الــصـيــاد
يمه ابوها الماقبل ينطيها مات...
روحي اخطبيها الي من أولادها
رايد اوفي وياها ميعادي القديم
حته اذا ماوفت بميعادها
جانت متيهه الدرب عشرين عام
وهسه ربج حن علينا و عادها
من وكت زفوها واني بلايه راي
بلا هدف روحي تسير اجيادها
وسادي يوجعني عليها شلون انام
وهيه يوجعني عليها اوسادها
اكبر وجرح الندم يكبر معاي
يناطر اليوم اليحطني اضمادها
معشعشه براسي مثل كابوس ليل
ليلة الزفة وصور جلادها
ضلت بنفسي اگف رجعها روح
ماگلتها لذاك لمن گادها
بالحلال اني ردتها وبت حلال
رجعت من الباگها على الرادها
كأن ابليس في المهد ارضعهم
عرين الصياد بقلمي شذرة
ديالا : انشل حالنه وره ابو نشمي نسوان العشيره سون محربه ويلطمن عبالك صياد مات اسم الله علي
ملخن نفسهن تملخ وحقهن
محد يلومهم كل الزلم تفتر
وما يعرفون شيسون ومن منهو ياخذون الأوامر
تمرض الشيخ وحتارو بي
حال الضيم حالنه انگلب البيت كله
عبالك سفينه وغرگت توازن ما ظل وتركيز ماكو
وانوب اجت سعاد متكاونه ويه غازي وليال ظلت
وحدها
تخبلت گمت اكل بروحي شسوي هسع ادز منهو عليها يشوف اخبارها وادز منهو على عماد يخبره تا يجي
كل ربعنه ملتهين بشغلة ابو نشمي ليلهم ما ينامونه
سعاد : ما گدرت اخبر ديالا وجوانه بوضع ليال
شفتهن حال الضيم حالهن وشيگدر يسون اذا عرفن اديهن مربطه وراح يحمسن روحهن لحالهن
گلت خن اني اتابع اخبارها وحدي
ما لگيت احد ادزه يشوف ليال وجهالي
كلها حايره بالطلايب
اجيت على اخويه الزغير گوه قنعته
دزيته وشيلته مسواگ للها وفلوس وخبرته يطمن جهالي اني راح ارجعلهم وعينهم من نفسهم
ليال : اجه اخو سعاد عليه جايبلي مسواگ وفلوس
اريد احجي ويا بعد مگدر فوگ ما هجمت بيتج يا سعاد انوب ماكله همي
طبيت جوه واني مقهوره من نفسي
ومن كلشي
اجو عمر وعثمان مكيفين
مستلمين الكتب مال المدرسة
گعدت اگلب وياهم بدون واهس وبالليل جلدتهن بنايلون وگمت الصبح
من وكت ريگتهم وراحو عالمدرسة
مرت ايام وهاذ حالي نفس الروتين يوميه
بس طول الأيام سعاد على بالي انام واگعد افكر بيها وهاذ غازي بعده يتهزم مني ومنع حت جهاله ما يجون عليه
الله يسامحك عبالي مو انته فازعلي
طلعت سعاد ارجل منكم ما بيكم حميه كلكم
زلم هاي الديره
مدنگه اغسل ملابسي حسيت وجع براسي وعيني اليسار مثل الگلوب شتعل بيها
لزمت عيني فتره تا هود الوجع گوه كملت الملابس من الدوخه الي صابتني شريت الملابس ورحت بحجرتي مددت
ظليت بمكاني مالي خلگ اگوم ولا اسوي شي
هسع يجون جهالي يريدون غده يربي اني شجاني
اجت كريمه وسألتني شبيه گلتلها راسي يوجعني وهسع حت جتفي اشو گام يوجعني
خطيه گامت تفرج جتفي وشدت راسي بالمهاد مال عذباء وما يفعل يهود الوجع وجابتلي حب راس وراحت هيه سوت غده لجهالي واخذت عذباء سبحتها
ثاني يوم نفس الشي الوجع نفسه
واليوم الثالث گام يتزايد صارت حالتي مدري شلون
انوب كشفت رجليني وبيها طعنات زرگ
صافنه على حالتي حجرتي ما نضفتها ملابسي ما غسلتهم وما سبحت
وملابس جهالي مال المدرسة منثوره
ويريدون اراجع دروسهم وياهم ومگدر اني شبيه يربي شجاني حيلي مهدود وكسلانه
عمر : يمه انتي حت ما تصلين
ليال : شلون ما اصلي توني شلت المصلايه گدامك وصليت گوه من وجع راسي
عمر : اي فرشتي المصلايه وگفتي عليها وجان توخرين ما صلتي والله اسألي عثمان
ليال : تريد تجذبني مو گوم اطلع بره
عمر : هسع اني شگلت وتعصبتي
ليال : گوووم اطلع بره
عمر : وين اطلع اريد اقرا عندي دروس
ليال : انته صاير مو خوش ادمي
گمت بساع وضربته
عثمان : يمه ليش ضربتي هو شسوه
ليال : اطلعو بره ثنينكم يالله
واخذو هاي وياكم معد اگدر اتحمل حسها
عثمان :گوم عمر اني راح اشيل الكتب وانته شيل عذباء وتعال بالهول نقرا
عمر : شبيها امي دحگلها شلون مبهدله
عثمان : نصي حسك لا تسمعك صارلها جم يوم تكاون بينه خن نطلع يمكن مريضه وهيه تشكي من راسها وايدها عوفها
سعاد :ابو نشمي بالسجن وليال بنص الحيايه
وجهالي بعيدين عني احير بمنهو افكر
اربع شهور مرو وغازي ما طب عليه ولا
اهلي شافولي صورة حل اخواني يگولون شلون احنه ندز علي اذا مو هو يجي وحقهم ما الوم احد بيهم
حال العدم حالهم كلها تركض واتبع وره صياد
ابو نشمي سبع ما ينخاف علي السجن للرجال
وجهالي صحيح مشتاگلهم بس ما عليهم خوف عمتي ادير بالها عليهم وهمه كلشي يعرفون
خليت تركيزي كله بليال ذبحني التفكير بيها
هاي الفطيره الي عايشه بنص الحيايه
كل فتره ادز اخويه يروح يشوف جهالي ويمر عليها
يگول يطلعلي ابنها يگول امي مريضه بيها تيفو
شجاب التيفو عليها اوف يربي انحمست حمس
بيت عمي علوان عبالك سفينه وغرگت الشيخ تمرض وگامت الوادم تجيهم تا تشوفه
محد يتهياله يحك راسه كلها تركض زلم بنسوان
بيتهم ما ينشف من الوادم خلاص حت احنه يوميه نروح عليهم من الصبح نعاون بيهن بالشغل
دله : محد وايج على زهور وشافها
سعاد : راحت ام نشمي تشوفها
هيه شبلاهه زهور
دله : مدري شبلاهه اشو بس حاجره نفسها ومعد تطلع من حجرتها
كواكب : ها يحبايب گضيتن الشغل
دله :بس ظل الخبز ديالا وجوانه وبنوات العم اخذنه
سعاد : شلون صارت ام ساجي
كواكب : والله يا خيه بعدها نفس حالها
انوب معد تريد تشوف احد وبس حاجره نفسها صارلها ايام حت شعرها ما تمشطه
سعاد : شزايد عليها رجلها بالسجن وعمها مريض والعشيره تطشرت
كواكب : الحمد لله على كل حال
سعاد : الحمد لله انتن الله گواجن وثبتجن
دله : خيه مجبورين نصير گويات ما نريد ابو نشمي يجي يلگه البيت متخربطه احواله هو غير منتجل علينه بس اشو زهور تخربط وضعها فرد نوب عبالك اول نوبه تجره علينه الصگعات ومنا الشيخ هم
كواكب : اشو هاي ظاله علبة عجين
دله : وينها
كواكب : هاي جوه الجدوره
دله : عجل ما شافنها البنوات
كواكب :سعوده ولو ازحمج اخذيها عليهن تا يخبزنها
سعاد : خن اگطعه تا يرتاح
كواكب : اي عفيه
سعاد : گطعت العجين وخليته يرتاح شوي
واخذته يم ديالا وجوانه
ديالا : هاي منين العجين
سعاد : هاي علبة جوه الجدر ما تندلن بيها
ديالا : يالله زيادة الخير خيرين
سعاد :تحزمت وگمنه نخبز هذني البنيات هم نگردن وحدتهن ما تشوف رجلها للفجر وتگعد الصبح وما تلگا
ومنا اختهن ومنا اهلهن زين من عدهن ظلن متماسكات وگويات هاي جوانه ذيبه ما شاء الله محد يلحگها لا بشغل ولا بغيره طالعه على مهره الله يرحمها
ديالا : امدي اظل اشتغل النهار كله ولا يجيني الليل وتلتم الهموم عليه لو مسجونين نص عشيرتنه
ولا ابو نشمي محد يعرف يتصرف صارلهم اربع تشهر يركضون وما فلحو بشي
سعاد : خيه صوجه ابو نشمي هوه الي جان داير كلشي وتعودو علي وذبو المنتجل على كتوفه
ديالا : اي والله انوب حت العرين محد يندل مكانه
البارحه اجه وادي وگال لشاكر اذا تندل العرين روحله تره بي اوادم بس شاكر ما يندله
سعاد : يبو يهالعثره منهو بالعرين خاف وادي يجذب
جوانه : ابد مو طبعه الجذب شفته حيل متوتر ويفكر
سعاد : اذا منصح الحجي واكو اوادم بي هذول شياكلون شيشربون ابو نشمي صارله اربع شهور بالسجن
ديالا : شاكر يگول اكو واحد من البدو يندل العرين
اذا صدگ ابو نشمي مخلي بي اوادم اكيد وصه البدوي بيهم
سعاد : اي والله هوه ما يفوته شي ويظل حاسب حساب لكلشي
جوانه : عمي زلمه عجزت النسوان تخلف مثله
سعاد : اي والله لو گلتي
جوانه : عمت عين الباب الي انسد علي
وعمت عين الديره الي ما بيها الصياد
سعاد : لا تبجين يولي ادعوله يرد بالسلامه هاذ صياد السباع تلگينه هسع مسوي جيش بالسجن
ديالا : ما تنلام لو بجت اني گلبي وار علي يا سعاد
سعاد : عجل اني شگول محموسه حمس محد جان يجي يتفگدني غيره ويتهده ويتفده
ولو هوه موجود من يوم الي غازي جابني جان ورهم ور خلي يطلع وهينه
جوانه : من يجي ما يخليج ترجعين لو غازي يأذن
سعاد : يمعوده ما ارجع بس خلي ابو نشمي ينور الديره افدي
ديالا :شايطه روحي ماكو خبر لا من ليال ولا من عماد ولا فاتن
جوانه : لا تشرهين على فاتن وعماد بس شرهتنه على هذيج الخوثه الي راحت يم شكحه ومعد نعرف عنها شي اخ لو يتهيالي اروح
سعاد : جريت حسره بگلبي اااخ يا جوانه لو تدرين بحال ليال جان شسويتي
ديالا :حبلت مرت باهي وما گدرنه نفرح بيها
خطيه حت هيه ما فرحت عبن تفكر بعمها صياد
.
سعاد : ست شهور وعشر تيام گضاهن ابو نشمي بالسجن واليوم يطلع برائه لعدم كفائة الأدله
عشيرتنه بخويطهم ملتمين يم بيت عمي علوان
راحو الزلم كلها تا يجيبون ابو نشمي زفه
واحنه النسوان ظلينه انتاني بي وكل وحده شايله سلة جگليت اني تلثمت تا خاف اطب بنص الزلم محد يعرفني
گلبي يرجف مجاي اصدگ ابو نشمي راح ينورنه بجيته ريتني فديتك ابن العم الي شليت حالنه بغيابك وكلها عرفت احنه بدونك ما نسوه شي
كلها فرحانه ومكيفه والنسوان تمشي وتهلهل واكثرهن جوانه تريد اطير انوب شايله سلاح تا ترمي وهيه ما تعرف الرمي
مكيفه ما تدري نشمي فرغ الشاجور من الفشگ وانطاها الرشاش خطيه راح اتفشل اريد اگللها بس نشمي حلفني
وين ما ادحج الوادم تضحك الا زهور شبلاهه هاي مجتفه اديها وماده البوز رحت لحجرتها بشرتها وجان رد فعلها بارد گامت لبست ملفع وحدرت عبالك ولا صاير بينه شي عذرتها يمكن صدمة الفرحه مدري هيه صابها هبال
ديالا : الناس تضحك من فرحتها واني ابجي
احس الگاع تهتز من جوايه الحمد لله راح يجي ابو نشمي ونخلص من الطلايب ونرجع مثل گبل
كلها متولمه وتاني ونذرو عيد يظل سبوع
النسوان كلها بالساحه مال البيت
محد بيهن جاي تصبر ما الومهن اني لو بيدي اذب الملفع واهوس بنص الزلم
جوانه : هسع بس خلهم يجون وينهم صارلهم سنه
سعاد : تصبري يولي خوما ينهبونه نهابه غير يسلمون علي يشوفونه وربعنه جثيرين يرادلهم يوم كامل بس يحببون بي
جوانه : يربي هسع يخلصونه
سعاد : يولي هو اجل تا يخلصونه
ديالا : شاكر يريد يفوت الزفه من گدام هذول الي شتكو
سعاد : والله شاكر مدري شلون يفكر
الوادم ابنهم انجتل وشكو بأبو النشمي وهاي صارت المهم طلع بالسلامه خلي يعوف الطلايب ويسترنه
ديالا : مجاي يقتنع شاكر هو والولد
جوانه : كافي تسولفن اسمع رمي والله يمكن اجو
سعاد : اي والله حس رمي
ديالا : كلها اوبشت وگامو يدحگون وحس الرمي گام يگرب باب السياج مفتوح على كبره ويمه ولدنه لازمين سلاح وناس عالصطح تربي (تراقب)
سعاد : تخسون گلبي راح يگف
اي والله هاي الزفه اجت تولمن تا اهلهل عني وعنجن
جوانه : واني راح ارمي عني وعنجن
ديالا : طبت السيارات عالساحه مال البيت
وعلگوها بالرمي علگ والنسوان تهلهل وتهوس
معد اگدر اشوف شي
ادحگ على جوانه سحبت الرشاش تا ترمي وطلع ما بيها فشگ تعصبت وشالتها ولطختها عالگاع
وگامت ترجد بروحها هاي سوالف نشمي اكيد اليوم. شيفكه منها
سعاد : هاي عود جنت متلثمه تا اطب بنص الزلم واطش الجگليت على ابو نشمي بس ما گدرت من گد البشر انوب بس اريد اشوفه من حدر من السياره ماكو اجلو اجل ربعنه عبالك مو شايفين غدي
صارو عبالك موجه گامو يروجون روج بنص هالساحه انسحبو الزلم عالمضيف واخذو ابو نشمي وظلينه بفشلتنه محد شافته اجه نشمي رزلنه
نشمي : انتن عش مؤبشات جدام الزلم شنهي مابيجن صبر لو استخفيتن
جوانه : اي ما بينه صبر تعال گلي عش فرغت الشاجور من الفشگ هااا
نشمي : علي حسج انوب خاف محد سمعج
عوزج اخليج ترمين وتجتلين الوادم مهبوله
ديالا : انلصمي جوانه شهل حس
سعاد : عوفو الكوان امت تجيبون ابوكم من الصبح انتو يمه ما شبعتو
نشمي :اذا اگلج ما تصدگين والله يادوب ايدي لاحت ايده وسلمت وبعدني توني تا احب راسه لگيت نفسي طاير بأخير الوادم هبابني تدامنت السياره ردت انداس
عمي هذول ربعنه مو بشر قسم بالله جاي نگللهم الزلمه تعبان خلو يرتاح عود ظلو حببو بي سنه ونامو ويا عسما يحبلكم بس خلو يرتاح
سعاد : هسع شلون والله معد اتصبر عك الله روح جيبه
نشمي : شجيب منه اهجبي يابه والله ما راح يطير ابويه خل تخف الوادم من المضيف وهو يجي يمجن وطشن جگليتاتجن اليابسات
سعاد : دگول والله جگليتي يابس شو هاك ضوگ
نشمي : شو وحده يالبخيله
سعاد : عجل ميه والف ضوگها وگلي شلونها
نشمي : شلونها يعني تسلم عليج
غدي حرام طعم صابون شنهاي ديرن بالجن اطشن هاذ على ابويه هسع يعبالي صابون ويگوم يليف
ديالا : التمو الثلاثي وبلشت سوالفهم
باهي : عود من هسع اگللكم اليوم الليلة لأمي
نشمي : خاف حامض على بوزك الليلة لأمي هيه الجبيره وحجي زايد ما اريد
كواكب : كافي انلصمو وانگلعو غادي هسع يجيكم شاكر مزرعد
ساجي :لحالكم تسولفون اليوم يم امي
نشمي :امك مريضه خطيه راح تنضرب بوري
ساجي : حت لو مريضه اطالب بحگها لو اندل تصير بالفشگ
نشمي :سولفو براحتكم يمه عوفي الشغل روحي اكشخي
كواكب : راح اگوملك بالجفجير اطلع بره اخيرلك
خوش الفگه گرة عين الصياد على هاي الخلفه
شاكر : هاذ انتو هين واني ادورلكم جان استحيتو مجابلين النسوان امشو عالمضيف الولد محد يلحگ
نشمي : راح نبلش عاد يالله هم انته امشي جدامي
خاف تعبالي اخليك هين تجابل مرتك والتعب بس علينه
شاكر : وجع الي يملخ اذانك امشي
ديالا : راحو الولد وگمنه نشتغل بدون واهس عبن بالنه يم ابو نشمي نريد نشوفه والله مجاي نصبر
يربي
سعاد : مال هسع اتلثم واطب بنص المضيف وارجدهم شاجور اخلي طشارهم ماله والي
ديالا : سويها مثل دگة وادي
سعاد : هههه يمه لا تذكريني بوادي ينعل بليسه
والله وگدر يصير خليفة الصياد
ديالا : گبل فتره اجو اهل المجتول
وگعدو بالمضيف ويدورون فصل
زلم العشيره كلها ملتمه علت اصواتهم وطلعو الكل من المضيف عبن معد ياخذ من گد البشر
محد يفعل ينطي مجال لشاكر وولد صياد يحجون والله زعم زغار وخلو الكبار يحجون
زهگ وادي وصعد عالسياج ويرجد شاجور فشگ فوگاهم خله الكل يسكت حط الرشاش على جتفه وگام يسولف
عساف :اسمعوني زين گبل لا تگلولي حدر واكرص وانته زغير احذركم تره الي يگرب يمي ادير بي شاجور طابگات عندي ويا ويلكم مني
ــ هاذ لمن الوليد
عساف : اني وادي ابن صياد السباع صگار الزلم
الي ارجل واحد بيكم من يگف يمه يغدي مره
انتو لو عدكم ذرة رجوله جان واجهتو الصياد بالعشائر بس شفتو نفسكم محد يگدر يگف جدامه رحتو مزرعدين عالحكومه شتكيتو
ــ انلصم وحدر احنه نحجي
عساف : لا والله ما انلصم فصل ما ننطي لو فلس واحد شنهي تريدون تثبت التهمه على ابويه هاذ صياد السباع ما يكتل غدر
ابويه يحط عيونه بعيون الزلم وياخذ حگه ويخلي العرب كلها تدري بي
ــ حدر يا وادي راح اگوملك.
نشمي : الي يمد ايده على وادي لا يلوم الا روحه
خلو يسولف اخير من بعض ربعنه
ابويه مو واوي حشاه هاي تلتگي بشواربكم انتو
مو شوارب الصياد الي تسواكم
خاف يجيكم واحد ويگول ننطي فصل وتعالو تنازلو
تره هاذ. مو من عشيرتنه واحنه متبرين منه
شاكر :بس الجبان والي ما عنده غيره يروح يشتكي
يالله كلمن لهله وفصل ماكو
عساف :خل ابويه يظل بالسجن سنين السجن لرجاااال
.
سعاد : اي والله خلاهم محد يندل دربه وطلعو ركض
ديالا : وهسع طلع ابو نشمي بدون فصل
وبدون ما توسلناهم هاي شوكه بعيون الشماته
سعاد : الحمد لله ربج رحيم ما عافه وحده
جوانه :ابشرجن عمي اجه وفات عالحمام بس ما خلوني اسلم علي هذول الولد يمشون ويا عبالك حراس
ديالا : خلي الزلمه يسبح ومن يطلع نروح نسلم علي
جوانه : يبوو والله مليت من الأنتطار يربييي
سعاد : گامت تصيح المصگوعه
ديالا : لو تشوفينه شلون تحب عمها وتهتم بي
اني شگد صارلي هين ما فد يوم ضحكت ومزقت گدام صياد وجوانه من اول سبوع گامت تمزق ويا وهو مكيف بيها وما يخلي نشمي حت يخزرها
سعاد : خليها يمعوده نيالها وين لگت هيج عم
… شبلاج يولي گمتي تروطين
ديالا : مدري شو دخت وصارلي فتره تلعب نفسي
سعاد : امت اخر عاده
ديالا : اهو وين راح تفكيرج
سعاد : هسع بس گليلي
ديالا : انطيتها التاريخ وگامت تحسب
سعاد : خايبه صارلج ثلث تشهر هسع ابنج اختطو شواربه ابطنج صدگ جذب مبارك اليوم العيد عيدين
ديالا : يمعوده لا تشيعين عليه امانه تره ما احس بشي
سعاد : وانتي منين يتهيالج تهجسين اذا تكربين ليل ونهار يمكن اجاج شاكر وانتي ما هجستي
ديالا : هههه لا مو لهل درجه يمعوده
يالله خلي نكمل شغلنه گبل لا تجي كواكب وتعيط بينه
سعاد : ظلينه نكرب شغل النهار كله وما شفنه صياد
لليل وره ما تعشت الوادم وفضت نصها رحنه بالهول وجان يفوت ابو نشمي ريت طولي بعد هالطول
رغم جان شكله تعبان ومتغير مبين علي الهم.
بس هيبته نفسها وطبعه نفسه ما صافح ولا مره خله ايده على صدره والنسوان اطش جگليت وتهلهل
راحت جوانه مزرعده وجان تصافحه
وگامت تبجي من فرحتها بس هيه يصافحها عبن مرت ابنه جرها وجان يحط ايده على جتفها ويحب راسها وابتسملها
سلمنه علي كلنه وجان يگعد وكلها تربعت يمه وندحج علي عبالك تلفزيون جدامنه ظلينه لنص الليل گاعدين وهو عيونه عالكل ويتفگدهم ما خله واحد وما سأله على احواله
كيف من سمع مرت باهي حبله
ناداها گعدت يمه خطيه رادت تموت من الخجل
وباهي گام حب راس ابو
ظلينه فتره يمهم واجو اخواني گالو يالله
لو بيدي ابات يمهم بس مگدر ترخصت منهم ورحت
ديالا : من راحو العمام صياد ترخص من الكل وراح نام بحجرة مشعل وگمنه نضحك عالولد الي تفشلو نشمي من كل عقله زعل
نشمي :هاذ ابويه من كل عگله عاف النسوان
وجفت بحجرة عمي مشعل
شاكر : لا يسمعك ابوك ويجي يطيح بيك بالعگال
باهي : يالله هالليله خلو يرتاح وباجر نسوي قرعه
نشمي : لا والله هسع امي تنصب نفسها وتروحله
كواكب : والله ان ما كرصت لگوملك اشو غادي فرد نوب مفلوت ومهنگم
نشمي : فوگ ما افكر بمصلحتج
كواكب : خلفله عليك گوم انطمر بحجرتك
يالله نامو تره عدنه گعده من الغبشه
نشمي : شنهي الجديد احنه يوميه نگعد من الغبشه
كواكب : كافي گوم انطمر
ديالا : گام نشمي طلع جانت جوانه واگفه بالباب جرها من ايدها واخذها عالحجره
نمنه بسلام وراحه جنه فاقدينها من ست شهور
گعدنه الصبح نشتغل بحب ونولم كلشي وكلنه عيونه عالدرج انتاني ابو نشمي يحدر
اجت سعاد وامها اليوم من وكت وگامت تولم ويانه
سعاد : حطينه السفره بالهول وكلها التمت حدر ابو نشمي ومن شاف اللمة ابتسم بحب وفخر
گعدو عالسفره يتريگون وكلها ادحج علي جان ياكل بكل هدوء شبع گبلهم وگام
صبيتله جاي وقدمتله
صياد : عسا لا شافت اديج الهم
شلونج بنت العم عساج زينه
سعاد :الحمد لله من طلعت انته غدينه نزهي بالنصر
ابتسم وخاط الجاي
صياد : عساج دوم تزهين بالنصر ام ياسين
عجل جهالج وينهم ما جايبتهم وياج.
سعاد : دنگت راسي وحجيت… لا ما جبتهم
رفعت راسي شفته مقلص عيونه ويدحج عليه
صياد : شگد صارلج هين
شاكر : اخوي هسع رتاح وبعدين اسعل على احوال ربعنه
سعاد : صد على شاكر نص التفاته ورجع سألني
صياد : شبلاج ام ياسين ما سمعتي سعلتج شگد صارلج هين
سعاد : جاوبت امي بدالي
ـــ :صارلها خمس شهور هين
جابها رجلها وره ما نسجنت وما وصلها
سعاد : فتح عيونه ويدحج عليه وعلى شاكر
ما گدرت احجي شي ترخصت وردت اطلع وگفني
صياد : تعاي وين رايحه
سعاد : رجعت بمكاني ادحج علي عيونه تلهب
صياد : شعندج انتي ورجلج شصاير
سعاد : شلون احجي هسع شگللهم
محد يعرف سبب السالفه الرئيسي هي ليال
ادحج على ديالا وجوانه بطرف عيني
انتبه عليه صياد وجان يگف
صياد : الحگيني ام ياسين
سعاد : طلع بره وهو جاتف ادينه وراه
لحگته وجان يگف بصف الدنگه
صياد : سولفي يابه شبلاج ويا ويلج تجذبين عليه
سعاد : بلعت ريجي وحجيتله كلشي من البدايه لحد ما اجيت هين وگمت ادز اخويه تا يشوف ليال
رفعت عيوني على صياد جان مصدوم
نهبل الزلمه وگام يرجد بروحه وينادي على شاكر
طلع شاكر مذعور وجان يگضبه صياد من ياخته
ويرعد بوجهه
صياد : شوصيتك انيييي مو گتلك عسما اهفي وانحكم اعدام ما اريد تعوف الي وصيتك بي سولف ليش ما وصلتهاااا
سعاد : دنگ شاكر وما حجه شي
طلعو ربعنه كلهم وجان صياد صاح على جوانه وديالا
صياد : امشن ولمن نفسجن وتعالن بساع
ديالا : شكو يربي شصاير راحنه ركض تولمنه
ورجعنه وصياد لازم شاكر من ياخته ويرعد بوجهه حت ازرار دشداشته تگطعت
صياد : شغله وحده وصيتك بيها وما دبرتها يخسه شاربك اي والله
ديالا : التفتت صياد على نشمي
صياد : عندك عتراض جنتي تروح وياي
نشمي : لا يابه عش اعترض انته ابو الكل
صياد : وانته شاكر عندك عتراض
ديالا : يربي شكو هاي وين نريد راح صياد شغل السياره وصعدت الشيخه گدام واحنه وره
گام يسوق سريع ونفسه يتصاعد ويضرب الستيرن بعصبيه
خزامي : وليدي سوق على كيفك دخيلك لا تگلبنه
شبلاك هسع جان صبرت مو هسع تجيك وادم وما تلگاك يابه وانوب عفت ربعنه بقلق محد يندل السالفه شنهي
ديالا :ابو نشمي وين نريد احنه شصاير
جاوبني بعصبيه
صياد : الزلم ما بيهم خير
انتن يالنسوان شلون تعوفن اختجن ست شهور ما وصلتنها وانتن تعرفن زين هيه يم منهو عايشه عتبي عليجن وعلى امي
خزامي : ابوك تمرض وراك والتهيت بي سامحني يابه حرت عليمن اصد
ديالا : گمت ادحگ على جوانه ما فتهمت شبيها ليال
… اخو سعاد كل فتره يروح ويگول زينه
تخبل صياد وجان يضرب الستيرن وما حجه شي
گامت السياره تروج بينه راد يگلبنه نطقت الشهاده بگلبي ولزمت ايد جوانه
ما وصلنه بيت ليال وبينه دم ولحم
حدر بساع وجان يعيط بينه
صياد : فوتن بساع شوفنهااا والي تطلع جدامجن وتمنعجن اريدجن تگضن بيها التوبه
ديالا :طبينه الطرمه دگينه الباب هذول بعدهم نايمين يگعدون متأخر
رجدنه الباب قوي وجان ينفتح الباب
وطلعت شكحه تفرك بعيونها وراهه رافده تلبس بالربطه انصدمن من شافنه گامن يبلعمن
ردنه نفوت وجان شكحه حطت ايدها وما تفعل تخلينه نفوت دفعتها جوانه حيل وطبت جوه گامن يحجن ويغلطن علينه وانوب طلعت نضال من حجرتها
وگفن صف واحد وما يفعل يخلنه نفوت على حجرة ليال يدفعن بينه زهگت جوانه وجان تسحل رافده من شعرها واني لزمت نضال نومتها بالگاع واضرب بيها ليشتها تليش وشكحه تصيح
انفتح باب حجرة ليال وطلعو عمر وعثمان
شافونه وظلو واگفين عفت نضال ورحت عليهم جانت حالتهم تقهر شايلين هموم عبالك عمرهم بالخمسين بوستهم وما انطو رد فعل
امكم وين
ما ردو عليه ردت افوت عالحجره
وجلب بأيدي عمر وعيونه مغورگه
عمر : لا تفوتين عليها عوفيها
ديالا : شبيك خاله خليني اشوف امك
هديت ايدي منه ورحت عالحجره وجان يجي يحط ادينه عالباب وما خلاني افوت
فتحت اثمي هاذ شبي
اجت جوانه وره ما دفرت رافده وجان تدفع عمر ونفوت جوه
ياريتني متت ولا شفت هاذ المنظر
نهد حيلي ثنيت بالگاع واصرخ والطم على وجهي
اريد استوعب الي جاي اشوفه ادحگ على جوانه مصدومه وفاتحه اثمها
والشيخه تبجي وتصفگ بأديها
جانت ليال مصلخه بطرگ الأتگ
ومربوطه بحبل على كل جسمها وشادينه بالشباك
وشادين اثمها بالربطه
رجليها مجرحات ويطلعن دم
تلاوز بعيونها عبالك ما تشوفنه
ركضت عليها بدون شعور تخبلت
اجت جوانه ويايه گمت اوخر الحبل منها
وعمر مجلب بأيدي ويصيح
عمر : عوفيها لا تحلين الحبل راح تنهزم بره وتصلخ
راح تنهزم عالشارع عوفيهاااا
ديالا : ارتخو اديه واني ادحگ علي حضنها ويبجي وراح جاب جرجف غطاها
عمر : عش جيتن هسع شتريدن عفتونه وحدنه محد اجه وشاف امي صارت مخبله تضربنه وتصيح وتصلخ وتنهزم رادت تموت عذباء
ديالا : عذباء. گمت التفتت حواليه وينهااا اختك وينها عذباااء
عمر : اخذتها عمه كريمه صارلها زمان
روحن يالله ما اريد احد يجي علينه امي تخبلت من وراكم
ديالا : دموعي تصب وادحگ على جوانه اريد افتهم شصار بعد مگدر احجي تربعت بالگاع ما ظل بيه حيل
جوانه صارت اسبع مني دفعت عمر
و حلت ليال من الحبل وجان توگفها
تخبلت ليال وگامت تصيح وتضحك وتشگگ بملابسها
وتريد تنهزم بره لزمناها ثلاثنه وما گدرنه
بيها الحيل كله محد يگدر يگرب منها تضرب وتخرمش لفتها جوانه بالجرجف وجان تجضعها بالگاع واني جبت الحبل وجتفتها انوب وشدينه اثمها
جوانه : عوفي البجي يا ديالا شنسوي هسع
شلون راح نطلعها
عمر : وين تريدون بيهاا ما تاخذونها لمكان
خزامي : وليدي لا تعرض هاي امك مريضه لازم نعالجها وترجع مثل گبل
عمر : ما ترجع امي تخبلت بعد
عوفوها بحالهاا
ديالا : طلعت من الحجره جانن نضال ورافده وشكحه بالصاله من شافني طبن الحجره وسدن الباب على نفسهن
رحت على صياد جان يفتر بره ويدخن
من شافني اجه يمي ملهوف وسأل
صياد :ها يابه صارلجن شگد جوه شلونها اخيتج
ان ان شاء الله زينه
ديالا : غصيت ودموعي تصب
صياد : شبلاج يابه اخيتج جرالها شي لا تكرصين سولفيي
ديالا : احجي واغص بالكلمه
حجيتله كلشي تخبل وگعت الجگاره من ايده صد بصفحه وراح يم السياره لزم گلبه شويه وجان يضرب السياره بثنين ادينه صد عليه واعصابه نار
صياد : جيبيها خن ناخذها ويانه
ديالا : ما نگدرلها ابو نشمي گويه حيل
صياد : لفنهااا بجرجف ونادوني
ديالا : رجعت لفيتها بجرجف مهدتها تمهد
وطلعت ناديت صياد فات عالبيت بدون شعور
لفلف ليال وشالها وهاي ترافس همزين جتفناها
عمر وعثمان يرجدون بروحهم ويركضونه ورانه
صياد حط ليال بالسياره وخله الشيخه يمها وره
فتح صندوگ السياره طلع مگوار
اجه انطا لجوانه وگز سنونه
صياد : فوتن عليهن وشگد ما بيجن حيل اضربنهن
ديالا : طبت جوانه ركض واني وراهه
گمنه نرجد بالباب وما يفعل يفتحنه دفعنه وما گدرنه
رجعنه على صياد شفنا يفتر والگاع مجاي تحوي وعمر يركض وراه يريده ينزل ليال وهاذ مغلس عنه
گناله ما نگدر نفتح الباب
صياد : ادفرن الباب على مكان القفل
شگد ما بيجن حيل امشن
ديالا : رجعنه انوب ونضرب بالباب وما يفعل ينفتح
راحت جوانه جابت شيش وجان تحطه بيه الباب والحايط وتدفع لحد ما نفتح وطبينه عليهن گامن يصيحن
لزمتهن جوانه بالمگوار كل ما تضرب وحده تخليها بالگاع ترعص واني ادبج عليهن واهلس
خليناهن بتالي روح ودمايتهن تكت
طلعنه نلهث من التعب
وگفنه صياد وهو متعصب يفور الگاع مو حاويته
صياد : ارجعن عليهن انوووب
ديالا : والله خوش ضربناهن
صياد : هذني سوت بأختجن الفعايل وانوب سحرنهااا امشن
ديالا : رجعت جوانه ركض ولحگتها والله ما ظل بيه حيل جوانه بس تريدلها حجه
لگيناهن على نومتهن ولزمتهن ضرب بدون وجع گلب
جوانه داست على راس نضال الا خلتها تفقد
طلعنه انوب وصياد على وگفته يفتر
گعد يم عمر ولزم كتوفه ويصيح علي
صياد : امك مريضه مريضه افهم يا بشر ناخذها نعالجها ونرجعها لك محد ياخذها منك
امشي ويانه يالله
ديالا : قنعهم وجان يصعدون ثنينهم گدام
واحنه وره جانت ليال تريد تفلت وتصيح همزين شدينه اثمها بالربطه
گلوبنه ترجف ما نعرف شنسوي
صياد : وينها اختكم
عمر : يم عمتي
صياد : تندلون بيتها
عمر : اي اندله
ديالا : گام عمر يدلي بصياد عالبيت مال كريمه وصلنه عليهم وجان احدر اني وعمر دگينه الباب وطلعت كريمه علينه اول ما شافتنه وگامت تبجي
سلمت عليها وفات عمر جاب عذباء يروحي شكبرانه وحلوه شلتها وجان تلزم ايدي كريمه
كريمه : انطونياهه عش تاخذونها امانه والله تعودت عليها حت رجلي معد يضربني من يوم الي جبتها يمي تعلق بيها
ديالا : مگدر اخليها تعذريني الله يرزقج الذرية الصالحه
كريمه : اخ يا ديالا لو احجيلج شصار بليال
مدري شجاهه تخبلت
ديالا : امج ونضال ورافده سحرنها وخبلنها
بعدين نتواجه وتحجيلي كلشي هسع مگدر اظل
مشيت من يمها وهيه ظلت مصدومه
صعدنه السياره ومشينه
خزامي : هسع وين ناخذ المره والبيت مليان اوادم
ديالا :گز سنونه صياد وضرب الستيرن بعصبيه
صياد : ما ناخذها على بيتنا
يتبع…… ..
ختصرت الست شهور
عبن ليال ما جانت اتذكر بيهن شي ومو بوعيها مگدرت احجي بلسانها
وما ردت اذكر كل حدث صار ابيت الشيخ علوان بهاي الست شهور تا ما ينعرفون
حسبي الله ونعم الوكيل على كل شخص يتعامل بالسحر