ဂျုံဆောင်း၏ ကားလေးသည် "GBK" ဟူသော အဆောက်အအုံကြီးကြီးတစ်ခုရှေ့တွင် ထိုးရပ်လိုက်သည်။ ဂျုံဆောင်းအခုရောက်နေသည်မှာ ဥက္ကဌရှင်မ်၏ ကုမ္ပဏီတွင်ဖြစ်လေသည်။ ဒီနေ့တွင် ဥက္ကဌရှင်မ်သည် သူ့အားတွေ့ချင်သည်ဟုပြောကြောင်း ဂျိတ်ခ်ပြော၍ လာခဲ့ခြင်းဖြစ်သည်။
ဂျုံဆောင်းသည် ကုမ္ပဏီသို့ရောက်ရောက်ချင်း အတွင်းရေးမှူးဖြစ်ပုံရသော ကောင်မလေးသည် သူ့အား ဥက္ကဌရှင်မ်၏ ရုံးခန်းသို့လိုက်ပို့ပေးသည်။ သူလည်း ကျေးဇူးတင်ကြောင်းပြောကာ တံခါးအား ခေါက်လိုက်သည်။
"ဒေါက်..ဒေါက်..ဒေါက်"
ထိုအခါ အခန်းတွင်းမှ
"၀င်ခဲ့ပါ"
ထို့ကြောင့် ဂျုံဆောင်းသည်အခန်းတွင်းသို့၀င်၍ ဥက္ကဌရှင်မ်အား ရိုသေစွာနှုတ်ဆက်လေသည်။
"မတွေ့ရတာကြာပါပြီ ဥက္ကဌ နေကောင်းရဲ့လား"
ဂျုံဆောင်းသည် တွေ့တွေ့ချင်းပင် တရိုတသေနှုတ်ဆက်လာသည်။ သို့သော် သူဒီနေ့စိတ်ထဲ လေးလံနေမိသည်။ ဥက္ကဌရှင်မ် သူနှင့်တွေ့ချင်သည်မှာ စီးပွားရေးကိစ္စသာမက အခြားအကြောင်းတစ်ခုခု ရှိနေသလိုပင်။
"ကောင်းပါတယ်ကွယ်။ အသက်ရလာလို့ ဟိုနာဒီနာတော့ရှိတာပေါ့ကွာ"
ထိုသို့ဖြေပြီးပြီးချင်တွင် လေထုသည် ဆိတ်ငြိမ်သွားခဲ့သည်။ ထို့ကြောင့် ဂျုံဆောင်းကပင် စကားစပေးလိုက်လေသည်။
"ဥက္ကဌ ဘာကိစ္စများရှိလို့လဲ။ ဥက္ကဌရှင်မ်က ကျွန်တော်နဲ့ စီးပွားရေးကိစ္စပြောစရာရှိတယ်လို့ပြောလို့လာခဲ့တာပါ"
ထိုအခါ ဥက္ကဌရှင်မ်က.....
"အန်ကယ် အခုတွေ့ချင်တာ စီးပွားရေးကိစ္စမဟုတ်ဘူး။ တစ်ခြားကိစ္စပါ။ အန်ကယ့်သားကိစ္စပေါ့"
ဂျိတ်ခ်အကြောင်း ပြောလာသည်ကြောင့် ဂျုံဆောင်းစိတ်၀င်စားမိသည်။ ထို့ကြောင့်.....
"ဟုတ်ကဲ့ပါ ဥက္ကဌ"
ထိုသို့ ဂျုံဆောင်းဖြေလိုက်ချိန်တွင် ဥက္ကဌရှင်မ် စကားပြန်စလာခဲ့သည်။
"အန်ကယ့်သားမှာ ချစ်သူရှိတာ မောင်ရင်သိတယ်မဟုတ်လား"
ဂျုံဆောင်း ပင့်သက်ရှိုက်လိုက်မိသည်။ တစ်ချိန်တည်းတွင်လည်း ဂျိတ်ခ်တွင်ချစ်သူကောင်မလေးရှိမှန်းသိလျက်နှင့် သူ့အားလက်ထက်ရန်လက်ခံပေးခဲ့သည်ကို အံ့အားသင့်မိသည်။
သို့သော် ထိုအရာများအား ဖုံးဖိ၍ အဖြေအား ဂျုံဆောင်း အားယူကာဖြေလိုက်သည်။
"ကျွန်တော် သိပါတယ်"
ထိုအဖြေကြောင့် ဥက္ကဌရှင်မ် စကားထပ်စလာသည်။
"သားရဲ့ကောင်မလေးက အိုယွန်းအာ လေ။ သူ့အဖေက နိုင်ငံရေးသမား။ လွှတ်တော်အမတ်လေ"
ဂျေးက အသိအမှတ်ပြုသည်ကို ခေါင်းငြိမ့်ကာ ဖော်ပြသည်။ ထို့နောက် ဥက္ကဌရှင်မ်က....
"မောင်ရင်နှင့် လက်ထက်ပေးတယ်ဆိုတာ ဂျိတ်ခ်နှင့် အိုယွန်းအာကို ကွဲစေချင်လို့ဘဲ"
ဂျုံဆောင်း မျက်၀န်းလေးတွေ လှုပ်ခတ်သွားသည်။ ထို့နောက် ဥက္ကဌရှင်မ်အားကြည့်လိုက်မိသည်။
ဥက္ကဌရှင်မ်က ဆက်ပြောလာသည်။
"အိုယွန်းအာက အန်ကယ့်သားဆီကနေ ပိုက်ဆံအတွက် ကပ်ဖားနေတာ။ ပြီးတော့ သူ့အဖေဆိုတာကလည်း လွှတ်တော်အမတ်လို့သာ အမည်ခံထားတာ။ နောက်ကွယ်မှာ အန်ကယ့်ဆီက ရှယ်ယာတွေခိုးနေတာ။ ပြီးတော့ သူကုမ္ပဏီတွေ ထောင်မလို့ပေါ့။ အန်ကယ်ဒီကိစ္စကို ရှင်းပစ်လို့ရတယ်ဆိုတာ မင်းသိမှာပါ"
ထိုအချိန် ဂျုံဆောင်း မေးခွန်းမေးလိုက်မိသည်၊
"ဒါဆို ဘာလို့ ဂျိတ်ခ်ကို....."
စကားပင်မဆုံးသေး ဥက္ကဌရှင်မ်က စကားဖြတ်ပြောသည်။
"မပြောတာလည်းလို့ မေးမလို့လား။ ဒီမှာမောင်ရင် မင်းကိုအန်ကယ်ကအခွင့်အရေးပေးတယ်ဆိုတဲ့ သဘောပဲ"
ဂျုံဆောင်း နားမလည်ပါ။ မည်သို့ဤသို့ ပြောသနည်း။ သို့သော် ဂျုံဆောင်း၏ အမူအရာကိုကြည့်၍ ဥက္ကဌရှင်မ်ပြောလာသောစကားသည် သူ့အားမျှော်လင့်ချက်ရောင်ခြည်လေး ဖြစ်လာခဲ့သည်။
"မင်း အန်ကယ့်သားကို ချစ်နေပြီမဟုတ်လားကွ။ ဂျိတ်ခ်ကို ကာကွယ်ပါ။ ဒီအခွင့်အရေးကို အသုံးချပြီး ဂျိတ်ခ်ရဲ့စိတ်ကိုရအောင်ယူပါ။ မင်းအချစ်သာ စစ်မှန်ရင် အန်ကယ့်သား သေချာပေါက် မင်းကိုပြန်ချစ်လာလိမ့်မယ်။ အကူအညီလိုရင်လည်းပြောပေါ့ကွယ်"
ထိုသို့ပြောသွားသော ဥက္ကဌရှင်မ်သည် ပြုံးယောင်လေးသန်းနေလေသည်။ ဂျုံဆောင်းလည်း ထပ်တူလိုက်ပြုံးမိသည်။ ထို့နောက် ဂျုံဆောင်းပြောလိုက်သော စကားသည်။
"ဂျိတ်ခ်ကို အခြားအကြောင်းအရင်းတစ်စုံတရာကြောင့် မဟုတ်ဘဲ ကျွန်တော်မေတ္တာသန်သန့်နဲ့ မြတ်နိုးတာပါ။ အဲ့တာကြောင့် ကျွန်တော်ချစ်ရတဲ့လူ အန္တရာယ်မဖြစ်အောင် မပင်ပန်းရအောင် ကျွန်တော်ကြိုးစားမှာပါ"
ဥက္ကဌရှင်မ် ပြုံးလိုက်ကာ....
"မင်းကို အန်ကယ် သမက်အဖြစ်ရတာ သိပ်ကံကောင်းတယ်ကွာ"
☆☆☆☆☆☆☆☆☆☆☆☆☆☆☆☆☆☆☆☆
ဂျုံဆောင်း ညနေစောင်းလောက်မှ အိမ်ပြန်ရောက်သည်။ ဥက္ကဌရှင်မ်နှင့် စကားပြောတာ အချိန်ကြာသွားခဲ့သည်ထင်။ ထို့နောက် အိမ်ထဲသို့၀င်၀င်ချင်း သူ့နာမည်အား ဧည့်ခန်းရှိ ဆိုဖာပေါ်တွင် ထိုင်နေသော ကောင်လေးက လှမ်းခေါ်သည်။
"ပတ်ခ်ဂျုံဆောင်း ခင်ဗျား ကျုပ်ဒယ်ဒီနှင့် ဘာအကြောင်းတွေပြောလာတာလဲ"
ခပ်အေးအေးလေသံလေးနှင့် သူ့အားမော့ကြည့်နေသောကောင်လေး။ သူလည်း.....
"ကိုယ်တို့လုပ်ငန်းတွေအကြောင်းပါ ဂျိတ်ခ်ရဲ့"
ထိုအခါ ကောင်လေးက.....
"ကောင်းပီ"
ထို့နောက် ဂျုံဆောင်း ဂျိတ်ခ်၏ မျက်နှာချင်းဆိုင်ဖက်တွင် ထိုင်လိုက်ကာ.....
"ကိုယ်မင်းကို ပြောစရာရှိတယ်"
ကောင်လေးက ဖုန်းကိုသာ အာရုံစိုက်လျက် စိတ်မရှည်ဟန် ပြောဆိုသည့်သဘောဖြင့် မေးငေါ့ပြလေသည်။
"ဂျိတ်ခ်......ကိုယ်နှင့်ညနေကျရင် တစ်နေရာလိုက်ခဲ့ပေးမလား"
ကောင်လေးက စိတ်ရှုပ်ထွေးစွာ စိတ်ရှုပ်ဟန်ပြလာသည်။
ဂျုံဆောင်းက စကားဆက်သည်။
"ကိုယ့်ကုမ္ပဏီကိုပါ။ ကိုယ့် ကုမ္ပဏီဆီ မင်းမရောက်ဖူးဘူးမလား။ အဲ့တာ....."
ထိုအချိန်တွင် ဂျိတ်ခ်စကားစဖြတ်ပြောလိုက်သည်။
"ကျုပ်မအားဘူး။ ချိန်းထားတာရှိတယ်"
ထိုသို့ပြောလိုက်တော့ ဂျုံဆောင်းထပ်မပြောဖြစ်ပါ။ အတင်းလည်းမခေါ်ချင်။ စိတ်ပါမှသာ သူခေါ်ချင်ပါသည်။ ဂျိတ်ခ်ကို စိတ်မညစ်စေချင်ပါ။ သို့သော် ဒီအခွင့်အရေးကို အသုံးချ၍ ဂျိတ်ခ်အကြောင်းလည်းပိုသိချင်သလို ရင်းနှီးမှုလည်း ပိုရချင်ပါသည်။
သို့သော် သူပြုံး၍.......
"ဟုတ်ပါပြီ။ မင်းမလာချင်ရင် ကိုယ်အတင်းမခေါ်ပါဘူး။ နောက်တော့လာပေါ့"
ကောင်လေးက ဖုန်းကိုသာ အာရုံစိုက်လျက် သူပြောသည်ကို ကြားမှန်းမကြားမှန်းတောင်မသိ။
ဂျုံဆောင်း ဖွဖွလေးပြုံးလိုက်မိသည်။
"ကိုယ်က မင်းကို ချစ်နေသူမို့ ဘယ်လောက်ဘဲစောင့်ရစောင့်ရ စိတ်ရှည်ရှည်နဲ့ ကိုယ်စောင့်မှာပါ"
☆☆☆☆☆☆☆☆☆☆☆☆☆☆☆☆☆☆☆☆
ညနေခင်းအချိန်တွင် ဂျုံဆောင်း ကုမ္ပဏီသို့လာခဲ့သည်။ ညနေ ငါးနာရီလောက်တွင် ရောက်ခဲ့သည်ဖြစ်သော်ငြား ယခုမူ ညရှစ်နာရီပင် ရှိနေချေပြီ။ သို့သော် အလုပ်များမပြီးပြတ်သေး၍ ပြန်ဖြစ်သေးမည်မထင်။ ထိုအချိန် တံခါးခေါက်သံ ပေါ်ထွက်လာသည်။
"၀င်ခဲ့ပါ"
ထိုသို့အသံပြုလိုက်ချိန်တွင် အတွင်းရေးမှူးကောင်မလေးသည် သူ့အားတိုးလျစွာ ပြောလာသည်။
"ဥက္ကဌကြီးက တွေ့ချင်လို့ပါတဲ့"
ဂျုံဆောင်း သက်ပြင်းဖွဖွချလိုက်မိသည်။ သူ၏ပထွေးဖြစ်သူသည် ပြသာနာတစ်ခုခုဖြစ်ပေါ်မှသာ သူ့အားအရေးတယူတွေ့သည်ဖြစ်ရာ သူစိတ်ပူရပြန်သည်။ ယခု သူတို့ကုမ္ပဏီသည် နလန်ပြန်ထူနိုင်အောင်မနည်းကြိုးစားနေရသည်ဖြစ်သည်။ သူ၏ပထွေးသည် မည်သည့်ပြသာနာများ ရှာခဲ့ပါသနည်း။
ဂျုံဆောင်း သူ၏ပထွေးရုံးခန်းထဲသို့ တံခါးခေါက်၍၀င်လိုက်သည်။
"ကျွန်တော့်ကို ပြောစရာရှိလို့ဆို"
၀င်၀င်ချင်း ထိုသို့ပြောလိုက်သည်ကို လက်ဖက်ရည်အား ဆင်ပြေနပြေ သောက်နေသော ထိုလူက မော့ကြည့်သည်။ ထို့နောက် ပြောလိုက်သော စကားသည် ဂျုံဆောင်းအား ဆွံ့အသွားစေသည်။
"ငါ့ကိုသိန်း ၁၀၀၀ လောက်ထုတ်ပေး။ ထုတ်ကုန်အသစ် project မှာ မှားသွားတာတွေရှိတယ်။ အစကနေ ပြန်လုပ်ရမယ်"
ဂျုံဆောင်း ချက်ချင်းစကားပင်ပြန်မပြောနိုင်။ သိန်း ၁၀၀၀ ဆိုတာနည်းသည့်ပမာဏလား။ ယခု ကုမ္ပဏီ၏ အခြေအနေကိုမသိ၍လား။ သူဒေါသထွက်မိသွား၍.....
"အခု ကျွန်တော့် ထုတ်ကုန်တွေကုန်ပြီ။ အဲ့တာကြောင့် ကျွန်တော်ကိုယ်တိုင် လုပ်မယ်ပြောတာ။ ပြီးတော့ သိန်း ၁၀၀၀ ဆိုတာနည်းတဲ့ပမာဏလား။ အခုတောင် ကုမ္ပဏီရဲ့ ရန်ပုံငွေထဲကသုံးနေရတာ"
ထိုအခါ ထိုလူက....
"မင်းငါ့ကို အပြစ်လာတင်မနေနဲ့။ ငါလည်းဖြစ်ချင်လွန်းလို့ မဟုတ်ဘူး။ အခု မင်းပိုက်ဆံ သိန်း ၁၀၀၀ မပေးနိုင်ရင် ငါ့ကုမ္ပဏီသွားမှာ။ ရအောင်ရှာခဲ့။ မရရင် ငါ့အဆိုးမဆိုနဲ့။ မနက်ဖြန်အပြီးလိုချင်တယ်။ ထွက်သွားတော့"
ဂျုံဆောင်း ရုံးခန်းတွင်းသို့ပြန်ရောက်သည်နှင့် toilet ထဲ၀င်ကာ မျက်နှာအား အကြမ်းပတမ်းသစ်မိသည်။ ဤကုမ္ပဏီသည် သူ့အသက်ဖြစ်သည်။ ထိုလူ၏ ကြိုးစားအားထုတ်မှု တစ်ခုမျှမပါ။ ဒါတောင် ဒါသည်သး့ကုမ္ပဏီတဲ့လား။ ဂျုံဆောင်း သူ၏ကုမ္ပဏီကို အလဲလဲအပြိုပြိုအဖြစ်မခံနိုင်ပါ။ ယခုအချိန်တွင် ပိုက်ဆံသိန်း ၁၀၀၀ အားမနက်ဖြန်အမှီ မည်သို့ရှာရမည်နည်း။
ဂျုံဆောင်း ညဆယ့်တစ်နာရီလောက်တွင် အိမ်ပြန်လာခဲ့သည်။ အိမ်တွင် ဂျိတ်ခ်ရှိပုံမပေါ်။ ထို့ကြောင့် ဂျုံဆောင်းသူ၏ အိပ်ခန်းအတွင်းသို့၀င်ကာ မှိန်းနေလိုက်လေသည်။ မနက်တစ်နာရီခန့်တွင် ဂျိတ်ခ်ပြန်ရောက်လာပုံပေါ်သည်။ နဂိုပင် အိပ်ဖို့ခက်ခဲသူမို့ အိပ်မပျော်သေး။ ထို့ကြောင့် အောက်ထပ်ဆင်းလာခဲ့သည်။ သို့သော် သူမြင်လိုက်ရသည့်မြင်ကွင်းကြောင့် နှလုံးသားတစ်ခုလုံး ကွဲကြေစုတ်ပြတ်သွားသယောင်ပင်။
31.10.2023