#ما وراء الأبواب
#الكاتبه : زهراء الهاشمي
بناتي الحلوات لا تنسون التصويت على البارت والتعليق على الفقرات حتى يصعد تفاعل القصه واستمر بالنشر
صِدگ كالوها گادِر بَس عَلينه
شِفتنَه نريد جَيتّك ما تجينه؟
شِفتنَه انحبَك اتحَكمِت بينه ..
نسيت شلون چِنت اويَالگَبلنه ؟
تجينه وتِشتكي كُل مَرّه مِنَه
مسَحنَه دَمعَت عيونَك بدينه
صِدك كالوها كادر بَس عَلينه .
~~~~~~~~~~~~~~~~~~~
هشام : بكيفي اجي شوكت ما يعجبني
حسام : هاي منو
هشام : مرتي
الكل : شنوووووو
سالم راد يهجم على ابو بس سلام لزمة
سلام : سالم بس اهداء خل نفتهم السالفة شنو
هشام : لا سالفة ولا تفتهم هاي مرتي واني جبتها حتى نعيش اني وياها يمكم
سالم : خاف ما تقبل
هشام : اقبل ونص كافي كاعد بالايجارات تعبت انيييي جا المن مخلفكم غير حتى تشيلوني بكبرتي
اباوع على عمتي ما مهته وجاي تاكل شنو معقولة ما تغار على رجلها لازم اكو أنه بالسالفة
حسام : هسه اذكرت مخلفنه وين جنت من جنه صغار وشابعنه ضرب وكتل وجوع هاا حظرة اللواء شنو الفلم
هشام : اني غلطت واعترف بهذا الشي واطلب منكم اسامحوني بالنهاية ابقى ابوكم والاظفر ما يطلع من اللحم
سالم : اكص اصبعي مو بس اقلع الاظفررر اطلع من بيتييييي
ما اهتم وراح كعد على القنفه رجل على رجل سالم صار يشيل روحه ويركعها بالكاع سلام كوه لازمه لا يروح يضرب ابو
هشام : شلونج ناز
رفعت راسها وباوعتلة بنظرت استهزاء
ناز : هه هلا
هو وجه صار ينطي اللوان نزل رجله وضل يكحكح جر كلاص المي جان على الطبله شربه صارت عينه على نجم رفع راسه عليهم
هشام : منو هذا الطفل ؟؟
سالم باوعلي بنظره يعنى اخذي نجم وروحي اني هم اخذت نجم وفلتت للغرفة كعدت نجم على الجربايه وانطيته التلفون
شمس: الزم حـبيبي باوع بهذا ولا تطلع من الغرفة خوش
نجم : اي
شمس: عفيه بالحباب
عفته ورحت طلعت ويا طلعتي حجه عمي
هشام : ههههه صاير تربي بولد العالم ما عرفتك يلنچر
سالم مدنك ولازم راسه حيل نقهرت من كلام ابو وهو سكت ما جاوبه ليا جانت واكفه على صفحه ما انطت ولا رد فعل
مشت تريد تصعد صاح عليها ابوها
هشام : ليا بابا
هيه ولا اهتمت كملت الدرج التفتت عليه يباوع عليها وعيونه مدمعه صفنت همه ليش يكرهون ابوهم هل كد ولا مره سولفلي سالم حتى من جنت اسئل على ابو بسرعه يغير الموضوع لازم اكو شي ضامينة
التفتت اريد اروح اكعد يمهم سالم خزرني خليت ودخلت الغرفتي مبين ميريدني اكعد يمهم بعد احسن رحت كعدت بصف نجم بس صوتهم بعده عالي
تأخر الوقت ونجم نام رحت فرشتله بالكاع شلته نومته وغطيته زين رجعت نمت على فراشي انتظر سالم شوكت يجي بس النوم غلبني ونمت ما ادري بنفسي
فزيت الصبح على صوت باب الكنتور رفعت راسي لكيته واكف يبدل
شمس: صباح الخير
سالم : صباح النور
لبس بسطالة وطلع اني شكو كالب وجهه عليه قابل كلت الابو روح ازوج
كمت غسلت وجهي جريت شالي وطلعت محد موجود شعجب كل مره كلها كاعده وعمتي اول وحده الكاها بالمطبخ
رحت الغرفتها دكيت الباب اجاني صوتها
ناز : ادخل يمه
فتحت الباب ودخلت جانت كاعده على كرسي الصلاة
شمس: صباح الخير عمه
ناز : صباح النور يمه
شمس: شنو الولد ما كاعدين اليوم ؟؟
ناز : كعدو ودخلو عليه صبحو وراحو كلمن الشغلة
شمس: يا لعد ما تريكوو
ناز : هناك يالكلون يمه
شمس: تمام اكوم اسويلج ريوك شنو تردين تتريكين
ناز : ما اريد يمه عاشت ايدج راح ارجع انام
اباوعلها كاعده وتسبح بس مبين عليها شكد مقهورة كمت وكفت بصفها بس متردده شحجي ما اعرف اواسي احد شغلتي بس اكابله وابجي تقربة مديت ايدي على جتفها
شمس: عمه لا تنقهرين اعرف الصار البارحه صعب عليج زوجج وعشرت عمر ويا وبينكم اولاد بس اني متأكده هاي السعلوه هيه ركضت ورا وفرت عقله وخلته يزوجها نسوان ما يكعدن راحه
ناز : ما يهمني ازوج اطلك سافر اهم شي عندي يبتعد عن جهالي البارحه سوده عليه فرفحة روحهم بسببه حسبي الله ونعم الوكيل بي من الصغر لا حواهم ولا صار أب بي خير الهم
شمس: بس الله عوضهم بيج صرتيلهم أم و أب بوقت واحد طلعتي زلم الكل يحلف براسهم ويهابهم
ناز : بس همه طلعت بيهم من هاي الدنيا وهل تشوفين كدام عينج ليا وتمرضت وحالتها يوم عن يوم جاي تسوء
وهذا حسام ليل نهار يفتر ويدور عليها ومن يجي هنا يضحك ويشاقه وادري بكلبه ملچوم على محبوبته عبالهم ما ادري بيهم يضمون عليه واني حافظتهم واحد واحد
وهذا سالم التشوفي صلب هذا اكثر واحد بولدي شبع ظيم يابو ظيم يلا وصل الهل مكان وكون نفسه وعيش اخوانه واخته وخلاهم يوصلون لو ما سالم محد من ولدي كمل دراسه ونجح بحياته مشوفين ابو متخبل منه
شمس: الله كريم عمه لا تنقهرين وتضوجين نفسج لا يصعد ضغطج
ناز : الله كريم يمه الله كريم
شمس : ان شاء الله الله يحفظهم الج وتشوفين احفادهم وتزوجيهم بيدج واحد واحد
ناز : ههههه الله يجبر بخاطرج يمه
شمس: حبيبتي عمه والعباس احبنج
ناز : هههههه تعلمتي من حسام
شمس: النهار كله يمشي ويصيح احبنج والعباس منو ما ندري
ناز : هذا هم حظه حظ سوده عليه
شمس : لا تخافين عليهم زلم يطلعون حقهم من حلك السبع ما يستسلمون بسهولة هذول ولد ناز بعد
ناز : ان شاء الله يا يمه
شمس: يلا اروح اسوي ريوك وناكل هنا اني وياج ما اسمعلج صوت
ناز : ميخالف بس اصعدي كعدي ليا ما بيه حيل اصعد الها
شمس: بعيني هسه اصعد اصيحها
طلعت صار كبالي سالم داخل من برا
شمس: شو رجعت
سالم : نسيت اوراق مهمة اجيت اخذها امي شلونها ؟؟
شمس: الحمد لله زينه وهسه رايحه اكعد ليا حتى نتريك
سالم : عينج عليها لا تخليها تطلع من غرفتها هل يومين
شمس: بعيني
راح للغرفة واني صعدت فوك
دخلت للغرفة بلا ما ادك الباب لكيتها
نايمة على الجربايه ومشغله بجهازها
شلون أصبر اعلى الاه
واترك نـحــيبي
بيـدي ادفنـة بــالگاع
جـثة حــــــبيبي
لتطن يطيب جرح الحبيب
وأتـرك نــحيبي
والوجرت بحشاي نار المُصيبة
شحال اليصد ويشوف
مصرع حـــبيبة
تقربة منها لكيتها نايمه وحاضنه البدلة العسكرية مال أسر ودمعتها على خدها مسحتها واني كلبي معصور عليها تتصرف عادي ويانه وهيه كاعده تبجي وحدها بالغرفة
كل فكري عبالي نست وتقبلت الوضع بس طلعت غلطانه من سابع المستحيلات ليا تنسى أسر جريت الجهاز طفيتها وخليت وطلعت بس الغصة لازكة بالعومي نزلت صار كبالي سالم يدور بالاوراق شال راسه من شاف وجهي معبس رفع حاجبه
سالم : شبيج شمس
ما تحملت بجيت بسرعه
سالم : شكووووووو دحجي ليا بيها شي
شمس : صعدت اكعد ليا لكيتها نايمه ومشغله لطمية وحاضنه بدلة أسر سالم احسها ما راح تكدر تنسى موت أسر
جر حسره وفرك وجهه
سالم : هو اني لليوم ما ناسي ولا رايح من بالي تردينها هيه تنسى وتكمل حياتها عادي
شمس: شلون لعد تبقى هيج طول عمرها
سالم : الزمن كفيل ينسيها يلا ابوية اني رايح وانتي عينج عليها وعلى امي نجم ما تعوفي كدام احد تضميي بروحج سمعتي
شمس: اي اي بعيني
سالم : يلا ثيمالاة ما اتأخر اني العصر يمكم
شمس : ان شاء الله الله وياك صدك سالم
سالم : ها بنيتي
شمس: احم اسفه على سؤال بس وينهم ؟؟
جر حسره وحجه
سالم : بغرفة حسام نايم راح يبقى هل فترا هنا وحسام راح بغرفة سلام شمس لا تتقربين يمهم ولا تحجين وياهم افتهمتي بابا
شمس: اي صار معلي بيهم روح أنتَ لا تتأخر الله وياك
جر راسي باس كصتي وطلع رحت سويت الريوك واخذته الغرفة عمتي حطيت الصينيه بالكاع
شمس: يلا عيني ام الزوز تعاي تريكي
ناز : نزول عليج ههههه
شمس: فدوووه الهل ضحكة الحلوة عيني
ناز : حبيبتي يمه لعد اخوج وين
شمس: هسه رايحه اكعده واجي
بعدني اريد اكوم ودخل نجم يفرك بعينه تلكته عمتي وفتحت ايدها
ناز : يمه هلا هلا والبيت منك ما خلى
هو ضحك وراح كعد بحضنها
ناز : صباح الخير بيبي
نجم : ثباح الخير حبيتي ( صباح الخير حبيبتي )
ناز : فدوووه الهل لسان
شمس : ها واني ما الي بوسه
كام من عمتي باسني وكعد بيناتنه صبيت جاي العمتي وكعدنه ناكل همزين نست شوي وكعدت تشاقه وتضحك ويا نجم عفتهم وطلعت
نظفت البيت على السريع ورجعت للمطبخ اسوي بالغده واكفة احمس بالجدر ودخلت السعلوة
غفران : صباح الخير
التفتت عليها لابسه ملابس نوم فاضحه وطالعة تفتر بالبيت يااا هاي تحجي صدك
شمس : شنو هذا لبسج ؟؟
غفران : ليش شبي ؟؟
هزيت ايدي وعفتها رجعت احمس بالجدر هيه راحت كعدت على الميز تفرك براسها
غفران : سويلي ريوك ميته جوع
شمس : حبي هذا الطباخ وهاي الثلاجه طلعي وسوي شبيج مكرمه واسويلج
غفران : اوووع شنو هذا الاسلوب اروح اكول الهشام بله يقبل بهذا الكلام
عافتني وطلعت هزيت ايدي امداج هجامة البيوت
كملت حمس الجدر وخليت مي ونصيته
رحت اشوف عمتي ونجم جانو كاعدين يباوعون على التلفزيون عفتهم وطلعت ويا طلعتي نزلت ليا تفرك بعيونها
شمس : صباح العسل يا حلوو
ليا : صباح النور شمس بندول بسرعه راسي راح ينفجر ما اعرف شبي
شمس: ياا ليش خاف لان سهرانه
ليا : ما اعرف حبابه بندول اريد
شمس: تعاي اكلي لكمة حتى اطيج ما يصير هيج تاخذيها وانتي مماكلة
هزت راسها ورحنه للمطبخ كعدت على الميز رحت سويت الها لفة جبن وكلاص جاي
شمس: هاج اكلي هاي بين ما اطلعلج حبايه
ليا : عاشت ايدج
رحت للكاونتر هنا بحر مخلي كلشي اسعافات منزلية علاجات شرابات ما مبقي شي ما مخلي مستشفى صغيره داخل الكاونتر طلعت بندول اخذت كلاص مي وديته الها وكعدت بصفها
ليا : اكلج البارحه شصار وراي من صعدت ؟؟
شمس : ما ادري والله لان وراج من صعدتي سالم خزرني حتى ادخل للغرفة واني افلت عدل وكبل للفراش
ليا : يعنى راحو لو بقو ؟؟
شمس: لا بقو سالم كال راح يبقون هل فترا هنا
ليا : وين نامو ؟؟
اريد اجاوبها ودخل ابوها أبدلتة العسكرية و ورا مرته تمشي راد يحجي من شاف ليا بدل وابتسم
هشام : صباح الخير بابا ليا
ليا التفتت عليه باوعتلة بنظرت استهزاء هو ومرته ورجعت تاكل حتى ما جاوبته هو من شافها هيج التفت عليه يأشر
هشام : كولي لج سوي ريوك الغفران
استحيت من حجه هيج كمت بسرعه بس ليا خزرتني وأشرت ارجع اكعد اني هم مثل الحبابه رجعت كعدت هاي يروح اخوها تجي هيه تخزر بمكانه نوب عيونهم كبار من يخزرون يصيرون يخوفون
التفتت على ابوها تحجي وتأشر
ليا : عفواً ؟؟؟ مسمعت شسوي
هشام : ريوك الغفران
ليا : منو نعلان ؟؟
هشام : مرتي
غفران : انت شنو ما جاي تسمع دكول عليه نعلان
هشام : ما جانت تعرف اسمج
ليا : اسمعي لج نعلان مو جايه اطبقين براسي مرت الابو القاسية وكل شوي ناطة جنج كنغر
هذن كلهن مطكطكات يم رجليه احترمي نفسج احسلج وجري عدل ترا عقلي طكه ونص الزمج واحركج واحسب الله ما خلقج وما يهمني لا جبير ولا صغير
غفران : ما تجاوب شكو ساكتتت متسمع بنتك شتحجي عليه
هشام : سوي ريوك النفسج واسكتي اني طالع للدوام
عافها وطلع هيه خلت وراحت للغرفة
شمس: شلون تحجين ويا هيج ما خفتي يضربج
ليا : ميسويها جبان يخاف من سالم
شمس: ليش يخاف من سالم
ليا : ما يكدر يطخني سالم حالف اذا ضربني يلعب بي جولة
شمس: يااا
ليا : ااااييي وهسه اني طالعة بشغلة واريد فلوس
شمس: وين رايحه ؟؟
ليا : للنجف احفر كبر النعلان .. شمس عدج فلوس لو اروح
شمس: عابتلج ما تتحاجين اوكفي هسه اجيبلج واجي
ليا : في انتظارج حب
راحت واني كملت لفتي وشربت الحباية شوي واجتني بيدها فلوس
شمس: هاج بس هذن مجمعتهن اخذيهن كلهن
اخذتهن منها احسبهن طلعن خمسمية وخمسين
ليا : بس يرجع سالم ارجعهن الج
شمس: نجبي شنو بيناتنه فلوس اخذيهن بالعافيه
ليا : احلى مرت اخ حيه ابوسجججج
شمس: ههههه حماتي العكربة
ضحكنه عفتها وصعدت بدلت ملابسي بسرعه وجريت جنطتي ونزلت رحت الغرفة امي جانت كاعده هيه ونجم
ليا : صباح الخير مامي
ناز : صباح النور يمه ها وين رايحه ؟؟
ليا : للسوك تردين اجيبلج شي وياي
ناز : وحدج ؟؟ انتظري يجي واحد من الولد ياخذج
ليا : شنو كدامج جاهله يا يمه بسرعه اروح واجي يا حبيبتي يلا ادعيلي
ناز : لا تتأخرين ليا بسرعه تعاي سالم اذا عرف رايحه وحدج والله يحرك الدنيا على راسج
ليا : نص ساعه واجي ما أتأخر
رحت بوستها وطلعت بسرعه اجرت تكسي ورحت للعلوة نزلت اخذت مسواك زين اجا الولد صعدهن بالسياره صعدت وكتله يطلع للمنطقة الكاعده بيها حُذام
قبل لا اوصل للمنطقه طلعت العباية والنقاب لبستهن والولد يباوع علية من الجامة خزرته دار وجهه هسه اجيبه ابوكسي افلش وجهه
وصلني الراس الفرع وما قبل يدخل لان طين
ليا : يابه هسه خايف عليها ادري لكزز لوما هيه سايبه مسكربه
-خويه البارحه غاسلها ما اكدر ادخلها مشوفين الفرع كله طين
ليا : ددخلها واطيك عشرين يلا يا خويه وين اكدر انزل والمسواك وياي
هز راسه ودخل للفرع اي سمعت بيها فلوس شلون ما ادخلها خرب يومكم شكد تحبون الفلوس نزلت واحتاريت يا باب بيتهم
طاح حظج حُذام فتحت الجنطة ادور على الجهاز ماكو حلوو خاف جانت عايزة هسه كملت ناسيه التلفون بالبيت خرب بعمامي
صفنت على الفرع وصرت اذكر من دزتلي العنوان وحسب وصفها هذا الفرع صح وهذا البيت السابع ديلا هيه فاتحه وخسرانه رحت دكيته الباب شوي وطلعت مره جبيره بالعمر
ليا : السلام عليكم
-وعليكم السلام
ليا : خالة هذا بيت كوثر
-يا كوثر يمه
صفنت وبهت وجهي خرب بيج حُذام بس لا مطيتني العنوان غلط فاهيه كلشي اتوقع منج
ليا : خالة كوثر صديقتي هنا بيتهم بس تيهت يا بيت اسفه حبيبتي ارجو المعذرة
-لا يمه عادي بس اوكفي اسئلج مرت ابني هيه من هاي المنطقه ويمكن تعرفها
ليا : اي خالة فدوه العينج
صاحت على مرت ابنها اجتي مرة مدعبله اسمنها ما شاء الله جنها فيل مدهرب استغفر الله هسه واكفه واتنمر شكووو
-ها عمه
-يمه البنيه تسئل على وحده صديقتها اسمها كوثر تعرفين وحده بالمنطقه اسمها كوثر
-قصدج كوثر اليتيمه ؟؟
هزيت راسي واني ما ادري هيه لو لا
ليا : اي حبيبتي هيه تندلين بيتهم وين ؟
-اي عيني هذا بيتهم المقابيلنه
التفتت صدك اذكرت هيه كالت الباب على اليسرى ثول حتى ثول الثولني تشكرت منهن ورحت دكيت الباب طلع ولد
ليا : كوثر هنا
-منوو انتي
ليا : شيب اهلك روح ادخل كول الكوثر اجت ليا وتعال نزل الغراض ويا الرجال
هز راسه ودخل هزيت ايدي مبين فاهي دخلت ورا وصل للباب دفعته ودخلت للصالة لكيت حُذام كاعده يم بنيه وتلف كبه شو هاي البصفها اطفري وارفعي السجينه بوجهي ما اهتميت الها
اجتني حُذام تركض حضنتها ولميتها بحضني صارت تبجي بصوت عالي عرفتها تعبانه
بقيت يمها للعصر يلا طلعت منهم بسرعه
اخذت تكسي ورجعت للبيت نزعت النقاب والعباية بالسيارة ضميتهن بالجنطه
بنص الطريق وشحط ابو التكسي وكفت كدامنه سيارة سوده مضلله نزلو منها اثنين ملثمين واجو على السيارة الاني بيها
واحد منهم فتح الباب من جهتي
-انتي ليا هشام ؟؟
******
حُذام
دخل شوي واجا هو وكوثر
كوثر بس شافتني فتحت عيونها
كوثر : حُذام
هزيت راسي
حُذام : اي
كوثر : اهلا وسهلاً تعاي حبيبتي ادخلوو جوا تفضلو
دخلنه جوا جان اكو كراج صغير وغرفة صغيرة كعدنه بيها راحت شوي واجت جايبة مي وجاي
كوثر : تفضلي حبيبتي
حُذام : عوفي المي هسه كوثر اريد احجي وياج بموضوع مهم
باوعتلي باستغراب
كوثر : كولي حُذام صاير شي ؟؟
باوعت كلها كاعدة حتى اخوانها هيه افتهمت ما اريد احجي كدامهم
كوثر : كومي بالغرفة نحجي .. ميسون اخذي رنا والعبو بالالعاب يلا حبيبتي وانتي حنين اخذي حوراء وروحن اغسلن الماعين يلا يلا وانتو كلمن يرجع الدراستة يلا بسرعة شوي واجي اراجع الكم الما قاري بالنعال على راسه
اخذتني ورحنه للغرفة جانت غرفة صغيرة مفروشة وبيها كنتور اربع بيبان وعلى صفحه بوفية وعليها فراشات كعدت وهيه اجت كعدت كبالي
حُذام : كوثر انتي كد الثقة واحد يحجيلج كلشي ؟؟
كوثر : عد يمناج كولي هنا نحجي وهنا يندفن الحجي
لزمت ايدها وبجيت
حُذام : راح اسولفلج كلشي من البداية للنهاية بس اوعديني توكفين وياي وما تعوفيني
كوثر : خوفتيني حُذام شكو احجي
مسحت دموعي وصرت اسولف الها كلشي من حادثة اغتص..ابي الموت ابوي وامي والخالي ومرتة الزواجي من ابن اخوها حتى حسام وشلون حبيته سولفة كلشي ما ضميت عليها شي اول مره بحياتي اسولف حياتي كلها الشخص واثق بي
جانت ويا كل موقف تبجي وياي واطبطب على ايدي ختمة الحديث بسالفة انهزامي ضحكت وجرتني الحضنها
كوثر : اعظم بنية شفتها بحياتي انتيييي
حُذام : راح تقبلين اكعد وياج بالبيت والله ادفع نص الايجار ونص الكهرباء وكلشي وياج بالنص ادفعه بس خليني اكعد يمج
كوثر : نجبي احنا منا وجاي خوات وما بين الاخوات هيج سوالف افتهمتي بس اكو شغلات لازم نحلها
حُذام : شنو هية ؟؟
كوثر : خواتج حرام يتركن الدراسه وامتحانات نص السنه قربة
حُذام : لا كوثر اخاف خالي يعرف يداومن ويجي ياخذهن
كوثر : دنجبي همه هسه معطلين بعد أسبوع للامتحانات رنا اخذها ويا ميسون من تمتحن وما اخلي احد يشوف وجهه لا تخافين اغطي
وحوراء ويا حنين هيه اول متوسط مو
حُذام : اي اول متوسط
كوثر : هاي هيه ياخذهن علي ويجيبهن ومنا الحد ما يخلصون امتحانات انقليهم غير مدارس
حُذام : ها يقبلون
كوثر : طبعاً وغصباً ما عليهم يلا هسه كومي افرغلج مكان بالكنتور خلي غراضج بي
حُذام : لا لا ما يحتاج
كوثر : شوفي حُذام اذا تبقين هيج تصرفين والله ازعل واطردج ترررا اني كتلج
حُذام : هههه
كوثر : اي هيج اضحكي شبيج يحضي .. تعاي خلي غراضج هنا بهذا الكنتور فارغ
حُذام : عاشت ايدج وممنونه منج ما اعرف شلون اشكرج
كوثر : نجبي وسكتي صدك وين راح تخلين الذهب ؟؟
حُذام : ما اعرف بس لازم ابيعه ما اكدر اخلي هيج
كوثر : كومي البسي وتعاي اطيج نقاب البسي نروح نبيعه اعرف صايغ بالسوك نبيعة اله
حُذام : الله ويدج
كوثر : كومي لعد
راحت جابتلي عبايه ونقاب لبستهن ما مبين مني شي
وطلعت علبة الذهب خليتها بجنطة كوثر
كوثر : ايدي طاحت جم كيلو هذا
حُذام : شمدريني اذا هيه تجيب وتشتري
كوثر : حييل خليها هسه ادكمز براحتها السعلوة
حُذام : ههههههه هاي اذا ما نجلطت
رفعة ايدها تدعي
كوثر : نذر عليه اذا نجلطت اهلهل بنص المستشفى
حُذام : شلون نذر عاوي دمشي نبيعه ونخلص منه
كوثر : امشي يلا
قبل لا نطلع وكفت توصي اخوها على البيت والبنات رحت سحبت حوراء على صفحه
حُذام : هسه اجي ما أتأخر رايحه للسوك رنا ما تفاركيها افتهمتي واكعدي ادرسي ويا حنين هم صف اول متوسط حتى ترحين تمتحنين
حوراء: صدك حُذام امتحن ما ابطل
حُذام : لا حبيبتي ما تبطلين تمتحنين ورنا هم تمتحن صيري سباعية وعينج على اختج ما أتأخر اني
حوراء: لا لا راح اخليها يمي واكعد اقريها
حُذام : عفيه عليج
بستها ورحنه طلعنه
كوثر : تكدرين تمشين لو ناخذ تكسي
حُذام : هو السوك بعيد لو قريب
كوثر : بعيد شوي منا
حُذام : اخذي تكسي واني ادفع الكروة
كوثر : دكلي خرا
لصمتني على حلكي ومشت اباوع عليها طويله ولابسه عبايتها وطايره بيها كوثر حيل حيل حلوه بيضه وشعرها برتقالي ما اعرف احمر لونه غريب عجيب حتى حواجبها نفس اللون
اخوانها مو مثلها انتبهت عليهم شكلهم حلو عادين بس هيه ليش هيج جانت ادور على تكسي رحت وكفت يمها
حُذام : كوثر حواجبج ليش هيج لونهن ؟؟
كوثر : من الله هيج
حُذام : ياا صدك
كوثر : اي والله اني طالعة على بيبية ابوي صهبة
حُذام : فدوووه يعنى هذا للون شعرج طبيعي ؟؟
كوثر : للاسف اي طبيعي
حُذام : راح احجي شي بس لا تصيرين عصبيه
كوثر : غردي
حُذام : انتي حيل حلوه بس ليش هامله نفسج هيج حتى حواجبج ما حافتهن ؟؟
كوثر : خلصت حياتي اركض وراه العيشه واشتغل منا ومنا وشكال الايجار وشكال ابو المولده منيلي وكت اعتني بجهرتي ما دكليلي
حُذام : حبيبتي الله يساعدج
كوثر : ويساعدج وهسه اسكتي اجا تكسي
سكتت وهيه راحت أجرت تكسي صعدنه وصلنه للسوك الولد راد الفين وهيه لزكة على الالف
كوثر : ترا كلها خمس دقايق عليمن الفين وين ماخذني العرعر
-خويه غير هاي كروتها
كوثر : هذا الف تريد تريد ما تريد جيبه
جريت الفين من جزداني وانطيتهن للرجال
حُذام : تفضل خوية .. امشييي كوثر
جريتها والرجال راح دفعتني وتخصرت
كوثر : عود هاي شيسموها
حُذام : كوثر امشي نبيع الذهب بعدين اكتليني موتيني احركيني سوي اليعجبج
كوثر : خوش لعد امشي نرجع لو لا اذا ما خبزتج خبز العباس ما يطلع اسمي كوثر
دفعتني ومشت رحت اركض وراها ما شاء الله ما تمشي تركض ركض وصلنه المكان بس محلات ذهب
حُذام : ها وصلنه
كوثر : اي هذاك المحل تعاي
رحنه دفعت الباب ودخلت جان موجود اثنين ولد ونسوان اربعه سلمت عليهم وراحت كعدت
كوثر : السلام عليكم
الكل : وعليكم السلام
حُذام : شو كعدتي ؟؟
كوثر : جا شتردين ابقى واكفه تعاي اكعدي بين ميطلعن هذن
رحت كعدت بصفها وهذن طولن جايات يشترن ذهب عرس يمكن لان اخذن تخم كامل بقن بالربع ساعه يلا طلع بس راحن كوثر كامت للولد لحكتها وكفت بصفها
-وين هل غيبه يابه ست كوثر صرنه ما نشوفج
كوثر : اشغال شسوي
-شركاتج هواي لازم
كوثر : نجب وتعال وزنلي هذن
-تُمرين أمر
مبين علاقتهم قوية لان دكله نجب والفطير يضحك طلعت الصندوك فتحته وهذا فتح عيونه على وسعهن صاحبه من شاف رد فعله اجا يشوف شكو ونصدم مثل الولد
كوثر : قل اعوذ برب الفلق الغسل شبيكم صلو على نبي
-اللهم صلى على محمد وال محمد ولج كوثر هذا منين الذهب
كوثر : لا تخاف مو ذهبي هذا ذهب صديقتي ورادت تبيعه واني جبتها تبيعه هنا لان اثق بيكم
-زين هذا جم كيلو
حُذام : ما اعرف بس هواي
كوثر : وزنهن ونشوف
صار يشيل ويوزن ويحسب
-كوثر هذن يطلع سعرهن كلهن كلهن 22 مليون وخمسه وتسعين الف
فتحت حلكي من كال المبلغ
حُذام : شنووو
-خوية 22 مليون وخمسه وتسعين
كوثر : فلك صابج ايمان
حُذام : فلك صابني انييي النايمه على وجهي هاي منين جابت هذن الفلوس كلهن
-هسه شنو تبيعون لو لا
كوثر : ها نبيع
حُذام : اي اي بيعيهن
حجت ويا كوثر نبيع هو اخذ الذهب وراح دخل جوا شوي وطلع بيده ضبه مال فلوس عمري كله ما شايفتها خلاهن بجيس وسلمهن الكوثر
كوثر شالتهن بسرعه ضمتهن بجنطتها وحطتها على كلبها
كوثر : مشكرين يباشا
-بالخدمة ههههه
جرت ايدي وطلعنه
كوثر : هسه بوجهنه للبيت عدل وكبل
حُذام : عود كلت اشتري للبنات شوي ملابس لان ما عدهن
كوثر : اخاف لا يبوكوهن ولج هسه لازمتهن وايدي على كلبي
حُذام : حبابه ما نتأخر بسرعه نرجع
كوثر : دمشي فضيني
طفرت بستها من خدها
حُذام : فديتججج
كوثر : دمشي فضحتينه الله يفضحج
جرتني من ايدي ومشينه فتنه من محل تلفونات دغيت كوثر التفتت عليه
كوثر : ها
حُذام : اريد تلفون
كوثر : شسوين بقنادر
حُذام : بنفسي والله جان عندي واحد واخذته اسليمة الغوادر حبابه خل اخذ واحد
كوثر : الصبر منك ياربي امشي فضيني
دخلنه واني فرحانه عبالك طفله ودخلوها للالعاب صارت تحجي ويا الولد وتعامل على تلفون كلكسي اخر شي تعب الرجال منها
-خويه اخذي بيش ما تردين
كوثر : اي هيج من البدايه اني ما شايله بس ميتين تفضل الزم ورتبلي الجهاز على ذوقك كفر جامة وسيم كارت اسيا
-لا ما اكدر هيج هواي
كوثر : هو شنو ما اكدر هو كفر بالف وجامه بخمسميه وسيم كارت بالفين دمشيها يا خويه تأخرت على البيت عايفة سبع ايتامه منتظريني
الجذابه منين سبع ايتام لزمة نفسي ما اضحك
الرجال هز راسه جزعان منها وراح جاب الغراض وطلع سيم كارت سجله بأسم كوثر
فعل السيم كارت وخلا بالجهاز ولزك الجامه والكفر وانطا الكوثر اتشكرنه من عنده وطلعنه من المحل واني فرحانه
حُذام : ليش ما اطيتي الفلوس شكد تتعاملين ما اتعبين
كوثر : مو بيدي تعودت اعامل بعدين ضمي شبيج شايلته وتفترين جنج جاهل
حُذام : خو انتي بس ترزلين
كوثر : دضمي وامشي يلا تأخرنه وهذولاك وحدهم هسه ولا واحد قاري ادري بيهم ولد الاوادم
راحت تمشي سريع وادردم واني وراها اركض دخلتني بالة ملابس بنات صارت تشيل وتشمر عليه اختار والله اختاريت الرنا وحوراء وحتى حنين وميسون جبت الهن لان نفس قياس خواتي حتى ملابس مدرسه اخذت الهن
دخلنه محل احذيه هم جبت الهم واشتريت النفسي امشي وفرحانه راحه نفسيه من تسوك وتصرف فلوس حسبي الله ونعم الوكيل بيج ايمان جنتي حارمتني من كلشي
غوربة الدنيا وكوثر صارت اصيح عاد راحت تأجر تكسي واني واكفة انتظرها التفتت واشوف مطعم مفتح طلع رجال شايل صينيه وفات من يمي ريحتها وصلت الخشمي مبين تمن ودجاج شوي اشتهيتها
اجت كوثر تاخذ بالغراض وتخلي بالسيارة دغيتها ومديت ايد
حُذام : كوثر اطيني خمسه وعشرين
رفعت راسها وخزرتني
كوثر : شسوين بيها
حُذام : شبيج خوفتيني اريد اجيب اكل من المطعم صار شكد ماماكلة من برا واشتهيت التمن والدجاجه
كوثر : اني اسويلج بالبيت خل يولي امشي
حُذام : معلييي كوثر اريد من المطعم حبابة حبابة
كوثر : الصبرررر منك اللهي جانت عايزة كملت من شمرت حُذام علية
دنكت مقهورة من كلامها عفتها ورحت اريد اصعد بالسيارة جرتني قبل لا اصعد
كوثر : بس لا زعلتي والله اشاقه وياج
حُذام : اي اعرف بس كلامج صح اني اجيت وشمرت نفسي عليج وزيدت الحمل عليج اسفه
كوثر : نجبي حُذام وروح اهلي مو هذا قصدي والعباس ولج انتي صديقتي واختي من يوم الشفتج ومعزتج صارت مثل معززت خواتي عندي الله شاهد امشي اشتريلج اكل من المطعم وشرط على حسابي
ابتسمت بوجه اعرف مو قصدها من حجت بس اني مو بيدي صايره انقهر من اقل كلمة
حُذام : لا من يمي
كوثر : ابد امشي من يمج انتي ادفعين
حُذام : ههههههه
-خويه يلا اصعدن لا
كوثر : اي نصعد انطي مجال بس اجيب اكل واجي وازيدك الف على كروة
الرجال سكت وهيه مشت للمطعم رحت وراها دخلنه المطم هادئ وحلو نظيف رحنه وكفنه يم الولد
كوثر : السلام عليكم
-وعليكم السلام تفضلو
التفتت عليه كوثر
كوثر : اكلج شتردين انتي صدك
حُذام : همه شعدهم
-عدنه كلشي وهذا المنيو تفضلي شوفي
اخذت المنيو وصرت اقراء اخيراً شفت تمن بصينيه وعليه دجاجه سعرها خمسه وعشرين زين رخيصه
حُذام : اريد صينيتين دجاج وتمن ام الخمسه وعشرين
-تمام وبعد
حُذام : بس هذن شكراً
-بالخدمة
كوثر : يعنى شنو اطلع بس خمسه وعشرين ؟؟
حُذام : لا حبي خمسين طلبت صينيتين
كوثر : نرجع للبيت لو ما نرجع
ضحكت على شكلها وهيه تتحلفلي شوي واجا الولد جايب الطلب شلت اني صينيه وكوثر صينيه وطلعنه للسياره نمشي
كوثر : ريحتها زرفة خشمي
حُذام : اني هم اذكر ايمان جانت تجيب وتاكل بس هيه وجهالها واني وخواتي تطينه تمن وروبه
كوثر : سوده عليه احتركت روحج ايمان
حُذام : خل تولي امشي يلا
صعدنه بالسيارة ورجعنه للبيت دخلنه وهو جاي يأذن
حوراء: الله يساعدجن
حنين : الله يساعدجن هاجن مي
بسطت كوثر بالكاع ومدت رجليها جنها عجوز
كوثر : اخ يمه رجليه راحن
تفرك بيهن وتحجي نوب رفعة ايديها تدعي
كوثر : يمن كون عساج برجل اعور يحُذام كون هيج يكومج بجلاق وينومج بدفرة تكطع نفسج ونفس مرت خالج
حُذام : رحم الله والديج
كوثر : نجبي
التفتت على حوراء جانت بيدها دولكة المي
كوثر : اطيني واترر
حوراء : شنو
كوثر : خايبه ماااي امدا المدرسه الفتج حتى نكليزي ما تعرفين
حوراء صافنه عليها اجت حنين تضحك اخذت منها الدولكة وانطتها الكوثر
حنين : تعودن اشوفنها هيج كوثر عجوز البيت
كوثر : عجزن اعضامج واعضام نسوان عمامج
حُذام : لا انتي مصيبه .. حنين حبيبتي جيبي السفره خل ناكل برد الاكل
راحت جابت السفره واني كعدت اسفط بالاكل
حُذام : يلا تعالو
احمد : الله هاي دجاجة
كوثر : لا مطي احمد بلا استغباء اكل واسكت
خطيه الولد كعد بصفها وسكت ما تنطي مجال كل شوي مفشله واحد حتى اخوانها تفشلهم بس مبين متعودين عليها
كعدنه ناكل ساكتين بس اخوها علي ما كعد ويانه شالت راسها تباوعلة
كوثر : عيني عُدي صدام ما تجي تاكل
علي : هههه الف عافية ما اشتهي
كوثر : طبك حريشي لا تاكل
غمته والتفتت تاكل اباوعلها جرت ماعون خلت تمن وفوك التمن خلت فخذ عرفت الاخوها شكد حنيه بس السانها عام عليها يرش رش
خلصنه اكل كمت غسلت الصواني وشمرت السفرة بالزبل مسحت الطباخ والكاع بسرعه صح صبابه والمطبخ صغير بس مرتب
كوثر : شوف ضيمي تمسح بالصب عوفي وتعاي لا تتمرضين ما بيه حيل مستشفيات
حُذام : كملت بس اعصر الوصله
عصرتها وخليتها على صفحه غسلت ايدي وطلعت وراها رحنه للغرفة جانت فارشه منادر هواي
كوثر : هنا أنام كلنه وبالصالة علي واحمد
حُذام : لا لا اني وخواتي انام بالصالة وانتو نامو بمكانكم
كوثر : اكلي نعال وتعاي اكعدي هنا
سكتت ورحت كعدت هيه راحت فتحت الكنتور وطلعت جنطتها اجت كعدت كبالي فتحت الجنطه وطلعت الفلوس خلتهن بحضني
حُذام : شنو هاي
كوثر : ابوي خليته بحضنج
حُذام : يا الله يرحمه
كوثر : حُذام عقلج افتحي زين مو وكت غبائج وفهاوتج انتي هسه مسؤولة على اثنين بنات مريضات ولازم توفرين كلشي الهم
وتتعلمين شلون تحميهن من خالج ومرته ابوس عقلج المحجر لا تصيرين غبيه صيري فطنه الكفي الشغلة وهيه طايرة هذا الزمن اغبر الفقير ينوكل والكلبه طيب ينداس بالرجلين
حُذام : ان شاء الله منا وجاي راح اتعلم واعتمد على نفسي
كوثر : اي هسه عجبتيني .. هذن فلوسج وشوفي انتي شسوين بيهن
حُذام : انتي شكد ادفعين ايجار هذا البيت
كوثر : ليش ؟؟
حُذام : راح احجي شغله بس الله عليج لا اصيحين
كوثر : غردي
حُذام : ما بقى شي على امتحانات نصف السنه وانتي كلتي بس يخلصن البنات مدرسه انقلهن غير مدرسه حتى خالي ما يعرف شي عليهن صح ؟
كوثر : صح
حُذام : اني فكرت بيها زين كلت ليش ما ننتقل كلنه غير منطقه وندفع ايجار سنه ليكدام ونبقى كاعدين بالبيت مرتاحين وبالفلوس الباقيه افتح دكان اطلعه من البيت ونسترزق عليه شكلتي ؟؟
صفنت بوجهي تفكر
كوثر : شوفي هيه فكرتج حلوه بس اني شكو رايحه وياج خو روحي انتي وخواتج وعيشن بالبيت وشوفي حياتج
حُذام : اجذب عليج اذا اكلج اكدر اعيش وانتي مو وياي كوثر انتي افهم مني واقوى تكدرين اديرين كلشي مثل اليوم الذهب شلون بعتي وتعاملين وتحجين اني لو بمكانج ياخذون الذهب مني بالف ونص
كوثر : فاهيه تسويها
حُذام : حبابه كوثر وافقي خل نبلش بدايه حلوه وصفحه جديده فدوه فدوه وافقي الله عليج ما تعبتي من هاي المنطقه القديمه والبيت هذا خل نفرح ونتونس ولو مرة وحده بحياتنه كافي اهلنه راحو وعافونه بالظيم
كوثر : بس هاي فلوسج ما اكدر
حُذام : نشارك كلشي نتشارك ونشتغل انتي بس خلي ايدج بأيدي
كوثر : خل افكر هسه عوفيني وروحي صيحي البنات يجن ينامن يلا
حُذام : ماشي فكري زين
عفتها ورحت صحت البنات ينام والولد نامو بمكانهم مشت الايام واني مرتاحه بيت كوثر بلشت الامتحانات وخطيه هية تاخذهم وتجيبهم
اليوم اجت ليا على بالي كلت اتصل عليها واطمن رحت ركض الكوثر جانت كاعده تلف كبة
حُذام : سويلي فيسو
كوثر : شنوو
حُذام : هذا البرنامج التخابرون من عنده شبيج عليى حرف ف
كوثر : اسمه فيس بوك يالحولي
حُذام : اي سويلي من هذا
كوثر : شسوين بي ؟؟
حُذام : اريد اراسل ليا مشتاقتلها
كوثر : خاف تبلغ عليج ولج ؟؟
حُذام : تفديني بروحها لا تخافين منها اخت زلم ما تغدر
كوثر : تعاي لعد
صارت تعلمني شسوي واني اطبق مثل مدكول الحد ما صار الحساب جان وهمي رحت ابحث على اسمها حافظته دخلت على صفحتها جانت مخلية صورتها هيه وأسر الله يرحمه
دخلت كتبت الها
حُذام : هلو ليا شلونج
ورا نص ساعة جاوبت حيل فرحت من حجيت
وياها وكالت راح اجيج بقيت انتظرها يومين وهيه ماكو أيست تجي الحد ما بيوم كاعدين العصر نلف كبه اني وكوثر وندك الباب
كوثر : كوم علي افتح الباب شوف منو
راح فتح الباب شوي واجا بعد ما حاجي ودخلت مره منقبة دفعت علي ودخلت للصالة كوثر بسرعه عافت الكبة وسحبة السجينه
كوثر : خير يا طيررر منو انتي
رفعت النقاب ونصدمة ليا
ليا : شيب الخلفجن خرب بشرفج حُذام اختنكت
شمرت الكبه وركضت حضنتها هيه بسرعة لمتني بحضنها صرت اشهك بالبجي احس شميت بيها ريحة حسام
حُذام : لـ ليا
ليا : لا خيالها
بوستها وخرت من حضنها اضحك وامسح بدموعي حجت كوثر وهيه تأشر بالسجينه على ليا
كوثر : هيه هاي ليا الخبصتينه بيها
ليا خزرتها
ليا : احجي عدل لج شنو خبصتينه بيها
كوثر : امداني جا اذا هيج السانج ما علمتيها الصديقتج تصير مثلج السان
ليا : غمه اعلم وارجع ليورا ونفس الفهاوة هيه هيه
كوثر : اي والله موتتني بفهاوتها
حُذام : ها شو كلبتن عليه
ليا كوثر : نجبي
هنه كالنها بنفس اللحظة واني وكعت بالكاع اضحك عليهن وهنه هم صارن يضحكن كوثر شمرت السجينه ورجعت تلف كبه
ليا : جاي تلفن كبه ؟
كوثر : اي حركي طولج وتعاي لفي ويانه
ليا : اي سهله وين المغسله اغسل ايدي
حُذام : لا عوفي اني هسه الف وياها ونكملها
ليا : نجبي واخذيني اغسل ايدي
حُذام : تعاي منا
اخذتها نزعت النقاب والعبايه شمرتهن على صفحه فتحت الها البوري هيه غسلت وطلعت كلينس من جيبها تمسح ايدها خرب يومها بعدها نفس الطبع
ليا : شلونج هنا مرتاحه
حُذام : الحمد لله احسن من بيت ايمان وعيشتها بألف مره
ليا : الحمد لله وهاي ام السان شلونها وياج
حُذام : ههه حنينه
ليا : مبين عليها امشي اروح اضوجها
ضحكنه ورحنه كعدنه نلف كبه دخل علي واحمد شايلين علاليك سود وصناديك برتقال وتفاح وطماطه وكونيت بتيته
كوثر : هاي منين
احمد : هاي الخالة جابتهن
ليا : خالة بعين اختك اسمي ليلوو
كوثر : شكو جايبتهن ست ليلوو
ليا : مو الج هذن الحُذام
حُذام : لا ليا شسوي بيهن شكو جايبتهن نوب شكد جايبه
ليا : نجبي نجبي لعد ادخل للبيت وايدي فارغة
كوثر : لا طلعت معدلة
ليا تباوع عليها وتخزر وهذيج هم تخزر بيها
حُذام : ليش تحسسني عدجن عداوه من قبل وحده تخزر بالثانيه
بعدهن ما حاجيات ودخلت حوراء تجبي وتركض
حوراء: حُذام حُذاااام
طفرت بسرعه عليها
حُذام : شكو شبيجججج رنا بيها شي
تحجي وفحطانه كوه افتهم منها
حوراء : خـ خـالي بـ برا ...
يتبع ...🖤✨
lnst:wt.8.4