{قصة"اتفاقية زواج" الثاني
أروى كانت في حالة صدمة وغضب شديد بعد ال شادي قاله هي ووائل اخوه واللي هز رأسه بيأس حتى نسمة اختها كانت مذهولة انه ملتزمش بإتفاقهم!
الكل كان سعيد جدا وابتدوا يهنوا بعض ودا جنن "أروى"وخلاها تصرخ فيهم:
_انتوا بتعملوا ايه بجد؟؟!
الكل وقفوا وبصولها بعدم فهم ؛ لحد ما والدتها "نوال" اتكلمت بجدية::
_بنعمل إيه يعني يا أروى بنهني بعض ؛ فرحانين بيكِ يا حبيبتي.
"أروى":
_دا لو انا اصلا م...
قاطعها" شادي" وهو بيضغط على ايديها ويبتسم بتوعد:
_ما خلاص بقى يا حبيبتي ما أنا قولتلك هجيبلك !
جده "سعيد" سأله :
_هتجيب ليها ايه بالظبط؟؟
"شادي" اتكلم بسرعة:
_ايس كريم..تصور يا جدي! ؛ شرطت عليا لو ماجيبتش ليها ايس كريم مش هترضى تتجوزني؟؟
الكل ضحك بعدم تصديق ماعدا سليمان(والدها) اللي نوعا ما حس ان فيه حاجة غلط بينهم ؛ "أروى" بنته عمرها ما وافقت على عريس وصلت لسن ال ٢٧ ولسة لحد دلوقتي رافضة فكرة الجواز شكلا وموضوعاً ومكتفية انها بقت دكتورة ناجحة وخلاص!
أروى سحبت ايدها من ايده واتكلمت بغضب أعمى:
_بقى بتتحداني طب وربنا لأطينها فوق دماغك .
إبتسم بإستفزاز:
_طب أعلى ما في خيلك اركبيه.
جزت على أسنانها وصرخت:
_وقفووو...
الكل انتبه واتخضوا ودا كان قبل ما شادي يمسك ايديها تاني بإبتسامة:
_يا جماعة هو المأذون ماله اتأخر ليه كل دا ما تتصلوا تستعجلوه أنتم مش شايفينها هتموت على الجواز مني ازاي.
الكل ضحك وجدها خاطر اتكلم:
_شايفينها..شايفينها والله يا أبني انا مش مصدق نفسي من الفرحة ؛ ما تتصل يا سليمان تستعجل المأذون هو إحنا كل يوم هنجوز الدكتورة أروى .
أروى كانت فاتحة بوقها وزي ما تكون بتحلم او بتحضر عرض كل اللي بيحصل فيه دا مش طبيعي يعني بعد ما كانت بترفض العرسان وبتشردهم ييجي الحيوان دا يعمل فيها كدة!! اما وائل ونسمة كانوا واقفين بيبصوا لبعض وشبه انجذبوا سوا وبصعوبة ماسكين نفسهم من الضحك على ال شادي بيعمله في أروى وردود افعال الكبار !
نوال ام أروى اتحركت ناحيتها :
_انتِ لسة واقفة عندك يا أروى؛ معقول يا بنتي ؟؟؟
أروى بتوهان:
_عاوزني اعمل ايه يعني يا ماما ارقص؟!
امها بإبتسامة عريضة:
_رقص ايه بس يا بنتي حيلك حيلك انتِ مستعجلة ليه كدة !
شادي ضحك وأروى كملت بتيه:
_اغني طيب!
امها بغيظ:
_تغني ايه يا بت ما تتهدي كدة وتتقلي فضحتينا .
شادي ضحك تاني وامها ابتسمت له بإحراج:
_لامؤاخذة يا جوز بنتي.
شادي بإبتسامة:
_خدي راحتك يا حماتي .
امها ابتسامتها وسعت:
_يخواتي على العسل ! حماتي طالعة منك عسل يا شادي.
اروى بدأت تفوق شوية من التوهان وبصت لأمها بصدمة:
_بقى دا عسل دا؟؟
تجاهلتها عكس شادي ال بصلها بإبتسامة سمجة:
_معثول يا حبيبتي لحقتِ تغيري من دلوقتي ومن امك ؛ معلشي يا حماتي هي عاوزة تقولك اني سكر مش عسل!
ضربته في رجله بجنون:
_ولاا وربنا اخلص عليك !
شادي زقها:
_هي حصلت *ولاا* يا فار تجارب .
أمها انصدمت من اللي بيحصل بينهم .
شادي لاحظ فبرر بسرعة:
_بنتك غيرتها صعبة يا حماتي وشكلي هتعب كتير قُدام!
كانت أروى هترد بس هو كتم بوقها بسرعة وكأنه بيهزر معاها:
_خلاص بقى يا حبيبتي انا اسف ؛ دا انتِ بتغيري جدا .
امها زهقت منهم:
_اسمعوا بطلوا الهبل دا بسرعة وانتِ اطلعي اجهزي وإلبسي فستان حلو واعملي شعرك
سابتهم ومشيت ويدوب شادي هيتنهد أروى فجأته لما عضت ايديه فصرخ بوجع وهو بيخبطها:
_يبنت العضاضة .
الكل لاحظ اللي بيحصل فبسرعة وائل جري عليهم وهو بيبرر:
_بيهزروا حبايبي حبهم ورومانسيتهم فظيعة بشكل!
رجع الكل للي بيعملوه وما اهتموش في الواقع ووائل أخيرا فكهم ؛ أروى قربت من شادي وابتسمت بخبث وتوعد:
_مش انت عاوز تتجوزني خلاص وانا موافقة بكرا نشوف مين اللي هيجنن التاني يا أنا يا انت يا ثقيل.
ضحك واستهزأ بيها:
_وبكرا ليه ما من النهاردة يا عبيطة.
جريت عليه تاني بس نسمة لحقتها واخدتها بعيد وهي بتكلمها بغيظ:
_يوه انِتي لسة هتتخانقي دا يدوب تغسلي شعرك وتلبسي المأذون زمانه على وصول .
مشيت مع اختها بالعافية وهي طالعة على السلم طلعته لسانها بطفولية وتوعد ؛ وهو رد عليها وهو بيرمي ليها بوسة في الهواء وبيستفزها:
_تشاووو بيبي هتوحشيني من هنا لحد ما تنزلي!
خبطت اروى درابزين السلم وطلعت مع اختها تحت ضحك شادي ووائل اللي بص لاخوه واتكلم بصعوبة:
_يا قادر.
شادي ابتسم:
_عَجبتك؟
وائل بضحك:
_إنت منك لله اصلا!
ابتسم وسكت ووائل سأله؛
_ليه خالفت الاتفاق!
هز كتفه ببساطة:
_معرفش بس ماشوفتش واحدة غيرها بجنونها وهبلها تنفع تكون مراتي ؛ حبيت طبيعتي معاها وطولة لسانها عليا أنا شقي ونشيط ومفيش غيرها انسب ليا ولا فيه غيري انسب مني ليها!
وائل ربع ايديه:
_وبس كدة!
ضحك شادي:
_وبصراحة عشان انتقم منها برضو واربيها بعد ما قالوا كدة الموضوع زن في دماغي وحلفت لانفذه اومال!
ربط على كتف اخوه الكبير:
_ربنا يتمملك على خير يا حبيبي ويهديكم حاكم انا حاسس نفسي بحضر فرح فوزية في مسرحية سك على بناتك لايف ومش متخيلك انت واروى يوم فرحكم غير فوزية وجوزها في الكوشة بيضربوا بعض!
شادي ضحك وبعدها سكت و بصله بخبث:
_وعقبالك يا خويا على اللي في بالك!
وائل انتبه بلهفة:
_انت اخدت بالك!
رد شادي:
_وهو لسة في حد ما أخدش باله
ضحك وائل:
_نخلص منك وبعدها افاتحهم في موضوعي.
شادي :
_ما بلاش احسن اعتبرها نصيحة اخوية وكدة .
وائل بسخرية:
_لا اطمن خايهالك نسمة مش أروى وانا مش انت.
ضحك ومردش
المأذون وصل اخيرا والكل اتحرك يقعد حواليه بإنتظار العروسة عشان يبدأو ؛ نسمة نزلت لوحدها وكان واضح انها متوترة وائل بصلها بإستفسار وهي هزت رأسها بغيظ فعرف ان اروى عملت مصيبة...
الكل سألها عن اروى وهي ردت بقلق :
_نازلة ورايا بس قالتلي اسبقها.
شادي سألها بهمس:
_اختك عملت مصيبة إيه؟؟
نسمة ردت بغيظ منهم:
_اهي نازلة وهتشوفها بنفسك ؛ اعقلوا بقى دا انتوا دكاترة.
تجاهلها ورجع يتكلم مع سليمان وتفكيره مع المجنونة ال فوق
فجأة اتخض الكل على صوت شهقة سلوى (أم شادي) وهي بتبص على السلم برعب:
_سلاما قولا من رب رحيم ، انصرف..انصرف.
زياد اخو اروى الصغير صرخ بخوف وهو بيتحامى في امه :
*_عفريتة..فيه عفريتة هناك.*
كانت أروى شكلها مخيف بالميكاب ال حطاه وكله أسود دا غير شعرها ال كان وكأنه تعرض لصاعقة كهرباء والفستان الاسود اللي زي بتاع الساحرات ، كانت وكأنها خارجة من فيلم رعب مش شكل دكتورة تجميل ابدا.
الكل أستشهد اول لما شفوها ما عدا نسمة وشادي اللي أبتسم بسخرية وكأنه كان متوقع،،!
اروى قربت من حماتها الخايفة:
_ فيه ايه يا حماتي مالك زي ما تكوني شوفتي عفريت؟؟..
سلوى بعدت بخوف وتمتمت:
_اللهم احفظنا.
قلبت أروى عينيها بملل وجدها اتكلم بغضب:
_اقدر افهم ايه اللي أنتِ عملاه في نفسك ده يا دكتورة!
اروى ببرود:
_عملت إيه يا جدو ما انا زي القمر اهو ، وبعدين اهم حاجة أعجب عريسي
شادي رفع حاجبه وهي سألته بتحدي:
_ايه رأيك في الميك اب والاوت فيت بتاعي يا عريسي.
فاجأها لم أبتسم وخالف توقعاتها ورد ببرود:
_ قمر طبعا يا حياتي مشوفتش اجمل من كدة
كلهم بصوله بتشنج وهي اتغاظت منه وأبوها شاورلها بغضب؛
_هتفضلي واقفة كدة كتير بشكلك ده مش هتتفضلي؟
قربت ويدوب هتقعد جنب شادي سمعت المأذون بيردد برعب:
_احفظنا بحفظك منهم يارب واحرقهم كلهم في نار جهنم.
*شادي* ضحك و*أروى* ضربته وبصت *للمأذون* بسخرية:
_طب انجز يا شيخنا عشان مطلعهمش عليك.
*المأذون* بصلها بخوف وبدأ فعلا ومكنش بيبصلها أبدا ؛ جدها كان وكيلها وحط ايده في ايد *شادي* وبدأ عقد القران والكل سعيد ما عدا هي كانت سرحانة وبتبص حواليها بشرود لحد ما فاقت على صوت "*المأذون*":
_بارك الله لكما وبارك عليكما وجمع بينكما في خير.
الكل بدأ يهني بعض و *المأذون* اتحرك بسرعة وبدأ يلم حاجته وهمس ل*شادي* بشفقة:
_خسارة والله يا ابني تضيع شبابك اللي زي الورد دا مع اللهم ما حفظنا ؛ يلا ربنا يعينك يا ابني هقول ايه ساعة القضى بيعمى البصر
شادي هز رأسه بآسى مصتنع:
_إدعيلي يا شيخ.
اروى قربت منه بتحذير:
_بتقول حاجة يا شيخ..
المأذون بعد :
_اعوذوا بالله من الشيطان الرجيم، انصرف.
بصتله بضيق وبعدها خدت بالها من شادي اللي بيقرب منها بإبتسامة غريبة فبعدت بسرعة :
_انت مالك ياض بتبصلي ليه كدة.
قرب تاني وفتح دراعه:
_عاوز حضن من اللي هو بيبقى بعد كتب الكتاب دا.
إبتسمت بخبث ووهمته انها هتحضنه بس فجأة ضربت رجله وهو بعد وصرخ بألم:
_اه يا بنت المجنونة.
ضحكت أروى بإستمتاع:
_احسن عشان تبطل قلة أدب.
صرخ شادي:
_قلة ايه يا روح امك هو أنا شاقطك دا انتِ مراتي يا غبية.
ربعت ايديها:
_وليكن مش من حقك..
اتعدل في وقفته وقرب منها بغيظ:
_تصدقي بالله انا االي غلطان عشان حبيت اجبر خاطرك بشكلك العرة دا ؛ روحي استحمي يا بت دا انا مطيقش اقربلك اصلا بريحتك دي بس هعمل ايه جبر الخواطر بقى على الله.
ضربته في كتفه :
_روح انت سرح شعرك الاول يا بابا وابقى تعال اتكلم.
شادي ضحك:
_هروح حاضر بس ايه رأيك تيجي انتِ كمان معايا لسمكري نشفهولك عشان يشيل الشحم اللي حطاه على وشك دا.
بصتله بصدمة:
_هقول ايه ما انت بدائي جاهل..دا مش شحم يا جاهل دا فونديشن اسود
زعق بصدمة:
_فونديشن ايه يختتتتتي سمعيني تاني كدة؛ دا مين اخترعه جديد دا جن سفلي؟
تمتمت بقرف:
_جاهل بصحيح.
تمتم هو كمان:
_قال دكتورة تجميل قال دي دكتورة تقبيح مش تجميل.
ضحكت اروى بإستهزاء:
_طب اسكت انت يا دكتور النساء يا بتاع النسوان يا معفن يا ابة عين زايغة
كان لسة هيرد بس جده وجدها قربوا وبصولهم بغضب:
_انتوا مش هينفع نصبر عليكم اكتر من كدة بعد اللي حصل النهاردة؛ اسمعوا فرحكم هيبقى كمان اسبوع ابقوا تعالوا قاعة اللؤلؤة عشان متقولوش مقولناش ليكم بس.
بصوا لبعض بصدمة وأروى عيطت بحسرة:
_شكرا على العزومة والله متنسوش تبعتولنا كارت دعوة عشان يدخلونا القاعة بقى .
يُتبع..