#حين_اتى
_حين اخلف وعودي ، هل تغفر ؟
_سأغفر
_هل ستبقى لي
_لا تخافي أنا لكِ 🧡
_____________________¹²
ابتعدت عنة بحيرة ومستمرة ادافع عن نفسي
... انت المتشوف تصرفاتي صح وإلا اني ممسوية شي
...يعني تريدين تروحيلهم ؟ يلة روحي بدلي اخذج بدل هالحجي
... انت ضايج لأن نروح لأهلك
...سمعي اذا كلتي قلدو لو ضوجوني والله انقل الغرفة لهناك وتبقين يمهم
اني مبعدج لأن شفتهم ضوجوج
تريدين ترجعين تسمعين نفس الكلام ؟
اخذج ماعندي ماعندي مانع
بس اذا بجيتي متلومين الا نفسج
...همة يكولون تعالي
...اي وانتي بكيفهم كالو تعالي رحتي
ضوجوج ترجعين تنحبين وتذبين الصوج بية
...ماضوجوني همة
... هههه انتي يرادلج گلب مامدشن شكو مدوخ راسي بيج ومبتعد عنهم وانتي هذا عقلج يومية شي
طلعت بسرعة من يمة رجعت للغرفة رحت لفراشي وتغطيت سمعت تلفونة يدك قريت الاسم "الوالد"
طلعت بسرعة قبل لاتنتهي المكالمة نطيتة الموبايل ... عمو يدك عليك
اخذة من ايدي رجعت لمكاني واسمعة يكول لأبو ...تؤمر سيد مسافة الطريق واني يمك
لا زهراء ماتكدر تجي مريضة
دخل للغرفة يبدل ماباوعلتة قبل ليطلع كلي راح اروح تريدين شي
...انت تريد تحبسني وحدي مو
...لا ، رجع يمي لزم ايدي
خلي يعرفون انتي زعلانة حتى بعد يتعلمون شلون يحجون وياج ومايضايقوج واني من ما اروحلهم هواي هم توصللهم رسالة ما اقبل ع حجيهم ولا ع زعلج
...ماشي
...ما اطول ساعتين زمان
...اي بس لاتقفل الباب علية
...كومي وراي سدي الباب
رحت ورا يم الباب ابتسملي لزمت أيدة
...هاي كومة نسوان يروحن قرايات خل اروح وياهن
...لا ، سدي الباب وراي من ارجع اخذج للحضرة
سديت الباب وضليت افتر بالبيت بما انو المفاتيح عندي فتحت باب السطح وصعدت
حسيت براحة القبة كدامي وصوت الهوسة احسة ببيتنا قررت أسويها كعدة هنا وارتب المكان وين اكو احلى من هيج منضر بس اول شي اشوف ضياء خاف ميقبل
صعدت ادوات التنضيف وشغلت الكلوب اليم الباب صار ضوة بالسطح كنستة لحد ماطاحت ايدي وماكو نتيجة واحس التشريفة مو قوية
وضياء مستحيل يهدم البيت ويرجع يبني يكول اذا تخافين اشوفلج غير بيت نأجرة وهذا خلي اني اريدة هيج يموت علي
صعدت سطولة ماي واجلف بالسطح زاهي وتايت بالعودة فتحت المرزاب حتى يوكع ماي واسمع صوت من برة ...يابة تنكعنة
شردت من السطح واترقب الصوت اندكت باب بيتنا ضليت ماعرف شسوي وكفت ورة الباب وصوت رجال غليظ حجة بدون مايعرف اني موجودة بصوت عالي
...سادة هاي هنا تكية وتنكعت الناس اذا بيها مجال أجلو الغسل ع باجر الله يرحمة لجدكم
هزيت راسي لأن ماكدر ارد خاف ضياء ميقبل ويكول ليش تجاوبي سديت باب السطح قفلتة ورجعت للغرفة اكعد هنا احسلي عن المشاكل
وهم طول ضياء والساعتين صارت ٣ ساعات ونص رجعلي بالوحدة بس حسيت القفل يندار طلعتلة ...تأخرت وصار موضوع
...يا الله أن شاء الله خير شكو
...صعدت للسطح اغسلة وطاح ع التكية اجة رجال دك الباب كال لتغسلو كلت خاف ما احجيلك وبعدين تعرف وتضوج يعني لتصيح علية ولا هاي لأن اني حجيت ماضميت عليك
هز راسة وسألني
...خو مافتحتي الباب؟
...لا والله ابد
...شصعدج للسطح ؟
...عجبني انضفة واشتم هوة لأن انت طالع وعايفني وحدي قابل حرام
...مو حرام بس جان انتضرتي اجي وصعدي وياي خو وكفتي الماي ماضليتي تشتغلين
...اي وكفتة واريد اسوي بالسطح كعدة
... إن شاء الله بس يصير عندي وقت ارتبلج المكان ، عموماً تريدين للحضرة لو نخليها ع باجر ؟
...ع باجر انت مبين عليك تعبان ولو بيك حيل جان كلتلي ليش ممبدلة اعرفك اعرفك
ضحك حضني ودخلنا سوة للغرفة سألتة بإهتمام ...أحد افتقدني
...اي
...وشكلتلهم
...كلتلهم حبيبتي زهوري متقبل تطلع من بيتها وكالت ماريد اروح لاي مكان
...يا هسة يكومون يكرهوني ليش
...خلي يكرهوج حبي الج مو كافي يعني ؟
...اي كافي بس هم اريد يحبوني خصوصاً عمتي وفاطمة اني احبهن
...الي يحبج مراح يكرهج راح يعذرج ويعززج بعين الناس اريد صبرج ماريد شي ثاني
عدت فترة هو مشغول بالموكب وصار يتأخر زايد طول اليوم لو اشوفة ساعتين ويرجع ينام يطلع الصبح للحوزة وهيج يمر اليوم
كعدت كدامة عالغدة وهاي الوجبة الوحيدة الي يكعد وياي بيها ...ضياء والله خنكة
بربك يصير جانن ١٢ ساعة وحدي هسة صارت ١٨ والله اخاف خصوصا من يصير المغرب احس البيت ياكلني اكل
...بس خل تخلص ايام الزيارة هنة جم يوم عيوني
...زين بهذا الوقت وديني يم أهلي لو للحضرة لو اكعد اباوع الزوار والله وحشة
...شوفيلج كتاب التهي بي افضل
...ماريد كتاب يحجي وياي يسولف يضحكني
...اي كلهن يسويهن احسن من البشر
...ماريد الأحسن اريد اطلع
ماجاوب لمن ردت احجي كال هسة اكلي بعدين نتناقش خلصنا وشرب جاي راد يبدل ويطلع ماحجيت شي خليت ورحت نمت شافني هيج حسيتة عصب
...حقج بس طول بال وياي هاليومين
ماجاوبتة درت وجهي سمعتة كال ...غبية
حجيت بقهر ودموعي توكع
...لتكول غبية اني مو غبية متحملة فوك طاقتي هسة لو سجين وسوالة مصيبة يذبو بسجن انفرادي يومين ويطلعو ليتخبل اني صارلي كومة وحدي وانت من تجي متضحكني عايفني بكأبة
...طبكن عندج ؟
...بدل بدل ماكو طلعة
رجعت راسي للمخدة ابجي نزع عمامتة وخابر المكتب كللهم ماكدر اجي
بدل ملابسة لتراك بيتي وطلع من الغرفة
مسحت دموعي وابتسمت حمد لله ماراح
سمعت صوت وقع أقدام فوك حسيتة ينزل الدرج رجعت تلفلفت دخل للغرفة وكال
...ادري بيج كاعدة ، راح ارتبلج المكان فوك واطلع اجيب الي احتاجة اجيب ع ذوقي لو انتي تختارين
...اني اختار
...يلة كومي بدلي بسرعة
لبست ع السريع اي شي اجة بإيدي جريت الحذاء شديت قيطانها وطلعت ادور علي هم مبدل ولابس دشداشتة السودة
... خلصت اني
...ها وين راح البجي صيري كدامي
وكفت كدامة ورفعت بوشيتي ...عيونج حمر
... مابية شي
هز راسة فتح الباب ومدلي أيدة لزمتهت وطلعنا ع الفروع لأن اني رفضت رغم الطريق يصير اطول بس المهم منطلع ع التفتيش والهوسة
ركبنا سيارتنا رفعت البوشية وكإنها حمل ثقيل
دتمشي السيارة وصادفت وحدة شكلها مو عراقية لابسة العباية وكلشي تمام بس نص شعرها طالع ...هاية عود جاية تزور
حرك السيارة وكلي
...غلط هاي غيبة حرام استغفري الله
...مو غيبة هي طالع شعرها
...روحي بوجها كوليلها طالع شعرج وزيدي نفسج حسنات ضميلهيا بيدج
سكتت افكر بكلامة كمل
...اقل شي اذا معجبج فد تصرف أو شي صادفج لتجهرين بي لاتحجين ولا تسبي أو تفسقي اذا ماكدرتي الا تحجين احجي وي نفسج بدون متحجي لأحد
الرسول محمد (ص) يكول
( الله تجاوز عن أمتي ما حدثت به أنفسها مالم تعمل او تكلم)
اذا لتجرين نفسج للذنوب ع شي ميستحق
...يعني اكدر احجي ع اي احد بكلبي بس ميتسجل علية ذنب ؟
...لا شي يختلف عن شي خصوصاً إذا جان بغير وجه حق ، يعني اذا ماجنتي تقصدين أو ممتقصدة هذا الشخص او انتي متعودة تحجين وي نفسج دوم يعني أشبه بالوسواس هذا يدخل لحيز قول الرسول
أما أذا جنتي حاطة شخص ببالج هو ممأذيج ولا ضالمج وانتي تكولين لا بداخلي جاي احجي مو لأحد مو غيبة هذا حرام الرسول يكول (ليس المؤمن بالطعان ولا باللعان ولا الفاحش ولا البذيئ)
...يعني هيج بسبب بسيط اطلع من الإيمان هاي لو مستغابة كدام كومة ناس شلون
...ماطلعتي من الإيمان كلة لكن صرتي مو من أصحاب الايمان الكامل
استغفر الله اذا اني غلطانة
...عفية عاشت ايدج اي تصرف تحسين أخطأتي بي استغفري رب العالمين مايرد الي يخاف منة ويخاف من الذنوب يغفرها
وين تحبين اخذج ؟
...ماعرف وديني لاي مكان بي اشياء حلوة
...نشتري اول شي زولية
...لا مالة داعي اني شفت بالمخزن اكو زوالي قديمة ليش نجيب جديدة ونذبها بالسطح تنمرد حرامات
...يامخزن ؟ قصدج ببيت اهلي ؟
...اي
...ماشي اجيبها بالليل هاي خلصنا منها
تردين اسويلج مثل السقيفة؟ يعني خشب
...لا أريدها لايلون حتى اشوف السمة
...ماشي
...وسنداين كون فد خمس سندانات
ونصبغ الحايط الورة
...سهلة إن شاء الله
نزلنا يم مشتل أخذت كم زراعية مقاومات يعني مو بسرعة يموتن وفد فرحانة حيل احب الزرع وهمين مانسيت الياس
اخذلي ٨ شتلات كبار سطرناهن بالأرضية مال الكشن الورة
ووكف يم مجمع شافة هوسة ماقبل انزل
...ابقي هنا اجيب شي واجي
...خو اروح وياك ؟
...لا هسة اجي
باوعلي بتحذير ...إياج زهراء ارجع الكاج كالبة الموجوة شوفي الهوسة اجيب شغلة ع السريع واجي
هزيت راسي راح ورجعلي بسرعة بإيدة علاكة خلاها بحضني فتحتها بسرعة خضار اسطناعي وركات خضر لايلون بس شكلهن يجنن عبالك صدكي ... شكراً
... شكراً لله حبيبتي
...انت خوش انسان الله يخليك
...هاا هاي من شوكت اني خوش ؟ هذا اعتراف منتزع منج بالقوة المفروض نسجل صوتج
ضحكت بصوت عالي ابتسم
...جاي يصير عندي ضغط ويرجع عليج يعني شنو عبالج اني ما اتعب شنو آلي حتى اكدر اتحمل بس نكول ميخالف هاي الفترة متعبة للكل ولازم ميصير قصور
...ليش هيج انتو مهتمين
...بسبب الحجي ع اهل النجف موحلو هالشي
...منو يحجي ع النجف ؟
...ناس زوار عبالهم من مانفتح بيوتنا قلة كرم مايدرون البيوت بالمدينة القديمة اكبر مساحة ١٠٠ متر وألبقية اغلبها ٤٠ و ٥٠ متر
...يا يعني همة ممنتبهين شون البيوت قديمة وزغار
... لا شمدريهم همة يعرفون هنا بيوت وخلص مايعرفون بالكوة لأمة العائلة العايشة بيها مايدرون بيت كامل مابي بس غرفة وحدة وغرفة استقبال وشي مفتوح ع شي من صغر المساحة
...زين بيوت الاحياء مو يدخلون العالم
...اي يدخلون وفاتحين بيبانهم بس اليوصل لأحياء النجف والامام علي خطوتين علي مايبقى يجي هنا وعبالة هم اكو بيوت مفتوحة
ملت راسي ع الجامة اباوع للخيم المنصوبة
...الخيم هم هواي وبيها كل الخدمات بس متكفي ...اي لأن المساحة كلها مشغولة
...حباب مشتهية قيمة جيبلي بالليل لمن تجي
...بعيوني
باوع للساعة وحسيتة ضاج لأن الوقت تأخر
...نكمل بقية المشتريات ع غير مرة ؟
...اي عادي
...عاجبج اجيبلج شي ؟
...لا شكرا
وكفنا بالفرع واجر ولد عندة عربانة حطينا السنادين ودخلنا بالافرع عن الهوسة
وصلنا يم بيتنا فتحلي الباب كال دخلي وبقة هو والولد يدخلون سنادين
رجعلي وقبل لاياخذ ملابسة يبدل كال
...عندي شغل مهم وعيونج
...اي عادي
باس راسي طلعت اشوف السنادين مخليهن بالهشتي حتى مامدخليهن
دنكت راسي اشتم ريحة ترابهن
استنشقت هوة قوي وزفرتة مرتاحة لوجودهن
تذكرت حذاء ضياء يرادلها مسحة كمت مسحتها ع السريع وخليتها يم باب الغرفة
نقلت السنادين للحوش دخلت للغرفة ديلبس محابسة اخذت الساعة اني لبستهيا وهو يفرح بإي بادرة من عندي ويصورلي اني سويت فد شي عضيم
لبس حذائة وكلي الله لايصغرج يعني لأن ماسحتها الة تبعتة للباب ودعني وراح
ورجعت وحدي احسب الوقت ساعة ساعة
ولمن يدخل المغرب ينقبض گلبي
واحس بشعور موحلو
ماعرف شنو طخ بدماغي اكتشف أكثر جزء اخاف منة بس خلص نويت العزم ادخل "السرداب"
اخذت اللايت بيدي احتياطا خاف تنطفئ الكهرباء وعلكت ضوة المخزن جان لونة اصفر
نزلت الدرجات واحس من كثر رطوبة المكان ممكن اتزحلك واوكع صرت بالباحة وبقيت محتارة منين ابدي
بعدين حسيت عيب يمكن يصير تطفل هذا لمن اعبث بأشياهم ويكولي ضياء ذنب اول شي استأذن منة ولمن يقبل انزل مرة ثانية
قررت اصعد بس من سمعت حاجة طاحت درت وجهي اشوف شنو اتبعت اثر الصوت وشفت لعابة تجي شوية أقصر مني تقريباً طولها ١٤٠ لابسة بدلة
خفت من منضر شعرها الطايح ع الكاع
عدلتها جان وجها حلو بس هيج فاتحة عيونها وكفتها عدل وضليت اباوع حتى كلايد لابسة
وهذا سوار بإيدها مكتوب علي (زينب)
وواضح السوار فضة
عفتها بإستغراب ووكفت كدام مراية تجنن روعة خشب ومملية زغرفات متصلة بالأرض يعني طويلة وبنهايتها مربع وبي فاتية
ردت افتحها بس بعدين كلت لا ماريد ضياء يضوج مني استأذن اول ، طلعت من هالمكان الي اعتبرتة مثل المتحف وكل اشيائة تستهويني
طفيت الضوة ورجعت للغرفة صليت وقريت من القرآن جزء نزعت الجادر وضلت عيني ع الساعة بعد سبع ساعات أو ٨ الا يجي
رحت للفراش تمددت والوقت بالكوة يمر
رحت اغسل البيت واني قبل ساعتين غاسلتة
لو اعيد كوي الملابس حتى التلفزيون الإشارة ضعيفة بي ويكطع منتهي وترني أكثر
استسلمت وقررت اقرة بعض الكتب
وبدون ما احتار رحت قريت الكتاب الي جابة الي سحر الكلمة قريت اول شي مقدمة بعدين مكتوب الجزء الاول
"الاستخدامات العامة للمحادثة"
اول شي بدأ بحديث شريف
"انت سالم ما سكت ، فإذا تكلمت فلك أو عليك"
صفنت هذا حتى الحديث يشجع السكوت جا شبيهم مايردوني ساكتة
بعد قرائة الصفحة الثانية اكتشفت التفسير الصحيح انو لازم من تحجي كلامك صحيح وتتأكد من قوتة ورصانتة بهيج حالة راح يكون الكلام الي مو علية
وبعدها قريت عن حدث بين الامامي الشافعي وشخص غريب أثناء خطبة والناس متجمهرة علي دتسألة رجلة تورمت فماكدر يمدها كدام الرجال الساكت ببالة انو هالساكت الة جلال ومكانة لكن هالرجال لمن حجة وسألة سؤال غبي وبين شكد هو ميعرف ضحك وكال
"آن للشافعي الآن أن يمد ساقه"
يعني عرف هذا الرجال عادي وصمتة مو عضمة لا قلة معرفة وحماقة
حبيت الي دا اقرا واندمجت بالكتاب وصح كلام ضياء يونس ويبدد شعور الوحدة
حسيتة عرف انو اني راح اقرا هالكتاب بسبب طول وحدتي أو جان متأكد لهذا من رجع بيدة كيس جرايد حطهن ع الميز
سألتة بشك واني اعرف انو بالكتاب مذكور حتى ننمي كلامنا لازم نقرأ جرايد
...شنو ذني
حجة وهو يدور وجهة
...ذني جبتهم حتى تمسحين بيهم المرايا اذا تردين مايتعبوج
...خلي اقراهم يمكن يعجبوني بيهم شي حلو
ابتسم عبالة ماشوفة وكلي براحتج
...ضياء
...عيونة
...شفت السرداب دخلتلة
...اي وشفتي بي ؟
بدل وكعد كدامي متربع
...كلشي حلو كلشي بس ما لعبت بيهم كلت اخذ اذنك اول شي لان ميجوز مو شي مالتي حتى اتصرف بي
...عفية عجبتيني الله يبارك بيج
... شكراً
وخرت شعري عن عيوني وكملت
...شفت لعابة بعد ؟ شنو الي عليها وليش موجودة جوة
...هاي لعابة زينب جدي سيد عبد الحميد الله يرحمة سحبها منها
...يا ليش
... لأن جانت بهذاك الوقت ماكو هيج العاب وهاي جابتلهيا خالتي لمن سافرت زينب طلبت لعابة ، لكن جدي من شافها ماقبل لأن كإنها بشر ك طول وملامح وجه
...يا هي لعابة واذا
...باوعي جدي الله يرحمة جان واصل درجة جبيرة بالعلم وأكو لمن يوصلون مرحلتة يصير عدهم ابسط شي ممكن علي اشكال
يعني اني اكلج الألعاب المجسمة مثل البشر فعلا عليها إشكالات
...ليش
...هاي اللعبة تتصمم قبل لتكوين مجسمها والرسول (ص) ذكر بقول (إن أصحاب هذه الصور يعذبون يوم القيامة، ويقال لهم: أحيوا ما خلقتم)
يعني شوفي رب العالمين يحاسب ع مجرد رسمة مجسمة كإنها فعلية اذا راح يحاسب ع مجسم ملموس ، يعني تركها أحوط ، ولهالسبب انأخذت اللعبة وانضمت بالسرداب ماكدر جدي يتلفها خوفاً ع مشاعر زينب كاللها لمن تكبرين طلعيها
زين والميز الخشب بي مرايا طويلة حلو هذا مالتمن ...هذي مال الوالد عجبتج؟
...اي حرامات عبالي مالتك واخليها فوك بالكعدة
...نستااذن منة وناخذها مو مشكلة
...زين عادي باجر انزل اشوف الاغراض البي
...عادي بس انتبهي مو كلشي النة يعني اكو اشياء لعمامي لأولادهم اشياء لجدي
...ماشي إن شاء الله
ثاني يوم العصر واني كاعدة وحدي اباوع تلفزيون اتصل ضياء كلي حضري البيت يعني اعزلة اذا يحتاج واسوي جاي
ملحكت حتى أسألة منو لأن جان مستعجل
مجان البيت يحتاج تنضيف رحت سويت جاي وحضرت فواكه
تحرك الباب عرفت ضياء اجة
طلعت استقبلة شلت الجنطة من أيدة وسألتة
...منو جاينة
...أهلي
مشة كدامي واني مستمرة أسأل وكف راسي نركع بضهرة ...انطي صبر يا روحي انطي صبر
...ها ليش جايين
...يعني أكللهم ليش جايين يصير ؟
...لا قصدي اهلا وسهلا بيهم
...اي عفية
بدل واني هم غيرت ملابسي لبيتيات مريحات
اندك باب البيت راح يفتحة دخلو البنات وعمتي وام تقي استقبلتهم ومن وصلت لعمتي باستني وكالت بشقة ...ها يالكاطعة عاش من شافج
حضنتها وحجيت بثقة مثل الكتاب منبقة خجلانين ومدنكين راسنة لو نحرك عيونة هواي المفروض تباوع بعين الي تحجي ويا
...لا والله بس ردت ابقة بالبيت لا كل يومية بمكان حتى اتعود علي
...حقج حبيبتي بس هاي تعليمات ضياء مو
...لا هو معلي اني ردت ابقة إن شاء الله منا وجاي ما اطول عليكم
دخلتهم الأستقبال ورحت اجيب ألمي قدمتة وكعدت يمهم راحو البنات يبدلون وافتهمت جايين علمود باجر الزيارة ويروحن ب ٤ الفجر يزورن الامام علي (ع)
كالت خولة وهي تباوع للبيت
... والله بيت جدي يختلف عن كل مكان وارتاح بي لأن بيت الطفولة ورجعت تباوعلي
حسيت دتكول هذا مو بيتج هذا بيتنا كلنا والنا الحق بي
بعدها علقت ع تغيير اشياء بالبيت كلتلي
...لا زهوري لو مخليتهن مثل قبل
...صح حتى اني احب بيتنا وماحب يتغير بس اكو اشياء لمن وخرتها خليتها بالسرداب مذبيت شي أصلا ضياء ميقبل يحبهم
بس بما اني بي احب اجدد الحاجات الي احسها عتكت
سكتت دخل ضياء نبهني اجيب الجاي راح عن بالي اريد اكوم واجت زينب بيدها الصينية والكعك خلتهن وشكرت الأستكانات
باوعت لضياء خاف ضاج من عندي لأن نسيت بس مبين عادي وابتسملي
بس شربت الجاي كمت اسوي العشة ولازم كلة اسوي اني ويكون طيب طبخت مطبك دجاج ووصيت ضياء ع روبة وأشياء ثانية بعدها حسيت لازم اسوي شي ثاني ف سويت مركة بيذنجان ووياها شجر قطع دائرية يطلع حيل طيب وفوكاهن لحم مسحت وجهي من التعب دخل ضياء باوعلي بحنية ...ها حبيبتي تعبتي
...لا بس احس بعد اسوي شوربة احسن
...ماكو داعي اكلج مناقصة شي عاشت ايدج
كعد يمي ع الطبلة يسوي زلاطة
دنكت حضنتة بست خدة وحجيت بحب
...الله يخليك الي
...ويخليج الي زهرائي
...اصب هسة ؟
...غير اخلص الزلاطة اول لو شنو ؟
...لا قصدي امد السفرة انقل فواكة وهيج
...براحتج
...شتكول اخذ الببسي هسة لو ورة الأكل
....لا بعد الاكل افضل وصيحي فاطمة والبنات ينقلن الاكل وياج حتى ميبرد الاكل بينما تصبين
صحتلهن وهو أخير شي يثرم اللهانة البنفسجية وحط شوية رمان وليمون
اخذت المواعين سفطتهن البنات وياي وأخير شي اني ويا نقلنا الزلاطة والخضرة
كعدت بصفة اول ما اكل كال عاشت ايدج
وبعدها تبعو عمتي والبنات اطمنت لمن شفت طعم الأكل طيب ولاحضت ضياء عينة ع ساعة خلص قبلنا وكام ردت اروح وراه ماقبل كال ابقي تعشي وهمس بصوت ناصي عيب تكومين من السفرة وتخليهم وحدهم
رجعت اكل وعيني ع الشباك لمن طلع من الغرفة مبدل ماضجت مثل كل مرة لأن مراح ابقة وحدي همة يمي
اجة كال مع السلامه رايح للموكب وطلع
من خلصنا العشة غسلنا المواعين سوة وسوينا جاي البنات توسلن لعمتي تاخذهن هسة للصحن وهي ترفض لأن هواي ناس
بعدها وافقت تطلعهن وكلتلي تعالي ويانة
رحت خابرت ضياء ماقبل وكال
...لا ماكو طلعة بعدين اخذج
...ليش ؟
...مشغول هسة وما اسمع صوتج عدل بس لاتطلعين
اخذت نفس عميق ولمن مابدلت وقت الطلعة كلتلهن ...عندي تنضيف البيت وملابس كومة محتاجة غسل اذا طلعتو الفجر اروح وياكم
محبن يضغطن علية كالن براحتج
هيج نص ساعة ورجع يخابر ضياء نطيتة رفض وغلقت الموبايل
رحت للحمام واحب ريحتة لأن قديم ريحة التراب احساسها غريب طلعت لبست ثوب جوة الركبة كلوش وجواه ستريج مشطت شعري وكعدت اقرا الكتاب
ص ٢٧ وبيها اتعلم شون ابدي محادثة
ويمكن هالشي مشكلتي الحقيقة
بعدها عرفت اني تاركة انطباع اول يمهم وهو الي يدوم غالباً واعرف انو انطباعي الاول مجان ايجابي بس تذكرت كلام ضياء
...لتقرين الكتاب لخاطر ترضين ناس أو بسبب تفكيرج بيهم اقري بحافز تطوير الذات وحبج لنفسج واكتمال صورتج
قريت لحد الاكتفاء وشوكت ما حسيت نفسي ضجت اتركة بسرعة حتى لا اكره الكتاب
عفت كلشي ونزلت للسرداب ضليت ادور بالأماكن الي مالحكت اوصللها وأحاول أنكر شعوري بالغضب من ضياء حتى مينطي فرصة يقنعني بطريقة متخليني اضوج
سمعت صوتة فوك صعدت الدرج ووكفت بالحوش ...حتى بالليل جوة المكان بارد واضلم
...عاجبني انزل ما اخاف من شي اني
حجة مستهزء وبعدها وبخني
...اي بطلة ، المهم ليش اخابر متردين رجعت عبالي صاير وياج شي شوكت تبطلين هالطبع
...مصاير شي خلص طمن
درت وجهي وردت ارجع لزم ايدي قوي
...لاتطيني ضهرج واني جاي احجي وياج أني زوجج مو اخوج الزغير
وخرت أيدة ومنتضرتة يحجي
خزرني وكال فوتي جيبي موبايلج وتعاي
رحت جبتة خليتة بإيدة فتحة وخلا بإيدي
حجة بتحذير
...اريد اتصل وما تجاوبيني
طلع من البيت ضليت اتنفس بسرعة
وبعدها ركضت الثلاجة فتحتها وطلعت بطل ببسي وكلاص كعدت بالكاع وضليت اشرب خلصت بطل ابو ٧٥٠ تمددت ع ضهري من الم بطني
...اخ بطني اخ
كعدت وانتجيت ع الثلاجة شبية ركضت ع الببسي فوك الضوجة ألم
لبست بلوز ابو الركبة حسيت بالنعاس القوي بس بقيت كاعدة عيب اتصل ضياء وادري بي يريد يشوف اعاندة لو لا
رديت علي سألني ...اجو لو بعدهم
...لا لسة
...شبي صوتج
...مابي شي
...يلة في أمان الله
...الله وياك
سديت الموبايل وأخذت حباية مسكن
رجعو تقريباً ب ١١ ونص فتحت الباب مبتسمة
وفارشتلهم بالأستقبال والغرفة عمتي جايبتلي وياها داطلي عسولات وشبشب ابو الدبدوب لأن البنات مشتريات منة
اعرف عمتي عدها فقرات ومتكدر تنام ع الأرض ف حتى بالموكب حاطيلها جرباية
بالكوة قبلت تنام ع جربايتنة
نامت يمها غفران ومريم وأطفالهم واني والبقية بالأستقبال كلت عادي ضياء ينام يم أمة بقيت منتضرتة لل ٢ كلها نامت واني كاعدة ع الدجة بس اجة وكفت ادلي وين ينام
حتى اني هم انام ميتة نعس
من شافني استغرب كلي وجهج اصفر
...يمكن لأن نعست
...ليش مانمتي؟
...بس ردت أكولك حتى تندل وين تنام
مكانك ع الجرباية يم عمتي
استغرب فركت عيوني بتعب
...ها اروح انام هسة ؟
...روحي جيبلي فراش افرشة بالمكتبة
...هناك تنام ليش؟
...ماترهم حبيبتي هسة جيبي فراش وبطانية والمخدة مالتي وتعاي
جبتلهيا بسرعة فرشتنهن وسألتة اذا يريد شي
باس خدي وكال هذهو عاشت ايدج روحي نامي
رحت بسرعة غفيت من التعب الصبح تأخرت وكعدت ع صوتهم بالبيت الفراشات مشيولة وبس فراشي باقي فزيت فتحت الباب الحوش مغسول وكدور ع النار الساعة ٩ ونص
صبحت عليهم واعتذرت لأن تأخرت بالكعدة
عمتي كلتلي وجهج اصفر شبيج
...ماعرف يمكن استبراد
غسلت وجهي اصفر وعيوني مورمة
أصرت عمتي حتى اتريك بعدها نطتني أدوية وخلتهن يمي
ماطولو هواي بس تغدو خابرت عمتي حتى يجي احد يرجعهم للبيت اجة سيد احمد أخذهم وراحو
ضليت وحدي شربت أدوية واحس احسن من البارحة جنت هواي متأذية بس اني طبعي اتحمل الألم والمرض يعني ما اوكع بسهولة
العصر اندكت باب البيت كلت منو بصوت ناصي وحجت مرية ...اني خالة جارتكم بيت ام مقداد هذا ثواب لروح النبي
لبست عبايتي ووكفت ورة الباب بس مديت ايدي كلتلها ... إن شاء الله واصل خالة
اخذت السفري تمن وقيمة حاارة وذاك الطبخ الممتاز ويا فجل وبطل لبن
وكعدت اكل طيرت الماعون حتى ماخليت لضياء اصلا مانتبهت الا واني مخلصتة
صحصحت شربت اللبن رجعتلي الطاقة الساعة جانت ٦ ونص ف طبخت شوربة بس استوت اذن صليت وقتت الموبايل ب ٩ ونمت
اول مادك لمنبه كعدت غسلت وجهي وعيني ع الساعة دقيقة دقيقة تمر واني وحدي صارت ب ١٢ ونص حسيت روحي طكت
لمن اجة ب ٢ جان الغضب مشتد بية
رغم هو كلي بدلي اوديج تزورين ماهتميت
وحجيت بتهديد
... والله يا ضياء والله ما ابقالك اني بشر مو مخليني وحدي من ال ٧ الصبح ل ٢ بالليل وعود تجي ساعتين بالغدة
اني اروح لأبوية اشوف يقبل بنتة ببيت وحدها طول اليوم اصلا منوو يقبل ؟؟؟
ضرب ع الميز بقوة ابتعدت عنة
...صووتج نصي
كلتلج لحد زيارة النبي اصبري بس انتي وين لا كلشي ولا الصبر شسويلج يعني كلتلج بهالموكب اني من عمري ١٩ اعوفهم ؟ اشو كلهم متزوجين وكلهم جاي يجون شنو الاختلف وياج
...اي همة زوجاتهم عايشات وي عوائل مو مثلي وحدي
... عموماً هو اليوم الزيارة وكلشي انتهى سدي الموضوع اريد انام
عفتة ورحت وحدي للأستقبال ابجي قفلت الباب حتى ليحاول يدخل
نص ساعة ودك الباب ماجاوبتة
...فتحي الباب
...مافتحة عوفني الله يخليك
...فتحي بس احجي وياج
...عوفني عوفني بروح امك
...وروح امي ماعوفج فتحي الباب
فتحتة ورجعت لمكاني اجة كعد يمي لميت رجلية وابتعدت عنة ضل ساكت لحد ما دكت ٣:٣٥ مد أيدة لشعري بعدتها
...جان هذا آخر يوم والموكب لو بي خيمة للنساء جان اخذتج وياي بس وين اخليج واحنة بس نطبخ ونوزع اكل بالشارع وخيمة وحدة للرجال ، عددهم قليل يادوب نلحك للشغل يعني من اعوفهم وهمة قليلين ماترهم
درت وجهي باس راسي ويمشي أيدة ع شعري
...شتردين اكول حتى تسكتين
...لتكول شي أصلا هواي كلت وانت مو مهتم أصلا
ضل كاعد لمن حس ماكو نتيجة وراها تمدد وباقية بطانية تغطة بيها وبالكوة فاتح عيونة بسرعة غفة وشكلة تعبان
شوية وهم دخت تغطيت ويا ونمت
الصبح كعدني مسويلي ريوك ومرايح للحوزة غسلت وكعدت اتريك بعيد عنة نطاني وردة جورية باوعت للسندانة لكيت الوردة الوحيدة الي بيها مشلوعة
حجيت بحزن واني اباوعلة
...ليش هيج ليش حتى هنا الوحيدات الي وياي والي يسمعني وأغلب اليوم وياهن تريد تحرمني منهن وتموتهن
كمت عن الريوك صاح بية
...تعاي تريكي بسرعةة
كلتلة بتلكؤ ...ماريد مو جوعانة
...رجعي !!
رجعت متضايقة تريكت بالكوة كلي كومي بدلي ...وين
...نوصل وتعرفين
هم بدلت شفتة اخذ فايلات ولبس مدني
طلعت ويا ركبت بالسيارة وساق ماعرف وين
دخلنا لشوارع گلي ...هذا حي الأ....
...اي وشعلية
...احجي عدل
...بعد حتى ما احجي هيج احسن
كال استغفر الله وسكت
وكفنا كدام مدرسة مكتوب
"مدرسة ال.... المتوسطة المسائية للبنات"
حسيت گلبي يدك بسرعة واحس نفسي ممصدكة باوعتلة بعدم تصديق نزل قبلي وفتحلي الباب
نزلت وحتى ماعرف شنو أحجي هو نزلي البوشية رفعتها ...خلي اشوف خلي اشوف
دخل واني لازمة أيدة
والمديرة اول ماشافتة عرفتة وكلتلة
...تأخرت هواي سيد مو ع أساس من ذاك الأسبوع تداوم واني وافقت لأن ادري الركضة ورة المعاملة تاخذلها اسبوعين
حجة وياها واني بس اباوع لكل شبر بفرح
بس لمن كلتلة ...خلي لتختلط بالبنات افضل
حسيت انو راح يبقيني ضياء وحدي وبس يصير عندي صديقات يبطلني أو ميخليني اداوم
كلتلة خلي تاخذ فرة وتشوف المدرسة ع ما
نكمل أجرائات لزم ايدي وهمس
...روحي بس لاتختلطين بأحد
هزيت راسي اي وطلعت من الأدارة للساحة
هيج عبالك عندي جناحات من الفرح
واريد اشوف شنو وليش يكولون لاتختلطين
واول لقاء الي بالطالبات انصدمت
واني أشوفهن نسوان كبار والأغلبية ميشات وحتى مكياج ماحبيت المنضر
جان ببالي شرطان بيض وأحذية رياضية وبرائة الي ضنيتها
بعدني اباوع مستغربة وانضربت ع كتفي
باوعت وراي بنية يجي عمرها ٢٥ هيج شي
كلتلي بإستهزاء
...ها يا المبركعة شجابج لهنا ؟
مدتلي أيدها تسلم مديت ايدي لأن عيب ما ارد السلام كلتلي ...تصيرين صديقتي
ضليت اباوع بوجها وممرتاحة
جرت ايدي وكالت
...سكتي يعني راضية تعاي دليني ياصف انتي اشوفلج مكان زين وهسة استلملج كتب
................................يتبع
⁴⁰¹⁷
بنات هذا الجبل قديماً من جهة الحويش
وهذا السور الي داير مداير المدينة هو سور النجف وحالياً هالسور مالة وجود فقط اثارة القليلة من جهة الحويش ومن جهة شارع السدير ، لون ترابة كان احمر
أما حديثاً ف الجبل قصو وصار ناصي وزغير
يعني حتى يناسب التقدم العمراني وهذا شكلة الحالي