#تاروت
البارت «50»
بقلمي: زينب علي
حلواتي لا تنسون التصويت+تعليق بين الفقرات ومتابعة الحساب zainab_ali1 ♥️
TikTok: zeinab_.ali1
Insta: zainab__.ali1
ماتجين...
اشظل بعد والمن بعد تتأملين
انتحرت النجمة بسمانا
وانذبح زاجل هوانا
واعلن البلبل حداده
وطائر النورس حزين
ماتجين...
اليحب لازم يمر مره بحبيبه
والمفارك هم يهزه الشوك
لحبابه ويجيبه
وانتِ ما چنچ حبيبة
ولا كسر گلبچ عذاب العاشگين
ماتجين...
عدنا شوگ المشتهيچ
وعدنا خاطر مشتريچ
مزاعلتنا
وليش من عدنا العشك
ماتشترين ؟
ها تجين ؟؟
𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵
خيال"
فتحت الباب ودخلت الغرفتها شفت دائب متجي على الميز يم الباب وهي واگفه گباله ورا الچرباية ووجها صاير احمر دم وترجف استغربت الوضع حچيت مستفسرة
خيال: شجاي يصير هنا
باوع لي دائب وحچه ببتسامة بخبثة وهو يخزر بزينة
دائب: سلامتج مرت اخوي بس جنت اسأل زينة چم سؤال ووصلني جوابها طمأني
راد يطلع استوقفته
خيال: شنو تسألها شنو موجود يمها بهيچ وكت دائب شكو
دائب: ها خيال خير خو ماكو شي تسأليني لو اسأليها شعدها بنص الليل تفتر بالحديقة وتتختل طالعة من الباب الخلفي حتى اذا ماعدها شي خلي تحترم هي گاعدة ببيتنا وتعتبر وحده من بناتنا شني نشدهن ونمشي گليلها تستقر ولا تلعب بذيلها ويا الرهبان
گالها وخزر زينة وطلع من الغرفة باوعت الزينة وجها اصفر وترجف اكيد ترجف اذا هو دائب يخوف المايتخوف رحت يمها وهي بسرعة حضنتني وانا حضنتها اطبطب على ظهرها واحچي
خيال: شصار احچيلي وليش هيج خايفة وشجنتي تسوين بالحديقة بهالليل
زينة: هاا طلعت اشم هوى
خيال: بهالليل معقول ؟ بعدين دائب شبي وياچ
زينه: ستوجبني وطرح علي اسئلة كلش خفت منه والله انا مالي علاقة وبحالي وحتى يمكم ما اگعد بس حتى لا اضايقكم ومستحيل اعض أيد أمي حكمة الي نمدت الي مستحيل انسى بيوم الي تمرضت شلون كعدت للصبح تداري بيه مستحيل اسوي شي يأذيكم خيال صح انا بت انسان فاسد بس والله مو نفسه
چانت تحچي بدموع والخوفة والكسرة واضحة عليها انقهرت على منظرها
خيال: أكيد هو مو قصده يشك بيچ بس لان تعرفين هما جاي يطلعون من شغلهم وشافوا اكثر من مره شخص يفتر حوالين البيت فـ الهيچ هو قلق مستحيل الرهبان يأذونچ انتِ أمانة عدهم اطمأني حبيبتي ولا تخافين مجرد اشياء للحذر كلبي وهسه يلا نامي ورتاحي ولا تفكرين بشي يوم الاحد عندچ امتحان يلا أمي
لزمت ايدي تحچي
زينة: خليچ هنا الحد ما انام خاف ترحين ويرجع
خيال: لا تخافين دائب مستحيل يسوي شي يأذيچ او يضايقچ غمضي ونامي وانت مطمأنة وزيدي امانچ اقفلي الباب عليچ وعوفي المفتاح بي
سكتت ما حچي شي بس غمضت عيونها بأشارة منها على القبول گلتلها تصبحين على خير وهي قفلت الباب وراي اول ما طلعت شفته گاعد بالصالة الفوگ رحت له احچي
خيال: خير ان شاء الله شو گاعد هنا
دائب: بباب المسعدة شنو الجديد جبت عمري گاعد ببابها
ضحكت
خيال: الله يساعد گلبك
دائب: دزج وسيلة تساعدينه ادخلي عليها شوفيها نايمة لو گاعدة
خيال: انت ادخل
دائب: لا دخيلچ تردين اطلع مفشخ انتِ ادخلي وگليلي جاي تقرأ نايمة
خيال: خليها وراي ومعليك انت ادخل راح ادگ الباب وانت فوت
دائب: مرت اخوي تاج راسي وراس عشيرتي شلون نجازيچ
خيال: بس اتفاهموا ماريد امجازاتكم
گلتها وهو صار يضحك دگيت الباب اجاني صوتها تصيح العجوزية ماتگوم
وتر: منوووو
خيال: انا ادخل
سمحتلي ادخل فتحت الباب دخلته بدفعة وطبگت الباب عليهم ورجعت الغرفتي لگيت يمان متمدد يتصفح بتليفونه ويدخن عطت
خيال :يمان تخوني وتشرب جگارة من وراي غير تنتضرني اهووو هسه مو صدرك تعب من الجگاير
يمان :شبيج خرعتيني وين ادري شتهيته تعاي هسه افتحلج باكيت هذا خلص
رحت بحضنه وكالعادة خلصنا جگارتين وراها نمنا لعل باجر يكون حامل النا يوم افضل من الي راح ...
❛❛❛❛
وتر
چنت گاعدة اقرأ اندك الباب وسمعت صوت خيال بس تفاجأت الي دخل دائب فزيت وكفت على ركباتي بنص الچرباية اصيح
وتر: دائب اطلع برا غرفتييي
دائب: احچي وياچ شويه واروح
وتر: ترى ميصير هيججج كل ما زانت الجلسة دخلوا عليه وسدوا الباب والله حركاتهم قديمة يالحمزة
باوعت حوالية ماشفت يمي غير علبة المكياچ موجودة على الميز نزلت اخذتها حتى اشمرها خاف يسويلي شي
رفع ايده يأشر ويحاول يهديني
دائب :اهدي اهدي بدون عنف جاي اتفاهم وياچ بهدوء بدون ضرب واسلحة ثقيلة رجاءً
تخصرت احچي
وتر: لا عيني ماريد تفاهمك شويه تبدي سوالفك وسوالف المحرك ومن هاي قصصك الماتخلص
دائب: جايچ بطرگ روحي كلشي ما اسوي والمحرك بدون دهن بعد شتردين بس نتفاهم
اتقرب عليه شوية شوية حاول ياخذ مني علبة المكياج نترت ايدي منه
وتر: اذا تتقرب مني والله اصرخ واخلي حكمة تسوي طشارك ماله والي ، بعدين بشنو نتفاهم تفاهم ماكو بينا دائب
دائب: ديلا مو عليچ اجيت اشوف ابني شلون مااشوفه مااطمن عليه
وتر: هاي سوالفك مو عليه
دائب: ماميت عليچ گلتلچ اريد اشوف ابني بطلت مااحچي وياچ
كلبت عيوني بملل وهو اتقرب مني بحذر خلا ايده على بطني مشها يحچي
دائب: كبرانة وبارزة اليوم من نزلتي وانتبهت عليها ردت اضمچ ماريد احد يشوفچ سُكرتي
وتر: هم عوزك بعد ترجع تحبسني
ابتسم ونزل على ركباته وجهة صار گبال بطني رفع راسه وهمس
دائب: بس ابوسه
ماحچيت شي رفع قميص البجامة الجنت لابستها وخلا راسه على بطني حسيت صارت عندي قشعريرة غمضت عيوني من انفاسه الدافية داعبت بشرتي وبوسات رقيقة صار يطبعها على كل مكان بجسمي بقى فترة بعدها ادركت الموضوع وابتعدت منه بلا كلام گام وگف گوه يجر النفس باوع بعيوني وگال
دائب: بس اسمعيني كلشي ماريد
بقيت ساكته سحبني من ايدي على كيف وگعدني على چرباية وهو جر كرسي المكتبة مالتي وگعد گبالي جر اديناتي بين ايديه باسهن وحط ايدي على لحيته وحرك راسهه عليها وهو مغمض عيونه
وتر: خلص دائب
دائب :حيل دائب بس اتفاهم وياچ وتعب روحي بفراگچ ما اسوي شي يغثچ ويضوجچ وراح اكون صريح الابعد الحدود حتى نبدي بداية جديدة متفقين جميلي ! يعني مو كلشي ماخذة بالصياح انت صيحتي مرة وگلبتي الدنيا وكسرتي استفادينا وصلنا الشي لو بقينا بنفس النقطة
وتر: بنفس النقطة بقينا
دائب: إذًا نحچي ونتفاهم افضل ونحل كلشي وحدة وحدة
وتر :تمام بالنهاية مو كلشي بالحياة عصبية وصياح مو مشكله اذا تفاهمنا بس المهم ان نكون صريحين وما نچذب على بعض ، بس ها ما اهد علبة المكياچ ما الك امان
دائب :تمام باعي عنوني اصل المشكلة مالتي انا وياج شنو منين بدأت وليش جاوبيني
وتر :بدايتها ان بعد ما اخذتني وكلشي طبيعي بيناتنا الصبح تگلي مامعتبرچ مرتي ومن هاي سوالفك حسستني بشعور محلو وخاصة بعد ما جنه سوه حستتني انت هواية تحبني من خلال كلامك الي ماتوقعت هيج راح تسوي بيه انت چنت مهووس بيه ماتوقعت ماتحبني
عدل شعري گرص خدي بخفة ايده يحچي
دائب :تمام باعي حيلي انا عشت هاي السنين كلها اشوف وتر البنية الي اجتني عمرها بالاشهر وانا ربيتها والي ربتها عيني من بعيد حتى المصرف مال دوامچ جنت احطه الچ جوه المزهرية الي يم الباب مو صح ابوي!
وتر:صحيح وانت الي جنت تحط الي الملابس وبوكسات وحتى اكل شكد چنت اتمنى احد يگلي هاي منين الچ لهدوم ومنين تصرفين بس للاسف جانوا محد مهتم ولا ذرة ان يعرفون منين جاي اجيب هيچ اشياء حتى لو اصخم وجهم هم مايهتمون المهم مااطلب منهم شي
دائب: شعلينا بيهم المهم بنيتي چانت تلبس حلو ومصرفها يمها المهم سنين وانا اشوف هاي البنية طفلة الي ومهتم با ادق تفاصيلچ حتى درجاتچ مال المدرسة جنت استلمهن قبل ما شوفينهن
گلت بصدمة
وتر: شلون چنت تشوف درجاتي شلون تدخل للمدرسة ؟
دائب: بواسطة العاملة طبعًا صح جانت تاخذ ٢٥على درجة عبالك مطلعه درجة بكلوريا بس مو مشكلة ادفعلچ دم گلبي اذا تريد
بقيت ساكته اسمع تنهد بتعب ورجع كمل
دائب :ومن كبرتي صرت اخاف عليچ من حكيم لان اعرف طينته شنو وخطفتچ ومچان بالي خطف جان بالي بنتي واخذها ارجعها الي انا ابوها وكل هل مده اشوفها عقلي يگلي وداخلي يردد بنتي بنتي وگلبي يگلي بس هي مو بنتك وين اكو طفلة هيچ لكن جان المنطق الي بداخلي يرفض هذا الشي يرفض يصدگ انا احبچ كاحبيبة مو طفلة ربيتها وخلص
رفع رأسه باوع عليه وضحك ضربته بقبضة ايدي حيل على صدرة احچي
وتر: شبيك تضحك
دائب: لحد ما فد بالليل رجعت تعبان الدنيا طالعة من عيوني وهيچ بيومها انت طول الوكت على بالي كل شويه اتعوذ الشيطان انوب دخلت للبيت لگيتچ مرتبة روحچ ولابستلي الي شورت احمر اخخ هنا الدنيا كلها فترت بيه ماستوعبت شي لان الطفلة الي چنت اشوفها ما عادت طفلة صرت هسه اشوفها حبيبه اريدها الي اريد امتلكها الاول مرة بحياتي اشوفچ انثى كاملة من كل النواحي سبحان الخالق الي خلق ابدع بخلقة هيچ بنية بعمري ماشايف ولا راح اشوف مثلها بتفاصيلها وتضاريسها بكلشي بيها لهذا ردة فعلي چانت قوية بس بيومهم للصبح مانمت اوصل باب غرفتچ وارجع
وتر: بس انت چنت تتجرأ وياي وتبوسني حتى تسكتني مره ردت تعتدي عليه اول مااجيت يمك وگلت لازم اخليچ بأسمي دائب ماتگدر تنكر هالشي انت مهووس بيه
دائب: واحلى هوس انا مو بس مهووس بيچ انا مريض مريض بشي اسمه اوتار گلبي حيلي انت من جنت اتجرأ وياچ حتى اخوفچ لا اكثر بس صدگيني ما ابالي غير نية وداعتچ
وتر: وبعدين شنو صار
خلا وجهة بين اديناتي يضحك سحبتهن منه بضوجة رفع رأسه وگال
دائب: وبيوم محركي طافي واجت وحدة فوصة كل شوي وگلتلي المحرك عطلان المحرك محترك وانا رجال ماحب تصير عليه سمعه وبعدني بحيلي وانت ماتطلعين من بالي اخذتچ وملكت الدنيا وياك جميلي ابد ابد لا تتوقعين ندمان بالحسين الشهيد احلى شي صار بدنياتي كلها هي ليلتنا زين اذا متندم شلون بقيت سبع ساعات اقنع ماشفتيني شلون جنت مندمج كل حيلي
دفعته حيل
وتر: اوي دوخر صاير فد مره
ضحك رجع سحب اديناتي باوعت بعيونه وگلت
وتر: ليش هيچ سويت
دائب: ضميري أنبني حسيت نفسي ما جاهز انتِ صغيرونة بعدچ وانا وشغلي المعفن بعدني ما طالع منه وبيومها الصبح اجتني رسالة تهديد ومن رجعتي هم بيدچ رسالة تهديد وهم امي بعدها ماتعرفچ حسيت نفسي تسرعت گلت لو شوي اكبر ومن حچيت صدگيني چنت مشتت مادري بروحي وبجهل مني طلع الكلام بهالطريقة
وتر: كلامك مستفز واسلوبك حقير چان
دائب: كل الي گلته عبالي حچاية وتعبر ماعرفت راح اخسرچ وترحين مني بيها بس انا ما ندمان تممت زواجنا وانتِ مرتي وحبيبتي وبنت روحي وكلشي انتِ عائلتي الحقيقة الصغيرونة انتِ قطعة من روحي وتعب عمري لا تتوقعين الموضوع سهل عليه من انتِ تنفريني ترى صعب عائلتك تنفر منك وانا عايش هالشعور من قبل وعشته بيچ مرة ثانية .
بيقت ساكته ماعرف شجاوب وهو ايده تمسح على ايدي بحنان باوعت له وحچيت
وتر :زين هذا يعدي ومو مشكلة وحچيك بي باب وجواب وممكن اعذرك بس الصورة انت وليلى ورقمي شنو المبرر اله
دائب: راح احچيلچ قصة ليلى بس ها اذا ركعتيني بهاي الي بيدچ الا اكوم اغسلچ غسل ولبس وحق اخو زينب
وتر: انت اغسل وانا اكسر العلبة براسك وسبع اليطلع دم
دائب: انتبهي وياي راح ابدي افصم بس تسمعين للاخير
وتر: يلااا فصم
دائب: باعي جان عمرچ مابين ١٢و١٣هيچ شي يعني حرفيًا بدأت احس بشعور انا ممكن جاي أأذي البنت شنو ذنبها هي وملاحكها يجوز حچي باتر صح و من اتعرف على اشخاص جدد انساچ ويجوز مجرد تعلق ويروح ما چنت ادري انتِ بروحي وشما يزيد العمر احبچ اكثر اتعلق بيچ اكثر احن الچ أكثر واكثر
تحسر بقوة ينفخ بتعب
دائب: المهم جان عندي صديق تعرفت عليه بالمعرض مالتنا يعني صارت صداقة وطبة وطلعة وفد يوم اخذني ويا للجامعة ضيف وعرفني على الشلة مالته ولد وبنات
رفعت حاجبي منتظرته يكمل راد يحچي من انتبه عليه سكت بعدها گال
دائب: شكو تخزرين وذبي هاي من ايدج قلقتيني
وتر: مااذبها وكمل
دائب: وبيوم گاعدين يعني وگالوا ان صديقة البنات الي ويانة هي من غير كلية بس بنفس الجامعة راح تجي عيني وهي دخلت وما اشوفلچ الا طبت بنت وضاربتلچ ذاك الفلر بالخدود والشفايف الله واكبرررر بقيت بس اردد صبرك اللهي صبرك انوب عرفت بيها دكتورة ومرحلة اخيرة واكبر مني هم ماتحملت اويلييي
ردت اضربه بالعلبة بس تفاداها لزم اديناتي يضحك
وتر: وخررر وخرر لا تضحكككك محد ضاحك وياك
دائب: دخلي اكملچ حتى تصير الضربه تسوه
درت وجهي منه اسمع
دائب: اجت البنت گعدت يمي وگلتلي اكيد انت دائب وانا اثيول شاف ما شاف شاف
راد يكمل خليت ايدي على حلكه مانعته
وتر: اششش اشش لا تكمل شنو اخذت راحتك بدون امثال مدري شلونها لا تكمل عرفت الباقي
عضت ايدي وباسها حيل بسرعة سحبتها
دائب: كلتلها اي انا دائب مدت الي ايدها وگلتلي انا ليلى مرحلة اخيرة دكتورة طب عام
المهم صار كلام بينا ودي منا وجيب منا وصارنا كلش اصدقاء ونطلع سوه ونطب سوه بس حتى حب مابينا من طرفي جان يعني مجرد صداقة بس هي اعرف بيها صارت تحبني
وتر: اهلها وين
دائب: ابوها وامها منفصلين والبنت عايشة يم بيت خالها ناس كلششش كلش فايخين ونصهم بالدولة وعائلة اوبن مايند وماعدهم حدود حتى بالدين
المهم وراها گلتلي نسافر سوى انا شدراني طول عمري مگابل باتر ويمان گلت طبيعي وشلت جوازي وطير يا دويب وهناك جنت اول مره بحياتي اشوف ثلج و جانت صديقتها ويانه وهي طگت هاي صور بس شنو وداعت حواجبچ گلبي چان ناطف عليچ وبالي كله يمچ
وتر: انت ليش تچذب هو گاعد يسبح بالثلج ولاهي بالفلر و يگلي گلبي ناطف عليچ هجم بيتك يا ابو گلب
دائب: والله وداعت عيونچ مااچذب بحرف ، المهم من رجعنا رجعت اگابل الباب واشوف ست وتر يمتى تطلع واشوف شنبها الاخضر
رجعت اضرب بي واحچي
وتر: چذاب منيلي شنب اخضر وانا شگرة يا الاملح
شد على اسنانه ولزم وجهي بقبضة ايده
دائب: تخليني اكمل لو اكمل على طريقتي
نترت وجهي من اديناته
وتر: شلون عافتك شلون عفتها شصار بعدين
دائب: بيوم ليلى شافت صورتچ مصورچ من بعيد وانتِ بباب مدرستچ حاطها خلفية ومواليدچ وزعلت بوكتها گلتلي انها ماتريد تكمل وياي وكلشي بينا نتهى لو اعوفچ وامسح الصورة وانا ماهتميت لان جنتي مريضة ولتهيت بيچ المهم هي بعدها سافرت تكمل دراستها برا وماهتميت اصلا ظليت يوميه ماخذ عشاي وجاي گاعد على سيارة مگابل حياطين بيت المسعدة لحد ما فد يوم جنت جاي اكل شامية وگاعد اشوف فلم ومكابل بيت المسعدة ست الحسن وخابرتني ليلى كلتلي انت وين كتلها كبال بيت بنيتي ليش گالت رجعت واريد اشوفك اتفقنا على ان باچر نتشاوف بنفس المطعم ورحت واشوفلچ ليلى طاگه نحت ومسويه فلر سي كامل الحلكها وخدودها وگاصه الاجفان ورافعتهن وطاكه ابرتين ورافعه حواجبها بويه نقطة ضعفي
باوع الوجهي شلون صار احمر ضحك ورجع گال
دائب: بس اهدي خلي اخلص راح تولدين هسه
وتر: نعممم اخر همييي
گلتها بعدم مبالاة بس انا عطبت
دائب: گلتلي هي تحبني بعد تعرفين دائب مو شويه بس انا شنو چان بالي كله مو يمها قبل لا اجيها شفت حيلي توره الحلوه هستوها راجعه من الدوام هي وخدودها حمر من شمس وتلمع لمع من البياض بقى عقلي يمها بس الگدامي جانت مسويه كل المغريات الي احبهن مع هذا بكل مره انت توگفين بين عيوني ماگدر اشوف غيرچ انا والباقي ما صار شي غير الي جنتي تسمعينه وهي تلح عليه حتى اذا علاقة محرمة تقسم انوب ماريدها ويا غيرك حتى لو بالحرام تعال
وتر: ومنين جابت رقممييي
دائب: من اجت امي اخذتچ ردت اطلع من المود چانوا مسووين تجمع الشلة القديمة ورحت يمهم وهي اخذت رقمچ يمكن من تليفوني لان انا عفته وجاوبت من الثاني على يمان
باوعت له بنظرة عدم تصديق صاير يبوس بأيدي ويحچي
دائب: والله والله بعمري مااحلف چذب قسم ياليلى مالامسها ولا واعدها ولا حابها ولا رايح يمها بعد تردين تصدگين تردين لا بكيفچ
وتر: بس انا حالفة ماارجع الك وماريد
گام من الكرسي گعد على ركباته گدامي اديناتي وهن بحضي نزل رأسه يبوس بيهن حيل ويحچي
دائب: اخر مره اسوي شي يضوجچ وداعت امي بس هالمره سماح يلا حبيبي والله متندم ماريدچ تشتتين ولا ابنا يتربى بعيد عنا
وتر: ليش بعيد انت موجود وانا هم وبنفس البيت ونبقى على نفس علاقتنا اب وبنته وعادي
جر راسي اله سنده على جهة يهمس بتعب
دائب: لا ياروحي ياعمري وحبيبة گلبي لا يا املي انت حبيبة عمري واجمل شي صار بدنياتي غلطت بحقچ صح بس انا انسان مامعصوم من الغلط انطيني فرصة اخيرة بس هاي الفرصة اذا سويت شي يضوجج خلص بعد انهيني من حياتچ
ابتعد شويه اباوع الوجهة عيونه صارن حمر يباوع عليه بنظرات ترجي حصنته حيل ضميت راسي برگبته وهو صار يبوس براسي
وتر: دائب الماضي راح وما اگدر احاسبك عليه بس الماضي اذا صار تكرر يختلف الحچي وياك والي راح راح وهاي هي قررت انطيك فرصة ثانية بس اقل غلطة اشوفك النبي عربي خوش دودي
دائب: عمر وروح الدودي هاي هي وعد شلون ماترديني اصير
وتر: بقى سؤال اخير
دائب: اجاوبچ
وتر: شنو سالفة الرموز D.w.17
ابتسم يحچي
دائب: حرفي وحرفچ و 17 بوسة
وتر: شدخل البوسة بالموضوع
دائب: اول يوم صرتي بي بين اديناتي بستچ 17 بوسة بالتمام وبأماكن متفرقة متذكرين اللوحة وين چنت مخلي الرموز هي هاي الأماكن
وتر: بس اللوحة انت راسم بس وجه وما بي 17 رمز وين بستني بعد
مسح جبينه يضحك لزمته من التيشيرت احچي
وتر: اعترف وين بستني بعد ترا چنت محرمة عليك
ضحك بصوت عالي دفعني على الچرباية يحچي
دائب: المهم هسه انت مرتي
صحت بي
وتر: دائبببب
تمدد واخذني الحضنه مددني وحضني من ورا خلا رجليه فوگ رجليه وهمس
دائب: اششش خلي ننام بلا لغوة زايدة
درت راسه عليه احچي
وتر: وين بستني احچي حرام عليك والله الذنب عليك مو عليه انا چنت مادري بروحي
لزم فكي يبوس بيه يكزكز ويحچي
دائب: منا بستچ مناااا
صار يقبلني حيل غمضت عيوني وهو كمل بلهفة رفع رأسه وهمس بأذني
دائب: بكل مكان 17 بوسة بكل مكان صارت اوتاري
وتر: الذنب عليك
دائب: انا وربي انتِ طلعي منها
ابتسمت ودرت وجهي خلا راسة برگبتي ياخذ نفس وگال
دائب: هسه تصالحنا
وتر: لا
باسني هواي بوسات وبقى حاضن بطني الحدما نمت
ثاني يوم الصبح چانت جمعة گعدنا متأخرين شفته الهسه بعده يمي ورايح بسابع نومة گمت بدلت ملابسي توضيت وصليت صلاتي قضاء لان رايحة عليه نومة عفته نايم ونزلت جوه البنات وخالة بالمطبخ يجهزون ريوگ صبحت عليهن حچت خيال ببتسامة
خيال: صباح الراحة كل هذا نوم الساعة 10
رفعت حواجبي اعرف بيها على شنو تلمح ندستها رميم وصارت تضحك جريت الكرسي وگعدت بلوعتلهن حكمة وگالت
حكمة: هاا شو تتهامزن وتتلامزن شبيچن
رميم: ماكو شي حكوم بس وتوره اليوم الوجه مورد دباعيها حكوم
باوعت عليه اجت باستني تحچي
حكمة: كل يوم الوجه مورد مو بس اليوم
ابتسمت وهي رجعت تسوي بالجبن اتقربت خيال مني همست
خيال: الصبح بلا مادگ الباب دخلت عليچ وشفت مناظر استغفر الله همزين غمضت عيوني وطلعت شاردة
وتر: ترى مصار شي بس هو مايعرف ينام بالتيشيرت الا ينزعه
خيال: ايي صدگت
ردت احچي ماگدرت لان امي اتقربت يمنا بقيت ساكته
جهزنا الريوگ والكل نزل كل يوم جمعة حكمة هذا قانونها الكل لازم تگعد على الريوگ ومو مشكلة حتى اذا متأخر دائب اخر واحد نزل من فوگ كلها انتبهت عليه وصارت توزع ابتسامات هزت راسها حكمة وحچت
حكمة: وانا اگول شبيهن البنيات يتهامزن بالمطبخ هسه وصلت خوش انا الكم
صبح عليهم وكعد گعدنا نتريگ وسط هدوء كالعادة اذا باتر هادئ البيت كله مكتآب ومالنا واهس الشي بعد صمت حكمة رفعت راسها ووجهت الكلام الدائب
حكمة: وين چنت نايم
دائب: فوگ
حكمة: يعني وين فوگ
ضرب على كتف باتر وگال
دائب: بحضن اخوي الزود
ضربه على ظهره
باتر: ليش تچذب انا نايم بالغرفة الجوه چذاب يمه چان نايم يم بنيتنا وتوره مايستحي الخايس
حكمة: اسمع هاي سوالف الختلات والخري مري ماياكل عندي خووشش
رفع رأسه متفاجأ
دائب: شني يمه شمسوي غير مرتي
حكمة: منين اجتك مرتك خطبتها من عدنا لا سويتلها عرس لا
دائب: يعني شني عود شسوي
حكمة: شتسوي بعد شني نعلمك هذا ابوها گاعد وخيال وانا ماتعرف الأصول تجي تخطبها من عدنا ما تحچي يا ابوها
حمحم يمان وگال ببتسامة
يمان: صح شني بنيتنا تجي تخطبها من عدنا
دائب: عود صدك تحچون
حكمة: ما نكشمر وياك
دائب: ومنو يطلبها وياي تردين اجيبلچ اوتار
حكمة: اكسر رجلها لو خطت بيتي عندك هذا بيتر ورميمه تكدرون هسه تلمون جولاتكم وتطلعون والعصر تجون تطلبونها مني وماجاي اشاقه وياكم
گالتها بحزم رجع دائب باوعلي وگال
دائب: وانتِ قابلة
وتر: انا شعلي القرار يم اهلي
حكمة: خيبين تربيتي بسرعة تغزر
هز ايده ماعاجبه كلتله رميم
رميم: انا اختك واخطبها الك لا تخاف
دائب: ام الاكبر تاج ونخلة وفسفورة ماتقصرين
وصدگ خلصوا ريوك وطردهم من البيت دائب وباتر ورميم وجهالهم كلتلهم ماترجعون الا العصر ومن كل عقلها دزت يمان على ضايفة وخيال رتبت البيت وبدلنا كأنما خطوبة حقيقية وفعلا حكمة چانت معتبرنها خطوبة
بدلت ورتبت نفسي ونزلت جوه يم خيال واسمع حكمة تحچي بالفون ويا دائب وتگله
حكمة: عود جيبلنا وياك چوكليت وورد مو تفشلنا انت والهيلگية الوياك وتجون اديكم فارغة
وقبل لا تسده رجعت صاحت عليه
حكمة: مو تجيب من هذا العادي ابو الف ارگعة براسك جيب نوعية غالية وزينة
هي تحچي وانا خيال ميتين ضحك شويه وندك الباب وخيال راحت فتحته وطبت رميم وباتر ودائب راد يدخل وهو شايل بيده ورد وعلبة چوكليت دفعته رميم تحچي
رميم: دوخر وخر اطب انا اول اخت العريس الهيبة
دخلت وراحت الحكمة تبوس بيها وتسلم علينا
رميم: سلام عليكم عيني ام يمان شلونج عيني ام شهم هلاو وتوره الحلوة عروستنا
خرطتهن كلهن وكعدت هزت ايدها حكمة وكالت
حكمة: ياا شو اخته مشيخيطة بلا هو هم مشيخيط مثلها
كعدنا وهم بقوا كلهم مبتسين وحكمه صفنت عليهم بعد صمت گالت
حكمة: ها راح تظلون ساكتين صخونه فتحوا الموضوع احچوا بي مداه هيج خطابة انطيكم صخلة احسن
اباوع الدائب اشر الرميم حمحمت وگالت
رميم: انا ام الاكبر اصير اخت دائب طبعا اخوية شحچيلچ عليه ادب واخلاق وتربية المنطقة كلها تحچي بي وبـ اخلاقه العالية عينه ما يشيلها ويموت على لبنية الطبيعيه مايحب البنات الي مسويات تجميل وفلر وهاي السوالف
وتر: واضح عليه بلا ما تحچين
فزيت من كرصتني حكمة ويمان يمسح بوجها ويضحك وباتر يشرب چاي ويباوع علينا بنص نضره شكله يموت ضحك
حكمة: شنسوي بأخلاقة طلعي بالمفيد شيشتغل
غمزتلها رميم تحچي
رميم: عيني ابنا عنده شهادة تجارة وطلع قبولة بوظيفة وحكومية هم وعنده معارض سيارات ومحل ذهب وتكدرون تسألون عنة بكل مكان كلها تمدح بي عود فد يوم شافوهه بمكان مشبوهه اسلحة ابددد عركه بالتعليقات ماعنده كلش فقير
باتر شرگ بالچاي وصار يگح قوي ويمان ودائب ميتين ضحك وجهم صارت حمره دم
رميم: شرگ راح يموت ويهد على كولة حكمة
ماهتمتلهم ورجعت كملت كلامها
رميم: واحنا اجينا نخطب بتكم العاقلة الرزنه الهادئة
حكمة: شكد تجذبين كتلج مدحيها بس مو هيچ هجم بيتچ منيلها عاقلة
رميم: اي المهم خالة واحنا داخلين من الباب نتقدم الايد بتكم الابنة دئوبي العاقل مااجينا من الشباك لا سامح الله
باتر: وبتهم ابد مو حبله وتريد تجيب بس كلنا نستعجل قبل ما تذبلها رباعي خاف محسوبكم سواها ثنائية
هنا خيال بعد ماكدرت عافتنا وطلعت من الاستقبال تضحك كام يمان وراها سحلها كوه رجع دخلها وحكمة تخز بيهم وتحچي
حكمة : اي نسأل ابوها اذا موافق
يمان: اي الولد احنا سألنا علية وردة مال الله بس يبقى رأيي البنية كلش مهم شتگولين بابا
اباوع الدائب عدل روحه مبتسم عود متأكد من موافقتي ضميت روحي ورا خيال وحچيت
وتر:ما موافقة ابنكم مو فارس احلامي
اباوع عليه فتح حلگه عباله صدك رفضت عض على اصبعة يحجي
دائب: خاب هدوني عليها الفوصة خلي اشوفها فارس احلامها منو
لزمته حكمة تحجي
حكمة: اهدئ اهدئ هسه نقنعها مايصير خاطركم الا طيب نقنعها بس اهدوا
من بعدها بقوا يضحكون وحكمة ناصبه عليهم وهم هم ناصبين على حكمة الحدما رجعوا طلعوا من البيت شو تأخروا برا مارجعوا دخلوا راحت فتحت الباب تصيح عليهم
حكمة: شنيييي صدگتوا رواحتكم خطار ماتطبون ياا يمه شمالكم كاعدين بهالبرد
بقت تداهر وياهم
ومن بعدها فعلًا بدينا نجهز الحفلة العرس ماردت انا بس حكمة اصرت تسوي الدائب عرس واستعجلنا حتى يصير قبل امتحانات نص السنه وهم لازم نستعجل لان هم شغلهم وامتحاناتي وبطني جاي تكبر رادت حكمة تسويلي حنة بس انا ماقبلت ماكو مجال والدروس خاف تفوتني همزين جنت مخلصة امتحانات شهرية
من ثاني يوم طلعنا انا ورميم وخيال اخذنا يمان
وفريتها فر كلشي مايعجبني ودائب على التليفون وياي يگلي شتردين اخذي ولا تهتمين حتى اذا غالي اخير شي رحت المحل بجبيله وشفت فستان ملكي رميم كلش عجبها وگالت يجنن بكل معنى الكلمة ومن لبسته حرفيا طلعت فد شي ثاني وختاريت ويا تاج والطرحة خفيفة مابيها اي شي واختاريتها قصيرة حتى ما تأذيني لان انا اصلا راح البس تاج وهم اخاف اتعثر بيها
ورميم ختارت فستان لون نود فاتح وبي لؤلؤ قصير من جوه وفوكه تول طويل وخيال ختارت فستان لون كريمي وبي لمعة خفيفة على الجسم وبي تكمله من ورا وختاروت تاج على شكل السعفه ينحط على الشعر
نزلنا شفنا يمان ينتظرنا تلگاني بضحكة اخذ الاكياس من عدنا وگال
يمان: هلا بعروستنا الجميلة ختاريتي بابا
وتر: اي ختاريت راح اطلع برنسس اجننننن
يمان: انتِ برنسس بدون شي
صعدنا بالسيارة حچت رميم
رميم: يمان نريد محل فضة حتى اشتري عقد ونرهمة للبدلة
يمان: سهله علي عدهم محل فضيات هسه نروح اله
طلع تليفونه وخابره فاتح مايك لان يسوق گله
يمان :علي بوجهك للمحل جاين ناخذ منك لان عدنا عرس دائب
علي: جا مرته مو حامل لو يريد يثني كفو من دائب الوحيد رجال عجبني
يمان: بلا تمسلت هي نفسها بس نسوي عرس
بقوا يضحكون ويتشاقون على ما وصلنا المحل جان يجنن وشلون مسوين اقسام قسم العروس قسم الي بي اشياء ناعمة قسم الاشياء الثكيلة حرفيًا انا والبنات ضعنا بالمحل وخاصة انا بس فلوس دائب يمي اخذ وانا مرتاحة افلسه تفلس
ختاريت عقد على شكل سعفه وتراجي سعفه بس مو وحدة لا مثل الدائرة وانازل منها تلاث سعفات وخاتم على شكل تاج وختاريت ساعة وخيال اشياء كلش بسيطة وناعمة اما رميم فا ختارت عقد كله لؤلؤ علمود يجي ويا فستانها وساعة وحلقة لان ما نزعتها اصلا وتراچي حيه نازلات ويمان وصى خيال حتى تاخذ الزينة هم لان ماقبلت تطلع ويانا اخذتلها عقد ناعم كلش حلو من ذوقها
الحدما صارت بـ 4 العصر يا دوب نلحك نروح نحجز صالون رحنا الصالون حجزنا وختارينا الي نريده ويا ماكيرا وتنظيف بشرة واضافر كلها خلصناها
وراها اشترينا احذيه وهنا المشكلة لان دائب محذرني ما البس كعب علمود بطني وانا بدون كعب اوصل النص صدرة شسوي حسيت شوي وابچي يعني اذا ردت اركص ويا يراد الي طبله جوه شنو شسوي قنعوني البنات اخذ شوز رياضي اكو خاص للعرايس وبي كعب داخلي گلولي هم مريح وهم ماتتأذين وينطيچ طول لان الكعب داخلي
بعدها رحنا للقاعة ودائب جان هناك وضبطنا كلشي وگالوا نروحلهم ثاني يوم حتى نتدرب وهاي الايام كلها دائب سوالي اجازة مرضية من المدرسة خمس ايام
اتفقنا وياهم على الفقرات وانا ردت فقرة ببداية الدخولية انا ويا وراها دخوليته هو واريد فقرة تسليم الورد للام ، دائب گال
دائب: هاي شلون وامنا وحدة
وتر: خيال راح تصير امي واسلمها الورد الها
ابتسم وماعترض ولا حچه شي عايفني براحتي ومنطيني على جوي ابد ما حرمني من شي شنو اطلب يكول تم
وهيچ ضبطنا كلشي ورجعنا للبيت هلكانين من التعب
اول ما دخلنا شفنا باتر لازم الجهال بالحديقة
وهم بس شافوا رميم دخلت ضلوا يحركون بيدهم عليها يردونها ضحكت وراحت الهم ملهوفة وجان لازم تتقرب منه حتى تاخذهم ماعرف ليش بقيت مركزة وياهم انتبهت على باتر عيونه ما جانت عليها يباوع بس للاطفال وهاي هي
❛❛❛❛
خيال"
برغم اجواء العرس وفرحتنا بدائب و وتر بس كل مره باتر هو الي يسوي جو بالعرس ويخبص الدنيا حتى من جهزنا ستفقدنا تعليقاته على كلشي بس ما حبينا نبين لخاطر فرحة وتر ودائب
ثاني يوم رحت وياهم لان رميم يم اطفالها وشفت شلون يتدربون حرفيا طالعين يخبلون برغم دائب جاي بنطرون وقميص وتر لابسة فستان بسيط بس مادري جمالهم طاغي وتر رغم الشوز مالتها عالي الكعب البي وكل شوي تريد توكع ودائب يلزمها مع كل هذا وبعدها من تباوعله ترفع راسها يعني سبحان الجمعهم وهم بكلشي متناقضين
واجه اليوم العرس الي كلنا متحمسين اله ورحنا لصالون وتر رادت مكياج ترابي يبين عيونها حادة وحمره قوية لان مكياج عيونها ترابيات وتسريحة شعرها بعد احلى
كل وحده بينا ضبطت نفسها وانا طلعت للقاعة قبلهن ورميم بقت وياها
انا وخاله حكمة جهزنا كلشي بس الي ستغربت منه اجو ناس كومة نگلبت الامة المكان المخصص الاهل العريس علساس نمله ملي مدري منين جابت حكمة هاي ناس كلها وكلهم بنات حلوات ويرحبون بالعالم حسيت هيچ سوت حتى ما تحسسه ان ماعندة احد واحنا فعلا اهله
والي صدمني اكثر جية ام دائب على حباية ونص جميلة بشكل بقيت صافنه عليها يعني من صدك مثل مگالت وتر كل جمال دائب منها واجو وياها تقريبا بالخمس بنات كل وحدة تكول الزين وجمال عندي مدري منين جايبتهم بس الي عرفته اخته وكرايبهم وبنات اخوها
فا اجت وكعدت بس للامانه المره ما حجت شي ولا كامت اصلا مثل الخطارة كعدت بس الي جابتهم ماگعدن واعترضن ليش اخذوا التليفونات منهم وهو دائب وسواسه حتى بروحه ولو بيده يضم وتر ومحد يشوفها
ووتر اصرت على دائب يعزم شلته القديمة وليلى هم هو ماچذب خبر اتصل وعزمهم كلهم موجودين وليلى من ضمنهم
شويه وسمعنا صوت الولد برا جاي يهوسون اله وطبن رميم وتر بمكان التبديل رحت شفتها ايه من جمال طالعة حرفيا ملكه لان اطلالتها من فوك الجوه ملكيه بمتياز حكمة صارت تاكل بروحها وكل شويه تقرأ ايات وتبخرها
وهو هم طالع فد شي جان ببدلتة السودة حرفيا وسيم الى درجة اباوع للبنات من دخل كلها صارت تتنادس وخاصة الي جايات ويا اوتار بدهن يكومن ياكلنه منتبها وياهم وحده تباوع للخ ويغمن بروحهن
ودخوليتهم جانت على اغنية هب السعد
فد شي فخم ويجنن طالعين اباوع الدائب شلون لازم ايدها وعيونه صارت تلمع بحب خاله حكمة دموعها من اول مادخلوا الحدما گعدوا هي تصب سوو الدخولية وهو شويه وطلع
من بعدها بدأت فقرات العرس ووتر كوه لازمتها حكمة خاف عليها ماتخليها تركص رغم هذا هي تهز لعبت لعب ماخلت شي بنفسها ما سوته الحدما صارت فقرة الرقصة مالتهم ودخل دائب من اشتغلت اغنية قيس هشام ( احبچ )
وتر...
لزمني من ايدي ونزلني ويا النص القاعة وصرنا نرگص على الاغنية حاوط خصري وشدني اله
حضنت وجه بأديناتي وهو سند رأسه على راسي مغمض عيونه يهمس
دائب: انا مو بحلم مو
وتر: لا حقيقة جاي نعيشها انا وياك
فتح عيونه وصار يهمس بكلمات الاغنية ( ماشفت اي شي يشبهچ لا حمامة ولا اكو وردة شايلة عطرچ حياتي)
وانا هم صرت اردد ويا بكلماتها اتقرب يم اذني وگال
دائب: خلينا نتفق ان هاي الاغنية تمثلچ وكل ماتسمعينها واعتبري گلبي جاي يغنيها الچ الوحدچ
ماعرفت احچي بس العبرة خنگتني قربته عليه وحضنته حيل عيوني صارت على ليلى گاعدة بالاخير وتخوزر بينا ابتسمتلها ابتسامة نصر راد يندار على اتجاه نظري ماخليته درت وجها بأديه همست
وتر: خليك وياي لا تباوع على الناس
همس
دائب: شسوي بناس مابيهم ضوه عيونچ
گالها واتقرب باسني بخفة نزلت راسي خجلانه من القاعة ضجت بالتصفيق
بقى هيج طول والوقت حاضني حضن مامهتم بالموجودين كل شويه سحبني اله لو يبوس ايدي هيج الحدما خلصت الاغنية باسني براسي واديناتي ورجعني المكاني وطلع
رحعنا كملنا فقرات العرس والعشا وكلشي الحدما صار وقت الزفة لفتني خيال لف مثل مچان موصيها لحظات ودخل يمان حتى يسلمني الدائب اتقرب مني كلشي ماشوف بس الرجلينات حسيت بخيال شلت ايدي خلتها على مرفق ايد يمان الي اتقرب مني وگال
يمان: امشي وياي خطوة بخطوة مو تطيحين
وصدگ مشيت ويا على كيف الحدما وصلنا دائب انطاني اله وگله
يمان: دير بالك على الوردة مالتك والاخير يوم بعمرك ابقى اسقيها بحنانك مو زلمة اليذبل وردته بعد مااوصيك ابوي
حضنه دائب واسمعها يهمس
دائب: ابوي واخوي وصديقي بعيوني اخليها
انطاني اله من بعدها اصدقائهم سووله زفة يمكن حفروا الارض من الركص
وطلعنا موجهين للفندق بعد زفة اطول من حياتي وصلنا هناك جانوا حاجزين سويت كامل
فتح الباب ودخلني شايل البدلة حجيت
وتر: تعبانةةةة ردتتت انام بالسيارة لو ما الهوسة وهسه ميته من النعاس راح انام بالبدلة
دائب: شنيي تنامين بالبدلة لا تخليني اسويها وانتِ بالبدلة صدگ
وتر: شتسوي اوويي وخر اروح اسبح ولو انت ادخل قبلي انا افتح شعري اول شي
ماحجه باسني وراح اخذ ملابس ودخل للحمام وانا فتحت شعري وحضرت ملابسي بجامة ستن لونها ابيض مال عرايس بس طلع انا دخلت سبحت ذبيت التعب كله وطلعت شفته مطفي الاضويه مخلي بس ضوء احمر خفيف ويا النفاخ والزينة صاير جو الغرفة يموت بعدمي لافه شعري بالخاولي اجاني لزم ايدي يتحسس عليها برقة باس راسي
دائب: جوعانة
وتر: اي اي كلش جوعانة
دائب: خليها بعدين اجليها فد ساعة
ابتعدت منه كعدت على القنفة كبال التلفزيون وحجيت ليش
اتقرب كعد يمي ولتز عليه حيل بحيث وجهي صار جوه وجه همس
دائب: مامشتاقتلي
وتر: لا طبعا شلون ما مشتاقتلك بس شسمه ماسولفتلك
مد ايده فتح اول دگمتين من البجامة لزمت ايده
وتر: شجاي تسوي
گال بصوت خافت
دائب: حتى تسولفين براحتچ يلا حبيبي سولفي اسمعچ
وتر: ايي اليوم من انطينا الورد انت الامي وانا الخيال شفت اوتار ضاجت حيل لاحظت مو
مد ايده وصار يفتح بالازرار الباقيات ويهمس بصوت ذايب
دائب: اي لاحظت وبعد
وتر: وليلى طول الوكت تخزر بينا
دائب: اي وبعد
فتح القميص كله وانا مستمره احچي نزله من اكتافي همس
دائب: ارفعي روحج شويه
رفعت نفسي وهو طلع القميص من واي وشمره ورا
وتر: جانت حفلتكم حلوة مثل حفلتنا انا حيل تونست
لزمت ايده من بدأ يجردني من كلشي باوعلي وگال
دائب: جاي اسمع ليش سكتي كملي يروحي
بعدت ايده وگلت بحده
وتر: دائب
دائب: حيل دائب
مانطاني مجال احچي الردت اگوله اتقرب عليه قبلني وسكتني مددني على القنفة وهمس بأذني
دائب: ديري بالچ على بطنچ مو تفصلين وياي
ماجاوبته بس مغمضة عيوني لحظات وحسيت نفسي نرفعت خلاني على الچرباية ورجعت ارواحنا امتزجت مع بعضها من جديد وهالمرة باكثر انسجام واكثر حب واكثر شغف وجنون ....
❛❛❛❛
رميم"
بعد ما رجعنا من العرس نزلت للمطبخ اغسل مميات الجهال قبلها شفت الشباك مفتوح والبيت صاير ثلچ من ورا اتقربت اريد اسده وشفت باتر طلع بالحديقة وماعرف منو يمه مديت راسي اشوف اول مره عبالي يمان بس للاسف بعمري ماتوقعت ان ممكن يصير هالشي ولا حتى بافكاري حسيت شعر راسي وكف من الي سمعته
يتبع ...
𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵
بقلمي: زينب علي
حبايبي اربطوا احزمة الامان احنا على موعد قريب من انفجار دامي 😩
معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️
متابعة ممتعة🦋