مي حلو: هدا اجر ابنتي زهرة ربي غيجزيك بالخير عليييه
زهرة: (بقات ساهية) عمرني فكرت فنهار للي يغذرني فيه رشيد وعاد ربيييلو ولدو قاااسحة بزاااف وجاتني فوق الجهد
مي حلو: للي غلب يسااامح حتى هو راك شفتيه كيف داير
زهرة: واخا نسامح منساااش انا وياه عمرنا نرجعو كيف كنا من ديما غنبقى نشوفو داك للي غدرني عمرني نعاود نتيق فيه وهاد هاد الولد للي غربي غيزييييد يفكرني
مي حلو: الوقت، الوقت
زهرة: (بزفرة طوييييلة) معلييييش انا للي جيت لعندو رخيييسة
مي حلو: اعود بالله علاش كتقولي هاكا نتي عارفة راسك غالية عندو ونتي الري وشوار فهاد الدار
زهرة: صافي امي حلو بلاش هاد الهضرة علية دابا شنو ندير مع ديك العافية منين ترجع وتشوف الولد
مي حلو: هه هاديك خليها علية
زهرة: هاديك انا ومقادراش عليها لدابا مزال كتقولي معندك كرامة سيري طلقي راسك بحال خديجة هه
مي حلو: زهرة نهضرو بالمعقول ملاك بحال هادشي تخلي راسها فالتيساع نتي قادة على راجلك وهو راه كيبقى باها وعليها بالاحتراام نتوما تنساو وهي تبقى معاه فالعيب ويبقى ديما كارهها
زهرة: اوا مسيكينة تصدمت كتر مني، انا عذراها والا عاود حط يدو عليها والله (حنحن وتم داخل فيدو لبيبي وهاز صويك فيه حويجاتو غير شافتو قلبها تقبط وزاد داك الكره كتر وكتر راها دابا كتشوف نتيجة خيانتو ليها على المباشر وبالدليييل، وعاد خاصها تربيه ماشي سيف عليها ولكن بقا فيها دورت وجهها وهو يحطو لمرت باه للي مدت يدها وغمزااتو باش يغبر جبد من جيب جاكيطتو ساشي صغيرة وحطها حدا زهرة للي بغا يبوس راسها وهي تحنيه كتر واخا هكاك حنا وباسها بلا هضرة، خرج ناضت زهرة طرقت باب بيتها ورجعت كتشوف فداك تربية للي نااااعس)
مي حلو: اه اه مسيكين واش هو للي نادب لراسو هاكا!!! لا لا هادو صباع مطراسييين فحنكوو
زهرة: (جات كطل عليه فكووه من ديك الكاشة للي ملوي فيها)
اويلي استغفر الله هادي طرشة بااااينة شوفي عنقو مسيكين وصباع فين مطراسيين ويلي استغفر الله الله يعطي القطع للي ضرب هاد الملايكة!!!!
(فكولو ديك التحزيمة للي كان محزم حيت ماشي ݣماط هداك وعاد مزيرين عليه)
واش بغاو يقتلووه هادو!¡!! (لقاو ليكوووش عااامر والولد هااابط بالمشݣ وطيااااب لدرجة مسلوخ بالحريق حل عويناتو كيبكي منين قاسوووه تماك بقا فيييهم بزااف لدرجة زهرة بغا عقلها يخرج هي حنيييينة بزاف فدراري صغار قلبولو فداك صويك مافيه حتى زيت ولا شي دهنة حتى من حوايجو للي عاطينو حاالتهم مسخييين)
اش هاد الوحوش للي كان عندهم
مي حلو: على للي سمعت لبنت الله يرحمها كانت يتيمة وغير مرت خوها للي كانت شادة الولد ومعندها حد
من غير خوها
زهرة: واخا يكون شادو كلب وميديرلوش هاد الحالة (شافت) حتى السرة (البوط) مزال مبرات ليه، شوفي كفاش ويييلي استغفر الله (هزت تيليفونها)
اجي دابا عندي نديو ولدك لصبيطار (قطعت حتى بلا ميجاوب)
واخا يكون عدووووها راه غير ملايكة!!!!
مي حلو: الام منين كتمشي كيبقاو ولادها غير يتلاوحو الله يرحمها مسكينة
زهرة: (شافت فالولد للي بقا فيها) الله يرحمها....
خديجة: (كانت فسطح دايرة ابيل فيديو مع يوسف وملاك للي جالسين فالبيرو كيتغدااو ويهضرو مجموعين، وهي غير كتشووف حست بغييييرة فشكل خاااافت هاد الاهتمام كامل يكون حب وهو براسو محاااسش خافت يرجع يفكر مزيان يلقى راسو مرتاح كتر مع ملاك خااافت منها تاخد ليها الامل باش تهرب من هاد الحبس، خافت تاخد ليها احسن انسان شافت فحياااتها...)
بصحتكم
(بقات كطل من سطح وهو يبان ليها حمزة جاي وهاز صاك)
جا حمزة
ملاك: (وجهها تخطف وشافت فختها)
يوسف: شكون هاد حمزة!!
خديجة: ولد الجيران
يوسف: (تسيف عليها) ونتي علاش كتدققي يجي ولا لا!!!!
خديجة: هه غرتي علية؟!
يوسف: (بقا كيشوف مخنزر فيها وحتى ملاك غير كتشوف بحزن ولكن ماشي فيها، بقد مكانت منو هو)
خديجة: هانتا احبيبي نفهمك علاش قلتها بلا منحس هو كان مزوج وبغا يتفارق مع مرتو وصدقت حاملة مهم هوما راه جيرانا ديال بالصح مو مكتخويش من عندنا منين عرف مرتو حاملة واقلة مابغاش وهو يطج روييينة وصاافي
يوسف: معندي منعرف بهاد الخزعبلات اخديجة وكنظن حتى نتي مشاكل الناس معندك مديري بيهم ولا تعمري راسك بيهم ولا تبقاي معلقة كتمنضري فللي جاي وللي ماشي
ملاك: (لا رد قلبها غيسكت حتى الماكلة حست بيها واحلة فقرجوطتها معرفت تصرطها ولا تردها)
خديجة: صافي واخا أنا غير م..
يوسف: مهم حنا غنخرجو من بعد ونصوني عليك (قبل متجاوب قطع هو علاش بغا خديجة حيت بعيدة على هادشي ولكن الطريقة باش قالتها!! معرفت واش كانت غيرة عليها ولا شنو مهم معجبوش الحال..) ملاك ملاااااااك
ملاك: هم!!! (رجعت كتكمل السوندويتش للي معندوش منين يهبط) صافي مشييينا!!!
يوسف: (وقف كيقاد شي وراق وجمع لبيسي ديالو) شكون هاد حمزة؟!
ملاك: (بلعت ريقها) كما قالت ولد الجيران
يوسف: وعلاش خديجة ذكراتو
ملاك: عادي راه قالت مو مكتخويش من عندنا يعني كنعرفوهم مزيان قراااب لينا بحال العائلة
يوسف: ومحاطش العين عليها؟!!
ملاك: (كتجاوب وكتحس براسها مخنوقة بزااف) لا
يوسف: مالكي؟!!
ملاك: واالو غير فية نعاس راك شفت لبارح منعستش بكري
يوسف: امم انا نوصلك من بعد نمشي نشوف داك السيد للي قلت ليك (صونا عليه شفيق) سمحلي نجاوب...
وي شفيييق... لا مزال فالخدمة... اممم مشفتوش... وايلي مزال مفخباارو... اهاااه عطييني لادغيس (دار راسو معارفش) نمشي نشوفو واش كاين تماك.. ياك الحاج مزيان... اممم صافي صافي واخا أنا نرد عليك (قطع معاه)
ياله نوصلك رتاحي فالليل نقدر نجي لعندك غيخصك شي حاجة!!!
ملاك: (مكتسمعش كلمة من عندو باغية غير توصل للدار تكون بووحدها حتى تيليفونها دارت مود أڤيون حتى توصل للدار مبقات عرفت لا ظحك لا تهضر وحتى صوتو تقيل فودنيها بغاتو غير يسكت مكتسمع واالو منو وصلو شافتو بغا يطلع)
فين ماشي
يوسف: نمشي نشوف اورطيغا واش باقي ناعس!! راه لدابا ممشاش عندهم لاكلينيك
ملاك: علاش كيجيه
يوسف: امم الواليد ديالو.....
ملاك: بالصح باه!!! (بقات واقفة حتى حل لاخر لباب شاد فجنبو وحتى وجهو صبح مطبوع كتر من لبارح وحتى عينو بزااف حتى تسدااتلو بقات كتشوف فيه وشاف فيها... حتى كتشوف وفاء طالعة مع درووج غير شافتو وقفت)
وفاء: اورطيغا مالك؟!
اورطيغا: والو، (شاف فيوسف) دخل
وفاء: وااا قولي مالك؟!!!!
يوسف: خاصك تلبس عليك واش مشعلتش تيليفونك فمرة!!
وفاء: (شافتو منخلها يعني غير طلعي باش ميقمعهاش لقات ملاك) زين صاڤا
ملاك: الحمد لله ونت؟! (تمو طالعين ودراري كيشوفو فيهم)
يوسف: كتعرف هادي؟!
اورطيغا: وشنو جابها مع هادي وعلاش هي هنا؟!
يوسف: واش هاد السيدة مزيااانة راها كراات معاها، (مجاوبوش) شوف الحاج بنسليمان جاتو كريز (لاخر شاف فيه منتابه) كانو تيصونيو عليك من قبيلة باش يعلمووك اما حسابلي راها فخباارك
اورطيغا: وفينو دابا؟!
يوسف: مزال فلاكلينيك مهم لبس باش نمشيو (دخل لبيتو للي كيسدو بالساروت) واش هاد السيدة مزيانة للي كرات معاها ملاك
اورطيغا: طاح الحك وصاب غطاه
يوسف: بمعنى
اورطيغا: راه باين
يوسف: (بجدية)
سمع امراد اخر مرة، اااخر مرة تهضر هاكا على ملاك انا نتسناك لتحت.. متعطلش...
(خرج معاجبوش الحال مفهمش علاش كيكرهها هاكا اه بجوج مكيتحاملوش ولكن ميهضرش عليها خاايب.. صونا على خديجة للي مجاوبتش، تم اورطيغا جاي كيعرج شوية داير نظاظر ديال الشمس وصل عندو جلس وهو كيلهت كأنه داير مجهود كبير وكيقاد القب على راسو)
اورطيغا: وهي شنو جلسها مع وحدة الا بالصح كانت متتعرفهاش
يوسف: كرات معاها حيت عندها شي حاجة فلفاك وعاد الخدمة قريبة داكشي باش كراات هنا
اورطيغا: من عندمن كرات؟! وخلات بنات لافاك كاملين وملقات غير وفاء
يوسف: مالها هاد وفاء
اورطيغا: ماملهاش ولكن... مهم هي تعرف الا كانت بعقلها كما تتقول راه غتفرز كولشي...
(بقاو ساكتين حتى وصلو لاكلينيك، كانت العائلة كاملة تماك مع نزل شاف اب ليلى تمشى عادي بارك على راسو باش ميعرجش وعاد هاز راسو ونافخ صدرو يوسف دوخو واش هدا للي كان كيتألم!!! داز من حداااه وهو يضربو بكتفو لاخر مهضرش واورطيغا كان كيتسناه يهضر حتى ضار عاد زير على سنانو واكلها فكتفو ورجلو للي ورك عليها بزااف، يوسف بقا برا كيسلم على شي ناس، كانت غيثة واقفة حدا ماماها للي مجمعين مع شي نسا)
غيثة: اورطيغا (هزت راسها مادة حنكها) صاڤا!!!
اورطيغا: صاڤا (سلم عليها) ونت!!
غيثة: الحمد لله بقا فيا عمو الحاااج (كتحنزز فوجهو للي باين واكل الدق ولكن مسولاتش)
اورطيغا: فين كاينين
ام يوسف: غيثااااا اجي هنا
غيثة: (ممسوقاش) فشومبر 10 الحمد لله فاتها. انا نمشي معاك نوريك
اورطيغا: (حط يدو على كتفها بامتمان) سيري اغيثة تكلمي لماماك من بعد ونشوفك (تم ماشي كيدوز حدا ولاد الحاج للي ممعتابرينوش من غير شفيق كان مع باه لداخل وحتى مو دخل الشومبر كان لقاه فايق، مشا جيهتو) الحاج!! (هز يدو يبوسها وهو يجرها بالزربة... ببرود)
بشوية عليك راك مريض
مينا: (وقفت كتغوت عليه وكتشوف فظهرو) فين كنتي منين كنت نصوني عليك دابا عاد جاي؟!
اورطيغا: (غير ضار عندها طيراتلو نظاظرو حيت بانلها الوجه معنفج وهو بنظرات باردة شاف فيها ولا بنظرة حيت عين مسدوودة)
مينا: دابزتي عاود الكيدار؟!!!
اورطيغا: (ببرود) ماشي بلاصة الغوات هادي الوالدة
شفيق: (شاف فباه للي مخنزر وباغي حتى هو يهضر وهو يسبق) لبارح راه دار كسيدة غير مبغاش يخلعكم
مينا: (بخوف) اويلي على كسيدة وفين وياكما كانت واعرة؟!
اورطيغا: بلا متخافي مكاين والو هاني قداامك حي الحمد لله
مينا: (جراتو عنقااتو) الله اولدي اشمن عين خرجت فيك عااود وعلاش متجيش عند ميمتك تقاابلك وتراعيييك فين جالس وفين عاطي الراس (شافت فالحاج ورجعت شافت فولدها)
اورطيغا: (غير حاط ذقنو على كتاف مو ونظراتو كانت فالحاج قرطاااس ماشي شوفات بلا ميحس براسو، لدرجة الحاج بقا كيدور عينيه، بعد منها) صافي مكاين واالو
مينا: الحاج مسيكييين تخلع عليك بزاااف
اورطيغا: حتى حنا تخلعنا علييه
الحاج: (كيهضر بصعوبة) فاين عملتي هاد لكسيدة؟!
اورطيغا: السعادة علاش؟!
الحاج: وعلاش مفراسي والو؟!
اورطيغا: مكنتش بغيت نخلعكم مهم لباس عليك انا نمشي نرتاح شوية (قبل ميهضرو تم خارج باغي غير يهرب منهم ومن نفاقهم تبعاتو مو بغات تشدو من ذراعو وتقصح)
الوالدة!!!
مينا: شنو هادشي للي راك دير فيه اولدي الحاج عيان ونتا كتقول تمشي شووف كولشي مزال هنا بقا غير شوية!!!
اورطيغا: وشنو نجلس ندير مثلا نصنع دوليبران ولا نعلق السيروم!!
مينا: منك منهم
اورطيغا: وااااناااا ماشي منهم هادو راه ولادو من لحمو ودمو اما انا غير خدام عندو فالمحال وووووووولد مرتو
مينا: (ضرباتو لذراعو وتوعت) براكة من تبووهيل الخاوي هو دايرك بحال ولدو ونتا غير منيييييفخ ومعاجبك حاال
اورطيغا: (حل جاكيطتو هز تريكووه بانلها شحال واكلها وماشي غير هي للي شافت حتى للي قراب تماك) نزيد نوريك
مينا: (ضرباتو لكتافو) الله يقلل حياااك موليتي تحشم من حد (بصوت خافت ميسمعوهاش) دابا يقولو غير ولد مينا دابز شكون عرفك درتي كسيدة
اورطيغا: (مخيخ) خليني نمشي الوالدة راه واقف غير بالبركة (تم ماشي ورجليه شوية كتعرج اما هي شافت فمفتاحة هزت راسها بنفخة ودخلت عند راجلها فين سمعت ولدو كيطاكي ويدافع على اورطيغا وخاصو يرطب شوية معاه حيت قاسح..)
غيثة: اورطيغا
ام يوسف: (غير كتحلف فبنتها للي غير لاسقة فيه دارت عند ختها) اوا ختي معرفنا هاد الموصيبة منااين نزلت علينا معرفت لا أصلها لا فصلها العائلة كولشي تيسول شكون وفين ومنين وانا راسي لتراب معارفة منقول ولا نوري اااانا الغالية للي شان وهما نقولهم زوجت لولدي شلييييحة معندها لا اصل لا مفصل..
اختها: ولبنت زوينة صرااحة
ام يوسف: قول شااارفة ظحكت على وليدي للي يجيبها في العشرينات بلارة وبنت فاميلياااا ااااااح على غدااايدي ومغيدير فية ولدي....
يوسف: (عيا يصوني على خديجة والو مكتجاوبش صيفط ليها اوديو)
معرفت شكون خاصو يتقلق انا ولا نتي للي جالسة فسطح تحسبي لولد الجيران امتى وفوقاش رجع!!!
(صيفطو مكره بقا جالس مع ولاد لفامي وحتى خوه للي جا غير شاف اورطيغا خارج مع ختو مشا عندهم)
غيثة: يوسف مقال لينا والو على هاد لكسيدة وكيف بقيت
اورطيغا: حيت ماشي شي حاجة للي تقال (وقف يوسف) صافي مشينا ياكما باغي تبقى انا نشد تاكسي هانية ختي يوسف
يوسف: غترجع ل..
اورطيغا: (بعياء) بغيت نرتاح شوية راك شايف لبلان
يوسف: امم.. حتى انا نوصلك ونمشي نتكى شوية بلاتي وندووز عندك
غيثة: مغتجيوش لدار الحاج سمعت كولشي غيكونو تماك
يوسف: لا ممساليش
غيثة: فين جالس اورطيغا؟! (هز حواجبو فيها) غير سولت بقييت فيا وصااافي
اورطيغا: (بابتسامة) بسلامة...
يوسف: غيثة سيري حدا الوالدة جلسي حداها
غيثة: حقا ماما سمعتها تتنݣر قبيلة حيت خديجة خطيبتك عمرها سولت فيها
يوسف: ومنين غتجيها النمرة خديجة!! قولها قالك يوسف واش نهار مشينا نخطبو خديتي نمرتها وعطيتها نمرتك باش تسولي فيها وتسول فيك!!
غيثة: بالصح..
يوسف: (لمس على حنكها بلطف) سيري حداها احبيبتي متبقايش واقفة هنا والا عييتي نوصلك للدار معندك مديري هنا..
(مشا عند لاخر للي مدݣدݣ بلا هضرة، وصلو لدارو) متأكد ملاك غتكون مزيان
اورطيغا: قولتي هي بعقلها اوا هنا تبين ليك العقل
يوسف: اممم.. فالليل نجي نجلس معاك
اورطيغا: (صغر عينو فيها) نتا خاطب ختها ولكن هاد الاهتمام بزاااف على وحدة خت خطيبتك
يوسف: قلت جاي عندك ولكن بانلي بلاش
اورطيغا: انا غير بغيت نفهم
يوسف: صافي حتى دابا موقع والو
اورطيغا: وصااافي ايووسف راني م**** فرايي هاد الساعة غير اجي مكاينش اصلا للي يجي يطل علية ولا يضرب فية الفقد
يوسف: صافي يكون خير.. (هبط اورطيغا ولاخر كمل طريقو لدارو للي تسالاو الإصلاحات فيه، عيا كيصوني على خديجة والو مكتجاوبش طلعلو الدم هو للي كان خاصو يتقلق ماشي هي للي حاضية بنادم وحيت مهضرش معاها حس بشي حاجة ناقصاااه على الاقل كيبغي يهضر معاها قبل مينعس...)
~~~~~~~
خديجة: (شادة تيليفونها القديم للي خلات فيه النمرة لقديمة وبقات مصدووومة مطرطقة عينها دارت يدها على فمها بقوة الصدمة الارض مهزاتهاش بقات واقفة كتمشي وتجي فسطح ممتيقاش رجعت شافت فتصاور وكتأكد 7 شهور باش رجعات لدارهم وطلقت واليوم مرت عمر الطليق ديالها دايرين ليها حفلة ديال السااابع وهو جالس على ركابيه كيبوس ليها كرشها للي باينة انها حاااملة ممتيقاش هادشي)
ياك هو عاݣر!!!!!!! كفاش هادشي!!!
لا لا لااااا ميمكنش!!!!!!!
وفاء: (بدلت حوايجها لبست بيجامة دارت شي اتصالات عاد خرجت من بيتها تاالفة دقت على ملاك فبيتها شي دقيقة عاد حلات ليها كانت بلا فولار) اووو غزيييولة بلا فولار
ملاك: شكرا (واقفة وملامحها ميتين بنعاس وفنفسها كتسبها علاش فيقاتها كانت ياله كدخل ليها نعيسة حلوة)
وفاء: ياكما كنتي ناعسة؟!!؟
ملاك: اه
وفاء: باغدوون.. قوليلي مال اورطيغا
ملاك: (هابلة بنعاس) مالو؟!
وفاء: مشفتيش وجهو كيف كان واش دابز!!
ملاك: ختي وفاء وانا مالي يكون شنوما بغا يطرالو انا بغيت غير نعس
وفاء: (تمت داخلة عندها) وصااافي اصاحبتي اشمن نعاس مقلتها حتى أنا للي هاكا عيني من لبارح
ملاك: (عوجت فمها متبعاها بعينها مربعة يدها بضجر) اوا طرف الخبز صعييب
وفاء: (ضارت طرطقت عينها فيها وهي طرطق بالظحك) هههههه اول واحد كيقولي هاكا
ملاك: شوفي انا ماشي شغلي فحياااتك اوفاء ولكن انا كريت معاك بغيت نرتاح منين نجي من خدمتي
وفاء: (تبدلو ملامحها لحزن) الا مهضرتش معاك ولا مع شي حد غندير فراسي شي حاجة
ملاك: ها!!
وفاء: محتاجة نهضر مع شي واحد نسي شنو وقع لي لبارح، عارفة راسي قجرت عليك ولكن معندي هاد الساعة فين نمشي ولا معامن نهضر!!
ملاك: (وفنفسها انا بعدا مكلقى للي يفهمني دخلت جلست فوق النموسية) واخا هضري
وفاء: (جلست فوق الكرسي) السيد للي كنت معاه لبارح دارلي اكبر قااالب طلع اكبر شماتة وانا اكبر مكلخة
ملاك: (بإشارة شنو ولكن بلا متسول)
وفاء: (بتنهيييدة) ضوروووني.. (بألم) معمري حسابلي غيبيعني بحال شي **** تقت فيه بزااف وتسنيت منو بزاااف حسابلي غرجعو ويكون ندم ساااعة!!! احححم معالينا (زفرت) مال اورطيغا؟!
ملاك: ههه للي فيك ممهنيييك
وفاء: عزيييز عندي بزااف داك السيد، واش كان فشي مطايفة عاود!!
ملاك: عاود!! علاش من ديما كيضارب؟!!
وفاء: لا بلعكس واخا مخيييضر ولكن روجوووولة انا نهبط عندو تهبطي معايا
ملاك: وانا مالي حتى نهبط عندو
وفاء: بيناتنا ماشي صاحبتو نتي؟!
ملاك: خليني محتارماااك اوفااء
وفاء: انا قلت هاكا حيت هاكا بانلي
ملاك: حيت شفتيني فدارو انا كنت تماك انا وأصلا مكنتش عارفاها دارو
وفاء: اممم مهم انا نهبط عندو نشوفو ورجع نتي نعسي شوية باش شوية نهردو الناب عفاك متخلينيش بووحدي
ملاك: (تبسمت معاها ابتسامة صفراااااااااااا ولوخرا خرجت كظحك جاتها صرييييحة ورتاحت ليها واخا لا هي من نوعها لا بحالها ومعندهم حتى شي قاسم مشترك...)
وفاء: (مشات لبيتها لبست بينوار رشت بارفان جمعت شعرها كوب شوفال مبغاتش تبقى بوحدها غير تهضر والسلام.. هبطت لعندو عيات دق والو محلش ليها طلعت خائبة.. دخلت لبيتها حيت مجاتش تنوض ملاك عاود...
بقات فبيتها غير كتبغي تغمض عينها كيجي فبالها شنو وقع كتجيها قشعريييرة منظر مقزز لحمها كولو كيضرها كولشي كان فيها الضرب الاغتصاب الاهانة متوقعتهاش منو وهي للي قالت واخيرا غتكون وتبقر على واحد كيمووت عليها وتحاول ترجع تستااقر معاه.. شافت فتيليفونها كان كيصوني قلبت التيليفون ويديها كيرجفو ورجعت مكمشة فوق ناموسية وحاشية راسها بين رجليها وردت الغلط كوووووولوو فيها من نهار رجع كولشي عندها كووول وعادي وحياتها اللور اللور.....)
خديجة: (صونات على ملاك مجاوبتتهاش صونات على مريم) الووو مريم واش راكي بوحدك
مريم: اه دراري فقرايتهم والراجل فالخدمة مالكي؟!!
خديجة: موصييبا اختي موصييبا
مريم: (تخلعت) اشنو واقع؟! ماما لباس عليها!!!!
خديجة: لباس لباس.. انا اختي انا..
مريم: شنوووو!!
خديجة: عمر امريم عمر مرتو حاملة وعندها شي سبع شهور
مريم: ياك مكيولدش!!
خديجة: (كتخبط ففخاضها) السيد عماااين كاملها وهو مكيقدر حتى يق** معايا 8 سنين وانا نرغبو على التحاليل وهو نووون واش بغا وكولشي عارف العيب منو
مريم: 7 شهور باش طلقتو!!
خديجة: اويلي اختي مريم نكون انا للي عاݣرة وبالصح هو لي كان صابر علية
مريم: ياك بيدي درت ليك التحاليل ففاس طبيبة قالت ليك كولشي مزيان وحتى خزان البويضات عندك مزياان
خديجة: اوا وعلاش حملت مرتو؟!
مريم: اختي قضاء الله وقدره يهب لمن يشاء مديريش فباالك صافي نتوما تفارقتو كل واحد يعيش حياتو متنسايش راه مبقى ليك والو وديري لاكط ديالك وتبداي حتى نتي حيااتك
خديجة: الله يا ربي اشنو مخبي لية عاااود
مريم: استغفري الله اصاحبتي.. اجي بعداا منين عرفتي مرتو حاملة؟!
خديجة: صيفطلي فلواتساب دالنمرة القديمة
مريم: وعلاش مزال مبلوكيتيه ياك اصلا قلنا ليك هرسي ديك النمرة!! حتى نتي اخديجة!!!
خديجة: دابا واش انا فوقت هادشي راني خايفة نكون انا لي معيووبة هاد المرة نموووت فيها إلا عاودت تطلقت مبغيييتش نخسر يووسف
مريم: وصاافي حتى نتي استغفري مولاك ربي هو للي كيكتب لكل واحد فينا ارزااقو استغفري الله ونساي عليك ومتعاوديش تهضري مع عمر راكم تفارقتو ونتي داخلة على حياة جديدة ديري عقلك اخديجة ودعي الخير تلقااايه... سيري بلا متفقسي راسك نصوني على ماما..
خديجة: بسلامة ختي (قطعت بقات مخلوعة، رجعت لفين حاطة تيليفونها كان يوسف مصوني عليها 5 دلمراات تأفأفت معندها خاطر تهضر وبقات غير كتصووط...)
~~~~~~~~~
أم يوسف: (شافت الوقت غير كيزيد ومبقى واالو وولدها غيعقد على وحدة محاملاها مباغاااهااا وممستعداش حتى تعطيها فرصة حاااارت شنو ديير ولدها راسو ياابس عليها وشاد فلبنت بيدو وسنانو وعاد كبيرة فالعمر والعائلة ماشي فمستواهم ملقات فيها حتى نقطة ديال الضو للي ممكن تبدا تقبلها كنتها، بقات كتشوف فمجمع العائلة حاسة براسها غدير موصييبة كولشي باغي يعرف مرت ولدها وهي موالفة الشيكي والنخوة وهادي للي غتجيب بعييييدة كل البعد عليها وعلى عائلتها راسها داااخ ومبقات عرفت راسها شنو غدييير....)
خديجة: (جاوبااتو) وييي يوسف
يوسف: (عاد فايق من نعاس) علاش متتجاوبيش؟!!!
خديجة: مخاصمة معاك
يوسف: وشكون خاصو يتقلق انا ولا نتي اخر مرة، اااااااخر مرة اخديجة تبقاي حاضية لية بناااادم شتي يوسف للي تتعرفي غيبان ليك واحد ااااخر (كتبسم من غيرتو) نتقبل كولشي الا تشوفي فشي واحد اااخر، من بين الناس ختاريتك حيت عارفك مربية ومتخلينيش هاد الثقة تزووول
خديجة: اولا هداك السيد راه كان خطيب ملاك وحيت كنتو بجوج بيكم كتغدااو قلتها ليها هي يعني الهضرة كانت موجهة ليها
يوسف: ولووو وهانتي قلتيها كااااااان هي وممعمراش راسها بيه اصلا
خديجة: وشكون قالها ليك
يوسف: حيت عمرها جبداتولي وحتى فاش هضرتي عليها مسوقااتش
خديجة: شووف ملاك هادشي مكتعاودو حتى لشي واحد حتى حنا خوتاتها ومكتعاودش لينا، وبالصح ممعمراش راسها حيت مزوج وقريب تزاد عندو بنت ولا ولد
يوسف: شتي كفاش تتباني داابا بفمك تتقولي بالصح ممعمراش راسها بيه ونتي كتقولها فلان ما فلان مفهمتش تتصغري راسك اخديجة
خديجة: (بحال ضربها بطرشة)
يوسف: خلي عليك هاد نقااايم الخاوية اخديجة، مهم انا هضرت مع بااك قالي مزال شي ورقة متقداتش ليك
خديجة: اممم ملقاش ورقة طلاق ديالي وخصااه ضروري مشا دفع للمحكمة باش تخرج ليه وحدة اخرى
يوسف: واقلة بقات عندي من نهار جبتيهالي وعطيتيهالي فالقهوة
خديجة: (تفكرت) اممم
يوسف: باقية مقلقة!!! زعما راكي عروسة الاهتمام كامل خاصو يكون ليك وتوجدي راسك لحياة اخرى
خديجة: وليتي كتهضر معايا خاايب ايوسف
يوسف: (زفر) حبيبة هاد الايام مخربق مع الخدمة والدار
خديجة: كما قلتي انا عرووسة يعني وقتك خاصك تعطيه لية ولا لا!!!
يوسف: كاينة احبيبة وداكشي للي تندير، مهم انا غنخرج عند صااحبي
خديجة: حتى انا مشغولة مع ماما كتقاد شي حاجة على ود سبووع
يوسف: متعذبيليش رااسك راك عارفة شنو تابعك
خديجة: هههه بانلي نتا للي خاصك توجد راااسك (سمعااتو كيظحك) بسلامة
يوسف: خديجة واش خاصك شي حاجة
خديجة: لا الحمد لله باقي عندي من داكشي للي خليتيلي...
يوسف: تنحس بيك مقلقة مني لا!!
خديجة: اه ايوووسف حيت وليتي كتقمعني بزااف, ملاحظتيش؟! معرفت علاش تبدلتي هاكا
يوسف: لااااا فمرة سمعي نقوولك اخديجة انا هو انا باقي باغيك وكتر من اللول ومقاااتل عليك وباغيك تكوني فداري اليوم قبل غدا الا غوت ولا درت شي تصرف ماشي هو هداك كان غير ردة فعل على شنو سمعت منك وخصووووصا قبيلة، خاصك تعرفي ضروووري انا باغيك مرتي ديالي بووحدي من حقي نغير عليك يمكن تتشوفيني اوبن بزااف ولكن انا فهادشي كرجل رجل تقليدي بحال اي رجل اخر مغريبي، فهمتي احبيبة
خديجة: (حركت راسها باه كانت كتقول فبالها غتعيش بحال عقليتهم ماشي تحايد الفولار ولكن ديك رجل تقليدي مفهماتهاش ومبغااش تحكر حتى لمن بعد وتفهم) هاد الموضوع خاصنا نتناقشو فيه وحنا مع بعضياتنا
يوسف: واخا حبيبة غير متبقايش مقلقة انا نمشي عند صاحبي ونصوني عليك تبقاي تجاوبي
خديجة: واااخ....
ملاك: (فاقت على ڤيبرور تيليفونها ناضت دااايخة معرفتش راسها فين كاينة وشكون هي وشنو كدير هنا!!! بقات شي 10 الثواني كتحك فروة شعرها كتمعن، عاد فهمت اش جابها لهاد لبيت هزت تيليفونها كانت خديجة للي كتصوني جاوبت) امممم
خديجة: موصيييبا املاك مووصيييبا
ملاك: (تفافاااات) مالكي وقعات شي حاجة لماما؟!!!
خديجة؛ لا انا، عمر يا ختي مرتو حاملة
ملاك: خلعتيييني ازمر تفووو
خديجة: وراه خاصنا نتخلعو
ملاك: لا خاصكي تخلعي نتي انا علاش نتخلع اختي!!!
خديجة: ياااك املاك زعما معارفااش الموصيبة للي انا فيها
ملاك: لا معارفاااش ومباغاش نعرف. وقققققفت معاك اختي فواحد نهار وفالتالي العربوون باان رديتيني مغيارة ومعرفت شنو!! سمعي اخديجة حنا خواتات ولكن فهادشي معندي منفعك فيه
خديجة: (بقات غير صااقرة بلا متحس) راه يوسف هو للي ختاارني
ملاك: (تبسمت باستهزاء) دابا يطليييه يخضر معاك (قطعت) خرا هاد زبلة عندها فالراس بلاصة لعقل ايخاان (خ***)
خديجة: (بقات فبلاصتها مكانش خاصها تقولها يوسف ختارني هي بغات تصلح معاها ساعة غير كفسااتها رجعت صونات عليها مكتجاوبش بغات غير تعتاذر.. مشات دقت فبيت مها يمكن تعطيها شي حل على الأقل ترتاح غير نفسيا كتسمع غير داك الولد كيبكي وهي كتراري بيييه)
واااا مامااا حلي خلااص
سهام: ههه مك جاتها المراهقة ديال تربية من نهار شدت ربيب نعاود باانت
خديجة: (ضارت مخنزرة فيها) سيري قلبي ساعة بأخرى
سهام: شناااهواا
خديجة: واااا كما كتسمعي ولا غندير صبعي فودنيااا نغوت لبابا وجدي للي جابو هاد الولد ونقول راه سهام مبغاتوووش وجالسة ظحك على ماما وراكي عارفة شنو غيديرو معاك اسهام
سهام: باسم الله عليك نتي فعار الله (طلعت فيها وهبطت ومشات) الله يستر
خديجة: المرض بقيتيلي غير نتي (رجعت كدق وهي تحلها مها لباب وخنزرت فيها باش تسكت)
زهرة: (بهمس) سكتي راه بحرا نعسلي
خديجة؛ ماما بغيت نهضر معاك
زهرة: (حطات لوليد فوق النموسية بشوووووويية باش ميفيقش)
خديجة: مدايرالوش ليكوش دابا يفزݣ ليك لفراش
زهرة: (ردات عليه ليزار) راني دايرة لميكة تحت كاشتو نخليه بعدا يرتاح مسيكين غير شوية راه طايب بزااف (شافت فيه متحسرة) وكان شفتي صحتو كولها ضرب الله يعطيهم القطع
خديجة: علاش شكون ضربو
زهرة: للي كان عندهم بااك وجدك طلعو لتاهلة يمشيو عندهم
خديجة: عنداك يمشي يجبد شي صدااع يصدق ضارب شي واحد تماك
زهرة: اوا راه ولدو هدا للي كلا طريحة دلعصا وهو مزال لحييمة خرجي خرجي غتصدعيييه (خرجت خديجة وتبعاتها مها واقفين حدا باب لبيت مابغاتش تزعزع معاها باش الا فاق تبقى حداه)
دابا غتفضليه علية اماما
زهرة: واش هبيلة راه خوك ابنتي هدا مالك وليتي هاكا غير محسووسة؟!
خديجة: عمر
زهرة: مال طاسيلتو هدا عمر؟!
خديجة: مرتو حاملة وعندها شي سبع شهور
زهرة: اوا بالزعطة بغيتي نمشيو نباركو!!
خديجة: اماما
زهرة: ياك مكيولدش!!
خديجة: واا هادشي للي كنت عارفة
زهرة: ونتي اش عرفك بيه بعدا
خديجة: امم ختو صيفطاتلي تصاور ديال السابع بغاو يفقصوني زعما راه كركبناااك ونتي للي مكتولديش وزوجنا خويا للي كتولد
زهرة: ياك نتي درتي التحاليل ديالك وكولشي بيخير الحمد الله
خديجة: اه درتهم 3 دلمرات غير هادي عام دارتهملي مريم بيدها وطبيبة نفس الهضرة كولشي عندي مزيان
زهرة: ايييييوا صافي هدا هو المهم ابنتي
خديجة: اوا شنو ندير
زهرة: سيري عند خالتك نجية شوفي واش كملت دوك لحوايج دختك راه مبقى والو وسيري عطي راسك شوية دالراحة
خديجة: واااا ماما واش محاساااش بية
زهرة: اش خاص مك ياك طلقتو لاش مزال كتذكرييه اصلا ونتي قربتي تزوجي
خديجة: وعلاش مرتو حملت!!!
زهرة: لا حول ولا قوه الا بالله العلي العظيم (دخلت لبيتها وسدت لباب مخلية خديجة مفقووسة حتى واحد محسات بيه معاها ومفقوس معاها)
ملاك: (كتجر فرجليها بغات دخل طواليط توجدو باش دوش ياله بغات تحل لباب متحلش كولو كتخرج يد ممدودة خرجت عينها صحصحاات من داك تضهشيرة ديال نعاس) اويييلي (طلت برويسها كتبان ليها وفاء سخفاانة راسها على الأرض ومن تكرشيخة للي معوجة فيها باينة فاقدة الوعي ولا ميتة مهم ماشي ناعسة، دخلت اليد للي تمدات لداخل وجرت يد تريكوها وسدت لبوانيي مطرقة لباب وبقات واقفة مصدووومة كتشوف فلباب للي مسدوود)
اويييلي يقولو انا قتلتها ولا يبقاو طالعين هابطين فية فالكوميساريااات والمحاكم...
اويييييييلي واش مااتت!!!
(بقات غير مطرطقة عينها فهاد المشهد درامي للي كتشوفو غير فالافلام والمسلسلات دابا طاحت فيه نييشان)
على زهر عندييييي بابا كان كارهني دابا يزييييد كتر تفوو تفوو وكان بقيت فلوطيييل حسن لي
(بقات كتمشي وتجي قدام طواليط)
زعما تكون ميتة ويييلي والله ميبقى يعاود يجيني شي نعاس!! شنو ندييير فهاد الموصيبة خاص نعتق البنت غتكون حية ان شاء الله غتكون حية!!!
(بانلها غير يوسف تقولهالو مشات لبيت هزت تيليفونها صونات عليه جوج مرات مكيجاوبش.. لبست بينوار كان معلق من مور لباب جاها طويل قدها بحال شي عباية ولوات شال عليها، مشات كتلست الباب حلالو بشوية بحال خيفاها تفيق هبطت درووج للي شاف تعابير وجهها كانت عادية ولكن لداخل خاايفة ومفاهمة والو دقت بشوية حتى رجعت كدق بالجهد حيت محلهاش شي دقيقة وهو يفتح لباب بالجهد)
اورطيغا: (متوقعهاش تكون هي، طلع وهبط فيها وبدوك درابل كتزيد تبان قصييرة) مالكي؟!
ملاك: (شيرت بصبعها لفوق) وفاء يمكن نتاحراات ولا ماتت (مكملتهاش حتى شافتو كيعرج وطالع فدرووج بالزربة) واش نسد لباب؟!!
(مجاوبهاش طلع وهي تبعاتو بشوية شافتو خارج من بيت لبيت)
راها فطواليط
اورطيغا: (شاف فيها باستغراب على هاد البرود حل بالجهد وهو يزدحها للراس حتى تسمعت)
ملاك: ويلي حتى الا مكانتش ميتة تمووت بهاد الدقة للي عطيتيها، حل غير بشوية!!
اورطيغا: (حنا عندها) واافاااا واافاااا (كيضرب حنكها بشوية شاف باكية ديال الكينات كولهم مطرطقين شاربااهم رجع كيطرشها بشوية كيحاول يفيقها باش ترد كتبغي تحل عينها ولكن الجهد واالو دغيا كيتشقلبو ويتغمضو ليها، وقف وخرج) سيري جيبيلي تيليفوني من لتحت
ملاك: منمشييش
اورطيغا: وعلاش؟!
ملاك: منمشييييش سييير نتا انا نحضييها
اورطيغا: غتحضييها!! على اساس غتنوض تهرب (مشا كيعرج بشوية وهي ديك سيري جيبي بأمر متقبلاتهاش رجعت كطل على لبنت خايفة عليها ولكن معرفتش تصرف!! شوية سمعاتو طالع كيهضر مع شي وااحد حتى وصل لتماك خرجت عندو) خاص نديوها لغساني
ملاك: وانا علاش كتشركني فهادشي خاصك نتا تديها للغساني
اورطيغا: عادي ابناادم واش مموالفاش تديري الخير
ملاك: الخير اه ولكن هادشي راه فيه البوليس والانتحار وسيير واجي وانا ماشي ديال هادشي راه يقتلني بابا ونخلع ماما
اورطيغا: (كيفهمها) انا مقادرش نصووݣ وهي خاص يديرولها غسيل المعدة ولد الحومة طبيب تماك هو للي غيتكلف بيها
ملاك: (خافت من باها) وشكون يهبطها فدرووج
اورطيغا: انا غنشوف
ملاك: (بشك) ياكما دايرلي شي قاالب وباغي تصفيهااالي
اورطيغا: (صدمااتو) عندك لسان قد الطول ديالك وشوييييييية دالعقل....
نعيمة: (كانت فالتوجيدات ديال سبوع بنتها حيت عݣوزتها دارت جهدها مضووبل وبغات دير احسن سبوع لحفيييدتها حيت ولدها حمييد عندو مكانة خاااااصة ديما مهلي فيها وداير ليها الخاطر بزااف وحتى نعيمة كتعاملها مزياااان..
كانت فالصالون كتعتاااني بشعرها حتى صونات عليها خديجة كتعاود وتشكي)
ياكما كذب عليك
خديجة: لا لا راه حفلة نيييت والناس معروضة وشطيح الماكلة والسيدة كرشها لفمها لا لا منظنش يديرها غير باش يفقسني ودابا ولاد لحرام عاد بانو لفلوس والماااكل
نعيمة: وعلاش غيفقسك مفهمتش نتي اشنو مشا ليييك اخدييجة من هادشي
خديجة: راه خفت عائلة يوسف يسيقو لخبار والله حتى يسبيوها فية أنا للي مكنولدش ويوقفولي فهاد زوااج
نعيمة: وشنو عرفهم هوما بشي عمر ولا شي زبل خوي راسك من هادشي اخديجة الله يهديييك
خديجة: خفت بزااف خاصني دغيا نحمل انعيمة
نعيمة: كفاش دغيا تحملي رزني ابنتي كيبانلي متعلمتي واالو من للي فات، زواج ماشي هو سبق فية نتساابق معاك الا مكنتيش مقتانعة وباغية تزوجي وتولدي حيت باغية تكوني أم تربي، تسهري، وتحني غير جلسي ابنتي حدا باباك وماماك
خديجة: (جاتها قسحت معاها) لا مقتانعة
نعيمة: ياك ماما مهلية فيك بلمساخن وكديرو جهدكم صافي خلي الباقي على الله هانا شحال وانا نتسنى وعمرني مدرت هاد الحالة للي راكي دايرااها ربي للي كيكتب اخديجة ماشي حنا للي كنتسابقو مع رزقنا
خديجة: اممم عندك الصح
نعيمة: ديري عقلك اخديجة وكبريييه راك داخلة على ناااس يفهموها وهي طايرة ويردووك جفاف بلا متحسي رزني وتقلي وعييقي راه يوسف ماشي هو عمر والشمالية ماشي هي لفييسية
خديجة: (عطاتها علاش كتقلب) عندك الصح
نعيمة: ياله سيري على منخرج من الصالون ونعيط عليك
خديجة: (قطعت، وبقا جامدة فبلاصتها من ديما غتبقى تحس بالنقص من خوتاتها،
ياك ها هي غتزوج يوسف زوين وكتبغيه ولباس عليه ومن عائلة هاي كلااص علاش مزال كيعاملوها هااكا!!!! طلت لقااات نجية داخلة كتبكي ومشات نيشان لبيت زهرة كدق دخلت وسدو عليهم لباب، مكرهتش غير تخرج عندها فلووس وباها مانع عليها الخروج عكس ملاك للي باقية تحت جنااحو وكدور ودردر على خاطرها وعاد تسافر وتبات برا الدار فوقما رشقات ليها ومكاينش للي حتى يسول ولا يقول علاش وفين..
عاود هزت تيليفونها لقديم رجعت شافت تصاور حتى صونا عليها عمر ابيل فيديو قطعت عليه ورجع كتب ليها)
عمر: من ديما كنتي كتحسسيني أنا للي مكنولدش وصدقتي نتينا للي عاقرة!!!
نتينا مصالحة لا لزواج لا تولي أم منين تبعت شوار مي ربي الحمد لله كتب علية نولي أب ووليت رااجل للي عماين وانا كنعاني معاك فيهم عندهم الصح نتي للي سحرتيلي
خديجة: (كتقرا هادشي وكتحس بالشمتة كفاش ردها هي للي ممزيانش ومتسواش محست حتى ردت عليه)
انا بعدا متأكدة انني حاملة من راجلي ولكن نتا ههه كاين الشك سير دير التحاليل الراجل ههه
(صيفطااتو ودغيا تنادم معاها الحال علاش جاوبااتو ݣاع وحتى هو محبسش من الصونيط طفات داك التيليفون وحلفت متعاود تشعلو مرة أخرى....)
اورطيغا: (جلس طالق رجلو ترتاح، عيط على شي دري يجيب معاه شي واحد وكانو ولاد الحومة ولكن ثقة قطع وشاف فيها الحوايج لابسينها كانت مربعة يديها ساهية ومخرجة عينها وباينة مخلوعة) معرفتيش علاش شربت هادشي؟!!!
ملاك: معرفتش
اورطيغا: مقالت ليك والو هاد نهار, حيت قبيلة كنتو طالعين بزوج بيكم
ملاك: (حركت راسها بلا) ناااااااري عنداك تموووت
اورطيغا: (بغا يخلعها) صراحة غتمشي فيها الا وقعت ليها شي حاجة
ملاك: (خرجت عينها) علاش انا مالي؟! هي للي بغات تنتاحر
اورطيغا: ونتي للي كاينة معاها فالدار
ملاك: انا كارية بيت كما هي كارية وكما حتى نتا كاري (دارت يدها فخصرها بحال غدابز) وزايدون مكاينش للي يمشي فيها قدك نتاا
اورطيغا: (شاد الظحكة) أنااا!!!
ملاك: ااااااه، أنا شاهدة اولا هي صاحبتك نتا وهي قبييلة هبطت عندك وانا نعست حتى فقت لقيتها فهاد الحالة بحال والو سممتيها بداك الكلام عندك ولا شربتيها شي حاجة وطلعتيها لحتيها هنا!!!
(طلعت فيه وهبطت) كولشي متوقع منك
اورطيغا: (بقا غير كيشوف فيها زربت علييه، حتى تدق لباب مشا حل كانو جوج دراري وراهم دخلو هزوها)
ملاك: صبر لبسوها مسكينة بعدا شي حاجة طويلة (مشات لبيتها قلبت جابت بينوار وشال عاونها اورطيغا حتى لبسوها حيت كانت لابسة غير كولون وتريكوه لاسقين عليها،
كان بدا يرجع ليها الوعي شوية وعينيها كيتشقلبو هبطوها فدرووج هو رجع دخل لدارو لبس كابيتوشو دار كاسكيط ونظاظر ديال الشمس وتبع دراري اما ملاك بقات بدوك لحوايج تاالفة مشات جابت غير سوارت طموبيلتها ولوراق تبعاتهم زربانة وكتلوم راسها اش داها لشي مشاكل واخا بقات فيها وفاء ولكن هي براسها بعدات غير باش تخلوا مع راسها وتفك حريرتها، وصلو لتحت بقاو كيتسناوها تجيب الطموبيل تحت الدار واورطيغا مزال كيحاول يفيق وفاء جات حداهم طلعوها اللور وهو ركب حداها وزادت لسبيطار الغساني للي قريب ليهم مسافة 5 دقايق)
ملاك: ويلا عيطو لبوليس
اورطيغا: متخافيش صاحبي غيتكلف
ملاك: ويلا مثلا مثلا عيطو البوليس راه غنمشي فيها بابا يقتلني وعاد خدمتي
اورطيغا: متخافيش حتى الا وقعت شي حاجة غنبعدك من هادشي كامل نتي غير درتي بليزير وصلتينا بحال اي واحد شافما وهزنا لصبيطار
ملاك: (بقات كتشوف فيه وفنفسها واش تيق ولا لا!!!)
اورطيغا: شوفي فطريق (قلبت وجهها كتكره هاد لقمييع ديالو مدخلتش من لباب لكبير مشات من لباب اللوراني حلهم العساس دخلت كانو جوج دراري لابسين طابلية ولكن تحلف عليهم ما هوما فرمليا ما هوما من عائلة الصحة هوما براسهم خاص للي يضرب الفقد بيهم..
مهضرتش بقات فالطموبيل ركبوها فكرسي متحرك وزادو بيها جا هو حنا وطل عليها من سرجمها)
صافي سيري نتي رجعي للدار
ملاك: زعما!!!
اورطيغا: (وقف ضاراه رجليه وجنبو) شنو للي زعما ؟!
ملاك: معرفت... نبقى معاكم نعرف غير واش بقات لباس
اورطيغا: لا معندك فين تبقاي بعدي من المشاكل شوية هي غتخوي معدتها وغردها للدار لعندك معندها معنى تبقاي هنا وتجبدي صداع عليك
ملاك: (بقات كتشوف اونفاص معاها وعقلها خدام تبقى ولا متبقااش حتى ضرب بشوية سطح طموبيلتها)
اورطيغا: ياله سيييري بحال والو البوليس يجي
ملاك: وايلي!!!!
اورطيغا: ياله ياله.. باش متبانيش للناس ويقولو مولات الطموبيل الحمرا للي جابتها كانت م.. (شافها ديمارااات راجعة ماشريال تبسم ݣيداها فطريق وتمات ماشي فحالها حتى بلا متلفت ولا تقول بسلامة...)
شريف: (كانو جالسين فقهوة هو حاط اتاي ويوسف حاط قهوة) هادشي متيتخبااااش مدام نتا مقتانع وعاجبك الحال عادي تقولها وأصلا داكشي كان زماان ماشي فهاد الوقت
يوسف: انا مقتاااانع والبنت باغييها
شريف: اوا وعلاش تتعقدها على رااسك وحتى لالة الغالية خاصها تعرف ماشي بالضرورة تعرف كولشي على خطيبتك للي مهم عندك نتا راه غتولي وحدة منكم
يوسف: عارف غدير شي مشكل الا عرفت واكترية من بلاصة اخرى
شريف: ملح زواج أخاي يوسف هوما هاد المشاكل صغاار
يوسف: اوا ونتا علاش فرتيكتيها؟!!
شريف: كترة التشراااط لدرجة حسيت براسي بحال شي بروجي عندها مكانتش فاللول هاكا
يوسف: وانا هادشي باش عاجباني خديجة مكاين لا تشراط لا مشاكل لدابا العرس قرب مكاين لا تشراط مادي لا معنوي لا احلام وردية وانا هادشي مخليني مرتاااااح معاها كتر
شريف: قلاال بنات الناس حتى نتا متفرطش
يوسف: شنو عارف علية!! مغنخليها ناقصة معايا والو قبل متحل فمها تكون عندها الحاجة
شريف: (ماشي فݣانتو) اللهم يسر!!
يوسف: نتا مكاينش شي محاولة اخييرة
شريف: من عندي لاااا!!!
عماين وانا شاد ليها كتر من الخاطر لدرجة اول مرة تفارق معايا ونكون أنا مرتااح...
صافي منين شافتني قلبت ديال بالصح بغات ترجع ولكن بشرووطها عاود
يوسف: اوا!!!
شريف: (حرك راسو بلا) صافي خرجت من الخاااطر
يوسف: معليييش الخير فيما ختاره الله اجي الحاج حالتو شوية مزيان؟!
شريف: الحمد لله
يوسف: صراحة عيق على اورطيغا
شريف: شوف هو خاايف عليه بزااف ولا كيمرض بزااف ومرضو سميتو مرااد لا هو معاه مزيان لا هو معاه خاايب
يوسف: ولكن مقصح معاه كتر ممزيان معاه
شفيق: اه مقصح، كيدير معاه شي حوايج ممفهومييينش براسي كنقول راه بزااف حتى عرفت.. ولكن تهضر توحل
يوسف: بحالاش.....
~~~~~~~~
ملاك: مع رجعت للدار جلست اول حاجة طاحت فبالها هو حمزة للي على للي سمعت رجع!!
ولداابا مزال مهضر معااها مواالو عارفة انها مستحييييييل ترجع معاه ولكن مكرهتش غير تفهم علاش دار ليها هكاااك غير نسبة باش يبرد غرورها شوية.. واش كانت عندو رخيييصة لهاد الدرجة للي يسمح فيها المرة اللولة والتانية ولكن هي للي مكانش خاصها تعاود تعطيه فرصة...
زهرة: (عاودات داوات الولد رشيد كيصوني والو مكتجاوبش) هانتي تشوفي فاش واحلة اختي نجية
نجية: معليييش تربحي فيه اااااجر كبييير راه واخا هكاك راه كيبقى يتييم
زهرة: هادشي للي خلاني نشوف من حاالو راه عندي بنات وكما عتقت هاد تربية نبغي هاد الخير يتصرف فيييهم.. ومالكي نتي؟!
نجية: ماشي حمزة راه مطججنا وطرد مرتو
زهرة: اممم ومشات؟!
نجية: لا كان بااه ووقفلو دخلها لبيتي وبقاو هضرة والغوات وانا خااايفة على هدا وهداك معرفت شنو ندير عييت تبرد ولا واحد فيهم بغا يتقاااد
زهرة: اوا يجمع راسو دابا مرتو حاملة معندو فين يرمي ولدو
نجية: قالها نربيه ولكن نتي للي متكونيش لية مرااا وبدا يحرمها عليه وشي هضرة كتقطع القلب الولد جاي من داك سطاج غيتفرݣع
زهرة: لا حول ولا قوه الا بالله العلي العظيم من اللول يفكر فهادشي
نجية: حنا قلنا تحمل ويتردع ويبغيها ساعة غير زاد شيطانو حمااا
زهرة: علاه كنتي تجري على حملها
نجية: اييييه شحال وكلت فيها ونجري بيها ها لمساخن ها لمسيد ومكانش بغا حتى يبقى معاها بقات عليه حتى..
زهرة: اوا واااش داك نتي
نجية: كتاااابت علية وصاافي كانت تبقى فية كل ليلة تجي تبكي علية وحتى انا ازهرة بغيت نشوف حفايدي راكي عارفة حمزة هو عيني
زهرة: معلييييش انجية دابا سايسووو معاه وغير بالعقل هضرو معاه اما الغوات غيعطي غير لغناااان وصافي
نجية: علاه ماشي قالنا انا بغيت ملاك هاكا مخرج عينيه وبقا على باه نتا سباب وتفرݣع عليه
زهرة: معندو ميبغي فبنتي يحل مشاكل ديالو مع مرتو ويتسنى ولدو ولا بنتو للي جاي فطريق صافي ينساها عليه وكلها شد طرييقو وهي راسها راه خااااااوي منو
نجية: عارفة اختي عارفة ولكن من اللول وكان خليناهم على خاطرهم
زهرة: قوليلي دابا نساي هاد الهضرة البنت عندي حتى هي بغات تحمل
نجية: والله يا ختي زهرة ومتساليني حلوف راني دايرة معاها جهدي راها بنتي حتى أنا للي درتو مع مرت بنتي راني كنديرو معاها خاصها غير متمشيش لبلاصة البرد وصافي
زهرة: على مولانا اختي
نجية: والعرس؟!
زهرة: على مفهمت من الراجل السيد مزرووب هانتي العقد غيديروه الجمعة وهو على مبين بغا غير ليلة ولكن عائلتو بغاو العرس
نجية: خليوها تعرس
زهرة: باها يديرلها ليلتها العرس دارتو المرة اللولة وهوما الا بغاو العرس الله يعاونهم
نجية: راهم لباس عليهم وغيبغيو يشوفو عرس ولدهم، نسييييت مجبت ليك داك الطرز معايا
زهرة: سيري بعدا فكي حريرتك مع ولدك وهضري معاه بالعقل وعاد جيبيلي السخرة
نجية: (بتنهيدة) اوا نخلييييك اختي هاد الساعة
زهرة: ربي عويييين.....
حمزة: (من بعد منوضها مع بااه مزيان وشااافو راسو يااابس مزال باغي يطلق بقا كيبكيلو تمااك وكان اول مرة يشوف باه كيبكي معرف ميدييير داك الغضب كااامل خلاه جااامد وغير كيشوووف، اخر حاجة بغاها فهاد الدنيا هو يبكي باااه بهاد الطريقة ويكون سبب فدموعو ولا يشوفو شي نهار كيبكي ومن جهة علاش ميشوفوش انه ممرتاحش فهاد زواااج وقلبو ماشي معاها مع وحدة أخرى لي ختارها من زمااان وعيا ينسااها ومبغاش تنسى ليه جلس حتى هو فالقنت منو للأرض شاد راسو اونفاص مع باااه دار غلط كبيييير منين سمع كلام بااه نهار اللول مكانش خاصو يسمعلو مدام ختارها ورتاح معاها يبقى معاها ويتقبلها بكوولشي فيييها... دخلت مو غير شافت راجلها مشات لعندو كتواسيييه تم وااقف ورجلييه ممساعفينوووش شد فالحيط وتفكيرو فقط فملاااك غتكون عرفت وسمعت بكوولشي مبقاش عندو لا وجه لا واالو باش يهضر ولا يفسر ومكانش بغاها تعرف انه كانت خلوة بينو وبين مرتو بقا فوسط الدار جااالس معارف ميدييير مشا لبيتو من من بعد مطرد مرتو من تماك.. سد عليه وتكا فنموسيتو مغمض عييينيه كاره وصاااخط ومطاااارق كتييرة فراسو...)
~~~~~~~~
ملاك: (توضأت وصلات العصر والمغرب بقات جالسة فبلاصتها صونات عليها خديجة مجاوبتهاش بغات تفرغ لهمها حيت حتى واحد مكيقسم معاها مشاكلها وهمها، سمعت الدقان فلباب كانت لابسة نفس لباسها ناضت حلات لباب كان اورطيغا شاد وفاء من خصرها، وكيزيدها بشوية وهاز ساشي فيديو ديال دوا)
كنت كنتسناك تعيطلي باش نجي نجيبكم
اورطيغا: راه صيفطت ليك مرسوول مع حمامة شي يوماين ويوصل عندك
ملاك: ها!
وفاء: (تبسمت بتعب) سمحولي بزااف صدعتكم معايا
اورطيغا: نتي حتى تصحصحي وغنتفاهم مع جد امك مزياان (حطها فلفوتوي للي فوسط الدار جلست سخفااتة حط ساشي ديال دوا) الهضرة ماشي دابا اواافا
ملاك: كيف بقيتي اختي كنت بغيت نجلس معاك ومخلاونيش
اورطيغا: (تم داخل للكوزينة)
ملاك: (تبعاتو بعينها) واش هدا كيدخل فينما بغا؟!! دار باه لقديمة!!
وفاء: (بعياء شادة فمعدتها للي دارت ليها غسييل) معليش
اورطيغا: (حط ليها كاس دلما) شربي دواك بلاتي غنصيفط على لعشا
ملاك: بلا متعذب راسك انا نخرج نجيبو
اورطيغا: متخرجيش فالليل الدنيا هنا قبيحة شوية, ونتي مزال جديدة
ملاك: مالها السيبة فلبلاد
اورطيغا: لا السيبة عندك فداك الفم نييت
وفاء: انا ندخل نتكى شوية دخت بزاااف (ناضت بشوية عاونتها ملاك دخلاتها لبيتها غطاتها طفات الضو وسدات لباب لقات لاخر مزال جالس كيهضر فالتيليفون)
ملاك: حم (شافت اورطيغا) ياله بسلامة
اورطيغا: (ضار عندها تم وااقف عيا بزااف كولشي كيضروو كمل الهضرة مع مو للي عرف الحاج مابغاش يجلس فصبيطار وداوه للدار)
امم صافي الوالدة... واخا.. نشوف كيفاش ندير واخا راك شفتي حالتي.. واخا... واخا الوالدة (قطع مع مو)
عنداك تخرجي
ملاك: لا منخرجش.. حم، خرج غير نتا
اورطيغا: (بقا كيشوف فيها حتى تبسم) واخا الا حتاجيتو شي حاجة هبطي للدار
ملاك: ياك غتمشي عند مك؟!! اممم ماماك
اورطيغا: (حرك راسو بلا حولة وتبسم مشا كيعرج سد لباب من مورااه وهي عاد حيدت فولارها وجلست كترتاااااح....).
ملاك: (صونا تيليفونها كانت خديجة جاوبت) ااااانعااام
خديجة: علاش مكتجاوبينييش
ملاك: مكنتش مسالية اخديجة معنديش غير مشاكيييلك فحيااتي باش نبقى مقابلة التيليفون
خديجة: حشوومة عليك كديريلي هاكا
ملاك: مدرت والو اختي ولكن نتي بزاااف كيحسابلك كولشي دااير عليك توݣضي شوية راك وحدة كبيرة ماشي مراهقة صغيييرة وعرفي شنو كيخرج مع داك الفم راه كندوزوها مرة وجوج ولكن الواحد منين كيطغى راه مكتبقى عندو حتى قيمة
خديجة : ياكي املاك يااك نتي للي تبدلتي علية من نهار عرفتيني مع يوسف
ملاك: ونااااااري على هاد يوسف وندمت علاش عرفتك بيه وصدقتي اختي من داك النوع للي الروح ديالها هو الراجل مع كيطلع معاها كتنسى واليديها
خديجة: هه والله املاك حتى نتي عندي أهم منو انا غير بغيت نفهمك حتى كنصدق غير مخربقاها
ملاك: واخا شنو بغيتي دابا حيت أنا راه حلفت مشاكيلك مندخلش فيهم
خديجة: خايفة
ملاك: بففف خديجة ديري ايمانك فالله شوية
خديجة: جا عندك يوسف؟! زعما تلاقيتو؟
ملاك: لا... مزال
خديجة: خفت نكون انا للي مكنولدش..
ملاك: ربي للي كيرزق كل واحد فينا وللي معندناش فيه الخير مكيعطيهش لينا سيري بهاد المبدأ وغترتااااااحي.. فين ماما
خديجة: منين جابو داك البجغوط وهي مقابلاه
ملاك: اشمن بجغوط؟
خديجة: ولد بابا
ملاك: اويلي علاش قبلات تربييه واش هادي حمقة ولا بغات تحمقني معاها
خديجة: ملاك غتسمعي مني نتي هاد المرة.. دخلي سوق راسك هاد المرة هي بغات تربيه وقااابلة براكة متجبدي مع بابا صدااع وتسماي بوحدك للي خايبة هي بغات راها مك وكبر منك وعارفة شنو كدير
ملاك: عارفة ***** للي عارفة علاش انا نجيب ولد ضرتي نربييه الولد للي كنعتابرو ثمن الخيانة نتي تقدريها على راااسك
خديجة: منقدرش.. ولكن ماما قلبها حنين وعاد الوليد مو ماتت وهي كتولدو خلاتوو عند ختها تكرفسو عليه وهو لحمة عرفتي شنو دايرين ليه بالضرب ولحمو كولو مقيح راه مشا بابا وحنيني يشكيو بيهم
ملاك: (بقات غير ساكتة حتى سمعت لبنت كتعيط عليها)
بلاتي ونصوني عليك اخديجة....
(قطعت مفقوسة... ناضت مشات لبيت شعلت الضو ولقات لوخرا كتبكي بقات كتقرب ليها بشوية)
صراحة عمرني طحت فهاد الموقف ومكنعرفش نتعامل مع شي واحد بغا ينتاحر
وفاء: (بشهيق وصوتها مبحوح من كترة متقيااات) ماشي سااهلة شنو داز علية
ملاك: انا معارفاش شنو داز عليك ولكن توصلي تقتلي أمانة عطاها ليك الله للي خاصكي تحافظي عليها منتافقش معاك فيها.. كولشي عندو حل واهم حاجة اختي وفاء خاص يكون إيمانك كبير بالله وغير غتيقي فللي كتب عليك الله، مشاكيلك غتبقى تحل شوية بشوية خاصنا شوية ديال صبر ماشي كولشي ساااهل فهاد الحياة
وفاء: (شافت فيها ورجعت دارت يدها على وجهها كتفكر داك المنظر كتبغي تمووت)
ملاك: (جلست فوق النموسية قريبة ليها) شوفي شنوما داز عليك خاايب الوقت راه كيدااوي مهم حاولي تكاي شوية بلاتي نجي عندك باش نتعشااو وتعاودي لية الا كنتي باغية تخوي قلبك باش ترتاحي
وفاء: (حركت راسها باه وتكاات عاود غطاتها ملاك وتمات ماشية) عفاك متمشييش وتخليني (سمعت الدقاان)
ملاك: لا.. انا غير برا غنتفرج فالتلفازة.. (خرجت من حداها مشات حدا لباب) شكون!!
اورطيغا: انا..
ملاك: (بقات واقفة واش تحل ولا لا.. حلت شافت فيه) شنو!!
اورطيغا: (كيهضر فالتيليفون) غنمشي نشوف الحاج... صافي واخا.. (قطع وشاف فيها حيد نظاظر) عنداك تخرجي
ملاك: راه قلتيهالي قبيلة، قلت ليك مغنخرجش
اورطيغا: (تكى على باب الدار بكتفو عين مسدودة وعين نايمة) نسيت كاسكيط ديالي
ملاك: (ضارت لقاتها فوق الطبلة مشات هزاتها جابتها ليه) واش باك مات؟!! (هز عينو شاف فيها) حيت ديك المرات قالو مات وقبيلات قالي يوسف فلاكلينيك
اورطيغا: (دار الكاسكيط فوق راسو ورجع نظاظر فعينييه) عنداك تخرجي.. (هبط مع درووج وهي بقات متبعااه نݣرت حيت مجاوبهاش وسدت لباب...)
يوسف: (دخل للدار لقا مو جات غير شافتو ضارت مخنززة تبسم معاها) مال الآلة الغاالية
ام يوسف: والو.... (ضارت مقابلة معاه) اولدي هاد التزويجة ديالك معاجبانييش وهاد الزربة ممتقبلاهاش غير قولي الا هي تتهددك ولا وقع بيناتكم شي حاجة قولهالي مغتخلينيش فدار غفلووون
يوسف: (هي جالسة وهو واقف حاط يدو على ظهر لفوتووي) نعلي الشيطان الوالدة انا بغيت نتزوج مبقيتش صغيير اشمن تهديد ولا شي حاجة مفهمتش علاش مبغيتيش تحتارمي قراري
ام يوسف؛ شحال ونتا تتعرفها
يوسف: ماشي بزاف ولكن مرتاح معاها وبغيتها
ام يوسف: اممم (بترجي) لا اولدي الله يرضي عليك دير بكلامي ودير بناقص
يوسف: بناقص؟ (جلس اونفاص معاااها) علاش بناقص وانا باغيها وعاد عاطي كلمتي ليها ولباباها واش لعب دراري صغار!!!
ام يوسف: انا نهضر معاهم الا نتا مبغيتش تبان فالصورة
يوسف: وعلاش تهضري سمعي الوالدة نتي عندي مهمة بزااف فحيااتي ومنقدرش ندير شي حاجة بلا بيك وشووورتك عندي من اولويات ديالي فكوولشي الا فهاد التزويييجة (جات تهضر قاطعها) من ديما تتقولي انا مول العقل وعارف شنو تندير وانا مزال تنأكد عليك عارف شنو تندير وعارف شنو باغي
ام يوسف: خليت لبناااات كاااااااملين!! وهاديك للي بانت ليك لا هي من سهمك ولا من مقااامك
يوسف: باش عرفتيها؟!! خديجة بنت مربية ورزيينة وانا عجباتني وبغيبيتها علاش متحتارميش هادشي
ام يوسف: اولدي مكملاش حتى عام باش كنتي تتقول على ياقووت هاكا وهادي لا علاقة بيها
يوسف: وهادشي للي مخليني مرتاح ليها حيت ماشي بحال ياقووت هادي للي غنأمنها على داري وتربيلي ولادي وانا مخاايفش، هادي للي غتحتارمك نتي والواليد للي تجي لداري وتلقاي مراااا ديال بالصح ماشي مونييكة خاص للي يشوفها يبقى عليها وااو ونتي وااعرة دابا ماشي موضوعنا انا منين قلت موضووع ياقوت تسد راه تسد وتطوى وتدفن...
ام يوسف: واخا نغمض عيني على المستوى ديالهم وشحال من حاجة!! ورااه هي كبييرة فالعمر واش تلحق الولاد ولا لا
يوسف: الوالدة من هنا داكشي ديالي انا وياها منبغيش شي حد يتدخل فيها ولا فولاد ولا حتى حاجة
ام يوسف: ومنين اسيدي هي زوينة وعفييفة ومرزنة وهادشي كامل فيها علاه متزوجتش شحاااال هادي هاد ديمانضة للي تظل تشكر فيها راها تطييير
يوسف: (فتحاتلو الموضووع) هي كانت ديجا مزوجة (خرجت عينها) عادي
ام يوسف: (معصبة وقفت) عادي (خبطت على فخاضها) اويييلي مناااين جاتها عادي منااااين؟! اويلي على مطلقة
يوسف: (غير كيشوف فيها)
الغالية: وشحال وهي مزوجة بالسلامة؟!
يوسف: شي مدة.. علاش تتسولي
ام يوسف: اوا وعلاش تطلقت؟!
يوسف: حيت متفاهموش
ام يوسف: الله يالا ربي من اللول حسيت بيها تلوات عليك بحال شي لفعة اويلي على اخر يامي نجيب وحدة مطلقة
يوسف: بففف الوالدة نعلي الشيطان
ام يوسف: (كنمشيو وتجي وتخبط) واخا نعلو، ولكن واش ترضاها على راسك تزوج وحدة ساابقك ليها وااحد وعلم الله شحال شابعة جنااابة!!!
يوسف: (بقا مصدووم فيها)
ام يوسف: واش كتولد ولا عاݣرة!!!
يوسف: (دار يدو بإشارة صاافي) منين وصلنا لهاد الهضرة راه مبقا كلاام (تم ضاير ماشي)
ام يوسف: يوووووووسف يوووووووسف (مشا وخلاها بصعرة) يووووووووووووسسسسففف....
يوسف: (بقا مصدوم فطموبيلتو وكاعي بالمزيان حيت كاين شي حدوود مخاصش يدوزهم مع مو وحتى هي بالمثل،
بقا فيه الحال بزااف علاش مشافتوش مرتاح وباغي هاد لبنت هو مباغيش يتعمق فحياتها للي دايزة وهي علاش كتعمق!!! علاش بغات تشوش ليه تفكيرو بشي حاجة تاافهة وحتى فالعصر الجاهلي مكانش هاد التفكير!!
ديمارا طموبيلتو وزاد دااايخ اخر حاجة يبغي يسمعها من مو على مرتو المستقبلية هي هادي واخا هو بعقلو ولكن ديك شابعة جنااابة خلاتو مشووووكي....
صونات عليه مابغاش يجاوبها تلف معرف فين يمشي حبس الطموبيل وبقا فيها غير كيفكر...)
~~~~~~~~~
رشيد: (رجع للدار فالليل مسخسخ حيت ظل عند الجدارمية للي فتحو تحقيق على ولدو للي تكرفسو والغد ليه غيديه تماك مع الشهادة الطبية للي عطاهم طبيب دخل نيشان لبيتو فين مرتو عتاكفت مع الولد لقاها عاطياه الرضاعة كتنعسو، بصوت خافت)
السلام عليكم
زهرة: (مشافتش فيه) عليكم السلام
رشيد: (سد لباب من موراه كيهضر بشوية) شحال وانا كنصوني عليك مجاوبتينيش
زهرة: الا كتصوني على ولدك راه ولا شوية
رشيد: (بعياء) مزال مبغيتي تسامحي ازهرة؟!
زهرة: صعيييب ارشيد داكشي للي درتي واعر مكيتنساش ومقااادة حتى نشوف فيك
رشيد: (بحزن حنا راسو وبقا متكي على الحيط)
زهرة: (بطرف عينها شافتو فديك الحالة) عطاك خاااطرك تغدرني وترجع عندي بحالا موااقع والو؟! عطاك خاطر تبات عند وحدة أخرى وانا تجي تنافقني وتكذب علية!!!
رشيد: (لا رد)
زهرة: (بقاو ساكتين شحال حطات لوليد فوق النموسية ناعس وبقات كطبطب بشوية عليه) شنو غتسميه؟!
رشيد: مااا.....ــمفكرتش..
زهرة: وشنو كتسنى؟! وديرلو ورااقو دخلو مع البنات راه كيبقى خووهم
رشيد: (كتزيد تقتلو بتعاملها) ان شاء الله
زهرة: وشريلو حويجات
رشيد: نخرجو انا وياك ونشريولو
زهرة: تمسا بخير (تكات حدا لبيبي للي عاطيااه اهتمام بدواه وحليبو وتبدالو، عطاتو بظهر وجرت لغطا مخلياه وااقف وكان غير غوتت ضربت هرست بلعكس عطاتو النخال وكملت تعاملها كأم ولكن كزوجة وقفات كوولشي للي كانت معوداه عليها....)
رشيد: (بقا شحااال وااقف حتى تحرك بشوية حل الماريو جبد فراش الارض ووسادتو فرش فالارض وجاب لغطا ونعس فالأرض...)
اورطيغا: (عرف الحاج رجع للدار مقادرش يصوݣ اصلا الطموبيل بقات حدا دار مو بقا مجمع مع دراري ديال الحومة تحت الدار.. صونا على شريف هو للي جا خدااه من تماااك ولاخر ألح عليه يعاودلو شنو وقع)
صافي هادشي شنو وقع
شريف: هاد لكسيدة كنتي حاضر فيها غير نتا لا بوليس لا كاميرات لا شهود!!
اورطيغا: (بكلل) شرييييف
شرييف: مرااااد
اورطيغا: (قلب وجهو كيحس بلعيااااا ولكن الشمتة غااالبة عليه ومتأكد 💯٪ 💯 غيكون هداك تماك، شريف كيهضر وهو باغي غير يتكالما) غير نشوفو وردني للدار
شريف: وعلاش!! هاد المرة غتبات معانا
اورطيغا: لا!! نتا عارف اشريف ضربت على لمباتة تماك من شحاااال هادي انا بغيت غير نشوفو وردني حتى الا مرديتنيش نتا غنشوف شي واحد اخر
شريف: ردك أنا اسيدي، مغتقولش شكون دار فيك هاد الحالة!! انا راه وليت خاايف عليك اخويا هاد المرة عينك تزݣلات المرة جاية؟!!!
اورطيغا: الا تتهضر على الحومة بلعكس تماك فين تلقى راحتي وبالظبط تماك للي تنكون بعييييد على المشاكل وما يجي منها
شريف: اوا وشكون
اورطيغا: كسيييدة مما قلت ليك ولكن معرفت واش للي ضرب وهرب كان قاصدها ولا لا!!
شرييف: هااااه عرفت غتكون شي حاجة
اورطيغا: منين نعرف كون هاني غنقولك كوولشي غير الله يرحم الوالدين الا ما طمر فرعتيلي *** بالتسوااال
شريف: معامن عندك الحساب وفيمن شااك؟!!
اورطيغا: الݣزارة دفاس كاملة ههه خوي رااسك اصاحبي مكاين واالو
(حطو الطموبيل فلباركينغ وتمشاو للرياض مع دخلو كيتساطح مع ليلى غير شافتو بقات مبلووكية مخرجة عينها لدرجة شريف بقا غير كيشوف فيها)
شنو غتبقاي مبندة تمااا
شريف: ليلى مالكي؟!
ليلى: (بخوف وندم شافت فيه) والو والو
شريف: (جر خووه للي دخل فيها بكتفو حتى ضاارت) مالك مع لبنت؟!
اورطيغا: (مجاوبش وحتى لاخر عارف خوه حال وأحوال ولكن باش يضرب زعرة ماشي من عادتو!!!! مشاو للصالون فين كانت العائلة دخل وتحولت للأنظار ليهم بقاو كيسولوه كيجاوب بكسيدة وجات عينو فأب ليلى) ولكن مولاها يتشد يتشد كولشي مصور وبااين، مهم (جلس حدا الحاج) الحاج كيف بقيت
الحاج: والبوليس شنو قالو ليك
اورطيغا: خليك مني دابا نتا للي كيف بقيت؟!! حاول على صحتك الحاج الوالدة راه حدها تحزن عليك 6 شهوور وتعاودها بتزويجة (بقا كيهضر معاه حتى ظحكو)
سعد: (غير كيخنزر من لبعد متصرطاتلوش حتى جا ربيب عاد ظحك باااه ورجع بحال الولد صغيير وهو اصلا بسبابو طااح بغا بتفرݣع شمكار خدا بلاصتو وخاايف من للي جااي يكون أسوأ...)
سعد: (بهمس بودن اب ليلى) شفتي شنو قلتلك
اب ليلى: (حرك راسو باه وديك الشمتة ديال بنتو تكون مع شمكار مابغاتش تصرط ليه)
اورطيغا: (حنا باس يدو وهضر بشوية)
انا غنمشي دابا الحاج, مريض وخاصني نتكى شوية باش نبرا دغيا ورجع للمحال غير يصبح الحال غرجع عندك نشوفك كيف بقيت براكة عليك من سهير وسير حتى نتا ترتاح شوية
(سايس معاه حتى بغالو بالخاطر خرج من تماك ومشا طل على مو واخا مقلق منها ولكن ميقدرش ميشوفهاش عيات كترغبو يبقى مابغاش رغباتو غير ياخد عشااه بقا كيتسناااها فوسط الرياض حتى جات من الكوزينة عطاتو لعشا ديالو عيات ترغبو يجلس وخاطرها وبالها مغيكونش مرتاح وهو بحال الحالة وبعيد عليها مابغاش حدها بززت عليه ياخد عشااه، ناض شريف وصلو للدار كان بغا يطلع معاه ومخلاهش خاصو يرجع الحاج
وكولها مشا فحاالو...)
اورطيغا: (تم طالع فدروج مزال ݣاع مرتاح على خاطرو صونا على يوسف للي غبر)
فيين.. اه كنت تماك.. لا رجعت.. انا غير فالدار.. صافي انا نتسنااك...
(وصل لدارو مشا للكوزينة حط داك لعشا تماك للي جاي متقل بيه ومشا لبيتو تكا على داك السداري كولشي كيضروو شرب دوا ديال الحريق وبقا متكي على ظهرو مغمض عينيه كتجي فبالو غير الشمتة ديال لبارح والهرمكة للي كلا فجناابو بقا شحاال متكي حتى سمع الدقان فلباب، ناض بتقالة مشا حل كان يوسف دخلو بزوج ساكتين)
انا جاي
(مشا للحمام شعل الضو كيشوف وجهو حدا فمو كاينة ضريبة وعاد الفاصمة للي فالحاجب وعينو زرقااا ومنفوخة ولكن بقات كتحل شوية ماشي بحال لبارح كيزيد يحقد مزيااان رجع عند يوسف للي لقاه حل لبالكون وواقف تماااك)
فييين
يوسف: هاانا
اورطيغا: (وقف حداه حاني كيطل) مشفتكش مع جماعة
يوسف: معندي خاطر نمشي، تناقشت مع الوالدة قالت شي كلام معجبنييش (زفر مكره حااااقد)
اورطيغا: مثلا!
يوسف: كلام ميتقاالش حتى بين صحاب حتى بيني وبين نفسي منقدرش نقولو!! والله مفهمت علاش تدير هاكا انا خديجة مزوج بيها سوا بغات ولا لا حيت مسألة زواج تتبقى ديالي انا وديك بنت الناس وتيبقى الاختيار ديالي فقط علاش هاد الحزازات الخاوية مفهمتش!!
اورطيغا: معليش مع الوقت تفهم
حقا مصوناتش عليك ختها
يوسف: ملاك!! لا علاش؟!
اورطيغا: (عاودلو تلخيص) واقلة خاص نطلع نشوف كيف بقات البنت
يوسف: مقالت لية والو اش دخلها هي فهاد المعماعة!!!
اورطيغا: ونخليو البنت تموت!!
يوسف: ماشي تموت ولكن شحال ما بعدت على المشاكل حسن
اورطيغا: اممم مهم اصلا كنت قلت ليهم غنجيب ليهم لعشا والوالدة صيفطات معايا شي حاجة
يوسف: نطلعو!!! (هز داكشي يوسف وتمو طالعين بزوج دقو وتسناو عاد فتحت ليهم ملاك مغلفة لابسة بينوار قدها فالطول ولاوية عليها شال نفس اللبسة.. بقات واقفة فلباب) ملاااك مقلتي لي والو
ملاك: غير مساليتش (شيرت بصبعها لبيت وفاء) من صباح وهي كتبكي بانلي موحال واش طول معانا لغدا خفت نغفل عليها دير شي حاجة
اورطيغا: (محس حتى ظحك) ربطيها
ملاك: (شقلبت عينها متبسمة وفتحت ليهم لباب)
هضر معاها نتا بعدا (ضارو بجوج) هو للي كيعرفها
(شافت فيوسف ولاخر مشا لبيتها) ونااااري على حصلة كنت هاربة من المشاكيل وطحت فمااا كفس صراحة الواحد منين كيشوف مشاكيل ديال الناس كيبانو ليه ديالو تافهيين
يوسف: ههه اشمن مشاكيل عندك الآلة ملاك
ملاك: ها!! راك عارف مع الخدمة وصافي
يوسف: ربي حطك هنا، بعدا هانتي عتقتيها اما وكان بقات بوحدها ميسيق ليها حتى واحد لخباار
ملاك: وراه هدا العزوا صااحبها هي..
يوسف: (خرج عينو فيها) ملاااااااك
ملاك: شنو سميتو راه مكتبغيش تحفظلي
يوسف: اورطيغا
ملاك: اورطيغا!!! (ميقت مخسرة وجهها) منين جات لباه اورطيغا على زعوريتو ولا بيااضو ولا (شافتو جاي مخرج وفاء معاه)
حم هانتي خرجتي؟! لبكى معندو فاش ينفعك توݣضي معانا ونساي الهم ينساااك...
اورطيغا: (مخسر كمارتو) واش متتجمعيش داك الفم عندك
ملاك: (عوجت فمها حيت معندها متقول، ومحسابهاش سمعها ضارت عند يوسف للي كيتبسم بقات كتشووف فيه)
يوسف: ختي صاڤا!!
وفاء: الحمد لله اخويا (جلس اورطيغا مباعد من وفاء للي غير دايخة، ويوسف للي باين مباغيش يجلس اما ملاك بقات غير وااقفة مفهمتش اش كدير مع هادو!! يوسف خطييييب ختها وفاء ياله يوماين باش عرفتها اورطيغا السيد للي مكتحملوش والمشكل انها بغات هاد جماعة فلداخل ديالها مابغاتش تبقى بوحدها ويرجعو عليها المواجيييع وهدا كان سبب كل واحد فهاد الربعة والدوافع تختلف)
اورطيغا: حقا راه جبت لعشا (شاف فملاك) الله يحفظك سيري حطييه
ملاك: ها!!
اورطيغا: الا بغيتي زعما، ماشي سيف علييك
(تمات ماشية للكوزينة هضر معاها مقاد اما مكانتش تحطو حلت الساشي كانت بواطة ديال الزاج كبيرة فيها لحم مزوق بالبرقوق ونص خبزة مغلفة بالأليمينيوم جبدتها وهي تلقاها بسطيلة ديال دجاج اللوز ماشي خبزة قلبت على كاسرونة كبيرة دارت داك لحم مخلط بالبرقوق ضيعت داك الديكور، والبسطيلة دارتها فلفران ديال الضو،)
مالي أنا خدامة عند بااهم حتى نتسخر عليهم هادشي مكنديروش حتى فدار با !!!
(جات بغات تخرج ولكن البنت مولات الدار راه كانت بين الحياة والموت متفهمهاش من الجانب الخايب تفهمها غير من الجانب الانساني!! رجعت بقات كتراد مع راسها حتى سخن داكشي حطات فطباسل وتمات مخرجة ناض يوسف الكوزينة يعاونها هز طبسيل لحم وهي فراشط، شاف فيها)
يوسف: صاڤا!!!
ملاك: (لوات شنايفها بمعرفت)
يوسف: تبغي نوصلك لوطيل؟! معندك مديري بهاد صدااع
ملاك: ونخليها بوحدها؟! صراحة عزت علية ومقدرتش
يوسف: بالصح ولكن!!! نتي فغنى على هادشي كامل
ملاك: معليييش (هزت كتفها) دير الخير تلقاه (تبسم معاها باينة حتى هو طايرة ليه، مشاو جلسو فالفتوي للي برا يوسف جر كرسي بقات وفاء كتعاود ان السيد للي معاه دار ليها قاالب وخلاها عشا لشي واحد عندو بيه الغرااض فشي شرااكة واخا كان كيسمع غواتها محنش فيها كلات لعصى وتغتاصباات بقات كتعاود لدراري كيسمعو ليها وهي كتبكي من غير ملاك كتاكل وتسمع حتى نطقت) لسقي فمو شي مونتييف حتى نتي
اورطيغا: (ضار شاف فيها كتمضغ بالزربة باش تهضر واخا مكتشوفش فيهم)
ملاك: (شافت فيها) ياك قلتي هو مدير اعمال وداكشي صيفطيلو غير برهوش ولا شي وحدة فلمطار يقنييو عليه مزيااان فزحام يلسقو ليه فجيبو شي طرف دلحشيش وخليه يتعذب، واخا ميتحبسش المهم يبقى طالع هابط ومربووط هادي تبردك شوية ولكن حتى نتي خاصك...
يوسف: (مبغاهاش دخل) ملاااااك
ملاك: انا غير قلت ولا ديري حل اخر نساايه وكملي حياتك وقطعي ورقتو ولكن هادي دير ليك العقل ازييين
وفاء: مبغيتش نعاود نطوف بساحتو لا هو لا غييرو نكمل قرايتي نمشي لألمانيا
يوسف: مهم ميغسي على لعشا اورطيغا مشينا!!!
اورطيغا: همم!!! اه.. اه.. (شاف فملاك شحااال) اه صافي اوافاا تااافقنا خلينا من هاد تبرهييش هاد المرة انا نكمل على ونلوح جدك من الطروازياام
وفاء: ههه ميغسي بزااف اورطيغا (مشاو دراري وبقاو لبنات شافت فملاك) شكرا بزاااف ملاك وسمحييلي على هادشي للي درت ليك
ملاك: انا صراحة ممتافقاش مع هادشي للي درتي ولكن عارفة الظغط كيولد الانفجار وميمكنش لا انا لا غيري نحكمو عليك حيت حتى واحد معايش حياة لاخر غير هو راه كولشي ليه الحل.. ودبا مثلا الا قتلتي راسك واش معندكش عائلة للي تخلي من موراااك متخافيش باش غيحسو!!
وفاء: (بتنهيدة) خايفة يكون صورني
ملاك: هو مدير وجايب شي حد للي معرفة صحيييحة فنظرك غيصورك ويلوحها حتى الا بغا يهدد غيهدد لاخر والا الله يستر مشا ودارها راه غيمشي فيها حتى هو مكنظنش مهم للي عليك هو تنساي عطي الوقت لراسك ونسااي...
دازت يوماين ملاك غير كتكمل من الخدمة كتمشي للدار مكتخليش وفاء للي كولها مغامرات وكتبقى تعاود لملاك للي كطلق ودنيها معاها عاجبها الحال تسمع خبيرات الناس وتشوف شنو داز عليهم وتاخد فكرة على شحال من حاجة مكانتش عارفاااها، اورطيغا مولاتش شافتو من ديك الليلة حيت كيجي عند وفاء فصباح قبل ميمشي لخدمتو وكتكون بوحدها وحتى يوسف مولاتش شافتو بيناتهم غير التيليفون مرة مرة كان جالس فداارو حتى الخدمة ممشاش ليها هضرة مو أثرت فييه بزاااف ماشي شك فزواجو ولا اقتناعاتو ولكن اخر حاجة توقعها منها جاتو قللات منو بزااف مكيجاوبهاش فالتيليفون وحتى فاش جات لدارو محلش ليها لباب حيت معصب ومباغبش يقول شي كلام ليها يندم عليه من بعد اللهم حتى يبرد شوية.. هضرتو بزااف كانت غير مع خديجة
مي حلو: اشنو ازهرة درتي؟!
زهرة: شنو غنقوولك منضيعش فرحة البنت نمشي بالولد ويبقاو يسولو من هنا ومن هنا غنخليه ليك على مرجع، نتي للي واش قادة بشي صداع الراس
مي حلو: الله يا ودي نديرو فعيني غير سيري وكوني هانية (دخلت عندهم سيهام)
سهام: حقا واش غادي تدي معانا ربيبك
زهرة: (كتكره هاد الكلمة) لا غيبقى معاها
سهام: حسن من شي تبرزييط تماك
زهرة: ما فيه مسكين بو تبرزييط ݣاع لوليدات صغار هكااك.. (سمعو صوت رشيد كيعيط ليها وكيهضر مع شي رااجل دارت شاال على راسها خارجة تشوف لمن كيقول مرحبا حتى لقات يوسف تبسمت ومشات جيهتهم) مرحبا ولدي نهار كبير هدا
يوسف: (حنا راسو بامتنان) براكة الله وفيك الالة سمحولي على هاد الدخلة كنت هنا فشي خدمة وقلت نجي ناخد الوراق باش ندفعهم للمحكمة
رشيد: ياله لبارح كملت كولشي بقا الباسبور، قالولي شي سيمانة ويخرج
يوسف: معليش هداك هو الوقت نيت باش نمشيو (خديجة كانت عارفة مجيتو كانت كطل غير من سرجم بيت مها وكتراري بالولد صغير للي ذبحو حولي عليه وسماوه كتشوف فالحب ديالها وكتفرنس) شتي ستي عمو شحال زوييين واخا راجل ختك غتبقى تقولو عمو يوسف هه
رشيد: دخل بعدا اولدي زهرة عمري للضيف ديالنا شي كاس اتاي
يوسف: لا لا خالتي بلا متعذبي رااسك
رشيد: (بصرامة) لغدا معانا ان شاء الله
يوسف: مرة أخرى ان شاء الله اسي رشيد مزروب شوية
رشيد: مكاين بو مزروب تغدا معانا اولدي وخود وريقاتك وسيير
(يوسف اصلا مكانش كيمشي للخدمة كولشي كيقادو غير من الدار، حنا راسو بأه دخل للصالون فين جلسو)
يوسف: سي رشيد مكناش هضرنا على التفاصيل كنت بغيت نجيب الواليد ونهضرو ولكن منين جيت جيت نهضرو حيت أنا بغيت نعقد على مرتي ان شاء الله ونسافرو ولكن العائلة مبرزطاني بغاو العرس
رشيد: شنو نقولك اولدي نتا طلبتي الحلال وشفتك معقول وولد الناس وحتى انا عطيتك بنتي للي دريويشة وصباارة دازت عليها فزواجها الاول ووقفت معاها حتى طلقت راجلها ورجعت معززة مكرمة لدار باها والحمد لله خرجت منها ساالمة ورجعتلي بصحبحتها، انا طلبي هو تهلالي فيها وحتى هي كذاالك غتهلى فيك وتكون بيناتكم المودة والرحمة باش زواجكم يسر فيه الله
يوسف: ان شاء الله اسي رشيد مغتلقاش معايا المشكل وغنديرها فعيني حتى انا قصدتكم والمقصود الله من تربيتك جيت طالب بنت من عندك (رشيد عجبو الحال حيت ݣاع ازواج بناتو نفس كلام يوسف كيتغناو بتربيتو وهادشي كيفرحوو...)
رشيد: الله يسهل عليكم اولدي غير هو العرس لبنت بغات غير ليلة بين العائلة وصافي
يوسف: شنو نقولك حتى أنا هكاك بغيت ولكن عائلتي ولا بد بغاو العرس وانا باغي نساافر هه حيرووني
رشيد: تفاهم اولدي مع داركم وللي درتووه انا نزيدكم غير الخير...
يوسف: (شرب كاس اتاي من بعد متفاهم مع باها للي عجبو الحال مدخل لا فصداق متشرط لا فسكنى لا الأمور المادية مهضرش عليها فقط طلب يتهلالو فبنتو ويقدرها،
خرج معاه للقهوة فين هضرو على بزاف دالامور ومختلف المواضيع، وهضر على خدمتو مع بااه والخدمة مع الدولة بقاو مجمعين شحاااال حتى عيطو ليهم باش يرجعو الغدا يتغداو مجموعين عاود دخلو لصالون مكاينش حس لعيالات غير هو رشيد خوه وباااه كملو لغدا للي دارو فيه دجاج محمر مع شلايض خبز وعصير بقا متوتر شحال)
سي رشيد واخا تسمحلي نهضر مع خديجة جوج دقايق بغيت نتشاور معاها فشي حاجة
رشيد: اهاااه.. اهاااه مرحباا ولدي (كيعيط) خديييجة (انا نوض نعيط ليها، ناض خارج لقا زهرة فلباب بحال شي عسكري) بغا يهضر مع لبنت
زهرة: ما فيها باس راه مكيدخلو مكيخرجوو ومبقى والو على زواجهم
رشيد: وفينها هي؟! خدييييجة
خديجة: هانا بابا (كانت غير فبيت لجلاس كتصنت ولكن لابسة بيجامة طويلة مع بينوارها من لحوايج للي كانو شراولها جايها على طايتها مصاوبة ميكاب خفيف ودايرة شالها)
رشيد: ها هو خطيبك بغا يهضر معاك
زهرة: صافي ها بيت لجلاس يهضرو فيه (مشا عيط ليوسف دخلوه لبيت لجلاس لقاها جالسة لابسة بيجامة من للي كان ختار ليها تبسم مع وجه مفيهش مكياج كانت زوينة وعاد لبارفان للي دايراه وللي دارتو حتى دخلت للبيت منين مشا باها،
تبسمت منين دخل وجلس فالسداري للي اونفاص معاها بصوت خافت حيت عارف مبقى حد فلباب واخا السرجم محلول كيطل على وسط الدار..)
توحشتك
خديجة: (تبسمت) حتى انا
يوسف: (بقا كيشوف فيها شحااال) خديجة بغيت نقولك شي حاجة مبغيتش تف (شافت فيه ببراءة) ولا صافي نسااي
(شد لسانو فأخر لحظة حيت حس بيه طلب مكيتطلبش وهو داخل بالنية فهاد زواج قرر هو يدير النية وربي فيكون كبير!!)
خديجة: لا غير هضر
يوسف: مكاين واالو.. غير جاتني فشكل صراحة ݣاع العلاقات للي درت فت فيهم الحدود الا مع البنت للي بغيتها لزواج
خديجة: ههه اوا هدا هو المعقول
يوسف: حتى بوسة!!
خديجة: ههه يووسف يسمعك بابا يلووحك من السرجم يدخلك من دوك لحديدات
يوسف: ههه فين هو انيير بغيت نشوفو
خديجة: بالصح!! ياله نعستو
يوسف: (شاف فيها بحب) عقبال منين تكوني تنعسي ولدنا ولا بنتنا
خديجة: (بابتسامة) ان شاء الله
يوسف: بوون، الا كتاب الجمعة غنديرو لاكط نقدر نجي غير انا من بعد ونمشيو عند العائلة غير هو انا بغيتك تكوني معايا من العدول نيشان عندي
خديجة: معرفتش ايووسف بابا مغيبغيش
يوسف: بغييتك اخدييجة تمشي معايا وراك غتكوني مراتي وحلالي
خديجة: حم غنكونو فمكناس راك عارف سبوع ختي
يوسف: نتبعك فينما كنتي اصلا حدها سيمانة وغتكوني فداري
خديجة: هه اوا صبر سيمانة مدات مجابت
يوسف: دات وجابت معايا احبيبة (حرك راسو بلا) مغنصبرش هه (خلاها غير كتشوف وهي عارفة غدير داكشي للي فبالها) انا غنمشي احبيبة باش منعيقش على باباك نهضرو فالتيليفون (حركت راسها باه خرج من لبيت سلم على مالين الدار وتم خارج للي كيتصادف مع حمزة فباب الدار واحد شاف فلاخر ولكن حمزة كان مخنزر ولاخر مفهمش ومسوقش... يوسف مشا وحمزة دخل لدارهم كيتساائل شكون هدا!!!!!!)
اورطيغا: (بدا خدمتو فالمحال ديالو دازت شي ساعة جا عندو الحاج ومعاه مو تبسم من زيارتهم خرج عندهم مرحب بيهم مفهمش سبب هاد الزيارة ولكن..) اهلااان اهلااان اهلااان نهار عليييظ هدا!! حمييييد ارا جوج كرااسا
مينا: لا ولدي الحاج باقي عياان (شافت فولدها) غنطلعو احبيبي للدار نرتاحو شوية كمل واجي تغدا معانا
اورطيغا: اهاااه، الحاج باقي عياان؟!
الحاج: الحمد لله اولدي الحمد كيف غادي مع العمل
اورطيغا: مزياان الحمد لله بلاتي غنمشي نجيب ليك دوك الشيكات ديال شهر وندووز على مصلحة الضرائب باش نقاد الإجراءات معاهم مغنتعطلش علييكم
الحاج: وجيبلي الروسيات كاملين
اورطيغا: ان شاء الله (مشاو وهو دخل رد الطابلية ديالو كيقطع شي طروفة ديال لحم واخا مكيقدرش يدير مجهود كبير مزال لحمو مقطع بكترة لعصا للي كلا وعاد يدو ليسرية ممعاوناهش بزااف)
عرق للي مزال خدام فيه هو ديال الشيكات والروسيااات...
( كمل شد تاكسي ومشا يكمل باش مكلفو الحاج.. ويطبق داكشي للي فكر فيه مزيااان)
~~~~~~~~~
ام يوسف: دخل اولدي دخل راني دايخة ومعارفة ما نعمل
شريف: ياك لباس الآلة الغالية !!!
(جات غيثة عندهم للي باينة عاد فاايقة لابسة بيجامة وشعرها كوب شوفال)
غيثة صاڨا!!!
غيثة: (سلمت عليه بلوجه) صاڤا الحمد لله ونتا!!
شريف: الحمد لله
الغالية: سير فطر وخليني نهضر مع شريييف
غيثة: باااي شرييف
الغالية: ولدي انا تنعرفك عزييز عندك يوسف ولكن راه رجع واحد اخر مبقاش ولدي المرزن للي تيفكر بعقلو ويتضرب بيه المثل
شريف: ياك لباس!!
الغالية: قالك على زواج ؟!
شريف: (بقا كيدور عينو) اه، ياك مشيتو معاه للخطوبة كاملين
الغالية: اييه خدانا معاه بالسيف وحنا معارفينش راسنا من رجلينا عندمن ماشيين وشكون هي حتى كيصدمني السيدة مطلقة ومدوزة مهضرناش على شكون هي وحالتها حتى حطنا قدام هادشي
شريف: ووووشنو المطلوب مني الآلة الغالية
الغالية: هضر معاه راه انا قاطع كلامي من داابا اعسااك منين يدخلها لدارو باينة خيرااتو هي ولا انا وهو بلا عقل ناض ختارها
شريف: احم مااااا للي تنعرفو الآلة الغالية يوسف غدا غيدير لاكط اشنو فاش نهضر معاه نقولو متزوجش مااا عرفتش ومفهمتش
الغالية: اويلي استغفر الله
شريف: لالة الغالية نتي عارفة يوسف تيفكر مزياان فالحاجة قبل ميديرها ماشي دري صغيير
الغالية: (كتبكي) الا هادي اولدي تلوات عليه متقوليش هدا هو ولدي مولاي يوسف لغزال!!!!!! ولدي مسحووووور مسحوور ماشي على هوااه ماشي هدا هو ولدي للي تنعرف
شريف: (معرف ميقول ومبغاش يدخل فهاد الامور) شوفي لالة الغالية مخاصكش تخليه بووحدو انا عارف يوسف عندو واحد المكانة خاصة عندك سوا كان غالط ولا مغالطش مخاصكش تخليه فهاد نهار بووحدو الدنيا هي هادي هو من بعد غيعرف كولشي واش هو ماشي فطريق صحيح او لا ولكن الا بقيتي تتعكسي معاه غيدير غير للي فباالو ونتي غتبعدييه علييك
الغالية: والمعمول؟!!!
شريف: مدام ختار ديك بنت الناس الا عارف انها مسلكاااه
الغالية؛ اويلي على مسلكااه اولدي شريييف الله يهديك حتى نتا انا بغيتك تهضر معاه ونتا تتقولي مسلكااه
شريف: لالة الغالية يوسف مشا هضر مع الناس لبارح ورسااا على حساب غدا أنا للي نقوولك متخليهش بووحدو (وقف حيت مبقالو ميقول ولا يدير) حتى مثلا اذا تصاب وكان غاالط يلقااك معااه (بابتسامة) نهارك مبروووك
(مشا وخلاها دايرة يدها على خدها متحسرة مصدومة ومفقوووسة....)
ملاك: (كملت الخدمة بكري ورجعت للدار لقات وفاء كتبريباري فشي حاجة، بدلت حوايجها وتقداات مزيان وخرجت هزت طموبيلتها نيشان شدت طريق المطار والفرحة مقداااها صونات على مها مجاوبتش صونات على خديجة)
خديجة؛ عرفتي شكون كان عندنا
ملاك: يوسف عارفة
خديجة؛ وباش عرفتي
ملاك: (كتقلي ليها السم بحواجبها) حيت تشاور معايا باش جا لتماك ههه (ظحكتها حيت جاتها بحال غاارت واكترية بقات سااكتة) هههه شي نهار غيتفرݣع فيك شي عرق سميتو يوسف هههه
خديجة: لا لا مقلت والو
ملاك: اممم مسكينااا.. فين ماما؟!!
خديجة؛ فبيتها
ملاك: كنصوني عليها مكتجاوبش وصليهالي بغيتها
خديجة: شنو بغيتيها
ملاك: وعطيهالي نقولها شي حاجة تفرح بعدا ونتي جالسة حداها بحال شي بومة كتقاقي بيوسف هههه ( رشقت ليها تشد فيها.. بقات مدة جاوبت مها وكتسمع صوت الولد صغير كيبكي خسرت وجهها حاقدة علييه)
ماما خرجي من هادااك صداع نقولك شي حاجة
زهرة: قوولي
ملاك: لا خرجي من داك صدااع انا مكنسمع واالو، انا نصوني ابيل ڤيديو عليك (صونات وهي تبان ليها مها عاكفة درة حياتي ومن موراها خديجة كتراري بالولد صغير خاشية وجهها تعرف شنو كاين!!) عرفتي فين ماشية انا
زهرة: فين؟!
ملاك: المطاااااااااار هه
زهرة: (بوجه عابس) وعلاش؟!
ملاك: صافي شريت كونطرا غنمشي لكندا عند فاطمة نعيش معاها على منقلب على شي خدمة صونيت عليك باش نتوادع معاك صافي مبقيتش قادة نعيش معاكم فديك الدار
رشيد: (طير التيليفون لمرتو وكشاكشو خارجين) والله يا مك حتى نتبعك فينما كنتي
زهرة: راها كظحك
رشيد: (بغا يخرجلو عقلو مخرج عينيه) داااابا تكوني فالدار ولا نجي لوالديك فينما كنتي دااابا (كيهضر ودفالو كيخر مكشكش)
خديجة: واش حمقة علاش غتمشي؟!
ملاك: (طارت الابتسامة) راه غير كنظحك انا غنتعرض لفاطمة راها جاية باش تحضر لسبوع نعيمة
زهرة: (بفرحة كبيرة، طيرتلو التيليفون) الله يا كبيدتي توحشتها وبغيت نطيرها من جناااابي صوݣي بشوية ابنتي
ملاك: متعرفوش تقولو هداك راه تم
رشيد: مزال كنسمعك الجحشة ولكن حتى ترجعي
زهرة: بعد من لبنت كانت مسكينة غير كتملغ معانا ونتا غير لاسق فيها
رشيد: الله يعميها ليها (قطعت عليهم شاف مرتو شنترت دخلت لبيت وتابعها كيهضر بشوية) راه خفت منين قالتها
زهرة: رخف على لبنت ولا بالصح غدييرها شي نهار تهز حوايجها وتزيد خلفة مترجعش من موراها...
#يتبع