ملكوت_ مهمة سرية//

ملكوت♤ البارت..7..

《 أّثًـنِأّنِ لَأّ تٌـبًقُى مًعٌهّـمً..

مًنِ لَأّ يِّفُـهّـمًکْ وٌمًنِ لَأّ يِّعٌرفُـ قُيِّمًتٌـکْ 》
.
.
البدايه...

*ازادي*

نزل هل خبر مثل الصاعقه على گلبي غرغرت عيوني دمع والدنيا افترت بيه حسيت نفسي طحت بحفره ماكدرت اطلع منهه جسمي انهد حيله وطاح النقال من ايدي كمت امشي كوه مادري وين اروح بس الاعرفه اريد اروح لحسام

اريد اشوفه اريد اكله ليش هيج سوه بيه عل اقل جان كلي جان طلكني ليش هيج يهيني بهل طريقه ويتزوج علي بدون علمي مشيت مسافه واني رجلي يمشن كوه وجسمي كله يرجف ماتحملت انلوت رجلي وكعدت عل ارض لمحت بصوره مشوشه رجال كبالي نزل على ركباته ويحجي وياي بس ماسمعه ثواني وسودت الدنيا بعيني وطحت مغمي علي ..

صوت اسعافات وناس تحجي يمي واحد ينده باسمي ماعرف رجال مره فتحت عيوني قليل ماشوف شي كله غواش كبالي واخيرا لمحت زهراء

كبالي بشكل واضح غمضت عيوني واستسلمت لدموعي صرت ابجي واشهك لزمت ايدهه عصرتهه حيييل وابجي واحجي..

_ليش هيج يسوي بيه زهراء ليش يتركني ليش يتخلى عني اريده اني احبه راح اتخبل بحبه ولج اني كل يوم انام واتمنى ماكعد لان الموت صار اهون الي من عيشتي بعيده عنه

زهراء اريده حبابه وديني اله اريد اشوفه اريد اكله ليش هيج يسوي بيه ليش ضحى بينه وبحبنه زهراء كسرني كسر اخر فرحه بكلبي جان بكلبي جمره وحامله جويتهه لخاطره

وهسه تركني اااخ يمه كلبيييي ربي اخذ روحي فدوا ربي احلفك بنبيك وحبيبك المصطفى اخذ روحي ربي اخذ روحي وخلصني اريد اجي يمك ربي اريد ارتاح يمك لا تبعدني عنك لا تتركني بهاي الدنيا الوحدي

اخذني الك يارب اخذني يمك خليني قربك ماريد اعيش بالدنيا بعد ماريد شي ياربي بس اكون يمك وماضل بهاي الدنيا بعد ربيي..ولج خيه هذا وليدي هذا طفلي جنت معتبرته

ولج جنت ادللة واحن عليه مثل حنيه الام على طفلهه انحرمت من الاطفال وكال اني ابنج وانتي بنتي ليش هسه خلف بحجيه ليش كسر حجايته وكسر روحي وياهه لييش ياربي ليييييش...

*كله هذا كلامي اهلوس بي بصوت مبحوح ومخنوك كلمه تطلع مني وكلمه ابلعهه اسمع صوتي بس بعيد واسمع صوت زهراء وياي تتوسل بيه ان اسكت واهده واني احس جسمي كله ينتفض ويلوع

راسي وصدري بركان مجمر ساكن بي روحي فرفحت واني اصيح جيبولي حسام اريد حسام اريد اشوفه ..حسيت بنغزه صارت بايدي خفيفه وبعدهه صار هدوء براسي وضلام وماوعيت على شي بعد ....
.
.
.

آيهب____

العمر ٢٨ الطول ١٧٩ الوزن ٨١

شخص قوي ..عصبي ..مهيوب .. ولا يهاب احدا له قلبان يحملهما في صدره الاول ناعم لعشقه والاخر حديدي لعمله ..

همه وحلمه في الحياة التخلص من كل شخص سيء في هذا العالم ولو كان على حساب حياته..

وهو شاب يمتلك عيونا كبيره وعسليه ونظرة حاده وشعر كثيف بسواد الليل وصوتا رجولي خشن ومشيتا واثقه ورزنه ..يتسم بالوفاء وجنون العشق رومانسي وهادئ تاره وبركان تارة اخرى..

#ساترك لكم المجال لتتعرفوا عليه جيدا في الابيات الاتيه......
.
.
.

ايهب_

داومت قبل ٥ اشهر تقريبا وجنت حيل مشغول بالمهمه وملازم مكاني يلي هوه يم الكفتريا مخلي

دراجتي ومستند عليهه واشتغل بنقالي مرت من يمي بنيه فوحت على روحي نسمه هوى بعطر الياسمين وعبرت

رفعت راسي اباوعلهه مثل الاميره ناعمه ونازكه وتمشي بثقه ونعوميه بقت واكفه هيه وبنتين وياهه تالي راحت يم لوحه الاعلانات يلي بس الجدد يرحولهه ..

عرفتهه جديده بالكليه ولان ماشايفهه هنا العام بس اويلي على جمالهه يكول ايه واميره ماشيه عل ارض مو بنيه ..

فززني من صفنتي اتصال من الرئيس رحت على جهه ورديت على اتصاله كملت ورجعت بمكاني بس الاميره هاي ضاعت من عيني ماشفتهه بعد من هذا اليوم الا بعد مرور يومين

اخيرا شفتهه بالصدمه بداخل الكافتريا تشتغل ويه ابو حسن ويسولف ويضحك وياهه وهيه ملامحهه ثابته وجامده

ترد كلمه وحده على الف جمله يحجيهه هوه توقعته يزعجهه وضجت منه حيل اكره هيج نماذج

يتلوكون للبنات بسوالفهم وضحكهم ..كعدت وطلبت جاي بقيت اشرب وعيني عليهه صابني فضول اتجاهه مفاجئ

انتبهت على ايدهه تلمع الحلقه بايدهه اليمنى حسب علمي المخطوبه تخلي حلقتهه باليمنى بس ليش هيج حزينه يله شكلهه متعاركه ويه الحب ..

اوو هسه انه شمكعدني هنا احجي ويه عقلي لا واباوع لعرض غيري ندري مو متدين وماتعرف القبله وين بس لهل درجه ماعدك غيره على عرض غيرك ..

تافافت وشربت اخر رشفه من الجاي اخذت مفاتيح دراجتي وطلعت كعدت بمكاني الكل يعرفني لاني هاي السنه الثانيه الي بنفس المرحله وهمتهم اني

مادرس ورسبت وعدت سنه ثانيه وانشهرت بسمعه زفره بين الطلاب وهي اني ملازم دراجتي وكاعد ابصبص عل بنات وتارك الدراسه

وسامه وهيبه بس شالفايده اذا ارسب وماعدي مستقبل هيج يضنون همه بس مايدرون بيه عيوني تبصبص عليهم لغير غايه.. حركتني الشمس

ورجعت للكافتريا وحاولت ابعد عيني عنهه كعدت قريب عل ميز الواكفه يمه هيه وتسوي عصاير

وتنطي واجالي صوتهه الناعم المبحوح لمن حجت ويه ابو حسن اليشتغل بالكافتريا يمهه وهيه تكله..

_حباب غير هاي الاغنيه مو حلوه

_لعيونك ياحلو الف اغنيه اغير

* ابتسمت ابتسامه باهته وحزينه بقيت مستغرب شو هذا يحجي هيج وياهه وهيه مخطوبه معقوله خطيبته لا بس مبين جبير بالعمر هوه والشيب تارس شعره رغم مبين رشيق شويه ..اففف وانه شكو هسه يافضولي المايخلص

مديت ايدي اخذت الكوب اشرب جاي وشرگت لمن طلع اغنيه هنديه بالام بي ثري المخلينه بالكافتريا رفعت راسي

شفتهه مغمضه عيونهه بنفاذ صبر نترت قطعه القماش من ايدهه وراحت لجهه النقال غيرت الاغنيه

طلعت اغنيه (مشتاق الك) بقيت اسمعهه واتمعن بكلمات الاغنيه حسيت طلعتهه حسب مشاعرهه بقيت صافن بيهه وانعادت الاغنيه مرتين ضجرت منهه واشرت لابو حسن يغير الاغنيه وراح غيرهه

طلع اغنيتي الاحبه دائما اكله يشغلهه اسمهه (حجيك مطر صيف) قديمه وكلش ادمن الاغاني القديمه.. بقيت ادندن ويه الاغنيه رفعت عيني وشفت الاميره صافنه بالفراغ درت وجهي عنهه لطشت عيوني عليهه

خرررب اول تالي تعجبني المعصكلات  انه وين روحي التحب الحاتات هسه صارت تدور أميرات اوووف ولو هيه كل اميره اميره ..

خلص وقت الغده وكلهه طشت ورحت لمكاني بره ومرت الشهرين نفس الوتيره بين شغلي بالنقال عل مهمه وبين عيوني التراقب هل اميره ..

وبيوم لفتت انتباهي لمن تجمعت الكليه كلهه بالساحه جنت قرب مسافه مو بعيده عنهه شفتهه مثل المريضه ووجهه اصفر فجاتا اختل توازنهه واستندت على يلي بصفهه

فزيت رجلي تريد تهرول الهه بس سيطرت عليهه لا ننفضح وتطلع سمعه مو حلوه على البنيه بقيت مركز انضاري عليهه لحدما جحضت عيوني وكمت عن الدرجه الجنت كاعد عليهه لمن سمعت وحده حجت بصوت شبه مسموع عنهه بانهه حامل ومن هل سوالف

شلون وهيه مخطوبه شنو حمل شنو خرابيط اجه بالي ابو حسن شلون يضحك ويسولف وياهه للحضه شكيت بيهه مو خوش بنيه ورجعت عيوني عليهه وانه اشوفهه وجهه صار احمر وعيونهه جاحضه على البنيه الحجت وياهه

ماكو

ثواني وكلبت عيونهه وانهد جسمهه بالكاع اجيت اركضلهه بعدت االطلاب واشوفهه طايحه

مصروعه وكالبه عيونهه وجسمهه ينكت وحده اخذتهه عن الكاع وعصرتهه بحضني حتى اهدي جسمهه ويوكف الصرع

مرت دقايق وماعت روحهه بحضني صارت ترفه وبخفه الشعرايه بعدما جانت مثل الخشب تصرع اخذتهه بين اديه وطرت بيهه بالسياره البره الاحتياطيه واجت صديقتهه وياهه وصلنه للمستشفى وحولوهه طوارئ

ضربوهه ابره مهدأ واخذو دم منهه يحللون يشوفون سبب الصرع المفاجئ الصارلهه بقيت

منتظر بره ربع ساعه ودخلت جان بيني وبينهن ستاره سمعتهه تحجي ويه صديقتهه تكلهه شصار وياي

انه سامع ابو الصرع من يدخل بنوبه مايحس على روحه ولا يتذكر معقوله صدك ماتذكر انهه انغمى

عليهه مساع ..خرب شرف حضي رجفتني عليهه بت الذين آمنوا .. بقت شويه واجت الدكتوره حجتلهه انهه بيهه تيفو وسوء تغذيه

جا طبعا اذا هيه بوقت الغده الناس تروح للكافتريا جوعانه تاكل وهيه تروح تشتغل والله اعلم بالبيت تاكل لو لا على هل ضعف هذا جنهه ريشه ..طلعت صديقتهه ووقفتهه..

_ها خويه وين

_خويه رايحه اجيب دوه من الصيدليه

_اطيني انه اجيبه

_خاف تصير زحمه

_لا مالج شغل اطيني

*اخذت الوصل ورحت جبت الادويه جانن عباره عن ابره ومغذي وكبسولين مال مهدأ ..دفعت الحساب ورجعت صحت لصديقتهه وانطيتهه العلاج وبقيت واكف بمكاني لحظات

طلعت الممرضه واسمع الاميره تشكي من راسهه شويه وسكتت كلت نامت هسه جريت كرسي وكعدت بره ورن النقال علي طلعت بره بعيد ورديت..

_نعم سيدي..لا سيدي اني بره الجامعه حاليا ..صار عندي ضرف سيدي..حاضر سيدي ..نعم ..مع السلامه سيدي..

*سديت الاتصال ورجعت لمكاني كعدت وبديت اشتغل بنقالي مرت قريب الساعه وربع وطلعت هيه وصديقتهه ساندتهه ومبين عليهه وجهه اصفر وتعباهه حتى مارفعت راسهه وباوعتلي

صعدتهه بالسياره وانطتني البنيه عنوان بيتهه وطرت بيهه للبيت واني عين عليهه وعين عل شارع ماعجبني وضعهه من شفتهه وشافتني وهيه وجهه اصفر ودمعتهه بعينهه تتصنع القوه

بس اكدر اشوف خلال مراقبتي الهه انهه حزينه وروحهه مجمره وعرفت انهه من نوع العصبيه وبسرعه تتنرفز وگلبهه قوي بس هل ضعف يلي بعيونهه بس لو اعرف شنو سببه وصلتهم و تشكرتني البنيه ونزلو واني حركت السياره ورجعت للجامعه والنقال احترك حرك علي شفته عادل الخاي** رديت عليه..

_ها لللك شرايد حارك شيب الخلفوني

_ولك وينك من الصبح منتضر اتصالك

_احترك ابوك تريدني اجي اطفي الك شنو

_لا بس طي** اشتاقلك سالني عنك

_اكل خ** ولك احجي يله شرايد

_ولك هذا الرئيس خبصني يريدني اجي يمك احفضك وانطيك دي**

_ ليش تجي يمي شصاير

_وين ادري الصبح اتصل علي كال تروح تشرف ويا على المهمه عل اقل اذا واحد غاب الثاني ينوب عنه مدري شلون

_اوووف اووووف يله جير بحضي وتعال نشوف الحظ الاغبر صارلنه سنه مالازمينهم خر** بيهم همين

_ولا يهمك ياخوي اجي وبالتعاون نسوي المستحيل

_يله هاذهو تعال ونشوف جاي اسوق هسه روح ولي

_انعم الله عليك خويه تكلي ولي

_جا شكلك روح حبيبي عوفني كاعوود اسوووق

_ههههاي مو حلوه عليك المياعه

_ههههه يله روح لك كافي تتعاير يمي روح

_حاضر سيدي ههههاي

*سديت الاتصال ودخلت للكافتريا مكانهه خالي شلوم بله بيهه عجيبه هاي البنيه انه اعرف البنات من ينخطبن تصير الكاع ماواسعتهن من الفرحه

اشو هاي الايام كلهه تكضيهه مبوزه وملامح وجهه جامده حتى صرت اتمنى بيوم اشوفهه مبتسمه ماكو خر**بالحظ الاغبر شمكعدني هنا افكر بيهه انه خرب شرفك عادل..

بقيت كاعد بمكاني منا لليل اجه عادل واخذ المتاوبه عني ورحت لقسم الكليه دخلت لغرفتي المليانه رسومات ومخططات وصور لاشكال الاشخاص وانواعهم وعلامات X على بعضهن

نزعت ملابسي وطلعت سلاحي من جورابي خليته عل ميز وتمددت عل جربايه الحديد صفنت واجت بالي بنت اللذين آمنوا

خرب شرفي اذا يطلع البالي مسوي هل كل* گلبي يمعود اصحى يا گلب عوف سوالف العشگ ماتفيدك بابا ..يله بله تسودنت صرت احجي ويه گلبي من وراهه احترك ابوك عادل ...

كمت كن مكاني كملت كم شغله الي ونمت للصبح كعدت بدلت ملابسي وشخطت سيارتي ورحت للجامعه قريبه جانت على الاقسام الداخليه دخلت اخذت معلومات من عادل

اجريت كم اتصال وراح عادل ينام بمكاني وانه بقيت اراقب فتره والطلاب كلهه دخلت للجامعه انتبهت انهه اليوم ماجايه لان شفت صديقتهه بحده دخلت للجامعه عرفت بيهه مريضه بعدهه

مر اليوم وثاني يوم نفس الروتين صرت افكر بيهه زايد هل يومين صار عندي رغبه اعرف اذا هيه بخير لو لا ..مر اليوم نفس الشي وثاني يوم كعدت سبحت وبدلت وطلعت للجامعة

انتبهت على عادل يصفن هواي ومرتين لكفته يباوع على صديقه الاميره لان تكعد بنفس مكانهن عل مقاعد القريبه من عدنه مسافه ندسته بيده والتفت علي اشرتله بمعنى وين صافن وردت علي..

_ها لا ماكو شي اكلك خلينه نبدل انت اخذ الشفت الليلي وانه الشفت النهاري

_دولي لك ليش تريد النهاري خاف تنعس بالليل

_لا مو هيج بس ااا

_عويدل الزم روحك احنه بمهمه مو مال سوالفك هسه الزم عينك الزايغه لا افكسهه الك هسه

_اوو شبيك انت مو مال واحد يحجي وياك رايح انه انام احسن

_امشي روح وليي

*هاي العايزه يعلك البنيه بي ويكسرهه هذا عادل اكبر لوتي اي بنيه يخلي عينه عليهه تعشكه بسرعه وهوه يلعب بيهه ويعوفهه ويكلب السالفه عليهه ماريده يورط هل بنيه البريئه وياه ..

رحت للكافتريا اخذت استكان جاي ولفه اصحصح بيهن وطلعت لمكاني كرت ساعتين باوعت لمكان الاميره وايست انهه تجي بعد بس جحضت عيوني لمن التفتت وشفتهه توه طالعه من القسم تمشي باتجاه الكافتريا

دخلت وروحي رفت عليهه رحت بسرعه دخلت وكعدت قريب مسافه عنهه وبقيت عين عل نقال وعين عليهه ماريدهه تحس بيه اراقبهه واتورط وياهه ..بقيت اصفن بيهه شلون تشتغل وترد على ابو حسن بكلمه وحده وابتسامه باهته ماتبين حتى

اااخ لو اعرف شنو علاقتهه بي وهيج ماخذ راحته وياهه الاعرفه ابو حسن خوش رجال مايحارش ويتلوك للبنات بس شماله هسه مستهتر يحشش ويضحك يريد يضحكهه كوه وهيه طالعه روحهه من روحهه ..

شما فكرت وضربت اخماس باسداس ماكاعد يطبعلي سبب مقنع يخليهه دوم حزينه وعيونهه مدمعه الشخص تجيله فتره يحزن ويكتآب بيهه بس تالي يرجع كلشي طبيعي اشو هاي ابد ماشفتهه يوم مبتسمه حتى ..

فرغت الكافتريا وكلهه طلعت وانه هم طلعت وصلت مسافه وانذكرت ماجبتلي بطل ماي رجعت عل كفتريا وشفتهه مغمضه عيونهه ولازمه بطنهه بالم فجاتا كعدت وره الميز عبالي اغمى عليهه طفرت من فوك الميز وشفتهه كاعده تون بالم

كرفصت كبالهه وانه كلي خوف عليهه كلتلي مابيهه شي ومتعوده عل الم صفنت اجه بالي خاف عليهه العاده الشهريه كمت بسرعه اشوف وحده من صديقاتهه شفت البنيه الوياهه دائما رحتلهه اركض ..

_خويه صديقتج متخربطه بالكافتريا تعالي شوفيهه

_ها منو وينهه

_ازادي

_شنوو شبيهه؟؟
.
.
يتبع.....