ما للجميلةِ قلبُِها ليْ لا يلينُ
إنّي ساسكُنُهُ إذاً مهما يكونُ
كَمْ آهةٍ اطلقتُها من عُمقِ قلبي
كم دمعةٍ في الليلِ تذرِفُها العيونُ
لا الوردُ إن اهديتَهُ يُجدي لديها
ويعودُ ليْ متباكياً (إنّي حزينُ)!
وانا لَديَّ ودائماً ثِقةٌ بنفسي
عِندي بها أيضاً هنا دوماً يقينُ
يوماً سادخُلُ للمدينةِ فاتِحاً
مهما تعددتِ الكمائن والحصونَُ
يوماً ساجِلسُ كالملوكِ بعرشِ قلبِكْ
إنّي عليهِ هناك لقويٌ امينُ!
عرين الصياد بقلمي شذرة
ديالا : راح ابو نشمي تا يعرف قرار ليال شنهو
وهاذ صار المغرب وهو ماكو
جوانه والشيخه لازمين واجبات بره يتانون بي
متوازيات عبالك هنه يريد ياخذن ليال
_طلع نشمي تخصر يدحگلهن
نشمي :لحالجن روحن اگفن عالشارع انطرن
جوانه :شعليك انته عش وار
نشمي :لا تناطلين تره خوش منطيتني ضهر
اذا ادفرج اوصلج الباب
جوانه :شو يا الله اضرب
تا اخلي عمي يكسر رجلك
نشمي :تأدبي يبنيه وجري عدل
تره خوش انطيتج مجال
خزامي :كافي عاد لا تگاضبون
شبلاكم جنكم الروسيه
ديالا :وگفت جوانه طبت جوه ادردم
ونشمي گعد بمكانها
قلقت جثير عش تأخر ابو نشمي
عاد اليوم عدهم گعده مهمه
ولمنه العشه ومدينه السفره
تا اجه جان متعصب وجهه عابس
ما فعل يتعشه
صعد فوگ لحگته الشيخه
وجوانه هم سحبت نفسها وراحت وراهم
شويه ورجعت بمكانها
حدر ابو نشمي
شرب الجاي وطلع والولد كلها وراه
راحو عالگعده الله يعينهم اليوم شراح يسوي بيهم على هاذ وجهه العابس وعصبيته
ادحگ عالشيخه تبدل حالها
لازمه السبحه تسبح وتستغفر
وجوانه گاعده يمها مجتفه اديها
اشرتلها بحواجبي وجان تجي تگعد يمي
جوانه : هاا شعندج
ديالا : انتي الي ها شعندج شبيهم عمج والشيخه وانتي هم ماده البوز
جوانه : هسع اگلج وترزليني
ديالا : عش ارزلج سولفي شكو
جوانه : مو اني رحت اتصنت على عمي والشيخه بحجرة عمي مشعل
ديالا : استغفر الله يربي اني جم نوبه بلغتج لا تصنتين على احد شعذرج من عمج اذا لگفج ها
جوانه : مو قلقني وضع عمي ما شفتي حاله شلون
ديالا : وذا قلقتي عش تصنتين وهسع شفتهمتي
يالله
جوانه : ما گدرت اسمع زين بس واضح ليال ما تفعل اتزوج عمي اسمعه يگول للشيخه
صياد :هاي الدثوه الي ما تفعل تكبر وتظل بعقل الجهل راحت ربطت حياتها ومصيرها بقرار جاهل وخلت جهالها يقررون حياتهاااا شلون ما ترديني اور بنار
جوانه : ما گدرت اسمع زين خفت احد يشوفني ورجعت
ديالا : شمدريج يقصد ليال
جوانه : والله ما تعدتها مو گالت راح اشور جهالي
الضاهر شارتهم وما يفعلون ومحد دثو غيرها
ديالا : انلصمي خوش صايره ما تحترمين
جوانه : احنه بوضع مو مال حترامات جاي نحجي الحق اكو وحده عايشه ويه شكحه ورافده وانوب نضال يمهن وتروح تحط مصير حياتها بيد جهالها
يالله گولي انتي اكو عاقل يسويها صارت ام لثلاث جهال وبعدها نفس الفطاره وبس فالحه تبجي وتنشگ خنينتها وتمش دموعها بردانها من اتذكر تصرفاتها امدي اشيلها ارجدها بالگاع تفور دمي والله
ديالا : مبين من حال صياد و الشيخه كلام جوانه صحيح يربي هاي ليال تظل بعقل الجهل وما عدها كلمة على جهالها شلون بيها الهي نور عقلها
ظليت اكل بروحي من القلق وانوب الولد طولو وگمنه ندعي يمر هاليوم على خير ونخلص عاد من هاي الطلبه الگشره
مرت الساعات علينه عبالك سنه
صارت بـ11 ونص يالله اجو كلهم عاگدين الحواجب ومحد بيهم حجه شي كلمن راح لبيته وحجرته ويكاون ذبان وجهه
ما سألت شاكر شي مبين من شكلهم
متكاونين والطلبه مليوصه بالزايد وعلگانه
استغفرت ربي ونمت واني ادعي ربِ يسترنه
للصبح وربعنه بعدهم نفس العبوس ومحد يحجي
كل واحد مبين على كتوفه جبل هموم
ولمنه سفرة الريوگ ونادينه الولد يتريگون كلها التمت الا ابو نشمي راح مدري وين
گمنه على شغلنه نادتني الشيخه
اني وجوانه ورحنه على حجرة الشغل
خزامي : شفتن اخيتجن شسوت يمه
گالت اشور جهالي وانطيناها مثل متريد وراحت شارتهم وگايله لأبو نشمي ما اتزوج
جهالي ما يفعلون ومگدر الح عليهم خايفه لا يبجون اسمعن البهض
ديالا : صديت على جوانه يربي ما ادري شحجي هسع شلون فشله حطتنه بيها جان تگدر تگول مگدر لو تعذرلها بشي مو تگول جهالي ما يفعلون
گمت ابلع بريگي احسه نشف
: هاي هي شيخه انتو سويتو الي عليكم
وصدگيني ليال معد تقتنع لو تندل بنفسها تموت
ما تكسر بخاطر جهالها
خزامي : لازم تقتنع لازم نظل نحاول وياهه
شلون مجان هاذ جاهل بساع يتبرطل
جوانه : لا والله ما يتبرطلون هذول مو بس يحبون اهمهم ويغارون عليها هم
هو جاهد جان اذا يحضنها يتخبلون وليال تمشي بشورهم هاي اني اگلج اگطعي،نفسج منها
خزامي : لا تصعبن السالفه وهيه سهله يا عيني
لا تسدن كل البيبان هسع نروح ونحاول انوب ونظل وياهه لحد ما تقتنع يالله جوانه هيري روحج
جوانه : وين
خزامي : نروح على ليال نحجي وياهه
جوانه : خاف نشمي ما يفعل
خزامي : بكيفه ما يفعل هسع ادز علي ويجي مثل الخوش
جوانه : هسع يگول هاي انتي حرجتي الشيخه عليه
خزامي : اذا يسولف اجسر ضلوعه امشي تولمي
واني هم اروح البس عباتي تا نشوف تالي ليال المصگوعه
سعاد :اجو نشمي والشيخه وجوانه
تنحرتهم وسلمت... يالله تعدو جوه زارتنه البركه
نشمي :بيتج عامر سعوده اني اظل هين
خزامي : بنيتي دزيلنه على ليال خليها تجي بساع
ما عدنه وكت
سعاد : اي هسع
طلعت ودزيت ياسين تا يناديها ورجعت گعدت يمهن وعرفت عاد اجن تا يحاجن ليال انوب
ليال : يربي شعدهن الشيخه وجوانه بس لا اجن يعيدن نفس الحجي رحت عليهم امشي بملل شفت نشمي عالشارع يفتر ويدخن
طبيت عالهول سلمت عليهم وگعدت ومثل ما جنت متوقعه اجن على نفس السالفه
خزامي : يمه انتي شلون تربطين حياتج كلها ومستقبلج بيد جهال توهم فگسو من البيضه ما يعرفون التينه من الطينه
ليال : كلشي يعرفون يا شيخه واني مگدر اكسر بخاطرهم اب ما عدهم واني شلت الحمل وحدي
ما اريد يگولون مات ابونه الي جان مدللنه وظلت امنه وگامت تفكر بالزواج
خزامي : يولي انتي معرسه لنفسج لو علمودهم
قابل راح ننصبج ونفوتج عالحوفه فهميهم هاذ الزواج لمصلحتهم اشرحيلهم بالتفصيل
ليال : حجيت والله بس ما يفعلون شسويلهم
هاي هي اني نسيت الموضوع وبعد ما اريد احد يحجي بي اترجاكم
خزامي : شلون تنسينه وعمتج الحيه تظلين عايشه وياهه ما تخافين ادربيلها عليج صگعه
ليال : يا شيخه المره هسع مو بحالي عدها الهموم الي تكفيها وزياده اني هسع اسمع منها جم كلمه
وتعودت عليهم شسويلها
سعاد : ظلن متجادلات فتره ومحد تنطي مجال لوحده لا ليال ولا الشيخه
لحد ما ليال زهگت وجان تگف
ليال : شيخه اني احبج واعزج اترجاج انسي هاذ الموضوع تعذريني عندي شغل اترخص منج
سعاد : طلعت ليال وظلت الشيخه تحمس بروحها هيه وجوانه طلعن متعصبات وجان يروحون
رحت تا اشوف ليال
طبيت على حجرتها وگمت احجي وياهه علمود توافق
ليال : اترجاج يا سعاد اتركي سالفة الزواج مستحيل اتزوج وجهالي مو راضين
سعاد : يولي نقنعهم نبرطلهم وعندج هاي عذباء نقطة ضعف الهم استغليها
ليال : شجاي تحجين كل عقلج
سعاد : مستمره احجي وياهه وجان يفوت عمر
عمر : شجنتن تحجن
ليال : كلشي ما نحجي شتريد
عمر : جانت نضال بالباب اتصنت عليجن
سعاد : يهالعثره بس لا تروح تزود الحجي
ليال : شتزود ليش شحجينه خليها تولي
اذا تسولف شي اخلي جتلت هذاك اليوم تلوحها
سعاد : عجزت واني احجي ويه ليال
تالي عافتني بالحجره وطلعت قافله ما تفعل
رحت گضبت عمر من كتوفه وحجيت ويا يخلي امه اتزوج وتاخذهم وتروح اشو هاذ انرعص وطلع بره
غدي شهل طبع هاذ
ديالا : امانه صدگ تحجين يعني ليال صيحت عالشيخه وعافتها وطلعت
جوانه : اي والله هاي ليال تخبلت رسمي ولا عبالك هاي الشيخه گدامها
ديالا : يبو يهالعثره فشله براس فشله
وياريت عاد الشيخه وابو نشمي يفكون ياخه من هاي المصگوعه منجدتنه وياهم
جوانه : انوب الشيخه وصتني ما اجيب طاري حجي واگول ليال صيحت عليها
ديالا : جزاها الله خير بس شلون بعد احط عيوني بعيونها انوب
جوانه : هسع راحت تسولف ويه عمي خن اروح اتصنت
ديالا : تعاي وين موليه... يربي هاي راح توگع نفسها بهبيه احسن شي اروح انحش نشمي عليها اخلي يضبها
ليال : رحت عالمطبخ افور مي لحليب عذباء
سمعت صوت نحيب خفت وگمت اتلفت
ماكو احد بالمطبخ عجل هاذ وين الصوت تهايگت من الشباگ شفتها كريمه گاعده
جوه شباك المطبخ مقرفصه وتبجي
خليت المي عالنار ولفت يمها
جانت تگهد بعبره تگص الگلب
گعدت يمها من شافتني مسحت دموعها
وصدت بصفحه
حطيت ايدي على جتفها
: ما الومج شما تبجين يا كريمه منا رجلج ومنا امج ومنا اخوتج حياتج اصعب من حياتي... .شهگت وجان تحضني وتبجي
كريمه : محد حاس بيه يا ليال والله تعبت
ياريتني اموت واخلص
ليال : لا يولي اسم الله عليج تره انتي مصگطه نفسج بنفسج
كريمه : شلون اني مصگطه نفسي متگليلي
اني حياتي انتهت من يوم الي استشهد ماجد هاذ البيت كله تدمر وراه
ليال : اي والله لو گلتي هاي صحيح
جان واگفلجن مثل الدرع شحده الي يحاجيجن
كريمه : اي شفتي شلون جان سبع وهسع راح وعافنه وحدنه گلبي محروگ يا ليال اجي يم امي تا اشكي ضيمي وتزيد همي هم وانوب بركات وسعد مدري عنهم ميتين عايشين
ليال : ان شاء الله عايشين والله گلبي بارد منهم يرجعون
كريمه : امي هم تگول گلبي بارد منهم
ليال : اي الأم تحس بضناها مهمها جان
كريمه : عجل واني مو ضناها عش ما تحس بيه دمرتني هيه وعذبتني بهاذ الزواج
ليال :خليها تحجي الي تريده
تعودي عليها مثل ما اني تعودت عوفي رجلج وتعاي هين اني متعجبه بيج شلون جارعته
كريمه : ضرب رجلي اهون من كلام امي يا ليال
ليال : لا مو اهون لو صگطج من الضرب وخلاج معوقه شتحصلين ها عوفي وتعاي اگعدي هين وتطلگي منه مو ابن خالج محامي شوفي بلكت يساعدج امج ما من وراهه نفع
كريمه : ابن خالي المحامي من يوم الي الملثم صگطه من الجتل وور مكتبة ما شفنا طلع من بيته
ليال : يالله هسع كافي تبجين ما تضرين بس نفسج گومي ويايه بحجرتي لا تگعدين يمهن... جريتها من ايدها واخذتها بحجرتي ورجعت جبت المي الفاير وگمت ابرد بي تا اسوي ممه لعذباء واجت سعاد وخوش صارت گعده وگمنه نمزق تا نضحك كريمه خطيه
ديالا :مرت ايام وطلايب ربعنه بعدها تجر تالي قررو الگعده تصير يم طرف ثالث بصلاح الدين ولازم الطرفين الي متكاونين يروحون
وباجر غبشه يمشون كلهم وبلكت الله تفض ملينه
زلمنه معد نشوفهم بس وكت الوجبه
گعدنه غبشه ودعناهم بالسلامه
والشيخه راحت وياهم تا من غادي تمر على اهلها
ظلو ثلاث تيام وجان يجون
والحمد لله متراضين وخلصت الطلبه وجابو وادي وياهم اول ما حدر وركض على جلابه عبالك اب وجهاله
كلها مكيفه بهاذ الصلح الي صار
بس ابو نشمي مو مكيف اعصابه نار
وعيونه تلهب من طب البيت يا دوب سبح وبدل وطلع مدري وين
...
سعاد :طلعت بره وجان اشوف ليال
شايله عذباء ومتهيره هيه ولدها مدري وين تريد
رحت يمها تخصرت تعاي وين موليه
ليال : اريد اروح اشوف بيت اهلي
سعاد : دهجبي هين لا تثبرينه
ليال : عش اثبرج اني بس اشوف البيت واجي
مشتاگه لهلي خليني اروح على اقل اشبع شوگي بشوفة البيت
سعاد : گصت گلبي ما گدرت امنعها ولا گدرت اروح وياهه غازي مو هين تا اشوره... زين شلون تروحين خاف يطلعلج جلب
ليال : عمر ويايه
سعاد : هههه والله وصرت زلمه يالمصگوع وتحامي امك
عمر : تخلين فاطمه تروح ويانه
سعاد : لا والله لو تأذن هم تذكر من طردت ادلم وما خليته يجوس عذباء
ليال : حيل بيك تستاهل هاي عود جان يقنع بيه تا اخلي فاطمه تجي
عمر : وانتي عش گلتي تره مو حلو نقل الحجي
سعاد : يمه يمه دحجي شلون زعل وراح يمشي عبن فضحتي
ليال : هههه يالله اسلم عليج سعوده امانه عينج على ملابسي شريتهم توني
سعاد : ينعل بليسج روحي يابه روحي درب السلامه ولا تخافين هسع اگضب العود واگف يم هدومج
ليال : بعد روحي
سعاد : شمهبوله يربي راحت ولا شي يشبه شي منها
لابسه اسود زعم محزنه والشعر مهدود شادته بربطه من النص شايله عذباء وعمر يمشي جدامها وعثمان وراهه تا يحامونها من الجلاب ظليت ادحج عليها ليما تعدت الشارع ولافت
ليال : امشي واتلفت وادعي يارب ما يطلعلي جلب
ما فتت من البستان بي جلاب جثيره
مشينه مسافه وجان تلاگينه سياره وگفت گدامي
دحگت هاي صياد شعنده يربي يمكن يريد على سعاد
فتح باب السياره حدر وهو خازرني
وعاگد الحواجب سلم بعصبيه وجتف ادينه وراه
صياد : وين رايحه
ليال : اريد اروح اشوف بيت اهلي
صياد : تشوفين بيت اهلج گلتي
ليال : اي
ظل خازرني ويحد بسنونه
ما گدرت اجابس نظراته يخوف
دنگت وردت اگمل طريقي عاط عليه بعصبيه
صياد : اوااش
ليال : صديت علي ...ها
صياد : اصعدي اوديج
ليال : لا تسلم گربنه نصل
عاط عليه بطريقه ما ادري شلون اوصفها والله ما حسيت نفسي الا صعدت السياره وره وجهالي گدام
وهاذ فر السياره بعرامه وما شال رجله الا احنه گدام بيت اهلي حدر وجان يطلع مفاتيح من السياره وفتح قفل الباب حاطله سنسله وقفل جبير
هاي عود اني جيت تا اشوف البيت ما عبالي حاطيله قفل گلت اخلي عمر يطفر من فوگ السياج ويفتح الباب
طبيت جوه واني شايله بنتي امشي سريع شبيه اني عبالك احد يركض ورايه والله انثولت يربي وگفت بالطرمه وما ادري بروحي شسوي وهاذ صياد سد باب السياج واجه يدحگلي
ويلف السبحه على ايده
اجه عمر اخذ عذباء مني
وراح هو وعثمان گعدو بالثيله
وصياد وصل يمي وهوه وخازرني
هاذ شبي يربي
راح على باب الصاله فتحه ودفعه بعصبيه
ظليت واگفه بمكاني نوب اجتف اديني نوب اعصرهم اجه وگف بصفي وصد عليه نص التفاته
صياد : انتي شبلاج ما تلبسين ملفع جاهل انتي يولي
ليال : جتفت اديني وخزرته بدون ما احجي هو شعلي بيه كل ما يجي ينحش سعاد عليه شعلي اريد افهم... عاط بيه خلاني اتيه دربي
صياد : نزلي عيونج خازره منهوو هاا
ليال : نزلت عيوني تفشلت صديت بصفحه انوب مجاي اتحرك من مكاني وهاذ نفض ايده وجتفهم وراه وراح يتمشى يم الجهال ويستغفر
التافيت وجان وافوت عالبيت فارغ ومرممينه جديد ولا عبالك جان محترگ
فتريته كله وگفت بكل مكان وتذكرت اهلي وابجي
هاذ البيت الي جان مليان اوادم ظلت بس الحيطان
ماكو حت غرض تا احضنه لصدري واشمه ماكو من ريحتهم شي رحت بحجرة ابويه حضنت نفسي واشاهگ احس العبره شگت صدري
گمت اتخايله بكل مكان بالحجره
علت صوت شهگاتي سديت اثمي وثنيت بالگاع
معد اگدر ابطل بجي دموعي تصب لحالها عبالك ما باجيه صار سنين
حطيت اديني على وجهي واهمس بأسم ابويه ومهره ومحمد وكل اهلي گمت اتخيل نفسي واني زغيره ياريتني متت من هذاك التاريخ وما شفت هاي الأيام
حسيت ايد مسدت على راسي فزيت
وجان اشوفه صياد گاعد بصفي تك ركبه وعيونه تلمع شال ايده من راسي ويدحگ عليه
دنگت ومسحت دموعي برداني
وگفت وهو وگف گبالي تلبگت مشيت تا اطلع
وگفني صوته
صياد : ليالي
ليال : وگفت وبدون ما التفت هاذ ليش دوم يناديني ليالي ما يعرف يگول ليال گلت... ها
اجه وگف گدامي بيني وبين الباب
جانت نظراته اتفحص كل وجهي
دنگت راسي وحجيت ... .هاا ابو نشمي شتريد
صياد :اذا اروح هسع اقنع جهالج ويرضون انتي ما يظل عندج اشكال مو
ليال : رفعت راسي وما عرفت شحجي گلبي محروگ
اعصابي تلفانه نعست فاجأه واريد انام ما ادري شبيه
صياد : ول يابه مو جاي احاجيج
ليال : ما ادري بوكتها ليش اجتني اعصاب
غيرت كل احوالي وعطت بوجهه... . لاااا ما ارضه حت اذا جهالي يرضون اني مرتاحه ابيتي وما عندي كل مشكله
مشيت ردت اتعدا واطلع لزمني من ايدي
وخلاني گباله ظليت متصنمه عيونه بعيوني تلهب ولازم ايدي بقوه
گمت امتمت عبالك مسويه جريمه اريد اگله ما سويت شي اريد ابرر لنفسي ما اعرف شحجي دنگت راسي خضني من ايدي ويحجي من بين سنونه
صياد : انتي شجااااج شهل السان هاذ نهبلتيي
افهمي يا بشر افهمي مو جاهل انتي هذاك البيت خطر عليج اطلعي منه
ليال : هديت ايدي منه وابلع بريگي،گوه يطلع الحجي... لا مو خطر عليه انتو عش خايفين هاا
اني مرتاحه والله وبس يجي حمايه اعقد علي وبعد محد يمسني بحجي... . اشو هاذ تخبل
لزم اديني ثنينهن بقوه ويرعد بوجهي صوته راد يفقدني الوعي
صياد : تزوجين منهوو منهوو عجل ولمي روحج لا يرجع وياخذج
ليال : هديت نفسي منه بالگوه هاذ،مخبل رسمي واني الي اگول عاقل طلعت بساع وهو صد عالشباك گام يكسر بي
رحت يم جهالي شلت عذباء... امشو الله نروح گمت اركض ركض وما التفتت ورايه ليما لگيت نفسي وصلت بيتنا طبيت بساع على حجرتي وگمت ابجي ما ادري شجاني خايفه وحزينه وگلبي احسه مكسور
عبالك ابويه توه مات
ديالا :گاعدين اني وجوانه نمرجع بالخضره نطلع منها الدغل تا الزرع يطلع ويعله زين فات ابو نشمي بسيارته وحدر وجهه حزين وايده تگطر دم فات يمشي على كيفه عبالك يريد يگع يمكن متكاون ويه احد
حفزت جوانه ولحكته ركض... الله يصگعج
ان شاء الله يلگفج ويصگطج
من الجتل ينعل بليسها ولا تنمي
سعاد : الاحظ شكحه صارلها فتره تاخذ عمر وتگعد جوه السجر وتظل تحجي ويا بالساعات
وهاي نضال تخلي ياخذ اميره يلاعبها وتصخر بي هين وهين وتمسكن وزعم هيه الخوش
واليوم الأجتماع غير
حاطه هدومي بالطشت اجلف بيهم
وعيني على شكحه ونضال ورافده گاعدات بالفي مال الشجر ومركزات بالحجي الضاهر عدهم مؤامره جديده وشي اكيد الهدف ليال مزال نضال شايله العود وتخط بالگاع الشغله جايده
ذبحني فضولي اريد اسمع شيحجن
غسلت اديني ونشفتهن ورحت لفت نص المزرعة الي جدام بيتنه وصرت وراهن وگمت اتگنص على كيفي لحد ما وصلت گريب منهم وسمعت اطراف الحجي
نضال : اني ما اگللجن انطب على حجرتها ونذبحها
شكحه : عجل شلون تموت لحالها يعني هاي ما يطگها عرج
نضال : لا اكو الف طريقه تموت بيها بدون ما نبين احنه
سعاد : خدر جسمي بس سمعت هل جم كلمه ومعد اگدر اتوازن دست على عود وجان يطلع صوت
ارتبكت گرمزت بالگاع سويت نفسي الم حطب تا اسجر التنور
اجن وشافني ظليت مدنگه زعم ما ادري بيهم رفعت راسي وسويت نفسي متفاجئه
... اسم الله هاي منين طلعتن
بلعت ريگها نضال وحجت
نضال : هاي شجاي تسوين شگد صارلج هين
سعاد : ثبتت نفسي بالحجي تا متشك بيه
مدنگه الم حطب واحجي وياهه... . شجاي اسوي يعني شتشوفين جدامج توني جيت تا الم حطب ظل عندي نص العجين ما خبزته عبن فطير
گمت اكسر بالحطب بركبتي واصفط
ظلن يدحگن عليه ليما قتنعن مني وجان يروحن
اخذت الحطب خليته يم التنور وجان اتربع بالگاع ولزمت گلبي يمه شهل حجي الي سمعته
منهي هاي الي يريد يذبحنها
ما عدهن غير ليال بالبيت ويكرهنها گمت اخلج واضرب على رجليني دخيلك ربي شهل بشر هذني
رحت تا اشوف ليال ولاگتني نضال
نضال : ها خبزتي
سعاد : لا بعدني وخري من دربي
تعديتها وطبيت على حجرة ليال جانت مصلخه عذباء وتبدللها
ليال : هلا اجيتي بوكتج تا تمشطيلي
سعاد : گعدت وادحگ عليها شلون هسع احجيلها الي سمعته خاف اطلع غلطانه وما يقصدنها وهاي تروح تخاف لو تهجم عليهن وتهمنها بسالفه شسوي يربي
ليال : شبيج سعاد وين شارده
سعاد : ها يمج مو شارده... لا ما احجيلها خليني اتأكد گبل راح اراقبهن هذني الثلاثه واخليهن شغلي الشاغل بس لازم اوصي ليال
هي اگلج من تنامين مو تخلين باب حجرتج مفتوح
ليال : هو اني امت اخلي مفتوح اذا ما اسرگه مگدر انام بس عش گلتي هيج اكو شي
سعاد : ماكو شي بس اخاف عليج من هذني الثلاثه
ليال : اني هم اخاف وماخذه حذري منهن لا تاكلين هم
سعاد : مشطت شعرها وجان اروح
ظليت النهار كله الوب وحايره بزماني
وكلام نضال وشكحه مجاي يروح من بالي
مدري بروحي شلون اشتغلت شلون دبرت البيت
اصب لغازي جاي وشارده اثاري هاذ يحجي ويايه وما ادري
مرت ايام واني اراقب بيهن ومجاي اخليهن يروحن عن بالي ابد
ليال : جنت حاطه ملابس واغسل بيهم اجت شكحه وگفت گدامي
شكحه : گومي شوفي الماطور مجاي يشتغل
ليال : احد گالج اني مصلح
شكحه : گومييي انهضي شوفي شيرادله
ليال : استغفر الله نفضت اديني من الطشت وگمت
رحت وگفت يم الماطور والله ما اعرف شسوي بي ثنيت يمه وگمت اگلب بالوايرات ما حسيت الا الگاع تشيلني وترجدني
سعاد : شايله العود واگفه بالطرمه تا اكتل البريعصي
سمعت صرخه وجان افز طلعت اركض والتفت شفت نضال طلعت وشايله عصى جبيره وراحت بصف المطبخ لحگتها وادحگ شكحه ورافده گاضبات عصي ويضربن بليال وانوب نضال اجت وياهن
...
ديالا :اليوم الولد كلهم بالشغل
وماكو بس احنه النسوان گاعدين بالطرمه الغيدانيه مال المطابخ هاي الي تنفش صوف وهاي الي تخيط
وهاي الي تحوك
دله : والله الي ينفش صوف مو اهين يا زهور
هسع يتطاير ويروح عالمطبخ ويگع بالأجل
زهور : وحتمال يسافر خارج العراق
شبلاج تره هوا ماكو ودحجي حاطهن عالحصيره وانفش على كيفي وهو جديد مو تگولين تخيان
دله : وذا جديد هاذ شعر ما تحزرين علي
ديالا : گام يتجادلجن وجان يجي وادي فات عالمطبخ تا ياخذ اكل لجلابه وصل الباب ما حسينه الا اجتنه صلية فشگ كلها بنص الحياطين
انبطحنه بالگاع ونصيح
وادي ركض عالبيت واحنه زحفنه وراه
طبينه جوه ما نعرف شكو وبس نلطم وكواكب تصيح علينه تا ننبطح
وادي طلع رشاش وصعد فوگ
گمنه نصيح علي ركضت دله اخذت رشاش انوب ولحگته معد نسمع بس الرمي قرفصت واصيح همزين ابني عد ابو جان اخترع لو صابه شي
شويه وجان يهجد الوضع وحدرو وادي ودله يركضون لحگناهم بدون ما ندري شكو وگفت بالطرمه واشوف وادي يركض ويبدل الشاجور وگف بالباب وگعد تك ركبه ويرمي ودله بصفه ترمي عبالك زلمه
خلصو رمي وجان يجون ثنينهم
مذعورين
عساف : صابجن شي
ديالا : لا الحمد لله كلنه بخير هذول منهو يول وشلون فاتو عالبيت
عساف : ما ادري هذول منهو واني صوجي طبيت وخليت الباب مفتوح
ديالا : ادحگ على جلاب وادي واحد منهم مبطوح ويمه دم... يول هاذ جلبك شبي
التفتت مذعور وراح يركض وجان يثني يم الجلب
يتبع...... .