#مراس_الدعجاء
للكاتبة هدهد
لا تنسون متابعة الحساب 💛
والتصويت والتعليق على كل فقرة احب تعليقاتكم 🎀
✤———————————————✤
الصبح وأحنا نتريگ فتحت موبايلي وشفت ناشرين صورتنا وصورة سيارتي وسيارة عثمان واحداث السباق كلها بكم حساب متخصصة بالسباقات وجانت شبه مشهورة والتفتت لعثمان وسألته
-شفت شناشرين؟
ميل راسه مستغرب وسأل
-شنو؟
-ناشرين صورتنا بحساب ***
-صدك!!!
-والله شوف
انطيته الموبايل وعقج حواجبه مزعوج وحجه
-ما اله حق يصورنا هذا
اخذ موبايله ودخل على نفس الصفحة وسألته مستغربة
-شراح تسوي؟
-اكللهم يمسحونها
وفعلًا دخل على الخاص وراسله..
رجع نزل موبايله ينتظر الرد وخلصنا ريوك وگلتله
-نروح لبيت أهلنا؟
-بكيفج
-يالله لعد أروح أبدل
دخلت بسرعة بدلت وطلعت أشوفه يخابر ومافهمت منو، سده وباوعلي
-خلصتي؟ يالله نروح بسيارتي
-ماشي
رفع نظارته يلبسها ورتب شواربه بالمراية وحجيت مبتسمة
-حلو لا تتضبط أكثر
ألتفت الي مبتسم وحجه بخـباثه
-شگد ؟
-ليش هيّ الحلاة بيها مراحل؟
-الي تحبه تشوفه أحلى واحد
ضحكت وتقربت احاوط أيده وحجيت
-تجنن لعد بعيني
رفع أيده يعدل گذلتي يحطها وره أذاني وحجه بفكاهة
-هيج تخجليني
توسعت إبتسامتي ودفعت كتفه
-ابو الخرعات يخجل؟؟ ما معقوله
تقرب من وجهي يحاوطه وتمتم وهو يتأمل ملامحي
-تدرين شگد هنيالي بيج؟ ما تخيلت بيوم تصيرين الي حتى رغم اعجابي بيج ما تخيلت ترهم ونصير لبعض بالنهايه، بس عبالك مثل الحلم الي تحقق ماتعرفين شگد احبج
عيوني بعيونه وأحس بشعور حلو ما ينوصف، عبالك كهرباء تمر بجسمي وفراشات وضغط مُحبب على بطني.. احبه واحب شگد يخليني احب نفسي بعيونه وشگد اني هواي اله وما اتعوض
-عثمان: ليلي الأليل، وجودج بحياتي مثل الامان النفسي والمعنوي.. عيونج وطن كافي أعيش بي ويا بشر عاقل يعوف وطنه للغربه؟
طبع بوسه خفيفه على وجهي بس مليانه مشاعر وحُب،
حاوطته بحضن وحجيت
-أحبك عثماني، وجودك مثل سند لشخص مبتوره رجله
تنفست عطره الي تعودت عليه وصارت كل ريحه اشتمها فاهية يمه
السالفة مو بالعطر .. السالفة بي نفسه
ابتعدت عنه واني الضحكه تارسه وجهي ووجهه هم مبتسم حيل
حضن كفي بكفه وتحركنا سوه
صعدت السيارة بحماس عبالك صار سنه ما شايفه أهلي رغم قبل ايام شفتهم،
تقدم ناحيتي عثمان وسحب الحزام وگال
-صايرة تنسين سالفة الحزام؟
-أي والله أنسى هواي
-ميصير يا حبيبي ميصير، كل شي توقعي وانتِ تسوقين
بقيت مبتسمه بدون جواب وهو شغل السيارة وتحركنا،
ايد عثمان ملازمة أيدي ويمسح عليها بحنان وشغل اغنية رومنسية بقيت اضحك وياها لان كلامها يضحك.. ما أحب الرومنسيه بس أحب كل تصرفاتنا سوه
مرات بكل لحظه تمر بحياتك أكو ريحة مميزه بيها
ريحة اذا تشمها تتذكر ذكرى صارت من زمان
سواء حلوة او سيئة.
مثل عطر المدرسة الابتدائية او عطر الامتحانات، يوووه خوب هذا جان يلعب ببطني لعب عبالك راح أطرح من الخوف وآني أصلًا مو حامل
ما اعرف شلون بس أكو ريحة لكل شي بالحياة حتى المشاعر
النومة بالشتاء يم الصوبة
العاصفة بنص الليل والرعيد
الصبح بالدوام
من تسهر وكل البيت نايم
كل شي يأثر بيه.. ما اعرف بس لحظتنا هسه اني وعثمان صارت الها ريحة مميزه إلها وهاي الريحة ما تصير الا من اجتمع اني وعثمان بالسيارة مالته بس
قاطع صفنتي وصولنا للبيت وكالعادة ندخل نسلم على اهله اول
لزم ايدي ودخلنا وهو مبتسم.. احب من يرسم شعوره على وجهه وخصوصا من يدخل لبيت اهله احسه حيل يشتاق الهم لدرجه مايسيطر على ضحكته بالبيت
فتح الباب وصاح
-يا اهل البيت وينكم
طلعت خاله من غرفتها للصالة اول شي وبعدها البنات وهي تهلي وترحب بينا
-فيروز: يا اهلين وسهلين نورتونا يا أمي تفضلوا تفضلوا
بوست عثمان وبوستني وبعدها سلمت على البنات وتحمدولي بالسلامة رغم من اول ماصار الي صار خابرني اثنينهن وتحمدولي .. احسهن خوات الي مو بس خوات عثمان
-فيروز: كيف صرتي يا امي؟
-الحمدلله خالتي ، شلونج انتِ؟
-فيروز: بشوفتكم سوا انا منيحه
-ميان: شلونج عمري؟ مشتاقين والله
-حياتي اني الاشوق كلش مشتاقتلجن والله
-ليان: شرايكم نطلع اليوم؟
-ميان: اي تطلعين ليش لا؟
شفت نظرات ميان الغامزه وليان الي تطنشها واستغربت وسألت
-شنو صاير ؟
-ليان: ماكو شي، عثمان شلونك ؟؟ صار فترة ماكو
-عثمان: حبيبتي ليانه والله بالبيت
-ميان: من لقى احبابه نسى اصحابه
-هههههههههه
-عثمان: شعندي غيرجن اني؟
-ميان: الله يخليك النا
وكلنا ردينا بآمين
بقينا نسولف هواي لحد ما مرت ساعة تقريبًا ووگفت اني وعثمان نستأذن اروح لبيت أهلي رغم خاله كلش اصرت نبقى للغده بس وعدتها بالعشه اجي
طلعت من بيتهم ودخلنا اني وعثمان بيتنا واول ما دگيت الباب فتح علوش الي من شافنا حضن عثمان على الطاير وعثمان متونس بي
-عثمان: هلا بالبطل شلونك حبيبي ؟
-علوش: الحمدلله يابطل
ضحك عثمان واني مثلت الزعل
-هاي شنو؟ واني ما تسلم عليه
باوعلي وبسرعة حضنّي واني تكتفت احجي
-لا لا بعتني علمود هذا مو؟
-عثمان: هذا شنو؟
-دسكت انتَ
-عثمان: أسكت ها؟؟؟ اني اعلمج
-علوش: أختي حبيبتي الحلوة انتِ
ضحكت من بده يتلوك وحضنته اسلم ودخلنا جوه البيت وحجيت اسأل علوش
-وين ماما؟
قبل لا يجاوب لاحظت حسنكي ينزل من الدرج ومن شافنا صاح
-حسنين: هلا بالنسيب وبمرته الگاطعة
-لا يا بذات اني ما گاطعة لو انتَ؟
-حسنين: هههههههههه اتشاقة عمي شلونكم؟
سلم وكعدنا وحجيت
-وين ماما؟
-حسنين: هسه على جيه من السوك
هزيت راسي ورجعت سألت
-وبابا؟
-حسنين: بالمكتب اكيد ، روحي صيحيله اكيد ما سمعكم
هزيت راسي ووگفت اعوفهم بالصالة الداخلية وتحركت بأتجاه المكتب مال بابا،
اول ما وكفت كدام الباب دگيته بهدوء مرتين وسمعت صوته من جوه يرد
-فضل: تفضل
وبدون تردد أنفتح الباب ودخلت احجي مبتسمه
-هلا بابا الجميل شلونك؟؟
رفع راسه الي وأبتسم ووگف واني بسرعة تقربت من يمه احضنه واسلم عليّه
-شلونك حبيبي ؟ مشتاقتلك
-فضل: اني الاشوق يا حبيبتي، شلونج؟ شلون عثمان؟
-الحمدلله
بعد سلام حراري كعدت كدامه على الكنبة وبقينا نحجي بمواضيع بسيطة لحد ما حجه
-فضل: اريد احجي شي أدري راح يضوجج بس لازم احجي
-احجي بابا شنو؟
وصدمني من گال
-فضل: أريد تبيعين سيارتج
-شنو تقصد بابا تعرفني أعشق سيارتي ؟؟
نزع نظارته وفرك عينه وحجه
-فضل: بابا متفيدج هالسوالف اشتريلج سيارة على كد دوامج وطلعتج النا وبس عوفي السيارات الرياضية
-شنو تقصد بكلامك بابا؟؟
-فضل: عرفت بيج متسابقه أمس بساحة كلها شباب شنو معنى هالتصرفات؟؟؟
-عادي مابيها شي
-فضل: شلون مابيها شي انتِ بأعتبار راح تصيرين ام شهالسوالف الشبابية وطيحان الحظ؟؟ ما تفيدج اعقلي وركزي على حياتج
-تدري كلامك مو عادل؟
-فضل: مو عادل؟، شنو تقصدين؟؟
-دا تتحيز اولاً للشباب وثانيًا برأيك البنت من تتزوج ما الها اي شي غير الحياة الزوجية والامومة وكلامك هذا كله تحيز
-فضل: تفهمين شدا احجي؟؟ هسه لو انتِ حامل جان هم وگع بسبب خطورة السباقات وشفت سباقج جان ردتي تموتين بحادث!!! انتِ وينج وين السباقات وسوالف ولد الشوارع ؟؟؟ اكص ايدي اذا ما تطلع كلها سوالف عثمان ومعلمج عليهم
-لا بابا عثمان ماله شغل!!! تعرف بيه احب هالسوالف من صغري وحتى جنت إطلع بدون علمكم أصور بس الفرق بين قبل وهسه هو يدعم شنو احب وما يرفض لي طلب
-فضل: وإني أرفض بنتي تروح هيج أماكن، لا تخليني أتصرف غير تصرف
زفرت بنفس مكتوم ما عاجبني الكلام لان بابا ما يفهم وجهة نظري
-بالمناسبة السباق ماله دخل بموت الطفل
فرك وجهه وعبالك استوعب هو دخل موضوع حساس بنص العركة وحجه بهدوء
-فضل: ماقصدت بابا بس اني اخاف عليج شلون اتحمل اشوفج تذبين روحج بالتهلكة وابقى ساكت؟؟ إذا طلعتي أزعل منج
ما رديت وحاولت اغير الموضوع
-عثمان وحسنين بالصالة
وگفت وطلعت ادخل للصالة وشفت عثمان يضحك مع حسنين وحيدر الي تعجبت من شفته، جان لابس لبس طلعة ومبين توه جاي
من شافني أبتسم ووگف يحجي ببشاشه
-حيدر:هلا بأخت أخوها
-هلا حيادر حبيبي مشتاقتلك
سلمت عليّه بودية وكعدنا سوه وسألته
-وين جنت؟
-حيدر: توني وصلت امي من السوك واجيت
قبل لا ارد دخلت امي مبينه مبدلة ملابس طلعتها وحجت مبتسمه
-امنية:هلا ماما حبيبتي شلونج؟
-هلا حبيبتي شلونج؟
-امنية: الحمدلله بعد روحي، شلونك وليدي شخبارك
سلم عليها عثمان بأبتسامه وكعدنا كلنا وشويه ودخل بابا وهم سلم وكلنا گاعدين
عثمان كل شويه يباوعلي مستغرب ويرفع حاجبه الي يسألني شبيه؟
معقوله مبينه ضوجتي على وجهي؟
دخلت ماما للمطبخ تسوي الغده وردت اساعدها بس ماقبلت لان تعرف اني كل شي ما اعرف بالمطبخ .. كعدنا كلنا البقية وبقينا نسولف بمواضيع هواي
بابا اجاه إتصال وقرر يرجع للمكتب واني استغليت من حيدر وحسنين يسولفون وسحبت عثمان واگفين وحجيت اسمعهم
-راح أشوف غرفتي لعثمان
تحركنا وعثمان شاد على ايدي ويخزر بيه ومن صعدنا الدرج حجه بصوت ناصي
-شگد فشلة عفناهم جوه؟؟ شسوي بغرفتج ما شايفها اني؟
-دسكت عادي بعدين وين شايف غرفتي هو مثل الحرامية دخلت الها مرة وفضحتنا فضيحة وشردت بنص الليالي
گرص أيدي وضحك ودخلنا جوه وسديت الباب وهو سأل
-شبيج؟
-شقصدك؟ مابيه شي؟
-من طلعتي من مكتب ابوج شكلج غريب
-ماكو شي
تقرب من مي وطوق وجهي وحجه بحنان
-احجي شصاير ؟
تنهدت بملل وسندت راسي على صدرة وحجيت
-بابا شايف السباق مالنا مدري ياحقير گايله وطلب مني أبيع سيارتي وما أروح للسباقات مرة ثانية
هز راسه بهدوء وحجه شي يصدمني
-حقه
-حقه شنو؟!!
-حقه لان خايف عليج السباق انتشر لان انتِ خاطرتي بحياتج وهو اب ومن حقه يخاف على بنته اذا بكل سباق تعيد الحركة مو كل مرة تسلم الجره
-عثمان شبيك انت وياي لو عليّه
-اني وي الحق للصراحة، لو ما احبج جان نعنعت عضامج على حركاتج المتهورة وهم فلشت سيارتج ومنعتج ما تشوفين ساحة بحياتج
بلحظتها يمكن من الضغط او من النقاش الي بيني وبين بابا مدري كلمات عثمان الي حسيتني بالذنب رأستًا نزلت دموعي وبديت ابجي
-أكرهك
فتح عيونه مصدوم وهو يشوف دموعي وبسرعة لزم راسي يرفعة وحجه بتوتر
-شبيج تبجين؟؟ اتشاقة عمي والله ايدي تنكسر اذا صارت گبالج، هاي عود صدك؟؟
ادفع بي وهو يجرني لحد ما ضربت صدرة حيل وضميت وجهي بين أيديني،
هو سحبني يحضنّي وحجه بحنيه وهمس
-اني لو ما احبج وابوج يحبج وشفنه تهورج ما راح نجي والله، وعديني ما تعيديها وتنگص ايدي اذا حاولت تمنعج
تنفست اسحب النفس من انفي وحجيت بصوت ضعيف
-ما أسويها علمود تفوز ها؟؟؟؟
ضحك وضرب رأسي بأصبعه ورد
-هذا الي يهمج لج؟ طاح حظك عثمان
-أنجب
-طاح حظج انتِ لعد
-عثمااااان
-طاح حظك عماد اي والله
-هاي شبيكككك
-شو كلهم ماترضين؟؟
-شكو تطيح بحظوظنا؟ من حلاتهم على اساس؟
ضحك ورفع ايده يمسح بدموعي وتمتم
-لا اني حظي شحلاته
-شلون؟
-حظي جابج الي وهذا أحلى حظ
سكتت بخجل وهو بقى مبتسم ومرت لحظات حلوة النا سوه
شوفته البوم ذكرياتي وصوري بالطفولة وهو جان يضحك على شكلي
من جنت طفله جان شعري مثل الولد وكله البس تيشيرتات حسنين وحيدر واعاند،
اكو صورة الي لازمه سجينه مال فواكه وعود شخصيه ورافعة حاجبي ومصوريني هنا عثمان مات ضحك عليها وحتى أخذ الها صورة بموبايله رغم رفضي
وكل شويه يداهرني ويحجي
-ها جبار
عفته شويه ودخلت للحمام ومن رجعت شفته مطلع صورة ومركز بيها وتعجبت من شفتها .. جانت صورة من تصويري لسيارته.. قبل سنوات بوقت سباقه الأول الي صورته بهذيج المنطقة الي حتى الصور ما مشرتهم
من أنتبه لوجودي سأل بغرابة
-عثمان: ليل هاي منين جايبتها؟
-هاا.. ما ادري
صفن بوجهي وكشف توتري ورجع حجه
-هاي انتِ مصورتها؟
-لاااا وين شلون أصورها؟؟
-احجيلي الصدك ليل؟
تقربت اسحبها من ايدة وارجعها مگلوبه بالألبوم ورجعته للكنتور وقبل لا ألتفت هو حاصرني بينه وبين الكنتور وحجه بهدوء
-شفت الألبوم السري بموبايلج.. وشفت تصوير السيارات وأعرفه تصويرج
ألتفتت عليّه ورديت بتوتر
-وين؟
-ليل صارحيني؟
تنهدت ساكتة لمدة بعدها حجيت
-حسـاب ... چان حسابي.
شفت الدهشة بعيونه وهو يستوعب
رجع عقج حواجبه مستغرب وسأل
-شلون؟؟؟ انتِ بوقتها حتى ما عندج سياره!!
ميلت راسي بحرج وحجيت
-جنت أسوق سكوتر
رفع حواجبه ما مستوعب وبعدها بهت وجهه وعض شفايفه ووجهه انصبغ
حجيت مستغربة
-شبيك؟
-ما-.. ماكو شي
سكت مدة وبعدها ما تحمل وانفجر بالضحك واني صافنه عليّه بكل غرابة.
هو لازم بطنه ويضحك ميت ضحك وانحنى ملزم بالكنتور وماتحملت وتنرفزت احسه يستهزئ بيه وحجيت بنتر
-شبيكك؟ شنو الي يضحك!!!
استعدل بوگفته وگال
-سكوتر؟ بربج سكوتر!!
ورجع يضحك واني ماتحملت وجريت شعره وحجيت بنبرة مغثوثه
-هييييي والله راح الطشك براشدي يطير معاني وجهك لا تنرفزني
يباوعلي مبتسم وطبطب على كتفي وهو يمسح دموعه الي طلعن من الضحك وگال
-تطيريني بالسكوتر مو بابا؟
ضغطت على سنوني متنرفزه وحجيت
-على الاقل أسوق كل شي علمود احقق احلامي
-ولج مصيبه انتِ تخيلت بالليالي سايقتلج سكوتر بنص السيارات وتصورين؟ وعلي تفحطين ههههههههه
-عثمااااان لا تشعل روحي
-أروح فدوه لأم سكوتر
قبل لا أصيح سكتني ببوسه وحاوط رگبتي بأيد وحده وگال
-لو أعرف بيج بهذاك الوقت جان استخطيتج وجبتلج سيارة
خزرته وهو مبتسم يحاول ما يضحك
-ليل: أمده حظي
-لا خطية هو بس حظج باقي ما امداه، بس صدمتيني وعلي.. شنو تسوقين بنص السيارات وبنص الليل وبسكوتر وانتِ مدودحه هالكبرج بالاعدادية؟ وعلي كارثة ومتهورة
-ديلا وحد اني ما أحقق أحلامي ؟
-هو شهجم بيتنا غير احلامج؟
-لا تطوخها تره ادفرك
-ادفريني يالمدودحه
رفعت حواجبي وقبل لا أرد اندك الباب ودخل علوش وحجه بصوت متحمس
-علوش:ماما تصيحلكم على الغده
باوعت لعثمان متفاجئة وسألته
-معقوله هلگد تأخرنا فوك وصار الغده
-باع الفشلة هسه شيگولون اجو علمود يختلون بروحهم؟ صوجج ادبسز
رفعت حواجبي وحجيت بأستنكار
-لا بله
طلعنا وره علوش ونزلنا واني اشوف ماما فارشه الاكل بالصالة وكل اهلي موجودين وكعدنا وياهم وحجيت مبتسمة بتوتر
-شبسرعة صبيتي ماما
-امنية: عبالنا نمتو جوه
-هههههههههه لا بس جنت اشوفه البومات صوري
-عثمان: جنت أعيب على جبار
خزرته وماما ضحكت وحجت
-امنية: اي والله جانت ولد بالكوه طولت شعرها جانت ماتقبل
-حسنين: جانت تبوك ملابسي وعلي هههههههه
-عثمان: هههههههههه اي والله بس حلوه بكل حالاتها
خزرته مره ثانيه من الخجل ورجع يحجي
-عثمان: زين عمتي شلون جانت ليالي بمراهقتها؟
امي عبالك ما صدكت يسأل وانطلقت تعدد سوالفي وتحجي منطلقة لا فاد كحه ولا تحمحم ولا نحنحه ولا اي شي
-امنية: جانت متهيلگه ودايحة بالشارع نلگاها تركض وره الجلاب وما تلگه ولد بره الا وتحطه وتتعارك وياه مرة لازمه ولد من المنطقة وشاگه فانيلته مجلوبه وعلي، أتذكر مرة ماخذه مكياجي بدون علمي وفاتحة ركن بالشارع وكل جهال المنطقة أمكيجتهم ولد وبنات اتذكر من اجو اهلهم يشتكون منها كل الولد حاطتلهم كحل وحمرة سحريه
اشوفهم كلهم فاحطين من الضحك حتى بابا يضحك وياهم واني غطيت بهدومي صرت هالگدوتني والله وغطيت وجهي
-حيدر: تذكرين من لگيناها لابسه لبس حسنين وتدبج بعرس گرايبنا بين الزلم؟
-حسنين: اتذكر ولك تتذكر من باگت جرو من الجلبه الي وره بيتنه؟ والجلب لاحگها وهيه مدخلته لبيتنه وضامه الجرو جوه جربايه اهلي هههههههههه امي بنص الليل تسمع صوت عبالها جني طلعت خانكته بالديباج وهو يصيح جنه جاهل
هالمرة صدك كلها ماتت ضحك واني طبيت بملابسي من الفشله
وهمه ولا عبالك اني موجوده رجعوا يسولفون
-فضل: اتذكر من صاعده بالسطح ماخذه صبغ الحذيان وصابغه شعرها بي ومحدده گصتها مربعيه وحواجبها وراسمه شوارب هههههههههه
-امنية: من غير الجل الجانت تحطه لشعرها وتسوي سبايكي وتطلع جلحه جنها محمود ابن حمديه ههههههههههههههه
عثمان مدمع من الضحك وحسنين من الضحك غص بالاكل وكلها عافت الاكل ويسولفون وميتين ضحك .. اني للصراحة اندمجت ونسيت دا نسولف عليّه ودخلت وياهم بالمحادثة اضحك
-تتذكرون من حسنين ماخذ نص ولد الفرع ومقررين يشردون وراكبين نفرات وموصليهم لحدود اربيل وتالي كاشفيهم ماعدهم فلوس وراح بابا شبعه دك ورجعه ههههههههه
-حسنين: جذابه
-فضل: لا صدك لا تجذب انت
-حيدر: اي وعلي صدك
-امنية: بس محد بخـباثه ليالي طلعتلنا شيب ببداية عمرنا كل يوم مسويه مصيبه
-حيدر: اتذكر من تزوج خالي الصغير وطلعت لابده بالكنتور وطلعوها هههههههههه
وجهي راد ينفجر من الفشله وحجيت
-ليش تجذب؟؟؟
-امنية: لا صدك بعرسه جنتي بگد علوش هسه وجنج شاذي
-رحم الله والديج يمه
كعدنا ناكل وكل شويه واحد يذب كلمه من قبل وفحطنا ضحك شگد تغيرت نفسيتي
خلصنا اكل وره الكعده خابرتني ليان وقررت اطلع وياهن نفرفر
عثمان هم وكف وياي وودعت اهلي وطلعنا وهو حجه
-ها وين؟
-نفرفر ميته من الملل
-من سوالف اليوم بعد ما أخاف عليج من الناس، اخاف منهم عليج
خزرته وهو ضحك وحاوط كتفي وحجه
-اتشاقة حبيبي، خلي أوصلكم
طلعت ليان وميان وصعدت وياهن وتحركنا وسأل عثمان مبتسم
-وين تريدون اوصلكم حبايبي؟
-ميان: مول ال...
-شتسون هناك؟
-ليل: نفرفر أكيد ونشتري
-ليان: لا لو رايحين ل...
-بكيفكم
أتفقنا على المول ونزلنا وودعنا عثمان ووصانا من نطلع نخابره
اول ما نزلنا ودخلنا سألتهن بحماس
-شصاير ؟؟ لازم افهم
-ميان: فاتج حبيب الكلب جاي بالطريق
رفعت حواجبي متعجبه وسألت
-شنو منو؟؟؟
-ليان: حبيبي جاي يخطبني رسميًا من اخواني هالفترة
رفعت حواجبي بفرح وحجيت
-صدددك؟؟ يمه مبروك حبيبي الله يتمم على خير يارب
ابتسمت بخجل وردت
-ليان: الله يبارك بيج حبيبي
-ميان: مكيفات اثنينهن مرتبطات، الك الله يالسنگل
-هههههههههه دوريلج واحد شنسوي يعني؟
-ميان: ايعععع ما أريد أكره الزلم
-ايباه صدك؟
-ليان: جذابه معجبه بواحد وياها بالدوام بس هو ما معبرها
ضحكت وميان طفرت على ليان تضرب كتفها على كيف وتحجي
-ميان:سهمج وصل الادبسز هيج تطشرت الكرامة
-اگول انتِ ادبسز شكو ضامة عليّه؟
-ميان: استحي منج
رفعت حواجبي مستنكره، ميان تستحي؟ اول تالي.. من شافت نظراتي ضحكت وحكت شعرها بحرج
-ميان: ماكو شي بيناتنا بس نظرات وحتى ما اعرف اذا هو معجب لو لا لذلك ما احب احجي بالموضوع خاف بس من طرفي وتخيب امالي اذا حجيت بي وما تصير
-الله يقدم الي بي الخير حبيبي
-ليان وميان: امين
-يالله نشتري فساتين أكيد الخطبه حتكون خنفشارية ولازم نكشخ ونكشخج ليوني
وبدت رحلتنا بالبحث عن فساتين وغراض وترتيبات لحد المغرب خابرنا عثمان واجه ورجعنا لبيت خالة فيروز.. بكل تعب
نزلن البنات غراضهن واني عفتهن بالسيارة ودخلت وياهن جوه وبوسط سوالفنا سألت ليان
-ليان: ترحين لعرس نرجس ؟
رفعت حواجبي متعجبه وسألت
-ليش هو يمته؟
-ميان: بالخميس ماتعرفين؟ عزمونا
-ما اعرف يمكن عازمين ماما
-ليان: بربج خلي نروح سويه؟
-مغثه شكو نروح
-ميان: نهز ونغثهن عناد وادري بيهن من عرسج للان مقهورات منج لان سويتي ترتيبات عرسج بفخامة والنبي للان اتذكر نظراتهن الحسوده وحتى ماما تحصن بيج وتقرالج بسبب عيونهن والحسد الي يرافقهن
-تدرين فعلًا مشتاقه اركصص ومشتاقه لعرس
-ميان: اي والله حتاني من عرسكم للان ما راگصه
-لعد اني شگلج؟ حتى بعرسي كل ما وكفت اريد ارگص امي تغمزلي اكعدي فشله
-ليان: هههههههههه بس ما قصرتي ترا
-أسكتن وعلي اذا عازمين بيت اهلي الا أروح عناد واهز للصبح
تعشيت ومرت الليلة بكل حُب ولطافة وسط اجواء عائلية حلوة.. حيل أحس بالألفه مع أهل عثمان واحسهم مثل أهلي
-
آخر لمسه حطيتها بالمكياج هيّ الحمره الحمراء وختمت كشختي برشة العطر،
لبست فستاني الي جابه عثمان الي الأسود مال عيد ميلادي لان حسيته أنسب شي
وشعري ملسته كله بدون اي تعرج خليته ينسدل على طول ظهري وانطاني مظهر ناعم ويناسب الفستان لان هو الي اخذ كل التركيز بسبب البلك الي تارس صدرة.
لبست كعب طويل أحمر،
جنت مسويه سموكي بس هادي على اطراف عيوني بس
توني أفتح بالكنتور ودخل عثمان الي وگف متصنم من شافني وعيونه متشخصه على منظري .. تقرب بهدوء ولزم ايدي وفرني واني ضحكت وحجه بنبرة هيمانه
-هالكـشخه ألي؟
بوزت شفايفي أحاول ما أضحك ورديت
-لا، اليوم العرس لو ناسي؟ مو أمس گلتلك
بهتت ملامحة بملل وعقج وجهه مزعوج وحجه
-أها تمام حلو
تحرك وكعد على الجرباية وهو يمشي انظارة على كل كشختي واشوفه يحاول ما يبين تأثيري بي وتمشيت للكنتور أفتحه واطلع العباية ولبستها وهو حجه
-منو يوصلج؟
باوعتله بأستغراب
-انا اوصل نفسي منو لعد؟
هز راسه بنفي وحجه
-اني اوصلج
-ماشي
تحركت اسحب شال احطه على راسي وحجيت
-خلصت، گوم بدل لعد
وگف وبسرعة غير ملابسه وتحركنا للسيارة وحركنا بأتجاه القاعة وانا منتبهه اله كل شويه يلتفت يباوعلي ويمشي نظراته على شكلي ويتنهد ويرجع يسوق
اول ما وصلنا صف السيارة كلش قريب من القاعة وتقرب يسد العباية من يم صدري وحجه
-لا تفتحين العبايه بالشارع
-اكيد حبيبي ، أشوفك بعدين
تقربت وطبعت بوسه على خده وشفته يعقج وجهه وهمس عباله ما أسمع
-أشتعلت صفحتج
رفعت أيدي أمسح الحمرة من خده وهو نزل قبلي فتح الباب وطلعت أدخل للقاعة
وما توقعت الي شفته
✤———————————————✤
يتبع
الانستگرام لكل جديد يخص أبطالي ورواياتي ✨
بارتين ونختم 🥹🥹🥹
يمه گلبي شلون افارقهم؟؟؟
البارت حلو وطويل وممتع واستمتعت حيل بكتابته والحمدلله رجع شغفي حيل 🥹💛
اتمنى من تشوفون هالبارت يعني خلصتوا امتحانات وانتم بخير لان ما اريد تقرونه وانتم تجهزون لامتحاناتكم
احبكم كلش كلش 🫂💛💛
دُمتم بِودّ