#تحدي_الحب
فراس/سحر احجي شكووو شبيج شكالتلج الدكتوره
سحر/ارتاح ماكو طفل ولا اكو ورطه
فراس/اوووووف الف الحمدالله
بس شفتها تبجي بهستريه
سحر زين طفل ماكو شبيج تبجين
سحر/طلع الي ابطني مو طفل كيس على الرحم والدكتوره تكول حجمه وشكله غريب شاكه يكون ورم حولتني على مختبر لازم اسوي تحاليل
فراس/اهدئي انـ شـاء الـلّه ماكو شي هسه اخذج للمختبر ونسوي التحاليل شو انطيني اسم المختبر
اووك قريب من هنا
وصلنه للمختبر
ابو المختبر كال شتصير منها حضرتك زوجها بقيت ساكت وهي ساكته
كتله اي زوجها
كال تمام طوبوها للغرفه سولولها تحاليل
بقينه كاعدين ساعتين ياله طلعن اخذناهن ورجعنه للدكتوره بقيت انتضرها طلعت هم تبجي
كالت الدكتوره حولتني لغير دكتوره اختصاص بهالشي ولازم نحجز موعد
اخذت الكارت منها واتصلت بالسكرتيره حجزت موعد بعد اسبوع ياله نروحلها
باوعت على سحر حيل انقهرت عليها
سحر/اووووف والله تعبت منا اطفالي صارو بعيدين عليه ومنا ابويه الي شاد فد شده ويايه ويوميه متعارك ويايه وطاردني وامي الي لا تحل ولا تربط ولنوب هذا المرض الي مدري منين اجه فراس ماريد احد يعرف هسه رجاءاً اله اتاكد وبعدين الله كريم
فراس/
رجعتها للبيت قبل لتوصل انطيتها مي غسلت وجهه
وكلتلها لتخافين اني وياج مستحيل اتركج
مهمه يصير تبقه بنت خالي وحبي الاول حته لو انتهى هالحب بس اكو ذكريات تجمعني بيها وسنين عشتهن وياها رجعت للبيت روحي طالعه ضايج فد نوب لدرجه مااتحمل حته واحد يكلي شلونك قفلت الباب على روحي وادخن جكاير منضرها ميروح من بالي كلت ياربي لو طالعه حامل ولا هالمرض هذا بقيت ابحث على المرض بالموكل وشنو اضراره واعراضه اختنكت بالزايد ساعه 12 بليل اتصلت بيها
جاوبتني صوتها مخنوك كوه تحجي عرفتها جاي تبجي
فراس/سحر كافي لتخافين انشالله مابيج شي ومجرد كيس ويشيلونه او تتعالجين ويروح فدوووه كااافي لتبجين ميصير تقهرين بروحج
سحر/فراس اشتاقيت لاطفالي حييييل احس روحي بعد ابد مااشوفهم احس راح اموت ومااشوفهم بعد
ساعدني فراس لتتخلى عني ابوس ايدك ماعندي غيرك ولاعندي سند بهالدنيه غير رب العالمين
فراس/اشششش مستحيل اتخلى عنج واني سندج لتخافين والله مااتركج لو الدنيه كلها تصير ضدج اني مستحيل اتخلى عنج وراح أّكون وياج خطوه بخطوه
هسه روحي نامي وارتاحي ولتفكرين بشي يجي موعد الدكتوره والله كريم
سديت الخط وحاولت انام
خلص لاسبوع واني مالي واهس لكلشي كوه اخلص الدوام تفكيري كله يم وضع سحر وحالتها
اما نيفين صرت اشوفها صح ماتغير شي من حبها بكلبي ونفس المشاعر بعدها وبعدني اشوفها البنت البريئه المميزه بــَس هم عواطفي سبقتني وخلتني حته نيفين مااديرلها بال وحالها حال الطلاب حته لو اشوفها صدفه وحدها واصير وياها وجه بوجه هم مااديرلها بال لان فعلاً هذيج الفتره بالي كله يم وضع سحر
صرت يوميه اخلص الدوام ارجع للبيت اتصل بيها تجي يمنه لان بيت اهلها مخلصتها بس بالغرفه وتبجي
من تجي يمنه امي وساره واحنه يمها شويه احسها تطلع من الجو الي هي بي
حاولت اغير نفسيتها ولو بشغلات بسيطه خصوصاً محد يعرف بوضعها غيري احاول اطلعها اشتريلها شغلات تحبهن صرت اعاملها كأنها طفله
صار موعد الدكتوره
واخذتها ورحنه وصل سراها طلبت اطب وياها وفعلاً طبيت الدكتوره شخصت حالتها وكالتلها عندج ورم على الرحم بس مااكدر اشخصه اذا كان ورم خبيث او لا اله احولج على دكتور اختصاص اورام اضبط دكتور ابغداد
وهم حجزنه موعد بعد3 ايام
ونفسيت سحر يوم على يوم تسوء اكثر واكثر
الى ان صار موعد دكتورها وهم اخذتها ورحت وهنا الصدمه جانت
الورم عدها من اشهر وواصل لمرحله متقدمه ولازم عمليه باسرع وقت يشيلونه الها والي صدمنه اكثر يشيلون رحمها واكو احتـمـاآل تاخذ جرعات كيمياوي بــَس هالشي يقرروه بعد العمليه
وهنا صار لازم تحجي لأهلها وللكل بهالشي
سحر/فراس اليوم احجي وي امي وابويه بــَس اريدك انت تكون موجود وساره وكلكم تعالو يمنه ورا المغرب حته احجيلهم
فراس/انشالله بستها من راسها
سحر انتي قويه انتي ام كدرتي تربين اطفالج لمده سته اشهر بالغربه وحدج وتشتغلين وتعيشيهم اكيد مراح تستسلمين لهيج موقف خليج قويه واني وياج ابد مااتركج اريد اشوف سحر القديمه القويه الي ميوكف شي بعينها اوك عمرري
سحر/تذكر من جنت تحب شعري طويل واني هم احبه طويل بــَس عاقبت نفسي وكصيته وهسه شعري راح يوكع كوله اكيد
فراس/اشششششش مراح تتغيرين وبكل حالاتج حلووه وانشالله متحتاجين للكيمياوي سمعتي الدكتور كال احتمال مو اكيد يعني
سحر/بس كال المرض متقدم عندج فراس احتمال اموت
ومااشوف جهالي
فراس/مراح تموتين والله وبالنسبه الجهالج وعد مني راح احجي وي ابوهم واحاول يجيبهم الج تشوفيهم
سحر/الله امنيتي الوحيده اشوفهم واشمهم
فراس/صار كلام رجال راح اجيبهم الج بس وعديني راح تكونين قويه ومراح تستلمين
بليل اخذت اهلي ورحنه لبيت خالي كعدنه وسحر اباوع عليها الدمعه بطرف عينها اشرتلها يعني خليج قويه واحجي
وبدت تحجيلهم
سحر/شكيت بنفسي مريضه من قبل كم يوم ومحجيت لاحد بــَس الفراس لان ماكدرت اروح للدكتوره وحدي فراس هو اخذني بسيارته وبعد مراجعات ل3 دكاتره اكتشفت عندي ورم خبيث على الرحم و بعد اسبوع اقل شي لازم اسوي العمليه وراح يشيلون الرحم مالتي واحتمال ورا العمليه اخذ جرعات كيمياوي
هناا الكل نهار خصوصاً ابوها شكد جان قاصي وياها وحاربها اكثر واحد اتاثر عليها شكد اشوف خالي قوي وشخصيه صارمه بــَس بيومها حسيت بغريزة الابوه عنده حضنها وبجه بشكل مو طبيعي نهار عليها صعد ضغطه وتخربط وامها كذالك ساره وامي يبجون الحزن غيم بالبيت عليها وبعدها الكل حاول يكون قوي علمودها وثاني يوم خالي ومرته اخذوها لغير دكتور وهم نفس حجي الدكتور الي رحناله رادو ياخذوها لتركيا يسولها العمليه هناك بس اكثر الدكاتره الي راحوله نصحوه بالدكتور الاول الي اخذته الها لان هو اختصاص فقررو يسولها العمليه حددو العمليه يصادف يوم الخميس
بعد تحاليل واجراءات
نيفين/
صار فتره وايام من بعد ما رحت الفراس ورجعتله الفلوس واحسه حيل تغير لدرجه نتلاكه اني وياه وجه بوجه ابد ميباوعلي وصار يشوفني حالي حال اي طالبه بالقاعه رغم رفضي اله ورفضت مساعدته اليه بس حسيت نغزه بكلبي من هيج ضل يعاملني وكولت خلاص هو هذا الي لازم يصير
صادف يوم لاربعاء امتحان عدنه الماده الي يدرسنه بيها فراس
الكورس الاول وقربت نهايه السنه
الثلاثاء رجعت للبيت ماما حيل تعبانه اخذتها للدكتور وازدحام عليه لليل ياله رجعنه للبيت وتعبانه حيل ما ضل وقت اقره والامتحان حيل ضروري
الصبح قبل وقت المحاضره رحت للمكتب مالته حته يأجلي الامتحان على يوم الخميس
دكيت الباب
فراس/جنت احضر بالاسأله اكتب وسمعت الباب اندك بدون ماارفع راسي كلت تفضل
واني مدنك اكتب بس شميت عطر غمضت عيوني لمده ثواني كلت بكلبي اييي هو عطرها رفعت راسي وصارت عيون بعيونها الي صار فتره ممخلي عيوني بيهن
كلت تفضلي
تليفوني جان على الميز كعدت على الكرسي كالت استاذ جان يدك التليفون سحر
راساً كلتلها دقيقه
نيفين/ردت احجي ودك تليفونه ولان قريب عليه قريت لاسم سحر توقعته راح يرفضه بــَس قاطعني وكلي دقيقه جريت نفس عميق فتح خط وبده يحجي وياها واني اسمع
فراس/الوو هلوو عيوني شلونج
اممممم احنه شحجينه وشكلنه
اي عفيه عمرري لتخلين بالي
انشالله باجر على الموعد
طبعاً اجي شبيج ياا دوام قابل الدوام اهم منج
محتاجه شي اجيبه الج وياي
تمام ديري بالج على نفسج يله عيوني باااي
سديت التليفون
حته نسيت نيفين يمي اني ممتعمد احجي وياها هيج لان نيفين كاعده بس سحر محتاجه للدعم المعنوي خصوصاً باجر موعد عمليتها ومو بــَس اني هـًُّـيًُْـچ صرت اعاملها الكل هـًُّـيًُْـچ صارو وياها خصوصاً خالي حيل تغير حته المي من تريد هو يشربه الها بيده
رفعت راسي على نيفين وكلتلها ايي نيفين تفضلي
نيفين/اسمع حجيه وي سحر واحس حراره تطلع من جسمي شنووو معقوله كمت اغار ماادري شصار بيه وخصوصاً تاكدت %100 بينهم علاقه ويحبها كولشي صار واضح مثل الشمس
استاذ بخصوص الامتحان مدارسه واريد تاجلياه على باجر
فراس/تعرفين ماعدنه وقت وماعندي ولا طالب مأجل اعتذر منج باجر اني مجاز
وهسه موعد الامتحان وهاي الأسئله جهزتها
اخذت اوراقي وكمت اطلع من المكتب وهي بعدها كاعده
سمعت صوتها ورايه
نيفين/حجيت بعصبيه
اييي طبعاً استاذ فراس متكدر تأجلي امتحان لان عندك موعد وي حبيبتك لو تريد مقابيل التأجيل شي يرضيك ويرضي غريزتك الشي الي تاخذه من سحر باجر وقبلها وقبلها تريد انطي الك حته حضرتك توافق تأجلي لامتحان لان الضاهر ماتت الانسانيه بيك حته من تريد تساعد لازم تاخذ شي مقابيله
......................
الكاتبه ام زيزو