آفْرُودِيتْ 🦢

الحلقة الثالثة و الستون🧚‍♀️

🔸️حلقة 63
🔸️نوح_يحكي:
عديت عينيا على تفاصيل وجها و جبدتها عندي أكثر خذيت نفس من ريحتها و كبست عليها...للحظة خفت تطلع مجرد حلم و باش يتسرب في لحظة غريبة كمية المشاعر لي نحس بيها و هي بين يديا فرحتها ليلة خلاتني نندم إني مخذيتش القرار هذا قبل توا منعرفش علاش كنت متردد...يمكن خاطر خفت من إني ناخو الخطوة هاذي و نربط روحي بستها جنب وذنها نحكي
أنا:محلااك جنيتي...كنت و باش تبقى أحلى هدية في حياتي
آنيا:أنت حققتلي كل الأحلام لي تسرقت مني نووح منحبكش تبعد عليا مهما صاار بيناتنا
أنا:يكفي أنك معادش تسكر الباب في وجهي
تبسمت مع ضحكتها و كبست عليها أكثر...معنديش إستعداد باش نبعدها عليا جملة...حتى بعد ما وفات الرقصة...كملنا بقية السهرية و إنسحبت بعد ما ودعتهم الكل...أول ما وصلنا للكرهبة...غزرتلي مصدومة...ضيقت عينيا نحكي
أنا:لباس عزيزتي ؟
آنيا:نسيت لوسي
أنا:متخافش عليها...من غدوة تكون عندك
آنيا:نوح أنا ولا مرة عديت ليلة من غيرها
أنا:أما ليلتنا مختلفة المرة هاذي
آنيا:علااش ؟
أنا:أركب و مبعد نجاوبك
آنيا:متأكد انها باش تكون بخير
أنا:آنيا ياا حبي...ياخي شكون أهم توا أنا و لا هي ؟ ساعة باش نولي نتنافس مع قطوسة أنا توا ؟
قربت مني شوية...باستني و غزرتلي ندرا كيف تحكي
آنيا:منقصدش...أنا جيست خايفة عليها و كهو
أنا:متخافش عزيزتي...أنا جيست نحبك تتفرغ ليا أنا و كهو
هزتلي براسها باهي...حليتلها الباب ركبت و خلطت عليها...خدمت الكرهبة و شديت ثنية الدار لي كنا فيها مكانش عندي وقت كافي باش نخطط لرحلة أخرى كيما أنو الدار هذيكا أكثر مكان آمن لينا عديت الثنية نسمع في تفاصيل العرس منها و على فرحتها بقدوم الكل...و رغم إني حضرت على كلشي أما حبيت فكرة إني نسمع كلشي منها مرة أخرى غير هذا الكل منجمتش نتعدا جمالها في الفستان...لتوا دقات قلبي تتسارع كي نغزرلها كبست على يدها في لحظة و بستها منها...غزرتلي و تبسمت بالوقت شديت الفران على جنب و نزلت قبلها غزرت لرجال لي وصلو قبلنا بشوية...حليتلها الباب و مديتلها يدي كبست عليا بالوقت...أول ما نزلت حملتها بين يديا دورت يديها على رقبتي تحكي
آنيا:نووح
أنا:إن شاء الله ماكش باش تسألني على لوسي
آنيا:لاا...جيست حبيت نقلك أنو حتى أنا حبيت الطلة متاعك اليوم
أنا:عيشك حبي...مع أنك تأخرت برشا
تبسمت كي خبات وجها في رقبتي و دخلت لدار بستها من رقبتها و حطيتها عالأرض...دارت عندي تحكي
آنيا:إمتى حضرت هذا الكل ؟
أنا:أنا جيست خبرتهم باللي قتلي عليه
آنيا:نووح أناا وقتها حكيت اللي كان يدور في راسي لتوا مش مصدقة أنك نفذت كلشي كنت نقول فيه
مديت يدي شوية و عديت صوابعي على خدها نحكي
أنا:أنا باش نعطيك كلشي تحلم بيه إنتي و نجم عليه جنيتي
آنيا:أنا نحبك أنت و كههو
قربت مني و باستني...قبل ما نجاوبها...حطيت يدي على آخر ظهرها و كبست عليها...غريب برشا الإحساس لي قاعد نعيش فيه...أنها ملكي و بطريقة قانونية زادة مكانش في حسابي جملة...عنقتها أكثر خاطر الراحة هاذي مكنتش نعرفها قبل توا...مكنتش نتوقع أنو باش يجي نهار و نعطي قلبي لمرا أخرى من غير صوفي فقت من سرحتي كي جبدت روحها مني تحكي
آنيا:هاذي أول مرة نعيش فرحة كاملة
أنا:و أنا زادة يا روحي
آنيا:خليك هوني أنا باش نحي الروبة و نرجع خاطرها رزينة برشا
جبدتها من يدها قبل ما تبعد و نزلت عليها شوية نحكي
أنا:خليك...تو ندبر راسي وحدي
آنيا:مفهمتكش
أنا:إيجا عندي...تو نفهم حبي
نزلت عليها و هزيتها بين يديا مرة أخرى...دخلت للبيت و حطيتها...غزرتلي تحكي
آنيا:حتى الكعب نحب نحيه...خاطر وجعني برشا و لازمني ناخو دوش زادة
أنا:كههو ؟
آنيا:تذكرت...دبشي في البيت لأخرى...برا جيبهولي أنت...خاطر بالرسمي معاادش نجم نمشي أكثر
عديت عينيا على تفاصيل وجها و تبسمت...فرد وقت كبست على أجنابها و دورتها..وين قابلت المرايا حضنتها من تالي نحكي
أنا:والله مزلت مشبعتش منك و إنتي بالمنظر هذا
نزلت عليها شوية...بستها من كتفها و رقبتها...وين حسيت برعشتها...مديت يدي شوية و حليت أول زر من الفستان...و ضيقت عينيا عينيا نحكي
أنا:قداش من زر موجود هوني ؟
آنيا:منعرفش...عديت برشا وقت نستنى فيهم باش يسكروها
أنا:مخذيتش بالي لتفصيل هذا و لا كنت منعتهم
آنيا:ميساالش...أنا حبيت الفستان هذا برشاا
أنا:و أنا حبيتك فيه يا روحي
مدت يدها شوية و حطتها ورا ظهرها...تحكي
آنيا:كمل حلهم توا نووح...خاطر نحس فيه مكبوس برشا عليااا
أنا:تدلل جنيتي
آنيا:عيشك يا روحي
عديت عينيا على وجها من المرايا و كملت حليتهم ورا بعضهم...كبست عليه بيديها زوز...دورتها عندي مرة أخرى و عديت صوابعي على خدها نحكي
أنا:هدي روحك صغرونتي
آنيا:علاش قاعد تغزرلي هكا ؟
أنا:آنيا يااخي أنا باش نشوفك لأول مرة هكا ؟ علاش التوتر هذا الكل
آنيا:منعرفش
مديت يدي لآخر ظهرها و قصيت رعشة شفايفها كي نزلت عليهم...أصلا منجمتش نقاومها أكثر..طاح الفستان بعد ما حطت يدها على صدري...جبدت روحي شوية و عديت عينيا على بدنها لي بقى مغطي ورا القطع لي كانو تحت الفستان...جيت باش نحكي...عنقتني قبل ما ننطق بحرف واحد...عديت يدي على ظهرها و خذيت نفس من ريحتها...منحبش نوترها أكثر و لا حتى نظغط عليها أكثر...يكفي أنها ملكي توا و بين يديا زادة و معااد يهمني حتى شي آخر في الدنيا هاذي الكل.

🔸️آنيا_تحكي:
عديت يدي على رقبتو من تالي و جبدت روحي شوية وين جات عيني في عينو...منعرفش علاش مزلت متوترة من غزرتو ليا و من ليلة هاذي الكل نزلت على شفايفي شوية نحكي
أنا:غمض عينيك
هز حاجبو مستغرب...حتى انا منعرفش علاش قتلو هكا...تبسم يحكي
نوح:أغزرلي هوني...مانيش باش نمسك و لا حتى نفرض عليك حاجة إنتي متحبش عليها...أكا علاش نحبك تهدي روحك و ما تخاف من حتى شي
أنا:مانيش خايفة منك
نوح:ملا شبي حبي
أنا:حتى شي
نوح:إيجا عندي تراه
كبس على يدي و عاوني باش نخرج من الفستان كبست على يدو و نحيت الكعب بيدي لأخرى..غزرلي ندرا كيف يحكي
نوح:آنيااا
أنا:مممم
هزيت عينيا في وجهو باش نحكي معاه...نزل على شفايفي بالوقت...لدرجة إني فقدت توازني لولا يدو لي دارت على ظهري و شدتني...كبست على أجنابو و ضعت معاه أكثر...جبد روحو مني شوية و كبس على خدي يحكي
نوح:إنتي باش تجيب آخرتي يا جنيتي
نزلت على شفايفي شوية و كبست على جنبو أكثر نحكي
أنا:نجم ناخو دوش تواا ؟
نوح:و تخليني ؟
أنا:مانيش باش نطول يكفي أنك تجيبلي دبشي لهوني
هزلي براسو باهي...خذيت نفس و جبدت روحي منو شوية...دخلت لبيت البانو و حطيت ساقي على حرف التوالات باش نحل السبتة لي مربوطة  مع الكولون فرد وقت دورت راسي شوية...جات عيني عليه و هو يغزرلي من ورا البلار...طيش الفاست و عطاني بظهرو تبسمت و كبست على الزر لي يحجب الرؤية خذيت دوش و شيحت شعري...فرد وقت حليت القجر لي خليت فيه الدوبياس لي حطو ليلتها في الفاليز متاعي لبستو تحت الكاب و خرجت...هزيت راسي شوية و غزرتلو...واقف جنب الشباك...حط الكأس من يدو يحكي
نوح:صحة لحبي
أنا:عيشك يا روحي
قرب مني شوية و عدا صوابعو على خدي...يحكي
نوح:دبشك هوني...تنجم تاخو راحتك لين نكمل الدوش متاعي
أنا:و تخليني ؟
غزرلي ندرا كيف...مديت يدي شوية و حطيتها على صدرو...غزر لشفايفي يحكي
نوح:آنياا...والله نحس في روحي أول مرة نتعامل مع مراا
أنا:باهي برشاا...خاطرني نحبك تنسى كل النسا لي تعداو في حياتك قبلي
نوح:علااش انا مزلت نخمم في شي آخر و إنتي معايا
أنا:ملا علاش تحب تخليني ؟
نوح:والله أنا قاعد نحاول نقضي على التوتر لي تمكن منك...خاطرني وليت نحس بيه حتى أنا
أنا:أنت توا وليت متاعي وحدي...أصلا هاذي أول مرة نحس روحي مرتاحة في علاقتنا و منخافش من فكرة أنو كلشي ينجم يوفى بيناتنا
نوح:و أنا مرتاح أكثر جنيتي
تبسمت و قربت منو أكثر...بستو من شفايفو و جبدت روحي شوية...شدني من حزام الكاب يحكي
نوح:برشا عليا هذا الكل
أنا:باهي مانيش باش نوترك أكثر...هاني باش نلبس دبشي و أنت تنجم تاخو دوش توا
جبدت روحي منو و قربت ناحية الفاليز لي خلاها فوق الفوتاي...و مديت يديا زوز حليت الكاب و نحيتو...وين طاح عالأرض بالوقت...و حليت الفاليز زادة...محاولة مني باش نلقى أي قطعة...و غزرتلو نحكي
أنا:ياخي بدلت رايك ؟
عديت عينيا على تفاصيل وجهو لي تكبست...تبسمت و نزلت راسي مرة أخرى...وين هد عليا في لحظة و جبدني من يدي يحكي
نوح:شنوة هذا ؟
أنا:توقعت أنك تحب تشوف القطعة هاذي عليا
نوح:و ناوية تلبس فوقها تواا ؟
أنا:أنت قتلي ألبس لين نكمل الدوش متاعي
نوح:بطلت...نجم ناخو دوش مبعد
أنا:علااش ؟
نوح:عندنا حاجات أهم من الدوش توا...مدام ديلان
هزني بين يديه في لحظة...حطني في وسط السرير و نزل عليا يحكي
نوح:إحنا توا باش نكتبو بداية جديدة خاصة بينا حطيت يدي على رقبتو و جبدتو عندي أكثر...حتى أنا نحب نعيش معاه كل لحظة من الليلة هاذي...كبست على الشوميز متاعو...أول ما نزل لرقبتي...وين كمل حلها و نحاها بالوقت...دقات قلبي كانت تقوى بعد كل لمسة منو...يمكن على خاطر ولا مرة توقعت أنو باش يجي نهار و نعيش الحب هذا الكل معاه...مع الشخص لي ظهر في حياتي فجأة و عطاني كلشي تحرمت منو قبل...غير تفاصيل الليلة هاذي لي خلاني نعيشها كيما حلمت بيها بالظبط...غمضت عينيا موجوعة و حليتهم مع لمسة شفايفو على شفايفي فرد وقت عدا يدو على شعري يحكي
نوح:كنت و باش تبقى أحلى حاجة في حياتي
تبسمت من غير حتى كلمة...لتوا نحس في روحي تحت تأثيرو...باسني من عيني و تبسم يحكي
نوح:والله أنا لتوا مشبعتش منك و لا من الروج لي هبلتني بيه
غرست وجهي في صدرو...خاطرني منجمتش نغزر لعينيه أكثر...ضحك و حط يدو تحت ظهري...تكى لتالي و جبدني عندو...حطيت راسي على صدرو و تبسمت بعدلي خصلات شعري يحكي
نوح:شبي حبي ؟
أنا:تذكرت أول لقاء بينا...وقتها كنت مجرد آلة و كهو الشي الوحيد المطلوب مني..هو نلبي رغبات الشخص لي باش نكون معاه...يعني ولا مرة توقعت نعيش هذا الكل مع الشخص لي نحبو و بالطريقة هاذي...مزلت خايفة من فكرة أنو هذا الكل يطلع مجرد حلم مش أكثر
غرس يدو في شعري و باسني من راسي...يحكي
نوح:و أنا مكنتش نتوقع إني باش نعشق نفس الطفلة لي كانت ما تفهم حتى كلمة مني
تبسمت و هزيت راسي شوية...عديت عينيا على وجهو نحكي
أنا:يمكن أنت الوحيد لي تفهمني بالقدا..خاطر أي شخص نحكي معاه...نظطر نعاود كلامي أكثر من مرة
نوح:شعندي نعمل...ربي معاياا
أنا:نووح أماان
ضحك و قرب مني شوية...باسني من شفايفي و كبس على شعري يحكي
نوح:محلااك يا عمري 
تبسمت و دورت يدي عليه أكثر...وين غفيت من غير ما نحس...و بالنسبة ليا كانت أول مرة نرقد مرتاحة و
من غير ما نخمم في حتى شي آخر...سواء من الماضي و لا من المستقبل

🔸️نوح_يحكي:
مديت يدي شوية و عديت صوابعي على خدها..حتى أنا مش مصدق لي صار الكل...لدرجة منعرفش قداش من ساعة عديتها و أنا نغزر لملامح وجها...قبل شهور من توا مكانش عندي أدنى إستعداد لخطوة كيما هاذي و إني نربط روحي بأي مرا مهما كانت علاقتي بيها خاصة بعد خسارتي لصوفي و لي عشتو بعدها مكنتش نتوقع أنو عندي فرصة باش نبدا من جديد و لتوا نحس ظهور الجنية في حياتي معجزة...خاطر كلشي كنت نخمم فيه قبل تبدل وقت خرجت في حياتي...تبسمت كي تحركت شوية و حلت عينيها دوب غزرتلي و غمضتهم مرة أخرى...بعدتلها خصلات شعرها لي طاحو على وجها و نزلت بصوابعي لشفايفها نحكي
أنا:صبااح الحب
قربت مني أكثر...و حطت يدها على جنبي...بستها من راسها نحكي
أنا:هياا قوم...هاك عديت شطر النهار راقدة
آنيا:منحبش
أنا:إذا ليلة وحدة و تعبت هكا...ملا شنية باش يصير فيك مبعد ؟
هزت راسها شوية و غزرتلي ندرا كيف...تحكي
آنيا:مفهمتكش
أنا:مش لازم تفهمني المرة هاذي يا روحي..توا باش تاخو دوش و نخرجو مع بعضنا
آنيا:خلينا هوني...منحبش نخرج تواا
أنا:باهي عزيزتي كيما تحب
آنيا:أما وصيهم يجيبولي لوسي
أنا:بالله ؟ وقتها هي توا ؟
آنيا:نحب نطمن عليها...زيد مش مستانسة نبعد عليها برشاا
أنا:أنا أهم من لوسي متاعك تواا...أكا علاش نحبك تهتم بيا وحدي
آنيا:ميجيش تغير من قطوسة...شنية باش يقولو عليك مبعد ؟
أنا:إذا كانت تشاركني فيك هكا...طبيعي نغير منها و زيد توقعت نسمع كلام آخر منك في صباح عرسنا
خذيت نفس و جبدت روحي منها شوية...كبست عليا بيدها و طلعت عندي أكثر...وين حسيت بأنفاسها لي ضربت في وجهي..حطت يدها على خدي..دوب باستني و غزرتلي تحكي
آنيا:لا لوسي و لا أي حد غيرها...ينجم يفك بلاصتك في قلبي...غير هكا أنت متاعي وحدي و ممنوع أي حد يشاركك معايا
عديت يدي على ظهرها و قلبتها تحتي في لحظة غمضت عينيها موجوعة...تبسمت نحكي
أنا:مدام هكا...منحبش نلقى لوسي في حضنك كي نبدا موجود
آنيا:معناها ماكش باش تجيبهالي توا ؟
أنا:لاا...اليوم إنتي ليا وحدي
آنيا:باهي...مدام هكا نحبك تحضرلي فطوري خاطرني ما كليت حتى شي أمس
تبسمت و نزلت عليها شوية...دوب بستها و جبدت روحي منها...نحكي
أنا:إيجا عندي تراه
وقفت و هزيتها في حملتي...دخلتها لبيت البانو..وين ظطريت نعاونها....خاطرني حسيتها مش قد بعضها جبدت المنشفة و دورتها عليها بعد ما لبست الكاب تكات عليا تحكي
آنيا:نووح والله جعت برشااا
أنا:تو نحضر لجنيتي فطورها
لبست دبشي و سبقتها...غطست نحضر في الفطور لدرجة محسيتش بيها كي جات عندي...تلفت عندها في لحظة و غزرتلها مروهج...مظهرها بالشوميز متاعي و شعرها لي مظفور على جنب...رجعني سنين لتالي في لحظة...كأنو صوفي واقفة قدامي بالظبط غمضت عينيا و عاودت حليتهم...ما نحب نخمم في حتى شي يخص الماضي...خاصة توا و في حضورها معايا...غزرتلي ندرا كيف و مدت يدها لشعرها تحكي
آنيا:هطا أحسن...خاطرني تقلقت منو
أنا:حلو آنيا...معاادش تشدو بالطريقة هاذي
آنيا:نحلو بعد ما نفطر
أنا:توااا
غزرتلي مصدومة...أصلا منعرفش كيفاش ضربت يدي على الرخامة لين تنطر الصحن...خذيت نفس طويل و عاودت غزرتلها...حطيت كلشي من يدي و قربت منها نحكي
أنا:منقصدش لي صاار
آنيا:هاني باش نحلو توا
مدت يديها زوز باش تحلو...كبست عليهم و نزلتهم نحكي
أنا:خلييه
عنقتها قبل ما تنطق بحرف وااحد...ماهوش ذنبها اللي صار من شوية...نظن لازمني مجهود أكبر باش نمحي الماضي متاعي الكل...خاطر حياتي باش تكون ليها بعد توا...ما نحب حتى شي يأثر على علاقتنا مهما كان جبدتها من عندي شوية و بستها من شفايفها...غزرتلي تحكي
آنيا:شنية صاار ؟ شبيك مش قد بعضك
أنا:متغزرليش هكاا...مكاانش تتحمل النتيجة مبعد
آنيا:شقصدك ؟
نزلت عليها شوية...دوب تكلمت في وذنها...جبدت روحها مني...تبسمت مع خدودها لي حمارو في لحظة و هزيتها على كتفي..رجعت لتالي و حطيتها على الرخامة قدامي...و عاودت بستها نحكي
أنا:ما نحب حتى شي يخلي جنيتي تتغشش
آنيا:أنت لي كشيت عليا من بكري
أنا:الحق علياا ملاا
هزتلي براسها باهي...كملت الفطور و نزلتها...دورت يديها زوز عليا تحكي
آنيا:إمتى نرجعو لأثينا ؟
أنا:بعد يومين و لا ثلاثة
آنيا:كهوو ؟
أنا:عندي خدمة تستنى فيا...منجمش نعطلها أكثر من هكا يا روحي
آنيا:بااهي و تتوقع أمك باش تقبل عرسنا ؟
أنا:علاش حتى تخمم فيها توا ؟
آنيا:منعررفش...جيست نحس في روحي متوترة شوية من الحكاية
أنا:إنتي مرتي توا و على الأساس هذا باش تقابل الكل معادش نحبك تخااف من مواجهة أي حد
آنيا:أنا جيست منحبش نكون المشكلة بينك و بين أمك
أنا:اللي بيني و بين أمي ما عندك حتى ذنب فيه و في وجودي ما عندها حتى كلام معاك...أما في غيابي نحبك توقف أي حد يقرب منك عند حدو حتى لو كانت أمي واضح كلامي ؟
هزتلي براسها إيه..حاوطت وجها بيديا زوز و بستها مرة أخرى...نعرف أنو زمردة ماهيش باش تعدي الموضوع هذا جملة...أكا علاش نحبها تعتمد على روحها سواء في وجودي و لا في غيابي...ما نحب حتى حد يأثر عليها و لا حتى يخلي ثقتها في نفسها تزعزع مرة أخرى...أهم شي عندي توا...هو أنها تتعلم كيفاش تحمي روحها مهما كانت الظروف و ما تخاف من حتى شي يعترض طريقها و حتى أنا نحب نبدا معاها كلشي من الصفر..من غير ما نخلي الماضي متاعي حائل بيني و بينها...يكفي أني نعدي عمري معاها و كهو.

🔸️إلينا_تحكي:
غمضت عينيا مع النسمة الباردة لي ضربت في وجهي و قعدت بجنبو...مديت يدي شوية و عديتها على ترابو حتى بعد الوقت لي تعدا...منجمتش نتقبل فكرة أنو هو ماهوش موجود في حياتي...مانيش باش نشوفو و لا نشم ريحتو زادة...الحرقة لي مزلت نحس بيها أكبر من إني نوصفها بشوية حروف خذيت نفس نحكي
أنا:نعرف أنك متغشش مني عاللخر...خاطرني خليتك وحدك...أصلا إحنا ولا مرة تفرقنا على بعضنا...و لتوا منحبش نتقبل فكرة أنك بعيد عليا برشا...أنا مزلت متعلمش نعيش من غيرك...من غير ما نحكيلك تفاصيل يومي الكل...أما قاعدة نكتب فيها ليك أنت غير هذا الكل عندي توأم...كيفنا إحنا بالظبط...و أكيد إسم ولدي باش يكون كيفك أنت بالظبط...أما بنتي باش نسميها نينا...تتذكر ميلا...كانت تناديني بالإسم هذا قبل..حسيت أنو مناسب برشا...حاجة أخرى نحبك تعرف أنو في الشهور هذوما...أنا نجمت نسترجع شوية من قوتي...قوة كافية باش تخليني نعرف كل شخص كان السبب ورا موتك...بعد توا أنا باش نعمل كلشي نجم عليه في سبيل إني نكشف الحقيقة للكل يا روحي...و كل شخص كان عندو يد في اللي صار معانا...صدقني باش نخليه يدفع الثمن غالي برشااا...و مهما كانت اللعبة هاذي طويلة أنا باش نكملها للأخير
كبست على ترابو أكثر مع دموعي لي هبطو ورا بعضهم الغريب في الأمر...أنو الحنين للمكان هذا تحول لحقد أول ما هبطت من الطيارة...فقت من سرحتي كي وقف قدامي و مدلي يدو...كبست على كرشي و وقفت بمساعدتو...مد يدو شوية و عدا صوابعو على خدي يحكي
أيان:إنتي لباس ؟
أنا:لبااس...جيست نحب نقابل إسكندر دورمان
أيان:تواا ؟
أنا:تواا
غزرلي مستغرب..خاطر معندناش ساعتين من لي وصلنا لهووني...هزلي براسو باهي يحكي
أيان:الخطوة هاذي باش تخلي أركان يعرف بوجودك هوني
أنا:أركان ما ينجم يعمل حتى شي...إذا قررت منخليهش يشوفني
أيان:فاش قاعدة تخمم ؟
أنا:نعاود اللعبة من الأول
أيان:إنتي حاامل و ممكن تضر صغاارك
أنا:أنت موجود معايا و باش تحميني...نظن هذا أبسط شي تنجم تعملو باش تثبت أنك تحبني بالحق مش مجرد حديث باش تنتقم من أركان و كهو
كبس على يدي و قرب مني أكثر...غزرلي ندرا كيف يحكي
أيان:أنا جيست منحبكش تعب روحك...هذا الكل تنجم تعملو بعد ما تولد
أنا:مانيش باش نضيع وقتي أكثر من هكا
مديت يدي شوية و شاورت لقبر ويليام...نحكي
أنا:لي دفنتو هووني...كان قطعة مني و من روحي و لتوا منعرفش نعيش من غيرو و لا حتى نتقبل فكرة موتو...ويليام كان حياتي الكل و سرقوه مني في لحظة إذا أنت باش تعاوني تفضل...إذا لااا أبعد من طريقي
جبدت يدي منو و بعدت عليه...خلط عليا بالوقت جبدني من زندي و دورني عندو يحكي
أيان:تعرف إني باش نكون معاك في أي قرار
عديت عينيا على وجهو من غير حتى كلمة و سبقتو للكرهبة...خلط عليا و ركب بجنبي يحكي
أيان:ماكش باش تقابلو في الوكالة
أنا:لاا..أعطيه الموقع اللي باش نقلك عليه...باش يجي من غير تردد
أيان:باهي
تكيت لتالي بعد ما عطيتو الموقع و حطيت يديا زوز على كرشي..آخر مواجهة لينا كانت في المكان هذا و نظن أنها أحسن بلاصة نجمو نحكيو فيها غزرت لأيان نحكي
أنا:أقف هوني
أيان:رد بالك على روحك
أنا:متخافش عليا
حليت الباب و نزلت..أصلا وصل قبلنا...كنت متأكدة أنو ماهوش باش يتأخر..جات عيني في عينو بعد شهور نزل راسو شوية و غزر لكرشي..وين حسيتو تصدم أكثر...وقفت قدامو من غير حتى كلمة..تبسم يحكي
إسكندر:إليناا
أنا:حضرة المحقق
إسكندر:وين كنتي و شنية لي صار معاك ؟
أنا:كنت في مكان آمن..بعيد عليك و على أركان القايد زادة
إسكندر:تعررف أنو أنا مستحيل نضرك
أنا:أنت لي جبرتني ندخل في حاجة أكبر مني..وين خسرت أغلى شي عندي في الدنيا و مدامك المسؤول الأول على اللي صار معايا..أنت مجبور تحقق في موت خويا و تعرف شكون ورا الحادثة سواء أركان و لا غيرو..أي شخص عندو علاقة لازم يدفع الثمن غااالي
إسكندر:التحقيق ممنوع في القصر متاعو و هذا اللي باش يصعب المهمة..إذا كانت صوفي توفات في المسرح و ما وصلنا لشي..تتوقع الخطوة هاذي باش تكون سهلة
أنا:أنا باش نعاونك...في الأول لازمك تعاود التحقيق في حادثة صووفي...أكيد فما ثغرة أنت تعديت عليها و لا أي حد فينا محكاش عليها...إذا وصلنا للمجرم أكيد نوصل لشكون حرمني من خوياا
إسكندر:باااهي...انا باش نعاود التحقيق من النقطة لي بدا منها كلشي
أنا:بااهي برشااا...أنا نحب نكون طرف من التحقيق هذا من غير ما يعرف حتى حد بالموضوع و الأهم أنو أركان ميعرفش بوجودي هوني
إسكندر:وين كنت ؟ و شنية صار معاك ليلتها ؟
أنا:لي قتل خويا..حاول يخلص عليا أناا زادة و كنت بحاجة إني نبعد لفترة باش نجم ناقف على ساقيا من جديد
إسكندر:إنتي حبلة منو ؟ رغم كلشي صار معاك ؟
أنا:علاقتي بأركان معقدة و ما يفهمها حتى حد من غيري أنا و هو و اللي في كرشي توا ما عندو حتى علاقة بالحقائق اللي باش تظهر..خاطر يخصني أنا و كهو و توا نحب نعرف اذا أنت موافق ؟ و لا نخلي شكون يستلم التحقيق هذا مكانك
إسكندر:أنا باش نكون معاك ديما..أصلا ولا مرة توقعت أنو يصير معاك هذا الكل و إنتي تحت حماية أركان القايد
عديت عينيا على وجهو من غير حتى كلمة...المهم عندي توا هو نجاح أول خطوة...خاطر بعد توا باش نشرف على التحقيق في موت خويا بنفسي و مهما كان الشخص لي ورا موتو..نهايتو باش تكون على يدي أنا و كهو

🔸️آنيا_تحكي:
نزلت من الكرهبة و كبست على يدو...رغم التوتر لي حاسة بيه الكل أما وجودو معايا في اللحظة هاذي عطاني قوة كافية...هزيت راسي شوية و غزرتلها واقفة على جنب تغزرلنا من بعيد...استغربت ردة فعلها خاطرني متوقعتهاش منها...دخلت معاه للأصونصير و هزيت عينيا في وجهو نحكي
أنا:نووح
تلفت عندي شوية...و حط يدو على كرشي...دزني لتالي و نزل لشفايفي يحكي
نوح:شنية تحب مرتي ؟
أنا:شي..نسيت اللي كنت باش نقولو
عدا صوابعو على خدي و باسني بالوقت...مديت يدي و كبست على جنبو...جبد روحو شوية و قرب لوذني يحكي
نوح:شنعمل فيك تواا ؟
تبسمت و دورت يديا زوز على رقبتو...حضنتو و بستو من رقبتو نحكي
أنا:خليك معايا و كهو
نوح:نكمل الخدمة لي عندي و نرجعلك...و يا ريت لوسي متاعك تكون راقدة
أنا:منجمش نتحكم في نومها
نوح:والله أنا حاجتي بمرتي ليلة
تبسمت و دخلت معاه للجناح بعد ما تحل الباب..عاود باسني بالزربة و دخل للبيت...دوب حضر روحو و خرج من جديد...فرد وقت استلمت لوسي من الخدم لي طلعوها مع لي فاليز...دخلت لبيتو و لي عالأغلب باش تولي بيتنا...خذيت دوش و لبست الكاب لي كان عند يدي...و خرجت...عديت دقايق ندور في بيتو كأني نقتل في الوقت لين يرجع..مديت يدي شوية و نحيت القلادة من التمثال...حليتها مرة أخرى و عديت عينيا عليها...و أول سؤال خطر في بالي..زعمة حبها كيما حبني أنا...و كان باش يعرس بيها حتى هي سكرتها بقوة و رجعتها لبلاصتها...منحبش نخمم بالطريقة هااذي...خاطر مجرد ماضي بالنسبة ليه مش أكثر..هو متاعي أنا توا و يحبني وحدي...فقت من سرحتي على صوت الأصونصير استغربت خاطرني ما طلبت حتى شي...خذيت نفي و خرجت من البيت لقيتها تطرد في لوسي بساقها...لي قربت مني تجري هزيتها في حملتي نحكي
أنا:فاش تعمل هووني ؟
زمردة:متحبش نولي ناخو إذنك قبل ما نطلع للجناح متاع ولدي
أنا:الجناح هذا ولا مشترك بيناتنا...يعني متنجمش تدخل من غير إذن
زمردة:تحل لسانك و وليت تعرف ترد الكلام
أنا:أنا جيست جوابتك حسب كلامك و كهو
زمردة:تتوقع وصلت للي تحب عليه ؟
أنا:والله ولدك هو لي طلب يدي مش العكس
زمردة:الله أعلم شنية صاار باش لقى روحو مجبور على خطوة هكااا
أنا:على حسب علمي ماهوش طفل صغير باش يلقى روحو مجبور على حاجة هكاا و نظن كان توجه الأسئلة هاذي ليه يكون أحسن...في الأخير إنتي أمو و ميجيش تخااف منو
زمردة:إنتي باش تدفع الثمن غاالي
أنا:ماانيش خاايفة منك
قربت مني أكثر و وقفت قدامي بالظبط...غزرت لعينيا تحكي
زمردة:اللي صااار ميبدلش حقيقة أنك نكرة
أنا:و ميبدلش حقيقة إني مرت ولدك تواا و نحمل نفس إسمو...يعني مهما كان موقفك و ردة فعلك حتى شي من هذوما يبدل الحقيقة هاذي...النكرة لي قدامك توااا...ولات فرد من عيلتك و على قريب أم أحفاادك زادة...و إنتي معندكش حل آخر من غير أنك تتقبل الحقيقة هاذي و كهو
مدت يدها باش تضربني...شديتها قبل ما توصل لخدي غزرتلي مصدومة و نزلت عينيها للخاتم لي في يدي كبست عليها أكثر و قحرتلها نحكي
أنا:غير أنك تتقبل الحقيقة هااذي...مجبوورة تحترمني زااادة...و متتعدااش حدودك معاياا و إلا المرة هاذي باش تكوني في مشكلة حقيقية
نطرت يدها مني و وخرت خطوة لتالي...تحكي
زمردة:الأياام بيناتناا
أنا:فما حاجات أهم منك في حياتي...لازمني نلتهى بيهم يعني التهديدات متاعك ماهيش باش تنفع معايا بعد تواا
قحرتلي و تلفتت باش تمشي...دخلت لوسي بين ساقيها و شعرة لا قلبتها..حطيت يدي على فمي شدني الضحك من الفازة...دورت راسها غزرتلي و زربت في خطواتها لبرا...غزرت في لوسي نحكي
أنا:هااك حتى إنتي وليت تاخو حقك بيدك
دخلت تحت ساقيا و طلعت للفوتاي...ضحكت و رجعت لتالي...أول مرة نحس روحي مرتاحة بالطريقة هاذي خاصة بعد ما شفت تعابير وجها...و الصدمة لي في عينيها...خاطرني لتوا منسيتش الطريقة لي حكات بيها معايا آخر مرة و مستحيل نسامحها عليها دخلت لبيتي و لبست دبشي...فرد وقت شيحت شعري و لا باش يتعبني أكثر...غير هذا الكل لقيت روحي نخمم في الصورة لي ريتها بكري مرة أخرى لدرجة إني محبيتش فكرة أنو يبقى محافظ عليها بالطريقة هاذي..يعني رغم كلشي مزالت بلاصتها محفورة بيناتنا..غير هكا حسيت بالفضول بخصوص علاقتهم زعمة كانت سطحية و لا عاش معاها كلشي كيما لورا بالظبط...يمكن لو مريتش القلادة مكنتش باش ندخل في حرب الأسئلة هاذي لدرجة إني محسيتش بيه كي رجع..تبسمت و قربت منو بالوقت عنقتو نحكي
أنا:تأخرت برشاا
نوح:كنت نسمع في المحاضرات اللوطة
أنا:أكيد حكاتلك كلشي
نوح:المهم أنك تعلمت من كلاامي...حبيت أنك دافعت على رووحك و ياا ريت تعمل الشي هذا مع الكل
أنا:مقصدتش إني نحكي معاها بالطريقة هذيكاا..أما ظطريت نجاوبها
نوح:ميسالش عزيزتي..المهم أنك تكون مرتاحة
أنا:إرتحت بوجودك معاياا
عدا صوابعو على خدي و باسني من شفايفي...يحكي
نوح:والله أنا توحشتك عاللخر..هاني باش ناخو دوش و نرجعلك
أنا:بااهي...هاني باش نطلب الأكل و نحط لوسي في سريرها
أنا:يكوون أحسن خاطرني منحبهاش تشاركني فيك جملة
تبسمت و هزيتلو براسي باهي..باسني و بعد عليا وقفتو نحكي
أنا:نوووح
نوح:شنوة تحب جنيتي ؟
أنا:شي...نستنى فيك
تبسمت و نزلت عينيا من وجهو..كنت باش نسألو على القلادة..أما سكت خاطر مش وقتها و ما نحب نخلق حتى مشكلة جديدة بيناتنا بعد اللي تعدينا بيه الكل

🔸️إلينا_تحكي:
حطيت يديا زوز على كرشي و تكيت لتالي...الجو فرهدني أكثر..تبسمت و أنا نتحسس في الحركة متاعهم هوما الشي الوحيد لي يخليني قوية لتوا و نستمر أكثر أصلا مانيش باش نتراجع بعد ما خذيت الخطوة هاذي مانيش باش نهدى حتى نعرف شكون اللي حرمني من خويا و جبرني نعيش الألم هذا هزيت راسي كي قربت مني تحكي
جينا:مدام إلينا...لازم تاخو دواك توا
هزيتلها براسي باهي و شديتو عليها...شربتو و غزرتلها نحكي
أنا:أياان وصل ؟
جينا:سيد أياان هووني...فما شكون معاه في المكتب معاه...خبرني أنو باش يجي عندك بعد شوية
أنا:شكون معااه ؟
جينا:منعرفش
أنا:باهي عيشك جيناا
عديت عينيا على الفراغ مستغربة...خاطر مش بالعادة يقابل شكون في الدار...خذيت نفس و هزيت روحي وقفت...كبست على الشال لي فوق أكتافي و دخلت من الحديقة...غزرت لوحدة من الخدم نحكي
أنا:ياخي الضيف متاع أيان مزال هووني ؟
هزتلي براسها إيه...نزلت على شفايفي شوية و طلعت للمكتب متاعو...منعرفش علاش حسيت بالفضول ناحية الضيف لي عندو...جيت باش ندخل أما تراجعت...خاطر حسيت روحي باش نتحط في موقف خاايب...خاصة أنو الأمر ميهمنيش برشاا وخرت خطوة لتالي و تلفت باش نمشي...قدمت خطوتين و حبست مع صوت الباب لي تحل...لي خلاني ندور من غير تردد...هزيت راسي شوية وين جات عيني في عينها...لقيت روحي واقفة نغزرلها من غير حتى حركة...كأني قاعدة نفحص في تفاصيل وجها لي كانت طبق الأصل علياا...لون عينيها و شفايفها و حتى ملامحها زادة...الفرق الوحيد لي بيناتنا هو العمر..عدات عينيها على وجهي و نزلت بيهم لكرشي حسيتها مصدومة أكثر و هي تغزرلي لدرجة إني لمحت دموعها و يدها لي كانت ترعش و هي تمد فيها ناحيتي تبسمت تحكي
كاثرين:إلينااا
أنا:كاااثرين
وخرت خطوة لتالي قبل ما تمسني...و لا حتى تحط يدها علياا...مكانش صعب عليا إني نتعرف عليها و نعرفها من أول غزرة...و رغم حسيت روحي عاجزة باش نبعد عليها...أما كل ذرة حقد ناحيتها في قلبي حضرت في اللحظة لي جات عيني عليها...بسببها هي تعرفت على إسكندر و بسببها هي لقيت روحي وسط لعبة كلفتني خوياا...طول السنين لي فاتت...كنت نعتقد إني بحاجة أم...أما طلعت غاالطة...أنا ولا مرة كنت بحاجتها في حياتي و حتى لو كنت نسخة منها مستحيل نكون كيفها و نتخلى على أغلى شي عندي مديت يدي شوية و وقفتها نحكي
أنامتقربش مني أكثر
هزتلي براسها لا و حطت يدها على فمها...قربت مني أكثر تحكي
كاثرين:إليناا...أسمعني مرة وحدة
ضحكت بالوقت...خاطرني متوقعتش الجملة هاذي منها...فرد وقت هزيت عينيا في وجها نحكي
أنا:ماكش مجبورة تبرر...خاطر ما تهمني حتى كلمة من اللي باش تقولها
كاثرين:لحظة بررك
هزيت راسي شوية و قحرت لأيان لي كان واقف وراها و وخرت لتالي...زربت في خطواتي لبيتي  سكرت الباب ورايا و تكيت عليها...كبست على كرشي مصدومة خاطر بالرسمي ما كان عندي حتى إستعداد إني نقابلها و لا نشوفها...مسحت دموعي لي هبطو ورا بعضهم و خذيت نفس نحكي
أنا:يززي كهوو إلينااا...المراا هاذي مجرد نكرة بالنسبة ليك مش لاازم تبكي عليها جملة
قربت شوية من الكوافوز و إستندت عليها بيديا زوز فرد وقت طلعت راسي و غزرت للباب لي تحل..دخل عندي يحكي
أيان:سوااان
أنا:نحب نبقى وحدي
أيان:هدي رووحك
أنا:فاااش تعمل المراا هااذي هووني ؟
أيان:جات باش تشوفك
هزيت عينيا في وجهو بالوقت و قحرتلو نحكي
أنا:جات باش تشوفني ؟ تتوقع أناا نحب نقابلها و لا نغزر لوجهاا ؟ أصلا أنت كيفاش تجيبها لهووني و أنا معااك...كيفااش تعمل فيااا هكااا أياان
ضربت يدي على الكوافوز و قحرتلو بالوقت...خذيت نفس و حطيت يدي على كرشي...قرب مني شوية يحكي
أيان:لبااس مااهو ؟
أنا:خليني وحدي أيااان
أيان:منجمش نخليك في الحالة هااذي
أنا:أنا لباااس...يكفي أنك تخلييني وحدي و كهو 
أيان:باهي باش نمشي...أما عالأقل لي نطمن عليك كبس على يدي و رجع معايا لتالي...قعدني على طرف السرير يحكي
أيان:متعبش رووحك أكثر...و نوعدك ماهوش باش يتكرر الأمر هذا مرة أخرى...إذا متحبش تشوفها ماهيش باش تجي لهوني جملة
هزيتلو براسي إيه و كبست على كرشي...نحكي
أنا:أمشي تواا
أيان:متأكدة أنك لبااس ؟
أنا:متخاافش علياا
جبد روحو مني و خرج من البيت...عديت يديا زوز على وجهي و رجعت شعري لتالي...نحب نتخلص من ملامحها لي ترسخت داخلي...نحب ننسى إني ريتها و سمعت صوتها...بالنسبة ليا هي ميتة تواا... وجودها و عدمو نفس الشي...أنا عديت عمري الكل من غيرها من غير ما نعرف إحساس الأم و لا نجربو...أنا فقدتها في أصعب أياام حياتي...و مانيش بحاجتها توا..بعد ما خسرت كلشي عندي...غمضت عينيا موجوعة من الضربات لي حسيتهم في كرشي...كأنهم متعمدين يذكروني بوجودهم معايا...تبسمت و عديت يدي على كرشي...نحكي
أنا:أنا مستحيل نكوون كيفها...مستحيل نتخلى عليكم و لا حتى نحرمكم من بوكم..منعرفش كيفاش باش نسوي الأمور هذوما الكل...أما وعد مني ما نحرمكم من حتى شي في الدنيا
تكيت لتالي و خذيت نفس طويل...منحبش نغشش روحي أكثر بسبب اللي صار...خاطر هي بالذات ما تستهل مني حتى دمعة و حتى اللحظة هذيكا باش نفسخها من بالي كأنها مصارتش جملة...في الدنيا هاذي معاد يهمني حتى شي من غير صغاري و حق خويااا لي باش نرجعو...مهما كلفني الأمر و مهما كان الخطر اللي يستنى فيا مانيش باش نرجع لتالي مانيش باش نهدا قبل ما نطفي الحرقة لي شعلت في قلبي.
#آفروديت🧚‍♀️
#سمر_القايد💜