السلام عليكم ورحمة الله وبركاته ❤
في بداية الفصل اطلب منكم الدعاء
للكاتبة نور سمو العراق
بالشفاء العاجل Smoo-1997
وترجعلها عافيتها وصحتها بجاه هاي الأيام العظيمة
♡♡♡♡♡♡♡♡♡♡♡♡♡♡♡♡♡♡
في عداد الاعمار
الفصل الأول
نورا ناصر
♡♡♡♡♡♡♡♡♡♡♡♡♡♡♡♡♡♡
هذول أحنــة گطـن
وانتم حجيكم نار يحرگنه
شمس والليل يڪتلنه
جنط غربـه وتـفرهدنـه
سكارى وبدرب تهنه
غرب والنشد يوجعنه
جهال وڪلشي يعجبنـه
غنه السـبعين ياهو يفتهمنه
وياهو يسمعنه على الفطرة وتعذبنه
هذول أحنــة شني تسمينه سمينه
لان طيبين وياهم خـذو حگنه
هذول أحنــة ".
((لشاعرها))
كريمة..
بيوم حار ورطب من شهر التاسع وجانت بداية دوام المدارس
صارلنا تقريبا اسبوع مداومين
حضرت الاكل صبيته وخليته بالصينية انه وياسر دواماتنا عصري وسعود معهد ومامداوم اليوم
امي طابخة مركة باميا باوعت للساعة كالت ياا تأخر ياسر ووراه مدرسة بس لا سعيود خذه عبود للشط وغرڰ
كتلها يايمه شسالفة تلگينهم هسه بالشارع لو شوف وين انتِ مو كلما يتأخر ياسر و كلتي غرڰ قللي مخاوفج شوويونه
كالت متجاهلة كلامي انه رايحة اذب الفضالة للدجاج واجي بلكن من اروح وارد هو جاي....
كتلها روحي يمه روحي دجاجاتج شموا باميه واشتهوا هسه خاف وحدتهن حبلة وتتنسى وتتشهى اخافن تحك ويطلع بفرخها
كالت تتطنزين علي ولج كريمة
كتلها لا يمه جاي الطف الاجواء انت شكلج متوترة اليوم...
لبستني ولا عبرتني وطلعت من باب المطبخ الي يطلع على الكاع وراحت
احنه رغم حالتنه زينة واكثر من زينة ابوي صاحب محل اقمشة ومن فترة فتح اله محلات مال زوالي هو ورجل عمتي
بس امي تحب تربي دجاج تكول الحيوان بركة بالبيت وهي من جانت عند اهلها ومن زغرها متعودة تربي
ومن شب على شيء شاب عليه وامي نفس الشي
بس بعدها شابة عمرها بنص الثلاثين بس تبين عشرينية
حتى من داير سنة لسنة من تحن عليه وتطلعني يسالونها هاي اختج!!
وهمينه عدهه صخلة ونعجة كلش تحبهن....
عدا البزازين تموت منهن ودوم تأذيهن
احنه كاعدين بمنطقة ريفية وبستان جبير كلش وبيت بعد اكبرررر بس احنا بسطاء واهل الديرة كلهم يحبونه وقريبين علينا...
طبعا امي تطبخ الغدا على وكت وخاصة بالدوام العصري حتى نتغده ونروح للمدرسة بس هي اصلا تطبخه علمود ياسر لان المفضل عدهه
خشمي حكاني يمكن شم ريحة عركة اكيد امي وسعود راح يتعاركون بعد شوي
هاي امي كلما يحكها خشمها وكالت راح تصير عركة
طبوا سعود وبشار يضحكون بس ياسر معصب ومبللة ملابسه وشعره
ركعت كصتي عزاا هذا منزلينه للشط هسه تجي امي وتلعب فلك بيهم
صعدوا سعود وبشار فوك وسعود يحوم يتاني امي تجي تحضرله الحمام الجوه وتطلعله هدوم
اجه يمي يحوس وتكلم بنبرة سريعة
كريمة كرك كرك جيبيلي مناشف وهدوم يابسة
باوعتله انغووو اأنتَ انغوووو اكلك ترى انه موو امي
تاني امي هسه تجي وتطلعلك هدوم
غماني وظل يغلط عليه راح من المطبخ وانه ظليت اكل امي مشيخته علينا مسويته شيخ ناقصة لو عمامة لو عگال وچفية ويصيير يخطب ويفصل
هي اجت باوعتلي وتريد تسالني قاطعتها
كتلها هاا حكاج خشمج وضحكت
كبل لا تجاوبني طب ياسر يمه طلعيلي ملابس اريد اسبح واروح للمدرسة
هي شافته مبلل ولطمت خدهه عبالك عدنا فاتحة
وراحت للموزع رحت وراها وكمت من الاكل
انسدت نفسي
وكفت يم الدرج صاحت بعلو الصوت
- ولك سعود سعود صخام بوجهك كوون انزززل انززل
سكتت شويه تسمع الجواب بس هو مارد عليها
استمرت تصيح ولك ماتنزل تظل فووك والله لااصعدلك والله واجيب الهاون واهطر راسك ....
نزل سعود معصب شبيج شبيج شبيج مات ابوج ماتوا خوانج شبيچ والله كرهتيني بعيشتي كرهتيني بهالبيت هذا
كالت بغضب حرمت عليك عيشتك ان شاءلله ولك يومك ڰبل يومهم الله ياخذك ويخلصني منك
رفع ادينه ليفوك يدعيى امين يا رب العالمين واخلص منچ شبيچ تصيحين شنو تريدين
ردت عليه بسرعة بسرعة
مو اصيحك ليش ماتلفي
لزم التيشيرت من يم بطنه وعته وكال بعصبية وهو ينزل الدرج بسرعة
جاي ابدل جااي ابدل انزلج مصلخ
يحجي ويجر بالتيشيرت
غمته وهو وصل لنهاية الدرج ونزل صار عالارض
كاللهه خير هالمرة شطايح براس سعود وجاي تصيحين شلكيتي من حجة حتى تسمميني وتهججيني لو چي اليوم گاعد ومامداوم
ردت بحقد على اساس تسوي نفسك غشيم ماتدري چم مره گلت لك لا تاخذ ياسة وياك للشط
تريد تعم عليه تريد تغركه ولك انت ليش تكرهه ليش
وڰف متخصر وجاوبها والله مخنثته هالياسر هذا خليه يصير سبع زلمه شبيج انتِ صار عمره 16 سنة وانت بعدج تصيحين ياسر لا يغرگ ياسر راح يغرڰ
صررخت بعلو صوتها يبوووي الله اكبر على راسك كون فال الله ولا فالك....
ياسر كاللها يمه كعدت عالراڰ ماطبيت غميج ولارحت بحر
كالت واذا الروج يجيك وياخذك بحر وتروح بيها وتغرڰ
سعود يفر بيده وهي دايرة وجهه وتحاجي ياسر
جاوبها يمه والله المدة نازلة ماكو هلڰد ماي
بهالاثناء طب ابوي..... وسمع صوت امي العالي والظاهر سمعه وهو جاي من الشارع
غمض عيونه يتنهد وظل يستغفر من شافهم واكيد عرف اطراف العركة منو
سعود وامي كالعادة
امي من شافته ركضت عليه صاالح خلصني من ابنك خلصني راح يعم على يسوري ويموته
باوعلها وزفر نفسه
وسعود من مكانه كاللها وهو يحاول يهدي روحه
يمه ابوي جاي تعبان هيج تستقبلينه تعال يبه تعال اكعد ارتاح...
كومي ولج كارينا جيبي لبوج ماي يشرب
ركضت للمطبخ اصب ماي وجيت بسرعة اسمع ابوي يگل لامي على كيفچ يا مرة على كيفج ايمان لا يصير بيج شي مايصير كل هالخوف هذا
مديت ايدي بيهه گلاص الماي لابوي وكتله الله يساعدك
خذاه مني وكال هلا بويه هلا كريمة
وراح كعد على القنفة وكعد سعود بصفه
وامي مستمرة تدردم كالتله خوو انت كله تصف ويه سعود افندي عبالك نبي منزه وانت تدري بي مايسمع حجاية مني وانت من تصف وياه تشجعه وتگوي عليه والله انه اخذ ياسو واروح لخواني اكعد عدهم وانت خلي يفيدك سعود
كام ابوي ولزمها بحنية ومبين تعبان كعدها عالقنفة وحاجاهه بهدوء مايصير الي جاي تسوينه يا ام سعود
انت جاي تفاولين على ياسر خوفج هذا راح يتحول كارثة تهد اركان هذا البيت كله
امي رفعت راسها بتكبر وماتباوع لابوي شاحة نظرهه منه
سعود كال بنبرة كلها سخرية اي والله يبه حجيك كلام
باوعتله امي وكلتله انجب انته واكل
قاطعها ابوي وكمل كاللها اميرچ علي شيگول؟
كالت بصوت متعجرف مادري شمدريني
جاوب ابوي بصوت هادئ "كل متوقع اتِ"
تعرفين يعني شنو؟
جاوبت بعصبية لاع مادري بس سعود راح
قاطعها ابوي وهي سمعتله مجبورة
يعني كلشي تخافين منه كلشي تتوقعينه يصير وانت بهذا تفكيرج وخوفج راح تجيبين النه مصيبة تدرين بنفسج انت لو لا
شحت وجهه من ابوي مرة ثانية بين متندمة وبين جاي تبرد اعصابها
سعود كال لا اكلك ولا تكلي يبه هي تكرهني وتريد الحجة عليه وچي شافتني اليوم گاعد ومامداوم را
قاطعته:-بنتر مااكرهك اكره سوالفك وتصرفاتك اكره عنادك
لزم ملابسه يعت بيهم يمااا والله ماخذيته وياي هو تبعني ولو مااحب ابرر واحجي لان ادري بيج ماتصدڰيني
نترت بي اي ماصدكنك تدري ليش لان انت عنوودي ودوم تسوي الشي بعنادي
عدل كعدته وكال اووو بالله هسه هاي شحجي وياها ومدد رجللينه بالطول على الكاع.. شطولهم رجلينه وصلن لنص الصالة شويه ويطلعن من الباب
ظلوا على هالحال ثواني حجايه منه وعشر حجايات من امي وانه رحت صبيت مرة ثانية بماعون وخليت المرك ع االتمن وطلعت للصالة اكل واتفرج عليهم خاف تفوتني حجاايه
ابوي طلع من جيب دشداشته علبة كاللها اليوم جنت يم ابو موسى الصايغ وعجبتني الج قطعة ذهب
امي تباوع للعلبة وتدير وجهه عود تكابر ومايرضيهه اي شي
بس ادري بگلبها هسه طلعن اله جناحات من الفرحة امي تموت عالذهب ويامرة ماتحب الذهب
وسعود صفگ ايديه وظل يصوفر
امي كالت ووجع ماتستحي ماتحترم مو كدامك ابوك هيج تسوي
ابوي خزره وكاله روح بويه اكو فرش جديدة جبتهن للبيت روح نزلهن من السيارة
راح سعود وهو يردد بنبرة مرح صار يبه تدلل
ابوي راد يبعد النار عن البانزين
وامي حسيتها فكت شويه
كالتله بنبرة انوثة هالمرة ونبرة جبار الي كبل شويه ملعلعة بلعتها
كالت وعين على العلبة الي بيد ابوي
وعين على حضنها عود خجلانة
مو انت تدري بي الولد مريض من صار لهسه
وتعرف معزته بگلبي چي مريض
انت مو من اسألك منو تحب اكثر واحد بيهم
تكلي غائبهم حتى يعود ومريضهم حتى يشفي وصغيرهم حتى يكبر!!
انه هالولد مرضه عله بگلبي شسوي
مايتحمل بسرعة يتمرض
هو ياسر كبل سنتين سوى عملية مصران اعور
وعنده حصوة بكليته وامي مسويتها قصة علينا
سكتوا شويه وامي كالت بس انه احسك تحب سعود أكثر
كلهم نفس المعزة بس هالولد احسه راح ينظلم
ياا شبي ينظلم سعود فد واحد ملعب يكرط الحية من راسها ومايخاف
انت يا ام سعود انت بتفرقتج هاي راح تخلين الولد ينظلم ترة سعود كلبه طيب وهم عنده احساس ويحس ترى اثنينهم ولدج مايصير تفرقين بينهم انه من يمي جاي انقهر على سعود
وتصير بينهم عداوة وواحد يكره الثاني على هالتفرقة هاي راح تهدمين عايلة كاملة وتولدين حقد وعداوة ...
استمر ابوي يحجي وياها بلين وحنية بس هي تعاند وتبرر وتناقش عفتهم وباوعت عالساعة ب١١ وربع حيييل دوامنه يبدي ب١٢
انه مبدلة ملابس المدرسة بس رحت غسلت وفرچت سنوني وطلعت برا خذيت حذائي مال مدرسة من الجزامة وطلعت برا امسحه
امي ماتقبل امسحه بالبيت
طبيت جوه رشيت عطر وخليت نيفيا لايديه
رحت للمدرسة وصلني سعود دخلت للساحة هووسة البنات والجو حار وهنه ولا يمهن يفترن بالساحة والشمس تصڰع...
دڰ الجرس ودخلنا للصفوف واجت ست عقيلة ام العربي وڰعدت تشرح قواعد
باوعت يمي كاعدة غفران بس بعدها ماجايه هاي الفاهية كله تتأخر
مرت عشر دقايق من الدرس وجان تطب غفران تتمشى على كيفها مايعة من الحر والشمس وجنطتها مخليتها صفح ومبتسمة رغم طيحان الحظ
التفتت ام العربي جانت تكتب عالسبورة وشافت غفران تتمشى على كيفها واصلة لنص السطر وجان تصرخ عليها بعلوو صوتها ووووولج هاااي ويييين
وهي غفران الفاهية ولا عبالك عليها الحجي مشت وهي تباوعلي ومبتسمة ووصلت يمي عبرتني وكعدت بالرحلة خلت ام العربي تشعوط بفهاوتها
اجت يمها للرحلة وحاجتها بعصبية
ولج منو سمحلج تدخلين وراي ليش جايه متأخرة شافتج المديرة؟ لو اجيتي كبل هنا
جاوبتها غفران لا ست امي جابتني
صاحت عليها وهي تضرب عالرحلة ادري امج جابتج لعد ابوج و من تحجين وياي كومي اوكفي
كامت غفران وكفت ببرود ست امي وصلتني للمدرسة
خلتها تطلع من الرحلة كالتلها روحي للمديرة
طلعت غفران تتمشى الى ان طلعت من الصف ورجعت ام العربي جرت نفس وسدت الباب وراها وظلت تشرح
انوب الصف حار وهي سدت الباب اختنكنا
ورا شويه اجن غفران وامها ام غفران ابرد من غفران نفسها الي هن اثنينهن ابرد من قالب ثلج
لا يابه ياقالب جبل جليد الي دعمته سفينة تايتنك
تحجي وتجر بحجيها ها ست شلونج
وصلت نص الدرب واجت وراي غفران تكول طاردتها من الصف
كملت بنبرة عتب ليش ست
تنفست ست عقيلة بغضب مكتوم كوة مسيطرة على اعصابها جاوبتها كتلها تروح للمديرة مو تتبعج للدرب وبعدين شون تطلع من المدرسة وهو الدوام بدا مايصير علميها هالشي مايصير
اي والله ست اهيه تخاف من المديرة وانه هم اخاف من المديرة مرووتج ست خلي تداوم بس هاليوم وبعد ماتتأخر
ڰالت مايصير ام غفران روحوا للمديرة
بعد الحاح المدرسة بنفسها صاحت للمديرة وظلوا يحجون برا على غفران وامها ويتناقشون وياها...
وبعدها اجت ست عقيلة هي تحاجي بغفران تكللها دخلي دخلي طار نص الدرس والله ولا اخليكم تطلعون بالفرصة الا اخذها لدرس الادب
اجت غفران وصلت للرحلة وانه والي كدامي والي وراي ظلينه نگرص بيها كله بسببج ماراح نطلع فرصة
وهي جان تصرخ بصوت عالي وست عقيلة تكتب عالسبورة وجان تدور علينا وذيج الرزالة
ادبسزيااات هاي يا عديمة تربية واخلاق صرخت هيج ما متربايات الا اجيب المديرة عليجن
وراحت جابت المديرة وذيج الرزالة وكلنا سكتنا ماكلنا غفران صرخت وتعاقبنا كلنا بالفرصة ماطلعنا
وتلث دروس جرة وحدة احنه محبوسين اخر درس الاسلامية المدرسة وزعت الاوراق مال الامتحان انه خذيت 80 من 90 وغفران ماخذة خمسة
ضحكنا عليها ضحك وهي ولا يمها شكد فاهية
كلتلها شيخة ادري شنوو انت طالعة من الدين الاسلامي حتى تاخذين خمسة
كالت يله ميخالف القراءة مالة السور عليها عشرة اعرف اقرا اخذ درجة كاملة
انيسة كالت هنيالي وهاي صارن 15 عود وخمسة عالحضور صارن عشرين حاسبتها صح غفو
ضحكنا وشيخة كالتلها هنيالج عالبرود هاي انت شون تنجحين كل سنة
جاوبتها انه غير امها تجيب ابايگ شبزي وتچبس تمر وتسوي معسل تمر ومكانس خوص ومهاف خوص وتوزع للمدرسات وينجحنها
انيسة جاوبت هنيالج غفران على امج حتى بالدراسة ماتريدج تتعبين ماتبادلين امج بأمي
غفران طاكتها صفنة وبس تهز براسهه
كتلها يمعودة مو حلو هيج علمتها عالفهاوة ووترى هذا مستقبلها لازم تشجعها تدرس والله انه متعجبة شون طلعت من الثالث ومارسبت وعادت سنة وهو وزاري
شيخة كالت هي كلها حظوظ ترى الوزاري حظك يا نصيبك....
انيسة كالت يمكن المصحح عرفها من اجوبتها فاهية كال خلي امشيها
ظلن يضحكن وغفران ضحكت ويانه على روحها هنيالها ماعدها هموم
دك الجرس تأفأفت مالحكنا نطلع بالفرصة ودك الجرس... دخلنا وخلص اليوم...
بالحلة خذيت جنطنطتي وطلعت شفت بشار واكف يم السيارة مالة ابوي وعيونه تلعب عالبناات اليى طالعات لبيوتهن
گلبي ظل يدڰ يدڰ غيرة حب ماادري شصارلي
شڰول على أهلي وأهله الي من صغري وهم يكولون بشار لكريمة وكريمة لبشار
الى ان خلوني احبه واريده بس الي
مشيت بثگل وحاسة بنفسي مبينه عصبية
ورحت يمه وكفت اريد ابين للكل انه اله وهو الي وحتى لو يباوع عليجن ترا بس هيج يونس روحه والا هو محجوز الي
وكفت يمه كتله ها جاي عليه
كال اي لعد على امي يله فوتي
دخلت بالسيارة كعدت ورا مو كدام هو دار وجهه عليه كال اكولج كريمة مدام كعدتي ورا عشتو شوفيلج وحدة تكعد يمي بالصدر لأن ضوجة
كتله بانزعاج شنوو عيني؟؟
ظل ياشر بيده ويكول عزميلج جم بنية من هذن كون ينطلع بيهن خلي يصعدن ويانه خطية يرحن مشي شمس وحارة
باوعتله مخنزرة كال ها شكلتي صح السيارة صغيرة بس نترسها ترس وحدة بصفي وحدة بحضني وحدة فوك صماخج
فتحت عيوني على كبرها وكتله بعصبية شبيك بشار ترى عيب عليك هالحجي كدامي لو يسمعك سعود يطيح حظك
وجان تنفتح الباب وتدخل غفران الحمارة وكعدت يمي جان تكول عادي اروح وياكم مو؟؟
قبل لا نجاوبهه سدت الباب
وهو عيونه طفرت من مكانهم داير ومخلي ايده على الكشن ويباوعلها مبتسم كال يا هلا والله اي طبعا تفضلي حياج..... حياج
درت عليها وكتلها بعصبية وادفع بيها
نزلي نزلي هسه امج تجي عليج وماتلكاج
وتظل تملخ بروحها تدرين شكد تخاف عليج هيه
جاوبت بابتسامة وتطلع الكلمة كوة لا و لج امي كالت رجعي ويه كركم
ظليت انفخ وهو بشار كال هلاااا والله اي اي عادي نوصلج ليش لا يمعودة ادللي اذا منوصلج نوصل منو
ووبعدين وجه كلامه الي اكلج كريمة لا تعزمين احد بعد ما شاءالله تكفي وتوفي وعينه عليها
ظليت خازرته وهي تحوس بالجنطة وجنكال بحلكها وحجابها مفتوح وطالعة ركبتها وكذلتها على كصتها
كال اكلج كريمة اذا مضوجتج خليها تجي تكعد يمي
كتله بأمر سووق بشار
و كرصتها حيل تباوعلي وتفرك بيدها
متعجبة كالت شنو
كتلها وصاكة سنوني حييل شعرج
كامت ولفته
وبشار بعد ما شبع نظرات منها ظل يسوق وشغل اغنية اخبارك ايه حبيبي طمني عليك حبيبي وحشتني عنيك حبيبي اخبارك اييه..
ويباوع عليها بالمراية ومبتسم عبالك صادله صيدة
كرهته وكرهتها تمنيت اشمرها من االجامة
طكيتها بيدها شكد تزعبلين كافي تحوسين برووحي دايخة شجاج
كالت اكلج كركم اليوم ام العربي مدري شبيهه وياي نشبت
جاوبتهه بنتر وعصبية حقها انت تبطين الچبد ومكروهة انت غفران لو منها اكسر راسج
كالت لا ولج يمكن متعاركة ويه رجلها وتطلع الحرگة بيه وطكتها ضحكة
وبشار هم ضحك وانه نار واشتعلت بيه كوون اركعهم راس براس
لا والله شنو ادنيى راسها يم راسه اغار خو هو يكيف
صاح هو هذا خوش لقب كركم احسن من سعود يسميج كارينا انت شجابج على كارينا
اووو والله غثتني غفران ياررربي
كتله ترى اسمي كريمة
كال قابل مااعرف مثلا اسمج المصون بس غفران خوش تدلعج
كرهت اسمها بلسانه شكد مكرووهين....
هي اشرت عليه و كالت اكلج هذا خطيبج الي تسولفين عنه
فتحت عيووني يممه بعد مااتحملها
صحت عليه بشار نزلها هاي المكروهة هنا نزلها
وادفع بيها من چتفها
هو كال لا بعدها ماوصلت لبيتهم خلي نوصلها فد نوب هي بيتهم مو بالفرع الي وراكم
جريته من ملابسه هسه تنزلها وهنا وصلنا لبيتهم اصلا مابقى شي
سحب ايدي ووخرها
هو خبيث يندل بيتهم ووصلها لحد الباب
هي نزلت مثل االرگة (السلحفاة) على كيفها
وكالت باي
هو هم جاوبها وهو يباوعلها وعيونه تلمع
وكال هلو هلو بايات بايات
حرك السيارة وظل يحجي شبيج وياها كركم ترى البنية رقيقة كلش شدعوة راح تاكليها
كتله اسمي كريمة بشار لاتكلب اسمي
ظل يفر بيده عاد هو شلون اسم حتى بيبيتي هم اسمها احلى من اسمج واحدث همين
تجمع الدمع بعيني حتى اسمي ماعاجبه يله ميخالف خلي يكول كركم كاري كمون جاا شسووي بعد
كال هي هاي غفران نفسها اتذكر عليها من جانت تسوي كصايب اثنين وتجي تعيدكم بالعيد
بقيت صافنة وكتله صدك؟ ليش هلكد خالها ابالك
كال وهو يضحك نسقيلي وياهه
جاوبته مصدوومة مو عيب تحجي هالحجي كدامي
رد ههههه شبيج كركم لا يكون عايشة الدور وترديني احتويج واحترم مشاعرج ترى اني بصراحة ما احبج
غصة شكبرها ببلعووومي صارت رغم سامعة منه هالكلام واجد
باوعلي بالمراية وجنه مصدوم من نفسه
كال بصراحة يعني اهلنا ظلمونه اني صح ارتاح عدكم من اجيكم بس والله اشوفج مثل اختي
و احسلج اكولج هالكلام اني ما اكدر اتخيلج زوجتي وانت هم بادليني هالشي
كتله واحاول اسيطر على روحيى ونبرة صوتي
لا عبالك ميتة عليك لو ماكو زلم بالعالم غيرك
ضحك والله انت مفضووووحة كركم ادري بيج بس اني اكول هالحجي لمصلحتج
كتله بعصبية اسكت اسسكت لااتكول كركم لااتكووول... وبعدين انت يمتى تولي لبيتكم موو جنك طوولت هالمرة عدنا شنو طلعت اقامتك عدنا وانه ما ادري
كال متأكدة ترديني ارووح انت متأكدة؟
اي رووح صاير مزعج ودير بالك بعد تجي عليه للمدرسة سعود يجي بدوام الصبحي وعمي محمد يوصلني بدوام العصري
كال ليش حتى لا اشوف غفران وتغارين
ماشايفة مثل حقارته وخباثته يدوس عليه ويعبر يمكن يريدني اكرهه
كمل كلامه من ما شاف رد
بصراحة اني بس ارجع لبغداد راح اترخص من ابويه وارجع هنا ابوج كال يشغلني وياهم
ودراستك؟ مو عالاساس تكملها
بعدين بعدين عود ادرس خارجي هسه اريد اجمع كم فلس اريد اتزوج
تتزوج؟ بخفوت سألته
بس هو وصله صوتي وكال اي بس لتفرحين موو انت... وكمل بضككة ماافيدج اني كريمة جديات عن الشقه
شقى؟ هذا كله يسمي شقى وهو جاي يطحن بيه طحن ويسمي شقى
جنت احاجي نفسي وهو كمل
كال بنبرة هايمة هاي غفران شكد تنحب يا الله صح كل كم سنة اشوفهة مرة لو مرتين بس مدري شيصير بيه
اريد اسألها ينطوها اهلها بهذا العمر؟ انتن هسه شكد عمرجن؟ ١٧ مو؟ هي بكدج نفس العمر انت وياهه؟
وصلنا لبيتنا وماجاوبته نزلت بسرعة حسيت الدنيا ضاكت بيه
شنو الي عجبه بغفران!!! فاهية ومرعبلة ومبهذلة يعني حتى ما تنحب وماتعرف تحجيلها حجاية وفاشلة شمعنى حبهه!! راح اتخبل
دخلت للبيت أمي كاعدة حاطة رجل على رجل ومزينة رجلها بحجل فخم لايك عليها ولابسة قطعة الذهب الي جابهه الهه ابوي الصبح
ناثرة شعرها الاحمر المحنى على جتافها ويمها الكرزات والعصير والكيك وتباوع مسلسل
كتلة من الأنوثة كدامي ولا عبالك ذيج الي جانت تلعلع الصبح... ولا عبالك ذيج المرة الي تربي صخول ودجاج
صعدت فوك وهي صاحت وراي شببيج ماتسلمين
ماجاوبتها صعدت مقهورة للغرفة وظليت ابجي بحرگة على حظي مامصدگة بشار مخلي براسه غفران لا ونوب يحبها من هي صغيرة واعترفلي اليوم
بجيت لما شبعت بجي وغفيت بملابسي كعدت ورا مادري شكد وذبيت هدومي وغسلت وجهي
نزلت جوه صار بشار بوجهي كاعد يم امي فركت عيوني خاف يلاحظ باجية ونزلت راسي
رحت للمطبخ شربت ماي وجاي اتغدى
اجه بشار سحبني من يمه
لزمني من ايدي
سحبت ايدي منه بزعل
قرب مني كال هسه لا تحجين على الموضوع الي كتلج عليه خوش
تجاهلته وطلعت للبستان افكر هو ليش كال لاتكولين بالله؟ معقولة غير رأيه؟
لا مبين مُصر عليها احتمال مايريد اكول لاهلي هو مايريدني حتى لا تصير مشكلة ويطردونه منا ووين يولي
وخاف ابوي مايشغله وهو متأمل بهذا الشغل حتى يكون نفسه ويخطبها
قطع سيل افكاري سعود وهو مخلي صخلة من صخول امي على چتافه ولازمها من اطرافها كل طرفين بجهة ويركض بيها
صخام بكصتك سعود ولايتوب من امي الصبح غاط ياسر بالشط وهالشي خط احمر عند امي
وهسه بايڰ الصخلة الصغيرونة مالتها بت الچبيرة ماصارلها شهر من جابتها أمها
هو ادري بي خبيث كلما تغثه امي يسودنها بسوالفه ويكوم يخبث
وييه هسه اذا درت شتسووي بي صخام
تعدى من يمي كتله هاي وين موديها!!!
كال ولج وخري لاتجي امج تشوفها وتفشل المهمة
ادري انت وين موديها
رد بسرعة صاحبي بيتهم بي جني ورادوا صخلة سودة
شيسوون بيها
جاوب بعصبية شيسوون بيها يعني يذبحونها ويطلع الجني من بيتهم
كتله والصخلةة خطية شنو ذنبها
كال ذنبها عمتها امونة
يقصد امي
حجه هيج وراح....
والله يضحك ويشتري المشاكل ويه امي شرايه ولو يطلبون فلوس عليها هم يدفع ولا عبالك ابن بطنهه...
الله ينطيك ياسعود ضحكتني وانه مقهورة اليوم دمي مشعوط والله لاينطيك بشار ولا ينطيك غفران وان شاءلله تبقى بحسرتك العمر كله
دخلت للبيت مبتسمة شفت امي
كالت شجاج مساع بوزج شبر هسه االضحكة من الذان للذان
كتلها ماكو شي يمه طباكات ماتعرفيني
فرت ايدها وانه بﻜلبي گلت والله يا يمه لو تدرين بيه اضحك على شنو...
والله يا امي لو تدرين خطفوا الصخلة مالتج الي مدللتها ومسميتها سعوودة ولو تدرين منو الخاطف المجرم
رحت للغرفة اڰلب بالكتب ومالي خلڰ اقرا وباجر عدنه انڰليزي
صار وكت العشه وكوة مشيت الوضع وماريد بشار ينتبه بس هو يضحك ويصنف ويه الولد سعود وامي ولهناك يباوعلي واصد نظراته
يوم ثاني دوامي صبحي كاعدين انه وسعود نتريك وياسر بعده يجر بروحه جر علمود يكعد
كلت لسعود ماريد بشار يجي عليه للمدرسة
عكد حواجبه كال ليش شبي؟
جاوبت مدنكة واكطع بالخبز
مايستحي يباوع عالبنات ويشمر حجي لا يروح يبلينه بلوة وحدة من البنات تشتكي عليه وبعدين سمعة مو حلوة عليه بالمدرسة
كال وهو يغمزلي متاكدة خاف تغارين
فقدت شهيتي و درت وجهي واندكت الباب طفر هو يفتحها دقيقة ورجع كال هاي صاحبتج ام عيون هيج اجت عليج تريدج
يحجي ويسحب بعيونه من الجهتين
عكدت حواجبي منو هاي؟
وهو يكعد والله مادري يمكن هاي اخت قصي لان تشبهه انه عبالي قصيوو بس لابس حجاب
ملخت خدي وكلت يبووووي لا هلا ولاااا مرحبا بيها
رفع راسه ليش شبيهه هم تجيبلج سمعة موزينة؟
كتله لا بس اكرهها مااحبها
ورحت تخصرت وطلعت الهه
كتلهه ها خيرررج جايتنه من الصبح
ضحكت غير دوام صبحي ابن خالتج مايوصلنا مثل امس
حمگت عليها حييل نار ظلت تطلع من راسي كرهتهه فجأة
وانه اسد الباب بوجهه كتلها اليوم ارووح مشي انه انت رووحي ماروح وياج تمشين دڰه دڰه چنچ رڰة وتأخريني
وكبل لا تجاوب سديت الباب بوجهه
سمعتها تدكه على كيف وتكول ولج كركم
غلست عليها ورحت كملت ريوكي ، بس ضايجة هاي تونست على بشار يمكن عجبها اووف ياربي
كوة بلعت اللڰمة وڰمت
باوعت لمكان سعود ماكو يمكن صعد لغرفته وبشار نايم بالديوانية وامي نايمة وابوي طالع من وكت للمحل مثل عادته كل يوم
خلصت كلشي وسعود ماكو مانزل معقولة رجع نام
صعدت دكيت الباب جان شويه مفتوح دفعته ودخلت وجان اشوفه كاعد وجاي يرسم ومندمج اجاه الهام يمكن...
عفته وطلعت مشي للمدرسة بس غريبة ماشفت الرڰة تمشي بالشارع مدري وينها
رحت للمدرسة شفت انيسة وشيخة وكعدنا نسولف
وداد كالت البارحة اخوي جنزني بسبب مرته الحية
انه وشيخة صحنا بصووت واحد ياا ليش شسوويتي
كالت بحزن والله ماسويت بس كلت لمرته غسلي كوب الحليب مال ابنچ لاتخلينه عالسنك وصخ وترحين
هي راحت وزته عليه واجه هايج مخبل
مني حجايه منه حجايه كتلني بس والله انهضمت وفكرت انتحر
امداه اخوج مع احتراماتي الج بس اخو مريته شون يمد ايده على عرضه وانت بعد شون تردين تنتحرين هاي الروح عندج امانة شوون تغضبين ربج عليج
كالت اوف حسبي االله ونعم الوكيل اريد اتزوج واخلص منهم اول واحد يدك بابنا الا اتزوجه حتى لو مطي يخطبني
شيخة كالتلها لا يمعودة شجاج انوب تخلصين من ضيم اهلج تروحين لضيم الرجل والعيال بعد انكس على الاقل اهلج يمونون عليج
كالت جبحهم من اهل
شيخه جاوبتها يمعودة يظلون اهلج شوفي هسه انه أمي احسها تفرق بيني وبين خواتي رغم انه الجبيرة بس ماتأمن بيه
تنطي لأختي الأصغر مني تشتريلها وتضم عطوراتها عني بس اشم ريحة اختي كله عطر حلو
من اجي اسألها منين تكلي من امي ومن اروح ادور ما الگه ومن اسألهه تڰول ماكو
وهالاشياء تقهرني بس اظل ابرر لأهلي اكول يمكن مو قصدها وتولي هالأشياء تافهة
انيسة كالت احنه كل وحدة همها شكل انا اخوي اموتني وانت امج تفرق بينج وبين خواتج وكريمة ذابحها الحب ههههه بس غفران عايشة حياتها بالطول والعرض امها مدللتها واخوها فقير وماتهتم ولا تنقهر
شيخة كالت العالم كله بعالم وغفران بعالم شوفوها جاي تلعب ويه الزعاطيط
درت وجهي واشوفها جاي تلعب مربعات ويه صف اول متوسط ولا مهتمة
كتلهم سمعوا لعد غير بشار صدمني صدمة عمري
كالن شكو
ظليت اعصر باصابيعي كتلهم بشار طلع يحب غفران
لطمن خدهن كالن ومنين يعرفها وين شافها
ضحكت بسخرية مبطنة بألم
شايفها تجي تعيدنا بالعيد ومخليها اباله
لو اعرف شنو شاف منها وحبها اشو حتى حجاب ماتعرف تربطه مثل الاوادم
بقن شيخة وانيسة مصدومات وبعدين كالن شراح تسوين
هزيت راسي بقهر وقلة حيلة
مادري والله مادري متفرفحة من امس لليوم
شيخة كالت خاف يريد يلعب عليهها يشوفها فاهية وتتقشمر بسرعة كال خوش صيدة يكضي وياهه وكت
انيسة ردت بحماس اي صدك لاتضوجين يمكن هيج واحنه انبه غفران ونكللها ديري بالج منه هذا ملعب
جاوبت واهز راسي بقهر... لالا ناوي يكون نفسه ويشتغل ويتزوجها حتى سأل عن عمرها واذا أهلها ينطونهه لو لا
تقربت غفران من يمنه واجت مبتسمة
كتلهن سكتن لا تخلن الفكرة ابالها عفية لا تظل تحبه
هنه سكتن وهي اجت مبتسمة ولاعبالك الصبح طردتها من بيتنا كعدت يمي وظلت تسولف...
دك الجرس ودخلنا للصفوف غفران راحت للحمام
وانا من يمي ظليت كلش مااحبها خذيت جنطتها وخليتها عالرحلة الاخيرة محد گاعد بيها
اجت المدرسة كالت يله امتحان وطلعنه الاوراق وهي جاي توزع الاسئلة علينه
وراها اجت غفران مغسلة وجهه بالحمام رزلتها ست سليمة رزالة معدلة ودخلت
واجت وتريد تكعد يمي تفاجئت ماكو جنطتها
ظليت ااشر لها عالرحلة الاخيرة راحت جابت الجنطة واجت كعدت يمي
شلون دقتني دققق ظليت بس انافخ واتذكر بشار من يحجي عنها
حتى ما جاوبت عدل وسلمت الورقة مامتأكدة من اجابتي
ورى ما خلصنا امتحان غفران سلمت الورقة
ست سليمة كلتلها طلعي بالساحة غفران اذا تردين
جاوبتها غفران ها لا ست
ورجعت للرحلة مصرة تحمض على گلبي
خلت راسها عالجنطة مالتها عود سوتها مخدة وشبڰتهه وغمضت عيونها وشكلها نامت وغفت
باوعتلها هنيالها لا هم ولا غم وبشار يحبها اووف الله ، ظلم والله ظلم
بالحلة طلعت شفت بشار واكف ينتظر ، بسرعة لبدت ، ضميت روحي بين الطالبات
وشفت غفران تباوع على السيارة وترد تباوع عالبنات تدور بعيونها
يمكن تدور عليه حتى تصعد ويانه بالسيارة
جان بشار ياكلها بعيونه بس هي ماتباوعله
كمت رجعت دخلت للمدرسة بلكي تروح تنگلع ماريدهه تصعد ويانه
وفعلا بدت المدرسة تفرغ واشوف بشار يحاجي المديرة يمكن يسألها عني
طلعت بسرعة هو شافني وجان معصب كلش
وهو يحاجي المديرة اشر عليه وباوعتلي المديرة
رحت للسيارة واتلفت همزين باقيات جم بنية وغفران ماهيه
صعدت واجه هو معصب
كال وسسم وين جنتي واني انتظر
ضحكت كتله سم الي يسمك شعليك
كال بعصبية صارلي ساعة انتظر حضرة جنابچ الكسيف وين چنتي؟
رديت ببرووود بالمدرسة وبعدين منو كالك تجي عليه لو جيتک هاي بيها غاية؟
كال معلييج انت معلييج
يحجي وينفخ
غير متت ضحك
حييل بي شسوى بيه امس موتني فرفرني
اليوم اجه دوري خوش خليته ينصگع بالشمس
فكرت بسرعة الظاهر غفران راحت بس هي تمشي على كيف وتوكف ترتاح بالطريق جم دقيقة وبعدين تكمل مشي يعني بعدها بالطريق هسه
خطرتلي فكرة وهو بعده يرزل بيه
ماعندج احساس ماتفكرين بيه واكف والشمس تسمط
انه تقمصت شخصية غفران بعدم الاهتمام
وكتله بالله نزلني يم المحل هذا شويه
كام وكف السيارة بسرعة وثار كل التراب بوكفته
وكال بعصبية
نزلي خاتوون وبسرعة لا والله انزل افشلج كدام ابو المحل
كتله نننننننن ماتضحك
ركع االستيرن بقووة ونزلت انه بسرعة اريد اروح للمحل بس تراجعت
درت ووكفت يم المراية الي بصفه
ظليت اعدل بحجابي اريد نتأخر بكل وسيلة لا نصادف غفران بالطريق ويشيلها ويانه
وهمين اريد اغثه حتى يبطل لواكة ويبطل يجي عليه للمدرسة
رحت للمحل دخلت عود اشتري وحرصت على التأخير وكل شويه اباوع من الجامة خاف ينزل ويجي يفشلني يسويهه ادري بي خبيث وحقير
وصدگ شفته فتح باب السيارة ونزل
وانه بسرعة حاسبت ابو المحل وطلعت
علما حاسبت هو واصل يم باب المحل
طلعت وجانت عيونه بهامته
كال ماتفضيهه خاااتون
وبيدي الاغراض الي اشتريتها كتله
اطير خوو ماا اطيررر
ورحت صعدت بالسيارة اخروش بالجبس واكرووط
هو ساق وكال شهالفكريات مااشتريتيلي شي
جاوبته هو انته انطيتني مجال حتى مااشتريت شي
مد ايده ليورى وخمش العلاگة كلها من حضني وطلع منها وظل ياكل
كتله قز القرط وسم وزقنبوت كووون
غمزلي بالمراية كال هاي الدعوة من كل گلبج؟
كتله من صمصووم كلبي
كال بحقارة وخبث اكييدة؟؟؟ هاا
درت وجهي عالجامة صكيت سنوني مكرووه مكرووه روح لبيتكم رووح شعندك ظال
كال اصلا انت أكثر وحدة فرحانة ومتونسة لأن اني يمكم
كتله ايييع ويع
ظل يحجي وأنا اباوع للدرب ومركزة واتفحص اشوف غفران بعدهه تمشي بالله
وهو هم الخبيث
كال وينها غفران
وكمل بقلق معقولة وصلت بسرعة لو احد شالهه ووصلها
شوون يحاتي بيها وخايف عليها
الله أكبر على راسك وراس غفران
بس هي يمكن هستوها طبت بدربونتهم
دخلت للبيت واستلمتني امي رزايل
لأن رحت للمدرسة وماكعدت ياسر من النوم
يسوري المدلل مالة امي
هي ترزل وتغلط عليه وبشار يشمت بيه
صعدت للغرفة متعودة على رزالة امي بس كدام بشار صعبة خاصة امي تنزل عالترابي وتغلط
وكله تصيحلي ام الوصخ رغم البيت بفضلي يلمع
لمع
وانوب فگدت صخلتها وظلت تحقق وياي وشاكة بسعود كتلها ماادري
وهي من عصبيتها عليه ماخلتني اتغده خلتني انظف البيت وادري بيها اليوم ماراح ترحمني
منا صخلتها ومنا ياسر فاتت دروس
تريد ياسر يطلع معدل طبية وبعظمة لسانها كالت اريده يطلع سعود كسر..
وهو سعود معهد طبي... اتذكر لهسه من جان يدرس للسادس تهججه وتطلعله 650 مصيبة حتى تأثر على نفسيته
صعدت لغرفة سعود ارتبها
جان دفتر الرسم على الجرباية مالته
فتحته وظليت اكلب بالرسمات شكد حلو يرسم
مامخلي وحدة ماراسمها يمكن نص بنات المعهد الي وياه
وهم راسم اطفال وراسم عيون وشباب كله شخصيات..
وصلت اخر رسمة انتبهت عليها جانت بنية مرسوومة بقلم الفحم
دققت بملامحها يااا هاي تشبه غفران !
باوعت على تاريخ الرسمة اليوم الصبح بالضبط يعني من شافها اليوم اجاه الهام
مادري ليش فرحت والشيطان ظل يرسملي خطط من قعر جهنم واريد اطبقها عالواقع...
سعود اجاه الهام من شاف غفران وانا اجاني الهامات من شفته راسمها...
يتبع...
بنهاية البارت اطلب منكم طلب مثلما دعيتوا لابني ونجح 😁 وانا مجربة دعائكم ادعو لصديقتي مريم تنجح من السادس وان شاءلله كل التوفيق لطلاب السادس اعدادي ويارب اسئلة سهلة
مريوم طالبة سادس خارجي وتعرفون طلاب الخارجي شكد تعبانين لان الاغلبية متزوجين
وعدهم مسؤوليات واطفال وماسمحت الهم الظروف يكملون دراستهم يستاهلون ندعيلهم
وربي يوفق الكل ان شاءلله...
احبكم 💋🎻
20 حزيران 2023