عندما تتغلب قوة الحب
على حب القوة
سيشهد العالم السلام ..
🎲🎲🎲🎲🎲🎲
قابل الباش بنظرة تكبر حتى ما تشكر منه لان هو اللي اجى وجاب الدعم، اللي فهمته لوما دعم الباش اينار تحاصر وجان انقتل وهو اللي قتل سحبان، سحبني من ايدي للسيارة سد الباب بقوة وراح صعد، الطريق كله ساكت حرف ما نطق، بقيت ابجي بهدوء دموعي تنساب بنفس السرعة اللي جنا نمشي بيها، الطريق ودموعي بينهم سباق
جنت شايلة هم نروح للبيت اللي كل مرة ياخذني بيه بس اللي صار عكس توقعي رجعنا بنفس الطريق اللي اخذوني منه جماعة سمعان وصلنا للوادي وكفنا كبال البوابة، رجّع راسه ليورا تنفس بعمق وطلعت كلمات تحذيرية بحتة مُنسابة من بين شفايفه
اينار : تعوفين غرفتج وتروحين لغرف البنات وحالج حالهم تشتغلين، اي شي يوصلني عنج تتحاسبين عليه، عدا هذا اكلج شربج نومتج نفسج اللي تاخذيه تسددين فلوسه عن طريق شغلج اذا بيوم قصرتي يتسجل عليج بدفتر الديون وياويلج اذا خالفتيني هاي المرة
خيلاء : وبعد؟
التفت علية باوعلي بمقت وكال
اينار : بعد وراج هواي ديون تسدديهن، تعلمي رزقج لا تستعجلين عليه
حجاها ودار وجهه اشرلي بطرف اصبعه معناها انزلي فتحت الباب ونزلت
انفتحت البوابة ودخلت امشي والدنيا طفت بعيوني مثل الاضاءة الخافتة الكئيبة بهذا المدخل
اول ما وصلت الدرج وبديت اصعد وكفني صوت بنية التفتت عليها باوعتلها عاكدة حاجبي
خيلاء : وياية؟
_اي مو اسمج سلافي؟
خيلاء : لا اسمي خيلاء غلطانة
_حبيبتي المهم ممنوع تصعدين فوك
خيلاء : اعرف بس اريد اغير ملابسي
_ملابسج نزلت جوة تعاي وياية
نزلت الدرج ونزل كل حيلي مشيت وراها بالممر اكو على يميني ويساري غرف ابوابها مسدودة بس وحدة جانت مفتوحة وبيها بنات كاعد ينظفون وجوههم وجسمهم استغربت شو الوضع عادي عندهم! بلة فات رجال مثلما اني فتت شنو موقفهم يكون، وحدة من داخل الغرفة رفعت ايدها وأشرت للبنية اللي يمي صاحتها
_سنارة تعاي
سنارة : هسه اجيكم بس اخلص من هاي
باوعتلي وهي تعلج
_منو هاي؟؟
سنارة : حبيبة سكرة
حجتها وضحكت مستهزءة
_هااا يلا لا تتأخرين نريد نتعشى
سنارة : اي هسه اجي
التفتت علية وكالت
سنارة : شبيج ما تمشين
خيلاء : مو اني اللي وكفت اسولف وأخرتج
سنارة : يمة من لسانج تكول دلالة
خيلاء : مكان مثل هذا وبيه ناس مثلكم شلون تريديني احجي واتصرف؟
بقت صافنة علية هزت راسها ومشت نهاية الممر اكو باب فتحتها وشغلت الاضاءة باوعتلي وكالت
سنارة : فوتي يلا
دخلت مكان غريب عبارة عن غرفة فارغة مابيها اثاث بداخلها باب فتحتها واشرتلي افوت
خيلاء : شنو هاي؟
سنارة : مكانج الجديد حبيبتي
خيلاء : ما افوت هنا لو تموتون
سنارة : اختصري علينا التعب وعليج الاهانة وفوتي برجلج
خيلاء : ما افوت اني مو حيوانة وانحبس
سنارة : اذا مو حيوانة ليش ما تجين إلا بالضرب؟؟
خيلاء : مافهمت شنو قصدج؟
سنارة : تعرفين قصدي كلش زين فوتي ولا تدوخيني
خيلاء : ما افوت واريد اشوف شتسوين؟
سنارة : اكلج باعي هواي مرن على كلبي مثل شاكلتج وجنت ادوسهن دوس، اذا ما تعرفين سنارة اسمعي عنها هسه، اكبر رجال اجيبه للطريق وما سموني سنارة على خالي بلاش لهذا تجنبيني لا ابوج الله يرحمه
خيلاء : شلون ألفاظ شلون قابلية شنو انتم!!
لعبت نفسي منكم كلكم، حتى ما اريد احلف لان المكان نكس بس لوما اختي هنا دقيقة ما ابقى لو اعرف انقتل على ايديهم او انتحر واخلص من حياتي، انتم ما ينعاش وياكم الغجر احسن منكم
انهاريت جنت اصيح بعلو صوتي الى ان اختفى تماماً وماكدرت احجي شي بعد، لهناك واجوي اثنين من طرفها رادوا يسحبوني من ايدي رفضت ونترت بيهم بصوت مبحوح
خيلاء : اني افوت اسحب ايدك
سنارة : هيج يلا
خيلاء : اسكتي انتِ رجاءاً
ضحكت مستهزءة وطلعت، فتحوا الباب اللي بداخل الغرفة قبل لا افوت سمعت صوت كلبجات حديد التفتت فعلاً لازمهن بيده ومنتظرني اقدمله ايدي
خيلاء : شنو هاي؟
_الأوامر هيج اجتي ما نكدر نخالف
خيلاء : تمام هاك ايدي بس كول للي دزك وأمرك شكد خايف مني لدرجة حبسني بغرفة داخل غرفة ومكلبجين ايدي
_لا تخافين، يوصل كلامج قبل لا نحجيه
هاي حجايته ذكرتني من فتح الحاسبة وسمعت حديث سديل وية اللي محاوطيها باللعب، عرفت صوتي مسموع الهم
مديت ايديه ورافعة راسي ادور على مكان الكاميرات مالكيت شي اكيد كله مخفي، كلبجوا ايديه ودخلوني بغرفة حجمها متر بمترين يعني يادوب امدد بيها، سرير واحد بس وكرسي غربي لقضاء الحاجة واكو كلينكس حتى مي ماكو
الموت اهون وارحم الية من هيج عيشة حقدت عليهم اكثر ودعيت من كل كلبي ينفني هذا المكان
وكأنما كانت السماء مفتوحة واستجاب دعائي من سمعت صوت هزّ اعماقنا هزّ والرخام غطى ملامحنا ضاعت صرخاتي بمهب الريح للخلاص من اللي اني بيه جنت اسمع كلمات تتردد
الثار الثار يا اينار الثار الثار يا رِجال العار
واختفى كلشي من الدنيا
ما قبل الواقعة
الوادي هادئ الكل مترقب، الحجي يعرف اكو هجوم راح يصير بس ما متوقع شنو نوعه وبأي طريقة وعلى ايد منو يكون الرد
كلمن اخذ موقعه والكل على اهبّ الاستعداد
صالات القمار فارغة، الكؤوس مجفية، الطاولات مغطاة، الرِجال انفصلوا عن النساء، اخذوا اجازة من المعاشرة
همهم الوحيد هو تفادى إحداث الضرر
خوفهم الوحيد هو سلامة الزعيم
اما الباش ما اتوقع اكو احد يدري هو اللي مشارك الزعيم بهاي المهمة
سنود : الوضع مخيف تحسين اكو شي راح يصير؟
سوارة : اول مرة يسحبونا من غرفنا ويتركون الرِجال وحدهم اتوقع اكو شي جبير راح يصير
سنود : وانتِ ما سمعتي شي؟
باوعتلهم بطرف عيني وبقيت ساكتة
سوارة : انتِ هييي مو تحجي وياج ليش ما تجاوبيها؟
سديل : شنو احجي شمدريني اني؟
تقربت مني لزكت جسمها بجسمي ابتعدت عنها ،تقربت اكثر
سديل : شبيج وخري
سوارة : انتِ حلوة حيل
سديل : وخري من وجهي احسنلج
سنود : عوفيها تولي يمعودة
سوارة : لا ما اعوفها اريد اشوف ليش تعاملني بهيج طريقة!!
تقربت مني وطلعت مطوة من جيب سترتها فتحتها بوجهي تصورت راح اخاف منها بس حتى رمشة ما رمشت بقيت اباوعلها مررت المطوة على خدي وعلى حلكي بعدت راسي عنها وهمست
سديل : السوالف اللي سووها وياج لا تلعبيهن وياية لان راح تتندمين
سنود : انتِ شنو اللي وصلج للحجي ليش هيج مهتم بيج وبعدين شلون دخلتي لصالات القمار ولعبتي!!
نريد نفتهم منج واليوم لعبتنا مادامج يمنا قريبة وهاي فرصة ما تتكرر كل يوم
سديل : علمي علمج شمدريني اني، ولو كان كلامج صحيح والحجي عنده اعجاب بية جان ما خلاني بوسط هيج بؤرة خايسة
سوارة : خايسة لان انتِ بيها
سنود : اتركيها خلي نفهم شوية
سديل : اختصري عليج الكلام، ما راح تسمعين حجي مني تمام!
سوارة : اكلج هاي جايبها يمنا لان يخاف من سيادة لا تعرف بيه يحبها وتطين عيشتها وعيشته، شنو رأيج نروح نحجيلها
سديل : وفري التعب تدري ومحاربتني ونومتي يمكم بسببها هي اللي فرضت عليه ينزلني هنا
سنود : ياا خطية بس حظج ابد مو حلو ما دام سيادة خلتج ببالها
سديل : اتعس شي يريد يصيرلي عادي اموت طز
ضحكن مستهزئات ما طول حديثهن من سمعنا صوت سيارات واسلحة واصوات الرِجال الصادحة
فتحوا الستائر باوعت وياهم عددهم مخيف ومسلحين، نزل واحد من آخر السيارات اللي صفت تقرب للبوابة رفع سلاحه وكام يصيح
سمعان : الثار الثار يا اينار الجبان.. الثار يا ابن الزانية.. الثار يا عار الثار الثار
يردد الكلام بصوت مخيف
كمشهد سينمائي وصل صوت سمعان للوادي، الحجي غلق الحاسبة رفع سماعة التليفون اتصل على سيادة استلمت الاتصال بعدها انتقاله لركضها بتبليغ الرِجال ليكونوا على اهبّ الاستعداد لرد هجوم سمعان وجماعته بعدما وصلهم خبر قتل الزعيم لأشقائه الاثنين سحبان وهتان الزعماء الاصليين للحزب
سيادة : احموا الوادي من السطوح وغلقوا الثغرات اللي ممكن يدخلوها ويستولون على الوادي
تبع صوتها رمي قوووي تكسر الزجاج دنكت وضميت راسي بين رجليه من الخوف والمنظر المرعب، غرفتنا جانت قريبة منهم كلش بعدها سمعنا الرد اللي وقف اطلاق النار، جان يزأر مثل الاسد صوته غطى على صوت السلاح
اينار : لك سمعان مو احنا اللي ننأخذ غدر طلعتلك أعزل وهذا صدري اترسه رصاص، الموت للرجال أهون من استجداء العطف بكلمات نابية صادرة من خنزير يتلفظ بألفاظ ويجيب سيرة نساء اطهر من الطهر، امي شعليها تنكس سيرتها بلسانك!!
حجاها ونطاه بوكس بوجهه خلاه يرجع ليورا تلكوه جماعته نام بحضنهم رجع الزعيم سدد لكمات بوجهه رفع راسه من سمع صوت الانفجار، تفجر الجزء الخلفي من البناية كام منه وعيونه منصبة على المكان اللي تفجر ركض وتوالت صرخات البنات وصار اطلاق نار بين الطرفين، سمعان ترك الخراب اللي خلفه وتوجه لسيارته صعدها وانطلقوا
ماصارلي شي بس مجرد خدوش بوجهي لان نزلت قطرات دم على ايدي وملابسي كمت اركض وادور على خيلاء، سمعت سيادة تريد تحبسها انفرادي وتعزلها عن البنات ليش ما اعرف، ركضت متوجهة للجزء الخلفي اللي هي بيه دخان ونار قوية، الغرفة اللي مقابل غرفة خيلاء المحجوزة بيها صايرة تراب والبنات اللي بيها كلهم ميتين الزعيم جان حاير شيسوي مرتبك وكلمة وحدة ما تفوه بيها بس جان يوخر الركام ويحاول يفوت لغرفة خيلاء
خيلاء
من صار صوت الانفجار اذني صار بيها ضغط لدرجة كمت اسمع صفير قوي بيها، بعدها نزل تراب من السكف ملئ راسي وجسمي وحتى حلكي اغمى علية من الخنكة ونقص الاوكسجين بالغرفة كمت اتنفس رذاذ التراب غمضت عيوني ودكات قلبي بدت تبطئ لحدما حسيت بيها راح تنتهي، ما اعرف شنو صار بعد بس فزيت على اصوات كلها هلع، صِراخ نساء وحناجر رجال تتفجر غضب، واصوات ازاحة الطابوك والركام اللي وكع كبال غرفتي
انفتح الباب ما ميزت منو كبالي لان وجهه يغطيه التراب زحفت ليورا من الخوف كام يزيح العقبات من طريقه ويتقدم اتجاهي
بعدها دنك همس بأذني عرفته اينار
اينار : اه اه
رفعني من الأرض ومشى بية بين الانقاض وطلعني اول ما عبرنا المكان وصرنا خارج البناية لمحت سديل تباوعلي من بعيد فرحت لسلامتها بس تجاهلتها ردت احسسها بحجم الغلط اللي ارتكبته، نزلني بديت استنشق هواء نقي وآخذ شهيق وزفير بدا يفك قيودي انفتحت ايدي، فركت معاصمي متوجعة منهن جنت مدنكة اباوع على الأثر اللي تركته الكلبجات صح وقت قصير بس جانت ضابة على ايدي بعدها انحضنت بقوة حسيت اجزاء جسمي تداخلت بصدره تنفس بقوة وصاح
اينار : اريد احضنج ويضيع نبضي وية نبضج
جان غايب العقل مستهتر المشاعر ترك كلشي وبقى ملازمني همست بقهر وضياع
خيلاء : اللي يحب يأذي؟ لوما الله ستر جان اندفنت جوة هاي الغرفة اللي حتى الحيوانات ما يرضون ينامون بيها
حاضني ويحجي
اينار : رجوعي للوادي لأن شفتج بهاي الغرفة اتصلت حتى يطلعوج محد رد تحججوا نايمين وادري محد بيهم نايم لهذا رجعت، وخرت منه وابتعدت بقى فاتح ايده يريدني ارجع جريت نفس قوي وهمست
خيلاء : بعد لا تعيدها ولا تستغل ضعفي وخوفي وتتقرب هذا الشي حرام لا تدخلني بهذا الطريق اذا تحبني ابعدني منا، وما اصدك بكلامك اللي حجيته انتَ حبستني هنا نزلتني من غرفتي حتى تعاقبني
اينار : نزلتج وية البنات خفت عليج لأن الغرفة كلها جام واحتمال جبير يدخلها رصاص وتروحين بيها مثلما شفتي هسه صار الهجوم علينا رمي وتفجير
جانت نظراته تعبانة وجهه شوية شوية بدا يبين، ملامحه شاحبة واعصابه ترجف قبل لا ارد اجى واحد همس بأذنه هز راسه وكال
اينار : روح هسه اجي وراك وتأكدلي كل اللي موجودين مابيهم شي وباقي البنات عالجوهم بأسرع ما يمكن
_صار زعيم
تركنا وراح، تقرب راد ياخذ ايدي سحبتها باوعلي بعتب وكال
اينار : متأكدة مابيج شي؟
هزيت راسي بلا ومشيت عنا تركته وتوجهت لسديل وشكو بداخلي غضب وحركة قررت اطلعه بيها كلت اهينها وحتى ضرب اضربها واذا استوجب الامر وعاندتني يمكن اخلص على حياتها واطم عارها
وصلت يمها اتعثر ببقايا فستاني الممزق رفعته من الكاع ووكفت كبالها ابتسمت مدت ايدها رادت تحضني قابلت لهفتها بكف رفعت عينها بعيني نطيتها الثاني وحاسة كلبي بعد يريد يضربها ما كاعد ابرد ونار صدري مستعرة لزمت خدودها وبقت تباوعلي نزلت دموعها وصاحت
سديل : لج ليش!!
هي كالت هيج وكأنما طلبت مني انفجر وانفجرت بيها
خيلاء : لج انتِ دمرتينا شنو اكولج تسوين العكس ماعندج مسؤولية، اهم شي عندج نفسج وبس وحدة حقيرة بعتي اختج من لحمج ودمج علمود ناس ناقصة عديمة الشرف والضمير، شنو قدمتي حتى انطوج هيج مهمات ومن شوكت تعلمتي وووو كل الكلام اللي جان يدور بعقلي فرغته بوجهها
سديل : خلصتي؟
تقربت اضربها لزمت ايدي وهمست
سديل : انتِ آخر وحدة مسموحلها تحاسبني، اللي وصلتله اني واللي احنا بيه انتِ سببه
خيلاء : شلون؟؟ عيدي اللي حجيتيه لان ما سمعتج
سديل : لا سمعتيني و اللي ردت احجيه حجيته وتعرفين قصدي كلش زين
خيلاء : تعالي لج هاي ويامن تحجين هيج!!
ولج قويتي وتذمرتي على الدنيا ودستي على اللي بيها ومن ضمنهم اختج
سديل : المكان مو مناسب حتى احجيلج ليش هيج تصرفت، بكل مكان مزروعة اذن شيطان
خيلاء : وين اولي بيج وتحجيلي!!
اتمنى تنطيني سبب واحد مقنع بس حتى اعديها الج وابقيج تشمين الهواء
سديل : شوفيلج مكان نحجي بيه
خيلاء : امشي بأي بقعة من جهنم الحمرا المهم تحجين وما يهمني اللي يسمع واللي ما يسمع اليوم انهي كلشي ومن ضمنها حياتنا اني وياج، ولج نمووت ارحم من الذل اللي شفتج بيه تمنيتج ميتة ولا تتنقلين من حضن لحضن ويتراهنون عليج
سديل : بالنسبة لحضن الزعيم قبل شوية شنو تفسريه؟ هااا؟؟
حجتها وكتفت ايدها
ضيقت عيوني بلعت ريك ناشف
خيلاء : لج يا غبية الاغبياء اول شي من شدهتي ما عرفت اتصرف ثاني شي اعتبريني سويت غلط المفروض تجين تحاسبيني شلون هسه اني احاسبج مو تقتدين بية
سديل : راح احجيلج وشيصير خلي يصير عسى ما الكل يسمع طز، على شنو شايلة كلشي وحدي تقاسميني اللي سويتيه
في جانب مظلم آخر بأحدى زوايا المقر تلبث امرأتان الشر والمكر حليفاً لهم والشيطان ثالثهم من رآهم تعوذ منهم من سوئهم وقبحهم
سيادة من خلف الستائر تاركة الدمار اللي صار ومركزة على هدف واحد وهو التخلص من البنات واللي صار اليوم بالوادي الها جزء كبير بيه بل الجزء الاكبر بهذا الخراب لان هي اللي دخلتهن للعب وخالفت أوامر الزعيم
سيادة : كلتلج اول خطوة حتى نتخلص منهم هي زرع الفتنة بينهم
سكرة : بس الزعيم ما راح تعبر عليه صدكيني
سيادة : تعبر حالها حال اللي عبرن
سكرة : ما اتوقع لا تنسين هو مو شخص يُستهان بيه وفعلاً ابن ابوه بس آخ شلون هيج راح محد عرف السبب مو؟
سيادة : الله يرحمه جان بمنصب عالي بالحكومة وانغدر
سكرة : انقتل بغموض حسب ما عرفت من الزعيم
سيادة : ما علينا المهم ريحيلي بالج ما بقى إلا القليل ونتخلص منهم
ثاني يوم نظفوا الوادي من الانقاض وعمروه، اجى مقاول البناء وياه مسطر كامل وابو الزجاج صلح الجام المتكسر، البستاني نظف الحديقة بس البنات محد لكى ارواحهن ماتن وانتهت حياتهن قبل التوبة، اللهم عافنا.
سديت الستارة ولبست لبس اكدر اطلع بيه دنكت على راس سديل بستها وطلعت مشيت بأروقة المكان وصوت الانفجار بعده يتردد براسي صرخات البنات ودمعتي
جريت نفس قوي وتوجهت لغرفة الاجتماعات بلغونا نتجمع بيها بينما يرجع الحجي لأن من الفجر راح لبيت سمعان يفض النزاع بأقل الخسائر
رجع واجتمع بينا، الخبر اللي أعلنه صدم الكل وهو
عواد : سمعان يريد يشاركنا بالنص واني وافقت
اينار شمر القلم من ايده وغادرهم بدون ما يلتفت لأصواتهم الجانت تنبح عليه حتى يرجع
تيام : ليش ما رجعتلنا قبل لا تتخذ القرار؟؟
عواد : خيروني بين الزعيم وبين امتلاك الوادي كله نازعتهم حتى اردعهم عن قرارهم ما رضوا بالنهاية كلتلهم يستمر الدم واحنا النا رد، بعدها ساومتهم بعدة امور انتهت بمشاركتهم الزعامة وية اينار
تيام : وان يكن رادوا الزعيم انطيه فدية للوادي
عواد : تحجي صدك؟؟
تيام : اي طبعاً الدمار اللي صار بسببه وهو يتحمل تبعاته واليوم طلبوه هذا حقهم المفروض توافق وتسلمه الهم
عواد : المهم اني تصرفت ونطيت حجاية واللي صار الكل يتحمله وانتهى الاجتماع الكل يروح لغرفته
تيام : لا اني ما اروح وضروري افهم شلون تصرفت بحصصنا، اذا تبرعت بحصتك فما راح تكفي وحدها اخذت حصص منو ومنو
عواد : انت كاعد تفهم اني جنت بأجتماع مغلق وبالكوة قبلوا يكعدون وياية وبالجلسة طلبوا مني دية بعد منازعات وتعالت الاصوات بطلب الثأر من ابن اخوك المرحوم شنو المفروض مني اسوي؟
تيام : تطلب منهم وقت تردلهم خبر تجي تشاورنا وتروح تبلغهم بالشي النهائي المتفق عليه
عواد : اللي صار صار واشرب البحر يا تيام اذا ما عاجبك قراري
تيام : ما عاجبني واللي راح اسويه محد يلومني عليه
حجاها دفع الكرسي ورا وكام مشى لخارج الغرفة وسد الباب بقوة ايده
طلعوا واني بقيت وحدي صافنة باللي صار والراح يصير عدا كلام سديل اللي اكل من عقلي وروحي اجزاء وخلاها متناثرة
فكرت وفكرت وفكرت آخرها قررت اروح واحجيله عن اللي سمعته واشوف شنو راح يصير واللي يكدر يسويه
رحت سألت عنه كالوا اخذ سيارته وطلع جان عصبي وما قابل يحجي وية اي واحد بيهم
رجعت للغرفة ونمت بصف سديل جانت نايمة بعمق وطفولة بريئة حزنت على حالنا وبجيت دم بداخلي
خلص اليوم بين الآه والونة طول اليوم بقيت منومتها بحضني وامسدلها شعرها بس كمت جبتلها اكل وكلتها ونومتها
صار الليل طلبت بإلحاح حتى اشوفه، خابروه بلغهم ياخذوني أله ورحت، ممر داخل ممر عبالك مغارة آخرها وصلت لباب تشبه الجدار لوما احد بداخل الغرفة فاتحها ماعرفتها باب
اشرلي اللي جابني حتى ادخل، دخلت لكيته كاعد على مكتب وبيده هواي اوراق شعره متهوس وملابسه ممزقة
بدون ما يرفع عيونه كال
اينار : مضيعة شي عندي وحركتي الدنيا هيج؟
خيلاء : اي
اينار : اخذيه وروحي اذا لكيتيه يمي
خيلاء : روحي وروح اختي بيدكم اخذتونا غدر مثلما اخذوكم حزب سمعان
رفع عيونه باوعلي وكال
اينار : بعيداً عن التفلسف اللي ماله داعي احجي بالمفيد عزيزتي لأن اذا كمت هسه راح اعرفج على شياطين الانس والجن
خيلاء : شياطين الجن اللي بالوادي؟
وادي تحميه العواهر وضعه من بعد حادث امس بات قاهر، بسبب قوانينهم البعيدة عن الانسانية؟
بقى ساكت ويباوعلي
خيلاء : الصمت ابلغ من مهاترات المختلين عقلياً
كام من مكانه سحبني من ايدي وضربني بقوة بالحايط تسارعت انفاسنا هو غضب واني قرف، مرر ايده تلمس تفاصيل وجهي ألتفتت للجهة البعيدة عنه همس بأذني
اينار : مستعد اتخلى عن كلشي اسمي منصبي مالي وصفاتي اللا إنسانية واقرب الأقربون اليه وما تبقى من عائلتي بس مال اخليج تمشين كلامج علية وتسوين اللي براسج هذا الشي مستحيل ومن اليوم تنسين وحدة اسمها خيلاء اسمج سلافي والكل تبلّغ بهذا الشي
حجاها وتقرب مني قبلني بقسوة بعدته بصعوبة ابتعد ومسح طرف فمه بإصبعه مثلما يمسحه من تنزل قطرة من الخمر على شفايفه، شايفة هذا المشهد المتكرر بكل جلسة يشرب بيها
انهاريت كمت ابجي واشكي حالي اني واختي وعلى اللي صارلنا
خيلاء : ولا واحد بيكم عنده غيرة ونخوة كل همكم الجنس ولكم انتم شنو من بشر مقرف!!
انتم شياطين الناس لازم تتعوذ منكم، المشهد اللي شفناه اني وانت بالحاسبة يخص اختي تعرف سببه شنو واني متأكدة انت ضمن لعبتهم الوسخة
اينار : شنو وضحيلي؟
خيلاء : البارحة انهاليت عليها بالضرب دمرتها بالحجي القاسي وتالي طلعت تسوي هذا الشي بتهديد منكم استغليتوا ضعفها وعدم ادراكها للأمور تهددوها بية مثلما تهددوني بيها، حتى لا تأذوني فاتت لهذا الطريق
ابجي واتخيلها من تحجيلي ودموعها تنزل خصوصاً من عيرتها بأسمها الجديد
خيلاء : ها سومة لو تريدين اصيحلج سيمة شنو يعجبج لأن كل جلب من جلابهم يدلعج بدلع شكل
سديل : اللي سويته حتى احميج
خيلاء : تحميني من شنو بلة ها من شنو؟
سديل : جنت احاول اطمطم افعالج اللي جنتي موقعة عليها وباصمة بأبهام ايدج هاي
تقربت واخذت ابهامي عصرته بين اصابعها سحبته منها لأن حسيته راح ينكسر بأيدها
خيلاء : يا افعال نوريني بلة اريد اسمع!!
سديل : اني وياج ننباع بأي لحظة للي راح نعجبهم، اني متاحة للأغتصاب لأعضاء الوادي، اعضائي تنباع اذا ما نفذتي طلبهم وغير هذا كله موقعيج على مبلغ مالي نحفى وما نكدر ندفعه
خيلاء : ما سويت هذا الشي اني وقعت على ورقة بيضة جبروني اوقع انضربت وتهددت، اكو واحد اسمه سطام ضرب راسي مراراً وتكراراً بالميز تعبت يلا وقعت وكلت بيني وبين نفسي التوقيع يتزور واكدر انكر واصلاً وقعت توقيع يختلف عن توقيعي الاصلي بس سحبوا ايدي بصموني غصب
اينار : منو يكول كلامكم صحيح؟
خيلاء : صحيح وانت مجبور تساعدنا
اينار : كلتلج صيري مرتي وكلشي ما راح يصيرلكم بس انتِ عاجبج طريق الذل والمهانة اللي انتم بيه، وها مرتي بالحلال
خيلاء : يا حلال هذا تعال فهمني يا حلال وانت من ساسك لحد راسك غركان بالحرام اصلاً زواجي منك بحكم الزنا
تركني ومشى رحت وراه صرت كباله خليت عيوني بعيونه كمت ما اشوف تغوشت بالدموع
خيلاء : اخذلي واحد ابو مخدرات؟ ومن اغيب عنه يشتاقلي ويتفقدني بكأس خمر؟ الحلال والحرام عنده سواسية؟ اخذلي واحد عرفته من شهر وايام معدودة وبسببه هو واللي وياه تحولت ملامحي لوحدة عجوز؟
لعق شفته دار وجهه ورجع باوعلي ببطئ بنبرة ساخرة من الموقف كله كال
اينار : عجوز!! انتِ عجوز؟
خيلاء : عفت كل كلامي وركزت على كلمة عجوز؟
اينار : ن استغربت الصراحة جمالج يتباهى بيه الرجال
خيلاء : هو هذا عالمك تحب تتباهى بجمالي وبفرض رجولتك علية وشلون تعاشر نساء ثانيات تحت اي مسمى من المسميات الدارجة وكل يوم عشيقة جديدة ترافقك عن البديلة
صفن بكلامي بعدها همس بنبرة امقتها
اينار : هذا قانون الوادي ولا حياة لمن تنادي
عبارة عن (شهوات ونزوات) ما بينا الصايم مصلي والكل بعيد عن الحلال مثلما تفضلتي سابقاً
خيلاء : انقرفت منكم حرام عليكم اللي كاعد تسووه ببنات الناس حرام
اينار : ليش حرام ماكلين شاربين لابسين سهرانين وبنهاية اليوم مرتاحين وبجيوبكم فلوس اكو احلى من هيج حياة؟
خيلاء : انت عبارة عن شكل انسان بس داخلك مليان قبح وماعندك إنسانية
اينار : اعشق الحرام وكلشي بالسر احبه
خيلاء : صار التباهي بالفسوق بدل ما نتباهى بالاخلاق والدين، ربي رحمتك بس لا تخسف بيهم الارض ونندفن وياهم وننأخذ بذنبهم
اينار : وفري نصيحتج لأن جاية للشخص الخطأ بالمكان الخطأ
خيلاء : الحجي وياك عقيم اني رايحة وممنوع تحجي وياية مرة ثانية واشواكي اللي زرعتها بغبائي اقتلعها بأظافري وإياك ثم إياك تكرر فعلتك مال قبل شوية
اينار : نبرات التهديد ما احبها
حجاها وجرها بصوته بعدها استفزني من كال
اينار : اني شنو سويت قبل شوية؟
خيلاء : تعرف كلش زين
اينار : وداعتج ما اعرف لأن اني رجل غركان بالحرام
خيلاء : تعرف كلش زين شنو سويت
اينار : لا ما اعرف ذكريني
حجاها وكام يتقرب بلعت ريكي وبديت ارجع ليورا بخطوات متعثرة وخايفة
خيلاء : اعرف اللي حجيته هباء والانسان الكدامي قلبه من حجر بس خليني اطلع
وصلت للنهاية صار بظهري الحايط مد ايده من وراية وفتح الباب دفعني وسدها بحركة سريعة شالني ونزلني على السرير تقرب مني وكال
اينار : اعرفج على نفسي ونزيح الغموض شوية حتى تعرفين وية منو تتعاملين اللي كدامج شخص يعشق كلشي محظور من خمور وفجور وفخور بالعهور وآخرها محظورات جسمج، الأخيرة بالذات عاشقها
يتبع......
متابعة ممتعة
تفاعلكم يزيد حماسي لا تنسون مثلما ادللكم دللوني🤭