အပိုင်း ၈ - မာမီ (၄)
သူမ ဤကလေးကို သိသည်ဟု မထင်ပေ။ သူမ၏မှတ်ဉာဏ်ထဲ အကြိမ်အနည်းငယ်ရှာကြည့်သော်လည်း မူလပိုင်ရှင်တွင် ကလေးရှိကြောင်း အရိပ်အမွက်ပင်မတွေ့ရချေ။ မူလပိုင်ရှင်သည် မည်သည့်အခါမှ ချိန်းတွေ့ခြင်းမရှိခဲ့ဘဲ သူမ မွေးဖွားလာစဉ်တည်းက တစ်ကိုယ်တည်းသမားလေးဖြစ်ခဲ့ခြင်းပေ။
ကောင်းပြီ။ ထိုသို့ဆိုလျှင် ဤထူးဆန်းသည့် အကောင်ပေါက်လေးသည် ရုတ်တရက်ကြီး သူမရဲ့တံခါးကို ခေါက်ပြီး သူမကို "မာမီ"လို့ အဘယ်ကြောင့်များ ခေါ်ရသနည်း?
ဤအရာများကို အလုံးစုံကိုနားလည်သွားရန် ယဲ့ချင်းအတွက် စက္ကန့်ဝက်လောက်သာ အချိန်ယူလိုက်ရသည်။ သူမသည် လွန်ခဲ့သောသုံးရက်အတွင်း ဟိုတယ်တွင် နေခဲ့သည်ဆိုသော်ငြား ရံဖန်ရံခါ အပြင်သို့ တချို့အရာများဝယ်ရန် ထွက်ခဲ့သေးသည်လေ။
ဤမြို့လေး၏လူဦးရေသည် မမြင့်မားသောကြောင့် လူတိုင်းသည် တစ်ရက်၊ နှစ်ရက်တွင်းပင် သတင်းအစုံအလင်သိရှိသွားနိုင်သည်။
သူမသည် လမ်းတွင် လမ်းလျှောက်သောအခါ သူမ တစ်ခါမှ မတွေ့ဖူးသောသူများသည် သူမကို အကွာအဝေးတစ်ခုခြားထားသည့်ပုံပင်။ သူမ၏ "ကူးစက်ရောဂါ" အကြောင်းသည် သူမ ဆွေမျိုးများ၏ သတင်းဖြန့်ခြင်းခံလိုက်ရပြီးဖြစ်မည် ထင်ပါ၏။
ယဲ့ချင်းသည် ထိုအတွက် စိတ်မချမ်းသာ မဖြစ်ပေ။ ယခုလိုမြို့ငယ်လေးတွင် လူတိုင်းသည် စုဝေးပြီး အတင်းပြောရသည်ကို ကြိုက်နှစ်သက်ကြသည်။ သူမနှင့်လာပြီး အတင်းအဖျင်းပြောမည့်သူမရှိသည်က ဆိုးရွားသည့်အရာတော့မဟုတ်ပေ။ တခြားသူတို့သည် ပေါင်းသင်းဆက်ဆံရေး လိုအပ်သော်ငြား သူမ၊ ယဲ့ချင်းသည်တော့ မလိုအပ်ပေ။ သူမသည် တစ်ကိုယ်တည်းသာနေလို၏။
သူမ မထင်ထားခဲ့သည့်အရာသည် သူမ၏ "ရောဂါ"အကြောင်းသည်သာမက သူမ၏တိုက်ခန်းအကြောင်းပါ သတင်းပျံ့နှံ့သွားခြင်းပင်။
ယခုတွင်တော့ တစ်စုံတစ်ယောက်သည် တိုက်ခန်းအတွက် သူမကို အမေဟုခေါ်မည့် အကြံတွေပါရှိလာကြသည်။ သူမ၏ နောက်ဆုံးအချိန်တွင် မိခင်ဗီဇတို့ တဖွားဖွား ပေါ်လာကာ နောက်ဆုံးတွင် ဤအသေးလေးအတွက် တိုက်ခန်းတစ်ခန်းချန်ထားခဲ့မည်။
ကျွတ် ကျွတ် ကျွတ်။ စိတ်ဝင်စားစရာကောင်းချက်ပဲ။
ယဲ့ချင်းသည် ကလေးလေး၏ ဖက်ထားခြင်းမှ ရုန်းထွက်ရန်ကြိုးစားသော်လည်း မရပေ။
သူမသည် မိခင်တစ်ယောက်၏ အပြုံးမျိုး တပ်ဆင်လိုက်ကာ အလွန်နူးညံ့သောအသံဖြင့်
"ကလေးလေး၊ ငါက ကလေးလေးရဲ့ မေမေ,မဟုတ်ဘူးလေ။"
ကလေးမလေး၏ နီလာရောင်မျက်လုံးထဲတွင် လှိုင်းဂယက်လေးများ ထလာပြီး ယဲ့ချင်းကို ပို၍ တင်းတင်းဖက်ထားလိုက်သည်။ ထို့နောက် အလွန်သေချာတိကျသော လေသံဖြင့်
"ဟုတ်ပါတယ်ဆို! မာမီက သမီးရဲ့အမေပဲ!
မာမီ! သမီး မာမီကို အရမ်းလွမ်းနေတာ! QuQ."
ဤအရွယ်နှင့် ဤမျှလောက် ကောင်းသည့်သရုပ်ဆောင်ချက်တွေ ရှိနေပါရောလား။
ယဲ့ချင်းသည် လုံးဝအံ့အားသင့်သွားခဲ့သည်။
အို၊ မြို့ကြီးပြကြီးရဲ့ အိပ်ခန်းနှစ်ခန်း၊ ရေချိုးခန်းတစ်ခန်းပါ တိုက်ခန်း၏ အံ့ဩဖွယ်ဆွဲဆောင်မှုကြီးပါပေ။
သူမ သဘောကျသည့် အတိုင်းအတာထိ သူမလက်ကိုဆန့်ကာ ကလေးမလေး၏ ဖြူဖွေးပြီး ချစ်စရာကောင်းသည့် ပါးလေးကိုပွတ်လိုက်ပြီး အပြုံးလေးကိုထိန်း၍
"သမီးရဲ့ နာမည်က?"
ကြောင်ပေါက်လေးနှင့်တူသည့်ကောင်မလေးသည် သူမမျက်လုံးများကို သက်တောင့်သက်သာ မှေးလိုက်ကာ ချိုသာစွာ ပြန်ဖြေလိုက်သည်။
"သမီးနာမည်က ချန်မျန်ပါ။ နစ်မြုပ်တာရဲ့ ချန်၊ ငှက်သိုက်မုန့်ရဲ့ မျန်။
မျန်ဟွာထန်*က သမီးရဲ့ အိမ်နာမည်လေ ပြီးတော့ မာမီ ခေါ်နေကျပဲကို။"
"အို, ရှောင်မျန်ဟွာထန်။" ယဲ့ချင်းသည် သူမ၏အိတ်ကပ်ထဲ နှိုက်ကာ သာမန်မြင်တွေ့နေကျ အဝါရောင်ပါကင်လေးနှင့် ပျားလိမ္မော်သကြားလုံးလေးကို ထုတ်ယူလိုက်ပြီး မေးလိုက်သည်။
"သကြားလုံး လိုချင်လား?"
မျန်ဟွာထန်လေးသည် အပြင်းအထန် ခေါင်းညိတ်လိုက်ရင်း ပြန်ဖြေလိုက်သည်။
"ဟုတ်!"
ယဲ့ချင်းသည် စိတ်ရှည်ရှည်နှင့် သကြားလုံးကို အခွံခွါပြီး အကျယ်ကြီး ဟထားသော ချန်မျန်၏ ပါးစပ်ထဲသို့ ထည့်ပေးလိုက်သည်။
ထို့နောက် သူမသည် ကလေးမလေး၏ခေါင်းလေးကို ပုတ်ကာ ချော့မြူလိုက်သည်။
"အခု မတ်မတ်ရပ်တော့။"
ကလေးမလေးသည် ယခုတွင် သူမ၏မိခင်မှ သကြားလုံးကျွေးပြီး ခေါင်းလေးပုတ်ပေးသောကြောင့် ပို၍ပျော်ရွှင်လာခဲ့သည်။ လိမ္မာစွာပင် သူမအမေ၏ပေါင်ကို လွတ်ပေးလိုက်ပြီး မတ်မတ်ရပ်လိုက်သည်။
"တော်လိုက်တဲ့ ကလေး။" ယဲ့ချင်း ပြောလိုက်သည်။
"အခု သမီးရဲ့လက်တွေကို ဆန့်လိုက်ပါဦး။"
သူလေး၏မျက်လုံးများသည် တောက်ပလာကာ သူမ၏လက်များကို မြှောက်လိုက်သည်။ သူမ၏ပါးလေးတို့သည် ဖောင်းလာပြီး ယဲ့ချင်းကို မျှော်လင့်တကြီး ကြည့်လိုက်ရှာသည်။
မာမီကလည်း သူမကို ဖက်တော့မည်ထင်ပါ၏။ သူမ၏မာမီသည် မည်သည့်အရာကိုမှ မမှတ်မိတော့သော်လည်း သူမကို ချစ်နေသေးသည်လေ။ မျန်ဟွာထန်လေး၏မာမီသည် အလွန်ကောင်းမွန်ပေသည်။
ယဲ့ချင်းသည် အနည်းငယ်ငုံ့၍ လက်နှစ်ဖက် ဆန့်တန်းကာ ကလေးမလေးကို ချီလိုက်သည်။ ကလေးလေး၏ကိုယ်သည် ယဲ့ချင်း၏ ဆန့်တန်းထားသည့်လက်အလွန် လေထဲတွင်ရှိနေလေသည်။
ကလေးမလေး ဘာတွေဖြစ်ပျက်နေသည်ကို နားမလည်သေးသည့်အချိန်တွင်ပင် ယဲ့ချင်းသည် သူလေးကို လေးလံသော သံတံခါးကြီး၏ အပြင်ဘက်တွင် အလျင်အမြန်ချကာ သူမရှေ့တွင်ပင် တံခါးကို ချက်ချင်းပိတ်ချလိုက်ချေသည်။
ဤကလေးမလေးသည် အလွန်ချစ်ဖို့ကောင်းပါပေ၏။ သို့သော် သူမ၏နာမည်သည် ယဲ့ချင်းဖြစ်ပြီး ငတုံးမဟုတ်ပေ။
•.•
Notes:
* 棉花糖 - Cotton Candyကို ပြောတာပါ။ ကလေးရဲ့ ချစ်စနိုးနာမည်လေးက မျန်ဟွာထန်ပါတဲ့။