سبحان الله وبحمده سبحان الله العظيم ♡
~ انتبهو بارت 67 نزل بس ماطلع لكم اشعار انتبهو تاكدو انكم قريتوه عشان تفهمون الاحداث .~
(بـيـت بـهـاج - ٢:٤٦ اليل )
نوره قامت من النوم مشتهيه فراوله من المزرعه الي بالديره والتفت لبهاج لقته نايم وهزته : بهاج
بهاج عدل نومته وكمل
نوره : بهاجوهه !
بهاج بنوم : هاه
نوره : قوم يلا بقول لك شيي
بهاج قام : لبيه سمي اسمعك ياقلبي
نوره : اسمع بقول لك شي بس ماتضحك!
بهاج : تم ابشري مااضحك بس انطقي
نوره : بهاج ابغى فراوله
بهاج كاتم الضحكه : فرواله اخو الليل؟ وش وحام هالحامل ؟
نوره : بهاج انا حامل ، نسيت؟
بهاج حط يده على جبهته وضحك على نفسه ! نسى ان نوره حامل !
نوره : ومو اي فراوله
بهاج ضحك على نوره
نوره تكتفت بزعل : مابغى شي اجل
بهاج بضحكه : خلاص خلاص قومي ندور لك فراوله
نوره التفت له : لا تضحك طيب
بهاج كتم ضحكته : يلا لتبدا رحلتنا بالبحث عن فراوله لنوري
نوره : مو اي فراوله !
بهاج : عن فراوله ناضجه وحمرا ونضيفه ؟
نوره هزت راسها : لا ، ابغى فراوله المزرعه الي بالديره
بهاج اتسعت عيونه بصدمه : هاه؟ اسرق يعني ؟
نوره هزت كتوفها : مدريي ، ابغى
بهاج قام : دندني وغني يلا نسرق لعيونك
نوره ابتسمت وراحت تلبس عبايتها وبهاج يسوي تمارين على ماتخلص نوره
نوره : وش تسوي انت؟
بهاج: اتمرن عشان اطمر الشبك من زمان ماسرقت شي
نوره ضحكت ونطقت : خلصت
بهاج قام : يلا مشينا
واتجهو للسياره وركبو وبهاج ميت ضحك بس كاتم ضحكته
وبعد ساعه تقريباً وصلو الديره
الديره يسكنها الهدوء والطمأنينه ومافيه صوت الا صرصور اليل
بهاج التفت لنوره : مصره يام دميعه على الفراوله ذي؟
نوره : ايي ابغاها وابغى توتو وحشتني مرهه
بهاج صد بغيره : افف من هالبس ذا
نوره ضحكت : تراه قطو مالا داعي تغار !
بهاج التفت لها ورفع حاجبه : بس بيجلس بحضنك اكثر مني !
نوره بأبتسامه : لاتخاف اليوم فيه ٢٤ ساعه ١٢ ساعه لتوتو و١٢ ساعه لك
بهاج هز راسه بنفي: لا ٢٣ساعه و٥٠ دقيقه لي و١٠ دقايق للبس
نوره : حرام توتو مو زمان عنه لازم اعطيه طاقه حنان
بهاج تنهد : بمصع راس توتو حقك ذا اذا غرت
اتسعت عيون نوره بصدمه : يامجرم ! تراها بنتي
بهاج ارخى ظهره على المرتبه : ولا اقول ؟ اعطيه سعود ياكله
كشرت نوره من طاريه والتفت بفضول : على طاريه وش صار على ريف
بهاج تنهد بضيق : ابوها اقشر معاهم عشاني طلقتها والثاني ماتبي ترجع لسعود بعد الي صار لها
نوره مسكت قلبها بحزن : تكفىى ابوهم المفروض يوقف معهم !
بهاج هز رتس بيأس : مالفروض كذا بس وش نسوي اذا ابوهم جاهل ويحب الفلوس
نوره : وسعود ؟
بهاج رفع حاجبه بغيره : وش تبين فيه ؟
نوره بترقيع : لا ماقصد اتطمن عليه وش ابغى فيه مامنه رجا بس ابغى اعرف ...
بهاج قاطعها بحده : مايحتاج تعرفين شي عنه
نوره عقدت حواجبها : بس ماق.....
بهاج رص على اسنانه بغيره : قصدك ولا مو قصدك سيرته واسمه لايطري على لسانك انتي حرم بهاج مالك حق تسألين عنه !
نوره التفت بزعل للجهه الثانيه : خير صاير عندك هرمونات شهريه كل شهر تنكد علي ! وتعصب بدون سبب
بهاج تنهد ومسك يد نوره وشدها : ماقصد انكد عليك بس ماحبك تتككلمين عن رجال غيري
نوره : بس ماقصدي اسال عنه ابغى اعرف اذا هو لسى يحب ريف بس انت متحمس ومستعجل وتبغى تهاوشني !
بهاج حط يد نوره على قلبه : ولايهون زعلك عليي سعود لازال يحاول يرجع ريف الرافضته رفض بات رغم عنف ابوها عليها وضغطه عليها الا انها تبغاك وتستنجد فيك اكثر من اختها
نوره دمعتك : امانه ! تبغاني؟
بهاج : اي بنخلص اشغالنا ونروح لهم
نووه هزت راسها برضى ومسحت دموعها وضحك بهاج وزفر بذوبان : يلعن شكلها ام دميعه دايم عيونها حلوهه يالبيهه
نوره بغيره : من تقصد ؟
بهاج عض على شفايفه : اوهه واستيعابها بطيئ وحامل كأنها بطريق يالبيهه
نوره استوعبت انه يقصدها وضحكت : حلوو انلعنت وانسبيت وطقطقت علي وكلهم تحت مسمى المدح
بهاج بنرجسيه : مدحي وغزلي نادر محد مثليي غيري اقصى غزله يامعشوقتي هاذا اقصى شي فما بالك بي من قوه الغزل شبهتك بالبطريق
نوره ضحكت : خارج الصندوق دايم ، يلا عاد عطيتك وجهه رح جيب لي فراوله
بهاج ضحك ونزل وغمز : ابشري يابطريقي
نوره ضحكت ومسكت جوالها وانشغلت على مايجي بهاج
بهاج اتجهه للمزرعه ورفع ثوبه على خصره ودق اللثمه على وجهه ولمح عامل وشافه وقرر يمهد الموضوع له
بهاج صافح العامل : ارحب صديقق كيف الحل
العامل صافح بهاج وهز راسه : كويس ميه ميه
بهاج شد على يد العامل : صديق انا يبغى فراوله يبغى يشتري
العامل هز راسه بالرفض : لا مافي بيع وشرا هاذا حق كفيل
بهاج تنهد وهمس : ياحبيبي تبيها بالطيب ولابالشر ؟
العامل : وش ؟
بهاج ابتسم وحط يده على على كتف العامل : تم خلاص بكرا اجيك ان شاء الله عندك الكفيل اتفاهم معه
العامل هز راسه ووقف وبهاج يهوجس ويفكر كيف يسرق وهو لواء ! اذا مسكوه يسرق وهو لواء كيف وجهه عند الناس ؟ ! رجع للسياره بعد ماطرت على باله فكره
نوره كشرت : رفض الجثه؟ ( الجثه = يعني واحد طول بعرض )
بهاج تكى عى دريشه نوره وحط يده على وجهه وابتسم : ولايهون عليي ارجع وعيونك والورع يبون فراوله ابك اصير لك فراوله لو تبين بس العامل ماشاء الله عليه يعني دبل بهاج بعشر مرات صعبه اسرق وهو موجود فابسوي شي ان شاء الله مايعرفني بس انتي لاتجين يعرفك من كثر ماتجينهم !
وراح لصندوق السياره
نوره التفت له من شافته مطلع حبل! ونطقت بخوف : بهاج وش تبغى تسوي يامجنونن !
بهاج يلعب بالحبل : بشنق العامل
نوره اتسعت عيونها بخوف: لاخلاص مابغى فراوله
بهاج لف الحبل : مافهمتك انتي مره ابغى ومره مابغى! اثبتي على كلام واحد
نوره : خلاص مابغى شي
بهاج عدل اللثمه : انا ابغى!
نوره تنهدت : اف منك يابهاج انت وعنادك
بهاج لف الحبل وحاول يدخل الحبل بجيبه صح واضح بس عادي عند بهاج ماتفرق ونطق : انا احرق الدنيا ومافيها لعيون نواره ام عيالي ! فمابالك لو تبي فراوله بس !
نوره : بهاج لاتتهور وتهايط فكر بالنونو الي ببطني !
بهاج ارسل قبله بالهواء ونطق قبل يمشي : العواقب مؤقته لكن الذكرايات دائمه يالحب خلي ورعنا يعرف ان ابوه عانا عشان عيون امه
ونطق بحده : ياويلك تجين احش رجولك حش
وراح مااعطى مجال نوره تتكلم
نوره ضربت فخوذها بخوف عليه واذا لحقته بيهاوشها حطها بين نارين
بهاج شاف العامل : صديق مافي امل تبيع؟
العامل هز راسه بالنفي : لا
بهاج : اسمع تراني صامل وبالمبلغ الي تبي
العامل : انت هرامي عيون هرامي (هرامي = حرامي )
بهاج ضحك بسخريه : ايه زين على زين اوريك عيون الحرامي شلون
العامل ناظره بسخريه ولف ظهره ومشى وبهاج لقى الفرصه انه يطرح العامل غدر لان العامل تبارك الله ضخم وكتفه وطرحه على الارض ونطق: عيون حرامي اجل ؟ تعرف ماشاء الله عليك بس ركز المره الثانيه ماتعطي ظهرك الحرامي يالكوتش
العامل : والله يجي شرطه
بهاج : انا شرطه يالحبيب
وطلع الحبل وربط العامل وسحبه ودخله الغرفه وربط فم العامل ومسك خدود العامل ونطق بهاج : صديق قلل اكل صاير لك زغود كبيره
والعامل يصارخ بس مربوط ماينفع والتفت بهاج يلقى نظره سريعه على المكان وسحب الجواات وكل وسائل التواصل وسحب مفتاح الغرفه واشر بهاج بيده بمعنى "مع السلامه " وقفل الباب واتجهه المزرعه بس كان باب المزرعه مقفل
تنهد بهاج : ياليل ماني فاضي ارجع اجيب المفتاح خل اطمر ويفرجها ربي
وحط رجله وطلع على الجدار وجلس على الجدار ونقط بأعجاب : مالومك يانوره لو سطيتي على المزرعه تسرقين
ونزل واتجهه لـ محميه الفراوله بكشاف جواله وشاف الفراوله وقطف وحده وذاقها : اشك انا الوحام موب نوره طعمه لذيذ بالدماغ ياشيخ ، افف ماعندي شي اجمع لنوره فراوله
وطلع من محميه الفراوله واتجهه لمطبخ المزرعه واختار اكياس ورديه لعيون نوره وطلع واتجهه لـ محميه الفراوله وفعد ينقى لنوره انقى واجمل فراوله موجوده ونقى لها افضل شي وتقريباً امتلت الكيسين الكبار وهو ياكل ومعجبه طعم الفراوله ومااكتفى انه يسطو على المزرعه لا قرر يلقى نظره شامله للمكان ودخل كل مكان وحصل مجموعه علب صغير لفتو انتباهه بس كان اذكى حرامي فتح العلبه بثوبه بدون لايلمسها عشان اذا بلغ العامل مايلقون بصمات بهاج فتح العلبه بثوبه وطشر على ثوبه لون احمر ! ضحك ونطق :اما ملون طعام ؟ يلونون الفراوله ؟ فكره حلوه نخرش نوره
وكب على نفسه الون الاحمو الاشبه يالدم وطلع
وجود الاكياس زين وطلع على الجدار واتجهه للسياره ونوره تنهدت براخه من شافته
نوره : وش صار على العامل!
بهاج يتلذذ بالفراوله واستوعب انه لازم يكمل الفلم وارخى ظهره بتعب : اهخخ يانوري انعطعنت انطعنت
نوره نزلت بخوف ومسكته : بهاج ! دمم !
بهاج بتمثيل التعب : ايي طعني
نوره من الخوف بكت ونطقت برجفه وهي تساند بهاج : طيب اركب انا اعرف اسوق انا اسوق فيك !
بهاج هز راسه بنفس وتذكر العامل المطروح بالغرفه ! وفز وسحب نوره وركبها للسياره ونزل الفراوله بالمراتبه الثانيه تحت صدمه نوره المصدمه كيف مطعون ويتحرك ويرتبك؟
ركض بسرعه بأتجاه الغرفه وفتحها وحصل العامل لازال يصارخ
بهاج تحسس ثوبه وحصل فيها ٥٠ ريال ونزلها على طاوله العامل
بهاج: اسمع صديق هاذا حق الفراوله الي خذيت عشان الذمه بس عشان مااكل شي حرام
وتحسس ثوبه وحصل ١٠ ريال ونزلها على طاوله العامل ونطق : وهاذي لك العشره عشان صبرك علينا وسلامتك وازهليني بفكك بس لاتحاول تعرف انا من لانك بتنجلط يالحبيب واذا تبي كاش قل لي اجيك بكرا اخر اليل اعطيك حق الفراوله كلها
وتقدم بهاج وفتح فم العامل : تبي فلوس زياده؟
العامل : يجي شرطه
بهاج : بسجنك ترى!
وفك بهاج العقده الي تربط العامل وانحاش والعامل على مافك نفسه الا بهاج رايح وداعس
بهاج مسرع بالسياره ويضحك : والله لو طرحني هالجثه اني ماعيش
نوره بلخمه : بهاج ؟!
بهاج التفت لها : عيون وقلب بهاج لبيه امري وتدللي
نوره : الدم؟
بهاج ناظر ثوبه وضحك : انطعنت
نوره : بهاج بلا استهبال وللعب اطفال الدم منين جاء منك ولا من العامل !
بهاج حط يده على قلبه : انطعنت من قلبي اهخخ يالالم
نوره حست ان صادق جاهله مقلبه : بسوعه بسرعه وصلني لبيت جدتي اكمدك
بهاج : على خشمي
واتجهه لبيت ام سحاب
بهاج اكبدد انه معه مفتاح بيته الثاني"بيت ام سحاب"
نوره بأستعجال : بسرعه بسرعه
بهاج يفتح الباب : ادخلي يالمطيوشه بجيب فراولتك واجي
نوره مسكته : بعدينن تعال جرحك!
بهاج دخلها : افصخي عبايتك على مااجيك
وسكر الباب واتجهه للسياره ونزل اكياس الفراوله ودخل البيت وسكر الباب وحصل نوره تدور بتوتر ودموع
بهاج : فقطتك يالخوافه تخافين علي؟
نوره تقدمت بدموع ومسكت ثوب بهاج : بهاج لاتتهور انت بتصير اب مابغى لدي يعيش اليتم زي امه !
بهاج مسح دموع نوره وضمها بكل حنان ويمسح عليها : ياعيون ابو مطلق انتي والله بس هاذا ملون طعام ماهو شي حبيت امقلبك
نوره بكت زياده من درت انه مقلب
بهاج ضحك وشد عليها : اسف
نوره رفعت راسها تناظره بدموع ونبره عتاب : بهاج ماتمقلبني كذا وانا حامل وحتى لو اني مو حامل لاتمقلني خير شر اخاف انا اخاف ادنى حاجه تشيب راسي خصوصاً عليك لانك متهور وتشغل بالي دايم اهجد يابو مطلق اهجد
بهاج : خلاص اخر مقلب ان شاء الله بس باقي لسته مقالب مانفذتها
نوره انهارت على صدره زياده : افف تتعبني كذا
بهاج شد عليها : اخسى اتعبك والله ابد اخر مقلب ان شاء الله يوم ولادتك بمقلبك عشان تولدين بدري
نوره ضحكت : خيرر خوفتني مابغى اولد
بهاج : تبين تبيضين؟ دجاجه انا قايل لك انك بطريق ؟
نوره تنهدت بضحكه : بهيج خير عاد لاتضحكني ابكي
بهاج تخصر : اذا عصبت بكيتي واذا صرت حنون بكيتي واذا صرت مهرج بكيتي ؟ وش اصير ياترا؟ اصير زوج البطريق ؟ فكره مش بطاله والله
نوره : خوش فكره
بهاج مسح دموع نوره : عيونك تعبانه روحي نامي عشان روحي ترتاح
نوره ابتسمت وراحت لغرفتها تبدل ملابسها
وبهاج دخل اكياس الفراوله للمطبخ بهدوء عشان ام سحاب نايمه بالحوش
ودخلهم الثلاجه وسحب صحن وحط فيه فراوله وغلسها بعنايه واتجهه لغرفه نوره بهدوء ودخل وشافها تربط شعوها وابتسم ونطق : فديت الشعر وراعيته
نوره تركت شعرها واتجهه لبهاج وابتسمت : فراوله ؟
بهاج بضحكه : لا طماط ؟ وش شايفه ؟ صحح صحح ضيعتي بيني وبين الفراوله
نوره ضحكت وخذت حبه فراوله واكلتها وطعمها يجنن لدرجه بهاج حس بطعمها من شاف سعاده نوره وخدودها الحمرا
بهاج بأبتسامه : ياناس ضعت ضاعت علوميي بعيونهاا
نوره بأبتسامه : ضاعت انوثتي عندك وانت تناديني يارياجيل اذا زعلت علي وماتبغى تنادي اسمي ! ضيعت انوثني وانت توديني للورشه تعلمني
بهاج صافح نوره : حلوو ضاعت رجولتي عندك وانتي ضاعت انوثتك عندي حلوو تصافينا
نوره ضحكت واكلت الفراوله وبهاج يتأملها وموتر نوره
نوره : اكل ! خلاص وترتني بنضراتك ذيي
بهاج تنهد وقلبه وعقله وعيونه كلها معها ونطق بهدوء : بس مابي ياعيوني شبعت وانا اقطف واكل الحمدلله سرق حلالل
نوره بحماس : ايي صح لازم تقول لي السالفه
بهاج ضحك وهز راسه راضى وخلصت نوره افراوله وانسدح بهاج على السرير ونوره تقدمت وانسدحت على صدره ويد بهاج محاوطه نوره ويشرح لها السالفه وكيف تقاتل مع العامل وكيف وكيف وكيف الي لانهايه الفت من حس بهدوء نوره الا نوره عيونها مقفله نصها تبغى تنام قام عنها يبغاها ترتاح وغطهاها وهمست نوره : وين ؟
بهاج : دقايق واجي
وهزت راسها نوره وطلع بهاج للحوش وهواجيس وابتسامته شاقه وجهه والي يشوفه يقول بالبدايات ! مايدرون ان طول عمره بالبدايات دام نوره معه كيف يصير بالنهايات ؟
تنهد وقام واتجهه لمجلس الرجال ودخله وجلس يفرفر بجواله وطفى جواله ونزله الا على اذان الفجر مسح على شعره بتفكير كيف يروح للمسجد وملابسه عليها ملون طعان احمر ؟ من يفهم الناس انه مجرد لون مو دم ؟ قام توضى وصلى بالبيت وسلم وقرا اذكاره وجلس على المركى بطفش
بهاج فك ياقه ثوبه : ياليل
اتصل على زيد يجيب له ثوب بس زيد مايرد على جواله وتنهد وقام وسحب شماغه وحطه على كتفه وركب سيارته وراح لـ اسواق الديره ونزل بكامل قواه العقليه واللون الي على ثوبه وكل نظرات الشيبان والعجز على بهاج والي يعرفونه اكثر من انفسهم !
وكانو يسألونه ويقول انه " ذبح عنز او خروف "
ودخل اقوب محل ملابس ونطق : ابي ثوب شتوي اسود سريع ! برد هنا
الموظف اعطى بهاج الثوب بمقاسات بهاج الي طلبها ولبسه بهاج واخذ ثوبه القديم وشماغه ودفع وطلع ويظبط شعره واتجه لسياره وركب وطق فيه عرق السناعه وقرر يجيب لهم فطور واشياء ناقصه البيت من شاف ثلاجه ام سحاب المليانه ادويه وعلاجات ودخل البقاله ومع الاسف ان الدخان جذبه واشترى دخان ومقاظي للبيت وحاسب وطلع واتجهه لبيت ام سحاب على حدود الصباح ودخل وابتسم من شاف نوره قاعده تصحي جدتها
نوره بأبتسامه : بهيج ؟ وين نايم امس؟
بهاج بكذب : نمت عندك
نوره ضحكت : لاجد وين ؟
بهاج مابغى يشغل بالها انه مانام ولاطب عيونه النوم : بمجلس الرجال
نوره ابتسمت وتقدمت تاخذ الاكياس من بهاج وبهاج رفض يعطيها !
نوره : عطني ،وش فيك ؟
بهاج هز راسه : لالا حامل انتي يضر الورع
ودخل ونزل الاغراض بالمطبخ والتفت لنوره : اسمعي انا بطلع اتمشى شوي واجي
نوره : والفطور؟
بهاج بأبتسامه : خليته لك ولخالتي والورع
نوره تخصرت : وابو النونو ليه ماياكل؟
بهاج : شبعان الحمدلله ابو الورع
نوره : تاكل غصب
بهاج ضحك وطلع من البيت ونوره قلبها ناغزها تحس وراه بلا وتجاهلت وسوت الفطور
وبهاج متكي جنب باب بيت ام سحاب يدخن ويفرفر بجواله! مايبغى يصارح نوره انه رجع لتدخين او بالاساس هو ماترك التدخين هو كان خايف على نوره فقط لااكثر ولا التدخين مستحيل يتركه بسهوله كذا كان يتخبى عن نوره ويعرف اذا عرفت بيتهاوشون فيتخبى
نوره خلصت الفطور وفرشت السفره وحطت الفطور وابتسمت : جديده ماودك تقلطين؟
ام سحاب : الا هالحين اقلط
نوره ابتسمت وسحبت شرشفها الاحمر : بطلع انادي بهاج يفطر
ام سحاب : اتصلي عليه
نوره : اعرفه مايرد
وطلعت
بهاج متكي ويدخن ويضحك على جواله وانفتح الباب والتفت شاف نوره طالعه بشرشفها الاحمر ومبتسمه ! وهاذا الي اوجع قلبه مبتسمه وهي تشوف وضعه!
لكن اختفت ابتسامه نوره من شافت الدخان الي بفم بهاج ونطقت وهي مو مستوعبه شي : وش هاذا ؟
بهاج جمدت ملامحه ولانطق بشي وكان بارد برود الارض ويناطر نوره كأنه يقول "مردك بتعرفين هالحين ولابعدين " ونوره تكره بهاج اذا دخن لانه اعصابه تتلف ويكون بارد وجاف وعصبيي وهي تكرهه اذا هو كذا !
تقدمت ودموعها تتجمع بعونها وتصارخ وتضرب صدر بهاج : بهاجج ! النونو الي ببطني انت ابوهه انت ابوهه كيف بيعيش ببيئه سيئه !
بهاج رمى الدخان وناظرها وساكت
نوره صرخت بدموع : تكلم انطق برر موقفك ي الاب المثالي ! مابغى اخلي ولدي يعيش بيئه سيئه
بهاج يناظر يمين يسار وشاف العالم تشوفهم ومسك عضد نوره بقوه وسحبه له وهمس بحده : اقصري صوتك لاقص لسانك!
نوره تبكي بألم : قصه اذا اذا انت بيعش ولدي مع اب مدخن
بهاج بحده وعصبيه : ادخلي داخل ! لالعن خيرك
نووه دفته وسحبت يدها بقوه وطاح الشرشف على كتوفها : مو انت الي تفرض سيطرتك علي
بهاج تنهد بعصبيه وغيره وسحبها والعصبيه الف ودخلها البيت ودخل وراها وصرخ بوجهها : لاتطلعين من الباب الا اذا انتي متغطيه لاقص رجولك !
جت ام سحاب : لعنه لعنه تلعنكم ابك علامكم فضحتونها عند فلان وعلان! تبون تجيبون لنا الكلام والقيل والقال ؟ تراكم بالديره يسمعونكم لو تهامسون ! تبون تذابحون تقلعو لبيتكم تذابحو موب عندي وبعدين ان يهالسربوت علامك مجود البنت كذا اتركها
نوره ناظرت بهاج بحده : وولدي المسكين بيعيش مع اب مثالي ماشاء الله عليه مثاليي مثاليي لدرجه خلني ساكته بس !
بهاج شد على عضد نوره ونطق بعصبيه : اقصري صوتكك
نوره صرخت : مابغى اقصرو خلهم يدرون كلهم ان نوره وبهاج تهاوشو بيصير شي ؟
بهاج بعصبيه : بيحطونك علك بين ضروسهم يالصاحيه انتي
نوره فكت يدها بقوه : طلقني مابغاك
بهاج ابتسم بأستفزاز : حلم ابليس بالجنه والله لو تنطبق السماء على الارض اني ماطلقك !
ام سحاب : عيني من الله خير تراتس حامل بورعتس وش طلاقه الله يصلحتس فكري بالكلمه قبل تهرجينه يابنت
نوره صدت عنهم وبهاج سحبها ودخل مجلس الرجال عشان يتهاوشون على راحتهم !
جلس بهاج على المركى وهو معصب ويهدي نفسه والمعروف عن بهاج شديد العصبيه والغيره ومايقدر يسيطر على عصبيته يخاف يغلط بحقها ويجيها اذى منه نطق بهدوء : اهرجي بهدوء عشان ماتستفزيني اشتعل !
نوره تخصرت بعصبيه ودموعها ماسكتهم : وكيف تبغاني اتكلم بهدوء وشفتك بعيوني !؟
بهاج ارخى ظهره : دخان ومن زمان ادخن وش الجديد يعني ؟
نوره زفرت وهي منغبنه من بهاج وبروده وعصبيته مافهمته مره بارد مره عصبي ؟!!
بهاج بحده : وطلاق امحيه من حياتك لاامحي ملامحك
نوره عقدت حواجبها بعصبيه ودموع : ورني عرض اكتافك يارجال البيت ! كانك رجال مد يدك والله وبالله ماتشوفيني من بعدها ! كانك رجال
بهاج غمض عيونه بعصبيه ورص على اسنانه ويدري لو قام بيعدمها هي والي ببطنها ويخسرها ويخسر الطفل بسبب كلامها المستفز بالنسبه لرجال .
نوره استوعبت كلامها مابنقال لرجال شديد العصبيه ومتهور ودب بقلبها الخوف تخاف يقوم والله مايفكها احد منه كلامها قوي مرهه
بهاج قام ونوره رجعت خطوات لورا ووجها يقلب اللوان من الخوف بهاج لاحظ خوفها وزم شفايفه ماكان قصده يضرها كان قصده يناقشها بهدوء بس هي خافت
نطق بهدوء : لاتخافين مني ! مابسوي شي غير اني بفهم وش سر اصرارك على الطلاق ؟
نوره سكتت بخوف خايفه منه بما انه متهور !
بهاج حرك راسه ينتظر اجابه منها وعصب وصرخ بوجهها : انطقي تكلمي وين لسانك يوم قلتي هالكلام وتدرين اني ماتحمله وتدرين اني بضرك ! ليش تقولينه ؟
نوره تجمعت الدموع بعيونها وسكتت بخوف من ملامحه وكلامه ونظراته العصبيه الي اخر مره شافتهم ايام الفديو ! بعدها ماعاد شافته معصب لدرجه هاذي وهاذا الي خوفها تخاف يمد يده عليها جاهله انه محرم مدت اليد عليها خصوصاً هي ويمسك نفسه عنها
بهاج بحده : ثمني كلامك ، ولاتقعدين تبكبكين عندي هنا وانتي مو قد كلامك
نوره : اتركنيي ياخي مابغاك مابغاك ، اف اف خلاص اهلكت نفسك بالتدخين وفيك صدر وصدرك تعبان وتتعبه زياده وانا حامل فكر بالمنطق اس.....
قطع كلامها من بدا يتقدم لها بخطوات ونظراته عليها وهي ترجع لورا الين لصقت بالجدار
بهاج همس : لاتقولين كلام مو قده
وناظرها وطلع من المجلس
تنهدت نوره وجلست وضمت رجولها (يكرم القارئ) وبكت ودخلت ام سحاب
: بنت علامكم ؟ منا حليلكم ببيتكم تلعبون ومستانسين
نوره سكتت وصدت تمسح دموعها : نقاش بسيط
ام سحاب : لا موب ببسيط دام وجه الولد اسود وحواجبه معقده وبراطمه هطول
نوره ضحكت من تشبيه جدتها : جديده عادي نقاش
ام سخاب : يويلي وقله واليي دام هاذا البسيط اجل كيف القوي
نوره ابتسمت ومسحت دموعها وقامت ومسكت كفوف جدتها بحنان : جديده امشي نفطر
ام سحاب : يلا مشينا
واتجهو للحوش بما ان الفطور بالحوش وجلسو وام سحاب تسولف عن فلان وعلان ونوره بالها مشغول ببهاج تخاف تخاف ينعاد حادثه لما طلع من عندها معصب وسوى حادث وتخاف هالمره مايسلم الجره ويتأذى ويصير الطفل يتيم ! تخاف تعيش طفلها ماعاشته هي من خوف وهم وضعف من اليتم ومن تسلط عمامها عليها
ام سحاب : اي على ماقالت مزنه ......
قعطعت كلامها من شافت نووه تهوجس
ام سحاب : علامتس يابنت؟
نوره : خايفه
ام سحاب : افا وراتس خايف وانا معتس وبهاج قدامتس ووراتس
نوره بدموع : ايي خوفي بهاج مايكون واقف قدامي ووراي اخاف يروح
ام سحاب : ووين يروح بسم الله عليتس ساحره الولد، الي يشوفه يقول مسحور
نوره تنهد بضيقه : طلع معصب وهو مايتحكم بعصبيته هي العصبيه تسيطر عليه !
ام سحاب دب بقلبها الخوف بس ماوضحت لنوره ومسحت على كتفها بحنان : يابنتي بهاج رجالً صاحي عاقل ماهو مسوي شي ان شاء الله
نوره انهارت مثل انهيارات الجبال : اخاف عليه كأني امه مو حرمته ، اخاف على النونو لايعيش الي عشته واخاف يعيش اردى من الي عشته اخاف يعيش تشتت بيني وبين بهاج ! اخاف يشوف هواشنا ويتعقد ! يمه صعبه يتحكم بعصبيته اخاف يضرني يوم من الايام بدون لايقصد وياكله الندم ويخسرني واخسره
ام سحاب : وانا امك حلو مشاكلكم كلها هالحين عشان لو جاء ورعتس على خير ان شاء الله مير انتم متخلصين من مشاكل الماضي وبعدين انا اعرف عوينات بهاج عيوينات الي يخاف عليك ويخاف يخسرك ويخاف يضرك وبعدين هو اذا خانقتس يرجع يراضيتس يابنتي صح بهاج عصبي وغيور بس ترى مامن مثله دامه يعزتس ويخاف عليتس ويطمنتس انه مستحيل يجيتس اذى منه فـ احمدي ربك عليه تراه رجال وينشد به الظهر لايشغل بالتس وانتي وش قايله له عشان يعصب لدرجه وجهه كذا ؟ ابك حواجبه صارو متصلات من كثر العقده
نوره نزلت راسها : يمه ، مادري اذا اقدر اقولك ولا بس مالي الا انتي وبهاج وصيوت يسمعوني الحين لا بهاج ولاصيوت يسمعوني بقولك انتي ، يمه انا شفت معه شي يضره وخفت عليه وصارخت وهو اذا صار معه هالشي يكون عصبي وادنى حاجه تعصبه وانا اكرهه اذا صار كذا احبه اذا كان مرح وبشوش ويمزح ويضحك ويطقطق ويمقلب ويتغزل فيني بعاج اذا شرا هالشي المخزي يتغير ماحبه ماحبه اذا صار معه شي وتهاوشنا والرجال شافونا وبهاج عصب لان الشرشف طاح وسحبني داخل وتهاوشنا ! عقب قلت كانك رجال مد يدك على
ام سحاب كانت تحاول تفهم وش هالشي الي يدمر بهاج ويدور ببالها ان بهاج يتعاطى ماتدري انه مجرد "دخان" وشقهت من قالت نوره "كانك رجال مد يدك علي" : ابك ابك ابك علامتس انتي صاحيه تقولين له تسذا وهو جمره شغله ماتدرين لو يدفنتس هنا خبله ؟ وين عقلتس ؟ ماينقال له كذا خص نص بهاج ! عصبي عصبي زين ماذبحتس يابنت ووش سوا كما اذاتس وربي لالعن خيره
نوره هزت راسها بنفي ودموعها تسيل : قال لاتخافين مني
ام سحاب : قايلتن لتس بهاج رجال وينشد به الظهر ابك عاني ماسوى لتس شي على رغم ان كلمتس قويه على قلبه المسكين
نوره مسحت دموعها وصدت
ام سحاب تذكرت : ايي صح ليكون يتعاطى الولد يربي والله ماتعيشين عنه دامه سكير نكير
نوره اتسعت عيونها بصدمه : هاه؟ لالا اقصد دخان ماقصد سكير نكير
ام سحاب تنهدت : الحمدلله دامه دخان ولا انه شي ثاني
نوره : بس صدره تعبان وبيصير اب ولازال طايش ويدخن ؟
ام سحاب تأشر بيدينها: حطيه بين يدينتس ترا الدعوا عناد جيبيه من الكلام الطيب يتركه اما هواش وصراخ بيعاند ومايتركه وبكرا يدخن عند خشمتس بعد وترى صعبه يتركه كذا فجأه خليه خطوه خطوه وخليتس معه
نوره هزت واسها برضى وقامت بتعبت : بنام
ام سحاب : نوم العافيه
وراحت نوره وام سحاب تدري ان نوره ماراحت تنام راحت تبكي ! وتنهدت بضيق واتصلت على بهاج ومايرد بتغسل شراعه
________________________
( بـيـن الـريـاض والـديـره )
موقف السياره على يمين ومتكي عليها يدخن ومستوعب انه صارخ وهاوش نوره ومستوعب نفسيته اذا دخن ! تتغير مو بهاج حتى هو عارف ان الدخان يتعب صدره ويغيره ومن الممكن ان الدخان يسبب خساره شخص عزيز على قلبه
واقف يخاف يمكل ويترك نوره ويدور ببالها انها مهمشه من بهاج ويختف يرجع يجرم فيها
فك ياقته بعصبيه : الله ياخذك يالشيطان كله منك
وشاف جواله يتصل فز قلبه وابتسم من تذكرها وشاف الاسم"جده ام دميعه" هي ام سحاب ونزل جواله بدون لايرد وتنهد ويفكر ويهوجس وقطع هواجيسه اتصال ام سحاب له وتنهد ورد ببرود : هلا
ام سحاب : ايا الموذي علامك مبكي البنت
بهاج تنهد بضيق : عادها تبكي ؟
ام سحاب : ايي تبتسي وتقطع وخايفه تفقدك يالمخنز تقول اكيد صار له شي ابك انت صاحي صاحي ؟
بهاج كشر بضيق : تمام قولي لها لاتبكي بجيها
ام سحاب : لاتجي تبي فرقاك ياادمي
بهاج رمى الدخان الي كان بفمه : جيت
ومااعطى فوصه لام سحاب تتكلم وقفل الخط وركب السياره واتجهه الديره
ووصل الديره واتجه ابيت ام سحاب جاء بيفتح الباب طلعت له ام سحاب
: وش تبا جاي ؟
بهاج صد : وينها ؟
ام سحاب : تبيها ؟ رح اسرح مع الغنم
بهاج عقد حواجبه بعدم فهم
ام سحاب : اي زي ماسمعت رح اسرح مع الغنم وجب لها تويتي البسه من عند صيته وعقبها افكر ادخلك
بهاج : طي....
سكرت ام سحاب الباب بوجهه وضحك بهاج بخفه ووده يطلع الجدار عشان يروح لها مايبغاها تبكي وقرر ينفذ طلب ام سحاب عشان يشوف نوره ويعتذر منها ويداريها راح لشبك الغنم والقى نظره سريعه
بهاج يمسح على شعره : مايحتاج اسرح معهم خلاص نروح نجيب البسه من صيته بس نستعين من الحبيب
ام سحاب جت : حط علف علف وذاك الوقت تشوف بنتي
بهاج التفت لها : شبعانات
ام سحاب : لا ماهن شيعانات وكلهم وكلهم جعلني ماخلا منهم والله اني احبهم اكثر منك
بهاج: ياخالتي تعطينها بالوجهه ماعندك مجامله
ام سحاب : ابك عان هن يجيبن لي اللبن والسمن والفلوس انت ماجبت لي الا الضغط والسكر ودموع نوره
بهاج : الله يسامحك ياخاله
ام سحاب عدلت طرحتها : علفهم علفهم بس
وراحت وبهاج التفت يدور العلف وشافه وتقدم له والاخلاق قافله وشاله روماه على شبك الغنم وواح اتصل على زيد ورد زيد بنوم
: خير ياوجه الفقر
بهاج : قم
زيد: على قوله حرمتك مابغى
بهاج : قم واصلح مابيننا عشان ترضى وتقول مابغى
زيد رجع نام : امسو بس انتو ومشاكلكم
بهاج : ابيك تتكلم مع صيته
زيد فز وقام وقلبه فراشات من طاريها : هاه
بهاج ضحك : لاخلاص مانبي منك شي
زيد : لالا بالخدمه انا بس وش بغيت؟
بهاج يحارش زيد : لالا خلاص انا اروح احل كل شي
زيد : جيت جيت لاتحرك بس وينك انت ؟
بهاج تخصر : ابد والله مطرود من بيت خالتي
زيد سحب ثوبه : افا ليه
بهاج : لعلي رفعت صوتي على نوره وخالتي طردتني
زيد : تستاهل ، وليه ترفع صوتك على اختي وبنتي نوره؟!!!!
بهاج تنهد : حصل نقاش بسيط وبس مالك دخل عاد مشاكل زوجيه !
زيد لبس ثوبه ومستعجل : ايي خولكم هلى جنب صوصو وينها؟
بهاج : وشدراني ؟ قم تعال شفها وجب البسه حقت نوره من عندها
زيد : عز الطلب
وقفل الخط ومامضت خمس دقايق الا زيد جاي ويركض
بهاج : بسم الله الرحمن الرحيم اهجد
زيد يعدل الشماغ : حلو شكلي ؟
بهاج : لا خايس
زيد : حلو اذا قلت خايس يعني اطيح الطير من السماء خوفي لاقلت حلو هنا اتاكد ان شكلي خايس
وابتسم بهاج من فهمه : يلا اجمع شملنا وكن سبب يازيد بصلاحنا
زيد تنحنح : ابشرو
وتعدل واتجهه لبيت ابو صيته وبهاج تكى وينتظر زيد
________________
( عـنـد بـاب بـيـت ابـو صـيـته )
زيد طق الباب
صيته بصراخ : وصمهه اصبر ياادمي
زيد اختل توازنه
صيته فتحت الباب : هلا
زيد : سلام ، نوره تبي البسه
صيته : تمام ثواني بس
وراحت تجيب القطوه وهو يدور موضوع يفتحه معها وجت واعطته القطوه
زيد : زعلتي عشاني اعترفت لك؟
صيته : اسمع ياولد الاجاويد سالفه اجبك ومعجب فيك قبل الزواج هاذي خرابيط مراهقين الي يحب يخطب ويتزوجها على سنه الله ورسوله مو احبك ومعجب فيك ومابينهم شي ومجرد علاقه محرمه وشكرا
وفهمها زيد وابتسم وراح وهي سكرت الباب وتنهدت
________________________
(بـيـت ام سـحـاب )
بهاج متكي على الباب ينتظر زيد يخلص ويجيب القطوه "توتو" عشان يراضي نوره فيها
جاء زيد ومعه توتو والابتسامه بوجهه
بهاج : صنعه صاروخ هي ؟
زيد بأبتسامه : لا
بهاج سحب القطوه منه : هات بس هالبس المروح
زيد : بحق والله
بهاج طق الباب وزيد نطق : حلو مشاكلكم انا بروح
بهاج هز راسه برضى وراح زيد وطلعت ام سحاب
: خير؟
بهاج بمزح : طالبين منك القرب ياخالتي نبي نوره
ام سحاب : لا ماعندنا
بهاج يمسح القطوه : جبت لها هديه
ام سحاب : ماتبيك ولا تبي الهديه
بهاج : الله يسلمك نبي نوره لازم لازم لازم
ام سحاب سحبت القطوه من بهاج : الله اكبر عاد يالبتمان افلح افلح وراك انت زعلت بنتي وانا ماارضى عليها
بهاج : دقي.....
ماكمل كلامه الا ام سحاب مسكره الباب بوجهه ضحك بخفه ونطق
: مهما ابعدوني عنك وربي مااتركك تبكين لحالك لو ابكي معك
ربط ثوبه على خصره وطلع على الجدار وجلس على الجدار يدرس تحركان ام سحاب شافها معها توتو ونزلتها ودخلت المجلس تتابع التلفزيون تطمن انها ماراحت لنوره ونزل ونفض يدينه من الغبار وعدل شعره واتجهه لغرفه نوره حط يده على مقبض الباب بس مافتحه واوجعه قلبه من سمع شهقه لها وكشر وجهه وطق الباب
نوره بدموع : تعالي ياجدتي
بهاج تردد يدخل وفتح الباب بهدوء نوره عقدت حواجبه من فتحه الباب الهاديه بالعاده ام سحاب تدرعم قامت وانفتح الباب شافت رجال طويل يسرق قلبها اذا شافته وشافت بهاج صدت عنه ورجعت جلست ونطقت بغصه: وش تبغى بعد؟ تبغى تدخن عندي ؟
بهاج تنهد وتقدم وجلس جنبها ونطق بهدوء: لاتصدين عني ابكي عندي لاتبكين عند غيري !
نوره نزلت راسها تمنعه يشوف دموعها ونطقت : رح لغيري انت
بهاج : لو ابي غيرك تري حولي كثير بس قلبي مايفز الا لك
بهاج قرب اكثر لها وحط يده على خصرها وقربه اكثر له وضمها : اسف وحقك على وش تبين مني بعد تبين ارمي نفسي بالنار ارميه بعد
نوره بدموع : انت اساساً رميت نفسك بالنار والخراب والهلاك !
تنهد بهاج ونطق بمزح : احرق الروح قبل تروح
نوره كشرت
بهاج : اطلبيني شي يراضيك اسوي لك الي تبين لو اشيل الحمل عنك بعد
نوره : مطلبي الوحيد منك اترك الدخان واكسبني !
بهاج : بس ؟
نوره : ايوه
بهاج طلع من جيبه بكت الدخان وفتحه وطلع الزقاير وقام واتجهه للزباله(يكرم القارئ) وكسره نصفين ورماه بالزباله ونطق بجديه : ودي اخليك انتي بنفسك تكسرينه بس يوسخ يديك النظيفه الي مامست الدخان
نوره تنهدت بأبتسامه من حركته وكلامه ونطقت : اوعدني
بهاج : وعد رجال ، وان عدتها تحرمين علي انتي والي ببطنك
نوره شهقت بخوف : بهاج لا مو كذا تحرمني عليك!
بهاج : عشان كل ماانوي اشتري اتذكرك
نوره ابتسمت وبهاج فتح يدينه ونطق : تعالي استقري بقلبي يام دميعه
نوره مسحت دموعها وتقدمت وحضنت بهاج
بهاج يمسح على ظهر نوره : ودي ودي مااترك هالحضن الي انحرمت منه ساعه ونص بس دقيقه اعرف كيف اراضيك زياده اعرف ان هواشي لك الصبح مضايقك
وطلع من الغرفه ونوره لحقته وبهاج خذا القطوه والتفت لنوره : عاني وش جبت
ضحك نوره بفرحه وتقدمت له تاخذ توتو ونطقت: توتيي
بهاج : على ماقالو الورع الداخلي يضحك
نوره بضحكه : الطفل الداخلي بطريقه بهاج الورع الداخلي
بهاج ابتسم من ضحكتها الي على قولته "ضحكه الورع الداخلي "بدال الطفل الداخلي
نوره ناظرت بهاج بحب : بهاج ياحيوان تجبرني ارضى !
بهاج : ابو مطلق غديت حيوان
نوره بأبتسامه : لا هاذي تعابير الحب
بهاج ضحك وجاه اتصال من سعود وطلع ونوره انشغلت القطوه
بهاج تنهد : وش فيك
سعود : احتاج مساعدتك يالبهجي
بهاج : احتزم بس وش بغيت ؟
سعود : ابيك تجي انت وحرمتك تقنعون ريف ان خطر عليها تعيش عند ابوها الي من الممكن يبيعها لشخص
بهاج بصدمه : يبيعها؟
سعود بضيق : مع الاسف ان ابوها كلب فلوس وادنى شخص اعطاه بنته ولو تعطيه٥٠٠﷼ باع بنته
بهاج : خلك حولها انا يمكن اجيكم بكرا اليوم صعبه
سعود : تمام بس لاتتأخر
بهاج: ازهلني
وقفل الخط بهاج وتنهد بضيق من مجرد التفكير بأن اب يبيع بنته عشان كم ريال ودخل يدينه بجيبه ووجهه باين الضيقه عليها ومايبغى يقول لنوره شي يضيقها زياده والي فيها مكفيها
دهل شاف نوره منشغله وتضحك مع توتو والشوق واضح بعيونها
ووقف وتكى يشوف فرحتها
ام سحاب جت والراديو خربان خقها وطاحت عينها على بهاج الي يتأمل نوره ونطقت : بسم الله الرحمن الرحيم ابك انت وش جابك جل ماانا طاردتك
بهاج رفع راسه وناظر ام سحاب وابتسم بوهقه
ام سحاب التفت لنوره : انتي يالمصيونه علامك دخلتيه وانا طاردته
نوره : والله ياجديده مادخلت احد ولاهم يحزنون فجأه رسبن عندي ولد منين جيت اذا جدتي طاردتك
ام سحاب مسكت راسها من فهمت نظراته : يويلي وقله واليي طامر الجدار ؟ وويلي وييلي فشلنا رجلتس ذا بيجيب لنا القيل والقال
بهاج : العواقب مؤقته اما الذكرايات دائمه
نوره : ايي والمثل هاذا الي لك يومين تكرره بيودينا بست وستين داهيه
ام سحاب : داهيه هالورع مايتوب
بهاج : ازهلوني عندي خبرات
نوره : سربوت من يومك عز الله كديت خير
بهاج غمز: عرفت السربته وسرقت الفراوله منك يالست نوره
نوره : جدتي شوفيهه يعايرني
ام سحاب سحبت بهاج : برى برى انت بلا على راس هالبنت
بهاج : يامزون المزيونه خليني ابرر
ام سحاب الخفيفه : سم وامر وتدلل ولا اقول مايحتاج تبرر نطرد نوره ازعجتنا بدموعها
بهاج ضحك من شاف ملامح نووه المصدومه : خفيفهه
نوره لازالت تحت تأثير الصدمه : اهخخ الجحده قويهه
بهاج استقبل القبله : بدعي لك تتخطرين ان شاء الله
نوره هزت راسها بأسف : عينا خير دامك قلت تتخطرين بدال تتخطين
بهاج بتفلسف : مفعولها اقوى تتخطرين اقوى من تتخطين
ام سحاب : يلا عاد انا بروح شبه العصريه افطن وانتبه لنوره لاتدج وهي حامل وتصيدها المصارعه صيته ويمترون الديره تمتير
بهاج دق الصدق : ازهليني بحشرها اذا شفتها تفكر تدج
نوره : لاا عاد انا وصيوت مخططين ندج اليوم !
بهاج هز كتوفه : اقرر وادرسك وضعك اذا انتي سيده اسمح لك خمس دقايق تدجين وترجعين بس
ام سحاب لبست شرشفها : يلا سلام
بهاج ونوره : هلا
وراحت ام سحاب والتفت بهاج لنوره وضيق عيونه : بجلس على قلبك
نوره : عادي عندي توتو تغنيني عن الجميع
بهاج كش بوجهه ووجهه نوره : مالت علي وعليك
ضحت نوره ومسكت القطوه وبهاج جلس وباله مشتت بسن قضيه هيام يخاف نوره وعاطفتها تغلبها وتتنازل ومن جهه ثانيه سعود وريف
نوره كانت تسولف بس بهاج ماكان معها وطلت بوجهه : بهيج ؟ وش فيك متضايق ؟
بهاج فز بعزه هواجيسه : هاه ؟ لا بس انشغلت شوي
نوره عقدت حواجبها : تهوجس بشي بدوني وماعلمتني ؟
بهاج هز راسه : لا بس يعني رمضان قرب وكذا
نوره بصدمه : قرب رمضان ؟!! كم باقي لهه ؟!
بهاج : صباح الليل باقي اسبوع
نوره ارتبشت وبهاج لاحظ ربكتها : علامك مرتبكه؟
نوره : اف بهاج القضاء ماخلصته (عادي صح الشفافيه كلنا بنات 😭)
بهاج مافهم شي : وش قضاه الله يسلمك ؟
نوره سحبت جوالها : ولد ولد ماتفهم
بهاج عقد حواجبه من هالشي "قضاء" ويحاول يسترجع كل شي واخيراً استوعب وفهم وضحك بخفه
________________________
(قـروب الـبـنـات )
نوره : بناتت باقي اسبوع على رمضان وماخلصت قضاء!!!!
نجلاء : يويلييي باقي لي خمس ايام والدوره على المشراف
وداد : يلهوييي علي الدوره الحين كيف اقضي؟!
الهنوف : عادي باقي اسبوع يميديك تتطهرين
سهام : الحمدلله خلصتهم
صيته : ياليل السرى
نوره : افف منكم ليه ماتذكرونا ؟ ليه بهاج ذكرتي !!
غدير : هاهه ! بهاج ! اخيهه استحيت
نجلاء : وويلي بتغطى عنه دامه يعرف حاجاتنا !
وئام : ماصدق ماصدق في غلط في غلط
الهنوف : يمهه وش عرفه ذا
نوره : ياربي منكم لالا ماعلمني بالقضاء قال باقي لرمضان اسبوع ولا وش يعرفه بحاجاتنا !
غدير : الحمدلله اخوي كويس ماهو حق كيني ميني
وداد : عيني عينك
________________________
( بـيـت ام سـحـاب - الـمـغـرب )
الدنيا اظلمت والاضاءه خفيفه وبهاج جالس بالحوش بالظلام ماشغل اللمبات معجبه ضوء القمر
بهاج جالس وحاط يده على فكهه وباله مشغول ويهوجس ونوره بالمطبخ
جت نوره ونادت بهاج بس مايرد عقدت حواجبها من انه مارد طلعت تشوف وينه وشافته جالس بالحوش ويهوجس ونادته : بهاج؟
استغربت اكثر من انه مارد ولازال عالق بأفكاره تقدمت وصارت قدامه ونطقت : بهاج!
بهاج فز : لبيه
نوره جلست جنبه : خير اناديك ثلاث مرات ولارديت ؟
بهاج جلس بأعتدال : ماسمعتك
نوره : مو ماسمعتني الا بالك مشغول بأحد وماودك تعلمني
بهاج صد عنها وسكت ومايبغى يتكلم عن ريف عشان نفسيه نوره الي فيها مكفيها
نوره حطت يدها على كتف بهاج : تكلم اسمعك واعطيك حل ولاتجلس تفكر لحالك كذا افكر معك واساعدك
بهاج هز راسه بنفي : الي فيك مكفيك مابي ازود عليك الهم همين
نوره : لا علمني وبعدين الحمدلله والشكر مافيني شي !
بهاج قام وحط جواله بجيبه : قومي روحي عند صيته استانسي
نوره قامت : وينن رايح ؟!
بهاج : شغله بسيطه واجي ، روحي لاتجلسين لحالك
نوره : وربي يابهاج تزعلني اذا سويت كذا وتخبي عني
بهاج ابتسم بتسليك وطلع وركب سيارته وراحت اما نوره الي تضايقت انه صار يخبي عنها وجلست بضيق وتهز رجلها بتفكير وماتبغى احد غير الي مضايق بهاج تنهدت بضيق وقامت وخطت على الشرشف الاحمر على شعرها وطلعت تمشى تغير جو لحالها
________________________
(بـيـت ابـو عـبـد الله )
ابو عبدالله : يابوك ياغدير عمك ابو نايف حدد موعد الزواج وقال غدير اذا ماعجبها نغير موعده
غدير ارتبكت : متى؟
ابو عبدالله : بعد العيد ان شاء الله ، مناسب
غدير هزت راسها برضى وتوتر
________________________
( بـهـاج )
مشى مايدري وين يروح وهو شايل هم خويه المقرب "سعود"
ودخل البقاله وطاحت عينه على الدخان بما انه متضايق ومن عوايد بهاج اذا تضايق يدخن حط يده على بكت الدخان بياخذه بس طرى على باله "تحرمين على انتي والي ببطنك " ، "نوره مابعدها نوره " بعد يده عن بكت الدخان وتعوذ من ابليس واتجهه لثلاجه وسحب كودرد وحط ريالين على طاوله الكاشير وطلع وركب السياره وفك ياقته بضيق هو تضايق اكثر من سعود تضايق مرهه ويعرف طعم الحب والفراق ومايبغى احد يجرب الفراق وخايف على سعود لايدمر نفسه وتنهد ورجع لبيت ام سحاب ووقف سيارته ونزل ولمحها تمشي بهدوء وابتسم من زولها وتقدم بخطوات سريعه يمشي جنبها
التفت بصدمه : بهاج؟
بهاج ابتسم : لا زيد
ابتسمت نوره وسكتت وبهاج يمشي جنبها وحط يده على كتفها وسحبه له ويمشون وكل واحد مشغول بهم الثاني نوره مشغوله بـ الشي الي مضايق بهاج وبهاج مشغول بنوره ونفسيتها وحملها الي اتعبها وماوده يتعبها الحمل ناسي هم سعود ونطق بهدوء : نواره اسمعي امي تقول لاتمشي كثير بالشهور الاولى ولا تشيل هم ولاتزعل وانتي ماشاء الله ماقصرتي مترتي الديره تمتير والزعل وزعلتي ودموعك ماتنشف ويلا امشي نرجع
نوره التفت له وناظرته وهزت راسها برضى ورجعو وفتح بهاج الباب ودخل نوره ودخل وراها وسكره واتجهه نوره لغرفتها عتبانه على بهاج ليش يخبي عنها الي مضايقه تنهد بهاج ودخل غرفتها حصلها جالسه على الكنبه استانس انها جالسه تقدم وحط راسه على فخذها : خليني هنا
نوره ابتسمت وبدت تلعب بشعره
بهاج : بنت انتي علامك تقل عتبانه علي ؟
نوره قرصت اذن بهاج : اكيد بعاتك دامك تخبي عنيي !
بهاج ضحك من قرصتها : ولاتزعلين بقول لك ،
وبدا يقول لها سالفه سعود وريف وهي كلعاده دموعها تسبقها وعاطفتها
نوره بدموع : افف يابهاج كلها منك
بهاج قام وناظر فيها بصدمه : هاه ؟ وشدخلني
نوره بدموع وغصه : انت قلت لي السالفه وماراعيت عاطفيتي
بهاج ضحك ومسح دموعها : انا خبيت عنك عشان ماتتضايقين وتبكين ولكن انتي اصريتي تعرفين وعرفتي ! وش استفدتي الحين ياعيوني الثنتين ماقوى على دموعك لا تبكين تعورين قلبي
نوره بدموع : عشانك عصبت على الصبح ببكي
بهاج ضحك وضمها ومسح على شعرها : خلاص اخر مره اعصب عليك انا اسف اسف يادهر قلبي ورجعانه وش بغيتي بس قولي ابي ذا واجيبه لك ولاتبكين ولا تتضايقين
نوره بدموع زياده : عشانك حنون ببكيي
بهاج شدها لصدره زياده : ابكي بقلبي وعندي اهم شي ماتبكي عند غيريي انا ملجئك وقت ضيقك وفرحك انا موجود حولك وحواليك انتي بوجهي من سود الليالي انتي بوجهي من الحزن والهم والغم جعله لاطرى لك يجيني قبلك
نوره ضربت بهاج بخفه : لاتدعي لاتدعي كذاا ! ادعى ان الله يبعد الضيق والهم عننا مو تدعي على نفسك انت يالله يالله شايل الي عليك !
بهاج سكتت ويمسح على ظهر نوره
________________________
( الـصـبـاح بـيـت ام سـحـاب - غـرفـه نـوره )
بهاج فتح عيونه بأنزعاج من اضاءه الشمس الي على عيونه التفت وطاحت عيونه حصل نوره نايمه على كتفه وعض على شفايفه بخوف خايف تتعبت بنومتها لانها حامل ولازم ترتاح ! وبما انه جالس على كنبه شال راس نوره عن كتفه والتفت وشالها بحضنه واتجهه للسرير وحطها بالسرير بهدوء وغطاها بالبطانيه وشال شعرها عن وجهها وابتسم وطلع وشاف ام سحاب راقده بالحوش وابتسم وطلع يجيب لهم فطور وراح وجاب فطور فول وتميز ودخل كان متوقع انهم قد قامو بس البيت هادي وابتسم وعرف انهم تعبانين ونزل الفطور بالحوش ودخل للمطبخ وطلع ابريق وشب النار وحط الابريق وسوى " شاهي البهجي " والتفت وطلع صينيه وحط اكواب وحليب سايل وحط الشاهي وعدل عمامته وطلع ونزل الشاهي عند الفطور وشمر اكمامه ورفع ثوبه على خصره بيي يزعجهم
بهاج عند راس ام سحاب : ياخاله شفتي وش صار امس بالديره نوضى تهاوشت مع مزنه وام مرزوقه تدخلتت
ام سحاب قامت بأنزعاج : ياولد تقلع عقوبةً علي ابك شكلي ماكله حلال يتيم عشان الله يعاقبني بك
بهاج تكى : شكلك اكلتي حلال نوره المسكينه رجعي الحلال لاصحابه ياخالتي
ام سحاب : سمعت بتقلع وسد نحرك؟
بهاج هز راسه بنفي :لا
ام سحاب سحبت علبه المناديل ورمته على بهاج : اجل اسمعها مني
بهاج يحك جبهته بألم : قناصه ماشاء الله عليك
ام سحاب حطت راسها على الوساده : هيا تقلع عني برقد لاتجيك ثانيه
بهاج : ياخالتي ياجميلتي ياجميله الجميلات يا....
قاطعته : ابك مضيع بيني وبين نوره ؟ عان نوره بغرفتها رح لها وقلت لها جميله القشرات تقلع بس
بهاج قام وكش على نفسه : مالت علي اسوي لكم فطور وادلعكم
ام سحاب سحبت البطانيه : افلح
وراح بهاج وابتسم بمكر من شافها نايمه بأمان واح بيخوفها بس تذكر انها حامل وكشر وجهه : افف اكرهه الحمل حرمني من اشياء
نوره تحركت بأنزعاج تقدم بهاج وطل بوجهها ويسوي حركات غريبه بوجهه نوره فتحت عيونها وشافت وجهه قريب منها ويسوي حركات بوجهه صرخت وصفقته كف بخوف
بهاج حط يده على خده بصدمه : الجده وبنتها كلهم طويلات يدين ويصفقون الواحد مايمزوحون وانا اذا عصبت بس تزعلون وانتم تسطروني واسكت عشان ماتبكين يالبكايه
نوره ضحكت بخفه : حسبتك مهرج وبعدين انت غلطان تطل بوجهي وانا نايمه ليهه
بهاج اتجهه للمرايه يشوف وجهه : ماهو مهرج مااشبه المهرجين
نوره ضحكتوابتسم لها وقامت ونطق : انتظرك بالحوش نفطر ونتناقش بمواضيع مهمه
نوره هزت راسها برضى وطلع بهاج وطاحت عينه على ام سحاب القالطه على الفطور تاكل : صحه صحه ياجميله الجميلات
ام سحاب : جعلك تسلم بس الظاهر انت عادك مضيع بيني وبين نوره
بهاج هز راسه بروقان : لا هي ام دميعه وانتي جميله الجميلات
ام سحاب بهمس : بيني وبينك نواره من يوم هي ورع ودموعها ماتنشف
بهاج بصوت عالي : الحقيي يانورههه خالتي تحش فيك
ضحك ام سحاب على روقان واستهبال بهاج وابتسامته من جت نوره
بهاج بأبتسامه : ارحبي يادهر قلبي ورجعانه ارحبي ياتاج راسي ومفتاح قلبي ارحبيييي تراحيب المطر يالدوله المدمعه حيي الله ام دميعه اقربي اقربي عندي
نوره ابتسمت على التوحيب وجلست جنب بهاج وبهاج يمدح ويرحب وهي ماتعرف ترد وترد الابتسامه وهو يحب يوهقها بالردود
بهاج بلع اللقمه ونطق بجديه : بعيداً عن اللعب والاستهبال الي قبل شوي جاي بقول كم كلمه لازم تطبقينها يانوره
ام سحاب : من جديه الموضوع قال نوره ماقال ام دميعه
بهاج هز راسه : نعم صحيح موضوع جدي
نوره بسماجه : لاخالي
بهاج شبك مع سماجتها ونطق : لا مليان مو خالي
وضحكو مع بعض وضرب كفه بكف نوره بمعنى "كفك"
بهاج تنحنح : نرجع لموضوعنا والي توقفنا عنه ، الموضوع وماهو بكرا عندنا جلسه بالمحكمه لاجل هيام والخمه الي معها والله يانوره تتنازلين بكسر اصابعك حذرتك انا !
نوره صابتها العاطفيه : لاا حرام لاتحطها براسك ومشها وعد الموضوع
تنهد بهاج ونطق بجديه : الموضوع ماراح يمر مرور الكرام ويانوره ان سويتي شي من وراي ولاتنازلتي بزعل منك وخالتي كذلك بتزعل ! لاتخسرين ابو ولدك وجده ولدك عشان وحده ماتسوى !
ام سحاب : نعم صحصح تنازل مانبا
نوره : بهاج حرام عليك اتركها
بهاج: بتركك وراها اذا تركتها
نوره عقدت حواجبه بصدمه من كلامه القوي والجدي !
بهاج : ادري تضايقتي بس لازم اقول هالكلام عشان تستوعبين ، هي سوت فيك اشياء واضعاف اشياء والي اخر مره بغت تعيد سالفه الفديو ونتهاوش بسببها وكل مره نتهاوش هي تكون ورا الموضوع فعشان كذا ياحلوه ياشاطره اهجدي ولا تذبحك العاطفه وتتنازلين !
نوره العبره خنقتها مستحيل تقسى على شخص مهما سوا كل شي لها ماتقسى
بهاج : عادي ابكي وتقطعي بس لاتتنتزلين ياويلك
بهاج غمز لام سحاب عشان تضغط على نوره وتقتنع نوره انها ماتتنازل مهما حصل
ام سحاب : ماعرفتس ليوم الدين اذا تنازلتي ولا عندي بنت اسمها نوره اذا تنازلتي
شهقت نوره بخوف ودمعت عيونها هم ضغطو عليها بالكلام القوي وهي ماتعودت تسمع منهم كلام خصوصاً من اقرب اثنين لها والكلمات تردد براسها
"بتركك اذا تركتها "، "ماعرفتس ليوم الدين " الكلمات قويه عليها هي ماتقدر تتحكم بعاطفتها بس مجبوره تتحكم بعاطفتها ولاتتنازل عشان ماتخسرهم !
بهاج خس انه ضغط عليها ورص على اسنانه مايقدر يداريها عشان تستوعب جديه الموضوع !
________________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
*اعتذر عن الاخطاء الاملائيه*
النجمه تدعم الروايه✨