يا سيّدة القلب ِ رُدَّي السيفَ عن عنقي
فقد ظمئتُ ولاحَ الجرحُ في أفقي
في حضرة ِ الحُسْن ِ لا أقوى على جَلَد ٍ
ولا أقاومُ سيفَ السّحر ِ في الحَدَق ِ
حاولتُ أرسمُ ما في القلب ِ مِنْ وَلَه ٍ
فخانني الحرفُ بين الحِبر والورق ِ
أنزلتُ قلبي على قيثارتي وترا
لما رأيتك ِ نايات ٍ على شفقي
كلّ البلابل ِ قالت وهي ساهمة ٌ
هذي العيونُ عناقيدٌ مِن الألق ِ
تسَمَّرَ الموجُ لما زرت ِ شاطئه
وراح يبحر في دوامة الغرق
رأيتُ وجهَك ِ في عينيَّ مسكنه
مِن طلعة ِ الشمس ِ حتى هجعة ِ الغسَق ِ
يا مَن زرعت ِ بذورَ الودَّ في كبدي
قد أورق الوردُ في قلبي وفي طرقي
هذي عيونك ِ أخشى كيدَ حاسدها
لذا قرأتُ عليها سورة الفلق..
عرين الصياد بقلمي شذرة
امل : مشت الزفه ونملص گلبي وراهه
واگفين بالطرمه كلنه ودموعنه تصب
ليش ليال مو مكتوبلها الفرح
ليش من دون البنات تعذبت
هاذ قدرها لو احنه ظلمناها
لو هي ظلمت نفسها
كلها شاركت بعذابها حت اني
ما گدرت اروح وياهه ولا فاتن گدرت
ابتعدت اصوات السيارات وظلينه اندحگ عالباب
موحش كئيب حزين
فاتو عمر وعثمان مبتسمين
شافونه ملتمين بالطرمه استغربو خفت خطواتهم
وصلو يمنه يدحگون ومو فاهمين شي
ما سألو وفاتو جوه وعمر ينادي
عمر : يمااا لگيت النستله الي تحبينها جبتلج
امل : طبينه وراهم عالبيت كلها مقهوره
گلبي احسه نمرد عماد يداري دموعه ويمشي وراه
صد علينه عمر
عمر : وينها امي وعذباء
امل : صدو علينه ثنينهم ويسألون شنحجي وياهم يربي راح عماد لزم كتوفهم
عماد : اسمعو خالو
: حجه هالكلمات ولگمته صبره
صبره : امكم عرست يابه راحت انزفت لا بحالكم ولا تدري عنكم
حطت صائب وحميد جوه التراب وعاشت حياتها
بنت الشيوخ ما انزفت زفتها انوب تزوجت صياد الشخ عمت عين الدنيا
فاتن : شجاج تخبلتييي مو زعم گلنه عقلتي
بس تظلين جبيره ومو خبيره
امل : تلاطشو صبره وعماد وفاتن
وعلت اصواتهم الله لا يوفقج يا صبره على هاي سوياتج التفتت تا احجي ويه عمر وعثمان جانو مصدومين وفاتحين عيونهم على كبرهن ويدحگون على بعض
عمر وگعن الحلويات من ايده طلع ركض وعثمان وراه
وجاهد وعلي وراهم يركضون
طلعت بره وراهم لازمه گلبي اويلي يمه وين ركضتو
وين تريدون يولو
ظليت بره افتر واسمع كوان صبره وعماد
ما گدرت افوت خفت من نفسي ازهگ واضربها
طلع عماد وراح وراهم
انهد حيلي وگعدت بالگاع
اكثر من نص ساعه يالله اجو
عماد وعلي شايلين عمر گوه گادريله
وجاهد شايل عثمان
يمه فرفحو فحطو يملخون بنفسهم واصلين السده ركض حطوهم بالهول وعماد گعد گبال عمر ولازم ادينه وهاذ متخبل ما يفعل يهجد
ديالا : صعدنه اني وسعاد تا نودي ملابس
ليال لحجرتها مو مولمه غير جنطه زغيره تعبالي نفسها ترجع تلايگنه ويا صياد عالدرج
تراجع وخلانه نكمل طريقنه
حدر بساع جان مرتاح تعابير وجه تحجي فرحته
_وگفت صافنه وادحگله
سعاد : شبلاج يمعوده وين صفنتي
ديالا : ابو نشمي ليش مكيف هالكثر عبالك شو شماخذ اريد ارتب هاي الشربكه بعقلي مجاي اترتب يا سعاد احس نفسي اعرف شي ومجاي اتذكره
سعاد : حجيت بگلبي شتعرفين ابو نشمي عاشگ ليال من زمان لاحظته گلبه يرجف عليها
ما ادري اكيف لو انقهر
امشي حبيبه خن نودي ملابسها ونشوفها شمحتاجه
ليال :صافنه على نفسي اني شسويت يربي
اندگ الباب فزيت... منوو
سعاد : هاي اني وديالا افتحي الباب
ليال : رحت فتحته وطبن البنوات جابن ملابسي
مشيت وراهن وگعدت عالجربايه حيلي مهدود
ثنينهن يدحگن عليه وبيهن سالفه... خير شكو
ديالا : ماكو شي سلامتج محتاجه شي تريدين عشه هسع
ليال : لا تسلمين مسدوده نفسي
گلبي يم الجهال هسع يدورولي شلون بيهم يولو
ديالا : گالتها وبجت وشفايفها ترجف
... عماد وجاهد يمهم لا ديرين بال هسع صارو گدام الأمر الواقع بعد ما يگدر يرفضون
سعاد : راح يقبلون بهاذ الزواج من يعرفون لمصلحتهم وينجمعون وياج
ليال : امت هاذ الحجي امت گللي
صياد گال باجر اجيبهم بس شيصبرني شلون انام وهمه ماكو
ديالا : صديت بصفحه ما اريد اشوف دموعها
انطيتها الجنطه وطلعت ما گدرت اتحمل وسعاد ورايه
ليال : وين تريدن وتعوفني وحدي
ديالا : نكمل شغلنه ونجي
ليال : وينهاا عذباء
ديالا : عد نشمي ما يفعل يهدها بگاع
ليال : ابتسمت بحزن همزين بنتي لگت ناس تحبها
من گلب عوضها عن حب اهل ابوها
طلعن البنوات ورجعت لصفنتي
ديالا : حدرت جوه شفت نشمي شايل عذباء والولد كلها تفتر وراه وما يفعل ينطيها لحد
حت ادينه باسوهن وما يفعل اخذها بحجرته وسد الباب
ربعنه بس تعشو كلمن راح لهله
عبن ماكو حفله وجوبي
سعاد خطيه راحت مقهوره والدمعه لايجه بعينها ما صخت تصعد تودع ليال
ظلينه بس احنه بيت علوان
وادي ما طب جوه ظل گاعد يم جلابه
صياد جان يم ولد عمه
راحو وصلهم عالباب ورجع وگف بالصاله وانطه الولد اوامر على جم شغله
التفتت علينه وهو جاتف ادينه وراه
صياد : والم العشه يابه
دله : اي ابو نشمي هسع اجيبه
ديالا : ابتسم وصعد فوگ
ليال :وينهن ذني گالن هسع نجي زين اني عش بعدني لابسه البدله
گمت فتحت الجنطه طلعت ثوب تا ابدل
جبت الشي الي احتاجه خاف اطول سبوع هين
رحت يم الميز شفته مرتب وما ناقصه شي
مشوطه وزيت وزواقه وعطور
ما اخذت منهن شي شلت البرگع عن راسي هوه اصلا جان ناصل
احاول افتح سحاب البدله مجاي ينفتح ولا اگدر انوله نزلتها من يم جتفي قوي وجان تنشگ
انفتح الباب وفزيت فات صياد
مبتسم وعيونه عليه
سحبت شعري خليته على جتفي
ودنگت راسي شبي هاذ و عش اجه
رفعت عيوني ادحگ علي جان مركز بيه
توترت گمت التلفت حواليه وامسح بشعري
تمشى بتجاهي وجان يندگ الباب
التاف وفتحه
فاتت دله وجان تخلي صينية العشه بالگاع
وحجت ويه صياد ببتسامه
دله : تحتاجون شي بعد
صياد :تسلمين عسا لا شافت اديج الهم. ام باهي
ليال : ما اريد عشه اني مو جوعانه عش كلفتي نفسج
دله : ماكو كلفه خيتي هاذ عشاكم
اترخص منكم
ليال : گالتها وحدرت خجلت من نفسي شلون جابتلي العشه واني صرت ضره عليهن الحمد لله انهن يدرن هاذ زواج مو صحيحي
ظليت على وگفتي
وصياد گعد يم الصينيه وناداني
صياد : تعاي تعشي يابه
ليال : استغربت هاذ يريد يتعشه هين
... شكرا مو جوعانه والله اكلت العصر ويه جهالي
رحت يم الميز وشلت الثوب تا يفتهم اني اريد ابدل
ويحس على روحه ويطلع
بس اشو ابتسم وشال الصينيه
صياد : عجل اني هم مو جوعان
ليال : وگف بالباب وجان ينادي
صياد : يربعنه
ليال : اجو اخذو منه الصينيه وسد الباب
التاف يدحگ عليه شنهي السالفه هاذ مو شافني اريد ابدل ما يفضني يطلع بلعت ريگي دنگت
... ابو نشمي من رخصتك اريد ابدل
رفعت عيوني شفته يبتسم ويهز براسه نزع الجناد وخلا عالكومدي بصف الباب واجه وگف گدامي
نظراته تربك ما عرفت افسرها
اعرف نظرته الي تخوف بس هاي لا
مركز بيه وعيونه تلمع وتفحص كل وجهي
ارتبكت نزلت عيوني تا احجي ويا جرني لصدره ولف ادينه عليه سحب شعري وشمني من رگبتي احس تكهربت اريد استوعب تخبلت حطيت اديه بصدره ودفعته
تراجعت وره واني مصدومه
وامسح برگبتي واتلفت اريد احجي ما اگدر
امتمت واگطع بالكلام
:شجاي تسوي بس لا تكون صدگت احنه عرسان
ابتسم وهو يجاوب
صياد : عجل احنه شنهي اذا مو عرسان ليالي
سنين واني اتاني هاليوم وتگولين مو عرسان
ليال : سنين شنهي شجاي تحجي عيب عليك لا تنسه زواجنه على شنهو اني اشوفك بالعين الجبيره لا تخرب صورتك گداميي اطلع واني راح انسه الي صار گلتها واني مخنوگه واحاول اقوي نفسي
عصر ايده ومقلص عيونه عليه
مشه بتجاهي واني اگحز وره لحد ما لزگت نفسي بالحايط كورت اديني على صدري وادحگ بعيونه
سند ادينه حواليه بالحايط تحاصرت
: ابو نشمي شهل تصرفات والله عيب عليك
صفن بوجهي وتنهد
صياد : 14 سنه ضام عشگج بگلبي ليالي
كل هاي السنين گضيتها واني اتحسر اشمج واتوسد شعرج الي اخذ عگلي
وهسع تگليلي اطلع
واني گضيت عمري انهزم منج عليج
هاي ليلتي الي اتانيها من سنين
عليش خايفه مني
ليال : انصدمت شفايفي ترجف
ليلة وعشگ شنهي شجاي تحجييي
... گرب راسه يم اذني وهو محاوطني
صياد : عشگج الي ذبحني وشل حالي ليالي
عشگج الي تعده الأستكانه والوصب
ليال : لزم رگبتي بأيده ويشمني وينثر بشعري
فاتحه عيوني مصدومه اديني ترجف مگدر احجي
رجليه تختض اريد اصرخ ما اگدر
صياد : اريدج لنفسي ملكي حبيني مثل ما حبيتج
ليال :حطيت اديني بوجهه ودفعته
لزمت راسي اريد استوعب الي اسمعه نهاريت
معد اركز گمت احجي بصوت عالي
شبيك انته شجاي تحجييي عشگ شنهي امت عشگتني وشلون اني حت ما اعرفك يادوب التقينه جم نوبه لا تجذب عليه وتريد تستغلني وترضي شهواتك مو تدري زواجنه شنهي اساسه استحي على روحك عندك الي مكفيك
عگد حواجبه وگرب مني گحزت وره
عثرت بالجنطه وجان اگع
اجه لزمني وجرني لحضنه
دفن راسي بصدره وحجه بحسره
صياد :من زمان احبج يا بنت الناس من اول ما شفتج بعرس غازي وسعاد عشگتج وهويتج شفتج زغيره عليه ما اتحمليني ولا اناسبج عفتج ودفنت العشگ بگلبي تالي اخذج الي ما يستاهل يلمح خيالج
اخذج مني والقدر رجعج عليه
بشنهي استغلج واني اغار واخاف عليج مني
وعندي الي مكفيني صحيح
بس انتي الي يريدها گلبي يا ليالي
ما اخذتج لشهواتي اخذتج لگلبي طلبتج لنفسي ورضيتي ليش هسع تعاندين لا تخربين هاليوم الي اتاني من سنين ارحمي بحالي
ليال :حاضني ويحجي واني افالت
نهزمت منه ورحت يم الكنتور واحجي بعبره
: امت طلبتني لنفسك مو گلت بس تعقد عليه وتجمعني ويه جهاليي وهاذ الزواج مو صحيحي ليش تجذب وهسع تگول احبج ومدري شنهي
مسح وجهه وگز على سنونه
اجه يمي حاولت افلت ولزمني لزگني بالكنتور وعيونه بعيوني ويتنفس بقوة
صياد :لا تجاوزين يا بنت اني مو جذاب من البداية دزيت عليج وگلت اريدج لنفسيييي اريدج ملكيي
ما رضيتي وخليتي شورج بيد الجهال
وگعتي نفسج بهبيه تلاحگتج بأخر نفس
ورحت طلبتج انوب لنفسي مره اليه ورضيتي شلون هسع تگولين زواج مو صحيحي
واطلعيني جذاب والله لوما متربعه بگلبي الا اگص السانج على هاذ الحجي الي ما سمعته من اشجع زلمه واجهته
ليال :واگف يرعد بوجهي واني جسمي كله يختض احجي واغص بالكلام... .امك وديالا وجوانه همه گالو زواج مو صحيحي ورجعو انوب كرروها من خطبت واني رضيت لهاذ السبب كل همي اريد انجمع ويه جهالي ما اريد زواج
غوشو عيوني خفت اخرب تنهد صياد وحجه بهدوء
صياد : مصار شي هسع بعدني على كلامي اجمعج ويه جهالج وشتريدين عين عيونج اخليج شيخه
يتمنن النسوان الي ظلمنج عيشتج
ما اخليج بعازة احد واصيرلج جبل بضهرج شحده الي يمسج بجلمه وانتي مرتي وحبيبتي
ليال : يحجي ويشم بيه
تخبلت گمت ارجد بروحي نزلت ومرگت من جوه ايده نهزمت يم الشباك واغص بالحجي
: عوفك من كلشي خلص بطلت بعد ما اريد شي
رجعني لهنه يم جهالي واني اشتان بروحي بعد
اذا تشوفهم يوروني بعد لا تفزعلي خلفله عليك
تنهد ومسح لحيته ويستغفر
اعصابه صارت نار اجه عليه نهزمت
ولزمني من وره لف ادينه على خصري
صياد : بحياتي ما ترجيت احد كلشي اريده اخذه بگواة ذراعي وهسع اني اترجاج لا تورمين گلبي
الي ينادي بأسمج وينبض بيج شلون اعبرلج وافهمج اني اعشگج
ليال : فلتت منه ونهزمت عالباب افتح بي ماكو مقفول دحگت عالجناد بي خنجر اخذته
اجه تا يلزمني صعدت عالجربايه عبرت من فوگاهه وجان ارهنه بالخنجر واصيح علي
..ليش قفلت الباب شتريد مني وخر خليني اطلع
صياد : شايله الخنجر عليه تريد تذبحيني
ليال :جاوبته بشهگه ودموعي تصب
اي اكتلك يا ويلك تگرب عليه والله اموتك
قلص عيونه ويدحگ عليه يحد بسنونه گرب مني
خفت وتراجعت وره وراهنته بالخنجر ايدي ترجف
سند ادينه عالحايط حاوطني والخنجر صار بصدره
صاك على سنونه ويحجي
صياد : شنهو ظل بيه وتكتلينه يا ليالي
سنين صارلج تذبحين بيه وريتي گلبي وشليتي حالي
عذبتيني وشيبت گبل حيني
شظل وتكتلينه يالذيبه اني مذبوح بيج ليالي
ليال : ضرب ايده بالحايط بصف وجهي وگال
صياد :ارحمي عزيز قومً ذله العشگ ليااالي
ليال : ارتعبت جسمي كله يرجف لزمت الخنجر بديني ثنين وابلع بريگي
اريد ادافع عن نفسي شفتي ترجف وامتمت
ـ وخر عني تره اموتك والله ما اخاف اني اسويها
واتعدها كافي عذبتوني شسويتلكم انيي ما احبك خوش ما اريدك ولا راح احبك بيوم
سحب ايدي وحط الخنجر على رگبته مدنگ عليه گصته على گصتي ويتنفس سريع
صياد : يالله اذبحيني يا ذيبتي
لا ترجفين اذبحيني اذا ردتي الخلاص مني
مزال بيه نفس ما اهدج ولا اعوفج انتي ملكي ان رضيتي ون ما رضيتي
بس الموت يخلصج مني
ما صبرت كل هاي السنين تا اعوفج واخليج تروحين انتي مزروعه بيه ساكنه هين وهين
ليال : يأشر على عقله وگلبه اخذ الخنجر من ايدي ولگحه سحبني وحاوط خصري بأيده وبيده الأخرى حضن ضهري عصرني دفن راسي بضلوعه ويهمس يم اذني
صياد : اليوم اطفي نار گلبي كافي صبر
ليال :كسر عضامي حاضني بكل قوته گمت افالت منه مو بشر هاذ حديد علت شهگاتي اصيح عوفني بحالي حرام عليك ما اريدك اني لو تظل بس انته بالدنيا ما احبك ولا اريدك اموت روحي
كمش وجهي وباسني حسيت شفتي انشلعت
گمت اشيل بروحي وارجد واضرب برجليني بالگاع
هدني مسحت اثمي وقرفصت بالگاع وابجي
ـ حرام عليك تسوي هيييج بيه شسويتلك انييي شسويتلك
اريد جهالي وينهم خليني اروح امانه جهالي هسع يدورولي
ابجي واشاهگ والم بروحي خايفه منه
گمت ادور عالخنجر گمت بساع رحت شلته ورهنته انوب وعزمت اذا ما خلاني اطلع اموت روحي
غمض عيونه وسحب نفس بعدم صبر
اجه واخذ الخنجر مني انوب ولگحه فوگ الكنتور
گمت افالت وادفع بي وگعني عالجربايه لزم اديني ثنينهن جتفهن يم راسي ويبوسني
ظل فتره الا طلع روحي
نزل راسه يشم برگبتي ويبوسها صديت بصفحه وابجي بعبره
... .مو گلت ما تريدني لشهواتك شجاي تسوي هسع
تگول شي والفعل شي شهگت بعبره مثل الطفل جوا
رتخت قبضة ايده وهد اديني وگف على طوله
ويمسح لحيته
گعدت لميت نفسي واغطي بصدري ودموعي تصب
مدنگه واحجي
... جنت اشوفك بالعين الجبيره واگول رجال ما منه ثنين جنت مكيفه احد طلعلي ومدلي ايد العون بدون مقابل
تالي غدرت بيه واخذتني بالحيله تا ترضي شهواتك اخذتني طمع هم لو ما عندك نسوان جان فتهمنه بس خيرك جثير ومكتفي ليش سويت بيه هيج
حط ادينه وره رگبته وفتر بالحجره صد غاد وجفاني
ظل فتره وجان يجي عليه
خفت وگحزت عالجربايه دحگلي بنظرة اسف مثل النظره يوم اجه فكني من شكحه من مات صائب
بلل شفايفه ويمسح بلحيته
صياد : والي بعث محمد بالحق
ما اخذتج بالحيله دزيت امي وگلتلها اريدها زوجه اليه من كلشي ودزيت خواتج وگلت لأمي تفهمهم نفس الحجي
ما فعلتي وخليتج براحتج وظليت ارابي علومج اخاف عليج اني الي ما خفت بحياتي غديت ما انام الليل اخاف عليج يا بنت الناس
والله ما اخذتج لشهواتي اخذتج لگلبي حبيتج
وهاذ مو بيدي لو اگدر جان طلعت گلبي من مجانه وشوفتج الحال
ليال : شجنت تسوي گبل شوي هاا ردت تاخذني غصب عني لا همك دموعي ولا توسلاتي كل همك جان ترضي رغباتك
تخصر وصد بصفحه يهز براسه بأسف
ويمسح رگبته
صياد : انسي الي صار الله يلعن الشيطان
ليال : لا ما انسا وهسع اريدك ترجعني منين ما جبتني بعد ما اريد احد منكم لا انته ولا اهلي كلكم غدارين شكحه اخير منكم على اقل جانت واضحه من البدايه انها تكرهني وبحياتها ما راح تحبني
صك ايده وغمض عيونه ويرجع يفتحهم وخازرني
صياد : الضاهر انتي ما ناويه تكبرين راح انطيج على گد عقلج واجاوبك بالحجي الي يوالم تفكيرج
اسمعيني زين وركزي بالحجي
مزال تگولين اخذني لشهواته
اخذيها مني كلام ارجال ما اجوسج اذا مو برضاتج
وسالفة رجعني لهلي وما تظلين هين
هاي گطنه وشيلها من اذنج طلعه من هاذ البيت ما تطلعين الا اذا ردت اني اخذج بيدي وارجعج بيدي
ان رضيتي او لع انتي مرتي حلالي ملكي
ليال : تعصبت وگفت گباله
... هاي مو بكيفك لا تصدگ روحك ما اظل هين وباجر اطلع منا وارجع لهلي
لزمني من ايدي وگاز على سنونه
صياد : اخذت اربع نسوان گبلج ما وحده منهن تستجري ترفع حسها جدامي لا تشوفيني كارص يا بنت اني ما احب استگوي على مره
تأدبي واعرفي حدودج
ليال : هد ايدي بهدوء وجتف ادينه وراه
وكمل كلامه
صياد :من يوم الي عقدت عليج انتي صرتي مرتي
وكلها عرفتج مرتي راح يقدمولج حترام ما تلگينه بأي بيت وكلها تحسبلج حساب
وانتي بالمقابل احترميهم واحسبي حساب
ليال : الي يسمعك يگول اني افتر واتغلط،عالناس
ابتسم وهز راسه
صياد :ادري بيج خلوقه وما تغلطين القصد تحترمينهم بحشمتج بحجابج ولبسج واسلوبج
والحس العالي ممنوع يا ليالي انتي بنت الدرويش ومرت الصياد خلي هالحجي ابالج
ليال : لحالك تحجي اني ما اظل هين ومن باجر اروح وما تشوف وجهي
ضحك وجان يروح يمدد وطلع جگاره
صياد : تسمحين ادخن بحجرتج
ليال : صديت بصفحه وجتفت اديني ما حجيت
ورث الجگاره ورجع ضهره عالحايط يدخن
وگفت بمكاني ما ادري شسوي مر الوكت واني مجتفه اديني وافتر وهاذ يدحگلي بطرف عينه
: اغفي اريد انام
صياد : ومن گاضبج يابه تعاي نامي
ليال : وانته بس لا تريد تبات هين
صياد : عجل وين اروح
ليال : عندك ثلاث نسوان روح بات يم وحده منهم
فرك گصته وخله ايده وره راسه
ويدحگ عالسگف
صياد : ما يرهم بيوم عرسي ابات بغير حجره تحمليني بس اليوم تعاي نامي ورتاحي انطيتج جلمه ارجال ما اجوسج تره لو اريد هسع شابع بيج ومكتفي
ليال : گالها وگام بدل صد عليه نص التفاته
صياد : راح تنامين بالبدله
تعاي بدلي يابه ورتاحي
ليال : شلون ابدل وانته هين
صد عالكنتور ابتسم وفرك عيونه
اجه يمي وفتريت انهزم لزمني وجان يفتح سحاب البدله وراح نام وحط ايده على عيونه
لزمت گلبي شگد خفت رحت عالكنتور فتحته اشكال الملابس وكلها طوال وعريضه
وستيات نوم من كل لون
غدي سديت الكنتور وما اخذت شي
رحت فتحت الجنطه مالتي وطلعت دشداشه حمره گصيره لزمتها وتنهدت بقهر هاي عود گلت اخذ راحتي والبسها بالحجره وحدي شلون هسع بيش ابدل هذنيج الملابس ما ينام بيهن طوال وعراض هذني اگعد الگه نفسي متصلخه
نزلت اردانات البدله وجان البس الدشداشه
وسحبت البدله من جوه لگحتها على صفحه
طلعت مشطي ورحت گدام المرايه امشط
دحگت على رگبتي هاي شمسوي بيه
ختنگت وگمت ابجي كتمت صوتي بأديه ثنين
شيجيب باجر وانهزم من هين صبرت نفسي وتشجعت اصبر مسحت دموعي
دحگت على صياد جان مجتف ادينه ومغمض شگد كرهتك ونزلت من عيني ضيعت كلشي زين سويته بعملتك هاي
شديت شعري بربطه من النص وگمت افتر شلون انام هسع ماكو حت دوشگ بالگاع غير الكمبار
ظليت افتر الا دخت وتعبت رحت فتحت الغطه وجان انام عالطرف حطيت ايدي جوه خدي دموعي تحدر على ايدي كل ما اغمض تطلع گبالي صورة عمر وعثمان شلون حالكم هسع شگلتو من دورتولي
حطيت ايدي على گلبي وادعي ربي يحفظهم ويصبرهم ويخلصني من هاذ البيت
ظليت افكر وابجي ما ادري امت نمت
فزيت على صوت صياد ولمسات على خدي
فتحت عيوني بتعب بعدني اغفي شفته گبالي راجي ادينه عالجربايه ومبتسم
صياد : گومي يابه صلي الفجر
ليال : فركت عيوني وگمت شاف دشداشتي گصيره ابتسم وهز راسه
راح فتح الكنتور وطلع وحده حمره وطويله
صياد : البسي هاي خوما تريدين تگفين جدام ربج بثوبج هاذ الي ذليتي عباد الله بي
ليال : اخذته منه ولبسته فوگ ثوبي
وردت اطلع
صياد : اواش
ليال : صديت علي ..هاا شنهو انوب
صياد : وملفع ما تلبسين
ليال : واني وين طالعه الدنيا ليل وماكو احد
صياد : وذا الدنيا لليل ولدي واخوي هين
ليال : اي اعرف ولدك وشاكر عش لو تلفعت
صياد :استغفر الله ياربي الصبر يا خالق الصبر
يا بنت احد گالج ولدي وشاكر مو زلم
ياالله يابه تلفعي وخن نطلع فضيني
اريد الحگ بالصلاة
ليال : اخذت ملفع وتلفعت ظل شعري طالع من جوه
راح جاب صايه ولبسني
فكيت اثمي هاذ شبي يربي
ما عاندت ولا حجيت
صبرت نفسي يالله ما ظل شي وتطلع الشمس واخلص منك مشينه بره وجان اتوضه ورجعت عالحجره وهو راح دگ الباب على ولده ونسوانه گعدهم عالصلاة
كلها گعدت حت الزغار اخذ الولد وراح عالجامع والنسوان كلمن صلت بحجرتها
لميت مصلايتي ورحت نمت
هالگد ما اغفي بس حطيت راسي عالمخده غفيت
بي الوعي والا وعي حسيت شي يلامس شفايفي
وعيوني تملمت فتحت عيوني شفت صياد گبالي نايم هاذ امت اجه ما حسيت علي
رجعت نمت
امل : الليل كله وعمر وعثمان يشاهگون
مردو گلوبنه مرد حجينالهم كلشي ولا صدو ولا ردو نمت وهمه بعدهم مغطين روسهم ويگهدون
گعدت من الصبح ما لگيتهم بفراشهم عبالي طلعو بره يفترون گمت دورت البيت كله وماكو هذول
رجعت گعدت عماد وجاهد
راح جاهد يدورلهم
سعاد : سجرت التنور تا اخبز
رحت تا اجيب العجين وجان اشوف عمر وعثمان اجو يركضون علينه وصلو يم الطرمه ويلهثون
رحت يمهم گبل لا يدگون الباب على شكحه
لزمتهم واسأل بيهم شجابكم يولو امشو ارجعو
وگف عمر وهو گوه يتنفس وحسه مبحوح
عمر : وين نرجع
سعاد : يم خالك عماد تا امك تجي تاخذكم امشو ارجعو گبل لا احد يشوفكم
عمر : امي عافتنه وتزوجت جنت ما اصدگ جده شكحه من گالت امك تريد تعرس وتاخذ صياد
گالت من زمان يريدها وتريده ما جنت اصدگ واتكاون وياهه
خلت خالي جاهد يلهينه بالمحل
وتزوجت انتي مسويه روحج ما تندلين خاله سعاد
سعاد : فكيت اثمي عليهم وما عرفت شحجي هاذ جانت شكحه تحشي بمخه وهسع تأكدله الحجي بعد ما يصدگ احد
راح دگ الباب قوي رجده
طلعت شكحه وجان يدفعها ويفوت جوه هو واخو
لطمت على وجهي ورجعت صفنت بزماني همد التنور وراح وما خبزت الا سجرت انوب
يول يمگروده يا ليال وين نايم حظج اريد افتهم
ديالا :اليوم ابو نشمي عن غير عادته ماكو بالساحه مال التدريب بس وادي واگف بيها ويتدرب وحده
شنهي بعده نايم معقوله هو ما يحب النوم ابد
گمنه نولم بالسفره مال الريوگ وجان يحدر
صياد مبتسم طب الهول وكلها وگفت بوجهه
وتباركله تشكرهم وگعد
جوانه صدت عليه نتسائل بالنظرات
وينها ليال محد يستجري يحجي ويسأل واني احوص تا اصعد عليها بس مگدر راح يحس عليه
كمل ريوگ گبلهم وراح صب جاي
شربه وگام
صياد : شيخه من تگضين الريوگ بلا امر عليج اريدج بسالفه
ديالا : گالها وطلع والشيخه كملت وگامت وراه
شويه ودزو علينه اني وجوانه ورحنه يمهم بحجرة الشغل جان صياد مشتعل نار ومنزل عيونه گدام امه والشيخه تحجي ويا بكل برود صد علينه وسألنه من رحنه خطبنه ليال اول نوبه شنو گنالها
حجيناله الصار تعصب و صد بصفحه
مغمض عيونه وصاك على ادينه
طلع وهو يفور نار
جوانه : شيخه شبي عمي
جرت حسره وحجت
خزامي : ابو نشمي ما گال اتزوج ليال بس جدام الوادم هو من البداية گال اريدها مره اليه من كلشي
بس اني اعرفها ما جانت راح ترضه وسويت هاي الحيله عليها وعليجن وجانت غايتي ارضي ابني واحمي ليال سامحني يمه غلطت اعرف
ديالا : نزلت عيوني وما حجيت شيفيد العتب
هسع... بس ظلت حيرتي ويا صياد هوه شلون جان مخلي ليال باله اني اتذكر مره سمعته يحجي للشيخه على وحده يعشگها ...صفنت ويه روحي معقوله هاي ليااال فكيت اثمي وجان اطلع حرت بزماني يربي ابو نشمي عاشگ ليال من زمان
ناداني شاكر ورحت يمه الا صخنت من التفكير
كملت شغلة شاكر وطبيت جوه صعدت فوگ ورحت وگفت گدام حجرة ليال وينها هاي ما گعدت الساعه 8 ونص
مديت ايدي تا ادگ الباب اجاني صوت صياد التفتت
صياد : عوفيها نايمه الليل كله تفز ما نامت
ديالا : رجعت وهو طب الحجره
حدرت جوه رحت عالهول نشمي شايل عذباء وكلها ملتمه يمه تريد تشيلها حت باهي وساجي يتوسلون بي ودله وهاذ معند
انتبهت على وادي جان حاط ادينه بجيوبه ويدحگ على عذباء ومقلص عيونه ظل مركز بيها
هز راسه وطلع
اكيد بعقله يضحك على نشمي وسوالفه
ليال :اول ما فتحت عيوني واشوف صياد مرتاج مغمض عيونه وشايل شعري يشم بي
فزيت وسحبت شعري منه رفع عيونه عليه بكل هدوء
صياد : صباح الخير يابه عش گعدتي ارجعي نامي
ليال : عدلت نفسي بدون ما اجاوبه
حدرت من الجربايه الم بشعري واحجي
اريد ارجع لهلي توديني لو اروح وحدي اختار
وگف وجان يجتف ادينه وراه
صافن بيه ويحجي بكل برود
صياد : العروس تسير لهلها وره السبعه
تبشرين اني اوديج بيدي
هسع روحي البسي شي طويل وتلفعي وذا ردتي حدري جوه سلمي على عايلتج الي راح تعيشين وياهه
ليال :تعصبت تفضت اديني... شجاي تحجي انته وجهاليي
صياد : رايح اجيبهم
توصين على شي من غادي
ليال : لا تجيبهم اني اريد اروح
ما جاوبني وفتح الباب تا يطلع رحت يمه تا اطلع هم لزم ايدي ولزگني بالحايط وصاك على سنونه
صياد : لا طلعيني عن طوري يا بنت الناس
خلي النمر هاجد بمجانه
ليال : گالها وطلع وگفت بالباب ادحگ علي يمشي بثگل حدر جوه وصعد وراه واحد من ولده يشبه
اي هاذ صديق عمر وعثمان... شبي هاذ واگف ويدحگ عليه رافع تك حاجب صد بصفحه وبتسم وراح لحجرته
گمت افتر بالحجره شسوي يربي گعدت بالگاع ولازمه راسي شلون راح اجيب جهالي هين ما اريدهم يجون
اريد اني اروح
امل : رجع جاهد فاحط من الركض
عماد : هاا يول ما لگيتهم
جاهد : راحو على بيت شكحه ما گدرت افوت عليهم شفتهم من بعيد ورجعت
امل : يبو يهالعثره شوداهم
ظلينه نلوب وراهم ونفتر اجه صياد وطلع عماد تلگا حجه ويا وجان يتعصب ويروح
سعاد : ما ادري شلون شتغلت وريگت عيالي
گلبي يرجف على هذول المعثرين الي ردو يم شكحه عجوز البين
اخذت المحواسه ورحت زعم احوس الگاع الي بيني وبينهم تا بلكت يطلعون عمر وعثمان واحجي وياهم
تالي سمعت حجي شكحه
شكحه : ها عمر شگتلك شفهمتك امك من زمان تريد بهاذ الزلمه يمكن حت من جانت عد ابوك دخيلنا الله
شفت هسع شلون تزوجت بدون علمك وبالبوگه حت احنه ما ندري بيها
اني ردت اخذها لعمك بركات علمودكم تا تظلون يمي بس هيه ما فعلت شفت وليدي شلون لافتها عليه وتهمتني زعم سويتلها عمل منين اسويلها عمل اذا لا طلعت ولا جيت
عمر :كافي تسولفين انتي هم من وراج راحت امي
كلكم اكرهكم لا احبج ولا احبها اني رجعت هين عبن هاذ بيتي وبيت اخويه ما اريد اظل يم احد
گومي من يمي خن اكل بتهنا
سعاد :اعصابي غدت نار اريد افوت على شكحه اگضي بيها التوبه بس مگدر ولدها هين خاف واحد بيهم يضربني ويجي صياد يورهم
التفتت وعلى طاريه شفت سيارة صياد
ظليت على وگفتي حدر وهو عاگد الحواجب سلم عليه وسأل عالولد
... اي هينه عمر وعثمان
صياد : بلا امر عليج دگي الباب وتعاي
سعاد : رحت دگيته ورجعت
طلع بركات وسلم على صياد وظلو شويه يحجون.
صياد : جيت اخذ الجهال على امهم ناديهم بالله
بركات : تعذرني بس هذول ولد اخويه وما يروحون لمكان
صياد : القرار لا يمك ولا يمي اذا رادو على امهم لا انته ولا عشيرتك تگف جدامي ناديهم عندي مشاغل جثيره
سعاد : راح بركات ناداهم بدون ما يحجي وصياد
ظل جاتف ادينه طلعو عمر وعثمان وگفو گدام صياد
عمر : شعندك اجيت شتريد
صياد : امك دزت عليكم تعالو وياي
سعاد : تعصب عمر وبدون ما يحجي راح جاب الكرك
وجان يگع ضرب بالسياره مال صياد كسر الجام وفلش السياره لطمت وجهي وبركات راد يحجزه وما خلا صياد
صياد : عوفه لا تجوسه
سعاد : ظل جاتف ادينه ومبتسم ويدحج على عمر يفلش بالسياره صد عليه وگال
صياد : بالله عليج الي يشوف هاذ الذيب يصدگ امه هذيج الخوثه الفاهيه
يتبع......... .