وانتي وش جاك تصيحين ؟
نوره مسحت دموعها : مدري احبكمم
بهاج رفع حاجبه بغيره : احبكم؟
نوره ضربت بهاج بخفه ورجعت السياره بزعل ودموع وهمس بهاج
: ماكملنا خمس دقايق من تحديها انها ماتبكي وش صار
الشايب : بغيت شي؟
بهاج التفت له : معليش والله تعرف حساسه وكذا
الشايب : ايي زين ياوليدي حافظ عليها وعلى قلبها
بهاج ابتسم وهز راسه برضى ورجع لسياره وركب وشاف نوره تمسح دموعها بالمناديل ونتاظره ونطق بهاج : ام دميعه عز الله
نوره دمعت زياده : اف منك
بهاج : خلاص خلاص انا ابو دميعه ولاتبكين
نوره : كفو كفو لاتبكيني
بهاج : اخسي ابكيك يابنت الاجاويد
نوره ابتسمت ونطق بهاج : وين تبين نروح ؟
نوره : ابغى جدتي
بهاج : علامك هجرتي بيتنا ؟
نوره : ماهجرته بس ابغى جدتي مشتاقه لها
بهاج هز راسه: الي ودك
نوره ابتسمت وحرك بهاج متجهه للديره
________________________
(بـيـت ام سـعـود )
دخل سعود ومعه ريف وزعلانه وتصارخ
ام سعود جت على حسهم : بسم الله الرحمن الرحيم علامك؟! ريف؟ وش جابك
ريف : مدري عن ولدك
سعود : من اليوم ورايح ريف تسكن هنا
امجاد اخت سعود : وليه تسكن هنا وهي مطلقه؟
سعود التفت لها ونطق بحده : هاذي زوجتي وماعمري طلقتها منين تجيبين الكلام ؟
امجاد : مدري على روحتها لابوها عبالي طلقتها
ريف : لاحبيبتي ارتاحي ماراح اطول عندكم
سعود : انتي زوجتي على سنه الله ورسوله
ريف : ماراح اطول عندكم
سعود رفع حاجبه من قوتها الي فجأه جت ونطق بهمس : حسبي الله عليك ياحرمه بهاج علمتيها قوه العين والعناد
سمعته ريف ونطقت : تسلم النوري والله على الكورسات الي اعطتني
سعود : اني داري انها ماتوفر
ريف كشرت بوجهه
________________________
( يـوم الـجـمـعـه )
نوره تبخر بهاج بالعود الازرق وبهاج يبتسم لـ نوره وام سحاب تشغل قرآن
بهاج قبل جبهه نوره بحب : يلا توصين على شي
نوره بأبتسامه : سلامتك ياعيوني بس لاتتأخر العصر بنروح للمستشفى
بهاج عقد حواجبه : مستشفى ؟! لمنن؟
نوره بضيق : جدتي اخر موعد لها
بهاج عض على شفايفه بضيق : تمام لاتشيلين هم بحجز لها افضل المستشفيات بالمملكه
نوره بأبسامه : افف بهاج ياخي مشكوور
بهاج مسك خد نوره : وش قلنا؟ مابيننا اعتذارات ورسميات
نوره ابتسمت وابتسم بهاج وراح يصلي صلاه الجمعه ونوره ماتركت جدتها ثانيه وحده ماتركتها
رجع بهاج بعد ماصلى صلاه الجمعه ودخل البيت والابتسامه ماتفارق وجهه وفرحان بحياته مع نوره ويحمد ربه على نعمه نوره
بهاج : ارحبو يالربع
نوره ابتسمت : البقىى
بهاج بضحكه : اقعدد يانوره والله منتي ببسطه صرتي تعرفين تردين
نوره : ايي تعلمت منك
بهاج ابتسم ونطقت نوره : تبغون الغدا اقلطه الحين ؟
ام سحاب : اي بالله اني جيعانه
بهاج مسك بطنه : وانا بعد جويع
نوره هزت راسها واتجهه للمطبخ تجيب الغدا وحست ببهاج متكي على الباب يتأملها التفت وابتسمت ونطقت : بهيج؟
بهاج بذوبان : عيون وقلب وروح بهيج
نوره تحط الاكواب : ايوا اللواء بهيج وشبغيت ؟
بهاج : بغيت اقولك هو اليوم اخر موعد لخالتي ؟
نوره هزت راسها بحزن : ايي اذا مااستجابت خلاص يعني مدري وش اقول لكن تفارق الحياه بسم الله عليها وانا ماودي ، افف متعلقه فيها مره
بهاج تقدم ومسك كفوف نوره بحنان : اسمعي ياعين ابوك انتي خليك واثقه بربي ومارح يصير الا كل خير وكل العلاجات انا متكفل فيها ودافعها واذا مااستجابت اسفرها على حسابي تتعالج واهم شي مااشوف الحزن والضيق بوجهك ياابوي انتي
نوره تنهد بضيق : ان شاء الله تستجيب
بهاج ابتسم : يلا عاد مانبي التكاك يدخل بعائلتنا الصغيره ذي
نوره ابتسمت وجت بتاخذ صحن الغدا الي كانت اساساً مخلصته بس تنتظر بهاج يجي من صلاه الجمعه عشان يتغدون سوا بس بهاج تقدم وبحركه سريعه اخذ الصحن من نوره ونطق : كم مره قايل لك لاتشيلين الثقيل يرحم والديك
ضحكت نوره : مو ثقيلل
بهاج : الا ثقيل بس انتي عوبا
ضحكت نوره ونطق بهاج : ايي صح لاتصدقين ان موضي توقف معك تذكري غدراتها ولاتوثقين
نوره عقدت حواجبها : ليه علامك عليها؟
بهاج : اذا انقرصتي منها قولي علامك عليها وافهمي كلامي زينن البنت عقربب وعاشت ببيئه عقارب انتبهي
نوره هزت راسها : مستحيلل
بهاج : مستحيل اثقق في احد غيرك وحتى خواتي ماوثقت فيهم كثرك واحفظي هالثقه ولاتخونينها وتعطينها كل شي يخصك ويخصني هي مجرد جاسوس بحياتنا
نوره هزت راسها بتسليك لـ بهاج ومو ماخذه كلامه على محمل الجد !
وحط الغدا وتغدو وجلسو
بهاج : تبوننا نسري الحين ولا العصر ؟
ام سحاب : الي ودكم والله
نوره : العصر كويس؟
ام سحاب : اي حليو حليو
بهاج هز راسه وسحب جواله ويدرس وضع هيام ومن جهه اخرى موضى ودوامه وكل شي وقام
نوره : وينن؟
بهاج : بخلص كم شغله واجي خلوكم جاهزين على اذان العصر جايكم
نوره : تمام لاتتاخروانتبه للطريق
بهاج : ابشري ياعيوني
نوره ابتسمت وراح بهاج والتفت نوره لجدتها تسولف معها
بعد كم ساعه اذن اذان صلاه العصر وقامت نوره وجدتها يصلون ويلبسون عباياتهم عشان بهاج بيجي على اذان العصر
وصلو وخلصو ولبست نوره عبايتها ونقابها وام سحاب لبست شرشفها وبهاج يدق بوري ينتظرهم واخيراً طلعو وركبت ام سحاب جنب بهاج ونوره ورا بهاج ومسكو الخط ونوره تهوجس وتشوف شكل جدتها وبهاج وام سحاب يسولفون ونوره ماهي يمهم وتهوجس ولابد من الدموع
بهاج رفع راسه وناظر المرايه الي تعكس نوره وشاف عيونها دموع وتناظر جدتها ونطق بهاج : خالتي ليش مانحب نشوف الي نحبه حزين ؟
ام سحاب : لانك تحبه وتعزه ولاترضى عليه الهم والغم
بهاج : طيب واذا هو حزين على شخص يحبه وشلون نبعد عنه الحزن؟
نوره تشوفهم يتكلمون بس ماكانت تدري من يقصدون جاهله انهم يقصدونها
ام سحاب : تخفف عليه حزنه وهمه وتحاول تضحكه وتزعل الدنيا عشانه
تنهد بهاج بضيق ونطق : طيب مافي مجال يضحك لان الهواجيس ماكلته
ام سحاب فهمت قصده ونطقت : يفرجها ربي
تنهدت نوره ونطقت : بهاج
بهاج فز من سمع صوتها : لبيه ياعيون بهاج
نوره : بتضارب معك
ام سحاب بصدمه : ابك علامتس علاه ؟ وراتس تضيقين على نفستس زياده ؟
بهاج : افا
تنهدت نوره : بس كذا ابغى اتهاوش معه احسه مسالم بالمره
بهاج ضحك وعارف انها تدور سبب تبكي عليه
نوره : انت ماتحبني
شهق بهاج وناظر لها بصدمه ونطق : انا ماحبك ؟ ابك احرق الدنيا لعيونك
نوره : مدري زعلانه منك
بهاج ضيق عيونه : وش يرضيك ؟ اطلبي الي بخاطرك
نوره ناظرت فيه وعيونها تتكلم وكأنها تقول "ابغى جدتي تتشافى" فهمها بهاج ونطق : ان شاء الله يالنوري نحتاج دعائك بس
نوره زمت شفايفها بضيق وهزت راسها برضى وعيونها تمتلي دموع
التفتت ام سحاب لنوره وشافتها تبكي : لا يانوره لا لا
بهاج ناظر المرايه وشافها تبكي وكشر بضيق وماهانت دمعتها عليه ووقت السياره على جنب ونزل واخذ نفس وفتح باب نوره وفتح يدينه لها : لاتبكين
نوره حضنته وشدت ثوبه وانهارت : مابغىى اترك جدتي يابهاج مابغاها تروح مابغى اعيش بدونها
بهاج شد حضنه : نوره تفائلي بالخير !
سكتت نوره وهداها بهاج ورجعها للمرتبه وسكر الباب وكمل الطريق وعينه على نوره الي تناظر جدتها وعيونها تتكلم
بهاج : خلاص يانوره لازم تصيرين قويهه !
نوره : افف كيف اصير قويهه وقلبي وعقلي مع جدتيي لاتجبرني على القوه وانا ماقوى عليها وانا اشوف جدتي بهاذي الحاله
بهاج ناظرها وسكتت مايبغى يضغط عليها الي فيها مكفيها
وبعد وقت من الهواجيس وصلو المستشفى ونزل بهاج وساند ام سحاب والتفت لنوره ونطق : تعالي
نوره قربت وصارت جنب بهاج وخلصو اوارق ام سحاب وكل شي وجلسو بغرفه الانتظار وبهاج يكمل باقي الاوراق
وقف بهاج عن غرفه الانتظار النسائيه تنحنح بهاج ونطق : نوره تعالي انتي وخالتي يلا جاء دورها
وطلعت نوره وجدتها ودخلو الغرفه
الدكتور : لو سمحتو اطلعو
بهاج التفت لنوره ونطق : يلا يانوره
نوره ناظرت الدكتور: مابغى! ابغى جدتيي
الدكتور : بسوي كل الي اقدر عليه
بهاج سحب نوره : تعالي نطلع ونغير جو
نوره ناظرت الدكتور : مابغى اطلع!
بهاج همس : نوره هاذا دكتور مو بهاج تعاندينه
نوره كشرت بضيق وسحبها بهاج وطلعو وجلس بهاج ونوره رفضت تجلس واقفه
بهاج قام ووقف جنب نوره ونطق بهدوء : هاذهي الدنيا يانوره تضيق وتنفرج ومابعد الضيق الا السعاده يانوره ماراح تفيدك دموعك لارح تفيدك ولا تفيد خالتي ، خالتي محتاجه دعواتك ماهي محتاجه دموع نوره اوقفي على رجلينك وهاذا اختبار من رب العالمين اختبار !
نوره بدموع : بهاج انت مو مستوعب الفقد وكيف تفقد ام واب وجده ربتك على يدينها من وانت صغير ماجربت ولا اتمنى انك تجرب ولا عدوي اتمنى انه يجرب الحياه الي عشتها !
بهاج ضمها ويمسح عليها : طيب انتي ليش تبكين وهي بأذن الواحد الاحد متشافيه ليش تصعبين وتعقدين الامور وهي محلوله بأذن الله ، جدتك بأحسن المستشفيات بالرياض ومن احسن الاطباء الي يعالجونها وهي بين يدين ربي يعني بأذن الله بكرا وهي تلعب مع عيالك يانوره تجدل شعر بنتي وتوكل ولدي يانوره فكري تفكير سليم ليش تفكرين انها بتموت او ماتتشافى ! نوره كذا تزعليني وتزعلين جدتك على هالكلام وتتفاولين عليها مايصير يانوره تفائلي بالخير ياابوي انتي
نوره حاولت تكتم دموعها بس ماتقدر دموعها تسبقها ونطقت بغصه : بهاج ماقصدي اتفاول عليها او اضايقكم خلاص انا اسفه اذا ضايقتكم بكلامي ودموعي وعنادي وب....
قاطعها بهاج بحده : وش هالكلام ؟ اسف والخرابيط ذي حنا وش قلنا مابيننا !
نوره : تمام
بهاج : ماامنعك تبكين عندي لكن امنعك تتفكرين بتفكير سيئ!
نوره نزلت راسها وسكتت وبهاج ضمها وسكتت وسحبها تجلس بالكراسي
طلع الدكتور ووجهه مرعوب ونطق : ماتستجيب واغمى عليهاا
نوره فزت : ايششش؟
بهاج : وش قاعد تقول؟
وراح الدكتور يجيب طاقم طبي تاركهم بحيرتهم ونوره تبكي وبهاج يهديها
________________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
*اعتذر عن الاخطاء الاملائيه*
النجمه تدعم الروايه✨