"ဂယူ ဂယူ အအေး၀ယ်သောက်ရအောင်"
"မင်းသောက်လေ ဘာသောက်မလဲ"
လမ်းပေါ်တွင်ဖွင့်ထားသော
ဖျော်ရည်ဆိုင်အသေးလေးတွင်ဖြစ်သည်။
"စတော်ဘယ်ရီ မင်းရော"
"ငါ မသောက်တော့ဘူး"
"သောက်လေကွာ"
ဆိုင်ရှေ့တွင် ခပ်ကြိတ်ကြိတ်ရန်ဖြစ်နေသည်။
ဂယူဗင်းမသောက်တော့ ဘယ်လိုလုပ်မလဲ
ချွမ်းရွေ့က မတူတဲ့အရသာ နှစ်မျိုးသောက်ချင်တာ။ တစ်ယောက်တည်း နှစ်ခွက်သောက်ဖို့ကျတော
မကုန်။
"ကိုကိုပြောနေတယ် သောက်လို့"
ကဲ ဂယူဗင်း လက်မြောက်လိုက်ရပါသည်။
"သရက်သီးတစ်ခွက် စတော်ဘယ်ရီတစ်ခွက်
ပေးပါဗျာ၊စတော်ဘယ်ရီထဲ
ရေခဲများများထည့်ပေးပါ"
ဆိုင်ဘေးက စားပွဲမှာထိုင်စောင့်ရင်း
ချွမ်းရွေ့မှာနေသည်ကို ဂယူဗင်း ငေးကြည့်နေသည်။ ဘာလုပ်လုပ် ချစ်ဖို့ကောင်းသည်။ ပိုတိုးချစ်ရသည်။
"ဟို ညီလေး "
ခေါ်သံကြားရာ လှည့်ကြည့်မိတော့ အ၀တ်စားသပ်သပ်ရပ်ရပ်၀တ်ထားတဲ့ အစ်ကိုကြီးတစ်ယောက်။
"ဟုတ်ကဲ့"
"ညီလေး သရုပ်ဆောင်လုပ်ဖို့ စိတ်၀င်စားလား"
"စိတ်မ၀င်စားဘူး"
ယတိပြတ်ပင် ငြင်းချလိုက်သည်။
သရုပ်ဆောင်မှမဟုတ် ဘယ်အရာကိုမှ
ဂယူဗင်း မလုပ်ချင်။
"တစ်ခေါက် ထပ်စဥ်းစားကြည့်ပါဦးလား၊
ဒီလိုလုပ် အစ်ကို ဒါလေး ထားခဲ့မယ် အိမ်ကလူကြီးတွေနဲ့ဖြစ်ဖြစ် တိုင်ပင်ပြီး ပြန်ပြောလေ"
ဂယူဗင်းကြည့်လိုက်မိတော့ လိပ်စာကဒ်။
သူစိမ်းအစ်ကိုကြီး ထထွက်သွားမှ အအေးဘူးနှစ်ဘူးကို ပိုက်ထားသည့် ချွမ်းရွေ့သည် ဂယူဗင်း
အရှေ့တွင် ပြေးထိုင်သည်။
လိပ်စာကဒ်ကိုလည်း ယူကြည့်သည်။
"ဝါး မိုက်တယ် ဂယူဗင်း၊အိုင်ဒေါလ်တွေပြောနေကြ လမ်းပေါ်မှာလူရွေးခံရတာမလား"
ကာယကံရှင် ဂယူဗင်းထက် ရစ်ခီသည်
ပိုပျော်၊ပိုစိတ်လှုပ်ရှားနေသည့်ပုံ။
"မင်း ဘာပြန်ဖြေလိုက်လဲ၊ လုပ်မှာမလား"
"မလုပ်ဘူးလို့ဖြေလိုက်တယ်"
သရက်သီးဖျော်ရည်အေးအေးလေးကို
တစ်ငုံ့သောက်ရင်း စိတ်ပျက်သွားသော
ချွမ်းရွေ့မျက်နှာအား ကြည့်မိတော့ ရင်ထဲ
ချိုချိုမြမြလေး။
"ဟာ မင်းကလည်း ဒီလောက်ကောင်းတာကို"
"မင်းကငါကို လုပ်စေချင််လို့လား"
စတော်ဘယ်ရီဖျော်ရည်ကို တစ်ကျိုက်ရှိုက်ရင်း
ရစ်ခီ ခေါင်းငြိမ့်ပြသည်။
"ဘာလို့လဲ"
"ရုပ်ရှင်မင်းသားဖြစ်ရတာ မိုက်တယ်လေ၊
မင်း နဲ့ အဲအလုပ်နဲ့က လိုက်တယ်၊ ဒါနဲ့ ငါကရော
ဘာအလုပ်နဲ့လိုက်မယ်ထင်လဲ"
"တစ်စုံတစ်ယောက်ရဲ့ အိမ်သားလေး"
"အဲတာဘာအလုပ်ကြီးလဲ ငါ ရုပ်ငါရည်နဲ့ဆို
မော်ဒယ်လောက်ဖြစ်ဖြစ်"
"မလိုက်ပါဘူး "
ချွမ်းရွေ့သည် ရှုံ့တွသွားသည်။
ဂယူဗင်းသည် ချွမ်းရွေ့ခန္ဓာကိုယ်ကို သူများတွေထိတာမကြိုက်၊မြင်တာလည်းမကြိုက်။
***
ဂယူဗင်း နှစ်ခေါက်ထပ်မစဥ်းစားဘဲ ထိုညတွင်
လာကမ်းလှမ်းချက်ကို လက်ခံလိုက်သည်။
ချွမ်းရွေ့ သဘောကျတာတွေဆို ဂယူဗင်း
သိပ်သဘောကျသည်။ ချွမ်းရွေ့သည်
သူနဲ့ ပတ်သက်ပြီး သဘောကျတဲ့အရာတွေများလာခြင်းကိုတော့ ပိုပြီးတောင် သဘောကျသေးသည်။
ဂယူဗင်းသည် ထိုနေ့မှ စတင်၍ အလုပ်များတော့သည်။သရုပ်ဆောင်သင်တန်း၊ဟိုသင်တန်း
ဒီသင်တန်း အစရှိသဖြင့် ရေတွက်လို့ မကုန်နိုင်အောင် သင်တန်းတွေတက်ရသည်။
ချွမ်းရွေ့နဲ့ တွေ့ချိန်နည်းသွားမှာကို မလိုလားတဲ့
ဂယူဗင်းက အချိန်ရသလောက် ချွေတာ၍
ချွမ်းရွေ့နဲ့ ပုံမှန်အတိုင်း သွားတွေ့သည်။
သို့သော် ပင်ပန်းနေသော ဂယူဗင်း၏ ပုံရိပ်သည်
မဖုံးကွယ်ထားနိုင်။
"မင်း ကို ကြည့်ရတာ ပင်ပန်းလိုက်တာ"
ပါးစပ်ကသာ ထိုသို့ပြောပေမဲ့ စားပွဲပေါ်
လက်တင်ကာ မှောက်ချလိုက်သူကတော့ ချွမ်းရွေ့။
ဂယူဗင်းသည် လည်ကုတ်အစပ်လေးကို
ခပ်ဖွဖွပွတ်သပ်သည်။ချွမ်းရွေ့က ခဏ မော့ကြည့်လာသည်။ဘာမှတော့မပြော။
"မင်း က ငါထက်တောင် ပိုပင်ပန်းနေပုံပေါ်သေးတယ်"
"ငါ ကျောင်းအပြင် အချ်ိန်ပိုသင်တန်းတက်နေရတယ်၊ မတက်ချင်ဘူး၊မင်း နဲ့ အတူတူ သရုပ်ဆောင်လိုက်လုပ်ချင်တယ်၊မင်းတို့ ကုမ္ပဏီ လူမလိုဘူးလား"
ဂယူဗင်း၏ ရယ်သံ သဲ့သဲ့လေးထွက်လာသည်။
သင်တန်းသားရွေးချယ်တဲ့နေရမှာ လူလိုရင်
၀င်လုပ်မယ်။ မလိုရင် ၀င်မလုပ်ဘူးလို့ ရွေးချယ်လို့ရသည်လား။
"မလိုဘူးထင်တယ်"
"ဟွန်း"
***
သင်တန်းကဆရာ၏ထောက်ခံပေးမှုနဲ့အတူ
ဂယူဗင်း၏ စန်း နဲ့ ပါရမီကြောင့် ပွဲဦးထွက်ရုပ်ရှင်အဖြစ် ရုပ်ရှင်ကားကြီးတစ်ကားတွင်
ပါ၀င်ခွင့်ရလာသည်။
ဂယူဗင်း၏ဇာတ်ကောင်သည် နွေးထွေးကြင်နာမှု
အပြည့်ရှိဟန်ဖြင့် လူတွေကို ကူညီပေးတတ်သော်လည်း နောက်ဆုံးတွေ စိတ္တဇ လူသတ်ကောင်ကို ကိုးကွယ်သော လူတွေကိုရွံ့မုန်းနေသူ။
သိသိသာသာ အလုပ်များလာသည်နှင့်အမျှ
ချွမ်းရွေ့နဲ့ တွေ့ချိန်ကလည်း သိသိသာသာကို
နည်းလာသည်။ကြာလာတော့ ဂယူဗင်း သည်လည်း ထိုပြဿနာကို မဖြေရှင်းနိုင်တော့ပေ။
ချွမ်းရွေ့သည်လည်း ပင်ပန်းနွမ်းနယ်နေဟန်
အပြည့်နဲ့ ဂယူဗင်းကိုမြင်လျှင် စိတ်မကောင်းဖြစ်မိသည်။ အရင်လိုအတူသွား အတူလာ လုပ်ခဲ့သည် သူငယ်ချင်းဘ၀ကိုလည်း လွမ်းသည်။
အချိန်ကြာလာလျှင် အဆက်သွယ်နည်းသွားလေဖြစ်သည်။ဂယူဗင်းက မအားပေ။ချွမ်းရွေ့သည်လည်း အနှောင့်ယှက်ဖြစ်မည်ကို စိုးရိမ်၍
အဆက်သွယ်သိပ်မလုပ်ချေ။
ဂယူဗင်းသည် ရိုက်ကွင်းပြီးလို့ လာတွေ့သည့်
အချိန်တွင်လည်း အရင်လောက် လွတ်လွတ်လပ်လပ်တွေ့လို့မရတော့ပေ။ နှာခေါင်းစည်း အမြဲတပ်ထားရင် တပ်ထား မဟုတ်ရင် နေကာမျက်မှန် နဲ့ ဦးထုပ်ဆောင်းထားရသည်။ထိုအချိန်တိုင်း ချွမ်းရွေ့သည် ခေါင်းလေးငုံ့ရင်ငုံ့ မဟုတ်ရင် ဒူးလေးညွှက်ကာ
ဂယူဗင်းနဲ့ အကြည့်ဆုံရင် ကြိုးစားတတ်သည်။
ဂယူဗင်း နဲ့ ချွမ်းရွေ့သည် အရပ်သိပ်မကွာ။
ဘယ်သူပိုရှည်လဲတော့ မသိ ချွမ်းရွေ့က ဘယ်တုန်းကမှ အရပ်မတိုင်း။ ဂယူဗင်းကတော့
ထိုအကြောင်းကို စိတ်မ၀င်စားပါချေ။
"စိတ်ညစ်လိုက်တာကွာ"
ရစ်ခီထံမှ ညည်းညူသံလေးထွက်လာသည်။
"အဲတာ ငါပြောရမယ့်စကားလေ"
ဂယူဗင်းသည် စိတ်ရှုပ်နေဟန်မရှိ။ချွမ်းရွေ့နဲ့
အတူရှိတိုင်း ပေါ့ပါးသွက်လက်နေသည်။ ဂယူဗင်း သရုပ်ဆောင်အလုပ်ကို အဲလောက်တောင်
သဘောကျသွားသလားလို့ ချွမ်းရွေ့
တွေးမိသည်အထိ။ ပင်ပန်းနေတာတောင်
ပြုံးရယ်နိုင်သည်အထိလေ။
"ဘာဖြစ်လဲ မင်းအစား ငါ နှစ်ဆ စိတ်ညစ်တယ်"
၀ယ်လာသည့် ကိုလာဗူးကို ဂယူဗင်းက
ဖောက်ကနဲ မြည်အောင် ဖောက်လိုက်သည်။
ချွမ်းရွေ့ရှေ့တိုးပေးသည်။
"မင်းသောက်လေ မင်းက ပို အိုက်နေမှာ"
ထိုသို့ ပြောနေပေမဲ့ အရင်ဆုံး တစ်ငုံ ငုံလိုက်သည်။ထို့နောက် ဂယူဗင်းဆီ ပေးလိုက်သည်။
"တော်ပြီ ဂတ်စ်များတယ် မသောက်ချင်တော့ဘူး"
ချွမ်းရွေ့သည် စာတွေနဲ့ နပန်းလုံးနေရချိန်၊
ဂယူဗင်းသည် ကျောင်းစာ နဲ့ အလုပ် နှစ်ခုလုံးနဲ့
လုံးလည်ချာလပတ်ရိုက်နေသည်။
သို့သော် ချွမ်းရွေ့ဆီက
<ဓါတ်ပုံ>
/ ကြည့်ဦး မင်းပုံအောက်မှာ လူတွေ မင်းချောကြောင်းပြောနေတာ/
/ငါ အတန်းထဲက တချို့ကောင်မလေးတွေက
မင်း ကို ရည်းစားတော်ချင်တယ်ဆိုပြီး
ပွက်လောရိုက်နေတယ်၊ ဂယူ ဂယူ ကိုကိုပြောမယ်
သရုပ်ဆောင်ဆိုတာ ရည်းစားထားလို့မရဘူးနော် *လက်ညိုးထိုး ဆူနေသည့် စတစ်ကာ/
<ဓါတ်ပုံ>
/ဒီမှာ ကြည့်ကြည့် မင်းပါတဲ့ ပိုစတာထွက်လာပြီ
ငါ အခန်းထဲမှာ ကပ်ထားတယ်/
ထိုသို့ ချစ်ဖို့ကောင်းသည့် စာတိုလေးတွေသည်
ဂယူဗင်းအတွက် အားဆေး၊ဗီတာမင်လေးတွေပေ။
***
ဂယူဗင်းပါ၀င်ထားသည့် ရုပ်ရှင်စပြသည့်
အချိန်တွင် နူးညံ့စွာနဲ့ မိန်းကလေးတွေ၏ အသည်းနှလုံးကိုဆွဲဆောင်နိုင်ရာကနေ
နောက်ဆုံး သွေးအေးသည့် ကောင်လေးအသွင် ပြောင်းလဲရာတွင် ဂယူဗင်း၏ မျက်လုံးအကြည့်၊
လေယူလေသိမ်း၊အပြုအမူတွေက အံ့ချီးဖွယ်ရာ။
ချွမ်းရွေ့သည်လည်း ရုံလက်မှတ်၀ယ်၍
မိသားစုနဲ့တစ်ခေါက်လာကြည့်သည့်အပြင်
ဂယူဗင်းနဲ့လည်း အိမ်တွင် ဒုတိယတစ်ခေါက်
ထပ်ကြည့်ဖြစ်သေးသည်။ထိုမှစတင်၍
နှစ်ယောက်သားသည် မတွေ့ဖြစ်တော့။
ဂယူဗင်းသည် နာမည်ရလာတာနဲ့အမျှ အချိန်ဇယားအပြည့်ဖြစ်လာရကာ ချွမ်းရွေ့ကတော့
ထိုအချိန်မှသာ လူတစ်ယောက်ကို လွမ်းတယ်ဆိုတာ ဘာလဲဆိုတာကို နားလည်လာသည်။
စာတိုပို့သည့် appကို ခဏခဏ၀င်ကြည့်ဖြစ်သည်။
သို့သော် စာတို ပို့ဖို့ရန်တော့မရဲ။ဂယူဗင်းသည် အလုပ်များနေကာ သူကြောင့်အနှောင့်ယှက်မဖြစ်လို။ ရွယ်တူကောင်မလေးတွေကများ
ဂယူဗင်းကို သဘောကျလိုက်တာဆိုသည့် အသံကြားလျှင် ချွမ်းရွေ့ရင်ထဲ မနေတတ်တော့။
ဂယူဗင်းကိုလွမ်းသည်။သတိရသည်။တွေ့ချင်သည်။
နောက်ဆုံးကြံရာမရသည့်အဆုံး ဖုန်းထုတ်ကာ google တွင်ရှာဖို့ပြင်သည်။
-ကိုယ့် အိုင်ဒေါလ်ကို အပြင်မှာတွေ့နိုင်သည့်နည်း
-တစ်ယောက်ယောက်ကိုချစ်နေတယ်ဆိုတာကို ဘယ်လိုသိနိုင်လဲ?
တစ်ခုအတွက်အဖြေရှာတွေ့သွားသော်လည်း နောက်တစ်ခုအတွက်တော့ ချွမ်းရွေ့က ယောင်ဝါးဝါး။
***
ဦးထုပ်ကို ခပ်ငိုက်ငိုက်စောင်းထားသော်လည်း ရွယ်တူကောင်မလေးတွေကြား ချွမ်းရွေ့ကအထူးအဆန်းဖြစ်နေသည်။ချွမ်းရွေ့က
ဟိုရှာဒီရှာ ရှာကြည့်သော်လည်း
ယောကျာ်းလေးဆိုလို့ သိပ်မတွေ့ရပေ။
တော်တော်လေးရှားသည်ဟုဆိုရမည်။
"ဟိုလေ မောင်လေးကရော ဂယူဗင်း
ဖန်ဘွိုင်း လေးလား"
ခေါင်းအမြန်ငြိမ့်ပြလိုက်သည်။
"အော် တစ်ယောက်တည်းလာတာလား ၊
အစ်မ လည်းတစ်ယောက်တည်းပဲ ဟီးဟီး"
ချွမ်းရွေ့က အူကြောင်ကြောင်။ ဘာ ဟီးဟီး လဲ
ဒီအစ်မကြီးက။
"လာ အစ်မကလေ ဒီလိုပွဲတွေကိုလာနေကျ၊
တစ်နေ့ကျရင် Entအကြီးကြီးထောင်ပြီး
ကောင်လေးချောချောလေးတွေကို မြေတောင်မြှောက်ပေးမယ် ဟဲဟဲ ဒါနဲ့ မောင်လေး နာမည်ဘယ်လိုခေါ်လဲ "
ဒီမျက်နှာရူးအစ်မကြီးက ထူးဆန်းပေမဲ့
ခင်ဖို့တော့ကောင်းတယ်လို့ ထင်သည်။
"ရှန်ချွမ်းရွေ့"
ချွမ်းရွေ့သည် ထိုအစ်မကြီးပြောသည့် စကားတွေကို အူကြောင်ကြောင်လေးနားထောင်ရင်း
အလိုက်သင့်ပြန်ပြောပေးသည်။
"အိုး ရှန်ရှန်၊ ဒီနားလာရပ် အဲတာမှ ဂယူဗင်းကို
မြင်ရမှာ၊ရော့ ဒါလေး ကိုင်ထား
မြင့်မြင့်တောင်ပြနော်"
ချွမ်းရွေ့ ဖွင့်ကြည့်လိုက်တော့ "사랑해요 김규빈"
အလျင်အမြန်ပြန်ပိတ်လိုက်သည်။ ယောင်ယမ်းကာ ထိုဗီနိုင်းအား ပစ်ချမိတော့မလို့။ မိန်းကလေးတွေ
ဖြစ်ပြီး ဒီလိုချစ်တယ် ဆိုတဲ့ စကားကို အလွယ်တကူပြောနိုင်တယ်။ ဒီလိုဗီနိုင်းကြီးတောင် ထုတ်ပြီးလေ။
ဂယူဗင်း ပေါ်လာချိန်တွင် လူအုပ်သည် တရုန်းရုန်း။
အော်တဲ့သူက အော်၊ အရှေ့ကိုရောက်အောင်
တွန်းတဲ့သူက တွန်းနဲ့။
ချွမ်းရွေ့ကတော့ ဘာလုပ်ရမှန်းမသိ။
"ရှန်ရှန် ဒီ ဘက်ကိုလာ၊ လူပိမယ််"
ချွမ်းရွေ့လက်ကိုဆွဲသွားသည့်
ထိုအစ်မကြီးနောက် လိုက်သွားသည်။
တစ်စုံတစ်ယောက်၏ အကြည့်တွေကိုတော့
ချွမ်းရွေ့သတိမထားမိခဲ့။
ချွမ်းရွေ့သည် ဂယူဗင်း မြင်လိုမြင်ငြား
ခြေဖျားထောက်ကာ မေ့ကြည့်သော်လည်း
ဂယူဗင်း မြင်ပုံမရ။အကြည့်တောက်တောက်လေးတွေနဲ့ ဂယူဗင်းကို စိုက်ကြည့်သော်လည်း
ဂယူဗင်းသည် လူအများထဲက ချွမ်းရွေ့ကို
သတိမထားမိပုံ။
မလာခင် အရင်ပြောခဲ့ရမှာဆို
သည့် နောင်တစိတ်လေးတောင် ၀င်မိသား။
ချွမ်းရွေ့သည် ပွဲအပြီးထိမနေဘဲ ပြန်လာခဲ့သည်။
ပွဲမှာတွေ့ခဲဲ့သည့် အစ်မကြီးနဲ့တော့ ဖုန်းနံပါတ်တွေလဲ၊အကောင့်တွေအပြန်လှန်ပေးခဲ့ကြသည်။
"အစ်မသာ အေဂျင်စီထောင်နိုင်ရင် ရှန်ရှန်ကို
အစ်မ မော်ဒယ်လုပ်ခိုင်းမယ်၊လုပ်ရမယ်နော်
လုပ်နော် ရှန်ရှန်"
လက်ကြီးဆွဲကာ အတင်းပြောနေသည့် ထိုအစ်မကြီးကြောင့် ချွမ်းရွေ့ ပြီးပြီးရော ခေါင်းငြိမ့်ကာပြန်လာသည်။
/ငါ မင်းကိုတွေ့ဖို့ လာသေးတယ်၊
မင်း ငါကို မမြင်ဖူးလား/
ညဥ့်နက်လောက်မှ
/ငါ မတွေ့မိဘူး၊မင်းတစ်ယောက်တည်းလာတာလား ဘယ်လိုဖြစ်လို့ရောက်လာတာလဲ/
/တစ်ယောက်တည်းလာတာလေ/
နောက်မေးခွန်းကိုတော့ ချွမ်းရွေ့မဖြေဖြစ်ခဲ့။
သတိရလို့ လာတယ်လို့ ပြောရမှာ တစ်မျိုးနိုင်တယ်လေ။
***
တက်သစ်စ ကြယ်ပွင့်လေးဂယူဗင်း၏ ကျောင်းတုန်းက ဆေးလိပ်သောက်သည် ဆိုသည့်သတင်းသည်
မီဒီယာစာမျက်နှာပေါ်တွင် ပလူပျံနေသည်။
အသက်မပြည့်သေးဘဲ ဆေးလိပ်သည် ဟုဆိုကာ
ကဲ့ရဲ့ပြစ်တင်သူများလည်း ရှိသကဲ့သို့၊
သပ်သပ်အောင်မြင်လို့ မဟုတ်တဲ့သတင်းတွေ
လွှင့်တယ် ဆိုပြီး ကာကွယ်ပေးသူတွေလည်းရှိသည်။
"ဆေးလိပ်သောက်ဖူးလား ဂယူဗင်း"
"သောက်ဖူးတယ်၊ ဒါပေမဲ့ နောက်ပိုင်း
ကျွန်တော်မသောက်တော့ဘူး"
မန်နေဂျာအစ်ကို၏ အမေးစကားကို ဂယူဗင်းမငြင်း။
"သတင်းတွေကတက်လာပေမဲ့ ဓါတ်ပုံတော့မရှိဘူး
ဂယူဗင်း ငါတို့ဘက်က ကောကလဟလအနေနဲ့
ရှင်းလိုက်မယ်၊ တစ်ဖက်တင်တဲ့လူက ဘယ်သူလဲဆိုတာကိုလဲ ရှာပြီး ညှိနှိုင်းသင့်ရင် ညှိနှိုင်းလိုက်မယ်၊
ဒီရက်ပိုင်း အပြင်မထွက်နဲ့ ဖုန်းကိုလည်း
ငါတို့ ခဏသိမ်းထားလိုက်မယ်"
"ကျွန်တော် ဒီနေ့ သွားစရာရှိသေးတယ်"
ဂယူဗင်းသည် အလျင်လိုနေတဲ့ပုံ နဲ့ပြောလာသည်။
"အရေးမကြီးရင် ဖျက်လိုက် ဂယူဗင်း၊
အခြေနေကိုသိရက်သားနဲ့"
"ကျွန်တော်ကို ဖုန်းလေးခဏပဲပေး"
ဖုန်းခေါ်သော်လည်း ချွမ်းရွေ့သည် မကိုင်။
နှစ်ကြိမ်အထက်ခေါ်လို့ မကိုင်တော့ ဂယူဗင်းသည် အသိပေးစာတစ်စောင်ပို့ခဲ့သည်၊
/ငါ ဒီနေ့မလာနိုင်တော့ဘူး ကုမ္ပဏီ ကငါကို
အပြင်မထွက်ခိုင်းတော့ဘူး။ အခြေနေတွေ
အေးဆေးဖြစ်သွားရင် မင်း ကို လာရှာမယ်။
ချွမ်းရွေ့ ကိုယ်ကို စောင့်နေနော်/
ထိုအချိန်တွေ ချွမ်းရွေ့သည် လေယာဥ်ပေါ်တွင် ဖြစ်သည်။ ရှန်ဟိုင်းက ပြဿနာတွေကြောင့်
ချွမ်းရွေ့မိဘနှစ်ပါးသည် အလျင်စလိုပြန်ရသည်။ တစ်ဦးတည်းသော သားလေးကိုလည်း
မထားခဲ့နိုင်လို့ ချွမ်းရွေ့ကိုလည်း ခေါ်သွားသည်။
ဂယူဗင်းရဲ့ စာကိုမြင်ပြီး သတင်းတွေကို
ဖတ်လိုက်ရသည့် အချိန်သည် သူများနဲ့ယှဥ်လျှင်
ချွမ်းရွေ့ သည် နောက်ကျသည်။
/ငါ အားလုံးကိုသိပြီးပြီ၊ မင်းရော အဆင်ပြေရဲ့လား၊ ငါ အခု ရှန်ဟိုင်း မှာ အိမ်ကပြဿနာဖြစ်လို့
အရေးကြီးပြန်လိုက်ရတယ်။
နည်းနည်းလောက်ကြာမယ်ထင်တယ်။/
ထိုမှစ၍ အချိန်ကာလ တစ်ခုအထိ ချွမ်းရွေ့နဲ့
ဂယူဗင်း အဆက်သွယ်မလုပ်ဖြစ်ခဲ့ပေ။ ချွမ်းရွေ့သည် ရင်းနှီးခဲ့ဖူးသည့် အစ်မကြီးတစ်ယောက်
ကြောင့် ကိုရီးယားတွင် မော်ဒယ်တစ်ဦးအနေဖြင့်
ပြန်လှုပ်ရှားဖို့ဖြစ်လာသည်။
ဘာလို့ ကိုရီးယားကို ပြန်တယ်ဆိုသည့် အကြောင်းအစစ်မှန်ကိုတော့ ချွမ်းရွေ့ပဲ သိလိမ့်မည်။
END
30.10.23