حبال من حرير

الحلقة الخامسه

صلو على خير البشر
اللهم صلِ على محمد وآل محمد

قراءة ممتعة
بسم الله

#حبال_من_حرير
#نسرين_الاسدي

____

ادم

شفت الساعة ب12:45 كمت متنهد
::- يلا خال انا اروح
::- باجر عطلة ضل هنا شتسوي رايح

::- لا تسلم حبيبي اروح انام وارتاح باجر للضهر ماكعد من لنوم تعبان
::- على راحتك حبيب دير بالك على نفسك تمام
::- صار خال تصبح على خير.

طلعت ركبت سيارتي وشغلتها.. لزمت جهازي اريد اشغل اغاني بس مو مال اغاني ونص ليل..
مشيت بالسيارة وانا اردد بإحدى اغاني هيثم يوسف.

" حَـرت ولحَيرتني انت، ضعت والضيعتني انت"
"حَـرت ولحَيرتني انت، ضعت والضيعتني انت"
" فرح انت، حزن انت  "
"تعذبني واكول للناس مو انت"

اخخ منج يالضيعتيني دكبري يمعوده مو كلبي شعلتي.. خلي نتزوج وانا اعلمج..  واكعد احجيلج شكد حبيتج وانتِ ماتدرين.. ونحجي قصتنا لأولادنا واحفادنا..

شخطت السيارة ووكفتها بسرعة من شفت دراجه مكلوبه والشخص لجواها طالع منه دم.. وواضح عامل توصيل "دليفري"  نزلت بسرعه وتوجهت للولد الي واضح مغمى عليه

انحنيت اله وقبل ما الحك الزمه اتخلى شي صلب على راسي من وره، غمضت عيوني سبيت روحي بداخلي، طيح الله حظ غبائي..

::- ايديك لوره راسك ولا تلعب بذيلك لأن رح تتأذا يحلو
::- ايديكككك يلااااااا

رفعت ايدي ونظراتي على ابو الدراجه الكلب كام كلشي مابي ويضحك لأن خدعني،
::- منو انتو وشتردون مني؟

::- لا تستعجل على رزقك حبيبي كلشي بالهداوه
::- روح فتش السياره

راح واحد منهم دخل للسياره يدور بيها وواحد وكف كدامي مخلي السلاح بأتجاهي والثالث واكف شوي عنه..

طلع من السياره وكال
::- لكيت موبايلين احدث موديل وفلوس والسيارة غنيمة حلوه.. اها وصورة بنية يبووووه مو بنيه تشك.....

ماكمل كلامه وهجمت عليه ضربته واخذت الصوره منه.. ماحسيت غير انلزمت من ايدي ورجعوني كاعد على ركبي.. سحب شعري من وره وباوع بوجهي والسلاح بيده

::- باوع لك لا تتمرجل بروسنه لا نذبحك هنا ونخلي خالك باجر يقيم عزاء لروحك.

حركت راسي وفلت قبضة ايده من شعري ورجع وكف كدامي والسلاح موجه عليه
::- نسألك وتجاوب لا تحاول تجذب
::- لا تخزررررر لا افقص عيونكك