------------------------------------
" اييه خيعونج لكيتي الماينام اليل كله لخاطر عيونج .
علي~
" صدفه المتنبي "
بقلمي انا . سعيده الزيدي
قراءه ممتعه ...
------------------------------------
علي :- ريحانتي شو باعيلي
شبيج ع شنو خايفه انه اعالج الموضع لتخافين ماراح يصيرلج شي .
ريحانه :- رفعت راسي هستوني اريد احجي
شهكت فازه من صار مرتضى كبال عيني جان يمشي ناحيتنه عينه ع ادينه
وجها احمررر وعيونه صايرات بكصته
بسرعه سحبت اديه من علي
همست بخوف وعيني ع مرتضى
ريحانه :- علييي عليي مرتضى ورااك ادخل للمطعم بسرررعه
بس حجيت هيج بسرعه التفت وراه لمح مرتضى ورجع التفت عليه عاكد حاجبه
كملت بتوسل
ريحانه :- علييي الله يخليك لتسوويلي مشكله روووح بسرعه
بقى صافن بوجهي شويه وهزز راسه عافني ودخل للمطعم
درت وجهي جلبت بأيد مروه خايفه همست
مروه :- اجه ولججج وصلل
ريحانه :- ديري وجهج لتباعيله
سوي نفسج مشايفته .
سكتت واني ارجف من الخوف واكول هسه يوصل وصل وصل
وكلبي يدك بسرعه بسرعه
فزيت والتفتت بسرعه من نتر
مرتضى :- بابااا ينتظرج بلسياره
بسرعه روحيلهه يلله
ريحانه :- بلعت ريك حجيت بهدوء
ريحانه :- يله امشي
خزرني وجاوب بنتر
مرتضى :- رووحي انتي معليج بيه هسه الحكج
ريحانه :- بلعت ريك بخوف التفتت ع مروه خايفه هزت راسها وضغطت ع ايدي تطمني
فزينه ثنينه من صاح
مرتضى : امشششي
ريحانه :- هزيت راسي بمعنى ماشي دنكت مقهوره هديت ايدي من مروه عفتهم ومشيت
امشي واتلفت ع مطعم خايفه
وكلبي صار يوجعني من الخوف
مااحسيت غير وصلت سياره عمي وكفت من يم الباب مالته
التفتت ورايه بس اريد المح علي
حسيت ع نفسي من عمي نزل الجامه التفتت عليه
مبين ع وجها العصبيه بقيت صافنه بوجها وبالي مو يمه حتى نسيت اسلم نسيت اتحمدله بلسلامه
حجه
عامر :- صعدي ليش واكفه هنا ؟
ريحانه :- بلعت ريك دنكت وحجيت
:- ارجوو المعذره منك عموو مااكدر ارجع للبيت الي انطردت منه .
عامر :- صعدي هسه مو وكت هلسوالف .
ريحانه :- لا عموو مااكدري ارجع وياك .
جاوب بنفاذ صبر
عامر :- من اكولجج صعدددي تصعدددين وبدوون اي كلمه زايده
ريحانه :- عموو م ...
ماخلاني اكمل قاطعني وصاح
عامر :- صعددددي بسررعه
ريحانه :- ماصدكت صاح عليه اني منااا خايفه وخانكتني البجيه ع علي بسرعه انفجرت بلبجي
ودرت صعدت بلسياره ابجي
بصوت ناصي وكلبي كد مايدك سريع حسيته يريد يطلع من مكانه
زفر نفس عموو وحجه
عامر :- هذذه الثاني وييين رااح .
ريحانه :- سكتت ابجي ماجاوبته
رجع نتر
عامر :- مو ااحاجييج ؟
ريحانه :- مسحت خشمي بلعت ريك وحجيت
:- مااعررف يمكن راح للحمامات
سكت ماجاوبني
دنكت مخليه راسي بين اديه
حايره واكول هسه يتعاركون ويسوولي مصيبه .
شويه وفزيت ع فتحه الباب رفعت راسي بسرعه
صعد مرتضى وركع الباب بقوه
نترر بي عمي
عامر :- اشبيك انتته الثاني ؟
ريحانه :- سكت ماجاوبه
غمضت عيوني بقوه واحجي بداخلي واكول
:- راااح يحجيي رااح يكُله
فتحت بهدوء من حجه ببرود
مرتضى :- مابيه شي
ريحانه :- ماعرف شحجه عمو بصوت ناصي بينه وبين نفسه
ويهز براسه بنفاذ صبر .
خليت ايدي ع حلكي اكتم صوت بجيتي
شويه ورفعت راسي مسحت وجهي ودرت ع جامه
صافنه افكر ب علي واسأل نفسي ياترا شصار ؟
وشراح يصير ؟
وهكذاا كضيناها ساكتين لحد ماوصلنه البيت
طبك السياره بلكراج نزل عمو واني بسرعه شلت جنطتي اريد الحك عمي وامشي وياه حتى اتهرب من مرتضى وميسألني شي
بس فتحت الباب نفتح باب مرتضى نزلت سوه نفس الشي ونزل التفت عليه سد الباب بطريقه يلفتني بيها
ماباوعتله هستوني اريد اعبره
صار كدامي وكفت باوعت لعمي
يمشي كدامنه
بلعت ريك بخوف حجيت بهدوء اني ومدنكه
ريحانه :- ووخرر ارييد اعبرر
همس بدون ميباوعلي
مرتضى :- ضاملجياها بس هسه مو وقتها .
ريحانه :- سكتت
فتحلي طريق عبرته ومشيت
زفرت نفس ودخلت للبيت
صارت بوجهي سيلا خزرتني
ماعرف شحجت ودارت وجها
عبرتها وصعدت ركض لغرفتي مااريد اشوف عمتي فتحت الباب دخلت وغفلته ورايه
انتجيت ع باب غمضت عيوني من شميت عطره التارس الغرفه
فتحت عيوني باوعت للغرفه
كُلش مشتاقتلها اتعودت عليها
كضيت ايام مُره وحلوه بيها
نزلن دموعي نزلت ع كاع مهدود حيلي حضنت رجليه وصرت ابجي بصوت واهمس
:- ليش كلما افرح تطلعلي سالفه تطلع الفرحه من عيوني ...
صفنت شويه وبسرعه رفعت راسي مسحت وجهي
سحبت الجنطه طلعت مبايلي
جان مغفل فتحته وبين مافتح
اني مخلصه اظافيري
اول ما فتح اتصلت ع علي
طلعلي جارٍ الأتصال
كلبي يُدك بسرعه بسرعه
عيني ع كتابه قريتها يمكن اكثر من خمس مرات اقرا بيها
وابجي بسكوت .
مارد عليه
زاد بجيي رجعت اتصلت مره ثانيه
شويه وفزيت من فتح خط
كمت بسرعه ركضت فتحت البلكونه طلعت كعدت بلكاع يم الباب قربت المبايل ع شفتي
نزلن دموعي
همست بحنيه
ريحانه :- علييي
ماجاوبني رجعت كملت
ريحانه :- عليي وياييه تسمعني ؟
شويه وجاوب ببرود
علي :- وياج
ريحانه :- اشبيك علي صاير شي خوما مرتضى حجه وياك ؟
فزيت فزه قويه من صاح
علي :- لتجيبيليي طارري ....
منووو هوه اشايف نفسه
حتى يجيييي عوددد يهدد ؟
انه كتللجج كتللج منن البدااايه مامرتاححلله وحضرتتتج ماتنطيين بيييه وتنكررين كلاميي تكلييليي صداقه وين اكو .... هيج .... ، .......
هيينننه هيينه عباااله خلصتت ويااه لا مستحييل إله ......
انييي إله ماخلصتتت احسابيي وياااه شلوون ننماااذج نوب عليييه ....
ريحانه :- جان يصيح مفرفح
بقى يحجي ويفشر ويتحلف شويه حس ع هدوئي
سكت يلهث
خليت ايدي ع حلكي ابجي
لااردياً طلع مني صوت شهكه
بسرعه بعدت المبايل نزلته بلكاع
وصرت ابجي بصوت
اسمع صوته يحجي بهدوء
علي :- ريحانه
:- اشبيج ؟
:- حاجيني
:- لا تبجين باع ...
ريحانه :- طكت روحي
وقبل ليكمل بحركه سريعه سحبت المبايل وسديته بوجها غفلته ورجعته المكانه
رفعت ايدي افرك بصدري مختنكه
:- ردته يهديني ، يطمني
يسألني خوما أذوج ؟ مو يحجي عليه ويتهدد بلمشاكل ويزيدها عليه ، اني مناقصني
تعبت تعبت لييش هييج جااي يصيييرر ؟ لييش كلشيي ضدي
نحرمتت من شي اسمه أهل وانحرمتت من اخوويه
وهوه بسس علليي ال بقالي
وهم راااح يحرمونيي مننههه .
حضنت نفسي ابجي بصوت
لحد ما تعبت صرت اكحح بقوه
واحس بلعومي تشكك
مسحت عيونه رفعت راسي للسمه اهفي ع وجهي
زفرت نفس شلت المبايل وكمت
دخلت جوه سديت الباب ومشيت بخطوات متعبه ناحيه الميز
خليت مبايلي عليه صار كبال عيني عطره درت وجهي بقهر
باوعت ع نفسي بلمرايه
وجهي وعيوني حمرر ومورمات
وخمشي صاير احمرر
نزعت القمصله بتعب وعيني ع مرايه
هستوني رفعت ايدي اريد احل شعري صفنت شويه سحبت ضفيرتي قدمتها لشفتي غمضت عيوني بستها اتمعنت بيها شويه ونزلتها
رحت سبحت بدون مااغسل شعري وبعدها اتوضيت وطلعت صليت صلاه البارحه واليوم
كعدت اقرا قرءان واسبح
دائماً من اسوي هيج ارتاح
الصلاه والقرءان ملجئي
كمت بدون ماادعي شي احس مااعرف ادعي او ماعرف شلون اعبر عن الي بداخلي
اكتفيت بهذه الآيه
( وَاللَّهُ يَعْلَمُ مَا فِي قُلُوبِكُمْ )
شمرت نفسي ع جربايه صافنه
عيني ع مبايل وكلبي ناغزني
اريد اكوم افتح المبايل واطمنه
وبنفس الوقت اريد ابتعد وارتاح شويه ...
غمضت عيني مااريد افكر بشي
وبسرعه غفيت ...
ثاني يوم كعدت باوعت لساعه الغرفه ب 11:00
فزيت وكمت بسرعه احجي ويه نفسي
:- عزااا العزاااج ريحانه هسه اخووج مااات جووع شلوون تخليين النووم هييج تااخذج .
حجيت هيج ووكفت استوعب
رجعت بخطوات متعبه كعدت ع جربايه نزلن دموعي
ضربت ع جربايه وصحت
ريحانه :- لييش لييش ماريد ابجي لييش هييج سويت المفرووض اذكرر هووه رااح .
بلعت ريك مسحت وجهي وكمت اناشغ دخلت غسلت وطلعت نزلت جوه
اول مادخلت المطبخ لكيت عمتي تطبخ التفتت عليه انتجت ع كاونتر ضحكت تك خد ورفعت السجينه
بس رفعت السجينه فزيت بسرعه وغمضت عيوني عبالي تشمرها عليه
فتحت عيوني من ضحكت بصوت أشرت عليه بلسجينه وحجت من بين اسنانها
مديحه :- لعد شكد ماعندج كرامه انتي تنطردين وترجعين
ههه وبلمناسبه لتخافين مني اني مو مثل امج مجرمه .
ريحانه :- خلت السجينه ع سنك دارت وجها وكملت بكُل برود
مديحه :- اي احجيلنه شكد سعر لليله البارحه وويه منو كضيتيها ؟
ريحانه :- بس حجت هيج صفنت شويه استوعب شحجت فتحت عيوني ع وسعها مصدومه
كافي بعد اتحملتها هواي اني منا روحي صايره بخشمي واجت هيه زادتها عليه وصلت حداها .
ركضت عليها سحبت السجينه اندارت عليه فازه وفاتحه عيونها مصدومه خليتها كدام وجها وهمست بين اسناني
ريحانه :- إله شرفي إله شرفي
الي يتهمني بي اصير مجرمه مثل امي وهاي تشوفيها راح تصير ببطنه
وترحين فدووه لحذاء امي المجرمه
لتوصخين اسمها وتجيبي ع لسانج خوش ؟
هايه مو اخلاقي وجنت محترمتج بس انتي مو مال احترام مال تهديد وخوف .
ريحانه :- احجي وهيه متشنجه خايفه وتبلع ريك
حجيت هيج خزرتها وشمرت السجينه ع سنك عفتها وطلعت صعدت للغرفه
ركعت الباب بقوه
كعدت ع جربايه لازمه راسي بين اديه ارجف واحجي .
:- شسويتي ريحانه ؟
مو مو جنتي ترجفين من السجينه ؟ شو هسه عندج ولا شِئ ؟ من شوكت ارفع سجينه بوجه الي يضوجني ؟ من شوكت اني هيج ؟
هايه مو اني مو ريحانه
اليوم تهددين بيها باجر تضربين واحد بيها ؟
ريحانه :- احس شخص يحجي بداخلي خايف ويلومني ع سويته
وشخص ثاني مخايف ويكلي السويتي صح كافي تسكتين ...
للحظه حسيت صرت خبله
كمت بسرعه ارجف وابجي
نمت بفراشي اتغطيت خايفه
ساعه ابجي ساعه اصفن افكر
لحد ما صارت ساعه ب 1:00
احس بطني موتتني من الجوع
:- زين ليش محد صاحني ع غده ؟
:- عموو مو جان يفتقدني دائماً
هسه ليش تغير عليه ؟
من بين افكاري فزيت ع صياح عمتي تحجي بصوت واسمع صوت سيلا هم تحجي وياها
شويه وكمزت من انفتح الباب بقوه دخل عمي خازرني
صاح بدون مقدمات
عامر :- كوووميي لجج ادبسزز شلوون ترفعيين السجيينه بوجهه عمتتج هااا تردييين تصيرين مجررمه مثلل هذييج الوحده ؟؟؟
ريحانه :- جان يصيح بعصبيه لشوي ويجي يضربني
جاوبته ببرود
:- هيه من تتهمني بشرفي عادي ومن رده فعل طبيعيه بدرت مني تصير جبيره مو ؟
عامر :- تتهمججج تجيين تكوليلي موو ترحيين تشيلين السجينه وتهدديناا بيهاا
و تخليينه نخااف منجج ومنأمن بيييج .
ريحانه :- احس كلامه سجاجين ويضربن بكلبي
بسرعه نزلن دموعي حجيت اني وابجي
ريحانه :- اذا عندك شك بيه اني مجرمه طلعني من بيتك ليش مخليني هنا .
سكتت ماجاوبني فرك وجها وطلع ركع الباب وراه
رجعت مددت حاظنه المخده وابجي
سمعت صوت سوالف عاليه وكأنو متعاركين
ماهمني شي ولا خفت خلي انطرد ولا ابقى هنا اتحمل أهانه
واستغلال وافتراء .
شويه واختفه صوتهم هدئوا
وبعدها غفيت ومااعرف شصار
ماعرف شكد مر وقت وفزيت من حلم مرعب
باوعت ب ساعه ب. 5:00
كمت غسلت وصليت
ورجعت كعدت ع جربايه صافنه
وراسي مسطوور
لزمت بطني بوجع من الجوع
شويه وكمت لبست عبايه
اخذت فلوس وطلعت
نزلت جوه اول ما نزلت لكيت عمتي وعمي وسيلا كاعدين بلصاله
بس لمحتهم بسرعه دنكت
اتقدمت شويه وحجيت اني ومدنكه
:- اني رايحه هنا للمحلات اشتري وارجع .
جاوبني ببرود
عامر :- روحي
ريحانه :- هزيت راسي مدنكه وطلعت
بعدني امشي بلكراج صار مقابيلي مرتضى يمشي ناحيتي
دنكت وعبرته بدون منحجي شي
طلعت امشي بلفرع واحجي بداخلي
:- معقووله ؟ معقوله علاقتي القويه ويه مرتضى تخرب بليله ويوم ؟ معقوله عمي راح يبقى هيج يعاملني لو بس هاي الفتره لأن معصب ؟
قطع افكاري الأطفال الي يلعبون بلفرع نغزني كلبي من اذكرت مرجان
درت وجهي اكمل طريقي انتبهت ع سياره الي اجت ناحيتهم تمشي بسرعه
مباشرتاً التفتت ع اطفال وجعني كلبي من شفت بنيه زغيره واكفه قريب ع شارع وتسحب ب جبس الابنيه الثانيه تريد تاخذه وتركض
شهكت ركضت عليها وصحت
:- ولللججج
وصلت يمها لزمتها وسحبتها ع صفحه اللهث
ركضت الابنيه الثانيه دخلت البيت وهيه تنتر بأيدي تريد تلحكها صحت بيها
:- اوكفيييي خليي تعببر السياره
وكفت ساكته اتقرب ابو السياره
من صار مقابيلنه التفت عليه دك هورن مبتسم وسوه حركه بوجها .
خزرته درت وجهي وهمست
:- شوكتت تبطلون هل سرعه مو دمرتوو عوائل بسببها
وهل سوالف الطايحضها ماتنقرضون ونخلص منكم .
عبرنه زفرت نفس براحه دنكت ع بنيه ثنيت رجليه اتمعنت بوجها
ماشاء الله بنيه تجنن ناعمه شكراا وملامحها زغيره وخشمها صايرر احمرر من البرد
ابتسمت وحجيت بداخلي
:- ماينلام علي من يحب البنات
نترت ايدي معصبه لزمتها وحجيت بهدوء
:- اشبيج حبيبتي
برطمت شفايفها وصارت تتهضم
وتباوعلي بنظرات بريئه
لامسني شعور حلوو ع حركاتها وبرائتها
بجت بصوت صارت تمسح بدموعها وتحجي
الطفله :- س ساله ماتتيني جبس
ريحانه :- احسس كزكزت ع حركاته وحجاياتها
وبنفس الوقت انقهرت عليها ضحكت
مديت اديه امسح بدموعها واحجي بسرعه
ريحانه :- يعمرري لاتزعلين خليي تولي ساره هيه وجبسها هسه اني اخذج ويايه واشتريلج كلشي تحبي ماشي
الطفله :- دوليي والله
ريحانه :- ههه والله
هزت راسها بمعنى ماشي رجعت كملت
:- الماما تعرف بيج طالعه خاف ادور عليج ومتلكاج ؟
رفعت راسها وهمست
الطفله :- ايه هيه دالتلي لوحي الئبي ويه الدهال .
ريحانه :- هههه يمه شهل كياته والسوالف الحلوه
بستها وكملت
:- يله حبيبتي امشي
كمت لزمت ايدها ومشينه حجيت بأبتسامه
ريحانه :- انتي شسمج يحلوه ؟
الطفله :- اسمي ليم
ريحانه :- صفنت شويه اترجم اسمها ضحكت وحجيت
:- ههه قصدج ريم؟
هزت راسها بمعنى اي
ابتسمت وحجيت
:- انتي صدك ريم اسم ع مسمى
ابتسمت توخر شعرها عن عيونها
مديت ايدي وخرت شعرها
وكملنه مشي
لحد ما وصلنه السنتر
ضحكت فرحانه هدت ايدي ودخلت تركض تفتر بين الحلويات وحايره شتختار
وكفت ع صفحه مبتسمه واتمعن بحركاتها شكد فرحت لفرحتها
واتمنيت ب هل لحظه علي موجود ويايه ويشوفها
فرت المحل كُله وكل شويه تشيل اكله تلتفت عليه وتحجي
:- خالاا عاتي اخد هايه وياهن ؟
واجاوبها ب
:- عاتي حبيبتي شيعجبج اخذي .
وهيه تضحك فرحانه خلصت منها ورجعت اشتريت لنفسي حبشكلات مال يومين
حاسبت ابو المحل انطيته الفلوس وطلعنه
اسولف وياها وكل شويه تضحكني بسوالفها حرفياً غيرت نفسيتي وحبيتها كُلش
دلتني لبيتهم وكفنه ببابه انطيتها علاكتها و كلتلها يله دخلي جوه ابتسمت وحجت
ريم :- خالاا تئاي ابوسج
ريحانه :- ضحكت مكزكزه دنكت عليها
لزمت وجهي بأديها الزغار
اتقربت عليه وباستني
ابتعدت وحجت
ريم :- خالاا اتي سسمج ؟
ريحانه :- هههه اسمي
ريحانه علي
حجيت هيج وحضنتها بقوه بست خدها كمت وحجيت
ريحانه :- يله ملوكه دخلي للبيت صارت بارده وكل يوك هيج وقت كعدي بلباب حتى اشوفج
ولا تطلعين بلشارع تراا يدعموج ويخطفوج ماشي حبيبتي ؟
هزت راسه ودارت دخلت فتحت الباب التفتت عليه رفعت ايدها ابتسمت وحجت
ريم :- الى اللقاء ليحانه ئلي
ريحانه :- ضحكت رفعت ايدي
وحجيت
:- الى اللقاء
ابتسمت وسدت الباب بقوه
اسمها تركض وتصيح فرحانه
:- مامااا مامااا
ضحكت ودرت راجعه للبيت
امشي وافكر اكول شلون هيج فجأه صرت اهتم للأطفال واحبهم وبذات البنات صرت احبهم ع حب علي ...
وهكذا لحد ما وصلت البيت
سمعت صوتهم ب استقبال
كاعدين
افتريت ودخلت من المطبخ
لكيت سيلا واكفه تاكُل شافتني
نزلت عينها ع علاكه وبقت صافنه عليها
استغفرت بنفاذ صبر عبرتها
وبوجهي صعدت للغرفه
دخلت وقفلت الباب ورايه
كعدت ع جربايه اكُل وكل شويه اذكر ريم وابتسم مكزكزه ع سوالفها
من خلصت كمت خليت الباقي
بلمجر ورجعت كعدت ع جربايه
صفنت ع باب البلكونه وافكر
لحد مارجعت اكتئبت احاول اطرد الأفكار بس مااكدر عليه ضغط كُلش هواي
حتى للمعطم قررت مااروح ماالي خلك احس مااريد اشوف احد
اريد بس انام ومااطلع من الغرفه
مددت ورجعت افكر ب البارحه
من كضيتها ويه علي
ضحكاته ، حنيته ،حضنه ، وهواي تفاصيل .
ابتسمت بقهر
وكمت للجنطه طلعت الورده
شميتها ورحت للكنتور طلعت دفتر حروف القلب
ورجعت طلعت كعدت بلبلكونه
فتحته وبديت اكتب كلشي صار البارحه واعبر عن سعادتي بوقتها
وعن حُبي ومشاعري تجاهه
حجيت هوايه شغلات جانت بداخلي فقط وماحجيتها ال اي شخص حتى ل علي محاجيتها
طول مااكتب دموعي ابد ماوكفن ...
ختمتها بلتاريخ واليوم والوقت
خليت الورده ب دفتر وسديته عليها
دخلت جوه رجعته لمكانه ورجعت نمت ومن بين التفكير المفرررط غفيت ...
مر وقت هواي كعدت شبعانه نوووم الجو بارد والكهرباء مطفيه
هدوء وبس صوت دكات الساعه ينسمع .
صفنت شويه اصحصح
كمت اتلمس ب الأشياء الموجوده بلغرفه وامشي لأن مااشوف شي
الغرفه ضلمه كُلش
وصلت الميز سحبت التلفون شغلته ومشيت اضوي ع طريقي بين ماوصلت الجربايه فتح
فتحت الرمز وكلبي يدُك سريع
اول مافتحته اجتني اشعارات كومه لدرجه مبايلي علك
انتظرت شويه لحد ما وكفن الأشعارات نزلت البرده
جانت اتصالات ورسائل ع خط وع واتساب من علي ومروه
وعلي مراسلني من رقم ثاني
بديت اقرا برسائله جان كاتب
امس .
:- ريحانه اشبيج تبجين ؟
:- لييش مترديين ؟
:- بيج شيي ؟
:- مو احجييي ويااج ؟
:- اسف صارت بوجهج والله ماكدرت اسيطر على اعصابي
:- ريحانتيي ؟
:- شلوون انام وانتي زعلانه
:- ريحانه علي حاجيني مو
كلبي طك عليج
:- صوت شهكاتج بأذني
ميخلني انام
:- انتي مو تدرين من البارحه
سهران وياج ومنايم هيج
ينطيج كلبج تنامين وتخليني
متلوع ؟
:- بس اريد اسمع حجايه منج
حتى انام مرتاح
:- ريحانه .
اليوم .
:- شلونج ؟
:- وينننج ؟
:- احد محاجيج ؟
:- مزعليج مو ؟
:- خوما أذوج ؟
:- ريحانتي ؟
:- ليش مااجيتي للمطعم اليوم ؟
:- منعوج من الطلعه مو بله ؟
:- ريحاانه كاافيي تعبتت الله
يخليج حاجيني ...
قبل ثلاث دقائق .
:- بس كليلي انتي بخير وروحي مااريد منج شي بعد .
ريحانه :- بين كل رساله ورساله اتصال وهوايه رسائل بعد
بس خاتمها بهاي الجمله الي خلت كلبي يوجعني
اقرا برسائله اعيد بيهن وابجي
احس خوفه وحنيته طالعات من الأحرف .
مسحت وجهي ودخلت ع محادثه احسني مشتاقتله هواي وكلبي متكطع عليه
طلعلي : متصل الآن ...
بلعت ريك اتخطيت كُل هاي الرسائل وكتبت بأيد ترجف
ريحانه :- اني بخير .
كتبت هيج حتى اطمنه والعكس هوه الصحيح
اعرف ماراح تمشي عليه .
اول مارسلتها شافها مباشرتاً
بقيت بلدردشه انتظره يكتب
شي واكول هسه يودي رساله ...
بقيت انتظره بلعشر دقايق وهوه ماجاوبني ...
طلعت من الدردشه باوعت ع ساعه ب 9:17
اتصلت ع خالتي جاوبتني وكلتلها اريد عنوان بيت امي اريد اشوف مرجان
بلبدايه ماانطتني العنوان عباله اريد اروح اخذه منها
صرت اتوسل واحلفلها مااخذه منها
:- لأن شفت وضعي اخر فتره مو مستقر وساعه الساعه انطرد
واكيد عمي ميستقبله بعد الصار بي ف وين اخلي لو جبته .
انطتني عنوانها وحلفتني مااخذه واعدتها مااسوي اي شي ولا اخذه من امه .
اتشكرت منها
سديته واتصلت ع مروه
هم جانت خايفه وتسأل ومن سولفتلها كُلشي صارت ترزل بيه وتلومني ع تصرفاتي وهكذاا لحد ماخلصنه حجي سديته منها وكمت اضوي ب الفلاش
غسلت واكلت ورجعت مددت بلفراش صافنه
اتنهدت بقهر احسني مشتاقه لمرجان ومتلهفه لشوفته
وماعرف المن اصفي بالي
ال علي ، ال مرجان ، ال امي ، ال عمي ، ال مرتضى ...
درت جسمي نمت صفح فتحت مبايلي ودخلت للأستديو اريد اشوف صور مرجان
اول مادخلت طلعلي فديو بي اني نايمه عكدت حاجبي مستغربه وبسرعه كمت خايفه اتسارعت دكات كلبي
دخلت ع فديو بلعت ريك رخى جسمي من نفتح
جان الفديو
اني نايمه وبس وجهي طالع وايد علي تمسح ع وجهي بحنيه
صوت الرعد والمطر مال ذيج الليله طالع بلفديو
اصبعه الأبهام يلعب برمشي وينزل ع خدي وخشمي وعيوني
صعد ايده ع شعري وخره ورا أذني وصار يبعده عن وجهي
رجعت الفديو وقربت المبايل ع أذني اتأكد من الصوت السمعته
ركزت بلصوت جان صوته يشهك تقريباً
رجعت اباوع ع فديو عيوني
متروسات دموع وكلبي ينغزني
واثناء ما يمسح ع وجهي صار صوت رعد قووي وبسرعه فزيت اتحرك المبايل بسرعه والكامرا صارت تصور بلكاع واسمعه يهمس
:- اسم الله ، اسم الله لتخافين يمج
حجه هيج وانقطع الفديو
خليت ايدي ع حلكي شمرت المبايل وصرت ابجي بصوت
كلبي اتكطع عليه
اريد اشوفه ، اريد اروح يمه
اريد احضنه ، اريد اشكيله وابجي بحضنه ، ارييده .
مددت بتعب حضنت اللحاف
مفتحه عيوني ودموعي تنزل ع مخده
مسحت وجهي ورجعت سحبت المبايل عدت الفديو مره ثانيه وثالثه ورابعه ...
خرجت منه دخلت ع واتساب
طلعلي
اخر ضهور منذ ٨ دقائق
كتبت بأيدي ترجف
:- عليي
مسحت دموعي وبقيت بلدردشه انتظره يرد
طلعلي صحين بس مافتحها
لحد ساعه ادعش وربع واني انتظره يرد
عيوني صارت تتلازك من النعاس
غفيت والمبايل مشتغل بأيدي ...
كعدت ثاني يوم ب 9:00
راسي مسطور ودايخه رجعلي فقر الدم والخفقان .
باوعت ع مبايل سحبته اريد اشوفه رد لا ؟
اريد افتحه طلع غافل مخلص شحن
زفرت نفس وكمت ...
مر اليوم علي مارد ع رسالتي
واني ابد مانزلت جوه ولا واحد صعد عليه وافتقدني
اكلت من الحلويات العندي وسديت جوعتي بيهن
صارت ال ساعه ب اربعه
كمت بدلت شلون مجان وقبل لا اطلع جانت باقيه عندي كاكو ثنين خليتهن بلجنطه وطلعت
نزلت جوه دورت عمي مالكيته
طلعت براا لكيته ب حديقه هوه ومرتضى وسيلا كاعدين
بلعت ريك مرتبكه مشيت ناحيتهم حسيت مرتضى رفع راسه بسرعه باوع عليه
واني ابد ماالتفتت عليه عيوني مركزه ع عمي
وكفت قريب عليهم وحجيت
:- السلام عليكم .
دنك مرتضى وبس عمي رد السلام
كملت
ريحانه :- احم عمي اني رايحه لشغلي .
بس حجيت هيج رفع راسه مرتضى وبسرعه نتر بشك
مرتضى :- ويين اكوو شغل هسه
شغلج مو ب سته يبلش !!!
ريحانه :- حجيت بهدوء بدون ماباوع بعيونه
:- اريد اشوف اخويه بلبدايه وبعدين اطلع لشغلي هم ورايه مسافه طريق
ماجاوبني دنك حجه عمي ببرود
عامر :- هذه هوه روحي
درت امشي بدون مااحجي شي
طلعت من البيت امشي واتلفت
ورايه خاف يطلع مرتضى يراقبني
مشيت لحد ما وصلت بيت ريم
ابتمست من لمحتها من بعيد واكفه شافتني ضحكت دارت وجها ورفعت راسها كأنما حاجت شخص داخل البيت التفتت عليه واجتني تركض وتضحك
دنكت وفتحتلها حضني وصلتني
وحضنتني تضحك
بستها وطلعتلها الككوايه من الجنطه كامت تكمز فرحانه
اتقدمت باستني رديتلها البوسه
خطفت نظره ع بيتهم شفت مره ماده راسها من الباب تباعلنه وتضحك
ابتسمتلها لزمت ايد ريم ومشيت ناحيتها وكفت كدام الباب باوعت بوجها
مره شابه سبحان الخالق شلون شايله جمال
عرفت ريم عليمن طالعه حلوه .
سلمت عليها ردت السلام واتشكرت مني وكلتلي صار عندي فضول اشوفج البارحه ريوم ماخلتنه ننام اني وابوها كُل الليل صرعتنه تصيح ريحانه علي اشترتلي كلشي وكلاشين
ضحكت ع سوالفها حجيتلها الموقف ونبهت امها متخليها هيج بلشارع اختصرتلها حادث مرجان وشصار بي ...
وجها صار ينطي اللوان من
الخوف حسيتها فطيره وع نياته وعبالها الدنيه بخير ومأمنه ع بنتها بلشارع
سولفنه شويه
دنكت بست ملك باوعت ع امها ضحكت وحجيت
:- اخاف تخافين ع بتج وعبالج مصابه تراا مابيه شي .
ام ريم :- لا كلبي بوسيها عادي .
ريحانه :- سولفت ويه ريم شويه استئذنت من امها وطلبت منها اخذلها صوره
قبلت
اخذتلها صور بحركات تجنن وهيه وتاكل بل ككوه
رجعت بستها اترخصت من امها ومشيت ...
رحت ع عنوان بيت امي الجديد
جان يبعد عنه ب فرعين
بس المسافه مو كُلش بعيده
وصلت للبيت وكفت باوعت بي
جان بيت زغير وقديم حتى كراج مابي يعني الباب الخارجي مباشرتا يدخلك للبيت
اتقدمت للباب رفعت ايدي الترجف دكيته مره ومرتين هستوني اريد ادك الدكه الثالثه
فز كلبي من فتحت الباب وصرنه وجه بوجه
باوعتلي بنظره خوف
درت عيوني منها وحجيت بهدوء
:- اريد اشوف مرجان
ابتسمت فرحانه وحجت
افنان :- اييي تعالي فوتي هذه كاعد جوه
يله دخلي وسدي الباب وراج الجو بارد ويدخل البرد للبيت ...
ريحانه :- حجت هيج وعافتني ودخلت جوه
نغزني كلبي حنيت لهاي الأيام القديمه بعدها نفسها امي
هم جانت قبل دائماً من اجي من المدرسه هيج تكولي .
بلعت ريك ودخلت سديت الباب ومشيت ع كيف اتلفت بلبيت
اجاني صوتها من الغرفه الي بصفي تحجي بفرح
افنان :- هايه اجت اختك تشوفك
مشتاقلها موو ؟
ريحانه :- كلبي دكاته تتسارع ويه كُل خطوه امشيها وويه كُل كلمه تحجيها
دخلت للغرفه وكفت بلباب باوعت لمرجان وجها موورد
ومسويتله اجواء حلوه بلغرفه وواضحه ع شكله الراحه
التفت بعيونه عليه
ابتعدت امي عنه وكفت ع صفحه مبتسمه
فتح عيونه ع وسعها بفرح من شافني .
ضحكت وركضت عليه احضن بي
وابوس بي وهوه مبتسملي
عافتنه امي وطلعت
باوعت بلبيت شويه ملموم ومتوفره بي الأشياء الضروريه
مثل الصوبه ، والكنتور ، والمده
وغيروها ...
شويه واجت شايله كلاص عصير بصينيه خلته ع طبله وطلعت
رجعت الاعب بمرجان طلعتله الككوه وكلتله ورجعت اسولف وياه
شويه وودعته هستوني اريد اكوم صارت عيني ع شربت
ماانطاني كلبي اكسر بخاطرها
شربت منه شويه وكمت
بست مرجان ومشيت امشي وعيني عليه وأشرله بأيدي واضحك
فزيت من انردمت بيها التفتت عليها جانت واكفه بلباب باوعتلي مبتسمه برضا واضح صار هواي واكفه بلباب
اختفت ابتسامتي بلعت ريك دنكت عبرتها وطلعت
سديت الباب ورايه
مشيت عيني ع بيت وكلبي ناغزني نفس اجواء بيتنه القديم ونفس ريحته نفس حياتنه القديمه نفسها امي
نفسه لبسها وتسريحه شعرها الي دائما جانت تسويها من تطبخ
ريحه اكلها الطيب الطالعه من البيت .
هاي التفاصيل كُلها خلتني احن لأيامنه سوه ...
طلعت من الفرع وكفت ع شارع العام خايف اتلفت بلمكان واذكر شصار بيه من الولد تحرش بيه
الشي الوحيد الي مطمني انو جان شبه سكران بوقتها وجنت لابسه كمامه يعني هسه اذا يشوفني ميعرفني ...
وكفت كيه اخذتني للمطعم نزلتني قريب ع مطعم
مشيت مسافه واثناء ماامشي
فزيت من ايدي انسحبت بقوه
للحكايه بقيه ...
------------------------------------
لاتنسوا متابعه الحساب والتصويت والتعليق على كُل فقره .
< دمتم في حفظ لله >