الجزء السادس و الثلاثون
بعد لا طلعت أسيل و عمتها أماني و كريمة
قعمزوا في دار الضيوف لقو فيها جارات
جايات للحاجة وردة
شوية و تعبت الدار لأن الوقت كان عشية
اضطرت أسيل تنوض تساعد عبير و علا في المطبخ
هيا و زوز من بنات الجيران
لأن دار الضيوف و مربوعة الرجالة معبيات بأحباب الحاجة وردة
أسيل كانت حاطة تليفونها فوق الدولاب
متع المطبخ لما سمعت صوت رنة مسج وصلت له
لكن كانت لاهية تصب في العصير في الطاسات
و طلعت السفرة لدار الضيوف توزع فيها
و بعد لا كملت رجعت للمطبخ
لقت علا تخدم في الشاهي بش يطلعوه للرجالة في المربوعة
قعدت تجهز لها في مترد الحلويات و الفطيرة و السفنز
إلي بيطلعوهم مع الشاهي
شوية و خشت عبير بطاسات العصير فاضيات
و بدت تغسل فيهم ..
أسيل جت جنبها تساعد فيها
في تمصميصهم و تنشيفهم
معاملة عبير لأسيل كانت لطيفة لحد ما لكن علا لا..
كانت تعامل فيها بجفاف و حدة
و أسيل ملاحظة هالشي
لكن عمرها مدورتها و لا عدلت عليها لأن حبهم للحاجة وردة مخليها متجاهلتها تماما
و عمرها مدورتها و لا دورت تلقيحاتها
إلي مرة مرة تسمع فيهم لأسيل
و كانت كل ما تجيهم تتعامل معاهم بشكل
لائق و حلو
لأنها حاسة أنه عمتها حيجي يوم
و ترجع لعيسى و متمنية من قلبها هالشي يصير
و حتى على عيون الحاجة وردة
إلي عمرها ما قصرت معاهم في أي وقت
و ديما تحن عليهم و معوضتهم
عن حنان الأم و الجدة ..
هالشي مخلي أسيل تعاون فيهم بكل شي تقدر عليه تقديرا و امتنانا
بعد لا كملت تمصميص نشفت إيديها
و خدت تليفونها لقت فيه مسج محتواه
( أسيل مرحبا ياريت لو فاضية ترني عليا بنخبرك شي ضروري)
فتحت حتى هيا عالمسجات بترد على رعد
لكن المسج موصلش لأن رصيدها كان غير كافي
و مكانش عندها اشتراك في النت
جت بتبعت له من فضلك اتصل بي
لكن تحشمت منه
و غير هكي مكانتش تقدر ترد على اتصاله
لو اتصل بيها لأن حوش الحاجة وردة زحمة و متبيش حد يسمعها تكلم فيه
ردت التليفون حطاته في مكانه
و ناضت بتكمل مساعدتها للموجودات في المطبخ
و هيا راقيلها
و في داخلها شعور شوق معبي قلبها
مخليها متمنية تسمع صوت رعد أو على الأقل تتواصل معاه بالرسائل
🌿🌿🌿🌿🌿🌿🌿🌿🌿
في مكالمة فيديو بين عبد الجبار و رائد
رائد إلي كان ناوي على خطة إنقاذ سريعة
إنقاذ لقلبه من أنه يتليع بنار الفراق و مرار الفقد
رائد إلي خلال الأيام الماضية
و من خلال تواصله الدائم بولد عمته فريحة
عبد الجبار اقترح عليه يجيب سمر
و يعرضها على أخصائي فيزيائي مشهور في أنقرة
و قال له أنه خو الأخصائي شريك رائد
في هلبا مشاريع و يقدر ينسق له على مواعيد قريبة للإهتمام بحالة سمر الصحية بشكل مكثف و فعال
و أنهم ميعتمدوش على العلاج الطبيعي
إلي ادير فيه في ليبيا ..
رائد قال لعبد الجبار أنه الأجهزة أكيد حتكون متطورة أكثر و العناية فائقة و النتائج أضمن و أسرع
و هالشي خلى منصور و فريحة يلغوا كل ارتباطاتهم الحالية في ليبيا بش يسافروا بسمر لتركيا في أقرب وقت..
و طبعا رائد كان مرتب كل شي ..
حجوزات العلاج و المتابعة الصحية
و حتى حجوزات السفر و الإقامة في تركيا
و هذا إلي كان يشرح فيه رائد لعبد الجبار بالتفصيل في هالمكالمة
و أكد له على حجز الطائرة إلي حيكون يوم الإثنين الساعة 9 صباحا
و رائد مصمم تصميم تام أنه ميضيعش الفرصة إلي يشوف فيها بالنسبة ليه فرصة أخيرة و استثنائية
🌿🌿🌿🌿🌿🌿🌿🌿
يوم الأحد 13 مارس
في ثانوية القدس
أسيل و أميرة مقعمزات يفطروا في الإستراحة
و أميرة كان باين عليها متوترة و قالقة
و أسيل تحاول تفهم منها
: غريب الموضوع ره شن معناها من يوم الخميس ما اتصلش بيك..
باهي مش صاير معاه شي متأكدة ؟؟
أميرة : قلت لك منزل عالإنستا صور ليه ماشي يوم الجمعة هوا و صحابه زردة
أني يوم الجمعة اتصلت بيه يعطي فيا خارج التغطية
و أمس كله مقفل محصلتاش
حتى مسج مبعتهوليش
و مفهمتش خيره بكل يا سيلا
أسيل مدت شواربها بتعجب :
غريبة و قلتي جوكم حلو قبل ما يصكر المكالمة معاك
مش عارفة مرات حد قاله عليك حاجة
سمع حاجة شاف حاجة منعرفش
المهم الموضوع هكي بدون سبب
تحسيه غريب و مش واضح
أميرة : شفتيني كيف ليا يومين نعاني
و أنتي لاهية مش فاضية بيا بكل
معش عرفت لمن نحكي و لا لمن نشكي
و لا عارفة كيف نتصرف و لا شن ندير
أسيل : شن بتديري تعرفي الجو
ديما تحب تجينا في الربيع
و خاصة بعد لا قاللها عمي أسعد
على مرضت جداي وردة قالت منقدرش نقعد عليها
جابت بنتها و صغار ولدها و جت
أميرة : قالت ماما الليلة بترفع عشاها و بتمشيلكم هيا و بابا يهدرزوا عليها
أسيل : مليح بكل .. شن رأيك تتصلي أنتي من تليفوني بجابر و تحاولي تفهمي منه
أميرة: شن معني من تليفونك ؟
أسيل : مش عارفة الحق
عندي إحساس أنه صايرة معاه حاجة
و ميبيش يرد عليك
أميرة و دموعها معبيات عيونها:
ميبيش يكلمني معناها
و أني معش نبي نجري في جرته أكثر من هكي
المفروض لو صاير معاه ظرف شاغله
نكون أني أول وحدة نعرف
و نوقف معاه فيه مهما كان هالظرف صعب
و لو سامع عني حاجة أو غلطت معاه في حاجة يقولي عليها يفهمني و نفهمه
مش يفوتني هكي بدون سبب
لا لا يا سيلا مستحيل مازال ندوره
لا من رقمي و لا من رقمك إلا لو هوا تكلم و فهمني..
و زيادة يكون سبب إلي مدايره فيا مقنع
غير هكي لا يمكن نرجع له بكل
أسيل : باهي خلاص عندك حق متكلميشي
أني نبي نكلمه أعتقد أنه صديقي حتى أني
و من حقي نعرف خيره و شن صاير معاه
مرتاحة هكي
أميرة و دمعتها عبت عينها و فاضت
واجعها الموقف إلي انحطت فيه :
ديري رأيك
أسيل : تعرفي رعد من أمس عشية
بعت لي مسج يبيني نكلمه لما نكون فاضية
لما جيت بنبعت له لقيت روحي مفلسة
و معنديش حتى اشتراك نت
بعت لي بعدها زوز مسجات في المغرب
و الساعة 11 و مرديتش عليه
أكيدة يقول هذه تتجكتر عليا
و ادير في الجو
و متحشمة نقوله مكانش عندي رصيد
توا مرات يقول بدت ادير في جو الشحاتة
و تبيني نبعت لها رصيد
عليك عار زعميتنا زي باقي البنات
و حني حتى الفقر و الفلس واخد فينا حصة
أميرة : و النحس يا سيلا و حياتك
بنات زينا مش من حقهم غير يحرثوا عليهم زي الحمير بش يجيبوا حق لقمتهم و من العام للعام يشروا لبسة و سبيدرو يفوتوا بيها باقي العام
شوفي هاه توا المزين قداش ليه الخدمة فيه واقفة
و زيادة امتحانات الفترة الثانية الأسبوع الجاي
معناها بنزيدوا قريب شهر بلا خدمة
مرات حتى حق القطن نغلبوا فيه
أسيل : عمي محمد معش صار معاه شي
أميرة : بابا ربي يكون في عونه حاله وقف
معش لاقي حق سبيزة للحوش
شادها غر عالدخان و بس
يا ريته حتى يتعصب و يعارك
زي باقي التريس على الأقل يخفف عليه الضغط
و الله مستعدين نتحملوا
تصدقي أمس آيات جابت حاجات فطور بسيطة
قريب كلاها قاللها أني قاعد بصحتي و نصرف على أمك و احتك و الحوش كله
نخدم و ندبر رأسي و كان نخدم عامل باليومية
جو الحوش كله كله كئيب
و زايد حالف على ماما ما تاخد مني قرش
قاللها خليلها فلوسها مصاريفها
و مصاريف قرايتها لن ربي يفرج علينا
أسيل نزلوا دموعها :
ربي يفرج علينا ..
مش قتلك حني مش زي باقي البنات
حني دوبنا دوب قرايتنا و ماكلتنا و شرابنا و تمت
الحمد لله على كل حال
أميرة : هوا هذا الحمد لله أحسن شي
اسمعي عندي كرت مدار داساته للطوارئ
توا بعدين لما نجوكم عبيه
و كلمي الراجل
بالك يبيك في موضوع عمل عمي أسعد و لقالك حل
عالأقل ترتاحوا من هم الشعشبونة
إلي زايدة عالهم هم
أسيل : اسكتي ساكتة تصدقي من أمس
و هيا تنق على جيت جداي للاهم
في قولت شن بنوكلوهم و شن بنشربوهم
و من وين بنصرفوا عليهم
مع أنه كل شي جايبينه معاهم بالزايد
و أمس يعقوب طلع جاب خبزة
و مدخل معاها أكياس و أكياس
حتى من التشيبس و النوتيلا و السامينسا جايبهم
كان عندي نت امبارح راهو نزلت ستوري
صورت فيها
سيلفي و النوتيلا من خلفي 😄😄
أميرة ضحكت و الدموع تنزل من عيونها:
يعطيك السلامة يا فرخة ضحكتيني
و أني نبكي
أسيل : مش يقولوا هم يضحك و هم يبكي
اضحكي القلب إن شاء الله
شن واخدين منها الدنيا حني
و أميرة مسحت دموعها
و في قلبها غصة من كثر الوجع و الهم إلي معبي قلبها و خاطرها
🌿🌿🌿🌿🌿🌿🌿🌿🌿
في نفس الوقت
لكن في مدينة ثانية
ا
لأجواء كانت غير الأجواء
الفرح كان طاغي على آل رزق الله
إلي مجموعة منهم حضروا مناقشة مشروع تخرج رغدة
رغدة إلي سحرت الكل بطلتها البسيطة و الحلوة
اليوم كانت طالعة جذابة و مميزة في عيون كل الحاضرين
كانت مقعمزة مقابلة أساتذتها المناقشين
بمنتهى الثقة و التركيز
جاوبت على كل أسئلتهم بمهارة و تفوق بالرغم من صعوبتها
و مترددتش لحظة
الدكتور المشرف عليها كان فرحان بيها هلبا
و كذلك شريفة أمها و بوها فاروق
حتى خوتها رضوان و رعد و رضا
و رائد إلي كان يتبع فيها عن طريق النت
و طبعا كبير عليتهم رضوان رزق الله
إلي كان مقعمز بكل فخر و اعتزاز بأحفاده
إلي أثبتوا أنهم أحفاد رزق الله
و مخيبوش أمل جدهم
لكن النظرات المميزة كانت نظرات سليمان
سليمان إلي بعد انتهاء المناقشة
رغدة خصاته بالذكر قدام كل الحضور
بالإضافة لعيلتها و الدكتور المشرف على مشروعها
سليمان إلي مش قادر يتجاهل دقات قلبه العاصفة 💓💓💓💓💓
و عشقه لرغدة إلي خلاص مش قادر يخبي روحه
كان يشوف فيها مقعمزة قدام الدكاترة
إلي تناقش في مشروعها قدامهم كأنها نجمة لامعة..
كأنها شمس دافئة في يوم شتوي بارد
كأنها همسة حنان رقيقة تداعب خلجات الروح
مكانش سليمان عارف أنه تأثير رغدة عليه أصبح كتأثير الترياق إلي تتجرع فيه خلايا روحه و قلبه قطرة قطرة
و هو في عز انتباهه لكل تفاصيلها بحركاتها و سكناتها
مفهمش علاش خطر على باله من العدم قول المتنبي إلي همس بكلماته بشغف و وله
( و حبيب أخفوه مني نهارا
فتخفَّى و زارني في اكتئام
زارني في الظلام يطلب ستراً
فافتضحنا بنوره في الظلام)
رغدة اليوم بإطلالتها و ضحكتها المزينة ملامحها كانت في عيون سليمان نور وضاء
شعلة متوهجة كان متمني يخفي بهرتها
و سحرها عن كل الأعين
ببريقها الخاطف للأنفاس إلي مكانش يحب غير أنه يحتفظ بيه في قلبه و إحساسه
بالك تقدر رغدة تبعد عنه ظلام الشك
و فقدان الثقة إلي ديما يحس بيهم سليمان
تجاه كل بنات جنسها
و يا ترى حتقدر رغدة تبدد كل هالظلام
إلي معشش في شغاف قلبه
و تطلع بيه من كل هالعتمة و لا هو إلي حيجذبها معاه للقاع وين ما فيه الظلام و السواد
🌿🌿🌿🌿🌿🌿🌿🌿🌿
الساعة 1:55 بعد الظهر
أسيل هيا و أميرة كانوا مروحات من الثانوية
أسيل حست بتليفونها يهز في جيبها
و لما طلعاته لقت الإسم عبير
تكلمت بحماس :
هذا الدكتور عيسى كتب لي لما تفضي كلميني..
و حتى هوا مسكين دارها فيه الرصيد مدورتاش
مدامه اتصل بيا ثاني معناها عميمة فايتاته بالطويل
و فتحت الخط : السلام عليكم دكتور
عيسى : و عليكم السلام ورحمة الله
أسيل شن حالك ؟؟
أسيل : الحمد لله حالي باهي
أنت كيف حال صحتك؟
عيسى: ماشية الحمد لله
استنيتك تشريني عليا مدورتينيش
أسيل : و الله مقدرت أمس كله و عمتي جنبي خفتها تسمعني نكلم فيك
عيسى : قالت لي عبير جيتوا أمس لحوش خالتي وردة
أسيل : إيه مشينا العشية
عيسى : وينك أنتي صوت دوشة سيارات؟
منسمعش فيك كويس
أسيل : إيه أني في الطريق مروحة من الثانوية
قلت لك أمس مشينا أني و عميمة و جداي للاهم و بنتها كريمة
عيسى: كويس كويس
حتى أني استغربت من السيارة الغريبة إلي مدرسة قدام حوشكم
أسيل شافت لأميرة و غمزت لها :
إيه هذه سيارة يعقوب ولد جداي للاهم هوا إلي جابهم
عيسى : صح شفته أمس راجل معرفتاش طالع من حوشكم و معاه صغار صغيرين استغربت من يكون
أسيل: إيه هذا يعقوب و معاهم صغاره التوأم
عيسى ارتاح شوية بعد لا عرف أنه يعقوب متزوج:
جاكم هوا و عيلته ؟؟
قصدي مدامه معاه صغاره
معناها حتى مرته جت معاه
أسيل حست أنها وصلت للي هيا تبيه :
لا لا مسكين مرته متوفية ليها سنتين تقريبا
و قاعد متزوجش ثاني يا ناري عليه
تعرف يهبلوا الصغار ما شاء الله عليهم ينزمطوا
حبيناهم لن خلاص
و حتى هما انسجموا مع بيسا تقول خوت
و عمتي أماني طارت بيهم للسماء
و عيسى مع كل كلمة تقول فيها أسيل كأنها تصب في البنزين على ناره قلبه الوقادة
خلاته قريب يهبل
لدرجة معش عرف يقول كلمتين على بعض
: آأأ معليشي احم أسيل
أني طلع لي موضوع هكي نكلمك بعدين بالسلامة توا
و صكر الخط بدون ميستناها حتى ترد عليه
و أسيل لما سمعت صوت تسكيرة الخط
حطاته في جيبها و هيا تقول بحماس
: يس يس فعلتها فعلتها
I did it يا ميرو
I did it
أميرة تلفتت تشوف حواليها :
حيه عالعار ارزني يا بنت رانا في الشارع
و الله كان يشوفك عمي أسعد
تعيطي في الشارع هكي لما يقتلك
فهميني علاش تتنططي هكي زي الشمبانزي
أسيل: هذا يا ستي عمك الدكتور عيسى خليته على ملال
و كان مجاش اليوم خطب عمتي
منبداش اسمي أسيل
أميرة ضيقت عيونها و بعدين فتحتهم:
قصدك لما قلتي له على يعقوب تبيه يغار عليها
أسيل : نحبك و أنتي فاهمتيها عالطاير
خليه يتشفشف شوية مدامه يحبها هكي و مهتم بيها هالإهتمام هذا كله
بالك يتلحلح و ينشط روحه
أميرة : أما أنتي يا دعوة دماغك سم سم
و إلي يقدرك يجي يحاسبني
أسيل : بش تعرفي بس
لكن أني خايفة من عميمة
و حاسة موقفها غامض و مش مفهوم
مرات نحس فيها فرحانة و جوها مليح
و مرات تنكد و يبدأ جوها يدره الكبد
بالك الدكتور يقدر يطلعها من الهم
و القهر إلي عاشاته
أميرة : إن شاء الله ربي يريح بالها و يسعدها
غر ردي بالك تستاقض بيك تكلمي فيه بس
أسيل خبطت خدها بخفة :
حيه عليا بعدين شن بيخلصني من لسانها
أميرة : أني متوقعتها لو عرفت تضربك حتى الضرب
أسيل: ربي يستر
أسرعي خفي مشيتك خلي نفوتوا زحمة الورشة
شوفيهم كيف مرشقين قدامها زي التماثيل
فكينا من دوشتهم و عيونهم إلي تندب فيها رصاص
🌿🌿🌿🌿🌿🌿🌿🌿🌿🌿
هكذا هي الحياة لا البدايات التي نتوقعها
و لا النهايات التي نريدها
بعد مرور 10 عشرة أيام
تحديدا يوم الإربعاء
23 مارس 2016
الساعة 10:54 صباحا
لا ياربي لا
ماما خيرها خالتي خيرها شن صار لها
عبير بسرعة اتصلي بعيسى بالله عليك قوليله يجي بسرعة
عبير مشت تجري لتليفونها المحطوط في دار المعيشة في حوش خالتها وردة
و اتصلت بعيسى إلي رد عليها أول ما طلع تليفونه من جيبه
: أيوة نعم
عبير : عيسى سلم وخيي تعالى لنا فيسع خالتي وردة اشبح خيرها أغمى عليها و لا مفهمتش
تعالى بسرعة بالله عليك
و عيسى لما سمع نبرة الخوف في صوت عبير
مسألهاش أكثر :
هاني جاي
و ناض وقف على طوله
آسف مضطر نطلع هدم العيلة خالتي شكلها تعبت
جنبه كانوا رعد و سليمان إلي مركزين على ملامحه إلي تغيرت و بان الخوف و التوتر عليه
ناضوا لحقوه بعد لا سليمان حط حق القهوة إلي كانوا يشربوا فيها و أشر للعامل
ركبوا الثلاثة كل واحد في سيارته
و مشو باتجاه حوش الحاجة وردة
عيسى درس سيارته قدام الباب الخارجي
و خش طول
و أول ما وصل قدام الباب الداخلي
قدر يسمع صوت عياط خواته و دوشة الجيران
و زحمتهم
نحى سبيدروه من رجليه و خش و هوا ينادي بصوت عالي: أمي خودولي طريق بنخش
و سليمة تكلمت بصوت واضح فيه البكاء :
خش وليدي خش
عيسى أول ما خش و قرب من خالته وردة
بعد لا بعدوا كل الجارات المحيطات بيها
و من أول شاف ملامح وجه خالته عرف أنها دخلت لسكرات الموت
و الصوت إلي طالع من حلقها أكد له هالشي
حاول على قد ما يقدر يستجمع قوته و رباطة جأشه
قرب باس خالته من جبهتها
و تكلم في ودنها بصوت عالي بش تسمعه كويس
و هو يقيس في نبضها
: خالتي قولي لا إله إلا الله
خالتي تسمعي فيا
عبير و علا و أغلب الموجودات لما سمعوا كلامه
متحملوش إلي يشوفوا فيه و تعالت أصوات البكاء
عيسى نهض عيونه الحمر و تكلم بصوت عالي:
سألتكم بالله إلي بتعيط تطلع تقعمز برا
سألتكم بالله تريحوها سألتكم بالله
عبير بتعيطي اطلعي
جارتهم عزوز كبيرة تمالكت نفسها
و كانت أول من دار ردة فعل :
هيا هيا اذكروا الله و اقروا قرآن متزيدوهاش عليها
و إلي بتعيط تعيط برا
و كل الموجودات فعلا قدام هيبة الموقف أ
غلبهم طلعوا برا
.. مقعدش إلا عدد بسيط في الدار يقروا في قرآن
و من ضمنهم أماني إلي حست أنها بتودع أمها للمرة الثانية..
و في داخلها وجع و ألم و كسرة ما يعلم بيها إلا رب العالمين
أما عيسى إلي خدي من أمه ماء زمزم
و قعد يقطر لخالته إلي كانت تنطق في الشهادتين
بأنفاس متثاقلة
كان من داخله منهار بشكل كامل
و فاتت الدقائق عليهم ثقيلة
الحوش و اللايدة الخارجية تعبوا بالأحباب رجالة و نساوين
و كل الألسنة كانت تلهج بالدعاء للحاجة وردة
إلي كانت وردة شارعهم
و فضلها على كل الجيران و من السباقين بالفزعة في الأتراح قبل الأفراح
🌿🌿🌿🌿🌿🌿🌿🌿🌿🌿
آااااخ رأسي داخ من هالأسئلة الغبية إلي مدايرتهالنا
أميرة : المشكلة وين تكلميها تقولك أنتم شهادة أنتم شهادة و لازم تتعودوا عالأسئلة الصعبة
عليك هم أحرف منكملوا السنة الزفتة هذه لن روسنا تتبخر
أسيل : غر الحمد لله غدوة عندنا نحو و شبه حافظينه كله معناها حنروح نرقد أقل شي للمغرب حتى ماكلة منبيش
نا...
و قطع عليها صوت أميرة :
أسيل شوفي الزحمة هذه وين في حوشكم و لا حوشنا؟؟
أسيل وقفت في مكانها لثواني و بعدين تكلمت بخوف :
جداي وردة .. حوش جداي وردة
و سرعوا خطواتهم الإثنين
لن وصلوا فعلا لحوش الحاجة وردة
إلي كان معبي قدامه بالسيارات و الناس إلي واقفين و واضح على ملامحهم الخوف و التوتر
و أسيل أول ما جت بتخش من الباب الخارجي لقت رعد مقابلها و مركز عليها بنظراته
موقفتش كملت داخل طول
و هيا تسمع في العياط
و أول ما وصلت لوسط الحوش
رجليها حستهم ارزانوا
و قعدت تقدم بخطوات ثقيلة لدار الحاجة وردة
و أماني أول ما انتبهت لها جت خدتها في حضنها طول
و مكانش مسموع غير صوت عيسى يقرأ في قرآن و طلعتها لوسط الحوش
متبيهاش تتأثر بهاللحظات العصيبة و خافت على نفسيتها منها
و مفاتوش دقائق إلا وصعدت الروح لباريها و توفت الحاجة وردة..
و طلع عيسى من الدار بعد لا باس راسها و سلم عليها
و خلاها مع صاحباتها و رفيقاتها يسلموا عليها
و عيسى أول ما طلع للنساوين
في وسط الحوش وقف و عيونه منزلهم تكلم بصوت مبحوح :
سألتكم بالله ما تعذبوها
منبيش نديب و لا عياط بصوت عالي
ادعولها و اقروا لها قرآن راهي ليها أيام توصي متبيش حد يعيط عليها و لا تبي نديب سألتكم بالله
وصية الميت أمانة سألتكم بالله واجب علينا انفذوها
علا إلي لما سمعت عيسى و كلامه تأكدت أنها خالتها توفت مقدرتش تتحمل الخبر و طاحت من طولها أغمى عليها
عبير مشت تجري لأمها تغمرتها و معش قدرت تشد روحها قعدت تبكي بصوت عالي : ماتت يا ماما ماتت
خلتنا خالتي خلتنا آآآآآه يا ماما ماتت خالتي ماتت 😭😭
كل الموجودات بالرغم من أنهم عارفين أنه أيام الحاجة وردة كانت معدودة في هالدنيا
إلا أنها خبر وفاتها فعليا كان صدمة و ألم للكل
أقل من ساعات و الحوش تعبى بالقراب و البعاد
و عيسى دار المستحيل بش تتنفذ وصية خالته في أنهم ميتأخروش في دفنها
و سليمان تولى كل إجراءات الدفن إ
لي طلعت في وقت قياسي بحكم معارفه
و علاقاته في المدينة
سليمة أختها هيا إلي غسلتها
مع جارة كانت صديقة مقربة للحاجة وردة و هالشي برضو بناء على وصيتها
قبل العصر نصبت خيمة العزاء للنساوين
في جنان حوشها
و سكان الزنقة كانوا مجمعين فلوس بانيين صالة كبيرة لحالات الوفاة لاستقبال المعزين من الرجال
و بعد صلاة العصر دفنت الحاجة وردة
و قلوب أهلها كانت مغصورة ألم و حزن عليها 😭😭
🌿🌿🌿🌿🌿🌿🌿🌿🌿🌿🌿🌿
ليلا
أسيل خلاص نوضي روحي أنتي وياها
حاولوا ترقدوا أنتم امبارح كله تقروا
و مرقدتوش بكل
أسيل : لا لا عميمة خلينا نعاونوا البنات من وين بيجينا النوم توا
مدامه الأستاذة زاهرة
قالت بتأجللنا امتحان غدوة خلاص
خلينا معاكم معندنا علاش مروحات
أماني تنهدت : هلبا عليكم هكي تعب
أميرة : عادي يا أمونة مدوريش توا نرقدوا
أماني و هيا طالعة من المطبخ :
ربي يهديكم
و قدام الباب لقت صابرين خاشة و في يدها حوايج واضح أنهم لعيسى
بتمدهمله من باب المطبخ إلي يفتح عالجنان
مقدرتش تتحمل اللقطة و حست قلبها انعصر
عيسى إلي كانت تشوف فيه
و هو يحضر في اللحظات الأخيرة في حياة خالته
عيسى إلي شافاته مطلع خالته لمثواها الأخير
مقدرتش لا توقف جنبه و لا تعزيه
في الوقت إلي صابرين مرته شادة حوايجه
بين إيديها و الواضح أنها طالعة بتمدهمله
أماني مشت قعمزت جنب بيسان بنتها
ضمتها لحضنها و هيا حاسة بألم و هم
في قلبها لو وزعاته عالمقعمزات يسدهم و يفيض
فتحت تليفونها على تطبيق القرآن الكريم
و قعدت تقرأ فيه و دموعها تنزل زي السيل
🌿🌿🌿🌿🌿🌿🌿🌿🌿🌿🌿
مكالمة هاتفية
رضوان : خلاص نا بكرا نجيب هلي
أمي و باتي و نشوف حني و جدي لو يقدروا
و نجيب معايا عواطف و نكلم رضا
رعد : باتي نا بلغته و قال جاي هو و سيدي فيصل
و رضا قال حيجي هوا و صفاء
رضوان: خلاص حنطلعوا بدري عشان نقعدوا النهار كله
رعد : و لو تبو تقعدو شقة سليمان تباتوا فيها على راحتكم لو تبوا تقعدوا و تحضرو اليوم الثالث في الوفاة
و متنساش يا رضوان بطاقتي تلقاها وين ما قتلك
تعدي تاخذ تموين تام تجيبه معاك للعرب
متتصورش قداش فيه ناس واجدة تجي للعزاء
رضوان : رحمة الله عليها لو كيف ما قلت ولية فزاعة و أحبابها واجد طبيعي الكل حيحضر العزاء
رعد : خلاص خليني نعدي
و قبل ما تطلعوا كلمني عشان لو تذكرت شي
و متنساش نجاة عدي عليها خود منها الشنطة إلي وصيتها عليها فيها دبشي
رضوان : تم .. متوصيش بشي أخرى
رعد : لا منور و تصبح على خير
رضوان : و أنت من أهل الخير
🌿🌿🌿🌿🌿🌿🌿🌿🌿🌿🌿
و في مكالمة فيديو بين ليبيا و تركيا
فريحة كانوا متصلات بيها مرت خوها شريفة و بنتها رغدة و أمها نجمة بش يطمنوا عليها هيا و سمر
فريحة : الله يرحمها و يوسع عليها
كانت من عز الناس رحمة الله عليها
حتى و هيا مريضة كلمتني 4 مرات هيا و أختها يسألوا على سمر بعد سمعوا بالحادث
يا نا عليا على أختها و هلها كيف صاير فيهن توا أكيد بينجنوا
شريفة : رحمة الله عليها الموت علينا حق
رعد أصر أننا نعدوا للعزاء
حتى فيصل و مراته معديين و بيعدوا معاه
إسلام و إبراهيم
فريحة: و أنتي يا أمي مش تعب عليك الطريق
و الزحمة إحتمال متتحمليهاش
و بعدين جوهم مازال بارد
خايفة عليكي تمرضي و تتعبي
فوتي الأيام هاذينا تدفى الدنيا شوية
و نرجع نا نعدوا نعزوا مع بعضنا
نجمة : مستحيل تعرفيني ما نقدر نقعد عنهم
هيا و أختها كانوا عز الرفاقة لما عدينا العمرة
و بعد زرناهم كرمونا آخر كرم و ناس نشادين
توا تبيني ما نعدي نعزي مستحيل
فريحة : يا أمي نا خايفة عليك تمرضي بس
نجمة : الحافظ ربي إن شاء الله
بعدين أنتي معاك عذرك قاعدة مع بنيتك مريضة عشان متعديش غير بعد تروحي للبلاد بالسلامة و على خير
فريحة : إن شاء الله على خير
الدكتورة اليوم قالت سمر ماشية كويس في علاجها الطبيعي
و ما تبيش واجد عشان ترجع تمشي على رجليها من دون مساعدة
شريفة : باهي باهي الحمد لله ياربي
بعد تفيق سلمي لنا عليها
رغدة : عميمة قوليلها أول ما تفيق تكلمني باهي
أمس محصلتهاش و اليوم كذلك رايفت عليها واجد
فريحة : حاضر حبيبتي حنكلمها
المسكينة تتعب واجد في جلسات العلاج الطبيعي تقعد فيها اليوم كله
تروح ترقد على طول قبل حتى لا تتعشى
شريفة : ربي يشفيها ويعافيها يارب
و تردوا للبلاد بصحة و سلامة
فريحة : اللهم آمين يارب
أمي متنسيش تسلمي على سليمة و تعزيها ليا
و نا حنتصل بيها بكرا نعزيها هيا و بناتها
نجمة :
إن شاء الله يا أمي إن شاء الله
هيا تو تبقي على خير و سلمي على منصور و سمر
فريحة : يوصل سلامك و سلمي على باتي و العيلة
و أنتم من أهل الخير يا غالية ربي يحفظكم
🌿🌿🌿🌿🌿🌿🌿🌿🌿🌿🌿
يوم الخميس 24 مارس
الساعة 3:15 صباحا
سمر بعد لا روحت من جلسة العلاج الطبيعي و من التعب على طول رقدت قبل حتى لا تصلي العشاء أو تتعشى
و لما ناضت من النوم الساعة 3 لقت أمها ناعسة عالكنبة في نفس الدار إلي هيا فيها
عرفت أنه أمها نعست من التعب محبتش تنوضها
أو تزعجها
خدت القيلات المحطوطات جنب السرير
و حاولت تنوض بدون صوت بش متزعجش أمها بالرغم من أنه حركتها ثقيلة و صعبة
و بعد محاولات طلعت من الدار بهدوء و استخدمت الحمام الموجود في الممر
و منها طلعت جهة للمطبخ لأنها كانت حاسة بجوع شديد و عارفة مش حتقدر ترجع ترقد و هيا جعانة
وصلت للمطبخ فتحت الضي و مشت للثلاجة
فتحتها و قعدت واقفة تشوف في محتوياتها بش تختار شن تاكل
: سمورة كنك مصبية هكي ؟؟
و سمر من الخلعة طيحت وحدة من قيلاتها
و رائد قرب بسرعة و طبس قامها
و تكاها عالحيط جنبه
و شد سمر من يدها سندها
و ديدشها لن قعمزت على كرسي في نص المطبخ:
أكيد جعتي يا قلبي لكي واجد ناعسة
و عمتي قالت أنك مكليتيش شي من الغذاء
سمر مفاجأة وجودها مع رائد في نفس المكان
بالرغم من كل محاولات تجاهلها ليه
من لما جت لحوشه
و إلي ساعدها وجود أمها معاها كل الوقت خلاها متجتمعش معاه بروحهم و لو لدقائق
خلت الكلمات كلها تهرب منها
و معش عرفت ترد عليه
رائد قرب يده يمسح على شعر سمر بحنية :
كنك سمورة يوجع فيك شي
سمر هزت رأسها نفيا و من دون كلام
رائد : باهي جعانة صح ..
لحظات بس و نسخن لك إيكالك
خليت الشغالة تشيل حصتك على جنب
نسخنها لك في الميكروويف و تقعد تمام
و فعلا مشي للميكروويف
إلي كان محطوط فيه عشاء سمر شغله
وبعدين طلع من رف الدولاب
شيشة عصير طبيعي حطها عالطاولة
و حط جنبها طاسة و شوكة و كاشيك و سكين
و رجع لسلة الفواكه خدي منها موزة و تفاحة و برتقالة و فراولة و كيوي و مانجا
و حطهم حتى هما عالطاولة
و كان يحاول قد ما يقدر يكون ترتيب الطاولة حلو و متناسق
كان يدير في كل شي بحب و شغف❤️❤️
رائد كان حاس أنه مالك الدنيا و ما فيها
لأنه و أخيرا قدر يحصل فرصة مع سمر
كان يدور فيها في السماء لقاها قدامه و بين إيديه
استنى لن سمع جرس الميكروويف
طلع منه صحن العشاء و حطه حتى هوا قدام سمر
بعد ما نحى من عليه الغلاف إلي متغلف بيه
و جي حتى هوا قعمز جنبها
بعد لا قرب الكرسي منها أكثر:
و هذا عشاء السمحة سمر كيف متحبيها
مكرونة سباقيتي بفواكه البحر
يدير فيهن شيف فلسطيني
حاجة حلوة واجد متأكد حيعجبك
هيا يا سمحة قولي بسم الله
و سبقها للشوكة إلي قدامها خداها
و عباها بالمكرونة
و قربها لسمر بش يوكلها بإيده
هذا كله و سمر كانت و كأنها مش مستوعبة
و لا مصدقة إلي قاعد يصير معاها
فتحت فمها و هيا عيونها معلقات في ملامح رائد و الحنان إلي واضح فيهم للأعمى
و استمر رائد في كلامه الرايق و الحنين :
بعد نكملوا الصحن هذا كله
نشربوا كباية عصير فريش
حضرته لكي بنفسي و بالأناناس كيف ما تحبي
دخلت على كذا موقع على اليوتيوب
و جربت كذا طريقة عشان يكون طعمته مقبولة بعد تجربيه تقوليلي حلو و لا ندور طريقة أخرى
هيا يا سمحة هيا كولي بالصحة و ألف عافية
و استمر يوكل فيها لعند ما سمر اكتفت
و هو يهدرز فيها على تحسن صحتها
و كيف فرحان أنها رجعت تمشي على رجليها
و طول الوقت سمر مقالتش و لا كلمة أو حرف
و كأنها خايفة أنها تكون في حلم حلو
و لو تكلمت حتفيق منه على واقع موجع و مرير
و لما كان يشرب فيها في العصير تكلم بصوت هادئ و متردد : سمورة نبي نقولك شي
هو بالأصح طلب
ممكن ؟؟
و سمر هزت رأسها إيجابا بدون كلام
رائد قرب وجهه منها
و هو يتأمل في ملامحها بحب :
بكرا أو بعده .. مش عارف بالضبط الموعد
نبيك تعدي معايا لمشوار مهم و ضروري
باهي سمورة ؟؟
و سمر و أخيرا صوتها طلع : وين؟؟
رائد حك حاجبه بإبهامه و تكلم بتردد :
هو مشوار نبي نعدي له نا وياك وحدنا
حنحاول نرتب الموضوع و نبلغك الموعد تمام
سمر : وين يا رائد ؟؟
رائد : متسألينيش بس
بعد نعدوا تعرفي
سمر أنتي عندك ثقة فيا صح؟؟
سمر : صح
و رائد تنفس الصعداء:
خلاص نرتب كل شي و نشيلك تمام
و قاطع كلامهم صوت فريحة وقفت قدام الباب
و عيونها معبيات نوم :
سمر ،، رائد ليش قاعدين هنا ؟؟
رائد بعد شوية على سمر و تكلم بثقة :
تعالي يا فريحة قعمزي معانا
نا فقت كيفك لقيت سمر واعية
و الباين أنها جاعت عقاب الليل
ساعدتها تسخن عشاها
و قعدت نحكي معاها لعند تعشت و شربت عصيرها
فريحة جت قعمزت في كرسي جنبهم :
ربحت يا رائد ربي يربحك
قعدت شاغلة بالي بيها نعست من غير إيكال
كيف حالك توا يا ماما ظهرك يوجع؟؟
سمر : لا يا ماما شوية بس
توا بعد ناخد المسكن يخف الألم
فريحة : المهم أنك تعشيتي عشان المسكن
من غير إيكال يتعب معدتك
و سمر جت بتنوض
تلقائيا رائد وقف و سندها
و فريحة حتى هيا جت شدتها من الجهة الثانية
: خلاص ارتاح أنت يا رائد
و عدي عشان ترقد و ترتاح بكرا وراك شغل
نا حنساعدها تأخد دواها
و نقعد نحكي معاها لعند ترجع تنعس
و رائد طلق يد سمر بتردد : تمام يا عمتي
تصبحوا على خير
فريحة : و أنت من أهل الخير
و طلعوا من المطبخ
بينما رائد قعد واقف في مكانه و الفرحة مالية قلبه لأنه حس بموافقة سمر بأنها تمشي معاه
رجع له الأمل في رجعتها ليه❤️❤️
🌿🌿🌿🌿🌿🌿🌿
يتبع ✍️✍️✍️
تصويتكم بنجمة ⭐️⭐️
و تعليقكم يشجعني
ربي يسعدكم و يحفظكم
Masa💎💎