فيما مضى
وقتاً جميلاً وأنقضى
واليوم أقضي ليلتي أحصي الفضا
ذاك الذي اسقيته من ماء عيني مدتا
ما عاد يشعر بالرضا
فوضت أمري للذي
خلق المشاعر كلها
عبدا.. ضعيفاً.. تائها.. متكاسلا.. متمارضى
ما بيه حيل ارفع جفن
ذبلان جسمي من الحزن والدمع..
الدمع من كد ما نزل ماخلة لون برمشي
محتار... محتار بحلامي البقن
شو ما رضن يتحققن
مثل اليشوف ابنه البچر.. كبران بس ما يمشي
ما عندي كلشي.. بيا بخت يردوني أرضى بكلشي
♠️♠️♠️♠️♠️♠️
من وين ابدي البحث حسرتي
جبيرة ياربي ما اقساها مشيت وبيد
بس الكروة اللي اروح بيها لمكان واحد فقط وصلت لنهاية الممر اجتي وحدة من البنات مشت بصفي وطخت كف ايدي التفتت عليها ونزلت عيني على كفها ضغطت على ايدي بيدها وهمست طلعي بدون حجي ولا تشوفين هسه شكو بيدج ..
وبالفعل طلعت ولكيت فلوس،استغربت شلون سمحولي اطلع وحدي واندل الطريق والمكان بس اللي اكدلي تفكيري ساذج وجود سيارة مظللة نزل واحد لابس قاط اسود بدون كلام فتح الباب وانتظرني اصعد حتى بدون ما يأشر او يحجي شي، واضح وضوح الشمس السيارة الية جاية متكونة من سبعة راكب صعدت مشت السيارة وانحط فوك راسي كيس اسود سكتت ماحجيت شي المهم اوصل للمكان اللي اريده واخذ الفلوس ، اول شخص فكرت اروحله اختي بس من وين تدبرلي هيج مبلغ وخايفة أأثر على حياتها ويخرب زواجها بسبي واكيد هسه طشت بين الناس اني انهزمت واختي عندها شروع بالقتل وزوجها قايم عليها دعوة اكيد زوجها ما يتشرف بمثل هيج خوات ...
بعدت الفكرة عن بالي اجت خالة ام طلال هذه امرأة كبيرة بالسن جنا بالعطلة نروح نساعدها نشتغل يمها وتنطينا فلوس نجمعها علمود من تبدأ المدرسة عندنا مصرف ،
كلت اشوف وين يوصلوني بعدها انزل واخذ تكسي لبيتها ، الطريق طويل كلش بس طلعت ساعة ستة المغرب مشت بينا السيارة مدة ستة ساعات ، ساعة 12 بالليل وكفت ونزلت منها وكفت بمكان شارع عام وبيه كشك بعيد وانارة متوزعة بصورة متساوية بس اغلبيتها طافية كم وحدة مشتغلة بس ، التفتت السيارة ماكو ما حسيت عليهم من حركوا بقيت مركزة بالمكان وتفاصيله ردت اعرف اني وين بالضبط تجرأت وعبرت للكشك جان اكو ولد صغير عمره ما يتجاوز العشرة سنوات سلمت عليه وسألته
خيلاء: هذه المنطقة شنو اسمها تعرف ؟
_ بالمحمودية خالة
خيلاء : واذا ردت اروح لبغداد من وين اصعد؟
_ اي تكسي يوكف اخذيه بس انتبهي لا يطلع سكران ترى هنا اكو هواي مزارع واذا اخذوج بيهن محد يسمعلج صوت وهواي بنات راحوا بيها
ابتسمت على طريقة كلامه وحرصه ورجولته همست بصوت تعبان
خيلاء : انت من وين تجيب هذا الحجي الحلو ؟ وبعدين اذا تعرف المكان بيه خطورة شلون تبقى وحدك شلون جازفوا اهلك بيك ؟
_ مثلما جازفوا بيج وخلوج تطلعين وحدج بهيج عمر وبهذا الوقت بالليل وانتِ بنية
دمعت على تفكيره وعلى حاله وحالي وشلون جاوبني جواب خرسني ، بلعت ريكي ورجعت سألته
خيلاء: شكد عمرك انت؟
_ 13 سنة
خيلاء: ماشاء الله قدرّتك اصغر
_ كلها تكول هيج يمكن لأن ناعم
_ اي صح
خيلاء : شكراً جزيلاً ودير بالك على نفسك
_ ان شاءالله وانت هم
هزيت راسي ومشت مسافة وسمعته صاحني التفتت عليه باوعتله وهزيت راسي بمعنى شنو ؟
-تعالي هنا يطلع الفجر تصير حركة بالشارع وروحي للمكان اللي يعجبج
خيلاء : ما اكدر ضروري اروح هسه
_ مهزومة من اهلج ؟ اذا مهزومة رديلهم الناس وحوش ما ترحم
تنهدت بحسرة تهد جبال هزيت راسي وكلت
خيلاء : الله المستعان
- ونعم بالله ، زين تعاي ابقي بالكشك واروح اصيحلج صديق اخوية يوصلج صح يحجي هواي ويدوخج بس انسان نضيف حيل
خيلاء: ياريت والله تسويلي فضل بعمري ما انساه الك
دخلت للكشك وهو طلع عشرين دقيقة ضبط حسبتله بعدها اجى يلهث وكف كبالي متخصر ويتنفس سريع
_ هسه راح يجي اسف تأخرت عليج بس هذا دثو اذا نام ما يكعد الأ بعد يومين
ضحكت بعدها سألته
خيلاء: انت شلون أمنت المكان بيد وحدة غريبة ؟ اكبر غلط تأمن للناس وياهو اللي يجي تساعده مثلي ممكن تتأذى بسبب هذا الشي
_ خالة الناس اجناس وسيماههم في وجوههم هذاك هو مبين ابن الاصول والزين
خيلاء : الله يبارك بيك
قطع كلامنا السايق وكف يتثاوب ويباوعلي بنص عين
_ هاي انت من وين شاردة من هلج من الجنة
الولد نتر بيه
_ لك هاي خالتي اخت امي وجايتنا خطار وهسه خابر زوجها يريدك توصلها لبغداد لو هي وين تريد اسألها
_ خالتك وما تندل بيتها وين
_ ها سعود ترى تعرف شنو اسوي
_ لا يلا رايح
مشى كدامي وصلت للسيارة صعدت وتشكرته هواي وبقيت ادعيله سد الباب والتفت للسايق شاوره بأذنه هز راسه بأي
صعدت وبقى واكف بمكانه وصل يمنا مدلي كيس سألته شنو بيه ما قبل يحجي فتحت ايدي الفلوس عركانات همست بخجل
خيلاء : أخذ حقك ورجعلي الباقي
ابتسم وسد ايدي وكال
_ يجي يوم حالج يصير احسن وضرفج عال العال وتعزميني على غداء بمكان اني اختاره
ابتسمت هزيت راسي والدموع ترست عيوني ضرب على السيارة وكال يلا الله وياكم ، قبل لا نحرك مدلي راسه وكال كروتج وصلت ردت احجي مشت السيارة، التفتت للسايق
خيلاء :ما دامك ما اخذت منه فلوس اني ادفعلك كروتك
ضحك وكال
_ دفعها
احتجيت
خيلاء: لا وين دفعها ما شفت شي واني انطيك الفلوس امانة ترجعهن
باوعلي بالمرايا وكال
_ شكد تنطيني ؟
خيلاء : شكد اتفق وياك اني ادفع
_ بانزين يملي سيارتي مدة شهر كامل
شهكت وفتحت عيوني
خيلاء : حيل ومن وين يجيبلك هالكد فلوس والله حرام وهو كشك قابل عنده معمل ؟
_ عنده بانزين يبيع مو عبالج
خيلاء : غير يسترزق منه خوما يخسر هيج خسارة ويكوم يشتري من جيبه
_ اني ما كلتله تعال كعدني بنصف الليل واكريني هو عرض علية ينطيني اني ما حجيت
بقيت ساكتة لان مبين انسان جشع وخبيث ، الطريق كله اكل بروحي وألومها شلون طلبت منه يساعدني لو ادري هيج يسوي فلا اقترب قاطع افكاري من سألني وين اوصل نطيته عنوان الحجية ام طلال ، من بعد صبر بليغ النفاذ وصلنا جانت الساعة الثانية والنصف ليلاً نزلت مجرد سديت باب التكسي حرك وراح وكفت كبال الباب مترددة بحيرة اذا دكيت الباب شنو راح يكون موقفي واني جاية بهذا الليل واذا شرحت سبب مغاير عن الحقيقة شنو ممكن يكون؟
فكرت اطلب الفلوس علمود عملية بنتي لا قدر الله ، بس ما راح يصدكوني يعرفون زوجي رتبة عسكرية وجيبه مليان المفروض ما احتاج احد
صعدت الحرارة براسي احس وجهي صار حار فركته حيل سحبت نفس ودعيت يكون ابنها وجنتها كاعدين بعدهم لأن مو مال انتظر للصبح و الوقت من يمر مو بصالحي ابداً
سميت بسم الله تجرأت ودكيت الباب مرة مرتين محد يفتح رجعت كعدت على الرصيف كبال بيتهم جنت اروح وارجع بكعدتي مثل اللي كاعد بكرسي هزاز يهز بيه وهو بنفس مكانه حسيت بدوخة قوية ما ماكلة شي
صار ليس يومين بس اشرب مي من القهر والتعب وبنفس الوقت ما استنظفهم واعرف فلوسهم فلوس حرام لهذا يعز علية ادخل لبطني لكمة حرام ،تذكرت العلاكة فتحتها باوعت بسكت شمائل وعصير داليا اثنين بأثنين ابتسمت على براءة هذا الولد وحنيته وكرمه وشجاعته رغم صغر سنه
فتحت البسكت اكلت وشربت وياه العصير اكلتهن بشراهة من الجوع حسيت نفسي ماكلة شي دسم بالبداية ما حسيت بشي بس مرت ربع ساعة معدتي كامت تأذيني لدرجة فضيعة كمت مشيت كلت بلكت اذا تحركت اتحسن بس نفس الشي
شوية اكعد شوية اكوم الى ان تقيأت اللي بمعدتي كله يلا ارتاحيت ، اشتهيت انام حتى لو على الرصيف بس بارد الجو ثلج عكس المكان اللي بيه الوادي حار ما اعرف بيه تدفأة لهذا ما جنت احس ببرودته
استمرت الرجفة بجسمي لحدما طلع ضوء الفجر اذان لصلاة الصبح دمعت عيوني تمنيت اسبح والبس ملابس نظيفة وجديدة واصلي تمنيت هاي الأمنية من كل قلبي وية ما صاح ان الله وملائكته يصلون على النبي يا أيها الذين آمنوا صلوا عليه وسلموا تسليماً ( اللهم صِل على محمد وآل محمد )
مرت ربع ساعة وحسيت اكو حركة من داخل بيت ام طلال صوت مي كأنه كعدت ترش الزرع ، من عوايدها تتوضئ وترش الحديقة بعدها تفرش سجادتها بالطرمة تصلي صيف وشتاء هذا حالها ظناً منها الدعاء بهيج طريقة مستجاب وغيرها لا
وكفت يم الباب دكيته انقطع صوت المي بعدها صاحت منو جاوبتها
_ب أني
_ منو انتِ
_ اني خيلاء بنت ام نهيل
_ ياهلا ياهلا
فتحت الباب باوعتلي عبست وجهها بعدما جانت مبتسمة سألت بحيرة
_ هاي شصاير بيج ليش هيج وجهج وشجابج بهذا الوقت بنتج وين؟زوجج شلون سمحلج تطلعين وحدج بهذا الوقت
بجيت وبشهكة كلتلها
خيلاء:خالة مشتهية اصلي وافتح صدري وادعي مشتهية انفض همومي بسجدة وبعدها احجيلج كلشي
تباوعلي بقلق خايفة مني لو علية ما اعرف بس حسيتها ترددت تدخلني بيتها صفنت بعدها استغفرت وكالت
_ لا حول ولا قوة إلا بالله العلي العظيم فوتي امي البيت بيتج ، دخلت وخطواتي ضايعة ماليها التعب دخلنا للأستقبال التفتت عليها همست مستحية منها
خيلاء: اريد اسبح واذا تمنين علية وتعتبريها صدقة عن راس اولادج انطيني ملابس نظيفة حتى لو قديمات مال حوراء البسهن عادي
_ جنتي تستعارين تلبسين منها رغم ملابسها جدد وجنت اتوسل بيج جانت نفسج عزيزة شنو اللي وصلج لهذا الحال راح اتخبل
خيلاء: وروح ماما احجيلج بس اسبح واصلي واشكي همي بسجدة حتى ما يكول حجت همها للعبد الضعيف اللي اني خلقته وهو لا حول ولا قوة وتركتني اني
باوعتلها بجت وتهز اكتافها بقوة تقربت حضنتني رغم بيها وسواس نظافة حتى شمتني من ركبتي ، ابتعدت باوعتلي وكالت
_ ربي يكملج بعقلج وتلبسين الحجاب يايمة
خيلاء : ألبسه ان شاءالله واجيج بلبس مختلف بس اطلع من اللي اني بيه
_ ان شاءالله هسه رايحة اجيبلج ملابس ومنشفة وفوتي للحمام قبلي تندليه بيتج هذا بعد
خيلاء : مشكورة خالة ما قصرتي بيت العامر ان شاءالله
دخلت للغرفة واني فتت للحمام نزعت ملابسي وذبيتهم بسلة النفايات صح انترست بس احسن ما اذبهن على الأرض
سبحت وكملت دكيت الباب خفيف بسرعة ردت يمكن جانت واكفتلي قريب الباب مدتلي المنشفة اخذتها نشفت بعدها اخذت الملابس لبست وطلعت لكيتها مشغلة الصوبة وحاطة قوري الجاي عليها كعدت اتدفى حسيت بشعري نشف استأذنت منها ورحت اتوضئ ما سألتني اي شي لأن جانت ملتهية تصلي رجعت للهول لكيتها فارشة سجادة الية لبست الايزار ووكفت اصلي اول ما كبرت بديت ارجف خشوع خوف رهبة من اللي اني بيه ايديه اخاف سويت الحرام اللي ما يغتفر
صليت الفجر ونافلتها ، ماما علمتني عليها من احنا صغار تكول الدعاء بيها مستجاب حتى وان طالت مدة الاستجابة بمعنى نحصل على الامنية بالوقت الصح وبالظروف المناسبة صليت ودعيت فتحت القران قريت سورة يس وهويت جثة هامدة على السجادة احجي وابجي ختمتها ب( اشكو بثي وحزني الى الله )
بعدها انمدت ايد مسحت دموعي وغسلت وجهي بالمي ومدتلي خاولي انشف بيه التفتت على الحجية اخذته منها لفيت السجادة وبقيت لابسة ايزار الصلاة حسيتها حاميني من الدنيا وتلوثها سألتني
_ تتريكين ؟
هزيت راسي بلا
خيلاء: ما اشتهي معدتي توجعني شوية واكل
_ زين تحجيلي ؟
خيلاء: اي راح احجيلج واتمنى تتفهميني ، وبديت اسرد التفاصيل الرئيسية اللي وصلتني للنادي ، تمهيد لموضوع الفلوس كلت بلكت تتعاطف وياية وتساعدني ولو بنصف المبلغ ولو اعرف اشتغل عندها العمر كله بلاش راضية وحتى ادور على شغل شريف اسدد دينها ومتأكدة عندها لان اهل خير
وناس شبعانين ، وصلت للسبب اللي خلاني اطلع من النادي واجيهم سكتت من سمعت صوت اقدام خلفي تنزل الدرج الحجية وجهها صار اصفر وتلعثم الكلام بحلكها بدون ما التفت عرفته طلال هذا ابنها حيل معقد ويشك بأصابعه
وكف كبال امه أشر علية وكال
_ هاي تاليها تلفين بنات الملاهي ببيتنا !
احتجيت على كلامه رديته بس غصيت بكلامي
خيلاء : احترم نفسك وبدون تجاوز رجائاً
_ ها تدورين احترام مني ليش اللي مثلج تعرف الاحترام ؟ امشي اطلعي برا بسرعة
_ ابني عيب هيج تحجي وياها هاي خيلاء بنت ام
قاطعها وكال
_ اعرف زر___ء بابا هاي اختها قتلت وانهزمت وهي هم على الواهس بنفس اليوم اتفقن وانهزمن حتى يشتغلن بالملاهي وهسه جايتج تفتعل قصة كذب حتى تأويها
خيلاء: اختي ما قتلت احد واحنا ما انهزمنا واني ما جاية حتى تأويني ببيتك
_ على شنو جاية من الفجر؟ شوفي يمة هاي مهزومة من واحد لو مسوية جريمة ولاحكيها واذا عرفوا يمنا كلنا ننشال وتحقيق وسين وجيم طرديها بينما احذف التسجيلات واروح لأبو علي جيراني هم اخليه يحذف الوقت اللي اجتي بيه
خيلاء: حرام عليك تطعن بأعراض الناس
_ قابل جذبت ؟ اسأليها زوجها وينه و بنتها وينها خلي تجاوبج
_ اي صدك بنتج وين ؟
خيلاء : مو مهم شكراً على كلشي قدمتيه الية ورحم الله والديج خليتيني اصلي
انتبهت عليه يتبسم بأستهزاء تقربت ابوسها دفعتني ، اخذت الفلوس وطلعت اسمعه يصيح على امه بس الحجي ما مفهوم مشيت وابجي بحرقة لوهلة حسيت قلبي راح يوكف ويعلن استسلامه مريت من يم الجسر قررت انتحر وكفت بعيني سديل بعدها بالوادي كمت اصرخ اريد انسى الموقف اللي صار والحجي يتردد بأذني هي واختها جذابات كل همهم يجذبون الشخصيات الكبيرة من الحجي والزعيم وانت نازل مر الموقف كله بس ما مر مرور الكرام شلع من عمري وقلبي وروحي لو حجي طلال لو الناس؟
زين هسه شلون نطلع للعالم شنو راح يكولون علينا بنتي شلون تواجه المجتمع من فكرت بهاي الأمور رجعت ضعفت وهم قررت اشمر نفسي
مشيت سريع اريد اهدأ وافكر صح واقرر على منو اروح باوعت للساعة صارت السابعة ، امشي واستذكر تفاصيل المشهد الأخير ابد ما راح من بالي
من هجمت على الحجي الكل وكف على اتم الاستعداد الموسيقى الصاخبة انطفت عجلة الروليت هدأت اصوات البنات انخرست هدأ المكان مابيه غير صوتي يصدح بقوة ، قررت يا اما الموت او الموت ماكو حل ثاني
خيلاء: كلب انت اللي اعتديت على اختي انت يا وجه الخنزير
سحبوني اثنين من الحماية وكتفوا ايدي بس بقيت مواجهته
عدل سترته وكال
عواد : شتهذين انتِ ؟
خيلاء : كلب شنو اهذي انت معتدي على اختي
بكل برود كعد على الكرسي رجل على رجل وكال
عواد : متوهمة اول مرة اشوفكم هنا
خيلاء: شلون اول مرة انت هواي ترددت على المكان الي جنت اشتغل بيه حافظة هاي الملامح كلش زين
عواد : اخذوها منا بعدين احاسبج بتطاولج على اسيادج
خيلاء: ولك متأكدة وجهك آخر وجه قبيح شفته قبل لا افتح عيوني والكى روحي بخرابة مخدريني واختي في حال يرثى له ملابسها ممزقة وعليها آثار تعذيب حتى اسألوا ساتي دخلت وياها للحمام وشافت آلاثار
سطام : اخذوها هاي سكرانة
سحبوني بقوة وبقيت احجي هواي دخلوني بغرفة كتفوني وخلوا مسدس براسي واحد منهم ركزت بوجهه تذكرته محاج طلب افتح حلكي رفضت اصرّ علية هددني بأختي انجبرت افتح حلكي واشرب من الشراب اللي بيديهم لعبت نفسي دفعته وكع الكاس وانكسر راح جاب البطل ضربني على راسي حاول يجبرني اشرب منه ما رضيت نفسي ما تريده شرب من البطل مثل الحيوان وعاط بية كاز على اسنانه
محاج : اشربي مثلي بسرعة
هزيت راسي بلا وكمت اصيح سدوا حلكي بكف ايدهم طلع واحد منهم ورجع اللي عرفته جايبه سرنجة سحب من البطل فتحوا حلكي ودفعوا الشراب داخل المرئ،
تقيأت وعادوا الكرة مرة ثانية وثالثة الى ان بديت احس الدنيا تفتر بية ودايخة ماعرف شنو صار بعدها بس من فتحت عيوني لكيت نفسي نايمة على قنفة ومغطيني
باوعت شفت الزعيم والباش والحجي واللي اسمها سيادة ، وجع راسي جبرني ارجع اغمض عيوني بس صاحية اسمعهم
سيادة : ماكو داعي نعيد بالحجي زعيم هاي تاليها نصدك زعاطيط ؟
اينار : سيادة قانون الوادي شنو يكول ؟
سيادة : قبل لا تحجي اعرفه كلش زين
اينار : من تعرفين حسب قانون 395 اللي يغوي بنية عذراء او غير عذراء ويعتدي عليها بأي عمر من الاعمار عقاب اللي سنّه الوادي شنو ؟
سيادة : يابة سكرانة سكرانة تصدك بوحدة غايب عقلها منها
تيام حجى بهدوء
تيام : واختها ؟ هم سكرانة ؟
اينار : اشتميها اي
سيادة : خلص
تيام : صدفة غريبة! بعدين شنو هذا القانون شو ما سامع بيه ؟
سيادة : هو يختلف عن القانون الاصلي بس الزعيم حبه وعممه على جميع رجال الوادي مع تغيير بالصيغة
تيام : وملتزمين بيه ؟ على الكل ؟ لو ناس وناس لأن اللي سمعته والعصفورة كالتلي الزعيم اي وحدة تعجبه ياخذها ما مبقي وحدة بحالها واذا خالفت ينزلها للصالة مع عقوبات شديدة
اينار : مو موضوعنا هذا المهم انتظر البنات يصحون واحجي وياهم ، واشوف من يذهب السكر عن عقلهم يبقى حجيهم نفسه لو يتغير
سيادة : روح ارتاح و كمل سهرتك واني باقية يمهم اول ما يكعدون راح ادز عليك
اينار :باقي اخذوا الباب وراكم
حجاها بحدية ، جسمي يرجف اريد اكوم اقتض عليهم بس ما باليد حيلة ما اكدر تعبت قواي خارت .....فززني صوت طفل يبيع ورد
_ خالة اشتري فدوة لوجهج
دنكت بمستواه وهمست بصوت مبحوح من البجي
خيلاء: المن اخذها ماعندي احد اهديه وردة
-حبيبج ابنج بنتج ، ماعندج جهال بكدي
من حجى هيج التمن علية مشتتات البال وخذن حيلي وهدّني بنتي اخ يابنتي شفايتلي يمي جان مليتلها الدنيا ورد
_ يلا خالة اخذي
مسحت عيوني وسألته
خيلاء: انت متريك ؟
هز راسه بلا
خيلاء: طالع من الصبح تبيع ورد وبدون ريوك بهذا البرد ليش ؟
_ لأن بابا شهيد وبس اني وامي واختي الصغيرة لازم اعيشهم اني
خيلاء: جوعان ؟
ابتسم وكال
-يعني مرات ما احس اني جوعان لان تعودت عليه
خيلاء: اذا اشتريتلك لفة تاكل ؟واشتري منك وردة شنو رأيك ؟
_ لا خالة انت بس اشتري مني واني اتريك اوعدج
خيلاء: لا متأكدة راح تنسى ، امشي اشتريلك
بعد معاناة يلا قبل يجي وياية حتى هيج اطفال شكد نفسهم عزيزة من شفته وهذا حاله بالبرد حمدت ربي على مصيبتي على الاقل بنتي دفيانة ومدللة حتى لو جانت بعيدة عني المهم هي بخير مو مهم اني
وصلنا يم كشك اشتريتله لفة كص وعصير اخذت منه وردة ونطيته فلوسها ابتسم وكعد ياكل شفت الفرحة بعيونه فرحته تشبه فرحة البنية اللي حصلت حبيبها من بعد ومعاناة و بأول طلعة الهم هدالها وردة ، الاحساس اللي وصفته يشبه لمعة عيونه تركته ومشيت امنته بيد رب العالمين يساعده ويخلي ولد الحلال بطريقه يساعدوه على المعيشة ، باوعت مابقى عندي غير بس خمسة الاف باوعت للسماء وكلت الحمدلله والشكر حالي احسن بهواي
كمت امشي واسأل من وين اوصل لمنطقة صديقة الية اعرفها كلت اخلص جزء من الطريق مشي ومن اوصل قريب اصعد سيارة حتى تكفيني الفلوس
وهي اصلا قريبة من المكان اللي امشي بيه بس اذا تكسي ياخذ هواي مشيت وصعدت نفرات بألف ذبتني براس الشارع مالتهم ، امشي واسأل نفسي هم راح احجي القصة من جديد ولو يصدكوني لو يحتقروني
بين المشي والتفكير لكيت نفسي بباب بيتهم ترددت ادكها لو لا قررت ادكها بعد معاناة من الألم والحيرة .
دكيتها اجاني صوت امها صاحت منو كلت اني اول ما فتحتها وشافتني سوت روحها ماتعرفني رغم علاقتي كلش قوية ببنتها عكدت حاجبها وكالت
_ تفضلي منو رايدة؟
خيلاء: رشا موجودة؟
_لا وين رشا تزوجت وهسه ببيت زوجها
صابني اليأس والتعب
خيلاء: اكدر اتصل عليها؟
_لا زوجها نحس وما يقبل تخابر احد
خيلاء: منج اتصل لأن اصلا موبايل ماعندي فدوة خالتي اعتبريها حالة انسانية
_ شبيدي عليج يا امي
حجتها وسدت الباب بوجهي هنا تأكدت ثروان فاضحني بين الملأ ، تحسبت عليه ومشيت خطواتي ثكيلة وقلبي تعبان بشكل ، حسيت بعطش حلكي نشف من القهر والخجل من توسلاتي باللي يسوى واللي ما يسوى، حسيت بكلياتي بدأت توجعني راد يغمى علية مريت من يم بيت بيه طفل يرش بالباب تقربت طلبت اخذ الصوندة منه هز راسه مبتسم اخذتها غسلت وجهي اكثر من مرة اريد اصحى شوية شربت منه المي بارد يروي بس اني ما رويت قلبي حار يلسع بنار الظلم
رجعتله الصوندة مسدتله راسه ومشيت جان باقيلي اربعة آلاف لاغير تنهدت شنو اسوي بيهن وهسه الساعة صارت الثالثة ظهراً بعدلي وقت هواي وفرص قليلة ومبلغ شحيح ما يكفي كراوي للأماكن اللي اريد اروحلها فكرت من الأول اروح لأقاربي وابلغهم يدفعولي الكروة بعدين خفت اروح خاف واصلهم الخبر وتصير اشياء لا يحمد عقباها
مشيت تقريباً ساعة مريت من يم مطعم وكفت وباوعت على الأكل من الجوع اشتهيت اكل تقربت سألت على سعر اللفة كال ب 3 ابتسمت ومشيت وصلت مكان خالي من الناس كعدت يم جذع شجرة على الرصيف واباوع على الرايح والجاي من بعيد تنهدت حسيت روحي راح تطلع من الجوع نزلت دمعتي دنكت راسي خليته بين رجلية واجتني الشخابيط براسي .....
فتحت عيوني بعدما طلعوا شفته كبالي ساحب كرسي كاعد عليه وفاتح رجليه ايده جوة حنجه وساند العكس على حافة الكرسي جان يباوعلي كأنما كدامه فريسة وحاير بالطريقة اللي ينقض عليها ويفترسها ماعرف ليش ما جنت خايفة منه وكأنما تعددت الخسائر والنتيجة وحدة
باوعتله وهمست
خيلاء: ليش ماعندكم غيرة الطالب حق منكم منين ياخذه ؟
بقى عابس الوجه مُكفهر الملامح
خيلاء: كاعد احجي وياك ، صنم انت ؟
ساكت الحايط يرد وهو لا
خيلاء: اريد اطلع منا اني واختي ترى جبتونا غصب لهنا
كمت من مكاني وثرت عليه رفعت نبرة صوتي وكف واشرلي بيده حتى اسكت عاندت ، تقرب مني لزم كتفي نهرته ورجعت ليورا
خيلاء: اذا مديت ايدك مرة ثانية .....
تقرب اكثر وقاطعني
اينار : شنو تسوين ثارني فضول اعرف ؟
بقيت اتفادى نظراته احاول اثبت بس خفت منه قررت ما اعانده اعرف يأذيني لو يتمادى بتصرفاته
خيلاء : اني واختي مظلومين وتعرضنا لتعذيب هواي ومو من المنطق والرجولة تحبسون نساء بمكان بيه ناس مو من ثوبهم
اينار: واوو احييج على الابداع
خيلاء: بخصوص ؟
اينار : بارعة بالتمثيل
خيلاء: كل كلمة حجيتها صحيحة ماكذبت بحرف
دار ظهره وخلى كفوف ايده بجيب البنطرون وتوجه للمكتب سحب الكرسي كعد و ورث جكارته سحب نفس منها وزفره ليفوك وكال
اينار : منو يكول كلامج صحيح ؟
خيلاء: ماعرف اذا واحد يحلف الكم تصدكون بيه او لا
ابتسم وكال
اينار : وين كاعدين وامشي وياج بالحلفان !!
خيلاء: شلون؟ اقنعك اني احجي الحقيقة ماكذبت ؟
اينار : مرة قريت اقتباس يخص المافيات يكول ( في الواقع ان الناس جميعاً يصدقون عادة معظم ما يقال لهم في هذا العالم الشرير اما انا فلا اصدق إلا ما يُثبت لي بالدليل الحاسم )
خيلاء: بمعنى ؟
اينار : دليلج طريق برائتج الوحيد
خيلاء: شلون مدحوا بيك وكالوا احسن من البقية اني كل يوم انصدم بيك اكثر من اللي قبله
اينار : يعني هسه تريدين تقنعيني انت بريئة ؟
خيلاء: ما اريد اقنعك اريدك تصدكني وتطلعنا منا احنا مو مال هيج شغل الله يخليك واريد حق اختي منك
اينار : ليش مني يعني؟وشنو هاي الثقة العالية اللي عندج ؟
خيلاء : يعني كل عقلك احنا نكذب شكلنا مال هيج شي؟
اينار : الكاتب الذي قتل زوجته أّلف كتاب حول زوجته ، عادي احجيلي الحقيقة من باب الاعتراف بالذنب فضيلة
خيلاء: انت هواي تبالغ احجي وياية حجي نفتهمه اثنينا
اينار : احاجيج بلغة الشوارع ؟
خيلاء: شوف اذا ما اخذت حق اختي من عيونكم ونطلع اني وياها ما اتسمى خيلاء بنت ابوية
كام و وصل يمي باوعلي وبقى مركز بعيوني كأنه يحسسني يعرفني من زمان
خيلاء : شكو ؟
ميل راسه وهمس
اينار : احجي وياج بلغة الشوارع ؟
تقرب خطوة
_اعاملج معاملة الرخيصات بالوادي ؟
تقرب اكثر
_آخذ اللي اريده منج بتباهي ؟
وصلت يمي لدرجة راح تتلاصق الاجساد
اينار : تدرين لهذا عمري ماكو وحدة وكفت بوجهي ولا رفعت نظرها مو صوتها
قاطعته بحدية وبتحدي كلت
خيلاء : وشنو الجابرك تميزني عنهم وتتحملني ؟
اينار : اكدر بلحظات هسه اكسر بيها شموخج واخليج تمشين مدنگة راس
خيلاء : تخسى
اينار : راح اسوي اللي اريده بس برضاتج
خيلاء : ما راح تتحقق تكهناتك
اينار : ماعندي تكهنات اني مجرم مو قسيس واحنا بوادي عواهر مو كنائس بيها مريمات
خيلاء : كلت عواهر يعني شي ما يشبهني ولا له صلة بية اتركني اروح ولا ترتكب جريمة ممكن بيوم تندم عليها
ابتسم نصف ابتسامة ولمحت نظرة اعجاب بعيونه
اينار :يا جريمة اكبر من تضييع الوقت ( الج ساعات ماخذة وقتي معطلة اعمالي وتعيدين وتزيدين بالحجي )
خيلاء : احجي عدل ليش هيج نبرة صوتك كأنه سكران
عكد حاجبه حسيته عصب خصوصا من كال
اينار : شمعرفني بأصوات السكارى شلون يكونون سهراتج وياهم خلتج تميزين الشارب من الصاحي
تلكئت وحسيت نفسي حجيت اشياء غلط وبعيدة عن الموضوع تركني ورجع للمكتب كعد رفع السماعة واتصل على واحد طلب منه يجيبله سديل بعدها سده وبدون ما يباوعلي كال
اينار : بمناسبة السكر نريد نعرف شنو موضوعكم وليش خربتوا السهرة والصفقة خسرناها هذه كلها تعويضات انت واختج تسددوها
سحبت نفس قوي رقبتي كامت توجعني رفعت راسي على صوت امرأة تهمسلي بكلمة بنيتي باوعتلها جايبتلي جيس
خيلاء : شنو هذا ؟
_ لفة وعصير ومي اكلي سندي قلبج بيها
خيلاء: وشلون عرفتي اني جوعانة وصابني العطش
رفعت راسها للسماء وكالت
_ ما ينسى عبده سبحان من يرزق النملة السوداء على الصخرة الصماء.
حجتها وراحت حتى ما لحكت اتشكر منها فتحت الكيس اخذت اللفة وبديت اكل وية العصير كملتهاوالعصير بقى نصفه رجعته بالجيس شربت مي حسيت صارت عندي قوة كمت حتى اكمل اللي بديته قررت اروح لاقاربي وشنو يصير خلي يصير ردت اجرب كلشي حتى ما اتندم اخذت تكسي طلب ثلاثة الالف توسلت بيه ينزل الف طلعت روحي يلا وافق صعدت وصلنا يمهم نزلت دكيت الباب طلعتلي بنت عمتي اول ما شافتني شهكت
خيلاء : شبيج ؟
_ لج روحي روحي بس يلكفوج يموتوج يمعزاية بسرعة روحي منا
خيلاء : زين انطيني بس فلوس كروة ارجع بيها للبيت ماعندي غير الفين دينار
طلعت راسها تتلفت منا ومنا باوعتلي وكالت
_ صبري هسه اروح اجيبلج
طبت تركض ثواني وسحبت كفي خلت الفلوس بيه وكالت يلا روحي بسرعة ديري بالج تبينين وجهج ويشوفوج ، ماخفت من كلامها بكدما تأذيت وتأثرت كلت حقها ستيرة من تكول البنات يختارون النوادي ولا يرجعون لأهلهم هاي اني صارت وياية وشي اكيد الحالة تخص ما تعم ...
حسيت اني وامشي وجع بكلياتي زاد لزمتهن و وكفت ارتاجيت بظهري على الحايط كمت اخذ نفس عميق عبرت الشارع توجهت على صيدلية دخلت وسألتهم على مسكن الآم اخذته دفعت فلوسه وخليت حبايتين بحلكي وطلعت بطل المي شربته كله
اني وامشي حسيت حركة غريبة وراية التفت ماكو شي دخلت فرع خلصته طلعت لشارع عام رجعت حسيت احد يتبع خطواتي بقيت اتلفت مثل المجنونة بس ما شفت شي غريب يمكن من الخوف والترقب للوقت اللي راح يخلص صرت اتوهم
آخر شي قررت اروح لثروان اخذت تكسي لمنطقتنا نزلت براس الشارع دخلت الفرع اغطي بوجهي حتى محد يتعرف علية وكفت كبال البيت على الجهة المقابيلهم ختلت ورا سيارة
جريت حسرة جبيرة وتذكرت بيوم الحفلة من طلعنا اني وسديل
اخ اخ ياسديل بسببج اني وصلت لهنا وفوك هذا كذبتيني احترك دمي مجرد مر الموقف من دخلت للغرفة واني منتظرة كلامها حتى اعلن ملامح النصر بعيوني و كلامي
بس خذلتني من سألها الزعيم عن اللي صار بالصالة وجاوبت بكل برود
سديل : كل اللي حجيته ماله صحة جنت سكرانة مو بوعيي
ما تهجمت ولا عاتبت عرفت مهدديها جريت نفس وقررت اتحمل مسؤوألية الموقف اللي سويته وحدي بدون تدخلها
باوعلتهم وحجيت بقوة
خيلاء : انطوني وقت اطلع بيه خارج هذا المكان اجيب الفلوس واعتقونا
الحجي باوع للزعيم وقبل لا يحجي الأخير الحجي كال
عواد : مني الج الاربعة وعشرين ساعة بعدها تنزلون تشتغلون وتسددون كل الديون اللي عليكم و وين ما تريدون تروحون روحوا
خيلاء : ماشي متفقين
رفع تليفون وطلب سيادة تجي اجتي كعدت كبالي تباوع علية وعليهم
سيادة : شنو المقرر؟
عواد :تريد 24 ساعة تطلع خارج الوادي
سيادة : وراح تسمحلها ؟
عواد : اي
وسردلها الحديث اللي دار بينا وبينهم وحتى الاتفاق ،بعدت عيونها مني وباوعتلي بنظرات صعب افسر حقدها
الزعيم جان واكف نقر ثلاثة نقرات على الميز وكال
اينار : اتفقوا اني ماعلية
ترك المكان وطلع ، من طلع اشرولي بطريقة حقيرة حتى اتبعه وافرغ الغرفة
طلعت وسديت الباب ما ردت ارجع للغرفة حتى ما اعاتبها واشوف نظرات الذل بعيونها انتظرتهم خارج الغرفة اكثر من ساعة ونصف يلا دزوا علية دخلت ونطوني الورقة مكتوب بيها اطلع مدة 24 ساعة وارجع بالوقت المحدد جبت الفلوس يطلعونا ما جبتهن انزل للصالة واشتغل كلشي ينطلب مني شرط التسديد بمدة ستة اشهر فقط
وقعت بدون تردد وكلي أمل راح اجيب الفوس والناس الخيرة راح تساعدني
بقى توقيع الزعيم اخذها محاج وراح دخل للغرفة اسمع صياح صار بينهم ماعرفت على شنو بالضبط بس من نطاني الورقة عرفت السبب الشروط اللي مذكورة بيها لكيته ضايف فقرتين الاولى ما فهمت معناها اعتقد مثل الالغاز بينهم الثانية
زواجي من الزعيم
وموقع بالنهاية ، هذا شلون لزك عود هو احسن منهم
بيومها ما نمت ابد ولا حجيت وية سديل رغم محاولاتها ثاني يوم ساعة ستة العصر طلعت وياهم ومر اليوم كأنما علية بسنة وهسه اني كبال اللي مفروض هو اماني ومأمني ابو بنتي
انتظرته بترقب عيوني على الطريق شوكت تفوت سيارته للفرع اباوع على الساعة شكد باقيلي على ال12 صارت ساعة عشرة ونصف طبكت سيارته نزل منها اللي يشوفه من بعيد يشبع
بشخصيته تقدمت اتجاهه خطوة رجعت خطوتين من الخوف بس من وصل للباب وحسيت بيه راح يفوت تجرأت وركضتله لان اعرف اذا فات راح يشوفوني بالكاميرات ومحد يفتحلي واصلا السكيورتي ما يسمحلي اقترب وادك الباب
خيلاء: ثروان
جمدت خطواته بمكانها
خيلاء : لخاطر بنتنا اوكف وحاجيني محتاجتك تساعدني لو مامحتاجة ما اوصل
التفت علية والشرار يتطاير من عيونه
بدون ما يتقرب كال
ثروان : امشي ولي منا ما الج شي يمي
خيلاء : بس اسمعني الله يخليك
ثروان : جاية تريدين مساعدة وما طلبتي حتى تشوفين بنتج ؟
خيلاء : مو هددتني لو اختي لو بنتي ؟
ثروان : واختاريتي اختج لهذا بنتج انسيها
خيلاء : جبرتني على الاختيار مو بيدي اللي صار
ثروان : تحملي نتيجة اختيارج وخلي اختج تحل مشكلتج
خيلاء : اني لوما محتاجة ما اجي
ثروان : اي كلتيها لوما محتاجة ما تجين واني تعرفيني كلش زين ما اساعد متسولات
خيلاء : بس اني مرتك
ثروان : شنو شنو ؟
خيلاء : مرتك وام بنتك ومحسوبة عليك
ثروان : العار محسوب على اهله
خيلاء : انت مقتدر تكدر تساعدني والمبلغ اللي رايدته تصرفه بسهرة من سهراتك وعزايمك
ثروان : اني احب اصرف فلوسي على الكيف ، لو الية نفس بيج جان اخذتج بأرقى مكان ونسهر بفندق ساعتين وانطيج ضعف اللي تريديه بس نفسي ما مشتهيتج
بقيت اباوعله وبالكوة لازمة نفسي ردت احجي ماتت الحروف بلساني تركني ودخل بقيت اباوع على الباب تمنيت اكسرها وافوت اشوف بنتي و احضنها
جريت حسرة قوية قبل لا التفت انجرت ايدي باوعت واحد لابس اسود و قناع اسود براسه حتى عيونه ما كدرت اميزهن وايده اللي لازمه ايدي لابس كف جلد ، اللي انتبهت عليه بس الزعيم والباش يلبسون كف جلد اسود عرفته من الوادي
ردت اسحب ايدي منعني سحبني وراه بتعب و وهن ودموع حجيت
خيلاء : ساعة 11 بعدلي ساعة
يتبع