မှောင်မည်းနေတဲ့ အခန်းငယ်လေးမှာ
တိပ်ခွေကလာတဲ့ ခပ်တိုးတိုးအသံကသာ
စိုးမိုးနေတယ်။
ရုတ်ခြည်း အပြင်ကမိုးစက်သံတွေက
အခန်းထဲက အသံတွေကို ဖုံးလွှမ်းသွားတယ်။
တဖြောက်ဖြောက်ကျဆင်းလာတဲ့
မိုးစက်တွေက ဂယူဗင်း အကြားအားရုံကို
သိသိသာသာ စိုးမိုးနိုင်တယ်။
အတိတ်က ပျော်ဖို့သိပ်မကောင်းပါဘူး။
ဂယူဗင်းကတော့ ရုပ်ရှင်တစ်ကားကို
ပြန်ကြည့်နေတယ်လို့ပဲ အလွယ်တကူ
စဥ်းစားလိုက်တယ်။မရေတွက်နိုင်အောင်
ကြည့်ခဲ့ဖူးတဲ့ တိပ်ခွေကို ပြန်ရစ်လိုက်တယ်။
အတိတ်မှာစမယ် ပစ္စုပ္ပန်မှာ အဆုံးသတ်မယ်။
အဖြူ၊အမည်းရောနေတဲ့ အရိပ်တွေကြောင့်
ဂယူဗင်းက တစ်ဖက်လူကို သေချာမတွေ့ရဘူး။
ဒါပေမဲ့ ရင်ထဲမှာ မေ့မရတော့ အင်္ကျီအရောင်က
အစ ဂယူဗင်း မှတ်ဉာဏ်ထဲ သံမှိုစွဲသလို
စွဲကပ်နေတယ်။
1.
"မင်း ကင်မရာတစ်လုံးနဲ့ ရှုပ်နေမဲ့အစား
ငါတို့ကို လာကူဦး"
ဂယူဗင်းက ကင်မရာကို သူမ လက်ထဲပေးလိုက်ပြီး
ရစ်ခီ နဲ့အတူတူ မီးမွှေးဖို့ပြင်တယ်။
အိမ်မပိုင်တဲ့ ရစ်ခီ က ချစ်သူနဲ့ အတူတူ
ခရီးထွက်ချင်တာကို သူငယ်ချင်းနဲ့ သွားပါမယ်ဆိုပြီး လိမ်တယ်။ နာကျင်ရမဲ့ကံပါလာတော့လည်း
ဂယူဗင်းက အတူပါလာရတယ်။
"မင်းနဲ့ သူငယ်ချင်းဖြစ်ရတာ
တော်တော်ကံဆိုးတာပဲ"
ဆန္ဒတွေကို စသလို၊နောက်သလို
ထုတ်ပြောဖြစ်တယ်။ အစကတည်းက
အလွယ်လမ်းကို ဂယူဗင်းက မလိုက်ခဲ့ရမှာ
အခုတော့ မလွတ်မြောက်နိုင်တဲ့ သံသရာထဲ
လည်နေပြီ။
"ဒီကောင် မောင်ကိုပြောတာ ကြားလား မင်း သူငယ်ချင်းကို ကြည့်ပြောထား"
ရစ်ခီ က တိုင်တန်းပြန်တယ်။မောင် ဆိုတဲ့
အသုံးနှုန်းက ဂယူဗင်း ရင်ထဲဆစ်ကနဲ။
ဘယ်သူကိုမုန်းမရလဲ။ တစ်ဖက်ကလည်း သူငယ်ချင်း၊အော် နောက်တစ်ဖက်ကလည်း သူငယ်ချင်း။
သံယောဇဥ်ဆိုတာ ဖြတ်ဖို့ခက်သလို၊
ချစ်မိတဲ့စိတ်ကိုလည်း ဖျောက်ဖို့ခက်သား။
2.
"ဒီနေ့ကတော့ ဂယူဗင်း မွေးနေ့ပါ"
မကြိုက်ပါဘူးဆိုတဲ့ ကင်မရာကို ကိုင်ပြီး
တစ်ကိုယ်တော် ရှိုးလုပ်နေတဲ့ ရစ်ခီကို ကြည့်ပြီး
ဂယူဗင်းပြုံးနေမိတယ်။
ရည်းစားလေးရပြီးမှ စကားတွေများလာတာ။
"ချစ် လက်ဆောင်ကို ဂယူဗင်းကို ပေးလိုက်ဦး "
ရစ်ခီက ပြောလည်းပြော ကင်မရာနဲ့လည်း
လိုက်ရိုက်နေပြတယ်။ ညနေကျရင် ပြန်ကြည့်ပြီး အဲဒီအပိုင်းတွေကို ဖြတ်ထုတ်ရင်ကောင်းမလား
ဆိုသည့် အတွေး၀င်သွားတော့ ဂယူဗင်းက
အပြစ်ရှိစိတ်တွေ တနင့်တပိုး၀င်လာတယ်။
ဒါပေမဲ့လည်းလေ သီးသန့်ကမ္ဘာလေးထဲမှာ
ရစ်ခီ ကိုပဲ ရှိနေစေချင်တာက ဂယူဗင်းရဲ့
အတ္တသေးသေးလေးပါ။ဘယ်သူကိုမှ
မထိခိုက်အောင် ထိန်းသိမ်းထားနိုင်မယ်ဆိုတာကိုလည်း ဂယူဗင်းက ယုံကြည်လို့
ဆက်မိုက်ဖြစ်နေတာ။
"ငါတို့ မင်းအတွက် ၀ယ်လာပေးတာ၊
ပိုက်ဆံက ငါပေးရတာ သေချာသိမ်းထား"
ဂယူဗင်းက ထိုလက်ဆောင်လေးကို ရွှေထက်ပင်
ပိုတန်ဖိုးထားခဲ့တယ်။ပိုက်ဆံပေးတဲ့လူက
အဲပစ္စည်းကိုပိုင်တယ်လို့ သတ်မှတ်လို့ရတယ်မလား။
3.
"မင်းသာ ငါနေရာမှာဆို ဘာပေးမှာလဲ
အရင်လတွေက နှုတ်ခမ်းနီပေးပေးပြီး၊
ပိုက်ဆံအိတ်၊ပန်း၊လက်ရေးစာ ဟာ ကုန်နေပြီ
ဘာပေးရမလဲ"
ချစ်သူကို လက်ဆောင်ပေးဖို့ ပူပန်နေတဲ့
ရစ်ခီထက် ဂယူဗင်းက ပိုပူလောင်နေရပါတယ်။
ရစ်ခီရှန်တို့ ရိုးသားပုံများ ဂယူဗင်းက
စိတ်မဆိုးနိုင်တဲ့အထိ။ဘယ်လောက်တောင်မှ
သူ့ကို အရင်းနှီးဆုံး သူငယ်ချင်းလို့
သတ်မှတ်ထားပါလိမ့်။
"ရေမွှေးပေးရင်ရော၊အရင်တစ်ခေါက်က
ရေမွှေး၀ယ်ရမယ်ဆိုပြီး ငါကိုတောင်
လာပြောပြနေသေးတယ်"
မှတ်ဉာဏ်ကောင်းတဲ့ ဦးနှောက်ကိုပဲ
အပြစ်တင်ရမလား။ရစ်ခီ ကို
အဆင်ပြေသွားစေချင်တဲ့ စိတ်ကိုပဲ
အပြစ်တင်ရမလား။ ဂယူဗင်းက ဝေခွဲလို့မရ။
"အာ ဟုတ်သား ငါကိုလည်း ပြောသေးတယ်
အခုနာမည်ကြီးနေတဲ့ ရေမွှေးအနံ့လေး
ကြိုက်တယ်ဆိုပြီး ကျေးဇူးကွာ
ကင်ဂယူဗင်းရှိနေလို့ တော်သေးတယ်"
ချက်ချင်းကို အော်ဒါတင်ဖို့ လုပ်နေသော
ရစ်ခီ စိတ်ကို ဂယူဗင်း နားလည်ပါတယ်။
ချစ်ရသူနဲ့ ပတ်သက်ရင် လူတိုင်းက
တက်ကြွသွားကြတာပဲမလား။ အခုဂယူဗင်းကိုယ်တိုင်တောင် ရစ်ခီ မျက်နှာပေါ်က
အပြုံးကိုမြင်တော့ တက်ကြွသွားတာဆိုတာ
ရစ်ခီ သူ့ချစ်သူကိုပေးဖို့အတွက်
လက်ဆောင်၀ယ်ခိုင်းရင်တောင်
ကိုယ်တိုင်သွား၀ယ်ပေးချင်တဲ့အထိပါပဲ။
4.
" မင်း သူငယ်ချင်းကလည်း ငါကို မွေးနေ့
လက်ဆောင်ပေးတာတဲ့ ကြည့်ဦး"
ရစ်ခီက ခေတ်ဆန်တဲ့ ဂျာကင်တစ်ထည်ကို
ထုတ်လာပြတယ်။
"ငါက အနက်တွေပဲ ၀တ်လို့ တခြားအရောင်လေးတွေ၀တ်ဖို့ဆိုပြီး ရွေးပေးတဲ့ အရောင်ကိုလည်း
ကြည့်ဦး"
အသည်းယားစရာကောင်းလောက်အောင်
ရစ်ခီက မျက်နှာရှုံ့မဲ့ပြပါတယ်။ ရစ်ခီ နဲ့
လိုက်လောက်ပေမဲ့ ရစ်ခီ မကြိုက်တဲ့
ခပ်ထင်းထင်းအရောင်။
"အရောင်ထင်းတာတွေထဲ မင်းနဲ့ဆို
အနီလေးက ပိုလိုက်မှာ"
"ဟုတ်တယ်နော် တကယ်ယောကျာ်းလေးတွေဖက်ရှင်အမြင်ကို ယောကျာ်းလေးချင်းပဲ
နားလည်တယ်"
အဖြေရသွားတဲ့ ကလေးတစ်ယောက်လို။
ချစ်ရသူမို့လို့ ဂယူဗင်းက အကုန်နားလည်နေကြောင်းကိုတော့ သိအောင်ထုတ်မပြောခဲ့။
ထုတ်ပြောနိုင်ခွင့်လည်း ဂယူဗင်းထဲမှာ မရှိခဲ့။
မနေ့ကထိ မကြိုက်သလိုလုပ်နေတဲ့ ရစ်ခီက
အဲဒီ ဂျာကင်ကို ဒီနေ့၀တ်လာပါတယ်။
"အစက မကြိုက်ပေမဲ့ ချစ် ၀ယ်ပေးလို့
၀တ်ကြည့်တော့လည်း မောင် နဲ့ လိုက်သားပဲ"
ဂယူဗင်းကတော့ ခပ်သဲ့သဲ့ရယ်မိတဲ့အထိပါပဲ။
အကုန်နားလည်နေတော့ ဘာအရေးလဲ။
5.
မနက်နှစ်နာရီလောက်ဖြစ်မယ်။ ပတ်၀န်းကျင်က တိတ်ဆိတ်နေပြီး အလင်းကောင်းကောင်းမရတဲ့ အချိန်မှာ ဂယူဗင်းကတော့ လမ်းမကြီးထက်မှာ။
အသိပေးခြင်းမရှိဘဲ မိုးက ရွာလာတော့၊
လှမ်းပြီးအသိပေးတဲ့ ရစ်ခီကို လိုက်ရှာနေရပြီ။
"ငါတို့ လမ်းခွဲလိုက် ပြီ"
ဆိုတဲ့ စကားတစ်ခွန်းကြောင့်နဲ့ ဂယူဗင်းက
အရူးမီးဝိုင်း ပျော်ရမဲ့ ကိစ္စဆိုပေမဲ့ ဆို့နင့်နေတဲ့
ရစ်ခီ အသံက ဂယူဗင်းကို
ကောင်းကောင်းဒုက္ခပေးပြန်တယ်။
ခန့်မှန်းရခက်တဲ့ ခံစားချက်တွေကြား
ဂယူဗင်းက လမ်းပျောက်ရပြန်တယ်။
"မိုးရွာနေတာကို ဒီတိုင်း ဆက်ထိုင်နေရလား
မင်းတို့ ရန်ဖြစ်ထားလည်း မနက်ကျမှပြော
ထိုင်မနေနဲ့တော့ ငါအိမ်သွားမယ်လာ"
အရှုံးသမားလို မိုးရေထဲ ထိုင်နေတဲ့ ရစ်ခီ ကို
ဆွဲရတာက ဂယူဗင်းအတွက်
အပင်ပန်းဆုံးအရာတစ်ခုဖြစ်မယ်။
ရစ်ခီကိုဆို ကျောကိုမတ်ပြီး ခေါင်းကိုသာ
မော့နေစေချင်တာပါ။
.
.
.
.
ရစ်ခီက ဘာတစ်ခွန်းမှမပြောလာခဲ့ဘူး။
ဂယူဗင်းကလည်း
အလိုက်တသိ ဘာမှလည်း မမေးခဲ့ဘူး။
"မင်း ရေစိုအ၀တ်တွေနဲ့တော့ ထိုင်မနေနဲ့
အ၀တ်စားလဲချင်ရင် ဗီရိုထဲမှာရှိတယ်"
ကြည့်မနေနိုင်တဲ့ ဂယူဗင်းကပဲ
ထွက်သွားဖို့လုပ်ရတယ်။ရစ်ခီတော့မသိ
ဂယူဗင်းကတော့ ရူးတော့မလိုပါပဲ။
"ငါ သူနဲ့မခွဲနိုင်ဘူး"
ဘုရားသခင်က ဂယူဗင်းကို မျက်နှာသာ
မပေးပြန်ဘူး။ဂယူဗင်းကလည်း အခွင့်ရေးကို
မဖမ်းဆုပ်ခဲ့ဘူး။လက်လှမ်းလိုက်ရင်တောင်
လွှတ်မြောက်နိုင်မယ့် အခွင့်ရေးကို ဂယူဗင်းက
ရစ်ခီ စကားတစ်ခွန်းတည်းနဲ့ မျက်နှာလွှဲခဲ့တယ်။
ကြေကွဲနေတဲ့ ရစ်ခီ အသံက ဂယူဗင်းကို
တံခါး၀ကနေ လှည့်လာစေတယ်။နာကျင်စရာကောင်းလည်း ရစ်ခီ သာ အဆင်ပြေမယ်ဆို
ဂယူဗင်းက နားထောင်ပေးဖို့ အဆင်သင့်။
"အဆင်ပြေသွားမှာပါ မင်းတို့က ချစ်ကြတာပဲ
စိတ်တိုနေတုန်းမို့လို့ ခဏပြောတာနေမှာ မင်းလည်း
သူ့အကြောင်းသိရဲ့သားနဲ့"
သူတို့က အပြန်အလှန်ချစ်ကြတာပဲ။ရစ်ခီ ကို
နှစ်သိမ့်ပေးတဲ့စကားလား ဂယူဗင်းကိုယ်တိုင်
သတိပေးတဲ့စကားလားမသဲကွဲ။
"မနက်ကျမှ ငါ ကူပြောပေးမယ် သူငယ်ချင်းလေး
နှစ်ယောက်ရှိပါတယ် မင်းတို့ကြောင့်
ငါအိပ်ရေးပျက်ရပြီ"
မတောင်းဆိုဖူးတဲ့ မေတ္တာတွေကို ဂယူဗင်းပေးတယ်။
အခုလည်း အကူညီမတောင်းဘဲ
ကူညီပေးချင်ပြန်တယ်။
ကမ္ဘာမှာ အချစ်နဲ့ပတ်သင်ရင် ရူးသွားတတ်ကြတာ သဘာ၀ပေမဲ့ ဂယူဗင်းကတော့ နာကျင်တာကို ရူးသွပ်နေခြင်းထင်ပါတယ်။
6.
" ငါလည်း သူ့ကို ချစ်ပါတယ် ဒါပေမဲ့လေ
နင်သူငယ်ချင်းက သတ္တိကိုမရှိတာ သူ့ အိမ်ကိုတောင် ဖွင့်မပြောရဲဘဲနဲ့ ငါကဘယ်လိုရှေ့ဆက်တွဲရမှာလဲ"
" သူလည်း ပြောမှာပါ နင်က ခဏလောက်စောင့်ပေးလိုက်လေ ဒီကောင် အိမ်မပိုင်တာ နင်လည်း
သိသားနဲ့"
ဂယူဗင်းက ဘယ်လိုအခြေနေမျိုးကိုမဆို ရစ်ခီ ဘက်လိုက်ဖို့ မတုံ့ဆိုင်းနေတတ်။
"နင်တို့ယောကျာ်းတွေကို ငါနားမလည်နိုင်တော့ဘူး
ငါအတွက် အခွင့်ရေးတွေရှိတဲ့နေရာကိုကျတော့လည်း ငါတစ်ယောက်တည်း စိတ်မချလို့ဆိုပြီး
သူက မထွက်သွားစေချင်ဘူး သူ စိတ်ချရအောင် စေ့စပ်သွားပါမယ်ဆိုတော့လည်း အိမ်ကိုတောင်
မပြောရဲလောက်အောင် သူက ဘာဖြစ်နေတာလဲ"
သူငယ်ချင်းတွေထဲမှာ ဂယူဗင်း
သူငယ်ချင်းမလေးကသာ စိတ်ဓါတ်အမာကျောဆုံး၊အပြတ်သားဆုံး၊အကြံ့ခိုင်ဆုံး။
တစ်ဖက်ကလည်းမမှား၊ရစ်ခီ ကိုလည်း
အပြစ်မတင်ရက်တဲ့ ဂယူဗင်းကတော့ " နင်ကို ရစ်ခီက ချစ်ပါတယ်" ဆိုတာကိုသာ အာဂုံဆောင်ရင်း။
.
.
.
" ချစ်က ငါကို ဘာပြောလဲ ဂယူဗင်း"
ရစ်ခီက အလျင်လိုနေမှန်းသိသာစွာကို အသည်းသန်။
" မင်းက ဘာလို့ အိမ်ကိုမပြောတာလဲ သူက မင်းနဲ့ စေ့စပ်သွားချင်တာ"
ငိုင်တွေနေတဲ့ ရစ်ခီ နည်းတူ၊ဂယူဗင်းရင်ထဲမှာလည်း ကမ္ဘာပျက်နေတယ်။
"ငါက ဒီလိုအခြေနေနဲ့ အိမ်ကိုမပြောပြချင်တာ၊
ငါ အစွမ်းအစရှိတဲ့ အခြေနေတစ်ခုကိုရောက်မှ
ချစ်ကို တရား၀င် စေ့စပ်ကြောင်းလမ်းချင်တာ၊
အခုချိန်မှာ ငါက ဘာကောင်ကြီးမှ,
မဟုတ်တာ မင်းသိသားနဲ့"
ရစ်ခီမှာကလေ သူ့ချစ်သူနဲ့ ပတ်သက်ပြီး
အနာဂတ်အစီစဥ်တွေရှိတယ်နဲ့တူပါတယ်။ဒါဆို
ဂယူဗင်းကရော ဂယူဗင်းတစ်ယောက်တည်းလေထဲမှာဆောက်ထားတဲ့ အိမ်လေးတောင် အခုဆို
ယိုင်နဲ့နဲ့ဖြစ်သွားရပြီ။
7.
အခုဆို ရစ်ခီ သူ့ချစ်သူနဲ့ လမ်းခွဲတာ ၃လ ရှိပြီ။
၃လအတွင်း ဂယူဗင်းနဲ့ သူငယ်ချင်းမလေးက
ဖုန်းပြောဖြစ်တာကြောင့် သူမ အဆင်ပြေနေမှန်း
ဂယူဗင်းသိရတယ်။
အဆင်မပြေကျန်နေခဲ့တာက ရစ်ခီ ဖြစ်ပြီး
အဆင်မပြေကြောင်းကို ပေါ်တင်ဖော်ပြခွင့်မရှိတာက ဂယူဗင်းဖြစ်မယ်။
ချစ်ရသူနဲ့ လမ်းခွဲလိုက်ပြီးတော့ ရစ်ခီ
အခြေနေက အားရဖွယ်မရှိ။ ဂယူဗင်းကျတော့ရော မထူးခြားနားပါပဲ။
"စိတ်ပြေလက်ပျောက်ဖြစ်အောင်
ခရီးထွက်ကြမလား"
"..."
ရစ်ခီကပြန်မဖြေ။
" မင်း ဆံပင် အမည်းရောင်ပြန်ပေါက်လာပြီ
ထပ်ပြီး ဆေးဆိုးရမယ်ထင်တယ်"
ရစ်ခီက ဆံပင်အမည်းတွေထွက်လာမှာ
အကြောက်ဆုံးမလား။
"..."
ဒါပေမဲ့ ဂယူဗင်း ရစ်ခီ အာရုံကိုမဖမ်းစားနိုင်သေး။
"မင်းအမေသိရင် စိတ်မကောင်းဖြစ်ဦးမယ်
ထစမ်းပါကွာ မျက်နှာလေးဘာလေးသစ်ပြီး
သပ်သပ်ရပ်ရပ်နေစမ်းပါ"
"ဖြစ်ချင်တာဖြစ်ကွာ သိသွားလည်း ကောင်းတာပဲ"
ရစ်ခီက ဂယူဗင်းကို ပြန်တုံ့ပြန်လာပေမဲ့
မထိရောက်သေး။
"မင်း ဒီလိုဖြစ်နေတာကိုသိရင်
စိတ်ကောင်းမယ်ထင်လား မင်းသိရဲ့သားနဲ့ သူ
က ဘယ်လောက်..."
"အေးနော် ချစ်က ရည်မှန်းချက်လည်းကြီးတယ်၊တော်လည်းတော်တယ်၊ ပြတ်လည်းပြတ်သားတယ်
ငါသာ ဒီလိုဖြစ်နေတာကို သိရင် ပိုပြီး
စိတ်ဆိုးသွားမှာ"
ရစ်ခီက အတင်းကုန်းရုန်းထပြီး ရေချိုးခန်းထဲ
၀င်သွားတယ်။ ဂယူဗင်းသွားမကြည့်ရင်တောင်
ရစ်ခီဘာလုပ်နေမှန်းသိပါတယ်။
အချစ်ရဲ့စွမ်းအားတွေများ တစ်ဖက်အပေါ်ကိုတော့ ကောင်းသောအကျိုးတွေသက်ရောက်ပေမဲ့
ဂယူဗင်းကတော့ မျက်ရည်မ၀ဲမိအောင်
ထိန်းထားရတယ်။
တစ်ခါတစ်လေ ဘယ်လောက်ကြိုးစားကြိုးစား
တစ်ဖက်လူက အသိမှတ်မပြုပေးရင်
ဘာမှဖြစ်မလာဘူး။
အချစ်ဆိုတာလည်း အတူတူပါပဲ။
8.
ရစ်ခီ ပြိုလဲနေတဲ့အချိန်မှာလည်း ဂယူဗင်းက
ဘေးမှာရှိတယ်။ရစ်ခီ အဆင်ပြေသွားတဲ့
အချိန်မှာလည်း ဂယူဗင်းက ဘေးမှာရှိနေတယ်။ အချိန်တွေ ဘယ်နှစ်နှစ်လောက်ကြာသွားပါစေ သူငယ်ချင်းအဖြစ်၊
သူငယ်ချင်းလေးတစ်ယောက်အဖြစ်။
ဂယူဗင်းက ၀မ်းသာစရာကိစ္စတွေကို ရစ်ခီ နဲ့
အတူ ၀မ်းသာပြီး ၀မ်းနညး်စရာကိစ္စတွေကိုဆို ကြိတ်ဖြေရှင်းတယ်။
အခုလည်း ရစ်ခီ စေ့စပ်ပွဲကို ဂယူဗင်း
တက်ရောက်ရပြန်တယ်။ ရစ်ခီကပျော်တော့
ဂယူဗင်းက အတတ်နိုင်ဆုံး ပြုံးထားပေးတယ်။
ဂယူဗင်း မျက်နှာပျက်နေလို့ နေမကောင်းဘူးလားဆိုတဲ့ စိုးရိမ်စိတ်လေးတောင် ရစ်ခီ
ဆီမှာမဖြစ်စေရဘူး။
" ဂုဏ်ယူတယ် မင်းအတွက်"
ဂယူဗင်း သူကိုယ်သူအတွက်လည်း ဂုဏ်ယူတယ်။
ဘာမဟုတ်တဲ့ ခံစားချက်တွေကို နှစ်တွေအများကြီး သိမ်းထားနိုင်ခဲ့လို့။ အဲတာတွေက ရစ်ခီ ကို
စိတ်အနှောင့်ယှက်ဖြစ်ခွင့်မပေးခဲ့လို့။
"အားကျရင် မင်းလည်းတစ်ယောက်ရှာလိုက်လေ
ဒီအရွယ်ထိ ဘယ်ကောင်မလေးကိုမှ
မကြိုက်ဖူးဘူး လို့ မပြောနဲ့"
ဘေးက သူငယ်ချင်းတွေက ဝိုင်းလှော်တယ်။
"အလှဆုံးတစ်ယောက်နဲ့ ငါ မိတ်ဆက်ပေးမယ်
မင်း ကြိုက်တဲ့သူကို လက်ညှိုးထိုးလိုက်
ငါ ချစ်ကိုပါ ကူပြီး မင်းအတွက်ရှာခိုင်းပေးမယ်"
ရစ်ခီက ဂယူဗင်း ပုခုံးကို လာဖက်တယ်။
ဂယူဗင်း မျက်လုံးထဲမှာ မြင်တဲ့ အလှဆုံးကတော့ ဘေးတိုက်မြင်နေရတဲ့ ရစ်ခီ မျက်နှာလေးပဲ။
ဘယ်လို့ ပြောရမလဲ။ ဂယူဗင်းက
လူသားတွေထဲက လူသားမို့လို့ ခံစားချက်တွေကို
မထိန်းချုပ်နိုင်တဲ့အခါရှိတယ်။
သဘောကျတဲ့ စိတ်ကို ချိုးနှိမ်ထားနိုင်ပေမဲ့
၀မ်းနည်းစိတ်ကိုလည်း မဖိနှိပ်ထားနိုင်ဘူး။
နှာရိုးတစ်လျှောက်က ကျဥ်တက်လာတာနဲ့အတူ မျက်ရည်တွေကြောင့် အမြင်အာရုံက ဝေဝါးလာတယ်။
ရစ်ခီက ပျော်နေတယ်၊ရစ်ခီက ပျော်နေတယ်၊
ဒါ ရစ်ခီ အစောင့်ဆိုင်းနေဆုံး အချိန်ပဲ။
တရားမှတ်သလို အထပ်အထပ်အခါခါ
ရွတ်ဆိုနေမိတယ်။
မျက်ရည်တွေက အငွေ့ပျံသွားသလို၊၀မ်းနည်းတဲ့
စိတ်အစား ကြည်နူးစိတ်က လှိုက်တက်လာတယ်။
ရစ်ခီက အရမ်းလှအောင် ပြုံးနေတာပဲ။
သူချစ်ရသူကို ကြည့်ပြီးတော့။
9.
ရစ်ခီ လက်ထပ်ပြီး ဘယ်နှစ်နှစ်မြောက်လဲ
ဂယူဗင်းမသိဘူး။သူ့ကလေးလေး ဘယ်အရွယ်ရောက်နေပြီလဲဆိုတာ ဂယူဗင်းစိတ်မ၀င်စားဘူး။
ဂယူဗင်းစိတ်အာရုံက ပစ္စုပ္ပန်မှာပဲ အခြေချထားတယ်။မှောင်မည်းနေတဲ့ အခန်းငယ်လေးမှာ
တိပ်ခွေကလာတဲ့
ခပ်တိုးတိုးအသံကသာ စိုးမိုးနေတယ်။
ရုတ်ခြည်း အပြင်ကမိုးစက်သံတွေက
အခန်းထဲကအသံတွေကို ဖုံးလွှမ်းသွားတယ်။
တဖြောက်ဖြောက်ကျဆင်းလာတဲ့
မိုးစက်တွေက ဂယူဗင်း အကြားအားရုံကို
သိသိသာသာ စိုးမိုးနိုင်တယ်။
အတိတ်က ပျော်ဖို့သိပ်မကောင်းပါဘူး။
ဂယူဗင်းကတော့ ရုပ်ရှင်တစ်ကားကို
ပြန်ကြည့်နေတယ်လို့ပဲ အလွယ်တကူ
စဥ်းစားလိုက်တယ်။မရေတွက်နိုင်အောင်
ကြည့်ခဲ့ဖူးတဲ့ တိပ်ခွေကို ပြန်ရစ်လိုက်တယ်။
အတိတ်မှာစမယ် ပစ္စုပ္ပန်မှာ အဆုံးသတ်မယ်။
ရစ်ခီကို ချစ်ဆဲ၊ချစ်မြဲ....
End<18.1.24>