يا غائباً والقلبُ ســـارَ بـإثـــرهِ
شـوقي مقيمٌ في فؤَادي كـالجَبَل
إن كنتَ غبت عن العيون مهاجراً
فجميل شخصك في فؤَادي لم يَزَل
لقائلها
عرين الصياد بقلمي شذره
قبــل ايــام
امل :من سديت الأتصال ويه ماجد
وروحي تلوب
اني گتله ليال يم فاتن
زين شلون اذا اتصل بيهم
دگيت رقم فاتن ومحد رد
كررت مرتين وما جاوبو يمكن نايمين
حطيت غده للجهال ورحت اشوف
عمتي معاضد بعدها على نومتها
طلعت بره اشهگ النفس
البيت بكل وسعه يخنگني
اااخ شحالج يا ليال
شلون نمتي البارحه وغمضلج جفن
شصار وياهه ربي
لا يمها اخت ولا يمها من حبايبها
ساكتني رجليه عالباب البره
امشي واسأل نفسي اني وين اريد
شسوي اروح عليهم هسع
خاف عمتي تمرض ورايه
وهاي صبره الكافر احسن منها
رجعت ودموعي تصب
طبيت جوه ودگ التلفون
اوووف بس لا يطلع ماجد
رفعت السماعه بخوف الو.
ديالا : هلا والله همزين وينكم
امل : مسحت دموعي جاوبت بثبات زينين شرايح النه انتو شلونكم دگيت عليكم محد يرد
ديالا :والله بخير الحمد لله
ها هاي انتو اتصلتو
مو جنت مخليه درويش على رجليه اهزله
وما گدرت اگوم وفاتن نايمه
اني صارلي من رحت ادگ وما احصلكم
امل : مو التلفون جان عاطل وحميد هسع يالله سوا
فاتن شلون صارت
ديالا : زينه الحمد لله من شافتني طابت ههه
اگلج عماد اجه
امل : لا بعده اسمعي ديالا اريد اگلج شي
هاذ ماجد كل شوي يتصل يريد يحجي ويا ليال واني گتله راحت على فاتن مگدر اخليها تحجي ويا عاد انتي اذا خابركم گليله اي موجوده بس طلعيلج عذر زعم متگدر تحاجيك خوش
ديالا : ها ميخالف اي شكو ماكو شتگتولي
ليال سألت عليه وينها بالله اريدها
امل : غصيت ما گدرت اتحمل گمت اگح
ديالا : هاي شبيج امل مريضه
امل :اي مريضه ما گدرت احجي
سلميلي على فاتن وديري بالج على نفسج
سديتها منها وگعدت بالگاع
لزمت راسي اني شلون بيه شتحمل تا اتحمل كلها.وگعت براسي وراح يلوموني ليش ما خبرتهم ماجد من جهه وعماد من جهه وفاتن.وديالا هم
عماد اگدر اتعذرله عبن ما اگدرت اتواصل ويا
حت لو اريد لا اعرف رقم يوصله
ولا هو خبرنه من راح
بس ماجد وفاتن شلون بيهم
ليش مجاي اخبرهم هسع او وتالي راح يعرفون
ارجع اسأل نفسي زين وذا خبرتهم.شراح يتغير راحت ليال وتزوجت وانتهى كلشي
وحتمال ماجد ينفعل ويصير شي بسببي
وفاتن تهبط وتمرض اسكت احسن
خلهم من يجون يعرفون
هسع اني اريد اعرف اخبار ليال
شسوي اروحلهم اشوفها
زين منهو يظل بمكاني اذا رحت
وگفت اتحسر وجان اتفطن بالتلفون
هنيالي يظل براسي عقل عگب الصار
دگيت رقمهم بسااع جاوبني صائب
صائب : الو
امل : وين ليال
صائب : الناس تسلم يا امل تبارك
امل :نفخت بقهر گوه كامشه اعصابي
تاما انهد بوجهه
: وين ليال اريد اطمن عليها
صائب : اگفي اناديها
ليال : الو
امل : يمه بس سمعت صوتها عبالك سنين صارلي شهگت ابجي وهيه هم اسمعها تشاهگ وكاتمه صوتها بأيدها اعرفها
ــ شلونج ليال زينه
ليال : اي زينه
امل : يربي هاي شلون اسألها على وضعها اخاف متأذيه متوجعه وما تگدر تحجي
ليال : الو امل وينج
امل : ها وياج يعمري احجيلي انتي زينه خوما تمرضتي
ليال : زينه والله ومو مريضه ليش اتمرض
امل : هاا خوش عجل مرتاحه تريدين شي ادزلج
ليال : اي مرتاحه وما اريد شي تسلمين
امل : خوش وجوانه يمج مو دزيها خل تجي
ليال : لا ما ادزها استاذي گال خليها
امل : شگت گلبي كلمة استاذي عصرت السامعه وغمضت عيوني بأسف شسويت يا صائب شسويت مو تگلك استاذي شلون راح تتقبلج زوج
ليال : امل وينج
امل : وياج يروحي اذا تحتاجين شي خابريني بسااع
ليال : اگلج امل ماجد خابركم
امل : بعدني ما جاوبتها انبهتت وجان تنسد السماعه
اكيد هاذ صائب سدها لزمت گلبي شجاي يصير ربي
ليال : جنت گاعده بالحجره امشط اجه استاذي
وگف بالباب ناداني
صائب : امل عالتلفون تعاي احجي وياهه
بس ديري بالج تحجين شي اذا سألتج شلونج مريضه بيج شي گولي زينه الحمد لله خوش
ليال : استغربت ليش ورحت ويا
حجيت وي امل ما گدرت اتحمل اشو عبالك صارلي شكثر مفارگتهم ختنگت وكتمت شهگاتي
ومثل مگال استاذي سألتني اذا مريضه دحگت علي وغمضلي عيونه جاوبت لا مو مريضه ليش اتمرض
حك لحيته واشرلي هاي هي
سألت على ماجد وجان ياخذ السماعه سدها
وجرني من ايدي اخذني عالحجره يحجي
صائب : مو گتلج قنادر صخام لا تجيبين اسمه انسي انتي بشر لو حشر
ليال : ظليت مدنگه وابجي هاذ شبي راح اتخبل
مر اليوم كامل وما خلاني اطلع من الحجره
لحد الليل طلعت مره وحده عالحمام وهم طلع ويايه وگفلي
شگد حاولت شگحه تشوفني
وتحجي ويايه وما گدرت
استاذي ما خلاها
تعشينه اني ويا وجوانه بالحجره
طلع وقفل الباب عليه من بره
ظليت گاعده افكر مليت
ردت اطگ منالضوجه والحمس
هاي شلون راح تخلص يربي
يعني هاذ هوه الزواج
هم ماجد لو اريد اتزوجه هيج يسوي
انفتح الباب فات استاذي
مضمد رجله مبين رايح للطبيب
گعد بدون ما يحجي اجت شگحه تنادي
نفخ وراح فتحلها الباب
صائب :ها خير
شكحه : انطيني جوانه اوديها لهلها
صائب : ليش عود
شكحه : شنهي ليش وليدي غير انته عريس ولازم تاخذ راحتك ويه عروستك.
صائب : خوش ماخذ راحتي وخلي جوانه اني مكيف بيها انتي ارتاحي
ليال :گالها وسد الباب اسمع شگحه بره ادردم
رجع وهو.يبتسم لجوانه
جرها يمه يمسد على راسها
گمت امتمت اريد اطلب منه نروح
بس خايفه هم يرفض
شلون يربي لازم اگله اني مگدر ابات هين انوب
وهاي جوانه مو مال تبات يم احد
تشجعت وحجيت
استاذي امانه خلينه نروح نبات يم اهلي
شفت جوانه البارحه شسوت
من وراهه حت الجربايه طلعتها بره
صد عليه وحجه بهدوء
صائب : ليال بحياتج سمعتي وحده تزوجت ورجعت ثاني يوم باتت يم اهلها
ليال : هزيت راسي لا
صائب : عجل شلون انتي تريد تروحين ما يصير يا عيني اگعدي واسكتي
ليال : بس اني ما اريد اتزوج حجيتها وبجيت
صائب : ميخالف اصبري جم يوم وانتي تعودين
ليال :ما اريد اتعود ما اريد رجعني لهلي
ضايجه اريد يم امي رجعني امانه
صائب : استغفر الله ربي لا تخليني ازعل منج بطلي بجي وروحه لهلج ماكو يالله گومي نحط فراش تانام
ليال : مسحت دموعي والعبره بيه گام هو وحط فراش بالگاع وطلع بره جاب نايلون وفرشه على دوشگ جوانه وحط فوگا جرجف ثخين ونومها بصفي وهو راح فرش ليغاد عني
ما گدرت انام بس اتگلب اني اخاف انام وحدي
اذا ما يحطوني بالوسط مگدر اغفي
واريد احد يفليني يحجي ويايه غطيت راسي بالجرجف وابجي والساعات تمر واني گاعده لحد ما طلعت الشمس مثل ليلة البارحه من طار النوم مني
تكشف الصباح يالله غفيت
حسيت على ايد تمسد على راسي
فتحت عيوني بتعب
شفته استاذي ردت اگوم ورجعني
صائب :ما قصدي اگعدج الليل ما غمضتي
بس گومي سدي الباب ورايه ولا تفتحينه ابد
وارجعي نامي
ليال : گمت وراه بتعب ردت اگع لزمني توازنت ومشيت طلع وجان اسد الباب واقفل السرگي
ورجعت بفراشي جوانه بصفي هم بعدها نايمه خفت لا هم مفيضتنه مثل البارحه مديت ايدي اتلمس ماكو شي اشوه حطيت ايدي جوه راسي ونمت بساع عبن سهرت الليل كله
ما حسيت الا على صوت الباب
شگحه كسرته تكسر فزيت على طولي
فركت عيوني وگفت بالباب
احك براسي وتثاوب
شكحه : ول بنت الاوادم ليش تخليني اسب اهلج اگعدي هاذ ثالث يوم ما شفنه خلقتج اگعديي
ليال : جاوبتها والنومه بيه
هاا خاله شتريدين
شكحه : اسمعو تگلي شتريدين افتحي الباااب افتحي طلعتي روحي فضيني يالله قبل لا يجي صائب افتحي الباب اگلج
ليال :يربي شلون اني هسع
خاف افتح الباب ويزعل مني استاذي
وما يرجعني لهلي
شكحه : وينج متي خوما متي فضيني افتحي هالمهجوم
ليال : تثاوبت واحجي وياهه خاله والله ما اگدر هسع يزعل استاذي
شكحه : اسمعي رافده تگول استاذي گرة عينج شكحه هاذ ثالث يوم وجنتج نايمه للضهر وما شفنه طولها الحلو
خوش بتليتي بلوه ماشي بسيطه اني اعلمج يا ليال
ليال : راحت وهيه اتهدد واني ورجعت فتحت البرده وگعدت حطيت ايدي على خدي واتثاوب
فتت بفراشي انوب وجان امدد بعدني ما غفيت
واندگ الباب انوب غلست والله ما اگوم لو اطگين هم
صائب : افتحي الباب ليال هاذ اني
ليال :گمت بساع من سمعت صوته فتحت الباب وفات شايل علاليگ
صائب : ها صح النوم ارجعي نامي ارجعي
ليال :لا بعد ما تسوه
محد يگدر ينام ابيتكم اشو كلها لاجه
ضحك وجان يحط العلاليگ عالميز
وراح عالكنتور يبدل ويسولف
صائب : لا احنه بيتنا هدوء تره هسع تشوفين
هاي ام اللسان بعدها نايمه
ليال : اي بعدها اني هم جنت نايمه بس
امك كسرت الباب عليه
عگد حواجبه وسأل
صائب : خوما فتحتي الباب
ليال : لا ما فتحته والله شگد لزگت وما خليتها تفوت وگامت تغلط عليه وتگلي نايمه للضهاري ومسعده اني حجيتله شگالت امه بالتفصيل
ضحك بصوت عالي و يهز راسه
اجه يمي كمش اكتوفي
صائب :عفيه عليج تسمعين الكلام
ولا تزعلين من امي مو قصدها
ليال :هزيت راسي بـ اي
راح يفتح بالعلاليگ وينادي
صائب : تعاي هاي شغلات جبتهم الج
ليال : رحت امشي على كيفي واديني وره ضهري
شفته جايب حلويات اشكال
صائب : هاي خاف تجوعين وتشتهين شي هذول كلهم الج حطيهن بالمجر
ليال : گالها وطلع حت ما تشكرته
دحگت على ساعته عالميز شفتها ب 10 يبوو هاي شگد نايمه واني اگول شكحه ليش متخبله
رحت گعدت جوانه التنبل گوه گشطتها
ولميت الفرش اليوم عبن حطينه نايلون
ما خزتني نفس البارحه
ظليت عاد احوص شلون اطلع اغسل
وگفت بالباب فتحته عالنص
وادحگ ماكو احد بالصاله بس اسمع
استاذي وامه متجادلين وحسهم عالي
ظليت واگفه ومحتاره اطلع لو لا
انفتح باب الهول وطلع منه واحد
انتبهت هاذ بركات اخوهم
دحگ عليه نظره خطف جان عاگد الحواجب
هز راسه وفات لحجرته
طلع استاذي وراه وهوه متعصب
شافني وجان يجي بسااع
صائب : هاا شعندج تردين شي
ليال : نريد نغسل وجوانه جوعانه تريد ريوگ
صائب : يالله هسع جيبي خاولي من المجر وتعاي بسااع
ليال : رجعت عالمجر طلعت خاولي ومشيت ويا عالمغسله غسلنه وونشفنه رجعنه عالحجره راح وشويه واجه جايب الريوگ او بالأحرى غده عبن صارت ب 11
اكلنه وبلش الملل بالحجره هوه يطلع ولازم اقفل الباب وراه يمكن لوما جوانه ويايه اطگ روحي واموت من الضوجه
امل : كملت غده الفلاحين ودزيته
وصبيت غده لحميد وصبره والجهال واخذت صينيه لعمتي معاضد بالگوه تا حطت لگمه بأثمها
غسلت المواعين وعجنت انوب للعشاء
طلعت انشف بأديني وجان ينفتح الباب واشوفه عماد اجه شايل جنطته على متنه ومبتسم
گلبي رجف گمت ابلع بريگي
تخدرت گوه حركت رجليه ومشيت وگفت بالطرمه تلگيته فتح ادينه وحضني سلم عليه واني جامده
ميته بدمي
عماد : شبيج امل خوما زعلانه يابه حقج تزعلين
والله ادري طسيت ولا خابرت ولا سألت شسوي صارت عندي ظروف بعدين احجيلج هسع اريد شي اكل ميت جوع
امل : حاجها وفات جوه ينادي
واني وراه امشي اسحل بروحي رجليه تخيطو
عماد :علويي وينك مصگوع
ــ صد عليه گال شو ماكو احد
امل : الجهال وره البيت يلعبون
عماد : هاا وامي وليال وينهم
امل : عمتي بالحجره
عماد : يمااا وينج
امل : احجي ويا ومتصنمه عيوني حت ما ترمش راح على حجرة امه واني ادعي لا تفوت عماد الله يخليك لا تروح
عماد : اااامل
امل :رجف گلبي هاي النبره اعرفها
مال انزعاج رحت اسحل بروحي
وگفت بالباب شفته لازم ايد عمتي
وعاگد الحواجب صد عليه وسأل
عماد :شبيها امي اشو مريضه وگوه تسولف
وما تفعل تحجيلي شي شبيها
امل : ادحگ على عمتي دموعها مثل الشلال وتعض بشفتها وعماد مبهوت يدحگ علينه ثنينه ويريد يفهم واحنه ساكتين عاط بينه
عماد : شكووو عاااد شصاير احجن
امل : ما صاير شي
عماد : لا تجذبن عليه خوش سولفن شكو
امل : اخذ صفنه وگال
عماد : ليال وينهااا تمرضت انوب مو عرفت والله عرفت گلبي لاسبني من يوم طلعت وينهااا ليال هسع سولفن
امل : گام يعيط ويدور بالحجره وينادي ليااال ويستفسر شلون تمرضت لف البيت وهو يدور ويحجي وگف وجان يعيط بيه
عماد : انتي ما تحجين لخاطر ربج وينهاااا ليال وينها
امل : حطيت ايدي على اثمي وثنيت بالگاع ابجي ما گدرت اتحمل انصدم واجاني ركض لزم وجهي وعيونه بيهن الخوف
عماد : امل شبيها ليال وينها احجي تمرضت جثير مو كلشي اتحمل امل تمرض وتطيب بس لا تگولين غير شي لا تگولين ماتت احجيييي امل
امل : اخر كلمتين عاط بيهن بعلو حسه گام يخض بجتفي ويريد احجي واني نهاريت لحد ما طلعت عمتي معاضد من الحجره تسحل بروحها وگالت
معاضد : كلشي مابيها اخيتك وليدي زينه ومرتاحه ابيت رجلها ومكيفه تعال احجيلك وافهمك لا تنفعل
وروح ابوك
امل :انصدم عماد وفتح اثمه
يدحگ علينه ويمتمت
عماد : بيت رجلها شنهي شبيكم
معاضد : وليدي اخيتك اجاها نصيب وما وگفنه بدربها تزوجت وراك وهاي صارت بعد والبنت اول وتالي تعرس حگك علينه محد ستشارك تعال فوت جوه يمي وروح ابوك لا تشلع گلبي عليك
امل : گعد عماد بالگاع وادينه مرتخيات بحضنه وعلى صدمته يريد يستوعب وعمتي معاضد تحجي ويا بجديه وتريده يفهم
عماد : انتو ناصبين عليه لو شنهييي
ليال شلون جاها نصيب وشلون تعرس بس گولو مريضه وصار شي وما نريد نگلك موو شصار فهموني احد تعرضلها نهزمت لو شنهي لا تخبلوني البنيه وين
امل :مسحت دموعي وسحلت نفسي يمه
حطيت ايدي على جتفه واكدت علي
اسمع عماد اول وتالي انته متخبل شلون مجانت الطريقه الي راح تعرف بيها راح تظل ردة فعلك نفسها وما تغير
الي صار صائب خطب ليال وراك من رحت وانطا بدالها رافده لحميد واتفقو بساع وثاني يوم عقدو وثالث يوم زفو ليال وهسع ابيت رجلها صارلها ثلاث تيام
امل : انبهت عماد وفتح اثمه وابتسم بستغراب
اخذ فتره بعدين گام وظل صافن وما حجه شي راح ركض اخذ المگوار وطلع ما ندري وين يريد على حميد لو على صائب
عمتي معاضد ما گدرت تلحگه وطلبت مني الحگه اني رحت وراه وصلت الباب وعاط بيه بدون ما يصد
عماد : يا ويلج يا امل تلحگيني يا ويلج
امل : گالها وكمل ركض حافي
ظلينه گاعدين بالباب اني وعمتي ونلوب
عمتي تنعي واني ابجي اوف يربي شصار هسع وينك يا عماد وشسويت صارت العصر وهو ماكو
على گعدتنا ونشوفهم من بعيد عماد گايدنه زلم ثلاثه وحميد منا هم جلبين بي وحالتهم تخوف الضاهر عماد اول ما لگه حميد وتگاضب ويا
عمتي فاتت جوه بساع واني ظليت بالطرمه
ادحگ حميد مكشم تكشم وعماد يشيل بروحه ويرجد والزلم ما تفعل تهده
ضارب حميد وهاد على بيت صائب
ولازمينه بالگوه اصدقائه الدراويش يبوسون بي ويهدئون بي وما يفعل يهجد تالي ثنين من الزلم گالو نظل يمه ليما يهدئ واخذو عماد وفاتو عالديوان
وحميد ظل بالطرمه يدخن
واثمه كله دم تستاهل اخوك ازغر منك يمد ايده عليك
هسع شلون يربي اذا عماد هد على بيت صائب
يربي تستر
مر يومين والزلم مگابلين عماد وما يفعل يهدونه
وعماد صوته طبگ معد يگدر يحجي
اخر شي طلع الضهر زعم عالحمام وجان يفلت ويروح ركض
لطمت على وجهي وصرخت طلعو الزلم تركض وراه
بس ختفه عنهم بخطوتين مدري وين وصل
انهد حيلي ومغصتني بطني معد اگدر امشي ااخ يا عماد
ليال : گاعده بالحجره واصفط بالغراض عالميز
وارجع اخربهم واصفطهم انوب
لزمت راسي راح اطگ من الضوجه
وهاي جوانه صدعتني هالگد ما تحجي
وتسولف تريد احمرها
جوانه : حطيلي حمله ليال عفه حمليني
ليال : ما يصير عيب هاي مو مالاتنا
جوانه : بس حطيلي عفه بس نتفه
ليال :اااف اخذت قلم الحمره حطيتلها شويه
سديته ورجعته بمكانه
كيفت جوانه واني من مللي هم ردت احط شوي حمره گلت عود امسحه وما اخلي استاذي يشوفه
اخذت القلم حطيت على شفتي الفوگ
وبعد شفتي الجوه ما خطيتها
وجان اسمع العياط بره يرج رج
وگفت بالباب اتصنت واحوص
اريد اطلع اشوف شكو
حاطه ايدي على گلبي
اريد اميز الصوت والله هاذ صوت عماد
مبين من بين الأصوات كلها
شهگت مكيفه عماد يروحي اجيت
ثارت فشگه وجان اصرخ واسد اذاني
وجوانه تصرخ ويايه
حصرنه نفسنه بين الكنتور والزاويه ونرجف
سعاد : حالتي تعبت جثير واستحي احجيلهم خاصة غازي تلعب نفسي من ريحته وريحة ملابسه وهنه نضيفات اصلا دايخه طول الوكت وامشي واروط وكاتمه بداخلي وما احجي
لحد ما دخت وگعت بنصهم
ودوني عالدكتور سولي تحليلات وطلعت حامل
عمتي علگت العياده بالهلاهل وغازي يبجي ويضحك ويهوس كيفو عبالك قرن صارلنه ما عدنه جهال
رجعنه على بيتنا طبيت بحجرتي وعمتي گالت ظلي هين مددي ورتاحي وغازي المصگوع ما اخلي يجي صوبج عبنج تكرهين ريحته بنيتي هاي من النساة
مددت وامسد على بطني واحمد ربي
وافكر بأمي اذا عرفت شگد راح تكيف
رغم لعبانه نفسي بس مكيفه اريد اطير من فرحتي
سمعت صوت واحد يصيح بره
گمت فتحت شباج حجرتي ادحج
يمه هاذ عماد اخو ليال
اجه مذعور وهاد بالمگوار يبو يهالعثره
لبست ملفعي وطلعت اركض على غازي
الحگ الحگ
هاذ عماد هد على ابن عمك الحگهم
طلع غازي ركض واني وعمتي وراه
وصلنه الطرمه وعماد بدفره وحده وگع باب الصاله وجفت عليهم ينادي بصائب
طلعو بركات واهله جلبو بي
صائب جان بالحمام البره
اجه يركض بطرگ البجامه
شافه عماد وجيت علي تا يضربه
لزمو بركات وغازي وسعد
وهاذ منفعل يشيل بروحه ويرجد
عماد : صاااائب يول شلون هيج تسوي نذل واني الي امنت بيكم امنتكم على خواتي عرضييي
شلون تخليني اولي ومن ورايه تزف اختي الي ازغر من جهالك
شلون فهمني هدوني خن اموته
صائب : اهدئ عماد وخليني افهمك لا تجاوز انته فايت على بيت واله حرمته وهاي مو اخلاقك
عماد : انته خليت بيهاااا اخلاق خليت بيها اخوه وحرمه يا صائب ليش فهمني ليش اني اريد منك تنكر الحجي انكر وگول الي سمعته جذب يول اني اعتبرك اخووووي واعز من اخواني
صائب : اذا الي سمعته اني تزوجت ليال اي تزوجتها على سنة الله ورسوله لا عيب ولا حرام ما اجرمت اگعد واستهدي بالله وخن نحجي
عماد : لاااا يا نذل يا حقير ومتفاخر بيها وتگول مو عيب شلون مو عيب واني امنتك على بيتي تغافلني وتاخذها لو يجي الف شرع ما اغفرلك شلون دبرتها يول عقلي مجاي يصدگ تخسه والله صارلي ثلاث تيام الووب ومجاي اصدگ
ــ اخليك حارس على بيتي وارجع الگاك بايگه وهاجمه
وتگلي مو عيب خنتني وتگلي مو عيب هنتني وخليت عتباري جوه رجليك وتگول ما سويت شي غلط لا يربي خاف اني متوهم وانته مو صائب يول هدوني بس هدونييي
سعاد :صائب دنگ راسه من شافني
عبن مو لابس قميص فات جوه تا يلبس
فلت عماد من بين الحواجيز ولحگه
تگاضبو بالصاله وتضاربو هو وصائب
عماد جضع صائب بالگاع وطاح بي
بوكسيات خله الدم يسفح
غازي وبركات وسعد الا لفو راس عماد
بجرجف يالله گدرو ويوخرونه من صائب
وهاذ گام والدم مغطي وجهه
فات على حجرة امه
طلع مسدس وضرب فشگه بالصاله ويصيح
صائب : عماد اهدئ افهمك شبيك صرت همجي ما بايگ اختك اني صارت زوجتي ان رضيت ون ما مرضيت
سعاد :انهبل عماد جيت على صائب وهو بيده المسدس ولا اهتم رجع يضرب بي
ملخه تملخ وگع المسدس
تناوشه غازي فصخه كلشي وحد ولگحه
وگع صائب من الضرب گاضب
ضلعه يمكن انكسر
ثلاث زلم وما يگدر يحجزون عماد
جان فاقد يضرب بصائب بدون وجع گلب
سمعنه حس زلم بره طلعت شگحه
شاكه ثوبها تلطم وتصيح
فزعتهم طبو شالو عماد
عگب ما خله صائب بتالي روح
وصلو باب الصاله تا يطلعونه بره
فلت منهم انوب ورجع على صائب خنگه
يشيلون عماد ويشيل صائب ويا ما يفعل يهده
ادحگ صائب ادينه ارتخن
ليال :صوت اللجه والصياح خلاني اتذكر اهلي
صرت اتخيلهم بيوم ماتو
احسهم بعدهم بره وابويه يناديني
ظليت ساده اذاني
واسمع صوت ابويه يگلي اطلعي
وينادي بعلو حسه ليال
گمت بدون وعاتي فتحت الباب وطلعت شفت
عماد يخنگ بصائب تا يموته
حضنت عماد من ضهره ابجي واتوسله يعوفه
صد عليه حضني وگام ينهت
عماد : ليال بنيتي شجابج هين يروح اخوج خلوني ليما اروح والتفو عليج الي ما يخافون الله
ليال :حضني حيل ويصيح بحسه المبحوح
عماد : شلون گلبكم انطاكم شلون
والله ما ارحمكم اليوم ادفن شكو واحد شارك بهاي الجريمه
ليال : گام يتهدد عليهم وتناوش المگوار
تا يضرب استاذي حضنته
من خصره واصيح
: عوفه امانه لا تكتله
حاوطني وگعد يناهت ويبجي بعبره
سعاد :صائب جان امدد بالگاع
لازم ضلعه ورگبته ويگح
وشكحه تفزع بالزلم تا يكتلون عماد
رادت تنزع مفلعها الا عاط بيها بركات
بركات :لحد يحط نفسه احنه اهل بيناتنا
يالله كلمن على بيته
شكحه : لا والله ما ظلينه اهل ولا شي هاذ الزلمه زفينه اخته بشرع الله وبرضاة اخوها تالي يجي هاد علينه وما خله واحد جدامه وما ضربه دحگو شسوه
كسر ولدي تكسر وصيح النسوان اذا ترضاهه شواربكم تا ما اظل هين واشيل من الديره كلها
بركات :يمه كافي فوتي جوه
صار سوء تفاهم وميخالف عماد من عدنه ويمون
عماد : اني لا منكم ولا اعرفكم غريب وذاك دربي صيت ان مرت ابويه تصير خالتهم هاي گرابتنه الوحيده
امنت بيهم وفوتتهم بيتي حت بالديوان ما اگعدهم احطهم بالحجره وداخل بيتنه اسرارنه گدامهم ومتكشفين على كلشي وناكل بماعون واحد
ــ امنتهم على بيتي وعرضي وحياتي
واعزهم اكثر من اخواني اجاني ماجد خطاب گبل فتره ورفضته مو زغراً بي بس اختي جاهل يا ناس جاهل راح الزلمه وحفظ مي وجه
ــ تالي يغدرون بيه ويخلوني ليما اروح ويزفون اختي ورايه ولمنو يزفوها لأخو الرجال الي اجه خطاب
واكبر منها ب ب24 سنه الله يقبلها معلم يتزوج طالبته الجاهل
ــ عجل شگد ما عدكم غيره وشگد ما عدكم دم
بثلاث تيام تحصلوها وتزفوها ليش ماخذينها من وره ثار والله ما اسكت وألا اطلع هاي الجريمه من عيونكم واخذ حگ اختي مربع اصبرولي
سعاد : گامت الناس تحجي وتهدي بيهم
وميخالف وطبو طرف محايد يجرحون ويداوون
استمرت الملحمه ساعات وعماد رادت تطلع روحه
ويريد ياخذ ليال وصائب ما يفعل ينطيها
تالي الزلم وگفو ويه صائب عبن ليال مرته شرعاً وحجو ويا عماد وفهمو انه درويش ولا يخرب سمعته
الناس كلها تحترمه وتعزه
من بعد صراع طويل ورادت تصير بالسلاح تالي عماد اخذ جوانه وراح بس هددهم يرجع ياخذ ليال وغصب عنهم اخذو الزلم وراحو بالگوه
وليال گامت تبجي تريد ويه عماد اخذها صائب
قفل عليها الباب بركات وغازي
اخذو صائب عالدكتور
وشكحه راحت تركض عالحجرة
ترجد بالباب وتنادي بليال
واني ورافده لازمينها تريد تكتل ليال تگول كله من وراهه ظلت تدفع بالباب الا فتحته طبينه لگينه ليال فاقده الوعي لا ايد ولا رجل نگعد نريد ماكو
عافتها شكحه وطلعت گالت بلكت تموت ظلينه يمها اني ورافده نگعد بيها وماكو عبالك ميته
رافده : هاي كل نوبه يصير بيها هيج
سعاد : هم لو اكو زلم هين جان مودينها
بس كلهم راحو عالدكتور ظلينه مگابلينها ونلوب
...
امل : رجع عماد جابو الزلم شايل جوانه ويتهدد
ما يفعل يهجد حلف الا يجرم بيهم
گامو الزلم يحجون علي اعقل وما يصير
اذا اجرمت اهلك وين يروحون
ما نام الليل ولا غمض عيونه ورمت منالبجي
: كافي عاد هلكت روحك
عماد : عوفيني اترجاج
نار بگلبي ما تهجد انكسرت عبن ما عندي
ضهر يسندني ابن ابويه اول الخاينين
شسوي گليليييي
مجاي يروح من بالي وجه ليال
ما شفتيها شلون مجلبه بيه وتصيح تا اخذها
غلبوني طلعوني عايل عبن ما عندي ضهر
امل :انفعل معد افتهم من كلامه بسبب عرته
وبحة صوته
عماد :بسيطه وين يروح مني حميد
مزاله مابي نفع اكتله واخلص
امل :خوش عثره انته تحجي من عصبيتك
عوف هالحجي وتعوذ منالشيطان
ظلت اواسي بي لحد ما شگ الفجر
مدد عالصبه يناهت من اعصابه المنهاره
..
ليال :حسيت على ايد تمسد على راسي
وصوت قرأن
فتحت عيوني بتعب راسي يوجعني
والحجره ظلمه همست مي اريد مي
صائب : هاا ليال گعدتي
تردين مي اي هسع اجيبلج
ليال :شعل الضوء وجابلي مي
گعدت شربت ورجعت عالمخده
راسي ثگيل يوجعني ودايخه
صائب : ليال شبيج احجي
صرتي زينه خوفتيني عليج
ليال :صديت ادحگله
وجهه مورم من الضرب ولازم ضلعه
گوه يتنفس
تذكرت الصار وختنگت ابجي
صائب :لا تبجين ليال نامي ورتاحي
ليال : عماد وينه شصار اريد اروح على بيتنا
صائب : من اطيب اوديج
هسع اني مريض ظلي يمي
وعماد زين راح لهله گتله بس اطيب ارجعج
ليال : نمت بصفحه ودموعي تصب
همست جذاب انته مثل ماجد جذبتو عليه
صائب :نامي بابا مو زيلج تبجين
ليال : شلون انام ومنين يجي النوم دموعي تصب
سمعت الأذان گتله هاذ اذان العشه
صائب : لا الفجر
ليال :حيل يربي شگد فاقده اني عجل
كتمت صوت شهگاتي بأيدي واصرخ صامت
بالگوه گمت صليت ورجعت نمت
الحسره تاكل بگلبي
امل :ثاني يوم طلع عماد منالصبح
گال عندي شغل
صار الضهر وهو ماكو گمت الوب وراه
انوب حت حميد ما رجع
واجه الليل وهمه ماكو
تخبلت وين راحو هذول
وگفتني عمتي معاضد بالباب
اسأل الرايح والراد عليهم
صارت ساعه 8 بالليل وماكو رحنه
بثاني حال وفوگ همنه صبره سممتنه بحجيها
تلوم بعماد ما جنت بحيل اردها ذبحني القلق
لهناك واندگ الباب طلعت
ناديت منو اجاني صوت بركات
بركات : هاذ اني
امل : فتحت الباب ها بركات شكو
بركات : امل اسمعي اجاني خبر مدري جذب مدري صحيح بس لازم بالحالتين اخبرج
امل : شنهو الخبر بركات لا تهبطني
بركات : سمعت من الناس الي زعم جانت موجوده گالو عماد و حميد متكاونين بالنجاره الصبح
ملتمه عليهم الناس ومحاجزتهم وراهه بشويه جايه سياره بيها زلم ملثمين ماخذين عماد وحميد
امل : لطمت على وجهي وصرخت يبو يالنكبه شجاي تحجي بركات
بركات : والله هاذ الي صار يا امل وهسع صائب دزني ابات يمكم هو مريض فلشه عماد وكسر ضلعه
امل : عطت بعلو حسي يستاهل صائب يستاهل كل الي صار من وراه لوما هو مجان صار هيج
بركات : هسع مالو داعي هالحجي يا امل اذا تسمحين افوت
امل : سمحتله وفات سد الباب وراه دخيلك يربي هسع شگول شحجي لزمت بركات من عكسه وحتمته ما يحجي لصبره ومعاضد اگف خن نطلع عذر
بركات : شنطلع عذر عود نگول ماخذتهم الشرطه عبن مسوين كونه بالگهوه وباجر يطلعون
امل : مو خاف ما يصدگن لو يهبطن شسوي هاي عمتي معاضد مريضه
بركات :والله يابنت خالي شسوي عندج غير حل
امل : لا والله حجيتها وبجيت
بركات : امسحي دموعج وتعاي عجل نحجي مثل ما گلت انتي لا تحجين شي
امل : طبينه جوه وگام بركات يلزگ جذب ويحاول يقنعهن صبره حطت اللوم على عماد مثل العاده وعمتي معاضد تبردت تبجي وتدعي الله يفرج عليهم
گمت الوب مثل المعسره ما اعرف شسوي
ظليت للصبح گاعده افكر
وين راحو منهو اخذهم
ابجي صامت ما اريد اضهر شي
بركات راح وگال اذا سمعت شي اخبرج
وانتي اذا سمعتي خبريني ومر يومين
وعماد وحميد ماكو وبركات وصائب ما مخلين احد ومو سائلينه عليهم ابجي وحدي واحزن وحدي وعمتي معاضد اطلعلها الف عذر باليوم تا اقنعها انكسر ضهري گمت ادرگ
انحنيت من الهم الي شلته بهذاك الوكت
ليال :مرت ايام والوضع نفسه
عماد ما وصلني ولا اعرف اخباره
والحصار عليه ما تغير
استاذي ما يخليني اطلع
ولا يخلي احد يجي يمي
حت كريمه حاولت افتح الباب واناديها
تجي تگعد يمي طردها ما خلاهه
ليش هيج يسوي والله تعبت
جانت جوانه مونستني هين
اخذها عماد وظليت وحدي
متت من القهر والضوجه راح اطگ
قرفصت بالگاع وسانده راسي عالجربايه
طلع استاذي يسبح وهم حتمني اقفل الباب وراه
قفلته ورجعت سارحه بتفكيري ودموعي تصب
سمعت صوت جاس گلبي
فزيت على طولي لزمت الباب واسمع زين
ماجد : شلونكم اهلي اني جيت
ليال : حطيت ايدي على اثمي وشهگت بفرح جسمي رجف من ساسي لراسي فتحت الباب بساع وطلعت شفته واگف بالصالة وحاضن كريمه بأيد وشايل جنطته على متنه
اجت عينه عليه شافني وبهت وگعت الجنطه من ايده ورتخه هد كريمه وظل فاتح اثمه
ويدحگ عليه من فوگ لجوه
جنت لابسه دشداشه حمره وشعري منثور واگفه اباب حجرة استاذي
مسحت دموعي برداني وركضت حضنته واشكيله
ــ ليش عفتني ورحت مو زعم نتزوج اني وياك ليش خليتني وحدي عذبوني
حميد ضربني واتزوجت استاذي لبسوني بدله وزفوني سولي عرس
ــ وهسع ساجنينييي هين وما يفعل يخلوني ارجع اني بطلت حت انته ما اريد اتزوجك
بس رجعوني امانه
وديني لهلي ماجد ودينييي
عماد تكاون وياهم راح وما رجع عليه
وديني انته
جنت دافنه راسي بحضنه
ابجي واشكيله رفعت راسي ادحگله
شفايفه وادينه يرجفن
وگع من طوله ثنه على ركبه وادينه ارتخو
اجت شكحه من بره هيه وسعاد وغازي
وبركات ظلو واگفين ويدحگون
غازي گنبص يم ماجد وحضن جتفه
واني رجعت ابجي واشكي ثنيت يمه ولزمته من ايده
دحگ عليه وجان يغمض عيونه و يگع
وگامو يصيحون علي كلهم شكحه شگت الثوب وسعاد لزمتها
وغازي وبركات يگعدون بماجد وما يفعل يگعد
وگفت على طولي حطيت اديه على وجهي واريد افتهم شكو ليش هيج صار رجعت دنگت على ماجد فاتح اثمه وفاقد اگعد بي ماكو گمت اصرخ لا تموت امانه لا تموت مثل ابويه ومهره گوم ماجد امانه
غازي وبركات يسحلون بي وما يگدر يشيلونه
تخبلت ادحگ كلها گامت تصيح بركات بعلو حسه يصرخ وغازي گام يلطم وشكحه فقدت الوعي وكريمه تلطم وتهلس براسها لهين وصدگت ماجد مات
امل : غسلت الملابس وطلعت انشرهم عالحبل
والف حسبه تجيبني وتوديني وين رحت يا عماد
دخيلك ربي من عمري على عمره
دموعي ترشگ انعميت هالگد ما ابجي
احير بمنهو ربي الحمد لله على كل حال
انفتح الباب مال السياج مسحت دموعي بملفعي
كل ضني عبالي الفلاحين ما صدگت على روحي من طبگ الباب وراه واجه يمشي عليه
ركضت مندل بروحي وحضنته واصرخ عماد
رجعت ابوسه من صدره ومن ايده
لزمت ايده واصرخ استوعبت زين ادحگ عليهم هو وحميد تعبانين وعيونهم مورمه وگوه يمشون
حميد يادوب وصل الطرمه ودنگ باس الگاع وحط ادينه على عيونه وعماد گعد عالحافه وساكت مثل الي جاين بصدمه
بس فرحتي بيهم تجاهلت حالتهم گمت اصيح وطبيت اركض بشرت عماتي وطلعن بوسنهم ويحضنن بيهم وهمه ولا انطو رد فعل
بالربع ساعه نريدهم بس يحجون ماكو
بس ساكتين تالي حميد حجه بتعب
حميد : هاا عماد نروح
عماد : اي نروح
امل : هين بلشت اسأل واستغرب عبن وضعهم مجان يسر ابد وين تروحون وشبيكم وين جنتو
عماد لزم راسه وعصره مدد بالگاع
ويدحگ عالسگف اثمه ابيض عبالك شارب نفط
غمض عيونه وجان يگعد صفگ بأدينه وگال
عماد : نروح نشوف اعدام حامد وربعه اليوم
الصياد لزم الي جتلو اهلنه واخو بالعرس ومن ضمنهم طلع حامد
يتبع…………