صباح اليوم التالي عائشه طالعه ماشه على الجامعه شافت محمد قصاد بيتهم اتذكرت معاملتها ليهو اخر فتره
عائشه: انا لازم امشي اعتذر منو عاملتو بطريقه شينه
عائشه مشت لمحمد
عائشه: محمد
اتلفت عاين ليها مخلوع
عائشه: انا بعرف اني بأخر فتره عاملتك بطريقه شينه وحتى طريقة رفضي كانت قاسيه شويه انا بعرف في النهايه نحنا جيران واخوان ومتربين سواا والزعل ما حبابو عشان كدا حابه اعتذر منك بس على اي تصرف شين بدر مني
محمد: انا ماقعد ازعل منك يا عائشه
كرم ومروان جو راجعين بيتهم في الحله شافو عائشه واقفه مع محمد
مروان: الولد دا شوفتو بتعمل لي اسهال معوي
كرم: مروان ياااخ بطل قرف
مروان: والله انا نهاائي ما مطمن ليهو
كرم: عائشه ليه واقفه معاهو
مروان: ما عارف بس دي وقفه طبيعيه ما تشيل هم
كرم: هم بس انا ما شايل هم
مروان: ما علينا ارح ندخلل
عائشه: يعني اتصافينا خلااص
محمد: ايواا
عائشه ابتسمت ليهو واتحركت
كرم: انزل يا مروان انا عندي مشوار
مروان: قال عندي مشوار قال
مروان نزل وكرم ساق العربيه وقف قدام عائشه هي مما شافتو ابتسمت
عائشه:كرم
كرم:عائشه صباح الخير
عائشه:صباح النور
كرم:ماشه الجامعه صح
عائشه:اي
كرم:طيب تعالي اوصلك
عائشه ركبت معاهو ومشو وهم في الشارع وقفو في الاشاره فجاءه جو ثلاثه شفع وهم بيقولو عمو كرم عمو كرم
كرم:اهلللين انتو ما لازم تجرو في الظلط كداا القدر ما معروف
طلع جزلانو عايز يديهم قروش بس وقفوه قالوا ليهو ما عايزين قروش الليله امنا بتشكرك شدييد وقالت لينا لو لاقيناك تاني نجيبك البيت كرم سكت وعاين لعائشه
كرم:كان بودي اجي معاكم بس
عائشه:مافي بس حيمشي معاكم اي
كرم:حيمشي قصدك بدونك يعني؟طيب والجامعه
عائشه:بمشي بالموصلات
كرم:يعني ما بتقدري تمشي معااي
الاولاد قالوا ليها تعالي انتي كمان عائشه وكرم نزلو ومشو مع الاولاد بيتهم سلمو على ام الاولاد طبعا البيت عادي وسقفو من حصير والارض تراب وفيها كانون صغير وسرير واحد بس والهواء ضاربهم من كل الاتجاهاات بس كرم وعائشه ما حسسوهم بأي شي جابت ليهم مويه وشاي شربوو واتونسو معاها شويه كرم عاين للزمن
كرم:والله يا اختي كان نفسي نقعد معاك بس عائشه عندها جامعه حنجي نزورك ان شااءالله
قالت ليهم تنورو بعدين كرم ساق عائشه ووصلها الجامعه
عائشه:حننوني والله هم كيف عايشين كداا هي واولادها بس
كرم:حنساعدها بدون ما تعرف
عائشه:طيب انا اتأخرتا لازم انزل بعدا
كرم:عائشه
عائشه:كررم
كرم قعد يضحك وقال ليها مع السلامه نزلت لقت المحاضره بدت
💙💙💙💙💙💙💙💙💙💙💙💙💙💙💙
رأفت قاعد في البيت طلع الصالون لقا رغده قاعده هناك قعد معاهاا
رغده: خير انت كويس
رأفت: اي الحمدلله
رغده: بس استغربتاا انك في البيت وما مشيت الشغل
رأفت: مافي شي ضروري عشان كدا قلتا اريح الليله
رغده: طيب طالما انت قاعد خليني اتكلم معاك في موضوع
رأفت: احكي اصلا مافي موضوع
رغده: الموضوع بيخص كرم نفسي اعرف مشكلتك معاهو شنو دايما بتشاكلو وبتتنهر فيهو ولمن وقع في مشكله ودخل مستشفى طوالي انت جيت جاري عشان تتبرع ليهو وتطمن على صحتو حابه اعرف انت بتحب كرم ولا بتكرهو حتى معاملتك مع سمير ما طبيعيه انا مرتك وبعرفك كويس بس علاقتك مع اولادك ما قادره افهما وريني حيحصل شنو يعني لو انك عاملتا كرم وسمير بمحبه وزي اي اب بحب اولادو حيحصل شنو لو حاولتا تصاحبهم وتخليهم يحكو ليك مشاكلهم كرم وسمير واكتر شي سمير صدقني بحبووك شدييد ودايماا بحاولو يخلوك مبسوط نفسي عيلتي تكون طبيعيه وكلنا حابين بعض اسي بسبب المشاكل الكتيره كرم طلع وخلا البيت بقا يجيناا مده بسيطه وبعدين برجع انا اشتقتا لي لماتنا في وقت الاكل لونسة سمير وكرم بالليل اللغاية اذان الصبح اشتقتا لولدي كرم وجودو في البيت وطلتو كرم حاول معاك مره وجا دورك انت
رأفت: خلصتي
رغده: لسه في كلام كتيير
رأفت: انتي شفتي الطريقه الصح لكرم وسمير وربيتيهم ويشهد الله من وقت وفاة ام سمير وانتي حبيتيهو وما فرقتيهو عن كرم ابدا وانا كمان حاليا التربيه الشايفها احسن ليهم الاتنين بربيهم ليها ما عايز لمن كرم يتزوج او سمير يجيهو اولاد ما عايز انهم يدلعوهم زي ما انتي بتعملي وبعدين شخصيتهم تطلع مغروره زي كرم وما شايفين زول قدامهم ولا شخصيتهم ضعيفه زي سمير بمشو ورا هوا اي زول وما بيتكلمو
رغده: يااادوب انا اتأكدتا انك ما بتعرف شي عن كرم لانو ولدك ما بس مغرور كمان قلبو طيب وفيهو جانب ايجابي ما عارف الحاجه دي وسمير شخصيتو ما ضعيفه بس هو بحترم النااس كلهم بدون فرز
رأفت عاين ليها وسكت
رغده: ما قادر ترد صح اكتشفتا انك ما بتعرف شي من اولادك حاول معاهم
❤️❤️❤️❤️❤️❤️❤️❤️❤️❤️❤️❤️❤️❤️❤️
مروان اتلاقى مع ايلاف في مطعم
ايلاف: اتصلتا فيني وخلعتني قلتا لي تعالي ضروري في النهايه طلعتا عازمني فطور
مروان: عشان تجي مخلوعه😹
ايلاف: ارح احكي ضارب مصحيني من النوم ليه
مروان: عايز اتعرف عليك يا ايلااف ارح احكي لي مين دي ايلااف
ايلاف: ايلاف قاااسم عمري 20 سنه بقرا ثالثه علم نفس بت واحده في نص اربعه اولاد ابوي برا السودان وامي في البيت امي اسمها بهجه.. اخواني محمد ومصطفى ومعتز ومجاهد
مروان:ماشااءالله والله
ايلاف: طبعا انا اكبر واحده
مروان: عجبوني كلهم بحرف الميم
ايلاف: اي زيك اهاا دورك
مروان: مروان عاطف ابوي كمان برا السودان في امي واختي الصغيره وديل في كسلاا امي دكتوره في جامعه واختي اسراء بتقرا طب سنتا التانيه
ايلاف: امك واختك في كسلا براهم
مروان: لا المنطقه هناك كلها اهلناا في خيلاني وفي اعمامي وهكذا وانا كماان عشان الشغل هنا بس كمان كل فتره بنزل ليهم
ايلااف: كويس والله بس انك تعيش بعيد عن امك صعبه صح
مروان: صعبه شديييد والله بس بتصل عليها مكالمات فيديو والحمدلله كلو تمام
ايلاف: حلوو
مروان: طيب اكلي لانو من هنا حاوصلك الجامعه ومنها حامشي الشركه
💜💜💜💜💜💜💜💜💜💜💜💜💜💜💜
مروان وصل ايلاف الجامعه وبعدين مشاا الشركه دخل مكتبو جاهو كرم
كرم: مروان اتأخرتا
مروان: كنتا بفطر مع ايلاف عشان كداا
كرم: والله غايتو
بيتكلمو جات غيداء
غيداء: كرم انتو كل وقتكم ونسه وناسين الشغلل
كرم: خيرر
غيداء: ديل صور العارضات الحيجو عشان يعرضو تصاميمنا انا اخترتهم شوفهم
مدت الصور لمروان بقا يعاين ليهم
مروان: ااخ ياقلبي دا شنو الجمال داا معقول ديل حيجونا في الشركه يااربي ياخ الله ياخدني دا شنو الكلام البقول فيهو دا يعني انا ما حازوق على دمي ولاشنوو شيلي مني الصور ديل وما توريني صور بنات تاني
كرم وغيداء بقو يضحكو فيهو كرم مسك الصور وشافهم مره واحده رجعهم لغيدااء
كرم:كويسين اي تمام يا غيداء
غيداء:معناها ربنا يخليني ليكم واحمدوالله اني معاكم في الشركه
كرم:فعلاا
غيداء مشت كرم قعد وعاين لمروان
كرم:مروان انت لاحظتا لحاجه
مروان:ما لاحظتا غير لاني واحد حيوان وماحازوق على دمي
كرم:غيداء ورتني صور البنات وانا ما اتاثرتاا ولا علقتا عليهم حتى ما عاينتا لصورهم مرتين انا مصدوم
مروان: حظك ياريتني لو مكانك
كرم: لا الموضوع دا خطير
مروان: كرم العارضات حيصلو متين
كرم عاين ليهو وسكت
.........
عائشه في الجامعه قاعده مع صحباتهاا
عزه: عائشه يابت بقينا ما بنشوفك ابدا
عائشه: قاعده والله بس انتو بقيتو ما بتظهرو
عايده: عان دي رمتا فينا عشان تطلع نفسهاا
قاعدين في القاعه بدت المحاضره
عائشه: اليوم دا مالو ملان محاضرات كداا
عايده: شكلك نسيتي جدول المحاضرات كمااان
.........
كرم: مروان صح انا اتذكرتا حاجه في كميه بتاعت عوائل فقيره في السودان فرأيك شنو حابب انو نقدم ليهو مساعده
مروان: ممكن اي
كرم: وعايزين يساعدونا ناس بحبو عمل الخير يعني زي عائشه وايلاف في عائله انا بعرفها بيتهم من حصير يعني مثلا لو جا اقل غبار او البحر هاج بيتهم حيتشال لاقدر الله عشان كدا العوائل الزيهم لازم نأمن ليهم طريقة سكن مريحه وكمان لازم كل شهر نوزع عليهم رواتب عشان يقدرو يأمنو حياتهم ودي حاجه حتكون مهمه في شركتناا ولازم نحافظ عليهاا
مروان: عجبني الاقتراح طيب انت اتصل بعائشه وانا حاتصل بإيلاف ونلاقيهم الليله وتحكي ليهم فكرتك ونمشي عشان ننفذ القصه
كرم: تمام
💚💚💚💚💚💚💚💚💚💚💚💚💚💚💚
بعد ما عائشه خلصت محاضرات ضرب ليها كرم واتلاقو الاربعه قدام محل ست شاي
كرم: بسببكم بقينا نحب الاماكن دي
عائشه: اصلكم بتحبوهاا
مروان: طيب بنات زي الورد عايزنكم في موضوع خطير عشان كدا ركزو كل حواسكم معاانا مروان حكا ليهم فكرة كرم من اولهااا
عائشه: كرم والله كان في عقلي نفس الفكره وكنتا عايزه احكيها ليك
ايلاف: ياسلام عليكم بتفكرو في نفس الشي في نفس اللحظه
عائشه: طيب حنبدا من متين
كرم: والله انا متحمس للفكره ولو علي نبدا من اسي بس
مروان: بس شنو مالك
كرم: ما عايز اسمنا يظهر يعني نعمل الشي دا بدون ما يعرفو انو نحنا العملنا كدا لانو هدفنا المساعده ما انو نظهر نفسناا
عائشه بتعاين ليهو مبتسمه
ايلاف: كلامك صح يا كرم معناها نتبرع بمبلغ للجمعيات الخيريه وهم حيشوفو العوائل الفقيره وبدعموهم
كرم: ا ممكن
مروان: ممكن اي وممكن كماان نسجل اسم كل العائلات المحتاجه في ورقه وكل شهر نسجل اسم 10 من العوائل وبدون جمعيه خيريه لانو مرات الجمعيات الخيريه ما بتكون صادقه ممكن نرسل وفد من شركتنا يوزع عليهم بدون ما يذكرو اسمااءناا بس يقولو ليهم انهم من طرف الجماعه ديلك اسمهم شنوو
كرم: ديوان الذكاه؟
مروان: لالا يااخ ما ديل ناس زمان كان بساعدو المحتاجين كل فتره ما اتذكرتاا المهم يقولو ليهم انهم فاعلين خيرر وهكذاا
ايلاف: فكرتك حلوة
مروان: مافي احلى منك والله
ايلاف خجلت مروان بعاين ليها كرم وعائشه عاينو لبعض وعاينو ليهم وبعدين ضحكو
كرم: شباب خلونا في المهم مروان فكرتك حلوة وحنفذهاا
مروان:انا وايلاف حنمشي للعائله الحكيت لينا
عنها ونسجل اسمائهم ومعاها كم عائله تانيه
كرم:تمااام انت وايلاف جهزو القائمه وانا وعائشه حنجهز طريقة الدفع والمواد التموينيه والوفد الحيوصلها ليهم تمام
كلهم قالوا ليهو اتفقناا وبعدين بدو ونسه
🤍🤍🤍🤍🤍🤍🤍🤍🤍🤍🤍🤍🤍🤍🤍
سمير واسمهان
سمير: اسمهان رأيك شنو لو نرجع البيت
اسمهان: بيت شنو ياسمير ما كفايه ما سافرنا بره انا رضيت بالموضوع وحاليا ما تمينا يومين عايزنا نمشي بيتكم انت جاادي
سمير: كل الموضوع هو انو ابوي الفتره دي تعبان وانا ما بقدر اخلي يشتغل في الشركه براهو وكرم ما موجود في البيت وامي رغده بتمل براهاا بتزهج قلبي ما مطاوعني اخليهم كداا انتي بس ارضي انو نرجع وانا بوعدك اول ما تنحل المشاكل حسافرك اربعه دول من اختيارك انتي هاا قلتي شنوو
اسمهان: اربعه دول
سمير: اي
اسمهان: كان كدا تمام نمشي
سمير: طيب
جهزو الشنط وطلعو رجعو على بيتهم الكبير رغده فرحت فرح لمن شافت سمير واسمهاان بتعاين للبيت باعجاب لانو بيت كبييرر دخلو شنطهم واسمهان بقت حايمه في البيت
اسمهان: سمير ليه غرفتك اصغر من غرفة كرم
سمير: حبيبتي لانو يوم نحنا رحلنا للبيت دا كان في بضاعه لازم اسلمهاا ولمن جيت كان كرم اختار الغرفه المطله على المسبح وانا شلتا الغرفه التانيه
اسمهان: معقولاا يا سمير ما جا في بالك تسلم البضاعه الا في اليوم داا
سمير: عادي الشغل ماعندو وقت معين
اسمهان لوت خشمها ومشت ترتاح سمير مشا قعد مع رغده
💕💕💕💕💕💕💕
مزمل مشا لسارة في جامعتها وطلب منها تجيهو في البوابه وسارة جاتو اداها هديه
سارة: فيها شنو
مزمل: افتحيهاا
فتحتها طلع كتاااب سارة كانت بتفتش فيهو وما لقتوو
سارة: يا الله لقيتو وين دا انا فتشتو مده طويلةة بالجد اانت مافي منك شكراا يااخ
مزمل: ولو ما بيناا المهم سعادتك
سارة: شكرا
مزمل: كفايه تقولي شكرا نحنا اصحااب ما بينا
سارة: طيب ادخل بدخلوك عادي بدون بطاقه جامعتنا دي حوش بقرر
مزمل: بالجد
سارة: اي تعال
دخلو الجاامعه وساقتو قاعتهم
سارة: عندنا محاضره ودي اخر واحده احضرها معاي
مزمل: طيب تمااام بحضرها معاك
قعدو والدكتور جا بدو المحاضره مزمل ملا شدييد لانها بتتكلم عن برامج الحاسوب بس ما اتكلم لغاية ما انتهت طلع مع سارة سواا....
يتبع....