#تاروت
البارت «41»
بقلمي: زينب علي
حلواتي لا تنسون التصويت+تعليق بين الفقرات ومتابعة الحساب zainab_ali1 ♥️
TikTok: zeinab_.ali1
Insta: zainab__.ali1
طعم تفاحك أغاني
ونجم يركض من طرف عين الفخاتي
𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵
خيال"
اليوم اربعين الصغار ملتمين بالاستقبال خاله حكمة تريد تسبحهم وكلنا گاعدين باتر ويمان هم موجودين حچت خاله حكمة معاجبها
حكمة: هسه بلا اليشوفنا شيگول وين اكو يسبحون جهالهم بنص الاستقبال
باتر: يمه الحمام صغير واحنا نريد نشوف
رميم: حكوم گلتلج نسبحهم بالختله انتِ ذعتي الخبر حتى دائب عرف احنا راح نسبحهم اليوم
حكمة: خيبه شنهو هو سر هم هيلگيه جنهم اول مره يشوفون فروخ
باتر: ترى صدگ اول مره نشوف فروخ
ضحكت ويمان گال قصده يسمعني كلام
يمان: رحم الله والديچ يمه خليتي الشمس تشرق علينا
باوعت له بطرف عيني باتر كاتم الضحكة ويضرب بي بمرفق ايده صاروا يضحكون بصوت عالي اتذكرت من انطيت موافقتي الحكمة و راحت گلتله
بيومها جنت واكفة على الدرج اباوع عليهم من فوگ دخل يمان مستعجل حكمة شلشته بالاتصالات
يمان: شني يمه جبتيني تطردين عليه ماشفت حتى دربي
حكمة: انطيني البشارة
اتقرب يمها يحچي
يمان: انطيچ روحي هم بس گولي
حكمة: چا حدد يوم العرسك
سكت شويه يباوع الحكمة بعدها گال بصدمة
يمان: لا حكمة مستحيل لا تگولين وافقت نسوي عرس العباس عليچ
حكمة: حالي من حالك انا هم متعجبة حچيت وياها و وافقت
مسح على شعره اتمشى بالصاله ورجع گال الخاله
يمان: يمه الله عليچ صدك عود وافقت وكلتلچ موافقة
تنهدت حكمة وگالت
حكمة: هي گالت موافقة بس الخاطر بيت جدها وحتى ماتعوفنا يعني لا تتأمل
يمان: مو مهم يمه اهم شي هسه وافقت وعافت سالفة الطلاگ
جان يحچي واللهفة واضحة بصوته وكأني من صدك وافقت نرجع سوه سمعت حكمة تگله
حكمة: يلا الطوبة بملعبك هسه شوفنا شطارتك
رجعت الواقعي فازة على صوت الباب يندگ گام باتر وگال
باتر: هذا اكيد دائب اجه
حكمة: يااا ياول وعد شمالكم اسبح الفروخ لو اسوي حلاوة
رميم: هسه يا حكوم خايفة على عيونهم خلي يباوعون
سكتت حكمة معاجبها ثواني ودخل باتر وراه دائب اول مادخل گال بلهفة
دائب: وينهم كون سبحتوهم بدوني
حكمة: هاي عود انت العاقل
دائب: يمه انا عاقل بس يم ذول ولد الچلب لا اخذوا روحي
گعد يم يمان وبقوا يتلاغون ويا حكمة وهي تسبح بالجهال وانا يمها اصب المي على ايدها بعدنا على هذا الحال دخلت زينة لابسه تراك وردي وابيض وهي بيضة وشكرة مو محجبة وشويه متروسة طالعة تجنن حتى انا ورميم صفنا عليها ندستني وحچت بصوت خافت
رميم: اكلچ هاي تريد تاخذ رجولتنا من عدنا
همست
خيال: لا تخافين ولد حكمة ثگال وهي أمانة هنا
رميم: لا تخليني اقسم منيلهم اثگال حچي يفيدچ هذا
خيال: شبيچ ماعندچ ثقة برجلچ
رميم: ايّ والله انا مااثق برجلي ادري بس واحد يدگله يركص مو انوب هاي تصفن المطي
ضحكت انتبهت الحكمة اشرت الزينة تگعد بصفها راحت بلا كلام گعدت يم حكمة مدري شنو هست بأذنها گامت شويه ورجت دخلت مغيرة ملابسها الثوب عريض ولامه شعرها
بيدها كلاص چاي خلته گبال يمان وگالت
زينة: مثل كل مره الشكر قليل
اخذه منها وگال ببتسامة
يمان: عاشت ايدچ
عيني چانت عليهم وكل حواسي مركزة وياهم گعدت بصفة مدري شيحچي وياها وهي تهز راسها بقبول رفعت انظاري الباتر شفت عينه عليه رجع باوعلهم اول مباوعت له زينة خزرها وهي مثل الخافت ضمت روحها ورا يمان بسرعة باوع عليه ماهتميت رجعت تركيزي ويا حكمة الي خلصت تسبيح الجهال تحت تعليقات الولد الما تخلى من مشاحنات دائب وباتر كالعادة
لفلتهم حكمة وهم كبرانين شويه وزايد وزنهم طالعين يجننون الاكبر اخذه دائب شاله والكرار اخذه يمان وباتر يصيح عليهم
باتر: يولد ترى ولدي اريد اشيلهم انا اولى بيهم
دائب: أربعة وعشرين ساعة مگابلهم احنا بس هالشويه
گالها وصار يبوس بالاكبر على كيفه هواي بوسات اتقرب منه دفع راسه يحچي
باتر: شبيك ماشايف جهال اول طيحتهم راح تأكله
دائب: اهووو يمه وخري مني
عضت على اصبعها تحچي
حكمة: هو ما يرتاح الا اطلعله شحاطة الفواتح
باتر: حكوم صايرة ما تشاقين
حچاها وراح وگف يم رميم خلا ايده على كتفها وگال
باتر: ياريت تاخذونهم فد يوم كامل فد شويه انا ومرتي نريد نطير
حجاها ورميم صارت تگرص بي من بطنه وهو يضحك صاح بي يمان
يمان: طيح الله حظك شگد ارعن
حكمة: هيلگ صاير فرد نوب
باتر: شبيكم نيتكم خايسة اقصد اريد نطلع نتسوق انا ومرتي اخي العزيز شكلك ماتعرف عرسك تحدد الاسبوع الجاي
جاوبه بندهاش
يمان: شنو اسبوع الجاي
گالها ورجع باوع عليه حچيت
خيال: اريد يخلص كلشي بسرعة ماتحمل تمثيل اكثر من هيج
يمان: شبيج انتِ مخبلة لو عاقلة اكو واحد يجهز ويحضر العرس بـ اسبوع واحد بس
خيال: هي حفلة صغيرة وخلص
عافني وباوع على حكمة انطاها الكرار وصار يحچي بعصبية
يمان: يمه وانتِ قابلة بهذا تصرفها
حكمة: ويهد لا تصيح منا اليوم الخميس تلحگ بس هم ايدك واشتغل
اخذت الجهال وطلعت وهو صاح بيه
يمان: شلحگ البيت بعده على النص الاثاث مالته وبعدني ما شايف دربي صدك تحچين
لزمه دائب وگال
دائب: هاي هي ميخالف منا الاسبوع كلشي يخلص
يمان: وين يخلص يعني حضرتها صارلها ست سنين تماطل من صارت صدگ حصرتني بـ أسبوع واحد اطيييررر
صاحها بوجهي كتفت
خيال: مشكلتك مو مشكلتي
رميم: خيال شجاج مو الهاي الدرجة يعني مو بس هو مايلحگ حتى انتِ وراج تجهيز وصالون وكومة اشياء
خيال: انا ماريد كل هاي الاشياء
دائب: اذا انتِ ماتردين عرس احنا نريد نفرح باخونه هو عرس ومره وحدة بالعمر
رميم: وانا هم افرح باختي شنو ترديها سكتاوي عيني مو بكيفچ
باتر: شني عمي ماخذه اخوي فصلي
بقوا كل واحد يني رأي شكل حجيت ببرود
خيال: اذا تردون تفرحون بأخوكم عود بعدين شوفوله بنت الحلال وزوجوا
رفع رأسه الي فوك وصاح بجزع
يمان: اخخخخ ولكم سكتوها وطلعوها من وجهي راح ارتكب بيها جريمة
خيال: انت شبيك هو زواج شكلي لا تكبر الموضوع
اتقرب وگف گبالي يباوع عليه بتحدي رفعت راسي اباوع بعيونه خلا اديه بجيوبه وگال بنبرة مهددة
يمان: على هاي الحصرة الخليتيني بيها لو ماطلعتها من خشمچ هسه تشوفين
خيال: خوفتني گمت ارجف
راد يحچي سحبوا الولد وطلعوا وياهم اسمع دائب يگله
دائب: لا تخاف تخلص باسبوع شعدنا قابل انا راح استلم البيت واكمله بمكانك
باتر: وانا واحجز القاعات واخلص كل شغلهن وانت خلص الباقي اربع ايام كلشي جاهز
باوعت الرميم گالت بضوجة
رميم: شفتي حلوها واحنا وين راح نلحگ نسوي كل اشائچ هسه
خيال: لا تكبرين الموضوع هو صالون وفستان گدام العالم وبس
هزت ايدها معاجبها انتبهت اصوت زينه تحچي
زينة: يعني انت ويمان مخطوبين
جاوبتها رميم
رميم: ايّ حياتي مخطوبين من ست سنين وعلى حب
زينة: من ست سنين وهسه يلا راح يتزوجون
رميم: شنسوي ظروف الله لا ينطي الي جان السبب
باوعت عليه وهمست
زينة: تحبينه
ردت احچي سبقتني رميم وگالت
رميم: شلون ماتحبه غير اگلچ خطبوا على حب
بقت ساكته شويه حسيت عيونها غرغرت بالدموع استغربت حالتها گالت بصوت مخنوگ
زينة: مبروك
عافتنا وطلعت انتبهت رميم تحچي
رميم: اذا ما طلعت تحب يمان شتردين انطيچ
خيال: لا رميم شتحچين بعدها طفلة هي وين يمان وين
رميم: وهي لان بعدها طفلة يمكن تعلقت بي ماتشوفينه هو شلون مهتم الامرها يدخل ويطلع يوصي حكمة عليها
خيال: بس يمان هو هذا طبعه اذا احد التجأ اله مايعوفه
رميم: انا العليه نبهتچ وانتِ بعد بكيفچ
بقيت افكر معقولة تحب يمان بس بعدها طفلة وينها ووين الحب من بعدها مرت الوقت للعصر حكمة اصرت عليه اطلع ويا باتر ورميم حتى ابدي اجهز لان مابقى وكت وانا معاندة چنت متمدده بغرفتي فتحت الباب بعصبية بلا ماتدگه دخلت تحچي عليه
حكمة: شوفي لا عبالچ محامية وسيدة مجتمع هاي سوالفچ كلهن مايمشن عندي هسه اكضج اعلسج علس بالشحاطة واريد اشوفن منو يطلع وراج
عدلت جلستي احچي
خيال: حكمة هسه اذا تگطعيني هنا ماتحرك
حكمة: مو بكيفچ گومي يلا خابرت بيبيتچ وگلتلها تجي بالليل تشوف جهازچ حضرنا وتدرين بعد احنا عرب دگة قديمة لازم نشوف جهاز العروس
جاوبتها بذهول
خيال: صدگ تحجين خاله شلون هيج تسوين
حكمة: ادري بيچ ماتجرين عدل الا بهاي الطريقة يلا گومي بدلي باتر ورميم منتظرينچ
بعدني بصدمتي دخلت رميم للغرفة اتوجهت للكنتور فتحته وصارت تطلعلي ملابس وتحچي
رميم: حكمة لا تتعبين نفسچ بالكلام هسه هي غصب عليها تگوم تبدل وتمشي گدامي واريد اشوف وحدة تعترض
خيال: يعني شنو جبر
رميم: ايّ
نفخت بملل وگمت
خيال: زين حتى اذا رحنا هسه ما نلحگ نجهز كل شي بيوم واحد
حكمة: وليش بيوم واحد الج يومين كل يوم اخذج من الصبح للعصر واختاري بكيفچ
خيال: هم مانلحگ نسيتي حكوم المفروض العرس الجمعة
حكمة: لا نلحگ كلشي ماعدنا شنهي قابل يسونهن الج تصنيع خاص هو كله موجود بالسوگ اشكال الالوان
رميم: وبعدين الصالون انا باجر احجزلچ وفساتين اذا ماشترينا اليوم باجر نشتريهن مو فد شي صعب
سكتت ردت اطلع حجة بس حتى اتخلص من الوضع ماكو كلشي ميفيد وياهن عافني وطلعن سلمت امري الربي بدلت ونزلت جوه شفتهم گاعدين بالصالة الولد ورميم وخاله
خيال: حكوم گاعدة شنو ماترحين ويانا
حكمة: لا وين بيه حيل امشي والجهال ياهو يظل يمهم الولد وياجن شسون بيه بعد
گام يمان وگال
يمان: يلا تاخرنا
باتر: انت اخذ مرتك بسيارتك وانا اخذ مرتي بسيارتي
بسرعة فزيت وكفت بص رميم احچي
خيال: لا لا انا اروح ويا اختي
رميم: لا عيني انتِ روحي ويا يموني انا وزوجي عدنا سالفة نحچيها بالطريق مانريد احد يسمعها
باتر: ايّ زوجة اخي اسرار بيت مايصير تطلع نقاشات عائلية خاصة
خزرتها ولا اهتمت لزمت ايد باتر وگالت
رميم: حكومتي ترمز المي يمچ والمميات والحليب وكلشي جاهز ، يلا عيني احنا رايحين
عافتنا وطلعت فززني يمان حچه قريب يم اذني بصوت مستفز
يمان: يلا عروستنا ورانا درب طويل
باوعتله بنظرة معاجبني عفته وطلعت امشي گدامه سمعت رميم تگول الباتر
رميم: اتصلت على دائب حتى يجيب وتر
باتر: بالطريق اتصل بي مالحگت
عافونا وراحوا يطلعون السيارات اتقربت منها احچي
خيال: منو وتر الي راح يجيبها دائب بس لا الي بالي
رميم: ايّ هي نفسها البنت الي يحبها ليش انتِ ماتدرين هو تزوجها
فتحت حلگي مصدومة
خيال: شنو دائب متزوج وحكمة ماتدري وهي هو اخذوها الناس الي جانوا مربينها ؟
رميم: ايّ بس حسب ما يگول باتر زواج شكلي بس حتى يخلصها من الناس الي جانوا مربينها تخيلي جانوا ماخذينها بس حتى ياخذون منها كليتها البتهم شگد حقراء من جد كاسرة گلبي قصتها مأساوية
خيال: بعدها صغيرة
رميم: شحچيلچ خيال البنت كلشش حلوه ناعمة وصغيرة تجنن يعني شتان ما بينها وبين دائب هي وين وهو وين ابد ما راهمين ويا بعض بس ايده بگدها
خيال: والله ولد حكمة مالهم رداد يتزوجون بكيفهم بدون ما يستشيرون احد
ضحكت من بعدها طلعنا من البيت هي راحت ويا باتر وانا ويا يمان خلصت الطريق كله ضايجة مطنگرة وهو رايح بغير عالم مشغل اغنية حبيتك حب لهفة بلهفة ومنطرب وياها وباتر ورميم بسيارتهم مسوين عرس يتسابقون ويانا مشغلين اغنية هيج اسمع منها شويه لان باتر يمد رأسه من الجامة ويصيح علينا
باتر: حبيييييبي الزاد بغيابك اگطعا ومن جوه الضلع گلبي اگطعا
اغنية حماسية ويركصون عليها حتى يمان صار عصبي لان مايسوق بأنصاف كل شويه يعيط بي عض على اصبعه يحچي
يمان: باع هاي باع هاييييي الهيلگ تهلهل ومكيفه برجلها الخبل
ماگدرت اتحمل ضحكت جان منظرهم يموت ضحك انتبه عليه وهو هم ضحك علا الاغنية وسند نفسه الناحيتي اتقرب مني يسوق بأيد وحده ابتعدت منه شويه ماتحمل رفع ايده جعص خدودي يغني ويا الاغنية
يمرافگ صغري وايامي
ومعاشر صحوي واحلامي
شلون الحاجب ينسه العين
شيفارگ ولفين اثنين ... تريد تظل تريد تروح
دفعت ايده حيل
خيال: شبيك ايدك شكبرها كسرت عظام وجهي دوخر
عض على شفته اعرف بي من يسوي هيج يعني راح يگول كلمة سخيفة سديت حلگه باس ايدي بسرعة جريتها گال
يمان: بعد اسبوع بس اسبوع واحد وتشوفين كسر العظام على اصوله مو تبقين تتوسلين
خيال: سخيف احلام العصر مالتك بطلها
يمان: دخلي يجي يومها واريد اشوف منو مايحقق احلام العصر الا اطبقهن بيچ وحدة وحدة
خيال: اهووو لا تخليني ابطل واروح اگعد ببيت جدي والله
يمان: اذا تگدرين يلا الله وايدچ
باوعت له صفح ودرت وجهي منه وهو اخذ الطريق كله اغاني قديمة ويتحرش السخيف كل شويه نتعارك ...
❛❛❛❛
وتر"
جنت اسبح طلعت من الحمام لافه الخاولي على راسي تفاجأت بي صار بوجهي من يوم عملتي المصخمة ماشوفته وجهي بلع ريگ يباوع عليه بنظرات ما حبيتهن غلست وردت اروح للغرفة حچه
دائب: همزين طلعتي
وتر: مادري بيك رجعت للبيت يعني لو ادري جان ماطلعت
اتقرب مني جرني من ايدي عليه لزمت وجهي باسني بخدي حيل
دائب: افيشش مشتاقلچ بابا ليش هيج حارمتني من هذا الوجه الحلو
وتر: انت ماتمشي الا بهاي الطريقة
همستها بيني وبين نفسي
دائب: شلون ماسمعت
دفعته بخفه بعدته مني احچي
وتر: هيج احجي ويا روحي
عفته ودخلت للغرفة قفلتها عليه رجع يدگ بالباب ويحچي
دائب: يعني شلون تبقين هيج
وتر: شتريد مني روح منا دائب
دائب: افتحي الباب نتفاهم
وتر: ماافتحه روح
دائب: وتر احسبلچ للخمسة اذا ماطلعتي انا افتح الباب وادخل واذا انا فتحت الباب ما راح يصير خير
وتر: لا تهدد ترى مو اسلوب هذا ماكو شي يمشي بالتهديد
جنت احچي بصياح حتى يسمعني اختفى صوته مدري وين راح على ما مشطت شعري رجع دك الباب
دائب: وتر تطلعين لو شلون
وتر: ماطلع
خفف من حدة صوته اتقربت يم الباب گال بنبرة تميل للترجي
دائب: يلا اطلعي لا تشلعين گلبي اطلعي حتى نطلع من البيت
وتر: نطلع وين نروح
دائب: راح يصير عدنا عرس ماتردين تشترين فستان حلو وبعدين رميم منتظرتچ انتِ مو تحبينها يلا حبيبتي افتحي الباب
فتحت الباب احچي
وتر: عرس منو وليش رميم منتظرتني
دائب: عرس اخوي الچبير ولازم تحضرين بي وزوجته تصير اخت رميم بدلي وخلي نطلع بسرعة
تخصرت احچي
وتر: لا تضحك عليه شلون احضر وامك ماتعرف انا يمك وانت متريدها تعرف حاليًا
ابتسم على حركتي قلد نبرة صوتي يحچي
دائب: ما ضاحك عليچ بس رميم راح تدبرها وتگللها صديقتي يمكن المهم هي تدبرها
بقيت اباوع له تنهد اتقرب مني وخر شعري من خدي وصار يبوس بي هواي ويگول افيش ورا كل بوسه وياخذ نفس قوي ابتعد مسح على خدودي بأبهام اديناته وهمس
دائب: اسف لان ضربتچ هذاك اليوم بس تستاهلين
ابتعدت منه احچي بأنزعاچ
وتر: اوييي كافي لا تلطش بالسالفة گوه جاي انسي نفسي
دائب: وداعت شورتچ الاحمر راح انساها
وتر: اصلا يخبل والله انت ماعندك ذوق واتكيت بعدين لبسي جان عادي مابي شي انت مدري شبيك
جعص وجهي يكز على اسنانه ويحچي
دائب: الادب سيز تسويلي اغراء بشورتها الاحمر
ابتعدت منه بسرعة خزرته وهو ضحك بصوت عالي دخلت للغرفة وسديت الباب بوجه اسمع بس صوت الضحكة مالته بقيت انطنط وحدي بالغرفة متت من الفشلة ، بدلت ملابسي وطلعت لگيته مبدل ومنتظرني طلعنا وطول الطريق رميم وباتر كل شويه يتصلون عليه يستعجلونه لان هم وصلوا للمول قبلنا
دلونا مكانهم وين منتظرينا لزم ايدي وحچه يوصي بيه
دائب: لا تشترين شي فاضح ممنوع
وتر: ليش مو اكو حنة بنات
دائب: اكو لهذا وصيتچ فستان فاضح ممنوع
وتر: اي غير بس نسوان شكووو بعدد
دائب: شنو النسوان ماعدهن عيون يباوعن عليچ
ردت احچي وهو سكتني من گال
دائب: هذولي وصلنا
باوعت شفتهم ملتمين واكفين على صفحة ينتظرونا اول وحده اجتني رميم ببتسامة تحچي
رميم: هلا بالعنون اشرقت وانورت
حضنتها سلمت عليها يربي هالبنت شكد شايلة حنية مو طبيعية ودمها خفيف تجنن
سلمت عليهم انتبهت على البنت الوياها باوعتلي بنظرات ثاقبه مثل الخزرتني نظرتها حادة ابتسمت بوجها وسلمت يلا شويه فكت وانطتني ابتسامة صغيرة انتبهت الصوت دائب گللها
دائب: مرت اخونا شبيچ تمشين وتخوزرين بخلگ الله على كيفچ عيني
ابتسمت تحچي
خيال: اسفين عيني مانقصد
يمان: دسكت يمعود مو گوه سحلناها وجبناها
مشت گدامنا وكالت بضوجه
خيال: نبقى نحچي لو نشوف شغلنا تأخرنا كلش
يمان مشى بصفها وانا رميم لزمت ايدي وكالت
رميم: اوي اختي نفسيتها خايسه هالايام اعذريها نمشي انا وياچ هسه ما نخلي شي ما نشتري
وتر: نطلعهم كسر
رميم: نگعدهم على الحديدة ولا يهمچ
ضحكت بقينا نمشي وراهم دائب والولد وخيال يمشون گدامنا هز ايده باتر وگال
باتر: اي عمي الناس تجهز من العشار بيت الخربيط يجهزون من المول بيت ابو تلف
خيال: وانت شعليك ليش ضايج
باتر: عمي ماصير الكم جاره شبيها عمارة حجي جاسب من شنو تشكي بس مو صوجچ صوج رجلچ الما كلچ ماعندي فلوس
يمان: طالب منك حتى ماعندي فلوس
گلتله رميم بصوت مسموع
رميم: ترى راح اشتري وياهم ابو ما عندي فلوس
مسح على شعره باحراچ وگال
باتر: صدگ چذب ام ولدي المول كله تحت امرچ شتردين بس اشري
بقوا يضحون عليه من بعدها صرنا نجهز اول شي سوينا صرنا نجهز للعروسة بس جانت مو طبيعية وكأنها مغصوبة وماتقبل تاخذ هواي اشياء انا ورميم صرنا ناخذلها
رميم: وتر خليچ وياي اخذي الي تحسي مناسب الها معليچ بيها
خيال: رميم بلا خبال
رميم: معليچ أنتِ وخري على صفحة
جهزنا الي نگدر عليه والباقي گالت رميم على باچر هم يجون ، من بعدها اشترينا انا ورميم نفس الفساتين للحنة صح شويه فاضحات ودائب طنگر بس ماحچه شي گوه قنعته رميم يلا سكت وهم اشترت الولدها هواي اشياء وملابس كله توينز
انتبهت على يمان صار يختار فساتين تقريب اربعة اخذهم ، ذوقه يمووتتت كلش كلش حلوات اسمعها تگله
خيال: يمان لا تاخذهم مراح البسهم
يمان: ميخالف انا عجبوني
خيال: منو يكول على قياسي
يمان: قياسچ مضبوط
رادت تحجي سكتها وراح حاسب عليهن وهي احسها تريد تنفجر من بعدها الولد تعبوا وگعدوا واحنا بقينا نفتر رميم تجنن ومريحة بالتعامل اشترت اشياء خاصة الها وجبرني اخذ وياها خاف اني عايزة شورتات حمر هي گامت تجيب وتخلي من جميع الالوان وتوصي بيه البسهم متنا ضحك انا وياها
وخيال ابد ماضحكت غير مجاملة كلش جافة حسيتها وحتى ماصار كلام بينا هواي
وراها طلعنا رحنا حتى نحجز بدلات بس يمان نزل ويانا وماقبل تأجرها الا تشتريها وهي تشيل روحها وترگعها
خيال: يمان صدگ تحچي شسوي بيها اشتريها هي ليلة وحدة
يمان: شني تأجرينها وبعدين تجي وحده وراج تلبسها لا ما يصير نشتريها
خيال: وبعدين وين اوديها
رميم: اي عادي عادي تبقى ذكرى معليچ مو صح وتر
وتر: صح حلو تبقى ذكرى هالشي كلش حلو
يمان: فدوه للبنات شفتي هاي الناس التفهم
خزرتنا وگالت
خيال: ماتسوى نشتريها علمود ليلة هي بدلة
يمان: بكيفنا يلا امشي قيسيها
هزت راسها تتوعد له والرميم قاستها جانت تجنن البدلة بين الفخامة والبساطة وفساتين الحنه هم كلش فخمات بين ذوقها وذوق يمان انا ورميم ماتدخلنا بس اخذنا على ذوق بعض فساتين نلبسهم للعرس
كملنا كلشي وتعشينا سوى جان الوقت وياهم كلش حلو بين شقى دائب وباتر ولطافة يمان وحسيتهم كلهم مهتمين بيه ماحسيوني انا غريبة اندمجوا يحچون وياي طبيعي تعشينا وطلعنا ودعناهم ورجعنا للبيت
اول مادخلت شمرت نفسي بتعب على التخم وهو ينگل بالاكياس
دائب: مشترية المول كله
وتر: ششتريت هو كله فستانين وشويه اشياء احتاجهم
گعد بصفي وگال
دائب: شو بلا شوفيني الاشياء
بسرعة فزيت تذكرت البلاوي الجبرتي رميم اشتريهم اخذت الاكياس منه احچي
وتر: اهووو اشياء بناتية مايصير تشوفها
دائب: ديلا هسه لو ما جنت اشتريهن الج بس خاف يطلعن كلهن من عائلة الشورت الاحمر
وتر: ولا تستحي صاير
ردت اخذ الاكياس من ايده ماقبل ينطيهن الي الا يشوف ماعرف شلون دگ تليفونه ونقذني
انتبهت عليه اول ما باوع للشاشة وجهه انگلب عافني وطلع يجاوب وانا دخلت الغراض جوه دقايق ودخل وجه مگلوب گلب وضايج ماعرفت شبي ولا هو قبل يحچي ...
❛❛❛❛
رميم"
اول مارجعنا عفت حكمة وخيال بالصالة يحچن ويتفرجن على الغراض وانا دخلت ركض على ولدي يمه حسيت روحي فرفحت عليهم جانوا نايمين ماتحملت شلتهم ابوس بيهم حيل صاروا يبچون خليتهم على الچرباية حللتهم العب بيهم
دخل باتر شافنا فرك اديناته يحچي
باتر: بويه كل ممتلكاتي مجتمعين بمكان واحد
اتقرب شمر روحه بصفنا بوس الجهال وصار يشمشم بيهم حيل يحچي
باتر: مو عطر عطرهم ياخذ روحي ويطير بيها
باوعت عليه ببتسامة همست
رميم: تحبنا
باتر: بلا سؤال هو هذا شايفه هذول النتف الصغار اول ماعيني صارت عليهم هيچ سكنوا جروحي بردوا جويات روحي
اتقربت بسته بشفته بوسة سطحية وابتعدت احچي بزعل مصطنع
رميم چا وانا
خلا ايده ورا راسي جذبني اله خلا جبينه على جبيني غمضت عيوني اسمع كلماته من گال
باتر: انتِ روح گلبي انتِ حطامي انتِ عذابي وسهر ليلي انتِ المستبدة مالتي
رميم: حرام عليك ما مخليلي ولا ذكرى حلوة
باتر: كل ذكرياتي الحلوة انتِ
فتح عيونه وهمس
باتر: مشتاقلچ شنو رأيچ نعوفهم ونطير البيتنا
رميم: وين جاي تشوف الاوضاع متأزمة وحكمة ماتخلينا نتحرك
باتر: يعني گليلي انتظر الحد ما ننتقل البيتنا الجديد وانچب
ضحكت جذبني اله اخذني ببوسة عميق اندمجت ويا بنفس لهفته بقينا فترة طويلة على هالحالة بس راد يبتعد انفتح الباب فجأة ثنينا فزينا دخلت خيال كتفت اديها وگالت ببرود
خيال: سخيفين شجاي تسوون المهم گوموا بدلوا واطلعوا راح تجي بيبي
صاح بيها
باتر: انا شايف العالم من تطب على رجال ومرته يدكون الباب هسه حتى اذا جفتوا يستحون ويسدون الباب انتي متخصرة ووكافه شنيه ما اختلي بمرتي من وراچن يا انتِ يا حكمة
خيال: دگوم بدل فضني
باوعتلي وگالت
خيال: وانتِ هم گومي بدلي شبيچ بس شفتي سرسحتي دثگلي عاد بس دكلها ركصتله
باتر: وين هو انا ملحگ ادگلها حتى تركصلي من وراچن
رميم: غير رجلي شبيچ ضايجة مو عندچ رجل
خيال: بلا سخافة وگوموا بدلوا
باتر: هسه نبدل
خيال: اي ياا يلا بدلوا
باتر: اي يلا واكفة شنو انزع گدامچ
ضحكت بصوت عالي وهي صارت تحچي علينا
خيال: شگد ماتستحون والله
عافتنا وطلعت من بعدها اجت بيبي هي وجدوا واتفقوا خيال قبل الحنة بيوم تروح يمهم وتنزف مناك اتفقوا على كل شي وراحوا
ثاني يوم هم طلعن خيال وحكمة وزينة گوه اخذتها حكمة وياها حتى تشتريلها ملابس للعرس وهم كملن النواقص الباقية والبيت خلصه دائب تأثيث بيومين ، حكمة ماقبلت ننتقل بي ولا ننقل غراضنا گالت بعد العرس ننتقل براحتنا بس رحنا رتبنا غرفة خيال ويمان راح ينزفون بي الوحدهم لان اختي الله يسلمها قفلت ماقبلت تروح فندق وحلفت اذا حجزوا بالفندق ماتحضر العرس
خلال أسبوع هلگنا بس نركض حتى مانگعد غير على الاكل يادوب لحگنا نكمل حجز الصالون والقاعات والتفاصيل الباقية اهتموا بيها باتر ويمان وقبل الحنة الصبح رحنا سوينا حمام مغربي وعناية كاملة بعدها بالليل اجوا جدو وبيبي اخذوا خيال وراحوا ...
❛❛❛❛
خيال"
وصلنا البيت جدي اول مانزلت صارت عيني على البيت كلش كبير وفخم
عدنان: هذا نفس البيت العاش بي ابوچ وكبر
بقيت اباوع للبيت يعني اكيد اذا هالكبره هسه العشيرة كلها گاعدة بي انتبهت على صوت بيبي تحچي
صفية: ادخلي بعد روحي ليش واگفة البيت بيتچ
ابتسمت لزمت ايدها امشيها رجعت گالت
صفية: لا تخافين عمامچ الچلاب ونسوانهم كل واحد عنده بيت منفصل محد موجود هنا غير عمتچ فاتن
خيال: شعجب معايشين هنا
صفية: كل واحد يتزوج جدچ ينطي بيت وهسه هو مگاطعهم يعني محد يجينا ومچ طالب رجع سافر وهو وعائلته
سكتت وتنفست الصعداء همزين مراح اشوف واحد من الغثة
خيال: وحتى بالحنه ما يحضرون
صفية: حدهم القاعة ويرحون
دخلنا للبيت وجدو صاح
عدنان: فاتننن وينچ رجعنا
فاتن: هلا بيكم هلا
رفعت انظاري المصدر الصوت شفت طلعت من وحده من الغرف مره تقريب عمرها نهاية الاربعينات كلش حلوه تشبهني الى حد ما اتقربت تحچي
فاتن: اللهم صل على محمد وال محمد يمه لا تگولين هاي خيال
صفية: هي هاي بنت اخوچ سليمان
گالتها وباعت عليه ورجعت ردفت
صفية: هاي عمتچ الوحيدة فاتن عايشه هنا لان رجلها شهيد وعندها بس بنت وحده عايشة يم اهل ابوها
ماعرف شحسيت من باوعتلها مشاعري مخربطة وهي تباوع عليه بدموع كسرت الحاجز البينا اتقربت حضنتني وصارت تبچي حسيت بحنانها اول ما حصنتني ماگدرت اتحمل گمت ابچي بصوت واشهگ ابتعدت تمسح بدموعي وتحچي
فاتن: فدوه لله يمه باوعيها تشبهني بالصغر
صفية: اي الخالق النطق واختها تشبه ابوها بالشخصية وامها بالشكل
فاتن: ليش مااجت وياكم
خيال: ماتكدر عمه عدها توأم ان شاء الله تتعرفين عليها باچر بالحنة
بوستني
فاتن: بعد روحي تخبل كلمة عمه منچ
من بعدها گعدنا شويه ويا جدو وبيبي وبقينا نحچي شوفوني البيت وغرفة ابوي القديمة فتحت كام ويا رميم شوفتها البيت
اتأخر الوقت فتحتلي عمه وحده من الغرف وگالت
فاتن: رتبتها الچ اليوم
خيال: عاشت ايدچ عمه
بقت گاعدة يمي وكل شويه تحضني من صدگ حسيت بحنانها تجنن ووجها بي راحة من بعدها عافتني حتى انام گوه غفيت من بين القلق والتوتر وافكاري
ثاني يوم گعدت الصبح على صوت التليفون يدگ ماسكت شفتها رميم جاوبتها احچي بنعاس
خيال: شبيچ اكو واحد يتصل هيج وكت
رميم: صباح الخير عيني گومي بدلي يلا راح نوصل
خيال: صدگ تحچين اكو واحد يروح للصالون الساعة 6 اكنس الصالون مثلًا
رميم:دكومي لحد ما نبدل لحد ما نروح على وتر وبعدين سره مو وحدچ انا ووتر وياچ راح نطول زين اذا طلعنا منا للـ 4 العصر
گمت وحچيت
خيال: ماعرف شنو لزومه هذا كله
رميم: عشر دقايق واطلعي مانگدر ننزل
سديته منها غسلت وطلعت بدلت ونزلت لكيت بيبي گاعدة مخليه التلفزون على القرآن وتسبح صبحت عليها وگلتلها راح اطلع حتى الحگ على الصالون ودعتها وطلعت لگيت باتر ورميم منتظريني اخذوني بعدها مرينا على وتر حتى ناخذها تأخرت وباتر خبصهم هورنات
رميم: بدل هاي الهورنات انزل دگ عليهم الباب
باتر: خلي يطيرون مو تفقنا وياهم من البارحة بسته يطلعون
بعده يحچي انفتح الباب وطلعوا ثنينهم مد رأسه من الجامة ويصيح عليهم
باتر: بعد بعد لو متأخرين بعد وننزل نتوسل بيكم حتى تطلعون
دائب: شبيك ومدري شني غير تصبر على ما نطلع
وتر: انا ما عليه گاعدة اول ماتصلت بيه رميم دائب شلع گلبي يلا كعد
باتر: ديلا عيني صعدي
صعدت بصفي وصبحت علينا باوعلنا دائب وگال بنعاس
دائب: ديروا بالكم على بنتي
باتر: ايباخخخ راسك مصفح مااخذتها انت اذا كاتلك الخوف عليها وبعدين وين رايحه للجبها رايحه تلبخ وترجعلك زرق ورق
دائب: دمشي لك لا تخليني اقسملك من الصبح ومنا البنات
ضحكنا على سوالفهم... وصلنا باتر للصالون وگال من تخلصون اتصلوا بيه
وصلنا تقريب الساعة بـ 7 الصالون بي قسمين عروس عادية وعروس VIP رميم جانت جاجزتلنا بالـ VIP اول مادخلنا بسرعة رحت بدلت ملابس لبست بدله قصيرة خاليه من الاكمام لونها بنفسجي قاتم متداخل باسود جانت ذوق يمان فوگها روب مكتوب عليه حرفي وحرف يمان رميم كلش مركزة على التفاصيل بشكل مو طبيعي
اول مابدأت الماكيرة تشتغلي دهنت جسمي الطالع سوت بي مثل اللمعة تجنن وقبلها انا چنت مسويه حمام مغربي وعناية كاملة بعدها سوت شعري تسريحة مفتوحة على طول شعري كلش طلعت حلوة
بدأوا البنات يشتغلون شي ورا شي براحتهم لان حاجزين غرفة بس النا
ختاريت مكياج بسيط بس رميم ماقبلت وهي حددت الام صالون شنو تريد من مكياج عليه ماخلتني اتنفس كلتلها سوي بني وركزي على الاينر وحمره حمراء
وتر ختارت مكياج بناتي وخبلت الماكيرة الا تريد حمره حمراء هم وساعتين هي تقنع بيها ان مكياجها مايلوگلة هيچ شي ماتقبل تقنع لا تطوخ لون الحمره
ولبست عدسات زرگ وهي بيضة وشعرها مفتوح بارمته ولونه مايل على شگار طلعت جدا جميلة وبدلتها صدرها مكشوف لونها ينطي على كريمي حددت تفاصيلها وبرزت انوثتها
اما ام الاكبر حدث ولا حرج طلعتنا كسر بالمكياج السموكي برز حدة عيونها وماخلت عدسات باتر وصاها قبل لا ننزل لا تخلي عدسات يحب لون عيونها
على ما خلصنا اجه باتر اخذنا للقاعة وجان كلشي على حباية ونص وماكو اي نقص من مصورين من دزاين من اكل من كلشي برفكت حرفيا باتر ورميم مسوين شي من نوع ثاني
دخلنا ورتبنا نفسنا شويه بعدها رحت وكفت يم الباب شغلوا اغنية دخولية العروس اول مادخلت شفت القاعة مكتظة بالناس عبالك عرس وجانوا اغلب الناس من طرف حكمة ماعرف منين طلعتهم بحيث بيت جدو شگد عدهم ناس الناس الي جايين من طرف حكمة اكثر عمات يمان ومعارفهم وصديقات حكمة وكرايب رجلها المرحوم ماعرف منين طلعتهم
اول ما گعدت سمعت حكمة سألت رميم على وتر تگلها
حكمة: خايبة هاي منين الي لاطشة بذلايلچ شايله فروخچ وتفتر بيهم
اباوع الرميم ارتبكت
رميم: شبيچ حكوم بس انت عندچ معازيم انا هم عندي صديقتي وعزمتها
هزت راسها وحچت
حكمة: هااا صاحبتچ خوشش صاحبه الناس كلها خطبتها مني وتسألني منين ما منين
رميم: حكوم گليلهم محجوزة
حكمة: لا راح اگللهم ابوها ما ينطيها
ابتسمت اعرف حكمة مايعبر عليها شي بس مشتها ، بعدها بدأت فعاليات الحفلة ورميم ووتر ماخلن اغنية ماركصن عليه ذبن لحم ثنينهن لعن لعب وحكمة بنصهن
من بعدها اعلنوا على دخول يمان حتى يحنونا اباوع البنات كامن يتطافرن يغطن بروحهن لبست البشت وغطيت نفسي بي لان الولد يدخلونه وفرقة موسيقية مشهورة وياهم لان سمعت حكمة تگول الرميم يگول لفوها ماريد شي منها يبين وصدگ رميم لفتني لف وهن هم غطن روحهن ولبسن عبي خليجية
دقايق ودخلوا يمان والولد وياهم فرقة موسيقية سوو دخولية خطيرة رفعت راسي لمحتهم بنظرة خاطفة شفتهم كلهم لابيسن زي خليچي لعبوا لعب بقوا كومه يركصون وكفوا القاعة على تك رجل على گولتهم
على ما طلعوا رجعت رميم نزعتني البشت ورتبتني شويه انتبهت عليه بصفي يباوع عليه
خيال: طفي عينك شبيك راح تاكلني
يمان: اخخخ لو يصير هسه اگلچ
خيال: عفية يمان لا تصير سخيف
ابتسم اتقرب همس يم اذني
يمان: مثل سر البيوت بكلبي ضميتچ
همست
خيال: يمان
لزم ايدي باسها وگال
يمان: فزة گلبه راح تموتيني حرام عليچ هاي شطالعة
نزلت راسي ساكته شابك اصابيع ايده ويا ايدي ولزمها حيل ايده ترجف مو احسن حال مني اشتغلت اغنية اسمها الحنة الاحمد المصلاوي وخالة حكمة وبيبي صفية جابن صينية الحنة وحكمة شايلتها وتركص انتبهت مكتوب بوسط تفاصيلها احبچ والبخت
حنتنا خالة حكمة بعدها گومني يمان وجابتله خاله علبة طلع منها كلادة ذهب كلش حلوه على شكل حرفه وخاتم هم وخلخال نزل لبسه الي وسط انظار الكل حتى حسيت الافواه بدأت تتهامس
باس راسي وهمس
يمان: احبچ والبخت الجمعني بيچ
ماعرفت شسوي بس لزمت ايده حيل تفاجأت من دعونا للرقص باوعت الرميم جانت واكفة وراي گلتلها
خيال: وين اكو واحد يركص ويا زوجته بالحنه شخليتوا للعرس شبيكم بكلشي مخالفين
رميم: محضريلچ جلطات بالعرس
خيال: والله ما استبعدها منكم
ضحك وسحب ايدي ويا النص القاعة اشتغلت اغنية اليسا مكتوبة ليك حاوطني ودخلني الحضنه عصرني عصر بين اديه همست
خيال: گطعت نفسي ترى وبعدين ابتعد شويه منا الناس
يمان: شعليه بالناس ** خواتهم
شهكت موسعه عيوني احچي
خيال: شبيك تخبلت هاي من شوكت انت تفشر هيج
يمان: من زمان بس ماتعرفين هذا الجانب ان شاء الله تعرفينه من اليوم
حجاها وعزز كلامه بغمزة
خيال: انت صاير فد مره مدري شبيك مستخف الناس تكبر تعقل انت تتخبل
يمان: اتخبل بتفاصيلچ مو مشكلة
حجاها وخلا رأسه برگبتي گمت ارجف ومتت من الخجل كل الي بالقاعة عيونهم علينا
خيال: يمان خلص
يمان: اششش
كالها باس كتفي على كيف همس
يمان: عطرچ يثمل خدرني
ويا كلمته مدري شصار بيه حسيت گلبي طاح ببطني ونغزات ببمعدتي همست بحده
خيال: يممماانننن خلصصص
رفع ايدي يبوس بيها ويحچي
يمان: الا تكسرين فرحتي ما ترتاحين
خيال: لا تنسى هذا الزواج شكلي
يمان: حچي يفيدچ هذا
نفخت بملل احچي بأنزعاج
خيال: بس احنااا هيج منفقين لا تخليني ابطل هسه والله
شدني اله
يمان: جاي تسمعين الاغنية شنو تگول
خيال: شتگول
يمان: مكتوبه ليك وانتِ انكتبتي الي انا وبس لو وين ماترحين ترجعين الاحضاني
خيال: رجعنا الاحلام العصر
يمان: اصبري عليه وشوفي شلون راح احققهن الچ
خيال: هسه شنو هذا الاصرار عليه بس انا بالعالم ماجاي افهم
يمان: غلطانة طبعًا مو بس انتِ بالعالم انت العالم كله بالنسبة الي
غمضت عيوني بقلة صبر رجع همس
يمان: زين انتِ هم تدرين ؟
خيال: شنو
يمان: عيونچ مسويتلي واهس حتى اعيش
خيال: يمااانن
يمان: فزة گلبه
ردت احچي خلصت الاغنية رجعنا للكوشة وهو لطش مايقبل يطلع حتى الناس بدأت تروح وتليفونه ماسكت اخر شي قفلة والقاعة بدأت تفرغ بقوا بس الاقرباء وبقينا نفتر عليهم ونسلم اكو ناس ما نعرفهم بيبي تعرفنا عليهم لو خالة حكمة شفت رميم مندمجة ويا عمه فاتن هي ووتر خوش صارن مجموعة انوب شلون 3 كلهن يحبن يضحكن ويشاقن
جنا واكفين يم بيبي وخاله حكمة انتبهت على زينه اتقربت من يمان همستله لان انا قريبة منهم سمعتها تگله
زينة: ممكن احجي وياك على انفراد
يمان: محتاجة شي
زينة: منتظرتك يم غرفة التبديل هناك اگلك شنو اريد
عافته وراحت بسرعة درت وجهي على خاله وبيبي سويت نفسي مامنتبها همس بأذني
يمان: شويه وارجع
هزيت راسي بـ ايّ
عافني وراح شويه وسحبت روحي من بين الكل ورحت وراهم ادور عليهم وين راحوا انذكرتها من كلتله يم غرفة تغيير الملابس نزعت الكعب مالتي وتوجهت للمكان جان هدوء الناس كلها هناك ملتهيا بالقاعة والركص والاغاني
صرت اسمع بس صوت شهگات توصلني وهو يحچي وگفت اسمع
يمان: ليش تبچين زينة غير افتهم محتاجة شي احد سمعچ حچاية وغثچ بيها
زينة: لا بس احس الي اريد اگوله ما يصير اگوله هسه
يمان: خوفتيني شبيچ احچي بابا
زينة: لا تتزوج فدوه
اتغيرت نبرة صوته وگال بأستنكار
يمان: ليش؟
زينة: لان احبك ماريد تروح الوحده غيري تهتم بيها
يتبع...
𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵
بقلمي: زينب علي
شنو رأيكم بالقصة والاحداث
شنو تتوقعون اعتراف زينة نعمة لو نقمة 🌚💔
+ البارت الي بعده مراح يتأخر 🫶🏻
معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️
متابعة ممتعة🦋