لا تنسون التصويت وترك تعليق لطيف مثلكم💋
ــــــــــــــــــــــــــــــــــ
_الفيحاء
_جو ممطر والهواء يداعب خصلات شعري وتسقط بعض قطرات المطر على وجهي
_من بين هذه الاحداث شفت خيال طفلة وسمعت صوت انين وشخص يتكلم بصوت خافت: ساعديني ..
_ما حسيت غير طحت من مكان عالي على اثر هل شي كعدت مفزوعة
_صرت اتلفت بالغرفة ضلمة گمت وصرت اتلمس بالمكان حتى اشغل الضوء
_حسيت لمست النقط ودست عليهن وشغلت الضوء ، طلعت من الغرفة وباوعت للساعة يلي بالصالة چانت الساعة بـ3 ونص
جنات: ياربي شهل حلم
_تمشيت ناحية الحمام ودخلت غسلت خلصت وطلعت رجعت للغرفة
_كعدت افكر بالصوت السمعته چان غريب وما اذكر سامعته ، حكيت راسي واردفت
جنات: اييي شهللل احلااام
_تنهدت وذبيت روحي على الفراش وصفنت على الحايط احاول ما افكر بالحلم هواي
_فزيت من صفنتي من سمعت صوت الاذان عبالك يأذن بغرفتي تعوذت من الشيطان وگمت صليت
_خلصت صلاة وگمت رحت للمطبخ سويتلي لفة مُربى ولزمت تلفوني وصرت اباوع باليوتيوب واكل
_دقائق وتلفوني دك باوعت للاسم
لگيته «آسر»
_فتحت خط واردفت
جنات: هلو آسر
:- صباح الخير يحلو
جنات: صباح النور
آسر: مبين كاعدة
جنات: اي شبعت نوم وكعدت
آسر: زين گومي صلي واكلي
جنات: خلصت صلاة واكلت
آسر: بعدين تجي يمچ ام مريم فتحيلها الباب
جنات: منو هاي وشعدها جاية
آسر: جيرانة ساكنة بالبيت المقابل بس تفتحين الباب تلگينها هسة كاعدة ترش الشارع
_سكت ثواني ورجع كمل كلامه
آسر: المهم تونسي وياها مو احسن ما تكعدين وحدچ وهم عدها امانة تخصني اخذيها منها ولا تچيسينها
جنات: امانة شنو
آسر: هيچ دين قديم المهم يلا روحي مو تنامين اريد اطلع للشغل ما الحگ اخابرلچ
جنات: اوكِ باي
آسر: جنات
:- ها
آسر: يمتى نتصالح
_ما جاوبته گمت وسديت الخط وشمرت التلفون وحچيت بنرفزة
جنات: واللّٰه بطران عباله نتصالح بعلاگة حلويات
_باوعت للساعة بالخمسة گمت رفعت ردانات التراك وبلشت تنضيف البيت
_خلصت ودخلت سبحت ولبست ملابس المدرسة وكعدت بالطارمة انتظر السايق
_سمعت صوت الهورن وجريت جنطتي وسديت الباب وصعدت بالسيارة
جنات: سلام عليكم
ود: وعليكم السلام شلونچ يمعودة بقى بالي يمچ البارحة ما داومتي
جنات: اي چنت مريضة اشوي
ود: ما تشوفين شر حبيبتي
_ابتسمت وسكتت عنها اشوي وجرتني تحچي بصوت ناصي
ود: فاتچ البارحة ست اشواق انفتگت التنورة مالتها وصارت مضحكة للبنات
_ضحكت واردفت
جنات: احس عادي
ود: لا مو عادي هيَ چبيرة لبسها ما يناسب عمرها
جنات: اي
ود: شبيچ ولچ
جنات: شبيه؟
ود: احسچ ما تحبين تحچين وياي
جنات: لا مو هيچ بس ما ادري شنو احچي
ود: يلا امشي نزلي بالحلة انكمل سوالف
جنات: يلا باي حبيبتي
_نزلنا وكلمن راحت لصفها ، بعدني ما داخلة للصف وحسيت وحدة جرتني من جنطتي درت وجهي وشفتها رقية وصديقاتها
جنات: شبيچ عوفي الجنطة لا تنگطع
رقية: ليش غايبة البارحة وانا اخبرلچ
ما تجاوبيني
_نترت ايدها وخرزتها وحچيت
جنات: كيفي ما اريد ارد
_عفتهن ودخلت للصف ذبيت الجنطة وكعدت متنرفزة من تصرفها
:- هلو جنات
_التفتت على مصدر الصوت وابتسمت من شفتها «نجاة» اشرتلها تجي تكعد يمي اجت يمي كعدت وحچت
نجاة: شو البارحة غايبة ضل بالي يمچ
جنات: اي چنت مريضة اشوي
نجاة: الحمد لله على السلامة فاتتچ الدروس
جنات: عادي اخذهم بعدين منچ وانا هم قريت اشوي
نجاة: اي عفية مبقى شي ونبلش امتحانات شهرية
جنات: اللّٰه كريم
حوراء: جنات تعاي
_باوعتلها واردفت
جنات: شكو؟
_جرتني من ايدي وسحبتني برى الصف وحچت يم ذاني
حوراء: الدرس الخامس تعاي لورى المدرسة
جنات: شكو
_دارت وجها وراحت ما جاوبتني اجيت اتبعها بس اجت المدرسة
_تجاهلت الامر ورحت للصف وخلصت الدروس بس استغربت من ما لگيت حوراء ولا رقية بس هيفاء كاعدة بعيد عني
_تجاهلتهم ومشت الدروس بشكل هادء صار الدرس الخامس واستغربت نجاة ما موجودة
_استأذنت من المدرسة حتى اروح للحمام ورحت للحمام لگيتهن متجمعات عليها
جنات: شكوو
رقية: لا تدخلين
_باوعت لـ«نجاة» المنزلة راسها تقربت جريتها من ايدها وگومتها وباوعتلي وعيونها متروسة دموع
جنات: شبيكم وياها
حوراء: گنالچ لا تدخلين
_خزرتها وجريت نجاة حتى نطلع وصارت رقية كدامي
رقية: اذا ما تردين ائذيچ طلعي وعوفيها وسوي روحچ ما شفتي شي
_ضحكت وحچيت
جنات: وخري لا الزگچ على عينچ مسوية روحچ سباعية على البنية
_ما حسيت غير طگتني راجدي
رقية: گتلچ لا تدخلين بس انتِ عاجبچ تنكفخين
_رفعت عيوني وباوعتلها بغضب گمت نزعت حذائي وشمرته عليها وگمت جريتها من حجابها وضربتها على عينها وصرت اكفخ بيها واحچي
جنات: ولللججججج تمديييين ايييدددج عليييي الچلللببببه
_ما حسيت غير حوراء صارت تكخفني ما ادري الكفخ منين يجيلي وانا نزعت رقية حجابها وجريتها من شعرها گطعته
_دفعتها ودرت على حوراء طفرت عضيتها من ايدها ونبتت اضافري بوجها وهي جرتني من حجابي وصارت تگطع بشعري
جنات: عوفييينيي الچلللبببه
حوراء: امووتچ اليييوم
_دقائق معدودة وسمعنا صوت المديرة هز الحمام هز
اشواق: وللللجنننن ادبسسسزيييااات
_ما شفت غير حوراء طفرت من يمي ولزمت ايدها وصارت تتبچبچ
حوراء: ااخخخ يُمة
ست اشواق: شكااااعد تسسون هنااا
حوراء: ست هاي جنات ضربتنا واحنى
ما مسوين شي
رقية: اي واللّٰه يا ست
_فتحت حلگي مصدومة من جذبهن رفعت ايدي وحچيت
جنات: واللّٰه جذابات هنَ چانن يضوجن نجاة ورقية ضربتني راجدي وانا ضربتها لان ضربتني
ست اشواق: بسسس يلااا كدااامييي للاددااارررة شلللعتن گلبييي
_اخذت حجابي وحطيته على راسي ورحنى كلنا للادارة انتبهت نجاة ما موجودة وحتى من اجت المديرة ما موجودة
_فزيت من صفنتي من عاطت بيه
ست اشواق: هيييو انطيني رقم ابوج
_باوعتلها بغضب وحچيت
جنات: انا ما مسوية شي حتى تخابرين اهلي هنَ البدن لازم تعاقبيهن
ست اشواق: سكتييي لللججج ماااكوو حترررام تررفعييين صووتجج كدااام مدررسستجج
جنات: ما رفعت صوتي ست كاعد افهمچ انُ انا ما مسوية شي
ست اشواق: سكتيي لا افصلچ
_نزلت راسي وعصرت ايدي احس نار تغلي بداخلي ثواني وسمعتها تحچي وية المعاونة اطلع السجل حتى يخابرون على اهلي من الرقم الموجود بالسجل
رفعت راسي من سمعتها تحچي بالتلفون
ست اشواق: انا مديرة مدرسة جنات ياريت تشرفنا محتاجيك بشغلة ضرورية
_خابرت حتى الاهل رقية وحوراء ، بقيت كاعدة على اعصابي واباوع للباب نهاية انتظره يدخل
_خابت كل امالي من اجت ام رقية وگلبت الدنيا بعياطها دافع عن رقية وعن حوراء
ام رقية: واللّٰه انا بتي ما تمد ايدها اذا ما مسويتلها شي اللّٰه يعلم هاي الملسونة شمسويتلها
_اجيت احچي وقاطعني صوته الخشن ..
:- سلام عليكم
ست اشواق: وعليكم السلام تفضل عيني
_اجة كعد بصفي وابتسم واردف
آسر: شصاير
ام رقية: عيني ضب بتك لا تتعلم تمد ايدها على البنات
_رفع راسه وابتسم وگام وگف واردف
آسر: خلصتي؟
_طگت رجلها بالگاع بغضب وكمل كلامه
آسر: جنات من بداية دوامها هنا ومحد اشتكى عليها ما تكدرون طلعونها خطأنا لان محد چان شايف شصاير
_اشر على رقية وكمل كلامه
آسر: يمكن هيَ البدت بالمُشكلة وبشكل طبيعي دافعت جنات عن نفسها
ست اشواق: تكدر تجي للادارة وتشتكي عليهن خطأ تضربهن وتورمهن
_لزم وجهي وباوعله واردف
آسر: وهن ما مقصرات
جنات: ترى دائماً يضوجن نجاة واليوم ماخذيها للحمام وچانت تبچي
_باوعتلهن المديرة بغضب وعاطت بيهن
ست اشواق: شنووو ماااخذاات نجاااة للحمااام هااا
ام رقية: وشنو تصدگين بيها
ست اشواق: صيحولي نجاة
_اجة كعد يمي ولزم ايدي وراحت المعاونة تصيح لنجاة وهو يحچي بطريقة هادئة
آسر: ورب العرش اذا الگة تگعة زرگة وحدة بيها اگلب المدرسة على روسكم
ست اشواق: تصير هل خلافات بين البنات
آسر: اعتقد احنى متفقين من بداية دوامها موو
_بقت ساكتة المديرة چانت عيوني على الباب انتظرها تدخل وتحچي الصار
_ابتسمت من شفتها دخلت چانت منزلة راسها حتى ما باوعتلي
ست اشواق: انتِ نجاة؟
:- اي
:- صدك رقية چانت تضوجج واجت جنات دافعت عنچ
نجاة: لا چنا نشاقة انا والبنات واجت جنات تعاركت وياهن
_فتحت عيوني مصدومة من كلامها باوعتله واردفت
جنات: واللّٰه جذابة
ام رقية: شفتيي عيني ستت بنااتييي معلييهن
_باوعت الـ«آسر» وحچت
ام رقية: اعتقد لازم تقدمولنا اعتذار
_لزم ايدي وگام واردف بغضب مكتوم
آسر: نعتذر وان شاء اللّٰه ما تتكرر
_راح سلم على المديرة واردف
آسر: من الافضل ينسد الموضوع
ست اشواق: مثل ما تريد استاذ
_جرني وطلعنا برى الادارة واردف
آسر: جيبي جنطتچ انتظرچ برى
جنات: واللّٰه جذابة
آسر: جنات جيبي الصخام خلي نخلص من هل مهزلة
_باوعتله وعيوني مغورگة ادموع بس واحد يكلي بز ابچي
_عفته ورحت للصف جريت جنطتي وطلعت من المدرسة لگيته واگف على صفحة قريت السيارة
_فتحلي الباب تجاهلته وصعدت ليورة صعد وسد الباب قوي وبقى ساكت
_شغل السيارة دار وطگ على الستيرن قوي وحچة
آسر: شبييييچ
جنات: انتت ماا مصدكنييي گتللك هيي ضربتنييي وانتتت مااا داافعتتت عنييي
_جر كلنكس ودار علي وحطهن بيدي واردف
آسر: دتعاي كعدي كدام واعلمچ شتسويلهن باجر حتى يتوبن
جنات: ماااا
آسر: يلا كيكتي لا تخليني العلع
_تأفئفت وگمت نزلت وكعدت كدام وحچيت
جنات: يلا احچي
_حرك السيارة واردف
آسر: بعد لو تشوفيهن يـ**** هم ما تدخلين
جنات: آسرررر
:- بعد ما تحچين وياهن
جنات: خوش
آسر: وتعوفيهن ما تحتكين بيهن
جنات: انت گلت تعلمني شسوي باجر حتى يتوبن
آسر: اي بطلت ما اعلمچ
جنات: تضحك علي؟
آسر: يمكن
جنات: افف
آسر: متأذية؟
جنات: لا مقهورة ليش ما تفلت على هاي رقية الحقيرة
_درت وجهي وحچيت مهضومة
جنات: يعني هاي نجاة ليش وگفت وياهن
آسر: خيولن دواهن يمي وحدة وحدة
جنات: شنو راح تسويلهن
آسر: امم رقية بت احمد؟
جنات: اي
آسر: ونجاة بتمن وهاي الثالثة نسيت اسمهل
جنات: حوراء ثائر
:- ايي كملي
جنات: نجاة بت حيدر
آسر: اوكِ
_باوعلي وكمل كلامه
آسر: يلا نزلي
جنات: اكلك
آسر: رويحتي احچي كلي اذان وعيون صاغية
جنات: وين چنت حتى ملابسك هيچ مرتبة؟
آسر: چان عندي شغل
_باوعتله واردفت
جنات: تشتغل بالمخبز وتلبس سترة نيلية؟
آسر: لگيت غير شغل يلا يحلو لا تكثر لغوة
_تنهدت ونزلت فتحت الباب وباوعتله سويتله باي بيدي ودخلت وقفلت الباب ..
_دخلت للغرفة وبدلت وتمددت على الفراش ما بية اكوم اسويلي اكل
_جريت علاگة الحلويات وطلعت نستلة وكيكة واكلتهن ونمت ..
_كعدت مفزوعة على صوت دكة الباب بشكل قوي
_بدون استيعاب گمت فتحت باب المطبخ وعطت
جنات: منوووووو
_وصلني صوت مرأة وهي تحچي:- انا يا عيني دفتحي ضل بالي يمچ
_فتحت الباب وباوعتلها چانت مخلية العباية على راسها بدون حجاب ولازمتنا بيدها حتى لا تسرح
_فتحت الباب اكثر واردفت
جنات: تفضلي
_جرتني وصارت تبوس بيه وتحچي
:- يمگموعة دهر على ما تفتحين الباب رجيلاتي تجمدت من البرد
جنات: عذريني چنت نايمة
:- اي ادري مبين من كوشتچ انا ام مريم جيرانكم
جنات: اي ادري گلالي آسر
ام مريم: يا خية راح تخليني واگفة
_ابتسمت ورادفت
جنات: تفضلي خالة
:- وخلخاله الخلخلت عظامچ گليلي ام مريم
_ضحكت وباستني وحچت
ام مريم: ولچ بيچ ريحة بزري
_ابتسمت واردفت
جنات: تفضلي دخلي
_دخلت وانا لميت شعري وربطته ذيل حصان وصبيتلها عصير وقدمتلها وكعدت تسولف
ام مريم: واللّٰه يا حبيبة هل مشلوع گلبِي يا تنضيف يا شغل وكل اشوي جايبيلي ولد خليه يمچ
جنات: منو يجيبلچ
ام مريم: منو غير هذا جموح شالع گلبِي يا خالة شاگ الگاع وطالع منها ولا يگول هلكدوته
_ابتسمت وحطت بيدي علاگة وحچت
ام مريم: هاي المانة چانت يمي وهسة صارت يمچ
جنات: مشكورة
ام مريم: دكومي يمگموعة كعدي بصفي ونسي وحشت الدار علي وهم بلكت تحچين ويه الوليد الجابوه من البارحة ما يقبل ياكل
جنات: خاف آسر ما يقبل
ام مريم: يمگموعة يقبل دامچ يمي يلا گومي خليت الجدر على النار لا يحترك ونبقى بدون عشة
_ابتسمت وتوترت ما ادري شنو اسوي اروح وياها لو ابقى كاعدة وما افتهمت سالفة الولد ..
_تنهدت وگمت لفيت شالي ولبست الجبة واخذت تلفوني وقفلت البيبان ورحت وياها
_چان بيتها گبال بيتنا ، دخلت وباوعتلها چانت الطارمة مزروع بيها ريحان وقفص بُلبل من خشب معلگ
ام مريم: فوتي خية لا تضلين واگفة
_نزعت البرجلي ودخلت باوعت للبيت بدايته صالة صغيرة چان كاعد ولد صغير على الكعدة ولام رجليه وحاط راسه صافن علي
ام مريم: هذا البارحة جابوه حتى اسمه ما يعرفونه
جنات: ليش جابوه يمچ
_باوعتلي ومسحت برگبتها وحچت
ام مريم: مبين محد گايلچ
_حچت هل كم كلمة ودارت وجها وراحت للمطبخ
جنات: ام مريم
:- ها حبيبة
جنات: منو هل ولد
ام مريم: كعدي حبيبتي اصبلكم وافهمچ تالي منو هل ولد
_هزيت راسي وكعدت قريب منه واردفت
:- انا اسمي جنات وانت شنو اسمك
_باوعلي ودار وجهه چان شعره محلوق على الصفر ويتلفت بالمكان كانه خايف ..
_سكتت عنه من اجت المرأة وحطت كدامنا صينية وكعدت وحچت
ام مريم: يلا تعالوا اكلوا
_تقربت من الصينية واشرتله يجي
جنات: شنو ما جوعان؟
ام مريم: عوفيه حبيبة اول وتالي يكتله الجوع ويجي ياكل
جنات: خطية وين اهله
_جرت الخبزة وحچت بعدم مُبالاة
ام مريم: ذابينه بالشوارع ووليداتي انكسر خاطرهم عليه وجابوه يمي شكم يوم
جنات: منو ولدچ؟
ام مريم: يمگموعة چا آسر ما گايلچ
جنات: لا
ام مريم: يخية جموح وليدي وآسر هم وليدي
جنات: ها قصدچ مثل ولدچ
ام مريم: لا ولدي مو مثل ولدي
_حطت كدامي خبزة وكملت كلامها
ام مريم: چا يمگموعة الامهات اليخلفن ويذبن ما يتسمن امهات
_باوعتي وابتسمت وكملت كلامها
ام مريم: الام التربي بزرها وتعلمه وينفت گلبها على ما يكبر
_هزيت راسي واردفت
جنات: ما فهمت شنو علاقة هل ولد بيهم
ام مريم: يا حبيبة انتِ نايمة ورجليچ بالشمس دكلي اكلي لا اهفچ
_ضحكت وحچيت
جنات: خالة انتِ حنيتچ عنيفة
ام مريم: وخلخاله الخلخلت عظامچ
_رفعت شعرها عن وجها وحچت بضحكة
ام مريم: ترى بعدني شباب وحتى ما عندي مريم بس مشت هل حچاية علي
_ابتسمت واردفت
جنات: شسمة لازم ارجع للبيت
ام مريم: يا حبيبة دگعدي لا اهفچ بعدني ما شبعت منچ لا عرفت شي عنچ
_هدت الخبزة وباوعتلي وحچت بقهر
ام مريم: عمن هذا المسودن رجلچ ما يسولفلي شي الگط اخباره من الرايح والجاي
جنات: ما اعرف شي عنه
ام مريم: ادري بيچ مبين فاهية
_ابتسمت واردفت
جنات: ايي اريد اروح ادرس
ام مريم: يلا روحي اشوي وامر عليچ اجيبلچ عصير
جنات: عندي بالبيت
ام مريم: چا عصيري مو مثل هذن التجيبيهن عصيري بيه خلطة سحرية
_ابتسمت وترخصت منها رحت للبيت وصليت وطشرت كتبي وصفنت
جنات: شنو قصتها شو ماخذة ميانة وياي
_تجاهلت افكاري وبلشت ادرس الفاتني وواجبات باجر
_عفت الكتب من سمعت صوت الباب يندك ، فتحت الباب واستغربت من الولد چان يباوعلي وعيونه كلها دموع
جريته ودخلته للبيت وحچيت
جنات: شبييك
:- لا تخليهم ياخذوني
_استغربت من الصوت كأنه صوت بنية جريتها ودخلتها للصالة وحچيت
جنات: انت بنية لو ولد
_باوعلي وعصر ملابسه واردف
:- لا تخليهم ياخذوني
_نزيت من سمعت صوت الباب يندك لزم ايدي وحچة
:- فدوة واللّٰه يضربوني حبابة لا تفتحين الباب
_بلعت ريگ حسيت حيلي يرجف من كلامه ، توجهت للباب بخطوات ثگيلة واردفت :- منوو
:- انا خوية جموح
_وگفت ورى الباب وحچيت
جنات: شترريد
جموح: چان اكو طفل يم ام مريم وغفلت عنه وطلع ما شفتيه
جنات: لا ما شفته
جموح: اذا شفتيه گليلنا
جنات: خوش
_سمعت صوت خطواته يبتعد عن الباب تنهدت براحة ورجعت دخلت للمطبخ وقفلت الباب ورحت يم الطفل وحچيت
جنات: لو تحچيلي شنو السالفة لو اخليهم ياخذوك
_نزل راسه واردف بخفوت
:- انا بنية
_باوعتلها بصدمة وحچيت
جنات: لعد ليش يگولون ولد
:- ما يدرون بية بنية
جنات: وشنو اسمچ
_صارت عيونها تتهرب مني واطكطك بأصابع ايدها ، لزمت ايدها وحچيت
جنات: فدوة احچي گلبِي انفت
:- اسمي مسك
_لزمت ايدي وصارت تشهگ وتحچي
مسك: فدوة لا تخليهم ياخذوني واللّٰه الغول يموتني
جنات: الغول!!
مسك: اي انا سمعته يحچي وية المرأة بالتلفون وگللها نخلص منها قبل لا يطلع الفجر
_صارت تشهگ وتضرب على وجها بچيت وياها وحضنتها
جنات: سودة علي لا تبچين انا يمچ
مسك: راح يموتوني
_چانت تحچي وترجف مووت روحها بچي
جنات: فدوة لا تبچين واللّٰه محد يلمسچ
_طفرت من سمعت فتحة باب الشارع سويتلها بيدي بمعنى سكتي ورحت باوعت من شباك المطبخ شفته «آسر» تنهدت براحة وفتحت الباب وباوعلي
آسر: لهل درجة مشتاقتلي وكاعدة تنتظريني
جنات: آسر اكو مصيبة
آسر: هيَ حياتنا كلها مصايب يلا غردي
جنات: شوف خلي نحچي
آسر: يلا احچي
جنات: يعني انت هسة ليش تخوفني
آسر: هسة انا حتى ما حاچي انتِ شبيچ تتراجفين
_اجيت احچي واستوقفني صوتها ..
مسك: اننننتتِ مثللللهم تررردييين تموتييينييي
_جرني بسرعة من ايدي ودخل للبيت دخلت وراه وشفته مچتفها وهيَ مفرفحة بين ايديه
_من رعب الموقف كعدت بالگاع وصرت اشهگ واحچي
جنات: عوفهاا شمسووويية حتتى تررددون تمووتوهاا
_باوعلي بغضب وحچة
آسر: صارلنا ساعة ندور عليها وتالي تطلع يمچ وما تحچين
جنات: ايييي مااا احچييي تررريييد تمووتهااا
آسر: يا اصخمها شكاعد تخوطين انتِ
_اتقربت منه وجريتها من ايده وحضنتها وحچيت
جنات: انتتت قااااتلللل
_چانت عيوني تراقبه صار يضحك وگام نكت ملابسه وصب ماي بالگلاص وشرب فتح اول دكمتين من قميصه وشكل اردانات القميص وحچة
آسر: ست مسك عبالنا رجعتي لنفسچ مكانچ مو ندري الدم يحن للـ****
جنات: كاااافيييي لاااا هييييچ تحچيييي
آسر: اريد افهم انتِ ليش بكل شغلي تدخلين
جنات: اذا شغلك بيه اذية لغيرك ما راح اسكتلك
آسر: اها جيد
_وخرت عني وباوعتله واردفت
مسك: منين تعرف اسمي
آسر: جؤ
_اتقرب جرها من ايدها واردف بأبتسامة جانبية
آسر: لعبتي بالنار وانچويتي عبالچ ينسكتلچ
جنات: عـ... عوفها حباب
آسر: انتِ بعدين يطيح حظچ على هل جذب
_باوعلي بغضب وجرها وطلعوا حسيت رجلي ما تعيني اطلع وراهم صار كلشي بسرعة كانه حلم ..
_بقيت كاعدة بمكاني ما ادري شكد على ما رجع دخل بس هل مرة امبدل ملابسه والابتسامة شاگة حلگه
جنات: وين اخذتها
آسر: جناتي يمتى نخلص من هل سالفة
_تقرب مني وباس راسي ورفعني على چتفه ضربته وحچيت
جنات: هدنييي
آسر: مشتاقلچ گلبِي طاگ عليچ
جنات: طبك طوب عوفنيييي
_ضحك وتمشى بيه للصالة نومني على القنفة وذب حيله علي باوع بعيوني واردف
آسر: خليني اشبع منچ
_نزلت ادموعي مسحهن بصبعه وحچة
آسر: المن البواچي؟
جنات: خايفة
آسر: من شنو
جنات: منك
_ابتعد عني وطگ على رجله وحچة بغضب
آسر: احترگت روحييييي
جنات: وين اخذتها فدوة جاوبني
آسر: لجهنم الحمرة
جنات: حـ.. حباب
_باوعلي وباس راسي واردف
آسر: اذا تنامين يمي اجاوبچ على التردينه
جنات: ما اريد
آسر: چا ما اجاوبچ
جنات: حباب احچي
_تمدد على القنفة واردف بأبتسامة
آسر: چا تعاي يمي خلي اسولفلچ
جنات: ماكو مكان اكعد يمك
_جرني من ايدي وحط راسي على صدره واردف بهدوء
آسر: لا تتراجفين مني
جنات: وخر
آسر: الحمد لله ما نمشي كيفچ
_حط ايده بين خصلات شعري واردف
آسر: ابوها باعها للخِنْزَبْ عبالنا ولد حتى ماكو شي يثبت هي ابنية وشردها جموح وهي ووياها كم ولد بس وزعناهم حتى لا يلگطهم الخِنْزَبْ وهاهية
جنات: منين عرفت هي بنية
آسر: بحثت عن اصلها وفصلها وعرفت
جنات: اءء
آسر: كافي خلصت الاسألة
جنات: انت الغول؟
آسر: مو گلنا كافي
جنات: حباب جاوبني
آسر: ممكن
جنات: گالت تريد تموتها
آسر: هي مفتهمة السالفة من خشمها
جنات: لا تستهزء ابد مو وكت هل حچي
آسر: كيكتي انتِ ليش دائماً تعظمين الامور
جنات: البنييية مخووفييينهااا وحااالقين شعرررهااا ومااا ندرررييي بنييية لووو ووولددد
_صار يضحك ويعصر بية ويحچي
آسر: يُبا انتِ حتى عصبيتچ حلوة ولو السانچ ينگط سم
جنات: حباب كافي
_سكت ما حچة وياي اشوي وبعدني عنه وگام
جنات: وين
آسر: انروح انشوف رحمة اللّٰه
جنات: آسر لا تأذيها
_باوعلي ورفع تك حاجب وطلع ما جاوبني كعدت اكل بنفسي ليش عفته ياخذها وما وگفت بوجهه
_اقل النص ساعة ورجع دخل چان لازم ايدها ويضحك
آسر: هاچ يالخوافة جبتها تبقى يمچ
_طفرت حضنتها وصرت ابوس بيها واحچي
جنات: يُمة سودة علي
مسك: وخري عني ما احب واحد يبوسني
_ابتسمت ووخرت عنها واردفت
جنات: تعاي حبيبتي انتِ
_اخذتها وكعدتها بالغرفة ورجعت طلعت باوعتله وحچيت
جنات: يلا روح
آسر: الفجر يمچ
جنات: عود خوش
_ضحك واردف
آسر: قفلي الباب وضمي المفتاح اذا شردت اعلگچ بالبنكة
جنات: عود خوش
آسر: يلا باي يحلو نامي لا تسهرين
_طلع وانا قفلت الباب وخليت المفتاح فوگ الثلاجة ورجعت للغرفة لگيتها مگرفصة على نفسها وكاعدة
_خليت ايدي على راسها واردفت
جنات: شبيچ حبيبتي
_باوعتلي واردفت بصوت ناصي ..
مسك: راح يقتلونا ..
ــــــــــــــــــــــــــــــــــ
ها نسواني المعدلة شخبار الاحداث🦦؟
زهور عدلت الاخطاء: Or_2000z
عدد الكلمات: 3061
حساب الانستا: edi_th7.0
زينب ...
هذا الخط للرادوا يشوفونه"