حـــمامة الشـــهم..🕊️
حــب وعــذاب....🤍
شهــم...
خــَسرنـا اٰول خــساِرة وگــلنة...°
عَـــاديِ تتـــعَوض....°
وخـــسرنا الـــثانية العُـــتب علـ حــض..
مــا ضلــت ولا حـــجة
شبـــعدِ ياگــلبي تتــرجه..
هــاي الثـــالثه وبــيها الــسكوت أفرض
_______________________________
صوت بعيد احسه يناديني احس نغزات على خدي اريد افتح عيوني ماكدر شلون الطابوكه على عيوني شويه شويه هاذا الصوت جاي يوضح..
_ حمامه حمامه
فتحت عيوني شويه شويه وكوه واول ما فتحت عيوني وجع حاد صار بارسي بين عيوني ..كلت _ اخخ
شهم _ كعدتي شبيج يوجعج شيء ؟
الساني ثكيل كلت _ راسي
شهم _ ميخالف لان انضربتي على راسج ميخالف
ونيت وكلت _ شكو شبيه
جر نفس وذبه كال _ طاب حرامي للبيت ما تتذكرين شصار ؟
غمضت عيوني وهزيت راسي بلا وصدك ماكدر اذكر اي شي من يومي مادري ليش ..
شهم _ يله ميخالف عود بعدين اذكري هسه اكعدي اشربي هاذا العلاج يله
بيران _ ماريد اكره العلاج
شهم _ اشربي ونطمي
ما كدرت اقاومه خله بحلكي حبايتين وشربني مي كلت _ ليث وين ؟
شهم _ يم نجمة جوة
بيران _ نجمة هنا
شهم _ اي هنا هيا وايهم و..امي
تنهد باخر حجيته غمضت عيوني وجتني لحضه شلون حسيت بسجينه على اركبتي شهگت _ تذكرت
شهم _ اي شنو شتذكرتي شفتي وجهه ؟
غمضت عيوني ورجعت كلشي صار بذاكرتي
قبل چم ساعه....
طبيت للغرفه ضلمه سديت الباب وتوني دا افتح الضوه وشهكت من حسيت ب سجينه على رگبتي _ بدون لغوه زايده وين الاوراق ؟
الساني انربط حجيت امتمت واشهك _ م من منو انته يا اوراق
دارني اله وخنكني بالسجين حسيت انجرحت عطت بوجع _ وخر منو انته شلون دخلت
جان ملثم لابس شفقه وكمامه سوده بس عيونه سود كلش وحمر ..
_ كتلج وين.....
بعده ما مكمل حجيه سمعت عياط شهم _ حمامه
وضربه مسدس ..
دفعني حيل ونضرب راسي بالحايط وبعد ما حسيت بشي..
شهم _ يا اوراق راد منج ؟
بيران _ مادري اخخ ماعندي اوراق
شهم _ ما لا حضتي شي غريب علي بايده بوجهه
حاولت اذكر بس ماكو جان ضلمه كلش ..
بيران _ لا بس انتو ما لزمتو ؟
تنهد _ جاي ندور مستحيل اخليه ينهزم بهاي السهوله اصلا شلون كدر يدخل البيت
حسيت بخوف شعندي شورطت روحي وطبيت بهاذا البيت اكيد راح يرجع مره لوخ ما حسيت الى وعيوني كامت تصب دمع _
رفع حواجبه وكال _ شكو ؟
خليت ايدي على عيوني وحجيت بنحيب _ شنو شكو يعني حرامي مجرم راد يذبحني وتسأل شكو ونوب ما لازمه انته مو ضابط ليش ما سجنته لو كادر بس علي
باوعلي ببرود وضيك عيونه _ طاح حضج عبالي مرأة تره راح ينلزم وبعدين انا شدخلني
بيران _ شنو شدخلك مو من وراك من يوم دخلت بيتك المشاكل تركض وراي
شهم _ طبج مرض ما كايلج تعالي اشتغلي هنا
رفعت راسي فوك محتاره ابجي بس حسيت بوجع بنص ركبتي لزمتها وكلت _ اهه
فز بسرعه وكال _ شبيج شكو
بجيت حيل _ ركبتي توجعني جرحني
شهم _ شو ارفعي راسج
رفعت راسي وقرب يباوع الركبتي فزيت حيل من حسيت باصابعه يتحسس الجرح بلعت ريك جوه اصابعه رفع عيونه لعيوني وكال بصوت هامس _ وعيونج راح ادفعه الثمن غالي
ضليت جامده من قربه ولمسته بعدت راسي شويه وهو وخر _
شهم _ نجمه جوه راح اكلها تسويلج اكل
بيران _ لا راح انزل اني
شهم _ بكيفج وها من باجر راح ننتقل نعيش بيت ابوي القديم
بيران _ هذاك الي بالبستان ؟
هز راسه وحسيت بفرح لان هاذا البيت احسه مثل السجن اي شيء مقيد بي عاد هناك كاع مفتوحه تذكرني بقريتي ..
بس شهم كلش مبين علي متوتر وضايج لا ضوجني بالحجي ولا ضل يلح علي بس حجه وياي هذني وطلع ..
كمت من الفراش وجان تلزمني دوخه طبت نجمه وكالت بسرعه _ ها شبيج
تقربت علي بسرعه وسندتني _ دختي تعالي اكعدي
باوعت عليها متفاجئة شويه لان كلش خايفه علي كعدت وكالت هيا _ راحت الدوخه اجيبلج مي
هزيت راسي بلا _ شويه دخت بس راحت الدوخه
فزيت من لزمت وجهي تحجي بحنيه _ لا تخافين ادري بيج مرتعبه من الي شفتيه بس اني وياج اعتبريني اختج
بلعت ريك وكلت بفهاوه _ شعجب ؟
ضحكت _ شنو شعجب تره اني ما كارهتج بس ذاك اليوم جنت ضايجه وشفت ليث متعلق بيج ولان اني ما اشوفه هواي غرت اعترف بس صدكيني ما اكرهج واصلا من رحتي ذاك اليوم كلش انقهرت عليج لان رحتي زعلانه مني ومن ايهم
حسيت بفرح بداخلي لان اخيرا تقبلوني وهم راح اروح اعيش وياهم شلت هم شلون اعاشرها وهيا تكرهني بس الحمدالله ..
بيران _ شكرا واني هم ما اكرهج والله
ابتسمت وكالت _ يله كومي خلي نتريك
بيران _ نتريك ليش بيش الساعه
نجمة _ بالتسعه الصبح ضليتي نايمه اليل كله والصبحيه وكلساع واحد لازم واجب يمج اني وشهم اني وشهم
رمشت متفاجئ وخرت كذلتي عن كصتي وكلت _ ليش نمت هلكد بس لا راسي راح يصير بي شي
نجمه _ لا كال الدكتور بس اغماء وهم خوف
بيران _ دكتور اجه ؟.
نجمه _ اي طبعأ شهم لاكيج غاركه بالدم
لزمت كصتي _ مو اني اكول راسي راح ينفجر
نجمه _ يله هسه خلي ناكل واشربي العلاج الي بعد الاكل شربتي الي قبله
هزيت راسي _ عفيه يله كومي
لزمت ايدي وكامت وشكد مرتاحه وفراحنه على الاقل راح اعيش ويا بنيه لطيفه الحمدالله ربي ...
رحت للصاله جان ايهم وغيد وشهم وذيج المرأه الي شفتها بعدنا ما واصلين كلت على كيف _ نجمة ممكن آسال منو ذيج المراه
رفعت عيونها وشفتها شلون الي ضاجت او انقهرت _ امي
رفعت حواجبي _ يعني ام شهم
نجمة _ اي
سكتت ليش من كالتلي هيج حسيتها شلون الضايجه والمقهوره وحتى من كعدنه ما تباوع عليها شلون المستحيه منها وهم حقها ابد ما ضنيت ام شهم هيج اصلا عبالي امه ميته
استغفرالله عبالك وحده مو خوش الشعر طالع من الشال والشال ذهبي والتاتو واصل لذانها وفلر شفتها مبينه جبيرة حيل بس كلش مهتمه بروحها .
كعدت وكال ايهم _ الحمدالله على السلامه عيني الوفي
ابتسمت _ شكرا
ايهم _ هاي شعجب
ام شهم _ الحمدالله على السلامه
ابتسمت وكلت _ شكرا خاله
ام شهم _ عوع شنو خاله تخلخلت عضامج بعدني شباب
فتحت عيوني بصدمه وباوعت الهم _ تعودي يا طنطه
بيران _ هه لا خاله مو اكبر مني هيج احترام
ام شهم _ يمعوده احنه مثل الخوات كوليلي ميار ميار
بلعت ريك ساكته شبيها هاي بكد امي وتكلي كوليلي ميار والله يا الله الثلاثه كامو وجوهم ما تكصها الطبر نجمه خلت ليث بحضني واني خنست متجاهله النضرات من غيد
كاعده وجتفه اديها وتباوعلي وخازرتني..
شهم........
المفروض الي هسه احنه كاعدينها كعده عائليه بس هيا كعده سربوتيه باختصار مخليلي ثنين ك*** واباوع عليهن
عفت كلشي وباوعت على هاي الساهور وجها اصفر وراسها ملفوف وعود لابسه شال بالكوه لازك باخير راسها .
جنت بالطريق قبل لا يطب الحرامي رجعت لان عساس عندي واجب تفتيش واتأخر بس اجلوها ورجعت للبيت بالطريق
ردت اشوف اذا هيا كاعده لا وفتحت الكامرات الي بموبايلي بس انصدمت من شفت احد طب بغرفه ليث لان اني مخلي بس بغرفه ليث كامرات بغارف النوم الاخرى ما مخلي
عقل ما ضل براسي خابرت ايهم ماكو بسرعه خابرت محمد وكتله يجي هو والشرطه.
شكد خابرت عليها ما ترد ردت اكلها روحي ليث لان عبالي راح يأذي ليث بس انصدمت من طلع من الغرفه وراح لغرفتها ..
وانا ما مخلي كامرات بالغرف .
من وصلت رجلي ما يعينني لان جان عبالي خلص خلص عليهم من ضربت طلقه
سمعت بس صرختها من صعدت فوك ما لكيت هاذا الكواد بس شفتها سابحه بدمها
انتبهت لغيد تباوعلها وتعض باضافيرها وضعها ما يطمن خلاني اشك نضراتها وهزه رجلها تذكرني بالمذنب الي احقق ويا.
بس نسيت هاي الافكار وضحكت على ليث يبوس بيها من حلكها وهيا تحجي ويا على كيف وتبوس بي خرب شرفها خلت الولد يستهتر بس ابد ما شايف ليث هيج من قبل دائما ليث جان يبجي ووجه شلون الي ما مرتاح جان وجهه ما بي نوع اصفر حاولت افضي وقت اله بس شغلي ميسمحلي جبتله احسن المربيات بعد ما كطعت الامل بامه الك*** بس نفس الشي اشوفهن بس يسون شغلهن ما يندمجن ويا والسبب والوحيد الي خلاني اضل متمسك بهاي الزعطوطه انو زعطوطي تزعطط بيها ..
رفعت نضراتها علي فجأة ورمشت دائما من توتر منتبه عليها تضل ترمش ردت اقشمر عليها شويه غمزتلها وسبحان الله وجها الاصفر صار احمر
توها دا تكوم شايله ليث كلت بحده _ وين ؟
باوعت لاكل وبلعت ريك _ اروح اساعد نجمة
آشرت بيدي وكلت _ اكعدي
باوعت علي وخزرتها حيل وهيا بسرعه كعدت _
حجت غيد باستهزاء _ ليش متكوم مو لازم تروح تسوي شغلها لو لا ؟
شهم _ شغلها تهتم بليث مو تنضف وصاختج
الكل تفاجئ من حجيت هيج لان انا ولا مره مفشل غيد كدام احد حتى غيد ضلت تخوزر عود ضاجت البربوك كالت _ هو اصلا اني صوجي كاعده يمكم
وراحت فوك ركض كمزت هاي الي عود امي.
ميار _ لا ابني على بختك ليش هيج فشلت الابنيه شكالت هيا
شهم _ وانتي شكو ؟ خاف صدك مصدكه نفسج
ايهم _ تم تحديد الكل
شويه وجت نجمة _ يله تعالو تريكو لعد وين غيد ؟
شهم _ نكبرت
نجمة .....
حرفيأ الكل مصدوم من شهم مبين كلش حاقد على غيد اصلا ميباوع بوجها اني جاية مرة وحده لهاذا البيت مال شهم او اثنين وشهدت عرايكهم بس منتبهة الشهم جان ميشيل عيونه عنها يهتم بادق تفاصيلها لازم مياكل اذا متكعد ويا بس هسه كلشي متغير كوه طايقين بعض .
كعدنا ناكل رغم الجو المتوتر بداخلي فرحانه شكد افرح من ننجمع ايهم جاب گيمر عرب وكاهي وطكيت بيض وزيتون .
فرشت سفره بالكاع ما خليتهم على الطبله لان شهم كالي نكعد بالكاع.
اخذت ليث من حمامة وكلتلها _ اكلي انتي اني راح اريكه
ابتسمت لي وكالت _ شكرا
ضحكت عليها الصراحه اول مره شفتها عبالي وحده حيه ما ارتاحيتلها بس الي شفته البارحه خلاني اباوعلها بغير نضرة لان البارحه وهيا مغمي عليها كسرت كلوبنا اني وشهم
جانت تهلوس وتهذي تبجي وتكول بابا تعالي لو بافل وين ليش عفتني لو تنط كلش انقهرت عليها وقررت بعد ما اغثها بكلمه لان اصلا صفنت بنيه صغيرا مثلها شسوي تشتغل خدامه وين اهلها وين كرايبها الله واعلم شافت وليش هيج وضعها ..
ايهم _ زيتونه صايره خوش ادميه
خزرته _ نجب واصلا اني شوكت ما صرت خوش ادميه من يوم يومي اني طيبه
ايهم _ طيبه لو ماصخه وهاهاهاها
بيران ضحكت وايهم وليث بس همه سخيفين شهم خازرهم وهما ولا يمهم _
شهم _ كافي خلي نتزقنب بدون صوت
ميار _ حمامة اسمج مو ؟
رفعت بيران راسها وحارات باوعت الشهم ونفت _ لا اسمي..
شهم _ اي اسمها حمامة
ميار _ هاا عشات الاسامي اكلج انتي شسوين لبشرتج وهيج تلمع علميني
خرب حضي على هاي الفشله زين امي تفشل بروحها اني شكو اريد اختفي _ حتى احرجت الابنيه
حكت راسها بيران _ م مادري هيه هيج
ايهم _ سعم شوفوني حلوة
بيران _ هسه اني كايله حلوه اووف
ميار _ تره ماكو داعي تجذبين ماكو بنيه بشرتها صافيه بدون لا تسوي شي
بيران _ والله كلشي ما اسويلها
شهم نتر _ هسه شنو نتريك لو نفتح مركز عناية
ميار _ عوع انته بس معصب
باوعلها وعيونه كلش تخوف شهم عيونه مثل عيون ابوي الله يرحمه وحتى سماره بس عيونه صفر على خضار مثل امي .
بس شخصيته ابد مو مثل ابوي ابوي وجهه يضحك ويحب يتشاقه شخصيت ابوي تشبه شخصيه ايهم رغم ايهم مو ابن ابوي بس اني احب ايهم وحتى شهم لان نحسه مثل سوالف ابوي اصلا ما يوم اعتبرت ايهم غريب عادته مثل شهم .
ميار _ اريد اروح الاحد لبيت اختي
شهم _ شو انتي طلعاتج كثرانه ينبع الحنان
امي توترت وضلت تلفت _ شنو كثارنه شمسوية اضوج واروح لاختي نروح للصالون
شهم _ خلي ايهم يوديج شنو ما عدنه سيارات ؟
ميار _ لا مو هيج ننجمع نسوان وحجي
شهم _ اي لعد خلي ايهم يوديج شكو دايحه وحدج من بيت البيت العالم شتكول علينا اصلا احمدي ربج محد يدري بيج ولا يعرفكم من جماعتي جان حتى لوجه الباب ما خليتج تطلعين
هو صدك شهم ابد ما يخلينا نتعرف على جماعته من الشرطه بس محمد لان صديقه من زمان يعرفنه ودائما اطلع علي شهم يكول ماريد احد يعرفكم حتى محد يأذيكم
ميار _ اي خلي ايهم يوديني ميخالف
هه يريد يكدرلها تروح لاختها صدك ومناك تروح لكوادها استغفرالله يعني مره جبيرة بالعمر غير تصلي تستغفر لا اني امي مستكحبه ..
بيران _ صدك راح نروح لبيت البستان ؟
كالت هيج بالهفه _ وايهم كال _
ايهم _ بيت البستان هاذا شنو جديده .
بيران _ ها لا مو بيتكم بي نخل هواي وقبل لا نوصله شفت مزارع وبساتين
ايهم _ ثول اي هذن كيعان مزروعه عدها راعي واحنا هم عدنى كاع زارعينها والبستان الشفتي هاذا ورى بيتنا بابه هم الشهم
شفت وجها متفاجئ _
بيران _ يعنيي انتوو هم عدكم كيعان مثلنا ؟
باوعتلها باستغراب وكلها هم ليش هيا منيلها كاع _ يعني قطعه ارض مزروعه _
شهم _ مثلكم ؟
كامت ترمش وتلعب باصابيعها _
بيران _ ها لا مو قصدي يعني مو مثلنا مثل العالم الي بالريف انتو مو هنا بالمدينه
نجمة _ اي عادي الكاع والبستان والبيت ورث من ابوية خلاه النه
بيران _ هاا فهمت
ميار _ شعدنه راجعين هناك فدوة خلينا هنا بهاذا البيت هم حلو وجبير وبمنطقه طاكه شعدنه راجعين لذيج الخيسه
شهم _ محد جابرج تبقين هنا او هناك روحي لبيت اهلج اصلا ابوي ما مخليلج فلس
انطاها وحده خلاها تخنس دنكت وكامت _ اروح ارتاح شوية _ وكامت تنهدت بضيق امي ليش هيج
شهم _ راح اروح هسه حضرو كلشي من غراض حتى باجر نروح
بيران _ يعني كلشي كلشي بعد ما نرجع
شهم _ لا مو كلشي ما نطول بس ما بين الزم ذاك الم**** واكطعه
ايهم _ هووب يمعودد بنات كاعدات
شهم _ هاا اعتذر خيتي ايهم نسيت انتي كاعده
ايهم _ ايباا شكد تضحك
خربب شكد فشله شهم مو شهم اذا ما فشر ..
بيران _ شفتولي موبايلي وين ؟
نجمة _ لا والله اصلا ما اعرفه شلون شكله
بيران _ هيج نيلي ماعرف نوعه
ايهم _ لو ماخذه رقمي جان اتصلت عليج
كامت _ لا راح اروح ادوره
شهم _ اكعدي راح اتصل عليج
هزت راسها وكعدت طلع موبايله وفتحه شويه وفزت كايله بصياح _ لالالا ماريده عوفه
باوعلها رافع حاجبه _ اكعدي ونجبي
اتصل وشويه وكما نسمع اغنيه _
_ شفت بس صورتك يمي ذكرت اسمك نسيت اسمي ذكرت ايامنه الحلوة _
ايهم كام يصفك ويرگص _ الله على العاطفه
شكد فشلت خطيه كمت وشفته على الطبله الي بآخر الصاله رفعته وانصدمت من الي مسميته لشهم باوعت عليها وجان تعض شفتها وتآشرلي بيدها لا لا بس شهم انتبه واني ارتبكت شسوي كالي
شهم _ نجمة جيبيه
تقدمت علي وهيا تعض بشفتها بتوتر وخايفه
اخذه من ايدي وشافه ضحك ما مصدك وباوعلها _ شحم الاملح
ايهم _ شنوو هههههه خرب شرفج وين احو شحم املح
باوعت جوه فشلانه شمر عليها الموبايل _ بعدين نتحاسب هسه اريد اروح اني اعلمج
اخذت موبايلها وطفته بسرعه وشهم بوس ليث وطلع .
ايهم _ الله يرحمج خيتي
بيران _ نجب انته شكد بطران
لطم على خده _ يمه يمه بينت بينت مو توج مؤدبه وتحترميني ؟
بيران _ منو محترمج ما تولي
نجمة _ صدمتيني الصراحه
بيران _ حبيبتي هاذا ما يستاهل احترمه
ايهم _ هه شلون عالم بلوجه مرأية وبلكفه سلايه
بيران _ شنو يعني ؟
ايهم _ يعني تاكلين نعل وتحترمين
بيران _ نعل بحلكك
راح شمر روحه على الكرويته _ راح اخذ قيلوله صغيرة رجأء ايقضوني بعد ست ساعات
نجمة _ قصدك غيبوبة مو قيلوله
ايهم _ اسكتي انتي زيتونه
بيران _ هههه شنو زيتونه
نجمة _ نجب ايهم
بيران _ لا عليك الله شنو زيتونه والله صار عنيدي فضول
ايهم _ زيتونه مرت باباي وهاهاهاها
اشو هاي خربت من الضحك واني خنزرت _ وجع نشالله السلوكي
بيران _ سلوكي هههههههه
وكعدت بالكاع تضحك _
بيران _ شكد تشبهونهم
نجمة _ حمامة والله راح ازعل شبيج
كعدت وتحاول تسد ضحكتها _ لا راح اسكت اسفه اسفه
سكتنا واني ضايجه ابوع لهاذا ولهاذا بيران رفعت راسها لايهم وثنينهم طكوها بضحكه _
كمت وكلت بضوجه واني اشيل ليث _ تفف على اليكعد وياكم زعاطيط
بيران.........
شكد ضحكني ايهم لان صدك باوعت على نجمة مثل ضعفها بس نجمة حلوة والله ومو كلش ضعيفه جسمها رشيق بس هما العراقيين يحبون المربربه .
بيران _ امداك زعلت من وراك
ايهم _ وسم وزقنبوت اني شعلي ذبيها براسي يله ولي اريد انام
بيران _ وين نايم هنا تره راح نضل نكركع ونشتغل روح نام بغرفه ليث بيها سبلت اله بشدة
ايهم _ هم صدك طلعتي تفكرين عبالي خبله
بيران _ روح ولي ما ميته عليك سلبوح
ايهم _ سبلوح سبلوووش
بيران _ شكد سخيف
كام من مكانه _ اريد على العشة مندي لحم ولبن مطروك واهم شي الطرشي
بيران _ صدك بعد ما تريد نعل
ايهم باوع علي وكال _ كافي عاد تره اذا بعد غلطتي علي اموتج والله
بيران _ اتشاقه وياااك شبييك لا تزعلل
ايهم _ تره متحجين وياي كلمه اذا ما سمطتي ابو ابوي
بيران _ لا بعد ما اغلط بس شويه هيج مثلا نجب ولي هيج على كولت شهم كهكهيات
ايهم _ يله هم انعم الله يله تصبحين على خير
بيران _ يا تصبحين على خير هو الصبح
ايهم _ لقد بدء صباحي للتو
بيران _ ديله ولي
ايهم _ وسم
_ وراح يتمركص شكد شافط جت نجمة تباوعلي مخنزرة ، _
بيران _ يمه هله هاي كل وحده تزعل تصير هلكد حلوة ؟
نجمة _ لا تقشمرين علي مو توج تضحكين علي
بيران _ لا والله ما مقشمره وعلي تخبلين وعيونج تخبل شكد مسحوبه جنج مودل والله
ضيقت عيونها _ صدك ؟
هزيت راسي _ اي والله اكلج انتي مخطوبه
نفت براسها _ لا
همهمت _ زين انتي مخلصه دراسه ؟
نجمة _ اي تخرجت
بيران _ شدرستي
نجمة _ طب بس ما اشتغلت
بيران _ ياا ليشش
نجمة _ مالي خلك واصلا شهم يخاف علي
بيران _ ميخالف بس لازم عندج وضيفه بس يله اهم شي تخرجتي
نجمة _ اي ولعد انتي ؟
بيران _ ها اني سادس بس بطلعت هسه
نجمة _ ليش مو صارلج ساعه ترزلين بيه لان ما اشتغلت
تنهدت _ وضعي يختلف نجمة اصلا ما رايده اتركها بس اريد اشتغل
نجمة _ اسفه على سؤالي بس ابوج ميت
هزيت راسي _
نجمة _ الله يرحمه زين اريد اسألج ؟
بيران _ تفضلي
نجمة _ البارحه ضليتي تهذرين باسم واحد اسمه بافل ممكن آسال منو هو
بلعت ريك وصفنت حتى واني اهلوس اكول اسمك يا بافل وانته اخخ الله كريم _ ابتسمت _
بيران _ هاذا بطل مال مسلسل صيني
نجمة _ ها واني عبالي حبيبج
ضحكت _ لا يابه منيلي حبيب اني
نجمة _ انتي محجبه
زميت شفتي _ نص ونص
نجمة _ شلون يعني ؟
بيران _ همم بصراحه اني ما محجبه بس من جيت هنا اخوج كل شويه مرزلني كل شوية مرزلني فاشترالي حجاب وجبه ومرات البسها اني اريد اضل لا بستها بس احس روحي عجوز
نجمة _ صدك شهم اشترالج ؟.
هزيت راسي _ بس بعد ما طيح حضي وطردني بالشارع
نجمة _ والله الصراحه مذهوله شهم ما يتدخل باحد ماله شغل بي بس اكيد يريدلج الخير وبعدين تره الحجاب ستر واحله شي تسويه الابنيه تحجب
بيران _ شلون يعني الشعر مو احله هيج كشخه وتسريحات
ضحكت _ اي صح بس الشعر مثل الكنز عند الابنيه او الشي المميز لازم الابنيه ما تطلعه للرايح والجاي خليه بس لحلالج مثل اخوج عمج خالج ابوج رجلج بس محارمج
بيران _ يعني حرام شخص عايشه ويا من الطفوله بس هو مو من محارمج تشوفينه شعرج ؟
نجمة _ اكيد حتى لو تعتبرينه اخوج حرام احد يشوف معالم جسمج او شعرج لازم تسترين روحج حتى رب العالمين يرضى عليج
هزيت راسي واحس كلامها صدك _
نجمة _ انتي تصلين
بيران _ اي واصوم هم
نجمة _ عفيه بس تحجي وصدكيني محد راح يباوع عليج او يفكر بسوء الج صحيح هاي الناس ما صارت تهمها الحجاب بس على الاقل الشخص من يشوفج محجبه وساتره نفسج ومحترمه نفسج هو هم يحترمج ويفكر اكثر من مره اذا راد يمسج بسوء !
هزيت راسي _ بس والله ما اعرف اتحجب مثلج هيج انتي تسوينه حلو اني بس لسويه يصير وجهي مثل البيضه مال الدجاج
ضحكت وضربتني على راسي _ اختاري الوان تناسب بشرتج وخليهن ساده من نروح لبيتنه انطيج شالات واعلمج
فرحت كلش _ صدك ؟ راح تعلميني ؟
هزت راسها كلش مرتاحه وفرحانه اخيرا صار عندي وحده احجي وياها دائما بهاذا البيت وحيده .
دائما احس بروحي ضايعه ماعندي بنت احجي وياها عن شي يخصني او اقضي وقت وياها صحيح احجي ويا ليث واگضي وقت بس هم امل واشتاق لبتول ولزينه وليمامه ..
نجمة _ خلي نكوم نحضر اغراضج واغراض ليث وشهم
هزيت راسي وكمت من مكاني _
نجمة _ شلون صرتي خما دختي
هزيت راسي بلا _ لا راحت الدوخه
شالت ليث وصعدنا فوك وبطريقنا نزلت غيد لابسه ومتعطره وطالعه صاكه ..
غيد _ نجومه فدوة ممكن تروحين شويه اريد احجي ويا هاي
باوعت نجمه علي وهزيتلها راسي طبت لغرفه ليث كلت بهدوء _ تفضلي
باوعتلي من فوك ليجوه _ لا بس ردت اكول خاف صدك صدكتي نفسج شهم يهتم الج
ضلت ساكته شبيها هاي مو جانت متحجي وياي شيخلصني هسه _
غيد _ تره شهم ميشوف غيري حبيبتي واذا كالج هيج جان يريد يخليني اغار يعني مخليج ك وسيله لا تصدكين روح ماماتي
بيران _ اني ما ما متوقعه شي وما مهتمه لشهم او الج اني جايه هنا علمود ليث وما اريد اتدخل مشاكلكم
غيد _ هاا صدك لعد احترمي نفسج زين ولا تلعبين وياي _ تقربت مني وهمست _ لا تحاولين تلعبين ويا غيد حتى لا يتكرر الي صارلج
باوعتلها بصدمه وكلت _ شنو قصدج انتي ؟
غيد _ فكري بيها حبيبتي واذا عندج شي انصحج دورينه كلش زين وتجيبيه يله باي ماماتي لا تنسين تحضرين جنطتي
وراحت ضليت جامده مستحيل تكون هيا الي وره هاي السالفه بس اني شعلي وشنو الي اطلعه هسه شسوي خاف عبالها احب شهم وهيج جاي تسوي خربب حضي هسه اني شيخلصني من شهم وغيد تف عليك بافل
طبيت للغرفه مال ليث كالبه خلقتي كعدت حلى الجرباية ..
نجمة _ خير شبيج ؟.
صحت_ مرت اخوج ترزل بيه عبالها احب شهم
نجمة _ شنو ليش شوكت
بيران _ شمدرني نوب تهدد والله يا الله
نجمة _ يمعوده طنشيها لا تردين عليها هاي احتركت لان شهم رزلها علمودج
بيران _ الله يخلي موده اصلا ما طيح حضي غير اخوج كتله لا تدخلني لا تدخلني بيكم لزك اله حل علي لسان غيد يله ارتاح
نجمة _ يمعوده على كيفج لا تحجين على شهومي
باوعتلها نضره بومباستكيه _ شهومي الحمدالله والشكر
نجمة _ وجعع كومي يله حضري غراضج راح احضر غراض ليث
هزيت راسي وطلعت ..
طبيت غرفتي واني ضايجه الصراحه طلعت جنطه وخليت بيها ملابسي وحطيت مرطباتي ومكياجي بس الملابس والاحذية ما اخذتهن كلهن هيج قسم منهن ..
جاي اكلب بالهدوم وجان اشوف هاي الجنطه الي لكيتها شلتها وصفنت خاف هاي الي تكولي عليها غيد بس لا هيا كالت فلوس هاي اوراق رفعت جتافي وخليتها بالجنطه عود من نروح انطيها الها
طلعت ورحت لنجمة _ لعد امج وين
نجمة _ نايمه بصف الغرفه الي نايم بيها ايهم
بيران _ هاا عبالي نام بغرفه ليث شنو ذوله اهلج ما يشبعون نوم اكول ليث عليمن طالع
نجمة _ انتي كاضيه عمرج تقلدين
بيران _ اروح احضر غراض غيد وشهم
هزت راسها جانت تبدل ليث انتبهت لنجمة كلش هادية تشبه شخصيه بتول ..
رحت لغرفتهم طبيتها جانت هوسه وبس غراض غيد متنثره شكد مدعثره اخذت جنطه من فوك الكنتور وفتحت كنتورها مادري شتريد بس اخذت بجايم نوم وبناطير وفوانيل وثنين فساتين وخليتلها مكياج وسديتها
فتحت كنتور شهم شكد عطره قوي شنو لوكي مال عطور شكد عنده عطور اخذتله تراكسودات وبناطير وهم فانيلات وسديتها
فتحت الجرار وجان بي كومه ساعات ونضارات شكد حلوات الله اختاريت اكثر وحده عجبتني سوده وبيها فضي ومكتوب بيها بالنص مزغرف _ الــــشهمِ _
خليتها اله بالجنطه وخليتله نضارات ..
هم فتحت جرار اخر جان بي كومه اكسسوارات مبينه ذهب سديتها بسرعه اخاف يضيع شي وابتلي ..
طلعت من الغرفه وضليت احوس
حتى نجمة خلت ليث ونامت ادري شجنتو تسوون باليل لعد
نضفت المطبخ والبيت نضيف كلشي ما سويتله ..
جاي ارتب بالطبله الي يم الغرفه وسمعت ضحكه ام شهم كلش عاليه وعبالك مال وحده مو خوش ...
ميار _ زهيرر شبيك حبيبي غير ماريد احد يشك
فتحت عيوني بصدمه وحسيت گلبي نكمش هاي العايله كل يوم اكتشف بيها شي يصدمني ..
ميار _ هو من اروح لبيت اختي تعالي اضل يمك اسبوع ...اخخ شسوي تدري بزواجنا مو فعلي ..صدك..جاي تقشمرني موو...اني هم احبك والله ..ميهمني كلهم اصلا باقيه يهمهم علمود فلوس شهم...صدك..
سكتت واني مصدومه حستها حست باحد وجان ابتعد بسرعه واروح للمطبخ شربت مي ..
وكعدت بالكاع والله نصدمت زين اذا مزوجه ليش محد يدري بس لا زواج متعه خربب شهم شمقصر وياهم والله مبين ما مخليهم محتاجين شي شكد مسكين شهم مرته وامه ثنينهن خاينات .
صحيح هو ادبسزز ومرات ينجلب بس خطيه منين ما يلتفت تلكاه ..
تنفست شعندي بنص هيج عالم والله مليت اريد ارجع لاهلي مرتاحه ومريحه راسي اذا هنه خاينات اني ليش كلبي يكوم يرجف .
شلون گلبها ينطيها تغدر بالادها هيج مبينين محترمين وشهم ضابط ما تخاف تنفضح وتخلي راسهم بالطين زغيره هيه امداها مو اني اكول بس تمضحك ضحكه الك*** اووف صرت مثل شهم .
واني صافنه فزيت من دك موبايلي _
بيران _ خرب يا ذكرت اسمك ونسيت اسمي هو اني نسيت اسمي من الصدمات
رديت _ الو
شهم _ مو جاي اتصل شكو متردين
بيران _ مادري جنت صافنه
شهم _ بهاي معذوره ابو صابر
بيران _ شتريد ؟
شهم _ وينهم ليش اتصل محد يريد
بيران _ كلهم نايمين
شهم _ هااا خوش ..انتي شلون صرتي ؟
تنهدت بضيق _ زينه ليش تدخل بيه انته شعليك.؟
شهم _ وجع ما فوك جاي آسال
بيران _ لا تسأل من وراك اكلتلي رزاله
شهم _ منو رزلج
بيران _ مرتك عبالها اني احبك وتكلي لا تصدكين نفسك شهم ميحب غيري عبالك اني ميته علي هو اصلا ينبلع
شهم _ تره جاي تحجين ويه الي مينبلع
بيران _ احم اسفه
شهم _ وانتي سكتي ؟
بيران _ لا كلتلها ما ميته على شهم
شهم _ لا عليج الله موتتها امداج
بيران _ انته شكو تكول هيج هيه مو مرتك غير تفزعلها
شهم _ ختولي ما ضل شي وتسربت
بيران _ عزهه جاي تكول
شهم _ وانتي هم احجي لو السانج بس علي
بيران _ ما احجي بس بعد لا تحجي وياي هيج كدامها او كدام اي احد او لا تحجي ابد
شهم _ شلون احجي ؟
بيران _ تحجي عبالك تهتم بيه والناس تفهم غلط
شهم _ شتفهم ؟
غمضت عيوني بنفاذ صبر _
بيران _ اهوو الناس عبالها انته تحبني
شهم _ ايع
بيران _ شنوووو ؟
شهم _ على كولتج ايعع شنو احبج هو انته شينحب بيج عبالك ليث
بيران _ انته الايع واصلا اكيف اذا ما تحبني
سكت وتنهد _ لا تفهمين اهتمامي غلط انا معتبرج مثل نجمة
_ صدكت منو ذاك اليوم جفت علي وحصرني نص اليل بس يله خل نغشم رواحنه ويا _
بيران _. رحمالله والديك
شهم _ يله سرسحي اريد اشتغل
بيران _ باي
طفاه وبوزت _ شوكت تخلص هل ربابه عاد والله مليت
.
.
.
.
باليل حضرنا العشى اني ونجمة ايهم صدك راح جابلنه لحم توه مذبوح حتى نسويله مندي وهاي ميار ما طلعت من غرفتها وشهم ما جيه وغيد..
حضرنا العشى وبس نتانيهم لان كال شهم راح اجي من وكت .
طلعت للحديقه لان اختنكت من البيت بس سمعت صوت ايهم يحجي بالموبايل ..
ايهم _ وعلي احبج وسيراميك الكاضم اي غير اغار عليج ...هاا يعني هيج صارت..تره اموت نفسي...وعلي اموت بدونج ..احبج يا جروحي
ما كدرت امنع ضحكتي نوب مرتجي على الشجره وياكل بورده ويهز برجله نط من مكانه وكال _ يله باي باي
ايهم _ شعندج ولج ليش تصنتين
بيران _ هههههه جروحي نوب امداك ثاري انته مسحول
ايهم _ وجع منو مسحول غير ساحلها اني
بيران _ مبين اي اغار عليج هههههههه شكد سخيف
وجه صار احمر _ تف عليج شكد حشريه
كال هيج وفتح الباب الجبير صار بوجهه شهم باوعله شهم وكال _ شكو شبيك
ايهم _ وخر عني شهم
شهم _ وسم ولك ؟
ايهم _ اهوو اسف اسف
_ طلع من البيت واني اريد اسكت من الضحك ماكدر باوعلي وسد الباب _ صوتج بنت المسموط
بيران _ هههههههه ماكدر والله
شهم _ شكو تره راح اجيج
سكتت كوه _ ما كو شي بس ايهم طلع مسحول من بنيه
شهم _ وانتي شكو حشرية ؟
بيران _ سمعته صدفه نوب يكلها جروحي
شهم _ طاح حضج عبالي عندج سالفه يله طبي جوه
هزيت راسي وطبيت اضحك ..
.
.
.
.
.
.
.
.
كاعدين ناكل وبس غيد ما موجوده تآخرت ..
باوعت لايهم وكلت لنجمة _ نجومه انطيني المي
هزت راسها وانطتني _ شكرا يا جروحي
باوعتلي مستغربه وايهم شرگ.وخزرني _
شهم _ كافي انا مو جاي اكول ماريد حجي من ناكل
هزيت راسي وكعدت اكل مثل الخوش ادميه ..
لا يروح يهيج علي هاذا مثل الخيسه ..
ايهم _ هيج احسلج
طلعته الساني _ بكيفي
شهم _ استغفرالله
ميار _ محتاجه فلوس
شهم _ خلي نتزقنب وبعدين سموني
.
.
.
بالحديقه رحنه نشرب جاي فرشنه فراشات وكعدنه لان الجو حلو وصاير باريد راح يبدي الشته ..
شهم _ حضرتو غراضكم. ؟.
نجمة _ اي كلشي حضرنا بعد بس نروح
شهم _ خوش
ايهم _ من طول كاعدين خلي نتعرف على بيران
باوعتله صفح وكته هاذا _ ليش
ايهم _ هيج وين بيتكم
بيران _ قرييب هنا
ايهم _ ها لعد شعب جاي تشتغلين هنا ؟ وين ابوج اخوانج عمامج
بيران _ شعليك انته اني اريد اشتغل
ايهم _ وسم نشالله
باوعت الشهم وكلت بضوجه _ شوف هوه الي يغلط بالاول
شهم _ ايهم نجب
ايهم _ يا روهيي عبالك زغيرة تشجي نوب
بيران _ عاد ما مسحوله من بنيه اغار عليج احبج يا جروحي امداك يا عار
شهم _ انييبي مو كلتتتت كافي شبييكم الخاطر الله وغار زعاطييط راسي يوجعنيبي
ميار _ محتاجه فلوس
شهم _ وانتيييي لزكتييييي اريد زقنبووووت ارييييد زقنبوووت مو كلتتت هسههه
ميار _ لا تعلي صوتك علي تره اني امك
نجمة_ شبيكم يمعودين منا العالم
بيران _ هو من وره ايهم
شهم _ بس اسكتو لخاطر الله بس خلينا كاعدين
سكتت منحرجه بعد الرزاله حتى ايهم خنس .
نجمة _ شكد راح تبقون يمنه شهومي
شهم _ والله مادري بس خلي تهدئ الامور وها اوصيجن الباب ما تطلعنه اكيد راح اتراقب ما اريد تنعرف وجوهكم موو اذا ردتن شي هاذا شهم وهاذا ايهم موو
حجينا _ ميخالف
باوعلي _ موو حمامه موو مو الكاج طالعه
ضجت وكتله _ اهوو شكو تكلي مرتين شنو جاهله اني
شهم _ لا يابه جبيرة
بيران _ هه جبيرة ونص بعد
ايهم _ وهاي نص بعد مني صرتين ثنين وهاهاهاها
بيران _ انته محد حاجي وياك يا جروحي
ميار _ محتاجه فلوس
ايهم _ اهوووو مبرمجه بس على هاي الكلمه شكد تريدين اني انطيج
ميار _ لا اريد من شهم رايدتلي مليونين
شهم _ خير نشالله شتسوين بيهن مليونين
ميار _ محتاجتهن مرأة تطلبني
شهم _ شسمها اني انطيه ياها
ميار _ لا مو كلهن تطلبني ياهن اني هم عاجبتي تخم ما ذهب رايده اشتري
ايهم _ هنا الحجي الزين شوفي حبيبه انا ما اشتغل ليل نهار حتى اشتريلج تخم ذهب ذهبج مو كليل اكعدي واسكتي اذا تريدين هاي 500 الف تريدينهن بالعافيه عليج متريديهن بكيفج
باوعتله بحقد وكالت _ لا اريدهن والله يا الله عساس هو ابو البيت وهو ربع ميطلع
نجمة _ شوكت ما طلع ربع لعد بيش عايشين احنه ؟
ميار _ نجبي انتي لا تنطين كبلي
شهم طلع من محفضته خمسه وعشرينات وحسب ونطاها _ ولو ما مصدك مراه تطلبج بس يله اكسب بيج اجر هم عود بر الوالدين الكح***
عزا شكد مستحي شلون يفشر على امه بس حقه هيا امه ك*** ونجمه متعوده ولا يمها وهاذا ايهم بس يراسل مبين يراسل جروحه ..ههه
.
.
.
.
رحت للمطبخ حتى اجيب ليث عصير لان كام يبجي فتحت الثلاجه واخذت عصير دا اديره بالمميه ..
سمعت اشعار من موبايلي بتول مراسلتني
بتول _ هلو شلونج شو ماكو
راسلتها _ هلو بيج بخير ما مختفيه بس عندي شغل
بتول _ هاا اليوم رحنه ودينه عمتي
ذبيت العصير من ايدي وكلبي نكمش _
بيران _ شبيها خما اكو شي
بتول _ لا والله كلشي ما بيها بس ردنا نشوف شوكت عمليتها وهم اجلوها
بيران _ هاا الحمدالله عبالي بيها شي ليش اجلوها
بتول _ مادري يكول خلي وضعها يتحسن
جنت مرتجيه على الكاونتر واراسل بتلول ومطيه ضهري للباب ..
ما احس الى بنفس بخدي التفتت وجان اشهك من عنده وراي وماد راسه وياي يقره _
شهم _ تراسلينمن ؟
وخرت عنه ولزمت كلبي _ وكعت كلبي الله لا ينطيك
شهم _ صدك يا روحي كلبج شو خلي اشوفه
مد ايده وخرت عنه ونترت _ شبيك شكد قذر
لزم ذراعي وجرني ولزكني على الكاونتر _ مو كلنا حسابج بعدين
دفعته وما وخر _ يا احساب وخر راح يشوفونه
شهم _ شمسميتني بموبايلج ؟
بلعت ريك وسكتت _
قرب وجهه اكثر من عندي ورجعت ليوره _ شكاعد تسوي مو كلت اعتبرج مثل نجمة ؟
شهم _ يله عادي كهكهيات كدامهم مثل نجمة وحدنا مثل..._ قرب اكثر وحسيت روحي انخرطت كلش اخاف من يقرب علي او يحجي وياي هيج..
باوعت للباب وكلت _ نجمة !!
التفت وجان افلت من جوه ايده _ ادبسزز ما تستحي مو تحجبت ليش تتقربلي هيج
شهم _ هو هاذا حجاب ؟ شعرج نصه طالع
بيران _ حتى لو مو محجيه بعد لا تتقربلي هيج والله اخاف شبيك
شهم _ انطيني موبايلج وبعد ما اتقربلج
مديت اله موبايلي _ شسوي لا تدخل بخصوصياتي ؟
شهم _ ما ميتج عل. خصوصياتج هيه بتول
فتحت عيوني بصدمه _ عزاا شوكت شفتها بتول
انطاني موبايلي _ هسه احسن واذا غيرتيه اصير على كولتج ايع وما اعجبج
بيران _ انته مو كلت اول ما جيت احب مرتي ومكتفي بيها ليش تتحارش
شهم _ منو محارشج بوية ؟
بيران _ انته مو قبل شويه كوه وخرت عنك ؟
شهم _ هاي محارشه امده حضي تره جاي اقشمر عليج
بيران _ لا اقشمر ماريدك تحجي ويااااي
شهم _ صوتج بنت المسموط
بيران _ لا تغلط تره اغلط
شهم _ شو باله اغلطي
بلعت ريك _ اخلاقي ما تسمحلي
شهم _ اخلاقج طايرة ويا ايهم اشو ؟
باوعتله نضره صفح وكلت _ لان اكبر مني
شهم _ وايهم مو اكبر منج ؟
بيران _ اكبر مني بشويه انته مثل ابوي
شهم _ ابوج ؟
هزيت راسي مبتسمه _ انته بكد ابوي فاعتبرك مثللل ابووووووي
اكدتله على الكلمه اباوعله وهو ضحك مستهزء _ ماشي بابا تعالي خلي ابوسج
وقرب مني رجعت ليوره _ وخر عني
شهم _ شبيج بابا غير اريد ابوس بنتي ؟
بيران _ ههه عود لوتي وخر عني تره انته مو خوش والله
شهم _ انا رجال على نياتي معتبرج بنتي
بيران _ مبين شكد جذاب اصلا اول ما شفتك عبالي ثكيل وهيبه طلعت بس شكل تتحارش بيه
شهم _ ضربتج وما صرتي خوش وطردتج وما فاد ثاري هاي الطريقه الها سحر خاص يخلي الواحد محترم حتى ميفك حلكه
بيران _ ههه عود مخوفني تره ما اخاف منك
قرب علي _ صدك
خليت ادي حاجز _ لالالا والله اخاف بس لا تقرب
ضحك _ يله عفيه رايح انام باجر بالخمسه نكعد نروح
هزيت راسي وهو طلع تنفست _ حقير
رفعت موبايلي دا اشوف شمسمي طلع مسمي _ شهم ❤️ _ هه نوب مخلي قلب والله يا الله حذفت القلب وخليت بس شهم شعندي مخليه قلب عرفه ولفه ..
.
.
.
.
.
.
.
صارت الصبح وطلعنه من الخمسه اني وشهم ونجمه وليث بسياره وايهم وميار بسياره وغيد بسيارتها ..
نجمة جانت صاعده بالصدر وليث نايم كمت انعس خليت راسي على الكشن ونمت اصلا بعد هواي يله نوصل ...
بعد شوية فتحت عيوني على صوت نجمة لكيت روحي كدام بيتهم والصبح توه طالع والعصافير وصوت الدجاج نزلت ومددت جسمي _ الله الجو يخبل
انتبهت مو بس بيتهم موجود هواي بيوت هنا مثل القرية بس بعاد شوية عن بيتهم وبره خضار ودجاج سارح وبط..
شهم _ شكو صافنه شيلي جنطتج وطبي جوه
هزيت راسي وشلت جنطتي ونجمه طبت جوه شايله ليث وغيد بس طبت جوه وكالت _ جيبي غراضي
هزيت راسي ورحت لسيارتها بس شهم لزم ايدي _ وين رايحه ؟
بيران _ بس اجيب اغراض الست غيد
شهم _ چماله الست زراب انا مو كلت طبي جوه هيا تجيب غراضها معليج
بيران _ بس راح..
شهم _ معليج طبي واذا حجت وياج بس كوليلي
هزيت راسي وطبيت للبيت حديقتهم مال البيت كلش جبيرة وبيها نخل تمر ورمان بس توه مخضر وبيها ورد وبعد اشجار بس ماعرف شنو نوعها كلش حبيت بيتهم لان ذيج المره ابد ما انتبهت علي هيج .
البيت من جوه كلش نضيف .
بيران _ نجومه وين اخلي غراضي
نجمة _ بصف غرفتي غرفة طبي بيها عود بعدين انضفلج ياها ما بيها شي هيا بس تراب
هزيت راسي وتوني دا اروح نترت غيد _ وين مولية ؟
التفتت عليها _ ها لغرفتي
تقربت مزكحه _ اني مو كلت جيبي غراضي
بيران _ ليش متجيبينها انتي ؟
غيد _ وانتي شنو شغلج على شنو جاي ندفعلج سم غير دا تخدمينا ؟
تنفست بعمق وباوعتلها بتحدي _ شهم هو الي يدفعلي اخدمه بس هو وليث
ضحكت ما مصدكه ولزمت ذراعي بقوة _ صاير عندج لسان وتحجين ها ؟ روحي جيبي جنطتي مثل الخوش ادميه
نجمة _ غيد كافي راح اجيبها اني
صاحت بيها _ انتي لا تدخلين
ايهم _ شنو ما تدخل انتي كمتي تمسلتين زايد غير بيتنا انتي
غيد _ هه بيته مصدك نفسه هاذا تره انته غريب بهاذا البيت هيج ثكل وعليهم خلفله على شهم ملفيك
ما حسينا غير غيد اندارت بقوة ونصفكت براجدي _ بنت الكلب
رفعت راسها وصاحت _ تضربني ؟
ما نحس غير خنكها وكال _ واكبرج هم
كلها التمت على شهم يريدونه يوخر ماكو منضره يخوف مزكح عيونه حمر وغيد روحها نخرطت صارت زركه اني كمت ابجي كلها من وراي هسه لو رايحه جايبه الغراض وساكته
اخر شي ايهم لزكه بوكس وخره _ يمعودد راح تمووت بيدكك
شهم _ طبهااا مررررض انا ارييد اخلصص عليييها
غيد طكتها بركضه فوك وتصيح _ اله اندمك
كعدت على الدرج نفسي مكطوع وشهم صاح _ بنت الكواد شايفة نفسها الضاهر خليتها تصدك نفسها زايد
ايهم _ شبييك انته تره هاي غييد غيد مو جنت تموت على الكاع الي تمشي عليها
خزره _ وهسه كلشي تغير صرت اذا اباوع بوجها تلعب روحي
نجمة كالتلي _ راح اروح اودي ليث روحي اشربي مي يروحي لا تخافين انتي معليج
هزيت راسي ايهم هم راح لغرفته وركع الباب قوي ..اول ما طلبيت البيت صارت مشكله من وراي ما اطب بيت اذا متصير مصيبه اني اكبر نحس لا ابو ضل وياي ولا اخو اني فكر .
خليت راسي بركبتي وبجيت.. شكد عيب وفشله شراح يكولون علي اسوي مشاكل بيناتهم اصلا من يوم طبيت بيتهم مشتكلهم متخلص خاف بسببي ..
حسيت باحد وكف كبالي بس ما رفعت راسي ضليت ابجي خجلانه _
شهم _ ارفعي راسج
ما رديت علي ضليت ابجي سمعت صوته معصب ونتر _ ارفعي راسج ولج
رفعت راسي اله واني ابجي ..
كنبص كبالي وكال _ ضربتج ؟
نفيت براسي ودموعي تصب
شهم _ لعد ليش تبجين ؟
حجيت بغصه _ والله اسفة بسببي ضربت مرتك والله بعد ما احجي
تنهد ومد ايده ومسح دموعي _ كافي شنو مشغله صونده يذبن اربعه اربعه
وخرت راسي وكلت _ مو كتلك ماريد اعاند الست غيد
شهم _ انتي ما دخلج بشي انا اريد الزمها بس اصلا حتى لو ما محاجينج بشي انا اريد اكتلها لان جاوبه على كلبي
سكتت بس دموعي ما سكتت سمعته تحسر وكال _ دموعج تجوي گلبي
باوعتله وكلت واني ابجي _ هسه يكولون اني سويت بيناتكم مشاكل
ضحك وهز راسه بلا _ انتي لا تردين على احد اذا حجه وشغلج بهاذا البيت بس تساعدين نجمة وبليث تهتمين اذا شفتج كمتي تخدمين لاحد اموتج
بيران _ حتى انته ؟
شهم _ لا انا هم خطيه منو يهتملي
بيران _ انته خطيه ؟
هز راسه مبرطم ومعوج حواجبه
بيران _ ايع ما لايكلك هيج تسوي روحك كيوت
شهم _ جاي اقلدج هسه من تبجين
بيران _ لا تجذب ما مسويه هيج
شهم _ لحضه
طلع موبايله وباوعتله مستغربه شكاعد يسوي هاذا رفع موبايله ورد نزله وداره علي _ منو هاي
فتحت عيوني بصدمه طاكلي صوره عيوني حمر ومبرطمه نوب حته خشمي احمر _
شهم _ هاي منو مو طمطم
بيران _ شنو هاي امسحها عليك الله
شهم _ لا خليها كلما علمود كل ما اشوفها اتذكرج شلون تبجين
وخلها بجيبه الموبايل ..
شهم _ رايح اخذ فره بالكاع والبستان انتي روحي لغرفتج
هزيت راسي وهو راح بالفتره الاخيره شهم صاير كلش متقلب ساعه ما ينبلع وساعه خوش رجال هسه الي يشوفه بهاي الحضه وشلون خلاني اسكت من البجي يكول شكد حنين وهو ما ينجرع ..
.
.
.
.
طبيت للغرفه الي كالتلي عليها نجمة غرفه صغيره وبيها كنتور بابين خشب ولونها شكري بيها مرايه بالنص وميز وبيها فراش مو جرباية فراش عالي ..
خليت غراضي بالكنتور وطبت نجمة _ ها اعذريني الغرفه صغيره بس هاي متوفره والله
ابتسمت _ لا عادي والله كلش حلوة احله شي بيها الشباك
صدك لان الشباك جبير وصاير على البستان
نجمة _ اذا اتريدين اخذي غرفتي
بيران _ لا والله شبيج عجبتني
كعدت على الفراش _ هسه راح اجيبلج ديباج نضيف
هزيت راسي ساكته _ لا تنقهين من غيد تره هيا هيج طبعها تس تس على كولت ايهم
ضحكت عليها وكلت _ اني هم جان ملازم احجي هيج
نجمة _ ما كلتي شي غلط اذا مثل ما كالج شهم بس اهتمي بليث هاي بطرانه شكد ما تستحي شكالت لايهم
بيران _ شقصدها بحجيها ما فهمت شلون شهم مخليه ليش هو مو اخوه
اخذت نفس وحسيتها ضاجت _ ايهم ابن امي من رجلها الله يرحمه بس بحياتنا ما عدينا مو اخونه
هزيت راسي _ فهمت بس شهم كلش يحب ايهم حتى لو ما ضاهر هاذا الشي اي شي يريده يتصل على ايهم وهاذا معناتها يثق بي ويحبه
نجمة _ اكيد بس هاي غيد شكد حقيرة
بيران _ اي والله صح اصلا اني من يوم شفتها ما بالعتها تخوف
نجمة _ سفطتي غراضج وتعالي خلي نسوي ريوگ
هزيت راسي وهيا طلعت رحت على الشباك فتحته وابتسمت الشمس بعدها توها طالعه والجو يخبل وصوت العصافير والدجاج نوب البستان الي صاير وره البيت الشباك مطل علي
شكد حلو البستان خضاره يجنن وكلش جبير ..
صح المسافه مو بعيده من الكاع للشباك بس عبالك اني برج ايفل غمضت عيوني واحس بالهوه بوجهي ..
عود مثل المسلسلات وهيج ما احس اله ومي بارد بوجهي عطت ورجعت ليوره _
بيران _ خرب هاي منووو
باوعت من الشباك ليجوه وشفت شهم يرش ويباوعلي ببرود _ طبي جوه وسدي الشباك تره هنا مو مثل بمنطقتنا الي يشوفج يكول دور ولد
بيران _ نكعتنييي
شهم _ طبج حرش
سديت الشباك معصبه مو اكلكم منفصم توه جان خوش ادمي ...
....يومين مر على جيتنا بهاذا البيت الوضع تمام غيد بعد ما حاجتني اصلا ما اشوفها هواي وشهم هم مشغول بالشغل وايهم هم يرجع العصر بس كلش يونسنه بسوالفه صح غثيث بس يله نجمة كلش حبابه شكد استمتع بالحجي وياها نشتغل سويه وناكل سوه وميار ام شهم راحت لبيت اختها او لزهير ههه عرفت اسمه..
بس ذاك اليوم ما انساه شلون غيد الله لا ينطيها بلتني جانت الدنيه العصر بعد ما نومت ليث ونضفنا اني ونجمة كلمن بغرفته ..
خابرت بتول وتطمنت عليهم بس سمعت دكه على الباب كمت وفتحت شفت نجمة _ ها نجومه
وجها جان ما يتفسر شلون الحايرة _ شهم يريدج
بيران _ شكو
تنهدت _ بس تعالي
طلعت وراها وخليت شال على راسي نزلت استغربت شفتهم كلهم متجمعين وغيد كاعدة على الكاع تبجي _
حسيت بخوف بكلبي كلت _ ش شكو ؟
رفعت عيونها الي وتقربت لازمه ادي تبجي _ فدوة فدوة اروحلج اخذيهن كلهن بس رجعيلي يا هاذا عزيز علي فدوة
بلعت ريك وكلت _ شنو هوه ؟
شهم _ انتي ماخذه عقد غيد ؟
يتبع....
________________________________
حـــمامة الشـــهم..🕊️
ذمة برُكبتك سَاعة سَاعة المَا نِمتهن.