انا والمجنون
بقلم اوتار حزينه
الجزء الاربعون
_______________________-
شروق
اجه الخميس وجاب فرحتي بكر
كاعده يم باب الاستقبال والبرگع على راسي
فرحه بگلبي مااعرف شلون اوصفها بس اكدر اگول
اني اليوم اسعد انسانه وفرحتي
اريد اطشها للكل
اريد الكل يفرح وياي لان الاحبه راح
يعقد عليه بعد شويه
لحظات تفصلني عنه واصير حلاله وام بيته
سمعت السيد سألني انتي مجبوره
على بكر فاضل صديق
لااا
جاوبته بخجل وهو حجه
الكل يسكت حتى اسمعها
صارت صنطه وهو كرر
بنتي علي صوتج حتى نسمعج
انتي مجبوره على بكر فاضل صديق
لا مو مجبوره
صوتي طلع وهو بده يعقد النا كمل وصرت
باسم بكر وطشت الهلاهل
شوگ كومتني هي وجنات ورحت كعدت
بالصاله عيوني غورگت وحبست الدمعه
گوه
امي اجتي ليمي بوستني وكامت تبجي
شوگ اشرت الها بعيونها على الكاعدات
سكتت وكعدت يمي وهي تمسح بدموعها
الفرح جنت اشوفه بعيون شوگ وجنات وكم وحده
لان الباقي ظلن يعاينن عليه والهمس
مشتغل بيناتهن
مادرت بال لاي احد ماردت فرحتي تكسرها
كم وحده حاقده
قبلت بي مثل ماهو
ورضيت گلبه بعده يم مرته وگلت وي روحي اصير
يمه وبيته وچدام عيونه وهو راح يحبني وي الوگت
راح اخلي يحبني ،،،،من يشوفوني شلون راح ادلله واهتم بي هو وبنته جانت عندي قناعه بكر راح يجي يوم ويحبني مثل ماانه احبه
بكر
اسمع السيد يعقد وبالي راح يم
اسيل من عقدنا،،،غمضت عيوني من تذكرت
شلون ابتسمت اول ما شافتني گالت
صرت حلالك
انتبهت لعمي من دغني بأيدي
جان السيد يحجي وياي خليت ايدي بأيده
وعقد اليه اني وشروق
ماجنت فرحان واحس بغصه بگلبي روحي
راحت يم اسيل وولدي حسيت ايد
لزمت گلبي وعصرته گلش
شلون افرح وولدي وهي جوه التراب
شفت هاي الفرحه جثيره عليه والمفروض ماازوج
ولا افرح بعد الصار بيهم،،،
عيوني غورگت وذبيت حسره
عمر لزم ايدي وحجه يم اذني
هونها بكر وافرح بهل اليوم
هزيت راسي واني ساكت وظليت اسمع الاودام
تبارك اليه
عمامي وولدهم بارگولي
وظلوا يمي شويه وبعدين ترخصوا حتى يرجعون
للفلوجه سجاد يمي وعمر وحسين الاخوه الصدگ وحزام الظهر الي شاد
ظهري بيهم
وره مشوار الاستقبال فرغت ومابقى
غير سجاد يمي،،،،،والولد
جنت اسمع الهوسه جوه
ملايه تقره وتصلي على النبي محمد
ماجنت اريد اروح البسها الحلقه چدام الادوام
من وره وضعي وگلت اگول لسجاد
هو سبقني بالكلام
اگلك خلي نطلع وي الولد وبعدين نرجع
شدگول
ليش نرجع
جاوبته وهو ضحك وجاوبني
غير حتى تلبسها الحلقه براحتك بعيدا
عن اعين الفضوليين
عرفت صاحبي حاس بيه وعرف الي بگلبي
هزيت راسي باي وطلعنا سوه وويانا الولد
الي علگوها بالسياره
سوه جوه حلو بس اني جنت بغير عالم
ابتسم الهم وبالي يروح ويجي ليم ولدي
ومرتي
ساعه وخابروا اهله ورجعنا،،،بس اني ويا
لان حسين وعمر نزلوا يم مطعم
وصلنا،،،،،جانت الدنيا ليل طبينا
للاستقبال هو،،،،عافني وراح لجوه
الباب انفتح وره مشوار،،،،وشفته طب وويا امه
وشروق لابسه ابيض بابيض ومغطيها برگع ابيض
ومايبين شي منها ووياهم ام عبد الله
حجه
مبروك وشايفين كل الخير
الله يبارك بيك ابو عسل
جاوبته وامه حجت
مبروك يمه
غصت كملت وهي تبجي
ديربالك عليها يمه تره انطيتگ قطعه
من گلبي
بعيوني راح اخليها
تسلم عيونك بكر
سجاد جاوبني وام عبد الله هم باركت
اليه
اكعدي هنا
حجت وياها وكعدت قريب مني
سجاد انسحب من يمنا،،،واجتي وراه ام عسل
باركت اليه واجتي وخرت البرگع
من شروق وحجت بضحك
وهاي عروستك الحلوه مبروك وشايفين
كل الخير
جنت منزل راسي ومرتبك كلش مادحگت الها
انتبهت هي رجعت البرگع وماادري
شحجت وي ام عسل
ها اي براحتج
سمعت كلام بينهن ورفعت راسي ام عبد الله
حجت وياي
احنا راح نطلع اخذوا راحتكم
ماحجيت شي،،،، طلعن وسدن
الباب وراهن
عيوني راحت لايدها من عدلت البرگع
وبياض ايدها خلاني اصفن عليها وهي جوه البرگع
اخذت نفس وذبيته وحجيت گوة
مبروك شروق
مبروك عليه وعليك
جاوبتني بخجل ورجعت عدلت البرگع
ماكو كلام ظليت ساكت وهي هم بعدين حجيت
ان شاء الله مااقصر وياج بشي واخليج
بعيوني
تسلم عيونك
جاوبت بكر بخجل وعدلت كعدتي
البرگع زحف ليوره ووكع من على شعري ردت اعدله
بس عفته من شفت صفن عليه
وتغيرت نظراته
نظرات الاعجاب شفتها بيهن للحظه وبعدين
نزل راسه وحجه بصوت مخنوگ
طالعه حلوه
هو جان لابس قميص ابيض
وبنطلون اسود مزين ومرتب روحه
بسيط بلبسه بس من جان قريب عليه وشفت
نظراته حسيت گلبي راد يطير من مكانه
حجيت گوة
شكرا
سكتت للحظه وبعدين مديت ايدي للطبله اخذت علبه وحجت بخجل
هاي حلقاتنا
حجت وصفنت على وجهها على خلقه ربي
الحلوه ماكو اي نقص بيها كلشي حلو بيها الوجهه
مثل الگمر والبياض ياخذ العقل
العيون ملونه والشعر مغطيها من فوگ ليجوه
ليش قبلت بواحد مثلي وهي الف واحد
يتمناها حجيت گوة
ليش شروق قبلتي بيه وانتي
سكتت وعيوني افترت عليها من فوگ ليجوه
الخجل بين بوجهها وزادها حلاه وجمال
وبرائه
ليش يبنت الناس گلتي اي
راح اعذبج وياي
لحد هسه ماعرفت ليش قبلت بيك
صوتها طلع گوة سكتت وظليت صافن
عليها رفعت راسها وعيونها صارت بعيوني
ابتسمت وخلت الگلب مايعرف
بشنو يحس بس،،،، شعور بالراحه
سكنته
عيوني
راحت للشفه من گالت بصوت ناصي
وهي منزله راسها
لان ااحبك قبلت بيك
عضيت شفتي بقهر ونزلت راسي
جاوبته گوة
حتى بعد السمعتي
اي وكبرت بعيني بعد اكثر
لان مانسيت مرتك
گلبي مو الج يبنت الناس
يجي يوم ويصير اليه يكفيني صرت الك
وبأسمك
شاحجي واني كاعد اسمع كلام برد گلبي
شويه شويه وحسيت راحتي يمها هي راح
تنسيني الشفته وراح تلمني اني وبنتي
لحظنها
مديت ايدي الها لزمت
ايدها بهدواه وايد اللخ اخذت الحلقه
وخليتها بأصبعها،،،
عيوني تتبعت ايدها اخذت الحلقه مالتي
ولزمت ايدي صفنت عليها للحظه سمار ايدي
وين عن ايدها البيضه
رفعت راسي وشفت عيونها
غوركت بس مبتسمه
خلت الحلقه وسحبت ايدها مني
الباب انفتح طبت امها واختها كامت
وعيوني راحت لطولها وشعرها النازل لمتنها
حجيت بخنگه
يارب اني شمسوي بهل الدنيا حتى تنطيني هيج
ملاك
شوگ
تعبنا من الركض بهل الاسبوع حتى
نكمل تجيهزات المهر مال شروق الي صار بسرعه،
اشتغل بالمطبخ وانظف الهوسه اني وجنات الي
ماعافتني ولا لحظه واحجي بگلبي على
ذيجن الي گلبن البيت وطلعن وهن يصنفن
على بكر لان مااجه ولبس الحلقه لشروق
هي ماقبلت لان مارادت تسبب اله احراج گالت
بعدين واجه وي سجاد وره مشوار
طلبت نعوفهم وحدهم حتى ياخذ راحته
ومايخجل من عدنا
جنت اشوف الفرحه بوجهها وبوجه
سجاد لان هو يحب بكر كلش ويحسبه
مثل اخوه،،،،
وره مشوار. رجل جنات اجه عليها
راحت ويا ،،،،من ضلينا وحدنا
خاله حجت
وياي بقهر
شفتيهن يمه كاعدت ويضحگن عليها
لبنتي
اي خاله شفتهن وسمعت الحجي مالتهن وغلست
حتى مااسوي مشكله وياهن واكسر فرحه
شروق
ياافرحه يمه ماشفتيها شلون ماخلته
يجي،عليها ليم النسوان وهي راحت اله
خاله هي مارادت تحرجه كدامهن تعرفهن شنو هنه واني وياج هم نعرفهن كلش زين اذا اجه
عليها شراح يسون
خاله هزت راسها بقهر وجاوبتني
جان الضحك وصل للشارع
ماكو مخافه الله مايخافن لا الله يعافي
ويبتليهن
جاوبتها ومسحت الميز ورحت غسلت الخاولي
كافي يمه تره تعبتي اليوم كلش
عادي،،،،خاله يهون التعب لخاطر
شروق العسل
جاوبتها بضحك وكملت
شفتيها شلون طلعت تخبل صلاوت وخلت العيون
عليها
اي يمه حلوه بي بختها مايل
خاله لاتحجين هيج والله راح يرجع
يمشي مادام هي صارت يمه وسجاد ويا
هزت راسها وهي مو مقتنعه بكلامي
كملت
راح اطلع الوصخ واغسل الحوش صاير فلم هندي
عوفي للصبح كافي تشتغلين
لاا شلون اعوفه هسه اغسله على السريع
طلعت ولميت القواطي وكلاصات المي المشموره
هنا وهنا،،،كملت تنظيف ورجعت للمطبخ
خاله ماكو راحت لغرفتها،،،طفيت الضوه
ورحت للصاله شفت شروق نزلت وهي مبتسمه
وبأيدها غزل
هاا عروستنا الحلوه شخبارج
خجلت مني وكملت بضحك واني اهوس بصوت ناصي يمها واهز جتف
جبنها مجهزه هي وشهادتها
بنتنا معدله واي لوله مابيها
ظليت ارگص يمها واطگ اصبعتين
سمعت صوت ورايه فزيت من شفته عمو السيد
ابتسم وخلاني بنص هدومي
اااروح
فلتت للدرج من خجلي وشروق ورايه هم
انهزمت من خجلها من ابوها،،،،،
صعدنا سوه واني خربانه ضحك حجيت
شلون فشله
اي
جاوبتني وحجيت بغمزه
روحي نامي واحلمي بيه للاسمر
عاابت
جاوبتني والوجه صار احمر دم
اوي عيني فديت الخجل
بستها من خدها وكملت
ااحبج لان تشبهين الحلو مالتي
فكيت عيوني وصحت
يبوو والله نسيته گلي اصعدي،ورايه واني
التهيت بالشغل باااي
فلتت للغرفه بسرعه طبيت
شفته متمدد ومبتسم
وي روحه صفنت علي وحجيت بضحك
هاي شكو بس لا تذكرت ايام عرسك
كعدت وتربعت على الجربايه وجاوبت شوگ
من حجت
اي والله تذكرت العقد مالتنا
وشلون طبيت وشفتج بالابيض وصرتي حلالي
وبأسمي
ههه هو اكو مثل يگول
اذا ضاگ خلقگ تذكر ايام عرسك
ههه منو گلج ضايج خلگي شوفيني تره كاعد
اضحك ومبتسم
اي شفتك وگلت واحده من اثنين لو تذكر
عرسنا لوطگن عنده فيوز وتخبل وكام يحجي وي روحه مثل المخبل
سكتت من حجت هيج وطه اجه بالي وهي هم سكتت من حست شحجت لمت شفايفها وراحت اخذت هدوم من الكنتور حجت بصوت ناصي
اروح اسبح
كام لحيله وعيونه تخوف وبيهن شر
باوعت للحمام شفته
بعيد ماالحك افلت اله لزگت بالكنتور من صار قريب
عليه حصرني بين ايده الاثنين
من سندهن على الباب
خليت الهدوم كدام وجهي وسمعته حجه
منو المخبل ولج والطاگات فيوزه
اني وداعه ابويه اني المخبله
ااااي
عطت من گرصني من ايدي بقوه وشمرت
الهدوم بوجهه وصحت واني افرگ بأيدي
اااخ ليش هيج تأذيني
واگص لسانج اذا بعد گلتي عليه مخبل
خزرته بضحك وطلعت لساني اله وحجيت
واني متعمده اضوجه
مخبل والطول طول النخله والعقل عقل الصخله
صفن عليه وجاوبني
چا اذا انه مخبل اذا ماعليه حرج بالي راح اسوي
گلبي فز من الخوف وصحت
ااكعد راحه عسل راح تگعد
ماكو راحه جرني عليه وحصرني بين ايده
وكتم صوتي بوسه قويه اخذ النفس
وياها
وخر وحجه بهمس
تعرفين شجنتي تسوين بيه من جنتي
تجين ليمي وتحجين وياي
ابتسمت اله وجاوبته
شجنت اسوي بله
نار تشعليها بيه وتخليني بحسرتج
جاوبتها ورجعت بستها بقوه
ايدي لمتها لحظني وردت اخليها بنص گلبي
هالگد مااحبها نسيت روحي
وهي هم ورحنا للجربايه عسل كعدت وطيرت
العسل من ايدي حجيت بضوجه
واني ازمجر بصوت قوي
تره هاي مو وضعيه بنت الچلب عبالك تعرف
وگتنا
هههههه وخر خلي اكوم عليها
عوفيها رجعت نامت
رجع يبوس بيه ويفرگ وجهه برگبتي وخدي
ويهمس
احبج ياجرح گلبي
عسل هم بجت وصاح
خرب گلبي
هههه
طگيتها بضحكه وكمت عليها واشوفه يدردم
وضايج والشعر مهوس رتبه بعصبيه
وحجه من شافني اجيت كعدت يمه حتى ارضعها
هاي شدسوين
ارضعها غير
اكلج انتي وبنتج صايرات بلااا احساس
انه مشعوله صفحتي وانتي كاعده يمي ومطلعه
مسح وجهه وكام وهو يعد ويصف عليه
اني وعسل
جاوبته بضحك
اي اني شعليه
اضحگي واشعليهم بعد اكثرر
هههه
ضحگت وشفت نظرات الشر بعيونه غطيت
صدري بخاولي وحجيت
راح اسكت
اي اسكتي احسنلج وخليني ابرد
عضيت شفتي واني كاتمه الضحكه
من نامت عسل بلحظه جرني لحظنه
وماكو تفاهم اخذه حگه وزياده ظل يبوس بيه
ويحجي كلام حب من التعب غفيت
وعفته يحجي وي روحه
بكر
زواجي من شروق استعجلت بي من
وره اخوتي
واختي الي اجوي لمده اسبوع وراها يرجعون
لامريكا،،،
البيت ماجان محتاج شي لان هي رتبته
على ايدها هي واختها
قبل عرسنا بيومين اجتي هي وام عسل
واختها ام عبد الله وجابت غراضها
عفت اختي يمهن
طلعت اني وسجاد حتى ياخذن راحتهن بالبيت
ووياي غزل تعشينا بره ورجعنا
بالعشره طبيت واختي تلگتني سجاد سلم
وحجه بضحك يم باب المطبخ
اشتم الريحه ابو العز مال اودام
ابتسمت اله وصدك البيت يلمع من النظافه
والريحه تخبل حجه
يله انه رايح تريد شي
لا تسلم
اخذ غزل لان رادت تروح ويا
وطلع صفنت على التغيرات الصايره
بالصاله ،، اختي حجت بفرح
الله حبك بكر وانطاك شلون بنيه هم خلقه وهم
اخلاق عبالك مو عروس ياربي شلون
حبابه هي نظفت البيت وسوت كلشي
شكد حجيت وياها ماقبلت
ادكول هذا بيتي صار
ابتسمت لاختي وجاوبتها
هي خوش بنيه ومتربيه زين
اي مبين واهلها هم خوش ناس واهل اصول
هزيت راسي وهي حجت بضحك
روح شوف غرفتك طلعت تجنن شنو من ذوق
شنو من نزاكه الله يخليها الك ويعوضك
عن الراحوا
ذبيت حسره وجاوبتها
تسلمين ام يزن
اروح اسوي جاي هسه فاروق وضياء يجون
هزيت راسي باي وهي راحت للمطبخ
مشيت بالعربانه للغرفتي،،،،جان الباب
مسدود فتحته وصفنت على الترتيب
فرشه بيضه وبيها شريط احمر على عرضها
البردات تول نفس اللون
كلشي حلو ونازك مثلها تحس لمساتها بالبيت
وتخليك ترتاح لوجود هيج انسانه
بي
طبيت وعيوني راحت للميز شفت سله
ذهبيه طابقين عطوري فوگ وعطورها جوه
ازار وسجاده بيضه مصفطات على صفحه سبحه
خرزها بيضه مثل لون السيت وقران
بغلاف نغس اللون
درت راسي للكنتور ورحت فتحته
هدومي المهوسه مصفطه صفاط حلو ومرتب
خانتي جانت يم ايدي واكدر اخذ الهدوم بسهوله
دحگت لفوگ وشفت هدومها مصفطه
واكو صندوق خشب على صفحه مگتوب علي
روح الروح بالانگليزي
رجعت ليوره وسديت الباب ظليت صافن
على غرفتي وهنا عرفت راح ابدي حياه جديده
وي انسانه تحبني وتخاف الله بيه
اني وبنتي
شروق
عرسنا اني وبكر صار بقاعه هو وحد وانه
وحد وصارت الحنه والعرس بنفس اليوم مثل
سجاد وشوگ،،،لان اخوته واخته رادوا يسافرون
ثاني يوم،،،،
هو مااجه وياي لاي مكان من وره وضعه
اخوه ضياء وسجاد
تكفلو بكلشي هو الي يودي ويجيب واصدقائه
تگفلوا بالقاعه وترتيبها هي والسياره
اجيت من الصالون گبل للقاعه
لابسه بدله رماني وكلوش وشعري عفته على
طوله بس برمته من جوه وتاج نفس
لون البدله،،،،
صلاوووت على الرسول طالعه تخبلين
عبالك لعابه
رغده حجت وهي تجر صلاوات وشوگ
كامت تهلهل هي وجنات من طبيت للقاعه خجلت
من نظرات الكاعدين كعدت،،،،، وانه منزله
راسي وجنات گابلت خالاتي وظلن يهوسن
اليه،،،
بكر
ماردت اكسر فرحه شروق لان هذا اول زواج
الها من رادوا الحفله بقاعه قبلت
وگلت اتحمل شلون ماجان لان هي تستاهل هذا
الشي جنت اريد افرحها لان وگفت وياي
وكفه حلوه لان
عرفت بيوم المهر
اني اخذت وحده اصيله وبنت اودام
من طلعت اهلها وخلتنا وحدنا رغم خجلها
عرفتني مرتبك منهم وخجلان من وره وضعي وتصرفت تصرف ريحني،،،
مبروك بكر ويوما اشوفك تمشي على رجليك
حظنت اخويه الجبير فاروق من بارگلي
وخر مني وكمل بغصه
الله يعوضك عن الراحو بجاه نبينا محمد
اللم امين
اخويه الوسط ظياء جاوبه وبارگلي
شروق
كاعده واعاين للشوگ شلون علگت الجو
هي ورغده واخت بكر الجانت اكبر مني بسنتين
اسمها امل حبابه كلش وفرحت لاخوها واليه
اجتي يمي وطشت عليه جگليت وكامت
تهلهل بوستني واشوف بعيونها الدموع ابتسمت
الها وهي حجت
مبروك حياتي وشايفين كل الخير
تسلمين حبي
جاوبتها وكعدت يم امي الي ماعافتني ولا
لحظه اشوفها الحزن بعيونها بس ساكته
وره مشوار شوگ هي وجنات اخذني
للغرفه ،،،طبيت بدلت بدله العرس
وشوگ حجت
بكر راح يجي يطگ حتى تاخذون صور انتي
ويا
گلبي فز من سمعت بي راح يجي وهم
ماجنت اعرف راح ناخذ صور
رغده عدلت شعري والبدله طلعت
ظليت بس اني وامي وجنات بالغرفه واكفه
مثل الصنم وعيوني على الباب
اجه وحده وهو منزل راسه
سمعت هلاهل بالممر وعرفتها رغده عيوني
ظلت علي رفع راسه شفته غمض عيونه للحظه بعدين ابتسم بس حسيته مو
على بعضه
شفت شروق طالعه تخبل موو
اخته،،، حجت وهو اجه بأتجاهي مبتسم
وجاوب بهدوء
اي طالعه حلوه وتخبل
گلبي رف من سمعت صوته عيونه
صارت بعيوني ونزلت راسي،،،،
اجتي الي راح تصور
شوگ طبت وحجت انتبهت اله وجهه تغير
وحجيت بسرعه
مااريد اصور
لااا
جاوبني بسرعه وكمل
كلشي تريدي راح اسوي الج
انه مااريد اصور ماردت هذا الشي
اني اريده
جاوبني وامي الجانت ساكته حجت
يمه صوري،وياي حتى تظل ذكرى
سكتت وجنات كملت بضحك
اي احلى شي هي صور العرس كلما تضوجين
طلعي الالبوم وشوفي روحج شلون
جنتي وشلون صرتي
بعدين
هو ابتسم وظل ساكت
البنيه طبت وتوترت كلش لان هو كاعد
بالكرسي واني واكفه حجيت بسرعه
راح اكعد هنا
ماانتظرت جواب من احد رحت كعدت
وشفته صافن عليه نزلت راسي من خجلي منه
لا خاف ضاج من تصرفي
اي اكعدي هنا وهو يجي يمج وغطي
الكرسي مالته بالبدله مالتج
ضجت من حجت البنيه هيج وعاينت
اله شفته ساكت واي تعبير ماكو بوجهه اجه
ليمي وصار بصفي عاين عليه وجاب وجهه
عليه وحجه بهمس
غطيني بالبدله مالتج
گلبي كام يدگ بجنون من سوه هيج
وشفت اخته و اهلي كاموا يضحگون والبنيه هم
عيوني غورگت من شفته هيج سوه
مديت ايدي گوة وخليت البدله علي
باوعي علي وانت هم خلي عيونك بعيونها
شروق باوعي على بكر
سمعت شوگ حجت ورفعت راسي
شفت صافن عليه ومبتسم،،،عيوني راحت
لايده مدها ولزم ايدي بعدين عاينت اله
الله تخبل هاي اللقطه
المصوره حجت بضحك وكملت
يله اللخ بعد اريد ايدج بأيده
سوينا مثل ماگالت وانه احس بحراره
گبت بيه ووجهي صار احمر دم
غزل جانت واكفه يم شوگ وتعاين النا
اشرت الها
تعالي
اجتي مبرطمه وزعلانه
خليتها بحظني وحجيت وي البنيه
صورينا كلنا
كملنا الصور وطلع من يمنا
بكر
ماجنت اريد اروح لشروق بالكرسي حتى
يزفونا فهمت اختي واخويه فاروق اكعد بالسياره
وهي تجي يمي انطوه خبر لاهلها وساعه
بالتسعه طلعوها بزفه حلوه وهي مغطيه
ومايبين شي منها ،،،،،، اخويه ضياءواختي زفونا بسيارتي
الي اخذتها قبل زواجنا بكم يوم
علگو الجو بالسياره ووهوايه سيارات جانت
ويانا من اهلها واهلي،،،،
دحكت الها وهي لابسه الابيض
بالي راح يم اسيل شلون من زفونا وشفتها
بالبدله البيضه شلون ادحك عليه وهي تضحك
غمضت عيوني بقوه من تذكرت
روحي شلون جنت لازم ايدها بقوه
ومو مصدك هي صارت
اليه اخيرا،،،،
فتحت عيوني من سمعت اخويه حجه
مبرووك وشايفين كل الخير
ديربالج علي لبكوري وخلي بعيونج
تسلم اخويه
جاوبت اخويه ضياء بصوت ناصي واختي
كملت
مبروك بعد اختك شايف كل الخير انت
وشروق
تسلمين امل يوما لولدج
رديت على اختي واشوف بنتي ترگص وي
اخويه، ،،،،،،،،،،ظليت ساكت الزفه ماطولت
ساعه ورجعنا للگاظميه وصلنا وامل
وام عبدالله نزلوها قبلي طبت
ونزلت بالكرسي،،،
شروق
ردت اموت من الخوف توترت كلش
وحسيت بروحي راح اتخربط،،،،تماسگت گوه
ومن طبيت لغرفتنا لزمت شوگ وحجيت
بخوف
عفيه لاتعوفيني وحدي
ههه كان غيرج اشطر هم حجيتها لامي
وعافتني وحدي وي اخوج المفترس
متت بگاعي من سمعت ردها وهي غمزتلي
وكملت
لاتخافين عيني هي اولها بصل وتاليها عسل
امل اخته ضحكت وجاوبتها
واخويه شلون وگع بعسل يخبل ويضوي
مثل الگمر بليله ظلمه
ههه اخوج ليل وهي گمره
هذني يضحگن واني ميته بمكاني امل طلعت
دقائق وسمعتها تهلهل فزيت
لان عرفت بكر اجه
طب وعاين عليه وخله دگات گلبي
ادك بجنون لزمت الورد بقوه ودرت وجهي منه
من خجلي من صار يمي اخته حجت
مبروك وشايفين كل الخير
تسلمين ام يزن
صوته جان مخنوگ
من لزمت ايده حسيت بحرارتها
خلتها بأيدي وحجت
منك المال ومنها العيال ربي يبارك الكم
بهاي الليله ويتتمها على خير
جنات گالت امين هي وشوگ
اخته كملت ويا
بكر راح نطلع ونعوفكم وحدكم
هز راسه وعافونا وحدنا وطلعوا
عيونه جانت على طرف بدلتي
ساكت وصافن،،،،فرگ وجهه بقوه ودار وجهه
ليوره عاين علي وذب حسره
جنت اشوفه مو على بعضه متوتر كلش
من حراگاته دار وجهه عليه صفنت علي،جان
مطعون وصاير احمر دم،،،وعيونه
هم بس مغورگه حجه گوه
مااكدر كلش اسوي جاي اشوف اسيل
مكانج
حجه هذا الكلام ودار العربانه وطلع
من يمي
صفنت على الباب ودموعي نزلت
بهدؤ لزمت بدلتي بقوه وحجيت بقهر
كلامه طلع صدگ گلي گلبي لمرتي وبس
انهاريت بالگاع وكمت ابجي
بشهگه
ماذا اقول لقلبي الذي احبك
وعيني التي بگت شوقا لك
ماذا اقول لنفسي عندما احبت
قلبا لايهوى سوى روحا
تهيم حوله ولا تجعله
ينسى
فات الاوان اليس كذالك
لان قلبي بهواك قد
تعلق
السلام لقلبي لانه بعد ان احبك
لم يعد كما كان،،،،
يتبع
مساء الخير والعافيه
نوهت ماانشر بارت اليوم لان زعلت من وره قله
التفاعل والتعليقات القليله بس
قلبي ماانطاني من وره كم متابعه تعلق وتنطي
حق القصه بالتصويت والتعليق
احب اهدي هذا البارت الها ونظام التنزيل راح
يصير يومين نشر ويوم استراحه
لان جاي اضغط على نفسي
هوايه واتعب من وره الكتابه مااريد استعجل
بالقصه لان بدت قصه بكر وشروق
اريد انطيهم حقهم بالسرد والاحداث
اتمنى تظلون وياي وتشاركوني بالتفاعل
لان هذا اقل شي تقدموا لاي كاتبه مو بس اني
اتمنى لكم قراه ممتعه
دمتم بخير
وعافيه
اوتار حزينه