مـا الحُــبُّ إلا جَـذْوَةٌ من نَــارِ
مَحـفـوفَةٌ بالشَـوْكِ والأخطَــارِ
وعُيونُ صَبِّ لَمْ تَذُقْ طَعمَ الكَرَى
فَرَوَت حَكَايَا اللَّيلِ للأسحَـارِ
وحَنينُ قَلْبِ مُفَارِقٍ مُتَلَهِّفٍ
لِوصَالِ مَنْ غَابوا عَنِ الأنظَـارِ
وصَبَابَةٌ عَصَفَت بِمُهجَةِ عاشِقٍ
لتُذيبَـها بالهَـــمِّ والأفكـــــارِ
وأنينُ نَايٍ زَفَّ ألْحَانَ الأسى
وأحَـالَهَـا عَزفَـاً على الأوتَــارِ
وهَوَاجِسٌ تُزجِي القَصيدَ لشاعِرٍ
كَلِفٍ بِسِحرِ الغِـيدِ والأقمَــارِ
فَاضَت مَشَاعِرُهُ بِنَزفِ يَرَاعِهِ
لِيَبوحَ بالآهــاتِ في الأشعَـارِ
وحَسِبْتُ أفْئدَةَ الحِسَانِ رَقِيقَةً
لَكِنَّـهـا أقسَـى مِـنَ الأحـجَـارِ
فَلَرُبَّ سَهْمٍ قَد أصَابَ جَوَانِحِي
شَطَرَ الحَشَا نِصفَيْنِ كالمِنْشَـارِ
آهٍ لِحَالٍ العَاشِقينَ مِنَ الهَـوَى
رِفْقَــاً بِنـــا يــا لُعبَةَ الأقـــدارِ
لقائلها
عرين الصياد بقلمي شذرة
سعاد : ولمت صينية العشه تا اوديها ليال
فتت من يم شكحه ورافده يملخن بنفسهن وعمتي وغازي يمهن يهجدون بيهن والوادم گامت تلتم
انقهرت بس على بركات وسعد ما يستاهلون خطيه
بس حيل بيج يا شكحه ولو الشماته حرام وعلى حساب ولدج الي مالهم ذنب بس ميخالف
خلي گلبج يور مثل ما وريتي گلب ليال على جهالها
فتت على حجرة ليال وحطيت الصينيه
: يالله فوتو تعشو
ليال : ها سعاد ما اجو الولد
سعاد : لا ما اجو فوتي اكلي
ليال : منهو اخذهم وشله بيهم همه ما عدهم شي
سعاد : احلفي بس عن نفسج ما عندج شي ابن ادم الي،يمشي عالگاع كلشي يطلع منه يجوز سولهم طلبه ويه احد
ليال : يمعوده كلها تسوي طلايب الا هذول الأثنين
وانتي تدرين شلون جانو ينهزمون من طلايب امهم
سعاد : هسع كافي تهرطين بعدج نفس طبعج تحبين السوالف فوتي اكلي تا بلكت تنگعين يراد حت الريوگ اطبخلج تمن تا تسمنين يصير بيج علج لحم مو زعم جنتي حبله وسويتي عمليه اشو بطنج لازگه بضهرج
ليال : شزايد عليه بس گليلي خلصتها ضيم بضيم
والله عماد شالني بعيونه يفوت على حجرتي
وبيده يوكلني البقلاوه وغيرها
ما خلاني اعتاز شي النهار كله علاگته تفتر
عليه وعلى جهالي
بس جذب يا سعاد الوحده اذا مو ابيتها ومن خيرها تاكل ما يزودها حال الليل ما انامه ذبحني التفكير وذا صار صدفه وغفيت يجيني كابوس يشل حالي
وانوب جبت وسجنوني عمامج ما يفعل يخلوني حت اطلع الباب ما خلو شي وما طبخو اليه بس مگدر اكل اغص باللگمه عبن مو مرتاحه
سعاد : عمت عيني عليج اكلت همج وما تمر لحظه اذا ما تجين على بالي حت غازي مل مني عبن اسولفله عليج خلفله على ابو نشمي يجيبلي اخبارج
ليال :عجل اني شگول فراگج ملص گلبي
تنهدت بقهر وگعدت يم جهالي
يالله اكلو
امل : بحياتي ما شفت عماد مخذول
ومدنگ راسه مثل اليوم
من ساعة الي مشت ليال ما نطق ولا حرف
يفتر بره ونشمي ويا
ما فعل يتعشه وبس يشرب جگاير
انحمسنه حمس وره ليال
رحت يم عماد احاول احجي ويا اعرفه اذا ما يفضفض يطگ... . اول ما وصلت يمه وگال
عماد : ولمي نفسج تره نمشي غبشه
امل : نروح ونعوف ليال
عماد : ماكو شي اسمه ليال ولا اريد اسمع طاريها
ابد امشي ولمي نفسج ولا تناقشين
امل : رحت بدون ما اناقش خفت ينفعل ويصيرله شي بتت بحجرة الشيخه ولا گدرت اغمض من التفكير شلون بيها ليال وهيه يم شكحه الي ما ترحم
وشلون بعماد الي گلبه مشتعل عليها بس لا يسويها صدگ ويعاند ليال وهيه عقل الجاهل
ومهما صار هيه تصرفت حسب عاطفتها
ماكو ام تگدر تعوف جهالها
ديالا : گعدت من الغبشه وطلعت العجين گبل دله تا اخبزه اريد الهي روحي تا ما افكر بشي
ما اعرف حال ليال شنهي
وابو نشمي من البارحه الضهر محد يندله وين هسع شلون يربي
كملت العجين تگطيع واجت دله گابلتها وخبزنه جميع
وگامو ربعنه كلهم يگعدون ناس وره ناس
وعماد راح يشغل بسيارته ويحطلها مي وبانزين
... ناداني ورحتله
عماد : ديالا نادي امل وينها مو گلتلها نطلع غبشه
ديالا :حجيت بگلبي وين يريد ويعوف ليال
... ظلو هين عش تروحون
عماد : شنهي نظل صارلي عشر تيام عايف بيتي وشغلي واهلي وانتي تدرين جاهد ما علي،منتجل يالله نادي امل خن نمشي مزال الجو مغيم وبراد
ديالا : بس اصبرو تريگو وامشو بعد وكت انته حت ما تعشيت وامل هم ..احاول الهي يظل ليما يجي ابو نشمي
عماد : ما اگدر مو جوعان يالله خيتي هيري امل
ديالا : رحت على حجرة الشيخه شفت امل مولمه نفسها وجاي تلبس بالملفع
امل : يالله اسلم عليجن يحبايب
خزامي : الله يسلمج يبعد روحي درب السلامه
ديالا : اواش امل وين تروحون وليال ما يجيبها عماد شلون نعوفها يم شكحه
امل : ما سمعتي بأذنج البارحه شگال حاولت ويا الا عجزت وما يفعل شنسوي يربي
خزامي : لا تاكلن همها يمه الله سبحانه ما يعوفها وحدها لازم ما يدحج لحالها ويدزلها الي يحميها
امل : والنعم بالله هو سبحانه اولا بعباده يحميهم
عينج من نفسج ومن اخيتج وعيالج يا ديالا سلم عليج
ديالا : ان شاء الله سلميلي على اهلنه كلهم
ولا تسولفين ويه عماد بالطريق
تره روحه صايره بخشمه
امل : ادري بي هسع يفور وبس يصل غادي الله العليم شلون راح يبرد گلبه
ديالا : ولمتلكم خبز واكل وحطيتلكم دبة مي
وحطيتلكم عكه مال دهن حر
امل : عش كلفتي نفسج يمعوده
هذاك الي دزيتو بعد ما خلصنا
ديالا : ميخالف هاذ جابو گبل سبوع طيب مال غنم وجاهد وعلي يحبونه
يالله امشي هاذ عماد هسع واگف عالنار
امل : طلعنه وسلمت عالبنوات كلهن
انطني هدايه تسياره والشيخه انطتني فلوس وقطعة حرير وملفع بريسم هاذ طبعهم محد يطلع من بيتهم فارغ
ديالا اخذت الغراض حطتهن بالجنطه وجوانه لازمه ايدي وتشاور بيه تريدني اقنع نشمي تا تروح ويانه وهاذ كل ما ادحگ علي اشوفه خازرها
... لا تفشليني ويه الرجال مصارله زمان من جابج علينه وهاي احنه يمج اصبري جم يوم وگليله وهو يجيبج تدرين بيهم ما يدزون نسوانهم ويه احد حت لو اهلهم
ديالا : اي والله تدري بطبع ربعنه وشافت بنفسها
شلون النسوان هين محد تطلع الا ويه رجلها
هذني نسوان صياد حت ويه ولدهن ما يروحن لهلهن الا ويه ابو نشمي هو يوديهن وهو يجيبهن
امل : عجل شبيج يا جوانه مجاي تفهمين طبع عيالج احترمي طبع زلمتج ولا تخلينه بموقف محرج
ديالا : طلعنه يم عماد جان شاكر واگف يمه ويحجون
تحاضنو ودعو بعض
شاكر : ما عنها ابو علي
عماد : لا والله گلي روح تدري دربي بعيد والأمور شلون
شاكر : عجل توكل ودرب السلامه ان شاء الله
عماد : الله يسلمك وتعذرلي من ابو نشمي وسلملي علي ما قصرتو ويانه
شاكر : استغفر ربك ابو علي احنه اهل ماكو بينه سالفة ما قصرت ومشكور
غصب عن شواربنه نگف وياكم
امل : صعدنه السياره وعماد يسوق وهذول كلهم يمشون ورانه لحد الباب الله يحفظ،هاذ البيت والناس الي بي وان شاء الله تدوم محبتهم ويزيد خيرهم
سعاد : ما خليت ليال تطلع من حجرتها خفت عليها من شكحه هاي المهبوله هسع تصد على ليال وتگللها انتي نهبتي الولد وگفت مثل الحارس عالباب
شكحه ظلت تندب والوادم يمها ملتمه لنص الليل
الا هلكت ومعد تگدر تحجي حسها طبگ
وحيلها نهد شالوها شيل اطمروها بالهول
راحت الوادم وجان اوصي ليال ما تطلع بلكت عاد تسمع الحجي
ثاني يوم من الصبح هطنه على حس شكحه گاعده بره وتشيل تراب وتواري بنفسها وتنادي بولدها وينك وين رحتو... اريد گلبي ينكسر عليها بس مجاي استخطيها من شين اعمالها
اجو ولد عمهم والتمو ربعهم كلها وتفلشو كل واحد بديره ينشدون اثر سعد وبركات
وللضهر وما لگو شي ورجعو انوب يدورون وشكحه ظلت تنوح وبنواتها وياهه... اني هم اسأل نفسي وين راحو هذول ومنهو اخذهم
ديالا : گاعده بره اغسل بالملابس كومتهن طابوره كلهن لشاكر ادري ما جنت يم مي وتغسل ملابسك
شگد عجوزي هم لو شته جان گلنه معذور
مدنگه اغسل وادردم على شاكر شفت في عكس عالطشت صديت ورايه واشوفه شاكر متخوصر
شاكر : منهو الوصخ يولي
ديالا : اني مو عليك
شاكر : عجل عالجيران
ديالا : صديت عالطشت وگمت اغسل بدون ما احجي
اجه گبالي وجان يسحب لطشت من ايدي
شاكر : جيبي خن اغسل هدومي
ديالا : شهل حجي هد الطشت خن اغسلهن اني هسع الوادم تشوفك
شاكر : ماجله هم الوادم لا تشوف شاكر يجلف هدومه مو وخري عن هدومي اني وصخ واني عجاز والله يعلم الحجي الي ما سمعته
ديالا : هسع سالفه وطلعت مني هد الطشت عاد
شاكر : تدرين بيه نضيف وما اخلي هدومي وصخه بس لا عدنه تايت ولا صخام تا نغسل بي مو بس اني كلها ويايه خوما اجلفهن بتراب
ديالا : يعمي اسحب كلامي اعتذر منك اني متعصبه من غيرك وحطيت ضيمي بالهدوم
شاكر : منا وغاد اقسم الشغل بينه تا ترضين
عليه جلف الهدوم وانتي عليج المواعين خل يكتب التاريخ شاكر ابن الشيخ علوان هو يجلف ملابسهم
ديالا : هههه كافي امانه انطيني هالطشت
شاكر : هاج يابه وهمزين شفنه ضحجتج الحلوه وسنونج اليلؤ
ديالا : اني بيا حال وهاذ يدور غزل وسوالف حلوه گعد عالبلوكه وگام يحجي نوب يضحكني نوب يكاوني خلصت الملابس بدون ما احس
اندگ الباب راح فتحه وفاتت سيارة ابو نشمي
حدر منها وهو متعصب ويطگگ برگبته وگف هو وشاكر حجو شوي وجان يفوت جوه تلاگه هو وادي
رحت وگفت يم شاكر واجه وادي وگف يمنه
.. شبي ابو نشمي عسما شر
شاكر : والله مدري ما حجالي شي
ولا ادري وين جان خبرته علمود عماد وانبهض
عساف : اني اعرف ابويه وين جان
شاكر : ليش اخذ شورك من طلع يالله گول وين
عساف : ابويه جان بالعرين
شاكر : شمدريك
عساف : من فات من يمي شميت بي ريحة الذيابه
شاكر : وانته صاير جلب وتشمشم شودا ابوك عالعرين هاذ مو وكت.صيد يجوز جان بحديثه
عساف : بكيفك لا تصدج
ديالا : گالها وراح يم جلابه وجان يصفن
شوي واجه وگف يم سياره صياد
فتحها يشمشم بيها ويفتشها شبي هاذ
طبيت جوه اعاون البنوات
كملنه كلشي ودرنه الغده فات ابو نشمي
سابح ولاف الغتره تربع عالسفره
ومثل المعتاد شبع وگام گبل الكل
گعد على صفحه حط المخده بحضنه
ويلف بالسبحه على ايده
اجت عيني على وادي جان يدحگله ويبتسم
هز راسه وجان يگوم يغسل ويگعد بصف ابو
لمينه السفره رحت جبت الجاي صبيته وقدمت للشيخه ولصياد ..اخذ الجاي وهو منزل عيونه
صياد : عسا لا شافت اديج الهم
ديالا : امين ابو نشمي بالعافيه
على گعدتنه وجان يجي ابو نجمه
كيف بي وادي وطلع يركض تلگا
فاتو عالهول سلمنه علي كلنه وجبناله من غدانه
ما فعل نسوي غيره
طلع رساله من جيبه انطاهه لوادي وگاله
ــ هاك هاذ مرسال من امك
عساف : عش دزت مرسال مو راح اروح وياك
ــ گلتلها يابه بس تدري عاد امك تحب ادزلك مراسيل
تگول يقراهه زين گبل لا يجي
ديالا : كيف وادي وراح بره يقرا الرساله ادحگ علي من الشباك يقرا ومقلص عيونه طبگ الورقه وجان يقوس اثمه بعلامة استفهام فتح الورقه وقراهه انوب وجان يشعل عود شخاط ويورها... استغربت شبي هاذ كل نوبه ادزله رسائل جان يضمهن
نفض ادينه وجان يصعد لحجرته
شويه وحدر مولم ملابسه وشايل الجنطه راح يم جلابه ودعهن ولاف وره البيت شويه ورجع گعد يم جده شرب الجاي وجان يمشون
مر اليوم بملل بالي وعقلي كله يم ليال
مدري شحالها يربي
طبينه نسوي عشه فاتت زهور تسأل
زهور : يبنوات جنت شاره ملابسي عالحبل الي وره البيت رحت العصر لميتهن وما لگيت الأتگ مالي
دورت بره الا فحيت وگلبت حجرتي گلاب وماكو
ومو تگولن اكو هوا وطار
كواكب : والله ما ادري ما شفته
دله : دوري حجرتج ومكان الحبل سبع نوبات
زهور : يمعوده من العصر ادور اكثر من عشر نوبات
كواكب : جان شفتي خاف الجلاب شالته
زهور : دورت يمهن وهم ماكو
دله : جلاب وادي ما يشيلن غرض
كواكب : على طاريهن احد حطلهن عشه
دله : اي الولد عشوهن
سعاد :التمو ولد عم بركات كلها واجه بنار
من الصبح يدورون لبركات وسعد ومالهم اثر
وهاي شكحه عجوز البين صدت على ليال وترشش بيها وتغلط وخلت اللوم كله عليها زعم ليال الفگر من طبتهم صگعتهم
وليال ما تبرد گلبها بس بالبجي وعمر من يشوفها تبجي ينهبل ويگف لشكحه بالباب يتهدد
شكحه حسها مطبگ گوه تحجي
وحطت عقلها ويه عمر
شكحه : منهو يربيك يول ليال العوبه الله يعلم شجانت توزكم عليه وهيه تعلمكم ما تحترموني
عمر : لا تغلطين على امي واني احترمج
اني خوش متربي بس شتگولين لأمي راح اردها الج حت لو انتي جدتي
سعاد : اجت ليال وجان تجره من يم الباب وتضربه راشدي فوتته جوه لحگتها احجي عليها... شبلاج عش ضربتي
ليال : ما شفتي السانه شطوله ولا عبالك ربيته وتعبت واني اعلم واسهر الليالي
سعاد : يولي خوش ربيتي بس شكحه اطلع الواحد عن طوره وهو جاي يفزعلج يالخوثه خلي ابنج يتعلم محد يجيب طاري امه
ليال : ما اريده يفزعلي اريده يظل بتربيته ولا يتعلم الغلط ويصير مثل ماجد الي ماكو على اللسانه بس يفشر ويسب ــ اخلاق جهالي تنعكس عليه يا سعاد
سعاد : عمر جان مجتف ادينه ويدحگ على ليال
ولا دار بال للضربه سمع شكحه ورافده يحجن راح وگف بالباب ويناطل بيهن جرته ليال گوه
نومته دثرت راسه
ليال : نام يمصگوع والله اذا گمت الا اكسرك تكسر
سعاد :ما انطه مجال من جوه البطانيه
يحجي وياهه
عمر : يمه ضربتج حت ما توجع الذبانه
ليال : سمعتي سعاد شلون جاي يناطلني راح يشلع گلبي هاذ
سعاد : عج الله عوفي لا تضربينه
ليال : لا تفزعيله راح يطمع هاذ المصگوع
سعاد : ظلت ليال بالحجره تفتر وتحلف بعمر
وما خلت بالحجي علي وهاذ ولا عبالك يسمعها صافن ومركز ويه حجي شكحه
ليال : سمعت يا عمر هاذ اخر تحذير الك
سعاد : گاللها اي وهو ما سمعها لف راسه ونام
تعللت يمها على حس شكحه ورافده
وجان اروح لبيتي وحذرتها ما تردهن ولا تحجي تا ميستگون عليها
مر سبوع والوضع نفسه والولد مالهم اثر
وهذول ولد عمهم رايحين رادين عالبيت خاصة هاذ المحامي ابو صلعه عوذا شگد كره ومو مريح
شفته اجه وشايل جنطته زعم ينشد عن الولد وگف بره يم شكحه يسولف ويدحج عالبيت تا يلمح ليال من تطلع فور دمي اخذت الباذوره (منجل) وجاي احش دغل من الحديقه للمعزات مالات عمتي
طبگت يمنه سياره لتفتت شفته ابو النشمي
هديت الباذوره من ايدي ورحت سلمت علي
صياد : شلونج بنت العم عساج بخير
سعاد : الحمد لله نسعل عنكم شعلومكم
صياد : نشكر الله كلنه زينين نزهي بالنصر
سعاد : سأل على غازي وعيالي كلهم وصد على بيت صائب يدحگ عالمحامي وشكحه وعاگد حواجبه
سأل وهو يدحگ عليهم
صياد : عسما شر شبلاهه ام صائب تبجي وفاحطه
سعاد : هاي ولدها صارلهم سبوع مختفين مدري منهو
جاي وماخذهم ومحلاتهم ورت كلها
صياد : لا خطيه الله يعوضهم
وهسع ما لگوهم ولدها
سعاد : لا والله دورو الا فحو
صياد :وهاذ الرجال منهو
سعاد : هاذ ابن خالهم محامي يوميه يجي يسأل
صياد : ها ومنهو بعد يجي عليهم من الزلم
سعاد : ولد عمهم يجون يتسوگون ويگعدون يم شكحه يواسونها
صياد : ويطبون جوه يگعدون
سعاد : اي يگعدون جوه
فرك گصته بعصبيه وجان يدحگ على بيتهم انوب
طلعت ليال شايله السطل بي الملابس وگفت يم الحبل وگامت تشر الملابس وهاذ المحامي يدحگ عليها الف نوبه گلتلها من يجي هاذ لا تطلعين وذا طلعتي حطي شي على راسج
تنهدت واجت عيني على صياد جان يدحگلها بخزره
وصاك ايده دمارات ايده كلها برزت يربي هسع شيگول بگلبه عليها اكيد نقدها
صد عليه وحجه بنبرة عصبيه
صياد : هاي ليش ما تلبس ملفع وتستر روحها
علميها تره انتي هم تشيلين ذنب
سعاد : والله يا ابو نشمي عجزت بيها
وهيه ما تعرف تلبسه
صياد : علميهاا مو جاهل هيه مو جاااهل
سعاد : انتبه على نفسه وهو يحجي بعصبيه
دنگ راسه ومسح لحيته
صياد : سامحيني بنت عمي اني منفعل من شغله اترخص محتاجه شي
سعاد : سلامتك ابن العم انت تمون لوما تريدلها الخير ما تعصبت... تنهد والتاف تا يروح لزم باب السياره وجان يسأل
صياد : احم اگلج هيه ما تنازلت عن الأملاك
ما حاولتي تقنعيها
سعاد : همزين فطني ابو نشمي جتفت اديني وتذكرت الحجي الي سمعته
ما اظن ليال بأسمها شي
قلص عيونه وسد الباب
صياد : شلون يعني
سعاد : اني نوبه سمعت شكحه تحجي ويه هاذ المحامي الي يمها يگللها مشكلتج مو ويه ليال ان وقعت او لا كلشي ما راح تستفادين الحجي كله يم الجهال جيبيهم اكسبيهم الصفج
صياد التفتت عالمحامي وصفن شافه بعده يدحگ على ليال لحد ما طبت البيت خزره بنظره راد ياكله
هز راسه وجان يسلم ويروح
ديالا :صار الليل وختفه ابو نشمي سيارته موجوده وهو ماكو وشاكر فايع يدورله عبن عدهم طلبه مهمه لواحد من عمامهم ولازم كلها تروح
انتظرو الا عجزو وماكو تالي راحو من دونه
ورجعو بـ 12 بالليل بدون ما حالين الطلبه
گام شاكر يرجد بروحه
ظل گاعد ويتاني بي وصارت 2 بالليل وماكو
تالي مل ونام گعدنه الصبح لگينه ابو نشمي بالساحه يتدرب هو والولد
راح يمه شاكر ويسأل بي
شاكر : ابو نشمي اشو البارحه ما حضرت كلها سعلت عليك ومحد يفعل يحجي شي عبن انته ماكو
ديالا : نفض ادينه من التراب ودحگ بعيون شاكر وحجه
صياد : ولا راح احضر بهيج طلبه يا شاكر
اخر همي احضر طلايب علمود مره حردانه
شاكر : السالفه كبرت والرجال تذابح هو واخوان المره ناس خلصت ناس
صياد : وهاي حلها شنهي
برئيك منهو العايل
شاكر : يگولون المره هيه عايله والرجال راضي يرجعها رغم هالشي علمود الجهال
صياد : شمدريك المره عايله سمعتها بنفسك
شاكر : لا ما سمعتها
صياد : هاذ الظلم يا شاكر يريدون نروح نحكم بدون ما نسمع السالفه من المره شلون تريدني افوت بهيج طلبه
دزيتلهم خبر وگلت خل يجيبون الأثنين ويتجابلون
ونسمع من الطرفين بس ما فعلو يدرون بنفسهم مذنبين هانو المره واخوانها فزعولها خلهم اكود گاضبين رجلها گاضين بي التوبه
سعاد : نمنه وگعدنه على طلبه اخرى
مدري منهو شاعل النار بالمكتب مال المحامي ابن اخو شكحه
مكتبه عباره عن حجره زغيره بانيها عالشارع جدام بيتهم عود هو محامي معروف وهاذ طالع تا يطفي النار ويفزع بالعرب
وجاي زلمه وناهبه وظاله النسوان تصيح
ماخذه بعيد وگاضي بي التوبه جاتله جتله مال موت مسحج عضامه مخلي بتالي روح وتارس عيونه واثمه تراب ومخلي على نومته
الفجر يالله لگو مسدوح بلوح الجت
نقلو عالمستشفى گوه يحجي وگايل تگابلو عليه عشر زلم وجتلوني والنسوان تگول جان زلمه واحد لابس اسود ومتلثم
الديره من يومها صابها ذعر
ربطو الي ور المحلات ونهب سعد وبركات وجتلت هاذ المحامي والي ور مكتبه سواهن نفس الشخص
كلها گامت تلزم واجبات بالليل خطيه اهل المحلات كلها دخلت اندار
ديالا :صياد وجوانه وگفين يم النخله
ويحجون اشوفهم من الشباك مال الهول جوانه تشومل بأديها وتصفگ بيهن يربي هاي امت اتعلم تحجي زين ويه عمها
وانوب صياد مقلص عيونه ونفسه يتصاعد مدري شحجه وياهه وجان تجي تاندي بأسمي طلعت عليها
..هاا شكو
جوانه : عمي صياد يناديج
ديالا : خير ان شاء الله رحت يمه جان متعصب عيونه تلهب نار... خير ابو نشمي ناديتني
صياد : اي ناديتج ام الصگر
صدگ اوراق ملكية اختج عندج
ديالا : اي عندي
صياد : اريد ازحمج تروحين تجيبنهن
ديالا : رحت جبت الأوراق انطيهم اله
گعد عالبلوكه وگام يقرا تعصب وجان يصد بصفحه
ظلينه اني وجوانه وحده ادحگ على وحده
ناوشني الوارق بدون ما يحجي وجان يروح طب على حجرة الشغل مال الشيخه ظل فتره وجان تطلع ويا لبست صايتها وجان يروحون ولا فتهمنه شي
سألت جوانه شجنتو تحجون
جوانه : حجيتله سوالف شكحه ويه ليال
اني لفت من شباك الهول وسمعت حجيها كله
ديالا : امت تبطلين العلوم ونقل الحجي مو من اول ما جيتي حذرتج ما يفيد وياهه هاي...اخذت الأوراق ضميتهن
سعاد :جانو ولد عم غازي ملتمين بالهول يحجون
گلوبهم واره علمود سعد وبركات الي مالهم اثر
وهاي شكحه راح تنهبل تجي تگعد بنصهم وتصيح
گامو كلهم ملو من الوضع
عجزو يدورون ما خلو بشر ما نشدو والشرطه ادور وتفتش البيوت وتگعد تحقق ما وصلو لشي
طلع غازي وياهم كملت شغلي وتا اروح يم ليال وجان ادحگ اجت سياره علينه ظليت واگفه لحد ما طبگت يمي وحدرو الشيخه وصياد
تلگيتهم وحيتلهم
فاتت الشيخه جوه وصياد ظل يم السياره
مجتف ادينه وراه ويفتر
گعدت يم الشيخه واخذت فتره وجان تحجي
خزامي : گومي ناديلي رفيجتج ليال
يالله بنيتي بساع
سعاد : گمت بدون ما اسأل اعرفها تحبها جثير
رحت يم ليال جانت حاطه بنتها تمهد بيها
... گومي وياي الشيخه خزامي يمنه ودزت عليج ابتسمت وشالت بنتها
ليال : صدگ يمكم
سعاد : اي والله گومي
انطت البنيه لعمر وعثمان وگامت وياي
ليال : عينكم منها مو تحطون اصابعكم بأثمها
سعاد : مشيت وياهه جان صياد گاعد بالسياره ويدخن... بس طبينه الهول ليال والشيخه تعانگو عبالك ام وبنتها
خزامي : يبعد روحي شگد مشتاگلك
اگعدي خن اكحل عيوني بيج
سعاد : لزمت ادين ليال وگامت تحجي وما عتبت عليها من مشت وراهه جهالها وعافت اهلها
خزامي : اني ما الومج يمه سويت الي ازيد منج من اخذو صيادي مني لا تبجين وتنبهضين على عماد يجي يوم ويفهم مثل ما فهمو اخواني
هسع احجيلي عنج شحالج شعلومج
ليال : شحالي يا شيخه الحمد لله على كل حال
خزامي : الحمد لله دائماً وابداً
اسمعي يمه اني اجيتج اليوم بشغله اسمعيها بعقلج لا تسمعيها بگلبج بس اول فال خن احجيلج
احنه النسوان يا بنيتي بكلشي ينحط اللوم علينه
بجتمعاتنا العشائريه هاي المراة مثل الوصله البيضه
تظلين خايفه عليها لا تنلطخ بالسواد ويصيبها وصمة عار تظل لازمتها للمات وتلزم بزرتها وراهه
ربعنه گبل يگولون المطلگه والأرمله بالبيت حيه
عبن تلحگها السوالف ازيد من العزبا
تصير عليها العين ويصير عليها الحجي
من الناس الي ما تخاف ربها
حت اذا وياهه عزبا بالبيت
وگالو العرب رجال فات بهاذ البيت وحافه
كلها راح تگول هاذ اجه عالأرمله هاذ منطق اهل النار
الي ما يرحمون المره
وانوب اذا جانت مصگوعه بجمال محد مثلها
هاي تنصاب بلعنه وما اتهنا بحياتها ابد
والي مثل وضعج گعدتها ابيت عيالها ما ترهم يبنيتي
ومن غير شي عمتج تثرد بدمج
ليال : شيخه شسوي مگدر اروح يم عماد واعوف جهالي اني گلت زعم اعقد على حمايه واسد حلوگ الناس عني بس مدري منهو نهبهم
خزامي : شموديج يم عماد
حت اذا رحتي يمه يظل الحجي عليج
وحماج ما يفيدج يبنيتي هاذ البيت ما يرهمج لو حيطانه ولا الوادم الي بي
انتي يرادلج رجال يگف بضهرج مثل الجبل
ليال : منهو يگف بضهري مثل الجبل غير عماد
وهسع تبره مني وعافني
خزامي : ما راح اعيد بالحجي واطول انوب
اسمعي ليال اني جايج اليوم اخطبج لأبو النشمي على سنة الله ورسوله
سعاد : فتحت عيوني على كبرهن وليال هم سحبت اديها من الشيخه وظلت ادحگ علينه ثنينه
نريد نفتهم شسمعنه خاف متوهمين
خزامي :مو وكت تصفنين اني جيتج بالوكت المناسب وافقي يبنيتي واطلعي من هاذ البيت الي ما تلگين بي السعاده ولا بالج يرتاح
ليال : انصدمت هاي شجاي تحجي اريدها تسكت مجاي تسكت مستمره تحجي
وگفت على طولي وادحگ على سعاد
مسحت وجهي احس صخنت.
: شجاي تحجين يا شيخه اترجاج گولي انج جاي تمزقين
سعاد : وگفت الشيخه واكدت الكلام انوب
ونهبلت ليال
ليال : من كل عقلج جاي تخطبيني لأبو ثلاث نسوان و15 ولد لا اني اكيد جاي احلم ــ سعاد شبييج صافنه اسمعي شتحجي
خزامي : ادري ابني عنده ثلاث نسوان وادري اكبر منج وعنده عشيرة ولد بس محد يرهملج ويگدر يحميج وياخذ حگج غيره لو اندل زلمه غيره ما اجيتج
سعاد : گامت ليال تفتر بالهول وتصفگ اديها
ليال : اني ما ردت مره تصير فوگايه وحردت وصارت حرب ورجلي انجتل من ورايه وهسع تريديني اصير فوگ ثلاثه
شي ما رضينه على نفسي شلون ارضاه على غيري
خزامي : يبنيتي والله حاسه بالنار الي وجت بيج
بس فكري بنفسج نوبه وحده ولا تفكرين بغيرج
ليال : اني محد حاس بيه لااا
والله لو اموت ما اخذ متزوج ولا افكر اتزوج بحياتي ان رجع حمايه اني عاقده علي وان ما رجع اتنازل لشكحه بكلشي واخذ جهالي واروح يم اخويه
خزامي : يولي شتنازلين انتي ماكو بأسمج شي
هاي الأملاك بأسم جهالج ما تشوفين عمتج اخذتهم ومن شافتهم ما يفعل يركدون اجت واخذتج يمها
تا جهالج تشوفج وتهجب
ليال : لزمت راسي وگعدت عالمخده واديني ترجف
شجاي يصير يربي
خزامي : هاي عمتج نيتها مو خوش يبنيتي اطلعي من يمها خاف تروح ادبرلج مكيده احنه نگدر ناخذج هسع وناخذ جهالج گوه بس هاي المعثوره تروح تلطخج بسالفه وافقي انتي من رضاتج وتزوجي ابو نشمي من تصيرين على ذمته يجي ياخذ،جهالج غصب عنها راح تظل ما تگدر تلطخج بشي وانتي على ذمة الصياد
ليال : ما تگدر تسوي شي المره حزينه علمود ولدها
مو بحالي هسع ولا يمي اترجاج يا شيخه اسكتي شهل حجي
سعاد : ظلت الشيخه تقنع بليال وتحجي وياهه
وهاي قافله ما تفعل تصد ولا ترد ترخصت من الشيخه وجان تطلع مذعوره
ليال : طلعت مندل بروحي هاي شجاهه
وگفت بالطرمه وادحگ على صياد جان جاتف ادينه وراه ومنزل عيونه صد عليه نص التفاته
صديت بصفحه ومشيت لبيتي
فتت من يمه وگفني كلامه
صياد : ما رضيتي يا ليالي مو
ليال : جاوبته بدون ما التفتت اي ما رضيت ولا راح ارضه
صياد : هاذ المكان خطر عليج يا ليالي وافقي وخن ارحم الناس
ليال : وزعم الحياة يمك جنه گلتها وكملت طريقي امشي سريع طبيت لحجرتي ورگعت الباب ورايه
سعاد : گعدت الشيخه عالمخده وصفنت
غمضت عيونها بقهر وگامت طلعت وياهه وصلت يم صياد جان مشتعل نار وروحه بطارف خشمه صعدو وراحو
صفنت ويه روحي شجاه ابو نشمي
شلون فكر بليال هاي عود يريد يحميها ميخالف
هو راعي نخوه بس مو ياخذها هوه عدنه شباب بالعشيره تسد عين الشمس
هيه لو ترضه جان اخذتها لأخويه
بس ما تفعل ما صدگت خلصت من صائب استحاله تورط نفسها بزواج انوب مستعده تگابل شكحه طول عمرها ولا اتزوج
طبيت عليها لگيتها گاعده تفرك بأديها وتفور اعصاب
گعدت يمها وما حجينه شي مسحت وجها وتعض شفتها بقهر وتجر حسرات
اخذت فتره وحجيت وياهه
الي شفته مناسب : تدرين يا ليال كلام الشيخه صحيح انتي اذا صرتي على ذمة ابو النشمي محد يگدر يلطخج بشي وباخذ جهالج من حلگ السبع ويجيبهم الج... وجت بنار وجان تگف ترعد
ليال : سعاااد اترجاج اسكتي لو اموت ما اتزوج
ولا افكر مو انوب اخذ واحد متزوج ثلاثه هاذ الشي شايلته من بالي
سعاد : عفتها ما ناقشتها بشي خفت عليها تنفعل وتخرب خليتها ترتاح وطلعت
بالليل وجان تجي طلبت من غازي يروح يجيب نقل لجهالها وخطيه غازي طلع من الغبشه وما رجع لليل جاب النقل وگال الصبح اكمل منا واثبتهم
ليال :اجت كريمه وعرفت منها وتأكدت
صائب ما مسجل بأسمي شي
عجل ليش گايل لنضال مگدر اطلگ ليال
عبن الأملاك بأسمها
كريمه :عبن مجان يريد يطلگج
ليال : فكيت اثمي ادحگلها
لا يمعوده بس لا تگولين يحبني
كريمه :لا مو شغلة بس يحبج
هوه فكر بالجهال اذا طلگج ماراح يظلون ويا
عاد سوه هاي الفره على نضال وامي
عبن يدري بيهن راح يلزگن الا يخلنه يطلگج
جان مقرر يخليج يمه بس كلشي تلخبط
انتي هجمتي على نضال
وصائب فار دمه وضربج
ومنا طلعتي حبله وزاد اخبالهم
معد نفتهم شي اني لحد هساع مجاي استوعب
ليال :صديت بصفحه اداري ادموعي
علوا ظاله ساكته وما هجمت على نضال
اني شجاني تخبلت بوكتها
هم لو احب صائب جان گلت يمكن منالغيره
بس ما احبه
يتبع...... ..
حبيباتي اذا طلع يمكم فشل تحميل البارت
معنى توقف للتعديل