#تاروت
البارت «44»
بقلمي: زينب علي
حلواتي لا تنسون التصويت+تعليق بين الفقرات ومتابعة الحساب zainab_ali1 ♥️
TikTok: zeinab_.ali1
Insta: zainab__.ali1
متغير علَي شفتك
فزيت برعب مخلوس
يا اجمل حلم بالروح
ما لايگلك الكابوس
𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵
وتر"
فتحت عيوني درتهن اباوع بالغرفة فزيت اول ما شفت نفسي نايمة بغرفته لكن سرعان ما تذكرت شنو صار البارحة بالليل رجعت خطيت نفسي گبيت نار من الخجل افكر عود الي صار حقيقة لو مجرد حلم
باوعت وراي على مكانه شفته ماكو مموجود غمضت عيوني استرجع الي صار البارحة
اول ما شفته طفه جگارته وگام بلعت العافية گلت انكتلت لا محاله درت وجهي اريد افلت للغرفة سرع خطواته وياي لزمني من ايدي جرني عليه حچيت بصوت مخنوگ
وتر: شنو تريد تضربني تعودت مثل كل مره تضرب لان تعرف مالي احد او مكان اروح له غير هنا
عبس وجهه مستغرب كلامي
دائب: اوتاري
ما خليته يحچي رجعت گلت اتصنع القوة
وتر: اقسم بذات الله اذا مديت ايدك عليه بعد وبنيتك تضربني اطلع من البيت واريد اشوف شلون تشوف وجهي بعد
جمدت فاتحه عيوني بصدمه من نصة عليه باسني بخدي حيل جعص خدي جعص ابتعد يحجي بصوت هادئ
دائب: منو يضربچ اكسر ايده
شلت ايده من رگبتي احچي بـ استهزاء
وتر: اسم الله عليك حنين كلش
سحبني من رگبتي بخفه رفعني اله الرجفة احتلتني وگلبي صار يدك مثل الطبل حتى صوتي ضاع همس
دائب: ليش ترجفين حياتي
وتر: انا نعست اريد انام
دائب: والمحرك الگلب وهفت من وراج تعوفينه
وتر: يعني شنو
دائب: هسه اشرحلچ تعاي وياي
نصه عليه شالني شهگت بخوف حاوطت رگبته احچي
وتر: انا جوعانة
باس خدي يمشي بيه وهمس
دائب: انا هم ميت من الجوع
دخلني للغرفة نزلني وسد الباب حركته زادت من دگات گلبي التفت عليه مبتسم يباوعلي بنظرات جريئة عيونه تلمع بحب اجه بتجاهي وزع قبلات رقيقة على وجهي وشفتي فتح شعري يهمس
دائب: صايرة تموتين اوتار گلبي ارحمي بحالي بكل وكت اباوع عليج بي انبهر وكل ماتكبرين تصيرين تاخذين العقل
جنت داخله بحالة صدمة ماعرف شسوي شلون اتخلص من هذا الوضع
ابتعدت اباوع عليه نزع التيشيرت مالته الساني انبلع ماگدرت انطق بحرف واحد رغم جان الجو بي برودة حسيت نفسي صرت وسط بركان من النار
اجه بتجاهي سحبني عليه اخذني بحضنه ايدي صارت على صدره العاري لا اراديًا صارت عندي قشعريرة من حسيت بعضلات بطنه برزت غمضت بخجل ردت ابتعد ماخلاني جرني عليه همس بأذني
دائب: وين ماكو تشردين اليوم بادليني
گلبي يدك مثل المجنون ونفسي يرجف صوتي من احچي يتلعثم گوه جمعت الحروف ونطقت كلمة
وتر: دائب فدوه خلي اطلع
دائب: اشش بادليني
سكتت وهو سحبني عليه وصار يتفنن مثل شخص جوعان سنين وشاف الاكل گدامه ياكل بكل شراها حتى ما اعار اهمية الرجفة جسمي بين اديناته غير من احتضنه همست بدموع يم أذنه
وتر: دائب جاي تخوفني
سحبني عليه شالني وهمس
دائب: احبچ بابا لا تخافين وانت بين اديه
حچيت بصوتي اليرجف
وتر: دائب
ماخلاني اكمل نزلني على الجرباية وصار فوگي
دائب: احبچ
بعدها اتقرب قبلني بكل احترافية وشغف حسيته راد ياكلني مو مجرد قبلة نساني بلحظتها انا منو ووين ماكان مني الا ان ابادله بمستوى شغفة واكثر
اطرافي خدرت گلبي تتسارع نبضاته يهمسلي بكلام يخليني افقد اخر ذرة اعصاب موجودة عندي
همساته الجريئة تخلي اقنعة البرود والا مبالاة تتساقط منه واحد تلو الآخر تحول تماما من شخص بارد الى بركان متحرك
كانت ليلة جنونية تضاهي حركاته المجنونه يتفوه بكلمات متناغمة مع صوت انفاسه الاهثة يعزف على اوتار قلبي لحن ينساب ويغلغل داخلي يلهب مشاعري يحتويني يحثني على المزيد من التقبل والجنون تبادلنا الحب ساعات وساعات
ختمت ليلتنا اخيرًا بقبلة عميقة وحضن حميم كله امان خالي من الخوف والترقب
غمضت عيوني فاقده عن الي حولي ماسمع غير همسته وهو يضرب على خدي بلطف
دائب: بيبي تسمعيني خرب بيومج شبيج فقدتي لا تخليني اتندم لان سويت هيچ
اتمدد يمي سحبني الصدرة رفعني من الفراش خلاني عليه يعدل بشعري ويبوس براسي يهمس
دائب: لا تخوفيني بيچ شي
حركت راسي برفض رجع همس
دائب: چا شبيج نعستي
هزيت راسي بـ ايّ بلا مااحچي
صعد الغطا علينا وعافني على وضعي ماحركني غطاني يهمس
دائب: نامي يحلي
غمضت عيوني على بوساته وكل شويه يهمس بكلمة احبچ
..
بعدت الغطا مني وگمت گلبي يدك بفراح من ارجع اتذكر كلمة احبچ ابتسم لا اراديًا طلعت من الغرفة اريد اشوفه وين مالگيته بالبيت دخلت للمطبخ هم مموجود گلت ممكن طلع يجيب شي او صار عنده شغل وما گعدني
رجعت اخذت ملابس ودخلت سبحت وطلعت صليت من بعدها رتبت نفسي وخليت مكياج خفيف سمعت صوت سيارته وكفت انتظرته يدخل للبيت ماكو مادخل طول وهو بره
جنت لابسه بدله حمره وبيها ورد ابيض ناعم كلش وهواي اللون الابيض طاغي على الاحمر خاليه من الاكمام بيها مثل الخيوط تنربط على الكتف
طلعت من الغرفة باوعت عليه من شباك الصالة شفته گاعد بالحديقة ماخليت شي عليه طلعت هيج لان الحديقة جانبية ومسيجه الي بداخلها ما يبين
فتحت الباب وطلعت شفته گاعد يدخن اتقربت عليه حضنته من ورا وهو گاعد
استغربت من اجيت يمه نتر ايدي حيل صدمني گام وگف وگال
دائب: وتر لاتتقربين يمي خلي بيني وبينچ مسافة
حچيت بنص صدمتي
وتر: دائب شبيك ؟!
نفخ حيل بعصبية يحچي
دائب: الي صار غلط واكبر غلط انتي طفلة وينچ وين هاي سوالف الي صار جريمة بحقچ جريمة انا وين چان عقلي من سويت بيچ هيچ
بقيت ثاغرة حلگي مصدومة
وتر: شنو الي جريمة وشنو مسافة انت تحبني وانا احبك ومتزوجين شي طبيعي ان نكون حالنا حال الاوادم
دائب: بس انا ما احبچ منو كال احبچ
وتر: شنو ماتحبني انت شجاي تحچي وكلامك مو بس البارحة كلامك من سنين وانت تردد احبچ
دائب: اي احبچ كـ طفلة ربيتها مو كـ حبيبة اتزوجها
وتر: والعقد ؟
لزم رأسه وگال بتعب
دائب: اذا على العقد لان ادري بيج تستحرمين سويته و عقدت عليچ
ماتحملت صحت بي حيل بحرگة
وتر: انت شبيك ساعة وياچ ساعة عليج ساعة حبيبي وساعة بنتي ساعة ابوچ ساعة زوجچ شتريد شجاي يصير وياك ارسي على بر
جنت احچي بعصبية اصيح واحس بدموعي تتطافر من عيني والقهرة واگفة ببلوعومي من القهر حنجرتي توسعت صارت تأذيني سكتت من شفته صفن عليه يباوع الي من فوك الي جوه وكأنه هسه يلا انتبه انا شلابسة
همس
دائب: طالعة تموتين كلش حلوه
گال الكلمة وسحبني من ايدي حضني حيل يرجف هدأت بس صوت نفسي عالي بعد وجهي من صدره وگال
دائب: كل مااگول بنتي تغريني بالشفة
قبلني مانطاني مجال للكلام غمضت عيوني ماحسيت الا دفعني حيل يمسح على وجهة شرايين رگبته برزت يحچي
دائب: خ*ا بالحظ الگـ *** وخري وخري خليچ بعيدة عني وتر خليچ بعيدة
عافني بنص ذهولي ودخل للبيت جرت الكرسي وگعد ظليت كاعدة بالحديقة وصافنة شبي شجاي يصير ويا ساعة احبچ واريدچ وساعة ماريدج وما احبچ !
بقيت شويه گاعدة على ما استوعبت گمت دخلت للبيت شفته مبدل ويريد يطلع وكاشخ على اخر حبه مالحگت احچي بسرعة تجاوزني طلع وسد الباب ورا
حسيت بغصة درت انظاري اباوع الاركان للبيت الفارغة واحس رجعتلي كل ذكرياتي وخنكتني العبرة
وحسيت نفسي رخيصة من خلال حچيه وحسيت بالضياع حتى لو اريد اعوفه وين اروح ، الاهله ! يبقون اهله ، وين اروح اروح الحكيم يبيعيني للاخس من دائب
رفعت راسي اهمس بدموع
وتر: ربي وين يروح الماعنده أحد
خليت ايدي على گلبي حسيت بضياع فضيع ردت مكان اشرد بي مكان مابي هما ولا طاريهم مكان مابي لا دائب ولا حكيم ولا اي أحد
مكان بي اهل بي عائله بي بيت دافي حضن ام طبطب واخت اسولف الها الي احس بي ، اب حنون واخ سند بس ماعشت ولا راح اعيش بمثل هيج مكان
وهسه كرامتي الي نسحكت بشنو اعوضها اطب بغرفة بيته اقفل على نفسي باب بغرفة هم يبقى بيته ! يعني حتى اذا حبست نفسي بغرفة راح واكل من نفس اكله واشتم نفس الهوى وماتغير شي
گعدت على التخم وبقيت ابچي بعبرة وخنگة مر وكت طويل حسيت تليفوني جاي يدك رحت اخذته من الغرفة رحت شفتها رميم
ما جاوبت لان مجان الي طاقه احجي ويعني شكد ماتكون لبنية لطيفة وحنينة تبقى مرت اخو وحتى اذا ردت افضفض من كثر الكتمان العشته صرت ماعرف شلون اشارك حزني ويا احد
وبقيت صافنه بفراغ وين اروح رجعت اخذت تليفوني بحثت بالنت ان البنات الي ماعدهم اهل وين يروحون وشلون يعيشون شفت اكو حلول وخيارات هواي بالنسبة الي كلها صعبة اشبهه بالمستحيلة
شمرت التليفون كلت اروح الكربلاء فكرت ان اروح للامام هناك بالكت الكه شغل بس شلون اطلع وشلون اروح ومنو كال يقبلون اشتغل ؟
وظليت صفنه توديني وصفنه تجيبني وماوصلتت النقطه حل
مسحت دموعي گمت بدلت ملابسي ولبست حجابي اريد اطلع من البيت واروح المكان اشتم هواء وارجع وماردت احد يعرف لان گلت شغله نص ساعه ارتاح وارجع
كتبت بورقه ان رحت اشتم هوى شوي وارجع وخليتها على السرير
طلعت وبديت امشي امشي وابچي بلا وعي تعديت المنطقة الساكنين بيها كلها رغم مسافة بعيدة وصلت على شارع عام وبديت اشوف العالم وناس شلون عايشة وكل وجهه بي قصة وكل ضحكة وراها سر بقيت امشي بين الناس بعدها ادركت انا كلش بعدت عن البيت والمنطقة وحتى يمكن يحتاجلي سيارة اجره حتى ارجع بس ماهتميت رجعت من الطريق الي اجيت بي وانا على نفس الدمعة كل ماتنزل امسحها
لحد ما حسيت الا وانا قريبة على للبيت صار يبين وسبارته موجودة يعني راجع باوعت من حولي الشمس صارت عمودية عيني دنيا الظهر وحتى الجامع صار يمجد
وصلت قريب على البيت كلش للباب ماحسيت غير الا ابو دراجة كسر علي وطيحني ونذب ظرف بحضني وشخط دراجتة وراح بسرعة
صدمة ذهول قلق رعب رجفة ماعرف شنو صار كل الصار مايعدى الثواني معدودة وانا على گعدتي فتحت الظرف ايدي ترجف نصدمت من المكتوب
" وجبة المخدرات غصبًا عليكم تتمرر من الرصيف والاسلحة هم واذا رفضت اقرأ السلام على بيتك والي بي "
لطمت على خدي احچي
وتر: يعني شنو دائب يشتغل بالمخدرات مستحيل لا مستحيل انا شسويت بروحي شلعبت بنفسي
نفضت روحي من التراب وگمت ادخل للبيت اسحل بنفسي بتعب طلعت المفتاح من جنطتي وفتحت الباب اول ما دخلت شفته واگف گبالي وصاير نار مشنط عيونه يباوع عليه بخزرة وانا الرعب بگلبي ماتحركت بيقت بمكاني
اجه بتجاهي صاح عليه يزمجر بصوته المزعج
دائب: انت تبقين ثوله وطايشه وماتعرفين تصرفين شلون طلعين وحدچ بالله تصخمتي برا شلوونن هيجج تسسووييننن شتعرفين انت وتطلعين وحدچ
صاحها بوجهي ماتحملت فقدت وانا منا بالعة هوا ومهضومة وخايفة من السالفة مال الظرف وهو يصيح رفعت ايدي وضربته حيل فتح حلگه مصدوم صحت بي
وتر: نفس ماريد اسمعلك بعد فهمت تريد تتكسح تحب وتزوج الله ومحمد وعلي وياك انا هنا خطار يومين ومليه رايحه
عبرت منه رجعت باوعتله وكملت
وتر: اصبر عليه واشوفك طفلة شسوي وقذارة شغلك عرفتها انا الي تندمت سلمت نفسي الواحد مجرم مثلك
شمرت عليه الظرف هو مازال مصدوم من ردة فعلي والي سويته دخلت للغرفة ركض ابچي واشهگت نزعت الجنطة وطلعت منها تليفوني وراسلت رميم كتبتلها
وتر: " فعلا هذول اسمهم الرهبان ومجرمين ! "
ثواني وشافتها رجعت دزتلي
رميم: " وتر منين عرفتي هيج شي اصلا شلون دائب يگلچ بهذا الموضوع "
وتر: " مو مهم شلون عرفت المهم تصخمت على وجهي وصخمت نفسي ويا وبعدين عرفت ان هو مجرم رميم روحي جاي تطلع راح اموت "
ماجاوبت بسرعة رجعت اتصلت بيه فتحت عليها خط احچي وابچي
وتر: رميم مجاي اتحمل كلشي بالبيت يخنگني مجاي اطيق اشوف وجهه ىميم هاني وهان مشاعري دائب داس عليه نهاني نهانيييي
رميم: اهدي وتر اهدي فدوه وافهميني شجاي يصير
هديت روحي وسولفتلها الحكاية بما انزلت كلها ..
..
رميم..
حاولت اهديها على قدر المستطاع البنت جانت فاقدة من البچي غلقته من عدها جنت گاعدة بالمطبخ خيال بغرفتها تصلي وحكمة هم بغرفتها يمها الجهال صعدت ركض الغرفتي شفت باتر گاعد على الحاسبة ماعرف شيسوي يشتعل سديت الباب وحچيت بنتر
رميم: گوم باتر وكتها هسه گاعد كوومم
بسرعة رفع راسه باوعلي استغرب لان حجيت ويا وانا صار كم يوم متجاهلته ومانحجي ويا بعض سد الحاسبة يحچي
باتر: خير ياطير اجتنا المصايب شبيج جنچ وحده معسرة ولادتها
رميم: مو وكتك هسه هذا اخوك ماعرف شمسوي بالبنت راح تنط من البچي البنت راح تروح من ادينا لازم نتدخل
فز يحچي
باتر: منو دائب
رميم: ليش اكو غيره هسه اتصلت بيه وتر وتصيح راح اموت وراح اموت مدري شمسويلها وهم عرفت بشغله شلون هسه شنسوي
سحب تيشيرته من الجرباية وگال
باتر: مايحتاجلها روحه للقاضي بس امي تحلها
رميم: لا شلون خاف دائب يزعل
باتر: خليها وراي امشي ننزل
عافني وطلع من الغرفة طلعت ورا متوترة وخايفة من ردة فعل حكمة نزل يركض طلعت خيال من غرفتها تسأل
خيال: شكو
رميم: يمان وين؟
خيال: جوه نايم گال تعبان شجاي يصير
سولفتلها مختصر واحنا ننزل رايحين الغرفة حكمة بعدنا يم الباب وسمعنا صيحتها باوعتلي خيال وگالت
خيال: الله اليستر بس
فتحت الباب ودخلت اسمعها تصيح عليه
حكمة: وانا اخر من يعلم ماتجوني قبل المصيبة لا تخلون الفاس يوگع بالراس يلااا تجوون
راحتلها خيال تحچي
خيال: اهدي خاله خلي نعرف السالفة
عضت على اصبعها بقهر
حكمة: ولكم يايابه يابويه هالشلايتيه ذول ما يطلع منهم بس شلعان الگلب والمصايب
باتر: يمه انا گلتله يجيبها يمج بس هو ماقبل يگول بس اخذها يم امي هسه تجرنا نتزوج وهو مامستعد الهاي الخطوة
اتقدمت فتحت كنتورها تلبس بجواريبها وتحجي
حكمة: طبعًا ما مستعد غير ملتهي بگـ*** وين يريد الزواج بعد
لبست عبايتها وگالت
حكمة: امشيييي اخذني اله
باتر: يلا يمه امشينا
باوعتله بخزرة ادري بي خبيث مكيف لان خبث على دائب رجعت حكمة وجهت الكلام الي
حكمة: بدلي وامشي وياي ماعرف البنت شبيها مابيها كلشي يصير
رميم: والجهال
خيال: مو مشكلة انا يمهم دام يمان بالبيت روحي خاف وتر تحتاجج
هزيت راسي بالموافقة وصعدت ركض بدلت شلون مجان وكتبتلها جايينچ بالطريق ونزلت رحنا البيت دائب حكمة صايرة نار تتحلطم ودردم عليه وباتر ما قصر يجيب حطب ويذب على النار كل شويه اگرصة حتى يسكت وهي تصيح بيه
حكمة: خلييي خلي يحچي لا تسكتينه لان يگول الحگ ماتردونه يحچي
باتر: اي والله يمه شفتي شلون انا مظلوم محد يقبل احچي
حكمة: انچب وسوق وانت ساكت لا تسوي روحك نبي انت هم مشترك ويا وكلكم مشتركين ويا انا اعلمكم اصبرولي
هز ايده يحچي
باتر: عيش ببخت موت ببخت مكرود يالمالك بخت
بقوا يتداهرون الحدما وصلنا روحي فرفحت بس اريد ادخل واشوف وتر شبيها
دگينا الباب شويه وفتحه انصدم بينا من شافنا كلنا متكومين بالباب گال متفاجأ
دائب: يمه
دفعته ودخلت تحچي
حكمة: وغمة حتى غمة وين البت طلعها
عاف حكمة اتقدم على باتر صاح بي
دائب: اكيددد هاي سوالفك انت الجبت اميي مووو
رفع اديناته بحركة استسلام
باتر: وانا شلي غرض مرتك اتصلت تبجي وتفرفح تگول الحگولي وهاي ام الاكبر شاهدة
رميم: صح دائب وتر اتصلت ميته بچي وسولفتلي الي صار الصراحة الموضوع ما ينسكت عليه انا جبت حكمة واجيت
بعده ماحاجي صاحت بي حكمة
حكمة: تگله طلعها هسه لا اطلع روحك بيدي ولك وين الفرخهه دووييببب الو المصايبب
دائب: يمه خلي احچيلج
حكمة: صوت ماريد اسمع نفس زايد ماتحچي تطلع البت لو اگلب البيت على راسك
تنهد بتعب وقلة حيله اشر بيده على باب غرفة بسرعة رحت عليها وحكمة وراي دگيت الباب اجاني صوتها تصيح
وتر: روح منا ماريد اشوف وجهك
رميم: افتحي الباب وتر انا رميم لا تخافين
بسرعة فتحت الباب شفتها الوجه مطعون احمر وميته من البچي شمرت نفسها بحضني تشهك وتحچي
وتر: رميم رميم راح اموت ماعندي احد غيركم طلعوني منا
رميم: اشش خلص اهدي هسه ناخذچ ونطلع
اتقربت منها حكمة طبطبت على ظهرها تحچي
حكمة: خلينا ندخل جوه نفهم السالفة بالاول
دخلنا للغرفة وانا حاضنتها سدت حكمة الباب وگالت
حكمة: سولفيلي وحگچ ماراح يضيع يمي
گعدت وبدأت تسولف الحكمة كل شي من اول يوم جابها هنا الحد اليوم وحكمة تاكل بروحها وتتحلف الدائب
اخر شي مسحت دموعها وگالت بصوت يرجف
وتر: تعبت الله يخليج خليني اطلع منا بعد ماكدر اتحمل اكثر
كامت حكمة وضربت على الحايط حيل صدمتني بكلامها ماتوقعت هيج راح يصير وخاصة من گالت
حكمة: انعلچ ابو دائب من اليوم اعتبريني متبرية منه وانعل امه فوك ابو ابن الچلاب لا هو ابني ولا اعرفه من اليوم
رجعت حضنت وتر وكملت كلامها
حكمة: أنتِ من اليوم بنتي ويشهد علي الله ان ماخلي احد يمسچ بحچاية طول ما راسي يشم الهوى ولا تنهضمين ولا تبچين طول ما انا بظهرچ ، ولاتكولين ماعندي احد انا امچ ويمان وباتر خوانچ ويكسرون ظهر الي يتقرب منچ والبنات بعد هن خواتچ وانتِ جربتي صحبتهن وتعرفينهن زين
رميم: حكوم خلي نطلعها منا راح تموت
حكمة: اي لمي غراضها وخلي نطلع
گمت وياها خلينا بالجنطة الي نگدر عليه ولبستها حجابها وطلعت وياها
حكمة: انتم اخذوها كدامي للسيارة وانا هسه اجي وراكم
اخذناها انا وباتر للسيارة صعدتها وباتر بقى يمها وانا ورجعت اريد اجيب جنطة ملابسها بعدني بالباب وماشفت غير حكمة صكت دائب براشدي يمكن سطرته سطر
وحچت ويا بحرگة
حكمة: وسفة ويا حيف رباي بيك تالي تطلع رجولتك على طفلة كل يوم تثبتولي انا ماعرفت اربي ولا واحد بيكم ولا چلب بيكم عرفت اربي مثل الاوادم
لزم ايدها باسها وگال
دائب: ميخالف امي وتاج راسي تمونين عليه بس خليني افهمچ
حكمة: ماريد اسمعلك نفس افتهمت طول ما انا حكمة عايشة وراسي يشم الهوى اكسر ظهرك لو تقربت يمها بعد
عضت على اصبعها تحچي
حكمة: خايب طم روحك بنية يتيمة تنهضم منك جان خفت الله بيها جان خفت من حوبتها الراح تكسر ظهرك وظهر الخلفوك
حاول يحچي وياها ماقبلت تسمعه عافته وطلعت وانا دخلت ركض اخذت الجنطة وطلعت وراها صعدنا بالسيارة اخذت وتر الحضني ومشينا باوعت وراي شفته واكف بالباب يباوع النا حسيت بي مثل البركان الخامد يريد ينفجر
اول ما رجعنا للبيت لگينا يمان وخيال منتظرينا فتحتلنا خيال الباب ويمان وراها يحچي
يمان: يمه خير شكو
نزعت عبايتها تحچي
حكمة: هو من وراكم يجي خير يالشلايتيه ، رميم گعدي البت وانطيها ماي فرفح گلبها المايخاف من الله گلبي ماينطيني ادعي عليه
گعدت وتر ورحت جبتلها مي گوه اخذته من ايدي بأيدها الترجف شربت شويه
بقى يمان يستفسر من حكمة وهي تحچيله ان تمم زواجه وتندم وهيج انوب اريد اسكتها ماكو ووتر رادت تختفي من الخجل كلشي ماتكدر تحچي بس ضامه راسها بحضني وتزيد بالبچي
بقوا ساكتين شويه يمان مصدوم مامصدك دائب هيج يسوي گال
يمان: يمه متأكدة مامعقولة دائب يسويها
حكمة: لا الفرخة تتبلى على اخوكم الشلايتي السربتي ابو الفوصات ولو ليش اتسغرب كلكم نفس الصنف
هز ايده محتار وبقوا ساكتين اتقربت منها خيال گعدت بصفها حضنتها ووتر زادت بالبچي بعدتها شويه محتضنه وجها تحچي وياها بتفهم
خيال: انتِ اختي من اليوم حالچ حال رميم ومستحيل بيوم تتأذين او تنجرحين بعد
گالت الكلام ورجعت حضنتها قرفص يمان گبالها يحچي
يمان: وانا عتبريني ابوچ وانتِ بعدج عنونه واكسرلچ ظهره الي يغثچ بحچاية وحدة من اليوم
باتر: يابه وانا هم اخوچ الطيف الحلو الي معذب قلوب البنات منقذچ الساحر
حاولت الطف الجو وحچيت
رميم: اهووو ولا يستقر تشارلي شابلن
باتر: انتِ معليچ الحية ماتگدرين الا تطلعين سمچ علينا
باوعتله بغرور بطرف عيني عض على شفته ورجع باوع الوتر يحچي
باتر: حتى ولدي اعتبريهم الج عربون صداقة بينا بعد شتردين
ابتسمت بتعب وهزت راسها بقبول بقوا يشاقون وياها ويحاولن يضحوها وينسوها ماقبلت تتغده اخذتها انا وخيال صعدناها فوك فتحنالها وحده من الغرف بسرعة بسرعة جهزتها الها فراشات وشراشف لان جانت جاهزة وحكمة حاسبة بيها حساب دائب
ماعفتها الوحدها بقت تحچيلي وانا اسمع الحدما نامت من تعب البچي حسيتها طلعت كلشي بداخلها
من بعدها مرت الايام ماتغير شي غير نور بيتنا بفرد جديد وتر الحلوه اضافتله نور ودفو بتواجدها بينا الكل اهتم بيها الكل حرفيا باتر يطب ويطلع يسأل عليها يمان يسولف اغلب الوكت وياها خيال گذالك ماعفاتها ولا لحظة وحكمة وانا كلنا حاولنا على قدر المستطاع نحتويها دائب كم مره اجه حكمة ولا خلته يوصلها ابد
وحتى يمان راح جاب مستمسكاتها من بيت دائب ومشى بإجراءات نقلها من مدرستها القديمة الجانت يم بيت حكيم المدرسة جديدة وهي ماقبلت كالت ان سادس والمدارس راح يصير شهر بادية ماتلحگ كوه قنعها گللها سوي الي تگدرين عليه واذا عدتي السنه فدوه الج ...
وهكذا انا وباتر على وضعنا وبعدني شاكة اكو شي بس ساكته انا عرف شوكت يجي دورها واحچي
❛❛❛❛
خيال"
عفت وتر ورميم وزينة گاعدات يم حكمة تسبح الجهال بنص الغرفة وصعدت الغرفتي يمان هستوه راجع من برا
اول ما دخلت للغرفة صار بوجهي طالع من الحمام لاف المنشفة عليه غمزلي يحچي
يمان: ها گلب اليوم ماكو لا بوسة لا گرصة
ابتسمت اتقربت منه بسته من حلگه بوسة سطحية اخذت نفس قوي گال
يمان: افيش نسيت تعبي كله
رحت للكنتور طلعتله ملابس احچي
خيال: ليش طلعتوا مستعجلين شصار
يمان: هسه احچيلچ
لبس ومشط شعره تمدد على الجرباية واشرلي اتقرب يمه طلع جگارة ورثها وخلا الحاسبة كباله يشتغل بيها ويحچي
يمان..
اليوم من چنا گاعدين على الغدا اجاني اتصال من رقم غريب بلغني ان هسه نزلت بضاعة بوحده من المخازن التابعة النا وهاي البضائع كلها ممنوعات وأسلحة وغيرها
طلعت بسرعة مستعجل وخليت باتر يطلع وراي حتى ماتحسون بشي وبالطريق اتصلنا على دائب لحگنا لهناك
نزلت من السيارة شفتهم اثنينهم ينتظروني گال دائب منزعج
دائب: هسه جايبنا من كل عقلك تنزل حاويات مخازنا بلا ما نعرف بيهن
يمان: هسه ندخل ونشوف
باتر: واذا طلع ماكو شي
يمان: ماخسرنا شي منين متعاجزين
عفتهم ودخلت للمستودع لگيته متروس حاويات باوعتلهم ثنينهم داخلين بحالة صدمة
يمان: ما شاء الله الحصاد وافر اليوم وتگولون ماكو شي
دائب: شني القضية قبل يومين انا چنت هنا المستودع فارغ
يمان: اليوم نزلن خلي نشوف محتوباتهن بلا
اتقدم باتر بسرعة فتح وحده من الحاويات نزل منها كارتونه طلع سچين من جيبه وصار يشگ بيها اول ما فتحها طلعت كلها مخدرات ومو بس هيج مخدرات وادوية ممنوعة دوليًا واسلحة هم
باتر: مستحيل من شوكت احنا نشتغل بهاي السوالف
دائب: اكو لعبة
عفتهم وطلعت برا اصيح على الحراس اجاني واحد يركض صحت بي
يمان: هااييي الضاعة شوكت نازلة وانتم وين جنتوا
- استاذ يمان مادري احنا من اجينا لگيناها موجودة
باتر: خلي نرجع الكاميرات المراقبة اكيد مسجلة كلشي
دخل يركض الغرفة التحكم واحنا وراه وطبيعي يصير المتوقع
دائب: الكاميرات متوقفة الساعة بـ 5 الفجر ورجعت مشتغلة الساعة بـ 8 الصبح
طلعت تليفوني اصيح وانا اصيح بيهم
يمان: اغبياء قسم اغبييااااء
اتصلت على فرات عسى ولعل يعرف خيط من السالفة اول ما فتح خط صحت بي
يمان: فرات شلون هيج بضائع نازلة بالرصيف وانت ماكلتلي ولا حاجي وياي
فرات: بس على كيفك يا بضائع نازله ووين
يمان: مخدرات وادوية ممنوعة كلها هسه بالمخزن مالتي وين جنت هاي الفترة كلها والرصيف صاير سفردحي ياهو اليجي يعبر منه لا واكو اوراق موقعة منو موقع صمد الگـ*** طلع من جهنم وقع عليهن
فرات: على شنو تصيح عليه انا شعلي مو من البداية گتلك الزم المعارض ومحلات الذهب هذا الخـ*ا شغلك ما اشوفه ورغم هذا كله ايمن جان يكلي كلشي اول باول وان بضاعة اليوم نزلت وبضاعة طلعت وكلشي زائد كاميرات المراقبة كلها يمه
يمان: ايمن منو وهسه وين
فرات: اندري غير وياكم صارله فوگ الست اشهر
صحت بي
يمان: شنو ويانه فرات شجاي تحجي اول مرة اعرف اكو واحد يشتغل ويانا اسمه ايمن
انتبهت على دائب گال
دائب: اعرف واحد اسمه ايمن اجه نقل مالته قبل سنه وكسور هنا وهو لزم الامنيه مال الميناء
يمان: اي وينه خر*ان وينه
فرات: من نزلت اول بضاعه مخدرات قبل 6 اشهر انا خابرت دائب وكلتله هيج وهيج السالفة حتى دائب بنفسه نطيته رقم ايمن وراها بعد ما حجه وياي توقعت ان تواصله صار وياكم هو اخر مره حچه وياي قبل 6 اشهر بالضبط
وجهت كلامي الدائب
يمان: حضرة العاشق وينه ايمن حچة وياك اتصلت بي؟
دائب: لا الرقم الدزه فرات دولي واتصلت عليه طلعلي واحد يرطن انگليزي
ضربت على گصتي حيل اصيح عليهم
يمان: حمييير اقسم بالله حمير ماتصيرلكم چارة وانت ستاذ باتر الكاميرات يمك ورمزها يمك وما مفتوحة بس بلابتوبك الكامرات جاي تنطفي وتشتغل وما مربوطة غير بجهاز الابتوب الي موجود بصخام وجوهكم بالمكتب ، وينها الحاسبة مالتك طلعهااا
راح بسرعة جاب الحاسبة واجه فتحها يدور بيها مسح على وجه بحيرة وگال
باتر: السجلات محذوفة ومسويلها اعادة ومحذوفة يعني مستحيل ترجع بعد مستحيل والتحكم صاير من الابتوب نفسه مو من جهاز ثاني
دائب عافنا وطلع يتحقق من الامنية بقوا واحد يذبها على واحد وضاع الحابل بالنابل
دخلت للمستودع رجعت اتصلت بفرات
يمان: فرات خمس دقايق الگاك مزروع يمي انت وشكو شي قانوني بالعراق
غلقته وگلت الباتر
يمان: تروح تجيبلي كادر امني جديد وتجي هسه هذول كلهم ماريدهم
دائب: اروح ويا
يمان: لا دائب انت تروح تجيب كامرات تليفونات لابتوبات جدد وتجيبلي ابو كاميرات ينصبهن اريد بحيث حتى النملة مانعرف مكانها من تمشي بالمستودع يلا ولدييي بسرعة هواي تهاونه بالشغل انتم روحوا وانا اشوف قضية ايمن وين راح واتخلص من هاي البضائع قبل لا تجيبلنا مصيبة
هم طلعوا وانا رجعت ادور ورا هذا الاسمه ايمن كلشي مالگيت مختفي واي اثر ما اله غير عنوان بمنطقه ريفيه ورقم دولي وهاي هي
رجعت گعدت بالمكتب خليت اديه وتچيت راسي عليهن افكر دخل فرات وويا ارواق هواي
سلمت عليه بعدها صار يشرحلي شنو صار بفترة غيابي شوفني شلون صاير اختلاس اموال من المعارض وسيارات طالعه وطابه وخساير بالهبل
يمان: فرات شغل المعارض انت تلزمها ترتب من يمك وتعوضلي هذا كله ماكدر اعوف هذا شغل واركز بهذا ماوصيك بعد
فرات: من البداية اگلك تعال شوف شغلك كز بي انت ماتقبل
يمان: ولك جم ايد عندي الف هن ثنين ماجاي الحگ بيهن هسه ماوصيك بعد اخيك عتبر نفسك موظف وهذا شغلك حتى فلوس ادفعلك او انت اخذ شكد ما تريد
ضربني حيل يحجي
فرات: نچب انت اخوي وشغلك هو شغلي واذا اريد فلوس اخذ مااخاف منك
بعدها بقينا گاعدين شويه نرتب بالاوراق خلصنا وفهمته شغله وشنو لازم يسوي دخل دائب جايب الكاميرات والحاسبات
وراها اجه باتر وجايب جهاز امني كلتله روح كمل اجراءات كلشي وتعال
وانا ودائب بدينا نشد الكامرات وشكو شي قديم يتعطل وينذب ورجع باتر ربط الكاميرات على لابتوبه
جاي نشتغل گال فرات مستهزأ
فرات: مو تحطون رمز ام الاكبر مرتي سر سعادتي لو بنيتي وانت الثاني تحط مواليد خليل كلبي ترا جاي تتعاملون ويا مجرمين ما جاي تسون اسماء على الفيسبوك
باتر: ولا يگعد فروتي الهكري
خلصنا كلشي بعدها بدينا نحمل بالحاويات بالف ياعلي يلا گدرنا نطلعهن ونتلفهن شي حرگنا وشي تلفنا بصعوبة يلا تخلصنا من كل البضائع
خيال: معقولة كل هذا صار وياكم وهسه شنو راح تسوون
يمان: شنسوي بعد راح نشتغل على التخلص من هاي المعمعه كلها ونرتاح بس اكيد قبلها لازم نتخلص من جم راس كبار
اتقربت يمه
خيال: يمان الموضوع خطر
يمان: شنسوي دخلنا بهذا الدرب ومشينا برضاتنا لازم نطلع منه ولابد من التضحية ماريد اگول الله ويانا لان اعرف احنا مانستاهل بس ادعي كلشي يتصلح وكلشي يعدي على خير
ماعرفت شجاوب بس حضنته حيل دخلني الحضنه ياخذ نفس من شعري يهمس
يمان: اشتاگتيتلچ
خيال: صير حباب اشو انت صاير فد مره ليل ونهار
يمان: عمي اريد حقوقي شلون هسه
خيال: احنا بيا حال هسه
ردت أكوم منه ما حسيت غير جرني من ايدي طحت عليه اضحك
خيال: يمان خلصصص
يمان: دتعاي تعاي اگلج موضوع مهم واسولفلچ زوجچ البطل شسوه بالبضائع
ابتسمت نزل راسه عليه قبلني بحب بس غمضت عيوني سمعت صوت باتر يدك بالباب ويصيح
باتر: يماااننننن يماااننن وينكككك اطلع بسرعة
بعدني منه بخوف وكام للباب .....
يتبع...
𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵
بقلمي: زينب علي
شنو رأيكم بالقصة والاحداث
شنو التضحية الي راح يقدموها الرهبان ياترى 🌚💔 ؟
معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️
TikTok: zeinab_.ali1
Insta: zainab__.ali1
متابعة ممتعة🦋