بين ًسًـــلاسل العادات

البارت 17

                 بسم الله الرحمن الرحيم

#بين سلاسل العادات_ وحكم القدر
بقلمي: kefeyah 🦋

لاتنسون التصويت +التعليق بين الفقرات +متابعة للحساب 🤍

""""""""""""""""""

يالكاسر بصدري نفس
وبروحي كاسر عافيه
يمتى ترد.....
طال البعد

""""""""""""""""""

نوف:-فزيت من النوم مگطوع نفسي حرارتي مرتفعة ودگات گلبي سريعة ادور عيوني بالغرفة تررعب اشياء غريبة اشوف بيها طفرت من مكاني ارجف شغلت الضوة وكل شوية التفت عبالي واحد وراي..

گوة اجر النفس مشيت باتجاة الكنتور احس نفسي راح اموت اذا بقيت هنا، فتحت خانتي ادية ترجف ابحوش بغراضي ماعرف شريد بالضبط..
صارت گدام عيني گلادتي شهگت بصوت واخذتها بيد ترجف اباوع بيها قطعة اثرية بنضري اجمل واغلى شي امتلكة تذكرني بايام الفرح والسعادة التبخرت فجأة... تلمست الفراشات طارت وحدة لبعيد بقن تلاثة.. ضميتها لصدري انحب بصوت عالي روحي محترگة يا مي اليطفيها لبستها كوة سديتها دخلتها جوة ملابسي خفت تنگطع..

وكعت بالكاع ارجف وابجي  جاي اتوجع  لزمت لثوبي من ناحية صدري لويتها خانگة روحي عفتة مديت ايدي بشعري اشلع بية ما احس بالوجع اعض اصبعي اضرب على رجلي روحي موجعة عكس جسمي رفعت راسي جيزداني بية فلوس واكعة منه تنفست بقوة وكمت اخذتهن ضميتهن لگلبي واتلفت بالغرفة..

هاي فرصتي خليني اطير من القفص مادام اجتني فرصة  حموت محد يحس بية ماعرف شسوي وشنو الاريدة روحي توجعني نفسي بغير عالم كأبة مغيمة بروحي..

لبست صاية وشال لفيتة على راسي اخذت الفلوس بيدي اباوعلهن ضبة خمسة وعشرينات من امي واخوتي مجمعتهن..

طلعت من الغرفة اتلفت  البيت هادئ كئيب دموعي تنزل وجسمي يرجف طلعت بوجهي محد لاگاني امشي بغير راي الدنيا غبشة الصبح هستوة طالع الكشاف..

امشي بسررعة والتفت وراي مثل المجنونة دخلت بالبستان ارركض  بس اريد ابتعد عنهم  انرطمت بشخص وكعت من طولي لزمت الكاع الباردة اترقبة بخوف گلبي حيطلع من صدري
مسحت وجهي وكمت ارجف مو خوف لكن ماعرف افسر سبب رجفتي ..

-وين رايحة 

-معليك معليك..

مشيت سريع احسة يمشي وراي گلبي نغزني مگدرت اكمل وگفت اتنفس بصوت عالي متت يا علي احضرني التفتت بخوف شفتة وراي ولد اسمراني طويل كاشخ ومرتب نفسة كأنة طالب جامعي او استاذ هيج حسيتة ..

-شمطلعج من غبشة الله بيج شي اساعدج....

مشيت بدون ما احجي وياة اريد بس اطلع من البستان امشي واتوقف  اتنفس من يضيع عني الهوى حالتي حالة متخربطة روحي العزيزة  لگيت الشال واكع من راسي رفعتة غطيت شعري وابجي بصوت عالي حرب صايرة بداخلي مايعجبني ولا يريحني شي الهوى يأذيني اريد شي حاد اضرب نفسي بية سجينة مسدس اي شي اريد اخلص نفسي من وجعها..

وصلت للشارع قلة سيارات تمر رجلية طاحن كل ماتمر سيارة اركض وراها بس اريد واحد يوگفلي ماكو اريد اطلع من هاي الديرة وين مايذبوني اقبل بس يبعدوني منا..

مرت تكسي اشرتلها وگفت سايقها رجال متوسط العمر اتنفس بسرعة والعرگ ماخذني، طلع راسة من الجامة عاگد حاجبة ..

-وين توصلين؟

صوتي وكلني ارجف:-طلعني منا بس بس..

-اطلعلج منا بس غير افتهم وين تردين

-اخذني لخوي حباب عفناة وحدة

-عمي واحد مأذيج بيج شي گولي اخابرلج الشرطة

امسح بدموعي المايقبلن يسكتن هزيت راسي مرارا وتكرارا:-بس اخذني حباب بس اخذني

باوعلي من فوگ ليجوة لم شفايفة للداخل وشخط السيارة بهتت ملامحي اباوع وراها ابتعدت كلش صرخت بصوت عالي اشيل روحي وارگعها بالگاع كعدت بالكاع ابجي واضرب على رجلي الشمس طلعت اكلتني بحرارتها..

-ارريد امشيييي منااا حبااابين اخذوونيي حمووت الله يوفقكممم اووگفووليي..

سيارات تمر حمل وتريلات بس اريد اطلع روحي توجعني شكاعد يصير وياي ماطول اذا بقيت على هالحال افكاري تصير خطرة اباوع للطريق شفت سيارة جاية من بعيد ردت اشمر نفسي گدامها وارتاح اخر خطوة بقت بس شي بداخلي منعني وكعت بالكاع اعصر التراب بيدي واشمرة..

مر وقت واني على حالي گلبي راح يوكف من البجي والصريخ اليشوفني يگول ماعدها عقل مجنونة شكلي هيج يوحي.. طفرت من مكاني وكفت سيارة كدامي امسح بدموعي واضحك فرحانة واخيرا انكت بملابسي وامسح بوجهي  شهكت بصوت عالي واختفت ضحكتي ..

قبل لاينزل من سيارتة  طگيتها ركضة اارركض بكل حيلي اريد اعوفه وابتعد ليش طلعلي منين اجاني
ما اريد ارجع وياة صاح باسمي بصوت عالي من الخوف  تكومت على وجهي بالكاع وفلوسي عاصرتهن بيدي..

-ارريد امشييي عووفوونييي حرراام عليييكم ماماااا تعاليلييي راااح ااامووت حياااوي وينننك مت متت متتت الحگولييي

رفعني من  الگاع شبة واعية ابجي واصرخ صعدني لسيارتة لفيت ادية لصدري ارجف وابجي هسة يضربني صاير ناار راح يحرگني فوك ما اني محترگة  اجة بيدة دبة طفرت من مكاني اصرخ واگمز مررعوبة..

-حبااب حباااب لاتحرررگنيي اخاااف اخاف من الناار ماماا الحگيليي رراح يحرررگنيي

ارجع ليورة انگطع نفسي وگعت بالگاع اجة يمة ماگدرت احجي بس احرك بيدي..

-مااي والكافل ماي شني احررگج تسوودنتت

فتح الدبة وذب ؏ الكاع  غسل وجهي وگومني طبك ايديناتي غسلهن غمض عيونة يستغفر ماحجة شي وياي نكت ملابسي كلهن تراب اخذ الدبة للسيارة وصاح بصوت عالي..

-يالزهررة الزجيية عااينيليييي وعاينييي لضيميي
يبوو الحسن ياعلييي حررت بززماانيي وينن انطيي وجهييي دلووووني ضعتتت من ززماان ماا ارريدها تضييع اررحموو بحاالي رراييد فزعتكممم..

رجعاها واجاني خليت ايدي بحلگي اشلع بضافري اريد ابجي وهو هم عيونة مليانة دموع عدل شالي ومسح دموعي لزمني من جتفي :-شمالج عاينيلي

-يوجعني كلشي يوجعني كلشي اريد اموت عوفني اموت اريد ارتااح

ارجف واعصر بزندي مسح وجهي بشالي وعدل شعري نفسة بوجهي اباوع بوجهة التعب والحزن مخيم واني مو احسن منة حجة بصوت يرجف..

-وين مولية بس كليلي اريد افتهم كليلي وين جنتي تريدين ترحين؟

-يم اخوي يمة يمة هناك

-لا اله الا الله رحمتك ياربي شلون طلعين من البيت بهل وكت عقل عندج عقل تفكرين بية يو لا

اهز برجلي ودموعي تنزل شحجي وياة ماعرف شرد علية..

:-وتالي ويااااج لو ماخذج واحد ورااايح انة شيصييير بية مافكرتي الوادم ماترحمني علبو
مرتة نهبت ووو.. اشكال الحجي ياهو اليكول جاهلة ماتفكررر.. عاينيلي وسولفيلي رراااح تموتينييي..

-اريد اطلع منا ما اريد ابقى هنا

-وين تريدين ترررحييين

-لاي مكان بس مو لبيتكم ولا لبيتنا هناك اتذكر اخوي المات واموت وراة اي اي اريد امشي بعيد بعيد هناك بعيد

-بس يو ادري ليش ترجفين جا ارتاحيت

-ما ما ما ارجف اني

صعدني بالسيارة يريد ينفجر صعد لمكانة وشغل ماعرف وين يريد ياخذني حتى ما سألتة حايرة بوجع روحي مندمجة بافكاري السوداوية ماحسيت الا من طبگت السيارة  بمكان كلة زرع عيوني تفتر بالمكان كلش حلو مثل بافلام كارتون هيج الگاع خضرة فتح الباب نزلني ومشة كدامي ميباوع بوجهي ..

-انهار باوعلي باوعلي حباب

التفتلي يباوعلي بنضرات حيرة مشيت بصفة لزمتة من ايدة لازگة روحي بية..

-ليش هنا جايبني ليش ها ليش

-وين اخذج حرت بس ذني المچانين عدي.. العصر تمشين وياي للطبيب

تركت ايدة وكفت فاتحة عيوني:-طبيب!! ليش ها مبية شي اني مو مريضة لا مبية شي

- بلكي يطيح على علتج چا وين اخذج السادة تخبلونج بالزايد بلگي الطب يعرف علتج..

-لا لا لا ما اروح ما اروح

-مو تكولين گلبي يوجعني اخذنج يشوف شبية ونرجع مايسويلج شي

-يعني ماينطيني ابر

-لاع

هزيت راسي بالموافقة  وبقيت بمكاني احرك رجلي بالزرع سحبني من ايدي يمشي بية ساكت بس صوت نفسة عالي واني كذالك يكول جنا نتسابق..

ريحة الزرع كلش طيبة المكان  بية برودة ارتاحيت كلش امشي واضرب الزرع بيدي واضحك اخذني لسد عالي من التراب عبرتة گوة مچلبة بية  ضحكت بصوت من شفت نهر صغير يمشي مية لبعيد..

-انهار ههههه هذا نهررر مثلك ههههههه

-انمار اااممممم منين سويتيني انهار

-لا انهار انهارر هو حياوي گلي

-الله يرحمه

درت وجهها علية احاجي بية..

-جان صديقك؟؟ مرة مرة تذكر من جنت بالشارع وحجيتلك عنة.. كتلة حجيت وي ولد  بالبداية عصب بس من عرف اسمك  گلي انهار حباب..

-كلش جنة صحبان رغم انة اكبر منة چان  كل مايجي نگضيها سوة روحي ترتاح من يجينة يضل يصبر علي حجاياتة ترد الروح

كعدت يم حافة المي لميت رجلية لصدري وخليت راسي كعد بصفي وطلع باكيت الجگاير يدخن..

-شنو جنتو تحجون 

-بمواضيع عامة دين سياسة عن حياتنة الشخصية شكو شي يطيح جدامنا  نحجي بية

-راح بعد ويامن تسولف.. تلگة صاحب غيرة بس اني ما الگة اخو مثلة يحبني..

غمضت عيوني روحي رجعت للماضي مر بشريط ذاكرتي  صوت حياوي  يدندن باغنية اتذكر كلمات منها اعصر بعيوني اريد اتذكر شجان يغني جانت اغنيتة المفضلة دائما يسمعها ويرددها بصوت..

-طير  يهاجر.. صاف.. شوف انهار شوف..

-ششوف

-هاي اكو اغنية حلوة بيها صاف وطير تعرفها

غمض عين وحدة يفكر ابتسم كانة عرفها طلع موبايلة من جيبة يكلب بية شغلة وخلاة على صفحة

-قصيدة موش اغنية اسمها يطير الصاف

-ما اعرفها بس سمعتها منة حلوة هي

-صح كلش حلوة تطيح على جروحي دوة

سكتنة ثنينة نسمع الها صوتها وهدوء المكان وجمالة راهمات وي بعض..

گبل متروح وتهاجر يطير الصاف تانيني..
اخذني وياك لحبابي على الجنحان خليني..
وادور وين ابوي حسين..
وادور وين ابوي حسين..

گبل ميطوح الحادي گبل ماياخذ الاحباب
ترجيتة بدمع يطفح مثل مايطفح الخنياب..

يهداك الله يحاديهم تهدى ولاتسوگ الناگ
مشوا لچن ممن عندة سمعت..
ولا سمعت جواب..

جزو بالمسرى كل خطوة احس تركت جرح وصواب..
تباريهم غدت عيني وتصد لمن شبحهم غاب..

يطير الصاف عافوني وانة الياويل يبرالي
اصد للبيت بعيوني واشوف البيت ضل خالي..

گطع لاوين ابوي حسين..

كل كلمة اسمعها اشهك گلبي احترگ من كلماتها والحزن البيها ، طفة القصيدة وسحبني علية حضني يمسح على ضهري امسح بدموعي  واشهگ..

-بسج مردتي گلبي

-الحزن يموت صاحبة

-الله يبعدة عنج

تنفست بهدوء مجلبة بزندة ضامة راسي بحضنة عطرة بخشمي، عيني على المي اليمشي اترقبة بهدوء روحي كاسرها الخزن  ..

-ليش هيج القصيدة حزينة..

-القصيدة هاي للعليلة تحجي عن لسانها شلون ضلت عايشة  بغربتها... تعرفينها؟

-مو كلش

-فاطمة العليلة بت الامام الحسين عليه السلام المرض علعلها واخذ من حيلها  من سافرو اهلها للعراق عافوها وحيدتها كل اخوتها واخواتها راحن الا هي ضلت تنعي وتخاطب الطير اليمر ياخذها لاهلها..

شكد افكر بيها واتخيلها شلون تضل وحيدتها وشلون تتخيل اخوتها موجودين ضلت تهز بمهد عبدالله الرضيع.. شگد تلوعت على فرگاهم تتنطر رجعتهم ساعة ساعة..

-خطية شلون عافوها

-ماكدرو ياخذونها خافو عليها تموت لن الدرب طويل وهي عليلة عيوفها بالدار وي ام البنين قاضية الحاجات..

-وبعدين..؟

-ابوها واخوها الجبير علي الاكبر والصغير عبدالله الرضيع واختها رقية وعمها ابا الفضل عليهم السلام اجمعين كلهم خسرتهم وصبرت وامنت بقضاء الله وقدرة...اتعلمي واطلبي الصبر منها  اصبري ولا تسودنين اتعلمي الصبر من اهل البيت..

-ان شاء الله..

دنكت راسي تنهدت بقهر وهمست:-بس هم  اريدة احتاجة

-انة موجود بدالة

-لا هو غير هو موجود وياي من جنت صغيرة يلعبني يوكلني ياخذني للمدرسة.. جنت اسولفلة كلشي

-سولفيلي كلشي بس لاتسوين بروحج هيج ارجعي ادرسي سولفي اكلي اطلع لاتضلين لافة روحج بالمهجورة..

-مدا اكدر

-تگدرين كلشي بيدج.. احمدي ربج عدج ناس تحبج وتخاف عليج شدگليلي

-ليش انت عندك امك تحبك ويمك كل يومية تشوفها وعندك اخت واخو كلكم بنفس البيت ماعفتهم وبقيت تتحسر عليهم ما مات شخص تعتبرة روحك

- غشيمة وانة صغير كتلو روحي جدام عيني وضليت بدون روح عشت انسان  يملك فقط جسد  كبر  بين قسوة العالم.. هه بعدين فرحت لگيت  انسانة رجعتلي روحي بعصاها السحرية..

سكت دقايق مثل الحس على نفسة.. يدخن ويذب حسرات دغيتة باصبعي بزندة:: وبعدين شنو صار؟

-صارت عندي روح مو بس جسد يافرحتي بذاك الوكت بس  ماكملت

-ليش؟

-كتلتلي روحي ومشت

صفنت استوعب كلامة وشيقصد هالفترة استيعابي كلش بطيء جحضت عيوني والتفتت علية مستوعبة

-لحظة هي بنية... حبيبتك مو؟ اي عرفت عرفت عندك حبيبة والقران عرررفت

تقربت علية اهز بية يكمل كلامة:-گول شلون حبيتها وليش عافتك كول حباب

-ماتفيدج سالفة قديمة

-لا تفيدددني تفيدني سولفلي حباب حباب

شعل جكارة الگاع ترسها گطوف اخذ منها نفس وكمل يحجي بگلب ملچوم..

:-بداية شبابي حبيت بنية انة جنت مالي غرض بهاي السوالف ولايمها بس هي انعجبت بية..

-گلتلك اني معجبة

-تؤ

-لعد شلون عرفت؟

-مبينة من اسلوبها من اهتمامها جنت اكرة البيت  اشرد منة اتخبل لوضليت بية..صارت يجمعني بيها  الوكت  بس هي البدت جانت تكعد تسولف وياي و..

-شگد ماتستحي ميصير تحجي وياك لانك غريب عنها

خزرني بطرف عينة مقبل من حجيت عليها..

-راح ابطل ما اسولف

-لا لا سولف

-حبيتها والدنيا حلت بعيني حاجيت امي تخطبها الي وراحت خطبتها واهلها رضو وصارت الخطبة وراها بفترة خربت كل شي وحرگت روحي وگلبي ومشت

عيوني تفتر منا ومنا گوة جاي استوعب كلامة يعني جان خاطب هسة يحب اي بس مو واصلة للخطبة شنو السبب الخلاها تفصخ درتة من زندة عيونة حمر مليانات حقد يطحن بالجكاير يگول دوة..

-ليش ليش عافتك هي مو تحبك  ليش عافتك من خطبتها..

-هه اخر حجاية گالتها" ما اريدك تصير ابو جهالي  اخاف يتعيرون بيك باجر عگبة "

-بلعت ريك روحي اشتعلت نار علية كلماتة لهبن صدري نار:: ليش انت شبيك وين تلگة احسن منك يحبها ويربي جهالها..

-ليش انة زين بعينج

عيونة بعيوني يترقبني بلهفة احجي..

-اي والله العظيم كلش زين رغم ابوك مو حباب بس طلعت حباب

-هو شطيح حضي غير ابوي دمرني ما خلاني اعيش مثل الناس وحتى لو ردت مايخليني

-ليش ليش هو مو ابوك

-اي ابوي

-لعد ليش هيج وياك

-حاقد علي يطلع حقدة وحرگتة  بية بهذلني سودني كرهني بروحي

-شكد اكرة الله يلعنة... وحبيبتك وين راحت؟

-ورة فترة من انفصخت خطبتها ابوي راح خطبها لواحد من كرايبنة

شهگت بصوت عالي وفتحت عيوني على وسعهن ما مصدگة لهدرجة شايل حقارة على ابنة ليش سوة كل هذا الشي حتى يحرگ گلبة غير ..

-وتزوجتتتتتة!!

-اي

-عزاااا بعينهااا

-عوفي العزا محد ناقص

سكتت استوعب واتخيل المر بية گلبي وجعني علية ليش هيج ابوة وياة وليش هي ماصارتلة روح مثل ماسماها واحتوتة شگد حقيرة لعد من كسرت گلبة بهلطريقة  مسحت دموعي ادية ترجف اباوعلة
الدخان ترسة..

-بعدك تحبها؟

-من حجت هذا الحجي كرهتها ازيد  ماحبيتها ونزعت روحي وكتلت كلشي يخصها وضليت جسد مثل ماجنت بدون روح...

تقربت علية عيوني مدمعة حضنتة ونزلت دموعي
ابجي محترك گلبي..

-اني اصيرلك روح  ختولي هذيج حتى العگروگة احسن منها.. انطيك  روحي لحلالك بس عالجها من آلمها واخذها الك للدوم ..

رفعت راسي اباوع بعيونة صفن بعيوني دقايق مسح دموعي باصبعة وابتسم بطرف شفتة...

-اعالجها واداويها واخذيها واشردي من ضيمي خاف اصير مو حباب مثل ماتكولين

-لا والله انت حباب

:-ماكو واحد بالدنيا حباب حتى الحباب يلعبون علية ويخلونة يصير وحش

-بس انت هم حباب مثل حياوي

سكتت غاصة بالبجي گوة سكتت غسل وجهي بمي النهر  اباوعلة رافع بنطرونة ويمشي بالنهر انطاني ايدة يريدني انزل وياة..

-تعاي شبيج

-اخاف ما ما

-منين تخافين هو ماي

-يطلع تمساح ياكل رجلي

-خايبة مابية دتعاي باررد  يسحب الحرارة منج

ترددت انزل بس عجبني اجرب الشعور  اشوفة يدفر المي برجلة وينتشر بالجو رفعت البشت ونزلت وياة مجلبة بيدة  المي يوصل لجوة الركبة باررد شعور حلو زارني بوسط الهوسة والخربطة الاني بيها ..

-الله حلو كلشش

-يا علي صرتي زينة

باوعت بوجهة مبتسم ابتسمت لابتسامتة وحركت رجلي بالمي:-اي اي صرت زينة بعد جيبني هنا

-اجيبج بس كون مايطلعولي صفح

بقيت العب بالمي واضحك احس روحي انتعشت نمشي والمي يتحرك جوة رجلينة مرت اكثر من ساعة تغيرت نفسيتي مية وثمانين درجة اضحك والعب بس هم جسمي يوجعني... رجعنا للبيت  دخلنا لگيتهم متجمعين بالمطبخ صرت بضهر انمار ما اريد اشوفهم مرات اخاف منهم سلم انمار ولزمني من ايدي خلاني گدامة..

ام سفانة:-ها فرخة بغداد تتونسين واحنا مهبوطين ندور عليج لدالنا شردتي مثل ذيج النوبة

ام سجى:-اهى دشوف انتي الفطيرة وين تولي مو كتلج عليش تخافين عليها خافي على روحج

جدة حكمة:-دبسجن مال الغسل لهلحلوج الماتعرف تحجي.. ها جدة شلونة مريتك..

انمار:-احسن

نوفة:-ماتخلينة ناخضها (ناخذها) لام حسين العليوية تقرا عليها تنشرلها بلكي تطلع علتها

انمار-: واليرحم والديج سالفة الكشاشفة والسادة لاتسولفينها بعد شوي اخذها للطبيب وفضت وانتهت

نوفة:-چا الدكتور شيسويلها خاب شمالك تدوهي سالفتها موش مال دكتور هاي داست وشخطت من مات اخوها ناخضها بس تقرا عليها ترجع وردة..

انمار:-رحمة الله والديج سدي السالفة ولاتجيبيلها طاري

اخذني لغرفتي صاير اعصاب ماعرفت شنو يقصدن ولا سالت.. شفت فراشي نعست رحت تمددت بية ميتة تعب جسمي احس بية منمل سحب الغطا وسحبني بعصبية..

-شبيك اريد انام

-اسبحيي بالبداية شگلنة شحجينة مساع

-شنو واحد مينام حرام يعني

ماحجة وياي كلمة سحلني سحل للحمام تعود على هذا الوضع علگ ملابسي وطلع سبحت بسرعة اخاف من اسبح ومن افرك جسمي يبقى يوجعني كملت بسرعة لاگيت البنات دنگت راسي ورجعت لغرفتي اركض ماگدر اسولف واحجي مثل قبل كلشي تغير

لكيتة كاعد يلف جگاير ويخلي بالباكيت جبت المشط وكعدت يم راسة..

-اهوو جكاير جكاير كافي راح تموت من وراهن

-يا ريت

-اوووفف اوووووووف

-لا تنفخين بوجهي

-يلا مشط شعري

-شو تأمرين علية اخاف اخذج الواهس وگلتي هذا يشتغل عندي

-لا مو هيج بس انت تعرف بية ماعرف امشط وشعري هواي

-لا تتانيني مامشطلج مشطي لروحج ماعدج ادين

-لا عندددييي

اخذت المشط ورحت كعدت بالزاوية خليتة گدامي بالگاع وصرت امشط بية ادية ترجف فحطت گلبي صار يدگ سريع وگع المشط من ايدي نزلن دموعي جانت امي بكل وقت تمشطة واليوم الماموجودة اخواني يمشطولي لفيت شعري ورحت لفراشي اول ماخليت راسي نمت..

فزيت على اثر صياح اعتقد صارت مشكلة كعدت على حيلي اريد اروح اشوف شكو بس ماكدر اتحرك
يربي شكاعد يصير ويامن هاي العركة سمعت صوتة يصيح بعلو حسة..

-بسسس اصبررلييي جممم يوووم اعووفلللك المهجووم واااهج

-بيك خير اطلع ولاتراويني جهرتك

-يصيررر خيييرر

انفتح باب الغرفة بقوة دخل صاير كتلة من نار يايوم شفتة هادء ومرتاح اخذت نفس اباوعلة شايطة روحة فتح خانتة وصار گدامي منطيني ضهرة شوية وراد يطلع..

-وين رايح شكو

-ماكو شي ردي نامي انة رايح باليل ارجع

راح والروحة روحة صار العصر صرت اتفرگع من الوجع ابجي واصرخ ساعة وساعة اسكت ما ينسمع صوتي  ملتمات علية البنات وامة حارن بية
المشكلة ماعرف شريد وشنو يوجعني تصرفاتي ماكدر اتحكم بيهن طلعني لغرفة بيبي كعدت تقرا قران على راسي  خنست مالي صوت بس عيوني تفتر جابولي عشة اكلت لكمتين ورحت تقيأتة رجعت لغرفتي لفيت راسي واسمعهن يگولن خاف حامل..

دخلت بفترة من الراحة ماحس بيها بشي كعدت الغرفة ضواها خافت باوعت بصفي انمار نايم على وجهة باقي بس بالملابس الداخلية غطيتة ونزلت من السرير شبعانة نوم كعدت بالزاوية وابلع بريگي عقلي فاصل بغير دنيا طفرت من مكاني مرعوبة من سمعت انمار يصيح بغير وعي رحت يمة اكعد بية ..

-كوم اكعد حلم مو حقيقة اكعد كابوس هذا

اضرب على خدة اريدة يكعد ماكو جسمة نار يجوي شكد يحجي مفهمت منة شي غير كلمات..

-اررحموهاا حرراام عليكم.. عوفونيي شسويتت.. طلعووني مناا اكرهكمم كلكم..

گلبي شوية ويوكف اول مرة تمر علية هيج حالة عبالي صار بية شي ابجي واضرب بية..

-اكعد انهار اكعد لاتتمرض منو اليحير بية بعدك.. ميصير ثنينة نتمرض

سكت يتنفس بصوت لزم ايدي تلمسها وخلاها فوك شفتة باسها قشعر جسمي سحبني علية وحضني حسيت گلبي مابية نبض افتح بيدة اريدة يفكني حموت روحي اشتعلت بنار...

-شبيك عوفني عوفني

مغمض عيونة وصدرة يصعد وينزل جعصني جعص

-مرتي انتي مرتي بالحلال لازمج لاتخافين

گلبني صار فوگي شفتي صارت ترجف مغمض عيونة ويتلمس بخدي ومبتسم حتى الحجي طار مني صرت ارجف شبية هذا تسودن علية...

-شبي.. ك شبيك وخر

-خدج ناعم مثل الحرير وانة ادية خشنة يعني مايصير الزمج حتى ما أذيج

-اي بس كوم جعصتني راح اختنگ

-هه عطرج طيب عادي اشمج

خلة راسة بركبتي يشم بية ادفع بية جلمود شثگلة روحي طلعت مو بوعية يتلمس ويضحك حرارتة انتقلت الي..

-شعرج حلو وانتي هم بس روحي لاتضلين يمي اخاف عليج من عادل وعمامي ومني احميج منهم بس ياهو يحميج مني

-ليش انت شبيك

-شوفت عينج

-شبيك ماشوف بيك شي

-اي صح محد يشوف بية شي بس هي

نهض من فوكي مطيت جسمي تكسرت ايدي انشنطت رحت وراة لگيتة كاعد مقابيل الباب صافن وايأشر باصبعة صرت بصفة اباوع وياة ماكو شي

-هنا هي تشوفني هنا

فتحت حلگي بس لا اكو جنانوة وجاي يحجي وياها اني وحدي بدون شي مرعوبة واتخيل مو عاد يحجي وي الفراغ متت خووف صرت اطگطگ بمكاني..

-هاي هنا جانت راحت منا جنا نريد نمشي وكضونة هنا هنا هنا...

يدير بوجهي للمكان احس رگبتي انشنطت بجيت من الخوف حضنتة من ضهرة ودموعي تصب..

-روحي منا حبابة عوفينة احنة نخاف روحي روحي بعيد.. كوم انهار كوم لاتاكلنة هي وجهالها كوم

كام طفرت وياة يمسح على وجهة تمدد بمكانة هادء مانطق بحرف ركضت ذبيت روحي زرگ بالفراش خلة عيونة على وجهة وكان ولا صاير شي...

-شبيك گول حباب گول شبيك

مارد علية تقربت منة كلش اندس بية داخل بسابع نومة غطة نفسة بالغطا وخلاني  مكشفة اطگ سن بسن سحبت الغطا منة غصب ودخلت وياه مگدرت انام متقيدة منة وبنفس الوقت خايفة من تصرفة..

كعدت من النوم ماموجود كالعادة رجعت نمت وبدت مشكلتي وي المجهول..

***

-شلون وي هاي الفرخة تريدني اتعشة بيها اليوم

رغد:-يمعودة شعليج بيها ختولي

سجى:-هسة بس كون ادري شعدها يمنة ضالة

اسراء:-والله مو بيتج مثل ما كاعدة بية انة هم

سجى:-ياهو العفطلج خاب ماتولين مني

اسراء:-اعديها الج بمزاجي

سجى:-ام مزاج الخايس شلون تتحارش بية

رغد:-شني متحامية عليها شبيج

سجى:: ختولي غثة ماتنبلع وعود صايرة الاخت الحنونة تروح لنوف تكعد يمها وتاخذلها اكل اللهم طولج ياروح

رغد:: غير اختها وضعها مايسر العدو تنقهر عليها

سجى:-اي كلش.. دمشينة نشوف شسيون

رحنا للمطبخ لگينة الولد كاعدين..

جاسب::سفانة كثريلنة حموضة على الزلاطة

همست رغد بصوت ناصي:: حموضة تاكل حموضة

گرصتها تسكت لايسمهعا ويجلب شيفضها وياة.. دخل رحمان جاي من الشغل طفرت اللوگية..

اسراء:-الله يساعدك اخليلك ملابسك بالحمام

عضيت شفتي حرگة عاينت لرغد ابدي اغمها على مرت اخوها سفانة گوة لازمة ضحكتها شكد ماتستحي تخليلة ملابس على اي اساس حتى عقد سيد مابينكم راحت تركض صاح وراها..

-راح اطلع ما اجيت اسبح

اسراء:-ليش غير جاي من الشغل

رحمان:-لا اجيت من العمرة ورايح يباركولي

گلب وجها وطلع مبين ذاك هو مايريدها بس هي لزكة كوة لزمت ضحكتي عليها حل فشلها وهي ولاجنها مفشلها راحت وي سفانة تگلي وتروح منا وترجع منا عود شوفوني نادرة غضيت بصر عنها وكعدت يم الولد..

جاسب:-اگلكم انة راح اموت

عباس:-منين تموت

-من الشغل خايبين موتني كلة علية

فارس:-ليش كلة عليك مو الولد وياك

جاسب:-اي بس انة علية الثگل

عباس:: جا مو جان انمار يشتغل بدالك هلبت شكة يوم وياريت واحد مادحة

جاسب:: هو لو يرجع جان ارتاحيت على الاقل يعرف شغلة انة شكو

فارس:-انمار لگالة شغلة اعتمد على روحك

جاسب:-جا وابوي يرضة غير يگلب الدنيا

فارس:-مالة حگ علية وين مايشتغل هو حر

جاسب:-هسة مال دهن حر بويااخ خاب شني سفانة ماكملتي

فارس:-شلون بلة تنفخ بية ويكمل ماتشوفها ماتلحگ  تطيرلك

جاسب:-بس على كيفك كول يا الله صاير محامي الدفاع

فارس:-مرتي تستاهل اصيرها محامي شعندي غيرها ام عيالي وشريكة حياتي

ضحكت بصوت بداخلي فراشات يگول جاي يحجي علية اباوع لسفانة صارت تضرب شي بشي امها گامت تنافر ماعاجبها عود بتها المفروض تفرح..

جاسب:-مرتي وشريكة حياتي الله الله

فارس:: ان شاء الله نشوف عن قريب شريكة حياتك
ونخلص منك

رفع راسة عاين لرغد ودنگ ضلت رغدة تنافخ

جاسب:-يا قريب هذا والوضع صاير فيطي..

هز بيدة وخزرنة بطرف عينة:-ها شو ماداومن شني بطلتن

سجى:-لا يخوي بس جيب الياخذنة لا احنها الاگينة خط ومرتاحين ضالين بمنيتگم شوكت ماتنحون علينة..

جاسب:-جا ماگلتلي اخذجن

رغد:-مو انت اشغالك هواي خفنا نزعجك

جاسب:-من كد ما اشغالي هواي طلع گمل براسي صگد رغدة شخليلة ويروح

رغد:: نفط واشعلة بجداحة اسهل طريقة

جاسب:-اي بعد انتي خبرة

سجى:-احمممم اكول انت ليش وجهك مجسب

جاسب:-شتقصدين ولج

سجى:-وجهك ادهنا بفازلين حتى يستعدل شبيك يصير ناعم

جاسب:-عود خوش

طلعت رغد تنافر مستحيل يكعدون سوة بدون بسامير انوب اسراء خاف تلزمها عليها هي بفترة السادس المصخم هملت روحها كلش بس هسة كل يومية مسوية خلطة لوجهها والبس والاناقة راحت ذيج الايام..

عباس:-سجيوة

-ها

-وين اختج

-بالحجرة يو وي زهرة

-خل يبدلن خاطر اطلعهن

-شني بس هنا وحنا مابيها مجال نجي وياكم

-اكعدن واسكتن وراجن دوام باجر روحن اقرن

-بطلت يابة عينك عينك طردني

عفتهم يتعشون ورحت لهديوة اگللها لگيتها طابگة وي زهرة تقري بيها صايرات صاحبات كلش شكد افرح من اشوف زهرة تندمج وياها كلنة ماتريدنة بس هسة شوية مالتلها..

-هاي كايز.. يلا بدلن اجتجن طلعة

هدى::باوعتلها بطرف عين ادري تجذب هزيت ايدي وغلست عنها..

سجى:: شو مغلسات مو احجي وياجن

هدى:-غير افتهم شتريدين

-عباس وداني عليجن يريد يطلعجن

كضيت دموعي ماريد اشوفة ولا اسمع صوتة خل ابتعد عنة وانساة محد يطيح بيها غيري مدري شلون حبيتة ومدري شلون راح اتخلص من هذا الحب ادور مايعاينلي بغير نضرة ابوية معناها انة فاسقة لازم اغير من روحي والتهي بدراستي..

-زهاري اذا تريدين تروحين روحي انة عندي واجبات

زهراء:-وانة هم ما اروحن اضلن وياج 

سجى:-صحلها رجل وصاحت اعور مو صوچن

ضلينة على كعدتنا اخذت دفاتر زهاري ارسم بيهن ورد والون وهي تكتبلي الواجب.. نايمة على بطني ورافعة رجلية ليفوك سمعت صوتة ونزلتهن نهضت روحي كعدت عدل.. واكف جدامنا وخازرنة يفر بسويچة..

-شو مامبدلات

هدى:-ما نروح

-خمس دقايق بين ما اشغل السيارة الگاجن مبدلات

عافنة وطلع وحدة تعاين بوجة الثانية..

زهراء:: خمس دقايق گال

-بس خمس دقايق لللج كوومي

نگمز منا ومنا لبسنة شلون ماجان طلعت زهراء گلبي وانة رحت لحجرة انمار بلگي تجي نوف ويانة دگيت الباب محد رد انمار طالع فتحت الباب الضوة خافت فتت لگيتها نايمة ذبيت حسرة شگبرها راح تدمر ولو هي هسة ماضال بيها شي لاتحجي وي واحد ولا تطلع شبة عايشة مانطاني گلبي اعوفها رحت انده بيها بلكت تكوم ويانة عالواهس..

-همهمم

-كومي نوف شني سالفتج كافي ماشبعتي اليل والنهار نايمة

ماردت علية بحرف مليت منها يكول ميتة مو نايمة طلعت لكيتهم متانيني..

عباس:: بعدد ناميي نااميي

كعدت يم زهراء ماحجيت شي طول الدرب ساكتة مو مثل كل مرة اسولف وياة من خاطري..

-شمالج هدوة اشو ساكتة

-شحجي

-شچنتي گبل تحجين

-خلصن سوالف گبل ماعندي سوالف جديدة.. انت سولفلنة عن حبيبتك صگد شكثر يلا تتزوج ورة دورت السنة؟

-ماعليج بهاي السوالف

-ليش مو انت تسولفنة كلشي هسة انة شكلت غير اعرف يمتها تعرس

-لدورة السنة نسويها سكتاوي وجدك مرحوم ممنون

سكتت بالعة غصتي خل يتزوج انة شعلية ليش هالغيرة والحقد الشايلتة على مرتة.. لهيت روحي وي زهراء اسولف وياها نزلنة يم محل يبيع عصاير جاب ثنين الي موز ولزهراء رمان..

-زهراء:-الله شگد طيب

-وين الطيب حامض يشحط

-اي بس احبة

-دحبية ياهو البحالج امووح وي الموز حلو شطيباتة

غورتها وراحت لعباس تريد غيرة اشترالها موز اجت تضحك تطلعلي السانها..

-اشترييت

-بالعافيه

عباس:-ازلفن عن الدرب شوية

رحنا يم السيارة شربناة واخذنة اشترالنة شعر بنات ناكل ونضحك وهو يضحك على واهسنة دائماً يطلعنا شكد نتونس وياة.. اتصلو علية صعدنا بالسيارة ورجع بينا مامشت هواي مسافة وطبگ نزل منها لاگوة ثنين ولد بعمرة يسولفون..

-زهراء:ذولة منين

-مبينين صحبانة

-اي بس حلوين

درت وجهي عليها فاتحة عيوني بحياتي ماممتوقعة هاي الحجاية منها:-عود هاي انتي الفقيرة وهيج تحجين جا شخليتي لرغدة وسجيوة طلع بيج كلة البلة بس مايبين

-هسة شبيج بس كلت هيج بدون گصد

-ولج منيلهم حلوين اشو ذاك وجهها ينگط دم يگول غاسلة بماي شونذر والثاني جنة سلبوح زيان بس يطخة عبسي يسيح

-يااء سلبوح زيان غير يخبل بس انتي ماعندج ذوق

سكتنا من صعدو  ضلينا مفهيين صعدو بالصدر وشغل..

-عباس: انلطمو بين ماتوصلون

-على كيفك عباس ابن فرناس شنحجي قابل

عباس:: مو ادري بلساناتكم معوقة ومنا بنات

-ترة احنة نعرف الاصول واذا على المعوق نسفرة للهند يرجع ركيضان مو بلة

عباس:-انجب والصم.

-نعم الله عليك هاي انوب گدام بناتكم امداك اي والله
اكلك ذني منين..

عباس:-راح انزلك

-هسة شكلت غير اسئل امداكم ثنينكم واحد شيترجة

طول الطريق السلبوح بس يسولف للامانة مو ضعيف بس لان طويل كلش گلت علية سلبوح سوالفة حلوة وروحة هم دمة خفيف يونس نزلهم بنص الطريق ورجعنا..

عباس:-ها ان شاءلله تغيرت من نفسيتجن

زهراء:-شوية بس ذولة خربوها علينة

-من انزل ثاني مرة اطلعجن لغير مجان

وصلنا للبيت نزلت كبل لازهراء تنزل مادرت حتى وجهي لكيت البنات يحضرن غراضهن للدوام خطية مخبوصات خبيصة..

سجى:-ها ولجن تونستن

هدى:-شوية

سجى:-هسة شوية هواي المهم تونستن

حضرت غراضي وراسلت بنية وياي بالقسم انطتني المواد الماخذينها وشرحتلي كم مادة ضليت اقرا لحد الوحدة طفيت رحت نمت وقتت الموبايل بالاربعة اشو مادك كعدتني رغد تطفر..

-راح نتاخر بساعج كومي

-جا بيش الساعه

-بالستة ونص

شهكت شنلحگ نركض منا ومنا طلعنة فحطانين صعدنا وي المجسب هم من الصبح انطانة محاضرة هسة احنا بيال حال الولد عايفة امهات الاحمر والاصفر راجعينة.. وصلنا متاخرين كل وحدة راحت تركض لمحاضراتها دخلت لمحاضرتي لكيتهة هستوها بادية استأذنت ودخلت..

متت جوع بدون ريوك معدتي صارت تكلب اول ماخلصت المحاضرة رحت للكافتريا اكل ولو هي اكلها مو طيب بس شنسوي..

-اوكفي سجى

درت وجهي بنية جاية باتجاهي:-لج فحطتيني

-والله ماادري بيج

-اني ريم

-وانة سجى

-هههههه اعرفج شلون

-منين تعرفيني

-البارحه راسلتيني

-ياااء هاي انتي ماعبالي

-اي اني.. ترة عدنا محاضرة بعد ربع ساعه

-يامحاضرة اريد اكل راح اموت

-حتى اني جوعانة بس اخاف تروح علية المحاضرة

-ماتروح يمي انة احجي وي الدكتور ادكلة اليتيمة

هزت بيدها ومشت جدامي:-بعدج ماتعرفينهم لج يشوون شوي هسة اسولفلج

طلبنا اكل دقايق وكمل كعدنا ناكل ونحش..

ريم:-لج عيني اجانة دكتور الا يشک شگ

-يا الله عاد يفتح النفس ونقرا مادتة

-يفتح ابو النفس بس غثيث وما ينجرع شايف نفسة ولعب بينة لعب من اول يوم

-ياستار ياربي عاد شلون فرحت

-لج غنى زحفت علية بس والله ثكيل ولا عبرها

-ياهي هاي غنى

-هاي النازكة تتعاير شوية كاتلة روحها هسة تلكيها اول وحده بالقاعة كاعدة

ناكل ومانحس بالوقت صاحت ريم بصوت عالي طفرتني وخلت الكل يعاين علينة..

-ولج تاخرررنااا تاااخرنا بعد مايدخلنااا

-شبيج كلبي طيرتية هي محاضرة انمونة

-لج هاي المادة بالذات معقدة اذا فاتتج محاضرة بعد ماتفتهمين شي منها وانوب الغثة ياخذنة بيها

عافتني تركض ركض يمة رجلية طاحن شوكت نوصل للطابق الخامس انخضيت خض بالف ياعلي الا وصلت،، واكفة ريم يم الباب وتلطم بالصامت جريت نفس..

-موتي موتي بعد اتمرغلي بالكاع

-لج تاخرنا شلون بينة

-واذا ادك الباب ونحجي وياة

-اني ماحجي انتي احجي يفشلنة اكيد

-خاب خل يطير شني فد شخصية يفشلنة والله الا اشهرة واخزية بس يحجي كلمة تغثني

دكيت الباب وفتت القاعة صنطة هدوء السطر الاول بنات ماشاء الله خوش مركزات الاستاذ جان داير وجها يكتب خوش شخصية مبين بس انة شعلية دار وجهها  فتحت عيوني ع وسعهن معقولة  ردت احجي وكال..

-ليش متاخرة

فاتحة حكلي  اريد استوعب اخافن صار يتخيلي هذا الاملح اللگاة بالبستان يو غيرة فركت عيوني احس فصلت عبالي اتخيل بعدني ماحاجية وكال..

ارفد:-لان اول مرة تحضرين راح اسمحلج تدخلين بس ثاني مرة التزمي بالوقت..

دخلت ريم جرتني مامستوعبة الكل انتبهة علية عبالهم انعجبت بية دخيلك ياعلي صدك عود انوب كبل استاذ هسة يو طالب بيها مجال.. كعدت صافنة علية وكل شوية اكرص بروحي بلكت جاي اتحلم لامجاي اتحلم اكول من داومنة اجة ويانة كاشخ
اثاري طلع يداوم هنا...

شخصية رزنة هادئة يشرح بصورة ممتازة ياصدمة عمري  خلصت محاضرتة وانة كلشي مافاهمة خلصتها احجي علية بكلبي دخلت علينة الدكتوره اخذتنا محاضرة انسطرنة سطر كلش تاخرت موبايلي احترك اول ماخلصت نزلت اركض مسطورة بس اريد اوصل لكيت جاسب متانينة اول ما صعدت نمت ميتة تعب كعدت من وصلنا مطيت جسمي ونزلت..

تمشيت مسافة واسمع العياط والصريخ جاي من بيتنا گلبي وگف رجلية نبتن بالكاع دخيلك ياربي...

يتبع..

توقعاتكم وبنضركم شنو تفسير حالة نوف 🥲
لاتسون تتفاعلون. ..

ممنونة لدعواتكم قلبي ❤🫂
انتظروني في بارت جديد..

دمتم بحفظ الله ♥