#تاروت
البارت إضافي
بقلمي: زينب علي
حلواتي لا تنسون التصويت ومتابعة الحساب zainab_ali1 ♥️
Insta: zainab__.ali1
النيه چانت بس أحبك
وما أحب كلشي يخصك
تالي حبيت المحله الأنت بيها
وأهلك وناسك وعطرك
𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵
وتر:
قبل لا نكتب القصة بفترة چنت متمددة وافكر بالواتباد والقصص باوعت الدائب جان متمدد يمي وسكرة بحضنه يباوعون بالفون ويضحكون حچيت
وتر: دائب شنو رأيك بقصتنا
باوعلي مستغرب
دائب: يا قصة حبيبي
گالها بلا اهتمام ورجع يبوس بسكرة ويلاعبها عدلت گعدتي احچي بأنزعاج
وتر: دوديي ركز وياي شويه شنو رأيك بقصة حبنا
دائب: شبيها تخبل ولا بالافلام حتى باچر عگبة من نحچيها الاحفادنا مايصدگون
وتر: تحس ترهم تصير قصة بالواتباد
كلتها بتفكر هز ايده وگال بستهزاء
دائب: أنتِ هذا الصخام ماخذ عقلچ راح تتخبلين من ورى
ماهتميت الكلامه اخذت تليفوني وطلعت من الغرفة گعدت بالصالة افكر منو ممكن اسلمها قصتي هواي احب كاتبات وهواي اعرف كاتبات بس باخر فترة انا وزينب كلش صرنا صديقات ودائمًا نسولف على الواتساب دخلتلها بلا مقدمات كتبت
وتر: زينبب اريددد اكتب قصتي وقررت اكيد أنتِ تكتبينها
ماكو مجاوبت اتصلت عليها هم ماكو بقيت الحح الحد ما جاوبتني معصبة
زينب: ادري شبيچ مشايفة اتصال هلگد متصلة
وتر: وين چنتي يمعودةة
زينب: مطفية النت جنت اكتب بارت شتردين وتولا گولي
وتر: اقري الفوگ
زينب: قريت اعرف قصتچ بس ارجعي انطيني نبذة عنها مفصلة اكثر كل الي اعرفه زوجج مربيچ وأنتِ صغيرة واخذج من ناس مو اهلچ وبعد
احتاريت شكلها خطفني ماتصدك بيه يمكن عدلت گعدتي وتربعت وكتبتلها
وتر: حبني من طفولة وخطفني وتزوجني وجبنه بنية
زينب: ايي وين القصة ؟
وتر: شنو هي هاي القصة
شفتها سكتت ورا شوي رجعت كتبت الي
زينب: لا ما اكتب هيچ اريد يعني قصة قويه وبيها فكرة وحبكة وقصتچ يعني ماعرف بس تقليدية
كتبتلها
وتر: شبيچ زينب والله تجنن قصتي شبيچ انا اعرف باعي عندي رميم وخيال تعرفيهم بعد سولفتلچ عليهم انطيچ قصصهم
زينب: اي وشنو قصتهم
وتر: باعي خيال نقتلوا اهلها على ايد اخو خطيبها
زينب: فلم هندي شنو وين صايرة
وتر : اگلچ من الأخير راح تكتبين القصه وهاي هي وراح ندزلچ دلائل هم خوش
زينب: زين والثانية
وتر: تنتقم من قاتل اهلها
زينب: ماتحسين الجو صار تراب
وتر: ندزلچ كلشي نگوله الچ بالدليل
زينب: وتر يعني وين القصص مجاي افهم شرحيلي بتفصيل او خلي احد يشرحلي الفكرة لان جاي احس اذا كتبت قصتكم ادمر مسيرتي الكتابية
وتر: اهووو ولا تستقر هو أنتٓ بطرگچ بطرگ عمو الخيلع باعي راح اخلي البنات يحجون وياچ ويفهمونچ احسن
زينب: ياريت
شمرت التليفون وركضت جوه للبنات جانن گاعدات بالمطبخ
وتر: خيالللل رميممم يبويييييييي خياللللل رميممممم
طلعت خيال تحچي
خيال :شبيج خرعتينا هو هيچ جان وگعتي
خليت ايدي على صدري بالگوة اسحب نفسي واحس تعبت ماحسيت غير اجتي ضربة على راسي حيل
رميم: مره ثانية اذا خرعتيني هيج حضچ اطيحة شبيچ جنچ سليمة البين تتزيبگين
صحت بيهن
وتر: اهوووو دسمعن باعن احنا حياتنه شلونها كلها اكشن وطك طك خلي نكتبها بالواتباد وعندي كاتبة تجنننننن مبدعة ونصير يعني أبطال واتباد وهيچ
خيال: ههههه شبيچ امي شهالافكار بعدين شنكتب ازواجنا مجرمين وتابوا اييي وخري وخري
وتر : أنتِ ليش تفكرين بيها هيچ فكري ان هنا تابوا وشلون غيروا نفسهم شلون احنا تخطينا هواي صعوبات ونخلي البنات يستفادون من تجاربنا
اباوع الرميم صفنت شويه بعدها گالت بضحكة
رميم: واوو حـُطام البتار الي حبت قاتل اهلها لايكتت حبيت قصتي ههه
وتر: عود شنو كاعدات تستهزئون بيه اصلا قصصنا تجنن والواتباد كله ما موجودة نفسه وين اكو قاتل بريئ ؟
رميم: للامانه ماكو بس سر سعادتي
وتر: وين اكو وحدة اخو خطيبها متهم بمقتل اهلها ؟
خيال: بس انا ويمانتي دفرنت
وتر: وين اكو وحدة مثلي قصتها حلوة وجميلة
گالت خيال وهي تكرص خدودي
خيال: وين اكو منك كتكوت
وتر: هسه نكتب قصتنا بربكم وترى محد راح يعرفنا ولا ابد مجرد نكتب قصتنا وهاي هي حبابين واللّٰه عاجبني اذا تحبوني
خيال: تمام اسأل يمان ماعندي مشكلة
صفكت بحماس ورحت بوستهاا
وتر :وين اكو منچ ام شهمييي اوييي مال جعصصص أنتِ والنونو بحوري الي ستوه صايررر
درت على رميم الي حاطه رجل على رجل وتشرب الكوفي بكل برود وتباوع عليه
وتر: أنتِ ريمه شنو تگولين
دارت وجهه علي ورفعت حاوجبها واردفت برود
رميم: انسي مستحيل اصلًا نريد نسافر شوكت الحك احجي قصتي للبنت
وتر: شبيچ نحيسه واذا كتبنا قصتج شكو بيها اصلًا تطلع برفكت اصلا القصة ماتكمل بدون باتر لان هو الاخ ثالث ودوره اساسي والقصة تتمحور عليه ترى
رميم :شي يخصكم قصتي ماريد اكتبها شنو إجباري
برطمت وسويت روحي زعلت وعفتها وگمت رجعت للغرفة شفت زينب رادة علي
زينب: بس مو اكيد اخذها
كلش انقرت رحت للكنتور وطلعت شكو أوراق وصور ونزلت يم حكمة وانا محملة أول ما شافتني گالت
حكمة: ياستار استرنا شمالچ محملة وشايلة
وتر: قررت اكتب قصتي يلا طلعوا شكو ادله عندكم وحكومتي سولفيلي قصتچ خلي انطيها للكاتبة
بهل اثناء دخلت رميم تخصرت تحچي
رميم: عود زعلتي ست جفصة
ودرت وجهي عنها وجتفت ايدي
حكمة: رميم ليش مزعلة وتر اگولمچ بالعوچية هسه
رميم: والله يا حكمتي ممزعلتها بنتچ تريد تشرنا على الحبل
وتر: ابقي نحيسة هو منو يعرفچ راح تبقن مجرد مشهد وبس روحي زعلت بعد
اجت حضنتني
رميم: انا شلون بسُكرة الجبيرة من تزعل زين شلون يعني غصب أكتب قصتي مو اريد أسافر
وتر: هو شراح تسوين بس تنطي قصة حياتچ وهاي هي لا من شاف ولا من عرف
رميم: زين ومنو هاي وهيج نثق بيها وننطيها هيچ تفاصيل من حياتنا ؟
وتر: اسمها زينب علي كاتبة وعدها قصه مليونية على الواتباد رغم بعدها مامخلصة القصة اسمها في قبضة الخيلع وسردها يموت والبنية كلش أمينة الدرجة حجينا وياها مره انا وأمي حكمة وفتحنا الها كام وهي اصلا صديقتي ومن بدأت قصتها الاولى انا احبها أنا احچي وياها وهي تكتبنا
حچت وهي تهز بيدها
رميم: زين جيبي حسابها احچي وياها ونشوف وين تصفى تاليتها وياچ يا ست وتر
وتر: بس مو تفشليني وياها على كيفچ ترا لكيكه (رقيقة)بصوت سُكرة
گالت وهي تاخذ يوزرها
رميم: دخلي نشوفها حمرا خضرا صفرا
رميم"
اخذت يوزرها وجيت اريد احجي وياها طولت يلا ردت
رميم: أنا اخت وتر اعتقد تعرفيني
زينب: ايّ قلبي تكدرين تحچينلي تفاصيل قصتچ
بدأت اخذ وانطي وياها ومن حجيها مبينه ماعدها لا منا ولا منا والي بگلبها على لسانها بديت انطيها رؤوس أقلام من قصتنا بس بعد الرهبان شلون نقنعهم
سوينا إجتماع احنا والرهبان وعرضنا الفكرة بالبداية رفضوا بس لان احنا مصرين وعجبتنا الفكرة عرفنا نقنعهم
يمان: وهي بس هاي الكاتبة شسمها گلتيلي
وتر: زينب علي وبعد اكو هواي كاتبات
يمان: لا أنا گلبي ارتاح الزينب خلينا على زينب يلا على بركة الله
وبدينا نسرد وشيبتنا زينب بالاحداث الحدما صارت تثق بينا كلش وجنا من نگعد نفتحلها كام ونشوفها لمتنا وگعداتنا يلا صارت تثق ماتطلب ادلة هواي بس اذا حدث قوي لا تطلب كلشي بالدليل
مره جنت احچي وياها كام بس اني فاتحة ونسولف بالاحداث ماحسيت غير ندفر الباب وچنت فاتحة سبيكر دخل الأكبر يصيح
الاكبر: ماما ويامن تحچين
راح للتلفيون باوع بي وصار يصيح
الاكبر: الو الو منو الوووو
رميم: شبيك أمي خرعتها هاي بنيه صديقتي اسمها زينب
الأكبر: الله ماما حلوةةة دنوبة
قرب روحه يم التليفون وصار يصيح
الأكبر: أنا احبچ دنوبة دنوبة احبچ
ماحسيت غير الكرار دخل يركض ورى اخو أول مادخل
الأكبر: تعال ولك هاي ماما تحچي ويا دنوبة
تقرب الكرار يصيح
الكرار :دنوبة بوسه بوسه دنوبة بوسهه
رميم: انتم وين تعرفونها حتى بليتوا البنت بوسة ما بوسة
ماشوف غير الأكبر راح وكفت بالباب يصيح على سُكرة وشهم
الأكبر: سكرر شهم ماما تحچي ويا بنية حلوة بسرعة تعالوا اسمها دنوبة
رميم: يا شبيكم امي متعجبين بالبنت اول مره تشوفون بشر
دخل شهم يحچي
شهم :وينحه وينحهه دنوبةة هاي أنتِ وينننن
وسُكرة اجتني تركض يصير اسويلها نيكب رميم اسويلها نيكبببب على عيونها
الكرار وهو يشيل التليفون
الكرار: هاي هي هنا جوه تليفون تعالوا
اجه الأكبر وگبل داس على الكام ويصيح
الأكبر: فتحي كاميرة فتحييي
الكرار :دنوبة فتحي كاميرة هبابة
اجيت عود اخذ الفون خرعوا البنية ما كام يطلع صوتها بس تضحك
رميم: شو دجيبوا التليفون خرعتوا البنية
ماحسيت غير ركضوا بالتليفون برا ونزلوا للصالة طلعت وراهم اشوفهم كلهم گاعدين وحاطين التليفون كبالهم ويدوسون على مال الكام
الكرار: اكلك خاف ماتعرف تفتح كام هلوو دنوبة تسمعين سلونچ
زينب :هلو حبايبي شلونكم
الكرار باعلى صوت عنده صاح
الكرار: صوتهاااا حلووو دنوبة بوسه فتحي كام فتحي
رميم :عيب عليكم هيچ تسوون بالبنت الا اگول اليمان
سُكرة :يلا دينب فتحي خنسوفج
زينب: لا وين تشوفوني
الأكبر: هبابه حبيبتي
بقوا يتوسلون بيها الحدما فتحت كام بعد ماطمنتها حكمة محد موجود بس الجهال اجت خيالها وبحضنها بحر وكعدت يمهم
وجان الاكبر يصيح
الأكبر: الله ماما مو كتلچ حلوة دنوبة احبچ
الكرار الا يحط حلكه على الكاميرة ويبوسها
الكرار: بوسه بوسه دنوبه بوسهه
الأكبر : وخلللل انا اريدهاااااااا دينب احبچ
بهل اثناء شهم مد راسه يريد يشوفها وجاي يتعاركون الكرار والأكبر
جان يركع راس الكرار براس شهم وشهم من الالم ضل صافن ومخترع
الكرار : يا يا ركعت راسي ومن جاي يرجع جان يدوس على رجل الأكبر
صاح الأكبر وهو يحط ايده على رجله
الأكبر: اي اي اي رجلييي اييييي أذيتنيييييي
خيال :يمه أبني يمه مادري شسوله يمه شهم احچي ماما شبيك تصنمتتتت أبني
متت ضحك عليهم اباوع شالت تليفون سُكرة وكعدت علو القنفه تحچي
غلا: هاي دينب انا سُكرة وانت سكد عمرچ
اجو الاكبر والكرار وراها وشهم دخل راسه بالكامره
شهم :اكلج انت منين علفين رميم
زينب :هلو بس على كيفكم احچوا شصار قبل شويه شنو هالمعارك الطاحنة
الأكبر: الله والله حلوة ماما خنجيبها النا نريدها
الكرار: اي حلوة اريدها
رفع راسه شهم
شهم :هي منين عرفيها أنتِ
حچت سُكرة وهي مركزة بزينب
سُكرة :دينب اسويلج نيكب خلي سويلج نيكبب
وضلوا هيچ الحد ما زينب سدت النت وراحت
الأكبر: يا ماما وينحا وين راحتتت ماما دنوبة راحت تعاي جيبيها
رميم: ولكم البنية مو هنا بعيدة شلون نجيبها باچر نحچي وياها خوشش
الاكبر :خوش يلا كوموا نلعب على ماتجي دنوبه
وهيج نكتبت قصتنا واحنا بنص الأحداث اني وباتر قربت سفرتنا وصار لازم نسافر نسوي عرس بما ان احنا ماسوينا هنا ....
______
2023/2/18
خيال"
نزلت من الغرفة للصالة شايله بحر بأيدي لگيت الكل گاعدين على الريوگ صبحت عليهم وخليت بحر بعربانته يم خالة وانا احچي
خيال: خالة فدوه بحر چنه اليوم ماله خلك ديري بالچ عليه وانا أحاول ما اتأخر
باتر: وشني أمي تشتغلچ دادة
ردت احچي سبقني يمان وگال
يمان: مو مرتك هم رايحة الدوامها وجهالك باقين يم أمي شني أمي هم تشتغلك دادة
باوع دائب الباتر وحچه بشماته
دائب: حيلل لو ساكت مو احسنلك لو الا ابوي يرزلك من الصباحيات
شال الخاشوگة عض على لسانه وحچه
باتر: دسكت لا انومها بعينك هسه
راد دائب يرد صاحت بيهم حكمة سكتتهم
حكمة: بسسس مناگركم من الصبح معليكم بجهالي نايمين اليوم حتى للحضانة مايرحون باردة
گعدنا نتريگ رميم وباتر مدري شنو يتهامسون ويضحكون اباوع الوتر ودائب شويه بينهم مشاحنات والجو مو صافي يمهم عرفت صاير شي بينهم گلت من ارجع اسألها لان اريد اطلع صايرة مشكلة بالشغل گلت من ارجع تقربت على يمان همست
خيال: يمان حبيبي راح اخذ سيارتك تمام
حچه بأنزعاج وهو يدور وجهه
يمان: اخذيها بس ديري بالچ من الطريق
گمت شلت بحر بوسته على كيف رجعته المكانه ووصيت خالة عليه وطلعت اسوق على كيفي وگفت بالتقاطع
چنت جاي اصور ستوريات عادي بس لفت انتباهي صوت بنية تصيح باوعت شفت ولد يمها صوتها واصلني تگله
- جاي اكلك تركني فدوه عوفني شتريد مني والله اذا اهلي عرفوا يذبحوني
وهو يجاوبها
- جاي اگلج تسوين الي اريده لو افضحچ
بدون اي تردد گبل بديت اصوره وطبكت السيارة ونزلت تقربت منه چان تهديده واضح بالتصوير
حچيت وأنا اسحب البنت ورى ظهري
خيال: هاي شجاي تسوي ويا اختي وشعندك وياها !
اباوع عليه وجهة لونه انخطف وارتبك بعدها تدارك الموضوع وگال
- اختچ مصاحبتني ودزلي صورها واذا ما نطيتوني فلوس افضحكم
البنية صارت تبچي وهي تلزم بيه حيل اباوعلها بعدها كلش صغيرة بزي المدرسة حچت بدموع
- والله چذاب والله هو ساحبهن من تليفون اخته والله والله اخته تصير صديقتي ودزيت الها صوري وهو ماخذهم حبابه لا تصدگي
طلعت تليفوني درت الشاشة عليه اشوفه التصوير
خيال: صوت وصورة والفيديو هسه صار عد اكثر من شخص اذا ما مسحت هاي الصور هسه راح ينشر الفيديو مالتك على كل التواصل واسويك بيزة ماتسوه وشكو واحد بالشارع يمر يتفل بنص گصتك يا عار
گال متعض
- بس تفكين حلگچ بحچايه انشرها هي وعائلتكم كلكم
خيال: هين انا الك الظاهر متعرف انا منو
طلعت تليفوني ادور بي صار كبالي العقيد فواز بدون تردد خابرته أول ما فتح خط حچيت
خيال: عقيد فواز
والولد من شافني هيچ گلت بسرعة انهزم
فواز: خيال شذكرچ بيه عاش من شاف إسمچ
خيال: فواز عندي قضية ابتزاز تگدر تحلها بدون ما يضر البنت اي شي
حچه وحسيت صوته صار مثل الخايف
فواز: منو مهددچ خيال احرگ الدنيا على رأسه
خيال: مو انا بنت اعرفها مهدديها بصورها اريدك تاخذ تليفونه وتمسح شكو هيچ صور
فواز: تمام هسه جاي عندج دليل ؟
خيال: صورة وصوت ورقم الدراجه مالته واعتراف البنت واضح بالفيديو وهو جاي يهددها
فواز: هاي هي دزيلي كلشي وخلي الباقي عليه
دزيتله كلشي شفت البنت ترجف وبس تبچي
خيال: شسمچ
- مسرة
ابتسمت الها وحضنتها اطمأنها
خيال: لاتخافين هاي هي انتهى كلشي راح اخلي يتمنى الموت وما يشوفه تطمني حبيبتي عندچ امتحان ؟
مسرة: لا ماعندي
خيال: ارجعي للبيت وگليلهم الطريق مگطوع وماگدرت اعبر يلا رجعي وهذا رقمي خلي يمچ وأنا اگلچ شنو يصير
مسرة: بس خالة متأكدة ميصير علي شي والله ماعندي علاقه دزيت الصور الصديقتي وهو اخذهن
خيال: خلخاله تخلخل اعظامج امشي لج خالة ترا انا بگدج بس شوي أكبر
اباوع عليها شفتها ضحكت
مسرة: مو ما اعرف اسمچ
خيال: خيال اسمي وعلى العموم روحي وطمني
راحت البنت بعد ما لحت عليه ان محد يعرف عنها شي صعدت السيارة ورحت الدوامي خلصت شغلي ورجعت البيت هدوء گبل صعدت للغرفة خليت تليفوني على الميز وشفت يمان جاي يصلي گلت ادخل اسبح ومن اطلع اسلم عليه واحجيله
دخلت سبحت وطلعت شفت تليفوني بيد يمان وهو ابد مايسويها وياخذ تليفوني بدون ما ياخذ إذن مني استغربت بس مابينت سويت نفسي عادي باوع عليه وگام اتقرب مني ملامح الغضب مرسومة على ملامحة ومسيطرة عليهن
يمان: فواز يگلج طالما انا وياچ لاتخافين الولد بالسجن والصور نمسحن كلهن
هطر التليفون على الچرباية صاح
يمان: ممكن يا ست خيال يا زوجتي افتهم شنو فواز ؟ وشرجعه وأنتِ تعرفين ان هو جان رايدچ ؟وياريت بس هيچ لا يگلج طالما انا وياچ ما تخافين بالنسبة للمگرن الي بالبيت شنو وضعه ؟
خيال: حشاك حبيبي صلي على محمد واستهدي بالرحمـٰن لاتحكم على شي ما فاهمه
مسح على وجهه وضل يصلي على محمد وال محمد وراها دار علي
يمان: تمام خيال يلا فهميني
گعدت بديت اسرد اله الي صار بتفصيل وحتى شوفته كلشي وجنت مسجله مكالمتي ويا فواز هم سمعتها اله
يمان: برأيج تصرفچ صح او غلط ؟
خيال: ما غلطت لان جان لازم اتصرف بسرعة قبل مالبنية تنشر صورها وتنفضح ولو مخابرتك چان طولت السالفة والوقت مو بصالح البنت ابد
يمان: حظري وماريد اشوفه ابد بتليفونچ
خيال: يمان عيب صدگني مو من ذوق احظره وهو بس اتصلت علي گبل گال تم
يمان :خيال خلي النفس طيبة بروح ذاك الأب الطيب
خيال :تمام مثل ماتريد
حظرت الرقم ومسحته بس وجهه بعده ثگيل عليه وما اهتملي ابد وضل طول الوقت متجاهلني الحدما طلع ويا الولد جانوا طالعين ويا اصدقائهم نزلت جوه لگيت البنات گاعدات بالصالة ورميم تحچي ويا وتر وخاله حكمة على سجادتها تقرأ القرآن يمهن اشوف وتر منزعجة گعدت يمهن احچي
خيال: خير شبي اليوم البيت متكهرب
رميم: تعاي بلا فهمي ست وتر ماتقبل تحچي
خيال: وتر خير صاير شي من الصبح شفتكم مو على بعضكم أنتِ ودائب
گالت بقهر
وتر: وين الخير هو اني من ورى أوتار اشوف الخير
خيال: شبيها أوتار
وتر: لو تبتعد من رجلي انا أرتاح
رميم: أنتِ ليش مجاي تفهمين هي أمه شنو تبتعد من رجلچ
وتر: راح احچي الصار وانتن احكمن وهاي أمي هم گاعدة
رميم: فصمي خلي نفهم
وتر:
بعد مارجعنا من السوگ صعدت تجهيزات البيبي للغرفة وشفتها صايرة هوسة گعدت أرتب بيها صارن گبالي اوراق فتحتهن اقرأ بيهن وانصدم جانن مستندات بيع قطعة أرض حچيت ويا نفسي
وتر: دائب شيسوي بهاي الفلوس كلها هو ممحتاج ليش بايع قطعة أرض
من بعد تفكير ماوصلت الحل يعني گلت حتى اذا علمود اني حامل وهيچ اصلا منحتاج كل هاي الفلوس وامي حكمة ماتخليني ادفع
خليتهن على صفحة وگمت رجعت اعزل بالغرفة على مارجع فتح الباب ودخل اتقرب لزم بطني وحضني من ورى ضعت بحضنه يبوس بخدي ويحچي
دائب: اشتاقيت أوتار گلبي
وتر: هو أنت وينك ملتهي بالشغل وسكرة يمكن من يجي ابنك بعد حتى بخلقتي متباوع
دائب: ظلمتيني هذا هيچ
وتر: وقتك كله الاطفالك والشغلك دودييي
حضني اكثر ايده تمسح على بطني همس
دائب: بس لا تنسين أنتِ أول اطفالي
وتر: صدگ دوديتي
دائب: شوكت تبطلين من هذا الدلع الخايس شلعتي گلبي
ردت احچي عيني صارت على الأوراق وتذكرتهن
وتر: دائب
دائب: ها يا حيل دائب
ابتعدت منه رحت اخذت الأوراق من الميز شفته عقد حاجبه بأنزعاج
وتر: الشنو هاي المستندات ليش بايع قطعة أرض حبيبي
دائب: احتاجيت فلوس وبعتها
وتر: بس هاي هواي فلوس عمري شنو سويت بيهم خاف متزوج عليه اعترف
دائب: هو أنتِ ماگادرلچ انوب اتزوج عليچ
وتر: چا شسويت بالفلوس
وگف يم ميز المريا وگال بصوت خافت
دائب: انطيتهن الامي لان محتاجة
وتر: وأمي حكمة قابل شنو تسوي بكل هالمبلغ
دائب: لا امي أوتار
شهگت وانا احچي
وتر: من كل عقلك دائب كل هذا المبلغ منطي الاوتار
دائب: احترمي مهما يكن تبقى أمي
اتقربت منه احچي
وتر: أمك ماتريدك بس بوقت المصلحة دائب الى متى اگلك أمك ماتحتاجككك بس من تريد فلوس
جرني من ايدي وگال بحدة
دائب: وووتر حامل لا تستفزيني وتتأذين
صحت
وتر: الحقيقة مرة دائب بس هو هذا الواقع أمك ماتحبك تحب فلوسك أمك مو بحاجتك
عيونه احسهن گبن نار صارن بركان أحمر جرني حيل رفعتي من زندي يحچي بتهكم
دائب: اذا سمعتچ تعيدين هذا الكلام مره ثانية لسانچ اگصة افتهمتيييي
دفعني گعدتي على الجرباية لزكت بطني متألمة صحت ورى قبل لا يطلع من الغرفة
وتر: خلي أوتار الحرامية تفيدك ام المصلحة انا الك
ماهتملي عافني وطلع احتاريت شسوي هاي اذا تبقى هيچ تخلي دائب يگعد على الحديدة يوميا منطيها مبلغ وقدره
اخذت تليفوني وطلع رقم عمو ابو دائب واتصلت عليه سلمت بعدها گلي
عزيز: اليوم متذكرتني چنتي الحلوة گولي بابا محتاجة شي مايردچ الا لسانچ
وتر: عمو اريد اشكي دائب يمك
عزيز: هاا گولي شمسوي وياچ هذا السبندي املصلچ اذانه
وتر: هاي أمه أوتار راح تخلي يفلس كل فترة وطالبة من مبلغ بالملايين
عزيز: ايا بنت الكلب شگد ماتستحي هاي وحتى وقار العمرها مامخلية رجليها بالگبر وبعدها على نفس سوالفها
وتر: انا والله لو ادري بيها محتاجة ومو مصلحة ولا احچي بس هي جاي تستغله وانا اتصلت بيك حتى تحچي ويا أنتَ خاف اذا واحد من اخوته حچه يتحسس من الموضوع
عزيز: اطمني بابا انا احچي ويا وهم راح ابحث ورى السالفة واشوف أوتار وين جاي تودي هاي الفلوس
وتر: شكرًا عمو ماتقصر
عزيز: واجبي هذا بنيتي
بعدني ماسادته دخلت سكرة بعدها واكفة يم الباب وحچت
غلا: مامي هاد منو تحجين ويا
وتر: جدو عزيز تردين تحجي ويا
كيفت اجت اخذت التليفون مني وهو هم كيف انطلق يحجي وياها اخذته وطلعت من الغرفة وانا بقيت على نار هاي صار يومين وبعده ممرجعلي خبر
خيال: مهما يكن تبقى أمه خاف صدك محتاجة المبلغ
رميم: تحتاج مليون مليونين بس هالگد انا هسه ويا وتر لان هاي ام دائب انا مارتاحلها مبينه ملعبة ومادية كلش
حچت خالة حكمة
حكمة: من يوم الاجاني بي وگلي أمي رجعت وانا عرفتها وحده مصلحچية ولوما فلوسه ما تباوع بوجهة وهاي انا احجيها وگاعدة على سجادة صلاتي
بقن البنات يحچن ويا خالة حكمة
وانا صعدت رتبت الغرفة وسويت اجواء وشعلت شموع وطلبت بوكيه ورد ولبست سيت نوم حرير لون نيلي وجان يجي على الجسم وبي فتحة على طول وبعد ما جبت بحر حيل جسمي ترتب وصار احلى خاصه وراها مباشرة دخلت جم ماصار عندي ترهل ابد وسحبت عيوني بايلاينر وسويت كاصيب صغيرونات من طرفين والباقي ويفي
سمعت حس صوتهم وهما يصعدون الدرج سوالفهم صوت ضحكاتهم توصل الآخر الشارع رگضت وگفت يم الميز سويت نفسي ممهتمة اعدل بشعري
اول ما دخل عيوني تركزت عليه اباوعله من المرايا صار يباوع من فوك الجوه وماگدر يخفي لمعه عيونه الواضحة عني مسح وجهة استغفر وگال بضحكة
يمان: ان كيدهن عظيم اللهم ان لم تصرف كيدهن عني لانصاع لهن لا مو بس انصاع حلقه بيدها اصير
ابتسمت تقربت منه سحبت ايديه ولفيتهم على خصري وايدي على كتفه گلت بزعل
خيال: يهون عليك تزعل من فزة گلبك وخليلك
يمان: أذوب بحروف اسمها
خيال: ليش تتجاهلي
سحبني يقربني عليه اكثر
يمان :كل ذرة بيه ساكنة بيچ أنتِ شلون اتجاهلچ
حضنته ابوس خدوده بوسات خفيفة
خيال: آسفة سويت شي من وراك وغلطت وأنتَ حباب ونطيتني درس وبعد ماعيدها بس والله خفت عليها
باس راسي
يمان :ميخالف خيالي ميخالف أنا مو ماعندي ثقة بيچ الي طلعتني من المؤبد والعدام لو اذبها بنص الزلم ما اخاف عليها محد يتجرأ يمسها بحچاية بس أعرف نكاسة الرجال وحيونته اخذتني غيرتي عليچ
حضنته الي وخليت راسي برقبته
خيال :احبك حيل يا فزة گلبي يا ميزتي البيها انغر
يمان :يابعد عيني ونظرها وذيج السنين كلها
من بعدها قضينا ليلة حلوة طيحنا بيها الزعل كله
رميم"
كاعده اطبك الملابس والأكبر والكرار يمي يدرسون
الأكبر: أمي ليمه سؤال
رميم: جواب حبيبي
الأكبر: هسه ليش الدجاجة ما تولد مثل الخروف
ضحكت طبعًا الأكبر يسأل أسئلة ما انزل الله بها من سلطان
رميم: لان رب العالمين قسم الحيوانات الى أقسام متعددة كل حيوانات الها طريقة تجيب وحسب طاقة تحملها وبنية جسمها ولان رب العالمين يخلق هواي اصناف من الكائنات وكل خلق يميزه وينطي شيء الي يميزه لهيج اله ميز الانسان يولد والدجاجه تبيض والخروف هم يولد
الكرار: هسه أنتَ سعليك تسأل هيج اسئلة
الأكبر: سبيك انت تيفي خليني اسأل
رميم: زين شنو رأيكم تگومون تساعدوني بدال هاي سوالف
گاموا اجو يمي وكل واحد لزم اله شغله وبديت اعلمهم شلون يطبكون الملابس وياي لحد ما كملنا
الأكبر: يبوي مامي تعبتيني انا لايح بعد لا صيحين علي
حچه الكرار وهو يشيل ايباده وايباد اخو
الكرار: اي صح تعبنا باي هبيبتي
ضليت مصدومة من السان الي يكنس ويرش ويا طلعتهم تصادفوا هما وباتر بالباب
باتر :ولكم شلونهم الجربزه
الكرار: يبوي زينين وخل خلي نعبر
الأكبر: هم اجه هم اجه زينين خلي اعبر امي خيال صيحنا وخر
اباوع الهم عبروا من جوه رجليه وطلعوا هز ايده وگال
باتر: امده حظي حتى جهالي يكرهوني دخيلك ربي شهالغضب
لتفت علي شافني واتقرب هجمم جعصني جعص بحضنه
باتر: اخخ بس أنتِ تحبني مالل تنكتلين هسه هيچ اگطعچ تگطع
رميم: أي مو موتتني شبيك
ردت ابتعد بس طكت بخشمي ريحة نسائية مو ريحتي گبل درت وخنزرت وجريته من ياخته وقربته علي اشمشم بي
رميم: كلمة وحدة ورد غطاها وين جنت ويامن ؟
غمض عرف انا شميت ريحة نسوان
باتر: اهدي اهدي وخلي افهمچ الموضوع
رميم: مو جاي تشوفني هادئة فهمني
باتر: چنت ويا علي وچان طالع ويا بنت وهاي البنت چانت صديقتها وياها فـ شسمه جنت گاعد قريب منها ولزگت ريحتها بيه بس ما والله وروح نرجس حبيبي ما باوعت حتى بخلقتها
رميم: لا والله وانا شنو هنا مثلا وبعدين مقتنع أنتَ اذاناتك جاي تسمع الي يطلع من حلگك !
باتر: هذا الي صار اچذب عليچ واكلچ جاي تشمين غلط
رميم: لعد روح ارجع منين ما اجيت تمام وخلقتك ماريد اشوفها ومره ثانية من تطلع ويا ****تسبح وتغير ريحتك وطب حتى ما اخليك تفقد ريحتي بغرفتك فهمت
شلت تليفونه ومحفظته الي جانوا على الميز وحطيتهم بيده
رميم: الباب ينتظرك اطلع برا لا وروح ضرغام اسويها عليك ظلمه ودليلها الله خليني عاقلة
باتر: هسه أنتِ تفاهمي وياي شسوي يعني علي حرجني وحطني گدام الأمر الواقع
تقربت احجي بصوت اقرب للفحيح واقرب نفسي منه
رميم: بنار جهنم الي تلفيك أنتَ وعلي اخر همي اطلع برا ماريد اشوفك فهمت ؟ لا وحق الله انا اطلع وتعرف اذا طلعت بعد ماارجع
باتر: اهوووو هاي هي طالع مولييي
صاحها بوجهي وطلع اسمعه يدردم وهو على الدرج
باتر: انا ابو نسوان چنت تجي وحده صارله خمس سنين مدري سته تجي وحده تمشيني مثل النعال ؛ سليمة تصك الزلم مثلي وامثالي
فتحت الباب وعطت بي
رميم: حتى ما متذكر صارلنا شگد متزوجين دوكفلي اوكف اذا ما شوفتك النبي عربي ما اطلع اخت ضرغام
دخلت ورگعت الباب ادري علي بكلشي يحط باتر بالنص وادري باتر مستحيل يخطي خطوة ويخوني لان يعرف العواقب وأكيد مراح أغث نفسي علمود اي شي بالدنيا گمت كملت الغرفة وطلعت أغراضي وبدأت اسوي سكن كير وسشورت شعري وبدلت وتعطرت وجبت حلوياتي وحطيتهن وفتحت التلفزيون وگعدت اشوف افلام ولا همني احد أبد بعد ما جبت جهالي نيمتهم يمي على الچرباية
صارت تقريبا ب٣ الفجر حسيت بدوره المفاتيح تنفتح على كيف گمت تخصرت اله
وانا لازمة بيدي الصير مثل الخيزران مالته موجود بغراضة
دخل للغرفة يتسحب على كيفه يدخل وگف من شافني بوجهة
باتر: بروح ضرغام خليني اطب هسه والحسين مالي علاقة ولا سويت شي بس گعدت أبو فاضل
طبعا جنت منيمة الأكبر والكرار يمي حتى من يجي يريد ينام ما يلگه مكان
اتقربت هو ماخذ احتياطه وساحب احزامه وضامه ورى ظهرة گبل نطيته ضربه على رجله بالخيزران طلع حزامه ولشطني بزندي بي حيل
طلع مني صوت شهگه لان ضربني حيل ضربته بكل قوتي على جتافه بالخيزران جان يجرني من شعري بدون ما احس عليت صوت
رميم: اخ شعريييي بااااااتررر
ويا صيحتي فزوا الجهال بس شافوا لازم شعري گبل ركضوا علي سوو هجوم
الأكبر: ولك وخل عن امي وخل وخل
يصيح ويضرب برجل باتر والكرار يجر بي من ورا ويضرب بظهره
الكرار :وخلل عنها ولك وخلل
تمددت وانا ميته من الضحك عليهم طاحوا بي كتل حيل وهو احتار شيسوي بيعدهم منه لو يضحك
باتر: شبيكم هيوووو جاي نتشاقه انا وياها شبيكم وخروا عنييي
صاح الأكبر وهو يدفعه عني
الأكبر: هو هذا هم سقه وخل وخل
ورجع عليه
الأكبر: وأنت لا تتحارسين بي تافي بعد
مسحت دموعي احچي
رميم: صار
الكرار يجر بابو ويگله
الكرار: اذيتها بابي يلا بوسها وكلها سولي
الأكبر: اعتذر اعتذر
ماعافونا الا صالوحونا وخلوا يبوسني ويگول آسف
الكرار: يلا امسي نامي وبطلوا هاي سوالف هبيبيني
لزم ايد اخو وطلعوا من الغرفة واحنا نضحك عليهم
ومن يومها مستحيل يطلع باتر مكان اذا مو انا ويا مكالمة من أول الطلعه لحد مايرجع
وتر"
مر كذا يوم انا ودائب مانحچي ويا بعض وعمو ابو دائب بعد مارجعلي خبر بعد فتح الباب ودخل ظهرية وراجع من الشغل طب بوجه للحمام جنت محضرته اله عفت الغرفة وطلعت اريد اشوف بنتي وين دخلت الغرفتها ماهي مموجودة أكيد يم يمان لازم تأكد شلون حتى استحيت ادك عليهم الباب
رجعت للغرفة واتصلت بخيال أول مافتحت خط گالت
خيال: لا تدورين على ضرتي هاي يمنا
وتر: عرفت يمكم لان شفتها ماهي بغرفتها
خيال: اجتنا هي وبطانيتها وراحت بحضن يمان بابي انام يمك وطردوني من الچرباية بالگاع وهم اخذوها كلها وهسه باقية مثل الماخذين رجلها ومخلينها اسمع بس سوالفهم وضحكهم
وتر: هو رجل شبيچ نحيسة
خيال: هو انا حاچية دروحي روحي جاي يصيحوني
سدته وراحت بقيت اضحك عليها تمددت على مكاني طلع من الحمام يباوعلي صفح مشط وتعطر واجه تمدد بصفي گال بنبرة حدية شويه
دائب: بنتچ وين
وتر: يم يمان
گلتها ونطيته ظهري شويه وحسيته خلا رأسه على كتفي وگال بتعب
دائب: محتاجچ بابا
رفعت ايدي تحسست خده فزيت احچي
وتر: دائب مصخن شبيك مريض خلي اصيح واحد من الولد ياخذوك للمستشفى صاير نار حبيبي
ردت اگوم لزم ايدي يحچي
دائب: لا لا بس خليني بحضنچ اريد احچيلچ هسه اصير زين
گعدت وهو خلا رأسه بحضني خليت اصابيعي بشعره امشط بي واحچي
وتر: حبيبي مغثوث انت من تنغث هيچ يصير بيك احچيلي شكو
تنهد بضيق وحچه
دائب: عرفت أوتار ليش اخذت مني المبلغ
وتر: ليش اخذته
دائب: طلع مثل ما أنتِ گلتي مصلحة لا أكثر هي گلتلي تريدهم تروح للعمرة بس طلع ابنها يشتغل بالفايز وخسران ومديون وخذت الفلوس علمود تسدد دينه وانا چذبت عليه
وتر: منو گلك
دائب: ابوي عزيز اليوم اجاني للشغل وگال
وتر: حتى تعرف أنا من احچي شي مو قصدي اكرهك بأمك بس أنا اعرف صنفها كلش زين
دائب: يعني لو گايلتلي الحقيقة ولا مچذبة عليه كلش نقهرت
وتر: لا تنقهر حبيبي واعتبر هذا الصار درس والفلوس مومهم احسبهم صدقة ودفعة بلا عنا بس المفروض تصيرلك عبرة بعد
دائب: لا هاي هي بعد مااصدگ
وتر: تمام
رفع رأسه يباوع بوجهي همس
دائب: تحبيني أوتار گلبي
حضنت وجهة بيدي وبسته بخده احچي
وتر: شلون مااحبك روحي من الدنيا أنتَ
دائب: احبچ حيل
تمددت ونيمته بحضني وبقيت اهدي بي واسولف ويا احاول انسي سالفة أوتار العوجة
ومن يومها صار ينطيها بس الفلوس الي مخصصهن الها كل رأس شهر غيرها يگلها ماعندي وكل مره تتعارك ويا وتصيح عليه بس هو يسكت مايحاجيها مرات اصفن اگول شگد اذته وهو بعده بار بيها بحيث من تصيح عليه يبتسم ودائب ابد مو من هذا النوع ...
انتهت ...
بقلمي: زينـب علـي
الرواية تحولت الى كتاب ورقي قريبًا يصدر عن دار الدراويش 🙈♥️
حساب الدار