يمه كلبي مثل جلد الضبع
وطابعه وما ينطبع
وريد ابچي ويعرضلي الربع
#انياط الانتقام
#الكاتبة من البصاروه
..
اجه جرجس لزمني يهدي بيه ويحجي وياي بس جنت فاصله وعيني بعينه
راحت انظاري ع الي بصفه بنيه بداية العشرين لازمه بأيده ولازم بأيدها طفل تقريب 3سنين
فهمت الموضوع واستوعبته بس غالطت نفسي وبقيت متصنمه صارو يحضون بس من واحد لواحد والعتاب والنحيب وهي تجلب بتشيرته خايفه والغريب امه طبيعي يعني تعرف بوجوده قبل هل يووم
راح جرجس حضنه وسلم عليه
جرجس:-الحمدلله ع السلامه
احمد:-الله يسلمك عضيد
باوعتلهم بطرف عيني جان كاعد وعيونه بيهم لهفه يريد يشمر نفسه عليه بس لازم نفسه
لُباب:-ولك يوم وين جنت مو كطعت كلوبنه عليك صار ست سنين هاي البنيه بقت لاطايله سما ولاكاع
ومنو هل بنيه الي وياك تره كلبي طلع من حلكي
وكفت ع حيلي كبالهم هو البنيه والطفل اشرت عليهم
ليار:-مرته وابنه ذول محاجه تفسير لكل الموضوع
احمد:-ليار اكعدي خلي نتفاهم
:-ميحتاج
جرجس جرني كعدني واشرلي اش اهدي
احمد:-اني تأسرت وي لجيش الي وي داعش لان فشلت مهمتنا بقيت من 2014لحد نص سنة 2016
لمن بدو يحررون الموصل مرح احجي لو اسولف عن الي شفته بالمعتقل بس جان كفيل بأن افقد جزء من عقلي وحياتي نجوم الليل بعز لظهر والاخبار توصل الكم من بعد مطلعت التقيت بعائله موصليه ازيدين جانت بنيه ومرآه المره مواته وصتني ع بنتها والي هي ناز مرتي وهذا ابني علي بعدها بقيت بيتهم على متشافه جروحي بقيت اسابيع افقد وعي وارجع اصحه. ايدي جانت مأثره بيها ضربه قويه وجانت تحتاج عمليه لحد مأخذت مده طويله يلا تشافيت اكيد مو تماماً كمت ع رجليه وبوقتها دزيت خبر لأهلي انو اني عايش بس حذرتهم يكولون لأحد ،،، العوائل كامو يرجعون لديارهم ام ناز توفت... امها وصتني بيها خوفاً عليها من اهل ابوها مؤذين اتزوجتها
..بعدها حملت بأبني علاوي ....طلعت جناسي ضياع مال ناز....عقدنا محكمه.... رحت لامريكا بوقت انتو توكم راجعين سويت عملية لأيدي
امس رجعت للعراق وهاي يمكم اني
جان كلبي ينطحن طحن ويتفتت بكل كلمه يكولها
البنيه تجبي امه تبجي كلها مصدومه بكلامه جرجس جان ساكت ويسوع كذلك اريد شخص يحجي ماكو
لُباب:-الحمدلله ع سلامتك ونورت ديارك بيبي ربي يعوضك بخسارتك
احمد:-اني جاي اريد مرتي
ضحكت باستهئزاء هو باوعلي متوتر
يسوع:- مبروك ابو علاوي شايف الخير بما انو اجيت وانتَ بصحه وسلامه انتَ عندك مره وطفل فأختي جانت مضيعه حياتها لانك مموجود وهسه انتَ اجيت فخلي نباشر باوراق الطلاك مثل مدخلنه بالمعروف نطلع بالمعروف
عاط بيه وطفر
احمد:-شتحجيي انتَ يسوعع شطلك اكلك رايد مرتي اني شطلك منها تره روحي خلصانه من الدنيا
جرجس:-تعذرنا ابو النسب مالك مره يمنه صارلك ست سنين غايب هسه تذكرتها
_get up liar
كمت ويا وجسمي كله يرجف جانو اخواني مخشنين كلش واني احس بشخبطه ع كلبي وعقلي
احمد:-لياررر لاتعوفيني لاتسوين هيجج محتاجج
ليار:-اي صحيح عزيزي مرتك وابنك بصفك التفت الهم واني التفت الحياتي كلمن بطريقه
ام احمد:-يمه ليوره حبيبتي كولي يا الله احنه نحبج وانتِ الاصل لو الف وحده متجي شبر منج وهو مجبور يتزوجها مالها احد بهل دنيا
لخاطر عشرتكم كعدو سوه تفاهمو وميصير خاطرج الا طيب
:-خاله اني احبج واحترمج بس السويتو وياي عمره مارح يتصلح ومابي اي تفاهم ابنج مخله لنفسه قيمه
وهو بنفسه باع العشره وانتِ ياخاله جان خفتي الله بناتج وانتِ مسلمه يعني كبال عينج
جنت اسكن لمستشفيات وصار سنين لاليلي ليل ولانهاري نهار تاليها طلعون تعرفون بي عايش وخاليني معلكه هيج انسان ماريده بحياتي
احمد:-ليارر خلينهه نتفاهم والقران مو بأيدي مجبور والله بكد عذابج وشوغاتج اني متعذب اكثر ولاليله نمتها مرتاح لانج بعيده عني
عفتهم وطلعت بره وامي وملك واخواني ويانه صعدت بسياره كمت ابجي بخنكه
جرجس:-لاتسوين بنفسج هيج مثل مصبرتي كل هل السنين بدونه كملي حياتج بدونه
امي تمسح ع راسي وحاضنتي واني ابجي بشهكه مالحكت افرح بجيته طعني بسجين وسط كلبي
يسوع:-شلون عذر مجبور اي ويعني مجبور ليش متقبل يكولون النه خبر دنعل ابو الي انطاك مرا هذا اني وهذا انتو يحلم اخلي ترجع اله
ميلا:-يسوعع كافي شنو هل غلط عيب عليك صاير همجي كلش وبس تغلط
سكت واني بحضن امي نار تعسر بداخلي
وصلت للبيت شفت بابا اعتقد جرجس حجاله شمرت روحي بحضنه اني مو طبيعتي اظهر حزني لو ابجي ابداً مو من هل نوع وهل شي كلش غلط اكبت بداخلي
عيسى:- حبيبي بابا كوني مؤمنه باختبار رب العالمين ولاتنهزين من اول اختبار تذكري اني وراج وانتِ عزيزة كلبي مافرط بيج ولا نتِ عاله ع كلبي عسل ع كلبي بيتنا موجود واعمدته مهما كان قرارج اني وياج ومحد يكلج ع عينج حاجب
بست راسه وابتعدت كلهم يباوعولي بحزن اجت مرت يعقوب نورسين حضنتني وتواسيني ملوكه تباوعلي وعيونها مدمعه
ملك:- بابا اغيد اتعلم اربك I dont like الكل يتكلم اربك واني مايفهمكم اشعر مو حلو
ابتسم بابا وباس راسها
عيسى:-صار بعد روحي ادخلج دوره مال لغه عربيه
يسوع:-خطيه انتِ مضطهده ياملوكه الله شاهد انقهر عليج من تبقين مصفنه علينه ليكول مطي
يعقوب:-انجب لاتحجي وي ملاكنا
ملك:- I don care
جرجس:-My dear, every day when I come back from work I give you an Arabic lesson
(عزيزتي انا يومياً عندما اعود من العمل اعطيك درس باللغه العربيه)
ابتسمت اله وباسته بخده...
كمت من يمهم رحت لغرفتي قفلت الباب كعدت ع السرير كبالي مرايه اخذت العطور العليها وشمرتهن ع المرايه تكسرن صرت اخذ واحد وره واحد واشمرهن بالغرفه صرت بحاله هستيريا
:-حقيررر حقيررر تفكر بنفسك بس اناني طعنتنيي كسرت كلبي واني صار ست سنين مضحيتلك وابجيلك حقيررررر متستاهل حبي اخخخ يمههه كلبيي
الباب يندك ولولد يرفسون بي بس جانن الابواب قويه
محسيت الا نفتح الباب ودخل بابا بدون مايهتم للكزاز عبر من فوكه وحضني يطبطب عليه واني اشكيله
غفيت بحضنه..
فزيت الغرفه ضلمه وصوت الاذان كمت ع حيلي شغلت لضوه جانت لغرفه نظيفه طلعت اتوضئ
طلعت من الحمام(اكرمكم الله)
صارت بوجهي ملوكه حضنتني كبل
:-احبكي اختي خفت عليكِ قبل التوه
بست خدوها الشلنفص اطول مني رغم اني اكبر منها
رحت للصاله جانو امي ولولد كاعدين وبابا ديصلي
ميلا:-هلا بلويره يلا ولج سختجيه توكعين كلوبنه عليج
يسوع:-يوم هاي تحب الاكشن خوب كولي اريد اكسر كزاز جان اخذتج لسيارة جرجس تكسرين الجام
جرجس:-اي كبش فداء مو سيارتي
يسوع:-سيارته الجبير بعد
جرجس:-الجبير تاخذون منه فلوس وتهلسو الجبير يصير كبش فداء الجبير تاخذون ملابسه خوب هاي مليكه جايبتلها ستايل جديد تلبس ملابس ولد
بقو يتعاركون ويتمالخون اني وكفت وره بابا اصلي
خلصت صلاتي وسلمت
الصلاه احسها هي النور الي دخل لكلبي
اذا جان اكو انجاز مسويته بحياتي
فهوه دخولي للاسلام اول بداية خطوبتي سنة 2011/1/1 هو تاريخ دخولي للدين الاسلامي
صفنت ورجعت الذاك اليوم السعيد
واكفه يم الامام وبصفي احمد
احمد:-انتِ مستعده لهل الخطوه ومن دون تردد
:-اني هذا قراري اني بكل قناعه وبكل حب اريد اسوي هل شي
احمد:-هنيالي بيج وبوعيج اشكر ربي انو انطاني هيج انسانه
ابتسمتله
احمد:-رددي وراي ''اشهدُ انَ لا اله الا الله واشهدُ انَ محمدٌ رسول الله ''
نطقت الشهادتين وايدي ترجف احس بشعور غريب جداً بقه يحجيلي عن الدين الاسلامي رغم عندي معلومات لان بابا جان دوم يشاركني معلومات تخص دينه
احمد:- دخلتج للدين الاسلامي نغسلت ذنوبي ويكلك ليش تحبها هذا الحب الي ينحلف وينحجي بي
'' الحب اذا مجان ع حب الله بحسن نيه شنو لذته ''
بعدها دخلت للسنه الجديده واني ع الدين الاسلامي رجعت لبيتنه واني لابسه حجاب شافوني اهلي واخواني باركولي وجانو سعيدين كلهم بقراري
ميلا:-تحرسج امنا العذراء والرب انتِ جريئه صارلي 28سنه متجرأت اخطي هيج خطوه رغم هي بالي من زمان وترددي يمنعني لان ماريد ادخل للدين الاسلامي بتردد بارك الله بيج بنيتي يوم الاخوانج
جرجس:-اني احب ديني وراحتي من ادخل لكنيسه واصلي بس اذا الرب قاسملي بالمستقبل فانشاءالله خير
رجعت لواقعي ع صوت يسوع
يسوع:-هاا خالهههه وين وصلتي هسه تطلع مصليه حتى صلاة مال باجر
:-خليني اتأمل براحتي شعليك
:-اليسمعها كبالها شط وخضار ومي هو حايط كبالج وعليه صورة الموناليزا
هزيت ايدي وكمت نزعت ايزار الصلاه جبت لابتوبي وملفات المرضى وكابلتهم وكعدت اشتغل سمعت اتصال تلفون بابا
عيسى:-وهسه شنو بعدهم بالمركز..مو خوش..يلا هسه جاي
سد تلفونه ماما سئلته
:-خير عيسى شكو
عيسى:-تاج الحُسن رافعه قضيه بتهمة التعنيف الاسري ومقدمه اوراق الكدمات وسوو القاء قبض ع ابوي واخواني
يسوع:-العببب عاشتت تاجه منامت ع حقها مجذب مؤمل من كال محد يكدرلها
جرجس:-والله وكفوو من عندها اني ردت اعرض عليهم. هل مقترح بس كلت ماريد اسوي مشاكل
عيسى:- محد يتدخل زين ماريد تصير عندكم عداوه وي اهلي
كام ابوي بدل هو واخواني وطلعو راحو للمركز
يسوع***
وصلنه للمركز طبينه لغرفة الضابط بعد ما ابوي بلغهم انو هو عمها فوتونه جانت كاعده ومتكيه ع الكرسي بكل ثقه
الضابط:- تكدرون تتفضلون
كعدنه
الضابط سلمان:- بنيتي احجي وعد مني اخذلج حقج منهم
:-حضرة الضابط اني مناويه اسُكت عن حقي شفتو تصوير الضرب ولهسه الاثار باقيه يعني اكيد عرفت الى يادرجه هم معنفيني
الضابط سلمان:- بلغني حضرة النقيب علي احنه القينه القبض عليهم
عيسى:- حضرة الضابط تكدر تفهمنا شنو الوضع
رد ع ابوي بعصبيه بس متجاوز ابد
:- ابوك واخوانك العارات متعرضين الها ومعرضيها للتعنيف وهي رفعت قضيه عليهم والمحاكمه بعد يومين
الا اخليهم يشوفون الويل. ويخيسون بسجن هل زفت عيب ماريد اغلط عليهم بكد اجدادي بس اذا هم ماخلو احترام لنفسهم انتَ تعقلها ياحضرة جناب العم تقبلها بنيه بتهم عرضهم يضربوها. هل ضرب الي بتعذيب نضربه ولاكميها ع خشمها وبي رضوض عيب
ابوي سكت حقه شيحجي يعني
الضابط سلمان:-عسكري جيبهم
جرجس**
طببوهم ذليلين ويجرون بيهم جر هاي تالية اليتعرض لمرآه هم صح جدي وعمامي بس مهما صار مستحيل اقبل بهل تصرف الهمجي ومثل ماهم عمامي هي بنت عمي واحجي لحق انو هم يستاهلون
خيون:- جدي ماستحيتي من فوتيني مركز
دكت ع الكرسي لكاعده عليه وكامت وهي بقمة الغضب الشراسه والقوه تنبع من عيناها انظر امامي انها امرآه ذات قوه مرعبه على الرغم من الحزن الذي يحاوط ملامحها الا انها جامحه شامخه كانت تزئر زئير الاسد لكي تقتطف من فم العدو بثأرها كان يقق بجانبها اخاها ولم ينطقب بحرفاً واحد لابد انهُ يعلم ماهي اختهُ
تاج الحُسن:- مستحيتو انتوو من مديتوو ايدكم عليه واني بنيتي ضعيفه درتو كلكم عليه وليكول حيوان اني مو بشر خيون لاعبالك اني هينه لا انتَ ولا ولدك تكدرون عليه فاهم لو لا كلت بلبدايه جدي وعيب عليه بس قسم برب الكون اندمكم ع كل ضربه انضربتها من عندكم وارجعها عشره بطريقتي
نواف:- شنو تضربينا يعني واحنه عمامج هاي تربيتج
:-لاتعذرني اني مو همجيه اتعامل بضرب
بممم فلشتهم طيرتهم اني لو منهم بعد ما اطلع بشارع بس حقهم اذا هم ذرة غيره معندهم
الضابط سليمان:- بابا تاج تحلين الموضوع ودياً ويوقعون تعهد عدم التعرض الج لو نقدم محاكمتهم
نواف:- اكيد اكيد ودياً احنه عمامها مو غربه
ندفع لباب ودخل واحد طوله يمكن 200اني شكد ماطويل هو اطول مني اوصل لجتفه وشوارب واسمر ذكرني بجمعه العتاك واحد اسمه جاسم المدكدك هذا هم نفسه
صخر:-لو هسه يجي الف عميد والف حزب هنا ماتتنازل زين اذا هي تتنازل اني ماتنازل زين سلمان افتح محضر واريد السالفه تطول ويباتون بالحبوس وحق بتي ميضيع
خيون:- مصدك نفسك ابوها تره هي بتنا ومالك كل حق تحجي
صخر:-شيخ اني لربيتها مو انتَ
صارت واحد يجر واحد يعر وهم مصرين انو ميتنازلون وهذا الي يصير زوج امها معصب فول
شفت لازم واحد يتدخل لان صرنه فرجه
رحت كبالها وكفت...
:- تعالي احجي وياج ع صفحه
رفعت حاجبها..طلعنه بره
:-تفضل
:-سمعي تريدين نصيحتي بما انو راسج افتر
تنازلي وكتبيهم تعهد اعتقد لهنا اخذتي حقج بس جرجرتج الهم بالمركز كافيه بهذلتهم وذلتهم ونفضحو
:- ذولي مو عمامك وجدك يعني اكيد تريدني اتنازل عمودهم مو عمودي
:- اني واكف وي الحق واعتقد تكتبيهم تعهد وبعدين تلعبيها صح غمزتلها بالاخير
صفنت تفكر خشمها مضبر وعيونها ورم خفيف تحتها بسبب لضربه
ضحكت بنصر وطبت تفر بشعرها ابتسمت ودخلت جوه
يسوع:- من تحجي لنسوان تسكت الزلم
ضربته بكوعي وحطيت ايدي ع وجهي اخفي ضحكتي خرب غيرتك يسوع مو وكتك اختنكت كلش واني حاصر ضحكتي
تاج الحسن:-- اتنازل بشرط
خيون:- والي هو
:- اولاً محد اله علاقه بيه بالبيت ومحد يتجاوز حدوده وياي ثالثاً اشوف امي اي وكت اريده مؤمل وسامي وعزام وياسين محد يحاسبني اذا اطلع وياهم
نواف:- وذولي منو انشاءالله تردين نشد لكرون فافون لو ستيل
:- براحتك الي يعجبك بس افضل لفافون لان لستيل يزنجر
يسوع بهمس:- والمسيح وامنا العذراء هاي داهيه وكفتهم ع تك رجل
جرجس:- يمكن الي يتزوجها هو يكنسلها وينظفلها حتى ملابسها هو يغسلها
ضابط سليمان:- شنو رأيكم
خيون:- موافقين
وقعتهم واحد واحد وطلعو وهي تمشي وحاطه ملفعها ع حلكها وتضحك
نواف:-لاعبالج انساها الج اندمج
تاج بضحكه:- ها نرجع للمركز
خلته يشيط ومؤمل يضحك وياها تقدمو تصافحو هو ويسوع
يسوع:-فجرتوها والمسيح
مؤمل:-شعبالك ماتنام ع حقها
يسوع:-اكلج بت عمي اكو فد واحد ديضايقني هل فتره متجين تكتلي الي
ضحكت ضحكه وصلت لراس لشارع معجبني تصرفها باوعتلها بطرف عيني
مؤمل:-دخيلك ياعلي امشي امشي انتِ فضيحه
هاج لسويج وطيري يويسن بسياره
:-كول ولعباس شجابه
:-جنه مطلقه بسياره كاعد يدك ليتيمه
:-لعد وينها عنه
:-اووو خبرج عتيك روحيله ديلطم لطم ثلاثي الابعاد
باوعتلنه ومدت ايدها تصافحنه
صافحتها صارت ايدها بأيدي استشعرت نعومتها وي خشونة ايدي طولت بلزمتها
:-ممنونه منك
حك مؤخرة شعره وابتسم حسيته استحه وخرت ايدي
:-ماسويت غير واجبي
ابتسمتله وعيوني تعلكت بالصليب الي بركبته كلش حبيته حمحمت ورحت باتجاه لسياره قبل لا اصعد نزعر لكاب لان جنت لابسته فوك ملابسي صعدت وره صحت
:-سلامممممم
دار عليه مبتسم
:- هلا يابه عاش من شافك ضلعنا شنيهاي وجهك ليكول جيس ملاكمه
:-جنت طالعه بشارع وافترو عليه السلابه اخذو سيارتي وتراجي العزيزات اخذو كلشي مني
:- لاموخوش
:- اي والله هاي لدنيا بعد شصوي
:- شوكت تبطلين تكلبين الحروف
:- من تبطل تصير نكدي وتكلي شبيك
:- زينه
:- اي هو ماعندك موضوع غيرها شبيها
:- تحبني
الضحكه شكت حلكي حتى خشمي كام يأذيني لان من اضحك خشمي يمد زواليه
:- كول والله عزاا والله حلوو وشنو صار احجيلي..عطت..اللهه تحمست
:-وجع حتى وجع
غميته واردف بحسره
:-زينه متحجي وياي صار شهرين من اعترفتلي واني مردت اخسرها لان ماكون مشاعر بداخلي الها معرفت شلون اتصرف اتجاه الموضوع جبت العيد
:-وهسه شنو
كال شي صدمني وخلاني اتخورس
:-رح اخطب صديقتها
يتبع...
برأيكم هل صدك ياسين رح يخطب ايه ؟
شنو ردة فعل زينه؟
توقعكم حياة ليار بعد رجوع احمد؟
لاتنسون التصويت..
فقره جديده بنهاية كل بارت ..
(اكتبو اي شي بهل حياه اخذتو منه عبره ودرس مارح تنسو خلي نستفاد من عبركم)
اعتبرو التعلقات مثابة فضفضه 🤍👍🏻