"لقدْ سألتْ: ألستَ تمَلَّ مِنّي
وكلَّ اليومِ نحنُ على تلاقي ؟
فقلتُ لها: إذا ما كنتِ قربي
فإنّي رغمَ قربكِ في اشتياق
وحبُّكِ طعْمُهُ في كُلَّ يومٍ
كفاكهةٍ تَنَوَّعُ في المَذاق
ولستُ أخافُ في الدنيا كخوفي
إذا ما جاءَني شبحُ الفراقِ !!
ولو ضمَّ الفؤادَ هناكَ قبرٌ
سيبقى معْ فؤادِكِ في عناق"
عرين الصياد بقلمي شذرة
دله : الحگي ول زهور حجرتج ورت
ديالا : صرخت زهور بعلو حسها وراحت ركض
لحگناها بساع وحده تدفع بوحده
صعدنه فوگ على حجرتها
لگيناها مشتعله والنار تلهب تطلع من جوه الباب
جيتت عالباب تا تفتحه وما گدرت گامت تشيل بروحها وترجد
زهور : ابني بالحجره نايم يولو
ياسر وليديييي يبووو يهالصگعه
ديالا :صعدو نسوان الشيخ على صريخها
ومن سمعو ياسر جوه كلنه گمنه نصيح
ولا واحد من الزلم هين بس احنه النسوان
وكلشي ما نگدر نسوي غير نملخ بنفسنه ونلطم
زهور كل ما تجيت عالباب يورها
وترجع عبن حديد والنار تلهب بي
زهور :ابني تخسون نايم جوه ابني يعرب طلعولي ابني وينك يوليدي
ديالا : ما گدرنه نفتح الباب حدرت بساع تا افزع العرب طلعت من باب السياج اركض وادحگ صياد اجه يمشي من بعيد جاتف ادينه وراه
صحت بعلوو حسي ابو النشميي الحگ
بخطوتين وصل يمي
صياد : خير شبلاج
ديالا : ورت حجره زهور وياسر بيها
ديالا : ركض وبس التراب وراه
رجعت عالبيت بساع اول ما صعدت شفت صياد دفر الباب وجيت بنص النار تا يطلع ابنه
والنسوان كلها تصيح عبن النار تلهب لهب
طلع بساع وهو ملابسه لايحهم نار ويطفي بنفسه لزم كتوف زهور وهيه مثنيه وفاحمه من البجي
صياد : ماكو الوليد يولي ماكو بالحجره
ديالا : انبهتت زهور وگامت على طولها
زهور : شلون ماكو والله جوه خليته نايم ابني ور راح مني انصگعت انيي
ديالا : گامت تلطم انوب وتشيل بروحها وترجد وين راح الولد عمره 11 سنه ما لحگت النار تاكله دخيلك ربي
وزهور تگول ما شفته طلع ولا احنه شفنا
التمت علينه الوادم عبن شافو الدخان والنار تطلع من شباك الحجره والبيت صار كله دخن
ادحگ من الباب جرباية زهور تلهب عبالك تنور وكلشي بيها مشتعل نار
عاط بينه صياد تا نحدر جوه ونلم نفسنه تا تصعد الزلم ويا يطفون النار ويريد نبدل لزهور ونلبسها عباة
احنه بيا حال وانته تريدنه نطب من الزلم يخايب ابنك ماكو والحجره واره
ظلينه واگفين وعاط بينه بصوته الي يرج
سحلنه زهور سحل وحدرنه جوه لبسناها ثوب فوگ ثوبها الي نشگ ولفعنها التمينه بالمطبخ
فحطت زهور وگعت بالگاع وتصيح
زهور : ابني مات راح مني راح ياسر
كواكب : خايبه استهدي بالله شنهي
علاگه وماعت ماكو الوليد بالحجره شو وين طلع
زهور : ما طلع والله عفته بسابع نومه وطلعت
ما گعدت غير ربع ساعه وياااجن وين راح ابنييي
ديالا : التمينه عليها نهجد بيها
غسلنه وجها وكلنه نبجي على بجيها انهارت
رحت عالشباك مديت راسي ادحگ الزلم تنگل تراب ومي تا يطفون النار
صديت عالباب مال السياج واشوف ياسر اجه هو. وعساف متگاودين وشايلين نستله ياكلون
شهگت بعلو حسي ول زهور هذاك ابنج بره يم الباب هذاك ياسر والله
فزت على طولها وطلعت تركض جيتت علي تبوسه وتحضنه وتشمه ما مصدگه
عساف ياكل نستله ويدحگ عليها ومبتسم
خطيه يمكن تخيل نفسه ويه امه
زهور : وين جنت مو خليتك بالحجره نايم
شلون طلعت
ياسر :اجه عساف گعدني تا نروح نشتري من الدكان
ديالا : رجعت تحضنه وتشمه
تربعت بالگاع وتشاهگ وياسر وعساف مو يدرون السالفه شنهي
الحمد لله يربي الله فكه هالوليد ودز عساف يگعده وياخذه ويا بس شلون ورت الحجره منين اجت النار شلون لو تور وهو نايم بيها دخيلك ربي
حدر صياد من فوگ هو والزلم وخزرنه تا نفوت جوه
ما اهتم للولد طلع بالسلامه كل همه نفوت ومحد يشوفنه عبالك الزلم راح ياخذون نقشتنه
طبينه جوه بساع وهو وصل الزلم عالباب وتشكر منهم رجع عاگد الحواجب وعاط بينه
صياد : شطلعجن بره جدام الزلم
ديالا : جاوبته زهور وهي تشاهگ وحاضنه ابنها
زهور : ابو نشمي هاذ ياسر طلع بالسلامه
وما صابه شي الحمد لله سامحني ما گدرت اتحمل ما اركض علي
ديالا : قلص عيونه عليهم فتره
ومسح وجهه ولحيته وگعد تك ركبه يم زهور وابنها يطيب خاطرهم
ديالا : گعدنه بالطرمه كلنه نريد انفاسنه ترجع
بينه الي ظلو يبجون من الصدمه وبينه الي صافن
وما يعرف شيگول
زهور حاضنه ابنها وترجف والدمع يصب
وصياد متربع وحاط المخده بحضنه وشابك ادينه
وعساف جاتف ادينه ومرتاج عالدنگه
اخذو فتره من السكوت التام عاد بلش التحقيق
صياد :ياسر وين جنت
ياسر : جنت بالدكان ويه عساف
صياد :عجل شلون ورت الحجره
ياسر : ما ادري يابه جنت نايم
واجه عساف گعدني گال نروح نشتري من الدكان ما ردت اروح بس لح عليه وگالي انطيك فلوس عود
گعدت وحدرنه جوه وجان عساف نسه الفلوس بحجرته گال راح اصعد اجيبهن واجي
ظليت جوه وراح عساف بساع جاب الفلوس ورحنه
صياد : ليش ما خبرتو احد بروحتكم
خزامي : اني جنت بحجرة الشغل واجه عساف گال راح اروح عالدكان اشتري ورخصتله
صياد : وانته ياسر ليش ما خبرت امك بروحتك عالدكان
ياسر : عساف ما خلاني گال اذا درت ما راح تخليك تروح ويايه واحنه ما نبطي نرجع بساع
صياد : وانته كسرت كلام امك ومشيت وره عساف
خزامي : هسع شلازمه هالحجي احمدو ربكم الوليد بخير هاذ عساف الله دزه ينقذ ياسر كافي سدو هاذ الهرج
دله : زين شلون ورت الحجره ولهبت النار
صياد : الصوبه واگعه متكبي النفط وماخذه النار
ديالا :صياد يحجي ومقلص عيونه على ياسر وعساف تنهد وگال
صياد : اروح اجيب خروف نذبحه شكر لوجه الله بس الله طلعكم سالمين لحد يصعد فوگ عالحجره سديتها وباجر ان شاء الله ارممها
كافي تبجين ام ساجي گولي الحمد لله
ديالا : گالها وراح تا يجيب خروف
وزهور مسحت دموعها و صفنت ورفعت حاجبها
زهور : شلون وگعت الصوبه لحالها
اكيد احد وگعها وتعمد يور حجرتي
خزامي : گولي يالله انفضي زيجج
بنيتي منهو يستجري يور حجرتج انهبلتي
محد بالبيت غيرج انتي وضرايرج وجنتن بره گاعدات
هاي الحوادث تصير تا البشر يتعض الحمد لله فاتت دله وشافت النار جان البيت كله ور وانتن تهرجن سوالف بره گومي هسع صلي واحمدي ربج واشكري
طلع ابنج سالم
زهور : والنعم بالله بس الصوبه ما تگع لحالها يا شيخه
دله : يمعوده هذاك اليوم جاي افول بصوبتي وجان تگع لحالها هنه هذني الصوبات بايهات
زهور : ما تخش عقلي ابد
الصوبه من احطها عالكنبار ما تحرك من مكانها ابد
دله : حتمال من طلعو عساف وياسر جروها وما انتبهو وگعت وراهم
كواكب : اي حتمال تصير
كافي يمعوده اهم شي ابنج سالم منهو عدنه يكرهج وتتهمينه
زهور : كلشي بحجرتي صار سماد ما ظل عندي شي
خزامي : كافي عاد يا زهور بالمال ولا العيال
سدي السالفه
ديالا : لليل واحنه بعدنه بصدمتنه وگلوبنه ترجف
خلينه زهور گاعده بالهول ويه ابنها بعدها بصدمتها ورحنه اني ودله وكواكب نسوي العشه صياد ذبح خروفين واحد وزعه عالجيران واحد سوينه منه عشه كواكب اخذت الصفه تشويها ودله سوت المعلاگ
واني گاعده اگشر بتيته الجهال يحبونها
اجه عساف وگف بالمطبخ واخذ صفنه
طلع بتيته واخذ سجين وگام يگشر
هاي شلك بي عساف مو هاذ جاي اسوي اني
جاوبني بدون ما يصد عليه
عساف : اسمي هو وادي مو عساف واريد اسوي عشه لنفسي
ديالا : مو الشيخه هو الي تسويلك عشه
عساف : مريضه رجليها توجعها
ديالا : عجل خليني اني اسويلك عشه
ما جاوبني وكمل يگشر البتيته ما يعرف يسويها شال نصها بالگشر گرضها زغار وغسلها وملحها اخذ علبة الشخاط وگعد يم الطباخ تا يشعله
خفت يور ايده گمت تا اشعله له وگفت يمه وتا اخذ علبة الشخاط من عنده
صد عليه وخزرني
عساف : شايفتني جاهل جدامج ارجعي على شغلج
ديالا :فكيت اثمي وگلت بگلبي لا والله اني الجاهل وعمري 10 سنين مو انته عفته ورجعت شسويله مو ناقصني طلايب
شعل الطباخ وجان يگلي البتيته
طفر الدهن على ايده نفض ايده وجان يمسحها بدون ما يگول اخ
كملهن ورفعهن بماعون واخذ خبز وراح
يربي هاذ لأيمت يظل هيج ما ياكل من ايد احد ولا يثق بأحد حت الشيخه من تجي عالمطبخ تا تسويله اكل يجي يگف يمها يشوفها صدگ هيه طبخت لو تجذب علي
وملابسه هم يگف يمها من تغسلهن
الله يستر منه اذا كبر وظل هاذ طبعه
كملنه العشه وجاي نشرب الجاي وجان زهور تگول
زهور : ابو نشمي اريد الحجره الي جانت بيها نجمه ليما ارمم حجرتي
ديالا : صياد جان گاعد مثل العاده وشارد
وعساف هم گاعد بصفه ومرتاج عالحايط
صد عليها صياد وقبل لا يحجي گام عساف وگال
عساف :لا والله ما انطي حجرة امي لحد
ديالا : خزره صياد وجان يگعد
صياد : البيت يطارد بي الخيل يا زهور باتي وين ما ردتي واصبري لباجر وعوفي حجرة عساف
زهور : يعني هاي عبن عساف گال ما انطي الحجره طاوعته بساع تره ما اريد اخذها بس ابات بيها اليوم
ديالا :خزرها صياد سكتت ودنگت راسها
وعساف گام انوب
عساف : اسمي وادي والحجره ما انطيها ولا اخلي احد يبات بيها
ديالا : گالها وهو واگف بصف صياد
لزمه صياد بدون ما يگوم وسحبه خلا گدامه
وعاط بي
صياد : شسمك يول عيد ما سمعت
ديالا : عساف مركز بعيون ابو وما دنگ راسه
عساف : اسمي وادي
ديالا : ضربه صياد راشدي وراد ياخذه يأدبه
گامت الشيخه وفكته منه خلته وراهه
وگف صياد على طوله
صياد : شيخه اترجاج لا تفزعيله انطينيا
خليني اربي الضاهر شافني كارصله وانفلت
خزامي : والله ما تجوسه شسوه لا غلط ولا سب
حجرته وما يريد ينطيهااا وذا على اسمه شتريد منه شبي اسم وادي احلى من عساف وخر من دربي والله ما تجوسه تره ازعل عليك وما احاجيك ابد
ديالا : ظل صياد واگف گدام امه
هي الوحيده الي تگدرله وما يعاندها
تنهد وستغفر ربه حجه بصوت ناصي
ويه امه وهو مدنگ راسه
صياد : شيخه يا امي وتاج راسي
عساف تطاول جثير ما ياكل من ايد احد يتجنجف
ويخليج ترجبيله وتغسلين هدومه
هاي عبرتها گلت جاهل يكبر ويبدل طبعه
عبرتله جثيره شغلات لخاطرج
بس هساع دحجيله واجف جدامي
ويعلي حسه على مرت ابو ويرد بوجهي
لا احترمني ولا حسبلي حساب
وانوب تبره من الأسم الي سميته اله
هاذ قلة تربية
اني ما اريد اقسي علي هو الوحيد من ولدي ما مديت ايدي علي بس ما اريد امدله الحبل
ويتفرعن علينه
خزامي : هاذ الحجي يفيدك خلي الك
عساف متربي احسن تربية اشو ماكو بنضافته ولا شطارته بالمدرسة وذكي كلها تحمد منه وذا على طبعه الولد على مجان والد يا صياد مو عندك نسوان خير الله وما تحب احد يخدمك هذاك اليوم مو شفتك گاعد غبشه تسوي ريوگ لروحك
انته جار عساف ناخته نخت بالطبع هو نسختك
صياد : بس اني ما اتجنجف عن نعمة الله
يا امي واي وحده ترجب اكل من ايدها وما افشلها
خزامي :كافي عوفه هاي نفسه وهاذ طبعه ما ياكل من ايد احد ولا يخلي احد يخدمه غيري اني مكيفه بي وراضيه علي
صياد : واسمه يمه مو كلها تدري بي عساف شجاه هسع ويريد انادي وادي
خزامي : ميخالف اترجاك وليدي عوفه يختار اسمه الي يحبه مزاله ما طالع عن قوانينك وتربيتك شتريد منه
ديالا : صياد شال ايد امه وباسها وگعدها يمه تربع گدامها وهو يمسد على ايدها
صياد : شنهي اترجيني يمه سامحيني اني الي اترجاج ترضين عليه انتي ما ترجين انتي تأمرين
سمعاً وطاعه يا جنة صياد وتاج راسه هاذ هو
الي تردينه يصير بس ارخصيلي بشغله اذا يوم سمعت عساف العفو منج اقصد وادي اذا سمعت بيوم طالع عن الطريق من وره هاذ الدلال
اشلع جوزته يا امي
خزامي : ابد اذا شفته سوه شي غلط اني انطيك رخصه وتأدبه
صياد : يصير خير
ديالا : الحمد لله عدت هاي الليله بسلام ومن هاذ اليوم الشيخه بلغت الكل عساف صار اسمه وادي
والكل طبعاً ينفذ سمعاً وطاعاً
امل : گعدت من الصبح گطعت العجين وطلعت تا اسجر التنور واخبز
نجفت التنور من السماد ورحت تا اجيب حطب من يم المخزن
اسمع صوت بشر يعن ويتوجع خفت ولزمت گلبي
جيت تا انهزم بس الفضول ما گدرت گربت من الصوت
اسمعه يجي من يم المخزن فتحت الباب
وطبيت واشوفها رافده گاعده بالمخزن لازمه بطنها وتبجي عاضه شفتها وتنزف دم
غرگانه فكيت اثمي وادحگ عليها شافتني وجان تشهگ
رافده : امل امانه لا تگولين لحد راح اموت تخسين
تعاي
امل : رحت عليها واني مصدومه
شعندج هين يولي وليش تنزفين
رافده : ذبيت جاهل
امل : ليش انتي حامل اشو ما ندري
شلون عجل تنزفين وگاعده هين امشي نوديج عالمستشفى لو اصبري اروح انادي حميد
لزمت ايدي وصاحت
رافده : لا امانة الله عوفي حميد لا تنادينه
ما اريد اروح على مستشفى هاي مات الجاهل وخلص ساعديني عليج الله
امل : صفنت وتذكرت من شفتها تسحل جيس الطحين
يبو يهالعثره رافده هاي انتي تعمدتي تذبين الجاهل ليش،يولي مو حرام عليج وين تروحين من ربج
رافده : اااخ يا امل عوفي هالحجي وداعت جهالج
بطني ملختني
امل : شسوي هسع فهميني
رافده : جيبيلي مي اغسل وملابس
وهاذ الجاهل اخذي ادفني
ولا تگولين لحد
امل : لزمت ايدي وتبوس بيها وتوسلني
بلعت ريگي يطگ شلت الجاهل زغيرون بگد حز البرتقال لفيته بوصله واخذته دفنته وگلبي يرجف عبالك اني موته
رجعت لحجرتي واخذت ملابس من مالاتي ما گدرت اطب حجرتها وترست السطل مي ورحت عليها
نضفتها وغسلتها عاونتها لبست الملابس ورجعنه عالبيت
راحت تسحل بروحها طبت لحجرتها
جريت حسره بقهر ورجعت اخبز
كملت الخبز والريوگ واجه عماد اخذ للفلاحين
واني رحت گعدت ربعنه وگوه گشطت جوانه الي نسخه من ليال بالنوم
جوانه : امل شنهي ريوگنه
امل : خبز وبصل انتي ما تملين من هاذ السؤال يوميه تعيدينه وهو ريوگنه نفسه يوميه ما يتغير
انهضي يالله وراج مدرسة دوبج تظلين ساعه تعدلين بجهرتج
جوانه : اهوو شگد اكره المدرسة
امل : وزعم هيه تحبج المدرسة مشرمتها بالدراسة
يالكسلانه اربع سنين بالخامس ما خفتي ربج
جوانه : هي المعلمة تكرهني وتسقطني
امل : لو تكرهج جان نجحتج و اگلعتج تا تخلص منج
بس گولي انتي كسلانه ملتهيه بالمكاون ويه جاهد
وما تدرسين ما جرنج خواتج ليال وديالا جانو المعلمين يحلفون بروسهن
جوانه : همزين اني مو مثلهن جان هسع مثل ليال متزوجه معلمي ههه
امل : شو گومي انهضي السانج طوله مترين
طلعي السانج بالدراسة وجدي ذراعج
جوانه : تره ما ارجع راح امر على ليال من غادي
اروح ويه استاذ صائب
امل : اني مالي شغل گولي لأخوانج
جوانه : گلت لحميد البارحه گال روحي
امل : خوش عجل سلميلي على ليال بدربج ولا تظلين يمها جثير تعاي گبل العصر
جوانه : ميخالف بس عود خلولي غده
امل : ليش ما راح تغدين يم ليال
جوانه : يمعوده كل ما اروح عليهم واتغده شكحه ادحگ عليه من اشيل اللگمه واعلجها لحد ما ابلعها تشگ صدري غدي شگد اكرها ام عطوب
امل : السانج يولي عود الزمي وفضيني گومي ما ظل وكت جاهد گعد وتريگ وراح
جوانه : ابو الجگاير شلون ما يگعد من وكت دوبه يديح ويه ربعه يشربون جگاير وره المدرسة
امل :شمدريج بيهم
جوانه : مو جنت يمهم تكاونه وضربت واحد بالطابوگه شگيت راسه
امل : الله يصگعج شنهييي شسوييتي سمعيني زين
جوانه : فزيت بساع ونهزمت من حس امل گامت تصيح عليه هاي شبيها عبالك ضاربها هيه
عشتو هو اني ضربت هذاك الهتلي
غسلت وبدلت وجان اگف گدام المراه اعدل نفسي
ادحگ على روحي والله اني حيل حلوه واخبل بست نفسي بالمرايه
شحبني يربي الله يحفظني
تريگت واخذت كتبي ومشينه اني وعلي وثائر
خلص الدوام ودزيت الجهال ويه جاهد
ورحت ويه استاذ صائب لبيتهم الطريق كله يرزل بيه عبن ما ادرس ومو شاطره ردت اتناوش حجره من الگاع وانومها براسه مدري شلون تحملته
اول ما وصلت بيتهم وتلگوني عمر وعثمان
حضنوني احلى شي بالدنيا الوحده تصير خاله
گادوني كل واحد من ايد وفوتوني جوه واستاذ صائب يضحك علينه طلعت ليال شافتني وشهگت عصرتني عصر ظليت يمهم عالغده ومثل المعتاد شكحه خازرتني ما اكلت مدري شلون عايشه يمها ليال شوفتها تسد النفس
لميت المواعين ويا ليال وجلفتهن
جانو گبل ما يخلوها اطب المطبخ هسع تمسح وتكنس وتجلف مواعين وتزرع وياهم بالخضره الي گدام بيتهم
كملنه ورحنه عالحجره واجت سعاد وكريمه
وخوش صارت لمه ظليت يمهم للعصر وجان يجي جاهد ياخذني رجعنه البيتنه وصلنه البستان
و انتلاگه ويه شباب ثنين
عدهم عداوه ويه جاهد تناگرو بالحجي وتكاونو عاد وبلش الضرب مجتفه اديني وادحگ شگد احب المكاون يربي
جاهد سبع يضرب هاذ وهاذ ما انطه نفسه بس ذاك النذل تناوش حجره وضرب جاهد على راسه من وره طلع دمه
ما تحملت وادحگ بصفي كوم مال كرب خستاوي
تناوشت وحده واجيت على هاذ النذل وهبده على راسه خليت دمه بطوله غلبانهم اني وجاهد دفرات وجلاليق خلينه وجوهم بالطين
ورجعنه على بيتنا ركض
وصلنه بتالي روح من الركض گعدنه بالباب مال السياج تركد انفاسنه تا عود انطب البيت ومحد يكشفنه
جاهد : عش حشرتي روحج مو گتلج الف نوبه لا تحطين نفسج بمكاون الولد
جوانه : صوجي فزعتلك هاي بدال ما تشكرني
گوم اغسل دمك جان ستحيت خليتهم يفجونك
جاهد : اريد من الله اسمعج تحجين لحد وتگولين فجو جاهد الا اصگطج تصگط
جوانه : عيبتله وجان انهزم جوه عوذا منه ناكر المعروف ابو الجگاير
ديالا : طلع ابو نشمي لحديثه بشغل صارله 14 يوم
اجو شاكر و الثلاثي ورجعت الحياة عالبيت
شاكر ما يگعد خطيه يادوب رتاحله يوم وحدر يشتغل ويشرف عالعمال
والثلاثي حملونه منية العسكرية
عبالك احنه دزيناهم رجعو زايدين قاطات بالمزق
نشمي : ابن البدويه بالله ناوشني الشكر من يمك
باهي : هاك الشكر وافتخر بنفسي ابن البدويه
بيك خير روح تبارز وياهه بالرمايه ونشوف منهو يغلب
نشمي : امي هم تعرف ترمي
باهي : بس مو مثل امي محد يلحگها بالرمايه ولا السياقه تربات ابوي بعد
كواكب : لا تبلشون
ساجي : امي هم تعرف ترمي شهر وابويه يعلم بيها تالي اسحبت الرشاش وگطعت سلاك الكهرباء ظلينه سبوع عايشين بالظلمه محد يحس بالفخر بگدي
زهور : وجع الي يملخ اذانك جاي تسمع اخوتك شلون يحمدون امهاتهم وانته بس تفشل بيه عذه منك ضرتي لو ابني انته يول
ساجي : همه حجو الحگ واني مثلهم ما اعرف اجذب تردين اسويج ذيب الظلمه شنهو الي تعلمتي لا سياقه ولا رمايه عجز بيج ابويه تالي عافج
زهور : منهو ناخيك وگالك سولف اكرص خفت هالشوارب جنهم نمل متكاون وهو ابوك ما علمني زين
نشمي : يبووو هههه شگد عييييب
بالله لو بذيج اليله شابعه نوم ومو مخلفه ساجي
جان هسع محد فشلج
زهور : اي والله لو مطموره اخيرلي
ولا مخلفه هالمعاره هاذ الي ما عنده سالفه بيها خير
ساجي : خلفوك انته كبرت الصياد كافي علينه
تذكر من ابويه علمك الصيد بوكتها الوزه بعد عنك جم متر اگدر بالنشابه اكتلها گالك نيشن عالراس وانته ضربتها بذيلها تذكر لو اذكرك زين وشسوه بيك ابويه
نشمي : جنت زغير وابوك يريدني بيوم وليله اصير مثله هسع عوفنه لا تعتگ بالماضي المهم اني اخوكم الجبير وغصب عن شواربكم تحترموني اگدر هسع احلف عليك تگوم تغسل جواريبي
كواكب : هاي هم بالعسكريه تكاونون اجان وتمنجدونه جدام الوادم
باهي : كفيلج الله تلتم كلها بالحجره مالتنه ومزق وضحج للصبح حت الضباط مجابلتنا ومن حدرنه گامو يبجون ورانه
زهور : يبجون من فرحتهم عبن انگشرتو عنهم
باهي : اي ساجي شلون امك من رمت وگطعت الأسلاك
ساجي : لا تذكرني ظليت شهر مستحي من ابويه عبالك اني الي رميت
زهور : ليش ما تگومون تولون من هين اخيرلكم
نشمي : امت يجي ابويه
كواكب : ما ادري
نشمي : من يرجع يم منهي راح يبات بالله
كواكب : وانته شعليك شو غادي متستحي
يول بس مو صوجك صوج زهور
زهور : اني شعليه
كواكب : ضحكتيلهم من بدايه حجيهم
وطلعتي عينهم لحد ما گامو يسولفون الشارده والوارده
نشمي : هسع عش سويتها طلبه يمه استهدي بالله وگومي حفي ولمي امورج بس يرجع ابوي احجزه الج لو اندلها تصير بالفشگ ما اخلي يروح لغيرج
كواكب : ديالا ناوشيني القندره من يمج خن اگطعها على اثمه هاذ المستهتر اللفگي
ساجي : وبداليش امك عيني والله احجزه لأمي وذا تريدها حرب حرب
زهور : يبعد گلبي هاذ الحجي الزين
نشمي : دحگو شلون كيفت ورد وجها توج تعيبين على ساجي والله لو تأذنين
ما اخلي يطب حجرتج اول ليله لأم النشمي بلكت تخلفنه بنيه
كواكب : كافي يا نشمي تره تحملتك جثير
نشمي : ولا يخلن الواحد يسولف يالله اني اگوم.
وانتن الثلاثه تولمن كلجن للإحتياط تره الزلمه غايب 14 يوم الي يلزمها ما يرحمها
ديالا : نشمي گالها ونهزم وكواكب شايله القندره وتركض وراه فررته البيت يركض گدامها ويلتفتت عليها يگللها
نشمي : جاي اسولف لمصلحتجن الله اكبر شسويييت
ديالا : شبعنه ضحك عليهم فحطت كواكب وما گدرت تلزمه تالي فحت وگعدت سوت نفسها جكها سن رجع عليها نشمي وجان تلزمه من اذنه وتضرب بي بالقندره فلت منها ونهزم وما شفنا لليل
وره العشه اجونه گرايبهم يتعللون
گعدنه احنه النسوان بوحدنه والبعض منهن سممني بحجيهن عبن ما حبلت حجو گلام احسه شگ صدري صعدت لحجرتي وابجي شگد لح عليه شاكر تا اسولف وما حجيت شي
لزم وجهي وحت من عيني باسني
ما گدرت اغثه گتله تذكرت اهلي وبيجت
شاكر : يبعد روحي غير تسولفين مو ورمتي گلبي
يالله گومي تولمي من هسع وباجر نطگ الريوگ ونزرعد عليهم نظل لليل
ديالا : باجر جمعه والشيخ يريد يعزم العمام شلون نروح
شاكر : والله نسيت باجر جمعه يالله عجل لعگب باجر نروح بس مشي دموعج عج الله
كلشي ولا اشوفج تبجين
ديالا : صفنت علي شگد يحبني وما يوم غثني بسالفه شگد عالم گالتله اخذ مره صارلك 10 سنين من تزوجت وما خلفتو يرزلهم ويسكتهم
سحبني وحضني بحب وگام يغنيلي
ويمسد على شعري ويگرص خشمي
شاكر : فديتج وفديت هاذ الخشم الي جنه حمصايه
وهاذ الشعر الطولان تربات ايدي يابه
ديالا : ضحكت وحضنته صدگ تربات ايده جنت اظل اگصگص بي ما احب الشعر الطويل عبن جنت مفرعه من اخذت شاكر منعني اگصه وطول صار يغطي ضهري كله
نمنه وگعدنه عاد من الغبشه اليوم عدنه عزيمه
شاكر ذبح طليان وگصبهم وكواكب تعاونه
بلشنه بالغده وجان يجي ابو النشمي
تلگو كلهم يسلمون علي
اول ما طب وشمر اردانه وگام يعاونهم
التمو العمام وصبينه الغده
ومثل المعتاد سمعت حجي يغثني وما تحملت گمت ابجي واشاهگ لفت وره البيت
شافني نشمي وجان يجي عليه ويحلفني شبيه وليش ابجي
نشمي : مرت العم عج الله شبلاج تبجين
عمي حاجاج
ديالا : ما جاوبته من العبره الي بيه والشهگه
وهو مستمر يحقق ويايه وانوب اجو باهي وساجي وتخبلو
ساجي : اذا عمي حاجاج امشي لمي هدومج
واحردي لهلج
نشمي : لا ظلي هين بس سدي الباب ولا تخلينه يطب الحجره شلون من سويتي بالعرس وخليتي يتفلحط سوي اجان بالضبط
باهي : انتو مجاي تواسونها راح تهجمون بيتها بهاي نصايحكم وخرو عني خن اني انصحها
نشمي : خايب ما تكرص وتولي اني لگيتها گبل واني الي راح. انصحها واعلمها
ساجي :وخر انته اني اگول سوي مثل ما گتلج لمي هدومج واحردي ظليلج جم يوم راح عمي يدحج عالحجره فارغه وانتي ماكو يروح يحب راسج ويرجعج.
نشمي :انته ما عندك غير هاي السالفه احردي واحردي بالله فرضنا راحت شمدريك راح يرجعها وما يطگها بمره عوفيهم وصدي عليه
اني اگول سدي باب الحجره
وخلي يظل مشحون بره
ساجي : يخايب اكرص انته الأخر هذاك اليوم بالعرس ابويه وگفلها وما تكشمت هالنوبه يكسر الباب ويفوت يكشمها عود خلي نصيحتك تفيدها
باهي : تخسون والله خلوني انصحها
نشمي : يالله سولف راح تموت اواش ساجي خن نسمع
فضنه يالله
ديالا : گاعده واحطه راسي بين رجليه وفاطسه من الضحك عليهم خلوني اضحك واني جاي ابجي
گعد يمي باهي تك ركبه وگال
باهي : اسمعي مرت العم اذا الكونه مالتكم علمود گالج اخذ عليج
اي شكو بيها خلي ياخذ بس حطي شروط جثيره لازم شيجيب لهاي يجيبلج ومن هسع گليله من تصعدون السياره انتي بالصدر هاذ مكانج لا تنطينه ابد عش تبجين والله ولا انقهر انتي صيري اخير منها
ديالا : ختنگت گوه متحمله ما اضحك بعلو حسي مدنگه راسي وكتوفي تهتز يعبالون بعدني ابجي حطيت ايديني على وجهي وادحگ عليهم من بين اصابعي
ساجي ونشمي لزمو باهي من گدامي وجان يوخرونه
شالو من كتوفه
نشمي : هيه هاي نصيحتك الي لوما تريد تسولفها متت اسليمه اطمك اي والله شنهي تخلي ياخذ عليها
ديالا :تناگرو بينهم وجان امسح دموعي وگلت
اواش يولد والله ما بيني وبين شاكر شي
نشمي : عجل عش تبجين
ديالا : دنگت راسي
ابجي عبن دوم اسمع حجي يغثني عبن ما اجيب جهال
ضاجو الثلاثي وظلو واحد يدحگ على واحد
عفتهم وطبيت جوه
امل :ولمت الحمام لعماد وفات يسبح
طلعت اكنس الگاع گدام البيت مدنگه جاي اكنس
وجان ينرجد الباب بقوه فززني
رحت ناديت صبره وطلعت فتحت الباب وگفنه گلنه بالطرمه نشوف شكو
صبره فتحت الباب وجان يجفت علينه اخو
هاجر وار بنار اجه يركض على هاجر ويصيح لزمها من شعرها ويسحل بيها
گمنه نفازع واحنه ما ندري السالفه شنهي
هاجر علگت الدنيا بصيح
تملخنه ما يفعل يهدها يسحل بيها ويصيح اليوم اذبحها اليوم اطم عارها
ما حسينه الا جوانه زرعدي بساع وجيبي كربه ونوميها براسه وجان يگع الزلمه ولازم راسه
طلع عماد لابس ملابسه بالمگلوب
اجه يركض علينه وهاجر گامت بساع فاتت جوه سدت على نفسها الباب
عماد : شكو شصاير
امل :ما ندري هاذ اجه وجيت على هاجر يسحل بيها
الزلمه بعده دايخ وامدد بالگاع
اجه يمه عماد يسأله ليش اشو هاذ شاف عماد وتخبل
گام وجان يلزم عماد من ياخته ويگله
ــ وتسأل ليش يا انذال ما عدكم محرمات
ما تستحي ما تخجل والله اذبحكم ثنينكم واطم عاركم
امل : ظلينه فاكين اثومنه هاذ شبي
لزمه عماد وخنگه
عماد : منهو الي ما يستحي وما عنده محرمات اعرف سولف لا ادفنك اهين حيوان فوگ ما دايس بيتي وهجمت عالنسوان انوب انته ابو الراهي
ــ ما دايس بيتك انته الي دست عراضنه وخنت اخوك بكبره شلون تصاحب هاجر وهيه ارملة اخوك
ما عندك خوات وتخاف عليهن والله لذبحكم ثنينكم واطم العار الي لحگنه من وراكم
امل : لطمت وجهي وصرخت يبو هاذ شجاي يحجي
عماد انصدم وهد الزلمه
عماد : شجاي تگول انته تخبلت
ــ لا ما تخبلت صرنه علج بحلوگ الناس اليوم اطب المحل تا اترزق الگه رساله مكتوب بيها روح شوف اختك الأرمله شلون مصاحبه عماد اخو رجلها
وحاطيلي وصله بيضه ملطخه بأسود
شنهي معنى هاذ غير ان عرضنه انداااس
يتبع...............
احبكم من قلبي يا احلى متابعات لافيوووو
نشيل ما نظل