ماجد
وَدَّعْتُها ولَهِيبُ الشّـوْقِ في كَبِدي
والبَيْنُ يُبْعِدُ بينَ الرُّوحِ والجسَدِ
وَدَّعْتُها لِفِراقٍ فاشْتَكَتْ كَبِدِي
إِذْ شَبّكَتْ يَدَها مِنْ لَوْعَةٍ بِيَدِي
وحاذَرَتْ أَعْيُـنَ الواشِينَ فانْصَرَفَتْ
تَعَضُّ مِنْ غَيْظِها العُنّابَ بالبَرَدِ
فكانَ أَوَّلُ عَهْدِ العَيْنِ يومَ نَأَتْ
بالدَّمْعِ آخِرُ عَهْدِ القَلْبِ بالجَلَدِ
جَسَّ الطّبيبَ يَدي جَهْلاً فقلتُ لهُ
إِنَّ المَحَبّةَ في قَلْبي فَخَلِّ يَدي
بقلمي شذرة العدوان
امل :مرت ايام والوضع هدوء
ماجد يوميه يخابر ويسأل على ليال
اكلت نامت شربت
وذا ماكو احد اناديها تحجي ويا
غصبن عني بسبب تهديداته
گال اذا ما اخلي يحاجيها
يجي من بغداد يسويلنه مشكله
ويهجم البيت علينه
وليال من يوم الي راح ماجد وهيه
تون وتبجي ودردم
صارت مزاجيه محد يفهم منها شي
ساعه ضحك ساعه بجي
واحنه منطيها على گد عقلها محد يحاجيها
حت حميد گام يدللها ويجيبلها هدايه
في سبيل يسد بوزها وهاي ما يعجبها العجب
ما تكيف بس من تخابر ماجد
تجي تصفگ وتضحك
ليال :اتصل ماجد رحت ركض اخابره
بالبوگه من امي حيل مشتاگتله والله
شلونك امت تجي
ماجد :ما ظل شي يروحي جم يوم واجي
راح اجيبلج ملابس وللعابات تخبل
وشفتلج احلى مدرسة راح تدرسين بيها
ليال :كيفت وگمت انگز اييي والله خوش
شكراً ماجد انته احسن واحد
ضحك وسمعني اغاني حلوه
ماجد :هذول الاغاني جبتهم الج
كاسيتات نزلو جديد
واخذتلج مسجل اكبر من ذاك الي عندج
ليال :صدگ والله
ماجد :اي والله
احبج ليال لا تخلين احد يخربج عليه مو
ليال :ماشي اني هم احبك
سديته منه ورحت يم امل احجيلها
امل :كيفت وگامت تصفگ جاهل يربي
كلشي ما تفتهم شگد اشرحلها وما يفيد
قافله على ماجد عبن يغريها
ليال :بس اروح ويه ماجد
كل غراضي انطيهن لديالا حت ملابسي
شلي بيهن ماجد يجيبلي غيرهن
امل :راحت وهيه تنگز وتصفگ
تنهدت بقهر وطلعت بره
اجه عماد يمشي سريع وينادي
عماد :امل لمي اهدومي بساع
عندي روحه لبغداد ويه الدراويش
امل :خير ان شاء الله
ناديت على ديالا تعاي
اكمشي علاوي تا الم هدوم اخيج
انطيته للها ورحت
اعبي ملابس عماد جان حيل مستعجل
عماد :احتمال نظل اسبوع او اكثر
لا يظل بالكم عليه
امل : ليش بالله مو تدري ما عدنه احنه
عماد : شسوي مجبور اروح بدال ابويه الله يرحمه
امل :تأفأفت بقهر
دگ التلفون راح عماد جاوب
شويه واجه هوه وديالا
خير منهو اتصل
عماد : هاي فاتن اتصلت تگول جيبلي ديالا تعاوني خطيه مريضه وگوه تحجي
امل : خطيه الله يعينها فاتن هم نگردت بهل مرض
عماد : الله يعين ها شگلتي ديالا تروحين
ديالا : صراحه كيفت اطلع من البيت
الي صاير ملل وما ينجرع ابد
ويوميه طلبه بس خاف امي متفعل
عماد :گلتلها امي جانت يمي من خابرت
يالله استعجلي اخذج بدربي
ديالا :شهگت مكيفه انطيت علاوي لعماد
ورحت الم ملابسي اجتني صبره تفر بسبحتها
صبره :عود عينج من اخيتج اشتغلي زين وديري بالج تمدين ايدج وتبوگين مثل هذيج الخدامه تره اگص ايدج اذا سمعت شي يخزي منج
ولا تحطين عينج على فلوس اختج افتهمتي
ديالا :ظليت مبهوته وصافنه عليها
هديت الملابس من ايدي
ردت ابطل الا ناداني عماد بصوت عالي
يااالله ديالا فضيني
اخذت نفس وزفرته گلت بگلبي ما اخليج تخربين واهسي اهم شي اطلع من يمج اخذت هدومي وطلعت ويه عماد وگفتلنه ليال تشاهگ وتبجي
ليال :اخذوني وياكم لا تعوفوني
عماد :وين اخذج خوما كلنه نعوف البيت
منهو يظل يم امي خليج هين
ومن ارجع كلنه نروح يم فاتن
ليال : گول والله
عماد :والله امسحي ادموعج وعينج من امي
ديالا :مشينه وصلنه الفلكه وتگفنه سياره ونروح
اول ما وصلنه بيت فاتن شفت حيدر گاعد بالباب مالهم حدرنه وتسالم هوه وعماد طبينه جوه عماد سلم على فاتن وصاها بنفسها وبيه وراح لبغداد
خطيه فاتن جانت تعبانه وشاده كانوله
من شافتنه شهگت وگامت تبجي
طبيت بساع بدلت هدومي
عزلت حجرتها وشلت ابنها الزغير
جان يصيح اخذته بدلتله وسويتله مميه
ودرويش اجه حيدر اخذه
فاتن :ذبحتني الضوجه
ومنا مريضه وجهالي على ايدي
ومعد نأمن نجيب وحده تعاوني
همزين اجيتي حيل كيفت
ديالا :والله حت اني كيفت اجاني باب فرج من اتصلتي البيت صار ملل وطلعان روح
..
سعاد :من يوم راح ماجد الوضع ما هجد
صائب انهبل نهائي گام يصيح يدور لماجد
كل شوي يهجم على غازي يصيح علي
اني ظليت بين حانه ومانه احجي لو اسكت
تذكرت كلام اهلي گبل لا يجي غازي يزفني
كلها وصتني واأولهم صياد ابن العم
صياد :مبارك بنت العم عساها جوازة الدهر
وتنسعدين ويرتاح بالج
انتي راح تروحين جنة على ناس غربه
ما جانت عدنه نيه ننطيج الهذول
بس ما ردنه نگف بقسمتج ودربج وغازي خوش انسان نبشت جده السابع يالله رضيت انطيج اله
ــ عاد اسمعي يا سعاد وخلي الحجي ترجيه بأذنج وانا اخوج اطبين بيت عيالج خرسه وعميا وطرشه
اذا تور الديره انتي خليج على طرف ولا تدخلين ابد
اريد اخبارج تصلني دوم تسر الخاطر اريد ترفعين روسنه جدام الغربه مثل ما عمتي رفعت روسنه بالسعودية ،،،،،
سعاد :رجعت من تفكيري
وظليت الوب كل ما اريد احجي لغازي عن الي شفته
اتذكر كلام اهلي وصياد واتراجع اخاف تصير عليه طلبه وتصل اهلي وتخرب بيني وبين غازي افكار جثيره لخبطت عقلي حيل اخاف اخسر غازي
تحسرت بقهر زين هوه صائب هالگد عامي الحقد
ما يدحج على اخو جان مو بوعيه
ومجاي يتذكر ليش ما يفهم ليش عامي الحقد
ويريد يكتل ماجد
شايل سجينته ويتهدد خله اهله بثاني حال
الله يهدي النفوس بينهم
گمت ادعيلهم حت بصلاتي
ما حرگ دمي غير نضال بدال ما تهدي النفوس وتحجي وتبرر على اقل احجيلج كلمه
وطفي نار هالوادم
لا اكتفت بالسكوت ومن ثاني يوم خلت بركات يوديها لهلها وظل صائب يرجد بروحه
ماجد جان يوميه يتصل ويتهدد يريد يجي وغازي يگله ممنوع اذا ما اني اخابرك لا تجي ابد
وخطيه يسعل ويريد يعرف صائب ليش تخبل يگول لغازي بس فهمني صائب شبي ما حجالك اني شسويتله كل ما اسمع كلامه گلبي يوجعني اريد احجيله منا مستحيه شلون اگله شفتك بوضع ويه نضال يخزي ومنا اخاف تكبر السالفه وتنجب براسي وهاي شكحه ما ترضه احد يجيب طاري ولدها بالموزين من اول ما فتت بيتنا غازي حذرني منها
تعبت منالتفكير والقلق
رحت اصفط بملابس غازي
اهجس ريحتهم مو طيبه رغم نظيفات
وصدري مورم واهجسه نار
لزمت راسي وگعدت بالگاع لايبه روحي
عفت الحجره مدعوله جريت مخده ومددت
فات غازي يدحج عالحجره ويسولف
غازي : شنهاي الحجره سعاد فايت بيها ثور
سعاد :بعدين اعزلها هساع دايخه
دنگ عليه وحب راسي
غازي : شبيج يروحي مريضه گومي اوديج
سعاد : مابيه شي بس دايخه
يمكن عبن ظليت مدنگه واعزل
وريحة البخور الي شعلته عمتي لعب روحي
غازي : هيه غير لو امي تبطل تشعل هالبخور
حت ريحته جايفه
سعاد :علوا اطفي دوخني
راح غازي يدور للبخور تا يطفي شويه واجاني
غازي :نسيت اگلج اليوم شفت اخوج
وعاتبني گل اشو ما تجيب سعاد
وهددني اذا ما اخذج اليوم يجي يهجم علينه ويحرمني منج شهر
سعاد : ههه عوايدهم ما عدهم حل وسط
غازي : اي والله انوب ويا ابن عمج صياد غير من شفته ردت ازوع العافيه
سعاد : شبي صياد ..
غازي : يمعوده لحيته واصله صدره وشعره مهوش يخوف يا ستار
سعاد : هاذ عبن محزن على اخو مشعل
وما يزين الا ياخذ الثار
هسع شگلت لخوي نروح عليهم
غازي :اي نروح امري لله گتله اني اجيبها عجل نظل ويجوني اهلج المصاگيع ياخذونج مني بس مو اليوم باجر ان شاء الله نجفتهم من الصبح وما نجي لليل بلكت يشبعون
سعاد : هاذ هو الي تشوفه
غازي : حياتي شبيج گومي اوديج عالطبيب
اشو تجرين السالفه جر
سعاد : مابيه شي عمري هسع اصير زينه
ظل غازي يمي يمسد على راسي ليما غفيت
ثاني يوم گعدنه منالصبح تانروح لهلي
هيرنه عمتي وما فعلت تگول فحانه
مشينه وصلنه بيت اهلي اشو قافلين الباب
وماكو ولا نفس
حدر غازي سأل جيرانه
گال كلهم راحو يم بيت الشيخ علوان عازمينهم
هاا اليوم جمعة يعني كلها ملتمه يم عمي علوان
غازي : عجل يالله نرجع ونجيهم غير نوبه
سعاد : لا عليك الله خن نروح هسع البنوات كلهن ملتمات واهلي غادي امشي غزوزي
غازي : ههه حلوه هاي مال غزوزي
سعوده عيب نروح جفت عالوادم بدون عزيمه
سعاد : بس امشي احسن شي الجفت بدون عزيمه هم اريدها حجه تا اكاونهم ليش محد عزمني
غازي :يبو گامت ادور كوان وطلايب
اني شورطني يالله امشي
سعاد :رحنه على بيت عمي علوان
ادحج من بعيد السيارات ملتمه كلها هين
اول ما حدرنه تلگانا صياد مشمر دشداشته
وشايل سجين الضاهر يريد يذبح الطليان
غازي من كل عقله ختل ورايه وهمس بأذني سعاد امشي ننهزم عليج الله
نغزته بجسعي لا يسمعه صياد
صياد : الله حيهم
غازي : ومن گال يحيا السلام عليكم
صياد : وعليكم السلام شهل جيه الي تسر الخاطر
تعدو تعدو (تفضلو ) شلونج بنت العم
سعاد : بخير ونعمه انت شلونك عساك بخير
صياد : زرتونه انتو صرنه بخير نزهي بالنصر يالله تعدو جوه لا تظل واجفين هين نسيبنه الا برزايل تا تجون
غازي : لا يخوي اني يوميه اتوسل بسعاد تجي بس متفعل تگول ما صدگت افارج اهلي انوب ارجع عليهم
صياد : منصح هالحجي ول سعيده
سعاد : عضيت شفتي لغازي الجذاب بسيطه
غمزلي وراح ويه صياد عالزلم
واني طبيت جوه
تلگني بنوات عمي ونسوان صياد
ظليت بالساعه اسلم شكثرهم ربعنه
الله يزيدهم فحيت ردت اگعد بالباب
تغدينه وجانت احلى لمه
الأهل والعمام كلهم ملتمين
من عدا شاكر وعرب ماكو ما شفتهم
عاد مشتاگتلهم والله سعلت عليهم
گالو طالعين بشغل عجيب
اول مره عزيمة الجمعه وبيها نقص من ولد عمي
ظلينه للعصر طلعنه گعدنه بالثيله
مزق وضحج ويه البنوات تونست جثير
ونسيت حت التعب البيه
ردنه نروح وما فعلو يخلونه
حلف علينه صياد الا انتعشه ونبات يمهم
غازي وافق منالخوف
راح گعد ويه الزلم واني ويه البنوات بالمطبخ
يسون عشه لعبت نفسي من ريحة الترجيب
طلعت بره روحي لايبه
لفت وره البيت گعدت وحدي اشم هوى
نظيف الجو حلو الدنيا غوربت
وبلش الظلام يختلط
سرحت بتفكيري
اني شبيه صارلي جم يوم
مو على بعضي
غمضت عيوني ومددت عالممشى
فززني صوت الباب نهضت نفسي
شفت شاكر اجه مستعجل
وگف يم المخزن وناده نشمي
مدري شحجه ويا
راح نشمي عالديوان يركض
طلع صياد وگف يم شاكر
ثواني ومشو مزرعدين
ظل نشمي واگف بمكانه متخوصر ناديته
فز يتلفت منين هالصوت اني ما ابين عبن بيناتنا
الدنگه جنت ادحج بتك عين
اجه يمشي عليه تفاجاه
نشمي : هاا سعاد انتي ناديتي شعندج هين ؟
سعاد :يسولف ويتلفت وراه ويحك براسه
متوتر
: شبيك اشو شاكر اجه بساع
وراح ما لحگت اسلم علي شعدهم
نشمي : ها ماكو شي عدهم شغل
سعاد :لا تجذب هي مو زعم اني اختك
وسرنه واحد
نشمي يعتبرني اخته
جان يساررني وما يضم عليه شي
النفس ابيتهم يحجيليا
وهسع ما يفعل يسولف
سرگدت علي عبن انتابني الفضول
گمزت صياد وصفگت ايده تخوف
نشمي :راح اسولف بس ديري بالج تجيبين
طاري الحجي هاذ تره ابويه محتمنه
سعاد : تدري بيه ما احجي لو مهما صار
نشمي : تعاي ليغاد نسولف خاف احد يجي
تدرين زهور تشم العلم وتودي لأبويه
سعاد : يالله احجي بسااع زهور جاي تسوي عشه
نشمي : ها يولي عجل اسمعي
يمكن ابويه لگه جتال عمي مشعل
سعاد :شلون لگا ومنهو هاذ
نشمي :اسمعي ابويه من يوم انجتل عمي مشعل
ما صتنصح الوضع وگام يراقب
سعاد :يراقب بمنهو
گعد نشمي دگ ركبه وحجالي كلشي بالتفصيل
شلون صياد شاك ابيت الملا وشلون خله عليهم مراقبين بكل مكان
انصدمت صراحه بيت الملا خوش ناس ومستحيل الهم ايد بشي معقوله يضحون بثلاثه منهم
في سبيل ينجتل مشعل ما اصدگ ابد
: لا يول ابوك متوهم هالنوبه
نشمي : يول اصبري افهمج شصار هسع
سعاد : يالله احجي لا تگطم الحجي
نشمي : هسع عمي شاكر مو جان مراقب المگبره
سعاد :اي ؟
نشمي : اي العصر عمي شاكر شايف واحد جاي يم الگبر مال الملا درويش وبنته وگايم ينحب ويبجي بعلات حسه عاد مسوين مثل ما موصيهم ابويه مراقبينه من بعيد ومندلين مكانه
سعاد : وهاي شعليها يا نشمي يجوز الرجال گرايبهم شكو بيها لو راح عالگبر يبجي
نشمي : واني شمدريني يمعوده بس خلي ابويه يخلص ويگطع نفسه كفيلج الله ما نشوفه صار صياد الليل ومن يجي صدفه يطب بحجرة عمي مشعل سواهه مزار
سعاد : الله يعينه مو هوه حيل يحب مشعل الله يرحمه
نشمي :مو بس شغلة يحبه
ابويه جثير متغير طول الوكت حاير بزمانه
وما يفعل يزين الا ياخذ الثار
غادي جنه اهل الكهف ويكاون ذبان وجهه
سعاد :والله مدري بعد الله يستر
زين ليال بنت الملا شعليها ودز شاكر يدور وراهه
نشمي : علمي علمج هاي من اجه من صلاح الدين گبل كلف عمي شاكر بهاي المهمه وعمي شاكر حمد بالبنيه بس ابويه انفعل مدري شجاه
سعاد : اي والله خوش بنيات بس حظ ما عدهن
اني اگوم امدد اهجس نفسي ماني زينه
نشمي : شبلاج گومي نوديج عالدكتور
سعاد : لا تسلم شويه تعب وهسع يروح
طبيت جوه وافكر بكلام نشمي شلون صياد يخلي ناس تراقب بيت الملا انوب كل مكان يخصهم والله عيب شراح يستفاد
ظليت گاعده ولايبه روحي
عشه ما تعشيت يادوب صليت
وجان انام ما اندل بروحي حت غازي نسيته
فزيت الصبح على حس كواكب
كواكب : خايبه گومي رجلج ورنه ور
يعبالي غبيناج عنه
سعاد : تمطيت بملل صباح الخير ام نشمي
كواكب : صباح الضهر يمعوده الساعه 9 ونص ورجلج واجف بره يريد يروح انتي شبلاج شهل نوم
سعاد :والله مدري شجاني
اشو احب انام
كواكب :انوب اهلج راحو خطيه من شافوج نمتي رادو يتعللون وياج وانتي نسدحتي وعفتيهم
سعاد : يالله عن غير نوبه خن اروح اشوف غازي
طلعت غسلت ونشفت وجهي حدر نشمي من فوگ مزنح حت ما لاحظني
رحت بره واشوف الولد كلهم ملتمين
وعرب وشاكر هم موجودين سلمت عليهم
ورجعت جوه شفت نشمي يولم اكل بصينيه
ويحاول يخفي تا محد يشوفه
وگفت بوجهه عبالي اله
گتله هاا يالجوعي طبعك ما مغيره
نشمي :وخري من دربي سعاد مستعجل
سعاد :طلع وهو متوتر ويتلفتت
قوست اثمي هاذ شبي
تثاوبت وحكيت راسي
جوعانه بس مدري شنهي اكل مشتهيه شي
ما اعرفه شنهي شيفت طماطه ملحتها وگعدت اكل
رجع نشمي بساااع گام يدور گلاص تا يصب جاي
يتفلت ومرتبك الا وگع الگلاص من ايده ونكسر
دنگ بالگاع يمسح بگصته ويدردم قلقني رحت يمه الم الگزاز
:شبيك يول انثولت
جاوب بنزعاج
نشمي : مابيه شي
سعاد :جذاب گول شبيك
وروح مشعل احد حاجاك صياد صيح عليك
التفتت وراه يشوف احد يجي صد عليه وگال
نشمي :شگلج ابويه محتمنه
ما نحجي لا تسرگدين
سعاد : گالها ورجع يلم الگزاز
طلب مني اصبله جاي بگلاص
معد يگدر يتوازن ادينه ترجف حيل انقلقت
كمشته من ايده وحلفته بكل غالي شكو
بلع ريگه وگال
نشمي :اجتنه صگعه يا سعاد ابويه راح يبلينه
هاذ الزلمه الشافو البارحه يم الگبر
ابويه راح جتفه وجابه
ومنالبارحه بالليل حاطه بالسرداب
وطايح بي ضرب كشمه تكشم
سعاد : يهالعثره منو هاذ ول نشمي شجاه ابوك
نشمي :مدري يا سعاد مدري
ابويه اول ما جابه گاله نورتني حامد
وهساع وره ما شبعه ضرب وجلاليق
گالي ودله اجل وجاي خله يتبوزع
كفيلج الله احط اللگمه بأثمه
وتنصل ما يگدر يبلعها
الزلمه ما ظل بي حيل اخاف يموت
وابويه يبتلي
سعاد : يبو يهالعثره يبوو
وهسع شلون عمي علوان يدري
نشمي : نصي حسج لا ينعل بليسج الصياد
علوان شنهي غير ابويه يور البيت اذا دره جدي اگضبي اثمج تخسين انطيني
هالجاي الأگشر خن اودي
سعاد :راح واني ظليت اعصر بأديني
يمه شگد خفت
هاذ صياد شلون اله نفس ياكل
وهو حاط واحد بالسرداب يعذب بي
طلعت امشي سريع تصادمت ويه صياد
ردت اگع وجان يلزمني
صياد : الله الله شبلاج يابه دحجي جدامج
سعاد :تعذرني ما انتبهت
ادحج ايده مخرمشه وبيها دم كشت روحي
عفته ورحت بساااع انادي غازي
اجاني عاگد الحواجب
غازي : هاا اشوفج طابتلج الگعده هين
سعاد : لا ما طابتلي يالله نروح
غازي :شبيج وجهج اصفر
سعاد :تعبانه شوي يالله نروح
غازي : يالله ولمي نفسج
سعاد : رحت لبست عبايتي
وسلمت عالكل لحو عليه اظل
بس مگدر روحي لايبه من كلشي
صحيح مو جديده علينه طلايب صياد
بس هالنوبه ما گدرت اتحمل
اسمع رجال بالسرداب جوه ايد صياد
ويعذب بي انوب وصف نشمي
خلاني اموت منالخوف
طلعت بره جانو صياد وغازي يم السياره
يهالعثره هاذ صياد يريد يوصلنه
صعدت واني ضايجه ومتوتره
اكل ما ادحج تجي عيني على ايد صياد
وهو لازم الستيرن
ايده مخرمشه عبالك جاين يضرب ببلوكه
اني بالعاده ما اخاف هيج
زعم قويه بس هسع خايفه مدري ليش
حصرت نفسي ويه الباب
تا متجي عيني على ايد صياد
وصلنه بيتنا حدرت بساااع
طبگت الباب فز غازي وخزرني
انتبهت على نفسي مو على بعضي
صياد تجاهل وصاني بنفسي
سلم على غازي وراح
فتت جوه نزعت عبايتي
ولزمت راسي تعبانه حيل
اجاني غازي يعيط
غازي :شبيج سعاد هجمتي باب سيارة الزلمه
سعاد :عاد هيه سياره عوفني ارتاح تعبانه مابيه
غازي : ماشي ارتاحي وهم عندي حجي وياج
اريدج مصحصحه
سعاد :غلست عنه ونمت
ما حسيت لليل گعدت لگيت عمتي مسويه عشه ومرتبه كلشي خلفله عليها
گعدت يمهم مگدر اكل وغازي مبوز يدحگلي
اكيد زعل عبن بنته غادي
لمينه العشه جبت الجاي صبيته الهم
ناوشت غازي الجاي
وجان يجفت علينه بركات يفزع
بركات : الحگني غازي الحگنييي
هاذ صائب تخبل ما ظل براسه عقل
غازي : شبي شسوه ؟
بركات : اخذ عمامي وامي وراح تا يخطب ليال لنفسه
غازي : شنهي شجاي تهذيي
سعاد : حطيت ايدي على اثمي وصرخت بصدمه الكل انتبهلي
بركات : والله هاذ الي صار يا غازي دابرني شسوييي
غازي : هسع وينه صائب
بركات : بعده يمهم ما رجع گال ما ارجع اذا ما اخطب
غازي : امشي نلحگه
سعاد :طلعو بركات وغازي ركض لحگو صائب
يم بيت الملا يربي شهل اهبال هاذ
زعم جنت مكيفه اخذت ناس مثقفين
ما عدهم طلايب
....
حميد : فاتن شعدها دزت على ديالا
امل : تگول مريضه ودزت عليها اداريها
حميد : وعماد اخذها وراح اشو ما شارني
امل : مو عماد صارتله روحه لبغداد
گال ضروري اروح
ومنا اتصلت فاتن گالت اريد ديالا تجيني
گال اخذها بطريقي اذبها يم فاتن واروح لبغداد
صبره : شكو بيها يمه اخذتها اختها تعاونها
احسن من گعدتهن هين لا شغله ولا عمله
حميد : شنهي روحة عماد الضروريه
امل : مدري يمكن علمود التكيه گالو راح تجتمع كل الدراويش بتكية (… .. وعماد راح بدال عمي الملا درويش
حميد : هاا الله يسهل
امل :اندگ الباب البره
طلع حميد يشوف منهو
فاتو صائب واهله وعمامه ثلاثه
تفاجأة خير اول مره يجون عمام صائب
عمتي صبره فاتت لحجرتها
واني طلعت الجهال وديتهم يم ليال
فاتو الزلم بالهول
وشگحه راحت بحجرة صبره
رحت اسوي جاي وافكر
معقوله اجو يخطبون ليال لماجد
بس عماد مو هين
زين اني شكو سويتها من صدگ
يجوز الناس اجت اتعلل
خلصت سوالف ويه نفسي
وكملت الجاي انطيته لحميد
ورجعت اخذت جاي لشگحه سمعتها تحجي ويه صبره وتصفگ على ايدها وتگول
شگحه :اي يخيتي هددنه يكتل نفسه
امل :من شافني سكتن
انطيتهن الجاي وگعدت يمهن
اجت عمتي معاضد
ادحگ على شگحه تفور اعصاب
تنافخ ودحگ بحقد على عمتي معاضد
تريد تاكلها
اخر شي انفجرت وجان تگول
شكحه :ارتاحيتي معاضد ظليتي مهيته بناويتج بدون تربيه ليما فتنن بين ولدي وسون شدخ بين الأخوان بعدهن بگد النعول ويدورن زلم
امل : عمتي معاضد ظلت فاكه اثمها
وادحگ علينه
معاضد : هاي ما مرجيه منج ام صائب بنواتي متربيات احسن تربيه وانجان قصدج على ماجد من اجه خطب ليال احنه ردينا وما انطينه
ليال جاهل مو مال الزواج والضاهر علگانه بينكم وجيتو تكاونين لو ماجد جبركم تجون تخطبون غصبن عنكم ومن هسع اگلج
ليال ما تناسب ماجد وما ننطي لحالكم جيتو
شكحه : اي والله جينه نخطب
وعلى گولتج غصبن عنه بس مو لماجد
جينه نخطب ليال لصائب
امل : انصدمت وثنيت على ركبي
وعمتي معاضد نفسي انبهتت وادحگ عليه
وصبره ساكته عين غير العاده تخبلت عمتي معاضد
معاضد : هاي شنهي شكحه اشو لا ظلت احترامات
لا ظلت مستحه شجاي تهذين
شكحه : والله ما جاي اهذي هاذ صائب جاب عمامه واجه يخطب ليال ورهم كلشي ظلت بس موافقة حميد خسرت ولدي من وراه بنوايتج الي ما متربيات
امل :اريد احجي بعد ما اگدر
مستحيل هاي شگحه تجذب اكيد
طلعت منالحجره ورحت تا اتصنت عالزلم
مريت على حجرة عمتي شفت ليال تلعب محيبس ويه جاهد وجوانه سديت الباب عليها خفت تسمع الحجي وتمنجدنه ويه الوادم
ركضت بساع وگفت بالباب مال الهول
واتصنت عالحجي وگلبي يرجف
عضيت ملفعي اريد اعصابي تركد
صائب : حميد اسمعني اني ما عليه بماجد جاي عليكم وخاطب ومدري شمتفق انته ويا
اني وياك ثنينه نعرف ماجد مو مال زواج
ميحتاج احجي مكسراته يمك انته متكشف على كلشي
حميد : يعني والله ما ترهم يا صائب شلون تجي تخطب البنيه الي خطبها اخوك گبلك ونرفض
صائب : كلشي يرهم حميد اني اعرف انته شنهي غايتك وليش طاوعت ماجد ورضيت بي اعرف شنهي ابالك واني هاي گدام عمامي اگلك
لا الف وادور رافده اختي بديلة ليال
و ظلت يمك اذا ما تريد
اشوف غيرها وانطي رافده
واتزوج قابل راح اظل
امل : رجليه يطگگن وسنوني گامت تصل عليه عبالك برد شهر الواحد اريد اتاوازن معد اگدر هاذ صائب شجاه تخبل حميد ظل ساكت فتره وجان يگول
حميد : بس عماد مو هين اصبر ليما يجي
صائب : منهو اكبر انته لو عماد
حميد : اني اكبر بس اخوي لازم اشوره
صائب : عجل انته مو رجال والك شورك
اسمعني حميد حجي زايد مگدر اكثر الك اليوم
فكر وتعال باجر زف رافده واني ازف ليال ها شگلت
امل : نار شتعلت بيه شسوي الطم اصرخ
صائب ختم كلامه لحميد اليوم لازم ينطي قراره تخبلت اسمع حجيهم واذاني احس تطلع منها نار مجاي اصدگ هاذ صائب المثقف مستحيل يا ناس شلون ترهم شلون اتحسس حرارتي خاف اني متوهمه
صائب : ها حميد شگلت اليوم الك تفكر براحتك
وترجعلي خبر الصبح لو تريد من هاي الگعده ونختم
حميد : يصير خير ان شاء الله افكر واردلك خبر
صائب : هاذ هو عجل نتوكل احنه
حميد : وين رايح خن نتعلل
صائب : مشكور عندي شغل جثير وهم اخليك براحتك تفكر زين من رخصتك نادي امي
امل :وخرت من الباب واني مصدومه
حت عيوني ما ترمش رحت يم باب حجرة ليال اسمعها تگول لجاهد
ليال :هوه المحبس يبين من ايدك
عبن زغيره رص ايدك زين
امل :حاطه ملفعي بأثمي گعدت بالگاع
طلع حميد من الهول گال امل نادي خالتي شكحه صائب يريد يروح
گمت بدون ما احجي ويا اسحل بروحي
طبيت الحجره جانت شكحه بعدها تكاون بعمتي معاضد بس منصيه حسها گلتلها صائب يناديج حفزت بساع وراحت الدمعه لايجه بعينها ودردم وتحسب
وصلهم حميد عالباب وعمتي معاضد ظلت گاعده تفور اعصاب
معاضد :شجاهم هذول تخبلو
والله ما تجره وتصير
صبره : ميخالف معاضد هيه اول وتالي ليال راح تعرس وبدال ما ننطيها للغريب
ننطيها لصائب خوش زلمه
معاضد : خايبه انتي كل عقلك لو جاي تمزقين
هوه ماجد ازغر من صائب وما انطينا شجاج انتي
لو كيفتي عبن شكحه گالت صائب راح يبادل رافده بليال
صبره : هوه صحيح جريمه ليال تبادل وحده معدله مثل رافده بس هاي صارت وكلشي قسمه احمدي ربج واشكري
امل : علگت بين عمتي معاضد وصبره وحده تناوش وحده صبره متراهيه وتحجي عالكيف وعمتي معاضد ترجد بروحها طب حميد عالصوت وعاط بيهن
حميد : شعدجن گمتن تعلن حسجن
معاضد : تعال يابه حميد اسمع حجي امك راضيلها تزوج ليال لصائب
حميد : اي وشكو بيها شبي صائب
معاضد :يبو يهالعثره شلون شبي يابه جبير ما يرهم وليال جاهل انتو مو زعم رفضتو ماجد لهسبب شجاك يابه حميد اشوف هم راضيلك
حميد : اي راضيلي وهذاك حجي واليوم حجي
اني مقتنع وجيت اخبركم باجر نعقد لصائب وليال واني ورافده حجي زايد ما اريد
امل : يمه تخبلت گلبي ينزف غيض لا يولو شجاي تسون عمتي معاضد فحطت
اخذتها على حجرتها گامت تنحب
ليال :شبيها امي
امل :مريضه گعدت يم امها
وگامت تفرج رجليها
رجعت بسااع على حميد افتهم منه هاذ اكيد مو واعي شيحجي هوه كل شوي برأي وگفت گدامه بالعين الجبيره خويه حميد انته ابو البيت والجبير على عيني وراسي بس تره ما ترهم منين ما تگلبها ما ترهم على اقل انتظر عماد يجي
صبره : وعش ينتظر عماد بالله ليش هوه مو زلمه مو عقله براسه لو من حقدكم محد يريد لحميد الخير من سمعتو راح ينطونه رافده گمتن ترجفن انتي وام رجلج
اسمعني وليدي حميد لحد يخربك هاذ الله جازاك على صبرك واخيراً راح افرح بيك باجر ان شاء الله نعقدلك على رافده بنيت خالتك مو گتلك من زمان البنيه يجي يوم وترضه بيك
وخاف احد يقنعك ويگلك ليال جاهل مو جاهل يابه دحگلها شطولها تعادل نسوان ثنين بس غير دللتوها وما لگت احد يوعيها ويعلمها هسع تشوفها شلون راح تعيش يم صائب ويسعدها وتسعده
امل : فاتحه اثمي وعيوني مصدومه شلون يا عالم هيج بشر يظلم لخاطر انانيته يولو طفله الله اكبر
ما خلتني صبره احجي دفعتني وطلعتني بره وگعدت يم حميد توز بي وتشجعه وهو مكيف راح ياخذ رافده وتگله شگد ما حاولت استعجل گبل لا يجي عماد ويخرب عليك
ظليت الوب مثل المره المعسره ما گدرت اغفي وعمتي معاضد تنحب وتدعي وتحسب
وليال نامت ما تدري شضاملها القدر
ركضت عالتلفون تا اتصل بفاتن وماجد مدري شگللهم وشلون احجي بس المهم اخبرهم
دورت اشو التلفون ماكو شنهي وين اختفه
اكيد حميد ضمه تما نخابر احد
..
سعاد :رجع غازي يفح منالعصبيه
لزم راسه گام يضربه راد يموت
سألته شصار رحتو على صائب وگفتو
غازي : رحنه يا سعاد رحنه تلاگينه بالطريق طلع خاطبها ومحصلها والصگعه مبدلها برافده شراح يصير هسع يربدنه ماجد والله ما يخلي يشم الهوى
سعاد :انحمست منالقهر اريد احجي ما اگدر يربي اخاف احد بيهم يجفص عليه و تصل لهلي ويجيني صياد يگوم يشيل زلم ويلگح بالسرداب حذرهم من اول ما زفوني محد يسمعني كلام شسوي يربي شسوي والله جريمه هاي
الأخ شلون يغدر اخو
اذن الفجر وغازي يلوب ويحش جگاير
ماكل هم ماجد عبن هوه دزه وتكفل صائب
...
امل :ما نمت الليل وغمضت
وهاي صار الضهر واني اطحن بروحي
ما اعرف شسوي وشگول
لا تريگت ولا تغديت
حالتنه اني وعمتي معاضد ما يتمناها حت العدو ابجي ولازمه بطني موتتني بالوجع من قهري
وهاذ حميد ولا همه اجه مكيف
جايب ويا الشيخ اخذه عالديوان
ورجع يمي يحذرني
حميد :هسع يجي صائب تا يعقد
عود طلايب وحس نفس ما اريد
امل :گالها وراح بشر صبره
طلعت من حجرتها مكيفه
شلون ما تكيف راح تبني سعادة ابنها
على احساب تعاسة ليال ورافده وماجد
اني الي مخبلني صائب شجاه
شلون اله نفس والله جاي اجذب روحي
اخاف اني بحلم هاذ صائب اثقف منه وارزن ماكو شجاه تخبل معقوله يريد ليال هم وعاشگها لا مستحيل اني سمعت نضال تگول صائب صارحني ورفضته عجل شجاه يربي
..
سعاد :من صباحيات الله لحد هساع
والعياط علگان ابيت صائب
رحنه عليهم شفنه صائب شايل جلكان نفط ويتهدد يور البيت اذا وگفو بطريقه
ادحگ رافده لاطمه على وجها وحالتها تقهر
اخذتها ورحت لبيتنا اهجد بيها
گعدت وگامت تنحب وتلطم
رافده : دابريني يا سعاد شسوي دابريني
وگعت ضحيه بين اخواني دمرونييي اني تالي صبري اروح مغصوبه لواحد ما اريده وعلى شنهو على انتقام ما يسوه والي قاهرني اخويه قدوتي هوه الي يريد ياخذني يسلمني لجلادي بيده شسويييي الله لا يوفقج يا نضااال
سعاد :انملص گلبي عليها
والي فهمته هيه تعرف بسالفة نضال
گنبصت يمها سويت نفسي ما ادري
: شنهي انتقام وشبيها نضال
احجي بلكت الله نلگه حل
رافده :شنلگه يا سعاااد هاي نضال النذله تدري بصائب يحبها يعشقها توسلها الا مل وما رضت بي وانطاها مجال وعافها براحتهااا
وستسر بماجد وحجاله مشاعره ويه نضال
وصارلنه سنين نعرف وكاتمين وصائب يدحگلها من بعيد ويلوب بروحه
تالي بيوم العزيمه مال بركات لاگيهم صائب بوضع يخزي وشفتي بعينج شلون ضرب ماجد وكسره تكسر
سعاد :استغفر الله يربي هاي شلون طلبه
بس الي شفته ماجد ما جان بوعيه
تعذريني واضح سكران وما يندل بروحه
رافده : يولي والله حجينه ويااا الصبح من راح ماجد وگناله مو بوعيه ما يندل بروحه بس نضال گالت شنهي يعني تتهموني اني اجيتله وجان تكشف صدرها شوفتنه العضات والأثار برگبتها خلت صائب يرجد بروحه تخبل الزلمه يا سعاد تخبل
اجاني گال اختاري
موت اخوج مقابل تزوجين حميد
شسوييي وافقت هددني يور البيت ويكتل روحه حلف الا يحرگ گلب ماجد مثل ما حرگ گلبه
سعاد : تره والله واضحه نضال ذبت نفسها على ماجد ما شفتي حت الصبح وبعده ما يندل بروحه
ولا يتذكر شي ليش صائب مجاي يفهم.
رافده : ما يفهم لاااا ما يفهم
صدگ نضال وجذبنه الكل
يعبالي ماجد خانه اااخ يربي شسوي هسع
سعاد :زين خابري ماجد احجيله
بلكت يجي يبررله ويحل الوضع
رافده : منين اخابره اذا صائب شال التلفون منين وتره حت تلفونكم شاله من الصبح تگاضب ويه غازي
حلف علينه اذا ماجد يجي هين او يسمع الا يور روحه تخيلي شال جلكان النفط وحطه بالحجره
سعاد : ظلت رافده تصيح واني الوب وياهه يربي شلون كسبان خطه شجاك ول صائب والله جنت اشوفك بالعين الجبيره
صار العياط بره طلعنه جان صائب
شايل مسدس بدال السجين
وينادي على رافده لمت نفسها وطلعت
صائب :يالله امشي نعقد الشيخ ابيت حميد
سعاد : راحت وهيه تشاهگ
محد گدر يمنع صائب الكل يلوب ويتگرضم
..
امل :اجو صائب واهله
رافده عبالك. جايه اعدام
مورمه العيون ولاطمه وجها
وشگحه روحها تريد تطفر
هيه ما عدها مانع تنطي رافده لحميد
بس ما تريد ليال لواحد من ولدها
طبو عالهول ظليت گاعده بالصاله
اريد اگوم ما اگدر
اجاني حميد يضحك من فرحته
حميد : يالله ليال وينها امشي ناديها
امل :شلون اناديها وهيه ما تدري يربي
رحت عالحجره اسحل بروحي
ادگ الباب قافلته عمتي معاضد
گنبصت بالباب وگمت اگهد واسمعها تنحب
وهاي ليال كلشي مو فاهمه
ليال :يمه شبيج تبجين
ليش قفلتي باب الحجره
تره اني طبت ومعد انهزم والله
معاضد : مابيه شي ظلي هين
ممنوع تطلعين
امل :گمت ارجد براسي عالباب
وينك يا عماد وينك
اجه حميد متعصب وعاط بيه
حميد :وينهااا لياااال مو گتلج ناديها
امل :وگفت اتوسله وابجي
حميد عوفها امانه هاي اخيتك
وخرني بنتر ويفتح بالباب گام يرجد بي
ويدفع فتحه وفات
جانت عمتي معاضد كامشه ليال
ما تفعل تهدها وتوسل بحميد
معاضد :تخسه وليدي اخيتك لا تكسرها
امل :فاتت صبره جرتها منها هيه وحميد
وهاي ليال مبهوته ما تدري السالفة شنهي
بس فاكه اثمها
جرها حميد من ايدها طلعها بالصاله
يسولف وياهه
حميد :ليال اسمعي انتي اليوم راح تزوجين صائب هاذ الشيخ بالديوان وراح يجي عالهول يعقدلكم
يا ويلج تعاندين وتسوين طلبه
امل :انصدمت ليال وفتحت عيونها
گامت ترجد بروحها
ليال :استاذي لا شلون اتزوجه هدوني
اني اريد اتزوج ماجد
امل :ضربها راشدي وگعها لزمت وجها
وگامت تبجي اخذتها عمتي معاضد بحضنها
واتوسل بيهم وهذول قافلين ضمير ماكو
وليال ادحگلهم وهيه مصدومه
تريد تفهم وحميد وصبره مستمرين بيها غلط
وحجي اشكال يريدون ليال گوه توافق
وهاي معنده وترجد بروحها
ليال :اني احب ماجد اريد اتزوجه هوه
عوفوني وخرو عني
امل :طاح بيها حميد ضرب
راشديات ودفرات
اني وعمتي معاضد انبطحنه عليها
ونصيح
ليال : گمت اصرخ بعلو حسي
انهاريت محد گدر يفكني من حميد
امي وامل اجاهن نص الضرب
سد اثمي وعاط بأذني اذا ما اوافق يذبحني
خفت من حلاة روحي
گتله اي اوافق بس كافي تضربني امانه
امل :وگف حميد وهوه يتهدد علينه
ويوصي بليال
حميد :راح يسألج الشيخ موافقه
گولي اييي وحميد وكيلي
فتهمتييي قسم بالله يا ليال
اذا بعرتيها الا اذبحج خلاااص
امل :هزت راسها بــ اي
وكاتمه حسها بأيدها شفتها اطلع دم
راح حميد جاب صائب والشيخ بالهول
طلعن رافده وشگحه منالحجره
مسويتها مناحه فاتو وراه
رجع حميد جر ليال وحلف علينه
اذا نلحگه ونحجي شي الا يكسرنه تكسر
صبره لفت شعر ليال گبعتها بملفعها
واخذتها عالهول تسحل بيها
وليال ادحگلنه وتشاهگ
عمتي معاضد داخت
وديتها عالحجره نامت على بطنها انهد حيلها
رحت وگفت اباب الهول ادحگ على ليال
كامشها حميد من ايدها ويهمسلها
تخسه على غيرتك
وانته يا صائب شجاي تسوي وليش
ليال :واگفه يم حميد اشاهگ وادحگ حواليه
ست رافده وامها هم گاعدات ويبجن
ويمهن استاذي جان گاعد بثبات
ويسولف ويه الشيخ شبيهم يربي شجاي يصير
سألني الشيخ انتي موافقه
ما عرفت شحجي گمت ابلعم
وامسح وجهي برداني
واستاذي مدنگ ويعصر بأدينه
سألني انوب صديت على حميد اتوسله
اريد اطلع رصني من ايدي قوي وگز سنونه
وافقت من خوفي وحميد صار وكيلي
امل :صوت بحتها من وافقت
تشگ الگلب خلتني ارگع براسي
عقدولها واجت صبره گايدتها وتضحك
صبره : مبروك ولو ما تستاهلين واحد مثل صائب
يتبع……………