و اعظم الحـب حبُ لا نبوح به
لكن أشواقه تغزو قوافينا
متى أنام بلا شوق ولا أرق
ودون ثرثرة للعقل تؤذينا
وكيف أحضن طيفا منك
لعل ضمته تمحو مآسينا
ذكراك؛ كم ألهبت روحي وأوردتي
وكنت أحسب طول العهد يُنسينا
عرين الصياد بقلمي شذرة
خزامي : وين نروح عجل اذا مو بيتنا
صياد : على بروانه اريد ادحج بوجه عماد
من يشوف حالة اخته الي عافهااا تروح من جدامه بكل هواده
خزامي : يوليدي عماد المگرود شطالع بيده
ما يگدر يصلها تدري بي اذا راح ينجتل
ديالا : تعصب صياد وضرب الستيرن الا فزينه
صياد : ادري بي ما يگدر يصلهااا
بس جان كلشي بيده كلشييي ليش من البداية خلاها تروح جدام عينه يدري بيها عقل ما براسها هو الفهيم شلون رضاها شلون
خزامي : يوليدي هيه عندت محد گدرلها احنه كلنه جنه موجودين وشفنه
صياد : وذا عندت جان يگدر يحط عليها راشدي ويخليها يمه غصب عنها مو يضعف ويروح يتبره منها جدام الي ما تسمه وهو يعرفها بنت ابليس
اترجاج يا شيخه لا تفورين اعصابي السموحه منج عوفوني لحد يسولف وياي
ديالا : انعصر گلبي دحگت على جوانه وما حجينه شي كتفينه بالخذلان والحسره رجال غريب يدافع لأختنه وگلبه وار بنار واحنه ما بدينه شي
حاطين ليال بيناتنه وگوه لازمينها
صياد يريد يطير بالسياره واعصابه نار كل ما تجي عيني عالمرايه اشوفه يدحگ على ليال ويصك على سنونه
الطريق طويل وانوب من وره حالتنه وقلقنه صار علينه طريقين حالة صمت محد يحجي
ماكو بس صوت ليال وهي تعن وخازرتني عيونها تخوف هنه كبار وانوب فاتحتهن ما گدرت اركز بيها
گامت تمط بنفسها صارت عبالك خشبه تهز براسها تريد تفلت واديها اريد اطبگهن بعد مگدر
عمر وعثمان بالصدر گاعدين
وعدهم عذباء اسمعها تناغي وتلعب ما تدري بالدنيا شي نولدت بدون اب وانوب تشردت لگينها بأطرف العرب وامها مخبله صفت من ايد لأيد
طول الطريق ودموعي تصب ما بطلت بجي لحد ما وصلنه بروانه
مرينه على محلات عماد ولگيناهم مقفولات رحنه عالبيت اول ما وصلنه وحدر صياد ودگ الباب قوي
طلع علينه علي ابن عماد سلم علينه وحيالنه جانت حالته تعبانه عاط بي صياد
صياد : وين ابووك
علي :مو هين تفضلو جوه
صياد : ام صگر اخذولي طريق بساع
ديالا : اجه صياد وجر ليال وشالها وهاي ترافس
جوانه حدرت وشالت عذباء وعمر وعثمان يدحگون على امهم ويبجون
امل : جنت اعزل بالحجره وادحگ على ملابس ليال
الي خلتهن هين وراحت غمضت عيوني بقهر
شحالها هسع شسون بيها
صافنه ويه روحي وسمعت الباب اندگ عبالي الجيران گمت بتعب تمشيت عالباب وجان اتلاگه ويه ديالا تفاجأت
ديالا :طبيت جوه تلگتني امل بالباب بدون ما اسلم عليها گلت… انطونه طريق ابو نشمي يريد يفوت عالبيت
امل : دحگت على صياد فات شايل ليال لافينها بجرجف وشادين اثمها بربطه انصدمت فتحت عيوني على كبرهن
طبيت جوه ناديت على هاجر تلبس حجاب
رجعت عالحجره لميت الملابس المنثوره
راحت ديالا ونادت صياد
اجه حط ليال بالحجره وگامت ترجد بروحها
يمكن لوما مجتفينها تاكلنه هاي شبيها يربي
ــ جان صياد متعصب ومنفعل
صياد : ناوشيني اي شي اسود
ديالا :دحگت حواليه تناوشت ملفع امل اسود اخذه ويشد عيون ليال وجان تهجد ودنگت راسها عبالك نامت طلع بره بساع وجان يگف بالطرمه وگام يصفگ بأدينه الگاع مجاي تشيله من اعصابه
سديت الباب على ليال وجان تطلع امي مريضه تسحل بروحها شافتنه وگامت تبجي
تريد تحجي ما تگدر من المرض والتعب عمت عيني عليج… هاي شصاير بيها امي
جرتني امل وحضنتني وتبجي وتشاهگ بعبره
اجت جوانه شايله عذباء سلمت ودموعها تصب
محد بينه يحجي كتفينه بالبجي اريد اكتم دموعي معد اگدر
امل :اريد افتهم خاف اني حلمانه هاي شصاير يولي شبيها ليال وليش عفتونه محد مر علينه
ديالا : بغصه… اني الي اسألج يا امل شصاير بيها امي اشو منتهيه وعماد وجاهد وينهم وانتي شنهي هاي حالتج ظاله بس عضام
امل : ابتسمت بقهر وادحگ عليهم
… شزايد علينه گاعدين وحدنه بداير الغرب يرادلي شهر تا اخلص حجي بالصار بينه
گليلي هسع ليال شبيها
ديالا : شنهو الي مابيها ليال مخبله لگيناها بتالي روح سولفي انتي عماد وجاهد وينهم
امل : لزمت كتوف ديالا وفكيت اثمي شنهي مخبله ليال شجاي تحجين انتي يمعوده
ديالا : هيج لگيناها ابيت شكحه مخبله تشگگ ملابسها وتنهزم عالشارع لگينه جهالها رابطينها بحياتي ما شفت هيج حال شمعرفنه احنه
ابو نشمي يگول هاي مسحوره
امل : گمت امتمت وادحگ عليهن مصدومه من كلشي
سحرنهااا الي ما يخافن الله خبلنهاا وين عنهاا انتو وييين
ديالا : وين عنهااا اني جنت بالضيم يا امل محد جان يتهياله يحك راسه ابو نشمي نسجن والشيخ تمرض ويوميه مداهمه عالبيت وربعنه لازمين واجبات منين يتهيالي اشوف ليال واني يادوب انام بالليل اربع ساعات
جوانه : ديالا عمي بره ينادي
ديالا : مسحت دموعي وطلعت ارجف وبطني توجعني
صياد : يالله تا نمشي ورانه طريق
امل : وين رايحين ابو نشمي ظلو شوي خلوني افتهم تره بعدني مخربطه شنهي انته جاين مسجون واني اگول عش محد وصلنه اثاري انته ماكو الحمد لله على سلامتك
صياد :الله يسلمج ويعزج بيتج عامر ما نگدر نظل
وصلي سلامي لأبو علي جبتله امانه اذا ما يريدها وبعده متبري منها يدزلي طارش
ديالا : امل جانت تفرك بأديها وعيونها مغورگه والعبره حاشره بصدرها ما تحملت وجان تشهگ وزادت بالبجي نهد حيلها ونخرطت بالگاع لزمناها اني وجوانه ونريد نفتهم شكو
امل : هوه وينه ابو علي واوصله سلامك يخوي
ضعنه كفيلك الله وصل بيه الحال ادعي ليل ونهار تا تجينه انته وتلحگنه
ديالا : فتحت عيوني وادحگ على صياد عگد حواجبه وذب الجگاره من ايده
صياد : وين رايح ابو علي شبلاكم شصاير
علي : ابويه وعمي جاهد صارلهم اربع شهور بالسجن
ديالا : صرخت وحطيت ايدي على اثمي
صياد : شجاي تگول يول سجن شنهي
علي : والله هاذ الي صار ابويه وعمي تكاونو ويه ناس من وره المحلات وهذولاك شتكو على ابويه وعمي
اجت الشرطه شالتهم وجدتي معاضد تمرضت وراهم صار بيها سكر
ديالا : تخبلت گمت الطم على وجهي واصيح وجوانه تبجي ومجلبه بيه معد اگدر اتحمل شجاي يصير بينه احنه ليش كل هاذ القهر ليش
طبيت واصيح بعلو حسي
امل : ملخت نفسها ديالا وترجد بروحها
والشيخه وجوانه لازماتها گامت تصيح بعلو حسها
الا نهارت وجان تگع ما ظل بيها حيل
معد اگدر اتحمل تربعت بالگاع
وطلعت ضيم گلبي الي كاتمته صارلي اربع شهور
امثل على عيالي وجهالي زعم اني القويه وصرت رجال البيت بغياب عماد وجاهد
هذول ثائر وعلي معد نگدر نخليهم يطلعون گمنه نخاف من كلشي تبهدل حالنه خلفله عالجيران تجي تشوفنه
ديالا : امدده بالگاع وراسي بحضن جوانه حيلي مهدود عيوني جف بيهن الدمع جابولي مي شربوني وغسلو وجهي جمعت قوتي وطلعت على ابو نشمي دز عليه جان يفتر بالطرمه وصاك على سنونه
صياد : يالله يابه خلونه نمشي طريقنه طويل
ديالا : واهلي ابو نشمي اخليهم وحدهم فوگ همهم واخواني ماكو وامي مريضه انوب جبنه ليال مريضه عليهم
غمض عيونه بقهر وضرب الدنگه بوكس گامت ايده اطلع دم
صياد : اني ما گلت لزلمجن راح اجيبجن لبروانه مگدر اخليجن هين امشن اوديجن وتعالن وياهم
اريد اتلاحگ عماد وجاهد يالله يابه اصعدن
ديالا : لزمت بطني من الوجع وسندت نفسي على جتف جوانه ومشيت ودعت امي
وامل وصيتها بليل وجهالها
امل : انتي گوه تمشين يولي شبيج
ديالا : بطني گامت تگطع بيه
عينج من هين يا امل ولا ديرين بال ابو نشمي راح يوصلنه ويرجع
بعون الله ما يخلي الولد بالسجن
امل : بدون ما تگولين اني بس شفت ابو نشمي ستبشرت خير يالله توكلو درب السلامه
ديالا : سحلت روحي وصعدت گوه
مشينه مسافه ولعبت نفسي من حلات روحي لزمت جتف صياد تا يوگف السياره
حدرت وگمت ازوع رادت روحي تطلع
ظليت فتره گاعده احس صخنت غسلو وجهي
وجان اگوم اصعد
معد اگدر اتحمل الوجع انجضعت بالسياره وحطيت راسي بحضن جوانه وهاي تهمسلي بفشله
جوانه : يمعوده شبيج فشلتينه شجاج
ديالا : ما گدرت ارد عليها لازمه بطني وروحي لايبه وابلع بريگي ختنگت اريد الهوا
وگفت السياره تفاجأت شنهي وصلنه
رفعت راسي تا احدر اتدامن حجرتي
اشو احنه يم عياده
صياد : شيخه حدرو ودي مرت اخوي عالطبيبه شوفيها شبلاها
ديالا : حدرو الشيخه وجوانه وجان يگودوني
اخذوني عالطبيبه جيكتني وگالت
ـــ انتي حامل ماما والجاره متقدمه
وطفلج وضعه مو زين
ديالا : غمضت عيوني
وصديت بصفحه ظلت عالطفل خلها تكمل
انقهرت الشيخه وگامت تصفگ بأديها
وجوانه حتارت تكيف لو تنقهر
ــ راح اكتبلج على علاج بس الراحه هي الأهم
لا تعبين نفسج ابد لازم اتركدين وارفعي رجليج بمخاد ثنين وان شاء الله ما علي شي
ديالا : تشكرت منها وطلعنه صعدنه السياره
اجه صياد جان يفتر ويدخن
صياد : ها يابه عسما شر
خزامي : خير ان شاء الله المره حبله بس مخطوره يابه الله يسترنه
صياد : الله يتمم ويجعله من الصالحين
ديالا :حجيت بتعب وفشله… مشكور ابو نشمي
گام يسوق على كيفه وجان يگف يم محل اخذلنه شربت وكعك حطيت راسي على جتف جوانه وجان انام وما حسيت الا اني گدام بيتنا
جان نشمي گاعد يم الباب اول ما حدر صياد ويلزم نشمي ضربه بوكس خلا حاير بزمانه
عاف نشمي صافن وگام ينادي
صياد : شااااكر
ديالا :حدرت وگادتني جوانه
طلع شاكر تلگاني لزمني من كتوفي ويتگفدني
شاكر : شبلاج يابه عسما شر
ديالا : مابيه شي… راح على صياد تا يشوف شعنده اول ما وصله وجان يضرب شاكر بوكس خلا صافن وفاك اثمه
التمو الولد كلهم ظلو واحد يدحگ على واحد ما يندلون السالفه شنهي
صياد : تخسه شواربكم يا حيف انتو محسوبين عالزلم يا حيف
ديالا : كلها ظلت مصدومه وتبلعم محد يستجري يسولف جان واگف بنصهم ويرعد
صياد : اثاري اذا انعدم اني تنعدم رجولتكم ويايه
ست شهور يا فيانين الحظ ما وصلتو بيت الملا وشفتو احوالهم شنهي
ست شهور ما وديتو نسوانكم على اهلهن شجنتو تسوون هين انطقوووو شجنتو تسووون
شاكر : اخوي سامحني اترجاك انهد حيلي وراك
وقصرت وياهم
صياد : ست شهور مهدود حيلك شنهو ختلافك عن النسوان ليش ما فاين بيكم وده حرمته لهلها وخلاها تشوف اخبارهم عندك علم يابو الصگر عماد وجاهد بالسجن اربع شهور والنسوان ظاله بدون والي
عندكم علم الي وصيتك بيها هسع متخبله بدون عقل
انطقووو وين جنتو يا فاينين الحظ الله لا يبارك بيكم خفت هالشوارب
نشمي : سامحني يابه ما سديت غيبتك
صياد : انجعم حسك ما اريد اسمعه
تاخذ مرتك هسع وتروح يم اهلها وما اريد جدمك يخطي هين اذا ما ادز عليك اني
نشمي : شنهي يابه هسع اروح ؟
صياد : عندك عتراااض
نشمي : لا يابه تأمرني امشي جوانه ولمي نفسج
ديالا : طبت جوانه ركض ونشمي وراهه
صياد : وانته باهي تروح لصلاح الدين توصل سلامي للشيخ عثمان تگله اذا على لحيتك تراب لا ينفضها الا يمي تجيبه وياك وتاخذه على بروانه يالله امشي هسع
وانته يا ساجي اروح بشغله هسع
ارجع باجر بعون الله الگاك مولم الربع كللهم عدنه طلبه
ديالا : انطاهم الأوامر وفات جوه لحگه وادي
مشيت وراهم گادتني الشيخه صعدتني لحجرتي
مددت عالجربايه وجان تجي دله وترفع رجليه بمخاد ثنين يمكن جوانه گالتلها
ظليت فتره لحد ما حسيت نفسي ارتاحيت طلعت من حجرتي استوقفني الكلام الي سمعته من حجرة مشعل
خزامي : لا تقسي على شاكر وليدي
لو تضربه اهون من تعزله من اوامرك لا تقهره تره نحمس وراك حمس
صياد : عساني لا طلعت وشفت هاذ الحال يا شيخه وصيته گبل لا اصعد السياره وخليت برگبته امانه
تالي ارجع الگاهه بدون عقل
يحمد ربه اني ما شلت راسه عن لشته
والي بعث محمد بالحق لو انه مو اخوي الا املص راسه شفتي حالتها بعينج شفتيها شلون مخبله وجهالها مشردين
ديالا : صفنت ويه روحي ليش صياد هالگد مهتم بليال
اني ما انكر هو زين ويه الكل بس ليال حيل يهتم بيها
حدرت جوه لگيت جوانه ونشمي رايحين
وصياد حدر من فوگ شايل جعبته شغل الماطور وصعد راح يمه وادي يتوسله تا يروح ويا
صياد : وين مهير روحك انته الأخر
عساف : وياك عك الله اخذني
صياد : واني وين اريد وخر من دربي
عساف : تريد تروح عالعرين اعرفك
ديالا : فتح عيونه صياد ويدحگ على وادي
خزره وجان يوخر تلثم وفر الماطور وراح
وظل وادي بمكانه وجاتف ادينه وراه
ادحگ على شاكر جان گاعد عالبلوكه
ويشرب جگاير رحت يمه وصد بصفحه عبن عيونه مدمعه وجه وارم من الضربه گعدت يمه احس صدره يريد يطگ من الغصه الي بي
شاكر : شفتي اخوي شلون عزلني
جنت اني الي اولم الولد اذا عدنه طلبه
وهسع عزلني منها استاهل يا ديالا استاهل قصرت وياج ويه اهلج هوه وصاني بيهم واني ما وصلتهم سامحيني
ديالا : حطيت ايدي على رجله وطبطبت عليها
لا تشيل بال ابو صگر اني يمك وشفت حالتك شلون صارت مالي حگ اعتب عليك وابو نشمي زعلان هسع من يرجع راح يسامحك
..جر حسره وشفايفه ترجف
شاكر : يسامحني بس ما يرجع مثل گبل خيبت امله وما سديت غيبته ما عرفت ادير شي وراه
انتي ما تعرفين الصياد من يزعل شگد صعب زعله
ادعي ربج ما يزعل منج بيوم
ديالا : گول يا الله ولا تصعبها
تعال عالحجره عندي الك خبر
.. جريته من ايده وصعدنه لحجرتنه
شاكر : ها شنهي الخبر
ديالا : ابتسمت بقهر ودموعي تصب
اني حبله
شهگ يضحك ولزم وجهي وعيونه مدمعه
شاكر : منصح
ديالا : اي والله بس الطبيبه گالت لازم اتركد زين
عبن الجاهل نازل من وره التعب
حضني وباس راسي لزم روحه گوه تا ميبجي
باسني بعيوني وخشمي
شاكر : الحمد لله
ما شاء الله. الله يبارك بيج وبي
من عمري على عمر الصياد الي جابج اليه
ديالا : الله يطول بعمره وعمرك
لا تغث روحك ابو الصگر تمر هاي الأيام
شاكر : تمر بعون الله وانتي لا تكدرين روحج
هسع تشوفين اخوانج حت سبوع ما يطولون بالسجن وحگهم يرجع مربع
ديالا : ما عندي شك وگلبي بارد منهم
بس اختي وامي … گلتها وبجيت
شاكر : لا تبجين يروحي شبلاهن
ديالا : اختي مخبله ما تندل بروحها وامي صاير بيها سكر من القهر والهبطات
شاكر : سامحيني اترجاج هاذ كله عبن هملتهم وما شفت اخبارهم
ديالا : صارت بعد وهاذ قدر الله
امل :رجعت يم ليال گعدت يمها جانت ما تندل بروحها عباره جن جسد متهالك بدون روح
رجليها مجرحه وشعرها معگد جسمها وصخ
بجيت بحسره هاي ليال النضيفه الي جانت تظل ساعات بالحمام تجلف بروحها
هاي ليال الي جان كل همها تكشخ
وتلبس نظيف ومرتب الي جانت تلزم العود وتگف يم ملابسها وتنش الذبان جانت عبالك تسبح بقاصر
وريحتها صابون
مديت ايدي وخرت الجرجف عن صدرها
جانت لابسه اتگ ومشگگ صفگت على رجلي وگمت اصيح معد اگدر اعبر عن حزني شسوي يربي
اجه عمر وگف يمي وهو شايل عذباء
شافته وصكت على سنونها وگامت اطلع صوت عبالك جلب ينمر خفت وگحزت عنها
طلع عمر وجان تسكت وگامت تنفس قوي ومدنگه
مسحت دموعي وطلعت يم عمر وعثمان جانو يبجون
وحالتهم عبالك زلم كبار من گد الهم الي شايلينه
… شصار يولو احجو شلون دبرتو نفسكم شسويتو
عثمان : تبهدلنه يا خاله امل
امي گامت تضربنه وتصيح علينه ولا تسبح ولا تصلي
محد تهتم بشي واحنه ما نعرف نهتم بعذباء بس نسويلها مميه نوبه وحده سبحانها وجانت راح تغرگ
غصت بالصابون فات بأثمها
اجت عمه كريمه اخذتها وراحت
عمر ما فعل ينطيها بس عمه گالتله داري امك ومن تطيب تعال اخذ عذباء
جبنه لأمي علاج من الصيدليه واشو ما طابت
گامت تنهزم وتشگ ملابسها وتنزعهن وتركض بره عالشارع الا لزمها عمي غازي فوتها جوه جانت بس لابسه اتگ مشگگته
حطيناها بالحجره عمر جاب حبل وربطناها وشديناها بالشباك تا متنهزم
ومن نروح عالمدرسة نسد الباب عليها من بره بالقفل
جده شكحه گالت هاي تخبلت عبن ابوكم مات واهلها عاوفها رسبنه ثنينه بالمدرسة وو
امل : اختنگت وما خليته يكمل كلامه
گمت طلعت بره وگمت ازوع اوف يمه واني الي جنت اندب حظي واگول شسويت وهيج جاي اتعذب
عجل ليال وجهالها شيگولون ربي
ظليت الوب وحايره بزماني مگدر افوت عالبيت مدري شلون ما تخبلت قرفصت بالطرمه وارجف
اجه علي وگادني جوه ادحگ على جهال ليال ودموعي تصب هاجر سوتلهم اكل وانطتهم
اجو. نشمي وجوانه محملين السياره كلشي
من مسواگ وملابس وحليب لعذباء
اول ما فاتت جوانه وعاطت بيه عبن لگتني ابجي
ما تلام بيه احنه بيا حال
گمت وياهه وتگابلنه على ليال ثلاثتنه اني وجوانه وهاجر اخذناها سحل عالحمام
گوه جلفناهه
جانت تفز من المي عبالك نذب عليها نار
سبحناها ولبسناها ملابس وجان نطلعها وگامت ترافس اجو علي وثائر جتفوها بالحبل
نشفنه شعرها وما گدرنه نمشطه صاير عبالك طباگه معثگ ما يتفكك راحت جوانه جابت مگص تا تگصه
وجلب بيها عمر
عمر : لا امانه خاله شعر امي لا تگصينه
جوانه : معثگ ما نگدر نمشطه خليني اگصه وهو يرجع يطول بس خلها اطيب
عمر : لا امانه عوفي لا تگصينه خلي اني امشطه
امل : اخذ المگص من جوانه وما خلاها تگصه
قسمنه شعرها بالنص وتگابلنه اني وجوانه نمشط على كيفنه بدينه من الطوارف الي جوه
تملخنه ونهدينه على صفحه تا گدرنه نسرحه
جبت الزيت ودهنته انوب وخليته مفتوح
صايره بي تموجات ومرعبل مدري شلون مو ذاك شعر ليال الحلو الي جانت لمعته تسحر
راحت جوانه وجابت الأوتي… هاي شتريد تسوين
جوانه : اكوي شعرها اوخر هاي الموجه الي بي
امل : وهيه بيا حال كل عقلج انتي
جوانه : بس جيبيها هسع اطيب وتلگه نفسها مرعبله وترجع اتخبل انوب
امل : طاوعتها وجان نجضعها وعلي جلب بيها واحنه كوينه شعرها صار سرح وحلو
كملناهه ورجعنه جتفانها وگعدنه يمها
اني وجوانه
جوانه :اگلج امل هاي صارلها فتره على هاذ حالها
زين شلون من جانت تجيها العاده
امل :اي والله صدگ عمر وعثمان جهال ما يفتهمون
وشگحه وربعها ما يطبنها لو تجيف
شو نادي عثمان نسأله
جوانه :طلعت ناديت عثمان
فات وسديت الباب
امل :تعال عثومي اگعد يمي
اجه يدحگ على ليال ويبتسم
عبن شافها نظيفه ومرتبه
صفنت افكر هاذ شلون اسأله يربي
اخذت نفس وحجيت
عثمان شلون من جانت امك تجيها العاده
يعني يصير بيها دم
دنگ راسه يعصر بأيدنه ويبلعم
هوه يستحي ويخجل
دحگ علينه بعيون مغورگه وحجه
عثمان :بكل نوبه يصير بيها دم
عمر يروح على جده شگحه وعمه رافده
يتوسلهن تا يجن يشوفن امي بس ما يفعلن
يگولن نخاف منها
عاد احنه نجيب مي بالحجره نغسللها
و ما يفيد الا يروح عمر يفزع عمه
كريمه تجي تهتم بيها
خطيه تظل تروح وترد لحد ما امي اطيب
امل :يسولف ويغص بالكلمه
انعصر گلبي ادحگ على جوانه
صاده بصفحه وتبجي
مسحت دموعها وصدت على عثمان
جوانه :زين شلون جنتو تعرفون امكم تريد
عالحمام وهيه هيج حالتها
عثمان :يوميه الصبح نوديها عالحمام
عبن تگعد منالنوم هاجده وصافنه
نگودها وما تنهزم ومن نرجعها بالحجره
تاخذ فتره واتخبل عاد
امل :انهد حيلي معد بيه اسأله شي
مسح دموعه وگف
عثمان :عود لا تگولن لعمر اني حجيتلكم
هوه گال اذا النسوان يدرن شصار بأمي
راح يعيرنها
امل :ادحگله وادموعي تصب
لا يروحي ما نسولف
ابتسم بحزن وطلع
...
ديالا : گعدت الصبح لگيت صياد راجع من العرين
وجامع الولد بالساحه ويحجي وياهم
جانو كلهم مسلحين صعدو السيارات وراحو
يربي دخيلك بس لا تصير طلبه جبيره
يارب تسترهم وتحفظهم
ظليت الوب وراهم خطيه البنوات ما خلني اجوس شغله ودارني حيل
دله : زهور اجلفي هدوم ابو نشمي مزال ما عندج شغل
زهور : ما اجلف شي اخذيهن انتي
ديالا : دحگنه عليها ثلاثتنه شبيها هاي جانت تغالب البنوات على هدوم ابو نشمي
كواكب : شبلاج يولي صابج هبال
اني ملاحظج حت من اجه ابو نشمي سلامج علي جان بارد ولا گعدتي يمه
ديالا : ما جاوبت زهور وجان تگوم وتصعد لحجرتها
استغربنه وضعها
امل :نشمي وجوانه ودو عمتي معاضد عالطبيب
وجاوبها گايدينها حطوها بالحجره وجايبين علاگتين علاج للها وضعها مو زين بلكت الله تعافى
گاعده بحجره ليال وصافنه عالشباك اجه گبالي نشمي ويفتر بالحديقه وشايل عذباء من اجه ما هدها من ايده حقه يفقد عليها عبالك شحمايه خدودها حمر وزنودها متبتبات وانوب لابسه بدله حمره تنگرط فاقد عليها يعضعض بيها
اجت يمه جوانه وانطته گلاص جاي
لزم ايدها ويحجي وياهه وتعابير وجهه
عبالك يتوسلها تسامحه سحبت اديها وجتفتهم وصدت بصفحه وتحجي
جان مقلص عيونه عليها وشكله حزين
راحت من يمه وظل على وگفته وشايل عذباء
شويه وجان يندگ الباب وطلعنه نشوف منو راح نشمي وفتح الباب فات صياد لابس اسود من ساسه لراسه ومحزم بالجناد والرشاش بجتفه
سلم وجان يگف بالطرمه يحجي ويه نشمي واخذ منه عذباء شمها وغمض عيونه دحگت وراه هاي شگد زلم بره صد عليه وگام يحجي
صياد : ام علي لا تشيلين بال اقل من سبوع
ان شاء الله ويجي ابو علي وجاهد ينورون البيت هسع جنت يم الي شتكو وراح يتنازلون عنه وغصب عن شواربهم
امل : شهگت وگمت افرك بأديني وادحگ على علي
اجت جوانه وسلمت على صياد وجان تبوس ايده حط ايده على جتفها ويحجي وياهه همس وهيه تهز راسها بـ اي انتبهت على نشمي جان عبالك غاير من ابو
صياد : ام علي اذا تسمحين راح يجي الشيخ عثمان هين اترجاج اذا عندج اشكال گولي ونأجلها ليما يجي ابو علي
امل : البيت بيتك ابو نشمي
عش عندي عتراض خلي يجي كل الهلا بيك وبي
هز راسه بقبول جان مهموم ومتعصب انطه عذباء لنشمي وطلع خبر ربعهم يروحون ونسحبو الكل وظل هو راحت جوانه جابتله فراش وگعدو بره
مرت ساعات واجه ابنه الأخر وجايب ويا الشيخ عثمان تلگا بالحضن شگد وجه نوراني هاذ الشيخ
مجرد شفته حسيت بالراحه وگلبي برد فاتو گعدو بالهول وظلو يحجون شوي واجت جوانه
جوانه : يالله امل نولم ليال
امل : شنولم منها احنه نگدر نگرب يمها
جوانه : بس جيبي عباة وملفع خن نلفها ونشد عيونها
امل : لفينها زين وجان يجون علي وثائر شالوها
واخذوها عالهول كلها طلعت وما ظلو بس صياد والشيخ عثمان واني وجوانه
نشمي شال عذباء
واخذ عمر وعثمان بره
تا ميسمعون شي خطيه الي بيهم كافيهم
اجه الشيخ عثمان شال الربطه عن عيون ليال
بس شافته گامت تصيح وتبجي وتفالت
تملخن اديه واني لازمها معد اگدرلها
طلع صياد وناده علي وثائر
خلاهم يلزمونها وهو گعد بمكانه يعصر براسه
گام الشيخ عثمان يقرا وليال ترجد بروحها
شد عيونها بملفع اسود ويقرا يم راسها
وهاذ جسمها يرتفع واديها تبس صارت عبالك خشبه
استمر ساعات يقرا ويحاور بي
عثمان : شيطان انت لو جن
ــ شيطااان
عثمان : ليش اجيت عليها
ــ همه دزونييي اني ما اجيت ما اعرفها
عثمان : ليش دزوك
ــ : تا اخبلها واجننها وافضحها واخرب سمعتها
عثمان : وگدرت
ــ : گدرت بس اخبلها واطير عقلها ما گدرت اهزمها بعيد ابنها عمر جتفها وسجنها ومنعنيي
عثمان : منهو الي دزك عليها
ــ : وحده اسمها نضال
عثمان : تطلع منهاا
ــ : لااااا ما اطلع ابد ابد
عثمان : ليش ما تطلع
ــ: هددوني اذا اطلع يحرگوني
عثمان : منهو هددك
ـ : الساحر هددني
عثمان : يهودي انته
ـ : اييي يهودي
عثمان :اذا حررت نفسك من الساحر واسلمت
ما يگدر يحرگك اطلع من البنت وخليها بحالها
ـ : ما اطلع بعد لا تحجي وياي لا تلح
اعذبها اموتها وما اطلع ما تگدرلي اني قويي
عثمان : القوي هو الله والحي هو الله
لولا الله ما گدرت انت تمسها
وهسع نشوف قوتك گدام ايات الله
امل : حسبي الله ونعم الوكيل
انهارت اعصابي اديه ارتخو معد اگدر اشوف دخت رجع الشيخ يقرا ومعد يحاور المس حالتها هاي بعد ازيد من نوبه نمست
الشيخ لزم العصى وگام يضرب بليال گلبي نمرد عليها
انتبهت على صياد جان صاد بصفحه مغمض عيونه وحاط ايده على گلبه
انهد حيل الشيخ وليال فقدت
الوعي ثنيت يمها ودموعي تصب
عثمان : خلو يكون عدكم علم راح نتعب جثير
بس ان شاء الله تطيب
امل : اجو الولد شالو ليال
حطيناها عالجربايه وشدينه اديها ورجليها
لزمت وجها بوستها من خدها يعمري شگد مشتاگلج
الله ينتقم من كل بشر اذاج
ظلت نايمه فتره وجان تگعد
اول ما فتحت عيونها صكت سنونها
وگامت تصيح شدينه اثمها وخليناها على نومتها
راحو الشيخ عثمان وصياد ما فعلو يظلون
نشمي گال الشيخ راح يبات يم ربعنه هين
وبين يوم ويوم يجي يعالج ليال
وصياد رجع لهله
..
ديالا : اجو الولد تلگيت شاكر وسألته شصار
شاكر : ابشري بالخير انحلت بجم بوكس ودفره
هذول لو يندلون منهو وره عماد مجان اندگو بي
ديالا : يعني راح يطلع عماد
شاكر : ان شاء الله
ديالا :خوش الحمد لله
ابو الصگر اريد انخاك
شاكر : ابشري
ديالا : اريدك تروح تعرف اخبار فاتن
شاكر : بهالشارب هسع اروح
ديالا : لا هسع ارتاح اول
شاكر : لا والله تحرم عليه الراحه هسع اروح واخملج اخبارها بس ما راح ابلغها اخبار اهلج خطيه تروح تهبط
ديالا : اي عفيه ابو الصگر
سعاد : ظليت بقلق ما ادري شصار وشسوه ابو نشمي
سمعت من اخويه گال جامع الشباب وماخذهم بطلبه
هسع ارتاح تنفس عود دور طلايب
كملت شغل ويه جناين اهلي
واخذت اخويه ورحت لبيت صياد
اشوه اليوم ما يمهم احد
طبيت عالمطبخ سلمت عالبنوات جانت ديالا تعبانه
وجها اصفر اخذتها بصفحه ها يولي شصار من رحتو على ليال.
ديالا : گلبج يتحمل تسمعين
سعاد : صارلي خمس شهور بعيده عن جهالي وگلبي بعده گوي احجي شصار
ديالا : حجيتلها كلشي صار تخبلت گامت تنگز
گوه لزمتها هاي عود الي گالت گويه
طلعت دله وكواكب على حس سعاد سحلنها فوتنها جوه
كواكب : شبلاج انتي نهبلتي يولي
سعاد : لا تلوميني ام نشمي گلبي نار هاي رفيجة عمري شفتي شمسويات بيها ااخ يا گلبي يتفاور دم
كواكب : الله ينتقم منهن حوبتها هاي اليتيمه ما تظل عالگاع بس كله من ايدها عش ما رضت تعقد على
ابو نشمي جان راح ياخذ حگها وزياده
ديالا : تفاجأت وما گدرت احجي ظليت فاكه اثمي وادحگ على سعاد انوب كواكب گالتها ورجعت تغسل تمن ولا عبالك حجت شي ودله بصفها تگصب لحم وهم ولا عبالك سمعت شي
سعاد : شمدريجن بهاذ الحجي
كواكب : شنهي شمدرينه غير ابو نشمي گالي واخذ رئي گتله سوي الي تريده
ديالا : يربي هاي المره ما عدها گلب لو شنهي
كواكب : دله فضيني صارلج ساعه لو اني هسع مگصبه بعير بحاله
سعاد : وانتي دله ما عندج عتراض
رفعت راسها ورجعت دنگت وتگصب لحم
دله : عش اعترض يمه والله لو ياخذ عشره ما ادير بال هاذ صياد السباع يستاهل وهو اصلا يريد يساعدها وهاذ عمل خير اكيف والله يجمع ام بضناها
سعاد : يمه على گواة گلوبجن
والله لو اني عندي مثل صياد ما اخلي يعرس لو اموت ...وزهور هم تدري
دله : ما اضن تدري جان علگت الدنيا تندلن بيها تغار
سعاد : قوست اثمي على هذني الي لا احساس عدهن ولا شي صديت على ديالا جانت تروط ولايبه روحها… شبلاج يولي
ديالا : نقطتي عليه وحبلت
سعاد : منصح والله مبارك خيه الله يتمملج
ديالا : الله يسلمج.
سعاد : هسع ليال شلونها امانه يعني ما تعرف احد اذا تشوفني ما تعرفني
ديالا : لا والله يا سعاد ما تعرف احد
سعاد : بس بردي گلبي وگليلي جتلتن شكحه وشلتها زين
ديالا : لزمتهن جوانه بالمگوار وحسبي يمج
سعاد : يبعد شيبي گلبي برد وثلج
هسع ليال يعالجها الشيخ عثمان وتطيب وترجع مثل گبل واحسن
ديالا :ان شاء الله يارب
رجع شاكر وجابلي اخبار فاتن
شاكر : ما اجذب عليج يا ديالا والله حالتها مو زينه
خطيه تعبانه طمنتها علينه وكيفت ودزتلج سلام
ديالا : الله يسلمها بس ارتاح شوي اروح اشوفها
شاكر : ان شاء الله
سعاد : ظليت يم عمامي
رغم احجي وياهم بس گلبي نار مشتعل اوف يروحي ليال شصار بحالج ياريتني ظليت بعيده عنج واحاميج من بعيد
اجه صياد جان وضعه تعبان ومهموم
تنحرته سلمت علي وسألته على ليال
تنهد بقهر وحجه
صياد : ما اگلج شحالها ان شاء الله تتعافى ادعيلها ام ياسين
سعاد : بكل صلاة ادعيلها والله
فات يمشي بتعب وگف وجان يصد عليه نص التفاته
صياد : غازي دوا عندي وانا اخوج والله لخلي يبجي الليل والنهار
سعاد : گالها وراح عالمضيف يشوف عمي علوان
ديالا : واگفه بالمطبخ اريد اعاون البنوات اولم وياهن سفرة العشه وما يفعل يخلوني
وادي نگل وياهن الأكل بدالي حطينه كلشي وگعدو كلهم عالسفره انتبه صياد انو زهور ماكو
صياد : وينها ام ساجي
دله : بحجرتها
صياد : عسما شر خوما مريضه
دله : لا الحمد لله ما بيها مرض وداهه ساجي الطبيب وصحتها زينه
صياد : عجل شبلاهه ما حدرت اتعشه
دله : ما ادري والله هيه جانت حزينه وراك و هسع مدري شبلاهه اگوم اناديها
ساجي : استريحي اگوم اني
صياد : اگعدو انتو اني اروح
ديالا : راح يناديها شويه ورجع وهي تمشي وراه جانت عاگده الحواجب گعد بمكانه وجان يناديها يمه
ظلت واگفه وتلاوز بعيونها وكلها ادحگ عليها
صياد : شبلاج يابه تعاي اگعدي
ديالا : گامت تفرك بأديها وخايفه عبالك يريد ياكلها
لزمت ثوبها عصرته وجان تروح تگعد يمه ظل مقلص عيونه ويدحگ عليها گام يشيل ويحط گدامها وهاي مبوزه خايبه وين لگيتي هالدلال اكلي عاد
شبع صياد وگام مثل المعتاد صب لنفسه جاي
وگعد يشرب گامت زهور وجان يناديها
صياد : تعاي ام ساجي
ديالا : ظلت صافنه وجان تروح يمه وتحاول تجنب ما ادحگ علي يربي هاي شبيها كلها مستغربه منها
صبلها جاي وناوشه الها
اخذته واديها ترجف ظل مركز بيها
صياد : گومي على حجرتج
ديالا : بس گالها گامت ركض
وجان يلحگها خطيه ساجي واخوانه ماتو بدمهم
گامو يسألون
ساجي : يمه كواكب عج الله امي مسويه شي
كواكب : لا والله كلشي ما مسويه
ساجي : عجل شبلاهه خايفه من ابويه وهو لاحظها
كواكب : والله يوليدي مدري
ديالا : ما گدر ساجي يكمل اكل ونفض ايده وگام
گعد يم الجاي ومرته راحت يمه
كلها استغربت وگامو ينسحبون من السفره
محد حجه شي ساكتين
گامن البنوات لمن السفره وصبن الجاي
مر وكت وصياد وزهور ماكو
يتبع…… ..