الجميلة والسايكوباثِ ( الجزء الثاني )

بارت اضافي ( 6 )

الجميلة والسايكوباثِ ( الجزء الثاني )

بقلمي أنا : چمارة عليِ 🤍 ..

بسم الرحمـٰن ..

بارت اضافي لأن حيل صار طويل البارت الأول 🤍

__________________

صگار : حامللللل سمرتيييي حامللللل ..

سمراء : بين صدمتي اجة شالني وضل يفتر بية .. نزلني عن الكاع واجو الكل يباركون ويهلهلون

حضنت بطني وضليت ابجي بفرح .. ما تتخيلون شكد حلوة من تكون روح بطنكم ولازم تعتنوم بيها

كلهم ضلو يباركون النا وعلى هاي الفرحة اسد راح جاب كيك كلش هواي ..

لليل واجن كلهن .. والبعض راحن لعيالهن .. كلهم سئلو بس ولا بشر كال حتى الأطفال لأن وصيناهم

وفعلاً ولا وحدة درت ..

ومر شهر ثاني وضحى رجعت من سفرهم وكذالك شاكة بروحها .. وهاذ سمينا شهر الحوامل ..

مرت ذياب هم حامل .. وشهر الحوامل سمينا ..

ومر شهرين وبطني بدت تبرز ..

حياتي ويا صگار ولا اروع .. دلالة وحبة يخليني ابجي فرح ..

والعرك مستمر وتعبني زيادة عن الزوم .. وعمي ومحسن ولا اشوفهممم .. بس اشوفهم اضل استفرغ وبلاخص صگار كلششششيي ولا اشوفةة .. اشتاقلةة أموت من شوقي الة بس من اشوفة اضل استفرغ

حسب ما كالت عمتي أنو راح يطلع يشبهم حيل ..

مرات حتى استحي من اشوفهم واستفرغ بلة صگار عادي زوجي وبينا ميانة ومتفهم حالتي بس همة حيل استحي منهم .. كل ما اشوفهم واستفرغ شيكولون علية !

وضحاي طلعت حامل .. وهسة صرنا ..

هند بـ 6 ونور مرت ذياب بـ 5 وأني صرت بـ 4 وضحاي بـ 2

وصگار .. أخذ ثاري من هذني الثلاثي الخبيث .. وزاد حقدهن أضعاف الحقد القديم ..

وبين ما أني اشغل وامسح آخر ما تبقة من السنك وكبت عيطة من سبب منو !! أكيد نوارة الساكنة بيتنا ..

استغلن طلعة صگار .. سكتت وسكتت واخر شي بيدي الخاشوگة وركعتها بيها ..

هنا عاطت واجت امها .. وانشكت بالنص .. شلون تسوين ببنتي هيج ! أجت هجمت علية وأني گلبي راح كلت خاف يوكعني ويضربن بطني .. اضرب بيهن وما اكدر .. كل وحدة سمينة وضخمة .. اكتفيت بالصريخ وللاسف طحت ..وكعت وكعة قوية .. حسيت الجنين ببطني نهز .. صرت أصرخ ولامة روحي احمي بطني وهنة يضربن ومكتفية بس بالصريخ .. محد كدرت عليهن .. مرت ذياب شمرنها على الحايط .. ضحى لازمتها ندى ويصرخن .. على صوتهن اجة اسد .. وهوة شافني هيجج وشاف شي ما كدرت اشوفة أني ما جنت منتبهة علي ..

وخرهن ثنينهن وكضاهننن أني مني متت وجع من كمية ضربة ..

ركضن علية .. وخبلتني غزل من كالت ..

غزل : سمراءءءء .. هاذذ دمممم .. دمممم هاذذذ

سمراء : كالت دم وأني تخبلتتتت .. صرت اضرب بروحي واصرخ ..

غزل : انعاد بية الزمن وحسيت بأحساسها وخوفها على طفلها .. ركضنا بيها أني واسد ونور ..

الطريق كلة تبجي وتصرخ وتتوعد الهن .. بنص الطريق خابرنا صگار .. فتح اسد سبيكر ونسمع صوتة ..

اسد : عمييي هذني الكح*** ضربن سمرة وهسة تنزف مظري شبيها

غزل : حجت سمراء وتستنجد بي ..

سمراء : صگاررر ابنييي راححح يروححح .. ولككك ابنيييي راحح يموتتتت

غزل : تخبللللللل .. حار يغلط يهدئ بسمراء المتخبلة

وصلنا للمستشفى وسمراء على نفس صرخة .. كبل رحنا القسم الولادة ..

استلمتها دكتورة ..

بين ما احنا منتضرين برا اجة صگار .. وجهة احمرر وكأن كتلة نار ويهرول .. خفت حيل وضليت ادعي لأن أعرف راح يهرج المستشفى ..

كوة هدئنا على ما طلعت الدكتورة ..

الدكتورة : الحمدلله على آخر الحضات تلاحكنا على الجنين

صگار : دكتور عوفي الجنين هية شلونها .. بيها شي

الدكتورة : لااا الحمدلله الأم والجنين بخير .. بس هذني أدوية وممنوع منعاً باتاً الحركة .. شهر كامل ممنوع تتحرك أبد .. ويومية تتحرك على كيف ولمدة ربع ساعة علمود ضهرها .. بس احنا لازم نبلغ لأن أثار تعنيف عليها

غزل : صارت عركة نسوان وهية جانت وحدها وهنة كلهن هايشات .. وضربنها

الدكتورة : أريد دليل على كلامج ؟

غزل : خلي هية تسولفلج

الدكتورة : تمام .. بس إذا جان عكس الكلام إلي كلتي راح يكون غير تصرف

صگار : هسة بس كليلي دكتورة زينة مابيها شي

الدكتورة : ارجع واكرر كلامي .. كلشي مابيهم لا هية ولا الجنين والحمدلله من تلاحكتوهم

صگار : اكدر اشوفها ؟

الدكتورة : لااا انطيناها منوم لأن بحالة بكاء هستيري

غزل : سكت صگار وراحت الدكتورة ..

دار وجهة علية ونتر ..

صگار : ويننن جنتي عنااا غزلل ويننن .. مو وصيتح عليهاا

غزل : ولحسين محد كدر عليهم .. حتى نور دفعنها منو يتقرب منهن يكتلنة .. ما كدرت عليهن اجة اسد يالة

اسد : هوة أني كوة كدرت عليهن يا عمي .. جنهن هوايش وين نكدر عليهن

صگار : خل ارجع ويصير خير .. اعلمهننن شلون يضربنهااا

غزل : طلعو سمراء على غرفة إلي بيها نسوان .. مال مرضى .. وكلنا جنة يمها .. بدت تصحصح

سمراء : شفتهم كلهم يمي .. خليت ايدي على بطني بخوف وكلت ..

- ابنييي ابنييي وينننن

صگار : اشششش سمرتييي .. سكرتييي مابي شي ابناا مابي والله .. كلشي ماكو حتى هاذ موجود ببطنج حبيبتي

سمراء : ضليت ابجي واحسهم خوافين .. الحد ما اجت الدكتورة واخذتني للسونار .. وسوتلي سونار والحمدلله شفتة .. وهم ما اطمنت وخليتها تسمعني صوت نبضة .. ما تتخيلون الفرحة إلي صرت بيها من سمعت صوت نبضة .. صگار فوك راسي واكف ويمسح بدموعة وأني ابجي وما امسح بدموعي .. وغزل الضحكة شاكة حلكها

خلصت ونزلت دشداشتي .. وكفت وضلينا نمشي .. طلعنا يمهم .. لزمني من خدودي وكال ..

صگار : شوفيي هاذ كلشي ما بي ابنا .. بس لازم تكعدين وما تتحركين أبد لمدة شهر

سمراء : تمام .. بس أريد ارجع للبيت حباب .. وديني أريد اطلع حركة گلبي بيهن

صگار : لا تتعبين روحج دواهن عندي

سمراء : صگار .. رادن يكتلننن ابني صگار والله ازعل منك وبعد ولا احجي وياك أني أريد أخذ حقيي انيي

صگار : عمي هاييي رايحينن .. بس كلشي ولا زعلج

سمراء : رجعنا للبيت وطول الطريق كاضة دمعتي كوة أريد بس اوصللهن ..

وصلت وشفت نوارة كاعدة .. بس شافت صگار وكفت بخوف .. ورحت كضيتها من شعرها ونعلت سلفاها .. طلعت حركة گلبي كلها بيها ..

حسيت بوجع ببطني وخرت منا ..

صعدني صگار للغرفة وبقت يمي ضحى وغزل ونور وهوة راح يجيب الدواء ..

نور : والله حيلللل .. حيللل سويتي بيهن هل كح**

ضحى : كلةة من ورا ندى هية كضتنييي ردت اخلي الگلاص براسهن .. كوا**

سمراء : بس استجني باتمان بس استجنيي .. جان خاسرة طفلجج

ضحى : انجبي طفلتي .. اصهب يريد بنية

سمراء : شو كلهم يحبون البنات !

ضحى : غيرر نخبلل احنا

سمراء : ضحكنا وضلينا نسولف ..

ومر شهر كامل أني ولا اتحرككك ابد .. كل الشغل البنات يقومن بي .. كلش كلش اسوي امسح الميوزة وترتيب بسيط بالغرفة ..

صرت بشهر الخامس .. وصار وقت نعرف الجنين شنو ..

طول الطريق صگار يدعي بنية ..

وصلنا الدكتورتي وفحصنا ..

وطلع ولد .. نوعاً ما ضاج صگار بس حمد الله وفرح لأن اجا وريث !

قبل لا نرجع للبيت نزلنا على المول ..

اشترينا ملابس الابني .. شكو شي يخص الأطفال اشترا .. وهواييي ملابس تخبلللل ..

وصلنا للبيت وكلهم نطووو فرح لأن وريث .. وبلاخص أبو والشيخ ..

بوجهي وصعدت الغرفتي .. وهوة هم ..

سمراء : اليوم عندك طلعة ؟

صگار : لااا .. ليش

سمراء : علمود نسوي سهرة أني وياك

غمز وكال ..

صگار : هااا هااا .. جيبي عود ونسوي سهرة

سمراء : لكككك يا ما تستحييي .. أبو نية السرسرية جان قصدي نسهر على فلم

صگار : أي چا أني هم هيج قصدي ! كتلج من تجيبين لأن موزين عليج السهر

سمراء : ضليت مصدومة بمكاني .. وهوة ضل يضحك .. بدون أي مقدمات كعدت بالكاع ابجي وهوة فطس ضحك وأني ابجي أكثر واكثر لأن يضحك ..

صگار : دكومييي كومييي جنج بطريق

سمراء : هوا كال هيج لو صرت ابجي وأصرخ واتعارك ويا ..

- حقيرررررر .. وخررر منيييي وخررر ما أريد اشوفك وخررر

على أثر صوتي وبكائي اندك الباب ..

غزل : سمرة أنتي بخير ؟

صگار : تعاي غزل تعاي

سمراء : فتح الباب واجت مستغربة من منضري

غزل : ياا شبيهاا .. شسويتلها صگار

صگار : يابة والله كلش ما سويت ! بس ضحكت عليها لأن شبهتها بالبطريق !

غزل : أي وانتة شنو تصيحلها بطريق هاي فوك ما شايلة ابنك

سمراء : كمت وحضنتها وضليت أكول ..

- امشي ولي انتةة .. بس أنتي احبج .. اروح يمج أنام خيولي هاذ

صگار : ههههههه .. اااا منو هاذ ولجج

سمراء : وخرر مني والله ولا اجيك بعدد وتحلمم تشوف وجهي ..

غزل : جرت ايدي وطلعنا من الغرفة وكوة كاضة ضحكتي .. حقها هرمونات حمل

وضلينا كاعدات بغرفتي بعد ما رتبت البيت ونضفتة وضلينا كاعدات .. التمن بغرفتي البنات ندى ونور وضحى وهند هية وبطنها .. صارت بـ سابع والطلع بيها بنية .. ما تتخيلون الفرحة .. بيتنا حيل يقدر البنية ويحبها أكثر من الولد وهم ما يردون الخلفة بس بنات لأن يردون وريث يشيل خواتة وابو ..

ونور طلع بيها أخت الاولادها تميم وتيم ..

شوية واندفر الباب .. واجة يصيح

صگار : ولججج بطريقيييي

غزل : راح على سمراء وهية شردت .. صعدت على الچرباية شاردة من يمة وهوة يكول ..

صگار : غصباً عليججج تجينن ويايي

سمراء : وخررر لو تموتتتتت .. والله إذا اجيتت إذا لزمتني انتحر من الچرباية وخررررر

غزل : يا الله .. الزهرة الزهرة .. يازهرة حضرينة .. افلحح من صلاة على محمددد وآل محمد ..

حاولت هدئ بيهم وهية تصيح وهوة يريدها .. آخر شي طفر عليها على الچرباية ورادت تطفر بس خانتها بطنها .. شالها واخذها للغرفة ..

....

سمراء : عوفنيييي .. وخررررر صگااررر والله ولا احجي وياكككك وخررررر

صگار : دنجبي لجج بطريق .. ما تنامين بحضنيي .. شلون ينطيج گلبج ولجج

سمراء : لااا تكولل بطريققق ولككك

صگار : ترديلج عرگة !! .. أني مستعدد بس كولي تردين عرگة ؟

سمراء : لككك .. بطني وجعتني حباب عوفني ..

ضليت اصيح بطني وبطني .. نزلني بالكاع كعدت على الچبراية وراح راد يجيب مخدة .. وركضت

...

غزل : هستوني فتحت الباب وشفت سمراء طلعت تركض .. وثواني وطلع صگار وراهاا .. يا يابةةةة احنا شفناهم هيج ووكعنا بالكاع من الضحك ..

لازمة بطنها وجنها بطريق ويركض .. وصگار شطولة ويركض ..

رحت وراهم نزلت وشفتها لابدة ورا ضهر امي .. تذكرت الشفتة فوك ومتتتتت ..

رحت كعدت على الكرسي فاطسة ضحك .. سولفت الأمي .. وما قصرت بالضحك

غزل : يابةةةةةة وحش يركض ورا بطريق ..

وفطست بالضحك .. مر وقت وراضتهم امي أو راضت سمراء وراضت هرموناتها .. وصعدو طيور الحب العشهم ..

مر الوقت وصارت بـ 12 ..

والى الآن أني بالگراج مختنكة .. ما أعرف شبية بس خنكة قوية بگلبي .. بجيت وردت بس اهدئ ماكو !

مر الوقت وباوعت الساعتي وشفتها بـ 2 ..

ردت اطب للبيت بس تذكرت ملابسي بالترك

( ترك الورا البيت إذا تعرفو ؟ )

ورحت بالضلام وكلت اخذهن هم الهي روحي بيهن شوية .. بين ما أخذ الملابس .. ايد خنكتني وكممت على حلكي تمنع صرختي .. الخوفة والرهبة أخذت حيز من حيلي ..

حسام : اششش لا تصرخيننن .. ترا اكللهم هية صاحتني

غزل : أني سمعت صوتة .. وصرخت بكل علو صوتي بس للأسف كتم صوتي بقبضة ايدة العملاقة .. راح گلبي وراح صوتي وكلت أكيد راح يبليني ببلوة !

حسام : اوخر ايدي بس إذا صحتي اكللهم هية صاحتني

غزل : وخر ايدة ودرت وجهي ردت اشرد بس گضني من ايدي بقوة ..

حسام : كح** س** .. ليش دزيت امي عليجج رفضتيني ! الفصليةة .. فوك ما اخذج واستر عليج يا عا*ر

غزل : تخبلت من كلامة ! .. أني بنت شيوخ واخت زلم مشوربة هيج يكليي !

بصوت شبه مسموع ..

- والله ماكووو غيركككك عا*ر ي.....

كتم صوتي وتخبلتتت .. صرت أصرخ واضرب برجلي وادوس على رجلي .. آخر شي ضربتة وكع بالكاع متوجع .. عفت كلشي وركضت .. وصلت النص الترك ورجعت محترك دمي .. نزعت نعالي وضربتة براسة ورجعت ركضت .. طبيت وقفلت الباب علمود لا يجي ورحت الغرفتي وقفلت الباب ثلاث طكات ..

وكفت بنص الغرفة مرعوبة .. گلبي دكاتة مرعبة .. تندمت لأن اجيت الغرفتي تمنيت راكضة الغرفة امي ردت انزل بس خايفة أخاف موجود ..

قرآت قرآن على ما بدت تروح الرجفة والخوف ..
ورحت نمت ..

عبالكم لهنا وبس ! .. لااا أكيد تحلمت بالنوقف الصار وبعد ارعب ..

كعدت مفزوعة من نومي .. بدون أي شي كبل نزلت يم امي

خديجة : إسم الزهرة .. شمالج ولججج شبيجج وجهج اصيفر ( اصفر )

غزل : تحلمت حلم يخوف

ضلت تقرأ على راسي ايات .. نوعاً ما هدئت ..

.....

سمراء : مر الأيام .. والاشهر وقرب موعد ولادتي ..

وبيوم جنا كاعدين سوة .. وحسيت على هند وجها بدة يصفر .. لزمت گلبي بخوف خفت خاف ولادة ومحد موجود ؟

وفعلاً شوية وصاحت ! .. متدا تتخيلون الخوف الي صرت بي .. حتى بطني ضلت توجعني من كد ما تبجي وتتوجع ..

الحمدلله من الله دزلنا اسد بهاذ الموقف اليخوف .. بس احنا بنات وحوامل وبس غزل وكم وحدة واكيد ما نكدر ناخذها وحدنا ! واحة اسد ..

( الطوارئ اسد 😂 )

اخذها واحنا ضلينا بالبيت .. شوية واجت عمتي وكلنالها وتخبلت !! .. أخذت جنطة الطفل وطارت للمستشفى ..

طول الوقت احنا خايفين وميتين خوف عليها .. والساعة بـ 1:31 .. خابرنا اسد وانطانا البشارة التخبل ..

جابت وسمعنا صوت الطفل وبكائة جنة نواصة .. لزمت بطني بدموع فرح وتحمست شوكت يجي ابني علي ..

صگار من هوة وصغير يسمو أبو علي .. وسمينا علي لأن حسن كالة سمي علي قبل لا يموت الله يرحمة
وفعلاً سمينا علي ..

مر الأيام وأجت هند .. ومر الأيام وابنها بدة يكبر ويفتح عيونة .. وسبحان الله عسليات حيلل .. وكبار علينا .. سمو وهاب ..

ومرن أيام زيادة .. وصارت ولادة مرت ذياب .. وهم نفس الخوف والرعبة .. وهم جابت بنوتة ما مقصرة عن الجمال ..

ومرن الأيام وصار وقت ولادتي !!!! ..

بعد أسبوع كامل وينور علي الحياتي ..

أسبوع كامل صگار خايف لا ليلة ليل ولا نهارة نهار ! على شنو ! ما أعرف .. سولفلي عن ولادة طبيعية وشلون مؤلمة وخفت منها بعد ما شفت نور وهند

وقررت أنو عملية ..

أسبوع كامل صگار ما يخليني اتحرك من مكاني أبد أكل هوة يوكلني والشغل كلة على البنات ..
اجة اليوم إلي مصادف بي وقت عمليتي وتجهزت أني وعمتي وغزل ..

تجهزت وأني كلي دموع ..

خوف ، فرح ، تردد ، حماس ، مشاعر متلخبطة ..

طول ما اتجهز للمعليات صگار يمي وعيونة حمر ..
رحت يمة وخليت ايدي على رگبتة وكلت ..

سمراء : شبيك صگار والله مابية شي وراح اطلع سالمة حبيبي

حضني حيل وكال ..

صگار : شلون إذا عفتيني شلون

سمراء : يااااا .. شبيك حبيبيي هية أقل من ساعة وما راح أحس على شي والله .. وراح يجي علاوي ينور حياتنا

صگار : ما اريدة .. اريدج أنتي شصخم بعلاوي

سمراء : ضحكت من كل گلبي .. ياااااا غير ابنااا شبيكك صگاري

صگار : أخاف تعوفيني مثل حسن سمرةة والله ما اكدر بدونج

سمراء : صگار لا تخليني اتراجع عن قراري واتوجع .. ترا الطبيعي مؤلم حيلل

سكت وضل بس حاضني ..

اخذوني على الكرسي .. وقبل لا ادخل العمليات واجاني شعور مو حلو ابد .. صحت صگار وحجيت ويا ..

سمراء : صگاري .. إذا صار بية شي علي بأماتك .. لا تزوج علية وتجيب أم مو زينة الابني

أني كلت هيج لو تخبللل .. ضل يحجي ويرزلني وطبيت للعمليات وهوة متعصب مني .. زين شلون إذا متت وهوة آخر كلامة رزايل !! انكسر خاطري من كلامة وعصبيتة وردة فعلة ...

بنجوني ونمت ..

ما حسيت على أي شي أبد ..

صحيت ولكيت الكل يمي .. حتى أختي .. صگار حاضن ايدي ونايم .. حركت ايدي شوية وفز .. باوع علية بنعاس .. وطار النعاس من عيونة من شافني .. حضني حيل حسيت شوية وتتكسر عضامي ..

صحو البقية على صوتة وشكرة الرب العالمين .. وما قصرو بالسلام .. أول كلمة نطقتها ..

سمراء : وين ابني !

خديجة : ها هسة .. هسة يجيبو بعد امج هسة

سمراء : طنكرت طول ما علي ما شايفتة ..

شوية وأجت عمتي بيدها ابني ! .. انرمست ضحكة قوية على شفتي .. ثواني ونمزجت بدموع .. صرت ابجي واضحك

وصار ولادة علي صگار ( 2014 / 1 / 1 )

شعور ما راح تحس بي غير الأم .. من تشوف ابنها إلي ضلت تنتضرة ببطنها .. وتعبت وعاشت الأم .. وتشوف ابنها وعيونة وخشمة وشفتة ..

شحجيلكم علي !

الوجه مديور .. والخدود حمر .. الخشم خشم صگار بهاذ الكبر ومبين خشم صگار والشفة وردية ومنفوخة جنها كرزاية .. بستة من حلكة وفز ضل يحرك بحلكة .. كالت عمتي أنو جوعان .. وحرت شلون ارضعة !! وصگار

سمراء : صگار دور وجهك عيب

صگار : ديلة يلة أم العيب .. خليني اشوف مشتاق

سمراء : يابة هوة كال هيجج وأني ضليت اباوع واتفحص المكان أريد شي اضم روحي بي !!

ضل يحجي ويشاقي بية وأني ما اقبل الة يدور وجهة ..

سمراء : دور وجهكك ابني جوعانن

صگار : انجبيي .. شني بس هوة

سمراء : لككككك صگارررررر

ضحك ودار وجهة .. أجت عمتي عدلت الشال وغطت صدري وابني ..

شبع ورجع نام .. ما انطيتة الهم أبد .. خليتة بحضني
مر الوقت وعرفت أني بوجه الصبح ..

وللضهر طلعوني ..

استقبلوني بأستقبال .. جان كلششش حلوووو

وكذالك ما تخلى من الذبابح وأني نقطة ضعفي ينذبح دجاج لو أي شي ..

بس حضني وضمني الصدرة وعبرت وأني خايفة ..

بين ما أني كاعدة بالصالة وهواي نسوان .. اجة صگار قبلني من جبيني .. واخذ علي ..

سمراء : وين ماخذة

صگار : اجو الزلم يردون يشوفو

سمراء : دير بالك علي حبيبي .. وتعال تعال صگار .. دفي انتة ماخذة برا الدنية حيل باردة ..

دفيت علي واخذا ..

....

وكف ضحكنا صگار وبيدة شبلة ..

الكل صلى على النبي .. يستاهل الصلاة .. اخذا الشيخ وضل يكبر بأذنة .. وبس ذكر الأمام علي فتح عيونة وانرسمت ابتسامة على حلكة اليصغيروني ..

ضل يفررة عليهم وهمة ينطو الهدايا .. جانت هدايا قوية .. هاي عاداتنا .. أي طفل يجيبو المجلس الزلم ويفررو عليهم ينطو هداية .. وجان علي شبل صگار
الة هداية خاصة .. هواي عدنا أطفال حضانة ما شاء الله .. بس شبل صگار جان يختلف حبة ..

وكأن الله من ولدة ولد حب الناس الة ويا ..

كل اليشوفة يكضة ويبوس بي تبوس .. والشيخ أول مرة بحياتي شفتة يحب هيج طفل .. بس أكيد لأن من نسل حفيدة المدلل

.....

سمراء : يرحن ويجن يخزرن بية .. عود عبالهن أخاف ! مستحيللل ارد الخزرة بيهن ومرات الشيخة ترد عليهن ..

الشيخة : خايبات لاا اكوم افطس عويناتجن .. ترحلها فدوة

شيماء : اييييي جابت وليدد بعد هاي هية صارت ملكةة .. وأني أبن عمهاا اخذذ ابني منننييي .. جبناها هناا ناخذ ثار وليدي الراح وكسرو گلبي .. حرموني من شوفتة .. وه....

الشيخة : عمي هنة سباعيات واخضن ( اخذن ) گليبات ( گلوب ) وليداتنا ..

شيماء : ولديداتج لو زلم جان اخذووو ثارر ابنييي الراحح

الشيخة : خايبة تغديلهممم فدوةة .. زلمم وغصباً عليجج .. شني ترديهم يتگوون ( يتقوون ) على حريم ! تاكلين نعل وتنجبيننن .. والله من اسمعج مرة ثانيةة حاجية هيجج .. الة اشك حلكج الن*نجس .. بريبوكك

سمراء : صار حجي وملاسن والشيخة كضتهن اكلتهن أكل كبال الدنية كلهاااا

ما اهتميت ولا حتى باوعت الهن .. التهيت بوجع بطني والخياطات ..

نص ساعة وجاب علي .. خليتة بحضني ورضعتة ونام خليتة بصفي .. مر الوقت وصار اليل .. لحو علية ابقى جوة بغرفة عمتي بس ما اكدر كلشي محضرة الـ علي بغرفتي .. صعدت شوية شوية لحد ما وصلت بس شنو الوجع خبلنيييي ..

اليل كوة نمتة من وجع بطني ..

صبح الصبح وجان المنبه مالتي علي .. بدلتلة ورضعتة وگمطتة ..

صگار : بعد هاذ المنبه مالتنا ماكو داعي للساعة

سمراء : ههههههههه .. ردت اصيح علي بس تذكرت أني امة

صگار : لا ربحنا ..

سمراء : والله ما متعودة .. أني كوة نمت من وجع بطني وهوة كعدني

صگار : اشتاقلج وكعدج

سمراء : باوعت علي .. واخذتة ضليت ابوس بي .. اجة صگار واخذة من يمي وضل ياكلة أكل ..

شوية وأجت غزل ..

غزل : سمراء تعاي انزلي اجو خطار

سمراء : تعاي فوتي غزل

سمراء : فتحت الباب وأجت شالتة وضلت تبوس بي رحت جهزت روحي وغزل تساعدني وصگار لازم علي خلصت ونزلنا ..

غزل شايلة ابني .. وصگار لازمني ويمشي بية لأن بطني حيل توجعني .. نزلت وسلمت على الخطار وكذالك خلو هداية بقماط علي ..

صار العصر وراحو الخطار .. مر وقت وصار اليل ..

بين ما أني كاعدة اعدل كاروك علي وغزل يمي تساعدني .. شفت مرت احمد .. إلي مات من ضمن إلي ماتو الله يرحمهم .. ما عبالي جاية عدها نية كل إلي ببالي جاية تاخذ الصينية .. ما أحس غير أجت شالت علي وركضت ..

اخخخخ .. وصرختتت صرخةة .. كمت ردت اتحرك بس بطني اعاقت حركتي .. راحت رواها غزل دفعتها وراحت !

تخبلتتت .. صرت اغلط عليها واصيح .. على صياحي اجو الولد واجة صگار متخبل ..

سمراء : صگار اخذتتتت ابنيييي اخذتةةة .. ولكك ابنيي راح تسوي بييي شيي صگاررررر

تخبللل وسودن أكثر مني ..

راح وضل يدك بالباب وهية تعيط تريدهم يرحون .. دفرتين من صگار تكسر تكسر الباب .. طلعت وجانت لازمة ابني ولازمة سجين ومخليتها على رگبتة !!

نسيت وجعي ونسيت بطني وكمت امشي بثكل ..

سمراء : لاااا .. لااااا .. ابنييي لااا .. دخيلج عوفيي عوفيييي فدوة

رحمة : تحبليننننن وتجيبينننن وريثثث وأني ابنيي جوة التراببببب كلةةة من سببكممم .. تفرحين بأبنج وابني جوة التراببببب .. والله الة اخدد حقييي .. ماكووو رجاللل اخذ حق ابنييي أني اخذذذ حقةةة

اصهب : زينن تاخذين حق ابنجج ! تاخذي من طفل ؟ شنو ذنبةة الطفل

رحمة : وانعلللل والديييي للطفللل .. هية *** و*** ويجيها طفللل وأني اخسر ولدد والله الة اكسر گلبج مثل ما كسرتي گلبييي

سمراء : لجججج شعليةة أني شعليةةة .. روححي روحي اخذي حقج من إلي كتلة ودمر بدمة .. تعاي اكتليني أني مالة ذنب ابنييي

صگار : تكتلي وماراح تاخذين حق ابنج .. راح تخيسين بالسجن واحنا يصير عدنا طفلل لا تتهورين كتلج أخذ ثارة وثارهم كلهم بس رجال برجال

سمراء : قربت السجين أكثر وتخبلت أكثر .. صرنا نجاملها من شفنا اسد وراها على الدرج يمشي بحذر ضلينا نجاملها ونماطل بالحديث ..

دقائق .. ولزمها اسد .. خلى ايد على الطفل وايد لزم بيها ايدها الي لازمة بي السجين .. ركض عليها صگار ولزم ابني بعد ما حاولت تشمرة من ايدها بس اسد لزمة وراد يفلت من ايدة بس الحمدلله تلاحكة صگار ..

اجة وجابلي ابني .. ضليت ابجي مرعوبة من الموقف إلي صار وياي .. الة شوية جان ابني مات وراح مني ..

وهية بعد ما أعرف شصار بيها ! التهيت بأبني اليبجي ..

عفت الكل وصعدت فوك .. طول اليل ما اكدر أنام خايفة خاف هم ترجع وتاخذ ابني مني ..

مر شهر .. وعلي فتح عيونة وجانت زرك على امي .. بس شكلة شكل صگار .. كل ما يكبر يصير النسخة الأصلية عن أبو .. ورحمة أبد ما شفناها وراحت الاهلها ..

مر الأيام كلش حلوة .. وكذالك المشاكل ما خلصت يومية مشكلة .. علي ما اخلي وحدة لو شيصير .. يا بيدي يا بيد أبو أو عمتي .. كلشي ولا اخلي وحدة ..

مر الوقت وأجت ولادة ضحى ..

الحمدلله جانت طبيعي .. ومر ثلاث ساعات وكامت الحمدلله .. جابت النا بنوتة

ومرن الأشهر .. وعلي صار عمرة 5 أشهر .. جمالة بدة يضهر أكثر وأكثر .. وعمتي والشيخة متخبلات علي .. ما يخلن أحد يطلعة الباب أبد .. واي بشر يجي ما يطلعنة أبد ..

المشاكل والعركات مستمرة وتزيد ما تنقص ..

رحمة حسرة تشوف علي وحدة إذا ما تأذي ..

وبيوم جنا كاعدين ..

الولد كلهم ملتيمن وجان يوم جمعة .. كاعدين بالحديقة يشوون سمك .. ولمة وسوالف وضحك ..

أجت غزل وأخذت علي وراحت جوة ..

مر وقت قصير ورحت اشوف التمن .. وصلت يم الطباخ وشفت رحمة تحمي بالخاشوكة .. استغربت بس ما سألت .. راحت وتذكرت علي !

بس كلت أكيد غزل يمةة .. ثواني وشفت غزل يمي !

سمراء : وين علي !

غزل : ياااا نسيتةةة بالكاععع ..

سمراء : بعدنا ما متحركات وسمعنا صوت علي يبجي .. بس مو بكاء عادي ! لااااا بكاء قوييي .. مال طفل طالعة روحة ..

ركضت بكل ما أملك من قوة .. شفت وراي صگار والولد .. رحت وشفت علي صاير احمرررر .. وشايطة روحة من البكاء ورحمة هستوها سدت باب غرفتها .. ركضت لزمتة وأجت عيني على ايدة وفخذة !

زرك على حمر بيهن جراحة ..

تخبلتتت .. شافها صگار واسد وعمي .. سألنا أبن ذياب ومثل ما توقعت كال رحمة !

راح صگار وكسر الباب بدفرة وحدة .. وكضاهاااا وفوخ گلبي من ضربها .. من كل الجهات تنضرب ..

والطفل بيدي بيدة يصير ازرك .. شوية وصارت شهكة وسكت .. تخبلتتتتتت سودتتت .. صرت أصرخ وانشمر بيدي .. أصرخ وابجي واحرك بالطفل ولا حركة منة !

أجت عمتي واخذتة مني .. شمرت علي ماي ومسحت على ضهرة وبدة يطلع صوت ..

لزمت ابني مسحونة روحي .. حسيت شوية وراد يروح مني .. اجة اخذا صگار من ايدي بعد ما ايدي بادت كوة سيطرت وما وكع من ايدي ..

.....

غزل : الجهال تعاركو ورحت فرغتهم وعلي بالكاع يناغي .. وبوجهي للمطبخ .. شفت رحمة وجها حاد يخوف .. ما اهتميت ونسيت الطفل ..

ما جان قصدي أبد اعوفة وحدة بس التهيت ويا الجهال ..

شفت حال سمرة وعلي اتخربط بين ايديها ..
تخبلت .. صرت اضرب بروحي .. تخبلت وأني اشوف حالهم وكلة من سببي .. يعني لو ما عايفة الطفل وحدة جان ما صار هيج ..

شالة صگار اخذة من سمرة وهية وكعت بالكاع .. اخذو وراحو يركضون هوة وذياب ..

اسد شال سمراء وشمر عليها ماي يالة صحت شوية ضلت تبجي وتريد ابنها .. بالكوة يالة هدئت ..
مر الوقت وصار اليل كلش يالة جابو علي .. نايم ومخلي ايدة على صدر أبو مثل الحاضنة ..

ركضت اخذتةة سمراء وضل يبجي .. من شم ريحتها يالة هدئ .. رحت صعدت الغرفتي مقهورة .. اليل كلة ابجي على إلي صار .. وضليت اعاتب روحي ..

غزل : ولجج ليشش عفتيي ليشش .. وعرفينن هاي الكو** موجودةةة ليشششش .. هسة الطفللل تأذة من سببج .. امدانييي امدانييي أي والله امدانييي

اليل كلة ما غفالي جفن .. بين غرفتي وغرفة سمراء ثنين .. وكل هالبعد وسمعت صوت علي يبجي .. خنكت روحي بالمخدة وصرت أصرخ .. ويا كل بجية تشيط روحة وأني ابجي على بكائة

وخلصت اليل كلة بجي .. الحد ما صار الصبح دخت ونمت ..

*****

بدلت الة ومجرد ما حركت ايدة دخل بنوبة بكاء هستيرية .. بدلت الة بساع واخذة صگار يسكت ببي والولد ما يسكت .. حاولت اسكتة وارضعة بس ماكو يغص وما يسكت ضليت ابجي عاجزة شلون اسكت ابني ! بجية يقط قطة من نياط گلبي ..

ويا كل صرخة تشيط روحة وأني ماعندي أي حل علمود اسكتة بي ..

صگار : جيبي منوم سمرة

سمراء : خاف مو زين صگار

صگار : چا الولد فطس من الصريخ .. خلي ينام ما علي شي

سمراء : رحت اخذت خاشوكة .. وهم غص بالدوة بس شربة ..

خليتة بحضني اسكت بي والعب ويا .. اخذا من حضني وخلا بالكاع .. وجاب خاولي وعدل ايدة المحرك بيها على الخاولي وثبتها ..

سمراء : لااا صگار خلي بحضني

صگار : مو لازم نربع ايدة ونثبتها كل ما تتحرك تأذي

سمراء : وفعلاً بدة يهدئ بس يناغي وكأن يعبر النا عن ألمة وجعة إلي حاس بي ..

ضلينا نضحكة وهم زين هدئ .. بدة المنوم ياخذ مفعولة .. ونام

رحعو راسي وسندت راسي على الچرباية .. وبجيت

صگار : هاي شنو سمرة أني اسكت واحد ويجي الثاني شبيجج

سمراء : كلة من ورا رحمةة .. كلة من وراها الكلبة الحقيرةة .. ما شفت الطفل شلون شاطت روحة !

صگار : شنسويلها ! والله ما جانت هيج أبد بس من مات ابنها ورا ابنها الثاني بدت تصير هيج .. جانت افقر وحدة وأكثر وحدة حنينة

سمراء : ضرت اضرب بروحي واكول بحركة ..

- شعليةةةة شعليةةةةة انييي شعليةةةةة .. ابنييي شعلييي ولكمم هوة كتل ولدكمم مو أني وابنييي والله موو احنااا والله

لزم ايدي وأني صرت اعاتب واحجي .. فعلاً !

شعلي هاذ الطفل البريئ ؟ شعلي بكل هاي المشاكل قابل هوة كتلهم لو لأن من رحم سمرة إلي أبن عمها كتل ولدهم ! زين أبن عمي ! ابننن عميي يعني مو اخوي واكول حقهم اخو كتال ولدهم ! ابنننن عمييي

صگار : بداعت علي كافي سمرة .. روحي رايحة كافي تزيديها علية

سمراء : حضنتة وضليت اهدئ بروحي كوة .. ما مقصر هاذ الأسبوع كلة هوة تعبان .. من ناحية شغلة ومن ناحيتنا كلنا .. يومية مشكلة وتعال صگار حلها ويومية مشكلة ويا رحمة وربعها وهم هوة إلي يحلها
ومنا مريض .. وعلي هم مريض

مر الوقت ونعست كلش ونمت بمكاني ..

مرن الأيام وايدة شوية صارت زينة ..

أخذت عصرونية حلوة وطلعت وبيدي ابني ..

خليتها بوسط البنات وكعدت بنصهن .. عمتي أخذ علي وضلت تهوسلة وهوة يناغي ويضحك وياها .. توكفة واهوسلة وهوة يضل يركص ..

نسولف ونضحك ومرت ساعة من أجمل الساعات بحياتي .. شوية واندك الباب وانفتح وطلعت مرت عم صگار .. رحبنا بيها وضيفناها ..

كعدة نسولف وعمتي والمرة يسولفن .. بدينة نسكت من جذبنة حديث المرة ..

أم حسام : والله يا خية اجيتج بطلب .. هوايي اجيت وجان ردكم نفسة وما يتغير .. بس احنا من كد ما نحبها ما نكدر نريدها للبنية .. أريد اطلب ايد غزيلان الابني حسام .. حيل حابها وشكد ودينا على نسوان بس ولااا راد يكول يا غزل يا ماكو

سمراء : غزل غصت بالكيك .. وخلت وراحت جوة .. رحت وراها .. أعرف بيها ما تحبة وتكرهة .. وفعلاً هوة ونضراتة وكلة مكروه ما أعرف ليش !

غزل : ولجججج خاف يوافقوننننن سمراء خاف يوافقوننن

سمراء : شنو بكيفهم ؟ دام أنتي ما تردين ما يوافقون

غزل : ولجج هاذ الكوا** كال الة أكول الابوج وغصباً عليج اخذج .. هددني سمرة هددني

سمراء : بس صگار كلمتة وحدة وما تتغير .. وكلمة منا وكلمة منا ما ما يوافق وانتهة الموضوع

غزل : خاف يكول للشيخ .. والشيخ إذا انطة كلمة لا صگار ولا أي واحد

سمراء : يمعودة هسة مو كل مرة تجي تخطبج وما توافقين وها هية ! شكو هالمرة

غزل : ما أعرف والله .. خايفة حيلل

سمراء : يمعودة لا تخافين ماكو شي غزيلان .. زين تعاي تعاي أنتي بگلبج واحد وما تكليلي ؟

دنكت وخدودها حومرت .. عرفت من ردة فعلها وسكوتها أنو أي ..

- هااا هاا ولجج .. اعترفي يلةة

غزل : بس مو تكولين سمراء

سمراء : من شوكت ما تثقين بية ؟

غزل : مو هيج ب....

سمراء : دكافي كولي منوو حبابة

همست بصوت ناصي ..

غزل : أمير أبن عمو محمود

سمراء : شهكت وكلت .. عزاااا صدك ! وهوة هم يحبج ؟

غزل : أي .. وعدني قبل لا يسافر بس يجي يزوجني بس للأسف صار كل إلي صار وما أعرف إذا يقبلل لو لا

سمراء : يعني جنتو على علاقة أنتي ويا ؟

غزل : أي .. من عمري 10 سنوات .. بس قسماً بـ الله ما مسوين شي غلط مجرد نسولف نكعد بالحديقة بليل ونسولف عن حياتنا ويومنة فقط

سمراء : زين وين مسافر !

غزل : شنو ما تدرين ؟

سمراء : سامعة اكو أبن عم مسافر بس ما سألة عنة ولا شي

غزل : مسافر علمود يدرس

سمراء : شنو يدرس ؟

غزل : طب

سمراء : شنو ؟

- طب قلبية

- واووو حلو ؟

- يجلطط .. بس والله ما حبيتة علمود جمالة بس لأن حنين علية ويحبني .. ما تتخيلين شصار بگلبي من رحت فصلية .. والله جان من يتقرب مني اتخيلة امير واحنا مزوجين وما اعارض أبد

سمراء : بدون عقد محكمة !

غزل : سمراء مو مثل اخواني .. وما حبني .. جانو متوحشين .. والله جان يضربني كبالهم وهمة يشجعو عكس هنا من وحدة تحجي شي وياجن يهجمون عليهن البيت .. مو قصة حسد بس اكلج واقارنهم بين اهلي وبينهم جانو حيل ضالمين وياي .. وكل ما اطلع لساني يكسروني تكسر .. كلة جان عمري 13 سنة وسنتين كاملات .. لحد ما كرهني كلش وزوج وذبني على بيتي .. وبعد كل هاذ طلع مو اخوي إلي كاتلة طلع صديقهم

سمراء : زين ما سويتو شي ؟

غزل : سوينا .. عشائرية واخذو حقي .. بس شراح يفيد كل ليلة أني ابجي من أتذكر الي صار ! اخذو حقي بس شيطلعها من بالي ؟

سمراء : زين شوكت يجي أمير

غزل : حسب ما كالت اختة بعد أربع اشهر

سمراء : ياا شوية ..

غزل : خايفة .. أخاف ما يقبل بية وأني رايحة فصلية وستة مرات طارحة .. احتمال كلش جبير انو ما اصير أم أني !

سمراء : دمعت عيونها .. وحسيت بنتي تبجي مو أختي .. حضنتها حيل وكلت بخوف ..

- اشششش حتى لو الله كاتبلج ما تصيرين أم من رحمج .. أني انطيج شكد ما تردين من أطفال عسى ما اضل أخلف طول عمري وانطيج لا تهتمين للاطفال

غزل : بس خايفة من أمير أني احبة حيل

سمراء : لو يحبج من صدك وراح يكون الج سند راح يقبل .. بس إذا موزين الج وماراح يكون سند ماراح يقبل بس شنو الله راح يعوضج بالاحسن من أمير والله

غزل : بس أني أريدة هوة

سمراء : الله ياخذ منا الشر حتى لو كأن ما نكدر نعيش بدونة .. بس شنو راح يعوضنا غزالتي راح يعوض

بالكوة سكتت وكضت روحها وما بجت ..

هاذ الجانب المضلم من غزل الفرفوشة والي أي بضر يكعد يمها ينسى احزانة ..

طول باقي اليوم أفكر بكلامها .. ومن هاي الحضة إلي دريت ما تكدر تحمل استعديت انطيها من رحمي بس عندي امل أنو رب العالمين يرحم بيها ..

مر الوقت وصار اليل ..

ساعة بـ 11 صگار جوة .. وأني ألعب ويا علي .. أجت غزل تكمز وتضرب بروحها .. عرفت من أجت تكول ..

غزل : الحكينييي سمراءءء .. الحكينييي

عرفت أنو أحد وافق على حسام الي تكرهة ما تطيقة

غزل : لجججج وافقووو .. وافقووو سمراءء وافقوو الشيخ وافققق

سمراء : اششش .. بس اهدئي حبيبتي .. هسة راح احاجي صگار هسة حبيبتي .. انطوهم خبر لو لا ؟

غزل : لااا باجر .. باجرر ينطوهمم

سمراء : خير .. هسة صگار راح يصعد واحاجي .. بس اهدئي لا تسوين هيج بروحج ..

فشلت وأني اقنعها تهدئ .. راحت الغرفتها بعد ما اجة صگار ..

صگار : شبيها غزل !

سمراء : حبيبي تعال أكعد هنا أريد احجي وياك

لزمتة من ايدة وهوة مستغرب ومنتضرني احجي .. كعدتة على القنفة وكعدت كبالة ..

سمراء : احمم .. شوف صگار

صگار : أي ششوف ؟

سمراء : انتة تعرف بأختك تكره الولد مو ؟

دنكت وجهة ورجع رفعة وحجة ..

صگار : أي !

سمراء : چا ليش موافقين !

صگار : مو هذاك الكو** مدري شحاجي ويا الشيخ وقانعة

سمراء : تعرف الولد مو زين ليش تنطي اختك الة

صگار : اخخخ ياسمراء .. شسوي هسة أني !

سمراء : ما تقبل .. البنية خايفة ومرعوبة اجتني تبجي تكرهة ما تطيقة .. ليش تغصبوها علي

صگار : أحاول ويا الشيخ واشوف بلكي يقتنع

سمراء : تجرأت وكمت كعدت بحضنة وقبلتة بخدة وكلت ..

- مدلل الشيخ ما تحاول انتة .. لا تكدر .. حبيبي لا تكسر اختك كافي عليها إلي عاشتة .. خليها أي واحد گلبها يريدة تكول موافقة ..

ابتسم وحضني من خصري وكال ..

صگار : تدلل سمرتي .. هاي رايح للشيخ ..

سمراء : ضحكت واجتني قبلة حنينة .. راح وأني التهيت بعلي .. نومتة وطبيت سبحت وطلعت وصگار بعدة

خفت أخاف ما موافق الشيخ .. بس اجة صگار وأجت البشارة ويا ..

صگار : اقتنع

سمراء : حضنتة بفرح وصرت ابوس كل وجهة ..

- لعدد رايحة ابشر غزالة

عفتة ورحت ابشرها .. ما تتخيلون فرحتها شلون جانت ..

غزل : لجججج والله كفوووو بربوكك .. شلون قنعتي !

سمراء : شعليج أهم شي اقتنع

كالت بقلق ..

غزل : بس راح يعوفني حسام !

سمراء : انعلي جدة كو** إذا سوالج شي

راحت وشمرت روحها على الچرباية وضلت تشمر برجليها بفرح وتصرخ كاتمة صرخاتها ..

غزل : ياييييي راححح يجي حبيبيي راححح يجيي

سمراء : فرحت على فرحتها .. وكامت .. ركضت قفلت الباب وفتحت الكنتور وكالت ..

غزل : تعاي اواريج هدية نطانياها .. بيوم إلي سافر كال خليها عندج كل ما تشتاقيلي شوفيها

سمراء : تسولف وتفتح الكنتور تطلع بالهدية .. طلعت علبة من هاي مال المكياج التنقفل .. لون بنفسجي جبيرة حيل .. جرتني وكعدت على الچرباية وفتحت القفل .. وافتحت العلبة .. بيها هواي هداية .. عطر ، اسوار ، عقد ، وبها هواي رسائل وغراض ..

ضلت ستولفلي عنهن وحدة وحدة والضحكة مرسومة على وجهة ..

غزل : شوفي هاي قبل موت الولد .. أخو جان مسافر يمة علمود يشوفة .. ودز هاي الهدية على الأساس الاختة بس هية إلي وهاي الرسالة ..

قريتها وجان مكتوب ..

" غزالتي الجميلة .. كلش متحسر على شوفتج .. متحمس تخلص هاي السنتين واجي اشوف شكلج شلون صار ، شخصيتج ، كلج متحمس ومتلهف الشوفتها .. كل ما اجوع بـ ليل اتذكرج وكول ياريت هية يمي .. وبعدني على وعدي الج .. ما دخلت بگلبي أي وحدة غيرج .. بس تخلص هاي السنتين إجي ورأستاً اخطبج وتصيرين حلالي .. احبج غزالتي الجميلة ، من أميرج "

سمراء : تحجي وعيونها مدمعة .. باوعت الخطة حلو وما أعرف شلون يكتب بهيج طريقة حلوة .. مبين القلم خانة ونكسر شوية وصار خط خشن بس زاد من جمال خطة ..

غزل : بهاي الرسالة خطة الأصلي هاذ الكبير والفوك خط حاول يقلدة ..

سمراء : شمدريج

غزل : حجيت ويا ثاني يوم .. وهوة حبيبي هواي دازلي رسائل وخطة الأصلي الكبير اما الفوك يكول حاولت يكون خطي ناعم وحلو مثلج بس خانتني ايدي وكتبت بخطي الأصلي

سمراء : بس يخبل خطة .. أتمنى أعرف شلون يكتبون بهاي الطريقة يخلون الـ ل جوة الـ ح ومدري شنو

غزل : أمير مشهور بخطة الجميل ..خوب بالانكليزي اسكتي منة .. يجننننننن كلش حلو خطة

سمراء : ما شاء الله .. أني خطي ولا مفهوم أبد

غزل : أني هم بس صگار خطة حيل حلو

سمراء : ماعرف والله ما شايفتة يكتب أبد

غزل : تدرين من أول ما بدة يقرأ هوة اشترى كتب وضل يقرأ

سمراء : يعني من زمن هواي هوة يقرأ !

غزل : أي .. حتى عقلة كلش حلو .. الوحيد إلي واعي وعقلة متفتح

سمراء : أي صح .. حتى يعرف شلون يتصرف بكل موقف .. حتى ويا علي يعرف ويفهمة من بجيتة وهسة أني تعلمت منة

غزل : ااااهاا .. شوفي شكد يفتهم .. الهاذ السبب الشيخ يحبة لأن واعي ومثقف

سمراء : كتبة كلها فصحى

غزل : يحب هاي الغة

سمراء : أي مبين علي .. أنتي قريبة من صگار أكثر من اخوانج الباقين !

غزل : أي .. أكثر واحد قريبة منة هوة صگار .. بس أكثر واحد اشاقة ويا وعندي ميانة ويا هم صگار بس اصهب أكثر

سمراء : بس ذياب

غزل : ههههههه .. عصبي هاذ رابي يم عمامي

سمراء : احسة يختلف عنكم الوحيد الي يختلف حتى بمعاني شكلة

غزل : أي صح .. بس تدرين احلى واحد صگار

سمراء : لا تحجين بهاي السوالف كبالي لأن أكيد صگار احلى واحد بعيوني

غزل : بعيون الكل مو بس عيونج .. اكلج ديري بالج من شمس .. وبعد كم يوم راح تجي خالتي تبقى أسبوع يمنا ترا عدها بنية اسما مريم فدد وحدة خ*را حشاج

سمراء : اهوووووو .. ما عاول اخلص من صخمة تجيني مريم ..نوب هاي شنييي

غزل : ولعباس مهووسة بصگار .. تكدري تأذيج علمود تاخذة

سمراء : أكيد ماراح تكدر لأن أني فزت بگلبة غصباً على كل وحدة تحبة ..

غزل : أدري .. يحبج وما يشوف غيرج بس احتمال تسوي اشياء مو حلوة أبد وراح تضوجج .. أبد لا تنزلين وأنتي ما مرتبة .. انزلي كاشخة فولللل مو كشخة عادية .. وخلي كحل لأن عيونج حلوة

سمراء : هية حلوة ؟

غزل : بت بغداد بعد

سمراء : احسها راح تجي سفور !

غزل : لا محجبة بس شنو الحجاب يبجي بالزاوية شعرها طالع وتلبس كلة قصير

سمراء : الحمدلله والشكر .. صگار يكره هيج بنات

غزل : أي الهاذ السبب حجت ويا خالتي وحاولت تحلي بنتها بعينة بس ضربها بالوجه وكال ..

' خالة من البداية بنتج ما تعجبني ولو على كص رگبتي ماراح ازوجها '

ويا يابةةة لو تشوفين وجها هية وبتها ..

سمراء : ما تتخيلون فرحتي من كالت هيج ..

مر الوقت واحنا نسولف .. شوية وسمعت صوت علي يناغي بصوت عالي وكأن يتعارك ..

ضمت الأغراض ورحت فتحت الباب .. شفت صگار ولازم علي وعلي يناغي ويصيح ..

صگار : عفيةة كول .. يلة صيح .. كللها عايفتنا ورايحة

سمراء : وهاذ خذا الواهس ويصيح وناغي ويحرك بأيدي .. فطسنا ضحك من طلع لسانة عود يبزق علية

- اااااا .. ولكك تتفل علية حيوانن !

علي : ادادادادادادادادا

سمراء : حرفياً بس دادادا وهاي هية .. بس هاذ إلي يعرف يكولة .. أو يايايا .. اخذتة من صگار وصرت اعض بي على كيف .. زنودة ورجلي تخلي الواحد كوة يعضة ..

غزل : عليج الله خل انومة يمي

سمراء : خاف يفز !

غزل : دجيبييي شنو أول مرة قابل !

سمراء : هاج اخذي .. بس إذا بجى جيبي .. وراح يضوجج لأن يفز هواي

غزل : ضوجتة راحة حبيب عمتة

سمراء : اخذتة غزل واحنا رحنا ..

أول ما نزعت الشال حضني من خصري وقبلني قبلة طويلة .. وووو ..

****

غزل : أني كلت احتمال جبير السمراء ! بس أني أساساً ما راح اصير أم بعمري وحياتي

اباوع على علي اليباوعلي ويضحك .. بستة من حلكة اليصغيروني .. مو علي هاذ مو علي كارثة .. كل البيت حبينا حب مو طبيعي ..

ضل يناغيلي وأني ألعب ويا ..

تخيلت أمير زوجي وهوة ابني .. شعور مؤلم كلش وبلاخص أمير حيل يحب الأطفال حيللل ..
مر وقت وضليت الولي الة علمود ينام ..

غزل : علوشات .. حبيب عمتة هوة

علي : ياياياااا

غزل : من اروح فدوة للـ يايايااا .. يبويييييي

وكضليتة نومتة على ضهرة ونمت فوكا وصرت اعضة وابوس بي وهوة فاطس ضحك .. نقطة ضعفي ضحكة الطفل القوية .. وهوة ضحكتة تخبللل
تخلي الواحد كوة يحبة كوةةة هيجج غصباً عنك تحبني ..

غزل : يابعد روح عمتكك .. ولكك سافل .. حيوانن

صرخ بوجعي هم بـ اداااااا

غزل : ولككك تصرخ بوجهييي ..

وضليت اعض ببطنة وهوة فاطس ضحك ..
خلصت وقت جداً ممتع ويا .. نوب نومتة ونمت ..

ومثل ما كالت سمراء .. نص ساعة وفز .. هم لوليت الة وأني منعسة حيل ونام .. ورجع فز وهيج خلصت اليل كلة .. آخر شي كعدت بـ 6 نومتة وضليت كاعدة كل شوية واغفة وافز على حركة منة .. صرت النفس أخاف اتنفسة يم هالمخلوق الطريقة نومتة تضحك ..

والحمدلله .. نام لحد الـ 11 .. وأني هم

كعد وهم ضلينا نلعب شوية .. وكمت .. ما شفت سمراء بغرفتها .. أخذت ملابسة من جرارات ملابسة ورحت بدلت الة وغيرتلة ومشطتة .. وسويتة صاك بالباكيت ونزلنا ...

والكل استقبلا بضحكة صغار وكبار ..

......

ضحى : فزيت على صوت قطرة الندى .. صوت بنتي

- حبيبي ياعمرييي .. اجيت يمةة اجيتت .. صبحت على ضحكتها الترد الروح .. بدلت الها وجبتها على الچرباية علمود شوية نسوي مضايقة الـ ابوها

- يلة كليلة بابا أكعد .. يلة دودة يلةةة

ضلت تناغي بـ ووو .. فقط بس هاي الفالحة بيها

كعد اصهب وباوع عليها وكال ..

اصهب : بلا مضايقة جنج دودة

ضحى : ولككك لا تعيب على بنتي

اصهب : بييي .. شوف منو اليحجي .. شلون الله بلاني بدود

ضحى : لاااا والله .. انتة شطولك ما شاء الله واحنا يمك جنة دود

حرفياً قطرة الندى من يشيلها اصهب هية شبرين وهوة 189 ولكم أن تتخيلو المنضر

ما استسلمت وضلت تناغي بصوت أعلى وأني اشجع بيها ..

كضاها ابوها وخلاها جوة صدرة ولزم ايديها قيدها وكال ..

اصهب : انة شكلت ولجج دودة .. هالكدودج وعنودية

ضحى : ضل يحجي وياها ويشاقيها ويلاعب بيها وأني كمت سويت روتيني الصباحي ..

رتبت الغرفة ورتبت سرير بنتي .. ورتبت روحي وأخذت دودة ونزلت وعفت اصهب نايم

صبحت عليهم وانطيت دودو العمتي ورحت اسوي ريوك ..

وكذالك ما يخلى من السم دام هنة موجودات بس أني اطنش عكس سمراء .. اجت هند وبيدها ابنها

ضحى : ياويلييي شنيي هاييي شنييي .. شني هاي البكلات شني انتي نيةة أنتي

هند : عجبني اسويلة تسريحة

ضحى : بس مال بنات هههههههه

هند : بس بربج مو طالع حلو ؟

ضحى : حلو بس شنوو يضحك والله

هند : دنجبي گلابج .. غير يخبلللل

ضحى : دنجبي لجج ا....

نوارة : كافي ولجنننن اشتغلنن وروحي ودي هاذ البيدج الخديجة لا اشمرة بالكاع

سمراء : عفواً منو التشمري !! شني ما عندة أهل تشمري وثاني شي طريقة كلامج عدليها مو خدامات عندج احنااا

نوارة : چا المن اجيتن هناا .. بس **** وتحبلنن !

ضحى : فكيت عيوني بصدمة من الكالتة وسمراء اشتغلتها ..

سمراء : علاقل ويا شخص يحترمنا ويحبنا .. مو يومية جاية الاهلي زعلانة

نوارة : علاقل عندي اهل ومو مجرمين

سمراء : علاقل ما عدنا حياية مثل امثالج

نوارة : شوف منو التحجي .. هوة أنتي اكبرر حية بهالكون

سمراء : وأنتي أصغر حية بهالكون .. أني هم صوجي اخلي عقلي بعقل زعاطيط

نوارة : منووو الزعطوطةة ولججججج

ضحى : بهاي الدقيقة اجى صگار ..

صگار : شكووو من صباحيات الله

نوارة : و.....

سمراء : بلة لا تصيرين الحية المضلومة .. ماكووشي حبيب روحي .. شنو تريد اسويلك ريوك بعد بيتي

ضحى : هية كالت هيج وصگار بطولة وضخامتة سرسح من كلامها .. نغلة أختي مو بيدها .. تعرف تخلي الشخص محبس بأيدها بمجرد كلامها .. جنا شنو نريد من أبوي نصيحلها هية .. لو شكد ما نتوسل بأبوي ما يرضى وبكلمتين من يمها يقبل وهوة الممنون ..

خلت نوارة تطحن بروحها وهية كلبتها غزل .. ردت اجفص واكللها روحي بالغرفة وتغزلي بي بس هم زين كضيت لساني ..

راح واحنا ميتات ضحك ..

هند : ولجج شني هاييي .. سرسح الرجال

سمراء : تعلمن .. اخذن گلوب رجولتجن بالكلام الحلو

ضحى : بس لو منج جان كتلة على الكالتة

سمراء : لاا عيني ما أريد اعگر مزاج حبيبي بصباحيات الله ..

شافت نوارة وامها اجن وهية كالت بصوت ..

سمراء : ما أريد اعگر مزاج زوجي بهاي الصباحيات البارحة عدلت مزاجة ..

شيماء : اويي شايف منج

سمراء : كلشي تردين اعددهن الج ؟

( راح ننفضح )

شيماء : لا عيني ما أريد تل....

سمراء : ما تردين تنقهرين ؟ عادي عادي ما احجي الخاطرج

ضحى : ما خلتها تحجي ابددد كبل رزلتها .. غزل جانت شاهدة على الموقف .. وحدة اخذت ماي الابنها والثانية أخذت الجايات وراحت ..

غزل : ولجج هاي سميرة صايرة خديجة رقم تو ( 2 )

ضحى : أي والعباس صدك صايرة تشبه عمة خديجة كلش

احنا نسولف وهية تشتغل وتسوي البيض ..

سمراء : يلة بنات خل نخلص بساع خطية جاعو ..

ضحى : وزعت الشغل علينا .. وبساع خلصنا .. رحنا اكلنا وكلمن يم زوجها وابنها بحضنها ..

خديجة : هاج ضحاوي .. سويلها صمونة وچاي .. جيبي جيبي أني اوكلها وأنتي اكلي

ضحى : سوتلها عمتي واخذتها توكل بيها لأن هية متريكة قبلنا .. وكذالك ما يخلص ضحكنا على شبل صگار .. مگلوب على بطنة ويخمط بالأكل وبالصمون شنو يشوف امة تاكل هوة يفتح حلكة يريد ياكل ..

واحنا ضالين ميتين ضحك علي ..

وبلاخص مرحلة العمر مالتة كلش حلوة .. وكلامة والي يحجي ويا يصيح ويناغي علي .. كلش افرح من اشوف صگار وسمراء وابنهم يضحكون حتى هند أحس روحي عندي كل الحيل من اشوفهن فرحانات

صح عشنا أيام أبد مو حلوة وتأذي بس الله شافنا صابرات وعدنا يقين بي أنو راح يفرح گلبنا .. وهاي هل فرح گلبنا ..

صح ما جانت امنياتنا .. جنا نتمنى نخلص دراسة ونلتهي بالدراسة بس بعد الله جازانا بهيج فرحة والحمدلله والشكر ..

وأني سبق وكلت الاصهب بهيج مواضيع .. وجان قرارة كلش حلو ..

اصهب : بس تكبر دودة وينقبل ارجعج خارجي واحققلج حلمج ..

ضحى : هاذ جان رد كل زوج من يمنا وجانت ويانا غزل ومرت ذياب هم وندى إلي اهلها ضلموها وبطلت وجانت هية كلة اعفاء ..

اما الولد كلهم يدرسون ..عدهم عيب الولد ما يدرس وياخذ شهادة .. أما بعيلتنا أهل أبوي .. البنات تقرة وتكتب يبطلوها .. هاي هية الولد كذالك .. وهنا بعيلة الشيخ .. البتية من الثالث وتبطل .. وبعدها تدرس سادس خارجي وفقط ! أما الدارس أكيد واعي ومثقف .. مثل صگار واصهب إلي محد يعرف وعية وثقافتة غير بس إلي يتقرب منة حيل .. وغيرهم

خلصت أكل وكمت .. رحت للترك الأخير .. بس غرف جميع أنواع الحياية والعقارب ..

قاطعني صوت خيرية .. إلي الخير كلة طاير من وجها ..

خيرية : تعاي لججج فصليةة .. تعاييي نضفي غرفتي مو بس تعلفين

ضحى : ماكلة ببطنج !! من حلالج !

أني كلت هيج وهية بيدها ماسحة وضربتني بيها .. شاطت روحي وصرخت بكل علو صوتي .. الضربة موتتني وما كدرت اضربها التهيت بالوجع إلي أحس شل رجلي شل ..

ثواني وشفت الكل يمي أولهم اصهب وسمراء ..

اصهب : شكوو .. هاي شبيجج بلة بلة اشوفف

خيرية : تغلطط عليةة وتعيرني بأبني المات وووو

ضحى : ضليت فاكة حلكي عليها وكلت ..

- والله جذابةةة .. والله هية ضلت تغلطط لأن أكل وكلت بس ماكلة من خيرج فقط والله وتصيح علية فصلية ولحسين

اصهب : وصدكك .. شني أنتي مشتغلة وتصرفين على البيت ! .. واخر مرة بعد اسمعج تصيحيلها فصلية وحق الحق اكص لسانج إذا تنعاد

رحمة : هااااا بسسس علينااا تكص لسانةة .. بس من تسمع بالثار تكول رجال برجال ومو زلمة اليضرب مرة

صگار : حاسبات نفسجن على النسوان انتن ؟

سمراء : وحقققق الحسين .. وداعت ابنييي مرة ثانية إذا وحدة من يمجننن طخت خواتييي لو سويتلهن بززز ولحسين تشوفن شي مو حلووو والله اواريجن وجهي الثانييي

خيرية : لااااااا عينييييي !! من شوكت الفصلياتت يستگون على نسوان البيتت فوك ما كت.....

صگار : كلمة فصلية ما تنعاددددد

خيرية : لي.....

صگار : مااااا تنعادددددد

رحمة : ضللل ضلللل ولدنا دمهم يروح هدر وانتة تتمعشك وحدة بدمها يمشي دم كتال ولدنااا

صگار : اعشگها وغصباً على الكل .. ومو بس اعشكها هايم بيهااا .. وقسماً بالقرآن وروح حسننن إذ وحكة بيجن حاجتهن لو بس تحاول تباوع السمراء انهيجن اذبحجن على القبلة ..

ضحى : الصياح گب ..وما سكت غير بتدخل الشيخة ورزلتهن رزالة تسوة عمرهن ..

احنا كلشي ما مسويات الهن وهنة يدخلن نوب الجذب يقرأ ألف عدهن .. يحلفن بروح الميتين جذب ! .. رحت اعرج من رجلي إلي حسيتها انكسرت رفع ثوبي على كد مكان الضربة ..

اصهب : مورمة .. كومي اخذج للدكتور لا يصير بيها شي

ضحى : لاا لااا والله كلشي مابيها هسة تخف

اصهب : كومي ضحى لا تزيد كومي

......

سمراء : ضحى .. تلاحكيها هسة قبل لا تزيد .. شوفيها شلون مورمة كومي يلةة

ردت اروح ويا أختي إلي رجلها زركةةةة .. ولا كأن مجرد عودة .. بس علي بجة وما كدرت اعوفة وراحت غزل وياها ..

ساعة ورجعت صابيها !

سمراء : شبيهااا .. شكال الدكتوررر !

اصهب : بيها رض

صگار : چا ما شاء الله .. بيها كل الحيل

سمراء : اجة اسد وياخذ بالهوة من مكان غرفتها ويمسح على اصهب وصگار ويكول ..

اسد : اللهم من حيل خيرية الصگار واصهب .. اللهم من حيلهن الحيل عمامي يا الله .. يا أم البنين

سمراء : ضحكني غصباً عني وأني عيوني مدمعة ..

اخذناها كعدناها بغرفة الشيخة ..

طول اليوم أني اوكل أختي وأني اهتم بيها .. بدت تتوجع من رجلها .. فدد حقدت عليهن حقد مو طبيعي .. مدقبل ابني وهسة أختي وكل مرة سمهن بديت اتعب ويقل صبري ..

صار اليل وشالها اصهب لأن حتى ما كدرت تدوس عليها .. صعدت بغرفتها وعدلت رجليها وعفتها يم زوجها ما يقصر ..

نزلت أكمل شغلي .. اغسل الكراج وغزل كاعدة ومخلية علي بحضنها ونسولف وهوة يلعب ويناغي ..

غزل : ردت اضربهن ومحمد بس كلت خطية الزلم همة منا تعبانين وبس اضربهن تگت الصيحة

سمراء : أني همم .. خفت على صگار هاي الأيام ضغطة دائماً مرتفع

غزل : يمةةة .. ليش شبي

سمراء : ضغوطات .. هوة يكره الفصول والعركات بس ما شاء الله كل ما جالهن يزيدن مدري شكو

غزل : لو يكول للشيخ يأخذ أحد الزلم ويعوف صگار

سمراء : كتلة بس تعرفين الشيخ معتمد بس على صگار وبس يكلة انتة يميني وحزام ظهري ما يكدر يرد طلب للشيخ

غزل : اففففف .. شني هايي

سمراء : ونوب اليوم هم بـ 4 يروح البغداد هوة والشيخ وعمي والزلم عدهم عركة بس شكبرهاااا

غزل : ياااا عركت شنو !

سمراء : هم كاتل ومكتول

غزل : عزا بس لا ينطون فصلية !

سمراء : لاااا .. صگار يكول كلشي الة الفصلية لأن طرف المكتول مو زينين أبد وراح تروح بيها البنية فا ما يقبل بهيج شي

غزل : ايععععع .. تذكرت

سمراء : ضحكت من عقجت وجها .. انتبهت على علي يباوع علية ويضحك

- ولييي .. ولييي ولجج حيوانةة .. اروحح فدوة لليباوع عليةةة يبويييييي

ضل يضحك أكثر .. وبعد ما تحملت وشمرت الماسحة ورحت ضليت اعضة وابوس بي .. عفتة ورجعت أكمل .. كملت ورحت صعدت فوك أحضر جنطة صگار لأن مبين راح يطول ..

أول ما طلعت الجنطة اجة ..

سمراء : أهلا حبيبي .. هم زين اجيت .. راح تطول لو بساع تجي !

صگار : الله اليعلم .. بس خليلي ثنين دشاديش وحدة سودة وحدة بيضة

سمراء : باوعت علي بطرف عيوني وكلت ..

- سودة تطلعك حيل حلو تبرزك

صگار : لعد خليلي بس بيضات

سمراء : فكيت عيوني من تذكرت يطلع احلى بالون الأبيض ..

- لاااا .. البيضة تطلعك احلى بعد

صگار : لعد هاي هية اروح مصلخ

سمراء : عزااااااا يطلعن عضلاتك

صگار : لعد ما اروح أمري الـ الله

سمراء : أي عفية .. ما تستحي تعوفني وحدي

ضحك بمكر وتقرب مني وكال ..

صگار : ليش تشتاقيلي .. يلة يلة اليوم هم عادي عادي

سمراء : فتحت عيوني بصدمة وضربتة من صدرة وكلت .. ايااا ما تستحييي .. بدة يتمادة أكثر بضحكة مكارة على شفتة .. وشردت من يمةة .. ضل يضحك

راح كعد على الچرباية ويسولف وياي وأني اخلي بملابسة وغراضة ..

صگار : علي وين

سمراء : جوة يم عمة وغزل

صگار : خلي كتابي إلي اقرا سمرائي

سمراء : تدلل حبيب روحي

خليت كتابة ونضراتة .. وخليت ثنين ساعات وثنين سبحات .. خلصت الجنطة وخليتها على الميز ورحت كعدت كبالة ..

سمراء : حبيبي

صگار : عيونة الحبيبج

سمراء : خلي ارجع للمدرسة هاي السنة

صگار : ما عندي مانع سمراء .. بس راح تتعبين حيل أكثر من ما تتصورين تتعبين علاقل من علي يصير أربع سنين لو خمسة راح يبقى يم امي .. وثاني شي تسجلن كلجن مو وحدة ورا الثانية

سمراء : أي خل نسجل كلنا !

صگار : كلهن منتضرات الجهال يكبرون يالة

سمراء : افففف چا شوكتت ..

صگار : هسة اجيبلج كتب ثالث علمود تدرسين وتضبطين الاساسيات حيل .. وبلكي بعد سنة ترجعين خارجي أن شاء الله

سمراء : كلت بفرحة .. والله

ضحك وكال ..

صگار : وداعت هاي العيون المكحلة

سمراء : كم وحدة راح نرجع !

صگار : أنتي وغزل .. بس إذا قبل اصهب أنتي كلجن

سمراء : وندى ونور ؟

صگار : نور مخلصة ثالث وندى ما يقبلوها هسة لأن صارلها سنتين مبطلة ولازم ثلاث سنوات وهم عدها شهادة ثالث بقى بس انتن تدرسن للثالث وأن شاء الله خير ..

سمراء : حيللل فرحت وحضنتة بفرح .. وقبلتة بخدة

- زين تكدر تقنع اصهب بس ثالث هسة نمتحنة ؟

صگار : أن شاء الله اقنعة ونشوف

سمراء : ضليت حاضنتة ومخلية راسي على كتفة وايدي على صدرة .. شوية وانفتح الباب .. جانت غزل ورأستاً رجعت طلعت .. ضحكت وصگار هم وكال ..

صگار : تعاي تعاييي غزيلان .. شني تستحينن قابل أول مرة احضنها

......

غزل : تمنيت الكاع تنشك وتاكلني تموتنييي تجلطني ما شفت صگار من اجة ابددد ما شفتةة ..

فتحت الباب بخجل وكلت ..

- أريد ملابس العلي دمر روحة

صگار : أبو كرش هم ماكل ..

غزل : هوة شاف أبو وراحت روحةة .. ضل يرفرف مثل الطير الحد ما اخذا صگار .. ضل يشاقون ويلعبون وسمراء تحضرلي ملابسة

صاح صگار بصوت عالي ..

صگار : لككك ابو كريشششش .. شوف كرشكك أبو كرششش

علي : ااااااا .. يايااياااا .. ايايا

( ياربي يالفشلة وأني اقلد صوت )

غزل : صگار يصيح وعلي يناغي ويصيح .. متت ضحك على شكلهم وشقاهم .. اجيت أريد أخذة من أبو جلب بأبو وضل يصرخ .. كل ما أريد اتقرب منة يضل يصرخ ويخضن أبو حيل

ما عاندت ونزل صگار وسمرة وياي وكعدنا يم امي والشيخة وعلي بحضن صگار .. الشيخة ضلت تكول گولات كلش حلوة وهاذ يهز جنة رقاصة ..

طول الكعدة فاطسين ضحك على علي وحركاتة إلي صايرة تنگرط گرط..

بدلت آلة وصارت لمة كلش حلوة .. اصهب وذياب وكل الولد وجملوها ولد اخواني إلي من مرت أبوي الجبيرة وهمة .. وصارت لمة بالغرفة كلش حلوة ..

صارلنا سنتين ونص ما ملتمين هيج لمة .. طول المة عيوني تدمع اشتياق الايامنا هيج .. جان حسن هوا إلي يلمنا .. هيج لمة حلوة ..

بين ضحكنا وشقانا وتحشيش الولد .. أجت شيماء ..

شيماء : يا ما تستحونننن .. ملتميننن وابني ميتتت وهوة جان يلمكممم ويسوي هاي المة الحلوةة

غزل : صگار وجهة صار أحمر .. واصهب كذالك ..

وجهت كلامها الصگار ..

شيماء : بيكمم خيرر اخذو ثار ابنيي إلي كتلتو رواحتكم بييي .. بدال ما تجيبون منهن وتذبوهن مدللينهن جنهن اميرات .. وين راح وعدكمم ويننن معيشيهن اميرات .. وين راح حلفانكم بروحة مو كلتلي يصگار تاخذ حقهة .. مو كلت تخليها تخلف وتذبها عار يم اهلها ويننن راح وعدككك وينننن لو تحلف بروح ابني عندك عاديي

غزل : وضلت تبجي وتلطم .. وگلبت المة الحلوة المشكلة ..

صگار راح صعد .. واصهب ورا .. وكلمن طش الاهلة وبقت بس الشيخة تتعارك وياها

.......

سمراء : رحت ويا صگار لأن وجهة ما طمن خير أبد كلت أكيد انقهر على صديقة واخو .. قبل لا أصعد أشرت الغزل وكلت ..

- خلي علي يمج غزالة ..

صعدت ورا وشفتة مضلم الدنية ومشغل السبلت حيل ومتغطي .. أدري بي ما نايم .. قفلت الباب ورحت بدلت لبست دشاشة قصيرة .. وتجهزت للنوم

كلت ما احاجي واخلي وحدة .. بس تذكرت كلام اسد .. وكأن جان يدري راح يصير هاذ الشي وصاني شلون اتصرف .. وگلبي هم ما انطاني ما اواسي واخفف عنةة..

درت وجهي علي وحضنتة .. وخرت البطانية من وجهة وكلت ..

سمراء : صگار .. حبيبي .. صگاري .. شو باوعلي باوع حبيبي

وللاسف صار عكس إلي جنت متوقعتة ..

كال بصوت حاد ومليئ بالغضب

صگار : كلة من وراج .. خليتيني احبج وما خليتيني أخذ ثاري .. كلفت بروحة الغالية عندي أخذ ثارة بس خليتيني احبج ..

سمراء : تحول معاني وجهي للصدمة .. وكأن إلي جنت خايفة منة صار !

- كايلتلك تحبني ؟

صگار : گلبي الكو** حبججج گلبيييي

سمراء : متندم لأن حبيتني ؟

صگار : بعمري ما تندمت على شييي .. بس على گلبي الحبج .. عاف بنات الناس كلهنننن وحبججج بدال ما أخذ ثارة منججج حبيتججج أكبر غلط سويتةةةة اكبررررر غلططط

سمراء : نغزني گلبي حيلل .. وصار إلي جنت خايفة منة صاررر ..

- مو مشكلة .. تكدر تصحح غلطك .. طلكني .. طلكني وصحح غلطك

دار وجهة علية وكام بعصبية .. ضرب الحايط ودار وجهة

صگار : وعليييي .. علييي يبقى بدونن أم

سمراء : رغم الغصة إلي صارت بيةة وصوتي التغير واختفى بس كلت ..

- مو واعدهن تاخذ مني ولد واذبني الاهلي !!

راح كسر المزهريات وضرب ايدة نوب اجة ..

لزمني ورأستاً نومني وقيدني وكال ..

صگار : أخذ ولددد وانطيهنن يربن من جديد .. ربن سنين واجة واحد **** .. **** وكسرهن بيي

سمراء : مصدومة من ردة فعلة والتقيد إلي مقيدني بي .. خلص كلامة تقرب مني بكل وحشية ..

- لكككك صگارررر .. لا تخلينيي اصرخخخخ .. طلكنيي طلكنييي بس لاا تسوي هيججج ولككككك

انگلب وصار وحش حرفياً .. تقرب مني بكل وحشية وحقارة ..

الباب ضل يندك وصوت عمتي وغزل والولد ..

عاط عيطة وحدةة خلاهم كلهم يرحون ..

عافني بعد ما أخذ إلي يريدة من ضرب ودنائة .. عافني مكسورة گلب ومهضومة من تصرفة ..

راح يسبح .. شوية وطلع حتى ما يباوع بوجهي .. حتى ما حاول يعتذر مني على إلي سوا ! حتى ما جرب يعتذر ! يچبر ولو كسر صغير من إلي سببة بگلبي !

سمراء : وثقت بيك .. وثق..

سكتتني شهكاتي إلي حسيت روحي طلعت ..
عيوني تروح وين ما يروح هوا .. اباوع بصدمة وكسرة گلب .. واكول بداخلي

- معقول .. كل هاي الأيام والاشهر .. ما أعرف إذا يضحك علية لو صدك يحبني ! لو شنو ! معقول هاذ نفسة صگار إلي قبل كم ساعة جان يحضني ويباوعلي بكل حب !

سمراء: لي.. سويت هي....

حاولت احجي بس شهكتي متعتني .. كل ما أحاول احجي تطلع مني شهكة أكبر من القبلهاا ..

صگار : أخذ ولدج واذبج يم اهلج المجرمين

سمراء : يحجي بعصبية وهوة لابس ومخلص ومقدم اصبعة ويحجي بتهديد .. ذب سمة واخذ جنطتة وراح ..

دقائق وشفت غزل گبالي .. اجت حضنتني

غزل : هاي شمسوي بيججج .. كوميي سمراي كوميي حبيبتي .. حسبي الله على من كان السبب .. حسبي الله عليهمم

سمراء : وخريي وخرييي .. مابية شي وخريي أريد اسبح وخري

عفتها وصرت أدفع بيها ورحت طبيت للحمام وقفلت الباب علية .. رحت سبحت وصرت بكل مكان لزمني أو قبلني بوحشية ازلغ بي بأضافري .. لحد ما حسيت بوجع وعفتة .. خلصت بعد ساعات طويلة ..

طلعت ولكيت عمتي وضحى وغزل ونور كاعدات ..

......

غزل : من هاذ الوقت وسمراء انگلبت 180 درجة ..

ضحكت بوجهة وعيونها مفتوحة بصدمة .. وكالت

سمراء : شك..و شبيك... شبيكم

غزل : تحجي والشهكة تشك صدرها شك ..

رحت ردت احضنها .. نترت بوجهي

سمراء : وخريييي .. شبيةةة أني مابيةة شيي وخري أريد أكل جوعانة وين الأكل ..

ضحى : هسةة هسةة .. رايحة اسويلج أكل بعد روحي

سمراء : اشششش لا تكولين بعد روحي مابية شي أني

خديجة : أي چا شبيج بعد أمج .. بس اخيتج وتحبج وتكلج هيج

سمراء : أريد أكل جوعانة

غزل : ويا كل كلمة بنصها شهكة مرعبة ..

راحت ضحى تسوي أكل وسمراء تشيل شي وتودي بمكان مو مكانة وترجع تجيب شي وتودي بمكان مو مكانة هم .. نباوع الحالتها والصدمتها ...

عرفت كل إلي سوا بيها صگار من صريخها بـ اليل
ما توقعت اخوية هيج يطلع تصرف منةة !

كان ذبت شعوذة بوجهة مو كلام ..

كم كلمة كالتها گلبت صگار والوضع كلة ..
لا عبالكم بس صگار .. لاا اصهب هم .. بس مو مثل السوا صگار ..

بدون لا أحد يحجي وياها كالت ..

سمراء : أني راح انطيكم ولد ونوب تذبوني .. أني ما أريد ولد اليطلعون من بطني .. همة مو إلي الكم انتو تاخذوهم أني مو .. انطي أني

غزل : صارت ما تعرف شنو تحجي .. تجيب يمنى تخلي يسرى .. كلامها ما صار موزن صار كلام مدري شنو ..

جابت الأكل ضحى وسمراء بعدها تجيب بالغراض وتودي .. فهمت حركتها تريد تلهي روحها بشي .. صحناها على الأكل بس صدمتنا من كالت ..

سمراء : أني .. أنام .. أني انطيكم ولدد .. أريد أنام هسة منعسة

غزل : تمام تعاي نامي يلة .. خلي اعد...

سمراء : لااا لااااا .. أني مابية شيي لا تسوين هيج مابية شي أني

غزل : تمام يلة .. تعاي نامي وخلي ابنج بحضنج

سمراء : لاا لاا .. هاذ مو ابني .. هاذ الهم .. همة الهم راح ياخذو أني مو إلي هاذ .. أني انطيكم ولدد انتو تاخذون مني

غزل : عرفت إلي كايلة الها .. عرفت صدمتها من إلي سوا والي كالة الها ..

نامت وتغطت ومن أقرب علي يمها تحجي وهية مصدومة وفاتحة عيونها ..

سمراء : لااا لا .. هوة ابنهم لاا .. راح ياخذو هاذ ياخذو

غزل : راحت امي وهية دموعها عشرة عشرة جابت قرآن من مكانة وكعدت فوك راسها وهية تردد كلمتها

سمراء : لاا لاا مابية شي .. لا مابية شي أني .. عادي عادي تاخذو .. انطي الكم أني

غزل : ضلت تبجي امي على حالها .. وضلت تقرأ القرآن على راسها .. شوية ونامت

طلعنا كلنا وامي بقت يمها ..

أخذت ملابس العلي قبل لا اطلع .. أخذت كمية هواي لأن عرفت سمراء راح تمر بحالة نفسية صعبة .. أخذت علي يمي بدلت الة وغيرتلة ومشطتة .. ونزلت

جدتي كل ما شافت شيماء تضل تغلط عليها وتدعي ومو بس هية كل احنا .. لوللاها جان ما صار كل هاذ

مر وقت وصارت بـ 12 ..

سمعنا صوت امي تصيح النا .. عفت علي يم ندى ..

غزل : ابقي هنا ولا تخلي وحدة .. لا يسولة شي ولا تصعدين لا يخاف من امة حبابة ابقي يمة ..

ركضت الأمي وشفت سمراء .. فاتحة عيونها بصدمة
وتكول ..

سمراء : لاااا .. هناا يريد يجيب مني ولد وينطيهم الهم .. ما أريد هنا لاااا

غزل : تمام .. تغيرين غرفتج ؟

سمراء : أي أي .. أي يريد هنا ياخذ مني ولد وينطيهم الهم

غزل : تأشر على الچرباية وتهز براسها بمعنى لا ..
اخذتها كوة الغرفتي .. ونومتها .. وبقت امي تقرل القرآن على راسها لحد ما نامت

مر ثاني يوم وحالتها زادت .. تنام وتفز تكرر كلامها
جنت كاعدة ودك تليفون امي وهوة يمي .. شفت المتصل صگار .. من صدك كرهتة وما ردت ارد علي ..

بس عاد الاتصال وكلت خاف شي مهم .. جاوبت

- الو

- ها غزل .. شلونج

- زينة الحمدلله

ضل يسأل على امي وجدتي وعلى علي .. منتضرتة يسأل على سمراء علمود انفجر بوجهة

- شلونك انتة

- تعبان حيل

- ليش خيرك ؟

- ما أعرف غزل .. ردت احجي ويا امي بلكي يروح تعبي

- طلعت حوبتها بهاي السرعة ..

تحمحم وشوية وكال ..

- شلونها

- ردت انفجر بوجهة بس صوتة أبد ما مبين بخير مهما يكون يبقى أبن امي وابوي ..

عبالكم اسكت ؟ أكيد لااااا ..

- الك الجرئة تسأل عليها ؟

- شبيها غزل

- شعليك بيها ؟ مو تريد تجيب ولد منها وتذبها ؟ تعال واخذ ابنك وديها الاهلها .. ترا تشور هاي البنية صگار والله تشور

- غزل تعبان .. شبيها

- مالك دخل كلت .. تريد امي ؟ امي يم إلي خبلتها وما خليتها تعرف ليلها من نهارها .. بعد سلامة

قفلت الخط منة وقفلت الجهاز كلة من رجع خابر ..
مر يوم ثاني وكذالك خابر وما جاوبت وامي ملتهية ويا سمراء الي يوم عن يوم دا تزيد ..

مر خمسة أيام .. سمراء زادت بحالتها وضلت بنص اليالي تفز مرعوبة .. صگار 100 مكالمة .. وكلت للولد محد يحجي أي شي عن سمراء لو شيسوي

اجة اسد وكال ..

- يريد يحجي وياج صگار

غزل : روح جيب صمون اسد .. وسد الاتصال

اسد : متعصب غزل .. متعصبب جاوبي

غزل : انجبرت اجاوبة .. أول ما خليت التليفون وكلت ..

- الو

اجة صوتة الزرف طبلة أذني ..

- لجججججج شكدددد خابرتتتت ليش ما تجاوبينن تردينننن تجلطينييييي

- شتريد ؟؟؟؟؟؟

- سمراءءءء ويننننن

- أخذت التريدة بكل قذارة وعفتها هية وصدمتها .. لككك لا ليلها ليل ولا نهارها نهار .. كلة من وراك مدري شبيها البنية مدرييي شبيهااااا

- شبيهااا .. كولي بالضبطططط شبيهااااا .. غزلل كافي تزيديها علية ترا اليمي كافي كولي شبيها بالضبط !!

- شبيكككك شحجيييي كتلكك منتهية البنيةة منتهية شبيككك

شمرت التليفون على اسد .. فتح السبيكر ..

- لجججج غزللللللللللل

اسد : ها عمي

- يابة والله وداعت علاوي إذا ما كلت انتة يا اسد اجي هسة من بغداد وانعل سلفة سلفاككك

اسد : ماعرف شنو سويت بيها بالضبط بس البنية مو واعية صايرة بحالة نفسية .. تحجي وياها شي تجاوب بغير شي .. ما واعية البنية أبد

- اخخخخ كلةة من وراييييي كلةةة من وراييييي

- أي عمي كلة من وراك .. هاي فوك ما ثقت بيك وحبتك هيج تجازيها بسبب وحدة سامة .. دخلت بينكم وخربت كلشي بينكمم

- كافيي اسدددد كافييي تزيد نار گلبي .. جاي أني جاييي

غزل : المن تجيي .. ومحمدد ما اخليك تشوفها لو تموتتتت

عفتة ورحت جوة ..

فعلاً صبح الصبح على دكة باب قوية ..

نزلت جوة واسد ركض يفتح الباب .. اجة صگار لابس لبس جنوبي .. دشاشة وعگال وساعة ..

شافني وكال بدون لا سلام ولا كلام ..

- وينهاااا

غزل : والله ولا اخليك تشوفها

دفعني بعد ما صرت كبالة .. وصعد وصعدت ورا راح الغرفتهم وفتح الباب وما شافها وتخبللللل ..

صگار : وينننن وديتوهااا ويننننن

غزل : الاهلها .. عندك مانعععع !

يابة أني كلت هيج وهوة انفجر فجرة .. ضل يغلط ويصيح ويكسر ويضرب شكو شخص كبالة .. لزمة اصهب وما نحس غير اصهب بالكاع ..

صگار : لكككك ليششش وديتهااااا ليشششششش ولكممممم كواو** .. ليششش وديتوهاااااااااااا

اصهب : لكككك كافي اهدئ م....

غزل : بعدة ما مكمل كلامة وراح باتجاه الدرج .. ركض ورا اصهب وكال ..

اصهب : لككك هاي بغرفةةةة غزللل صگا بغرفتهااا لكك اوعى شبيكككك

غزل : يحجي ويا وهوة ما يسمع أبد .. لحد ما كضا اصهب وضربة راجدي .. يالة وعى كلة أنو بغرفتي وراح ركض ..

أول ما شافها نزع عگالة واقدم ناحيتها .. جانت حاضنة امي بس شافتة يتقدم كامت من مكانها مرعوبة وجها مليئ بالخوفة ..

راحت على الزاوية مرعوبة من تقربة تجاها ..

صگار : سمرائي ..

غزل : راد يحجي كلمتة الثانية وكالت بخوف ..

سمراء : وخررررر .. ما اخليك تاخذ ولدييي وخررررر وخررر أني انطيهم وخررر

غزل : كل ما يتقرب منها تصرخ أكثر وأكثر .. دار وجهة علينا وطلعنا كلنا .. بس ما طلعت أخاف يسويلها غير شي وتتخبل أكثر .. قفل الباب وأني ضليت بمكاني .. راح وهية ضلت تصرخ أكثر وأكثر

سمراء : وخرررر .. وخرررر ولكككك .. وخررررر عوفنيييي .. عوفنييي ما انطيهم ولدييي ما انطيهمم وخررر

غزل : بدون لا يسمعها وحضنها .. وهية تخبلت .. دفعتة بكل قوتها وضربتة راجدي وصرخت صرخةة واستمرت تصرخ وتزيد ما تنقص .. تضرب بي وتصرخ ..

جان موقف مرعب بالنسبة إلي .. صوتها وصريخها وشكلة كلة ذكرني بالماضي الأليم ..

حضنها غصباً عنها وذبت روحها علي وتبجي .. طلعت صدمة إلي صار وياها بهاذ اليوم .. تدفر بي وتصرخ تريدة يعوفها .. الباب يندك والولد يصيحون علي

سمراء : لككككك جلببببب حقيرررر .. وخررر منييي حيواننننن .. أنيييي تاخذذذذ مني ولددد وتشمرنيي مووو ..

غزل : دفعتة وضربتة وهوة مستسلم الكل حركة تصدر منها ..

سمراء : هسةةة تطلكنييييي .. هسةةة تذب كلمة طالك من حلكككك هسةةة

غزل : تخبلت وصرت ابجي من ضلت تضرب بروحها وتصرخ وتريدة يطلكها ..

انهارت قوتها وكعت بالكاع فاقدة للوعي ..

شالها واخبل .. ضل يصيح علية علمود أجيب ماي بس أني ذاكرتي خانتني ودخلت بعاصفة الماضي ..
جمدت بمكاني .. بس اشوف ماكو أي ردة فعل

راح جاب ماي وشمرة عليها .. ما كعدت وتخبل .. أني تخبلت أكثر منة .. رحت فتحت الباب وطلعت اصيح الولد واستنجد بيهم .. كل عقلي سمراء ماتت .. كل إلي بعقلي ماتت ..

اجو واخذوها من صگار إلي خانتة روحة .. لبسوها شال على السريع وعباة وراحو واخذو امي وياهم ..
أني كعدت بالكاع ابجي ..ابجي على حالت سمرة وابجي على ماضيي الحقير إلي عجزت انساة ..

*****

ضحى : كل الأيام دموعي ما نشفت على حالت أختي وصدمتها .. كرهت صگار كره مو طبيعي ..

والي صار وياها وتخربطت هنا فقدت .. طلعت غزل تصيح ماتت .. هنا ما ضل عقل براسي حسيت من صدك خسرتها

مر وقت وبالكوة هدئونا بس دموعنا ما تنشف أني وغزل .. خابرو عمتي خديجة وكالت بس صاير عدها ضغط ومرتفع .. تطمنت على كلامها بس بعدني أريد أختي .. ابنها ضل يصرخ على الصريخ الصار الصبح وحالتة صارت حالة .. متعود يا على سمراء يا عمة يا غزل .. وكلهن مو يمة .. بالكوة تهدئة هدى بالكوةةة

صار ثاني يوم .. واليل كلة ما نمتة ..

مو بس صگار انقهر .. حتى اصهب .. وضل ثلاث أيام وجهة ثكيل وياي بس اخر شي اجة وفهمني وافهمتة لأن صديقة وكلامها جان سم مو كلام عادي ..

بس إلي سوا صگار ابددد ما مقبول ..

****
غزل : صار ثاني يوم وأجت سمراء من الصبح .. بس مو سمراء الي نعرفها لااا .. الوجه شاحب .. الشفايف الحلوة صايرات زرك .. الوجه الأبيض مشرب بالحمار صار أصفر .. وصار مو أقل من حالتها .. مو لأن اخوية بس الصدك ثنينهم واحد اسوء من الثاني ..

صعدت كبل نامت بغرفتي ..

صار ثاني يوم واجة أبوي والشيخ وسولفنة كل إلي صار الهم .. كلهم وكفو ضد صگار وتصرفة ..

وسمراء بس تشوفف صگار تتخبل وتضل تبجي وتصيح علي .. كلمة الطلاك ما تروح من بالها أبد ..

جنة كاعدين واجة صگار شافتة دمعت عيونها وكأن جانت متجهزة قبل لا يجي .. رادت تصرخ بس كال ..

صگار : بس اسمعي مني .. بس اسمي سمرتي

*****

سمراء : تريدني اسمعع ؟؟ اسمع شنوو ؟ كلشي ما اسمع .. انتة أسمع مني .. طلكني محكمة وبقي بس شيخ وتنتهي علاقتة وتصير مثل قبل فقط فصليتك مفهومممم !

صگار : كل انسان ويغلط .. وادري ادري غلطت سمرتي أدري غلطان ولجج والله كلامها اجة سجين بگلبي

سمراء : انقهرت من كلامها ! انجرحت وگلبك أذاك صگار مو ؟ .. لكككك أني گلبيييي وكففففف من تصرفك جنت حاسةراح يجي هاذ اليوم جنت حاسة بس كلت هاذ صگاري ما يسوي هيج بية أبد .. لككك أني غلطة وتريد تصلحها ؟؟ متندم لأن حبيتني وخلفت مني مووو .. تريد تاخذ مني ولد وتذبني الاهلي وتذلي يصگار ؟؟

صگار : أدري غلطان .. وما اكلج ولا راح ابرر بس ل...

سمراء : امشي وخررر مني صگارر ..كرهت اشوفف حتى عيونك الي جنت اعشقهن كرهتهن حيللل حيلللل كرهتهننن .. هاي عيونك إلي جنت تشوفي بيهن اتعذب من لمساتك الجانن يسعدني .. جنت تشوفني اتعذب بس مالك دخل وتكمل علمود تكسرني ؟؟ شمسوية أني ؟؟ كاتلتهم وما أدري بروحي .. لكككك كاتلتهممممم .. جاوببببب لوو تضلل مسمععع الهننن

راد يحجي ويبرر بس سكتة وطردتة برا .. لأن دموعي خانني ونزلن وما أريدة يشوف دموعي ينزلن من سببة .. ما أريد احسسهم بالانتصار ..

بجى علي وما ردت ارضعة وأني مهضومة لأن حسب ما كالت عمتي أنو مو زين على الطفل .. وسويتلة ممة وشربها وسكت جوعة ..

مر أسبوع كامل .. رجعت صحتي شوية .. ورجعت الغرفتي بعد ما ضليت أفكر ليالي الأسبوع كلة شلون اخلي يتندم على فعلتة علية .. ياريت لو جان بس متقرب بس كلامة بوقت عصبيتة جانن مشاعرة الحقيقية .. كل ما يخوني گلبي ويحن اذكرة كلامة وشلون يلوم بروحة لأن حبني وزوجني وخلف من يمي وما كسرني وأذاني ..

ما كدرت اسامحة أبد ..

رجعت وكرهت كلشي بهاي الغرفة .. كل شبر من هاي الغرفة كرهتها .. نومت علي وهوة جان طالع .. رحت كعدت على الچرباية .. رجعتني ذاكرتي الاسوء ثاني يوم بحياتي .. رحت طلعت مخدة وبطانية ونزلت بالكاع ..مر الوقت وعجزت أنام ماعدا النعاس مسيطر علية .. حاولت أنام قبل لا يجي بس ما كدرت ..

سمعت الباب انفتح .. غطيت وجهي وكتمت انفاسي الثانية .. وغمضت عيوني .. حسيت على نفسة صار قريب ردت اتحرك بس جانت القبلة على جبيني .. سكتت وما تحركت وبقيت امثل أني نايمة ..

مر وقت طويل وحركتة اختفت بعد ما سمعت صوت الباب انقفل عرفت نام .. طلعت وجهي لأن اختنكت وضليت مفتحة عيوني .. مر وقت زيادة وحسيت على البطانية تنرفع مني ردت اشرد بس قيدي بسرعتةة ونام وتغطى ..

سمراء : شوف صگاررر .. ترا كارهتك كرهةةة مو طبيعية .. لا تخليني اكرهك أكثر من كرهي الك وخر

صگار : افاااا .. بسرعة تحول هاذ الحب للكره !!

سمراء : كلة من سببك .. انتة إلي خليتة يصير كره

قبلني من كتفي ردت اكوم بس مقيدني ..

صگار : اسف سمرة .. اسف يروحي .. كل انسان وأني اعترف غلطت بحقج حيل .. بس وداعت علاوي بلحضة غضب صار الي صار .. حاولت اكض روحي بس كلامها ضل يزن براسي

سمراء : وانتة تضل تسمع كلامهن إلي كلة سم ! زين ما فكرت وكلت هية شدخلها ؟ بدال ما تروح بهاي حالت العصبية تتعارك ويا الكتلهم مو الطرف المضلوم

صگار : ما أعرف شنو ابرر .. بس سامحيني

سمراء : مو تحب عيوني انتة .. ليش خليتهن يبجن واستنجد بيك وبوحشيتك ليش ما عفتني ؟ لهل درجة الكره عامي عيونك !

صگار : جانت لحضة عصبية سمراء .. كلامه رجع بأذني رج .. ما عبالي گلبي راح يصير رجيج يمج واحبج أني حلفت بروح حسن أخذ ثارهم وثار حسن وانطيهن ولد منج ..

سمراء : شنو رحمي رخيص واحبل وانطي

صگار : لجج والله هاي قبل لا اشوفج وا....

سمراء : وخرء مني صگار .. هسة سويت الجنت خايفة منة باجر تنطي حتى علي

صگار : علي ابنااا سمرتي .. ابنا شلون انطي

سمراء : هااا بس راح تخليني احبل وتنطي مو

صگار : شبل من شبالي إلي تشيليهم برحمج شلون انطيهم سمراء .. وحق الحسين وداعت علي هاذ الكلام كلة قبل سمرائي .. قبل .. بس تعلقت بيج وبكل واحد تشيلي برحمج شلون انطيهم .. والله جانت ساعة عصبية سمرتي

سمراء : وخر مني صگار .. آخر مرة اكولها .. وخررر منييي

صگار : أريد اشم عطرج .. متعود علي

سمراء : أي تعود بدونة .. وخررر

صگار : قصدج تطلكين ؟؟ لو على كص رگبتي ..

سمراء : تطلكني محكمة وبعد ينتهي كلشي بينا مفهوم .. وتبقى بس شيخ لأن أني فصلية

صگار : فصلية گليبي أنتي ..

سمراء : وخر منيي .. أني غلطتك وتريد تصححها مو وخرر

ضب علية أكثر وقيدني .. حاولت وحجيت بس من حسيت علي بدة يتحرك سكتت .. ونمت ..

مر شهر كامل وجهي ويا صگار كلش جامد .. ما احجي ويا غير بس من يسأل ومن يبدي يتمادة اضل بس ' شعلية ' تمام ' فقط ...

حاول بكل مرة يصالحني .. بس أريدة يكون الة درس وما يعيدها لو مدري منو كال .. فعلاً الحق الأكبر على شيماء الحقيرة .. أجت وضلت تبجي واستخدمت نقطة ضعفة إلي هوة حسن .. بس أريد يكون درس وما يسوي هيج شي وياي مرة ثانية ..

جمدت ويا صگار حيللل .. بس يتقرب لو يلزم ايدي اطلع من المكان إلي هوة بي كلةةةة ..

وبيوم أبد مو عادي .. ما أعرف شنو من يوم ..

اثرم زلاطة ( سلطة ) علمود الغداء .. اجت نوارة وشيماء وشمس إلي زادت جياتها وأعرف المقصود شنو .. بس مستحيللل

نوارة : أي حبيبي .. هوة راح يصير الج لا تخافين

شيماء : هوة بعد راح يعوف مرتة .. اغتصب**ها وضربها وراح ياخذ جهال ويعوفها ويصير بيدج ..بعد حتى ماراح يتصالحون .. وهية هم تكرهة مو هيج سمراء ؟

سمراء : ابتسمت بوجهن رغم العصبية والحقد .. وكلت بفخر ..

- مجرد حلم وماراح يصير .. صگار إلي وبعمرة ماراح يكون الغيري .. أبو علاوي شلون اعوفة .. مجرد كرصة أذن الة علمود مرة ثانية لا يزعلني هيج

نوارة : چا مو اغتص***بج وضايتي تبجين وضربج ؟

سمراء : لا توهمين البنية وتكسريها .. مجرد راد قربني بدون موافقتي وأني زعلت منة لأن جان يريدني بقوة .. وطبعاً زاد بلمساتة وبوساتة وأني زعلت لأن ما أريد اصير حامل .. اخلي علوشتي يكبر يالة اترس البيت جهال ..

نوارة : تحلمين وروح حسن .. شوفي شلون راح ياخذ ولد منج ويذبج على بيت اهلج

سمراء : بيت اهلي من أريد اروح اروح برضاتي مو زعلانة .. وثاني شي مو فارغتلكم اخلف وانطيكم

شيماء : شني ولجج زعطوط وانطي كرصة أذن ؟

سمراء : من ينام بحضني يصير طفل وأني امة .. وثاني شي شوية لزمن خشومجن يدخلن بكلشي ندري الوحدة خشمها جنة كباية بس لا تدخل بحياة الناس ..

استغلن الوضع وبدن يصرخن علية .. لأن علاقتي ويا صگار مو زينة وعبالهم راح اسكت وارجع مثل قبل ومحد يدافع إلي ..

أجت عمتي وضلت تلاسن بيهن .. بهاي الحضة اجةة صگار .. بس شافنة صارت المضلومات بس بعد منو يكدر العمتي !

وزخت كلشي كالنة إلي ..

صگار : شني تايهة الجن وتحجن عليها ؟

شيماء : اييي بس ذاك اليوم اغتص**تها غصباً عنها علمود تجيب ول...

صگار : منو كلج سويت هيج ؟ تقربت منها بقوة وأذيتها وزعلت مني

سمراء : حيل استحيت من كال هيج .. أني بلة عادي بس هوة .. يبويييييييي

راحن وضلن يصيحنن ..

شيماء : روححح الها الفريخخخ .. زعطوط وتنطيك كرصة أذن .. زعطوط

عافهن وصعد فوك ..

شوية واجة مبدل .. صبينا أكل واخذنا على السفرة وأول مرة من بعد شعر ونص أكعد بصفة .. بس علمود اضوجهن ..

خلصنا أكل وصار اليل .. وصگار جان كاعد بالديوان بس هوة واسد .. شوية وشفت شيماء ورحمة رايحات الجهة الديوان .. عرفت راح تصير بعد مشكلة بيني وبينة .. دقائق وطلع اسد .. اجة ناحيتي متعصب وضايج ..

سمراء : شبيك ؟

اسد : همم راحح يشتغلن بأذنة .. يحشنها حش

سمراء : عمك لو يحبني صدك ما يسمع الهن ..

اسد : بويايييييي بويةةةة .. لو اكضهنن هذني الثنائي المزعج .. خرب يومهن

سمراء : خيولن مالك دخل بيهن .. المهم سولفلي شصار بدراستك ؟ نجحت لا ؟

ضلينا نسولف .. اسد سادس وعاد دور ثاني وبعد ننتضر رحمة الله علي .. معدلة حيل حلو ودرجاتة كلهم 90 بس بالرياضيات أخذ 20 بيها ..

مر وقت .. وسمعت صوت صگار عالي حيل .. بس ما سمعت شنو كال .. شوية وطلعن وجوهن حمر ..

اجن يمشن ومو مشي عادي عبالك يتناطحن .. مرن من يمي وأني متجية على الكاونتر .. وأجت رحمة رادت تجهم علية ..كضاها اسد ودفعها وهية ضلت تغلط علي وعلية وعلى صگار .. اجة بهاذ الوقت الشيخ وسمعهن يغلطن على أكثر ثنين يحبهم .. لعب بيهن جولة ..

مر الوقت وصار اليل ..

صعدت الغرفتي وبيدي علي ونلعب أني ويا ..

بين ما بدلت الة وخلصت ودا انومة انفتح الباب .. ما اهتميت والتهيت بـ علي انومة .. نومتة وكمت اريد انزل اخلص الشغل إلي علية .. شفتة يباوعلي بغضب بس ما اهتميت .. وصلت يم الباب وفتحتة .. اندفر الباب واندفرت على الباب .. صار مقابيلي وأني اهمس ..

سمراء : شبيكككك

صگار : تنطيني كرصة أذن يسمرة ؟ زعطوط اني كبالج ؟ تضلين تحجين كبالهن علية ؟

سمراء : مثل ما خليتهن يشمتن بية تستحمل كلشي يصدر مني .. وإذا لهل درجة نفسك غالية تعوفني وتنسى أني مرتك .. وتذكر أني فصلية

صگار : ذليت روحي ذل هاذ الشهر كلةة ..اعتذر وارجع اعتذر وارجع وأني بعمري وحياتي ما معتذر من أحد بس أنتي مو أي احد ! .. بس إذا لهل درجة گلبج حاقد علية أني اعتذر واتمنى تسامحيني وراح يصير مثل ما تردين ..

سمراء : رغم الغصة والقهر .. بس كلت ..

- اسامحك بس تحلم انسى الي سويتة ..

صگار : هاي هية .. وراح ترجعين مثل قبل .. كلشي ما يكون بينا غير بس السبب الي انجمعنا بسببة

سمراء : تمام .. وخر مني هسة .. واتمنى تطلكني محكمة

ابتعد عني وكال ..

صگار : تحلمين

سمراء : ما جادلت ورحت نزلت .. خلصت شغلي وتقصدت اتأخر لأن متأخرة .. خليت آخر شي الكراج
غصة بگلبي توجعني .. مقهورة بشكل مو طبيعي ..

حاولت أكون طبيعية والهي روحي بالكراج .. بس للأسف دموعي خانتني ..

شمرت الصوندة من ايدي وغطيت وجهي وانفجرت رحت كعدت على الدجة مال باب الديوان .. وضليت ابجي .. ما تمنيت أني هيج .. أساساً ليش سوة هيج ! ليش وصلنا الهاذ الحال .. أريدة واحبة بس السوا صعب .. شنو إلي راح يضمنلي ماراح يعيدة أو ماراح يسوي إلي كالة ؟

گلبي يريد شكل وعقلي شكل .. حرب بينهن ونفسيتي التعبانة حيل ..

ما ردت هيج يصير أبد ما ردت .. أريدة واحبة بس خوفني منة .. خلة عندي خوفة من الستقبل ويا بعد الي سوا بية وكلامة إلي خلاني انرعب حيل خفت من صگار ومن مستقبلي ويا ..

كمت وخلصت بساع ورحت صعدت .. لكيت الوضع هدوء .. الغرفة ضلمة وثنينهم نايمين رحت بدلت ملابسي تنكعن حيل .. وأخذت مخدتي وطلعت غطى ونمت بالكاع .. مر الوقت هدوء .. وقاطع هدوء الغرفة ..

صگار : تعاي نامي بمكانج

سمراء : ضل يردد هاي الكلمة وما ارد علي .. لحد ما بدة يحتد صوتة وخفت على علي يكعد كلت

- ما أريد شكراً

صگار : مو بكيفج تعاي

سمراء : هوة شنو مو بكيفج ؟؟ ما أريد يصير بينا قرب أبد

صگار : ليش !!

سمراء : تعيد إلي سويتة بية

صگار : سمراء غلطة وجانت بلحضة عصبية .. راحت ولت لا تذكريها يومية

سمراء : ناسيتها علمود ما اذكرها ؟

صگار : ردتي تسويلي لوية أذن ؟؟ .. هاي هية خوش سويتيها .. تعاي يمي سمراء لا تسوين هيج وتشلعين گلبي .. ترا يوجعني والله

سمراء : ما رديت علي أبد .. وضل يعتذر ويحجي .. وأني ماخذة وضع الصامت ولا نطقت بحرف .. لحد ما سكت وأني نعست ونمت ..

ومن هاي اليلة صگار تغير ..

مر شهر كامل .. وصگار يومية يتغير ويبرد بأتجاهي وجهة ذبل وصار سواد جوة عيونة .. صحتى بالنازل كل ما اشوفة لازم گلبة .. عبالي من سببي ولان أني هيج بس ما توقعت السبب أبد ..

بيوم عادي .. مشاكل ما تخلص أكيد .. خلصت غسل الكراج وهالمرة من وكت لأن ما عندي شي جان ..

صگار بالديوانية من أول ما غسلت الكراج اجة .. وأول ما خلصت طلع اسد واصهب وذياب ..
باوعلي اسد وعرفت بحلكة كلام ..

سمراء : أأمر اسد تريد شي ؟

اسد : ها لاا ..ليش

سمراء : حسيت بحلكك حجي ؟

اسد : ها .. اكلج سمرة روحي ورا عمي مدري شبي جنة مريض

سمراء : خليت الماسحة على صفحة وكلت بقلق ..

- شبي ؟

اسد : ما نعرف .. وجهة ضل يصير ازرك ونفسى كوة يجرة ردت اروح ويا بس ما قبل .. روحي أنتي شوفي شبي

سمراء : بدون أي كلمة رحت ..قبل لا افتح باب الصالة كال ..

اسد : عوفي الزعل سمراء .. ترا مريض حيل

سمراء : هزيت براسي .. وغسلت ايدي بصابونة بساع وأخذت علي وصعدت وفعلاً أول ما فتحت الغرفة شفتة واكف ولازم گلبة .. أول ما شافني تصرف كأنو ماكو شي بس وجهة يحجي العكس ..

- شبيك صگار ؟

صگار : سلامتج

- وجهك مب... تعبان من شي ؟

باوع علية بتعب وهنا أعلن هزيمتة ورجع على الحايط بتعب وكال بصوت كوة يطلع ..

صگار : محتاجج .. ما اكدر على بعدج بعد

سمراء : رحت خليت علي على كاروكة ورحت حضنتة .. أني هم مشتاقتلة حيل .. وكافي هاذ العقاب شهرين هوة يحاول بس راسي يابس جان ..

حضني بقوة .. روة عطش هاي الأيام الي حضنة جان فارغ مني ..

صگار : مشتاقتلجج سمرتي .. مشتاقلج حيلل يابعد نضري

سمراء : حسيت نفسة إلي يجرة صار مسموع .. ابتعدت عنة اتجى على الحايط ولزم گلبة حيل

- شبيكك صگاررر .. شيوجعكك

راد يحجي بس سكت وصاح بألم .. تخبلتتتت .. وضعة تدهور أكثر .. وكع بالكاع ولازم گلبة .. يريد يحجي بس ما يكدر عن طريق الاشارة فهمتة يريد أحد الولد ..

رحت ركضت اصيح على أي واحد .. أول ما طلعت شفت اسد يمشي ويرجع واصهب كاعد ومخلي ايدة على راسة .. صحتهم بخوف وكأن جانو منتضريني اصيح عليهم ركضو على صگار إلي انتهة ..

راح اسد بساع فتح أحد الجرارت وطلع علاكة مال دوة .. من كد الدموع عيوني غوشت وما صرت اشوفهم زين .. رحت شلت علي إلي صار يبجي ..

اهدئ بعلي وصگار انتهى .. صار واحد يصيح على الثاني واصهب بيدة جهاز ويكول الصگار ..

اصهب : لكك صگار .. بس اصحى .. اصحى بس اسحب النفس بس عاينلي صگارر

اسد : اصهبب راح يروح من يمناا اصهب .. سمرة روحي صيحي ذياب .. أي واحدد بساععع

سمراء : رحت ركض ابجي وميتة .. نزلت جوة ابجي .. كلهم تلكوني وبس ذكرت صگار متخربط .. ركضو .. عمي والشيخ الولد إلي موجودين ..

صعدت وراهم .. بعدني ما واصلة للغرفة وطلعو شايلين صگار واسد قبلهم يركض .. تخبلتتتت
علي راد يطيح مني بس ماعرف منو شالة واخذا مني .. نزلت والخبلني أكثر صريخ عمتي والشيخة وكلهن يحجون بخوف ..

ردت اروح وياهم بس محد خلاني .. تخبلتتت ضرت ابجي واضرب بروحي واكول ..

سمراء : كلة من سببي كلةةةةة من سببي .. ولككك صگاررر .. يابعد روحييي اسفةة .. لااا تروحح منييي صگارررر .. اخذونييي وخرووو .. اخذونيييي

......

غزل : تبجي وتصرخ وتضرب بروحها ..ما اكدر اروحلها لأن علي عندي .. اخذتة وصعدت فوك من ضل يبجي .. امي وجدتي وسمراء والنسوان .. وكأن مات مو تخربط ..

من شفت حالتة رجعت للماضي .. وعرفت السبب قلبة ..

هوة من الصغر اكتشفنا صگار مريض قلب .. ما أعرف بالضبط شنو نوع مرضى لأن يتخبل إذا ينذكر .. وحتى محد يعرف غير بس أني وامي وابوي الشيخة واصهب واسد وذياب .. وحتى واحد سمع من الثاني وجان يكلب الدنية إذا درة أحد يعرف وبلاخص سمراء ..

الضاهر هاي الأيام كلها ما ماخذ الدوة .. وحسب ما كالتلتي سمراء أنو تعرف هاذ دوة للضغط ومو دوة قلب !

بس وضعة من شفتة وكأن جثة .. شكلة ازرك كلش والولد متخبلين .. جان وضع أبد مو حلو .. مر وقت طويل .. من الصوت اختفى نزلت اطمن إذا اكو بشارة ..

سمراء كاعدة بزاوية وتبجي .. وامي نفس حالتها شافت علي أجت اخذتة تبوس بي وتحضنة .. هوة بس شافها كأن شاف مهرج .. ضل يضحك بصوت عالي .. على صوت ضحكاتة ضحك الكل ..

مر الوقت وصار ليل كلش .. كلهم راحو ينامون بس سمراء وامي والشيخة وضحى ونور وأني ..
ردت أخذ علي انومة بفراشة بس سمراء ما تقبل ..

صار ثاني يوم وخابرنا اسد .. صوتة يحجي شكل ولسانة يحجي شكل .. يكول بخير بس أبد ما طمني گلبي على صوتة .. أي شي يصير ينكلب صوتة .. طمن الكل بس گلبي ما أطمن ..

سدينا الاتصال من يمة .. ومر وقت زيادة .. أخذت تليفون امي وصعدت الغرفتي ورجعت خابرتة ..

غزل : الو .. اسد لا تجذب أني ما حجيت لأن جان كلهم موجودين .. شبي صگار ؟

اسد : كلشي مابي غزل

غزل : محد يمي اسد ..ولحسين ما أكول الأي بشر بس كلي شبي ؟

اسد : راح يسوولة عملية .. بس هاذ إلي فهمتة !

غزل : شهكت بخوف .. عملية شنو اسد ؟

اسد : ما أعرف .. ما خلوني موجود بس ذياب راح ويا الدكتور .. بس فهمنا أنو عملية الگلبة مدري شبي

غزل : ياربيييي لطفك .. هاي شلون إذا درت سمراء

اسد : لا تكليلها ابدد .. انسي شنو كلتلج مفهوم ؟

غزل : شوكت يطلع ؟

اسد : بعد هواي ..

غزل : ياربي دخيلك .. سمعت صاحو وسد الاتصال وأني نزلت ..

ما كلت السمراء ولا البشر ..

فوك ما مقهورة نوب صگار اجة زايد .. الصبح عرفت أنو أمير ماراح يجي بعد مدري كم سنة ومنا صگار وضعة موزين ..

مر أسبوع كامل .. ومدري شلون درت سمراء بعملية صگار وتخبلتتتت ضلت تدك وتلطم .. تخبلت بمعنى الكلمة .. ضلت تذب الصوج بيها بس ما تعرف شنو السبب .. كلنا نعرف عملية بس ما نعرف ليش !

ومر شهر .. كل ما اخابر اسد بالختلة يكول نايم لو ما كاعد .. اسد ممكن يكذب على الكل إلي علية لأن اعرفة بساع ..

امي تتخربط وتروح تجي مهبوطة ..

خديجة : يايمةةةة يصگار .. ولكمم الأجهزة محاوطتة بكل مكان جنها عدو .. ولكم احاجي يهمس بأسمها .. يهمس وما يحجي ما يكدر .. سودة بوجهي يمةةة سودة بوجهي يايمةةة يوليديي

غزل : تحجي وسمراء لازمة علي وتبجي .. علي ضل يبجي من بكائها وهية حاضنتة وتبجي بالكوة يالة اخذتة منها وصعدتة فوك .. الجهال يمي ويلعبون ويا وهوة ميت ضحك عليهم .. اباوع عليهم .. ما يعرفون شنو بهاي الدنية وشجاي يصير ..

تمنيت ارجع طفلة صغيرة وما أكبر ابد .. ارجع طفلة ما يهمني غير ألعب والهو ودراستي وصديقاتي .. جان كل همي ما افوت وقت الأفلام كارتون جنت انقهر وابجي فقط من افوت كارتون ..

بس للأسف .. كبرت وصار آخر همي ألعب .. صار همي الحياة وشلون التعايش وياها ..

مر أسبوع والحمدلله كالو صگار صار زين .. وصار يوم طلعتة من المستشفى ..

سمراء طول اليوم عيونها ما ناشفة ..

****

سمراء : شلون تنشف عيوني وأني خايفة .. وخجلانة من روحي أحس .. متحمسة اشوفة ومشتاقة الة بس أخاف اروح احضنى ويحجي علية لأن أني سبب إلي صار ويا ..

أول ما كعدت بدلت وحضرت روحي وبدلت العلاوي وكل شوية تيعد عمتي وتكول ..

خديجة : بدلي العلاوي يمة .. لبسي وعطري صگار مشتاگلة

سمراء : سبحتة وعطرتة .. وصار يلك لك .. وعطرة يسطر .. تعمدت اخليلة من عطري إلي صگار حيل يحبة

خلصت ونزلت .. انطيتة الغزل ومن باستة ضحكت وباوعت علية وفهمتني ما شاء الله داهية ..
مر الوقت واحنا نحضر غداء .. وبين ما اقطع الباذنجان والبتيتة .. صارت هوسة برة .. اخذتني ذاكرتي لليوم إلي انضرب طلقة .. بس جان يشعور يختلف .. قبل جان شعور فرح وسعادة .. هسة شعور ندم وخوف ..

استقبلو بالرمي إلي الأطفال ضلو يصرخون وبعضهم ركضو طلعو برا .. ثواني واجة اسد .. يضحك والضحكة شاكة وجهة ..

اسد : وينن الشبل

سمراء :ما أعرف يمكن يم عمة ..

راح ركض .. شوية واجة بيدة علي وعلي يضحك لأن يركض بي .. ابتسمت على ضحكة علي والتهيت اخلص شغلي وعيوني مغورگة دموع .. مرت نص ساعة .. شميت عطرة ! .. عرفت راح يفتح الباب .. نسيت شلون أجر النفس وتوترت حيل .. وفعلاً ثواني وانفتح الباب .. غمضت عيوني وطاحن دموعي كل عين منها دمعتين بنفس الوقت ..

سمعت صوت عمتي وبكائها والشيخة تهلهل .. خفت ادور وجهي .. بس أريد اشوفة .. صوتة خلاني ابجي أكثر شهر ونص أني ما سامعة صوتة ولا شايفتة ..
أجت بصفي غزل وهمست وهية تسوي روحها تاخذ زلاطة ..

غزل : يباوع عليج سمراء .. يريد ردة فعل منج .. دوري وجهج بساعع

سمراء : ما حجيت وبس خزرتها .. سمعت صوت شمس وهية تسلم .. ردت ادور وجهي بس كضيت روحي كوة .. شوية وراح طلع بعد ما اجة عمي اخذا

بجيت أكثر .. صرت اثرم وابجي ..

غزل : امداجججج يثولة .. غيررر تحضنييي طول الوقت يباوع عليج سمراء يريد ردة فعل منجج .. امداج يغبية

سمراء : لج والله خفت .. كلة من سببي صار بي هيج

غزل : مو من سببج سمراء .. والله مو من سببج يا عيوني

سمراء : كافي غزل فدوة كافي .. وين علي ؟

غزل : يم الزلم .. سمراء ترا صگار يحبج والله .. جانت عيونة تترجى أنو تدورين وجهج علمود يشوفج .. عوفي الزعل وحافضي علي .. صح إلي سوا مو حلو بس جانت لحضة عصبية وانطي فرصة وعود إذا عادهة أني بيدي اطلكج منة والله

سمراء : ما حجيت وهية تحجي وتنصحني .. كل كلامها جان حلو وحسيت ترتب تفكيري المشوش ..

التهينا بالأكل .. صبيت للخطار البرا ونوب للنسوان واحنا ولا صار عدنا وقت ناكل أبد .. شوية وجابو علي يبجي بعيارة .. بس شافني ضحك ..اخذتة من اسد وكلت ..

سمراء : اياا جذاببب

اسد : كو** جان يبجي جذب .. بس شافج ضحك

سمراء : اخذتة وضم راسة برگبتي وضل يباوع الاسد واسد يضحكة وهوة يحضني ويصرخ بفرحة ..

اسد : ليش ما حضنتي صگار .. عاف مجلس الزلم يروحون ويجون واجة علمود يشوفج ؟ بس طلع خايب املة .. الهسة هوة ضايج وكل شوية يطلع حجة علمود يجي ويشوفج بس محد يخلي ..

سمراء : يحجي وما عندي رد .. آخر شي ختمها بـ ..

اسد : لا تخسري سمراء .. ترا هواي تعبتي واخذتي ثارج وزيادة .. هسة رجعي سمراء القديمة وإذا رجع غلط وسوة هاذ عود تصرفي بغير تصرف ..

سمراء : عافني وراح بعد ما أجت أحد النسوان ..
انطيتها إلي تريدة وراحت .. رحت وديت علي يم غزل .. انطيتة الها وهوة مجلب بشالي ويصرخ بعصبية .. ارجعة بحضني يسكت ويباوع بعصبية وطابك حواجبة ويباوع على غزل وهية تصيحة .. اخر شي تعصبت وكامت رادت تاخذة مني وهوة ضل يصرخ .. بس عندي شغل كلش هواي انطيتة الها وضل يتعارك وياها ويع*فط عليها ..

ضحكت علي وعلى شكلة المتعصب ..

خديجة : تعاي سمرة اكلي شو ما شفتج تاكلين

سمراء : ما أريد يمة .. شبعانة هسة عندي شغل ..

ضلت تحجي علية لأن ما أكل .. بس ما اهتميت ورحت .. النسوان كلها تهمس البضعها وأعرف على شنو يحجن ..

رحت وشفت جهال بالمطبخ ويممم القورييي ..

سمراء : يااا ياااا .. ولكممم منا القوري راح تحتركونن

بهاي الحضة أجن نسوان وراهن نوارة .. وجان ابنها أحد الي يلعبون ..

نوارة : ولجججج منو أنتي وتصيحيننن على ابنيي

- على كيفج .. شمصيحة ؟ هية بس حجت رادت تنبهم

نوارة : وهسة شراحح يصيررر وإذا لعبوو ق....

- اييي ومن يوكع القوري على ابنجج تجين تتبجبينن

سمراء : سكتت وبس ضليت اباوع الها بنضرات حقد وكره وانتصار .. ما اهتميت وأخذن ماي النسوان ..

- ختولي .. هية تكرهج لأن الكل يحبج هنا

سمراء : أدري خالة .. أساساً لهاذ السبب ما حجيت

ابتسمت وكالت ..

- أنتي مريت الشيخ صگار ؟

سمراء : ابتسمت وكلت .. أي

- ما شاء الله شكد وصفولنا عليج ما عبالنا هيج جمالج

- والله ضلموج بوصفهم

سمراء : جمال عيونج هاذ خالة ..

بس هاذ الحديث البسيط دار بينا .. وكذالك الجهال موتوني آخر شي المرة طردتهم وطلعت وكالت ..

- تعاي سمرة قفلي الباب عليج ولا تخليهم يجون ..

قفلتة وبديت اشتغل .. شوية ورجع اندك فتحتة وجانو الأطفال يشربون ماي .. تكرر هاذ الشي ثلاث مرات واخر شي مليت .. وعفتة مفتوح ..

التهيت انضف اخفف ولو شوية من الهوسة .. بين ما أني انضف أجن الحياية .. تعمدن يحجن بصوت شبه ناصي علمود أسمع

نوارة : يمعودة هسة يطلكون وأني بيدي ازوجج إلى

شمس : الله هيج واصير مرت الشيخ

نوارة : تصيرين حبيبتي .. أساساً همة خربو كلش حتى اليوم ولا باوعت بوجهة وحتى هوة ..

سمراء : وأني اغسل حجيت .. حبيت يكون سلامنا حار وعيب كبالكم ..

نوارة : أي كلش عود تضحك علينا

سمراء : ومنو أنتي علمود اضحك عليج ؟ زعطوطة علمود اضحك ؟؟

ضلت تحجي وتدردم .. شوية واجو الزلم .. جايبين المواعين .. راحن بخزرة من اصهب .. نقلو كل الصواني وخلوهن بالكاع .. راحو واجن البنات

ضحى : يلة نرتب ا....

سمراء : مو هسة ضحى .. روحي البنتج جاي تبجي

ندى : علمود نخلص نخفف

سمراء : لاا حبابات .. فدوة روحن هسة شوية وتعالن عود ننضف ..

راحن ورحت قفلت الباب .. للأسف حيل انغثيت من كلامهن .. وطاحن دموعي .. مسحتهن بساع من حسيت باب الكراج ينفتح وعرفتة من عطرة .. متت خوف وتوتر ومستحى .. سمعت صوت قفل الباب .. ثواني وايدين حاوطن خصري وحضني قوي وضم وجهة برگبتي ..

طاحت دموعي وما كدرت اكضهن ..

صگار : مشتاقلج ينضر عيوني

سمراء : ردت احضنة واكلة أني هم بس ماعرف أحس شي كض لساني ..

صگار : بعدج زعلانة مني ؟

سمراء : ما حجيت ولا نطقت .. الحروف والكلمات راحن من بالي .. قبلني من كتفي وكال

صگار : شسويلج وترضين ؟؟ انطيج عيوني ؟ ..لو اشلع گلبي وانطي الج ؟ بس أأمري سمرائي

سمراء : ردت احجي واكلة مشتاقة الك .. وندك باب المطبخ إلي على الصالة .. رحت فتحتة وشفت نوارة الضاهر ما شافت صگار وكالت ..

نوارة : شسوين تقفلين الباب .. تدخلين عشيقج ب.....

شافت صگار وجمدت بمكانها ..

صگار : أي تواعد عشقيها .. امشي ولي وخليها وحدها هية وعشيقها ..

سمراء : راحت تركض وهوة غلط .. باوع علية وأني هم .. ضليت مركزة بعيونة وبمعاني وجهة .. حيل تعبانة معاني وجهة .. وبلاخص عيونة

صگار : صارلي شكد ما شايف عيونج ؟

سمراء : استحيت ودنكت عيوني .. رحت أكمل شغلي وهوة راح .. طول اليوم جنت تعبانة ونفسيتي متحطمة .. صار العصر .. علي بدة يتنحس يم غزل ما قبل هية تنومة ضل يبجي .. اخذتة وصعدت انومة .. هستوني خليتة بكاروكة انفتح الباب ..

شافني ضل يباوع علية .. نزلت عيوني ورحت يم الباب وهوة راح على الميز .. فتحت الباب وقبل لا اروح كلت ..

سمراء : محتاج شي ؟

صگار : محتاجج

سمراء : ضليت اباوع علي وحرت شنو اسوي .. اعوفة واروح لو ابقى يمة لو شنو أكول ! حك ارنبة خشمه وكال ..

صگار : سلامتج

سمراء : سديت الباب ورحت نزلت ..

نزلت أكمل شغلي أني والبنات .. شوية ونزل مبدل وكاشخ الآخر حباية .. انهلكنا أني والبنات وخلصنا الساعة بـ 1 ضبط

تعبت وتكسرت تكسر .. صعدت مبللة وميتة نعاس أول ما فتحت الباب شفتة متجي على تاج الچرباية ومخلي علي كاعد على بطنة ويضحكون .. بس شافني علي ضل يرفرف بأيدي يعبر عن فرحة بشوفتي ..

سمراء : يااا حبيب ماما .. هسة حبيب روحي هسة اجي .. شوكت كعد

صگار : صارلة هواي

سمراء : سكتت ورحت .. سبحت على السريع وطلعت بدلت ومشطت وروتين ليلي عادي ..
رحت علمود أخذ علي انومة .. أول ما شلتة لزم ايدي وجرني علي وكال ..

صگار : شكد راسج يابس يبعد حيلي

سمراء : حاولت اكض ضحكتي بس ما كدرت وضحكت .. رحت غيرتلة وبدلت الة وهاذ كلة كل شوية العبة ونضل نضحك وصگار يضحك على ضحكتة .. نومتة وكمت .. طفيت الكلوبات ورحت تغطيت وضليت اباوع للكنتور .. حسيت علي بدة يتقرب .. حضني حيل وردت احجي بس استوقفني بـ ..

صگار : لا تحجين .. شهر ونص ما اشوفج غير بس بأحلامي

سمراء : سكتت والتعب تغلبني ونمت .. فزيت على صوت تكسير .. باوع لكيتة واكف وبيدة أدوية وگلاص الماي متكسر .. فتحت المبات وشفت ايدي ترجف الدرجة ما يكدر يلزم الشي إلي يريدة .. كمت شغلت ضوة خفيف ..

سمراء : شنو محتاج صگار .. شنطيك ؟

وصفلي شكل الدوة .. انطيتة الة ورجفة ايدة مرعبة ما كدر يشرب ماي حرفياً كلة تبدة بالكاع .. شربتة ماي وبقيت واكفة يمة .. شوية والرجفة خفت

كوة كضيت دموعي وما نزلن .. حالتة حيل صعبة .. ايدي ترجف وحتى صوتة وشكلة وتصرفاتة ..

باوع علية وبحركة ضعف من طرفة وطرفي .. حضني بقوة .. بادرت وحضنتة بأشتياق .. دموعي نزلن غصباً عني .. حضني اقوة وكال

صگار : اخخخخ يبعد عافيتي .. ليش هيج جنتي حارمتني من طختج ليش يسمرة .. بعد توبة إذا ضوجتج ولو بحرف واحد .. توبةة

سمراء : ضليت ابجي واعاتب بي ..

- كلة من وراك والله .. كلة من وراك انتة .. ليش هيج حجيت وياي .. شكد توسلت بيك تعوفني بس جنت حقير .. والله لو بس مسوي هيج جان سامحتك بس كلامك ما اكدر انسا أبد .. أبد ما اكدر .. ليش تكول هيج .. إلي جنت خايفة منة صار وسويتة و....

صگار : كافي يبعد عافيتي ورويحتي .. لا تعيدين الماضي سمرتي .. خلي نبدي بداية جديدة من هاي الحضة وارجعي سمرائي القديمة

سمراء : حضنتة حيل وكلت ..

- والله اليوم ردت احضنك بس جنت خايفة .. ما تتخيل شصار بية من سوولك عملية .. حسيت قطعة من روحي خسرت صگاري .. والله انتة قطعة من روحي يابعد روحي انتة لا تسوي هاذ أبد .. لا تسمع الهن والله هدفهن يفرقنا ويزوجنك شمس

صگار : إذا جابت اضفر رجلج عود تكدر تفكر ازوجها تحرم علية حرمة غيرج ياشيخة گلبي ..

سمراء : وقت كلش هواي وأني ابجي وهوة يسكت بية .. سكتت ورحت نام ونمت بحضنة ..

كعدت وأني كلي نشاط .. درت عيوني على صگار متجي وعلى بطنة علي ويضحك بي ..

رحت بساع غسلت وجهي وسنوني وبدلت وأخذت علي ابدل الى .. خلصتة وصگار هم بدل .. واخذ علي ونزل وأني خلصت ترتيب الغرفة ..

مر أسبوع والديوان ما فضى من الخطار تروح وجبة وتجي وجبة أكثر .. وكلة غداء وعشاء ومتنا ..

.....

مرت سنة ..

جانت سنة كلش حلوة وهادئة ومع الكثيرررر من المشاكل .. علي بدة يمشي وحلى أكثر من قبل .. وعلاقتي بصگار قوت أكثر وأكثر وصار تؤام روح إلي

....

ضحى ..

بهاي السنة جانت حيل حلوة .. كذالك مع الكثير من المشاكل .. قطرة الندى كبرت وصارت مكافش هية وعلي واحد اوكح من الثاني ..

علاقتي بـ اصهب حيل حلوة بس من يصير تدخل من بعض الما يخافن الله تخرب .. بس ما نطول كلة كم ساعة ونرجع احلى من قبل

هند ابنها كبر وكذلك الثلاثي المرح .. ساعة مرح وساعة مكافش وساعة غيرة وساعة زعل .. وتعالن يا الامهات راضن وتفاهمن ..

حيل تعبت من بنتي .. هية وعلي حيل شخصياتهم صعبة وعصبيين حيل .. مرات من كد قلة الحيلة إلي عدنا نكعد أني وياها وهمة يبجون واحنا نبجي وياهم على الواهس ..

ورحمة ما خلصنا من تعنيفها للأطفال .. كل ما شافتهم وحدهم لازم تأذيهم .. أكثر من مرة تعاركنا وياها بس ماكو أي فائدة غير بس تزيد .. عجزت أعرف شنو علتها ويا الأطفال وهمة صغار ما يفتهمون أي شي !!

......

غزل ..

خلصت هاي السنة بين انتضاري الـ أمير وبين حسام ومشاكلة .. حيل بدت تخلص طاقتي وهوة كل أسبوع لو شهر هبطة .. يجي يخطب وجدي يوافق ولولا صگار لو اصهب جان رايحة بالرجلين ..

هذولي الإثنين إلي قريبين للشيخ وكمتهم مسموعة يم الشيخ ..

......

سمراء ..

مرن 3 سنوات اضافيات .. سنوات عادية گ أي عائلة مليئة بالمشاكل ويا شيماء وربعها ..

علاقتي ويا صگار قوت الدرجة مو طبيعية ..

علي صار عمرة 3 سنوات وصگار بدة يعلمة على الانكليزية وهوة حيل يفرح .. أكثر وقت ممتع عندة هوة من يعلمة أبو .. الضاهر ما مبقي إلي شي حتى بالصفات يشبه أبو كلش ..

شخصيتة جداً صعبة بس كلش حلوة .. لولا صگار وخبرتة بعلم النفس جان منتهية أني .. حتى يفضل أبو أكثر مني بس يحبني أكثر من أبو فهمتو!

ما تتخيلون عركات دودو وعلي شكد .. بس من واحد بيهم يتأذة الثاني يضل يبجي .. كلش علاقتهم مثل علاقتي بـ ضحى من جنت صغيرة .. والدبدوب أبن هند القاضي مالتهم .. ثلاثي مرح نسميهم ..

وبيوم جنت اجهز العيد ميلاد دودو تكمل عمر الـ 2

جنا حيل فرحانين نجهز واصهب طايررر بيها وبس تكلة باباتي يتخبل على هاي الكلمة .. لو تكلة أريد قطعة من القمر يروح ويجيب الها

راحت ويا يهجزون الكيكة وملابسها .. واجت محملتة تحمل .. لابسة بدلتها الودية وتتعاير بمشيتها وكل ثانية تگلب كذلتها الورا وهوة وراها محمل بالاغراض ..

سوينالها العيد ميلاد وجان كلش حلو .. وبين ما جان وقت تطفي الشموع .. وقفت الكل

قطرة الندى : اوكفوو ..

راحت على علي وجرتة من ايدة وكف بصفها وكالت

- يلة خلي نطفيها أني وياك ..

باوعت على ضحى إلي تباوع علية بضحك واجت يمي وكالت ..

ضحى : من هسة خلي نتفق على المهر ؟

سمراء : ضحكت ..

اصهب : هاي بدال ما تكليلي تعال بابا تاخذين علي ؟ وانة الي محملتني جني مرة وافتر بيج !

قطرة الندى : يلة يلةة عادي .. من اسوي عيد ميلاد بعد عود اخليك انتة تطفي الشموع

اصهب : انعم الله عليج بعد ابوج .. هم زين فكرتي بية

سمراء : وما قبلت تقطع الكيكة الة ايدها بأيد علي وعلي يباوع الاصهب بأنتصار ..طول فترة التجهيزات يتعاركون .. هاذ يكلة تختارني والثاني يكلة تختارني

اكلنا كيك وضلينا نسولف ..

نور : سمراء سويتي فحص ؟

سمراء : ها ! .. لا والله

نور : دكومي نروح دام هاذ المستشفى مفتحة !

ضحى : يمعودة هوة معروف على هاي الأعراض

نور : حتى لو نتأكد ..

سمراء : مو هسة باجر .. هسة تعبانة ومابية حيل

نور : دكومي خل نتمشى أني وياج ياعيني

سمراء : نور والله تعبانة حيل

غزل : رجلج بعدها توجعج ؟

سمراء : أي والله ما راح الوجع .. اخخ شلون وكعة نحسة

نور : مو كتلج ونبهتج !

سمراء : جنت مستعجلة ..

ختمنا اليوم بسوالف وضحك .. صعدت قبلهم كلهم ورحت استفرغت .. كل أعراض الحمل ضهرت عندي وبعد بس اتأكد وباجر اروح ..

ويا طلعتي من الحمام افنتح الباب .. مخلي على رگبتة ويسولفون ..

صگار : ها حبيبتي .. بعدج لعبانة روحج

سمراء : أي والله حيل تعبانة .. خمول وكسل ولعبان نفس موتني

صگار : يلة يلة استحملي استحملي .. مث ما شلتي علوش راح تشيلينة

سمراء : خايفة .. خاف صدك حامل

صگار : ليش هالخوف يا عيوني ..

سمراء : اخذني من ايدي وكعدني على الچرباية وضل يهدئ بية .. باوعت على علي الي نضراتة غيرة

- شبيك أستاذ علي

علي : ليش تخلي يلزمج من ايدج ؟

سمراء : لعد غير زوجي ؟

علي : وأذا شني ما تستحي انتة تلزم ايد امي

سمراء : نزلة من رگبة وكعدة بنصنا وكال ..

صگار : بعد ابوك أني شايف ولازم بقت على الايد ؟

سمراء : صگاررررر .. هسة يكبر ويذكرررر شلون اخلي عيوني بعيونةة ولككك

صگار : انجبي هسة شني هوة ماراح يشوف ! ولكك وعلي الة اجيبلك مثل امك مصكصكة

سمراء : دنك عيونة وكال بمستحى ..

علي : دودو تشبه امي

سمراء : فطسنا ضحك على كلمتة .. ولككك مخلي عينك على البنية

علي : ماما احبها حيل حبابة وهية هم تحبني

سمراء : خلصنا اليلة كلها ضحك وشقى ..

صار الصبح ..

روتين صباحي عادي .. الحد العصر .. بدلت وأجت نور وغزل إلي بالكوة سحلناها علمود تتغير نفسيتها ورحت للدكتورة ..

وجهتني على تحليلات وأخذت تحليل .. مر وقت طويل وصار وقت تحليلي ورحت أخذتة .. عبالي راح يكول شنو طلع بس طلع أمر من الدكتورة ما يكول ..

رحت الها وكما توقعت .. حامل ..

ما تتخيلون فرحة نور وغزل .. وأني فرحانة وخايفة وكل المشاعر اندمجت سوة

رجعت للبيت وكلت الصگار .. وجانت فرحتة أكثر من فرحتة بحملي العلي ..

خديجة : بيا شهر

سمراء : بعد ثلاث أيام اصير بـ الرابع

ضلت تهلهل وتهوس .. وكذالك رحمة هجمت البيت هجم وصل حتى تريد تضربني وتطرح الطفل ..

مر الرابع بسلامة دفرات الطفل ترجع السعادة والضحكة بوجه صگار .. وبس يسمع صوتة رأستاً يضل يتحرك وكأن يعرفة ..

ودخلت بشهر الخامس .. وبيوم جنت كاعدة أكل إلي توحمت بي .. اجة صگار من برا ..

سمراء : هلا يبعد روحي

اجة حضني وقبلني من شفتي لأن محد موجود .. كعد بصفي وشاركني مشاهدة التلفزيون .. شوية وبدو يجتمعون بالصالة وصار ضحك وسوالف .. صگار مخلي ايدة على بطني وجان يسولف .. فجأة الطفل تحرك .. توقف عن السوالف وصاح العلي إلي متحمس أكثر من صگار ..

كعد كبالي على رگبة وضل يلزم بطني والطفل حركاتة قوية .. وعلي ضحكتة رجت البيت رج ..
أجت رحمة جانت لازمة صينية .. بس شافتنا بهاي الوضعية كضت الصينية وركعتها بالكاع وصارت تصرخ .. الجهال كلهم انخلسو من صريخها وعلي حضني بخوف .. وهية تصرخ .. أجت علية رادت تهجم بس كضوها ..

رحمة : ولجججج ابنييي بالكبررررر وانتي فرحانة بأبنججججج ولجججج *** كو*** .. ابني بالكبرر وانتيييي فرحانة بأبنجججج

صريخها ملى البيت .. ضلت تدك وتلطم تخبلت بكل معنى الكلمة .. غزل أخذت الجهال إلي تخبلو من صريخها وصوتها ..

راحت للمطبخ وعبالنا هدئت .. ثواني وأجت بيدها سجين وتصرخ ..

رحمة : والله .. الى اكتلللل روحييي إذاااا ما تنطيني إلي بطنهااا والله انتحرررر وابليكمممم والله

سمراء : ضليت مصدومة من كلامها .. رادو يهدئوها بس متخبلة .. ضلت تتصارع هية وزوجها .. الحد ما جرحتة وصار دمة بطولة .. انرعبت من المنضر وهية ضلت تصرخ وانهارتتتتت

من منضر الدم ركضت استفرغ .. طلعت روحي وكل ما أكعد مهدود حيلي اتذكر المنضر واستفرغ أكثر جرني صگار وكعدني بغرفة عمتي .. أجت ضلت تسمي علية وأني منهارة ..

مر أسبوع .. واختصر إلي صار بهاذ الأسبوع ..

أسبوع عبارة عن عرك بيني وبين رحمة ..

طبعاً لأن أني فصلية .. والى الآن .. فا جنت اشتغل عادي بغرفتي .. اجاني اسد وكال

اسد : سمراء الشيخ يريدج

سمراء : بسم الله .. ليش

اسد : تعاي وهوة يكلج

سمراء : ردت اجاوب خلى وراح .. معانية جانت مو حلوة .. حزن على عصبية على خوف !

عفت كلشي بيدي ورحت .. أول ما طبيت للديوان ..

سمراء : سلام عليكم ..

الكل رد السلام .. ورحت كعدت كبال الشيخ بعد ما كلي أنو أكعد

الشيخ : بوية .. انة صحتج على شان اكلج چلمتي الأخيرة .. وانة اعتذر إذا راح تضوجج چلمتي بس أكول الحگ لو مهما يصير .. أنتي أول خطوة جانت أنتي فصلية الهاذ الدار .. صح نچرى واخذتي گليب الشيخ .. والله يابوية ما أعرف شلون اكلج !

سمراء : تفضل شيخنا .. كلمتك على راسي

الشيخ : سالم راسج يُبا .. ابن عمج الي شايلة دمعة كتل 8 من ولدنا واحد سببلة اعاقة طول عمرة .. ولدنا جانو زلم وراحو بدون سلاح بس استقبلهم الجبان بسلاح وكتلهم .. وجان المقصد من جيتج ناخذ زلم ونملي حضن الامهات الراحو ولدهن وترجعن منين ما اجيتن .. بس الكل الي بالدار حباجن أن كان أخ أو زوج أو أخت .. وأنتي بعيونج شفتي شلون حالتها ! مو هينة كاتل ثنين من ولدها .. فا يابوية اريدج تحنين على گليبهة وتنطيها إلي ببطنج يملي حضنها واتمنى ما تفشليني وتكسرين چلمتي ..

سمراء : أول ما كال هيج گلبي وجعني .. لزمت گلبي وصگار راد يجي بس الشيخ لزم ايدة

- بس شيخنا شلون انطي قطعة من روحي ؟ شلون اشوفة يكول الغيري ماما ؟

الشيخ : صح صعبة بس عايني الحالت أم مثلج خاسرة ولدها .. وثاني شي راح يكون كبالج وتكدرين تملين عينج دام هوة يمج وراح يكبر كبال عيونج

سمراء : بس ماراح يعرفني امة ! ماراح يكلي يمة !

الشيخ : مو مشكلة .. يكبر ويعرف أنتي امة وراح يحبج مثل ماراح يحب امة .. بوية أتمنى ما تشليني وترديني .. وانة طلبت منج لأنج بت شيوخ وما تكسرين چلمة الأكبر منج !

سمراء : ضميت شهكتي واستحيت اردة .. وافقت

ياريت لو رادتة وما موافقة ياريتتت ..

كمت منهم وأني بس اشهك .. بدون دموع وبدون اي ردة فعل .. رحت للمطبخ وشفت خديجة والشيخة وغزل ونور وضحى وهند وندى كلهن منتضراتني .. ما بية حيل حتى ارد عليهن .. كبل صعدت الغرفتي ونمت .. من كد ما جنت مقهورة نمت والغصة بگلبي

كعدت على صوتة وهوة يعتذر مني ..

سمراء : مالك ذنب حبيبي .. مالك ذنب .. بس أني هم مالي ذنب انطي قطعة من روحي !!

صگار : اخخخخ أول مرة بحياتي أحس روحي عاجز وما اكدر اسوي أي شي .. أول مرة حسيت بالكسرة وأني ما اكدر اسوي حل !

سمراء : كافي حبيبي .. كافي دام ابني راح يكون يمي واشوفة واحضنة هاي هية .. ألف الحمدلله

ما ردت ابين الة حزني وكسرتي وهوة ما عايز ..

كمت على دكة الباب .. راح صگار يفتحة طلع علي ..

علي : شنييي بس انتو يعني ما تردوني أني ؟؟

سمراء : اسفة علي .. بس جنت بحالة مو زينة ونمت

تقرب مني بقلق .. خلى ايدة يتفحص درجة حرارتي يتأكد انو مو مريضة

علي : شو مو مريضة شبيج ؟

سمراء : حضنتة وكلت .. دادة تعبني

دنك على بطني وكال بهدوء ..

علي : خطية ماما .. لا تتعبها خطية شوف مريضة من سببك

سمراء : صار الطفل ببطني يتحرك .. وكأن يرد علي

علي : أني اكلك لا تتحرك وانتة تتحرك

سمراء : هههههه .. معناها يحجي وياك ماما .. بس هوة ببطني ما تسمعنى

صگار : يلة .. كومو اطلعكم

سمراء : جنت حيل تعبانة .. وما وافقت ..

.....

مر شهرين وصرت بـ 7 .. بهاي الشهرين متحطمة نفسياً .. كل ما تشوفني رحمة تذكرني وتتشمت أنو راح تاخذ ابني .. وأني اطنشها بس بداخلي مكسورة بهاذ تصرفي كبرت بعين الشيخ .. وبعين الكل .. الشيخ صار وين ما يشوفني يمدح بية وكأن وحدة من بناتة ..

....

بيوم جنت كاعدة ارتب بخانة علي .. اجة صگار يضحك وفرحان ..

صگار : سمرائي .. كومي بدلي مسويلج هدية

سمراء : ابتسمت وكلت .. شنو يعني نطلع ؟

صگار : هوة أي بس المكان راح يفرحج هواي ..

سمراء : ابتسمت وكلت .. هاي رايحة اسبح واجي

علي ما يحتاج اسبحة لأن صارلة نص ساعة من سبح وبدل وكأن يعرف قبلي ..

عفتهم ورحت سبحت .. طلعت وشفتهم يحجون وبس شافوني سكتو ويضحكون ..

سمراء : خوفتونيي ولكمم .. شنو من مفاجأة ؟

علي : مفاجأة حلوةة .. بدلي وخلي حمة ( حمرة ) ومكياج ولبسي حلو

سمراء : حاضر يروحي .. تعالو اختارو الي ملابس بس لا تتطشرون الكنتور !

ضلو يختارون إلي .. وطلعولي فستان أبيض وبي ورد أصفر كلش حلو وبلاخص ينفع للحوامل وأني بطني كبرانة .. لبستة بعد ما خليت مكياج حيل خفيف .. لبستة وجان كلش حلو .. واحتارو حذاء صيفية مناسبة كلش للفستان ..

لفيت شالي وصگار بدل .. ونزلنا ..

انصدمت ضحى وهند كذالك مبدلات ومنتضرات ازواجهن .. متنا ضحك

نور : شني نزل عليهم الوحي ؟

سمراء : شمدريني ياخية .. شو فرحان أكثر مني

ضحى : أني هم .. كل شوية يكول اموتج فرح ..

سمراء : صدك نسيت اكللكم .. ضحى هم حامل بس بشهر الـ ثالث وما كايلين الأحد خاف هم ياخذونة من يمها ..

ودعتهن ورحت أني أول وحدة ..

طول الطريق علي وصگار فرحانين .. وأني فرحانة على فرحتهم .. مر نص ساعة واحنا نمشي ..

سمراء : وين رايحين ؟؟

صگار : كلشي بوقتة حلو .. هسة بس نوصل تعرفين

علي : أني حيل متحمس

سمراء : وفعلاً .. نص ساعة وبدة يدخل بفروع أني اعرفها .. الحد ما دخل بشارع أني حيل مشتاقة الة باوعت علي بدموع فرح ..

سمراء : صگاررر .. راح اشوفهم ؟؟

صگار : اصبري بوية كلها دقائق .. دقائق وراح تقر عيونج بشوفتهم ..

سمراء : صگار عود صدك ؟؟ .. يعني راح اشوف امي وابوي ؟؟

صگار : أي يابعد نضر عيوني ..

سمراء : ضليت ابجي وهمة يضحكون علية .. وفعلاً وكفنا كبال بابهم وأني ارجفف وعيوني دموعها عشرة عشرة .. فتحت الباب وطبيت .. كلشيييي ما متغير زرع زايد والاشجار كبرانات وأني بالكراج انفتح باب الصالة وشفتة حسين وراح ريم !!

ريم صرخت وحسين وكع منة تليفونة وعلاكة ..

سمراء : حسينننن ..

ركض علية وأني هم .. حضنتة وشتميت عطرة الي بس بالحلم جنت اشتمة .. على صرخة ريم التمو الكل .. أبوي شافني ضل يبجي وامي انهبطت ..

شالني عن الكاع وضل يبوس بية وكأن بيدة طفلة عمرها ثلاث سنوات ..

نزلني ورحت بحضن أبوي .. اخخخخ يا اشتياقي الة
ميتة بشوفتة .. بعد حضن وبكاء دام النص ساعة رحت بحضن امي الي ضلت تبجي وتصرخ وحاضنتني

ندوة : يايمةةةةة ياسمرتييي .. يايمةةة يانضرر عيونييي .. ولجج وين جنتي عني .. يابعد امج وين جنتي .. ولجج عافيتي راحت وراج عفتيني هنا وخذتي گلبي وعافيتي وياج

بعد سلام حار ويا امي اجة الدور الخواتي .. هم ما قصرنا ..

راح ابوي وحسين سلمو على صگار سلام حار ..

صابر : هاذ الطفل منو ؟

سمراء : حفيدك بابا

حضنة وضل يبجي .. وامي كذالك .. وعلي حاضن أبوي وهوة يكلة ..

علي : لا تبجي جدو .. هاي جبنا ماما واجينا احنة

سمراء : استغربت شلون عرفة جدة ! .. باوعت الصگار ضحك .. عرفت هوة كايلة ..

طبينا للبيت ورحت ما خليت شبر بالبيت ما بستة كلش مشتاقة البيتنا والايامنا ..

كعدت أني وخواتي وامي .. تخبلن وطارن من الفرح من عرفن أني حامل

ريم : ولجج شنو هاذ ابنججج .. يايييييي صرت خالة

سمراء : جان احلى يوم بحياتي .. تقريباً نص ساعة وانفتح الباب .. شفتة جبر ورحت لبدت ..

جبر : منو يمنا ؟

ريم : لحضة راح اجيبلك طفل واتحداك تعرفة !

سمراء : راحت صاحت على علي .. وارتة الجبر ..

جبر : منو هاذ الصاك

ريم : اتحداك تعرفة .. ابن شخص حيل تحبة ومشتاقلة ؟

سمراء : تحولت معاني وجهة للصدمة وكال ..

جبر : أبن سمراء ؟

سمراء : بجيت وطلعت من مكاني وصرت بوجهة .. ضل واكف مصدوم .. وكعت الأغراض من ايدة واجة حضني بكل قوتة .. حسيت عضامي تكسرن .. بدة يقوة وتضايقت من بطني وكلت ..

سمراء : على كيفك جبر ابني ببطني ..

باوع بصدمة وكال ..

جبر : حامل طفلتي ؟؟ كبرتي وصرتي أم ؟

سمراء : هاذ علي ابني ..

شالة وضل يبوس بي وعلي يضحك .. كتلة أنو صگار موجود .. باوع علية وكال

جبر : شلونها علاقتج ويا ؟

سمراء : تخبلللل .. كلش حباب وبينا حب يا جبر مو طبيعي انسان كفو بكل معنى الكلمة ..

جبر : معناها مرحب بگلوبنا إذا هيج ..

راح وأني رحت وراهم .. تسالمو وصگار الضحكة شاكة حلكة .. الضاهر اندمج زيادة هوة وحسين وابوي ..

جبر : والله صرت كفو الاختي

صگار : والله يخوي اختج نچرة وخلتني اعشگها عشگ

جبر : أدري بأختي .. ما تلحك تتعرف عليها بساع تشك الگلب وتكعد بي

صگار : والله ما عاب حلكك

سمراء : ضحكت وكل شوية أبوي يكون يبوسني

دقائق واندك الباب .. توقعت وجان توقعي بمحلة .. راح جبر يفتح الباب وطلت ضحى .. ركضت على امي وحضنتها وامي طارتتتت الكاعع ما وسعتهاا

وصار سلام حار كلش بينهم .. وكذالك الولد تعرفو كلهم على بعض ..

بين ما نجهز الأكل والضحك مالي البيت انفتح الباب وطلع زيد .. يايابة شكددد مشتاقة الة .. حضنتة حيل وهوة بساع عرفني ..

كبران وحليان .. راح يعيط سمراء أجت .. والله وربع ساعة وكل عماتي هجمن علينا .. مردنا مرد ..
والصدمة أنو هند جاية كذالك

وضلت يصيحن بطريق لأن حامل وقصيرة ..ماعدا طولي حلو بس الحمل .. اخخخ منك يالحمل ..
ضلن يسألن والمقرب والي اعرفها تريد الخير أكول عن حياتي الحقيقية .. والي اعرفها من جوة الجوة احجيلها بس المشاكل واحافض عن حياتي السعيدة

مر الوقت وعشت أجمل أيام حياتي .. صار اليل كلش وصگار راد نروح .. بس علي ودودو جان الهم رأي آخر بعد ما تعرفو عن الأطفال .. وفعلاً بتنا ..

وجانت ليلة سعيدة .. اشترينا حلويات كلششش هواي وكعدنا بالحديقة .. كل شوية ادمع وما مصدكة أبد أنو شفتهم .. أبد ما مصدكة

ثاني يوم بليل اجة صگار واصهب ورا .. ماعدا كلنا بنفس الطريق والبيت بس كلمن وزوجها ..

مرن الأشهر وصار موعد ولادتي .. صگار زاد خوفة أكثر من علي بأضعافففففففف ..

وصار اليل وجان موعد ولادتي بعد أسبوع .. بس بدة ألم ببطني قوي ! ..

( الأحداث الباقية راح تلكوها ببارت الـ 1 ..

هسة راح نكمل الحاضر 👍🏻 )

( الحاضر ) ...

خلصت ونومت علي وحيدرة وأني هم كلش نعست ورحت ذبيت روحي بحضن صگار .. حاولت أنام بس للأسف ما كدرت .. ضليت أفكر بموضوع حيدرة .. يعني ليش انطيها ابني ليش ؟؟ وشلون راح انطيها وشلون راح يعيش وياي ويصيحلها ومايصيحلي "ماما" ..

غفيت بتعب ..

وصار الصبح .. وفزيت على صوت دكة باب قوية ومرعبة وكأن احتلونا !! .....

للحكاية بقيه ..... 🤍

             __________------__________

واخيراً ...

خلصت بارت سمراء إلي أكثر بطلة عدها أحداث هواي وقوية .. البقية بارت واحد راح يخلصن أحداث الـ 4 سنوات إلي توقفنا بيها بالجزء الثاني ..

المهمم ..

اعتذر عن التأخير بس ضحتي جانت أبد مو تمام والبارت صار 16624 .. تخيلوو !!

.......

إلي يكولون نريد الجزء الأول .. اكتبو

( الجميلة والسايكوباثِ ) ..

تقريباً نفس تصميم الغلاف وراح تطلع أول وحدة 👍🏻

ولا تنسون تابعوني على قنواتي ..

تلكرام :

candiesjojo

انستكرام :

jamar_aali

وتكدرون تتواصلون وياي واتباد هم 🤍

دمتم سالمين 🤍

استودعتكم الله ✨

تصبحون على أحلام سعيدة 🤍