فــاطمة الـزهراء ..🤍
حـــمامة الشـــهم..🕊️
حــب وعــذاب.....🤍
ريـــِحانٍــة 🌿
ffaa22_
مابيه حيل اخذ نفس
ماعندي واهس للحچي!
من برا تلگاني ابتسم
من جوا اطگ من البچي
مابيه أكمل هالدرب
تعبان خلوني انتچي..
_______________________________
بيران ......
معشت شعري من الشال لزمت شعرها اني هم واضرب هيا تضرب واني اضرب وليث يبجي وكعت بالكاع وهيا فوكاي ضربتني ومخشتني لزمت ايدها ولويتها وكلبت نفسي عليها واصفك بيها راشديات واصيح
_ اموتجج انتيي وجهالج الوصخههه
وكفت عن الضرب رافعه راسي على الهورن القريب مني من فزيت هيا شنو سيارتمن الي طبت بينه
_ وخريي عني ولكمم يبوو الحكولي
ضليت كاعدة فوكها واباوع للسيارة وطلع منها شخص خلاني تجمدت دفعتني المراة بقوة وكعدت بس عيني ما شلتها صارت عيوني بعيونه خازرني حيل ومصدوم يباوع لحالي
ليث _ بابااااااا
ليث ركض اله فرحان وملهوف بشوفه ابو شاله شهم وحضنه حيل مغمض عيونه ويتنفس براحه ضليت جامدة ما كمت اباوع رجع شرجعه قبل السنه بعد ثلاثه اشهر يله يجي شعنده شراح يسوي بيه راح ينتقم لو ياخذ ليث فززني صوت المراة تصيح
_ انتهه رجلهاا ما تشووف مرتك شكد مستهترة تركض ورة جهال وتكتل بيهمم همه جهال واذا تعاركو شنو بس ابنها مكتول
وخر ليث عنه وكال يوخر بشعره عن وجهه _
شهم _ منو ضربك بابا
_ هداك وهاي عمه تتلت ماما
باوع علي ونتر بحدة_
_ كومي اوكفيي
وكفت بسرعه انفض بملابسي واعدل بشالي همست بصدمه _
_ شجابك
مال راسه بسخرية وكال _
_ السيارة
باوع علي المراة بعصبيه ونتر _
_ ايدج تنكسر اذا صدك مادتها على ابني ومرتي
المراة باوعت علي وعلى سيارته جان لابس ملابس دوامه لزمت جهالها وكالت _
_ لا هيج عرك جهال اعتذر عيني
ورحت بسرعه طبت عيوني ما شلتهم عنه كلبي ينبض بخوف منه تقرب يمشي بيده ليث وحجه بابتسامه مستفزة _
_ مصدومه بشوفتي موو ههههه عبالج خلصتي مني
ليث _ بابا لا لوح بعد ) بابا لا تروح بعد )
شهم باسه بخده حيل وكال _
_ ما اروح يا روح ابوك كام تسولف
سمعت صوت امي ورانه تحجي بصوت عالي _
_ هاذاا شهمم اجهه
عبرني وراح عليها هو وليث _
_ ها عمه شلونج
_ هلا هلا يمه شلونك شوكت اجيت
رحت عليهم واكفه اسمع _
_ والله اليوم الصبح وصلت
_ تعال تعال عمه طب يله بيران علش صافنه
باوعلي نضرة استحقار وطب حسيت بخنكه بوجودة طول هل فتره جانت حياتي هادئة وهسه حسيت كلشي انگلب كلشي انعاد طبيت للبيت وراهم روحي مسلوبه يا ترة شراح يصير شراح يسوي
كعد على التخم وامي بس تحجي وكل شوية كومي جيبيله مي كومي سوي هيج
اولغا _ وين جنت يمه ليش كل هل غيبه
_ والله بعد شغل شنسوي
ليث بس مجلب انتبهت على شهم يلعب بشعر ليث ويحجي باوع علي وهز راسه احسه مستعجل على شي
شهم _ مرة خصتج عمه عندي فد كلمه ويا بيران خلي ليث يمج بين ما نخلص
بلعت ريك خايفة ومتوترة امي بسرعه كامت ماخذة ليث وتحجي
_ اخذ راحتك عمه هاي ليث يم بيبيته مو ليوثي
_ امم بيبي
شهم كرص خده وكام ماشرلي براسه ضليت كاعدة مسوية روحي مغلسه عود مادري
اولغا _ كومي بيران رجلج يريد يحجي وياج كومي لغرفتج
خزرت امي راح هو قبلي صعد ماخذ راحته الاخ هواي فركت وجهي بحيرة
_ كوميي شبيج
_ ماريييد
_ وج كومي يمه رجلج صار هواي ما شايفج يجوز عنده شغيله وياج
وتغمزلي شوف هاي عبالها صدك ازواج عاديين تنهدت بتعب وكمت صعدت رحت لغرفتي وطبيت كاعد على الجرباية وفاتح رجلي مسلطن _
شهم _ ماخذة الدور زين والله حتى جرباية ليث وصورة هنا كلها
سكتت اباوعله نضرات باردة شكد اكرهه شكد مستفز _
شهم _ شجابجج هناا منو سمحلج تتطلعين من البيت نجمه وين بيتنه ليش فارغ تره ما صار جم ساعه من وصلت وكلشي ما فاهم غير لكيتج هناا
عضيت شفتي حييل متوترة شكله هاذا خاف احجي وينجلب علي غمض عيونه بعصبيه وكام رجعت ليورة بخوف لزم زندي حيل وجرني يحجي بحدة_
_ شنو خرسيتيي ورايي ليش متحجين نجمه وين
_ همم هو شـ شوف نجمه ...
_ اي
غمضت عيوني بخوف وفتحتهن ماكدر احجي هيج يوترني ويخوفني جرني وراه حيل وكعدني على الجرباية وكال _
_ شوفي تره مالي خلكج هسه ولخلقج احجي بسرعه شجابج هنا وينهم اهلي
_ ش شهم شوف
_ اي اي جاييي اشوووف
_ شبييك مو شوف
_ استغفرالله احجي
_ من رحت وكلت راح ادزلج واحد اسمه سلام مو
_ اي وصار عنده شغل الولد ودزيت غيرة
_ اي مو وصلني يم بيتك وراح
_ اي ليش تنكطين بيهن تنكطت احجي ولج
_ اي شوف مم مو دكيت بالباب ومحد طلع الباب مقفول وضليت هواي ادك على نجمه وما ترد
عيونه بيهن خوف وقلق يراقب كل كلمه اكولها _
_ ايي كملي
_ اي ردت اروح لبيت عمك بس انته منعتني مو
_ اي
_ فجيت لبيتنه وضليت هنا وماكو نجمه مارد فتذكرت عمتك مريم عندي رقمها خابرتها وكالتلها على نجمه وين هم ما تدري كتلها انطيني رقم عمك هم خابرته وكتله كلشي بس هو كال اني مالي شغل لا بشهم ولا بيهم
_ همم كال هيج
_ اي وكال ميار اخذت نجمة وراحت لبيت اختها بعد ما كالولك
_ كايليلي ***** بيهم
_ اي شوف اني حاولت اتصل بعد بي جنت اخاف على ليث اخاف ماكدر اله بس هم ما رد علي فبعد ما اتصلت انتضرت جيتك وكملت حياتي طبيعي اني وليث بس بعد جم شهر اتصلت علي نجمه
_ اييي وينها
عضيت شفتي ادير بعيوني يعصر بذراعي حيل وينتضر الكلمه مني نتر بيه بعصبيه _
_ ولج دحجييي
_ شوف شهم مو تعصب علي اني لان ركز مالي شغل
_ خرب ****** راح اخنكها وج احجي
_ ها اي اي ما حجت وياي هواي ولا كالتلي وينها بس كالت احمم ت تزوجت
فتح عيونه بصدمه حيل وارتخت ادي من زنودي وجهه صفر ونفسه صار عالي همس بصدمه _
_ ت تزوجت
_ فصليه
ما لحك يستوعب لزكته بصدمه اخرة صرخ بيه حيل جفلني _
_ شجاييي تحجييين شنوو فصليه وج شنوو وينها
ضميت وجهي بخوف احجي بسرعه _
_ والله مالي شغل والله مالي شغل
عافني وطلع معصب يسحب بموبايله يريد يتصل عضيت اصابعي شراح يصير لحكته بسرعه وره ليث بس شافه ركض وراه
_ بابااا لا تلووح
باوع علي وعض شفته يحجي بعصبيه بس يريد يسيطر على اعصابه _
_ بابا حبيبي هسه اجي اجيب عمه نجمه واجي مو
_ لاا تعوفنيي مالييد
رحت شلته بسرعه اهز بي واحاول اسكته _
_ هسه راح يجي شوف راح يجيب عمه نجمه مو تحبها
_ الوح ويا
شهم _ سكتي
كال هيج وراح بسرعه امي ضلت تسال شكو عبالها تعاركنه كتلها درة باخته رايحه فصليه ضلت تلوب تكول هسه تصير عركه واخاف علي هاي امي شبيها ليش تحبه _
شهم ......
صعدت بالسيارة فاير وگلبي مشتعل نار نجمه متزوجه بدون علمي وفصليه المن انطوها فصليه اذا عمه ال**** ما اله شغل بيهم المن قبل اسبوع اجانه قرار ننزل قبل الموعد ونزلنه كبل رحت للبيت مالنه تفاجأت بي مقفول جنت عبالي يم بيت عمي رايحين اتصلت على نجمه ما ترد على ميار بس هاي ما اتصلت عليها رحت لبيت عمي ما لكيتهم بس كالولي مو هنا ما حجو شي غير انهم مو هنا خابرت نفس الولد الي وصل بيران وليث وينهم كال من كتلي وصلهم وديتهم لباب بيتهم ورحت الغلط كله غلطي ما جان لازم آمن هلكد واعوفهم شلون انسه منو عمامي شلوون ضربت السايرين بقوة وعصبيه
موبايلي رن ومحمد جان المتصل _
_ محمدد لازم تجي بسرعه محتاجك
_ شهم لازم اكلك شي مهم
_ وكتهااا هسه اكلك نجمه ...
_ هيا على نجمه عرفت نجمه تزوجت فصليه
_ ادري من ***** بس لا اعرف منووو
_ اعرف منو تعرف بيت الشيخ فاضل الله يرحمه
_ ايي
_ منطيها لابنه رائد الجبير
_ شلووون
_ اي
_ ش شلون ولك شمدريك مستحيل رائد ههه اصلا منوووو منطيهاااا
_ امها
_ شنو ميار شلون انطتها
_ ميار متزوجه شهم وابن رجلها داعم اخو رائد ومنطيها لرائد فصليه
لزمت راسي حيل اعصره عقلي ما جاي يستوعب بعدني ما كايل يا الله تماطرت علي الصدمات ميار شوكت ازوجت وشلون تتجرا تتزوج شنو متت من انطت نجمه بكيفها هاي هيه ميار انتي الي جنيتيها على نفسج
لفت سيارتي بسرعه واتجهت لبيت رائد ما جنت متوقع ابد رجال مثل رائد هيج يسوي طول عمري عرفته محترم وادمي شلون يقبل بوحدة بكد اخته الزغيرة مراة اله ولا وهو متزوج اديه كامن يرجفن اخاف ما الكاها اخاف لا سامح الله ما تحملت وصار عليها شي اكيد مجوعيها اكيد ضاربيها امانه ابوي انه فرطت بيها شلون اعوفها يم ميار وأمن شلوون خرب روحي نجمه شخصيتيها ضعيفه وفقيرة مستحيل تتحمل احد يقسة وياها تنهار ياربي ياربي بيا عين اطلب منك وانه اعصيك وما اصليليك ياربي يا الله اريد نجمه منك ياربي كون ما بيها شي ياربي
هديت نفسي كوة واسوق بسرعه بس اريد اوصل واول مرة بعمري هلكد ادعي ربي يحفضها ولا يلجم گلبي بيها هواي طولت يله وصلت واضطريت انزل اعبي بانزين وكلت لمحمد يتلكاني هناك
لليل يله وصلت وكفت بابهم ونزلت خليت سلاحي بخصري ونزلت ما اشوف دربي محمد ما واصل دفرت الباب برجلي حيل اصيح _
_ اطلعووو مخانيييث
دفرت حيل دفرة دفرتين ضوه سيارة وهورن وراي صار التفتت نزل محمد بسرعه همين سمعت صايح من جوة يصيحون شكو
صرخت حيل ادفر _
_ افتحووو الباب لا اهجمه فوگ روسكممم
محمد لزمني وكال _
_ على كيفك خلينا نفتهمم
انفتح الباب شفت اخو سنان ركضت علي ولزمته من ركبته احجي واعصابي ترجف _
_ **** م**** اذبحكممم وعلييي نجمهه وييين
_ شبيك وخر مني شعلي بنجمه جوة
دفعته حيل وكع ليورة لازم ايده لان وكع عليها طبيت للبيت وضربت فوگ بالمسدس النسوان كامن يتعايطن صرخت بصوت رج البيت _
_ نجمةةةة
نزل رائد يركض من الدرج وجهه مصفر ركضت علي وضربته بوكس قوي وكعه للكاع _
_ كلب ابن كلب هاي تاليه ثقتيي بيييك
لزم حلكه متوجع وكام يحجي _
_ شبييك هو هيج الحجي اوكف خل افهمك
رجعت علي محمد واكف متجتف يباوع لزمته من قمصيه وكلت بحدية _
_ نجمةة وييين
_ فوك
ضربته براسي على خشمه غمض عيونه بوجع ودفعني وصاح _
_ نجلبتتت كلتت خل افهمككك
_ ***** بيكم انته وعشيرتك نجمهه ويين وخرر
دفعته اريد اصعد لزمني وكال يتنفس بحدية _
_ اروح اصيحلها شبيييك تره ما ماخذ روحها بس لحضه
محمد لزمني وكال على كيف _
_ على كيفك شوية يمكن ما بيها شي شبيك هسه تجي ونشوف
رائد _ خرب روحك شهم كسرت خشمي
_ امشيييي صيحهاا
استغفر الله وصعد وجهه محتقن باوعت عليهم نسوانهم خاتلين باخير الصاله خايفين وسنان واكف متجتف يم الباب غمضت عيوني اسيطر على عصابي انتضرت فترة فتحتهم من سمعت صوتها يرجف
_ شهم
باوعت على الدرج بسرعه نزلت تركض وراها رائد شي بارد نزل على گلبي من شفتها كلشي ما بيها نزلت الدرج ركضت عليها وضميتها بحضني حيل مردت گلبي من بجت حيل وتحجي
_ وين عفتنيي ويين
_ اشش يروح شهم ما اعوفج بعد
_ اخذنيي منا لا تعوفني ماريد اضل
وخرتها عني اتفحص وجها كلشي ما بي لزمت اديناتها ادور خدش زغير حتى اموتهم هسه لزمت وجها احجي بقلق _
_ ضربوج ها اذوج سوالج شيي ؟
نفت براسها تبجي حجت بشهكات _
_ كلشي ما سولي عمو رائد ما سوالي شي حماني منهم وكالي انتي امانه حتى لا تحمل علي حقد خلاني بعيونه بس اخذني منا مارييد اضل
باوعت على رائد واكف وراها ويباوع بقهر غيونه صارن حمر وحلكه يرجف لزمت ايدها وكلت _
_ يله وداعتج اندمهم واحد واحد
جريتها وياي وكفت من لزم ايدها رائد يكول بصوت يرجف وغصه _
_ نجمة
جرت ايدها بسرعه تبجي جلبت بيه وكالت _
_ اخذني منا ماريد اضل
رائد _ شهم ..
شهم _ بعدين رائد بعدين
جريتها وياي حاضنها على جهه ومحمد ورانه بس نجمة جانت تبجي حيل وتباوع وراها طلعنه من الطارمه وصعدنه السيارة طلع رائد واكف وجهه متروس قهر وحزن يباوع بحسرة _ هيا باوعت علي وبجت ودارت وجها وغمضت حيل تبجي عضيت شفتي حيل ولزمت ايدها احجي _
_ كافي يروح اخوج كسرتي گلبي
_ لـ اهئ ل ليش رحت وعفتني بايدهم ليشش
هزيت راسي ساكت وكلت _
_ صوجي صوجي
حركت بالسيارة ومشيت ابد ما حجيت وياها جانت منهارة كلش والطريق كله تبجي كرهت روحي وتمنيت لو ميت قبل لا اعوفها ويا ميار الك****
حسيتها سكتت من البجي باوعت عليها ولكيتها نايمه مديت ايدي عدلت راسها ومسحت دموعها _
ما جان عندي فكر وجنت حاير اريد الكف ميار واريد اروح لعمي الكواد بس بنفس الوقت ماكدر اعوف نجمة وحدها اتجهت كبل لبيت بيران طولت بس اريد اخلي نجمة يمهم هو احنه دكومنه يمهم اباوع عليها وافكر اذا صدك محد محاجيها وصايرة بامانه رائد ليش هلكد تبجي ومتاذية انا اعرف رائد ولو ما اعرفه جان ما صدكت ب نجمه من كالت محد اذاني لان اعرف كلش زين امه هواي شافت ضيم من اخذوها فصليه ويكره شي اسمه فصليه بس ما جاي افهم ليش هلكد تبجي معقوله متاذية مني انا ؟
للفجر كلش وصلت لقريتهم ونجمة نايمه رفعت الموبايل واتصلت عليها اهوو شيكعدها هسه هاي خمس مرات اتصلت يله جاوبتني كوة تحجي
_ ها
_ اطلعي
_ ماكوو شنو
_ شنو
_ شسمه نوم نوم راح تصبح على خير
_ استغفرالله اطلعي بالباب انا
_ زين زين يسلم عليك
صرخت بأعلى صوتي بعصبيه _
_ اكعديييي
نجمة شهكت وكعدت تباوع بصدمه وخرت الموبايل بسرعه ورجعت راسها احجي بهدوء _
_ نامي نامي ماكو شي نامي
غمضت عيونها ونامت بسرعه حجيت بين سنوني _
_ مو احجيي وياج صحيتيي
_ ها اي اي شكو ليش تصرخ
_ افتحيلي الباب جبت نجمة
_ اي اي بس لحضة
تنهدت بتعب اباوع عليها يا ترة شوكت ارتاح بحياتي ؟
باوعت على بابهم انفتح وطلعت تباوع دك عين وشالها لافته صفح اشرتلها ترجع للبيت رجعت واكفه بالباب طلعت ورحت على نجمة شلتها بين اديه وطبيت فتحتلي الباب تحجي بقلق _
_ شبيها يعمري شبيها
ما رديت عليها احس كل خوفها وقلقها جذب _
بيران _ صعدها لغرفتي لغرفتي
صعدت للدرج وطبيت غرفتها خليتها على الجرباية وغطيتها _
بيران _ شكو شكو احجي شبيها منو ما..
_ اششش انحليتيي
_ منو ماخذها
_ مو شغلج باجر اجي اخذهم ديري بالج عليها اذا سالت علي كليلها صار عنده شغل موو
هزت راسها نترت _
_ موو
_ هااا اي اي خوش
باوعت على ليث نايم بجربايته كمت علي ودنكت بسته حيل اوخر بشعره شطوله صاير شعره باوعت عليها كاعدة على الجرباية وتغفي _ كمت وكلت ببرودة _
_ رايح انا تعالي سدي الباب وراي
فتحت عيونها بسرعه وكامت وراي نزلت بسرعه وطلعت ما باوعت عليها بس سدت الباب ورحت بسيارتي _
كل عقلي تمركز يم ميار اريد بس اوصللها واخنكها باديه هاي المراة گ**** ما توب شكم مرة غلست عنها لخاطر نجمة واكول تبقة امها ما احرمها منها رغم اشوف كلشي بعيني شلون ما مهتمه بنجمة ولو شوية بس ما اكسر خاطر نجمة متحملها بس ترووح تنطيي نجمة بهاي الطريقة البشعه بس بمجرد ما غبت عنها شوية ارتاحت ست ميار وكامت تتصرف بكيفها بس لا ميار اليوم نهايتها على ايدي
هواي اتصل علي محمد وما جاوبت ادري بي راح يلزك وانا مالي خلك
وصلت بغداد ورفعت موبايلي واتصلت _
_ ها سلام
_ سيدي ب**** منطقة ***** بيتهم سيدي
_ عاشت ايدك اشكرك
_ واجبي سيدي
طفيت الموبايل وهزيت راسي متوعد انا أعلمهم المنطقة جانت بعيدة وطولت يله وصلت هاي من نزلت ما مرتاح ولا شوية صارلي افتر يومين على نفس الفرة باوعت على الصورة بالموبايل نفس البيت اخذت مسدسي ونزلت الباب جان زغير ومو قوي دفرة وحدة دفرته وكع عود خل تفيدكم النزاكه
وجهت مسدسي على الشبابيك ورميت تطشر الكزاز رحت عيوني تطافر شر ضربت يدة الباب بطلقة ودفرته طبيت اباوع بسخرية كاض ابنه ونايم بالكاع رحت علي دفرته حيل وكلت
_ كوم خنييث كوم واجهني لا تصير جبان
_ سيدي سيدي مروتك ما مسووين شي الله ينطيك عوفنه
يحجي وحاضن ابنه حيل لزمت ركبته وكومته وخنكته احجي _
_ ميار ال**** وينها
_ عوفني عوفني ما اعرفك عوفني
ضربته بوكس بقبضة ايدي على حلكه راد يوكع رجعت لازمه وبس اسمع ابنه يتوسل وراي _
_ ما تعرفنيي موو بس تعرف تطلع ابنك من خيسته باختييي موو تتصرف بكيفك وتنطيي بكيفك اخذذ روحكك اليووم ميااار وييين
حجة بصعوبه لازم ايدي _
_ ما ماعرف ماعرف بيها اختك والله مو اني انطيتها ميار والله
_ وانتهه مااا كلتت باطلل كمتوو تلعبوون بيها بكيفكممم احجييي ميارررر وييين
_ ميار مريضة والله راح تموت والله
رجعت ضربته حيل وكع بالكاع ضربته بطرف بسطالي على حلكه وكع صرخ ابنه يحجي بخوف _
_ جوة جوة ميار جوة الله يخليك عوف ابوي عوفه
دفعته عن رجلي ورحت افتح بالغرف جانو ثلاثه غرف فتحت الاولة ماكو الثانية لمحت نايم تقربت بعصبيه بس بطأت حركتي من انتبهت مغذي معلك الها ضعيفة حيل وشعرها ماكوو ؟؟ صلعه لا حواجب ولا رموش وجهه اصفر بطريقة مرعبه اعضام خدودها مبينه وكوة تتنفس مخليلها جهاز تنفس راسي افتر شصاير هاي شبيها مو جانت شعرضها وجها احمر شصارلها
زهير _ مريضة والله طلعت مريضة بالسرطان قبل لا نتزوج بشهر وسالت حالتها كلش ما خليت دكتور يعتب علي وما وديتها ونفس حالتها تعبت بالكيمياوي وماكو تحسن والله الدكتور كال اذا عاشت بعد شهر زين
باوعت على بسخرية يبجي ضميت مسدسي بخصري وكلت ببرود _
_ طبها طوب وعساها ما كامت وانته لا عبالك سكتت عنك ابنك راح يضيع مثل ما ضيعت اختي وشغلك الي نصه فساد راح يوكعك انتبه زين وراقب شهم شراح يسوي
طلعت مصدوم وراسي دايخ معقوله ميار تعاقبت عن الي سوته بهاذا العذاب كلت اول ما راح الزمها راح اعذبها واموتها راح اخليها تتندم على كل الي سوته بينه بس انصدم بيها هيج ميار الي كضت عمرها لا صلاة ولا صوم كضت عمرها بالزنى والمعاصي هاي نهايتها كعدت بالسيارة وصفنت هو هيج البشر ؟؟ مايدري شوكت الله ياخذ امانته مايدري شوكت يروح من هاي الدنية وهو ما تايب ولا مستغفر يموت والله ما راضي عنه معقوله تكون نهايتي هيج قبل لا اتوب لربي ؟
لزمت راسي بوجع اتصل محمد جاوبت بتعب _
_ ها محمد
_ انته اكو عقل براسك شلون تروح هناك وحدك مو جاي اصخم علييك واتصل
_ ماكو شي انحلت
_ اي كلشي ماكو عندك انته كلشيي ينحلل
_ محمد ...
_ شكو
_ ميار
_ شبيها ؟
_ بيها سرطان وما باقي جم يوم وتموت
صار هدوء سمعته تنهد وكال _
_ مقهور ؟
ضحكت باستهزاء وكلت عاصر ايدي _
_ انقهرر ؟؟ انقهر عليها بشرفك انا اتمنالها الموت اليوم قبل باجر
_ لا تجذب شهم تبقة امك
_ كافي يا **** مو امييي هاي مو اميي
_ خلص اسف كافي
_ يله باي
_ الله وياك
سديت الموبايل ومشيت بالسيارة حسيت رجلي فركسن من البسطال وعيوني غوشن من التعب من اتلكاها من نجمة ميار عمي منين كلها ملتمه علي خرب روحي _
بيران .....
من الصبح فززتني نجمة تبجي حضنتني وتبجي شكد حجيت وياها تفهمني شكو ماكو بس كالت ( خذلني بيران راح اموت ) بعدها شوية شوية هدات وفهمت منها متزوجة فصليه من رجال يعرف شهم اسمه رائد وبس تبجي انقهرت عليها اكلها ضربوج تكول لا تعذبتي وياهم تكول لا لعد شبيج ما بيه
بعدين امي حجت وياها سكتت شوية وليث اجه عليها وديتها للحمام سبحت وبدلت وكعدت بغرفتي عيونها مورمه
_ هسه يا عمري مو جابج وانتي تكولين كلشي ما مسويلي كافي
_ ما تفهمين بيران ما تفهمين
_ كافي يعمري هسه حته دا اكول جذب معذبيها مجوعيها اشو صايرة هل سمنج والخدود حمر
كلت هيج اضحك ابتسمت حضنتها وكعدنه ساكتين حجت بصوت ابح _
_ اخوج رجع
_ اي
_ وين مرته خطيه بتول
_ مو هنا زعلانه منه
_ خطيه
مبينه ما الها خلك تحجي ولا سألت عفتها وحدها ونزلت يم امي تسوي غدة وكفت يمها اكل من الطرشي وصافنه
_ شبيج بيران يمه
رفعت جتافي _
_ مادري يمه هسه اني شنو شوكت اتطلك من شهم
_ يا عزة ليش تطلكين يمه شبي
_ يمه يا شبي ترة زواجنه صار هيج اجباري مني اني توسلت بي حتى اخلص من سرمد
_ ميخالف يمه انطي النفسكم فرصة شهم خوش رجال
_ ممم كلش
_ جنج ما مقتنعه
_ يمه ما تدرين بالمضموم انتي
_ يا وشمضموم
_ هيج يمه بافل شكال الصبح
_ ما كال شي يكول راح اعزمه على العشة لازم نحجي
تنهدت بضيق شنو نهاية هاي السالفه يا ترة _
اولغا _ اوف والله مختنكه على بتول شوكت ترجع عاد
_ بافل كال من ارجع ارجعها
_ بلكت تقتنع ليث وين
_ يم عمته
_ خطيه هل بنية شكد مهضومه شلون صارت
_ شوية احسن سكتت انزلها جوة ؟
_ اي نزليها على اوا خل تنزل تتغدة هم
_ اي خوش
رحت على نجمة وبالكوة قنعتها تنزل تكول اريد انام وهيا من البارحه نايمه نزلتها وتغدينه سوية وليث طيار بشوفتها حتى عافني الخاين بعدين سويت روحي ابجي جذب اجه علي رضاني اموت على سوالفه
نجمة بس خلصت اكل صعدت والدمعه بطرف عينها لعد شكد متأذية غسلت المواعين واني افكر بالكت شهم يعوفني بحالي والله ما بيه حيل _
لليل اجه بافل جان كلش ضايج رايح على بتول وما جاية وضايج لان خاف اروح تعلق بليث وعود ما يكدر على فراكي لعد شلون عفتني سنه شكد جذاب اصلا اني ولا مسامحته ولا احجي ويا غير العرگ لسه وجهي ثكيل علي لان اني مخليته هو سبب كل الي جاي يصير بيه
جنت صافنه على التلفزيون حسيت بيد على شعري يوخر بكذلتي باوعت على بافل عيونه مدمعات رمشت مستغربة _
_ شكاعد تسوي وخر
كال بخنگه _
_ راح ترحين ويا شهم مو
حبيت احرگ كلبه باوعت بتكبر وكلت _
_ لعد غير رجلي اروح ويا
لزم ايدي وكال بنبرة حزينه يحاول يقنعني _
_ انتي مو كلتي مجبورين خلص اطلكج منه وضلي هنا شعندج رايحه شبعد ها
_ شبيك انته صاير حنين
نزل راسه وكال يتنهد _
_ لسه زعلانه مني انتي لسه ما رضيتي علي ترة مشتاق الكعداتنه سوة ولسوالفنه ليش ما نحجي ابد بس نتعارك بيران
نترت ايدي منه وكلت بعصبيه _
_ اسال نفسك على شنو تزوجت شهم مو من وراك مو بسببك شعندي ويا شهم انيي ليش احتمي بي مو عندي اخوو ليش لعد اذا هلكد تحبني وتعزني ليش رحت ها
_ اسف بعد...
قاطعته وكمت بعصبيه _
_ لا تحجيي وياي خل تفيدك صخماء
_ صخماء العزة
عفته وصعدت فوك فايرة _
دخلت غرفتي بعصبيه نجمة فزت تباوع علي بحضنها ليث تحجي ويا كالت باستغراب _
_ شكو
_ ماكوو شي
_ مبين
گلبت عيوني مطنكرة باوعت على ليث بحضنها كلت بعصبيه _
_ عفتنيي موو بعد متحبني
نجمة ضحكت ما مصدكة _
_ شبيج يمعودة
خليت ايدي على عيوني وبجيت بقهر مادري شبيه حسيت روحي حايرة ومنضغطه الله واعلم شهم شراح يسوي بيه مستحيل يستسلم هيج ويعوفني ونوب بافل قهرني لان من وراه اجت علي تحجي بقلق _
_ شبيج بيران عليج الله شكو
_ ماكو
حجيتها ابجي اجه علي ليث مبرطم وخر اديه عن وجهي _
_ اثف ماما والله بعد ما أئوفج اثف
حضنته ابجي وخرته عني وكلت اعدل بشعره _
_ اسفة اني هم ما قصدي اصرخ عليك من وره نجمة
_ يا شعلي اني
باسني بخدي وكال _
_ الوح مم حالو ( اروح يم خالو )
_ روح يعمري دير بالك لا تكع من الدرج
_ لا اعلف اني ( اعرف اني )
طلع من الغرفه يركض تنهدت امسح دموعي كعدت يمي نجمة وكالت _
_ شبيج ليش بجيتي
_ ماريد ارجع لشهم نجمة شهم يكرهني عباله اني تعاونت ويا غيد ويكرهني والله خايفة منه يريد يعذبني
تنهدت بحسرة وحضنتني تحجي _
_ لا انشالله ماكو شي ميسويلج شي
_ ههه ميسويلي لج هوه بس من يباوع علي يخزر ويتواعدلي شلون لو ضليت ويا والله احلفله مالي شغل مالي شغل ميصدك
_ الله كريم
تحجي منزله راسها فزينه من سمعنه هورن برة باوعت عليها وبلعت ريك _
_ هاذا اجه
_ ايي شوفي من الشباك باله
رحت شفت من الشبآك وصدك هوة وبافل طلع علي سديت البردة اكمز واحجي _
_ ماريد اروح ماريد شوفي اني راح اكله نتطلق وعود اذا اجه يكتلني العباس عليج احجزي
_ ماشي
_ يبوو يبوووو
ضلينه كاعدات فوگ لحد ما صعدت امي وكالت انزلي انتي وليث نجمة تستحي من بافل ما نزلت نزلت شايله ليث اباوع علي وادعي ربي يعوفني بلكت هسه يكول لبافل نتطلك _
اول ما نزلت باوع علي جان كاعد على التخم وفارگ رجلي ومرخي ضهره ليوره واصابعه على شفته نضراته مادري شلونها ابد مو مريحه وخرت عيوني عنه وعفت ليث راح عليه ركض وجيت بحضنه كعدت على التخم الي يصير كرسي وحده ما اباوع علي
بافل _ ما صحتلنه فرصة نتعرف وانشالله منا وجاي نتعرف ونعرفك كلش زين
باوع علي بافل وكال _
_ للاسف ما كدرنه بعد كالولي شارد
بافل احتقن وباوع علي گلبت عيوني عنه عود معصب مني لعد انته مو شارد _
بافل _ بس رجعت كدامك اني تكدر تعرفني زين هسه
_ مم تشرفت عيني ام ليث يله نروح احنه
رفعت عيوني متفاجئة منو ام ليث اني ام هم ضلت تباوع علي وبافل بلعت ريك وكلت _
_ ها
شهم _ شبيج حبيبتي يله روحي على نجمة خلي تحضر نفسها
ضليت صافنه علي مترددة شروح اني ما اريد اروح اني دغتني وكالت _
_ يحجي وياج رجلج شبيج
بافل _ شبيج عمري ما تريدين ترحين
جان يكولها بلهفه ينتضر ردي لو بس احجي كلمه ميخليني اروح كلت لازم اكول البافل خلص شلون اروح برجلي للنار باوعت علي شهم خازرني _
بيران _ اء ن نكدر نحجي كلمتين شهم
رفع حواجبه بسخرية وكال _
_ ليش لا عيني ام ليث
خله ليث يم امي وكام اشرتله على غرفة امي لحكني واني گلبي يرجف حيل بخوف _
طب للغرفة وراي وسد الباب التفتت افرگ بايدي ارجتة على الباب وجتف ادي يباوع علي ببرود اخذت نفس وكلت _
_احم شهم
_ نعم
_ شوف ا انته انته تدري على شنو تزوجنا مو
_ طبعا شلون ما ادري غير الاميرة الجميلة واقعه في حبي
زفرت بضجر وكلت بهدوء _
_ شهم تره ما جاي اتعارك وياك والله خلينه نتفق
_ ليش انا هسه متعارك غير جاي احجي ويا مرتي
_ سرمد تزوج
_ الف مبروك
_ و و وهسه يعني عادي نتطلك بعد ما اله شغل بيه
_ هاا صدك
عصبت من برودة وسخريته مني كلت بنتره _
_ شهم فدوة
اتجه علي يمشي ومبتسم ابتسامته المستفزة _
_ عبالج كلشي يمشي بكيفج
_ حتى بافل رجع واحاجي يرجعلك كل فلوسك الله يخليك شهم خلينه كلمن يمشي بدربه
ضحك وحك شواربه عضيت شفتي هسه ينفجر بوجهي هز راسه ومنزل شفته لي جوة راضي _
_ يوم عن يوم جاي اتفاجئ بغبأج حبيبي يعني انتي خططتي وتعبتي حتى تتزوجيني ومن شفتي شهم مو مثل ما تريدين كلتي هاي هيه اعوفه ميفيدني الكه غيره مو
_ لا انته ما كاعد ..
_ اششش
كالها وخله ايده على خدي فزيت ليورة رجعني بقوة وكال يضغط على وجهي _
_ بكيفي وبمزاجي اخليج ترحين من يمي اطلع كل دقيقه فكرتي بيها تخدعيني وبعدين افكر ارجعج
دمعت عيوني بخوف وصارت غصه بلعومي همست _
_ والله مفتهم كلشي غلط
_ هاا غلط غيد من شردت غلط ومن لكيت اوراقهم باغراضج غلط ومن سمعتيني ذاك الحجي غلط كلشي غلط لان انتي ست بيران مو لازم تكونين بريئة وكلها غلط
_ عوفني ما اضل وياك اصلا كلت لاهلي زواجنه اجباري وبافل كال اطلگج
ابتسم وعض شفته غمضت عيوني بألم من يضغط على وجهي باديه _
_ بافل ما غيرة اخوج الي خلاج تفترين بالبيوت تشتغلين خدامه هسه صار عزيز
_ معليك انته اخوي واني راضيه اخخ
صحت من نبت اضافره ورة اذني وجهه قريب من وجهي حيل _
_ صلافتج هاي والجرأة انسيج ياها من تجين يمي وحك عيونج الجذابات
_ وخر عني ماريد ابقة يمك شنو كوة
_ كلتيلي بافل اخوج امم زين انا ما اطلگج اذا تريدين تطلگين ادفعيلي مهر **** مليون
سكتت لازمه ايده اريد اوخرها ما يوخر _
_ ادفعلك معليك
_ الضاهر انتي ميفيد وياج اله هاذا الاسلوب خوش
همس باذني يحجي بخبث _
_ اخوج خوش محلات عنده بس حرامات يروحن بطكه اصبع مني
باوعت على محتقنه بلعت ريك ارمش ما مستوعبه _
_ ش شقصدك انته
_ انا اكدر اسوي كلشي وما اخلي احد قذر مثلج وخبيث يروح هيج بدون انتقام لج والله باتصال واحد مني اتحداج هسه تلكين اخوج يشك بهدومه على محلاته
همست بغصه _
_ حرام عليك
ابتسم ومسح دموعي يحجي باستفزاز _
_ شش حبيبي على شنو هل دموع ما بيها شي رجال رايد مرته يمه
وخرت اديه عني اباوع وصدري يصعد وينزل بعصبيه وقهر _
_ ماريد ابقة يمك ماريد انته واحد قاسي وشرير
_ اخرب على الفهاوه شريرر ؟ اووي
خزرته عصر فگي بايده وكال _
_ عيونج ما يخزرن منا وجاي لا اطلعهن
_ وخر عني اكرهك
ابتسم وشال ايدي باوع عليها وعصرها وكال _
_ تخافين مني ؟ هههه من ضربه زغيرة خفتي مني ؟
سكتت اباوعله بحقد وهو مستفز بابتسامته شال ايدي يم حلكه وباس اصابيعي سحبتها منه بعصبيه رجع لزمها وطعج اصابيعي ليوره شهكت بوجع سد حلكي وهمس يم اذني بحقد وهو يعصرهم _
_ وحك عيونج راح تشوفين الاسوء منه
دفعني لزمت ايدي بوجع وكعدت بالكاع شايغة روحي لزم ذراعي وكومني نتر بيه _
_ اشش كافي بجي تطلعين منا طبيعيه وتكولين اريد ارجع ويا زوجي وتمشين مثل الحبابه
_ عليك الله عوفني
_ ***** اذا عفتج
باوعتله بقرف مشمازة روحي منه ومن فشايرة _ دفعني وكال _
_ يلهه
مسحت وجهي وهزيت راسي احجي _
_ ماشي يا شهم بس خلي ابالك كل الاذية الي جاي تسببها الي راح ترجع عليك والله ما يضيع حك مضلوم
_ ديله ولي
طلعنه من الغرفة وهو ولا يمه مبتسم ولازم ايدي باوعت علي بافل عيونه بيهن عصبيه بس ميكدر يحجي _
بيران _ يمه اني راح اروح
اولغا _ يمه فدوة اروحلج الله وياج يا روحي
كالتها بقهر بافل خازرني بعصبيه صعدت فوگ ونزلت دموعي طبيت للغرفة وفزت نجمة واجت علي _
_ ها شكو
_ نجمة والله تعبت يعني شنو هيا گوة توسلت بي يعوفني شوفي سوه بايدي يهددني باخوي اذا ما اجي يعني بس يريد يجيبني يمه دا يعذبني
سكتت تباوعلي بحزن _
نجمة _ لا تبجين
_ شنو ما ابجي نجمة ماريد اروح ويا
_ هسه هو وينه
_ جوة
_ راح نروح
_ اي خلي الم اغراضي الله لا يوفقك يا شهم
طلعت الجنط وبديت الم باغراضي انوب بافل كوم علينه الغراض والملابس كلهن لميتهم ما خليت شي صارن اربع جنط وجنطه ليث رحت بدلت ملابسي ولبست الجبة والشال نجمة همينه بدلت مني وكعدت امي اجت وكالت _
_ نجمة حبيبتي شهم يكول خلي تنزل دا نروح
_ اي خاله
طلعت من الغرفه بقينه بس اني وامي ابتسمت بوجها ماريدها تدري بي مقهورة _
اولغا _ يروح امج ادري بيج مقهورة علينه بس شنسوي هيه هاي سنه الحياة
_لا يمه ما مقهورة ضايجة شويه
طلعت فلوس من عبها واجت علي خلتهم بايدي _
_ نجي عليج لا تخافين خلي هذن عندج احتياط
_ يمه ..
_ اشش خذيهم يله يمه
هزيت راسي وضميتهم بجنطتي خاف صدك احتاجهم اني هم عندي فلوس بافل ينطيني يدزلي بايد امي وما اصرفهم عندي هواي ضلت تحجي وياي وتعلمني والدمعه بطرف عينها طلعت من الغرفة وجان تنزل دموعي كعدت على الجرباية ادعي ربي يفرجها اندك الباب مسحت دموعي بسرعه وكلت _
_ منوو
_ اني
_ طب
طب بافل يباوع علي وعلى الجنط سد الباب وكال _
_ بيران يعمري اذا ما ما مرتاحه بس كولي والله ما اخليج ويا
_ لا شبي مرتاحه وما الكه مثله
اجه علي ولزم اديني وكال _
_ ادري بروحي غلطت من عفتج وحدج غلطت غلطه عمري وكل دقيقه اني الوم نفسي شلون سويت هيج بس والله العضيم ابد لا تضنين بيوم انتي وحدج اني اخوج لو شنو يصير اني وياج لو بس سمعتي حجاية منهم بس اتصلي بس كولي
باوعت علي ساكته من ودي احضنه بس كبريائي ما يسمح هو حضني حيل وعصرني بحضنه _
_ لا تعوفيني بيران
_ بافل...
وخر عني مبتسم وكال بحنية _
_ اجيج كل ما اشتاقلج لا تنقهرين
هزيت راسي بس بعد احجي ابجي ماكدر باس كصتي ومد ايده الجيبه _
_ بافل والله عندي
_ ميخالف شلون بيه اعوفج ترحين باديج
_ والله العضيم عندي يبوو هاي شكد بافل شسوي بيهم
_ ما يغلن عليج قصرت هواي وياج ومن وراي تزوجتي شهم اكلج على طاري شهم هاذا رجلج ولا ينطاق
_ ههه شبي
_ مادري مكروه
_ انته تكره لان راح اروح ويا
_ خليولي
ابتسمت طلع من الغرفه تنهدت وباوعت على الفلوس صفطه مال خمسه وعشرينات هاي شكد منطيني شراح اسوي بيهم والله خوش قطه عطيتهم يله هم انعم الله ضميتهم وشلت الجنط ونزلت اباوع على نجمة كاعده بصف شهم
رجعت نزلت باقي الجنط شهم يباوعلي بشماته گلبت عيوني ورحت واكفه يمهم
شهم _ احنه نتوكل ورحمة الله والديكم ما قصرتو استقبلتو مرتي وابني وما قصرتو وياهم
بافل _ شنو استقبلتو مرتي غير بنتنه قبل لا تصير مرتك
شهم _ بعد صارت الي هههه
يضحك يعاند بافل الي وجهه ميكص الطبر _ راح شهم على امي باس راسها وكال _
_ اشكرج عمه ما انسه معروفج
_ يروح عمتك شسويت اصلا اكيف لو تنطوني ليوثي يبقه يمي
شهم _ هههه ليث تبقه يم بيبي
ليث باوع على امي وشهم حاير وكال بلطف _
_ الوح وياك وعود ادي لبيبي ( اروح وياك وعود اجي لبيبي )
اولغا _ باعني بسرعه
راح عليها باسها وراح على بافل هم باسه بافل شاله بحضنه وباسه يحجي ويا على كيف وليث يضحك انتبهت على شهم يباوع عليهم ومبتسم اخر شي بافل خله عشره بايد ليث شهم ما قبل بس بافل اصر وخلاها بايده نجمة طول الكعدة ساكته وشاردة اخر شي ودعناهم وطلعنه واني كل شوية اباوع عليهم شكد انقهرا لان ما ودعت بتول ولا تدري راح اروح
صعدنه بالسيارة اني ونجمة ليورة وليث كدام
نجمة خلت راسها على رجليه وغمضت بتعب هاي شبيها ما تشبع نوم شهم باوع عليها يسوق _
_ نامت
_ اي
بعد ما حجينه بس هو طول الطريق يحجي ويا ليث مكيف بي لان كايم يسولف تنهدت بتعب افكر شنو راح يسوي بيه من نوصل معقوله يضربني ليش لا إذ هو توة طعج ايدي رخيت راسي ليورة وغمضت هم الدنية ليل هيه غفيت بس اسمعه يكول
_ ما شالله تنبل مال نوم
ورة جم ساعه كعدت ولكيت ليث بحضني حضنته زين ورجعت نمت وكعدت على صوته يكعد بينه يكول وصلنه باوعت من الجامه بيتهم القديم الي يم بيت عمهم من زمان ما شايفته نجمة كعدت تفرك براسها بوجع انطيتها ليث تشيله ونزلت الجنط اني بقن اثنين بالسيارة جابهم شهم يكول _
_ شكد محمله الخاطر الله
سكتت عنه مغلسه فتح الباب بالمفتاح وطب شصاير بالحديقة صايرة يابسه صفرة والشجر موكع كومه اوراق صفر وكلها تراب فتح باب الصاله وطبينه البيت حرفيا عبارة عن تراب
شهم _ هاي شصاير وين راح انام
نجمة _ نضف هسه ماكو اشكال
شهم _ وين تنضفين هسه الساعه ب 3 باليل بس اكنسن هاي الصاله بس النص وافرشولنه هنا
باوعت على نجمة ساكته شنو انام سوية هنا لا اكيد نفض التخم وكعد مخلي ليث بحضنه نايم رحت شغلت الجوزة واشتغلت الكهرباء شفت نجمة صافنه على البيت وعيونها دمعت رحت عليها _
_ ها شبيج
_ ضحكت علي واخذتني
_ مني هيا
غمضت عيونها بتعب وفتحتهم_
_ ماكو شي يله يله
هزيت راسي ورحنه جبنه مكناسه بس كنسنه التراب الي بالنص ورحنه جبنه فراشات فرشنه بالصاله خله ليث ونجمة بسرعه بدون حجي نامت بفراشها وغطت راسها باوع عليها وتنهد ورفع عينه علي _
_ اريد اسبح
_ اي روح
_ صدك ؟
_ والله شبيك
_ والله مادري شلون اشكرج همزين سمحتيلي
باوعت على متفاجئة نتر بيه _
_ حضريلي الحمااام
فزيت من نترته ضجت وما رديت علي هسه اني شعلي صعدت فوك لغرفته صايرة سالفه من التراب طلعت اله ملابس وتوني دا اطلع طب هوة يمشي كوة على اطراف رجلي ردت اطلع صاحلي
_ هيوو وين تعالي
رجعت اله شايله الملابس _
_ ها
_ وجعا اكو علبه اسعافات بالكنتور اخذيها وانزلي جوة
تنهدت بضيق ورحت اخذتها يتامر علي عبالك اشتغل عنده اخذتهم والتفتت جان ذاب البسطال ومغمض بوجع باوعت على اصابعه مورمات كشت روحي ونزلت بسرعه رحت للحمام وشغلت كلوبه علكت الملابس وطلعت خليت العلبه على التخم وكعدت اباوع على نجمة بحقد _
_ عافتني وحدي ونطمرت
اتاني ينزل حتى يسبح وينام واصعد انام نزل مصلخ بطرك السروال نزلت عيوني بصدمه وفشله طب للحمام همست _
_ ما عنده مستحه هم اجيت علي
ربع ساعه وطلع ينشف بشعره وعاقج وجهه بتعب عيونه مورمات كعد على التخم ورخه راسه ليورة ضليت ساكته رفع رجلي على للتخم بصفي وكال _
_ يله !
_ شنو
_ دهنيلي من هاذا المرهم ولفيهم يله
رفعت حواجبي ما راضيه درت عيوني وكلت _
_ سويهن انته
_ بيراان لا تخليني اكوملج هسه تره كوة كاعد راح انام على روحي
التفتت علي وكلت بحده _
_ عيب لا تكول هاي الكلمه
_ هاا صدك
_ اي والله مو انته كتلي
_ وهاي من ذاك اليوم لهاذا اليوم تتذكرين طاح حضج يله يله
_ وخر عني شنو جاي تذلنيي مو كلتلك عوفني طلگني
هز راسه واخذ العلبه يتواعد _
_ اطلعهم ي بيران
گلبت عيوني بملل شيريد يسوي يسوي باوعت علي كوة ينوش رجله ومتوجع حيل بي وابو زايد ذاك اليوم مو كرم اصابيعي يباوع ويخزرني يريد اجي اساعده واني مغلسه لازكه روحي ويا طارف التخم _
خلص ولف رجلي وكال _
_ **** بيج گ***
انقهرت بكد ما يغلط علي واني ماكدر اسوي شي كام لفراشة واني هم كمت اريد اصعد فوك صاح _
_ ويين
_ اروح انام
_ تعالي نطمري هنا البيت ما منضف وبي بستان هسه تلكين ثنين نايماتلج بالفراش وتعال يشهم ودي وحير وانا عيوني بعد ماكدر افتحهم
ضليت متصنمه خاف صدك تجيني حيه يمه واني مناك ارجف من الحيايه ضليت واكفه افكر اروح لو ارجع نتر_
_ تعالييي نطمريييي
_ اي اي
طبيت بالفراش الي ورة نجمة هيا فارشة هم فراش الي غطيت وجهي وكلت _
_ واذا اجت الحية هنا
_ تلدغج واخلص من شرج
غلطت علي بگلبي ونمت نوب بالكوة نمت كمت اتخيل الحية تجيني من الفراش واغطي رجليه زين واكول ( طراها ولا ملكاها ) عود هاي تعلمتها من امي اذا نكول هيج ما تجي الحية_
الصبح نجمة كعدتني الساعه بالتسعه شهم طالع يجيب ريوگ كمنه اني وياها وبدينه بالطابق الفوك انضف بالغرف كلبنه بي مي وغسلنها ولمعنه البوب والخشاب وكلشي بي تراب ذبينه المي من الدرج واجه شهم شايل العلاليك
وكفت امسح بالمي اجت نجمة تريد تاخذ العلاليك منعها وكال بنتره _
_ عوفيها هاي تاخذهم وتصب شنو شغلها لعد
تنهدت بضوجه وضليت اباوع علي صاح _
_ شكوو صافنه تعاليي
ذبيت الماسحه ساكته وصابرة اخذت العلاليك وكال يحضن بنجمة _
_ لا تشتغلين بعد هاي تشتغل
نجمة _ شهم شبيك
_ اشش مو زينه انتي تعالي تعال بابا
عود يريد يقهرني ههه والله ما اهتم صبيت الريوگ وخليته بالصينيه جايب كيمر وكاهي وصمون خليت الصينيه كدامهم ورحت سويت جاي جبته وكمت اخلص مسح
نجمة _ بيران تعالي تريكي حبيبتي
بيران _ ماريد ما مشتهيه
شهم _ تاكلين مالت ابوي
طنشته ورحت فتحت الغرف انضف بيهم خلصو ريوگ وشهم كل شويه موديني على شغله واذا صخرني على هاي قبل لا تخلص هاي يرزلني ليش عفتي شغلج على النص بس يريدني اتعارگ واني باردة ويا _
نجمة ما ردت علي كامت تنضف وياي وهو اخذ ليث وطلع مادري وين طلع وجان اغمه بايدي نجمة ضحكت
بيران _ هاذا شبي عود يكرهني لو شنو
نجمة _ لا تنقهرين فدوة هو هيج من يحقد على بشر بعد ما يعوفه
_ طبه مرض
_ اسم الله
گلبت عيوني ورحت على المطبخ اجت نجمة شايله الصينيه وخلتها على الكاونتر _
_ خليتلج ريوكج هنا تعالي تريكي
_ ماريد منه شي
_ ترة بطنج ما عليها تعالي اكلي محد يهتم تره بس انتي الي تتاذين
سكتت ورحت تريكت هو صدك شهم راح يجي يرضي تعالي اكلي اشو بس اني جوعانه اكلت وغسلنه المواعين وعزلنه البيت وخليته يلمع حتى الطارمه نضفناها من الورق وخلصنه بس غدة ما سوينه لان ماكو مسواك بالبيت _
كعدنه بالصاله اني ونجمة نجمة تلعب بالحلقة بيدها صافنه كلت _
_ نجمة شصار وياج يعني والله داخ راسي
_ كلشي صار
_ شلون يعني هسه انتي اذا محد ماذيج ليش ضايجه
_ متاذية اني بيران
_ ضربوج
_ مو شرط الاذية بالضرب فعل واحد من شخص تعزة ينهيك يكتلك بدون عصا
_ عليج الله شكو احجي
_ ما بيه روحي لعبانه
_ هو الرجال التزوجتي حلو
_ انتي تدورين حلوين
_ لعد شسوي حضي جابلي واحد ازرك نوب ما ينحمل
_ هيوو لا تحجين على شهومي
_ ازرب على شهومج
_ ولجج
اندك الباب كمت خازرتها وهيا هم فتحت الباب الهم شهم وبيده ليث خازرني صاح
_ موو صارليي ساعه برة لدك هوررن ليش ما تفتحين
بلعت ريگ بخوف لان صاح حيل ومعصب كلش _
_ ما سمعت
_ شنوو طرشههه ما تسمعييين امشيي افتحيي البابب
هزيت راسي وطلعت اصلا اني لابسه شال ما ذبيته حتى من نايمه بس كلش خوفني صياحه وشكله رحت فتحت باب السلايت وطبب السيارة وبس خازرني طلع واني ضليت واكفه فتح الصندوك وينزل بالعلاليك الي يمه اني اباوع علي صافنه _
_ بعدد اخذيلج خيرة زينه موو فتحتت الصندوك روحيي نزلي الاغراضض
_ ايي هسه شبييك
كلتها بانفعال ورحت بعصبيه اجه وراي معصب ولزم ذراعي حيل نبت اضافره صحت _
_ اخخخ
_ عليمن نترتيي
_ شنترت وخر عنيي
لزم فگي حيل وعصره يحجي بغضب _
_ ادفنجج هنا اذا بعد رديتيي عليي موو
هو هاي الي يريدها ارد علي حتى يضربني ضليت اباوع علي بس ساكته والقهره بگلبي صاح بنتره _
_ موو احجي وياج هاا ليش متريدين بنت **** انعل ابو الرباج
_ لا تشتمم وخررر عني شبييك
طلعت نجمة تركض علينه لزمت شهم _
_ عوفها شهم شبيك دعوفها
_ وخري نجمة
لزم رگبتي من ورة ودنكني على الغراض _
_ هايي شغلتج بهاذا البييت خدامه النه ما الج حاجية ولا قيمه واذا اعترضتي اندمج
وجعتني رگبتي واني ساكته والدمعة بطرف عيني نتر بيه بعصبيه _
_ بنت الخرة بنت الكلب جاي احجي ويااج ردي
نجمة _ شهم فدوة كافي عوفها
_ احجييي ردي عليي
_ عوفني ..
_ هاا يعني تعانديين
_ ما معاندة خلص كافي ماشي اشتغل وخر عني
دفعني حيل ليورة وكعت للكاع عصرت ايدي حيل بعصبيه وقهر
_ **** ما تمشي اله بالعين الحمرة
طب جوة يسب اجت علي نجمة كومتني تحجي _
_ يروحي انتي لا تبجين
اني عاصرة شفتي ليجوة حيل ماريد ابجي بس دموعي سبقتني كلت بغصة _
_ والله ما مسوية شي هو يريد حجه
_ ادري ادري بي كومي بس لا تعاندي
_ شعاندت نجمة شعاندت شكلتت
_ يله كافي كومي لا تردين علي
كمت ولزمت خدودي بوجع كل مرة ينبت اصابعه بيهم يوجعني شلت الاغراض ويه نجمة وطبينه لكيناه يخابر بعصبيه مادري منو _
_ مثلل ما كتلككك تجييب ال*** واني متراجعع اريد حصتيي... مادري بعد ... استعجل
طفاه وباوع على ليث ساكت يباوع علي بخوف صاحله بحضنه وراح طبينه للمطبخ نعزل بالغراض كوة مسيطرة على نفسي بكد ما خوفني وجعني الله لا يوفقه كون جايب خضرة ولحم وفواكه ومستلزمات البيت كلشي جايب حتى اكل جاهز صبينه اني ونجمة ونجمة اخذت الصينيه وراحت مستحيل اكعد ويا على نفس الصينيه واباوع بوجهه هو اني بس اباوع بوجهه تنسد نفسي اخذت صمونه اكل بيها وكاعدة مرتجية على الكاونتر
والله لو مادري بشهم صدك يسويها ويحرك كلبي بافل يدمر شغله الي تعب بي ومعيشنه بي ادري بي يطلعله سالفه علي جذب لو مو قانوني لو بضاعه مسروقه كلشي يسوي سكتت رغم زعلانه من بافل بس يبقه اخوي وبركبته عائلة شلون اضحي بي
سكتت واكول لحد ميروح غضبه ويعوفني
طب ليث واجه علي مدلي طرشيايه _
_ اتلي ماما دوعانه
ابتسمت وبسته بخدة كعد بحضني ياكل بايده لفه تنهدت ابوس بشعره ليث سبب ثاني مخليني صابره معتبرته ابني صدك _
وخر عني ليث وكال _
_ بابا تتلج ( بابا كتلج )
بست ايده الي على خدي وكلت _
_ خليولي بابا مو حلو
_ لا حلو بابا
_ يا ياهو احله اني لو هوة
_ ثينكم
_ ههههه صاير لوتيي
سكتت من طب شهم بحلكه لكمة نزلت عيوني ساكته كال مقوس حواجبه وعيونه مزغرهم _
_ ليش ما تجين تتزقنبين
_ ماريد
_ طبج وجع تعال بابا
_ ماريد منك زقنبوت لا تضل كل شوية تغلط
اجة وخر ليث وضربني على كصتي حيل وكال _
_ وشسوين باله هاا
_ وخر عني شبييك
كمت اريد اطلع حجه مقاطعني _
_ مو هاذا شهم الي تردي حبيبي ليش تتهزمين
عفته وصعدت فوك لغرفتي القديمه نزعت الشال وكمت اكمز بعصبيه واعض بايدي _
_ وك كون الله ينتقم منك الله يطلعها بيك انشالله تنطرد من شغلج انشالله ا..اءء امم انشالله يرزلوك مثل ما ترزلني يا شهم
كعدت بتعب خابرت امي وطمنتها علي وكالتلي بتول رجعت هم حجيت وياها وعتبتني شلون ترحين بدون لا تكولين ودعتهم ورحت طلعت ملابس وطلعت رحت اسبح بس شفته يحجي ويا نجمة ونجمة تبجي _
ما اهتميت خلصت سبح وطلعت شفته حاضنها باوع علي بخزرة خوب ما فالح بشي غير يخزر _
نجمة .....
حالي الي جنت بي جنت كل يوم ادعي ربي لا تغيرة عشت ايام ويا رائد ما تنسي كلها حب وفرح وغزل ولحضات سعيدة بس للاسف ما دام ورة ما تم زواجنه بعشيرين يوم بالضبط
جنت اعيش ايام حلوة ويا لحد ما عرفت سهى انو زواجنه تم كلبت الدنية علي ملختني وضربتني وكوة طلعوني من ايدها
من عرف رائد رزلها ومنعها بعد تطخني جنت انسة كل كلمة مو حلوة يحجوها من يدافعلي هوة
سهى ما سكتت اشوف كل يوم ياثر اسحارها على صحه رائد عمتي راحت للسيدية وانطتها كم شغله كالت ماكدر افك السحر هواي اسحار علي بس انطتها مي ارشة ويسبح بي شوية فادنه
بس المشكله بيوم جان رائد توة جاي من سفرة شغله الي طولت اسبوعين كوة تحملت سهى وجناينهم من اجه فرحت وحضرت نفسي على اخر حباية فرحانه بحبيبي الي اخيرا بعد فتره رجع الي
من طب للغرفة جان وجهه مكلوب ما اهتميت رحت حضنته بقوة اعبر عن اشتياقي بس هو صدمني من دفعني وكال _
_ وكتهاا نجمة روحي لعبانه حضرتي الحمام
ضليت مفهاية بوجهه من تصرفه هاي اول مرة هيج هزيت راسي _
_ اء اي حضرته شبيك حبيبي
_ما بيه بس وخر شنو هل عطر الي مخليته
_ شبي مو حلو اشتريته اني وسوسن
رفع عيونه بعصبيه وكال بحدة _
_ شلوون اشتريتيي ومنوو سمحلج تطلعيين
_ ها. .
ما خلاني اخلص اجه علي ولزم ذراعي حيل ينتر _
_ كلتيلييي
_ مو اتصلت عليك وما رديت شبيك رائد جاي توجعني مو كتلي اذا تردين تطلعين اطلعي ويا امي وسوسن
_ رجلجج اكسرهااا اذا بعددد طلعتييي بدوون علمييي
دمعت عيوني وكمت ارجف مصدومه منه معقوله هاذا رائد الي ودعته بوسات واحضان _
باوع لعيوني وغمض عيونه حيل وعافني وراح للحمام
كعدت على الجرباية وبجيت اني ادري بي ادري باسحار سهى راح تاثر بتصرفاته وياي ادري _
والله لعد شغيرة حتى لو كان معصب وضايج مستحيل يحاجيني هيج انهضمت حيل ورحت مسحت المكياج وبدلت ونمت بفراشي من ذيج اليله احنه انام بالكاع بطلب مني
طلع من الحمام وغمضت كلت هسه اكيد راح يجي يراضيني خلص وطفه الضوة وما حسيت بي يمي ابد
رفعت راسي وعضيت شفتي حيل من شفته نام على الجرباية دست على كبريائي وكمت علي احجي بغصة _
_ رائدد كووم
_ شتردين نجمة
_ مشتاقتلك ليش هيج وياي
حجيتها وبجيت سحبني من ايدي لصدره خلاني بالغطه ويا وحجي _
_ اسف بس تعبان نامي
حجها كوة من ورة خشمه شلون الجابر نفسه انهضمت بالزايد ما يريدني ازعل بس مايريدني كلني حضنته حيل ادعي ربي ما يغيرة يارب والله اموت هو ضل يتكلب واخر شي وخر عني ودار وجهه ليورة ونام كمت مصدومه من تصرفه ميريدني
كمت من الجرباية ونمت بفراشي ابجي
وبعدها هيج مرت الايام رائد ساعه زين وعشرة لا ساعه يرجع رائد الي اعرفة والحنين شويه اعوفه وارجع كالب خلقته وينتر لو يكلي ليش فاهيه لو يكول مهمله لو يحجي ليش الغرفة وصخه
والله الغرفة النهار كله تلمع يوم عن يوم ياكلني القهر شلون بيه اني رائد جنت ما امل من غزله وسوالفه الحلوة واهتمامه صار لا يسال على اكلتي ولا شمحتاجه بس يخلي فلوس الي بالغرفة ويطلع
من يجي احسه راجع رائد الي اعرفة ملهوف علي بمجرد ما يحضني يوخر منزعج ويطلع لو ينام يم امه لو يطلع من البيت
اشوف سهى متشمته بقهري المشكله القهر يبين بعيوني وتشوف رائد من ما معبرني كدامهم
الي شعلني وموتني انو رائد كام يحجي وياها لو تكله رائد محتاجه هيج بلا ما يسال ينطيها لو تكله وصلني لبيت اخواني يوصلها تجيب جاي ويشكرها ويبتسملها اضل كاعدة يمه وتسولف كام ما يردها ولا يمنعها كمت ابجي حيل واشجي لسوسن وعمتي وهنه هم ما بايدهن شي
وبيوم جنت كاعدة بغرفتي اباوع علي التلفزيون طب للغرفة وكال _
_ وين سويجي
كلت ببرود _
_ هذاك
أشرت على ميز تواليت راح اخذه ورش عطر ومشط شعره استغربت وكلت _
_ وين رايح
_ هسه اجي هنا
_ لعد خلي اجي وياك ضايجة
_ جؤؤ غير مرة مطلع سهى
كمت بصدمة وحسيت گلبي تكسر كلت شفتي ترجف _
_ ش شنو مطلع سهى و وين
رفع حاجبة وكال _
_ هنا بالسوك محتاجة كم شغله
رحت يمه بعصبيه وكلت ودموعي تنزل _
_ ما ترووح شعندك وياها شنوو شعليك بيهاا
_ شنو شعلي بيهاا شبييج غير مرتيي وبعدين شنو امشي بكيفج
_ شنوو هسه صارتت سهى عزيزة هاا هسه كمت تطلعها وتبتسملها وتحجي وتتشاقه من حبتك نجمة يله
_ استغفرالله يا الهي شبيج انتي تدورين عرايك
_ انته لييي شبييك شبييك رائد شبيك ليش هيج تتصرف وياي
_ نجمة عيني وخري مالي خلكج
_ ما اوخرر هسه تعوف السويجج وتكعدد
_ لا والله صدكك وخر عني دربي ماريد امد ايدي عليج
_ تمدد ايدكك علييي ؟؟؟ انيي
_ وكسر راسج اذا عليتي صوتجج
_ رائد...
_ ترة مثل ما انتي مرتي هيا مرتي قبلج واكبر منج هم واجبي عليها اكبر من واجبج
_ لا تكسر گلبي رائد
خزرني وطلع كعدت بالكاع مصدومه واتنفس سريع وابجي سوتها سهى واخذته رجعته الها ومن الله ينتقم منها كسرني رائد الي جنت خايفة منه صار لعد وين حجيه وين انتي حبي وين الي مربيني هو وين الي يكره سهى ومنعزل عنها ليش من حبيته وتعلقت بي يله رجع الها شلون بيه اني كل ذرة من روحي متعلقه بي وتحبه وتعشقه ادري صدك واجبه بس هو جان مادي واجبه باحسن صورة بعيد عنها ليش هسه يتعطرلها ويروح شراح اسوي اني
بذاك اليوم بجيت هواي هواي وعمتي تخبلت وضلت تحجي علي وسوسن هم تهدي بيه بكد ما بجيت حتى دخت ونمت وكعدت على لمسات بوجهي فتحت عيوني وشفته نايم على بطنه يمي على الجرباية صافنه وخرت عنه والتفتت روحي محتركه منه ومقهورة _
رائد_ شكو ؟
يسأل شكو يسأل شكو وما يدري شكو شسوه بيه همست _
_ سلامتك
_ ليش عيونج هيج مورمه يعني بجيتي لان اخذت سهى للسوگ عمي باجر اخذج
التفتت علي معصبه وكلت _
_ يعنيي اني هاذا هميي رائد هاذاا
_ لعد شنو
يحجي براحه وهو بمكانه عضيت شفتي وكلت بقهر _
_ ترة اني مو قوية رائد وهاي تصرفاتك الباردة تقتلني تموتني وتدمرني اذا ما تريدني وتريد ترجع لسهى عوفني ذبني يم بيت عمي ولا تتصرف هيج
_ شنو ما اريدج وشنو ارجع السهى ترة ثنينجن نسواني اني شوكت عايف سهى حتى ارجع لها وشنو ما اريدج غير مرتي وحبيبتي انتي
حجها وسحبني اله يبوس بخدودي دفعته بقهر ولزمت راسها بوجع روحي لعبت _
_ طلك سهى
ضحك يباوع الي بملل _
_ على شنو اطلكها ؟
_ مو ما تحبهاا مو تحبنيي الي سهى ما تناسبك اصلا سحرتك وخلت هيج ترجعلها وتكرهني
_ استغفرالله والله مللتيني شوكت ما اجيج وكلتي سحر سحر سحر سحر من عرفتج تصيحين سحرر اهوو
كام بضوجة صحت بعصبيه ورحت لزمته قبل لا يطلع _
_ اي ايي روح روح على سهى صرت ما اعجبجج موو اخذت الي تريده مني ورجعت لمرتك
غمض عيونه بنفاذ صبر ونتر ايدي _
_ كافيي وخري
_ ليششش هااا لعدد ليشش كلتت احبجج ليش علقتنيي بييك
_ وانتيي شنوو مو تدريين بيه لعدد متزوج ليش قبلتي بيهه وهسه يله جايتني طلكك سهى سهى ما اطلكها علمودج ليش اطلكها يتيمه ما عدها احد ليش هيج اضلمها
بجيت بتعب وحرگه _
_ الله يخليك لا تحجيي هيج لا تحرگ كلبيييي
_ يعني من احجي شي صدك جاي احرك گلبج نجمة عيني ترة ما اكرهج اني احبج واعزج بس تصرفاتج كلها مكروهة عوفيها عيني
_ انتهه بعدد كوول اكرهجج لا تجذبب انتهه واحدد جذابب ما تحبنيييي تجذبب
رفع ايده علي بعصبيه خملت بخوف وخليت ايدي على وجهي ابجي استغفر ودفعني عن الباب وطلع كعدت مرتجية على الباب وابجي
وهيج مرت الايام شهر مر واحنه هيج يجي يعتذر وينطيني امل رجع مثل ما جان بس بساعه يتغير ويصير عبالك جابر نفسه علي يريد يتعارك بس احسه ينقهر علي لو احجي ويا يستغفر ويدير وجهه بضوجة اموت ميت موته باليوم من هيج يتصرف
صار مهمل كلش حتى ابد ما يقرب علي بس اول ما تمت علاقتنه جان يجي علي بس من رجع من سفرته ابد ما قرب علي يجي ليمي يبوس وبعدها يبعد بضوجة وينام اضل ابجي طول اليل ما فالحه بشي غير البجي سهى صارت تعاند وكانها تدري بشكو شي يصير بيناتنه تتزين وتدلع يمه بعنادي لو تكله حبيبي لو عمري اشتعل من يرد عليها بها عيني
صرت اني الي كوة اطيقة من تصرفاته هواي دست على نفسي بسبيل يتغير اشغل قران ارش مي ما يتغير شي صار من يطب للغرفة ما احجي ويا ولا هو يحجي كلمن ينام بصفحه علاقتنه صارت باردة تلعب النفس
وبيوم بما ان الشتة طلع جنه نشل بزوليات البيت مالنه الطابق الفوك غرفتي وغرفة الحجية وغرفة سوسن الحجية بس واكفه تعلم بينه واحنه ننكل فوك السطح حتى نخلص نوب الحجية كل شوية تريد تشيل ويانه وما نخليها
شلنه الزولية مالت سوسن وديناها حسيت بمغص بمعتي لزمتها بوجع وكلت _
_ اخخ بس لا صرتي انشلعت
_ يا تعالي اكعدي خلي اجيبلج مي
كعدت بالصاله لازمه معتي بوجع جابتلي مي وكالت ارتاحي شوية كعدت صافنه هم افكر برائد من الصبح جوة ما صعد فوك الشي الي مريح گلبي شوية ومصبرتي ما ينام يمها ولا لا موت لو صدك
سوسن شالت الزوليات الزغار وجان نسمع صيحه الحجية شهكت وركضنه عليها واكعه يم الكنتور ولازمه ضهرها رحت عليها
_ يا يا عمه شبيج كومي
_ ضهري ضهري يمه ضهريي
_ شجنتي اسويين سوسن روحي صيحيلهمم
كومتها كوة وهيا متيبسه وتصيح بوجع اجه رائد وسهى يركضون راح عليها لازمها
_ يمه شبيج شيوجعج
_ ضهري يمه ضهري تيبس اخخخ
كعدها على الجرباية وصاح _
_ سوسن علاجها ويين والعصارة شكومجج يمهه
_ ردت انوش الجنطه فوك الكنتورر
جنت ارجف من الخوف عليها وسهى مسوية روحها خايفة ولازمتها _
رائد_ شكومجج يا يمهه لعدد انتنن ويين
سوسن _ هنا جاي اشيل بالزوليات توها كدامنه
رائد_ وحضرتجج ويين ما بيج تساعدينها مراة جبيرة
باوعت علي ماشرة على نفسي بصدمه اني شعلي _
_ اني
_ لا ابوووي اشربي اشربي يمه
سهى ابتسمت بخبث وخلت ايدها على ضهره تعاند بيه _
_ شعليي انيي لعددد مو جنتت هم اشتغلل
رفع راسه خازرني وكال _
_ اششش اسكتيي
_ لا ما اسكتت شنو جاي تذب الحركه بيهه شعلي
سهى _ مو قصده هيج يعني هو صحيح كالج مالج شغل بغشل البيت بس خطيه الحجيه
صرخت عليها باعلى صوتي _
_ انجبييييي انتييي كلبهه
اجه علي ولزم شعري حيل وكال _
_ مووو كلتت اسكتييي السانججج ليششش طولااان
الحجية _ ولك رائد عوف الابنيه عوفهاا ما عليها
نجمة _ اي اي تعال اضربني يله انته هاي الي ما سويتها بعد
عت شعري حيل يصرخ _
_ وشنوو خايفف منج بنت **** مستهترهه
دفعت ايده كوة وكلت _
_ لا تغلط على ابوييييي جبااان لو بيك خير مو سهى تسويلك اسحار وانته انسحلت
فتح عيونه حيل وضربني راشدي وكعني بالكاع الحجيه تصرخ علي وسوسن واكفه بخوف وسهى الضحكه شاكه حلكها لزمت خدي بوجع وبجيت من القهر ياذيني الي جان يخاف علي من الهوة كومني من شعري وكال _
_ جباان موو ولج والله صوجي اني لفيتج هو انتي شنو مو خلف الله علي لفيتج يشمرون بيج منا ومنا واصلا انتيي شنو فد قندرة زعطوطه جهال تريدين تشيخين علي مو اني اعلمج
سحلني ورة واني ساكته ودموعي تجري دفعني بالغرفة وكال _
_ انتي مو مال عيني واغاتي انتي مال قندرة تطولين السانج وصوتج عالي وساكت الج بس من مربيج انتي منوو اذا من زغيرة انتي فالته
ضحكت وسط دموعي وبس اباوع علي اعتبرت من هاي الحضه كلشي انته خلص ولو مو سحر يا رائد ما ارجع الك لو تموت بعد _
_ رجعني لبيتنه
_ ارجعجج ؟؟؟ ليشش ؟ مو فصليه انتيي كايمه تتامرين لو نسيتي انتييي مرتييي وتبقين هنا غصبا ما عليج تضلين
سد الباب وقفله من ورة كعدت ما ساكته عضيت ايدي حيل شورطت نفسي اني ليش حبيته ليش سلمت نفسي اله ليش تعلقت بي منو هو بالنهاية مثلهم كلهم ما يفرق
ضليت كاعدة يم طارف الجرباية وساندة راسي اباوع للسكف ودموعي تجري صار اليل وما نمت انفتح الباب ما باوعت ولا تسألت منو عرفته من عطره سد الباب وكال _
_ نجومة
ما رديت اجه علي وكعد كبالي خله ايده ورة ركبتي وعدل راسي اله بلع ريك ومسح على خدي _
_ اسف تنكسر ايدي كون اذا عتدها اعذريني
ما جاوبته بس اباوع برود تاام روحي هادئة وما عندي ردة فعل _
_ غلطت ادري ومديت ايدي عليج بس والله لحضة عصبيه عصبت وخفت على امي ومنا انتي حجيتي هيج وعصبتيني بعد ما شفت دربي اعذريني يروحي انتي
هم ما جاوبته تنهد وعض شفته _
_ نجمهه ردي علي كافي مو جاي اعتذر الج يعني تكليلي جبان وترفعين صوتج علي شسويلج مثلا انتي جبرتيني امد ايدي عليج
_ ما يوجع
_ ها ؟
_ ما يوجع الراشدي بكد ما يوجعني كلامك رائد
هز راسه وبلع ريك _
_ ادري لوصت هواي بلحضة عصبيه اسف
ما جاوبته تنهد وباس خدي يحجي _
_ ما تنعاد بعد
ما جنت اباوع بوجهه ولا اهتميت بالبوسات الس يطبعها على خدي جنت لو بس يلمسني لمسه اسيح من الخجل والفرح شو هسه كل ما يجي يقرب اتذكر كل تصرف مو حلو بحقي
من شافني ما مطيه ردة فعل عصب وخر يفرك براسه _
_ مو صوجج صوجي اني شعندي باقي يمج عبالج ضاله عليج موو
ما رديت علي طلع من الغرفة وعرفت نجمة ماتت صدك نام يمها بعد ما كسرني كسرت عيني واخذته مني والله اليل بطوله ما اخذت عيني النوم ابد والنهار كله ما غيرت مكاني ولا حجيت شكت حجت وياي سوسن اكل والحجية ما رديت عليهم خلو وطلعو جنت اعيش صدمه وخذلان جبيرة
اليل من صار وقت رجعته من الشغل طب للغرفة وباوعلي بصدمة _
_ لجج شعندج لسه كاعدة هنا كومي
تجاهلته وكاني ما سمعته _
_ استغفرالله لج بوية راح تتخربطين لساج بدون اكل كومي
ولا رديت علي ولا عبرته جنت ادعي ربي يرجع شهم واخلص اجه علي حاول يسحبني حتى اكول ما قبلت توسل اعتذر ما رديت هم عصب وراح يسبح صار من يعتذر ويسمعني كلام حلو يحملني منية _
طلع من الحمام وهو يباوعلي بضوجة مشط وكعد يلعب بموبايله ويحجي _
_ عمي اسف والله اعتذر غلطت وامداني واني جبان كومي اكلي يروحي
جان من ودي اعاتبه واكله ليش رحت يمها بس جانت روحي لعبانه وخاويه وما بيه حيل حجي _
رائد_ يعني اني تدرين قصدي من حجيت هيج والله لحضة عصبيه مو كتلج احبج وما اكدر بدونج لا تصدكين الحجي الحجيته يروحي انتي ...هسه احجيي احجي يمعودة لا تخبليني
بعدة يريد يخلص سمعنه طلقه دوت بالبيت انتفض بذعر وصاح _
_ شكوو
اني هم فزيت بخوف اباوع علي كام وكال _
_ لا تطلعيين
طلع راح سد الباب على امه وعلى سوسن كمت ارجف من الخوف من اسمع عياطهم برة ما اسمع شي غير صياح زلم ونسوان تكورت على نفسي ادعي ربي يخلصني شجابني اني _
شوية وطب رائد وجهه باهت ما سالته شكو جان واكف يباوعلي وشفته ترجف وايده ضاغطها حييل _
رائد _ ن نجمة ..
همست _
_ شكو
ابتسم وشفته حيل ترجف اجه علي ولزم وجهي يكول _
_ احبج وتحبيني وما تعوفيني موو
_ شكاعد تحجي رائددد
_ تعذريني عن تصرفاتي الي ما اكدر اسيطر عليهم س سحر سحر مو تكولين سحر نفكه وارجع و والله حتى اني كاره روحي من احاجيج هيج نجمة لا تسوينها فدوة لا تعوفيني
وخرت اديه عني وكلت ارمش بخوف _
_ شكو رائد
بلع ريك وكال _
_ ش شهم
_ شبييي شبي شهم شبي
_ كلشي ما بي ج جوة شهم يريدج
نبض گلبي حيل بفرح ولهفه وقهر الفرح انو دعيت ربي يرجع شهم ورجع الي والقهر انو اني بيوم جنت خايفة افاركه وهسه اني رايده هاذا الشي خليت اديه بالكاع وكمت
اتجهت على الباب لزم ايدي ونزلت دموعه _
_ ترجعين الي مو نجمة
نزلت دموعي وكلت بابتسامه _
_ لو سالني هاذا السؤال قبل شهر من هسه جان كتلك على كص ركبتي ما اعوفك بس هسه يا رائد اكلك بعد تحلم تشوف وجهي صدكني
جرني اله ينفي براسه ويحضن بيه _
_ لا لا معصبيه مني انتي شوفي شوفي والله مو قصدي والله مادري شبيه
_ كتلك من قبل وما صدكتني انته مسحور بس سواء صدكت او لا بعد ميهمني رائد راح اقدر معروفك وفضلك علي من امنتني يمك وما خليت احد ياذيني وما راح انكر ابد وفرصة سعيدة
عفت ايده والتفتت ارجف وابجي ضل صافن ودموعه تنزل ركضت بسرعه بس اريد احتمي اريد اخوي الي كسرتي بعوفتي هنا اول ما شفته شمرت روحي علي بجيت وكاني وصلت الامان ما باوعت على احد ولا حجيت بس رائد واكف يباوع بقهر وشفته ترجف حيل
من رحت لزم ايدي وكسر گلبي عفته ورحت وعفت قصه حبي الي عشتها اول مرة بحياتي بوقت قصير ما سالت شهم ابد ليش رجعت قبل موعدك المهم فرحت بي
من كعدت لكيت نفسي يم بيت بيران ومن رجعنه جنت مقهورة مكتابة مالي نفس اسولف ولا اكعد يم احد بس اجبر نفسي ما جاي يطلع من بالي ابد
جنت هم مقهورة على بيران لان شهم هيج يعاملها بس مالي خلك اتدخل ابد مالي خلكك
روحي لعبانه من كلشي بس اريد انام _
والصدمة الي ما توقعتها ابد ميار الي سوت بيه هيج وبسببها كالي شهم مريضة وراح تموت مادري تشمتت مادري انقهرت المهم بجيت
كالي انتقم من زوجها وابنها والابن انسجن والابو انطرد من شغله
كالي احجيه كلشي من البداية ما حبيت ابد اخرب بين رائد وشهم بسبب حبي حجيتله كلشي ما عدى اخر فترة حجيتله شلون حماني ودللني وما خله احد يتقربلي شهم كام يلوب يكول ضربته هو كلشي ما مسوي سالني لعد ليش ابجي ومنقهرة كتله لان ميار انطتني ولان عفتني انته
حضني وكال _
_ عدت وبعد ما تنعاد
غمضت عيوني مرتاحه بحضنه _
نجمة _ شهم
_ همم
_ لا تسوي هيج بيران خطيه شمسويتلك
_ ختولي *** هل *** اكبر جذابة وحقيرة
_ ترة الابنية خوش ابنية وادمية
_ اييي كلش تخرخر آدمية
_ هاي شبيك ترة يجوز صدك ما الها شغل بسالفه غيد ويعني ترة الابنية تحلف ما تحبك لا تسوي هيج حباب
_ وانتي صدكتي تحبني هيا حبت فلوسي يروحي ومن شافتني ما منطيها وجه وطيحت حضها كامت تريد تنسحب
_ اذا صدك تريد تنسحب جان قهرتك وذبت ليث شمرته بيت عمي وعاش الي عشته اني يمهم ليش تحملت مسؤلية تربيته وهمه شفتهم خطيه هسه يله الله انطاهم جانو ما عدهم شلون ما خلت ليث يحتاج شي ربته ودللته وشفت شلون صاير كبران ويحجي وسمنان هاي منين حتى الفلوس الي انطيتني ياهم ميار اخذتهم ولا حصلت بيران ربع
_ اخذتهم ؟
_ اي والله وانته قرر منو تاخذ ابن رجلها الي عافها بعد اسبوع من زواجهم وسافر ولا ومطيح حضها وقاهرها ورايح منو ولا ما منطيها ولا ربع ولا فلس جان راحت ذبت ليث وكالت شلي شغله شمحصله منه بس هيا بكلبها حنية وتحب ليث مثل ابنها والله من اشوفهم سوية مستحيل افكر بيهم غير ام وابنها
_ تمثيل وداعتج
_ شهم ترة تنفرز
_ تريدني احبها من ليث
_ اهوو هسه عساس انته توم كروز
_ ولج شنو توم كروز يروحلي فدوة
ضحكت وخرت _
_ عوفها خطيه
_ ديله روحي نامي اشو انتي تنعسين ما تشبعين نوم
_ ههههه مادري عيوني كوة يفتحن
ابتسم وكام صعد فوك تنهدت وكمت رحت لغرفتي هم خليت اعراضي جوة مالي خلك اصعد فوك اتعب _
بيران ____
جاي اسفط باغراضي وحدي انفتح الباب بقوة فزيت لكيته شهم خازرني يا ستار يا ربي _
بيران _ ها ؟
_ وسما وزقنبوت
_ ياا
_ انتي منو كالج تخلين ليث عندج وتربي عود شنو دا احبج
_ يا
_ تريدين احبج مو ؟ تدللين تعالي
سد الباب واجه علي صرخت راجعه ليورة شمرت علي الملابس _
_ وخر وخر هي هوو وخر
_ تعاليي
كومني ولزكني بالحايط صرخت بخوف _
_ وخر عني شبيك
_ مو تريدين احبج
_ لا والحسين ما اريد
_ لا تريدين ماشي
قرب مني وصدمني بفعله .....
يتبع .........
_______________________________
القصة بيها هواي اخطاء وانشالله تتصحح عن قريب والخطاء مني لا غير ..