ما كان مُقدرًا لك سيأتيك و لو كان بين جبلين .
و ما لم يكن مُقدرًا لك لن يأتيك و لو كان بين شفتيك
عرين الصياد بقلمي شذرة
ديالا :قفلت الباب وظليت ارجف
رجليه تختض شوي واسمع صوت الهوسات
والهلاهل تحركت يده الباب
لزمت گلبي
گامو يدگون حيل واني ساده اثمي
وما افعل افتح
اجاني صوته
شاكر : افتحي الباب يولي منجدتينه شبلاج
ديالا : ما جاوبته ظليته ساكته وارجف
شاكر : افتحي الباااب بنت الوااادم
ديالا : ما افتح الباب امانه روح
شاكر : وين اولي افتحي المهجوم لا اكسره وابتلي بيج افتحييي
ديالا : گام يصيح عليه ويرجد بالباب واسمع والوادم تهجد بي
گمت ابجي وافتر بالحجره ياريت سمعت كلام ليال ونهزمت قرفصت وكورت اديني يم صدري وارجف
امل :گمنه نلطم اني وفاتن
رادت روحي تطلع لزمت وجهي صخنت
كلها بالصاله الفوگ لجتهم علت
گامو يهجدون بشاكر ناس تگله البنيه خايفه
وناس تگله طب كشمها شلون تسد الباب بوجهك ناس تضحك وتنادس
والبعض منهم الشماته بوجوهم
ما گدرو يضموها
انهد حيلي اني وفاتن گعدنه بالگاع
وادحگ عليهم هايطين
عاط بيهم صياد وسكت الكل
صياد : كاااافي انلصموو ولا حس يالله حدرو جوه ما اريد هين ولا اشتر
امل : حدرو كلهم ناس تطرد بناس وما ظل بس صياد وشاكر والشيخه خزامي وشيخه جوريه واگفين بالباب يبوو شگد خزي ومنجده دخيلك ربي استرنه
صياد اخذ شاكر بزاويه
يحجي ويا هجده گعد شاكر
ورتاج عالحايط حط ايده على خده
رجع صياد حجه ويه الشيخه خزامي
وجان تصد علينه واجت متت بدمي
تخسين يا ديالا شسويتي
خزامي : يمه لا تشيلون بال احنه نعرف البنت زغيره وما تفتهم تعالن احجن وياهه خل تفتح الباب برضاتها حرامات ينكسر الباب بليلة العرس وتصير سوالف ما تسركم ولا تسرنه
امل : گمنه اني وفاتن بساع دگينه الباب ونتوسل بديالا تفتحه نحطينه بموقف ما ننحسد علي
ادحگ شاكر عيونه گامت تجدح وصياد يفتر يمه وخازره
سعاد : الي فتهمته من ربعنه صياد معاند الكل وخاطب ديالا لشاكر عمامي معارضين گايلين بنواتنه ما بيهن قصور ليش صياد ياخذ الغريبه لأخو ما كفاهم هذيج الي بعرسها مشعل صار جوه التراب
واگف بنصهم صياد وگايل
صياد :بنوات عمي على عيني وراسي
بس شاكر يعدهن خواته ما اجبره عليهن
عاد اني رايح اخطب البنت
تجون وياي خير على خير
ما تجون اني وحدي اكفي وحجي زايد ما اريد ،،
سعاد :رايحين ويا عبنهم يدرون بي من يعزم على شي يسوي بيهم وبلياهم
جان حاس بالفخر طول فترة العرس لحد ما ديالا سدت الباب بوجه شاكر وبلش الحجي
والندس عاط بيهم وطردهم جوه
حدرت وياهم والله اني هم اخاف منه وگفو جوه وگام يحجون اشكال والوان كل ما اريد اردهم تگرصني امي وتگلي معليج انتي
لجو وعلت اصواتهم وضحكهم خاصة البعض من بنوات عمي والنسوان
حدر صياد بخطوتين طب بنصهم الكل كرص وانبهت وناس ادحگ على ناس
وصياد صاك على سنونه وصاك ايده
وگف بنصهم وگال ،،
صياد : بالقرعان الي يفتح بوزه بسالفه
الا اعلگه بالجنگال واجلده ليما افح
واحطه اجل للجلاب وانعل هيدا
انجان هسع وبعدين لو وراه مليون عام يا ويلكم الي اسمع بي هاذي بحرف يمس اخوي وحرمتة اوركم ور
والي بعث محمد بالحق اشلع جلودكم وانتو عايشين ترضون بهاذ الحجي تظلون هين تگولون ما نرضه انگشرو كلمن على مهجومه واني ادواكم بعدين احجووو احد عنده عتراااض،،
سعاد : الصاله على كبرها مليانه بشر محد نطق بيهم حرف هدوء تام بحيث صوت سنون صياد وهو يحد بيهن ينسمع يدحگ عليهم وينتظر احد يجاوبه ماكو عافهم وصعد فوگ
ظلو الكل ساكت حت بغياب صياد محد حجه
بس يبلعون برياگهم ومحد بيهم راح عبن الي يروح معنى معترض على كلامه ظلو غصب عنهم
اشتفيت بيهم يستاهلون
صعدت فوگ شافني صياد وخزرني
دنگت وفتريت تا ارجع ناداتني ليال واجت يمي لزمت ايدي اتوسلني اظل يمها
دحگت على صياد غمضلي عيونه يعني ظلي
كيفت ومشيت ويه ليال وگفنه بعيد عنهم جانت خايفه وترجف ،،،
ليال :والله احسن ديالا قفلت الباب وبلكت ما تفتحه
سعاد : يولي نصي حسج لا يسمعوج
ليال :همزين سعاد اجت يمي
كمشت ايدها وگفت
امل وفاتن راحن يدگن الباب على ديالا
بلكت ما تفتحلهن
سعاد :دزو عليه اهلي مدري شعدهم
صديت على ليال اطمنها
هسع شويه واجي ظلي هين
ليال : ليش وين اروح هوه ظاله هين مدنگه اعصر بأديني خايفه واعض بشفتي
رفعت راسي شفت صياد يدحگ عليه ومتعصب هاذ شبي عابس ويحد بسنونه
صد بصفحه ورث جگاره وگام يدخن
ويفتر يم شاكر گعد يمه تك ركبه ويحجي ويا ويطبطب على جتفه
..
ديالا :ما اريد افتح الباب ما اريد عوفوني
امل : افتحي الباب يولي منجدتينه افتحي
ديالا : ما افتح ولا باب روحو من هين
شتريدون مني
امل : شلون شنريد منج هاي حجرة الزلمه افتحي يريد يبدل ملابسه ويطلع
ديالا : جذب والله جذب
خلي يروح يبدل بغير حجره بيتهم مليان
امل : يبو يهالعثره ديالا افتحي الباب اذا سمع عماد يزعل منج عيب والله عيب تفشلنه ويه الوادم افتحيي
ديالا : هو اني اريد اگول لعماد شراح يسون بيه واخلي يبطلني من الزواج
امل : لا تخليني اشگ هدومي شنهي يبطلج انتي بدرس ويبطلج بس افتحي الباب هسع
وخن نفوت جوه نحجي
ديالا :ما
فاتن : افتحي ديالا خن نحجي وياج يالله بنيتي راح اتمرض دخت ولعبت نفسي اخ راسي امل الزميني راح اموت عينج عالجهال ااامل
امل : فاتن حجتها وعضتلي شفتها فتهمت عليها وگمت انادي لا فاتن اگعدي يمه الحگوني وگعت فاتن من وراه ديالا الحگوني
ديالا : صرخت ولطمت على وجهي وگعت فاتن
فتحت الباب بساع اشوف شكو وجان يجفتن جوه امل وفاتن طلعن يجذبن عليه لزمتني فاتن تكفخ على راسي ،
فاتن : انتي شلون تسدين البااااب بوجه الزلمه زماله كون اليوم مو عرسج ومو بيت الشيخ هاذ االا اصگطج تصگط وانعل بليسج
ديالا : حاطه ايديه على وجهي احمي نفسها منها گمت ابجي واعصر بأديني دفعتني عالجربايه انفعلت وگامت ترجد بروحها وامل تهجد بيها
رجعت لزمتني من اكتوفي وتخضني
شبعني رزايل
ما حجيت بس مدنگه راسي وابجي
امل : كافي فاتن هسع العالم تعبالي اكو شي
فاتن : ليش ظل شي تا يعبالون ما سمعتي الحجي بأذنج وشلون العالم سوت وتشمتت اكيد هسع اشكال السوالف صفطو ومو بعيده يگولون عليها مو بنيه
امل : لا يمه اسم الله شهل حجي والله اذا سمعو عماد وحميد ينجلطون
فاتن : خليهم ينجلطون بلكت تكيف ديالا وتحني ايدها خزت اخوانها
ديالا : سديت اذاني عن حجيهن يربي اني شسويت
ما اريد اخواني يزعلون مني محد گالي الزواج هيج جان ما وافقت غطيت وجهي گمت اشاهگ
ليال : فتحت ديالا الباب وجفتن امل وفاتن ظليت واگفه وحدي وارجف خنگتني العبره گمت ابجي
صياد يدحگ عليه يريد ياكلني
يربي هاذ شبي بواگ الربطات
اني شعليه وخازرني مدري شنهي حجه ويه امه واجت يمي حضنتني وتمسح وجهي
خزامي : عش تبجين ول بنيتي مشي دموعج تره مو بس يحدرن على خدج جاي يورن گلب عزيز القوم
ليال : لو بس اعرف شنهي عزيز القوم هاذ جان رتاحيت حطت ايدها على ضهري گامت تمسد على شعري وتلهيني بالحجي
انفتح باب حجرة ديالا وطلعت امل نادت الشيخه خزامي وجوريه راحن ومشيت وياهه ما خلتني امل افوت گالت ارجعي بمكانج هسع نجي
رجعت وگفت بمكاني ما ظل احد بس اني وصياد وشاكر
مدنگه راسي اخط برجلي بالگاع وجاتفه اديني وراه ضهري شاكر على گعدته حاط ايده على خده وصياد يفتر كل ما ادحگ علي اشوفه مركز بيه وخازرني
يبو هاذ بس لا سمع بيه اني حجيت ويا ديالا وگلتلها نهزمي برطمت صديت بصفحه عنه شسويله اختي هاي عجل اعوفها عوزك والله يا بواگ الربطات
امل : طبن الشيخه خزامي وجوريه ام شاكر يحجن ويه ديالا ويهدئن بيها سكتنها من البجي والشيخه خزامي گالت اطلعن كلجن طلعنه وظلت بس هيه يم ديالا
ديالا : گعدت يمي الشيخه وحبت راسي
خزامي : بنيتي لا تفشلينه انتي ختيار صياد لأخو اختارج من بين كل البناويت وعارض الكل تدرين هسع كلها شتفت بي عبنج سديتي الباب بوجه اخو وكل هاذ وصياد ما خله احد يحجي عليج
كرصهم وطردهم جوه
عاد يمه ارفعي راس اخيج الصياد اعتبري عماد واگف بره يريدج تبيضين وجهه جدام عمامه والله شاكر خوش وليد معدل وسبع اذا عرفتي تصرفين يخليج تاج على راسه زلم هاذ البيت يحبون المراه ويحترمونها ما يرفضولها طلب ابد لا تخافين منه
ديالا : ظلت تحجي ويايه فتره وراهه گامت وگفت بالباب ونادت شاكر بطني وجعتني مجرد گالت اسمه اجه عاگد الحواجب عيونه حمر فات وجان توصي بيه
خزامي : عود صير ادمي شاكر سمعت صياد شحذرك
ديالا : هزلها راسه وطلعت سد الباب وراهه وقفله لزمت الجرجف مال الجربايه ارتعبت اجه يمي لزمني من حنجي وصاك على سنونه
ليال : طلعو كلهم وطب شاكر اني لحالي ارتعبت
حدرت الشيخه ونادت ربعهم من جوه صعدو فوگ يغنون ويجوبون ويوهسون ولا جنهم گبل شوي ترزلو اجت يمي سعاد كيفت
سعاد : ها يولي فرجت والله اختج سوت ضجه بهالبيت وترزلو من وراهه يستاهلون
ليال : ما حجيت شي بالي يم ديالا
ديالا :شاكر طب متخبل لازمني من حنجي قوي ويصيح عليه اريد احجي ويا مگدر خفت منه
شاكر :شلون تسدين الباب بوجهي وتفشليني وتشفين الناس بأخوي صيااااد تفشلين ابو النشمي يولي منهو انتي هااا والله لوما يوصيني بيج ويحذرني الا اگضي بيج التوبه واربيج من جديد
ديالا : لزمت ايده واخرها من حنجي وجعني
گمت ابجي واشاهك
هدني وغمض عيونه يستغفر
اخذ فره بالحجره تخوصر ويدحگ بالگاع
نزع سترته والقميص كورهن ولگحهن
بنتر ورجع تخوصر
غطيت وجهي ابجي اجه يمي
لزم اكتوفي ويبلع بريگه
شاكر :هاي الي صار صار راح اعذرج عبنج زغيره وخايفه دحجي لا تخافين مني اني لو بيدي اخليج على هواج وامت ما رتحتي وامنتي بيه بس عمامي بره يردون نيشان هاي عاداتنا وانوب انتي جملتيها بهاي سواتج صار حجي اشكال عاد مجبورين ثنينه
لا تعبيني تا ما اذيج سلميني نفسج وامني بيه هيه دقايق وتفض ما اطول ولا اريد الطمع بس اخذ النيشان اسد حلوگهم
ديالا : كلشي مجاي افتهم من كلامه
بس اني عرفت شيريد بطني وجعتني من الخوف ارجف من ساسي لراسي تنصنمت ما حجيت عبن خفت على عماد وحميد خاف يسمعون بيه ويزعلون مثل ما گالت فاتن وينجلطون
ما تحركت ولا قاومته تصرفت مثل الي ذبت روحها فدائيه في سبيل اخوانها
مسح دموعي وباس راسي نزعني البدله حضنت نفسي غطيت صدري لبسني سيت نوم ابيض
فقد ظل يدحگ ارتعبت من نظراته وخجلت
حضني وشم رگبتي عصرني عصر وباسني
جنت جسد بدون روح
يگلبني شلون ما يريد
ومثل ما گال ما طول وخلص كلشي ما اذاني ولا تعبني باس راسي وگال م
شاكر :بارك علينه
ديالا :ظليت مصدومه من نفسي ارجف من التوتر والمستحه حت الدمع جمد بعيوني گام لبس دشداشه بيضه وطلعلي دشداشه حمره نزعني الثوب الأبيض
گال هاذ بي النيشان شاله وخلا عالجربايه ولبسني الدشداشه رتب الحجره وعدلني لم كلشي
حضني بقوه همس يم اذني
شاكر : والله ما مدي اطلع بس مجبور
ترافتج نستني حرگة دمي والفيانه مالتج
ديالا : لزم حنجي بلطف وباسني راح فتح الباب وگف شوي واجت الشيخه خزامي
ردت اگوم ما خلتني ظليت گاعده
دحگت عالثوب شافت النيشان وگامت تهلهل
شاكر باس راسها وجان تباركله واجت باستني وباركتلي
خزامي : مبارك يبنيتي ان شاء الله الولد الصالح
احجيلي يمه اعتبريني امج بيج شي فحانه مرضانه لا تستحين مني
ديالا : دنگت خجلانه واعصر باديني
هزيت راسي بـ لا ما بيه شي
خزامي : هاي الحمد لله تمت على خير عجل اطلع انادي خواتج وانته شاكر ما تطلع لو تريد تظل مو العالم فحت رجليها من الدبج يابه
امل :من شاكر فتح الباب وطبت الشيخه
لزمت گلبي وادعي يربي
ما تكون ديالا فشلت الزلمه وكاونته
شوي وطلعو والشيخه وگفت بالباب هلهلت
والعالم گامت تراعص زعم هاذ رگص
الحمد لله يربي الضاهر تمت على خير
سلمو على شاكر وباركوله
رحنه اني وفاتن وليال وسعاد طبينه على ديالا
سعاد : ادحگ على ربعنه يرگصون جذب يرجدون برواحهم هاذ كله خوف من صياد حيل بيكم
طبينه على ديالا جانت گاعده عالجربايه وترجف
من شافتنه دنگت حضنتها فاتن وبوستها باركنالها
تعصر بأديها ما حجت وليال ظلت واگفه وعيونها مغورگه باركتلها وبست راسها استخطيهن هالبنات بلكت الله يسعدهن
ــ مبارك ديالا الولد الصالح يارب
فاتن : ليال ما تجين تباركين لأختج
ها ديالا اشوفج ما متي مثل ما گالت ليال
ديالا : ما حجيت فشلانه همه شلون مكيفين بهاذ الشي وجاي يباركون والله عيب اشو كلها ترگص وتغني يعني الناس كلها تعرف احنه شسوينه شلون راح اسلم على اخواني واهلي بعد واحط عيني بعينهم يعني ليال هيج صار وياهه
اجت ليال وتربعت بالگاع يم رجليه
وعيونها مغورگه
ما گدرت اجابسها نزلت عيوني وما حجينه شي
فاتن : شبيجن وحده ادحگ على وحده وساكتات
امل : ههه عوفيهن يسولفن ويه بعض بالعيون
ديالا : فعلاً حجينه ويه بعض بالعيون هسع فهمت ليال ليش جانت خايفه وتصيح اكيد تأذت ونرعبت وخافت عليه اصير مثلها عصرت اديني وبجيت عليها شگالت بوكتها وهي محد يمها من اهلها
اندگ الباب فتحته امل
وفاتو نسوان تباركلي وتسلم عليه
واجو زوجات صياد يعرفن بنفسهم ويسلمن
كواكب : مبارك حبيبة ان شاء الله تهرشون وتجرشون انتي وشاكر وتترسون البيت جهال اعرفج بنفسي اني مرت ابو نشمي الجبيره احنه ما جينه بالمشيه ولا بالزفه هسع نعرفج بنفسنه
هاي دله ام باهي مرت ابو النشمي الثانيه
وهاي زهور ام ساجي مرت ابو النشمي الزغيره
احنه بس بالأسم ضراير بالصحيح احنه خوات
وان شاء الله انتي هم اختنه
امل : الله يحفظجن ويديم خوتجن
عينجن من ديالا مثل متعرفن هي زغيره
دله : احطها بعيوني واعرف شعورها هسع عبن تزوجت ابو النشمي واني بگدها كلشي ما اعرف الحمد لله لگيت كواكب جدامي ما گالت انتي ضره حسبتني اختها الزغيره وعلمتني
امل : الله يديمها يارب
ليال : شگد حلو هذول الضراير عبالك خوات عجل ليش صبره عادت امي امدها تاكلها
وتوحه ونضال كل ساعه كونه وناس نتنف بناس ليش ما يصيرن مثل هذني
هاذ البيت مبين خوش والناس زينين اني بعرسي محد طب عليه باركلي ظليت مسجونه وكت وهسع ديالا كلها تفوت تبارك وتگللها اني اختج ناس زينين الحمد لله احسن من بيت صائب بجثير بلكت ديالا ترتاح
امل : فاتت نجمه سلمت علينه وهم باركت لديالا
هاي امت اجت اشو ما شفتها
وشدعوه حاطه زواقه هالكثر مالطه نفسها ملط
بس لا بعدها تسحل بروحها على صياد
طلعن نسوان صياد كلهن ادحگ زهور خزرت نجمه
وهاي عوجت اثمها وصدت بصفحه
يمه يا برودجن لو اني انتفها نتف
ديالا : كل شوي تفوت ناس شكل تبارك وتطلع شكثرهم هذول بلكت كلهم عايشين هين
والله اكيف غيرو نفسيتي شوي
عبن يحجن كلام حلو مزقن وضحكن ورگصو بحجرتي ضحكوني
جان الوضع خوش لحد ما گالت امل يالله نروح
لزمت اديها واتوسلهم يظلون
امل : يبو يهالعثره وين نظل يمج صيري سبعه واسمعي كلام زلمتج يولي عيالج ينحطون عالراس شفتي حجيهم عبالك ذهب لوما احب عماد الا اطلگه واخذ منهم
ديالا : ضحكن هيه وفاتن
وظلن بالساعه يوصن بيه ويعلمني
ليال : انتن روحن اني اظل هين
فاتن : الله يصگعج وين تظلين
ليال : اظل يم ديالا عود ما ابات يمهم ابات يم الشيخه
سعاد : ينعل بليسج يا ليال بسلت السالفه بسل وخلت امل وفاتن فاكات اثمهن
ديالا : خلوها تظل شتردون منها
امل : اسمعو الأخرى شتگول گرة عين زلمجن
امشي ليال گدامي يالله
ليال : ما اروح امانه اريد اظل والله ما ابات يمهم احدر جوه ابات بحجرة الشيخه
امل : لا يمعوده خاف زحمه باتي هين بين ديالا وشاكر تا شاكر يشيلج ويلگحج من البيتونه لو يرجع ديالا ويانه
ديالا : گامت ليال تنعوص وحرجت الا تظل تنگز وتضرب رجلها بالگاع خلت فاتن وامل يلطمن
وسعاد تضحك
بوسني وصني بنفسي
واخذن ليال سحل جلبت بالباب
گشطنها گشط وطلعن
احس روحي طلعت وياهن ظليت وحدي بالحجره
امل : التوبه التوبه امشي على مكان وليال
ويايه منجدتنه لعبت بينه طوبه
خبلت ديالا وهسع تريد تظل ما گشطناها الا تفلنه المر
هالمصگوعه من كل عقلها تضرب رجلها بالگاع
وتبجي مثل الجاهل گرة عينك صائب
انوب تگول عود ما ابات يم ديالا ابات يم الشيخه
حدرنه جوه جلبو بينه نظل شوي انوب وما فعلنه جهالنه اني وفاتن بالبيت هسع لعبو طوبه وطلعو عماد وحميد من الأسلام
وگفنه بالطرمه تا نروح ويه صائب
اجت الشيخه گالت صياد يوصلجن
يمه شلون يوصلنه بالليل وحدنه اني فاتن والطريق طويل ظليت صافنه وادحگ على فاتن ردت احجي وجان اشوفه طلع ويا مرته زهور بطنها واصله خشمها ،،،
زهور : ها يحبايب يعني ما عنها عزمتن تروحن
امل : اي والله نروح جهالنه بالبيت وبس العجايز والزلم غادي
زهور : عجل يالله نتوكل ونتواجه جثير ان شاء الله
امل : راحت وصعدت گدام بصف رجلها
اني شلون راح عن بالي صياد زلمه معدل تربات المضايف اكيد ما يوصلنه وحده جاب مرته ويا
مشينه وصائب ورانه والطريق كله ساكتين محد حجه غورگن عيوني دموعي گامت تصب من ودعنه ديالا ما گدرنه نبجي التهينا نگشط بليال من يم الوادم
وصلنه بالسلامه عزمتهم يظلون ما فعلو وراحو ،،
سعاد :طول الطريق وليال زعلانه وادردم
مهبوله تريد تظل هين الله يكبر عقلها
سكتت من كيفها ونامت على جتفي،،
ديالا :ادحگ حواليه وحدي بالحجره
ظليت صافنه ويه روحي تخيلت حيدر گدامي
اسمع صوت ضحكاته وسوالفه
وجعني گلبي شهگت ابجي
گمت قفلت باب الحجره خفت احد يفوت
گمت الوب وامسح برگبتي اختنگت
يمه شگد يوجع الحب ويموت
سديت اثمي واصرخ صامت
امت حبيت اني امت عشگت
شلون صار هيج هاذ مرض والله مرض
گعدت وقرفصت نفسي
تذكرت اهلي وخاصة عماد
گمت احجي ويه روحي
شسوالنه الحب اخذ اعزاز گلبي ودمرنه شتتنه بين العرب دموع عماد من يبجي بذله هاي ما انساهه ولا تروح من بالي شگد عزيزه دمعة الرجال اثاري
دحگي لحياتج يا ديالا من زاويه ليال
وضعي اخير من وضعها بجثير
هيه تزوجت معلمها واكبر منها بجثير انغصبت وتمرضت والله الي يعلم شصار وياهه من تزوجت
لا يمها ام ولا يمها اخت ولا صارلها عرس مثل البنات
اما اني اخذت ابن شيوخ ومو جبير عليه شاب حلو ومرتب وسبع يكفي انو هو اخو الصياد
سوالي عرس شيوخ ما خله نقص واهله ناس زينين
هاي هي تقبلي حياتج ويه شاكر ولا تفكرين انسي واسمعي كلام زلمتج مثل ما علموج
مستمره احجي ويه نفسي اندگ الباب مسحت دموعي بساع وگمت فتحته
طلع شاكر ابتسم وفات قفل الباب سحبني لحضنه
شاكر : ها شجايج ما قفلتي الباب وخليتيني مشحون بره لو فكرتي ويه نفسج ما ظل عندج شي تخسرينه
هاي جاينه تبجين يولي
ديالا : جاوبته بدون ما ارفع راسي
گتله بجيت عبن راحو اهلي
شاكر :يالله هو سبوع ويجونج وكل ما شتگتي اوديج عليهم ما اخليج تفگديهم ابد
ديالا : ظليت مدنگه وبتسمت بحزن
شاكر : اشو كارصه ما تحجين شو ارفعي راسج دحجي عليه
ديالا :حاوط خصري وخله اديني على رگبته
ويريد ادحگله
بلعت ريگي ورفعت عيوني
شگد مكيف عبالك جان منتظرتني سنين
صافن عليه ويعض بشفته
شاكر : اويلي شتخبلين الله يعين گلبي
شيطلعني من الحجره بعد
ديالا :لزمني تبوس اريد اتنفس مگدر
اندگ الباب وما يفعل يهدني الا رجدو رجد
راح يفتحه وهو يدردم
ناوشو الصينيه جابولنه العشه حطها بالگاع
وگعدني يمه دنگت اعصر بثوبي
شاكر : هاذ الثوب لو عنده السان جان سولف
شبلاج يابه تره ما ظل شي ينخاف منه
ديالا : گام يسويلي لفات ويوكلني گوه
لحد ما حطيت ايدي على اثمي وگلت بعد ما اريد
گام وده الصينيه وطلعنه غسلنه جان محد فوگ ولا نفس ورغم هاذ شاكر لفني لف لبسني ملفع طلعت جني الخبله وفوگ الدشداشه لبسني صايه
غسلنه ورجعنه نزعت الملفع والصايه
قفل الباب واجه
شاكر : وهسع نرجع لموضوعنه
ديالا : لزمني من وجهي بأدينه ثنين
وباسني بقوه عبالك اكلني ضجت حس عليه عض شفته وحضني لزمني من حنجي وگال
شاكر : هسع تگولين بگلبج شبلا نهبل مو
اي اني مهبول اليوم لا تلوميني مرتي حلوه وتنگرط واليوم يومي وهاذ عرسي
ديالا :شالني اخذني عالجربايه
ما انطاني مجال احجي واتنفس
ولا فك مني ياخه لحد ما گام من كيفه
لميت نفسي اغطي بروحي
ختنگت گمت ابجي
انبهت ولزم وجهي گام يمتمت
شاكر : شبلاج تبجين بيج شي احجي شتهجسين انادي امي هسع اصبريلي
ديالا :توتر وگام يبلع بريگه
هزيت راسي وحجيت بعبره مابيه شي
شاكر : عجل شبلاج تبجين
ديالا : لحالي هيج خفت
لزم حنجي وابتسم
شاكر :لا تخافين ما ظل شي يخوف
تره والله گوه گاضب نفسي ما اذيتج
وهاي بعد ما تحسين بوجع من اليوم
يالله گومي نسبح مزال كلها نامت
ديالا :لفني لف عبالك مهدني طلع گدامي
ماكو احد گادني ورحنه عالحمام
گام ينزع بملابسه فتحت اثمي
گتله تريد تسبح يمي اطلع امانه
خن اسبح عود انته ورايه
ضحك وحضني
شاكر : ليش عود اطلع مستحيه مني
ديالا : عضيت شفتي وهزيت راسي بـ اي
شاكر :كل عگلج مستحيه
عجل تونه بالحجره شجنه نسوي
ديالا :جنت ساده عيوني ما شفتك
اطلع هسع امانه ضحك بعلو حسه
شاكر : ساده عيونج لا يابه تمزقين
اسمعي من اليوم مستحه مني ماكو نسبح جميع وشريد اسوي لا تعلين گلبي خوش
وهاذ اني راح اسبح جدامج تعودي مناليوم
ماريد افارگج
ديالا : نزع ملابسه وجان ينزعني گوه
وسبحني شگد ما يستحي
يغسل بجسمي ويضحك مكيف
شاكر : تستحي مرتي زعم بالحجره جنه نتعلم الأخلاق
ديالا : نشفني هوه لبسني هدومي ورجعنه عالحجره وگفت گدام المرايه ونشف شعري
شاكر : هاذ من گاص شعرج اجان
ديالا : اني
شاكر : وجع مكيفه مجان تنكسر ايدج ياويلج انوب تگصين شعرايه وحده ابتلي بيج
ديالا : برطمت هاذ شگد يتأمر ادحگ عالساعه 11 ونص تذكرت صلاة العشه اني ما صليت
شافني صافنه سألني
گتله نسيت الصلاة
شاكر : صلي هسع تلحگ
ديالا : كيفت وطلع ويايه توضيت ورجعت فرشت السجاده وصليت وهو مرتاج عالجربايه فتحلي حضنه رحت يمه امشي على كيفي خايفه لا يرجع انوب
سحبني لحضنه وباس راسي نومني على ايده
غمضت عيوني وما گدرت انام ولا هو نام ظل يدحگ عليه ويلعب بشعري ويگلب بوجهي يمكن بحياته مو شايف بنيه مدري امت غفينه
والصبح گعدت على لمساته
جان يبوسني واني نايمه ويشم بيه فتحت عيوني وجان يبتسملي باسني يم اذني وهمس
شاكر : يا حلاتك يهل صباح اصلي وادعيلك ابو النشمي الله يطول بعمرك
يالله گومي نحدر جوه تدرين الساعه 9 ونص واحنه نايمين صدگ حسيت اني بشر يوميه صياد يهجم عليه من الغبشه عبالك اني نباش گبور
ديالا : گمت ويا راح بدل
واني طلعت دشداشه لبستها ومشطت شعري ظل واگف يدحگ عليه وساكت گتله شبيك يالله مو تريد نحدر جوه
شاكر : اي شو ما لبستي ملفع تريد تحدرين اجان جدام اخواني
ديالا : برطمت ورحت طلعت ملفع حطيته على راسي
منين ما اجيبه ينصل ما اعرف اسوي
وگف هوه ولف شعري ولبسنيا
صاده عالمرايه حضني من وراه وحط راسه يم رگبتي وگام يحجي ويايه ويوصيني
شاكر : اسمعي يا دلال گلبي احنه بهاذ البيت ماشين على نضام من وعيت على نفسي هو موجود وما تغير ابد حجابج ما ينزل من راسج الا بحجرة نومنه هاي
وجدامي بسس
نسوان ابو النشمي صارلهن سنين
محد شاف شعرايه من روسهن
عاد احنه جنه زغار من تزوج ام النشمي
ربتنه وتستحي من عدنه
حس عالي للمره بالبيت ماكو
مناطله ومكاون ماكو
نسوان ابو النشمي عبالك خوات مو ضراير
هاذ البيت مو مثل بيت اهلج بالطبع ان شاء الله ما نقصر وياج نحبج وندللج ازيد منهم بس فيحة غادي ماكو هين انتو غادي طول الوكت لابسات گصير ومفرعات جدام الزلم اريد افتهم انتو مو اسلام مثلنه لو دينكم وحد
هسع انتي زغيره شمعرفج بس عتبي عالزلم
المهم يا دلال گلبي
هين لبسج كله طويل وحجابج يغطي راسج ورگبتج زواقه جدام اخوتي ماكو عندج الحجره هاي وتصلخي براحتج اكيف افقد ههه
اي اسمعي بهاذ البيت
ابويه الشيخ هو ابو الكل
كل العشيره تحترمه وتهابه بعتبار هو الشيخ واجبج تحترمينه مثلنه اعتبري ابوج من تشوفينه گومي بوجهه وسلمي وتلگي وذا يطيعج على شغله روحي بساع
هاذ للإحتياط احنه ما نشوف ابوي الا نادراً بالبيت
وابو النشمي هو درع عشيرتنه كلها والناس تهابه خوف وحترام وهو الكل بلكل من بعد ابويه حت بوجود مشعل الله يرحمه ابو النشمي هو جان ذراع ابوي اليمين والجبير هين وبكل مكان
واجبج تحسبينه مثل اخوج الجبير
وعزت وعرب اخواني هم حسبت اخوانج
احترميهم الكل
ابو النشمي عنده ولد جثير صلاوات عالنبي
ومنهم ثلاثه شباب نشمي الجبير وساجي وباهي
هذول ملح البيت اذا التمو محد يگدر يسد بوزه من الضحج
بس انتي خليج ضمن حدودج ولا تماينين وياهم تا يظلون يحترمونج الميانه الزايده تشيل الأحترام
امي الشيخه جوريه ما تدخل بأمور البيت افقر منها هين ماكو مو عبنها امي وامدحها اريدج تحسبيها امج وتظلين وياهه هيه حزينه على اخوي مشعل الله يرحمه واحنه مدارين مشاعرها
الشيخه خزامي ام صياد هي الي ادير امور البيت وحتياجاته تگدر تگولين المفتاح عدها
ومحد معترض البيت ماشي بالعدل وما فد يوم صارت طلبه
احنه الثلاث اخوان عزت وعرب واني كلنه نمشي بطوع ابو النشمي وين ما يأشر نگف عن نفسي اذا يگلي موت اموت
عاد اذا شفتيني يوم افدي بروحي لا تستغربين وتگولين رجلي ذب نفسه فدائي لأخو
اني احبه وغالي عليه هو معادل روحي
كواكب مرت اخوي الجبيره هيه بنت عمنه
واكبر من عدنه كلنه نحترمها
واحنه هين محد ينادي نسوان ابو النشمي بأسمهن
كنيهم بأسامي ولدهم
المرأه بهاذ البيت نحترمها ونقدرها ما عدنه مراه تنضرب ولا تنهان جدام احد
خصوصيات الحجره لأختج بنت بوج ما اريدها تطلع
تحتاجين شي ممنوع تطلبين من غيري
بيتنا مضياف ما تدرين بأي ساعه
ودقيقه انترس اوادم لهسبب
نضام الأجل هين
الريوگ عالساعه 7 ونص
والغده وره صلاة الضهر
والعشه وره صلاة المغرب
تحسباً للخطار لازم نكون مكتفين
هسع ما تلگين احد بهالساعه ابو النشمي والولد كلهم يحدرون عالشغل ناس عالگاع وناس الدكاكين والمخازن وابويه لو يطلع بطلبه لو يجابل المضيف
وامي والشيخه خزامي بحجرة الشغل يخيطن لحف ويطرزن من يأذن الضهر تلگين الكل التم
ماكو بس نسوان ابو النشمي هين حالياً
يگعدن من الصبح يكربن بهالبيت
تلگينهن بالمطبخ ما يطلعن منه
وذا رحتي يمهن شتسمعين منهم ممنوع يطلع
الغيبه والنميمه ممنوعه ما نحب المره الي تسوي علوم ابد ،،،
ديالا : فرني علي ولزم حنجي
شاكر : وهسع احدر اجيب الريوگ خن ادللج
ديالا : ابتسمت وما حجيت شي
غمزلي وراح
صديت عالمرايه ادحگ على نفسي راح اتحمل هاي العيشه اني ما متعوده على نضام محدد
مسحت وجهي ودعيت ربي يوفقني
شويه واجه جاب الريوگ فات يضحك
شاكر : تدرين ابو نشمي محذر ربعنه محد يدگ علينه الباب لو نظل نايمين لليل ومبلغهم محد يجي من الصبح يباركلنه گايللهم الضهر تعالو
واني اگول اشو محد دگ الباب اثاري الصياد صاگرهم
ديالا :حط الصينيه بالگاع وناداني
وكلني بيده ويدعي للصياد
شاكر : الله يطول بعمرك ابو النشمي
ديالا : كافي تحجي بالزلمه راح اطگه بعين
دحگ عليه وهو يلوك بلع اللگمه وگال
شاكر : شطگه بعين مهبوله انتي جاي ادعيله
تدرين اني ما جانت بنيتي اعرس هسع اصلاً هوه يكرب علينه شغل ومهمات ما عدنه وكت نفكر بنفسنه بس اجاني وگال راح اخطبلك اخت حرمة اخونه مشعل
وراح بدون حت ما يسمع رئي اي لو لا
ديالا : يعني انته مو موافق
ضحك وغص باللگمه ضرب صدره وگال
شاكر : شلون مو موافق مهبوله انتي طرت اصلاً خاصة من عرفتج انتي كيفت
ديالا : استغربت وگتله وين شايفني اني ما شفتك ولا جنت اعرفك
دحگ عليه بتك عين
شاكر : تذكرين من نوبه طلع اخوج الزغير وجان ينطج بوكتها رحت علي نفضته وجيتي انتي تنادينه وشفتج شبعت شوف
ديالا : ظليت فاكه اثمي اي تذكرت يعني هاذ انت شجابك غادي جنت عباليك شاحوذ
جاوبني بضحكه
شاكر : جنت بشغل هسع كافي نحجي اكلي يبعد گلبي
ديالا : گام يلف ويدحس بأثمي خلاني اشبع گوه
شاكر : يالله ناخذ الصينيه ونحدر محد هين بس نسوان اخوتي خن اشوفج البيت گبل لا تلتم الوادم وتجي تبارك
ديالا :گمت شلت الصينيه طلعنه من الحجره گال
شاكر : اواش خن اشوفج هاذ البيت
عود نحدر فردنوب
ديالا : ذبيت الصينيه وجان يگودني
نمشي بالبيت الفوگ بيتهم جبير عبالك قلعه
فوگ خمس حجر نوم وحمامات ثنين
وكلهن الحجر نفس الكبر وصاله زغيرة عرفني عالحجر كلهن وحده مال مشعل الله يرحمه مقفوله محد يفوتلها بس صياد
وحده حجرتنا وحده لدله
وحده لزهور وحده فارغه
البيت الجوه الصاله عبالك ساحه من كبرها
واربع حجر نوم ثنين للشيخه خزامي وجوريه وحده لكواكب وحده للشباب
ومطابخ ثنين وحمامات ثنين
وهول جبير گال هين ناكل ونلتم
طبينه المطبخ شفت نسوان صياد ثلاثتهن موجودات معتبجات بالغده من هسع خطيه زهور گوه تشتغل حامل بطنها شكبرها
گامن سلمن عليه وباركلي انوب هذول شبيهم شگد يباركون طلعنه بره المساحه مالتهم تبني خمس بيوت بس حديقه ماكو عدهم
ديرتهم مدري شلونها ديرتنا احلى
وداني عالمضيف اكبر من بيتنا ويخبل عبالك لوحه
وداني على حجرة الشغل طبينه سلمنه على شيخه خزامي وجوريه شفطني شفط يبوسني جاي يخيطن لحف وجودليات
طلعنه انوب فررني البيت عدهم مخازن بره
وغراض شكثر مصفطه وقفص بي جراوه عبالي جلاب صدمني من گال هاي جراوه مال ذيابه لازمهم صياد شله بيهم يبو يهالعثره اني شلون راح اعيش هين
رجعنه عالبيت گعدت يم نسوان صياد بالمطبخ
تونست على حجيهم عبالك خوات من صدگ
سألت زهور امت تولدين
زهور : هاذ شهري ظلتلي ايام
ادعيلي اجيب بنيه وافرح ابو النشمي
ديالا : ان شاء الله تجيبين بنيه
ظليت يمهن ومثل ما گال شاكر اذن الضهر والتمو الكل گامو يطلعون من كل باب اوادم
طلعت بالصاله وگفت يم شاكر واجه صياد
شاكر : تعاي سلمي على ابو النشمي
بدون ما تمدين ايدج
ديالا : وگف وجان نروح علي سلمت بدون ما امد ايدي حط ايده على صدره ورد السلام وهو مدنگ وابتسم ابتسامه گوه تنشاف اصلا يمكن ما ابتسم اني يجوز جنت متوهمه حجه وهو مدنگ
صياد : نورتي البيت مرت اخوي من هاي الساعه تحسبيني اخوج عماد شتريدين عين عيونج
واحنه الممنونين
ديالا : ندسني شاكر تا احجي شي
ما اجه ابالي غير اگله الله يطول بعمرك ابو النشمي
ابتسم شاكر
همزين حفظتها منه هالسالفه
جاوب صياد وهو يحط ايده على جتف شاكر
وابتسم نص ابتسامه
صياد : ويطول بعمرج انتي والسبع شاكر ويديم زواجكم ويرزقكم الذريه الصالحه
ديالا : گالها وراح لحجرته
صد عليه شاكر وگرص خدي رحنه سلمنه عالشيخ
ما وترني مثل صياد وجهه بشوش ويضحك
رجعت عالمطبخ اجو ثلاث شباب يمشون جميع ويضحكون طبو عالمطبخ شافوني وخجلو
سلمو عليه من بعيد وعرفو بنفسهم
نشمي وساجي وباهي
نفس الگصه وحلوين مرتبين
هذول ولد صياد عبالك اخوانه والله
گامو يمزقون ويه امهاتهم
وناس تعيب على ناس عاد طردوهم من المطبخ
صلو الضهر الكل واني وياهم
رحت ويه البنوات وبلشن يولمن السفره
عوانتهن التمو عالغده اني گعدت يم شاكر
مگدر ارفع راسي يربي والله عيب
محد يحجي عالسفره ولا حرف
گرب شاكر وهمسلي
شاكر :اكلي يروحي تره محد يدحج عليج
ديالا :گام يشيل ويحط گدامي
فشلت تمنيت تبلعني السفره
كملو الغده جابو الجاي
وبلشو يحجون بالشغل والطلايب
ادحگ الكل من تصير سالفه تضحك يضحكون
الا صياد عابس حاط المخده بحضنه ويمسح بلحيته عبالك گاعد بفاتحه وذا علت اصوات الثلاثي ساجي وباهي ونشمي شوي يخزرهم بطرف عينه
ويسكتون لو حرف ما يطلع
اجت الناس تبارك وتروح مرت الأيام بسلام مثل الروتين يوميه لحد گبل السبعه مالتي بيوم
گاعدين بالمطبخ اني ونسوان صياد
گالو هاذ اخو الشيخه خزامي ابو نجمه اجه
رحبو بي وصبو الغده منفرد بس للزلم
واحنه النسوان والجهال تغدينه بالمطبخ
كملو الزلم و رحنه لمينه السفره
ورجعنه اخذنه الجاي شاكر گعدني يمه بعتبار هاذ خالهم ومو غريب نگعد كلنه بوكت الجاي
ادحگ الرجال يحوص بي سالفه تالي نطق
گال ـ ابو مشعل اني جيتك اليوم اريد صورة حل
الناس اكلت وجهي مو تدري من زمان قارين فاتحة نجمه وابو نشمي
ربعنه غادي بصلاح الدين كلها تدري بهالشي معد اگدر اواجه ربعي من عيونهم وسوالفهم
نجمه صارت حبيسة حجرتها
گلتو ما نزف احنه بيا حال عبنكم جنتو محزنين على مشعل الله يرحمه هسع الحزن ظل بالگلب ورجعتو لحياتكم الثار واخذتو وشاكر زوجتو بعد شكو شاحنين البنت
من هاذ المكان اگللكم اذا صياد ما زف نجمه لا اني خاله ولا اعرفه ونكسر العصى بينه
ديالا : طول ما ابو نجمه يحجي صياد خازره صد بصفحه وما حجه شي بس احس النار تطلع من خشمه جاوب الشيخ علوان بمكانه
علوان : حگك بطولك ابو نجمه واخذها من هالشارب السبوع الجاي نجمه عروس ابيتنا
ديالا : الكل ظل ساكت وصياد ادحگله جان متربع والسبحه بيده عصرها ايده گامت ترجف من العصبيه
دمارات ادينه رادت تطلع
حط عيونه بعيون ابو وگال
صياد : هاذ هو شيخ مثل متگول
تعذروني هسع اترخص
ديالا : طلع ولحگه شاكر
كواكب ودله ما حجن ولا ولده بس زهور گامت تبجي وتفتر بالمطبخ لازمه بطنها ودردم حجي على نجمه
ما تلام هنه ثلاثه ومتراهمات راح تجيهن الرابعه
منهو يگول تراهم وياهم
لليل والوضع متوتر وشاكر يحوص يدور لصياد يگول مدري وين راح
تالي ايس منه واجه متعصب گام يفتر بالحجره ويدردم على نجمه وابوها
ديالا : هو صياد ليش ما رفض
شاكر : شلون يرفض شلون ما يصير
فرضها علي خاله گوه لزگها تلگ وقرو فاتحتهم
وشگد لايس صياد رادهم همه يبطلون بس
جيره ولزگ حمادي
ديالا : نام شاكر وهو مقهور على اخو
گعدت من الصبح اليوم السبعه مالتي
سبحت ولبست نفنوف طويل واجت دله رتبتلي الملفع ما حطيت زواقه بس كحل شوي حدرت جوه شفت صياد جاي واگف ويا شاكر يحجون ادحگ عيونه حمر مبين ما نايم الليل
شمر اردانه وتحزم ذبح خمس طليان
للسبعه عبن عازمين جثيره ناس واجو اهلي كلهم من عدا ليال ماكو انقهرت عبنها ماكو
كملو السبعه مالتي جانت حلوه
خاصة بوجود عماد جابلي گلاده ذهب لبسنياهه وباس راسي حضنته شگد احبه
راحو اهلي وزعم باجر اروحلهم بس شاكر ما فعل
شاكر : عندي روحه لمكان واطول اجليها روحة اهلج وره عرس صياد اوعدج اخليج يم اهلج يومين
ديالا : راح شاكر مدري وين وظل ثلاث ايام
ظليت مثل ما وصاني اگعد الصبح
واحدر يم البنوات بالمطبخ اعاونهن
اجه هو وصياد ومر الأسبوع ركض
زهور جابت ولد
گامت تبجي والشيخه تحجي عليها عبن عترضت على عطايا الله خطيه جانت تريد تجيب بنيه
حطو زهور بحجرتها ترتاح
وبلشو الكل يركض ويشتغل
زعم باجر عرس صياد ونجمه
يتبع…………… .