#تاروت
البارت «45»
بقلمي: زينب علي
حلواتي لا تنسون التصويت+تعليق بين الفقرات ومتابعة الحساب zainab_ali1 ♥️
TikTok: zeinab_.ali1
Insta: zainab__.ali1
كدما بروحي ألم
مرات من انجرح
ما أكدر اتألم
ولتصبلي هم وعتب
مليان كاس الهم
ولا تنتظرني اعترف
صعبة اعترف بالغلط
وانذبح من اندم
𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵
خيال"
طلع يمان للباب وانا رحت البس حجابي اسمع باتر يحچي وصاير عصبي يگله
باتر: يمان خل نطلع للمستودع بسرعة هناك الولد متعاركين ويا الي طالعين كشف على المستودع وواحد منهم متعارك وياهم يگله اجتنا اخبارية على وجود مواد ممنوعة بالمستودع وهسه الشرطة كلها هناك والدنيا مگلوبة
يمان: منو وصلك الخبر هاي يمتى
باتر: هسه اتصل بيه حداد خبرني
يمان: بس ابدل
دخل يمان للغرفة ينافخ بملل توجه للكنتور طلع ملابس يبدل رحتله احچي
خيال: شجاي يصير ؟
يمان: علمي علمچ خلي نروح ونشوف
خيال: دير بالك فدوة الوضع مبين خطر واكو احد جاي يتربصلكم
باسني براسي
يمان: لا تخافين حبيبي وطمني امي ما اوصيچ بعد
بعدها بدل وطلع نزلت وراه اسمع حكمة تصيح عليهم
حكمة: ما ترتاحون الا تجيبولنا مصيبة من ورا شغلكم الطايح حظه
بقوا برا ماعرف شنو يحچون وياها شويه وعافوها وطلعوا مستعجلين سدت الباب وراهم ودخلت تحچي
حكمة: يصيبكم حريشي احنا ماعلينا شي اسد بابي انا وبنياتي واليسألنا عليهم اكلهم ذولاك هم تردون روحولهم مالنا غرض بيهم
گامت رميم لزمتها من ايدها گعدتها على التخم تحچي
رميم: واذا واحد بيهم انجرح تخبصين الدنيا
حكمة: هالمرة غير اليجي من ايده الله يزيدة حيل وابو زايد وياهم خلي ينشلع گلبهم حتى يعرفون الله حق
سكتنا وهي رجعت گالت بعصبية
حكمة: مالي غرض بيهم عسى ما تاكلهم الچلاب
حمحمت وتر تحچي
وتر: هذا يمان دز مسج يگول الوضع كلش خطر عليهم
گالتها وغمزت الرميم بس سمعتها حكمة فزت تحچي بخوف
حكمة: شنهي خايبة شمالهم شو بلا اتصلي بيهم خلي نشوف
هي تحچي ورميم ووتر خربن من الضحك
خيال: خلي يولن حكومة چذابات هم شوكت لحگوا يوصلون الراس الشارع
گامت شالت نعالها تركض وراهن
حكمة: بنات الاوادممم تشتغلنييي
وتر چانت شايلة الكرار صاحت بعلو صوتها
وتر: حكوم شايلة ابن ابنچ راح يطيح من ايدي
حكمة: انتِ باقية مگابلة الفروخ وگاعدة وين كتبچ جيبيهن وادرسي على مانشوف هالشلايتية شيسوون
گالتلها رميم وهي تشيل جهالها تخليهم على صفحة
رميم: ادعيلهم حكوم مبين سالفتهم صعبة كلش
راحت وتر جابت كتبها وگعدن يقرن هي وزينة وتر سادس وزينة خامس واحنا مخلين ادينا على خدنا وگاعدين ننتظرهم يرجعون
❛❛❛❛
يمان"
وصلنا للمستودع شفناها كلها مگلوبة شرطة وناس والامنية والعمال
باتر: اووو مليوصة وسيراميك مكة
يمان: اكو واحد مخبر يعني وجاي يلعب من ورانا
نزلنا دخلت للمستودع اشر عليه حداد يحچي
حداد: هذا استاذ يمان هو صاحب المكان
سلمت على الضابط
يمان: انا يمان صمد صاحب المستودع خير سيادة الضابط او مشكلة
- اجتنا اخبارية عن وجود مواد ممنوعة ومخدرات بحاويات المستودع وياي امر بالتفتيش بس الامنية هنا سببولنا مشاكل
يمان: نعتذر حظرة الضابط بس هاي حسب تعليماتنا تگدرون تاخذون راحتكم بالتفتيش ما عدنا مشكلة دام الوضع قانوني
وگفت على صفحة انا وباتر وهم فتشوا المستودع هيچ گلبوا گلب
باتر: الظاهر الي مخبر عنده ظهر قوي بالدولة مو من العادة يطلع كشف بهيج وكت
يمان: واحتمال إجراء قانوني
باتر: دباعهم شلون گلبوا المستودع گلب هم وچلابهم
عافني وراح يمهم يحچي ويا الضابط حسيت بتليفوني اجاني إشعار مسج شفته من رقم غريب مكتوب
" واخيرًا رجعوا الرهبان واجه وكت تصفية الحسابات "
بلا تردد بسرعة ضغطت اتصال واتصلت بي ماكو خرج من النت رجعت اتصلت على الخط مغلق
بقيت افتر وأتساءل منو هذول مانريد نرجع للمربع الأول وسلسة الدومات من جديد ، فتشوا وطلعوا من المستودع كلشي ما لگوا شوفت المسج الباتر اثنينا احتارينا بالموضوع
باتر: مو گلتلك هذا واحد جاي يلعب علينا
يمان: يعني لو ما سابقينه بخطوة وتلفنا البضاعة الله اليعلم هسه شصار لوبعدها مكدسة بالمستودع
باتر: ينراد شغل هواي وهذا دائب ما يجاوب
يمان: خلي نرجع للبيت ونتصل بي يلحگنا
باتر: وامي
يمان: خليها وراي
طلعنا راجعين للبيت طول الطريق افكر شلون ممكن نطلع من هاي السالفة كلها ...
❛❛❛❛
خيال"
رجعوا الولد للبيت وجوهم ما تتفسر تلگتهم حكمة گعدوا يسولفولها كل الصار وحتى على التهديد اباوع اليمان وجه مبين بي التعب وواضح عليه الحيرة كل شويه يلزم رأسه بألم
تنهد ووجه الكلام الباتر
يمان: خابر هذا الحيوان كله يجي هنا مشمور نفس جلب هناك بلا صار بي شي
حكمة: شنهي وين تردون تجيبيون هذا سيبندي هنا ببيتي
يمان: خوش مااجيبه واذا صار بي شي لا تكعدين تلطمين باعي هاي رسالة تهديد الوضع الي احنا بي مايسمح للزعل
باتر: هسه وكتها خلي يجي ينشمر هنا حالة حالنا
فزت تحچي
حكمة: يمه ابني ياهو مهدده
يمان: ولا عبالك ستوها ماتريده يجي هسه صار يمه ابني ، دخابري كليله يجي يعيش هنا احنا نكول مايقبل
باتر: اي حكومي مايسمع منا
حكمة: وينها مرتك تجيبلي تليفوني
صاح بصوته عالي على رميم چانن هي ووتر بالمطبخ ضربته حيل وگالت
حكمة: وخرس بدل ما تجوعر بصوتك گوم انت جيبه ماتشوفني صحت المرتك يعني انت گوم جيبه
باتر: هو هذا الوسطاني معدوم الحرية والقرار والارادة ودومه مضطهد
راح جابلها التليفون اخذته تدور على اسم دائب وتحچي
حكمة: يمه شمعة بيتي اذا صار بي شي اموتن ورا
اتصلت بي اول ما فتح خط گلتله
حكمة: يمه ابني شمعة بيتي العاقل البار بيه يمه جبتك بتعب واه والويلاه بعد امك تشيل جولاتك وتجي والي ما اشوفه مزروع يمي خلال نص ساعة اشوفة حكمة شسوي خوش بعد امك ... يلا عفية بسبع معسلامة
متنا من الضحك يمكن حتى مانطته مجال يحچي گالت الكلام وسدته بوجهة
اباوع على يمان صعد فوگ ردت اصعد ورا بعدني على الدرج صاح باتر
باتر: مرت اخوي سر سعادته ما تنزلين انتِ واختچ واختچن ثانية تصبن اكل كتلنا الجوع نسوان اخر وكت لظهاري نايمات ومخليات امي وحدها تطبخ وتنظف شافنا ماكو تستفردن با امي بعد بعد خلنها تنظف غرفچن
خيال: راح يصير العصر على فكرة
گام وگف يباوع على الاثاث يهز بيده ويحچي
باتر: لا ما سحات لا كانسات لا خابزات كلشي ماكو بس فالحات طلبات ومصاريف هاي هي
ادري بي يسوي هيج حتى يكسر جو الكآبة الي صار طلعتله رميم من المطبخ بأيدها جفجير والايد الثانية شايلة بيها طاوة صاحت بي
رميم: هاي عليمن
راحلها يحچي
باتر: مرتي تاج راسي بس انتي بنية حلوة وتخبلين جيبي ايدج ابوسها
گللها وباس ايدها رجع گال
باتر: على راسي ام الاكبر شنو طبختي سر سعادتي
هدأت تحچي بغرو
رميم: ايّ هيج عفية هيج صير
باتر: شطابختلنا تاج راسي
رميم: خالة علمتني اطبخ برياني وسويته اليوم
باوع على حكمة وگللها
باتر: يمه تأكدتي من الاكل خاف هاي الحية تخليلنا بي زرنيخ وعلي كلنا تفطسنا
ضربته بخفه على راسه بطاوة تضحك وانا فقدت من الضحك عليهم گعدت على باية الدرج ماتحملت وحكمة تسبح وميته ضحك على سوالفهم
طلعت وتر من المطبخ گالت
وتر: شكو شبي باتر يصيح
التفت عليها گللها
باتر: هلا عيني هلا بويه شنو شلون سادس وياچ
وتر: وينه هو السادس بعدني كلشي ما مفتهمة
باتر: احسنلچ انا هم طلعت من السادس بالقدرة مدري شلون نجحت منه خو بنص السنة طحت بكلهن ولزمني يمان طيح صبغي كتلني كتله غسل ولبس يلا نجحت وابوج الخايس قبل سنتين يلا خلص معهد تجارة هم چان دجه دبل بس يموني ابو طول الحلو طلع بزنس وكذا
رجع يمان نزل صاح عليه
يمان: وشبي البزنس ماعاجبك
باتر: اخوي تاج راسي شمالها عباد الله ما تتحاجه
ابتسم اتقرب مني همس
يمان: صار ساعة منتظر تصعدين وراي
خيال: ردت اصعد والتهيت بسوالف باتر
يمان: انا الچ
خيال: مايخوفني تهديدك
همس
يمان: اخخ افقد
ضحكت رجعن البنات للمطبخ وحكمة وياهن وانا رحت طلعت ملابس للصغار وگعدت اغير ملابسهم وباتر يلعب بيهم شفت يمان طلع تليفونه وگال الباتر
يمان: لابتوبك وين اريده راح اخابر حداد مسؤول الامنية
گام جابه اله ورجع گعد گال يمان
يمان: اول شي اتصل على فرات خلي نشوف بلا
اتصل وفتح مايك صوت فرات اسمعه واضح بقوا يحچون شويه بالشغل
يمان: وهسه شنو الوضع يمك
فرات: كلشي تمام الي مختلسين رفعت عليهم قضاية وكلشي قانوني وحسب الاصول بس محتاجين محامي شاطر
رآسًا يمان رفع انظارة بتجاهي اشرتله براسي بالموافقة
يمان: المحامي جاهز خلي عليه
سده من فرات واتصل بمسؤول الامنية وفتح لابتوب باتر بحظنه وبقي يستفسر منه كله كلشي تمام ومراقب الوضعية زين
ويمان يوصي ان ماريد اي بضاعة تنزل حاليا بالميناء خلي كلشي يستقر ويتحول قانوني بالكامل يلا
بعدها اتفقت ويا انا الزم قضية الاختلاس الي صارت بالمعارض ومحلات الذهب مالتهم حسب شغلهم القانوني
عفتهم ودخلت ورا البنات گالت وتر
وتر: انا خلصت الي بيدي راح اصعد اصلي قبل لا نصب الغدا
خيال: اخذي راحتچ حبيبتي
اول ما طلعت من المطبخ اتقربت مني رميم تحجي
رميم: وتر الهسه ماعرفت دائب راح يجي يعيش هنا خطية اذا عرفت شلون
خيال: اكيد راح تزعل لازم نحچي وياها
حكمة: وتوره عاقلة هسه انا اصعد احجي وياها
خلصت الشغل الي بأيدها وعافتنا وصعدت وراها تفهمها ...
...
وتر..
خلصت صلاة وقبل لا انزل اخذت تليفوني تصفحت بي شويه چنت مسويه حساب وهمي ومتابعة دائب من عنده لان مسويتله بلوك من كل مكان دخلت شفته ناشر حالة اغنية بحبك وحشتيني وهو يسوق طالعة بس ايده وكاتب عليها
" يا طفلتي لا تكبري إياكِ من صمتي.. ومن صوتي ومن خوفي عليكِ، أن تستسلمي! "
حسيت الدموع تجمعت بعيوني صارت تحرگني فجأة الباب ندگ بسرعة مسحت عيوني اهفي عليهن واخذ نفس استجمعت صوتي اليرجف وگلت
وتر: تفضل
دخلت حكمة تحچي ببتسامة
حكمة: وتورتي الحلوة خلصتي يمه
وتر: اي يمه هاي ردت انزل
اتقربت مني گلبت شعري بأديها وخرته من وجهي تحچي
حكمة: بسم الله الرحمن عين الحارة باردة عليچ تخبلين
ماتحملت حضنتها احچي
وتر: حبيبتي عيونچ الحلوات
حكمة: تعاي نگعد هنا نسولف شويه نتسامر انا وياج بعده الغدا مو هسه يصير
گعدت على الجربايه واخذتني بحضنها تحچي
حكمة: وتوره الحلوه تدرين جان امنية رجلي يصير عنده بنية وتكون حلوة وشاطرة بس هو عمت عيني راح من وكت لا لحك يجيب طفل ولا يتهنى بحياة وعشت طول عمري وحيدة بين اربع حياطين
وتر: الله يرحمة
تنهدت تحچي
حكمة: امين امين يارب ... المهم بقيت سنين عايشة وحيدة لحد ما اجه يمان وشلته بيدي جنت بعدني صغيرة مو كلش چبيرة جنت بداية الاربعين بس يمه الضيم يكبر والعوز يمرض ، اول مااخذته الحضني حسيته هو ابني وچبيري جنت اخاف انام ليل خاف صمد يأذيهم وماحس بيهم خاف صمد يجوعهم وانا اكل بعدين واجه باتر وجان نسخه نرجس
اختنگت بعبرتها بس ماسكتت كملت
حكمة: وجانت نرجس دائما تكلي يمه يمان وباتر واحد عيني وثاني نضرها وحبيتهم على محبة امهم واخذتهم وحاولت بكل طرق اعيشهم عيشة كريمة
سكتت شويه عرفتها راح تحچي عليه باستني وكملت بحسرة
حكمة: بس دائب هذا يختلف عندي دائب اخذته بدون ما افكر نظرة عينه الحادة ونبرة صوته المهضومة ماكدرت اعوفها وامشي عنها دائب عزيز كلبي الوحيد العاقل بينهم الوحيد الي من جنت احجي لحجاية ما يكسرها اسمي العاقل من گد ما ميطلع اله صوت
ربيتهم ٣وملوا علي الدنيا لحد ما ضحكوا عليهم ولد الحرام وبوكتها جنت شبهه ميتة ومن وعيت ورجعت الي صحتي كتشفت ولدي ضاعوا مني
وباتر مدلل نرجس كسرته الدنيا وما عاد مدلل ويمان الي يخاف يترك فرض الدنيا غيرته وخلته ياخذ فلوس حرام ودائب الي يخاف يأذي النملة الماله صوت صار وحش كاسر
وحجيت وصيحت وزعلت وعفتهم بس وين بعد الدنيا خذتهم وغرتهم بفلوسها وحلاوتها محرومين من ابسط شي وصغار بعدهم ما شايفين الدنيا عدل صارت سيارات وبيوت وبنات حواليهم ولبس والفلوس هواي وخذتهم الدنيا ورجعت وحدي بعد ما چانوا مالين عليه حياتي الحد ما انتقلت يم بيت حچي سليمان جان عدهم ثنين بنيات خيال ورميم جانن صغار وتربن يمي ورجعن نورن دنياتي وجربت تربية البنات وماكو احلى منها لحد ما كبرن وحبها ويمان حب خيال وخطبها چنت ما مصدگة بروحي يوم السعد هذا
واجه اليوم المشؤم تدرين ليش سميته مشؤم لان شفت الخوان الي ظلوا محافظين على خوتهم سنين هسه واحد دمر حياة اخو وثاني شال بخاطرة عليه وماتوقعت باتر يكتل وغلطت بحق ابني وجذبته وكتله انت قاتل وانا اعرفه نسخة نرجس الي مايهل الها تأذي النملة
هذا كله هي تحچي وانا على فد دمعة مثل الي لگيتها حجة حتى ابچي وهي هم تبچي بعدها مسحت دموعها ابتسمت وگالت
حكمة: وبعدين اجن البنات ورجعن وليداتي وتفائلت بيهم خير وگلت ماعرفت اصلح ولدي اجه الي يصلحهم ونعم منهن خايبه ربن الزلم من جده وجديد
گعدتني گبالها تمسح بدموعي وتحچي
حكمة: بس دائب جنت شايلة حمله ياهي التصلح حاله وياهي الي تشيل دائب چنت اسمع ببنيته واعرف عنده وحيدة بس ماجنت افتهم شنهي قصتها بس هو يحبها من الصغر الحدما لحد ما طخت عندي وكلولي اكو بنية حلوه تنتضرج تاخذيها ماچذبت خبر رحت بسرعة بلا تفكير اخذتها واجت اصغر جهالي واحلاهم اجت الصغيره المدللة وتوره الحلوة
ولتموا ولدي حاولي وبناتي التمن وصار عندي 6 ابناء واحدهم يگل للكمر انا احلى منك بس جانت عدنا مشكلة
وتر: الي هي
حكمة: بتي الصغيرة متعاركة ويا دائب وحياته هسع هو بخطر وخايفة عليه واريده ابقي يمي بس اذا بنيتي ماقبلت افصم ظهره اليجيبه هنا
زدت بالبچي حضنتها حيل احچي
وتر: حكومتي انتِ كلشي بنسبه الي انتي احسن ام بالدنيا وشنو ماتردين سوي المهم انا يمچ مو يم أحد غيرچ
حكمة: يعني يجي دائب هنا
وتر: اذا چان على داىب عادي خلي يجي مالي شغلة بي المهم انا يمج
صارت تبوس بيه وتحجي
حكمة: بعد روحي العاقلة خيبة يروحلچ فدوة دويب ابو الوسواس
ابتسمت وهي گالت
حكمة: حطي حجابج على راسج وتعاي وراي
لبست حجابي ونزلت وراها شفته موجود گاعد يم الولد ورميم وخيال يمهم جان گاعد ويهز رجله بتوتر اول ما شافنا نزلنا گام وگف راحتله حكمة
اباوع عليها شلون تحضنه وتشمه تحضن بي وتكله
حكمة: يمه ابني العاقل الهادي خايب كلولي مهددينك ياهو وياك كلي اطيحلك حظه وصبغة
ابتسم يبوس براسها وبأيدها يحچي بلهفة
دائب: شتاقيتلج حلوة البن
حكمة: تبقى گاعد يمي ماتروح
عفتهم ودخلت للمطبخ اسمعه يگللها
دائب: يمه شلون اعيش هنا وتر
حكمة: تكله بتي عاقلة ومالك شغلة بيها انت بصوب وهيه بصوب انا امها مسؤولة عنها تفاهمنا بالموضوع انت لا تدخل
من بعدها گعدنا تغدينا عادي ولا كأنه موجود وطبعا باتر ماسكت ورجع عاد سالفة اول ما شافوا دائب وشلون حكمة جلفته من الوصخ وهم يضحكون اخر شي گلتلهم حكمة بتهديد
حكمة: تبقون هاي كعدتكم وهاي حنيتكم وعلاقتكم الاخر يوم بعمركم وحق ابوي الغالي اذا بيوم عرفت وسمعت حتى لو بگبري واحد منكم متعارك ويا خوانه لو مأذي وحدة من البنيات اغضب عليه اليوم الدين
كلهم گالوا بصوت واحد وانا منهم
: من عمرنا على عمرچ
رجعت باوعت اليمان وگالت
حكمة: اكلك عيني يمان جيب النا طاوله اكبر من هاي ما شاء الله عليكم كله تخلفون زوجي بعد چم يوم تصير ماتوسعنا هاي وين تكفي انت وفروخك وفروخ خوانك
باوعلها يمان يحچي
يمان: ليش مرتي حامل ومادري
حطت اصبعها ع السانه وع الميز مثل التبصم وگلتله
حكمة: وها اها اطلع موش حكمة بت نعيم اذا ما خيال طلعت حبلة
خيال: دخيلچ حكوم مو وكتها هسه كلش
يمان: صدك مو وكتها وعدين ليش انا الاشتري دائب وبات شناقصهم طول عرض فلوس
حكمة: انت چبير هم صغار
يمان: سوده عليه اجيبلهم حجلات يا صغار غير الثلاثين ترحب بهم
بين كلامهم ونقاشاتهم العائلية نسيت نفسي وابتسم ويا حچيهم واحاول اتجنب دائب بس درت انظاري عليه شفته عايفهم ويباوع عليه مبتسم الابتسامتي گلبت عيوني بملل ومانطيته اهمية رغم طول الگعدة هو نظراته تلاحقني
بعدها خلصوا شربوا جاي وطلعوا گالوا عدنا شغل نكمله ونرجع ووصوا حكمة تقفل الباب وماتفتحه حتى اذا يندك
وللعصر كلش وهم ماراجعين وهم اجو بيت جد البنات بيبيتها وجدها وعمتها بقوا شويه بس شافوهن وراحوا
گعدنا يم حكمة نلعب بالجهال وزينة بغرفتها حتى على الغدا گوه حكمة جبرتها تگعد ويانا هالبنت ماعرف شنو سالفتها بس ساكته وتجي تكعد يمنا شويه وتروح
انتبهت على رميم تحجي ويا خيال تگللها
رميم: صدك ما حاسة بأعراض حمل
خيال: شجاج بعد وكت ويني ووين الحمل اصلا احنا متفقين هسه مانريد نسوي جهال خلي نشوف تاليتها وين
رميم: اذا حسيتي بشي عندي اختبار حمل منزلي ضامته بالجرار فوك گليلي انطي الچ
ماعرف ليش كلمتها بقت ببالي واتخيل نفسي يصير عندي اعراض غير انجلط نفضت الافكار من راسي ورحت جبت كتبي اقرأ ورميم وخيال يساعدوني على قدر المستطاع...
❛❛❛❛
يمان"
طلعنا انا واخواني افترينا على المعارض والمحلات چيكنا الوضع الحد الليل بحدود الساعة 9 رحنا للميناء بعدها للمستودع
گعدت احچي وياهم
يمان: راح احجي وكل واحد بيكم يمسعني كلش زين اليوم احنا وحدنا ، ماكو شاهين الي جان معينينا عد العالم علاقات ومن اليوم ماحو اصحاب ماعدنا كلها اعداء هسه احنا حتى فلوس لهيج شغل ماكو ماجاي نطلع ولا فلس من هذا الشغل واضح
باتر: واضح بس وين تريد توصل
يمان: هسه احنا شنريد احنا نريد نقوي العلاقات مال نجي ونبدي نوكع بيهم كبل مبين احنا وما راح ندبرها لازم نزرع عين بكل عصابة ونسيطر عليهم من الداخل يلا نگدر نبدأ بالشغل الصح ، وهذا الصخام الي جان يدخل بضاعة لازم ينعرف
باتر: بس اذا ايمن ماكو احنا ثور الله بارض الله كلشي ما نگدر نسوي
دائب: ايمن عنوانه رحت شفته طلعت بركه مال بقر والي بيها رجال ومره وحتى جهال ماعدهم رقمه دولي يعني جايب رقم وحاطه والعنوان وهمي
صحت بيهم
يمان: مو انتم مطاية محد بيكم مكلف روحه يدك على الارقام الموجودة ايمن سنه ونص بالميناء لازم الصاية والصرماية داخل المكتب كل واحد بيكم وفاتح اجهزتنا كل احنا يعرف بكل جهاز شكو ومنو لا والله خوش رهبان والنعم منكم كفو
باتر: هسه غير نعرف ايمن منووو راح اتخبل
يمان: ايمن علساس جان يشتغل الصالحنه ومشي امورنا تمام والفلوس التدخل بحسابتنه ينطيها الفرات وفرات يوزعها بحساب البنك يعني الولد ما بايك فلس احمر وما مدخل الطير
دائب: والله حيرة يعني هسه هو ويانا ويانا لو علينا علينا
يمان: اها هنا مربط الفرس هو ويانا لو علينا
دائب: وشنو الحل هسه هو خيط ومحروك يعني مانكدر نسوي شي
گام باتر وگال
باتر: وليش مانكدر جاي تكول مسؤول امنية يعني اكيد الامن يعرفوا
دائب: اذا موجود يعني البضاعه اكيد هو مدخلها مليون بالمية
يمان: المخدرات والمممنوعات دخلت بعد ما ايمن ختفى قبلها جان يدخل جبس مواد غذائية وكل شي قانوني واصولي وانا موقع عليهم بأيدي ، بس دخلت الممنوعات ايمن بح طار وين محد يدري
اباوع الدائب صفن يفكر بعدها گال
دائب: واذا كتلك ندليت بيته
يمان: وين وشلون
دائب: من كلت مسؤول امنية انا قبل فتره رحت الواحد منهم وداني البيتهم على ماتذكر ذكر اسم ايمن وگال مسافر صارله سبوع بس هو كاعد ويا بنفس البيت
باتر: الخيط ما محروك وايمن موجود اذا ايمن جان داخل بكل غرفنا وهو امنية يعني اكيد يعرف يفك شفرات ويفتح الابتوابات بكل بساطة واحتراف بهاي الحالة لازم ايمن ربط الكامرات على جهازه وجان يحذف ورا ما يخلص ومن طب البضاعة ايموني ابو طول الحلو يسد الكامرات حتى يدخلون جماعته بكل بساطة
صار يفتر يتمشى ويحچي
باتر: واذا تسألوني هو ليش جان يدخللنا ويا المخدرات بضاعة اصولية فـ هذا حتى ياخذ توقيع يمان ويگدر يستنسخة ويزورة بكل سهولة ، وبعد ماعرف كل زاغور بالميناء كلك ليش باقي اطفر وكلشي بيدي
باوعلنا وكال
باتر: صح
دائب: خـ*ا بعقلك طبعًا صح
يمان: ايمن لازم يجي هنا ويلاقي مصيره مثل شاهين وهاي شغلتك دائب
دائب: اي ياعيني مو هو عجل واجيبلك يا الي كدر يدخل للميناء ومحد حس بي اذا شفت ظله اتفل بكصتي
فز باتر يحچي
باتر: والحسين اذا سويتها وجبته الا اتفل بگصتك
دائب: اكل مطي انت مو تريد بس تلزملك سالفة
يمان: بلا هاي مسلتتكم الماصخة ودائب انت الزم الي سالفة مراقبه ايمن وصديقة وعرفني اصغر تفصليه كون هيج حتى الي طهره تجيبه الي وباتر انت تعرف شغلك ما حاجه احجي
باتر: لا هاي هي
عفتهم وطلعت تليفوني اتصلت بصديقي اسمه علي
اول ما فتح خط گال
علي: يماني معذب قلوب العذاري وين اخوك صديق الملاهي مشتاقلكم گـ*****
يمان: علي عوف سوالفك بدون تفاهه هسه شنو شغلك وين صار
علي: افا عليك شنو تريد يمي حتى عندي نسوان يخبلن
يمان: اريدك يمي مقبل على شغل ثگيل واريد هواي مساندة
علي: عمي صدك چذب يمان انت اخوي سهله خادم صغير انا ثواني ويمك انا وشكو گـ*** اعرفه أمرني
يمان: اريد اطلع من شغلي واريد اصفي شكو شبكه زباله موجودة حواليه
علي: اخ حرامات عود جيت كلت رزق واجه واصير واحد من رهبان للاسف ديلا المهم كلي شمحتاج انا برسم الخدمة
يمان: عندي خطة واحتاج بيها شخص بدولة
علي: هههاييي من چنت اگلك انا شخصية وتحتاجني ماتصدك دشوف درب الجلب على الگصاب راح تحتاج واسطة السيد الولد واحزابة الشريفة وخبرتي برصد المجرمين المتلبسين
اتقرب باتر صاح عليه
باتر: اي اشوفك هستوه طلع رائد ونطك بعقوبة فصل استقر
علي: لك هااا كلببب هذا باتر
دائب: وانا هم يمه
علي: الشريفين كلهم مجتمعين بمكان واحد والعكس صحيج ههههاااييييي
بقوا يتشاقون ويا اخذت التليفون منهم ورجعت كلت بجدية
يمان: المهم باع راح افهمك شنو اريد بالحرف الواحد وانت اسمع حتى نمشي حسب هاي الخطة
بدأت اشرحله بس تنفيذها بالوقت الحالي صعب ينراد تخطيط بالاشهر يلا نكدر نسيطر من بعدها اخذتهم ورجعنا للبيت ...
❛❛❛❛
خيال"
جنه كل احنا كاعدين وطبوا رهبان وجوهم تعبانة كالعاده وضاعهم مزرية سلموا وكل واحد انصرف الغرفتة انا صعدت ورا يمان ورميم ورا باتر ووتر ولا مهتمة مارفعت راسها بقت تدرس يم حكمة ودائب من يشوفها بمكان يلزك بي اجه وهو تعبان كبل تمدد بحضن حكمة يسولف وياها
دخلت للغرفة جنت محظرة الحمام اله اجه عليه لزم راسي قبلني وابتعد يحچي
يمان: افيش
خيال: مبين تعبان
يمان: هواي سوالف تدوخ المهم جبتلج اوراق الي تحتاجينهم بالقضية
حاوطت رگبته احچي
خيال: اذا كسبت الدعوة شنو راح تنطيني
سحبني من خصري يحچي ببتسامة
يمان: اخخخ انت بس اكسبي الدعوة وحتى اذا ما كسبتيها رگبتي سدادة شتردين اطلبي حتى اذا ليلة حمراء صباحية هم قابل
خيال: والله انت صاير كلش
ضحك دارني حضني من ورا وكفنا گبال المراية باس رگبتي خلا اديناته على بطني يحچي
يمان: صدك حجي امي انتي حامل
ملت براسي عليه
خيال: لا ما احس باي اعراض وحتى ثكل ماكو رميم تگول تحسين بثكل واعراض نساوة
يمان: اذا صدك صرتي حامل ونساوتچ تصير مثل المسلسلات تلعب روحج مني اموتچ خيال كلشي ولا هاي السالفة
ضحكت احچي
خيال: هو وينه هسه صاير
يمان: هم تحبين يصير عدنا طفل وتوأم نفس الاكبر والكرار
خيال: طبعًا بس احنا متفقين مو هسه من تطلع من شغلك تمامًا يلا
يمان: اعرف بس اذا صار عدنا شحابه تسمينهم
خيال: انا احب اسم بحر
يمان: حلو وانا احب اسم شهم حتى تصيرين ام شهم
ابتسمت درت نفسي عليه بسته اندمجنا شويه بعدها دخل للحمام حتى يسبح
من بعدها مرت الايام عادية وهم كلمن ملتهي بشغلة وبيوم بالليل جنا گاعدين انا ويمان بغرفتنا نباوع تلفزيون ما حسينا الا صار صياح وصوت عالي ركضت بسرعة فتحت الباب سمعت الصوت جاي من غرفة باتر ورميم متت من الخوف ردت اروحلهم لزمني يمان يحجي
يمان: هوب هوب وين رايحة رجال ومرته شكو رايحتلهم
خيال: يمان مجاي تسمع صوتهم
يمان: ميخالف مايصير
خيال: هدني يمان اريد اشوف
رجعت دخلت اخذت حجابي لبسته وطلعت دكيت الباب عليهم ورميم تفرفح تصيح وتحچي ماعرف على شنو
خيال: رميم شبيكم فضحتونا اصواتكم طالعة
انفتح الباب وطلعت رميم بيدها الاكبر وكرار انطتهم الي تحچي بعصبية والوجه مطعون احمر خلتهم بيدي وگالت
رميم: خذيهم
ورجعت سدت الباب بوجهي اتقرب يمان اخذ واحد من الجهال من ايدي يحچي
يمان: مو گلنا مايصير تدخلين دمشي يا طرگاتي امشي
خيال: شبيك مجاي تشوفهم تهستروا بالصياح
اخذنا الجهال الغرفتنا وهم بقوا فوك الساعتين صياح وصوتهم عالي اول مره باتر يرفع صوته على رميم حتى صوت تكسير صرنا نسمع گلنا مستحيل خلوا بالغرفة شي صاحي الحد ما ملوا واختفى صوتهم والصغار بقوا نايمين يمنا
خليت يمان ينام وطلعت من الغرفة وشفت رميم گاعدة بالاستقبال الفوگ ودموعها عشرة عشرة تبچي وتمسح بيهن متت من الخوف رحت عليها حضنتها احچي
خيال: هاي شصاير ليش هيج حالتچ شبيكم انضربتوا بعين
رفعت راسها اباوع وجها اصفر وخدها صاير احمر دم شهگت احچي
خيال: هاي شنو ضاربچ
باوعتلي صفح تحجي
رميم: يخسي الخايس يضربني هاي لان حاطة ايدي على خدي صار احمر انا الي فكست عينه بوكس عميت عينه عمي خليتها زركه وضربته بركبت رجلي على مصدر رزقه خليته يحلم يجيب جهال بعد
ضحكت من كل گلبي احجي
خيال: هسه انا كلتلها خاف عليج لو عليه
رميم: طبعا عليه ما تشوفين ظليمتي
خيال: وين ظليمتج انتِ ومسكارتچ ومسشوره شعرچ وهو مزورگ بعد وين الظليمة بالموضوع غير افهم هسه على شنو هذا كله
رميم: جايبي بـ 1 باليل والقميص مفتوح وريحة نسوان تعط منه تعططططط ويكلي جنت بشغل يا شغل ومن الثول الزايد الي صايبه ورا شوي يكلي يم اصدقائه كل ساعة يحچي شكل ومضيع صول جعابه والي يقهر يحلف خيال يحلف بغلات ولده وروح امه ما يخوني
خيال: باتر مستحيل يخونچ
رميم: هذن كلهن شنو معناتهن حب يجرب العطور النسائيه مثلا ومكالماته وتليفوناته وتليفون مايسكت هذا كله شنو معنى
خيال: ماعرف شكلج الوضع محير شلون وخاصة باتر عنده انتِ فد شي مستحيل يسويها بس هم هذن كلهم يثبتون هو يخون
رميم: ورح أهلنا اذا طلع باتر صدگ يخوني الا اشرب من دمه واشوفه رميم منو
نتهدت بحسرة
خيال: دكولي يالله وگومي نامي يامي والصباح رباح اتفاهمي ويا مو تكتلينه يمعودة ستري علينا اهله يردونه ترا
بقيت اشاقيها احاول اخفف منها عفتها بعد ما رجعت دخلت للغرفة
وانا هم رجعت دخلت شفت يمان گاعد يتصفح بتليفونه اول ما شافني دخلت فتح الغطا حتى اروحله رحت دحست روحي بحضنه گال
يمان: اطمنتي على اختچ
خيال: ايي وابشرك اخوك متزورگ كالعادة
يمان: بعد ايدي خليها تربي
خيال: انت هم ينرادلك تربية صاير فاسد كلش
ضحك يبوس بيه ويهمس
يمان: احبچ والخت
ابتسمت غمضت عيوني ونمت بعد ما تطمنت على رميم بس بقى موضوع باتر محيرني
❛❛❛❛
وتر"
فزيت على صوت المشكلة الي صارت وبعد ماگدرت انام سحبت تليفوني اتصفح بي فجأة اجاني مسج على الواتساب مكتوب بي
" شلونچ وتر "
ترددت بالبداية بس قررت اجاوب
وتر: " منو وياي "
" ليش ماعرفتيني انا ليلى "
جلست گعدتي وكتبتلها
وتر: " انت منين جبتي رقمي "
ليلى: " اذا اريد ماكو شي يصعب عليه والافضل تسألين دائب هالسؤال المهم هذا مو موضوعنا موضوعنا راح ادزلج اشياء شوفيهم "
ردت احظرها بس فضولي ماخلاني ثواني وصارت توصلني مسجات وصور كله هي ودائب اباوع اله بالصورة ضحكته شكبرها وهو گبال الناس مغنتب اربعة وعشرين ساعة وحتى اكو صورة من الصور هم بوسط الثلچ وثنينهم يضحكون ووحده من الصور هي حاضنته من ورا والثانية ساند راسه على راسها
وصارت تكتب تفاصيل علاقتهم وتشرحلي كل صورة شلون اخذوها ووين جانوا طالعين ومسافرين بوكتها متت بدمي من القهر حتى عيوني شاط بيهن الدمع وصار ما ينزل حسيت الغصة صارت تبني جسور بصدري تمنع حتى الهوى يفوت اختنگت كلشش
ماتحملت اكثر من هيج انطيتها حظر واريد اسيطر على رجفة جسمي ماگدر بس ارجف واتنفس بكل قوتي واتعوذ من الشيطان مدري شصار بيه
سمعت الباب يندك وصوته يحچي
دائب: وتر گاعدة افتحي الباب اريد احچي وياج
ماصدكت اجيت والله جابگ كمت بسرعة فتحت الباب انتبه على رجفة جسمي وحالتي استغرب لزمني يحچي بخوف
دائب: حبيبي بيچ شي
دفعت اديناته مني هو عباله هاي حالتي لان صعد الغرفتي رجع جرني عليه حضني حيل يهمس
دائب: مشتاقلچ اوتاري انا ماگدر بدونچ ماگدر شلون بيه جرحتچ شلون هيچ سويت وياچ يارويحتي
دفعته حيل اهمس بحدة ماريد يطلع صوتي قبل شويه باتر ورميم لعبوا لعب وهسه احنا
وتر: دائب ماريد اشوف خلقتك گبالي ماريد اطلع برا
رجع سحبني اله يحچي بترجي
دائب: لا بابا بنيتي انتِ فدوه يروحلچ دائب ماگدر اعيش بدونچ ارجعي نوري دنياتي بضحكاتچ
وتر: تريدني ارجع مو خوشش خلي اشوفك
تملصت گوة من بين اديناته وركضت جبت تليفوني فتحت المحادثة مال ليلى خليتها بيده احچي
وتر: تگدر تفسرلي حضرة الدكتورة المصون مدام ليلى منين جابتتتتت رقممييي وباي حق تدزلي هاي قذارتكم وتشوفنياها وتگلي جان زوجي وجان يحبنيييي
بقى يگلب بالمحادثة مصدوم ويكز على اسنانة بغضب
دائب: هاي شجابها عليچ
وتر: والله ماعرف دشوفها اول كلمة گالتها اسألي الدائب
بلع ريگ بصعوبة وگال
دائب: يعني هو ماضي وكل انسان عنده وراح وانتهى
ابتسمت بحزن اتقربت عليه احچي
وتر: انا حبيتك ، صح عمري صغير بس انا فعلا حبيتك ممكن سويت شي غلط من قدمت نفسي الك بس مو بقصد وصخ اصلا ما جنت افتهم الموضوع عدل انا جان المفروض اطلع منك من اول يوم بس سالفة ماعندي اهل كسرت ظهري
سد على ايده حيل ضرب الحايط يحچي بعصبية
دائب: لااا تگولين ماعنديي اهلللل هاي الكلمة لا تنطقينها كدامي
وتر: هاي الحقيقة بس تدري ماتوقعتك هيج وين الي احبچ من انتِ وطفلة وين ان انت تبقى تنتظرني وين كلامك وانت اكثر شخص يخاف عليه ويحس بيه وينهههه
دائب: هذا انا گلي گبالچ وبس الج انت وبعدني گد كلامي احبچ واحتويچ واحس بيچ
ضحكت بأستهزاء
وتر: تحس بيه بيا طريقة ؟ بهذا الوقت الي جنت جاي تضحك انت وحبيبتك انا الي علساس تحس بيه جنت جاي انضرب واموت الف موته بيت حكيم بوقت هاي طلعات وحياة الـ vip العايشها انا جان حسرة علي الهدم وانت تكلي احس بيج واحبج وينه حبك
لزم اديه يحچي
دائب: والله احبچ والله عيوني ماتشوف غيرچ بس انت بعدچ صغيرة حاولي تفهمين موقفي
عطت بي
وتر: صغيرة بس مو معناها غبية صغيرة بس مو ثولة وين اكو واحد يحب وحدة يسافر ويا وحدة ثانية وما كافيك ان تحب وحدة ثانية انت جنت عاقد عليها اسم الله عليك تخاف تزني هنا صرت مؤمن هم تممت زواجك وبعدها تندمتتت موووو
دائب: وتر
خليت اصبعي على حلگي احچي
وتر: اشششش بعد هذا الي شفته تحلم تحلم ارجع وياك لو اعرف ازوج اخيس بشر بدنيا ولا ابقى يمك ثانية وحدة اكمل دراستي واروح اقسام داخلية واطلع ناقصة اذا بقيت هنا وامي حكمة راح تعذرني بعد ما تشوف وصاخة ابنها
دائب: بلا خباااللل
وتر: دائب اطلع برا وهااا قبل لا تطلع لا بالك زعلانة منك ومانتحاجه لا ابد غلطان راح اتعامل وياك وكأنك شخص عادي حالك حال الموجودين يمان وباتر
تنهدت بضيق مسحت دموعي ورجعت گلت
وتر: لا ما اجمعك بيهم لان انت اقرف واوصخ من انك تنجمع وياهم على الاقل باتر كتل نفسة على رميم وما باوع الغيرها برغم كلشي صار وسوته يمان لحد لان يباوع على طول خيال من تمشي وصارلهم سنين يخاف يكلها حجيها يغثها بيها انا انت هه انت بـ ابسط شي تروح الليلى تركض ، اذا انت هيج جان خليتني اتزوج غسان على الاقل حبني
اباوع عليه صفن عليه مايعرف شيحچي اتقربت كلش باوعت بعيونه همست
وتر: عيونك چذابات غشني اللمعة الچنت اشوفها بيهن هذا جان انعكاس لمعة عيوني لا اكثر
ضربت على صدري حيل احچي
وتر: بكل موقف عشته يمك احس بضياع بكل يوم يمر علي وانت بحياتي احس باليتم كل مرة تثبتلي الماعدها اهل ينداس عليها بس وعيوني وغلاتي لاتحسب انا من هذا نوع ادوس عليك وعلى گلبي ومايرف الي جفن بس الموضوع موضوع وقت ولا تحسبني ضعيفة انا مراية شما تكسرني اجرحك اكثر
رفع رأسه الي فوگ يمسح على رگبته الي برزت شرايينها وايده ترجف مايعرف شيجاوب رجعت گلت
وتر: وحتى اذا ما جرحتك راح تبقى من تباوعلي تشوف صورتك مشوهه بعيوني
باوعت اكو فوك الميز مثل الفازة بيها ورد شلتها ورگعتها بالكاع هو مثل الجفل فتح عيونه حيل
وتر: تحسب راح اكلك انا مثلها واذا نكرست ما تصلح مو ، لا انا مو من هذا نوع
شلت گزازة منها اتقدمت بتجاهه لزمت ايده وشخطتها حيل شخط طويل دمه صار يطلع صكيت على اسناني احچي
وتر: انا من انكسر اخلي بيك اثر عميق ما ينشال بسهولة
اخذت من الدم طلع من ايده وخليته على ايدي وگلتله
وتر: باوع انا من انكسر اتحنا بدم الكسرني
راد يلزمني هنا نهاريت وصرت اعيط
وتر: اطلععععع براااا دائب اطلعععع ماريد اشوفك
فتحت الباب وطلعته دفع دفع گوه يلا طلع وسديته اسمع حكمة صار صوتها عالي تحچي عليه ويمان هم صوته طالع وصارتلهم هوسه انفتح الباب ودخلن البنات اجتني خيال بسرعة حضنتني تحچي
خيال: انت زينة
وتر: لا لا والله تعبانه انا كلششش تعبااانة
خيال: خلص يعمري خلص ارتاحي رزلته الج حكمة بعد مايصعد هنا ارتاحي
رميم ماحچت شي بس لمت الكزاز وكنست الغرفة بعدها دخلت حكمة تطمن عليه وهم بقت تحجي وياي ومنومتني بحضنها الحدما غفيت
من بعدها مر كم يوم هو ماموجود بس يجي ينام وياكل ويطلع واصلا ماصار كلام بينا وهم حكمة مانعته يحچي وياي ابد ماتخلي يوصلني
جنت ادرس وصار عندي الم بظهري قوي خليت راسي على المكتب متملة كلت اكيد حتجي المحروسة الشهرية رحت جيكت ماكو شي
ورتبت وضعي على هذا الاساس اشو جم يوم وبديت احس بثكل وحرارة بجسمي مو طبيعية ماهتميت وكلت اكيد هرمونات بس الوضع زاد وبدأت اخاف اخذت تليفوني بحثت بالكوكل اعراضي وان الدورة الشهرية مجاي تنزل ماتوصلت الشي من بعدها كلها صارت تنتبه عليه انا شكد خاملة وهم عبالهم من موضوع دائب والمشكلة الصارت لهذا محد محسيني بشي
لحد ما فد يوم كاعدة ولعبت نفسي بسرعة طلعت من الغرفة دخلت للحمام وتقيأت وطلعت وجهي مخطوف وارجف من الخوف من تذكرت كلام رميم وخيال على موضوع الحمل بحثت اعراضي اعراض حمل وخفت اكول الاحد بقيت ساكتة وردت اشوف
وذكرت رميم عدها لان كالت الخيال اذا تردين اختبار حمل موجود عندي بالمجر بسرعة كمت ونزلت جوه شفت الكرار بيد حكمة اخذته كتلها اريد العب ويا شوي واخذته وصعدت الرميم بسرعة
دكيت الباب وسمحتلي بالدخول دخلت احچي
وتر: فحطت جيبلي ماي ابنج ثكيل
غمتني تحچي
رميم: كبر طفي عينچ راح تحسد الولد
ضحكت وهي هم طلعت تجيبلي مي اتذكرت من كالت بمجر الجرباية كبل فتحت المجر واريد اطلع الاختبار صار كبالي اعرفة شايفة مثله بالمسلسلات والتلفزيون بسرعة اخذته ضميته بالمخبأ السري
رجعت رميم انطتني مي بقيت گاعدة يمها شويه بعدها گمت وعفت ابنها يمها
والاختبار اخذته ورحت الغرفتي وشفت شلون يسوه
ركضت دخلت للحمام سويته وبقيت انتظر النتيجة وهنا احس العالم وكف بالنسبة الي حرفيًا وكف حتى النفس قطعته وصرت ماكدر اتنفس ....
يتبع...
𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵
بقلمي: زينب علي
ياترى باتر شضام من مصيبة شتگولون 💔 ؟
معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️
متابعة ممتعة🦋