حبال من حرير

الحلقه الأولى

.

بسم الله
وقراءة ممتعه..

صلو على خير البشر
اللهم صلِ على محمد وآل محمد وعجل فرجهم

#حبال_من_حرير

#نسرين_الاسدي
انستا /nsr_een2

^^^^
النساء ...

نصف المجتمع ..والسبب لأستمرار الحياة ..وقد منحهن الله عزوجل مكانة كبيرة حيث انزل سورة بأسمهن ..
وقد اوصى الرسول بالرفق بهن ..لكــــــــن
قليل من الرجال من يحترم المرأة ويعتبرها تساويه في الحياة
والأغلب يعاملها ك جارية او ك مجرد ألة تنتج الأطفال

لكــــــن .. كل النساء لديهن قوة كامنة لا تظهر الا في الحالات الصعبه واذا ظهرت فهي لن تنكسر ولن تتراجع ولا تستسلم .. سوا كانت حره او مملوكة ستضل هي ذات قوة خارقه ...

.
.
.
.
.

٢٠١٨ _ احدى محافظات العراق الوسطى..

صافنة اباوع من الشباك للبنات الي كلهم جاي يمشون ولابسين الزي المدرسي واحلامحهم كدامهم.. وكل ثنين بسالفة ويضحكن

اتحسرت واني مقهوره.. رغم صار عمري٢٥ سنة بس بعدني احلم ارجع طفلة والبس ملابس المدرسه واركض واسعى لتحقيق احلامي ومااتركهن..

باوعت لأنعكاسي الي صار كدامي بالمراية.. اي مهره اندفنّن احلامج قبلج بطلي تحلمين بتكوين مستقبلج بطلي..

اني وحيدة اهلي جان عندي اخو واحد يشتغل بالبناء وكع من الطابق الأخير وتوفى قبل ٥ سنوات وجان وقتها مزوج وعنده ولد وبنية اعمارهم ٦ و٣
وزوجته ما قبلت تتركهم وبقت ويانه لأن ابوي وامي كلش يحبونها ومعتبريها مثلي هسه اعمارهم البنيه ٨سنوات ولولد ١١.

حالتنه متوسطه عايشين على راتب الرعاية مالت ابوي لأن هو معوق من سنة ٢٠٠٣
احنه عايشين بمنطقه تعتبر شعبية..

رجعت لازمه دفتري مال الرسم وكملت رسمتي..رسمت بنية تشتغل وفرحانه

وما حسيت الا انسحب الدفتر من ايدي التفتت بسرعه.. اي منو غيرها يعني قطوف بت عمي الفضولية

قطوف : شنو هاي مهره شراسمه انتي

مهره :مثل ما جاي تشوفين بنية محققه حلمها ومتوظفه

قطوف : بعدج على هاي التخيلات ترا الشغل والوظيفه مو النه اني وياج افتهمي يا عيني

سحبت الدفتر منها
: وليش بله احنه وحد عن البنات هم نكدر نتوظف ونشتغل حالنه حالهن بس اخ من الفلوس

ضحكت وكالت وهي طالعه : مادام تعرفين ماكو فلوس بعد عليمن تحلمين ..فتحي عينج على واقعنه ويلا تعاي تغدي صبينه الاكل

سديت الدفتر وتحسرت ..صحيح حجيها ..بس الاحلام هم من حقنه ..

باوعت وراها بدت تفتر بالمطبخ وهيه تضحك، دومها هيج تخفي حزنها وحسراتها ماتبينهن لآحد..

قطوف مو مجرد بت عمي هي مثل اختي لأن اني وياها تربينه سوه من واحنه صغار لأن ابوها انقتل لمن جانت بعمر ٤ سنوات
وامها ما حبت تبقى وتربيها راحت تزوجت وضلت قطوف ويانه وابوي هو الي تكفل بتربيتها

^^^^

لبست عبايتي ودرت لبيت عمي ماعندي غيرهم وين اولي اذا محبوسه بهالبيت..

قبل لا ادخل لباب..عيني راحت على الحديقة.. وعلى الاسطبل.. عيوني ضلت تتنقل لجمال المكان والخضار.. او يمكن تدور أحدهم.. استغفر الله.. دخلت

::- السلام عليكم

ردن مرت عمو وبنتها لكاعده كدامها وتمشط بشعرها.. كعد على القنفه وهنه بالكاع.. اباوع لبنت عمي روان تخبل ماشاء الله عليها صلوات على النبي كلش حلوه روان بيضه شحمه وعيونها ملونه.... عكسي انا.. اي عكسي

دائما اشوف نفسي مو حلوه انا عكسها تماماً ، انا سمره ووجهي دائما بي حبوب من غير وزني الي ماجاي اكدر انزله.. دائما بليل اكول شفرقني عن البنات الحلوات ليش الله ماخلقني نفسهن حلوه؟

فزيت من عاطت بيه روان
::- من حريشي وين صافنه

ضحكت
::- عدنه امتحان فيزيا حياتي

فزت
::- صخام الصخمني باجر احد عبالي سبت كلشي ماحضرت

دمغتها امها على راسها
::-صوتج ولج وبعد عندج وقت الليل طويل اكعدي انتِ وريحونه واقرن وانا هسه اكوم اسويلجن احلى حلاوه

ابتسمت
::- لا شكراً عمه لتعبين نفسج انا شوي واروح

::- ليش عمه بعد وكت

سديت كتابي مبتسمه بحزن
::- تدرين ابوي اليوم يجي وماكو داعي احجيلج عنه من ينزل

كامت
::- ادري يعمه بس الابو والام شما سوو لازم نتحملهم ربنا أمرنا بهلشي واحنه انفذ ونطيع ، وتخلص يحبيبتي تضل سوالف..

ابتسمتلها شكد احبها واحب سوالفها
::- اي اكيد عمه حبيبتي ونعم بالله

جاي نحجي ونزل مأمون ، ابن عمو الجبير، كالعادة ملابسه بالون أسود مايغيره.. كال بهدوء
::- السلام عليكم

ردينه
::- وعليكم السلام

بسرعة كالت عمه
::- ها يمه محتاج شي عدكم ملابس اغسلهن؟

::- لا لا لتعبين روحج ستوني طلعتهن من المجففه.. احم.. بس هذا بنطرون كريم مدري شماكل عليه وماطاح منه ولو اتعبج

ابتسمت واخذته من ايده
::- لا ولو يمه تعبكم راحه

باوعلها.. وابتسم ابتسامة صغيره وطلع..
اجت روان تدردم
::- ترا كلمة شكراً ماراح تقلل من مكانة الامير

أنبتها عمه
::- هذول اخوتج حبيبتي لا تحجين هيج عليهم وابد لا تخلين بكلبج اتجاههم لو هلكد

حضنتها وبوستها بخدودها
::- يا شبيج يمه والله ماقصدي شي اصلا احبهم بس همه مايحبونه انا وانتِ

::- لا حبيبتي يحبونه بس مايبينون مشاعرهم ، بس لا سامح الله من تطيحين بمشكلة تلكيهم واكفيلج وكفة ساتر..

راحت عمه واجت روان سحبتني ورحنه لغرفتها.. غرفه هادئه بسيطة، دخلنه وشمرت روحها على الجربايه ونوب فزت وشغلت بجهازها مولد على الامام علي عليه السلام، وبي نغمه حلوه ضلت تردد وياها وتفرفر بيه..

ضحكت
::- هسه يجيج عمو يكسره براسج يكلج تسمعين اغاني

التفتت للمرايه ترتب بشعرها وتردد وي كلماتة..
::- لا حياتي انا اعرف الاغاني حرام ومااسمعهن والله يبعدنا عنهن.. وهذا مولد وهمين كلت لبابا كال حلال مو حرام..

::- اي هل اكول ماتفوتج هيج فايته..

اذن المؤذن واجت عمه كالتلتنا صلن ولحگني.. صلينه وكملنه..

صاحت عمه من بره
::- يمه رونه تعاي اتصل ابوج رح يجي خلي نصب غدا

طلعنه ثنينه ، وماخلني اروح كللي ضلي للغده يمنه.. نزلو كريم وحسن..
مأمون وحسن وكريم همه ولد عمو من مرته الاولى ومرته الثانيه هيه ام روان وروان عدها اخوات اصغر منها ب٣ سنوات تؤام..

بس مأمون واخوته الطابق الثاني كله الهم وعمو مكملة من كلشي على حيات امهم الله يرحمها ومن توفت عاشو بي و مأمون داره اخوته بعيونه حته ملابسهم بيده يخليهن بالغسالة مايحب يطلب شي من عمه ام روان ف همه تعلموا مرات على كد الوجبة ينزلون يتغدون وياهم..

اجو التؤام اخوات روان الصغار " يوسف _ يمامه " أعمارهم ١٣ سنة.. سلمو وكعدو.. يوسف يحب اخوته يموت عليهم اغلب وقته بالطابق الفوك يمهم ، يمامه ويانه حضرنه الاكل واخذ يوسف السفرة فرشها بالصالة.. كملنه صب واجه عمو ومأمون من الجامع..

خلت روان الاكل على الطاولة.. وراحت طلعت جدو وهوا يحجي عليها
::- اي توكم ذكرتوني وكلتو نوكل هلشايب لكمه ننطي يغمة ماي.. جلاب ولد جلاب

روان
::-جدو حبيبي والله قبل نص ساعة انطيتك ماعون فواكه

::- ولج صبريه ترادديني وتحلفين بالله جذب هم من ثول ثولج ولج الله يذبج بالنار

كعدته وبده ياكل.. جدو هوا جبير بالعمر وعنده خرف وزهايمر ينسه ويحجي امور ماصايره لو من الماضي وهوا عايش ببيت عمو.. صح يحجي عليهم بس ونسة البيت..

انتحبت روان لان كلها "صبرية" هاي صبرية وحده من عماتنه متزوجة بالناصريه بعيد عنه وهوا لان ينسى كل ما يشوف روان عباله بته يكلها صبريه وروان تنفجر..

كعدنه كلنه وانا مستحيه حيل همه صح حاسبيني وحده منهم بس الولد متقيدين مأمون وحسن حته مارفعو روسهم من الاكل يستحون مدري يستحرمون..

فزيت من حاجاني عمو بارق
::- شلونج باباتي ريحونه؟

ابتسمت كلماتة كلهن دفو
::- الحمدلله عمو زينه

::- دومج حبيبتي اكلي بابا لا تستحين

::- ربي يحفظكم عمو ويديم السفره ويديم كادودها يارب

::-حبيبتي ريحونه

اباوعله شلون يفلس اللحم ويخلي كدام روان ويمامه حنيته تخبل ماجنه هوا وابوي اخوه ابد ابد ، تنهدت واندعي الله يديملهم ابوهم ويحفظه الهم يارب ويهدي ابوي..

خلصنة غدا ولملمنه المواعين واخذت روان الجاي الهم وانا غسلت المواعين وي عمه ورحت لبيتنا..

كام يوسف
::- انا اوصلج

ابتسمتله
::- مو بعيد بيتنا

::- ميخالف انا زلمة ماقبلها اختي تطلع وحدها بالضهر

ابتسمتلة وتمشينا، وصلنه ورجع
سحبت السيمه مالت الباب ودخلت..

شفت امي واكفه خزرتني وعضت على اصبعها، بلعت ريگي وأشرتلها شنو..

بعدهي ماحجت وشفت ابوي طلع من باب الغرفة.. لازم الحزام بيده وهز راسة كايل
::- شرفتيييي لعار وين جنتي بالضهاري؟؟

امي
::- مو كتلك يم بيت ابو مأمـ...

عاط بيها
::- سكتييييييي

بلعت ريگي
::-ا.. الحمدلله على سلامتك بويه ا.. الله يساعدك

::- الله لا شافج ولا لفاج الي حقيره شعدج تخبخبين بالبيوت بالضهارييي

::- ببيت عمو.. مارحت لمكان

::-انعل ابوج لابو حته عمج لا خطيتي بعددد ولي حيوانه.. رگعني بالحزام الجان بيده اجت الضربه بيدي.. بجيت ورحت للغرفه مستهضمه مقهورة.. ولهضمني اكثر حجيه..

::- الله لخذا ولدي مايعرف ياخذج ويخلصني منج..

غطيت راسي منهاره اكثر ، منتظره اليوم الي ياخذني بي ربي..

^^^

عيونه ضلت تراقبه وهو محتار ويفكر بالمقترح الي گاله عليه صديقة ، واضح من حركة رجله السريعه ووضعية ايده على ذقنه
حرك ايده اكثر من مرة على لحيته وعيونه تدور محتارة

كسر حاجز السكوت ورجع كاله : شيخ بارق ما اعتقد الموضوع يحتاج كل هذا التفكير ..هلشي راح يحققلك ثروة
جاي تفهم علي شلون انته راح تصير الوحيد بالمنطقه عندك هلشي
شايف الناس شلون راح تجيلك من كل مكان

حرك خرزات السبحة وحجه بعد الصمت الطويل : بس هلشي راح يسجل علي ذنوب جاريه يا استاذ

سكت شوية منزل راسه بعدين التفت عليه وحجه بثقة : ليش ذنوب ..بالعكس الناس راح تسلى ..يعني اكيد راح يدعولك كلما طلعوا من المكان

شرب من جايه ورجع كايل: شيخ بارق الدنيا مو كلها شغل وتعب ..تحل مشاكل الناس ..تروح للجامع ..تحضر عقد زواج ..او ترجع وحده زعلانه لزوجها

لا شيخ الدنيا هم ينرادلها تتونس شويه بحياتك تروح لمكان ترتاح بي بليل بعد تعب النهار ..الراحه مطلوبة شيخ

نهض مرتب خاجيته وعمامته وكال : دورلك واحد غيري استاذ يامن اني ما اكدر اشاركك بهيج مشروع احصل حرام من ورا.. في امان الله

وكفت بسرعه صايحه : لحظه بارق بس خل نتناقش

طلع بدون ما يسمعني ..حرامات توقعت راح يوافق لأن هاي الفكرة راح تخلي اغنى رجال بالمنطقه بس ليش رفض
وين الغلط او الحرام بهيج فكرة بالعكس احنه راح نخدم الناس لأن راح نرفه عنهم..

****

مهره

اخذت بت اخوي زنوبه ورحت للأسواق شوي عنه شترينه شكم حاجه ، امي عين وحده كريمه والثانيه نضرها ضعيف ماتشوف اغلب الحاجات والمسواگ نطلع نجيبهن اني وقطوف

رحت للحجي مالكيت عنده لأريده اضطريت اروح للأسواق الثانية تنهدت يلا مهره بسرعة تاخذين التردينه وترجعين.. باوعت من بعيد اكو ناس داخل الاسواق اي الحمدلله

دخلت وبسرعة خذيت الاريده ورحت اخذت علاگه خليتهن على الميز يحسب سعرهن..

بلعت ريگي بخوف من طلع اخر رجال جان يمنه.. ضليت بس اني وزنوبه وهذا الحقير الي نظراته تنگط قذارة ، اا احسبهن

ابتسم ومدلي العلاگه: من زمان ماجاية عنيتي عليه

غمضت عيوني بنفاذ صبر: شكد سعررررهن

: شنو ما مشتاقتلي؟

رفعتله عيوني خازرته: صدك متستحي انت على الاقل احترم عمرك والشيب لبراسك

: احترك ابوج على هل العيون

: احترررررم نفسكك والغي شكد صارن

: بلاش للحلوات

لزمت ايد زنوبه وكتله: في ميزان سيئاتك ان شاء الله

وخليت وطلعت ضل يصيح وراي ماهتميتله القذر النگس تف عليك وعلى شكولاتك.. مسحت الدمعة لنزلت من عيني من زمان واني اتعرض للكلام لبذيئ من لمايخافون الله ومجبورين نطلع اني وقطوف مالنه احد بس رب العالمين..

****

صفيت السيارة وطفيتها ونزلت وانا افر السويج بيدي الكلب مشتاقلة هوا مايحبني بس انا گلبي كلب يحبه..

باوعت بالحديقة ماشفته كل مره الگاه هنا.. طلعت موبايلي وضغطت على رقمه.. رن.. رن وكالعادة او يرفضه بوجهي او يتركه يرن بدون جواب..

تنهدت وغلقت موبايلي ضميته بجيبي.. طلعت من الحديقة انتجيت على السيارة وضليت منتظر بحدود الربع ساعة مارجع اتصل بيه.. الكلب خلي اروح وارجع واني اعلمه.

اجيت اركب بسيارتي وصفت التكسي نزلو منها ثنين بنات.. عبيهن السودة وجناطيهن مالات المدرسة أميزتهن.

ضليت اراقب لوحت الها بنت عمها ومشت لبيتهم وهيه اجت ماشيه بإتجاه بيتهم..

حجابها مال المدرسة الابيض وعبايتها السودة طاغية وي جمال وجها وخدودها الي صايرات ورديات بسبب ضرب الشمس عليهن..

فزيت من صفنتي وتأملي بيها ، صوتها وهوا يدخل لسامعي نفس أجمل النغمات الاحبها..

ابتسمت وتمشيتلها
::-شلونج شحمه

::- شحمه شنو مو عيب كبرت انا

::- تبقين شحومه لعنونه لتخبلين

::- هههههه شلونك شعجب واكف بره مادخلت

::- منتظر الكلب ذاك انتِ روحي ارتاحي عوفج مني

::-ليش متدخل شمس تعال تعال..

::- تأمرين شحمه

تمشيت وياها وهيه تسولف منطلقة واني احير اصفن على عيونها مدري على كلامها..

فزيت من صفنتي على صوته
::- انت هنا؟

وباوعلها وحجه
::- شجابج وياه انتِ؟

توترت
::- مو وياه بس شسمه لكيته بره ودخلنه سوه.. جان جاي علمودك اصلا

::-يلا روحي دخلي جوه.. وانت تعال

دخلت وانا تمشيت
::- شنو ردك بفلوس ابن الوزير.. هسه مال افلش التلفون براسك المن صانعينه علمود من واحد يتصل تجاوبه تجاااوبه مو تغلقه بوجهه شنو هذا لتكبر

صعدنه الدرج وفتح لباب ليطل على طابقهم الثاني درج خارجي..

ذبيت روحي على القنفه وهوا بده يسوي بالجاي
::- منو انا علمود اتكبر؟ ماتكبرت بس جنت مشغول حبيبي.

رجعت راسي ليورا نزل عن القنفه وكتله
::- مو متدين انت ليش تجذب..

مأمون
::-خليت الجذب الك

ماجاوبته.. رددت كلمات الاغنية من شفت گمر الله يمشي على گاعه
أشكر يبو عيون الشهل..
يالنضرتگ تكتل كتل..

ابتسمت وانا اشوفها بالمكلوب.. عدلت راسي باوعتلها عدل.. ضليت صافن.. متأملها..

مأمون
::- ها روان؟

روان
:- اا شسمة امي دزتلكم ماعون البقلاوة هذا لكيتها مسويته

مأمون
:- جان صحتي علي ليش صعدتي وانتِ ستوج راجعه من المدرسه

::-عادي ماصار شي، الف عافية اكلوا

نزلت وانا عيني وراها
ردتت بهمس::- اول مره اشوف بقلاوه شايله بقلاوة

نتر بيه مأمون من شافني صافن وراها
::-هيووو وين صفنت وشحجيتتتت؟

اتنهدت واخذت الماعون من ايده واخذتلي قطعه ماكلها
::- اممم خرب بحضي شهلطعم يابويه يكول عسل

مأمون
:-احترم نعمة الله لبيدك

::- شمسوي هسه طاكلي بطل عرك وياها

عاط بيه
::- اتسسمم وانت ساكت حيوان ولا تتلفض هيج الفاض كدامي لا افلش سنونك

::- نعتذر شيخنا اسف والله لساني يزل يمك

::- انجب يلا..

رجعت اكل وادندن مبتسم من يجي طيفها كدام عيوني
::- أشكر يبو عيون الشهل..
يالنضرتگ تكتل كتل..

سحلت والدي مو بس كتلتني نضراتك اخخخ

مأمون
::-اكلك لعبت روحي من شفتني وشفتك تحب وتتحسر روح اخطب وفكني

::-مو هسه غير نعيش قصة حب نسولفها لأجيالنا

مأمون
::- رب العالمين يكول ((وأتوا البيوت من أبوابها)) انت تقدملها وعيش قصة حبك بالحلال احسن الك

::- حبيبي هيه حته ماتدري أحبها لأن شوي الأمور مُعقدة

::- ماكو شي صعب خلي نيتك صافية واخذ امك وخالك وحته ابويه واني هم من عيوني اخطبلك ونروح للبنيه وان شاء الله مايرجعونك

تحممت وضليت اباوعله وانزل عيوني متوتر

شرب شوي من كوب الجاي وباوعلي مصغر عيونه.. حاولت اغير لموضوع لا يشك لأنه ذكي..

::- اي اكيد كلكم اخذكم ان شاء الله بس خلي ارتب أموري

مأمون
::- ان شاء الله.. بس ماگتلي منو لتحبها؟

::-من اقرر اخطب تعرفها

::- نعرفها لو غريبه؟

::-تعرفها وكلش قريبه منكم

::-شنوو؟ منيه؟

::-اختك..........

يتبع ....

..
للحكاية بقية♡

لا تنسوا التعليق على الفقرات عيوني 😘

+تم تغيير الأسم لسهولة اللفظ ويناسب القصه اكثر

تحياتي الكم 🫶🏻

نسرين+بدوشه