رواية # الهجرس
#الكاتبة راوء هادي # قراءة ممتعة للجميع
وقبل كل شيء ، اترك تعليقًا وإعجابًا
بين الفقرات
الكل تفاجأ من كلامي عمي ايهم راح لعمي جاسم يركض وانا والربع وراه نركض ونصيح "
هجرس_عمي وين رايح
ايهم _اليوم اكسر احاولك گللللب شلون تبيع ابن
اخوك شلووون
جر عمي جاسم من ياخة دشداشته قوي ويزكح بنص وجهه "
جاسم_شبيك تخبلت ايهم شيل ايدك
ايهم _اليوم اطم عارك ياعاااار
توه راد يجيبه بوكس لزمت ايده وجريته قوي من عمي جاسم ماكدرتله دفعني هناك وين عاد لتموا عليه كلها وجروا يغلط ويفشر علية طلع جدي شكو شكو صاير بيناتكم
ايهم بصياح"
بالخير عليك يابة ابنك بايع ابن أخوه للمسؤول والضباطه علمود يذبحووووا
جدي_شلووون ؟!
جاسم _حيوان جاي تفتري عليً
ايهم_مافتري هذا الصدك هدوووني خل اكله بسنوني هدوني ولكم هدوووني هذا ساقط كواد عااار هدوووني
شبيكم ماتسمعوووون
جاسم_ايهم شبيك منو ضاحك عليك
هجرس_محد ضاحك هذا الصدك انت مخلي ايدك بيد أعدائي وتردون تتخلصون مني
جدي_ شنو هالكلام هجرس
هجرس_انا سمعته بترس اذاني هذاك اليوم يكول ورث ابوي كله باسمه وإذا أبوي مااخذ الورث وقسمه علينه راح يكون عقاب ابوي موت هجرس
جاسم_كافي جذب هجرس تريد تخرب بيناتنه بعد ماتصافينه
ايهم_والله العظيم ماكو غيرك أنت الجذاب وقبل شهر اجيت على ابوي وفتحت موضوع فلان قطعة أرض وهذا أكبر
دليل على كلام فرقد صح
جاسم_اكل خر... ايهم
عافوا ايهم هم عافوا تهجم على عمي جاسم وضربه صارت لاخت عسله ناس تغلط وتفشر على ناس جدي تخبل من سمع هيج السالفة ودخل الكل للمضيف
ونزل تحقيق بولد عمي جاسم عمي جاسم نكر وكال مستعد احلف كلام الله كلام هجرس وايهم فتراء علية أنا بريء من هاي التهمة ومالي شغل بالمسؤول وضباطه
ايهم_تعال خالد احلف كلام الله كلام ابوك صدك
خالد خاف خطية وماتقدم بقى واكف ويرجف 'كام عمي جاسم وصاح بايهم " مالك شغل بخالد خالد مريض
انا احلف عليش تدخل ولدي
ايهم_انت خنزير وحلف كلام الله عندك مثل شربه ماي خالد يحلف لأن جان وياك قبل كم يوم بيت المسؤول وأخاف
تنكر انا شفتك بعيوني الاثنين
جاسم_صايرة دايرة تجسسون عليً
جدي_انجب ولاكلمة جيبوا القرآن الكريم تعال خالد احلف كلام ابوك صدك وكلام فرقد وايهم جذب
تعال جدي لتخاف تعال
وائل_والله إذا طلع كلامهم صدك كتلك على ايدي جاسم يصير
جاسم_مو تايه لايدك ناقص
وائل_ماكو غيرك أنت الناقص والكلب والعار مالتنه
كبت العيطة .... بين أبوي وعمي صاح جدي بيهم وعمي ايهم تخبل خبال راح جاب القرآن الكريم وجر خالد من ايده هو مريض وبي سرطان حميد
بالرأس وجاي يتعالج ...
ايهم_يله احلف خالد
جاسم_لا تحلفه ايهم مريييض
ايهم_تعترف لو يحلف ابنك المريض
جاسم_وانا شعندي واعترف كتلكم مالي دخل مالي دخل
صار يبجي مثل النسوان وتربع بنص المضيف يدك على رأسه خالد يبجي ويرجف من الخوف اباوع
للمكره واضحك
هجرس_دموع التماسيح ماتنفع وياك اليوم خالد تشهد على كلام ابوك صدك
خالد_كلام أبوي جذب عوفني عمي والله مالي دخل
ايهم_بارك الله بيك جاسم صدك رفعت رأسنا اليوم
وماخاب ظنه بيك
هجرس_وهسه شنو ردك ؟
جاسم_جبرني الناقص جبرني
جدي_مال جبرك ماتمشي وياي اليوم اليوم اكسر
وادفنك عايش ياناقص شلون تبيع ابن اخوك الوحيد شلون تريد تقتل ابن اخوك شلووووون
محد تقدم على عمي جاسم غير جدي طيح حظه بالضرب هو يبجي ويتوسل بي يعوفه ويكله والله ردت أعترف عنه واكوللكم ويصيح انا مجبور جبرني
وهددني بس ماساعده يفضحني
جدي_شمصخم أنت
جاسم_اتاجر بالممنوعات
جدي_تسمم بولد العالم والك انت عار وحرامات تبقى عايش
هو كال هيج لو ابتلى على عمره كوه ....جروا من بين ايدين جدي خطية ولده كلمة وحدة ماطلعوا بس يبجون على اصخام رأس أبوهم خالد تخربط
شاله ايهم فوك جتفه وطلع بي للبيت وراه اثنين من اخوانه.
جدي تفل على عمي وكعد راد يتصل بالشيخ مالتهم ماخليته وجريت التلفون من ايده
هجرس_لا تتصل
جدي_رجع التلفون خل اكسر أحوالهم
هجرس_خلني انا اتصرف
وائل_شسوي فرقد
هجرس_من زمان ناوي اكسرهم تكسر وهاي اجت لايدي هسه اريد اسكت حلوك الجلاب بطريقتي مو بالشيوخ العشيرة لان مثل كل مرة يحجون ويرجعون يهددون
بالقتل هذولة ماتمشي وياهم لاشيخ ولاقانون انا
اعرف دواهم شنو بالضبط .
جدي_على شنو ناوي بالضبط
هجرس_اضربهم واهددهم بطريقتي الخاصة
جدي_مو الواحدك أخذ وياك ولد عمامك وسوولهم جره اذان
نفتح باب المضيف دخل عمي ايهم وكال "
ربعي تلاثه بالجهاز المكافحة اجيبهم وياي ونأخذ السبع السبع عدنه وننصب الهم كمين ونكسر أحوالهم
ونسويهم عبرة لمن اعتبر
جدي_لا تورط ولد العالم
ايهم _مسوي وياهم وكفات ولازم يردونهن لي يله جاسم اتصل بيهم هسه وكللهم فرقد باجر بفلان مكان
يطلع وهاي فرصتكم تكتلوا
هجرس _خل نخطط أول
ايهم_رسمت الخطة وخلص انا وربعي نصعد وياك بالسيارة بدون مااحد يدري والربع يطلعون قبلنه بساعة للمكان وهم من يجون راح انطي إشارة والكل تنقض
عليهم
وائل_ليش ماتخبر عليهم
هجرس_اخبر منو هم دولة بذاتها محد راح يطلع عليهم
وائل_ماطلعت
ايهم _كلهم ربع يدخلون مناه يطلعون مناه وكلشي مانستفاد خل نخوفهم ونكسر احلوكهم علمود مرة الثانية
مايتجرأون ويعيدوها
جدي_اياني وياكم تقتلون احد
هجرس_بس تكسر اطمن
جدي_انطيت كلمة ودير بالك تخلف بكلمتك هناك
هجرس_اطمن ماخلف
جدي_هاهية لعد يله أتصل بيهم
جاسم _اخاف يفضحني المسؤول
هجرس_لازم لزمة علية بس اطلعها اخلي يبوس القنادر أتصل
جاسم_ خوب انت ماتعبر عليك سالفة
هجرس_اتصل يله
كوه كام من الكاع وكعد فوك الكرويته متوجع طلع التلفون من جيب الدشداشة واتصل بي يحجي طبيعي ويضحك تفاجات منه ممثل بارع الملعون جدي بقى يفر بيده
جاسم_كتلوا وشمروا علمود يكولون دواعش كتلوا ..اي هو هذا الصح .. اطمن محد يعرف وأنت موتت قلوب دليل لايابة ماكو اي دليل مو كلتلك ماعنده دليل لو عنده
دليل عليك جان قدمه
من كعدوا قبل كم شهر ايي ماعنده اخذها مني فارغ هجرس وبطرك الكلام هههه اي فارغ ... اي شاد حزام ظهره بابوي اي هو بدون وساطة ابوي مايسوى نعال
لاستيك مكطع ههههه
ايي تدري بي كل همي ورث أبوي يرجع اله علمود أخذ حصتي منه انعل ابو فرقد يابو الخلفه هذا بلاء أسود ونزل علينه من يوم للولد بي الله يلعنه شيطان أسود
ايي ههههههه
جرها بضحكة ...طويلة خلاني اكعد على الكرسي خربان من الضحك نهى الاتصال وكال "
جاسم _تمت المهمة
جدي_كرت عينك يابة
جاسم_مجبور
جدي_محد كالك دكلك دكة ناقصة كوم اطلع بره ماريد اشوف وجهك الوسخ كدامي بعد
جاسم_يابة ابوس ايدك ورجلك سامحني
جدي_لو ضاربني لو هايني ولا داك هالدكة الناقصة شلون طاوعك قلبك تنطي بابن اخوك الوحيد وتدري بي كلكم وانتو واولادكم بكف وفرقد والوحدة بكف عندي
والله لو شعره وحدة من شعر راس فرقد توكع بالكاع بسببك احسب نفسك في عداد الأموات جاسم
جاسم_والله اكعد عاقل ولتريده يصير
جدي_اطلع برره
جاسم_يابة بس اسمعني
كام جدي بطوله وصاح بي "
تطلع لو اخليهم يشمروك جنازة بررره لا اعرفك ولا تعرفني من هاي اللحظة متبري منك وعتبرنك ميت
يلللله برررره كلللب بررره ....
كام طلع برره وراه ولده كعدت بصف جدي أهدي بي أخاف تضربه جلطة من وراهم ساعة زمان راح الكل رجعنا للبيت سلي تبجي خايفة وأمي وجديتي خديجة
منهارة منورة أبنها وسوالفة الماتخلص...
مجبنه طاري راح نادبهم كنه راح نكعدهم للحك بعد يومياً ونفضحهم بالعشيرة كلها ...
رحت للغرفة سلي وراي تبجي كسرت قلبي من شفتها منهارة وتشهك مثل الطفل لعايفته امه بنص ناس غربه
تقرب منها وجريتها لحضني
_هويني كدامج مابي شي
_ليش تورط روحك عوفهم يولون
_مامورط هم دخلوني بنصهم كوه وتدرين بي ماسكت إذا احد يريد يأذيني واطمني مراح أواجه راح نسويها
كعدة عشائرية وتفض الشغلة
_والله
_اي حبيبتي يله كافي بجي
بعدت عني مسحت دموعها بصابيعي"
يله ابتسمي
_هي مال ابتسامات من سمعت عمك يريد يقتلك متت من الخوف عليك وكلت هاهية راح اخسره
واعيش بدونه أني وابني
طكتها بعيطة وحضنتني
اففف شلون ورطة وياج سلي .. يابة كلشي مابي ..وشحداهم يوكعون شعره من شعر رمشي بالكاع
... كافي ولج
_بعد ماخليك تطلع من البيت أبد
_شايفتني مره وتخافين اطلع ولج انا زلمة وشحدة أشباه الرجال تندك بي إذا ماسويهم وصلتين
فلا اطلع ابن امي وابوي
_ايي هذا انت ماخذها بحيل صدر عبالك كل العالم مثل عمامك تروح لجدو عليهم وهم يسكتون
هذوله غير عمامك تره
_اعرف هذولة غير لذالك مااخاف
_شنو قصدك ؟
رفعت راسها وتباوعلي مستغربة ودموع تنزل من اعيونها "
الخبث لشايلي عمي جدوع وجاسم اشحده واحد شايله هذولة يكعدون يمج ويحجون يطلعوج انتي المذنبه وهم المظلومين اما ذوليج بطرك التهديد
والكلام وجيتون جيت بدون تفكير أو تخطيط لذالك سهل خداعهم ونيل نهم بسهولة
_تريد تتورط انووووب
_من صخام براسج اسكتي فضحتيني
سديت حلكها بيدي "
اششش كافي شرشبيل هي مال اعياط وصياح كلتلج انا زلمة مو مره علمود أخاف من تهديد لو ناس تريد تكتل انا ضابط وهذا شغلي بنص الخطر وانا والخطر ربع
فهمتي ...
شلت ايدها لو ابتليت كعدت بالكاع تعيط مثل سيفو شلعت قلبي شلع كعدت كدامها واهدي بيها ماكو قافلة ماتطلع من البيت اله جدي يشوف حل الهم ماخليك تطلع
بس تطلع اكتل نفسي ...
_هسه شلون نبقى هيج
_اي مامستعدة اترمل وباجر أربعين ابني يطلع تريد تيتم ابنك على الاربعين فرقد ابوس ايدك رجلك
راسك لا تطلع أبقى بالبيت
والله ماتحمل موتك ...
_لا إله إلا الله كافي يابة مراح اطلع اكابلج واكعد ارتاحيتي هسه
_لاا مارتاح إلا جدي يشوف حل
_حالهم وربطهم بيدي ذولة
_فرررقد بالقران اكتل روحي اكعد راحة
_وهاي كعدت ارتاحت الدودة
_ربي شماخذه أني رجال عديم الاحساس
_هو هذا لحبيتي وتمنيتي تحملي واسكتي يله كافي عياط مو خلصوا ادموعج كومي غسلي دكومي
شكد غثيثة صايرة
جريتها من أيدها وكومتها غسلت وجهها ....ونومتها بحضني غصب عنها هناك وين تذكرت شهم وين ؟ اباوعلها نايمة مثل الطفل جريت ايدي من جوه رأسها بهدوء
وكمت طلعت بره الكل نايمة حرت بزماني شهم ويامن دكيت باب جديتي حلوة ماجاني الرد فتحت الباب وشغلت الضوه جانت نايمة وشهم ماكو عدها رحت لأمي
دكيت الباب اجاني ردها "
تفضل
فتحت الباب ودخلت لكيت مخليه شهم على رجليها وتهز بي شهم عندج
_اي يمة عندي خطية مرتك منهارة وأخذته منها تعال اكعد
_ بالي بقى يمه
_يمي لتخاف تعال اكعد وسولفلي شنو القصة وشراح تسوون وياهم ولا تكلي مثل ماكال جدك تره اني أعرفك ماتسكت وراح تسويلهم كسر جناحات
_قديمة مال كسر جناح اريد اكسر روسهم علمود
مايتجرأون يندكون بي
_كوه كوه تجيب المشاكل لنفسك ملاحظ هل شي ؟
_اي
_فوكاها تكول اي
_تدرين بي ماسكت عن الباطل وهو باطل شلون ترديني اسكت الله يكول ليسكت عن الحق شيطان أخرس
وانا مو شيطان علمود اسكت
_اعرفك دمك حار وهسه
_هسه توصلج أخبارهم الظهر
_ليش شراح تسوون ؟
_المطلوب ديري بالج عليه يمة
عفت امي وطلعت ....عدل للغرفة بدلت وطفيت الضوه ونمت كعدت ويه صلاة الفجر صليت وبدلت واخذت المسدس وطلعت لكيت جدي وأبوي كدامي وصوني
من اطلع من البيت وبفلان منطقة اوكف السيارة ويصير تبادل بيني وبين عمي ايهم هو يصير يسوق وانا ارجع بالكشن الخلفي ويه ربع عمي ايهم
علمود لا يضربون هم ويمشون بالسيارة من يشوفون ايهم يحيرون بزمانهم واحنه نقطهم ...
عقل جدي عقل ضابط مخطط مو عقل مهندس زراعي متقاعد ودعتهم ومشيت طلعت أمي وراي روحهاا مفرفحة تحضن بي وتبجي وتتوسل بي ادير بالي على نفسي
بست راسها وكتلها "
اخذيها مني ارجعلج بطولي مارجعلج بتابوت
انا كلت تابوت لو نهارت بالبجي ... أشرت لابوي يأخذها انا مامتعودة احد يبجي وراي واكره هاي السالفة مال من اطلع كلها تعيط وراي عبالك بعد مراح أرجع الهم .
طلعت بره شفت عمي ايهم وجايب وياي تلاثه من ربعه كلهم صعدوا بالسيارة صعدت بالسيارة وعمي ايهم اتصل بولد عمامي سيارتين طالعين قبلنه وحدة كدامنا
تمشي والثانية ورانه بمسافة والسيارات مو النه ماخذينهن من ربعهم علمود مايعرفونهم ...
حركت السيارة اباوع ... على عمي وربعة ناموا بالسيارة ماكو الهم أثر مشيت مسافة طويلة انتابني شعور هو وراي يمشون باوعت بالمراية الصغيرة فعلاً وراي
سيارة بيكم مسافة طويلة تبعد عني ...
عمي وراي صاروا لازم نبدل
ايهم _اطبك صفحة بسرعة
هجرس_صار
مشيت مسافة وطبكت ......صفحة بسرعة صار التبديل اجه بمكاني عمي ايهم وانا رجعت ليورة
حرك السيارة عمي
ايهم _ ذو الفقار شيل القادفة واطلع
هجرس_انا اطلع الهم انطيني ذوالفقار
ايهم_اكعد أنت خل ذوالفقار يطلع الهم اريد اسويلها مفاجأة
ولكم شالوا اسلاحة واثنين بالبدي طلعوا
اطلع ذو الفقار بسرعة
جرها من ايدي ذو الفقار وطلع الهم عمي ايهم عرض السيارة بنص الطريق عرض وأحنه كلنا طلعنا
وبيدينه الاسلحة...
ايهم _ناقصين تردون تندكونه بينه انزلوا كسروهم
فتحنه بوب السيارة ونزلنه هم تفاجأو وكفو السيارة ونزلوا معينين علينه بالأسلحة ناس معينه على ناس من خلفهم اجتي سيارة تابعة النه ومن كدامهم هم سيارة ثاني
الكل نزل انصدموا صدمه عمرهم من شافوا الأشخاص لحاصرتهم وعرفوا نفسهم جانوا
ناصبيلهم كمين
هجرس_يله الكل ترمي أسلحتها لو اخلي ذو الفقار يفجركم
ذو الفقار_سامعين بي من قبل فجرت بيت عيال أختي ومستعد افجركم بدون مايرف الي جفن عين
يللله اسلحتكم بالكاع
نزلوا اسلحتهم ورفعوا ايديهم ليفوك ماقتربت الهم ولا وسخت ايديه بيهم الربع تكفلوا بيهم وعمي ايهم وبارق ماقصروا بيهم طيحوا حظهم طيح وجتفوهم وخلوهم بالسيارة
ايهم _عدل للمضيف ناخذهم وندز على شيوخهم
هجرس _اي اريد اعريهم كدام العشيرة كلها
ذو الفقار_ بوية لو طالعة طلقة وحدة منهم جان خليت
لحمهم يطاشر ههههه
ايهم_حبيبي وعزيزي ابو الوكفات الصعبة ذلفقوري تعال خل ابوسك هههه امممح
جره وباسه بوسة ام الطكة صعدنا بالسيارات عمي ايهم يسوق وانا بالصدر كعدت يمه اتصلنا بجدي كال بس توصلون المنطقة دكوا عليه علمود انطي علم
للشيوخ خل تجي تستلمهم ...
ذوالفقار _هسه راح يصيرون مضحكة هههه
ايهم _عبالهم احنه ناس خرطي وجبناء مايدرون بينه مخاوين الموت هههههه
ابو سيف_بالموصل لعبنه داعش شناو وجايين علينه ولد الداخلية لماشايفين شنو معنى الحرب
والقتال هههههه
هجرس_شنو ماشايفين القتال عدل كلامك ولك
ايهم_قابل مجذب كاعدين بنص المركز وساكتين وياهو ليشتكي تطلعوله مو مثلنه احنه ولد الذهبية وين ماكو داهية سودة نركض وراها مثل مانركض وره امهاتنا
من جنه جهال صغار ههههه
ذو الفقار _ عمي انا من شفت ايدينهم تنكرط كرط احلى من ايدين مرتي تفلت على روحي هذولة بعمرهم يمكن ماطالعين واجب عمي الضيم كله للذهبية والجيش
انتو الداخلية مرتاحين مو مثلنا بضيم الله كاعدين
هجرس _والله محد كالك قدم على الذهبية
ذو الفقار_ارجال احنه ونحب المخاطر
هجرس_جا لعد احنه نسوان اشو حالنه من حالكم هم عدنه واجبات ومهمات صعبة وخطرة هو صح حياتكم اصعب من حياته بس كلمن واختصاصة وهذا اختصاصكم
انتو بنص المخاطر عايشين ...
ايهم_شحلاتها من تطك الهاونات والمدافع ههههه
هجرس _انتو عاشقين للذهبية بعد عليش تحجون
علينه احنه الداخلية
ابو سيف_مرتاحين عمي مرتاحين انتو شغلكم الورقة والقلم وهنا وهنا تفرفرون بسياراتكم
شعدكم شغل عمل
ايهم_بس تدريباتنه تكفي وتوفي
هجرس_والمطلوب هسه شنو احول عليكم واجرب ضيمكم
ايهم _ايي تعال عليك الله
هجرس_علمود جدي يسويني وصلتين ههههه
كضينه الطريق ضحك ......وشقا وانا ادري بيهم موقصدهم يحجون علينه احنه الداخلية يحجون ويضحكون هذوله هم روحهم رياضية ومرحين ويحبون يشاقون
بس دخلنه المنطقة اتصلنا بجدي ....
وصلنا للمضيف نزلوهم أربع تهم مربطين عدل للمضيف جدي يباوع عليهم ومتعصب اعيونه برأسه صايرة عمي جاسم اجه ويه عمامي جدي طرده وكاله بس تصعد فوك
درج الطرمة ارميك عدل لبيتك ولا توريني
شكولاتك القذرة بعد
عمي جدوع بايك طن هوى ....يباوع عليهم شلون مذلولين ويرجع يباوع لربع عمي ايهم شلون يضحكون عليهم وقلبهم ميت اصحاب عمي ايهم
وذو الفقار مخبل ايده والتفجير امر من عمي ايهم قبل فترة تعاركوا ويه أخته رجلها وامه وضربوها وحبسوها بالحمام يوميا من عرف بيهم
هيج مسوين بأخته راحلهم هداه مالكه احد بالبيت فجر البيت وطلع وهسه حالف بس يشوف زوج أخته الا يكتله هو وامه وهسه مالهم حس ولا خبر محد
يعرف وين رايحين وأخته طلكها منه .
ساعتين ماكو المضيف انترس .... عالم واهل الضباط والولد لوياهم اجوي المسؤول ماله طك لا اتصل ولا اجه وشيوخنا كلها اجت صارت عركة من عركة بالمضيف
شيخ العشيرة مالتنه طلب ٥٠٠ مليون فصل ذوليج ماعدهم يدفعون جدي مايريد فلوس بس يريد يعلمهم
شلون يندكون بينه.
مافضت السالفة أبد اخذوا ولدهم وطلعوا شيوخنا كالوا لازم نأخذ فصل منهم هاي محاولة قتل متعمدة ويردون يكتلون زلمة من عدنه علمود ماتنازل عن إرهابي نكس
ماكو تنازل مايدفعون فصل راح نأخذ بثارنه واحنه مانجوز من المسؤول وين مانلكاه نكتله نكتله احسله خل يكعد ويواجه الكل ولما واجه نطلعه من جوه
الكاع ونسوي عبره لغيره ...
وصلوا هذا الكلام اله بيد شيوخهم كملت الكعدة كمت رجعت للبيت أضحك سلي تباوعلي من الصالة وتبجي اقتربت عليها عافتني ودخلت للغرفة زعلانة
سلمت على جداتي التلاثة وامي ... ومرت أبوي ونزلت بوست شهم وكمت رحت عليها كعدت أراضيها ماتقبل ترضى شلون غشمرتني وطلعت بدون ماتكلي وماتودعني لو
قاتليك جان شحجيت وشكلت ....
شكد حاولت قنعها ماقنعت زعلانة وبالليل نفس الشي صارت كعدة بالمضيف وكلها اشيوخ جدي طلب المسؤول يجي ولما اجه ينهدر دمه بين العشائر وين مانلكاه نكتله
احسله خل يطلع نفسه مو خاتل مثل النسوان
والله مانجوز منه ...
الشيوخ هم كالوا نتصل بي مايرد خل نحل المشكلة وندفع الفصل وخلص...
جدي_وانا عايز فصلكم انا اريد المسؤول كدامي ولما طلع المسؤول تصير ثارات بين العشيرتين طلعوا المسؤول لو اروح اشتكي عليه يم وزير الداخلية هو وضباطه
انطيكم مهلة مناه ... الثلاثاء لما طلع انا بيدي اشتكي عليه وعلى الضباطه وانزلهم لاسفل السافلين
احسللكم طلعوه ...
هجرس_ عدكم مهلة يومياً غير هاليومين ماعدكم
الشيخ _يصير خير
خلوا وكاموا مروا اليوميا ونفس الشي المسؤول ماكو والشيوخ تطلب مانشتكي يم وزير الداخلية عليهم ماسمعت منهم اخذت جدي وعمي ايهم وربعة ورحت اشتكيت
عليهم يم وزير الداخلية .
هسه طينتهم طين وراحت كل الرتب العسكرية وراح ينحبسون وياخذون عقوبات صارمة .
رجعنا للبيت ماكو ساعة والشيوخ عشيرتهم كلها عدنه وجانوا يحجون عليه كالوا شارد خارج العراق صارلة أيام ومناك ينطي توجيهات للضباط ورط الزلم وشرد ..
هجرس_وين يشرد يطلعون من جوه الكاع يطلعونه يوم يومياً تلاث أربعة تجيبه الاستخبارات
جدي ماخذ فصل ... من الضباط والولد وياهم كال الحكومة تاخذلي حقي منهم رادوا نتنازل ماتنازلت وكلت ماحليتوها عشائرين نحلها بالقانون واحنه زلم قانون
ونأخذ حقنا بالقانون .
انشالوا الضباط اثنينهم والولد .....الوياهم شراح يخلصهم تطينوا وكعدوا وانا قدمت أدلة قاطع عليهم مرت عشرة أيام وعلاقتي ويه سلي مخربطة أوضاعها
بعدها زعلانة وتلح عليه أترك شغلي تعاركت وياها "
_اترك الشرطة واقدم على الذهبية يم ايهم علمود ترتاحين مني وكل ١٥ يوم يله تشوفين جهرتي
طلعت وطبكت الباب قوي وراي محد .... يراعي مشاعري كلها تكلي أنت جبت المشاكل لايدك ليش مايكولون
هم قذرين ويدورون مشاكل ...
شهر كامل مر ونفس الحال نفس الشي علاقتنه مامقترب منها أبد هي تنام بجهة من الجرباية وانا بجهة تدري بي عناد واكره ليعاندي ويكعد يرزل بي انا أعرف الطريق
الماشي بي صح وراح اتوفق من الله ...
ثاني يوم الصبح كعدت اباوعلها نايمة .. وشهم هم نايم قتربت عليها اباوعلها بحسرة وشوق مشتاقلها كلش بدون وعي بستها بشفايفها جانت النية بوسة سريعة وافلت مثل كل مرة
بس هالمرة عمقت بالبوسة من كثر مامشتاقلها .
ماحسيت عليها غير تدفع بي وتون بين شفايفي صارت تضرب بي لزمت ايديها اثنينهن وبقيت ابوس بيها بعدت عنها صارت تكح بصوت عالي خنكتها خنك
_يمة شكد مشتاقلك شرشبيل
_خنكتني واخرر عني
_غير احبج ابوسج بوسات تكطع النفس
_هسه صرت تحبني صارلك شهر ماتحجي وياي واخررر
_غير انتي تجين تراضيني
_هاي العايزة اراضيك فوك مانت الغلطان
_اي تعال ورضيني واكعدي تدليعلي مو هاملتني هي الهملة وماصدكتي تزاعلنه علمود تبعدين عني
_ عكس صارت
_مو كل مرة اكعد واراضيج صار لو نزلتني نفسج وراضيتيني
_كل مرة اني أتنازل وهالمرة ماتنازل لو منو يجي واخرر
_بكيفج اوخر
_اي اااه ايديه كسرتهم ولك واخرر
_خل اخنكج انوب بوسه تنكطع النفس من صدك ههه
_لاااا واخر شبيك والله تعبانة
_سلي ضميني ويطيح التعب كله أعلى متني
_انوب صار شاعر المزنجر واخر دا اكولك واخر شبيك
_والله اصيرلج شهد الشمري وأبقى اشعرلج الليل والنهار شتردين لعد شرشبيل
_اريدك توخر وبس
_خايبه هو العمر مرة دخليني اكضي وياج
_ممم هسه صار العمر مرة وتحب تكضي وياي لو تحب تكضي عمرك وياي ماتزعلني وجان راضيتني مو صارلك شهر كامل عازل فراشك عني وماتقترب
_لاوالله كل يوم احضنج وابوسج وانام وياج بس تكعدين اشرد وأنتي مو كل يوم بالليل تبوسين بي وتشردين
من احس هم كولي جذب
_حرامي من يوم يومك تبوس بي بوكتي واخررر
_لعد وأنتي موحرامي
_لا
_لاخطية أبد موحرامي تذكرين البارحة بستيني بشفايفي من حسيت فلتي هم كولي جذب
_لاا جذاب أبد
_هاي الجنية مو أنتي
_اي مو أني
_اويلي ياية شلون جنية حلوة بس من ودك تاكل
بشفايفها إلي تنكطع عسل
_راح اضربك
_خايبه اضربي منو لازمج المهم عندي ابوش
_مااانطيك ابو المشاكل
قتربت عليها ضمت شفايفها بحلكها ماتخليني ابوسها ...
هيج صارت
هزت راسها عود ايي "
_بسيطة بطن عيني اكو هواي اماكن تستحق البوس
صرت ابوس باركبتها وصدرها هي .... تخبلت صارت تعيط وتصرخ وتريد تعضني تفاجأت من رد فعلها العنيفة رفعت راسي اباوعلها مستغرب...
_من خبال الخبلج شبيج انكرصتي تره رجلج
رجلج وعادي اقتربلج
_لا موعادي
_انجبي وكافي زعل وعناد
_لازعل ولا عناد ايدي شبيك راح يتكسرون تره مرتك مو عدوتك كدامك لازمني هالزمة وتتحرش بي
بهاي الطريقة المقرفة
_صارت تحرش
_اي لعد شنو هاي لازم ايديه وصاعد فوكي وتبوس غصب عني وياريت بطريقة حلوة بطريقة محلوة وتلعب النفس بعد فرقد احسلك تره تصير موزينة
_خل تصير موزينة
_ليش عناد
_اعشقج شرشبيل
_اهووو ولك واخر
عفت أيديها ونمت بصفها جريتها لحضني حضنتها كل قوتي
ادري الله خالقج حلوة ونطاج ضحكه حلوة ليش تخربين كل
هذا الجمال بالعناد والنكد ليش ؟
_من وراك
_من وراي صدك شرشبيل
_اي تضرب وترجع تداوي
_هو هذا الصح
_وين الصح اشوف كله أخطاء
_انجبي ماتعرفين تحجين يله اسكتي مالي خلك اتعارك وياج
_بس الك خلك تبوس
_هو وينه البوس إذا أنتي عالنة الاحداد ومسويه
روحج ميته بصفي
_كافي
_لاموكافي
_ختنكت
_وخنكتهم اختنكي
_راح امووت
_وموتتهم موتي
_هجيرس عوفني
_شرشبيل ماعوفك لو تنطبق السماء على الأرض احسلك اكعد عاقل وانجب وبادلني الحضن وخلني احس بوجودك صارلي اشهر مفوط منك ليش هيج أناني وماتحس
_خلي الإحساس الك أبو الاحساس
_كلي أحاسيس بس للاسف أخذت مره جافة
وماعدها رومنسية ابد
_انوب يدور رومنسية
_ادري مزوج عمي ايهم ومنومه بصفي لحظة عمي ايهم رومنسي عمي جدوع يطك الجلب بالعميدة
مثلج طبق الأصل
_لا تشبهني بهذا الخبيييث
_لعد اكعدي عاقله ومصيري رومنسية
_لا تحلم
_خلص لعد راح أتزوج الثالثة بلكت تطلع رومنسية وتدلعني فرقودي فرقدي قلبي قلوبي وتكعد تتغزل بي وتحبني مو مثلج مزنجرة ومطنكرة
دفعتها وكعدت انكرصت كرص"
تزوج فوكي هجرس
_اي
_فوكاها تكول اي
_لعد شسويلج مزوج زلمة مو مره انا رجال واريد مره تهتم بي وتداريني وأنتي ماتردين تتغيرين وتصيرين رومنسية وتلبسيلي ملابس حلوة ومغرية
_واني شفت من اول ليلة خليت شهم بطني وشفت انجوم الظهر بالحبالة جبته ماجبته طلعتلي بسالفة شكل وهبطتني هبط توه طلع الاربعين جريتلك زعله شهر كامل
الصوج بيك مو بي والله
_هيج صارت
_اي أنت زعلت عمدن لان تريد تطك الثالثة بس لاتحلم اخليك تزوج بالقرآن الكريم اذبحك أنت ونايم
بس اسمع تريد تزوج
_تذبحين منو شرشبيل
_اذبحك هجيرس أنت لي وحدي واللي تشاركني بيك اشركها نصين افتهمت لو لا
_لا مافهمت
_غصب عنك افهمك تعال خل اربيك الظاهر محد مربيك من أهلك وحاليتلك تزوج اثنين نسوان
مثل أبوك وجدك مووو
_اي حلوة مال اثنين نسوان
_اليوم اسويك اثنين من صدك
تفاجأت بيها من جيتت فوكي تضرب بي من كل عقلها انطيتها كامل الحرية خربان عليها ضحك تضرب بي
وتبجي وانا اضحك عليها
_هاي وين رهمتيها شرشبيل تضربين وتبجين هههه
_ادعي الله تموت وماتزوج غيري
_بربوك بيش طالبتني
_عليمن بربوك ولك
_ااااخخ شلتي صفحتي شيل اااخ اففففف
كامت من فوكي تمسح بدموعها ضربتني ضربه على صفحتي شلتني شل خلتني الوب من الوجع ...
_حيل وابو زايد بيك
_خرر.. بيج ولج انتي شنو شلون تضربيني هيج ااخ راح اموت
_موووت
_صدك ولج ترديني اموت
_ايي تموت وماتاخذ غيري
_مخبله مالومج
_اذبحك وغلات شهم عندي اياني وياك تكرر هاي الكلمة مال أتزوج الثالثة افتهمت لو لاااا
_صيري خوش ابطل ماتصيرن ادخلها الج مفاجأة
_علمود بلحظتها تجيك الطلقة بنص راسك ورأسها
_هاا
_اي والله اكتلك واكتلها واحني ايديه بدمكم
_جهزي نفسج باجر احجزلج يم دكتور نفسي خل يعالجج
_عالج نفسك يله تعالجني ابو النسوان ماتكفي
وحدة الا اثنين هجرس افندي
_هاي وين مولية
_اسوي سم وزهر لي والك بلكت الله نموت سويه
_من خبال الخبلج
_ويخبلك وياي ابو ثلاث نسوان
كامت طلعت وطبكت الباب قوي وراها فز شهم وصار يعيط نزلت لازم صفحتي واهز بالكاروك اريد يرجع
ينام هو تنكرص كرص
_شدعي عليك شرشبيل المخبل تعال بابا تعال هاي امك مخبله فزززتك من نومتك الحلوة
شلته وطلعت ...بي بره الغرفة شلته وخليته بحجر مرت أبوي تهدي بي كمت وكفت باب المطبخ اشوفها هي
وفطومة يسوون ريوك
هجرس_كملتي السم والزهر لو بعدج
سلي_ماسويلك
هجرس_سالمين شبيك اليوم كالبها
سلي_اطلع فرقد
هجرس _شلون راح تخليني اتعصب عليها واشيلها واشمرها من فوك الحايط على اهلها واروح اجيب الثالثة
شالت السجينة لي تخزر بي "
وشلون اخليها تركص على اركبتك وركبتها
يله اطلع برره
هجرس_ام دودة
سلي_تقبل اعوفك واتزوج غيرك
هجرس_علمود املص اركبتج واركبته
سلي _ابو دودة مالومك يله بره اطلع موزين عليك
دخان عندك تحسس
هجرس_ديري بالج تعيديها
سلي_كولها لنفسك
هجرس_تهددين
سلي_اي
هجرس _خوش صايرة تهددين بدون ماتخافين
سلي_تعلومك
هجرس_تعلومي
فطومة_لعد حلال عليك تريد تزوج فوكها شناقصها اريد ايد رجال اشو تخبل وجنها لعابة وجابتلك ولد يخبل
تطلب الله بطلابة بعد فرقد
هجرس_ماشاءالله صايريدج دفاع قوي
سلي_عيطة وحدة مني كل اهلك ياكلوك ويرموك بره
هجرس_اممم
دخلت أمي "
اطلع يمة راح تختنك ماتشوف الدخان شغلي
الساحبة فطومة
فطومة _مشتغلة
طلعت بدون كلام خليت وكعدت بصف جدي جابت الريوك وطلعت تتريك بالمطبخ ويه فطومة كملت ريوك ورحت دخلت بالمطبخ كاعدات ياكلن ويضحكن
هجرس_كومي طلعيلي ملابسي اريد التحق
سلي_لحظة
هجرس_بسرعة
طلعت بعدني ماداخل للغرفة صارت وراي "
شكو اليوم تطلب مني ملابسك كل
يوم مو تطلعهن بنفسك
_من اليوم عليج بعد
_افتح الباب
_تعاي أنتي افتحي
_موخدامة جواك افتحلك الباب افتحه بنفسك
انداريت عليها اخزر بيها تباوعلي بهدم إهتمام...
سلسبيل
_مو تريد تزوج عليش جاي علية وتشرط
_ليش تخليني اهين كرامتج
_نهانت قبل الزواج وبعد الزواج لا تحلم تنهان
_هاا جاي تأخذين بحيفج
_لا
_اي مو لا تدرين بي شلون خبال شايل لا تخليني اتخبل عليج واشيلج واشمرج لامج
_وامي ماتصدك تشيلني وتمشرني على دلشاد
هي جابت طاري فريخ البط لو عقلي طار بسرعة جريتها من ايدها وفتحت الباب دخلتها للغرفة طبكت الباب قوي وايدي مجلبه بيدها كل قوتي من ودي اكسرها الها .
_انا شكلت سلسبيل
_ااه ايدي عوفها
جريتها كل قوتي لعندي لزمتها من اكتوفها قوي بأثنين ايديه"
انهيج بلحظة وحدة سلسبيل
_هاي شبيك
_لا تشوفيني أضحك وياج وساكتلج عبالج هاهية دستي على رأسي بعدج ماتعرفين منو هجرس وشيكدر يسوي بيج احسلج اكعدي عاقلة وسدي حلكج
وطاري فريخ البط ماريده يمر على لسانج
_والله اشاقه وياك
_اليوم نعادت باجر ماتنعاد وأن نعادت ماتلومين الا نفسج
_والله ماعيدها
_يله كدامي طلعي ملابسي
عفتها راحت بسرعة طلعت ملابسي وخلتهن فوك الجرباية باوعت للزي ماعجبني "
_طلعي الزيتوني
_صار
راحت بسرعة غيرته رفعته لي "
هذا
_اي خلي هنا
_تريد شي بعد
_روحي اكعدي كدامي من اريد شي اكلج
_صار
راحت كعدت كدامي ... تباوعلي بهدوء بدلت وكعدت لبست الحذاء وكمت توجهت عليها جانت كاعدة كدام الميز رادت تكوم اشرتلها تبقى كاعدة
_ابقي كاعدة
ماردت شلت المشط وصرت امشط بشعري.... نزلته واخذت مشط صغير مشطت شواري باوعلها بالمراية تبتسم بخفه رفعت الها تك حاجب ضحكت وكالت
_حلو تره مايحتاج تعدل
_اعوذ بالله من اعيونج الحول
_خلف الله عليك اعيوني حول
_اي
_اكوم
_لا
_تعبت
_عادي
_هاي شنو
_ولاكلمة
_ماا
_راح افتح دهن الشعر وجبه فوك راسج
_هاي شبيك
_مزاجي تعكر من وراج
_من وراي مو من وراك
_اسكتي
نزلت المشط واخذت العطر ارش على نفسي تباوعلي وتضحك نداريت عليها رشيت عطر بنص وجهها ...
_لمن توزعين ابتسامات شرشبيل
_اااه عميت اعيوني
_علمود ماتشوف غيري
_شبيك تخبلت اااه
_من وراج
نزلت العطر فوك الميز ورجعت انداريت عليها تفرح بعيونها بألم ابتسمت هذا عقاب الها على ءكرها لفريخ البط دلشاد تدري بي اكره واموت منه ومتحلف بي
_سلي فريخ البط رجع للعراق
_شمدريني بي ااه اعيوني احتركوا
_كلشي مابيج
_والقران احتركوا
_هسه اخذج للحمام اغسلهن الج انطيني ايدج ابنيتي
فتحت اعيونها حمرة دم تخزر بي "
تجرح وتريد تداوي
_مثلج
_شسويه أني
_تجرحين بي وانا كايلج من قبل ماتحمل كلمة تجرحني
_واني شكلت وانجرحت
_ذكرتي فريخ البط
_انعل ابو يابو الخلفوه اعيوني اااه
_كومي غسلي
_راح تجيب آخرتي على ايدك
_امين امين
_فوكاها تدعي
_ماتفرحين تموتين على ايد حبيب القلب
_ساعة السودة لحبيتك بيها ادري شفت بيك وحبيتك
_شفتي اعيوني الحلوات وشفتي ملوحة وجهي وطولي وصرتي ماتندلين دربج ونعمت اعيونج
الحول عمي بي
_عليمن
_اكو غيرج بالغرفة
_الا اعوفك واطلع ل...
_وين ترحين زعلانة يم اهلي اجيبج بس اطفر الحايط اخليج فوك جتفي واردج وين ماترحين
اردج شرشبيل
_من ماتكدر تعيش بدوني ليش تشلع بقلبي
_مو احبج
_وتحبني تشلع قلبي
_اي والله
_الله يأخذني ويخلصني منك
_ولا يهمج اورط نفسي وخل يكتلوني والحكج بالجنة
_هااي شنووو
_صوتج ام شهم
_ساعة السودة ساعة السودة
_مافهمنه على شنو
_لحبيتك بيها وعفت كل الزلم ولفيت عليك
_عمي هي كوه عندي جاذبية عالية خلتجن تتعاركن علية أنتن والجنية سل بس القوية بيجن وفازت بي أنتي
شرشبيل عمي شرشبيل قوي هههه
_هسه غسلت ايديه منك بالماي والصابون والزاهي والتايت والقاصر انت شاخط وشايف نفسك شوفه
_شاخط ومخبل وبي جن وكل الصفات الموحلوة بي حبيتيني وهسه بس اكول اعوفج وادور غيرج تتخبلين
ومستعدة تسوين جريمة
_الله يأخذني
_شله بيج الله
_ليش هيج
_لان حبيتيني بقلب نظيف وتمنيتيني من كل قلبج
_هيج تعاملني
_من حرصي عليج هيج عاملج
_هذا مو حرص هذا انتقام
_هن الاثنين سويه اندمجوا
_شمسويتلك
_تعاندين وتشلعين بقلبي شلع وانا ماتحمل احد يعاند ويشلع قلبي شمحلاج جنتي اول أيام عرسنا من حبلتي لليوم
صرتي سم وزهر وماتنبلعين أبد
_حالتي النفسية تخربطت من حبلت ومن شفتك ورطت نفسك ويه عالم ماتخاف الله تخبلت بالزايد احجي وياك ماتسمع مني وتحجي بكل برود برغم الخطر
لصاير وياك عندك صفة اكرهها
_وشني هي ؟
_عديم الامبالا
_والمطلوب
_غيرها
_اكثر صفة بي أعشقها ترديني اموتها غير يموت هجرس بي
_لعد حلوة ...
_اسكتي كافي بجي وكلام راح أتأخر منورة كلامج الفارغ مابي كلمة حلوة وتشفي القلب أنتي تعرفيني من صغري وهذا انا مامتغير أبد بس كبرت وصرت احلى من قبل
وصرت اعجبج أكثر المهم تشكريني مو تعذبيني
_على شنو اشكرك؟!
_بادلتج نفس الحب وأكثر وحبلتج بولد شمحلاته و يشبهج
_مخبل مالومك
_بيك شرشبيل
قتربت منها جتفت ايديها ....وانطتني ظهرها حضنتها حيل وبستها بركبتها رفعت رأسي اباوعلها مطنكره
_مانصالح
_لاا
_شلون نبقى مزاعلين ومانسوي اخو الشهم
_تدور جهال
_شحلات جهالي وأنتي أمهم
_لاتحلم اسوي طفل ثاني مخبله اسوي شهم شوفني انجوم الظهر بالحبالة والكل وياي ومتكدرله انوب
تدور جاهل ثاني
_كل سنة نسوي واحد
_شنوووو
_اسويهم ١٢ واحد
_شعندي يمة دجاجة وناملك على ١٢ بيضة وافكسلك فريخات
_فديت دجاجتي وفريخاتي
_واخرر
_ليش هيج مخبلة وتشلعين قلبي
_تذكر شكد شلعت قلبي
_موكلت جاي تاخذين بحيفج
_شنو شعورك
_محلو
_شعوري جان هيج وأكثر اكعد اباوعلك بحسرة وأنت هاملني وتهيني وترزل بي برغم كل الي سويته بي بقيت أحبك وانتظرك تباوعلي بنفس الشعور
_مو باوعتلج
_بعد ماطيحت حظي
_انا هم طاح حظي ونهانت كرامتي بختياري الخطأ على أقل أنتي ختاريتي الصح وبقيتي تحاربين علمود تأخذي مو مثلي ختاريت الخطأ وحاربت وبنص المعركة
خانتني وعافتني وخلت ايدها بيد غيري .
_ختولي لا تذكرها
_هو أنتي كوه تذكريني بيها وتفتحين جروح
_ ولايهمك هسه اجيب الابره والخيط واكعد واخيطهن الك
_وره ساعة تفتحينهن شل فايدة
_انجب غير أحبك
_عليمن انجب ولج
_والله زلة لسان صارت لا تضرب عليك الله
_هل مرة سماح الج المرة الجاي ماكو سماح عوبة ام لسان الطويل من ياخذها الحماس تصير
تغلط وتجفص بالبطن
عفتها ومشيت "
وين رايح
_لدوام وين
_زعلت
_هو احنه مو مزاعلين
_ انتظر هسه اراضيك والله
_ماريد
_بس أني اريد
_عود من أرجع من الدوام راضيني بلي يرضيني
فتحت الباب وطلعت أضحك عليها ....عقلها عقل طفلة ولاجن جبيرة وعدها طفل رحت للدوام هوسة ولعبان نفس حسدوني عمي ايهم وربعة من كالولي كلشي ماعدكم
وتعالوا شوفوا الشغل فوك من الرأس صاير ومداهمات عدنه مره مشتكيه على طليقها خاطف ابنها لعمره ٣ سنوات من باب البيت أهلها وتكول كالي الا احرك قلبج بي
وتبجي وتكول والله قتل ابني قتل ابني ...
تحجيها بكلب محروك حرك تذكر سيفو بعمره جان وتذكرت معزة شهم عندي صعبة كلش ام تفقد ضناها عاد كملت كل الإجراءات اللازمة وطلعنا على ابو الطفل
فتح الباب وطلع النه .... عادي سلم وكال ماعندي شي وياها وماخاطف الطفل هي تجذب عليكم وجاي تفتري علية هذا البيت فتشوا إذا لكيتوا اي دليل
اعتقلوني
هجرس_بكلا الحالتين معتق ليك فتشوا المكان
كلبشوا ايديه العناصر دخلت وياهم للبيت شفت مرته الجديدة كاعدة فوك الجرباية شامره الشال شمر وتبتسم بكل صلافة صدك كرهتها وكرهت هيج نوع من النسوان
قليلات أدب واخلاق فتشوا الغرفة مالكوا شي البيت كله بره كلشي مالكوا تونه ردنه نطلع حساس قوي انتابني قاتله ومخلي بالمجمدة هو ومرته
هجرس _تعال وراي
ذياب_وين؟
هجرس_فتشتوا المجمدة
احد عناصر الشرطة"
لقيت نظره عليها مابيها شي
هجرس_نظره شنو تعال ذياب وياي فتشها
ماخليت العناصر تفتش انا وذياب فتحتها شفها مخربطة تخربط وكلها اكياس سوده وبطاله بامية مجمدة شامرينهن بشكل عشوائي شلون يردون
يضيعون شي شلت الابطالة انا وذياب ..... وكمت اشمر بيهم الصدمة الي اكياس بكمية جبيرة جانوا موجودين
طلعت أحد الاكياس
هجرس_انطوني كفوف
ابو الطفل_ هذا لحم
هجرس _هذا لحم ابنك ياناقص
ذياب_شنو ؟!
هجرس_باع كميات الاكياس الموجودة وخربطة الثلاجة تدل على وجود جثة الطفل مقطعة داخل الأكياس
انطوني الكفوف لبستهن ... فتحت الكيس والصدمة لي ايدين طفل صغير مكطعات داخل الكيس بقيت مصدوم من المظهر صايرين مثل بالفلام الأجنبية يقتلون
أطفالهم ويقطعونهم ادري شنو من بشر أنت شلون تقتل ضناك
كمتله ردت اشيله واخلي بالمجمدة فوك لحم ابنه ماخلوني وجروني منه تخبلت خبال
من شفت المشهد المرعب والمروع اب يقتل ابنه ويقطعه علمود يحرك قلب امه اكو عالم تتحسر على الأطفال وانا من ضمنهم جنت من تزوجت حنين ماكو أطفال
جنت اشبع قهر من أشوف بارق ولد عمامي عدهم أطفال وانا لا حيلي كله صار يرجف مرته هم تم اعتقالها هي وياه شريكة بالجريمة طلعت اثنينهم قاتلي ومقطعي
علمود يتخلصون من أثر الجثة عن ...... طريق رمي الأكياس للحيوانات بالبزول ويخفون أثر الجريمة بالكامل صارت هوسة من هوسة وام الطفل عرفت تخبلت
ونهارت خطية من سمعت قاتل ابنه ومقطعه ومخلي بالمجمدة داخل أكياس شكد مارة علية قضاية مثل هل قضيمة تأثرت بيها بشكل مو طبيعي طفل عمره ٣ سنوات يقتله
والده علمود ينتقم من طليقته ...
ياسر_الصوج منها هي عوبة شلون تتيه الطفل يلعب كدام الشارع اكرصي ابنج وانجبي داخل البيت جم مرة حذرنا وكلنه لا تخلون الاطفال تلعب بره بالشارع او بالباب الدنيا مو أمان يريد يلعب بره ابو امه اخته عمته خالته توكف وياه ليش هالاهمال ياربي ليش ...
هجرس_هواي جاي لاحظ هذا الشي الاطفال مسربته بالشوارع وامهاتهم ماكو وياهم ومن يختفون تعالوا لكوهم النه ويكتلك القهر مانلكاهم عايشين نلكاهم
مكتلين ومكطعين لو مغتصبين
ياسر_اي والله دنيانا مو أمان أبد
هجرس_والله لليوم مامخلي طفل من أطفال ولد عمامي الصغار تطلع بره تلعب خوب احنه منطقة ريفيه وكلنه ولد عمام ماكو احد غريب بينه
امشي واحذر بيهم اطفالكم اطفالكم عينكم عليهم والكل ماخذ بنصيحتي بس هالعالم تنصح بيها عبالك مايسمعون وماخذينها بستهزاء عبالهم الدنيا بعدها بخير الله مايدرون صارت دنيانا موحشة والاب والام والاخت
والاخ يتقمس بدم الآخر...
ياسر_طبهم مرض علينه نسوي احنه شنسويلهم هذا الإهمال ينتج من الأهل
هجرس_ايي
ياسر _هواي متأثر
هجرس_غير انصدمت من شفت ايد صغيرة مجمدة
ياسر_يمممة الله لاينطي الله لايوفقة هذا خل يسلمونه بيدي والله اكطعه تكطع وجمدة هو وعايش علمود
يحس بشعور الطفل شنو جان
هجرس_لو بمكان القاضي انا رأسن انطي عدام من اول جلسة
وعدامه يكول تقطيع هو وعايش واشمره
بالمجمدة لما ينتهي ويموت
ياسر _اي والله هذا دواه ودوه كل شخص مثله
تكسرت تكسر لما انتهى .... الدوام ورجعت للبيت منتهي من التعب تلكتني سلي مبتسمه ...سلمت عليها ودخلت
للغرفة دخلت وراي
_متغدي
_الحمدالله
_اخاف جوعان
_لا
_مو على بعضك أخاف زعلان مني
_لا
_لعد شبيك
_تعبان
_بي ولابيك
باوعتلها بطرف عيني "
شبيك تباوعلي هيج
_منو يدعي علية الصبح
_ من حركة قلبي
_وقلبج من يحترك تدعين علية
_ايي اريدك بس لي وماريدك لغيري
_اي الج بس لا تدعين
_وليسمع الله يستجاب دعائي من اول كلمة
_محتمل تكون ساعة مستجابة
_هاا
_اي والاسلام ينهي الدعاء على الأبناء وقت العصبية لان من المحتمل تكون ساعة مستجابة
_والله بعد ماعيدها ابد ابد
_وياريت كلامج صدك
_صدك
_دتعال فتحي دكم البدلة مابي حيل
_شكد تعبتك لعد من سودة بكصتي
_شكلنه شرشبيل
_زلة
اجت لعندي فتحت دكم البدلة ونزعتها لي ...
يله وراي للحمام
_توني سبحت
_وانا كايلج اسبحي تعاي سبحيني مابي حيل
_ههه يله فوت لما اطلعلك ملابس
فتت للحمام ثواني ولحكتني ردت تتحرش بيها بس تعوذت الشيطان خليها مالي خلك هسه كملت سبح طلعت بدلت وكعدت فوك الجرباية طلبت شهم
مشتاقله راحت جابته لي اخذته وخلينه فوك صدري العب وياه أقل زلة يصير يضحك مثل أمه يضحك للهوى اندك الباب اسمع صوت سيفو .. فقع الباب تهوم ...
هجرس_ههههه افتحي الباب يريد تهوم
سلي_جاية معشوقي جاية هههه
فتحتله الباب دخل بسرعة ركض صعدلي لجرباية يبوس بي ..
فقع ابوش
_رحمه لاهلك هو انت جيتت تبوس بي وتطلب البوس هههه
سيفو_ تهوم
هجرس_شبي تهوم
سيفو_عنوني
هجرس_وانت ببو
سيفو_اي ببو هو عنوني
هجرس_اي شعندك ساكنه اليل والنهار روح لاهلك
سيفو _مالوح
هجرس_ليش ماتلوح
سيفو_تتومة علاوي جدو جدة تلي فقع تهوم
هجرس _ماتكدر تتيهنه
سيفو_اي ابوش تهوم
هجرس_اي بوشه
صار يبوس بي الحلو بي سيفو ....مايقترب ويضرب شهم أبد يحبه ويموت عليه شبعنه لعب ويه شهم ونام من كيفه وسيفو هم نام بحضني عفته نايم بحضني
وسلي راحت انطت... خبر الهم سيفو عدنه نايم اخاف ينشغل بالهم عليه طفت الضوه واجت نامت على ايدي وأيدي
الثانية نايم عليها سيفو
_اسفة
_بعد وكت تتأسفي
_مو انت تعاركت وياي
_والله كيوت وحباب انا بس انتي بسلامتج مخبله وشاخطة واقل زلو تكبين هاي الكبة البيج بطليها
_ايي
_وجعيي نامي
_مو كوه تتحرش بي
_وين متحرش بيج ايد سيفو نايم عليها وهاي الج
_خل انام احسلي
_اي نامي شرشبيل
العصر طلعت من الغرفة توجهت لبيت عمي ايهم بارق اجه يركض فرحان ماعرف شبي دخل علينه
جفت وكال بصياح
بارق_الف مبروك المسؤول منتحر ههههه
ايهم _انجب شنو منتحر احجي عدل
بارق _والله العظيم شيخهم أتصل بجدي هسه وكاله لاكينه شانق نفسه بالشقة بيروت
ايهم_والله
بارق_صارلي ساعة احجي عربي لو فرنسي جاي اكول شانق روحه شانق روحه وميت حرامات مات وماخذته الحكومة ولا احنه اخذته حقنه منه
هجرس_اخذنه حقنه وخلص
بارق_وين اخذنه ؟
هجرس_انا اكول اخذنه حقنه مربع يله سدوا موضوعه
ايهم_قصده على الشكيه وهو فلت ومن خوفه من الحكومة كتل نفسه وخلص هاهيه انتهى موضوعه ... صدك ترحون زيارة كربلاء والنجف وشريفة (ع)
هجرس _الثلاثاء شعدكم
ايهم_ماعدنه شي بارق عندك شي
بارق_كلشي ماعندي اشمر المره على أهلها واحكل
سيفو فوك جتفي واطلع
هجرس_هاهيه لعد الثلاثاء إذا الله خلانه عايشين نطلع
ايهم_ان شاءالله فرقد بارق ماتطلعون اليوم الا تتعشون عندي
هجرس_نبقى ليش مانبقى ههههه
بارق_نريد تسويلنه دجاج شوي بالفرن
ايهم_تدللون
هجرس_مايدلل عليك ظالم عمي الصاك
ايهم_طبعا صاك العشيرة انا هههههه
بارق_شكد ساقط
ايهم_مثلك ساقط كرسوع ههههه
نصبنه على بارق صار يكمز وانوب عيرني بشهم ابنك كرسوع مثلي لا تحجي ولا تعيب باع هلكد ماعيبت عليه
طلع ابنك مثلي ناعم
وره العشة بساعة رجعت للبيت كعدت بالمضيف بعد ماشفت زلم عدنه خطار يحجون بسالفة المسؤول يكولون هو متورط ويه هواي عالم وكلها تريد تكتله
ومأيس من الحياة وشانق نفسه البارحة بالشقة ..
لل١٠باليل يله راحوا كمت دخلت للبيت ماشفت سلي وشهم عند أمي رحت شفته نايم وفطومة فارشه افراشها بصف الكاروك وعلاوي نايم فوك الجرباية
نزلت بوست علاوي وفطومة وشهم وطلعت لكيت امي كاعدة يم جديتي حلوة وأبوي ومرته جاي يحجون بموضوع المسؤول عفتهم ورحت للغرفة
ويه فتحتي للباب شفت سلي كاعدة و ...
لابسه فستان أبيض قصير فوك الركبة واصلوخ مطلعة صدرها وشعرها البني نازل على اكتوفها ومخليه مكياج
طالعة جنها لعابة مو بني آدمية
بتسمت بخجل وكالت بكل هدوء ورقة "
تأخرت
رجعت الإبتسامة الها دخلت للغرفة سديت الباب وخليت التلفون وسويج السيارة عالطبلة بصف
جرباية وقتربت الها
_لو ادري منتظرتني مجان تأخرت
_مو دزيتلك رسالة
_وين ؟
_ عالخط
_ماجنت منتبه أروح فدوة لهذا الطول على كيفج وياي تره قلبي ترف ومايتحمل كل هذا جمال
كامت بطولها اخذتلي قلبي وعقلي اجت لعندي مبين عليها وجهها ملامح الخجل بس صارت كدامي جريتها
من خصرها بأثنين أيديه
_احتركت امج ع جمال لبيج
خلت رجليها فوك رجلية وكفت ع روس أصابها وحاوطت اركبتي بأيديها الاثنين وتباوعلي بكل لهفة وشوق
وأني كذالك ذايب بنظراتها
قربت وجي لوجهها وهمست كدام شفايفها "
ليش من اقتربلج تنتهي كل
القسوة لبي ؟
شدت على اركبتي أكثر وكالت "
لأن تحبني وأحبك
_اي والله
شلتها بحضني لفت رجليها على خصري وهي باستني بشفايفي مو انا تهديد الصبح جاب نتيجة وياها .. جانت هي
ليلة أحلى من ليلة عرسنا ...
اجه يوم الثلاثاء رحنا كلنه للزيارة اول مازرنة العلوية شريفة (ع) وعلي ابن الحسين (ع) وراها كربلاء المقدسة وثاني يوم طلعنا للنجف زرنا الإمام علي(ع) وراها رحنا
للمقبرة ' جداتي تعاركن بالمقبرة خربنه ....من الضحك عليهن متيهات مقبرة اهلهن وحدة تكل للثاني
هنا اهلج وهنا اهلج ...
جدي_اكو واحد مايندل مقبرة اهله هنا سرداب اهلج خديجة جوري بالفتحة الثانية سرداب اهلج
هجرس_جدي اندل اهلجن وانتن ماندليتن
خديجة _صارلي سنة ماجاية للمقبرة ومتغيرة هواي
ايهم_كل يوم يموت ألف واحد هاج شوفي اجنازة اجت
باوعنه على جهة اليسار شفنه شايلين ... جنازة وعالم كلها زلم معكلة مره وحدة ماكو وياهم جاي يدفنون ميتهم بعد ماكملنه زيارة أهل القبور...
نزلنه للسوك اشترينه غراض وسيفو عايف ابوه ولاحكني شلته بحضني اشتريله ليعجبه وراها رجعنا للبيت بالطريق نزلنه بارق وعمي ايهم جابلنه غده بالسياره نأكل لفات ...
بالازدحامات لمحت سيارة كاعدة بالصدر وحدة تشبه حنين بقيت مركز بيها دارت وجهها والصدمة لي هي حنين بس متغيرة ومسويه تجميل
الخشمها ونافخة شفايفها وسمنانه ... هي قبل ضعفت علمود الخلفة بقيت أبتسم بخبث وأخيراً رجعت للعراق علمود انتقم منها وأخذ حيفي من رجلها
مرت على اول .... لقاء لي بحنين شهرين وبهل شهرين جبت عنوان بيتها ردت اروحلها وانتقم منها بس للاسف ماحالفني الحض وكعت جديدي خديجة مريضة
بالفراش وطلع بيها مرض تليف بالرئة مراجعات كله الاربيل وانا لحرت بيها اودي واجيب ولا واحد من ولدها
كال انا اودي امي واجيب بيها كلها شالت
ايدها هي نايمة بالفراش وعايشة على الأوكسجين وتبجي لأن ولدها وبناتها بالسنة حسنه يذكرونها وعمي جاسم ماكلف نفسه واجه سأل عليها بغياب جدي
خوش ماخذله عذر جدي متبري منه ...
بالليل حالته الصحية تدهورت وفدمرة صارت بساعات تسلمها كاعد يم رأسها دارت وجهها علية وكالت بصوت
تعبان شبه مسموع
_جدة فرقد
قتربت الها "
هاا جدة شمعتازة
_عوف حنين
_اعوف حنين !؟
_اي لا تدمر نفسك بيها وتضيع شبابك بقذارتها
_ارتاحي جدة
_امانه عليك عوفها الخاطري عوفها وركز بحياتك
ويه مرتك وابنك
_انا بنيتي اقتلها هي وزوجها بس الخاطرج راح اعوفها تولي
_ايي خلها تولي
_شيوجعج جدة
_قلبي
_اريد من الله يدير الوجع بي وشوي اخفف من الامج
_بيش طالب روحك
_ماتحمل اشوفج تتعذبين
_هذا أمر الله
_ونعم بالله
نزلت دمعتها .... لزمت أيدها بيدي وبستها الها كوه صارت تجر بالنفس عرفتها هاي اللحظاتها الأخيرة وراح تنقطع أنفاسها الأخيرة كمت صحت للكل ودزيت على عمامي
وعماتي قسم اجه وقسم ماجه والله ... عالساعة بال١١ بالليل سلمتها الله كسرت ظهري من ماتت صرت ابجي على جنازتها مثل الطفل تأثرت هوي بموت جديتي
خديجة موت جديتي كلش أثر بي وبالعائلة اروح لادوام ومن ارجع اصيح عليها عبالي موجودة بالبيت من ادخل وماشوفها أشبع بجي ويه جداتي
عليها ...
وره السبعة جديتي خديجة بيوميا اجوي ولدها وبناتها يطالبون بالذهب والفلوس كعدت الهم ركبة ونص وكتلهم مالكم درهم أحمر الذهب ابيعه واوزعة على الفقراء
والايتام بخيراتها والفلوس أشتري ..... بيهن افراش وبرادات واوزعهن على الحسينيات والمساجد بخيراتها وهاي وصيتها وانا المتكفل بالوصية اي واحد عنده اعتراض
خل يقدم اعتراضه
دخل جدي وكال "
موين جنتوا من جانت مريضة ؟ ميتين لو مفقودين وقت ماتت امكم ذكرتوها واجيتوا تطالبون بورثها يله برره ماريد اشوف شكولاتكم الزفرة حرامات حبلت
بيكم وكبرتكم وزوجتكم وتعبت عليكم حرامات .. يله الكل تكوم تطلع ولمايطلع اطلعه بطريقتي
الكل طفر عمتي يخزرن بي عمامي من ودهم يشربون من دمي وره هاي السالفة صرت اسمع حجي ماينسمع بحقي وبحق جدي هملوها وخلوها تموت ماعالجوها ماسفروها
خارج العراق واكلوا حالها ومالها ...
وانا منطيهم الاذن الطرشة لأن أعرف بنفسي كل أسبوع باربيل وهذا المرض ماله علاج لان آدمي جبير وماكل رائتها بالكامل حتلوه اطلع بيها للخارج نفس الشي
تموت وماعدها مناعة حسب كلام الأطباء....
انا ادري بيهم كل دكهم ...ومدكوكهم الذهب والفلوس الفلوس طلعوا ٣٦ مليون والذهب بعته جاب ٦ مليون ٣١٨الف دينار تبرعت بجمعية تلم تبرعات للفقراء
والمحتاجين والأيتام
بال٦ مليون ...
واشتريات افراش وبرادات ... بخيراتها وياي يمشي عمي ايهم وابن عمي هيثم وبارق في حيث بسنة وحدة صرفت كل افلوسها بخيراتها وربع دينار ماخليت بجيبي
وبجيب أحد وماخليت احد من ولدها وبناتها يتهنى بيهم هي ماتهنت بيهن اخليهم هم يتهنون لاوالله .
مرت الأيام والشهر والسنوات وهباوي صارت عدها بنات أثنين ومناوي ولد وسمته فرقد على اسمي وسلي جابت ابنية سميتها على اسم جديتي خديجة...
ماريد اسمها ينمحي من البيت اريد اسمها يبقى عايش ويانه وكل يوم اصيح بي بالبيت ماحجيلكم عن شهم بطرك الطول جنه عامود كهرباء وجسمه جنه كصبة
رفيعون نهر كله مكابل سيفو وكاعد بالمضيف ...
واحنه جنه بزمن كورونا والأوضاع تخوف اول شخص انصاب عدنه عمي جاسم وماكو ١١ يوم بالحجر الصحي وسلمها لربك وراها عيدان انصاب وعمي ايهم وبارق
اغلبيتها انصابت بس الحمدلله والشكر تشافوا منها وماماتوا غير ماتوا من عدنه تلاثه ويه عمي جاسم جدي ضارب الدنيا واهلها جلاق ولامهتم لكورونا ولا ملتزم بالوقاية
الصحية اكله التزم يكلي هو الروح بيد ربك شوكت ماياخذها يأخذها جايني كرونا ياكرونا هاي
دروحوا انتو وكرونا
هجرس_جدي اسمها كورونا مو كرونا
جدي_نفس الشي جر من يمي هجرس
الحجي ويه جدي عيب كاعد بالليل بالغرفة وسلي كاعدة تنوم بخديجة واتصل بي عمي ايهم خبرني الشيخ الروحاني ضاربته كورونا وهسه بالحجر الصحي بغداد
كمت كل يوم أتصل بأخو واطمن عنه كل يوم يكلي وضعه مو تمام وماعنده مناعة والله ماكو ١٣ هيج بقى عايش وراها توفى خطية انكسر قلبي عليه جان خوش ادمي
ويساعد هواي عالم من خلال شغلة وشغلة الأساسي هو رادود حسيني ويقرا بالمجالس الحسينية مرتين لزمنا قرالنه بالمجالس واخر مره عالم من نفس عشيرتنا
لزموا عدهم وره مامكمل من عدهم العشرة الأولى والعشرة الثانية والثالثة وبالرابعة من محرم لازمي بمجلس عزاء بالكاظمية وانصاب هناك وتوفى هذا الحجي
صار بشهر محرم الحرام ....
صار يوصلني حجي من عماتي الشيخ ومات وهسه ترجعلك سل ويرجعلك هجرس منو يخلصك منهم وحوبتنه راح تطلع بيك اكلت ورث امنه حسبي الله ونعم الوكيل
بيك هجرس ...
من مانطيتهم ورث جديتي خديجة هم ماطابين البيت حتى بالاربعين مالتها ماجوي ولا راحوا زاروا قبرها ماعرف
الحقد لبقلبهم منين جايبينه ؟
وعلاقتي بسلي حلوة ومستقرة وخالية من المشاكل صح تزعل وهناك وين تقنع ونصالح ...
ودلشاد انقطعت اخباره هي القطعة عبالك فص ملح وذاب وحنين لحد الآن ماكو خلفة زوجها متزوج عليها وهسه مرته حامل بس هي باقية وياه لان مالها احد غيره
وجدي يمشي ويوصي بي شكد ماجاك ابتعد عن المشاكل ولا تقترب للمشاكل ولا تورط نفسك ويه
عالم ماتخاف الله
من شفت صار عندي طفلين ومتعلقين بي واخواني اثنين واهلي كلها تحبني تغيرت وصرت مادخل
بالمشاكل وابتعد عنها ...
وره ماخفت كورونا والأوضاع صارت شوي أهون من قبل سلي حبلت وهالمرة حبلت بتوم بنية ولد سمنت بشكل موطبيعي وبطنها كبرت صارت مابيها حيل تكوم من
الفراش وانا طاير من الفرحة بيها الله عوضني بمره ذرة مال ذهب وأطفال يخبلون وعائلة حلوة ومرت ابوي اخذت خديجة الها وامي ماخذه شهم يمها
بالشهر لل١١ من سنة ٢٠٢٢ سلي جابت البنية والولد الولد ردت اسمي على اسم جدي جدي ماقبل وكال تسمي عباس والبنية زينب ماكدرت أعارض كلامه وسميتهم عباس وزينب
جانوا هادئين كلش ....ومايحجون مو مثل شهم وخديجة مخابيل خدوجة تباوعلهم وتضحك انوب هي سمينة وام خدود نسخة ثانية من أمي صايرة
ومرت ابوي طايره بيهم ... عبالك احفادها مو ولد ابن زوجها وخدوجة تصيحلها ماما وتنام بحضنها متعلقه بيها وسلي المسكينة متعاركة وياي ..
_انت كلتلي كل سنة نجيب طفل وصدك سويتها
_اي وان شاء الله على السنة الجاي هم نسوي واحد
_والنبي ماكو بعد راح أقفل كافي ابنيتين ولد هي
شبع جهال فرقد
_جدي يكول ابوك ماخلف غيرك واريدك انت تخلف
عشر على عناد عمامك وعماتك
_ماكو فرقد لا تحلم
_انجبي بعد واحد نجيب
_لاااا
_ايي هههههه
جريتها الحضني واضحك عليها انوب هي كامت تبجي ماتريد جهال بعد بعد ماخلف تتوسل بي عبالك هذا الشي بيدي مو بيدها عاد كتلها اشاقه وياج أربعة كافي
وراح نقفل بعد مانخلف .
#النهاية
إلى هنا و تنتهي قصة الهجرس أتمنى نالت إعجابكم القصة
مع تحياتي لكم الكاتبة #رواء هادي
تابعوا حسابي على الانستغرام ✓
اما بخصوص القصة الجديدة مراح انزلها هسه لان ماكاملة نقل من اصحابها بس اكملها نقل واكملها كتابة يله انزلها علمود ماينشلع قلبي وقلبكم بيها .