سبحان الله وبحمده سبحان الله العظيم ♡
(بـيـت ابـو نـايـف - الـعـصـر )
قهوه العصريه وريحه البخور والعايله متجمعه على القهوه والشاهي والضحك والسوالف
نايف شاف ان الوضع يسمح له يصارحهم تنهد وقال : يبه ، يمه
ابو نايف وام نايف : هلا
نايف : بتزوج
ام نايف بأبتسامه: الله بيشرك بالجنه ها تبينا تخطب بنت خالتك نوضى؟
نايف : لالا
الهنوف : بخطب لك صديقتي
نايف : لالا
ابو نايف : بشرني من هي؟!
نايف : غدير بنت عمي مطلق
ام نايف : احلى مااخترت ابك غدير سنعه اسنع بنات عمك
نايف ابتسم
ابو نايف : خلاص تم اذا طلع بهاج من المستشفى نخطبها لك
نايف : تم
الهنوف ورت امها فستان : يمهه وش رايك بهاذا الفستان؟!
ام نايف بضحكه: تونا تونا هههههههههه
_____________________
(الـمـسـتـشـفـى )
نوره جالسه عند بهاج تتطمن عليه بس بهاج كانت نظراته ندم بندم انه كسر نوره
بهاج بندم : انا اسف
نوره : بهاج خلاص عاد من اليوم وانت تتأسف ! حنا وش قلنا الولايف مابينهم عتاب ولا اعتذار!
بهاج ابتسم وسحب نوره لحضنه وحضنها : اهخخ يانوره ابك انتي كيف تسرقين القلب والعقل !
نوره بضحكه : كيد النساء هههههههههه
بهاج بضحكه : الله يخرجنا هههههههههه
دخل الدكتور وفزت نوره وابعدت عن بهاج
الدكتور : اعتذر
بهاج : حصل خير
الدكتور : تمام فحوصاتك سليمه تقدر تطلع
نوره: طيب له ادويه شي؟
الدكتور : اي اي له ولازم تكمدين الجروح الي بجبهته ضروري تتكمد ولازم يتحرك لايجلس كذا
نوره : تسمع بيهج؟ ياويلك ان ماطبقت شي منهم!
بهاج بأبتسامه : ابشري ياعيوني
الدكتور مد الوصفه : هاذي اسماء الادويه الي لازم يشربها
نوره خذت الوصفه : تمام مشكور
بهاج من قوى التركيز الي فيه شاف يد الدكتور لامست يد نوره
بهاج اتسعت عيونه بغيره وعصبيه : اطلع برى !
الدكتور : وش فيك ؟
بهاج بعصبيه : لاتخليني افرشك هنا والعن والد والديك
الدكتور : تمام تمام
نوره : بهاج وش فيك ؟
بهاج بغيره: اسكتي انتي بعد ، والله لو اشوفك توطوط عندنا بلعن خيرك !
نوره تعمدت تثير غيرته زياده : مشكور يادكتور ماتقصر عملت الي عليك وزياده
الدكتور ابتسم : هاذا واجبنا
بهاج قام بعصبيه رغم تعبه الا انه قام ومسك ياقه الدكتور : لعنبوك انت تيس ماتفهم ! اقولك تقلع يعني تقلع ماتفهم انت ؟!
نوره ندمت انها تعمدت تثير غيرته وتنهدت وتقدمت لـ بهاج وحاولت تفك يدين بهاج الي على الدكتور
بهاج التفت بعصبيه : نوره والله ماهجدتي بلعن خيرك معه
نوره : طيب اجلس انت تعبان
الدكتور : حصل خير اختي نوره
بهاج تنهد بطفش وغيره : لاحول ولاقوه الا بالله ابك انت بهيمه ماتفهم؟ كيف موظفينك وانت درج ماتفهم؟!
الدكتور : تمام بطلع بس فكني
بهاج فك يدينه بقوه : تقلع
وطلع الدكتور ومنلخم من تصرفات بهاج
بهاج مسك نوره : وانتي عادي عندك؟!
نوره بغيره : وانت عادي عندك تتزوج علي؟
بهاج تنهد : قلت بطلقها
نوره : وانا ماتزوجت الدكتور عشان تغار!
بهاج سحب نوره من خصرها بأتجاهه : انا كم مره قايل لك لاتطرين الزواج على لسانك!؟
نوره : وانا كم مره قلت لك لاتتزوج؟
بهاج : طيب اعتذرنا وتأسفنا وكلانا الندم ولازلتي تحنين على هالسالفه
نوره بغيره : ماش اعتذارك ناقص
بهاج تعمد يثير غيرتها : رهوفه مسكينه تعلقت فيني وماتدري اني تعبان بالمستشفى ياعمريي عليها
نوره عقدت حواجبها بعصبيه وضربت صدر بهاج : وجع وش عمري ماعمري !
بهاج : تصدقين انها صاروخ
نوره طالعت فيه من فوق لتحه بغيره : ورع ودني لها بلعن والدينها بغير ديكور وجهها
بهاج : هو انتي اذا غرتي تغيرين ديكور الوجييه؟
نوره بعصبيه وغيره : ايه وشكلك بتلحق الي لحقو تغيير ديكور الوجهه
بهاج : اها يالنوري تهديد الدعوى؟
نوره : لا وشدعوا مانهدد حنا نفعل
بهاج : وين جوالي اكيد رهوفه خايفه علي
نوره عضت على شفايفها بغيره وسحبت شنطتها وفتحت الباب وجت بتطلع الا بهاج جلس بكذب يمثل التعب : اهخخ ي نوره طحت طحت ورجلي توجعنيي
نوره اتجهه له بخوف : يمه بسم الله عليك وش فيك
بهاج كشر وجهه بكذب وتعب : يانوري الجرح الي بجبهتي يوجعني مرهه
نوره حطت يدها على الجرح بخفه : ياروحيي بسم الله عليك بـ سعود ولافيك
بهاج بضحكه: كارهه سعود بالمره هههههههههه
نوره : وماراح يدخل بيتي ! من الحين اقولك تجمع سرابيت مانبي وتخطيط لزواجات مانبي !
بهاج مسك خشمها : ياعيني على الغيوره
نوره ادركت انه قبل شوي قال "رهوفه" وقامت بغيره والتفت له : دبر عمرك مع رهوفه
بهاج بتمثيل تعب : اهخخ يانور ماقدر امشي
نوره : لا والله؟ والله انك جني وتطامر البحور مو بس الجدران
بهاج بضحكه: كان كان هههههههههه
نوره : ها انت الحين ضحكت يعني مابك بلا
بهاج انصرع : اهه تعبان
نوره زفرت وتقدمت ومدت يدها له : قم
بهاج مسك يدها وكان بيسحبها له بس خاف تطيح وينكسر خشمها وقام : احتاج مسانده من حبيبه القلب
نوره تركت يده : خل رهوفه تنفعك
بهاج : اوهه ماقدر اقوم مدي يدك
نوره تنهدت ومدت يدها وبهاج سحب يدها وطاحت عليه نوره غمضت عيونها توقعت انها بتطيح بالارض وينكسر خشمها بس طاحت على بهاج فتحت عيونها لقت بهاج يتشمت عليها ويضحك وقامت بهدوء
بهاج حط يده على كتف نوره ويمثل انه مايعرف يمشي او صعب يمشي وهو كذاب مقطع ونوره صدقته وساندته وهي بتموت غيره وبهاج مستانس على غيرتها
وطلعو وبهاج معطيها وضعيه التعبان الي صعب يمشي ونوره مساندته وطلعو برى المستشفى
نوره : بعاج
بهاج ساكت لااسمع لاارى
نوره : بعاجوه
بهاج : الله الجو مغيم
نوره : بهاجوه!
بهاج : وين جوالي
نوره : بهاج؟! رد
بهاج : اوهه كم الساعه
نوره : بيهج؟
بهاج : ياليل وين السواق ماجاء
نوره : بوبو؟
بهاج التفت : لبيه ياعيوني بوبو وشرايين بوبو سمي وامري وتددلي ياعيون بوبو
نوره هزت راسها بفهم : اها صياد ماهر
بهاج غمز : بالخدمه كانك تبين كورسات عندي ماعندي مشكله
استوعب وقال: لا دقيقه من تصيدين؟ لالا ماعندي كورسات ولا شي
نوره : الا الا نبغى كورسات
بهاج: لا والف لا
نوره كشرت وكشت بوجهه بمزح: مالت عليك وعلي
بهاج ضحك وقال : يلا وصل قومي
نوره : سبحان الله صرت تعرف تمشي هالحين؟
بهاج بتمثيل لتعب: اهخخ يانوره مقدر مقدر
نوره : هههههههههه
وركبو وتوجهو لبيتهم
_____________________
(الـجـامـعـه )
نجلاء كلعاده ماتلقى احد يطلعها من الجامعه وتتصل على امها وتقول لها وامها مصممه على رائد !
نجلاء: امري لله
رائد : يلاا تحركيي
نجلاء : كأن اسلوبك فيه اسلوب امر؟ لاحبيبي انا بنت سالم ماأامر !
رائد عقد حواجبه : حبيبي؟ وين عايشين؟
نجلاء كشرت: وعع نسيت انك خروف !
رائد : هيا بسرعه استعجليي تأخرت على محاضرتي
نجلاء تربعت بنص الشارع : مابي دامك تتأمر عليي تقلع بنتظر اخوي ابو صنادح !
تنهد رائد: ورعه اسمعي ترى ماعنديي وقت ! والله لانزل واجيبك غصب عنك
نجلاء: شكلك متأثر بقصه نوره وبهاج ! مو نوره انا وانت مو بهاج !
رائد : صح لاانتي الجنيه ولا انا بهاج لكن هالحين اوريك كيف اجيبك غصب
نجلاء: اعلى مابخيلك اركبه
نزل رائد وقامت نجلاء : يمهه هالمجنون وش بيسوي
رائد : جيتك
نجلاء هجت : والله ماتمشي رايك على وانا بنت سالم
رائد يركض وراها : ابو سالم جعله يسلم تعال فشلتنا تعالل
نجلاء: تقلع وطس
رائد: فضحتينااا تعاليي
نجلاء: حلم ابليس بالجنه !
رائد مسك نجلاء وسحبها له وصارت مقاربه له مابينهم شي
نجلاء اتسعت عيونها بصدمه وسطرت رائد كف : قليل ادب
رائد استوعب ونزل راسه بأحراج : معليش والله ماكنت اقصد
نجلاء دفته عنها : خلاص انسى ياويلك تفضحنا يابخور السوق
رائد ابتسم بشر : اسمعي ياورعه وربي ماركبتي ورجعتك لبيتك بعلم العيال
نجلاء : وجعع ترى المتضرر انت !
رائد : عادي بلقم كم كف من ابوي وتنتهي السالفه لكن انتي؟ بيزوجونك تعرفين عاد عائلتنا
نجلاء غمزت : قبيلتي غير هههههههههه
رائد بضحكه : ايي نسيت ان ابوك مو عميي هههههههههه
نجلاء : يلا تقلع عاد اعطيتك وجهه
رائد كش بوجهه نجلاء : وعع انا الي ميت عليك
نجلاء كشرت وجهها : لايمه بموت بدونك !
رائد: عاني باقي ١٠ دقايق على محاضرتي وربي ماركبتي بسحب عليك!
نجلاء : علي الطلاق بالثلاث ماني براكبه معك دامك تتأمر
رائد تخصر : ومن تطلقين ياحظي؟
نجلاء : زوجي المسقبلي
رائد ميل راسه بتأمل وقال بدون لا يحس على نفسه : ياحظه فيك
نجلاء تغطت من الربشه : وجعع
رائد استوعب وقال بضحكه : اقعدد اسلم فرعون هههههههههه
نجلاء شالت الغطوه : رائد برحم والديك تقلع خلاص مابي
رائد : مو على كيفك عمتي سحر قالت جب ابو سالم غصب
نجلاء : طيب قل لـ امي سوسو ابو سالم عيا
رائد : سوسو؟
نجلاء: ايي ليكون حرام ندلع امي!
رائد: اقول لاتضيعين السالفه وامشي قداميي
نجلاء تربعت : وانا ماني بماشيه لو على جثتي
رائد سحبها ومسك عضدها ومتجهه للسياره بهدوء الارض ونجلاء كل كلمه قالتها له وتحاول تتفلت منه وركبت السياره "ورا"بقله حيله وتدعي على بهاج بهاج ماله دخل بس تدعي عليه : الله يسلط عليك يابهاج علمت عيالنا جرجه الحريم الله يسامحك مو كل الحريم نوره الله يسلط عليك جنون الارض
رائد بضحكه : طريقه بهاج مضمونه هههههههههه
نجلاء : لا انت ولابهاج يقدر يمشي كلمته لاعلي ولاعلى نورتي
رائد : الجنيه مشاها بهاج على كتفه بعد مو بس مسكها
نجلاء شهقت بصدمه من ادركت ان بهاج ونوره بدايتهم مسكه العضد : ياراسييي البدايات الي مابدت تبي تبدا
رائد : وش فيك؟
نجلاء : نزلنيييييي
رائد : ليش
نجلاء بصراخ : نزلنيييي
رائد وقف السياره : وش قومك !
نجلاء نزلت : وعع البدايات وانا بوقفها قبل تبدا
رائد : وش بداياته الله يخلف ؟!
نجلاء سحبت شنطتها : وربي ماركب معك
رائد : استهدي بالله وش سويت لك؟
نجلاء طلعت جواله تتواصل مع اوبر
رائد نزل ووقف قبالها : وش تهببين ؟
نجلاء : خلاص رائد روح مابي اروح معك ليكون السالفه غصب بعد!
رائد : وجعع وش فيك خلعتي قلبي !
نجلاء : رائد يرحم والديك مابي خلاص
رائد : وش الي خلاص وش الي اذيتك فيه ليكون السالفه الي قبل شوي
نجلاء: ورع تقلع عاد خلاص عطيتك وجهه
رائد : تتعاطين شي انتي مو صاحيه وربي!
نجلاء : جاء جاء خلاص مع السلامه
رائد : من الي جاء مو فاهم شي !
نجلاء : اوبر يلا سلام
رائد حس بشعور غريب داخل صدره واظن انه شعور" الغيره"
ومسكها بقوه : على قصه رقبتي تروحين مع رجال ثاني
نجلاء فكت يدها بقوه : خيرر عاد تراك ولد خالي مو رجليي
رائد بعصبيه : لاتخليني اثبت لك عاد انك حرمتي بالمستقبل لاتخليني اخطبك الحين !
نجلاء اتسعت عيونها بصدمه : وشش ؟!
رائد بصراخ وعصبيه : اي اي يانجلاء انا احبكك واكثر واحد خاف عليك يوم تقرصك العقرب انا انا يانجلاء احبتس خذي هالعلم ولا خليه
نجلاء ماعاد تقدر تنطق بكلمه وحده من قوى الصدمه
وسحبها بهدوء وركبها السياره واعتذر لـ اوبر وركب سيارته ومشى بهدوء وكل واحد مصدوم من الثاني
نجلاء مصدومه من حب رائد لها
ورائد يخاف نجلاء ماتبادله
رائد : تؤمنين بالحب من اول نظره؟
نجلاء : لا نظري ضعيف
رائد : كذابه عيونك تقول سنايبر
نجلاء شدت شعر رائد : وجع قل ماشاء الله
رائد : بنصدم اتركيني
نجلاء: قل ماشاء الله
رائد : ماشاء الله ماشاء الله
ووصلها للبيت ونزلت وصفقت الباب بقوه وهو كشر وراح لبيته سحب على محاضرته
_____________________
(بـيـت ام سـحـاب )
ام سحاب تتجهز تبي تفر الديره وجت بتطلع لقت بوجهها ...
ام سحاب بشهقه : بسم الله سكنهم مساكنهم وش جابك انت
الجد عبدالرحمن بهدوء : جاي بقول شي وبمشى
ام سحاب عقدت حواجبها من هدوئه وخافت على نوره وبهاج ليكون مسوي فيهم شي !
ام سحاب : زين خلك هنا لين يجي زيد عيب تدخل حنا بالديره
عبدالرحمن : الي ودتس
واتصلت ام سحاب على زيد وشوي وجاء زيد ويده على قلبه خايف ان هالشايب مهبب شي
زيد : وش بغيت؟
عبدالرحمن : بقول شي وبمشي
زيد : اقلط
وجلسو بقسم الرجال ببيت ام سحاب وبينهم القهوه
الجد عبدالرحمن : اولاً انا اعتذر من نوره والله لو انها قدامي لااحب راسها
ام سحاب : اي طيب والمفروض تعذر لها مو لنا
الجد عبدالرحمن بندم : ايي جاي بقول شي اقوى
زيد : وش هالشي
دخلت صيته المطفوقه بصراخ : خالتيي مزوني وينتس ؟
سكتت من شافت اجتماع
صيته : يويلي اجتماع الاتحاد السوفيتي؟
زيد : ياليل منتي صاحيه
ام سحاب : وش قومتس يامره
صيته : لالا خلاص بسكت
زيد : تسوين خير
صيته : اسكت يالزرافه
زيد : سمي
الجد عبدالرحمن : يلا انا استاذنكم
زيد : وين اجلس
الجد عبدالرحمن : لاوالله تأخرت
ام سحاب : والعلم القوي وين طس؟!
الجد عبدالرحمن : بعدين تعرفونه
صيته بهمس : الله يستر
زيد بهمس : ايي والله صادقه مصيبه هالشايب
صيته بهمس : شايب عايب ، زيدوهه
زيد بهمس:نعم
صيته بهمس:نعمامه ترفسك المهم شبكته مع خالتي ام سحاب
زيد بشهقه: لابسم الله على وخيتي
صيته:ابك عان عيونهم قلوب
زيد:ليتك ساكته
صيته :سم
_____________________
(بـيـت بـهـاج )
بهاج جالس يتابع جواله ونوره جنبه وحاضنها على جنب ويتابعون الجوال مع بعض
ونوره ميته ضحك على فديو
نوره بضحكه : بموت طيحته ضحكتني هههههههههه
وبهاج مبتسم ويعيد الفديو عشان يسمع ضحك نوره
اختفت ضحكتها من شافت رساله سعود " بهاج فكرت بالموضوع ؟ "
تنهدت نوره بضيق وقامت متجهه للمطبخ ومعصبيه وكارهه هالسعود
وبهاج تنهد من شاف نوره تضايقت ورد على سعود : من الحين اقولك شي يخرب بيتي وبين حرمتي مابي اساعدك اعتذر !
سعود : بهاج الصدق ضربت البنت ومو راضيه تسامحني
بهاج : ياليل عاد ! لاتضربها ! مستحيل ترضى اسأل مجرب دقيقه بتصرف
سعود : تمام
وتنهد بهاج وقفل جواله وقام متوجهه للمطبخ وشاف نوره واضح معصبه وتفكر وتقدم وحضنها يهدي من عصبيتها : افا افا وش الي صار
نوره بزعل : بهاج خلاص عاد ياكثر مواضيعك انت والتيس الي معك
بهاج : ياعيونيي والله ماهو شي وهالحين اقولك
نوره بزعل : ويطلع تعال نتزوج فلانه نستر عليها صح؟
بهاج شال نوره رغم تعبه الا انه شالها وحطها على طاوله المطبخ
بهاج بأبتسامه : فكي العصبيه ياشيخه خلاص مو حلوه عليك
نوره ابتسمت تلقائياً
بهاج : العلم ومافيه ياطويله العمر والسلامه انا قلت لك سالفه رهف واختها سعود وش مسوي؟
نوره بكرهه : قل وش ماسوى
بهاج : ضارب حرمته الضعيفه ضرب رجال
شهقت نوره بخوف : يمهه وينها تكفىى بروح لها امانهه يلا
بهاج ابتسم : تحلين الموضوع ؟
نوره غمزت : بقول لها لاترجعين لخراب البيوت سعودوه
بهاج بضحكه : لا مااتفقنا كذا هههههههههه
نوره : خله الدنيا دواره ، لاخلاص بروح للبنت تكفى !
بهاج غمز : بشرط
نوره : وتتشرط بعد ؟ وش هو ؟
بهاج بأبتسامه : بوسه
نوره ترددت بس تذكرت انه زوجها عادي ومسكت وجهه وباست خد بهاج
تنهد بهاج : ياليل عادك تستحين مابي من هنا
نوره اتسعت عيونها من عرفت تفكيره
بهاج شاف امس فلم قرر يطبقه على نوره وحط يده ورا راس نوره ويده الثانيه مكتف نوره
نوره استغربت قطع استغرابها من شافت ان بهاج بايسها شفايفها وانلخمت ماقدرت تسوي شي من الصدمه
قالت بينها وبين نفسها : يخراشيي مهبول ذا - كأنه طول ؟ - شكله رقد بالغلط
بهاج : ها تبين ثانيه ؟
نوره سكتت بأحراج وخجل
بهاج : يلا انتظرك بالسياره
نوره : تمام
وراح بهاج والابتسامه شاقه وجهه ونسى التعب كله
ونوره راحت تلبس عبايتها ونقابها
بهاج بسيارته والاجواء الي فيها بقايا مطر بس ومشغل ياحميد ياحميد مايدري ليش يحب هالاغنيه خصوصاً او عشانها تذكرهم ببداياتهم
جت نوره : الله الجو يجنن
بهاج : مثلك
نوره ابتسمت : ابغى ....
قاطعها بهاج : ايي اشتقنا لـ ابغى ومابغى
نوره : سم على خشمي بنكثر منها
بهاج : ها وش تبغين ؟
نوره : قهوه
بهاج : سمي يادهر قلبي تبين شي غيره ؟
نوره : سلامتك
بهاج ابتسم واتجهه للكوفي الي تحبه نوره وطلب خمس قهوات
نوره : ليه خمسه !
بهاج تعمد يثير غيره نوره : لرهوفه وسعودي وريف
نوره علقت عيونها بصدمه : هاه ؟
بهاج شدد على كلامه : لرهوفه وسعودي
نوره ضربت بهاج بغيره : وينها رهف والله للعن خيرها بس
بهاج : استهدي بالله
نوره بغيره وتقلد صوت بهاج : رهوفه وسعوديي يملا الهم
بهاج بغيره : سعوديي ؟
نوره بغيره : رهوفه ؟
ولفت نوره لجهه اليمين بزعل
بهاج ابتسم من شاف غيرتها طالعه من عيونها والقى نظره سريعه على المكان وشاف ان مافي احد والتفت لـ نوره ورفع نقابها لـ فوق
شهقت نوره وحطت يدينها على وجهها : بعاج !
بهاج : بعجتي ام اسمي
نوره التفت وسحبت النقاب منه : تستاهل بعجه الاسم !
بهاج : هههههههههه
_____________________
(الـفـنـدق )
ريف ماتتكلم ولاتبكي ولا تسوي شي جالسه جسد بلا روح
وسعود واقف مكانه بندم انه دمرها
شوي واتصل بهاج : الو وينك
سعود : بالفندق
بهاج : اطلع جايب حرمتي عشان تشوف حالتها
سعود : سم
وطلع سعود ونوره شافته وكشرت بكرهه وهو نزل راسه وطلع
دخلت نوره بشهقه من شافت منظر بنت لابسه فستان ابيض ملطخ بالدم وشعرها على وجهها بشكل عشوائي ومنزله راسها وتناظر الارض بفراغ
نوره رمت شنطتها واغراضها بالارض وتقدمت بخوف على ريف : ريوفه ياحبيبه امك انتي ياروحي وش فيك
ريف ساكته ومن شافت حنان نوره نزلت دموعها
نوره دمعت من تذكرت نفسها بالمزرعه ايام سالفه الفديو ومسحت على وجه ريف بحنان : لاتخافين ياروحي انا معك
ريف ببكى : انتي مين ؟
نوره بدموع : نوره حرم بهاج
ريف بدموع: انتي الي تزوج عليك ؟
نوره هزت راسها بغصه بمعنى " ايه انا "
ريف ببكى : حرامم عليهم يسوون فينا كذا انا وانتي واختي المفروض مانكون هنا
نوره حضنت ريف بحنان وتقرا عليها وتسمي : ياعيوني انتي والله مايجيك اذى دامك معي وحياك بيتنا مفتوح لك ٢٤ ساعه
ريف حست بحنان بحضن نوره وبكت بحضنها ونوره تبكي معها وجلسو تقريباً ٥ دقايق بكاء وصياح وفضفضه
بهاج ميز صوت بكى نوره وقال بينه وبين نفسه : اقعد نوره مطبقه مثال لبى الخوي الي مايخلى خويه
سعود قلبه يتعصر من سمع بكاء ريف
نوره اول شي حسنت نفسيه ريف لو تكه بس وقامت جابت الاسعافات الاوليه وسحبت ريف واتجهه لغرفه النوم وحطت ريف بالسرير وغطتها وبدت تعقم الجروح الي بوجهه ويدين ريف ونوره تبكي وتتذكر سالفه الفديو وكيف كان وضعها يشبه وضع ريف وريف تتأمل جمال ولطافه نوره وكيف هي عانت بالحياه ورغم كل شي الا انها حنونه بس دار بباله سؤال ليش نوره تبكي ؟ اكيد صاير لها شي يشبه سالفتي ؟
ترددت وقالت : ممكن سؤال ؟
نوره تمسح دموعها : عيوني لك
ريف : ليش تبكين؟
نوره : لابس تذكرت سالفه تشبه سالفتك وصرت زيك
ريف قامت وحضنت نوره : اهخخ ياحلوك وهاذا انتي عانيتي بالحياه ولازلتي مبتسمه
نوره بادلتها الحضن : ياريف ياحبيبه قلبي انتي الحياه هاذي ماترحم لازم تكونين قويه فيها ولاتبيني ضعفك لاحد لان بيستغلك ويضربك بنقطه ضعفك
ريف : صعبه كل الناس عرفو اني ضعيفه شخصيه وصارو يستغلوني فيها عكس اختي رهف قويه
نوره : لا ياروحي عمرك ماكنتي ضعيفه انتي قويه بس لعل جاء الي اقوى منك عادي انا قويه وجاء الي اقوى مني ولاتضعفين مهما كان نصيحه مني
ريف هزت راسها برضى
نوره : انسدحي تعبانه لاترهقين نفسك
ريف انسدحت وعيونها تدمع ونوره تمسح دموعها وقامت نوره تسوي لها فطور والواضح لها ان ريف ماتاكل لان شفايفها باهته بشرتها باهته ترجف من الجوع واتجهه للمطبخ تسوي لريف شي تاكل وسوت شوربه واتصلت على بهاج قالت تقدرون تدخلون تجلسون بالمجلس ولاتوطوطون يمين يسار
وخذت نوره الشوربه وراحت لغرفه النوم وسعود وبهاج دخلو وجلسو بالمجلس
نوره تشرب ريف : لازم تتغذين ! ولابتتعبين
ريف : بس شبعت
نوره : ريف لاتزعليني !
ريف بضحكه : يوهه حسستيني اني اصغر منك ! تراني اكبر منك هههههه
نوره بضحكه : العمر مجرد رقم هههههههههه
ريف بأبتسامه : صح
نوره : اختك رهوفه قريبه من هنا؟ بجيبها تتونس معنا
ريف نزلت راسها : ماتتهاوشون على بهاج ؟
نوره : لا معليك بس وينها
ريف : مدري اسألي بهاج بس امانه لاتتهاوشون
نوره : ازهليني
وطلعت نوره ونادت بهاج وجاء بهاج : وين الست رهوفه؟
بهاج تكى : وش تبين بها ؟
نوره : وينها
بهاج : امشي بس لاتضرينها البنت تعبانه تفسياً
نوره ضربت بهاج بخفه ودمها يفور : بزر لاتستفزني بخوفك عليها خلاص طلقني وخ.....
بهاج قطع كلامها : لاتكملين على قص رقبتي ماطلق
نوره : وينها
بهاج مسك يد نوره يهدي من عصبيتها : صلي على النبي
نوره : اللهم صل وسلم على نبينا محمد
بهاج : هديتي؟
نوره بعصبيه : اييه هديت
بهاج : لا للحين فيك عصبيه
تنهدت نوره : بهاج تراك قاعد تستفزنيي
بهاج : هههههههههه
ومسك يدها وطلع واتجهه لغرفه رهف
_____________________
(غـرفـه رهـف )
رهف تدور بالغرفه وتتصل على بهاج الي مايرد عليها ومعصبيه
فجأه دخل بهاج نوره رفضت تدخل
رهف بعصبيه : وجع وينك لي اسبوع اتصل عليك !
نوره سمعتها واتسعت عيونها بغيره
بهاج : ايي انشغلت
دخلت نوره والغيره بعيونها : سلام
بهاج ورهف : وعليكم السلام
رهف شافت نوره واعجبت بجمال نوره وقالت : وجعع بهاج طايح بالحب ! ليكون متزوجها على نوره ! ياعزتي لك يانوره ! هيه انتي ترى بهاج متزوج نوره مااسمح لك تاخذين بهاج من نوره! ترى بس قاعد يغريك بفلوسه وهو يحب نوره بس !
بهاج التفت على نوره المنلخمه : اي صح بهاج يحب نوره فهمتي يامدري من انتي ؟!
رهف : خيرر ليكون صدق متزوج عليها
بهاج : ايي تزوجت عليها انتي وهاذي . يقصد نوره
نوره معقده حواجبها بصدمه بهاج جحدها !
بهاج : اي يارهف هاذي بنت اجنبيه ماتعرف تتكلم
رهف : عزتي لنوره
نوره : هيه ورع انت وياه انا نوره
بهاج :هههههههههه
رهف : انتي نوره؟ ليش جحدك طيب
نوره : مدري عنه الجحود
بهاج : رهف لاتصدقين ترى تكذب عليك مو نوره نوره بالديره هاذي اسمها نور
رهف : تطلقي منه هو يحب نوره مايحب نور !
نوره : خيرر انا نورهه
بهاج : لا نوره بالديره انتي نور
نوره : ياليللل
رهف : عاد اعلمك ياالاخت نور بهاج لنوره مو لك
نوره رمت شنطتها على بهاج : وجع خلك معها وخل نور معك
وحطت الغطوه على وجهها وطلعت بعصبيه وبهاج ضحك وطلع وراها يركض ويضحك وسحبها وحضنها
بهاج بضحكه : وه وه نسينا ام دميعه هههههههههه
نوره : بهاجوه بعد عني
بهاج شد الحضن : لا بدخلك بضلوعي
نوره سكتت
بهاج : يلا خلاص عاد يالزعول فكي عقده الحواجب
وسحبها معه ودخلو على رهف
بهاج : الصدق ان هاذي نوره
رهف : متأكد ولااتفاقيه عشان ماعلم نوره عليكم؟
بهاج : لاهاذي نوره
رهف : والله مالومك لو حبيتها صاروخ ارض جوي
نوره كانت تحس بغيره بصدرها من تشوف بهاج يسولف مع رهف
بهاج ابتسم : اي والله
رهف تقدمت وسلمت على نوره ونوره سلمت عليها
رهف : نرجع للموضوع طلقنيي
بهاج طاحت عينه على نوره المتخصره وتنتظر كلمه "طالق" تعمد يثير غيرتها وبما ان رهف حلال تقدم وحضن رهف
رهف اتسعدت عيونها بصدمه وتحاول تبعد عن بهاج الي ماحد يقدر عليه
نوره ارتخت يدينها وبردت ملامح وجهها ودموعها تطلع تلقائياً وطلعت بهدوء ولبست النقاب بعصبيه وغيره
رهف ضربت بهاج : وجعع قلنا بالورق بس خير وش وضعك وقدام حرمتك بعد صاحيي انت !
بهاج : وينها !
رهف : تقلع
بهاج خذا شنطه نوره المرميه وطلع يدورها ويتصل عليها
اما نوره دخلت غرفه ريف بدموع وشافت ريف وحضنتها بدموع
ريف تمسح على نوره : بسم الله عليك وش فيك
نوره ساكته ودموعها تنزل
ريف : نوري تكفين لاتسكتين قولي ليي
نوره بغصه : حضنها قدامي
ريف : من حضنن
نوره بدموع : التيس بهاج
ريف : ياعمريي
نوره ببكى : اخخ يانوره ليش تسامحينه وترحمينه كان خليتيه هاذا قلبك الرهيف شوفي وش سوا حطك قدام الامر الواقع وحضنها قدام عيونك
طق الباب دخلت رهف : ريف تعالي بهاج بيدخل
نوره مسحت دموعها : خذيتيه ؟
رهف : لا والله ماخذيته وبتطلق منه بس هو بيثير غيرتك
نوره نزلت راسها بدموع : لايجي
رهف : تمام بس لاتهقين اني باخذه منك لاوالله واحلف لك ان مابينه وبينه شي ولا اني احبه في الف غيره وش ابي فيه اذا هو متزوج
نوره هزت راسها بتسليك وقالت: لايجي
رهف : الي ودك
وطلعت رهف وريف راحت للمجلس
رهف : ورع انت صاحي تتزوج على هالقمر الي حتى وهو يبكي يجنن
بهاج : لاتقولين انها تبكي؟!
رهف : اييه وزعلانه ماتبي مقابل وجهك لاتسوي فيها يامسلم كذا!
بهاج تجاهلها ودخل الغرفه ولقها جالسه وجلس جنبها وحضنها : ياقلب بهاج انتي والله كنت بخليك تغارين
نوره بدموع : مو كذا مو كذا صعبه عليي قلبي مايتحمل والله الي جاه منك كثير
بهاج حط يده على قلب نوره : بسم الله على هالقلب الله يحفظه
نوره قامت : ودني لديره !
بهاج : الي تبين
وطلعت نوره ومتجهه لسياره بعصبيه وغيره وبهاج وراها ندمان
وركب السياره وركب وحركو وبهاج يحاول بـ نوره يمين يسار يراضيها بس ماش نوره ماتعطيه فرصه
_____________________
(خـط ديـره الـشـيـخ - الـعـشـاء )
نوره داخ راسها مو معقوله هاذا طريق ديرتها
نوره : بس هاذا مو طريق الديره
بهاج : اي مو طريق ديره القمر
نوره : اجل ؟
بهاج : يوهه ماعلمتك
نوره : لاتعلميني ولاتكلمنتي
بهاج : سمي
ووقف بهاج عند بيت صغير وقديم
نوره عقدت حواجبها : من ؟
بهاج بأبتسامه : عموشه
نوره : ياليل عاد خلاص تعبت كل شوي متزوج !
بهاج نزل وفتح باب نوره : انزلي وشوفي عموشه بعيونك
تنهدت نوره : الله يصبر قلبي بس
ونزلت وطق بهاج الباب وطلعت "عمشه" بفرحه وحضنت بهاج : بهيج ؟
بهاج بادلها : ايي بيهج ياعمرشه
نوره ابتسمت وارتاحت من شافتها كبيره بالعمر
نوره كانت واقفه ورا بهاج فـ عمشه ماتشوفها
عمشه : ها ياوليدي عسى نوري رجعت لك
بهاج التفت ومسك نوره وقدمها لعمشه : هاذي النوري
عمشه حضنت نوره : ياهلا ويامرحبا بالنوري الي قطعت قلب ولدي
نوره بادلتها وحبت راسها بحياء
مصلح "الشيخ" طلع : ياهلا ببهيج والي معه هو انتي نوره
نوره هزت راسها بحياء بمعنى "ايه"
مصلح : اقلطو اقلطو
بهاج صافح مصلح : لا جيت بس ببشركم ان نوره رجعت وعادها زعلانه ي يم
عمشه : ازعلي يانوري وتدللي على تسبده وافقعي مرارته خذي راحتس محد بقلبه غيرتس
نوره ابتسمت : وبعانده من حقي صح؟
بهاج بتأمل : ابد ابد الي ودك
مصلح : حلفت الا لتجلسون
بهاج : لا والله عندنا اشغال
عمشه : حلف الرجال !
بهاج : امري لله
ودخلو وجلسو بالمجلس وعمشه قامت تسوي قهوه فزت نوره : لا ياخاله انا اسويها
عمشه : لا انتم ضيوف لي
نوره : والله اني لسويها
بهاج : لزمت
عمشه: اجل بروح معتس
نوره هزت راسها برضى
~ المطبخ ~
نوره تنتظر القهوه تجهز
عمشه : نوري يابنيتي حافظي على رجلتس
نوره : حافضت عليه بس ماش
عمشه : والله ماتدرين وش كثر تأذى من بعدتس والله انه وقع ولارفع راسه وكومه سرحان وهواجيس
نوره : ايي بس الي سواه قلبي ماتحمله عشان كذا زعلت وطلبت الطلاق محد يلومني بموضوع هاذا وسامحته عشانه تعبان والصدق عشاني احبه
عمشه : اي ماقلنا شي ازعلي وتدلعي بس لاتأذينه
نوره تنرفزت منها كيف تقول لا تأذين بهاج وبهاج هو الي اذى نوره وتنهدت وسكتت احترمت عمرها وجهزت القهوه وحطتها بالترمس وكلها عصبيه
وعمشه لاحضت عصبيتها : يابنتي لاتزعلين مني تعرفين بيني وبينك اجيال يمكن اخطيت بحقتس اعذريني يابنتي
نوره ابتسمت : لا ياخاله عادي
عمشه : اكيد ؟
نوره : اكيدين
وطلعت عمشه ونوره ونوره تقهوي ونوره من التوتر مدت الفنجان باليسار ومدته للشيخ مصلح وماخذاه نوره عقدت حواجبها : ي خال القهوه
مصلح ساكت
بهاج يغمز لنوره ويهمس : معكوسه يالمهبوله
نوره استوعبت ومدت الفنجان بيدها اليمين : سم
مصلح : سم الله عدوك
وقهوتهم وخلصت وجلست جنب بهاج
بهاج بشماته : جيل اخر زمن مايعرف يقهري
نوره بهمس : ترى الي بيني وبينك سنتين بس اهجد !
بهاج : سمي
جت حدود الساعه ١١ اليل مصلح وعمشه راحو يرقدون لانهم كبار بالعمر
بهاج : رضيتي ؟
نوره : لا مانسيت !
بهاج بضحكه : البعير اذا حقد والله مايفك هههههههههه
نوره تخفي ضحكتها : نفط دمك نفط
بهاج بتفلسف : خذيها من الجانب الايجابي" نفط " يعني الذهب الاسود غالي غالي مره يانوره يعني اذا احد قالك دمك نفط يعني دمك ذهب يعني مدحه!
نوره : بهاج مواصل صح ؟
بهاج : الله الله مواصل ماطب عيني النوم
نوره : ارقد بدا عقلك يفصل
بهاج : نوروه
نوره ساكته لااسمع لاارى
بهاج : نوره ؟
نوره : كم الساعه ؟
بهاج : نوري؟
نوره : تأخر الوقت
بهاج فهمت انها بترد الحركه قال بضحكه : نوني هههههههههه
نوره : لبيه لبيه ياقلب نوني
بهاج : رديتيها؟
نوره : العين بالعين والسن بالسن وبالبادي اظلم
بهاج : خلك من الامثال شرايك ندج بالديره ؟
نوره : قدام
بهاج : ماتوفر عزتي لي
نوره قامت بحماس : يلا يلا
بهاج انصرع وغطا وجهه بالفروه : برقد برقد
نوره كشرت وجلست وتكتفت وزمت شفايفها بزعل
بهاج طلع عينه من تحت الفروه وش شفايف نوره الي واضح زعلانه
بهاج بمزح : براطم الناقه وش فيها ؟
نوره التفت وناظرت فيه بتحدي : والنفاس الي منسدحه قدامي وش فيها؟
بهاج قام مسك قلبه : اهخخ ماراح اتخطرى ذبه النفاس
نوره : هههههههههه
بهاج : والله ماخليها بخاطرك امشي ندج
نوره : مابغى
تنهد بهاج : ياليل اكثر كلمه اشتاق لها بس اذا سمعتها اكرها
نوره : مابغى اطلع ابغى انام
بهاج سحبها : ثوري ثوري قدامي
نوره : مابغى
بهاج : مو على كيفك البسي يلا
نوره قامت بقله حيله ولبست نقابها والشرشف الاحمر
بهاج حط يده على خصر نوره وبدو يتمشون بالديره
بهاج : نوير وش رايك نعوضهم ببيت حرام كلفنا عليهم
نوره : ايي لازم كلفنا عليهم ياعمري عليهم
بهاج : ياحظي حرمتي حنونه
نوره : من قدك والله
بهاج: هههههههههه
وتمشو ورجعو لبيت الشيخ تعبانين ونامو بالمجلس بهاج جالس ونايم وبحضنه نوره نايمه على صدره بتعب
_____________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
كلعاده ماانزل الا اذا عندي اختبار .. اجازه سعيده للسعوديين 😭
جوي الخميس غياب جماعي وجمعه وسبت والاحد اجازه رسميه والاثنين اجتهاد شخصي مني بغيب 😭😭
اجحدوها عاد البارت طويل عوضتكم عن قطعتي 😭
كيف تعرفون اني مواصله؟ اذا كان البارت كله ذبات هنا تأكدو اني مواصله😭
النجمه تدعم الروايه✨