__________________________
" لازم يبقى شي من عندك وياي
مااطلع اذا مااخلي من عطرك
شكراً لأن جنت المخرج
الخطط لكلشي وياي
كلما صفكولي الناس اذكرك .
ريحانه~
" صدفه المتنبي "
بقلمي انا . سعيده الزيدي
قراءه ممتعه ...
------------------------------------
ريحانه :- وكفت كيه اخذتني للمطعم نزلتني قريب ع مطعم
مشيت مسافه واثناء ماامشي
فزيت من ايدي انسحبت بقوه
شهكت وبحركه سريعه دارني عليه رفعت راسي اشوف منو
رجف كُلشي بيه من اجت عيني بعينه
وجها احمرر وعروك كصته بارزه
ضغط ع ايدي بقوه
غمضت عيوني متوجعه احس اظافيري نبتت بأيدي
بلعت ريك بخوف فتحت من سحبني بهدوء للسياره بدون ميحجي شي
بحركه سريعه صعدني وافتر يركض صعد بسرعه وحرك السياره .
كلشي صار بسرعه حتى مالحكت استوعب .
التفتت عليه من طلع باكيت الجكاير ورث جكاره وايده ترجف
اريد احاجيه بس اخاف منه من يصير هادء واحاول اتجنبه
تصرفاته وترتني ومنا خايفه لا يطلع مرتضى يراقبنه
ماكدرت اتحمل ابقى ساكته
التفتت عليه وحجيت بسرعه
:- علييي ؟
ماجاوبني ولا التفت عليه
درت وجهي ع جامه مخنوكه
حسيت ع ايدي تحركني
دنكت اشوفها فتحتها باوعت بيها صايره حمرره وأثر اظافيري طابع
بلجلد .
درت وجهي وبسرعه نزلن دموعي
عضيت شفتي اكتم صوت بجيني
مااريده يحس عليه ابجي
لفحتني ريحه الجكاير
خنكتني كُلش
خليت اديه ع وجهي وصرت اكح بقوه
حسيته التفت عليه دار وجها ونزل شويه من الجامه مالته
سحبت نفس براحه من لفحني هوا بارد
مسحت دموعي ودرت ع جامه
وهكذا لحد ما دخلنه البستان
التفتت عليه وحجيت بنتر
:- لييش جبتنيي هناا ؟
ماجاوبني استفزني ببروده طبك السياره قريب ع غرفه اخذ اغراضه هستوه اندار يريد يفتح الباب ووكف من صحت
:- علييي احاجييك جاووبنيي
لتستفزنييي ببرودك
ماسمعلي فتح الباب ونزل عيني عليه لحد ما دخل الغرفه
بقيت كاعده بلسياره اعاند بيه
ماانزل
عيني ع باب واكول هسه يجي ينزلني
مرت دقائق وهوه ماكو اتلفتت بلبستان شبه اضلم
بلعت ريك خايفه شلت الجنطه ونزلت اركض وكفت يم الباب زفرت نفس فتحته ودخلت بهدوء .
اول مادخلت صار بوجهي جان كاعد ع قنفه يدخن بس شافني
بسرعه كام يمشي ناحيتي
درت وجهي اسد الباب وعود ممهتمه واني احسني صخنت من الخوف .
بس التفتت صار كدامي اتقدم ناحيتي بخطوات هادئه
بلعت ريك رجعت ليوره
صار هوه يتقدم واني ارجع ورا لحد ما استوقفني الحايط
خله ايده ع حايط وبلأيد الثانيه
خله الجكاره بصف راسي ع حايط وطفاها بي ببرود
بسرعه دنكت خايفه بلحظتها حسيت راح ابجي من خوفي
رفعت راسي بسرعه من اتحمحم
باوع بعيوني زغر عيونه
واخيراً نطق ببرود
علي :- انتي شبيج ويايه ؟
ريحانه :- انته الي شبيك ويايه ؟
علي :- ليش شمسوي ؟
ريحانه :- ماصدكت هيج كال
بعد استلمته .
:- شنو شمسوي ؟
هايه ثاني مره احتاجك بيها
ومالكاك يمي
والمره الثالثه اتصلت عليك ردتك تطمني تكولي اني وياج تسألني شبيج مابيج
مو تصيح عليه وتزيد خوفي
وانته تعرف كُلش زين بلي جاي
اعيشه .
هوه هيج الحُب علي ؟
رفعت ايدي خليتها كدام وجها
التفت عليها عاكد حاجبه نزلن دموعي وكملت
:- شوووف شووف ايدي شسويت بيها
ليش ؟
جزائي لأن غفلت المبايل بوجهك ومااجاوب عليك مو ؟
زين اني مو بشر ؟ همينه اتوجع وانعزل واكتئب واخذ بخاطري
وازعل ...
تصدك علي اني مامتوجعه ومقهوره ع ايدي
اني مقهوره لأن أجت منك
احجايه وحده تطلع منك.
احتمال انته وغيري يشوفها عاديه
بس اني ممكن تبجيني وادمرني
وممكن اطيرني للسمه من الفرح
وتغيري يومي كُله ...
تدري ليش ؟ لأن بكُل بساطه احبك . ومزاجي كُله يعتمد عليك انته .
ريحانه :- جنت ابجي مفرفحه واعاتبه مثل الطفله
وهوه مركز بعيوني يستمعلي .
نزلت راسي وكملت بهدوء
:- المهم حبيت انبهك لأن تصرفاتك هايه جاي تخليني ابتعد عنك .
حجيت هيج وسكتت مدنكه
بلع ريك فرك وجها وابتعد عني بسرعه رفعت راسي عيني عليه
اتمشى بخطوات متعبه كعد ع قنفه ودنك يلعب بكيتري الي بأيده
يسحب الكيتر ويفلته ومن يفلته
يصدر صوت ضربه الكيتر بأيده
بقينه ع هذه الوضع شويه ومسحت وجهي اتقدمت ناحيته
وكفت يمه بقى مدنك
ثنيت رجليه وكعدت يم رجليه
رفعت راسي باوعت بوجها
سحبت اديه لزمتهن امسح عليهن بأصابيعي
رفع عينه باوع لأدينه وصعدت عينه تدريجياً لحد ما صرنه عين بعين
بلعت ريك وحجيت بنبره هادئه
:- علي هذول عمامي وانته تعرف كُلش زين شنو العمام بمجتمعنا
يعني اذا احتكيت بمرتضى اني الي راح اتحمل نتائج افعالك وبكُل سهوله راح ينهي عليه يحبسوني بلبيت ويعقدون عليه هذه اسهل شي وماانصدم اذا صار
واني ماعندي أهل حتى تكول يكدرون يدافعون عني ويمنعونه
وعمي تعامله ويايه مو مثل قبل
وبس يحجيله مرتضى عن الشافه البارحه صدكني بوقتها مراح توكف بعينه رحمه .
لخاطري عوفه اني جاي اعيش بقلق وتوتر من ورا هلسالفه
اموووت اذا يصير شي ويزوجوني لمر ...
مخلاني اكمل بسرعه خله ايده ع حلكي وهمس
علي :- اششش سكتي .
ريحانه :- باوعت بعيونه ساكته
سحب ايده عن حلكي
ودنكت خليت اديه ع رجليه
وبعدها خليت راسي عليهن صفنت مفتحه عيوني وساكته
خله ايده ع شعري وصار يوخره ورا اذني ويمسح عليه بهدوء
غمضت عيوني
اتقرب يم أذني وهمس
علي :- والخلق شعرج السرح محد يتزوجج غيري .
ريحانه :- فتحت عيوني ساكته
شويه وحجيت بتعب
:- شصار البارحه وياك انته ومرتضى ؟
اتنهد وحجه
علي :- من دخلت المطعم كعدت ع طبله جنت صافن واعصابي متوتره مااحس غير نسحب الكرسي كعد كدامي هوه هذه
واول ماكعد حجه ...
مرتضى :- شعندك ويه ريحانه ؟
علي :- ضحكت وجاوبته ببرود
:- ليش منو حضرتك ؟
مرتضى :- ابن عمها
علي :- هممم حلوو اي وبعدين ؟
مرتضى :- سألتك جاوبني شعندددك ويه ريحاانه ؟
علي :- اجاوبك ليش مااجاوبك عود ؟ بس الجواب راح يقهرك حييييل .
مرتضى :- احجيي ولا تلعبب بأعصابي
علي :- قدمت وجهي ناحيته
خليت عيني بعينه وهمست
:- ريحانه احبهاااا وتحبنيي
بلمختصر مرتي المستقبليه .
ابتعدت وكملت
:- هسه عرفت شعندي وياها ؟
سكتت يستوعب كلامي دار وجها ورجع عاين عليه ونتر
مرتضى :- هههه وانته فرحان عود ؟ لك بابا تحلمم تحلمم
بيهاا هههه مرتي والله يالله
خلي عينك بعيني وركز زين
علي :- نركز ليش منركز
ونسمع لتفاهاتك هم .
مرتضى :- اسمععع لك تعوف ريحانه وتبتعد عنها
واذا لمحتك مره ثانيه وياها
بوقتهاا راح تشووف شيي ميعجبك ماشي .
علي :- ههههه صدك والله ؟
مرتضى :- اي صدك اني ابن عمها واولاا بيهاا
وعايش وياها بنفس البيت ويمك الحساب بعد .
علي :- حجه هيج ضرب ع طبله بخفه وكام ...
ريحانه :- استمعله من يحجي وكلبي يدك بسرعه من الخوف
ختمها ب ...
علي :- ريحانه تدرين شصار بيه من اخر جمله حجاها ؟
وربج ردت انجلط من وجع راسي استفززني بيهاحييل
نوب يحجيها بطريقه قذره
وكف شعر راسي من حجايته
شلون عايشه يم هيج شخص قذر لج لو بيدي اخذج واشرد
ما أمن بي ساعه الساعه يسويلج شي ...
ريحانه :- بلعت ريك بخوف رفعت راسي وحجيت بتبرير
:- علي باوع الله شاهد ماكو هيج شي من الي بالك
حتى اني ع نياتي ماجنت اعرف
يفكر بيه بهايه الطريقه
هسه يله ونصدمت من كلامه .
لزم وجهي ابتسم بخفه وحجه
علي :- تؤ تؤ شنو هل حجي ولج
انه اثق بيج واعرفج انتي شنو
ولو هذه القذر مسويلج شي
ف اكيد جان حجيتيلي ومضميتي عليه مو صح ؟
ريحانه :- هزيت راسي وحجيت
:- ايي طبعاً
علي :- احجيلي سوالج شي البارحه هوه ، اهله ؟
ريحانه :- لا اصلاً ميحاجيني ولا يباع لوجهي
والحمدلله لحد الآن ماحجه العمي شي
علي اني خايفه من هدوئه كُلش
علي :- ديخلي يولييي هذه
مايكدر يسوي شي هوه لو يكدر جا هسه كالب الدنيه عليج
وين اكو واحد يعرف ببت عمه عدها علاقه ولحد الآن ساكت عليها بس الجبان يسكُت هيج
ريحانه :- درت وجهي بحيره
لزم وجهي دارني عليه وحجه
علي :- اشبيج ؟
ريحانه :- بس حجه هيج نزلن دموعي رجعت خليت راسي ع رجليه وحجيت
:- عليي صايره اخاف من نفسي
حجيت هيج وبجيت بصوت
بسرعه رفع راسي باوعلي عاكد حاجبه حجه بأستغراب
علي :- من شنو ؟
ريحانه :- ا اخاف اصير م مجرمه
مثل ااا امي .
علي :- شنو هلحجي ولج !!!
ريحانه :- بعدت ايده عن وجهي
مسحت دموعي دنكت وحجيت
:- ب باوع البارحه نزلت اتريك
اني ج جنت معصبه كُلش من السالفه الصارت
ف صارت بوجهي عمتي صارت تستفزني وتهيني وتقهرني
تكولي شكد بلا كرامه انتي رجعتي للبيت الي انطردتي منه
واساساً اني ماردت ارجع بس عمي جبرني
باوعت بعيونه وكملت
:- وتدري شتكولي نوب ؟
لزم اديه قرب وجها وهمس
علي :- ايي شتكولج ؟
ريحانه :- تكولي ايي احجيلي شكد سعر لليله البارحه وويه منو كضيتيها .
بس حجيت هيج فتح عيونه ع وسعها
بجيت بصوت ورجعت راسي ع رجليه
حجه بحركه
علي :- كون الله ياخذها
جا هايه شكد ***
وهسه عرفت ابنها عليمن طالع
اففف ليش ماكلتيلها كضيتها يم ابو نعناعه ومبرده كلبي .
ريحانه :- ماجاوبته مستمره ابجي
رفع راسي لزم وجهي بين اديه مسح دموعي وحجه بهدوء
علي :- تؤ تؤ ريحانه علي تبجي
من ورا هيج نماذج
ولج تروحلج سبع فدوات
مني هيه حتى تنزلين دموعج من وراها ؟
ريحانه :- شهكت وحجيت
:- علييي افهمني اني ماجاي ابجي من وراها ا اني ابجي ع نفسي ت تدري شسويت من حجت هيج؟
ركضت ع سجينه رفعتها بوجها
وهددتها اذا تعيدها هيه او غيرها اخلي السجينه ببطنه
ا ااتخيل جنت ارجف من السجينه وهسه بسهوله اهدد بيها
تصدك اوصل لدرجه ماعندي مانع اكتل بيها .
صفن بوجهي مزغر عيونه
ابتعد عني انتجه ع قنفه خله ايده ورا راسه رفع عيونه ع سكف صار يعض بشفته وكأنما يفكر بشي .
مسحت دموعي وكملت بتبرير
ريحانه :- علييي والله اني مو هيج ابد
بس همه هم همه وصلوني لهاي المرحله
يضغطون عليه لدرجه كمت اشك بنفسي خبله لو بيه مس
هيج من الضغط احس اصير شخصين شخص بريئ وشخص شرير وهذول ثنينهم يحجون بداخلي هذه الأحساس بلذات ضغط ثاني .
وماعرف اصير اتصرف تصرفات مو بأرادتي .
احجي مفرفحه وابجي وهوه صافن عليه يستمعلي بتركيز
اتقدم عليه ساكت سحب اديه
باس اصابيعي اصبع اصبع
وبعدها وخر شعري عن عيوني
حجه بحنيه
علي :- فاهمج يحيلي فاهمج
على كيفج وي روحج
الي جاي تسوي مو غلط
انتي جاي ادافعين عن نفسج
ومن تتصرفين هيج جاي تبردين كلبج افضل من انو تسكتين وتكبتين بداخلج
اني افتخر بقوتج متحرش سكران وهججتي لو صاير الموقف بوحده غيرج الله اعلم هسه شمسوي بيها
واما عن جنتي تخافين من السجينه وهسه صارت عندج ولا شِئ
لتضوووجين بلعكس افرحيي
لأن مو معناها انتي وصلتي لمرحله القتل واتحولتي لشخص قاسي
لا انتي وصلتي لأقصى مرحله من الشجاعه
زين هاي البنات الي تشيل سجاجين بجنطتها من تطلع معناها مجرمات ؟
لا طبعاً
هنه يشيلنها حتى يدافعن عن نفسهن وبس .
وشي طبيعي تشوفين السجينه
فد شي مرعب بسبب ماضي قاسي .
بس خلي تفكيرج ايجابي دائماً
السجينه مو دائماً شي سلبي
ألنه .
احياناً تكون النه
سلاح ، دفاع عن النفس ،
المفروض تفهمين شنو السجينه من ذيج الليله الي تحرش بيج الولد
مو لولا الله ثم السجينه جان هسه انتي اسم الله عليج لو ميته لو مسويلج شي يدمرلج حياتج مو صدك ؟
ريحانه :- احس كلامه حطه ع جرحي وطاب
كلامه حارب مخاوفي
وغير نظرتي للسجينه
صفنت شويه افكر بكلامه .
هزيت راسي بمعنى " اي "
ابتسم وكمل
علي :- ومو بس هيج واضافه الى فوائد السجينه نسوي بيها اكل ونكصكص بيها طماطه وخيار
لوما السجينه بحياتنه نموت جوع مو بله ؟
ريحانه :- بس حجه هيج لا اردياً درت وجهي وضحكت
عرفته متقصد يحجي هيج حتى يضحكني ويغيرلي جو .
علي :- ايي هيج ضحكي الحزن مايلوك الوجهج الحلو .
ريحانه :- اختفت ابتسامتي وسككتت
لزم وجهي وكمل
علي :- شو باعيلي
ريحانتي لتخافين انه وياج .
:- حرامات هذول عدهم وحده مثلج هذه مو مكانج انتي دمعه حرامات تنزل من عيونج
:- وانه اواعدج بأسرع وقت ممكن راح اجي اخطبج واخلصج منهم ماكدر بعد اخليج يمهم اكثر من هيج
:- اخخخ انه الهم بجو ريحانتي
:- ولج لتصفنين وتضلين تفكرين شوفي وجهج شلون صاير اصفرر وذبلان .
اخخخ ليش هيج تقهريني عليج ها ؟
ريحانه :- دنكت ساكته
رجع كمل
علي :- مو احاجيج ؟
ريحانه :- رفعت راسي باوعتله وهمست
:- همم ؟
علي :- لوعتيني عليج كافي هيج تسوين بروح
اذا مو لخاطر نفسج لخاطري انه
ريحانه :- رجعت دنكت مسحت ادموعي هزيت راسي وحجيت
:- ماشي اطمن ان شاء الله
احاول اخفف عن نفسي
علي :- وعدد ؟
ريحانه :- ابتسمت وحجيت
:- وعد بس ها اذا صار شي يقهرني لتلومني وتكلي واعدتيني لأن هذه الشي مو بديه .
ابتسم وحجه
علي :- نفس الشي جا ليش تنطين وعد ؟
اووف كون هيج وتصيرين بدون احساس لا احساس ولا ضمير
بوقتها راح ارتاح
ريحانه :- لا مترتاح لأن بوقتها اصير مااحبك واحطم مشاعرك واجرحك بدون احساس .
علي :- اففف يعني تصيرين قاسيه ؟
ريحانه :- اي شلون لعد
علي :- هههه لا بطلت خليج حساسه احسن من صالحي .
ريحانه :- باوعت بعيونه وضحكت بخفه مسح وجهي
بعدني عنه نزل للكاع يضحك خله ايده ع قنفه انتجه ع باطن ايده وصفن عليه مبتسم باوعت بعيونه بيها لمعه
حجه
علي :- شكد مااعصب وانقهر
بس اشوف عيونج واسمع حجاياتج انسه كُلشي
واصير اسعد انسان بلدنيه .
ريحانه :- ابتسمت وحجيت
:- اييي واضح مو جاي اشوفك تضحك ولا كأنما هذاكه
علي الجان مشتعل نار من الأعصاب .
علي :- جا غير عيونج مفعولها قوي .
ريحانه :- ضحكت
ودرت انتجيت ع قنفه بصفه
درت وجهي وهوه بقى صافن عليه
بلعت ريك متوتره واتلفت بلغرفه متلافيه نظراته ...
رجف كلبي من اتقرب عليه
قرب وجها ناحيه وجهي بلعت ريك دنكت خجلانه
مد ايده رفع وجهي
التفتت عليه وكلبي دكاته تتسارع
نزل عينه ع فك وجهي
مد اصابيعه اتلمس الشامه بهدوء رفع عينه باوع بعيني وهمس
علي :- هايه الشامه
الي بفك وجهج
احبهااا حييييل .
ريحانه :- درت وجهي ساكته
نزل ايده من وجهي وكمل ...
علي :- وخجلج مني بعد احبه حيييل .
ريحانه :- من حجه هيج ضحكت ودنكت
علي :- شلون بيج انتي ؟
ريحانه :- رفعت راسي التفتت عليه وحجيت بتسائل
:- ليش شمسويه ؟
غمز يضحك قرب وجها
وهمس
علي :- اممم ع اساس ماتدرين شمسويه .
ريحانه :- دفعته اضحك حجيت
:- هههه علي وخرر عني
انته وسوالفك
ابتعد يضحك
احسني نسيت كُلشي نسيت جنت ابجي نسيت همي نسيت الناس وماعرف بس شخص واحد والي هوه علي .
:- صفنت شويه اذكرت
ودرت وجهي عليه معصبه
رفعت اصبعي كدام وجها وحجيت
ريحانه :- باوع استاذ علي
انيي مو فطيره حتى تضحك عليه بكم احجايه
لا عبالك نسيت السويته بيه البارحه وارجع احجي وياك بكل سهوله .
ضحك بصوت وحجه
علي :- اففف شكد قاسيه انتي
يعني كُل هذه وزعلانه مني ؟
ريحانه :- اييي
اتقرب عليه وهمس
علي :- بشنو تحبين اراضيج ؟
ريحانه :- التفتت عليه بسرعه ابتسمت وحجيت
:- بوكيه ورد
وها اذكرت مو اطلبك وحده ؟
علي :- هههه اذكرتي بوقت مو مناسب بوقت ادوريلج زله عليه
ريحانه :- لا ماادور زله
بس ليش جذبت عليه وكلتلي اجيبلج وحده تسواها الي شمرتها بلشارع ؟
علي :- هههه اهووو
بدت القساوه
ليش احنه شوكت اشاوفنه بموعد ؟
ريحانه :- ها اي هم صدك
علي :- اييه الحمدلله
ريحانتي انتي
اطلبي بعد وادللي عليه .
ريحانه :- ابتسمت وحجيت
:- سلامتك ماريد شي بعد .
علي :- هاهيه يجرالج بويه صارن ثنين
بس مو هسه
اجيبهن الج بوقت مناسب ماشي ؟
ريحانه :- ماشي
علي :- يعني هسه اتراضينه ؟
ريحانه :- ضحكت وهزيت راسي بمعنى " ايي "
سكتت يباع بوجهي
شويه وسحب ايدي بهدوء باوع بيها عاكد حاجبه رفعها لشفته
باس باطنها بهدوء غمض وبقى مخلي ايدي ع شفته
شويه وفتح نزل ايدي باوع بعيوني وهمس ...
علي :- اسف ريحانتي ماتنعاد .
ريحانه :- سكتت ماحاجيته
سحبني خله راسي ع صدره وحضني بقوه
همس
علي :- مشتاكلج
حيييل ريحانه علي .
ريحانه :- حضنته مبتسمه
غمضت عيوني
همست
:- واني بعد مشتاقتلك كُلش هوايه .
علي :- اهخخ ياريحانتي اندارلج فدوه .
ريحانه :- اثناء ماحجه هيج حسيت ضربه قويه صارت داخل راسي غمضت عيوني متوجعه
شويه واختفه الوجع
فتحت عيوني بلعت ريك
بقيت صافنه افكر شنو بعد ماسولفتله
ضحكت من اذكرت
رفعت راسي باوعت بوجها وحجيت
:- علييي
علي :- روحه التهواج
ريحانه :- هههه باوع اكو بنوته زغيره بفرعنه ماشاء الله تجنن
رغم ثاني مره اشوفها بس حبيتها كُلش وحبتني لأن اشتريتلها
وكلما اشوفها تذكرني بيك ماعرف ليش يمكن لأن انته تحب البنات .
علي :- هههه صدك ؟
ريحانه :- والله
اوكف خلي اجيب مبايلي
صورتها حتى اراويلكياها ...
ابتعدت عن حضنه سحبت الجنطه طلعت المبايل ورجعت الحضنه
رجع يمسح ع شعري فتحت المبايل دخلت ع استوديو طلعتله احلى صوره جانت بيها تضحك
ووجها متروس كاكو
ضحكت رفعت راسي باوعت
ل علي عينه ع صوره مبتسم
التفت عليه من حجيت مبتسمه
:- باوع هايه عليي لوو تشوف سوالفها يممههه تكزكزز حركاتها واديها الزغار ضحكتها وشعرها الأشكر
تفاصيلها تجننن ماشاء الله
الله يحظفها لأهلها .
احجيله وهوه عينه عليه مبتسم
من خلصت كلامي التفت ع مبايل سحبه مني قربه ع وجها زغر عيونه مركز بملامحها
بقى صافن يباعلها مبتسم
اتهند وحجه
علي :- الله
ريحانه :- رفعت راسي ع مبايل كلبت ع صور الثانيه وحجيت
:- وهايه بعد
:- وشوف هايه همات
ضحك وحجه .
علي :- دباع الحركات فدوواا شلون حليوه .
ريحانه :- اييي تنكرط ان شاء الله يجي يوم وتشوفها .
علي :- يجي ليش مايجي .
ريحانه :- ابتسمت ورجعت عيني ع مبايل اريد اكلب ع صوره البعدها طلعلي الفديو الي مصوره علي
بسرعه التفت عليه
كلبته واخذت المبايل منه دنكت سديته .
حجه
علي :- شفتي ؟
ريحانه :- حجيت بدون مااباوعله
:- ايي وبجاني هواي .
علي :- ليش ؟
ريحانه :- رفعت راسي باوعت بعينه وحجيت بهدوء
:- خلاني اشتاقلك كُلش
اتنهد ساكت سحبني لحضنه
ايد تمشي ع ملامح وجهي
وايده الثانيه شابكه جف ايدي
همس
علي :- ريحانتي
ريحانه :- همم
علي :- من نزوج وتجينه بنوته تدرين شنو أسميها
ريحانه :- ابتسمت وحجيت بنبره هادئه .
:- اييي شنو تسميها ؟
علي :- نعناعه
ريحانه :- رفعت راسي بسرعه باوعت بوجها ضحكت بصوت وحجيت
:- هههه صدك والله ؟
ابتسم وحجه
علي :- صدك والله
ريحانه :- شعجب اختاريت اسم نعناعه ؟
علي :- هههه حتى تصير عندي ريحانه ونعناعه .
ريحانه :- ضحكت فرحانه
:- عزاااا واوو حلوو هيج
ويصيحوك ابو نعناعه هههه
علي :- اييه الله
ويصيحوج ام نعناعه
ريحانه :- ايي ريحانه ام نعناعه
خضره مو عائله
علي :- هههه
اهخخ اهخخ
ريحانه انتظر هاي الأيام واحسبلها يوم يوم
اتمنى اول طفل النه يكون بنيه
تدرين دائماً من وجهج اتخيل ملامحها
هيج اتخيلها ناعمه وبحلاتج
ووجها بريئ مثل وجهج
ومثل سوالفج وحنيتج
اخخ بويه اتحمس من اسولف بيها .
ريحانه :- رجعت راسي لحضنه
واستمعله مبتسمه اتخيل ملامحها وياه وكلبي دكاته تتسارع
لحد ماخلص كلامه
غمضت عيوني وهمست
:- وهيج واثق انته تتزوجني لدرجه باني احلام ؟
علي :- اييه طبعاً
مااعترف بشي اسمه قسمه ونصيب ضروف ومدري شني
انه رجال من حبيتج كد هذه الحُب مااعوفنج بنص الطريق
وها والله ضروف الله مكاتبلنه ننجمع ومن هاي الأعذار لا لا هذن مو سوالفي
رجالج ميخليج تصيرين لغيره
انه خيارين عندي بقانون الحُب
ياننجمع سوه ، يا نموت سوه .
وعد يا ريحانه علي
ومن انطيج وعد ثقي
بيه ولتخافين ولتشيلين هم
لهذه الموضوع
وعد مني ازووجج ومتصيرين لشخص غيري
اطمئني .
ريحانه :- بلعت ريك ساكته
كلامه فعلاً طمني
رفعت راسي باوعت بعينه
وهمست
:- واني اوعدك ماازوج غيرك
واذا صارت شغله أجبار
بكُل بساطه انتحر .
باوع بعيوني اتقرب يم وجهي
ابتسم وهمس
علي :- يابختي بيج
جا شكد محضوض انه والله رزقني بيج .
ريحانه :- ابتسمت ورجعت حضنته مااعرف ارد ع هيج كلام
رجع يمسح ع شعري وايده تنزل
ع ملامح وجهي
رفعت راسي وحجيت
ريحانه :- علييي
علي :- اويلييي علييي
ريحانه :- ههه بله ليش جبتني هنايه ومخليتني اروح لشغلي
واني هاي صار يومين ممداومه
نوب اني اكثر كرزونه مملتزمه
يعني إله يفصلني المدير
شلون بله ؟
علي :- هسه يله اذكرتي ؟
ريحانه :- ايي شبيك مو سالفه تجر سالفه ونسيت
علي :- هههه لا لتخافين يمي
انه مضبط الشغله
والمدير ميكدر يحاجيج بعد عسى ما تبقين شهر ممداومه
هم ميحاجيج .
ريحانه :- صدك ؟
علي :- اييه صدك
ريحانه :- افيييش اهم شي خلصتني من لسان المدير
علي :- وهاهيه ؟
ريحانه :- لا
وشكرا علاوي كُلش هوايه
علي :- اهخخ علاويي
هيه علي وشمسويه بيه
نوب علاوي بعد متنجرع .
ريحانه :- هههه شلون يعني ؟
علي :- يعني كومي سويلي فد كلاص جاي من ايدج الحلوا
ريحانه :- ضحكت هزيت راسي وحجيت
:- صارر مو تدلل
علي :- اقديلج فدوا
ريحانه :- نسيت نفسي صافنه بوجها ومبتسمه
شويه وحسيت ع نفسي من ضحك وحجه
علي :- هههه جا ماتكومين ؟
ريحانه :- هزيت راسي بمعنى
" ايي " وبسرعه ابتعدت عنه
كمت بسرعه متجاهله الدوخه
مشيت ناحيه السنك وكلما ازيد خطوه كلما الدوخه تقوا صار عندي وجع راس قوي لامسني شعور غريب
احس الغرفه صارت تفتر بيه واصوت وشوشه بأذني
غمضت عيوني بوجع
بس فتحت فقدت توازني بحركه سريعه اتقدمت ع سنك وجلبت بيه
غمضت عيوني بقوه نزلت ع كاع مهدود حيلي اني وانزل حسيته ركض عليه همست بوجع
:- علييي
للحكايه بقيه ...
------------------------------------
لاتنسوا متابعه الحساب والتصويت والتعليق على كُل فقره .
" دمتم في حفظ لله "