ماجد
من زفو المحبوب وكت المسية
ذاك رمي الچيلات تمنيتة بيه
زفوها ولزافوف مر على بابي
عمري نكلب سبعين واني بشبابي
عرين الصياد بقلمي شذره
امل :حسبي الله ونعم الوكيل عليج
شيسوي بيج ربج انوب
اخذ رجلج وابنج الجبير، وبنتج بيوم واحد
وما اتعضتي تصرفاتج مال جهال
جان استحيتي مره شكبرج
المفروض كامشه القرأن
تلمين حسنات لأخرتج
مو تلمين حطب لنارج
صبره :امشي ولي عابت هالوجه الأزرگ
احمدي ربج يمنه وادم جان خوش عرفت اربيج
امل :الله لا يوفقج عسا ادموع ليال وحوبتها
ما تگع بالگاع كلهن يرتدن عليج ان شاء الله
ليال :حضنتني امل فوتتني جوه وگامت تنحب وتبجي وتلمس بوجهي ومسحت الدم من اثمي حطيت ايدي على خدي يوجعني
منالضرب ابجي واشاهگ وصافنه افكر
شصار گبل شوي مجاي استوعب
دموعي تصب ومگدر احجي
خايفه ومرعوبه
طلعت امل وهيه تلطم على راسها
ظليت يم امي الي انبطحت
وگامت تعن گمت امسد على راسها
وادحگ حواليه كلشي ما مفتهمه
امل :صگعه وگعت على روسنه
شي ما يتحمله عقل شجاكم يا صائب وحميد ثنينكم.جبرتو خواتكم دخيلك ربي منا ليال تبجي وما تدري السالفه شنو ومنا رافده گلبها ينزف دم.
ادري شلون الكم.نفس يا ظالمين انته يا حميد
مو جاي ادحگ رافده اگبالك
تبجي ما تريدك شلون نفسك راح تتقبلها يا ظالم
وصائب مستحيل اصدگ هاذ نفسه ابن خالتي المثقف اكيد اكو شي صار ويا راح اتخبل
لزمت راسي وگعدت بالگاع
شسوي ياربي رحمتك الطف بحالنا
راح الشيخ اجت صبره طشت جكليت على حميد ورافده بدون هلاهل وباركت لصائب على شنهي مكيفه على طياح حظج وحظ خلفتج
حميد مكيف يريد يطير ويبوس براس صبره
ورافده ادحگله عيونها دم منالقهر
گادت امها وراحن مشي
ظل صائب واگف ويه حميد
يسولفون بجريمتهم
صائب : مبروك حميد اني عن نفسي باجر ازف
وعرس ما راح اسوي وانته ظلت يمك امت ما ردت تعال زف وبكيفك اذا تريد تستعجل لو تصبر
حميد : عليش هالعجله صائب اصبر شوي خن نتنفس لا جهزنه لا احد يدري
صائب : عن نفسي اليوم اجهز كلشي وما اريد اتأخر لو يوم اني لو الحگ جان اليوم زفيت بس صارلي شغل ومحد ويايه
حميد : هاذ هو عجل الي تشوفه سوي اني راح ارتب على كيفي
امل :طلع صائب لحگته انادي
وگلبي يفور من الغيض انادي ما يفعل يگف
فتح باب سيارته لزمته من ايده
وطبگت الباب قوي عاط بيه
صائب :شبيج امل شتريدين
امل : فهمني يا صائب شجاي يصير هاذ انته العاقل والمثقف
صائب : ليش شمسوي
امل : وهيج بكل برود تگول شمسوي انته جبرت اختك وجبرت بنيه جاهل ويتيمه واخوك يريدها رحت عقدت عليهااااا ليش يا صائب ليييش شنهو مبررك گدام اخوك شنهي مبررك گدام. ربك.
ـــ ما جاوبني وخرني من الباب وشغل سيارته وراح خلاني اتخبل بزياده انهد حيلي اريد اصل الطرمه معد اگدر گعدت يم الدنگه ولزمت بطني الوب يا ناس وحايره بزماني شلون اسوي هسع
سعاد : رجعو رافده وشكحه من بيت الملا يبجن
تكسر الخاطر حالة رافده بنيه مرتبه وحلوه معلمة وتعبانه على نفسها تروح بكل بساطه تنغصب على رجال ما تريده والله جريمه
شويه واجه صائب بالسياره
مجرد طب البيت صار عياطهم عمتي طلعت من جوه وراحت عليهم واني ما تحركت من مكاني شبعت قهر عالبعد واني اسمع حجي رافده وصائب
صائب : اول وتالي جنتي راح تزوجين حميد يا رافده عجل ما گلتي ماجد من راح خطب ليال شنهو العرض الي راح يقدمه لحميد واني متأكد انتي جنتي راح توافقين بكل رحابة صدر عبن هاذ ماجد محد يرفضله طلب
رافده : مستحيل ارضه لو يموتني مستحيل جنت راح اگف بوجه بكل حيلي على شنهي اطاوعه ليال جاهل واني سبق وبلغت فاتن ومهره الله يرحمها گلتلهم ماجد يريد ليال بس ما تجره وتصير عبن ادري حميد راح يگبعها ويجيبها وذا ما تصدگ اسأل فاتن
صائب : هسع الي صار صار كافي مناحه هاي عقدتي على حميد شبي خوش رجال على اقل راح تزوجين واحد رايدج وانتي مو زغيره تانگول ننتظرها تكبر
رافده : هاذ الي طلع وياك خلفله عليك
زين عوفك مني يطبني مرض احجيلي ليال الجاهل شلون راح تعيش وياهه شلون گلبك انطاك مو جنت تگول ليال مثل بنتي كون تسمع صريخها وحميد يضربها علمود توافق بيك وهيه بكل برائه تگله استاذي هاذ شلون اتزوجه
صائب : حياتي اني وليال محد اله علاقه بيها هيه بنتي وراح تظل عجل تردين اخلي ماجد يلعب بينه بكيفه هذاك النذل الحقير طلع هوه وره رسوب لياااال نذل ودني نفس لو اندل بي ادمي اني ازفها اله بيدي بس دني نفس ما عنده محرمات خانييي
رافده :ظل بهاذ حجيك لعبت بيكم نضال طوبه
تره تريد ماجد من زمان وهو جان لابسها
والله تسحل بروحها علي سحل وما يصد بوجها
شافته سكران ما يندل بروحه واستغلته
صائب : حقج تحجين هيج ما شفتي الي شفته اني
كافي تصيحين يا رافده اترجاج اني باجر ازف خليج اخت لأخر مره ويايه وامشي نجهز
رافده : شتجهز الي يسمعك يگول الأستاذ صائب راح ياخذ مره معدله مو ياخذ طالبته الجاهل الي ما تعرف الطين من العجين
سعاد : لزمت راسي تصدعت من حجيهم يربي هاي شلون طلبه شلون راح يعيشون نفضت نفسي وگمت مددت ااخ لو بس اعرف غازي وين راح ،،،
امل :اختلط الظلام مو بس بالجو
اختلط على روح رافده وماجد وليال
امشي مثل الثوله واتصفن ويه روحي
شسوي رحمتك يربي
گعدت بالمطبخ لازمه راسي احسه يريد يطگ
منالقهر وحيلي مهدود منالجوع
مالي نفس اكل شي
فاتت صبره شايله جيس حنه حطته گدامي
صبره : هاج هاي حنه عجنيها
اليوم الحنه مال ليال اني عزمت البنوات تا يسولها حنه بسيطه خوما تطلع من البيت سكاتي خطيه
امل : ضحكت بستهزاء وقهر واصفگ بيدي
صبره : وسم شجاج
امل : ينعل بليسج يا عمتي والله ينخاف منج مكلفه نفسج وجايبه الحنه وعازمه البنوات زعم هاذ لخاطر ليال مو ليش ما تگولين لخاطر الناس ما تگول حميد جبر اخته واخذ بدالها مره
انتي شنهي من بشر
مستعده تسوين اي شي لخاطر ترضين غرورج وانانيتج
شحصلتي صارلج سنين تخططين
اول شي استلمتي فاتن انطيتيها لشايب علمود الفلوس وتعذبت وخسرت صحتها
وراهه استلمتي محمد الله يرحمه وزوجتي وحده ما يريدها خاف تعبالين ما ادري تره سمعت الحجي كله بهذاك اليوم من فاتن حجت الماجد
وراهه عاد استلمتي مهره وظليتي وراهه الا دفنتيها يالله رتاحيتي بسبب طمعج دفنه ثلاثه بيوم واحد ومجاي تواطين ابد بالعكس زاد طبعج عوفج من ليال هاي منتهين منها مستعده تذبينها بالنار لخاطر سعادة ابنج
تعاي گليلي،شمدريج حميد ورافده راح ينسعدون ها
بطلي هاي سوالفج انتي مره جبيره رجلج بالگبر شتنتظرين گليلي
مستمره احجي نفعلت نگشت دود بطني كله
لحد ما نفجرت بوجهي مثل البركان وگامت تعيط وهجمت عليه تضرب بيه تعافشت وياهه هيه اضخم مني تغلط،وتسب وتضرب وتفزع بحميد
ليال :نايمه على رجل امي بالحجره ودموعي تصب
وامي تمسد على شعري وتصبر بيه جسمي يرجف
ما جاي استوعب شي من الصار
گامت تجيني صور اهلي من ماتو
افز اصرخ وترجع امي تحضني
شگد حاولت اطلع منالبيت ما گدرت
كل البيبان مقفله والمفاتيح عد حميد
والتلفون ماكو اريد بس اتصل بماجد
يجي ياخذني هوه مو گال ما اتأخر
سمعنه صرخات امل فزينه اني وامي بسااع
لگينه صبره تضرب بأمل گامت امي تفازع بينهن
كسرن غراض المطبخ والشعر صار بكل مكان
امل هم تضرب بصبره وتصيح
وامي معد تگدر تفازع انهد حيلها
گمت الوب واعصر بأديني اريد افك امل ادحگ الدم گام يطلع من خشمها
تناوشت الجفجير وارگع صبره على راسها وجان ادوخ وتگع لزمت راسها وگامت تصيح
ركضت على امل حضنتها وامسح بشعرها وخشمها يكت دم
على حطتنا واجه حميد ينادي
جان تعيط صبره الحگني ول حمييد
فات بساع عالمطبخ يدحگ ويسأل شكو
استلمته صبره توز بي عليه وعلى امل
صبره : اوف يابه حميد جيت على امل گلتلها اعجني حنه تا نحني ليال عزمنه البنوات وجان تستلمني يابه غلط وتفشر وما خلت وهجمت عليه
وضربتني وتجي هاي اخيتك فوگ زيني وياهه وتضربني بالجفجير على راسي
ليال :تخبل حميد گام يحجي ويرعد
ما شاف حالتة امل شلون نتفتها صبره
رافع ايده ويتهدد عليها
اذا ما صارت ادميه يطردها لهلها
صد عليه جرني من شعري
حميد : وانتي ليال شلون تضربين امي حيوانه والله لوما عرسج باجر الله اصگطج تصگط امشي ولي بدلي وعجني الحنه
ليال :دفعني وراح گعدت يم امل ابجي
وامي سانده يمنه تنحب وتنعي
اجت صبره اخذت الحنه
عجنتها ولا جن مسويه شي تهدد وتحلف بأمل
امل :انهضمت لأول مره بحياتي
احس نفسي انكسرت
مو عبن صبره ضربتني وغلبتني
لا بس مهضومه على هاي الجاهل
الما تعرف الدنيا شضامتلها
مگنبصه يمي وتمسح بدموعي
ليال :كافي تبجين بس يجي عماد يحل كلشي
وخلي نعزل وحدنه واني حت دراسة بعد ما اريد
امل :اااخ يا ليال اااخ ياريت بهل بساطه
وتصير گادتني طلعنه بالصاله اندگ الباب البره
طلع حميد يجمح شويه واجه
شايل علاليگ حطحن گدامي
حميد : هاج هاذ جهاز ليال دزه صائب شوفنه للبناويت الي راح تجي هسع وفضني عاد سويتنها مناحه عدلي ليال ولبسيها شي خلي العالم تشوفها عروس مو جنها الأرمله
امل : گالها ودفر العلاليگ وراح اجت صبره وراه تفتح بالعلايگ وطلع بالملابس ومكيفه
صبره : دحجي ول ليال شجايبلج صائب ملابس حلوه وزواقه تعاي دحجي هذني شويفهن للبنوات من يجن
امل : ظلت ليال لازمه ايدي وادحگ عليه بنظره بيها الف سؤال شفايفها تمتم تريد تحجي وكأن توها يالله ستوعبت انها راح تزوج صائب حطت ايدها على اثمها وجان تعيط،
ليال : لااا اني ما اريد اتزوج استاذي
اريد اتزوج ماجد احبه رجعو الغراض ماريدهن
امل :لزمتها اهجدها اخاف عليها تنفعل
گامت ترجد بروحها وتلطم
طلع حميد لزمها من شعرها
اجه تا يضربها على وجها
وجان يرجع ايده وعاط بيها
حميد : تحبين منهو ولج بگد القندره شتعرفين انتي
قسم بالله اذا ما صرتي ادميه وگعدتي عاقله الا ادفنج واحمدي ربج عرسج وما راح اضربج امشي ولي بدلي عليتيني امشييي
امل :دفعها وجان تگع مسحت دموعها
ولمت نفسها ترجف ادحگ عليه تريد العون مني
ومن عمتي معاضد واحنه لا حول ولا قوه
ساجنه حميد حالنه حالها
سعاد : حاطه المواعين اجلف بيهن
واسمع صائب يحجي ويا غازي بصوت عالي طلعت اشوف شكو وگفت بالباب انشف اديني واسمعهم
صائب : هاي تاليها غازي تعوفني وتصف ويه ماجد الي خاني وكسر گلبي
غازي : ماجد لا خانك ولا كسر گلبك وذا صدگ سواهه معنا شتفرق عنه حضرتك هسع تريد تسويها العين بالعين اتقي الله يا صائب عود من يجي ماجد حاسبه واجهه لا تخلي الحقد يعميك اصحه على روحك يا بشر طفله هاي الي راح تكسرها طفله
باجر انته تنسه وماجد يشوف حياته زين هاي البنت شنهي مصيرها فهمني
صائب : غازي من الأخير يعني ما راح تاخذ اهلك لبيت الملا تسون الحنه للبنيه
غازي : ولا اخطي خطوه وحده هاي حربك وانته اشتان بروحك.
سعاد :عافه غازي بره وفات متعصب
هاذ شعنده شيريد
غازي : بطران يريد اخذجن على بيت الملا تسون لحنه مال ليال يگول ما عدهم احد متعافي ينعل بليسه ول سعاد راح اتخبل هاذ شلون هيج عنده عادي شلون اذا اجه ماجد شلووون هسع تلگينه متخبل يتصل علينه وما يحصل احد شلون بيه اني ورطت روحي وصرت بالنص
سعاد :لا تفحط فوت اگعد وربك يحلها
غازي : اااخ يا سعاد شلون اهدئ والله لايبه روحي انتي ما تعرفين ماجد مخبل عنده طباگات اقل شي يسوي يكتل صائب
سعاد : گعد غازي يعصر براسه ويصفگ بأدينه اختنگ گمت امسد على ضهره اوف يربي بسبب سوء تفاهم راح تنهجم بيوت الناس الطف بينه يارب
امل : التمن البنوات العازمتهن صبره وبنوات ربعنه جايبات وياهن شيره موصيتهن زعم ينظفن ليال
جابنها گعدنها وشلحن ثوبها وهيه خايفه
تبجي وتمسح بدموعها وتغطي برجلها
گامن يضحكن گالن مابيها شعر
بس ميخالف تا نگول نظفنه العروس
حطن الشيره على رجل ليال فزت تصرخ
انهزمت منهن وختلت ورايه تعصر بثوبي وتهمس
ليال : امل وخريهن عني امانه حجيهن مو حلو يسولفن كله عيب ويريد يصلخني هاي صبره گالتلهن امانه امل وخريهن
امل :حضنتها وگمت احجي عليهن
هجمن على ليال عبالك ما شايفات بنيه
وحده شايله خيط ومنگاش وحده شايله شيره
: گلتلهن اني اتكفل بيها رايتجن بيضه وخرن انتن
گوه گشطتها منهم
بلش الحجي والتبسبس هاي شلون رهمت
وشلون صارت اشو كلها سكاتي
اني وعمتي معاضد وليال محد بينه يجاوب
صبره تكفلت تجاوب على كل سؤال وتجذب
صبره : والله ما جانت عالبال بس رحنه خطبنه رافده وطلبو بديله عنها وانطينه ليال
ـــ زين ليش ليال مو ديالا اكبر منها
صبره : والله همه استحبولها ورادوها وهيه وافقت مكيفه احنه لا جبرناها ولا ضغطنه عليها كلشي برضاتها
ــ زين اشو لا فاتن لا ديالا ولا عماد وينهم صار كلشي بساع
صبره : عماد يدري قبل لا يروح وفاتن وديالا خبرناهم حتمال باجر يجون وهاذ صائب هو مستعجل يريد يعرس خطيه الزلمه مكيف
ــ اي ام محمد شلون ما يكيف راح ياخذله عصفوره بگد جهاله وتخبل وين لگاها
صبره : هاي كلشي قسمه وانتن لا تحطن عينجن على رزق الزلمه
امل : اسمع حجيهم واعصر بأديني الوب يربي كون يصير شي ويتفلش الوضع كون ينهجم البيت علينه فوگ هجمته هاي ادحگ على ليال بس تلفت هين وهناك وكل وحده جرها بصفحه وتسألها شي وما تعرف تجاوب وصبره وراهه تفتر
اخذن ليال مني ولبسنها نفنوف احمر
وحطلها حمره اااخ يانار گلبي
وين تروحين من ربج
عمتي معاضد داخت لزمت الحايط سحلتها گوه مددت بحجرتها احس نفسها صار ضيگ وتوسل بيه اروح يم ليال نخاف عليها ترجع تنصدم
عفتها ورجعت جانو البنوات جايبات الحنه
العجنتها صبره گامن يسولفن بينهن
: هاي الحنه ما تطبع مبينه مو زينه
: خن نحطلها لامندوزي
: ونحطلها شويه بانزين
راح تصير حمره طوخ
امل : لزمت صفحتي ادحگ عليهن
شلون يجلفصن ويخلطن بالحنه
وهاي ليال مبهوته وادموعها تصب
انحمست وفوگ حمستي
اجت بنت عمي تشاورني
: اگلج امل اشو مو حافين للبنيه حواجبها ثخان
امل :خزرتها بغضب وجان تروح
بلعت ريگي احس حنجرتي اطگ
شنهي نحفلها ليال وينها وين تجهيز العروس
غمضت عيوني بحسره اريد العون من ربي
حطن الحنه على ايد ليال وهيه تشاهگ
صبره :خطيه تبجي راح تفارجنه
واحنه خطوه عنها
: اي غير كل عروس تبجي بيوم الحنه
امل :الف سؤال انسأل بيوم.حنة ليال
صبره سكتت الكل وجاوبتهم واقنعتهم
كمشت ثوبي من صدري اهيم بروحي تا اشگه واسوي فضيحه واگول ليال مغصوبه ارجع اتذكر كلام حميد من هددنه گبل لا تجي الناس
حميد : راح تجي الوادم هسع صيرن خوش وحجي زايد ما اريد وبدون مناجيد دحگن هاي الرشاش جبتها ما عندي مانع اگوم ارمي حي الله واحد گدامي
خاصة انتي يا امل والله ادشرج لهلج واخذ ابنج منج خاف تعبالين يگف بعيني عماد
امل : رجعت من تفكيري امسح برگبتي
وصدري اختنگت
راحت الوادم وظلت ليال ساده اديها بالحنه
تنحب وتهدد بس يجي ماجد تحجيله كلشي
اااخ شتحجيله يولي شتحجين
غسلت اديها وطگعت الحنه بيدها احمر بأسود
نامت وهيه تشاهگ
عمتي معاضد الليل كله لازمه گلبها وتعن
ونفسها يضيگ
حضنت ليال وامسد براسها
لحد ما غفت وهيه تهمس
ليال : بس يجي ماجد اگله عليهم
امل :صبحت الدنيا النهار عبن منحوس يركض ركض
افتر احس البيت راح يگع علينه انوب اجتني صبره جرتني من ايدي
صبره : بالله نضفتي البنيه جهزتيها للعرس
امل : نفضت ايدي منها وعفتها وطلعت
ليال :گاعده يم امي جانت ساكته
وما تفعل تحجي وگوه تنفس
مسدت صدرها وابجي
اجت صبره جرتني من ايدي بساع
اخذتني على حجرتها
صبره : روحي جيبي الشيره وتعاي انضفج اني هاي امل ما وراهه مابيها خير
ليال : ظليت فاتحه اثمي وادحگ عليها انوب گامت تحجي سوالف مدري شلون
صبره : لا تخافين من صائب يجيج وتظلون. وحدكم. بالحجره راح يدللج حظج يگعد ويا من يجي ينزعج ملابسج لا تخافين وتستحين هو هاذ الزواج
ليال : حطيت ايدي على اثمي وطلعت من يمها اصرخ تلگتني امل گمت انحب بحضنها واتوسل بيها تتصل بماجد تا يجي
امل :الوضع الي اني بي ما اتمنى حت العدوي
جاي اشوف طفله گدامي تناهبتها الجلاب
واني لا بيدي اعينها ولا اعين نفسي
تسلحت بالدعاء وتبردت بالبجي
اخذت ليال اهجد بيها حالها يمرد الگلب
ظلت للضهر تنوح
راحت صبره عالباب واجت مكيفه وشايله علاگه
وگفت يمنه وفتحتها
صبره : دحجي يول ليال هاي بدلة.عرسج دزوها تخبل مشترينها على حسابج گومي البسيها هسع تجي الوادم تشوفج
امل : ادحگ عالبدله واتخيلها جفن ليال
يربي دخيلك افرجها كون هسع يجي عماد يدفر الباب ويفوت لو ماجد يربي دخيلك بين هذول الأثنين يجينه واحد
التمن النسوان وليال مجلبه بثوبي
تريد العون مني انحمست عليها متت
اجت صبره هيه وربعها جرن ليال مني گوه
زوقنها ولبسنها البدله جانت تگمز وما تفعل تركد شاورتها صبره وجان تهجد وگامت تبجي صامت
صار الغروب وگاعدين ننتظر جنازة ليال مو زفتها
عمتي معاضد من الصبح بحجرتها مريضه وگلبها ينهت واني وحدي الوب شايله ابني
ما خلتني صبره اگرب يم ليال ابد
..
سعاد :مو عبالك عدنه عرس
عبالك موت يا ستار
محد يفعل يزف ويه ويه صائب
غازي وبركات فاتو بالهول مالنه
گعدو يحشون جگاير وخايفين
اجو اصدقاء صائب تا يزفوله
مشو ثلاث سيارات ماكو نسوان غير شكحه
وثنين من زوجات اصدقائه
زين على شنهو سويت عرس
تا محد من اصدقائك ياخذ عليك نظره
لو تحب تتباهى رغم ضعفك
رافده المگروده كل شويه تجي
تنحب وتبجي يمي تفرغ طاقتها
وترجع لبيتهم مخذوله
رافده : اخ يا سعاد ااخ شلون بينه هسع شلون.
يريدني اخذ حميد لا رحمه ولا ضمير عنده حط ليال وصگطها تصگط تا ترضه بصائب هاذ شلون راح اعيش ويا شلون دابروني
سعاد : زين صائب شلون رضه هاذ حرام والله حرام ما يدري البنيه مغصوبه
رافده : يدري بكلشي ويگول جاهل بعدين تعود هاذ شتحجين ويا شتحجيين ااخ يا ناري
سعاد : الله يعينج اصبري بلكت يجي ماجد وتفرج
رافده : شتفرج يا سعاد متگليلي هاذ راحو يزفون خلص انتهينا بعد ادمرنه
سعاد : راحت رافده وهيه تنحب وتحسب شلون وگعت بين اخوان ثنين ما عدهم رحمه الله يعينها
...
امل : طبگن السيارت واني واگفه بالصاله شايله ابني فحم من البجي ردت ارجده بالگاع من فورة.دمي وغيضي اريد بس اوصل ليال اشوفها ما خلني عبالك عصابه صبره وگرايبها الي همه گرايبي اصلاً واهلي الي ما عدهم رحمه وضمير
انهد حيلي وگعدت بالگاع لزمت راسي
وهاذ وابني يفالت مني ملخني يخاف
طب العريس الله لا جابه
وگفت بعصبيه اريد احجي ويا
بلكت يبطل هاي المهزله حت لو متأخر
بس مگدرت جرتني صبره من ايدي
هيه وربعها فوتتني بالحجره
مالتي وتسرگ الباب عليه من بره
ذبيت ابني بالگاع
وگمت ارجد بالباب محد يفتحي
ليال : گاعده والنسوان محاوطاتني من كل مكان
ويعدلن بيه ابلع بريگي احجي وياهن محد يسمع ابجي يمسحن دموعي گمت ارجد بروحي وردت انهزم جلبت بيه صبره وشاورتني اذا انهزم وما اگعد عاقله هددتني تگول للنسوان ليال عاشگه وليال وحده مو خوش وتگوم تحجي عليه الوادم ويذبحني حميد اني وامي وديالا
حطيت ايدي على اثمي وگمت ابجي صامت
گالو الزفه اجت ادور لأمل ماكو ختفت
جابولي وردايه لزمتها مثل العروس يسكتن بيه النسوان بس مگدر اسكت هوه الدمع لحاله ينزل ابجي بداخلي مرعوبه وخايفه من كل سالفه حجنها النسوان
وخرن مني وانطو مجال گالو هاذ العريس اجه
طب استاذي وعلى وجه ابتسامه حزينه طشن جگليت بدون هلاهل زعم حزينات على اهلي الماتو
ــ اجه گعد يمي واني ابلع بريگي وادحگ علي مو مصدگه
صفگن شويه النسوان وجان يگودني من ايدي ومشينه عالسياره
اجت جوانه تصرخ تريد ويايه حضنتها واشاهگ
اريد اشيلها وجان النسوان اخذنها مني
گامت تمرغل بروحها
استاذي هد ايدي وگعد يمها
دگ رگبه وجان ينطيها فلوس
وما تفعل تسكت
صائب :تعال سعد شيلها يمك بالسياره
ليال :رجع گادني بدون ما يصد عليه يسحل بيه سحل البدله طويله امشي واتعثور بيها شالها من گدام حطوني بالسياره وجان يصعد بصفي يسوق ادحگ على هاي الهوسه كلها واللمة
ومجاي اصدگ خاف اني حلمانه
گام يسوق ومركز بالطريق واني مدنگه مستحيه من استاذي اتخيل نفسي بالدرس وعندي واجب صعب
وصلنه بيتهم وجان يحدر بساع نزلني هوه شالني من الباب وما خلاني اگعد بالصاله حطني بالحجره وسد الباب
اجت خالته تنادي فتحلها الباب وجان يحط ايده ما خله احد يفوت گالتله شلون يابه جيب البنيه بالصاله يم البنوات خل نغني نرگص شنهي مستعجل جتفتتها بالحجره
صائب : لا خاله مو هيج بس مبينه تعبانه واريدها براحتها عوفيها هسع روحو دگو وارگصو
ليال :گالها وسد الباب اجه انطاني مي
اخذت الگلاص منه ايدي ترجف
شربت مي والشهگه بعدها بيه
گعد استاذي غمض عيونه بتعب
وعصر راسه صفن شويه
وطلع قفل الباب عليه من بره
ركضت عالباب ارجد بي واصيح
فتحوليييي
محد يسمعني مشغلين اغاني
گعدت بالگاع ابجي وارجف
ادحگ حواليه اني بحجرة استاذي
الجربايه حاطيلها جرجف ابيض
وراسمين عليها قلب حب بالجكليت
وناثرين ورد جوري احمر
وگفت ادحگ على نفسي بالمرايه
لابسه البدله البيضه والبرگع
وشعري مهدود على طوله
وحاطيلي كحل وحمره
گمت اعصر بأديني وابلع بريگي اي هاي
مثل العرسان يعني اني هسع عروس
گمت الطم وابجي نزعت البرگع
وارجد بالباب فحطت منالبجي
لحد ما انهد حيلي
وگعدت بالگاع منهاره واشاهگ
سعاد :واگفه بالطرمه ادحگ واگرط بأضافري
احوص اريد اروح بس مگدر غازي منعني
اخذ بركات وراح مدري وين
گال ما اتحمل اشوف هاي المهزله
الفضول سيطر عليه ورحت من طبت الزفه صائب طبگ السياره بالباب وحدر بسااع ونزل البنيه يمه من. شفتها انهد حيلي
تخبل يربي عبالك لعابه شعرها اسود ليل ولابسه ابيض ومخلين البرگع عالنص هنياله ماجد ما ينهبل عليها گمت اتگرضم
ادحگ عليها ما تعرف حت تمشي بالبدله وتبجي وخايفه والورده وگعت منها شالها صائب فوتها من الباب فتت وراهم وجان
گبل حطها بالحجره وقفلها
ظلن النسوان يحجن بالصاله شلون
اخذ العروس وما خله احد يشوفها
هاي الي تگول ملهوف وما يصبر وهاي الي تگول خايف عليها من الحسد عبن اخذله عصفوره
رافده مسويه مناحه عازله زاويه وتنحب
وشكحه من شافت النسوان ابتهرن بليال عبن حلوه كيفت وگامت تفيك وتهلهل وطش جگليت
اريد اظل واشوف تاليها بس گلبي يم غازي هسع يجي وما يلگاني وينهبل رجعت بساع على بيتنا
وگعدت بحجرتي ارجف وافكر بليال هالطفله شلون راح يصير بيها
امل : ظل الباب مسدود عليه لحد ما راحت الزفه
يالله اجه حميد فتحه عطت بوجه ما خليت بالحجي ما جاوبني لا هو. ولا صبره راح گعد بره يدخن
ركضت بساع على عمتي معاضد
لگيتها بتالي روح اثمها بجنب وايدها يابسه گمت اصرخ والطم ناديت حميد
وراح بسااع جاب سياره ونقلناها
ليال :ما ظل بيه حيل ابجي
بس الشهگات تطلع مني
هجد الصوت بره وما ظللهم حس
انفتح الباب وجان اگف امسح بعيوني
فات استاذي او الي جان استاذي
طب الحجره شايل صينية عشه
فات بدون ما يدحگ عليه
حط الصينيه بالگاع نزع سترته وعلگها
ختنگت وعلت صوت شهگاتي
صد عليه واجه
گل ما يگرب اگحز عنه
لحد ما نحصرت يم الحايط
لزم تكتوفي واني ارجف واشاهگ
صائب : لا تخافين ليال تعاي تعشي
ليال : دنگت راسي اعصر بأديني وما تفعل ترگد شهگاتي رجع طبطب على جتفي وجرني من ايدي
مشيت ويا مثل ما جنت امشي من يگودني نفوت عالصف گعدت عالدوشگ بدال الرحله وادحگ عالجربايه مكانها بمكان السبوره
لازم ايدي وگاعدين واني ادحگ عالحجره
ودموعي تصب گامت تنگط من حنجي
فززني صوته
صائب : ليااال
ليال : ها
صائب : يالله تعشي بابا
ليال : مسحت دموعي
كورت اديني بحضني وهزيت راسي
: ما اريد استاذي مو جوعانه
تنهد وجان يسويلي لفه حطها بأيدي
صائب : اكلي بس هاي لخاطري يالله
ليال :دنگت راسي وهمست
استاذي اريد ارجع لبيتنا امانه
شال كشمة. خبز اكلها وهز راسه بقبول
كيفت ورجعت گلت
: استاذي هسع اريد ارجع وديني
صائب : تعشي ونامي هين والصبح اوديج يالله
ليال : حطيت اللفه بالصينية
ولحيت الا اروح هسع
وديني استاذي اني ليش هينه
گمت ابجي وعلت عبرتي
: اني احب ماجد اريد اتزوجه هوه
صد عليه بغضب وجان يعيط
صائب : انعلبو ماجد كلب حقير نذل حيوان
ليال : گام يغلط ويسب ويدفر بالغراض دفر كلشي گدامه حت صينية الاكل نثر كلشي عالميز شگگ الفرشه مال الجربايه
ارتعبت هاذ مو هو مو استاذي سديت اذاني وقرفصت بصف الكنتور وابجي اسد اثمي واسد اذاني ادحگ علي تخبل فلش الحجره تفلش
اندگ الباب وجان يفتحه عالنص
وخله ايده تا محد يشوف
شگحه :فضنه وين النيشان
يالله وليدي عمامك بره
صائب :افتهمنه عاد لا تخبصينه
ليال :ظلت تحجي ويا همس
وهو يهز براسه راحت وجان يسد الباب قفله
ودحگ عليه بنظرات مريبه گام يمشي بتجاهي قرفصت نفسي وسديت عيوني
اشاهگ واتوسل بي يرجعني البيتنا
يتبع……… ..